Prentsa Oharren banner
Kategoriak: Erakunde Adierazpenak  —  Komunikazio Zerbitzua / Servicio de Comunicación  —  7 urtarrila 2020 12:42

 1.- Gasteizko Udalak atsekabea adierazi du aho batez, 2020ko urtarrilaren 2an izandako lan-istripuan izandako heriotzagatik. Doluminak helarazi nahi dizkie hildako langilearen familiari, lagunei eta lankideei. Era berean, lan-istripuen salaketa publikoa egiten du, eta Eusko Jaurlaritzaren Segurtasun Sailak eta Osalanek heriotzaren inguruabarrak argitu ditzatela eskatzen du, familia eta senitartekoei informazioa eman ahal izateko.

2.- Gasteizko udalak agerian utzi nahi du lan-prekaritateari aurre egin behar zaiola, lan istripuak ekidin egin behar direla, gauza guztien gainetik eta kosta ahala kosta, lan-segurtasunak lehentasunekoa izan behar baitu edozein lanetan. Ezinbestekoa da laneko osasunari eta laneko segurtasunari buruzko kanpainak bultzatzen jarraitzea, baita laneko arriskuen prebentziorako arauak bete daitezen eskatzea ere, bereziki lan-prekaritate argiko egoeretan.

3.- Horregatik guztiagatik, erakunde guztiei berriz ere eskatzen die lan-arriskuen prebentziorako jardunbide egokiei buruzko proiektuak gauzatzen laguntzeko – lan-administrazio, sindikatu eta patronal-erakundeekin koordinatuta–, laneko segurtasunaren eta osasunaren aurkako delituen kontra aritzeko, eta ikuskapen-zereginak areagotu eta hobetzeko.

4.- Halaber, Gasteizko Udalak bat egiten du heriotza hau salatzea eta hildakoaren familiari babesa eta elkartasuna adieraztea xede duten ekimenekin, eta horietan parte hartzera dei egiten die herritar guztiei.

Share
Kategoriak: Erakunde Adierazpenak  —  Etiketak:   —  Komunikazio Zerbitzua / Servicio de Comunicación  —  29 azaroa 2019 12:50

Bihar, azaroak 30, Hiri Hezitzaileen Eguna da, eta horrekin bat egiten dute hezkuntza politika lokal guztiak zeharkatzen dituen ardatza bihurtzeko lanean ari diren udalerriek.

Hori dela eta, talde politikoek “Gasteiz, Hiri Hezitzailea” izenburua duen adierazpena irakurri dute. Udalak “garapen iraunkorreko helburuekin duen konpromisoa” gogorarazten du testuak, “guztientzako bizitza osoko hezkuntza inklusibo eta kalitatekoa lortzearren, garapen pertsonal eta kolektiboaren eta hiri eraldaketaren motor gisa, hiri bidezkoago, solidarioago eta kulturartekoagoen alde. Pertsona guztiak benetan berdinak diren hiriak, desberdintasunen errespetua oinarri delarik pertsona guztiak elkarren artean hitz egiteko eta elkarrekin bizitzeko gai diren hiriak”.

Gainera, Nazio Batuen Erakundeak azaroaren 30a Hiri Hezitzaileen Nazioarteko Eguna izendatzeko eskaerari atxikitzeko gutuna sinatzeko konpromisoa hartu dute Udalbatzako 27 zinegotziek.

Hiri Hezitzaileen Nazioarteko Egunaren adierazpena, 2019

Hiri Hezitzaileen Nazioarteko Eguna dossierra

Share
Kategoriak: Erakunde Adierazpenak  —  Etiketak:   —  Komunikazio Zerbitzua / Servicio de Comunicación  —  25 azaroa 2019 10:45

Indarkeria matxistaren biktimei erreparaziorako tokiko ekintzak

Azaroaren 25a (Emakumeen aurkako indarkeria desagerrarazteko Nazioarteko Eguna) dela-eta, indarkeria mota honen egitura-izaera nabarmentzen dugu, eta gure konpromisoa agertu nahi dugu emakumeen aurkako indarkeriarik gabeko gizarte bat eraikitzeko. Era berean, nazioarteko esparru juridikoarekin bat etorrita, berresten dugu beharrezkoa dela ekintzak proposatzea esku-hartzearen alor guztietan: prebentzioa, hautematea, arreta, babesa, koordinazioa eta justizia, arreta berezia jarrita biktimei eta bizirik atera diren pertsonei erreparazioa ematean.

Biktimei erreparazioarako printzipioak berekin dakar biktimak eskubide-urraketa bizi aurreko egoerara lehengoratzeko beharrezkoak diren ekinzak martxan jartzea. Indarkeria matxistaren biktimen kasuan, xedetzat hartzen da biktimaren bizi-baldintzak funtsean hobetzea, urratutako eskubideengatik erreparazioa jasota eta eragindako minetik berrezarrita. Era berean, ahalduntze-prozesua bultzatu behar da, indarkeria-egoerari aurre egiteko gaitasuna eta autonomia indartu dezaten.

Tokiko gobernuek biktimei arreta eskaintzeko alorrean aitortuta dugun erantzukizuna eta eskumena gure gain hartzen dugu, gure herri eta hirietan indarkeria matxista jasaten duten emakumeengandik hurbilen gauden erakundeak garelako. Politikarien eta teknikarien bultzada koordinatuarekin, tokiko erakundeen esku-hartzea funtsezkoa da erreparatzeko prozesuan, komunitateko bizitza berrezartzen laguntzeko eta biktimei erreparazio publiko eta soziala emateko, indarkeria matxistaren biktimen eta bertatik bizirik atera diren pertsonen inguru hurbilenean.

Horren ildotik, Berdinsareako (Berdintasunaren aldeko eta emakumeekiko indarkeriaren aurkako Euskadiko udalen sarea) udaletako berdintasun-teknikarien lana oinarrizkoa eta balio handikoa da, udaletan ekintzarako orientazio eta irizpide komunak eskaintzeko, batez ere, udal txikienetan. Hain zuzen, erreparazioari dagokionez, Indarkeria matxistaren biktimei erreparaziorako tokiko ekintzen gida bat prestatzeko lanean ari dira, tokiko erakundeek indarkeria matxistaren biktimek ordaina jasotzeko duten eskubidea praktikan jarri eta zehaztu ahal izan dezaten, udal eskumenaren esparruan.

Tokiko gobernuek konpromiso politikoak betetzeko jardun nahi dugu, eta, horren bidez, indarkeria matxistaren modu guztiak desagerrarazten lagundu, honela:

  • Biktimen eskubideak arreta-prozesu osoaren erdigunean jarrita, euren beharrizan eta eskariei entzunez eta arreta emanez.
  • Langile espezializatu eta kualifikatuak edukita, erreparazioaren ikusmoldetik, ikuspegi feministarekin.
  • Erreparaziorako eta ahalduntzeko esku-hartze prozesu guztietan, kudeaketa eta azkartasuna bermatzeko lan eginez.
  • Tartean sartutako erakunde guztiekin koordinatuz, arreta eta erreparaziorako baliabideak egituratzeko, indarkeria matxistaren biktimen egoera erabat lehengoratuko dela eta urratutako eskubideak berrezarriko direla bermatzeko.
  • Talde feministekin eta tokiko emakumeen elkarteekin modu estuan lankidetzan arituta, berdintasun-politikak eta ekintzak diseinatzeko, biktimei eta bizirik atera diren pertsonei arreta eta erreparazioari dagokionez.
  • Era berean, dei egiten diegu herritar guztiei, udalerri guztietan A25 dela-eta antolatuko diren salaketa- eta aldarrikapen-ekintzetan modu aktiboan parte har dezaten.

 

 

 

 

 

Share
Kategoriak: Erakunde Adierazpenak  —  Komunikazio Zerbitzua / Servicio de Comunicación  —  8 abuztua 2019 12:46

Gure udalerrian jazo berri den eraso matxistaren aurkako gaitzespen eta arbuio irmoenak erakutsi nahi ditu Gasteizko Udalak. Halaber, laguntza eta hurbiltasuna eskaintzen dizkio hala biktimari, nola biktimaren inguruari, eta bere eskura jarri behar dituzten baliabide psikologiko, juridiko eta sanitario guztiak nahiz babes- eta harrera-baliabideak, bere interesei eragiten dien informazio guztia eduki dezala bermatzearekin bat.

Zentzu horretan, Gasteizko Udalak, kasuaren berri izan eta horren gaineko ikuspegi ahalik eta oso eta zuhurrena izateko informazioa erkatu ondoren, Gasteizko Udalak Indarkeria Matxistaren aurrean Jendaurreko Erantzun Publikoa emateko Protokoloa aktibatu du. Hortaz, premiazko bilera deitu du, bai informazio guztia biltzeko, bai erantzun instituzionala nahiz biktimari eta bere inguruari emango zaion arreta koordinatzeko xedez.

Azpimarratu egin nahi dugu indarkeria matxista giza eskubideen urraketa larria dela eta gizartearen berebiziko arazoa dela, berori jasaten duten eta horri aurre egiten dioten emakumeen duintasunaren eta osotasun fisiko zein moralaren aurka jarduten baitu. Indarkeria mota hau ez dute ekintza isolatuek osatzen: gure gizartea egituratzen duten jokaera esplizituen eta mezu normalizatu eta sinbolikoen sarea da, zeinak emakumeak gizonen mende edukitzeko xedea duen, bai eta indarreko sistema heteropatriarkalak ezartzen dituen mugak gainditzen dituen gorputzik, eredurik edota jokaerarik ez baimentzeko asmoa eduki ere.

Bada, Gasteizko Udalak, emakumeen eta LGTBI pertsonen giza eskubideak benetan erabiltzen direla bermatzeaz arduratzen den erakunde publikoa denez, udal-erakundeek eta herritarrek oro har edozein eraso matxistaren aurrean berehala eta irmo erantzuteko, biktimari lehentasunezko arreta emateko, emakumeei eta LGTBI pertsonei indarkeriari aurre egiteko tresnak emango dizkieten prebentzio-neurriak garatzeko eta erasotzaileen zigorgabetasun soziala desagerrarazteko neurriak sustatzen jarraituko du. Era berean, indarkeria matxistarik gabeko bizitza askeak bermatzeko lanean jarraituko du Udalak, bere eskumenak erabiliz.

 

Hori dela-eta, honako hau adierazten du Udalak:

  • Ordezkaritza instituzionalak eraso hauen aurkako arbuioa erakutsiko du 15 minutuko kale-agerraldi batean, abuztuaren 8an, 13:00etan, Plaza Berrian, «Vitoria-Gasteiz: eraso matxisten aurka» lelopean.
  • Udalak antolatutako jai-ekitaldi guztiak 10 minutuz geratzea eta komunikatu ofiziala irakurtzea.
  • Tabernetan eta jai-guneetan, baita bestelako edozein ekitaldi edo jardueratan ere, gaueko 00:00etan musika 10 minutuz geratzeko gonbita egitea eta komunikatu ofiziala irakurtzea.
  • Paseilloa 10 minutuz geratzera gonbidatzea herritarrak eta, batez ere, blusen eta nesken kuadrillak, indarkeria matxistaren aurrean erantzuteko dauzkaten protokoloetan edo estrategietan jasotzen diren baldintzak kontuan hartuta.
  • Halaber, bat egingo du mugimendu feministak edota hirian Andre Mari Zuriaren jaiak antolatzeaz arduratzen diren eragile giltzarriek deitzen dituzten ekimenekin. Hortaz, herritar guztiak gonbidatzen ditu horietan parte hartzera eta zabaltzea.
Share
Kategoriak: Erakunde Adierazpenak  —  Etiketak: ,   —  Komunikazio Zerbitzua / Servicio de Comunicación  —  7 abuztua 2019 11:40

Gure udalerrian jazo berri diren eraso matxisten aurkako gaitzespen eta arbuio irmoenak erakutsi nahi ditu Gasteizko Udalak. Halaber, laguntza eta hurbiltasuna eskaintzen dizkiogu hala biktimei, nola biktimen inguruari, eta euren eskura jarri behar dituzten baliabide psikologiko, juridiko eta sanitario guztiak nahiz babes- eta harrera-baliabideak, euren interesei eragiten dien informazio guztia eduki dezatela bermatzearekin bat.

 

Zentzu horretan, Gasteizko Udalak, kasuen berri izan eta horien gaineko ikuspegi ahalik eta oso eta zuhurrena izateko informazioa erkatu ondoren, Gasteizko Udalak Indarkeria Matxistaren aurrean Jendaurreko Erantzun Publikoa emateko Protokoloa aktibatu du. Hortaz, premiazko bilera deitu du, bai informazio guztia biltzeko, bai erantzun instituzionala nahiz biktimei eta euren inguruari emango zaien arreta koordinatzeko xedez.

 

Azpimarratu egin nahi dugu indarkeria matxista giza eskubideen urraketa larria dela eta gizartearen berebiziko arazoa dela, berori jasaten duten eta horri aurre egiten dioten emakumeen duintasunaren eta osotasun fisiko zein moralaren aurka jarduten baitu. Indarkeria mota hau ez dute ekintza isolatuek osatzen: gure gizartea egituratzen duten jokaera esplizituen eta mezu normalizatu eta sinbolikoen sarea da, zeinak emakumeak gizonen mende edukitzeko xedea duen, bai eta indarreko sistema heteropatriarkalak ezartzen dituen mugak gainditzen dituen gorputzik, eredurik edota jokaerarik ez baimentzeko asmoa eduki ere.

 

Bada, Gasteizko Udalak, emakumeen eta LGTBI pertsonen giza eskubideak benetan erabiltzen direla bermatzeaz arduratzen den erakunde publikoa denez, udal-erakundeek eta herritarrek oro har edozein eraso matxistaren aurrean berehala eta irmo erantzuteko, biktimari lehentasunezko arreta emateko, emakumeei eta LGTBI pertsonei indarkeriari aurre egiteko tresnak emango dizkieten prebentzio-neurriak garatzeko eta erasotzaileen zigorgabetasun soziala desagerrarazteko neurriak sustatzen jarraituko du. Era berean, indarkeria matxistarik gabeko bizitza askeak bermatzeko lanean jarraituko du Udalak, bere eskumenak erabiliz.

 

Hori dela-eta, honako hau adierazten du Udalak:

  • Ordezkaritza instituzionalak eraso hauen aurkako arbuioa erakutsiko du 15 minutuko kale-agerraldi batean, abuztuaren 8an, 13:00etan, Plaza Berrian, «Vitoria-Gasteiz: eraso matxisten aurka» lelopean.

Abuztuaren 7an:

  • Udalak antolatutako jai-ekitaldi guztiak 10 minutuz geratzea eta komunikatu ofiziala irakurtzea.
  • Tabernetan eta jai-guneetan, baita bestelako edozein ekitaldi edo jardueratan ere, gaueko 00:00etan musika 10 minutuz geratzeko gonbita egitea eta komunikatu ofiziala irakurtzea.
  • Paseilloa 10 minutuz geratzera gonbidatzea herritarrak eta, batez ere, blusen eta nesken kuadrillak, indarkeria matxistaren aurrean erantzuteko dauzkaten protokoloetan edo estrategietan jasotzen diren baldintzak kontuan hartuta.
  • Halaber, bat egingo du mugimendu feministak abuztuaren 7an 20:00etan Andre Mari Zuria Plazan deitutako kale-agerraldiarekin, eta herritar guztiak gonbidatzen ditu horietan parte hartzera eta beharbada gure laguntza behar duten arbuio-ekimenen berri ematera.

 

Share
Kategoriak: Erakunde Adierazpenak  —  Komunikazio Zerbitzua / Servicio de Comunicación  —  16 uztaila 2019 13:28

Gure udalerrian izandako eraso lgtbifobikoaren aurrean, Gasteizko udaletik gure gaitzespenik sendoena agertu nahi dugu, eta biktimari sostengua eta hurbiltasuna adierazi.

Gasteizko udalak gogorarazi egiten du eraso mota hori giza eskubideen urraketa larria dela, eta indarkeria matxista ez dela eraso fisikoa edo sexuala bakarrik.  Baimenik gabeko igurtziak eta musuak, adierazpen edo begirada umilgarriak, larderia edo xantaiak eta adierazpen, irain edo keinu LGTBIfobikoak ere indarkeria matxistaren adierazpenak dira eta ez dira gertakizun bakanak, hala jasotzen baita Udalak 2018an egindako LGTBI biztanleriaren errealitatearen diagnostikoan edo Gasteizko Udalak LGTBIfobiaren kontrako behatokiaren bitartez indartu nahi dituen gizarte kolektiboek eraso LGTBIfobikoei buruz egindako txostenetan.

Zentzu horretan, Gasteizko Udalak, emakumeek eta LGTBI pertsonek giza eskubideak benetan erabil ditzaketela bermatzeko ardura duen instituzioa denez gero, neurriak bultzatuko ditu honako hauetarako: berehala eta irmotasunez erantzuna emateko edozein eraso matxistari, lehentasunez arreta emateko, erasotzaileen indarkeriari aurre egiteko prebentzio-neurriak garatzeko eta gizarte-zigortasuna ez onartzeko.

28-J koordinakundeak deitutako elkarretaratzera dei egiten die Udalak herritarrei. Gaur izango da,  19:00etan, Andre Maria Zuriaren plazan.

Share
Kategoriak: Erakunde Adierazpenak  —  Komunikazio Zerbitzua / Servicio de Comunicación  —  28 ekaina 2019 10:47

LGTBI Udal Erakunde Adierazpena

Erakunde-adierazpena, 2019ko ekainaren 28an LGTBI Harrotasunaren Nazioarteko Eguna dela eta

2019ko ekainaren 28an LGTBI Harrotasunaren Nazioarteko Egunaren jatorrian dauden Stonewalleko matxinaden 50. urteurrena beteko da. Herritar erantzunaren eta mobilizazioaren oroitzapena, hark sorrarazi baitzuen mundu osoan eskubide zibilen eta eskubide afektibo-sexualen aldeko herritar mugimendua.

Ordutik hona legegintzan izandako aurrerapauso garrantzitsuak eta sexu-orientazioaren eta genero-identitatearen alorretako aniztasuna gorabehera, oraindik ere diskriminazioa, indarkeria, estigmatizazioa eta gizarte-bazterkeria eragiten dituzte gure gizartean bizirik dirauten LGTBIfobiak eta heterosexismo baztertzaileak. Funtsezkoa da politika eta ekintza publikoko neurriak jorratzen dituztenean, herri erakunde guztiek aintzat hartzea oraindik ere beharrezkoa dela pertsona homosexual eta transexualen eskubideen babesa sustatzen jarraitzea.

Baina, horrez gain, premiazkoa da sexu- eta genero-aniztasuna balio eta ekarpen sozialtzat jotzea, zeinaren bitartez kolokan jarri ahalko ditugun, bai heterosexualitatea arau sozial gisa, bai eta gizon/emakume binarismoa gizarte-antolakuntzarako eta genero-identitatea modu zorrotz eta hertsian eraikitzeko tresna gisa ere. Horrek gizarte eta pertsona askeagoetara joateko aukera emango liguke, askeago ahalmen eta desirak garatzeko, eta eskubideak bermatzeko.

Helburu horrekin konprometituta dagoelarik, Gasteizko Udalak Gasteizko LGTBI herritarren errealitateei buruzko DESIRAK PLAZARA diagnostikoa osatu zuen ikuspegi feminista eta intersekzional batetik abiatuta, hartara sexu- eta genero-aniztasunaren alorrean egoki jardun ahal izateko beharrezko informazioa izateko.

Diagnostiko hori abiapuntu, Berdintasunerako politiketan sexu- eta genero-aniztasuna txertatzeko 2018-2021 aldirako agenda osatu da, bean bildu direlarik berdintasun-politiken lar-alorrean 2018-2021 aldian abiarazi beharreko esku-hartzeko ildoak eta jarduerak. Horien artean, nabarmentzekoa da Gasteizen LGTBIfobiaren kontrako behatokiaren sorrera: berriki sinatu da horren hitzarmena, LGTBI pertsonen aurkako indarkeria matxistari eta bazterkeriari loturiko egoerak antzemateko eta horien inguruan sentsibilizatzeko eta jarduteko.

Horregatik guztiagatik, Gasteizko Udalak BERE GAIN HARTZEN DU sexualitate, genero eta desio anitzak ikusarazteko KONPROMISOA, eta LGTBI taldeko pertsonen kontrako diskriminazioari, estigmatizatzeari eta bortizkeriari aurre egitekoa, berdintasuneko politika publikoaren bidez, hain zuzen ere:

  • Berdintasunerako politiketan sexu- eta genero-aniztasuna txertatzeko 2018-2021 aldirako agenda abiaraziaz.
  • LGTBI-fobiaren aurkako behatokia abiaraziaz.

Vitoria-Gasteizen, 2016ko ekainaren 28an.

Share
Kategoriak: Erakunde Adierazpenak  —  Komunikazio Zerbitzua / Servicio de Comunicación  —  14 maiatza 2019 13:53

Gorka Urtaran alkatearen adierazpenak

  1. Gasteizko Udalak elkartasuna eta maitasuna adierazi nahi dizkio Pilarren familiari, igandean Aranbizkarra auzoan erasoa jasan zuen pertsona gaur goizean hil baita.

 

  1. Gasteizko Udalak irmotasunez gaitzesten du udalerrian gerta daitekeen eraso edo delitu oro.

 

  1. Gasteizko Udala guztiz prest dago Udaltzaingoak Ertzaintzari laguntza ematen jarrai dezan, gertaerak argitu eta erantzuleak atxilotzeko, egindakoagatik dagokien zigorra jaso dezaten.

 

  1. Udalak bost minutuko elkarretaratze batera deitu ditu herritarrak; bihar, maiatzak 15, izango da, 12:45ean, Urrezko Zeledonen plazan (Postetxearen aurrean).
Share
Kategoriak: Erakunde Adierazpenak  —  Etiketak:   —  Komunikazio Zerbitzua / Servicio de Comunicación  —  22 otsaila 2019 09:36

Egun gutxi barru, 2019ko otsailaren 27an, Saharar Herriak Saharar Estatuaren (Saharar Errepublika Arabiar Demokratikoa – SEAD) 43. urteurrena ospatuko du.

43 urte dira Mendebaldeko Sahararen okupazioaren aurrean Herri Sahararrak borrokan dirauela, eta egoera irtenbiderik gabe jarraitzen du. Horrenbestez, lurralde okupatuetan zein Tindufeko errefuxiatu sahararren kanpamentuetan bizi diren biztanleak haien giza eskubideak urratuta ikusten dituzte, okupaziopean edo errefuxiatuta bizitzera behartuta.

Testuinguru honetan, Nazio Batuek aurrerapausoak eman dituzte Fronte Polisarioa eta Marokoko Erreinuaren arteko elkarrizketaK desblokeatzeko, sei urte baino gehiagoz geldirik egon eta gero. Horrela, abenduan lehen elkarrizketa erronda bat egin zen, eta beste berri bat espero da 2019ko lehen hiruhilekorako.

Era berean, Europar Batasuna eta Marokoren arteko arrantza akordioari dagokionez, Europako Justizia Auzitegiaren epaia berri on eta aurrerapauso garrantzitsu bezala ikusi izan da, bertan, hurrengoa baieztatzen Delako: “Mendebaldeko Sahararen gaineko Marokoko Erreinuaren subiranotasuna ez dela errekonozitzen, ez Europar Batasunaren partetik, ezta bere kide diren Estatuenetik ere, eta ezta, modu orokorrago batean, NBE-aren partez ere”. Hala ere, eta epai horren aurka, 2019ko otsailaren 13an Europako Parlamentuak  Eurpoar Batasuna eta Marokoko Erreinuaren artean negoziatutako arrantza akordioa onartu du, bertan ilegalki okupatutako Mendebaldeko Saharako lurraldea barnebiltzen delarik.

Horregatik guztiagatik, datozen tokiko, foru eta europako hauteskundeetara begira, deialdi egiten zaie partidu politikoei, prestatzen dituzten hauteskunde programetan saharar auzia barnebildu dezaten, honen dimentsio politiko, elkartasunezko, humanitario, eta kooperatiboan. Eta, aldi berean, hautetsiei eskatzen zaie Herri Sahararraren askatasunarekiko konpromisoa adierazi dezaten.

Era berean, erakunde bidaietan egiten den lana oso beharrezko izaten jarraitzen duela baloratzen da, horien bidez lurralde okupatuetako eskubideen urraketa egiaztatzeko: saharar biztanleen adierazpen, bilera, elkartze eta manifestazio eskubideak, alegia. Eta baita Nazio Batuen ebazpenak bete eta giza eskubideak errespetatzeko eskatzeko.

 

Horregatik guztiagatik:  

BERRESTEN DUGU Fronte Polisarioa dela Saharar Herriaren ordezkari bakar eta legitimoa, NBEak eta nazioarteko komunitateak hala onartuta. 

SALATZEN dugu, berriz ere, Mendebaldeko Saharan dagoen marokoar okupazioa ilegala dela, eta ezin duela Herri Sahararraren autodeterminazio eta independentzia eskubidea urratuko duen ondorio juridiko edo politikorik izan. 

EGIAZTATZEN DUGU Mendebaldeko Sahara lurralde autonomo bat dela, Nazioarteko Zuzenbidearen araberakoa, eta Marokoko Erreinuaren parte inoiz ere izan ez dela. Eta, horregatik, Mendebaldeko Saharako okupazio ilegala bertan behera geratzea aldarrikatzen dugu, eta baita Herri Sahararrak duen autodeterminazio eskubidea ere. 

AINTZAKOTZAT HARTZEN DUGU Mendebaldeko Sahararen “de iure”-ko potentzia administratzailea Espainia dela adierazten duen Auzitegi Nazionalaren Autoa. 

EXIJITZEN DIOGU Marokoko Erreinuari saharar preso politiko eta kontzientziazkoak berehala askatu ditzan, eta horrek kontrolatzen dituen kartzeletan giza eskubideen urraketak amaitu daitezen, presoen osasun fisiko eta psikikoa bermatuz. Aldi berean, familiei elkartasuna adierazten diegu. 

SALATZEN DUGU Mendebaldeko Saharan Marokoko Erreinuaren eskutik egiten ari den errekurtso naturalen bidegabeko ustiaketa, eta lurralde horretan lan egiten duten enpresei nazioarteko zuzenbidea eta saharar biztanleen eskubideak errespetatzea eskatzen diegu. Interesa dutenei (enpresak eta herrialdeak) Herri Sahararraren ordezkari zilegiarekin (Fronte Polisarioa) negoziazioak hasteko eskatzen diegu. 

GOGORARAZTEN DIEGU erodiputatuei, Marokorekin negoziatutako arrantza akordioaren alde Europako Parlamentuan otsailaren 13an eginiko bozketa, zeinek Mendebaldeko Sahara barnebiltzen duen, legez kanpokoa izango dela, EUko Justizia Auzitegiaren epaia ez errespetatzeagatik. Eta hargatik, akordio horren kontra gauzatzen diren kanpainekin bat egiten dugu, Marokok ez duelako subiranotasunik Mendebaldeko Sahararen gainean. 

SALATZEN DUGU, Marokoko Erreinua eta Europar Batasunaren arteko arrantza akordio horren onarpena, Europako Parlamentuak otsailaren 13an onartua, eta Mendebaldeko Sahara barnebiltzen duena, akordioa Herri Sahararraren eta haren bidezko ordezkari den Fronte Polisarioaren onarpenik gabe eginagatik. 

ESKATZEN DUGU Nazio Batuen partez Mendebaldeko Saharako gatazkaren irtenbide justu eta behin-betikoa lehenbailehen bideratu dezala. Irtenbide hori, ezinbestez, Herri Sahararraren autodeterminazio eskubidea erreferendum bitartez gauzatzetik pasa beharko da. Eta NBE-ren Giza Eskubideen Kontseiluari eskatzen diogu Mendebaldeko Saharako Giza Eskubideen Errelatore bat izendatzeko. 

BERRIZ ESKATZEN DUGU, Mendebaldeko Saharako egoera larriaren aurrean, MINUSOak haren funtzioak handitu ditzan. Hargatik, Nazio Batuei eskatzen diegu MINURSOari saharar biztanleen giza eskubideen zaintza eta ikuskaritza eskuduntza eman diezaion lurralde okupatuetan. 

EXIJITZEN DIOGU Europar Batasunari, Marokoko Erreinuarekin duen Lehentasunezko Akordioan ezarritako giza eskubideen errespetuari dagokion klausula gauzatu dezan. 

INDARTZEN DUGU gure lankidetza Emakume Sahararren Batasun Nazionalarekin (UNMS),hark errefuxiatuen kanpamentuetan gauzatzen duen berebiziko lanagatik. Era berean, emakumeen giza eskubideen urraketa eta ikusezintasunaren gainean arreta deitzen dugu, bereziki lurralde okupatuetan desagertutako emakumeen gainekoa. 

ESKATZEN diegu, euskal erakundeei, elkartasun laguntza eta laguntza humanitarioa indartzea, bai Tindufeko saharar errefuxiatu kanpamentuekin, zein lurralde okupatutako biztanleekin. 

 

ADIERAZTEN DUGU, SEADen 43. urteurrenaren ospakizunak direla eta, euskal erakunde ezberdinek Tindufeko errefuxiatu kanpamentuetara bidaia egingo dutela, Herri Sahararrekiko konpromisoa berresteko.

Estatu Espainiarrak Mendebaldeko Saharari dagokionez duen arduraren jakitun izanda, Espainiako Estatuari hurrengoa eskatzen diogu:

-Marokoko Erreinuari Mendebaldeko Saharan giza eskubideak errespetatu ditzan exijitzeko, eta baita biztanle sahararren kontrako indarkeria bertan behera utzi dezan. Horrenbestez, Nazio Batuen eta Europar Batasunaren baitan MINURSOak Mendebaldeko Saharan giza eskubideen ikuskaritza eta babesa gauzatzeko eskuduntza izan dezan lan egiteko eskatzen diogu.

-Saharar biztanleen giza eskubideak errespetatzeko exijitu dezan, Ginebrako Giza Eskubideen Kontseiluko kide izango den heinean, 2018-2020 aldian.

-Fronte Polisarioari estatus diplomatikoko ordezkaritza aitortzeko, Herri Sahararraren ordezkari zilegi bakarra den heinean, NBEak hala onartuta. SEAD-a onartu dezala, horrenbestez.

-Biztanle sahararrekin duen lankidetza eta laguntza humanitarioa areagotu dezala, bai errefuxiatu kanpamentuetan zein lurralde okupatuetan, izan ere AECID-aren laguntzak azken urteetan murriztu baitira.

Horretaz gain, Mendebaldeko Saharara bideratutako Europako Fondoen areagotzea eskatu dezala.

Azkenik, euskal gizarteari dagokionez, hurrengoa adierazten dugu: 

ESKATZEN DIEGU, komunikabideei, Mendebaldeko Saharako gatazka duen garrantziarekin landu dezatela, gizarteak ematen dion garrantzi berarekin, alegia. Eta elkartasuna adierazi nahi duten pertsonei Mendebaldeko Saharako egoeraren berri sare sozialetan eman dezaten animatzen ditugu.

AINTZAKOTZAT HARTZEN DUGU RASD-telebista, Saharar Irrati Nazionala, Saharar Berri Agentzia eta zonaldean lan egiten duten beste komunikabideek duten garrantzia, bereziki, lurralde okupatuetan, Herri Sahararraren egoera eta haren helburu zilegiak zabalduz.

ADIERAZTEN DIEGU, elkartasun elkarte eta kolektiboei, gure esker ona, haiek, egunerokoan lan egiten baitute Herri Sahararrarekiko laguntasunak bultzatuta, helburu bakarra senidetutako herri horren askatasunezko etorkizuna lortzea izanda.

AITORTZEN DUGU haurren udako harrerarako Oporrak Bakean programaren berebiziko garrantzia, familia saharar eta euskaldunen arteko elkartasunaren eta maitasunaren adierazpen handiena.

Erakunde-adierazpen hau hurrengoetara bidaltzea proposatzen dizuegu:

-Nazio Batuetako Idazkari Nagusia.

-Ginebrako Giza Eskubideen Batzordea.

-Horst Kohler Jauna, NBEko Mendebaldeko Saharako ordezkari berezia

-Europar Batzordea

-Espainiako Estatua

-Espainiako Errege Etxea

-Fronte Polisarioaren Euskadiko Ordezkaritza

-Marokoko Gobernua

Share
Kategoriak: Erakunde Adierazpenak  —  Komunikazio Zerbitzua / Servicio de Comunicación  —   09:35

Udal honetako aldibatekotasun-tasa % 40 ingurura iritsi da hainbat arrazoi tarteko: aldian-aldian eta modu erregularrean LEP orokorrik egin ez izana, berritze-tasek ezarritako mugak, udal plantilako egiturazko lanpostuak betetzeko aldi baterako programak erabili izana…

Aldibatekotasun-tasa handiaren eta kontratazio gehienak bitarteko langileekin egitearen ondorioz sortutako egoera hau dela eta, hainbat estamentu ofizialek -estatukoak zein erkidegoetakoak–  zalantzan jarri dute sortzen ari zen enplegu publikoaren eredua.

Gasteizko udalari dagokionez, udalbatzak 2018ko azaroaren 28an egindako osoko bilkuran aho batez onartu zuen aurrekontu-plantilla aldatzea, aldi baterako enplegu-programak udalaren lanpostu zerrendan sartzeko. Udal langileen sindikatu-ordezkaritzarekin izandako negoziazioan aho batez erabaki zen lanpostu horiek finkatzea, eta talde politikoek ere hala erabaki zuten aho batez Funtzio Publikoaren Batzordean, eta horrek lagundu egin zuen osoko bilkuran guztiak alde egotea.

Adostasun erabaki horrekin, eta abian den LEP prozesuaren fase guztiak gauzatuta,  aldibatekotasun-tasa % 6koa izatea lor daitekeela jotzen da.

Helburua aldibatekotasun-tasa  “aldibatekotasun-tasa tekniko” kalifikatzen dugunaren ingurukoa izatea da, hau da, tasaren ehunekoa digitu batetik gorakoa ez izatea inolaz ere. Beraz, lortu nahi den helburu horren garrantzia kontuan hartuta, hautatze prozesu hauek udal hauteskundeetako emaitzak gorabehera bermatu behar direla uste dugu.

Horrenbestez, udaleko PP, EH Bildu, EAJ-PNV, PSE-EE, Podemos eta Irabazi taldeek honako konpromisoak hartzen dituzte:

1.- Agintaldi honetan abiarazitako edo egun martxan dauden LEP prozesu hauek guztiak burutzea:

  1. a) Udaltzaingoa I eta II (2017-2018)
  2. b) A eta B taldeetako lanpostuen hornikuntza
  3. c) A eta B taldeetako LEP (2017)
  4. d) Suhiltzaileen eta inspektoreordeen LEP
  5. e) A eta B taldeetako LEP (2018)
  6. f) C, D eta E taldeetako lanpostuen hornikuntza
  7. g) SISZko kabo eta ofizialordeen barne sustapena
  8. h) C, D eta E taldeetako LEP (2018)
  9. i) C, D eta E taldeetako LEP (2019)
  10. j) Laugarren xedapen iragankorraren eskaintza, 2005etik etengabe beteta dauden postuetarako.
  11. k) Polizien deialdi bateratua, III (2019)

2.- Enplegu publikoaren egonkortasunaren alorrean agintaldi honetan hartutako erabaki hauek osorik beteko direla bermatzea:

  1. a) Aldibatekotasun-tasa digitu bakarrera jaistea.
  2. b) Karrerako funtzionarioen karrera profesionala ahalbidetzea, hornikuntzen eta sustapenen bitartez
  3. c) Aldi baterako enplegu programak lanpostu zerrendan finkatzea (412).
  4. d) LEP deialdien oinarriak administrazioaren egungo egoera sozialera egokitzea, kontuan hartuta hamabost urte pasa direla enplegu eskaintzarik gabe, eta horrek egungo bitarteko langileei edo behin behinekoei zer ekarri dien

3.- Aldiro LEPak deitzea, bere fase guztiekin, ezingo delarik bi urte baino gehiago izan LEP batetik bestera.

4.- Aldibatekotasun-tasa tekniko bat mantentzea, zein inolaz ere ez den digitu bat baino gehiagokoa izango

Vitoria-Gasteizen, 2019ko otsailaren 22an

Share

Aurrekoak »