Berriz ere, Salburuko hezegunetik ibilaldi polit bat egin dugu oreinen marrualdiaz gozatzeko asmoz. Egun honetan, P. Ignacio Barrutia-ko ikasleekin batera.
Gaur goizean, behe lainoa Salburuan nagusi zen eta orein talde handiak ikusi ez ditugun arren, primeran pasa dugu hezegunea inguratzen dituzten landareak behatuz, Zabalganako ikaslegoarrekin batera.
Udari agur esanez, bagoaz pixkanaka udazkenean sartzen. Zerua estalita esnatu gara, tarteka euri-tantak bota dituelarik, baina ez igandero bezala “Los fresnos” behatokira joan eta asteroko errolda ornitologikoa egitea galarazteko neurrian.
Zangaluzeak dira, orain ere, hezegunean espezie ugarienak; izan ere, ur-maila baxua delarik, errazago lortzen dute elikagaia. Besteak beste, 5 koartza hauskara eta 3 zikoina zuri ikusi ditugu.
Horiez gain, 9 basahate, 5 kaio hankahori eta uroilo arrunt bat zenbatu ditugu.
Nabarmendu nahi dugu ikusi ditugula, baita, 3 borrokalari, eta istingor eta uroilanda handi ale bana.
