Prentsa Oharren banner

Gasteizko Green Deal-en aholku-batzorde zientifikoaren sorrera iragarri du alkateak

 

Gasteizko alkateak udal politikari buruzko eztabaida orokorraren bigarren saioan iragarri duenez, batzorde zientifiko bat sortuko da Gasteizko Green Deal-en jarduerak gidatzeko. Hiriaren etorkizunaren aldeko ituna da hori, eta ekonomia berdean, kohesio sozialean eta ingurune naturalaren babesean oinarritzen da. Esparru akademikoan ospe handia duten bost pertsonak osatuko dute aholkularitza zientifikorako batzordea, eta ekimen pilotu berritzaileak garatzea planteatuko dute Gasteiz Green Deal osatzen duten ekonomia berderanzko eraldaketa-eremuetan.

Gasteizko Green Deal-en aholku-batzorde zientifikoa uztailean hasiko da lanean, eta honako hauek osatuko dute:

  • Miren Artaraz. Eusko Jaurlaritzako Unibertsitate Politika eta Koordinazioko zuzendaria da egun. Ekonomian doktore da EHUn, eta hainbat ardura-postu bete ditu Gasteizko Enpresa Ikasketen Unibertsitate Eskolan, non irakasle eta ikertzaile aritu baitzen 1997tik 2017ra bitartean. 2011n Emakume Zuzendariaren saria jaso zuen, AMPEA Arabako emakume profesional eta enpresarien elkarteak ematen duena.
  • Gorka Orive. EHUko Farmazia Fakultateko irakaslea da. Botiken jariatzean eta medikuntza birsortzailean aditua, Geroa Diagnostics bioteknologia-konpainiaren sortzailea da, zeina Alzheimerraren tratamenduan espezializatuta baitago CIBER-BBN Espainiako Ikerketa Sarean zientzialari aktibo gisa parte hartzen du, eta Singapore Eye Research Institute-ko irakasle adjuntua. 64ko H indizea dauka, nazioarteko 300 argitalpen zientifiko eta 16000 aipamen. Lau liburu argitaratu ditu, beste lau patente, eta nazioarteko 500 konferentziatan baino gehiagotan parte hartu du.
  • . Nuria Gisbert. CIC Energiguneko manager orokorra da; energiaren biltegiratzea ikertzeko Europako erreferentzia-zentroa da hori. EHUko doktoregoa du Enpresa Zuzendaritzan, Ezagutza eta Berrikuntzan (2018). Industria Ingeniaritzan lizentziaduna da (2000). Innobasqueko Zuzendaritza Batzordean eta Zientzia eta Teknologiako Euskal Kontseiluko Aholkularitza Batzorde Zientifikoan parte hartzen du. 20 urtetik gorako esperientzia du, batez ere energiaren sektoreari lotuta, enpresa pribatuetan eta ikerketa-zentroetan.
  • Mª Ángeles García Fidalgo. Bioaraba Osasun Ikerketako Institutuko zuzendari zientifikoa da. Osakidetzari estuki lotutako ibilbide profesional luzea du, 1994tik. Ikertzaile gisa, nabarmendu behar da hainbat proiektutan parte hartu duela, esaterako, irudi bidez gidatutako biopsian, zeinari esker Massachussetseko MITen saria jaso baitzuen 2017an, besteak beste.
  • Unai Pascual. Ikerbasque BC3 Klima Aldaketarako Euskal Zentroko ikerketa-irakaslea da. Yorkeko Unibertsitateko (Erresuma Batua) Ingurumen Ekonomiako doktoregoa du. 2001 eta 2013 artean irakasle izan zen Cambridge eta Manchesterreko unibertsitateetan. NBEk babestutako IPBES plataformaren aditu-taldeko kidea da; giza garapenean, biodibertsitatean eta garapen jasangarrian lan egiten du plataforma horrek. Future Earth-eko zuzendaritza zientifikoko hainbat batzordetako kide ere bada, hala nola Lurren eta Ekozerbitzuen Programa Globaleko kide.

“Azken hilabeteetan agerian geratu da zientziak gure bizitzan duen garrantzia. Ikerketa eta ezagutzaren sorrera funtsezkoak dira gure osasunerako, baina baita gure etorkizunerako ere. Gure hiriaren etorkizunaren aldeko apustu hori arlo zientifikoan ospe ukaezina duten emakume eta gizon gasteiztarrek gidatutako apustu bat izatea nahi dugu. Ekonomiaren, osasunaren, ingurumenaren edo energiaren alorreko pertsona horiek gure hiria nazioarteko beste proiektu batzuekin lotuko duen aholku-batzordea osatuko dute, ideiak eta ezagutza Gasteizera erakartzeko “, adierazi du Gorka Urtaran alkateak.

Alkateak ekimen hori Gasteizen inoiz ikusi gabea dela azpimarratu du, kudeaketa publikoak eta ikerketa zientifikoak bat egiten duten gune bat eratuko baita helburu partekatu batekin: etorkizuneko hiriaren zumeak jartzea.

2019ko abenduan, Gorka Urtaranek Green Deal aurkezteko aukera izan zuen COP25en, Nazio Batuen Erakundeak antolatutako Klimaren Goi Bileran, eta proposamen hori AEBetako presidenteorde ohi Al Gorerekin partekatu zuen.

Share

Alkateak ´Vitoria-Gasteiz Green Deal´plana partekatu du Al Gorerekin

Gorka Urtaranek plana jasotzen duen agiria eman dio, zeina ekonomia berdean, gizarte kohesioan eta natur ingurunearen babesean oinarritzen baita

 

Gasteizko alkate Gorka Urtaran Madrilen izan da gaur, Klima aldaketari buruzko Gailurrean Estatu Batuetako lehendakariorde ohi eta 2007ko Bakearen Nobel sari Al Gorek “Konpon dezagun elkarrekin krisi klimatikoa” izenburupean eskaini duen hitzaldian; abenduaren 13ra arte iraungo du biltzarrak. Bide batez, Urtaranek “Vitoria-Gasteiz Green Deal” plana partekatu du Gorerekin. Oinarriak azaltzeaz gain, Nazio Batuek antolaturik egiten ari den COP25aren inaugurazioan aurkeztu zuen agiriaren ale bat eman dio.

 

 

The Climate Reality Proyect-ek —Al Gorek klima aldaketaren kontra sustatutako ekimena— eta Tierra Pura fundazioak antolatuta dute hitzaldia, krisi klimatikoak espainiar estatuan izango dituen ondorioak eta maila globalean ezar daitezkeen irtenbideak hizpide hartuta. Ekimen horiek zuzenean ezagutzeko asmoz joan da alkatea, Gasteizen garatzen ari diren eta gerora egin daitezkeen ekintzetan txertatzerik bada ere.

 

Bide batez, Gorka Urtaranek solasalditxo bat izan du Al Gorerekin, eta “Vitoria-Gasteiz Green Deal” planaren ale bat eman dio; hiriaren etorkizunerako plana ekonomia berdean, gizarte kohesioan eta natur ingurunearen babesean oinarritzen da.

 

“Gure ahaleginak hiri berdetik ekonomia berdera igarotzera zuzentzen ari gara. Vitoria-Gasteiz Green Deal planak hori lortzeko garatzen ditugun ekimenak bideratuko ditu. Planetak dituen erronkei aurre egiteko irtenbideak erakartzea da asmoa, gure hirian lekua izan bailezakete”, azaldu du alkateak. Hiriaren eredu ekonomiko eta sozial berrirako trantsizio “berdea”.

 

Hitzaldia amaitzean, Al Gorek eta alkateak minutu batzuetako elkarrizketa izan dute, eta alkateak txostena eman dio Al Goreri. Ameriketako Estatu Batuetako presidenteorde ohiak “Vitoria-Gasteiz Green Deal” dokumentuarekiko interesa agertu du, eta esan du interesez irakurriko duela, proiektu berri honetan hiriari zortea opa izateaz gain.

 

Share

Gasteiz nabarmendu egin da Klimaren Gailurraren inaugurazio-jardunaldian, ingurumenaren alorreko lorpenengatik eta datozen urteetarako “Green Deal” planagatik

Alkateak hiriaren ibilbidea eta ekonomia berdea, gizarte kohesioa eta natur ingurunearen babesa sendotzeko planaren gakoak azaldu ditu Madrilen

Audioa: alkate Gorka Urtaran

Gasteizek COP 25-Klimaren Gailurraren inaugurazio-jardunaldian parte hartu du gaur; Madrilen egiten ari da gailurra, hilaren 13ra arte. Klima aldaketak dakartzan arriskuei aurre egiteko akordioak lortu nahi dira nazioarteko biltzar horretan. Gasteizko alkate Gorka Urtaranek hiriak ingurumenaren alorrean egindako bidea azaldu du, baita datozen urteetarako “Green Deal” plana ere. Euskadiko hiriburuak entzuleak harritu ditu ingurumenaren alorreko lorpenengatik eta datozen urteetan ekonomia berdea, gizarte kohesioa eta natur ingurunearen babesa sendotzeko taxutu duen planarengatik.

Urtaranek “Hiri iraunkorrak eta erresilienteak” izeneko mahai-inguruan hartu du parte, Gailurreko eremu ofizialean, eta solasaldian parte hartzen zuen hiri bakarra izanik, Gasteizi erreparatu diote. Hauek izan dira bertan alkateaz gain: Álvaro Rodríguez, The Climate Reality Project-en Espainiako koordinatzaile nagusia (Al Goreren fundazioa da hori, zeinak Gasteiz gonbidatu baitu ekitaldira, FEMPekin batera); Hanno Schoklistch, Kaiserwetter Energy-ren CEOa; Ignacio Chanzá, Climate KIC Comunidad Europea de Innovación y Conocimiento-ko Berrikuntza arduraduna ; David Bartolomé, ShareNow-eko Garapen zuzendaria, eta Ignacio Colmenares, ENCE Energía-ko zuzendari betearazlea.

Gasteizko agintariak “Vitoria-Gasteiz Green Deal” deritzon plana azaldu du,hiriaren etorkizunera plan abiarazi berria, zeina ekonomia berdean, gizarte kohesioan eta natur ingurunearen babesean oinarritzen baita. Hiriak klima aldaketaren erronkari egokitzea solasaldiaren hizpide nagusitzat hartuta, alkateak azaldu du hiria dagoeneko lanean hasia dela “hiri berdea izatetik—mundu mailan halakotzat aitortua— ekonomia berdera igarotzeko“. Horretarako, zenbait ekimen bideratuko dira, “gara litezkeen nazioarteko irtenbideak erakartzeko gure hirira, erakundeen, enpresen eta ikerkuntza zentroen arteko lankidetzaren bitartez“. “Gure hiria —alkatearen hitzetan— laborategi bikaina da ekonomia berderantz bideratutako esperientziak egiteko“.

Hain zuzen ere, Estatu Batuetako biltzarkide gazteen Alexandria Ocasio-Cortez-ek urte hasieran “Green New Deal” izeneko proposamena argitaratu zuelarik urratutako bideari jarraitzen dio: klima aldaketaren kontrako eta eraldaketa ekonomikorako plan handinahi bat, zeina erreferente bihurtu baita mundu osoan. Horren haritik, Europako Batzordeko presidente Ursula Von Der Leyen-ek “European Green Deal” bat aurkeztea proposatu du; hura ere gailurrean dago.

Klima aldaketa eta haren ondorioak begi bistakoak dira. “Hori dela eta, funtsezkoa da prestutasunez eta lasaitasunez jardutea. Vitoria-Gasteiz Green Deal gure hiriaren aldeko itun bat da, hurrengo belaunaldien etorkizunaren aldekoa, baita planetaren aldekoa ere“, adierazi du Urtaranek Nazio Batuen Gailurrean. “Gure bizi-kalitate handia sendotzea eta etorkizun ekonomiko eta sozial sendo eta bideragarri baten oinarriak finkatzea da helburua, akordio zabal eta plural baten bidez, ikuspegi askotarikoak eta osagarriak bilduko dituena“, azpimarratu du alkateak.

Plana era guztietako entitate eta gizarte eragilerekin eztabaidatu eta aberastuko da, eta oinarri hauek ditu: mugikortasun iraunkorra (zeinean berebiziko zeregina baitute oinezko eta bizikleta bidezko mugikortasunak, superetxadiek, autobus elektriko adimentsuak, tranbiak eta Mobility lab-ek), hiri azpiegitura berdeak, hiriaren izaera industriala, logistika (abiadura handiko trena eta Jundizko garapen logistikoa lehen lerroan direla) eta zerbitzu publikoen hobekuntza. Beti ere, garapen ekonomiko iraunkorra, gizarte kohesioa eta ingurumen iraunkortasuna gidari direla. Horren guztiaren bitartez, helburu hauek lortu nahi dira: negutegi efektuko gasen isurketa gutxitzea; kalitateko enplegu berriak sortzea; ekintzailetza eta berrikuntza teknologikoa bultzatzea; ekonomia berderanzko trantsizioa; hirian konexio handiagoa izatea ahalbidetuko duten azpiegiturak; trantsizio energetikoa, energia jasangarriak sustatuz; balio eta kultura “berdea” hedatzea; gizarte kohesioa indartzea, eta auzoen arteko oreka.

Lehenengo esku-hartze horretaz gain, Gorka Urtaran COP25 biltzarreko beste bi ekitalditan izango da. Abenduaren 7an (larunbata), hiri iberoamerikarren foroan hartuko du parte, espainiar estatuko eta Latinoamerikako beste alkate batzuekin batera; abenduaren 10ean, berriz, Estatu Batuetako lehendakariorde ohi Al Gorek emango duen hitzaldian; 2007an Bakearen Nobel saria eman zioten hari, klima aldaketaren kontrako aktibismoagatik. Alkateorde eta Lurraldearen eta Klimaren aldeko Ekintzaren zinegotzi  Ana Oregik ere hartuko du parte Nazio Batuek antolatutako Klimaren Gailurrean, zeinean ingurumenaren arloko 25.000 aditu eta aktibista biltzea aurreikusi baita.

 

 

 

 

 

 

Share

Alkateak “Vitoria-Gasteiz Green Deal” plana aurkeztuko du Klimaren Gailurrean, Al Goreren fundazioak gonbidatutik

 

Vitoria-Gasteiz Green Deal plana aurkeztu du alkate Gorka Urtaranek

Urtaran mahai-inguru baten protagonista izango da, eta bertan azalduko du hiriaren etorkizunerako plan hori, zeina ekonomia berdean, gizarte kohesioan eta natur ingurunearen babesean oinarritzen baita

Orobat, hiri iberoamerikarren foroan hartuko du parte, espainiar estatuko eta Latinoamerikako beste alkate batzuekin batera, eta Estatu Batuetako lehendakariorde ohiak emango duen hitzaldian

 

Audioa: alkate Gorka Urtaran

VG GREEN DEAL dokumentua

Gasteizko alkate Gorka Urtaranek COP25 Klimaren Gailurraren zenbait jardunalditan hartuko du parte; abenduaren 2tik 13ra arte iraungo du horrek. Irekiera-egunean, mahai-inguru batean parte hartuko du, Estatu Batuetako lehendakariorde ohi Al Goreren fundazioak gonbidaturik. “Vitoria-Gasteiz Green Deal” plana azalduko du foro horretan hiriaren etorkizunera plana, zeina ekonomia berdean, gizarte kohesioan eta natur ingurunearen babesean oinarritzen baita. Ondorengo egunetan, hiri iberoamerikarretako alkateen foroan hartuko du parte, baita Gorek hautatutako entzuleen aurrean emango duen hitzaldian ere.

Gaur goizean aurkeztu du alkateak “Vitoria-Gasteiz Green Deal” plan sortu berria, Salburuko hezeguneak interpretatzeko Ataria zentroan. Datorren astelehenean, aldiz, ordezkari publiko eta pribatuekiko mahai-inguru batean partekatuko du, Nazio Batuek Madrilen antolatutako Klimaren Gailurreko eremu ofizialean (eremu urdina).

Al Gorek sortutako The Climate Reality Project irabazi-asmorik gabeko entitateak antolatu du solasaldia, eta Gasteizko esperientzia izango da aztergai nagusia. Izan ere, fundazio horri arreta eman dio gure hirak ingurumenaren kontserbazioan urratutako bideak, garapen iraunkorraren alorrean nazioarteko erreferente bihurtu baikaitu; orobat, klima aldaketaren kontra abian jarritako ekintzei erreparatu diete, eta “Vitoria-Gasteiz Green Deal” planaren bidez ingurumenarekin, ekonomiarekin eta gizarte politikekin lotutako alderdietan egiten den apustuari. Hiriak klima aldaketaren erronkari egokitzea izango da solasaldiaren hizpide nagusia.

“Dagoeneko lanean hasiak gara, hiri berdetik —joan den irailean mundu mailan halakotzat aitortu gintuzten, Etiopian— ekonomia berdera igarotzeko. Eta proposatzen dudan planak hori lortzeko garatzen ditugun ekimenak bideratuko ditu. Planetak dituen erronkei aurre egiteko irtenbide eta ekimenak erakartzeko plana da, gure hirian garatu daitezen”, azaldu du alkateak. Gorka Urtaranek azpimarratu du oso garrantzitsua dela “VG Green Deal” nazioarteko foro goren horretan aurkeztea, itunaren zutabeetako bat sinbolizatzen duten ordezkariak bildu baitira mahaian: erakundeen, enpresen eta ikerkuntza zentroen arteko lankidetza.

Udal agintariak Euskadiko hiriburuaren hiri-eredua plazaratuko du, eta gaur ezagutarazi duen planaren abiatzea. Hain zuzen ere, Estatu Batuetako biltzarkide gazteen Alexandria Ocasio-Cortez-ek 2019ko otsailean “Green New Deal” izeneko proposamena argitaratu zuelarik urratutako bideari jarraitzen dio: klima aldaketaren kontrako eta eraldaketa ekonomikorako plan handinahi bat, zein mundu osoko pertsona eta erakunde askorentzat erreferente bihurtu baita. Horren haritik, Europako Batzordeko presidente Ursula Von Der Leyenek “European Green Deal” bat aurkeztea proposatu du. Gasteizko lanak ere ildo horri jarraitu nahi dio.

“Klima-aldaketaren ekonomia, ingurumen eta gizarte ondorioak begi bistakoak dira. Lasaitasunez baina irmotasunez lan egiteko unea da, elkarrizketa eta adostasuna baliatuz. Hiriaren aldeko itun bat da Gasteiz Green Deal, hurrengo belaunaldien etorkizunaren aldekoa, baita planetaren aldeko ituna ere. Gure bizi-kalitate handia sendotzeko eta etorkizun ekonomiko eta sozial sendo eta bideragarri baten oinarriak finkatzeko plan bat, akordio zabal eta plurala, ikuspegi askotarikoak baina osagarriak biltzea helburu duena“, adierazi du.

Vitoria-Gasteiz Green Deal plana aurkeztu du alkate Gorka Urtaranek

Beharrezkoa izango den transformazioa prestatzeko Gasteizen gara litezkeen ekintzen bidez gauzatuko da plana, eta horietako batzuek nazioarteko garrantzia lukete. Hiriaren eredu ekonomiko eta sozial berrirako trantsizio “berdea”. “Bat egiten badugu, eta erabakitasunez lan egiten, lor dezakegu aldaketa horietatik hiri hobea ateratzea, puntako zerbitzu publikoekin, ekonomia dinamiko eta modernoarekin eta jarraitu beharreko eredu izaten jarraituko duten azpiegitura berdeekin”, nabarmendu du alkateak.

“Badakigu nola ekin hiri-aldaketa handi bati; gainera, eredu ekonomiko eta industrial sendoa dugu, badakigu zer-nolako balioa duten hitzartzeak eta akordioetara iristeak gauza handiak lortzeko. Horiek dira aurrean dugun erronkarako behar ditugun osagaiak”, argudiatu du. Hainbat alderdi hartu dira aintzat planean: mugikortasun iraunkorra (zeinean berebiziko zeregina baitute oinezko eta bizikleta bidezko mugikortasunak, superetxadiek, autobus elektriko adimentsuak, tranbiak eta Mobility lab-ek), hiri azpiegitura berdeak (bereziki, Eraztun Berdea), izaera industriala (neurri handi batean automobilgintzan oinarritua), logistika (abiadura handiko trena eta Jundizko garapen logistikoa lehen lerroan direla) eta zerbitzu publikoen hobekuntza (garbiketatik hasita hiriaren mantentzeraino, segurtasunetik eta gizarte kohesiotik igarota).

Alor horretan garatzen diren ekintza guztiek hiru jarraibide hauek hartu beharko dituzte kontuan: garapen ekonomiko iraunkorra, gizarte kohesioa eta ingurumen iraunkortasuna. Eta hauek dira lortu nahi diren helburuak: negutegi efektuko gasen isurketa gutxitzea; kalitateko enplegu berriak sortzea; ekintzailetza eta berrikuntza teknologikoa bultzatzea; ekonomia berderanzko trantsizioa; hirian konexio handiagoa izatea ahalbidetuko duten azpiegiturak; trantsizio energetikoa, energia jasangarriak sustatuz; gizarte kohesioa indartzea, eta auzoen arteko oreka.

Gaur alkateak aurkeztu duen agiria proposamen bat da, eta era guztietako entitate eta gizarte eragilerekin eztabaidatu eta aberastuko da. Nolanahi ere, oso konpromiso argiak ditu:

  • Hemendik eta 2030era arte, proiektu eta multzo bat bultzatzea, zein jarduera-plan bateratu batean jasoko baitira, ezarritako helburuei erantzuteko —2020. urtean aurkeztuko da plan hori—.
  • Hartutako konpromisoen jarraipena egiteko eta kontuak emateko lantalde bat sortzea.
  • Horren barruan garatzen diren ekimenak giza baliabidez eta baliabide ekonomikoz hornitzea.
  • Itun horren esparruan hartutako konpromisoak eta egindako aurrerapenak defendatu eta zabaltzea, beste eragile batzuk inplikatzeko eta beste erakunde batzuentzat eredu izan daitezen.

Beste esku-hartze batzuk Klimaren Gailurrean

Klimaren Gailurreko asteleheneko hitzorduaz gain, zeinean “Vitoria-Gasteiz Green Deal” aurkeztuko baitu ofizialki, Urtaranek beste bi ekitalditan hartuko du parte. Abenduaren 7an, hiri iberoamerikarren foroan hartuko du parte, espainiar estatuko eta Latinoamerikako beste alkate batzuekin batera; abenduaren 10ean, berriz, Estatu Batuetako lehendakariorde ohi The Climate Reality Project-en fundatzaile Al Gorek emango duen hitzaldian —bereziki hautatutako entzuleen aurrean hitz egingo du, eta Gasteizko alkatea berariaz gonbidatu dute—.

Alkateorde eta Lurraldearen eta Klimaren aldeko Ekintzaren zinegotzi Ana Oregik ere parte hartuko du Gailurraren zenbait forotan.

 

 

 

 

 

Share

Gasteizko lehen “elektrolindegia” Latinoamerika plazaren alboko aparkalekuan egongo da eta kargatzeko hamar puntu izango ditu

 

Karga azkarreko edo erdiazkarreko zutoinak egongo dira zerbitzugunean, hiriko horrelako lehenengo gunean

 

Gasteizko lehen “elektrolindegia” Latinoamerika plazako aparkalekuan egongo da eta ibilgailu elektrikoak kargatzeko hamar puntu izango ditu. Udalak gaur goizean ireki du deialdia, zerbitzugune hori ezarri eta ustiatu nahi duten enpresek haien proposamenak egin ditzaten. Hautatuko enpresari lursail horren 273 metro karratuko zati baten erabilera pribatiboa emango zaio, jabari publikoko emakidaren bidez. Estatuko hiri baten hirigunean kokatutako lehen eletrondegia izango da.

“Gaur beste urrats bat egin dugu ‘Vitoria-Gasteiz Green Deal’ estrategian. Plan hau Garapen Jasangarrirako Helburuen eta 2030 Agendaren barruan dago, eta gure hiriaren, hurrengo belaunaldien etorkizunaren eta planetaren aldeko itun gisa sortu zen.  Eta planak hasieratik aurreikusten du lankidetza publiko-pribatua eraldaketa berderako giltzarri gisa. Horregatik, ‘Green Deal’ delakoarekin bilatzen genuenaren adibide ona da elektrolindegia hau: hirian eragina izango duten eta garapen ekonomiko jasangarrian, gizarte-kohesioan eta ingurumen-jasangarritasunean eragingo duten ekintzak”, azaldu du Gorka Urtaran alkateak. Elektrolindegiak, gainera, hiri-mugikortasuna deskarbonizatzen lagunduko du, Udalaren helburuetako bat.

Enpresa esleipendunak bost kargagune instalatu beharko ditu, hamar ibilgailuri zerbitzu emateko. Zutoinetako hiru karga erdiazkarrekoak izango dira 50 kw-ko korrontearekin, karga azkarreko zutoin batek 100 kw-ko korrontea izango du, eta karga azkarreko azkenak 150 kw-ko potentzia.

Emakida bost urterako izango da, baina urtero luzatu ahal izango da, gehienez ere hamar urtera arte. Elektrolindegia ustiatzen duen enpresak 7.189,38 euroko kanona ordaindu beharko dio urtero Udalari (lehiaketara aurkezten diren enpresek bere eskaintzetan kopuru hori hobetu badezakete ere). Udalak baldintza-agirian ere zehaztu du tarifek ezingo dutela prezio hauek gainditu: 0,25-0,40 eu/KW karga azkarrerako eta 0’10-0’30 eu/KW.

ELEKTROLIDEGIA dosierra

Share

“Energia % 100 herritarra” erabiltzeko gonbita egiten du Gasteizko Udalak, klima-aldaketaren kontra borrokatu eta hiriaren trantsizio ekologikoa bizkortzeko

Energia % 100 herritarra kanpainaren aurkezpena Gasteizko udala

 

Ekainera arte luzatuko den kanpainak bat egingo du Klimaren eta Energia Iraunkorraren Plana lantzeko azken fasearekin, zein eragile eta herritarren partaidetza-prozesu baten bitartez burutuko baita —2050. urtea baino lehen udalerrian karbono-neutraltasuna lortzea da planaren helburua—

 

Atzo ekin zitzaion ekimenari, Ibiltaria eta Hausnarketa estatuak klimaren zaindari bihurtu zituen ekintza batekin, hirian azken 50 urteetan izan den tenperaturen igoera ikusaraztea helburu

 

Sentsibilizazio-kanpaina berri bat aurkeztu du Gasteizko alkate Gorka Urtaranek gaur prentsaurrekoan, zeinen bidez herritar guztiak klima-aldaketaren kontrako borrokan inplikatzea lortu nahi baita, planeta osoaren ingurumen-erronkarik larriena izaki, dagoeneko ondorio nabarmenak bizi ditugunez, hainbat esparrutan.

“Energia % 100 herritarra” lemarekin, eta “Vitoria-Gasteiz Green Deal”-en babesean eta Interreg Europe programak garatutako INTENSIFY proiektu europarraren esparruan, hau lortu nahi da kanpainarekin: klima-aldaketa gure hirian dagoeneko izaten ari den ondorioak ikusaraztea, eta, batez ere, aldaketa horri aurre egiten laguntzen ari diren ekintzei balioa ematea, erakundeetatik eta hainbat sektoretatik, baita herritarrek berek ere.

“Udalak hainbat ekintza, estrategia eta itun jarri ditu martxan klima-aldaketaren kontrako borrokan. Nagusietako bat Vitoria-Gasteiz Green Deal-en proposamena dugu: hiriaren aldeko itun bat, hurrengo belaunaldien etorkizunaren aldekoa, planetaren aldekoa. Gure bizi-kalitate handia sendotzeko eta etorkizun ekonomiko eta sozial sendo eta bideragarri baten oinarriak finkatzeko plan bat. Eguneroko ekintzekin eta egunez egun hartzen ditugun erabakiekin egin behar diogu aurre klima-aldaketari; esaterako, hondakinak birziklatuz, bizikleta erabiliz joan-etorrietarako, edo nekazaritza ekologikoa ekoitzi eta kontsumituz”, azpimarratu du Gorka Urtaranek. Hain zuzen ere, hiru adibide horiek dira kanpainaren irudi nagusien protagonistak, hiri osoan ikusiko baitira, hainbat mezurekin: “Gehiago eta hobeto birziklatuz irabazten da klima-aldaketaren kontrako borroka”, “Bizikletaz irabazten da klima-aldaketaren kontrako borroka” edo “0 kilometroko elikagaiak kontsumituz gelditzen da klima-aldaketa”.

Energia % 100 herritarra kanpainaren aurkezpena Gasteizko udala

“Azken 150 urteotan, batez besteko tenperatura globala 0,8 gradu igo da, eta igoera hori bizkortzen ari da azken hamarkadetan. Gasteiz da fenomeno horren aurrean kaltetuen gerta litekeen euskal hirietako bat. Klima-aldaketaren aurkako 2050erako Euskal Autonomia Erkidegoko Estrategian jasotako aurreikuspenen arabera, mende honetan, gure ingurunean, batez besteko tenperatura 2,5 gradu igo daiteke neguan, eta 5,5 eta 7 gradu inguru udan. Era berean, bero-boladen iraupena % 150 luza daiteke mende-bukaerarako. Hori dela eta, uste dugu funtsezkoa dela herritar guztiak eta udalerriko sektore guztiak inplikatzea klima-aldaketaren ondorioak arintzea helburu duen borroka honetan”, adierazi du alkateak.

 

Klimaren enbaxadoreak 

Gainera, Gasteizko klimaren “enbaxadore” bihurtu diren lehenengo bi pertsonak ere izan dira prentsaurrekoan. Batetik, Sara Ortiz, CIC EnergiGUNEko —energia biltegiratzearen inguruko ikerketa-zentroa, Arabako Teknologia Parkean kokatua— finantza-zuzendaria, eta, bestetik, Miguel Ángel López de Vicuña, Mataukuko nekazari ekologikoa.

Kanpainan zehar klima-aldaketari gizarteko hainbat esparrutatik nola aurre egiten zaion erakutsiko duen bideo-sortako protagonistetako bi dira. “Ikerketa eta zientzia funtsezkoak dira fenomeno horren kontra borrokatzeko, eta Gasteizen, zorionez, energia biltegiratzearen inguruko ikerketak egiten dituzten Europako hiru zentroetako bat daukagu, CIC energiGUNE. Horren lanak funtsezkoak dira, besteak beste, energia berriztagarrien eraginkortasun handiagoa lortzeko eta biltegiratzea hobetzeko. Eta lurra eta elikadura zaintzea ere funtsezkoa da; horregatik, ezinbestekoa da Miguel Ángel bezalako nekazari ekologikoen lana. Luxu bat da udalerrian 63 herri izatea, eta horien partaidetza ezinbestekoa da klima-aldaketa geldiarazteko erronka lortzeko”, azpimarratu du Gorka Urtaranek.

Beste bideo bat ere aurkeztu du alkateak, klima-aldaketak etorkizunean gure inguruan izan ditzakeen ondorioez ohartarazteko. Gure ur-erreserba nagusiak, hots, Uribarriko urtegiak 2080an izango duen egoera azaltzen da bertan.  Mende honen bukaerarako euri-egunak % 10 murriztea eta muturreko bero-egunak % 50 ugaltzea aurreikusten da, eta, horren ondorioz, ur-erreserbak nabarmen kaltetuta gerta litezke. “Gure eguneroko ekintzek eta hiri osoaren inplikazioak ondorio horiek arintzen lagun dezakete”, adierazi du alkateak.

Energia % 100 herritarra kanpainaren aurkezpena Gasteizko udala

Gizarte-eragileen eta herritarren partaidetza

“Energia % 100 herritarra” lemari gogor eutsiz, erronka horretan herritarren inplikazioa lortzeko ekintza-sorta handi bat aurreikusi da kanpainan. Komunikabide lokalen bitartez zabalkundea emateaz gain, kaleko ekintzak egingo dira, eta sinergiak bilatuko beste ekimen batzuekin, inpaktua biderkatzeko. Horrela, maiatzean, Araba Ekinean ekimenarekin batera, ekitaldi bat egingo da online, klima-aldaketaren kontrako borrokaren inguruan negozioa eraiki duten hiriko ekintzaileen adibideak erakusteko. Belaunaldien arteko lantegiak ere egingo dira, arazoari buruzko hainbat ikuspegi trukatzeko, adinekoen eta gazteen artean; izan ere, azken horiei eragingo die gehien arazoak, eta kezkatuta ageri dira.

INTENSIFY is part-funded by Interreg Europe through the European Regional Development Fund

Ingurumenaren Mundu Egunaren inguruan, ekainaren 5ean, kaleko ekintza bat egingo da, klima-aldaketa arintzeko guztion lankidetzak duen garrantzia erakusteko. Herritarren energia hori biderkatu eta inplikatutako sektore guztietara iristea izango du helburu. Horrez gain, hainbat jardunaldi tekniko egingo dira herritarren zeregina ulertzeko eta politika instituzionalek klima-aldaketa geldiarazteko mundu mailako helburu horretan aurrera nola egiten duten jakiteko.

INTENSIFY is part-funded by Interreg Europe through the European Regional Development Fund

Era berean, Udalak ahalegin berezia egingo du orain arte berotegi-efektuko gasen emisioak nabarmen murriztu dituzten hainbat sail edo sozietate publikok egindako ekintzak herritarrengana helarazteko. “Klima-aldaketari ez zaio aurre egiten bakarrik Lurraldearen eta Klimaren aldeko Ekintzaren Sailetik edo Ingurugiro Gaietarako Ikastegitik; hainbat udal zerbitzutatik egiten dugu, esaterako gure eredu energetikoak aldatuz, mugikortasun iraunkorragoa sortuz, edo energia-aurrezpena eta efizientzia bultzatuz”, gehitu du alkateak.

Energia % 100 herritarra kanpainaren aurkezpena Gasteizko udala

Klimaren eta Energia Iraunkorraren Plana (2021-2030)

Orain, Klimaren eta Energia Iraunkorraren Plana (2021-2030) lantzeko prozesuaren azken fasean murgilduta dago Udala, plan horrek gidatuko baitu klima-aldaketaren kontrako borroka hirian, hamarkada honetan. Urtaranen gobernuak agintaldiko programa aurkeztean adierazi bezala, bi ekintza-plan barne hartzen ditu Klimaren eta Energia Iraunkorraren Planak: batetik, emisioak gutxitu eta trantsizio energetikoan aurrera egiteko, eta, bestetik, klima-aldaketara egokitzeko. Helburu hauek ditu planak, besteak beste: 2050erako karbono-neutraltasuna lortzea hirian; berotegi-efektuko gasen emisioak gutxienez % 55 murriztea 2030erako —2006koen aldean— hainbat sektoretan (etxebizitzak, zerbitzuak, barne mugikortasuna eta lehen sektorea), eta udalerriaren erresilientzia-gaitasuna areagotzea, klima-aldaketaren eraginetara egokituz (zaurgarritasuna eta arrisku klimatikoa murriztea).

Eragile interesdunekin eta, oro har, herritarrekin kontrastatzeko partaidetza-prozesu baten bidez zehaztuko da planaren azken dokumentua, generoaren eta belaunaldien ikuspegiak aintzat harturik eta gazteen proposamenak integratzeari arreta berezia eskainiz.

Webgune honetan kontsultatu ahal izango da kanpainari buruzko informazioa, baita Gasteizko Udaletik klima-aldaketaren kontra bideratzen diren neurri eta ekintzak ere: vitoria-gasteiz.org/accionporelclima.

BIDEOA

 

 

 

Share

Bederatzi entitatek bat egin dute sendagaiek ingurumenean sortzen duten kutsadura ikertu eta horren kontrako konponbideak aplikatzeko

 

Gorka Urtaran alkatearen adierazpenak

Gasteizko Udalak, Arabako Foru Aldundiak, Euskal Herriko Unibertsitateak, Bioaraba Osasun Ikerketako Institutuak,  Vital Fundazioak, Arabako Sendagaigileen Elkargo Ofizialak, BIC Arabak,  AMVISAk eta AquaDatek protokolo bat sinatu dute gaur goizean, farmakutsaduraren alorreko berrikuntza-programa bat garatzeko; Gasteizen eta Araban sendagaiek ingurunean sortzen duten kutsaduraren aurkako irtenbideak ikertu, aplikatu eta ezagutarazteko konpromisoa hartu dute horren bitartez.

Alkate Gorka Urtaranek, diputatu nagusi Ramiro Gonzálezek eta EHUko errektore Eva Ferreirak eman dute hitzarmenaren berri prentsaren aurrean; ekitaldian beste hauek ere izan dira: Mª Ángeles García Fidalgo, Bioaraba Osasun Ikerketako Institutuko zuzendari zientifikoa; Jon Urresti, Vital fundazioko lehendakaria; Milagros López de Ocariz, Arabako Sendagaigileen Elkargo Ofizialeko lehendakaria; David Montero, BIC Arabako zuzendaria; Ángeles Gutiérrez, AMVISAko lehendakaria, eta Jorge García del Arco, Aquadat startup-aren fundatzaileetako bat. Bederatzi entitate horien ordezkariek sinatu dute lankidetza-protokoloa, zeina oinarria baita berariazko hitzarmenen bidez garatzekoak diren ekintzetarako.

Besteak beste, planetak gero eta toxikotasun-arazo gehiago izateak ekarri du ituna hitzartzea. Zehazki, “kutsatzaile izendatu berriak” deritzenek gero eta kezka handiagoa sortzen dute, eta horrek farmakutsadurari erreparatzea ekarri du, alegia, sendagaiek beren bizi-zikloaren etapa bakoitzean ingurumenean eragin dezaketen kalteari.

 

Berariazko ikerketa-proiektua 

Zenbait alderdi aipatzeagatik, protokoloak aurreikusten du ikerketa proiektu bat abian jartzea hondakin-uretan eta ekosistemetan kutsatzaile izendatu berririk dagoen eta horrek zein eragin izan dezakeen zehazteko. Orobat, ikerketa zientzialarien artean eta gizartean ezagutarazten lagunduko da, jardunaldi, mintegi edo biltzarren bitartez.

Sendagaiak zentzuz erabiltzea

Hartutakoen arteko beste konpromiso bat da sendagaiak zentzuz erabiltzeko irtenbideak identifikatzen eta garatzen lan egitea, eta farmakutsadurak duen inpaktuari buruzko prestakuntza ematea osasun alorreko langileei. Entitate sinatzaileek, orobat, irtenbide teknologikoak sustatuko dituzte farmazia-produktuak eraginkortasun handiagoz desagerrarazi ahal izateko.

Gasteiz eta Arabarentzat garrantzi handia duen ekimen honek badu aurrekaririk orain protokoloan parte hartzen duten ikertzaileen eta entitateen arteko lankidetzari dagokionez:  hondakin-uren epidemiologiari buruzko azterlana, SARS-CoV2 garaiz antzemateko, farmakoak kuantifikatzeko eta substantzia toxikoak analizatzeko, Gorka Orive eta Unax Lertxundi zientzialariek egindakoa. 

Gasteizko alkate Gorka Urtaranen ustez, Gasteiz eta Araba ezin egokiagoak dira laborategi-lurralde gisa: “ikerketa zientifikoa funtsezko tresna da errealitatea ezagutu eta hobetzeko, eta neurri eta ekintza politikoak erabakitzen laguntzen digu. Gaur mahai berean eseri gara erakundeen, zientziaren, ikerketaren eta ekintzailetzaren alorretako eragileak, nire irudiko Vitoria-Gasteiz Green Deal denaren adibide grafikoa osatuz, zeina gure hiriaren aldeko ituna baita, hurrengo belaunaldien etorkizunaren aldekoa, baita planetaren aldekoa ere”.

Arabako diputatu nagusi Ramiro Gonzálezek, berriz, “prestakuntza eta ikerketaren beharra eta teknologia aliatutzat izatearen beharra” azpimarratu du, “agertzen ari diren arazo berriei aurre egiteko, farmakutsaduraren kasuan bezala. Aldundiak berrikuntzaren aldeko apustua egin du, eta aspalditik ari da bultzatzen alor publikoaren eta pribatuaren zein erakundeen arteko lankidetza-eredu hauek, hainbat eragilerekin. Egiaztatu da aliantza horiek funtzionatzen dutela Arabako etorkizuna sendotzeko xedea duten proiektuetan. Akordio honen bidez, teknologiaren alorrean I+G+B lantzeko ezagutzaren oinarriak ezartzen ditugu, urak farmakutsatsailez arazteko“.

EHUko errektore Eva Ferreirak ere Arabako zenbait erakundek eta entitatek gaur sinatu duten protokoloaren garrantzia aipatu du: “Berriro ere, gaur sinatu dugun asmo-akordioak erakusten du zein balio handia duen unibertsitate-ikerkuntzak gizarteari zerbitzu emateko. Farmakutsadura lehen mailako arazoa da. Horregatik, ingurumena aldezteko konpromiso politiko eta sozialak ikerketa zientifikoaren laguntza behar du, besteak beste, euskal unibertsitate publikoarena“.

EHUko ikertzaile Gorka Oriveren hitzetan, “akordio hau beharrezko oinarri eta pizgarria da gure inguruan jarduera multzo bati ekiteko, hala nola kalitateko ikerketa, alorrean aintzindaria izango den prestakuntza, eta herritarrei farmakutsaduraren arazoa ezagutarazteko zabalkundea“.

 

Share

Alkateak Michelin Hirien Sarearen aurrean aurkeztu du Gasteizek pandemiaren ostean bere etorkizunari aurre nola egingo dion

Gorka Urtaran alkateak beste alkate eta klima-aldaketen aurreko estrategian adituak direnekin batera hartu du parte “Hiri-erresilientzia” bideokonferentzian. Ekimena Michelin Hirien Nazioarteko Sareak antolatu du. Hitzorduaren bidez, ekonomia, ingurumen eta gizarte arloko jasangarritasunaren ikuspegiaren pean pandemiak eragin duen trantsizio-etapari aurre egiteko tokian tokitik zer estrategia planteatu duten ezagutu ahal izan dute parte-hartzaileek. Jasangarritasunaren ikuspegi soziala izan da, hain zuzen ere, Gasteizko alkateak bereziki landu duena:

Urtaranek Orain Gasteiz planaren ardatzak zehaztu ditu. Horixe bera da koronabirusak eragindako krisiaren aurrean jarduteko ardatz nagusia eta hauek dira horren oinarriak: osasunaren babesa (eskumena duten administrazioekin elkarlanean), gizarte-ongizatea sendotzea (bakarrik dauden adinekoengan, adingabeak dituzten familiengan eta etxerik gabeko pertsonengan arreta berezia jarrita) eta tokiko ekonomia babestea.

 

Etorkizunera begira, Gasteizko alkateak azpimarratu du Euskal Autonomia Erkidegoko hiriburuak European Green Deal estrategian hartu duela parte. “Ezinbesteko beharra da etorkizuneko hirietarako”, aipatu du Urtaranek. Gainera, jarduteko beste ardatz bat ere zehaztu du: Garapen Iraunkorrerako Helburuak. Ekimen zehatz horien artean, auzo guztietan gertutasuneko baliabideen proiektuak nola garatzen ari diren azaldu nahi izan du. Bestalde, adibide gisa jarri du supersagarren proiektua, Gasteiz 2030ean CO2 emisioetan neutroak diren Europako 100 hirietako bat bihurtzeko funtsezkoa izango dena. Era berean, energia oinarritzat hartuta, hiriko birgaitze-politikei protagonismoa eman nahi izan die.

Jardunaldian, bestalde,David Millerrek, Torontoko alkate ohiak, ere hartu du parte. Bere ustez, COVID-19ak eragindako krisia hiriak berreskuratzeko aukera izan daiteke, lehentasuna pertsonengan jarrita. Bere hitzaldian, Bridgewater-eko (Kanada) alkatearekin, David Mitchellekin, solasean aritzeko aukera izan du.

 

Porous city network & landprocess enpresako CEOak eta sortzaileak, Kotchakorn Voraakhomek, etorkizuneko krisiei aurre egiteko garaian baliabide hidrikoak eta paisaia-arkitekturaren ikuspegitik horiek behar bezala kudeatzea erabakigarriak izan daitezkeela azaldu du. Jair Alexandre Gonçalvesek, Guarulhoseko (biztanle gehien duen Brasilgo hirietako bat da) Nazioarteko Harremanetarako zuzendariak, udalerri horrek abian duen uholdeak prebenitzeko proiektuaren berri eman du.

 

Bestalde,Jérôme Auslenderrek, Frantziako Clermont-Ferrand hiriko alkateordeak, COVID-19ari aurre egiteko hiri horrek abian jarri dituen neurriak zehaztu ditu. Amaitzeko, tokiko demokrazian nazioarteko aditua den Firdous Oussidhoumek zerbitzu publikoak hobetzearekin lotuta pandemiak berekin ekarri duen ikasbidea azaldu eta hiritarrak horretaz gero eta gehiago jabetzen direla azpimarratu du.

 

Michelin Hirien Sareak, gaur egun, Europako, Amerikako, Asiako eta Afrikako 35 udalerri biltzen ditu. 2019an, Gasteizen egin zuten bigarren kongresua (hirugarrena irailean egingo dute Querétaron (Mexiko)- eta gaur egun Gorka Urtaran da Sareko presidenteordea.

Share

Alkateak Gasteizko superetxadien eredua defendatu du aldaketa klimatikoaren aurkako estrategia gisa SUM Bilbao biltzarraren aurkezpenean

Gasteizko alkate eta EUDELen elkarteburu Gorka Urtaranek parte hartu du, modu telematikoan, gaur goizean SUM Bilbao biltzarra aurkezteko egin den ekitaldian.

Gorka Urtaran alkateak azaldu duenez, EUDEL Itun Berde handi bat bultzatzen ari da, ‘Euskal Udalen Green Deal’ delakoa, hirien eta herrien eraldaketa iraunkorraren protagonista izan daitezen.  Urtaranek azpimarratu duenez, “Euskal Udalok planetaren erronka nagusiekin konprometituta gaude: klima-aldaketa eta trantsizio energetikoa, garraio publiko modernoa eta pertsonei lehentasuna emango dien hiri-mugikortasuna”. Adibide zehatzen artean, alkateak Gasteizen ‘superetxadien’ proiektua nabarmendu du, eta proiektu horren ardatza “espazio publikoa pertsonei ematea” dela adierazi du.

Share

Gasteizek 105.000 eurorekin sustatuko du ingurumenaren arloko proiektuak aurten, beste erakunde batzuekin elkarlanean

Gasteizek zenbait erakunde eta entitaterekin jardungo du elkarlanean ingurumenaren arloko ikerkuntza eta zabalkundean; 135.000 euro bideratuko ditu horretarako. Gasteiz Greenen ildo estrategikoetakoa da klima-aldaketaren kontra borrokan diharduten entitate eta erakunde espezializatuekin lankidetzan eta ikerkuntzan aritzea.

Alkateak gogorarazi du Gasteizek konpromisoa duela klima-aldaketaren kontrako borrokarekin, Europar Batasuneko alkateen itunean jaso bezala, eta, halaber, hau adierazi du: “hiri berdetik ekonomia berdera igarotzeko agenda argia daukagu, gure Gasteiz Green Dealek ezarria. Gasteizko Green Deal planak bideratzen ditu hori lortzeko egiten ari garen ekimenak. Planetaren erronkei aurre egiteko maila globalean proposatzen diren eta gure hirian aplikagarriak diren konponbideak gureganatzea da kontua. Erronka horiei aurre egiteko proposatzen diren eta gure hirian ondo egin daitezkeen konponbide eta ekimenen barruan daude Ingurugiro Gaietarako Ikastegia egiten ari den ikerketa-lerroak“ nabarmendu du Gorka Urtaran alkateak.

Aurten, beste bi lerro gehitu zaizkio Ingurugiro Gaietarako Ikastegia egiten ari den ikerkuntzako lankidetzari: bata Unesco Katedrarekin, kultura-paisaien eta ondarearen arloko ikerkuntza aplikatuko jarduerak egiteko, eta lerro horretarako 15.000 euro bideratuko dira; eta bestea Euskal Herriko Hazien Sarearekin, nekazaritza-dibertsitateari eta lursailen ondarea kontserbatzeari buruzko prestakuntza- eta zabalkunde-esperientziak trukatzeko eta sustatzeko, eta beste lerro horretarako ere 30.000 euro bideratuko dira.

Ingurugiro Gaietarako Ikastegiak hiri-ingurunetako naturari buruzko ikerketa-lerro batean dihardu, Basque Centre for Climate Change – Klima Aldaketa Ikergai (BC3) elkartearekin elkarlanean. Udalak 15.000 euro bideratuko ditu aurten ikerketa-lankidetzako proiektu horretarako.

Bestalde, Gasteizek landare-espezieak landatzearen bidez eta beste konponbide naturalen bidez lurzoru hondatuak leheneratzeko ikerketa- eta praktika-ekintzekin jarraituko du, EHUren eskutik. Horretarako ere 15.000 euro bideratuko ditu.

Ingurugiro Gaietarako Ikastegia hidrogeologia arloko ikerkuntzan ere aritzen da EHUrekin lankidetzan, eta horretarako ere 15.000 euro bideratuko ditu.

Ingurugiro Gaietarako Ikastegiaren eta Neiker-Tecnaliaren artean ireki dituzten ikerketa-lerroetako bat lurzoruen kontserbazioan zentratuta dago, eta horretara 15.000 euro bideratuko dira aurten.

Share