Prentsa Oharren banner

Bizanetako kafetegiak eta elkartzeko guneak irekiko dituzte bihar

Zentro bakoitzean mahai kopuru mugatua egongo da eta ezingo dira 45 pertsona baino gehiago bildu

 

Bizan sarea —lehen, adinekoentzako zentro soziokulturalak— normaltasunera itzultzen ari da pixkanaka zerbitzuen funtzionamenduari dagokionez. Pandemia zela eta, itxi egin behar izan zituzten iaz, eta, orduz geroztik, osasun egoerak utzi ahala zabaltzen joan dira berriro.

Jantokiak izan ziren ateak ireki zituzten lehenak, eta haien atzetik beste zerbitzu batzuk jarri ziren berriz martxan, hala nola informazioa, ile-apaindegia, podologia, osasun-parkeak, lantegiak eta ikastaroak, betiere COVID-19aren kontra ezarritako segurtasun-protokoloa errespetatuz.

Bihartik aurrera, kafetegiak eta elkartzeko guneak ere erabilgarri egongo dira. Mahai kopuru mugatua izango dute eta 45 pertsonarentzako lekua egongo da gehienez ere.

Kafetegian derrigorrezkoa izango da maskara erabiltzea kontsumitzeko unean izan ezik; ezingo da zutik kontsumitu; mahai bakoitzeko 2 pertsona soilik egon ahal izango dira eta erabiltzaileen artean 1,5 metroko distantzia mantendu beharko da. Gainera, gehienez ere ordubete egon ahal izango da bertan.

Erabiltzaileek barran eskatu beharko dute horretarako ezarritako lekuetan, momentuan ordaindu, eta langileek esaten dieten mahaian eseri.

Neurri horiekin batera, segurtasun arau orokorragoak ere errespetatu beharko dira bi zerbitzuetan.

Kafetegiak eta elkartzeko guneak ireki ondoren, hemerotekak dira Bizan sarean itxita jarraitzen duten zerbitzu bakarrak, eta, horiek ere, osasun egoerak uzten duenean irekiko dira.

 

 

 

Share

Adinekoentzako zentro soziokulturalek 94 lantegi eta 1.137 leku eskaintzen dituzte udako jardueren programazioan

Osasun parkeetako 200 adinekok haien ariketa-errutinak erakutsi dituzte Mendizorrotzeko futbol-zelaian

Uda iristear da eta adinekoentzako zentro soziokulturalek udako jarduera-programa abian jarriko dute berriz ere; oraingo honetan, 94 ikastaro eta lantegi eskainiko dituzte, eta 1.137 leku egongo dira guztira.

Eskaintza zabal horretan, era guztietako ikastaroak egongo dira, hala nola, kultura lantegiak, TikTok koreografiak, eta ohiko informatika ikastaroak, norberaren zaintzari edo ariketa fisikoari buruzkoak, edo osasun parkeak, besteak beste.

“Adinekoak fisikoki zein mentalki hobeto sentitzea eta harreman berriak hastea nahi dugu; horri esker bere autonomia mantendu edo hobetuko dute, lagunduta sentituko dira eta bakardadeari aurre egin ahal izango diote, bakarrik sentitzen badira”, azaldu du Jon Armentiak, Gizarte Politikak, Adinekoak eta Haurrak Saileko zinegotziak.

Programazioaren % 70 aire zabalean egingo da eta % 30 herritar guztientzako izango da “adina kontuan hartu gabe, oso garrantzitsua baita belaunaldiek kezkak eta jarduerak partekatzeko aukera izatea”, esan du zinegotziak.

Teknologia berriekin lotutako jarduerek ere garrantzi berezia izango dute, esaterako, ordenagailuak eta telefono adimendunak erabiltzen ikasteko ikastaroak, izapideak on line egiten ikastekoak eta abar; eskaeraren % 13 osatzen dute.

Jon Armentiaren esanetan “informatikaren gaia azpimarratzen dugu, informazioaren teknologia berriak gero eta gehiago erabiltzen direlako gure gizartean. Argi geratu da pandemiaren ondorioz bizi dugun gizarte- eta osasun-egoera honetan”.

Ariketa fisikoa Mendizorrotzen

Jon Armentia zinegotziak Mendizorrotzeko futbol-zelaian eman du programazio horren berri; izan ere, 200 adinekok hara eraman dituzte osasun-parkeetan egin ohi dituzten ariketa-errutinak, adinekoen zentroek antolatzen dituzten jardueren adibide gisa, eta Deportivo Alavesen omenez, aurten mendeurrena ospatzen baitu.

“Denboraldi honetan babazorroek osasuna kendu eta eman digute, nahiz eta, azkenean, lehen mailan mantentzearen pozak une txarrak ahantzarazi dizkigun. Taldeari aitortu beharreko gauza da hori, are gehiago 100 urterekin osasun ona duela kontuan hartuta. Beraz, zorionak”, gehitu du Jon Armentiak.

Osasun-parkeetan 60 urtetik gorako pertsonak elkartzen dira, ariketa fisikoa egiteaz gain, harreman sozialak ere indartzeko. Erabiltzaileak nahi dutenean joan daitezke parkeetara edo entrenatzailea dagoen ordutegian, aparatuak erabiltzen eta ariketa-errutinak egiten ikasi nahi badute. Saio horiek doakoak dira.

Urte batzuetatik hona, nabarmen igo da parke horien erabiltzaile kopura eta egun 600 baino gehiago dira.  Pandemia egoeran adinekoek jarduera segurutzat daukate aire zabalean egiten delako. Gainera, erabiltzaile askorentzat mugitzeko, sozializatzeko, eta, azken batean, bizi-kalitatea hobetzeko aukera bikaina dira.

Gasteizek 12 osasun-parke ditu, eta joan den astean Maider Etxebarria alkateordeak iragarri bezala, legegintzaldi honetan beste bi jarriko dira, Sansomendin eta Txagorritxun. Aparteko inbertsio planaren barruan izango da, zeina 2020ko aurrekontuaren likidazio positiboarekin gauzatu ahal izango baita.

Izen-emateak

Adinekoentzako zentro soziokulturaletako udako ikastaro eta lantegietan izena emateko epea maiatzaren 20an hasiko da. Ekainaren 2ra arte, interesdunek 1.137 lekuetako bat betetzeko aukera izango dute, eta izena ematen den hurrenkeran esleituko dira.

Horretarako, adinekoentzako zentro soziokulturaletara, gizarte-etxe eta kiroldegietako informazio zerbitzuetara eta herritarrei laguntzeko bulegoetara jo beharko dute. Udalaren webgunean eta 010 telefonoan ere erregistratu ahal izango dira.

Ekainaren 5ean, bete gabe geratu diren plazetan izena emateko epea zabalduko da.

Programazio guztia COVID-19ari aurre egiteko babes neurriak errespetatuz egingo da eta nahitaezkoa izango da maskara erabiltzea.

Share

Adinekoentzako zentro soziokulturalek zaintzari buruz antolatutako argazki digitalen lehiaketaren sariak banatu dituzte

Adinekoentzako zentro soziokulturalek 55 urtetik gorakoentzako argazki digitalen lehiaketaren hirugarren edizioari dagozkion sariak banatu dituzte; aurtengo gaia “Zaintzen duten pertsonak eta lekuak” izan da.

Gizarte Politiken, Adinekoen eta Haurren zinegotzi Jon Armentia izan da buru San Martineko adinekoen zentroan egindako ekitaldian, eta bertan saritutakoekin eta Adinekoen Zerbitzuko langileekin elkartu da.

Familia zaintzaileei laguntzeko Maiteki udal programaren lankidetza izan du lehiaketak aurten, Udalaren asmoa baita “zaintza-lanak aitortzen dituzten ekintzak bultzatzea, eta horretarako ingurune adeitsu eta integratzailearen beharraz sentsibilizatzea“.

Guztira 22 lan aurkeztu dira lehiaketara. Hauek dira irabazleak:

Lehen saria (600 euroko txekea): “Burua zaintzen”, Concha Pascual Romerorena.

Bigarren saria (300 euroko txekea): “Familia giroa”,  José Antonio Morlesínena.

Publikoaren saria (300 euro): “Absentziak eta agintzariak”,  Miguel Ángel Lacalzadarena; 218 boto lortu ditu internetez.

Saritutako argazkiak, gehi lehiaketara aurkeztutakoen artean hautatutako beste bi (“Zoriontsuak”, Mauro Sánchezena, eta “Nire bi makilak”, Pilles Bourdoiseaurena), postal formatuan argitaratuko dira, hiriko hainbat lekutan banatzeko.

+info: Argazki digitalen III.lehiaketa (+55) “‘Zaintzen duten pertsonak eta lekuak'”

Share

San Martineko adinekoentzako zentro soziokulturala abenduaren 16an irekiko da; udal sareko handiena izango da

San Martineko adinekoentzako zentro soziokulturala datorren astean irekiko da, abenduaren 16an; udal sareko 16.a izango da, eta handiena.

Podologia, ile-apaindegi eta informazio zerbitzuak jarriko dira martxan; bestetik, osasun-parkearen zerbitzua urrian abiatu zen, eta Piztu zure auzoa programaren talde eragilea azaroaren bukaeran hasi zen biltzen.  Abenduaren 21etik aurrera 1-3 egun irauten duten zenbait jarduera eskainiko dira, hainbat alor lantzeko: teknologia berriak, hezkuntza, osasunaren sustapena, aisialdia, harremanak, eskulanak… Geroago bi eta lau hilabeteko ikastaro eta jarduerak antolatuko dira.

Zentroak zeregin garrantzitsua beteko du San Martinen, auzoan 60 urtetik gorako 3.600 pertsona bizi baitira; baliabide berriaren erabiltzaile potentzial horiei Txagorritxu eta Lovaina inguruko beste pertsona batzuk gehituko zaizkie, horietan ere zentroak izan arren.

“San Martineko zentroarekin auzokoen eskaera historiko bati erantzungo diogu, eta auzoa balio handiko gizarte-baliabide batez hornitzeko helburua betetzen; adinekoak elkartzeko gunea izateaz gain, hainbat zerbitzu eta programa eskainiko dizkie parte hartzeko, osasuna hobetzeko eta segurtasuna emateko. Bestela esanda, zahartze aktiboaren bidezko ongizateaz eta bizi-kalitateaz ari gara“, azaldu du Gizarte Politiken, Adinekoen eta Haurren zinegotzi Jon Armentiak.

Hiru areto

San Martineko adinekoentzako zentro soziokulturala jartzeko Udalaren Teknologia Berrien Zerbitzuak erabiltzen zituen bulegoak baliatu dira; 1.300 m2 dira, aparteko hiru aretotan banatuta.

Lehenengoak 68 m2 du, eta jarduera fisikoak egingo dira bertan. Bigarrena da zabalena (740 m2) eta zentroko programazio eta zerbitzuen zatirik handiena hartuko du: lantegiak, prestakuntza-gela, ikus-entzunezkoen gela, informazio zerbitzua, ile-apaindegia eta podologia zerbitzua, baita kudeatzaile-talderako bulegoak ere. Hirugarrenean (488 m2) elkartze-aretoa, kafetegia, mediateka, hemeroteka, hiri-laborategia eta jantokia daude.

Gizarte Politiken zinegotziaren iritziz, “honelako baliabideen bitartez, adinekoek elkartzeko leku bat izan dezaten nahi dugu, ikasteko aukera ematen duen, osasuna eta ongizatea sustatzen dituen eta bizitza soziala eta parte-hartzea ahalbidetzen dituen programazioa eta zerbitzuen karta eskainiz. Hori guztia batuz gero, mendekotasuna prebenitzeko eta autonomia pertsonala sustatzeko errezetarik onena izango dugu”.

Irekitze ekitaldia

Inaugurazioa dela eta, bihar, abenduak 11, informazio-materiala banatzen hasiko da auzoko saltoki eta entitateetan, irekieraren berri emateko.

Hilaren 16an (asteazkena) inauguratuko da, eta egun horretan, baita 17an eta 18an ere, informazio-karpa bat jarriko da zentroaren kanpoaldean, hiru egun horietan programatutako bisita gidatuetan parte hartu nahi dutenek izena eman dezaten. Bisitek 30 minutu iraungo dute, eta gehienez 5 pertsonak osatuko dituzte taldeak.

Auzokideek zein jarduera egin nahi duten iradoki ahalko dute karpan, “gure asmoa delako erabiltzaileek, auzokoek eta gizarte-eragileek definitzea programazioaren zati bat, San Martineko adinekoentzako zentro soziokulturala jarduera-edukiontzi handia izango baita“, gehitu du Armentiak.

Zentro soziokulturalak

Gasteizko adinekoentzako zentro soziokulturalak duela 40 urte baino gehiago sortu ziren. 35.000 erabiltzaile dituzte, hau da, hiriko 60 urtetik gorako pertsonen erdiak dira ohiko erabiltzaile.

2015ean Lakua-Arriagako inauguratu zenetik ateak irekitzen dituen lehen zentroa da San Martinekoa.

Share

San Martineko adinekoentzako zentro soziokulturala izango denak badu osasun-parkea jada, udal sareko hamabigarrena

Urriaren 1ean hasiko da ikasturtea parte horietan, zeinetan 400 adinekok baino gehiagok egin baitzituzten jarduera fisikoko programak 2019an

San Martineko adinekoentzako zentro soziokulturalak instalazioak prestatzen jarraitzen du, urtea bukatu aurretik irekitzeko asmoz. Barrualdean espazioak hornitzen jarraitzen dute; kanpoaldean, berriz, osasun-parkea instalatu da jada Vera-Fajardo Margolariaren kaleko zati batean, adinekoei egokitutako gimnasia aparatuz horniturik, ariketa fisikoa egiterik izan dezaten.

Parke berria udal sarearen hamabigarrena izango da. Banaka edo begirale profesionalen laguntzarekin erabili ahalko da, lantegi eta saio praktikoen programa baten bidez. Adinekoentzako zentro soziokulturalek urriaren 1ean jarriko dute abian programa, Adinekoen Nazioarteko Egunarekin batera.

Ordubeteko saioak egingo dira hamar osasun-parketan, 10 pertsonako taldeetan; iaz 400 pertsonak baino gehiagok hartu zuten parte horietan, emakumeak gehienak (355).

Ariketaren bidez, adinekoen autonomia sustatzen laguntzen dute parkeek, haien adinerako egokia den jarduera fisikoaz informatu eta prestatzen, eta haiengan jarrera positibo eta irekia pizten, zahartzeari aktiboki aurre egin diezaioten“, azaldu du Gizarte Politiken, Adinekoek eta Haurren zinegotzi Jon Armentiak.

Jardueretan parte hartzen dutenek segurtasun distantzia gorde beharko dute elkarren artean, maskara nahitaezkoa izango dute —ariketa gogorra denean izan ezik— eta gel hidroalkoholikoa eraman beharko dute.

Programei berriro ekitea

“Pixkanaka urratsak egiten ari gara nolabaiteko normaltasunerantz. Une honetan irekita ditugu adinekoentzako jantokiak, baita informazio, ile-apainketa eta podologia zerbitzuak ere. Urrian, berriz, osasun-parkeak eta adinekoen zentroetarako diseinatu dugun programazioa jarriko dira martxan, gure erabiltzaileei 230 lantegi eta ia 2.700 leku eskainita“, adierazi du Armentiak.

2020-2021 jarduera-programa covid-19ak sortutako zirkunstantzia berezietara egokitu da: higiene eta osasun-segurtasunaren alorreko neurri zorrotzak hartuko dira, eta lantegi eta ikastaroetan parte-hartzaileen kopurua mugatuko.

 

Share

Adinekoentzako zentro soziokulturalen sareak jantoki-plazen kopurua handituko du, lantegien eskaintza handituko eta bakardadearen aurka egiteko “Piztu zure auzoa” programa hiri osora zabalduko

Kudeaketa-kontratu berriak hobekuntza garrantzitsuak aurreikusten ditu hurrengo bi urteetarako

Jantokiko 68 plaza berri egokituko dira, eta beste 400 lantegi eta ikastaroetan

Udalak laster esleituko du adinekoentzako zentro soziokulturalak kudeatzeko kontratu berria, oraindik lizitazio-fasean baitago. Kontratu berriari esker, Gizarte Politiken, Adinekoen eta Haurren Sailak hobekuntza garrantzitsuak egingo ditu baliabide horien 35.000 erabiltzaileri baino gehiagori eskaintzen dizkien zerbitzu eta programetan.

Berrikuntzak urritik aurrera iritsiko dira, kudeaketa bi urterako esleitu ondoren eta 3,3 milioi euroko urteko aurrekontuarekin —egungo kontratuak baino ia milioi erdi euro gehiago—. Berrikuntza nagusietako bat zentro bat gehiago kudeatu beharra izango da, San Martinekoa, datozen hilabeteetan irekiko baita; beraz, dagoeneko 16 izango dira udal sarea osatzen duten adinekoentzako zentro soziokulturalak.

Zentro soziokultural berria sareko handiena izango da eta zerbitzu guztiak izango ditu: informazioa, kafetegia, ile-apaindegia, podologia, hemeroteka, infoteka, osasun-parkea, erorketen prebentziorako programa eta animazio soziokulturalerako programa, baita 48 plazako jantokia ere. Plaza horiei Aranako zentroan sortu berri diren beste 20 plaza gehituko zaizkie; bertan egokitzapen-lanak egingo dira datozen hilabeteetan, jankideen kopurua 70era arte handitu ahal izateko.

Jantoki-zerbitzuak bazkari osoa eta egokia eskaintzen du, eta erabiltzaileen gizarte-integrazioa sustatzen; urte osoan erabili ahalko da, zerbitzu hori duten 10 zentroetan. Adinekoentzako jantoki-sareaz gain, beste hiru jantoki daude udalaren zainpeko apartamentuetan; horrenbestez, guztizko eskaintza egunean 700 menutara iritsiko da.

Bakardadeari aurre egitea

Kontratu berriarekin, adinekoentzako zentro soziokultural guztiek animazio soziokulturaleko teknikari bat izango dute; beraz, orotara 16 egongo dira —gaur egun 10 ari dira sare osoari arreta emateko lanetan—. Horri esker, zentro guztietara zabaldu ahalko da “Piztu zure auzoa” programa. Programa hori bakardade-egoeran dauden adinekoei zuzenduta dago, eta gaur egun Koroatzean, Landazurin eta Pilarren garatzen da.

Langile gehiago izateak auzoetako erakunde eta elkarteekin lan komunitarioa sustatzea ere erraztuko du; hain zuzen ere, horixe proposatu zioten sailari adinekoek berek iaz zentro soziokulturalen parte-hartze eredua ebaluatu zutenean. “Auzo bakoitzeko sare komunitarioetako lana sustatuko dugu eta belaunaldien arteko jarduera gehiago antolatuko ditugu. Ikastetxeen, goi-mailako eskolen eta unibertsitatearen lankidetza bilatuko dugu, beste adin-talde batzuekin topaketak eta ezagutza-trukeak sustatzearren. Horrek gure hiriko gazteek adineko pertsonei eta zahartzeari buruz duten irudia hobetzen lagunduko digu”.

Zurrumurruen aurkako estrategia bat ere garatuko da, eta esperientzia berri bat abiaraziko da, zeinaren bitartez adinekoek eskainiko baitizkiete ikastaroak, lantegiak eta jarduerak beste adin batzuetako taldeei. Belaunaldien arteko programa horrek hiru lantegi eskainiko ditu zentro bakoitzeko, eta adinekoek beren ezagutzak eta trebetasunak transmitituko dituzte horietan.

Lantegi eta leku gehiago

Urritik aurrera, adinekoentzako zentroek aldatu egingo dute ixteko ordutegia, eta ordu erdi aurreratuko da, hau da, 20:30ean amaituko da jarduera. Izan ere, ordu horretatik aurrera jende gutxi ibili ohi zen zentroetan; horrek baliabideak birbanatzea ahalbidetuko du, beste zerbitzu eta programa batzuk bultzatzeko.

Horrekin lotuta, ikastaro eta lantegien eskaintza 12.812 ordukoa izatetik 14.218 ordukoa izatera igaroko da. Hau da, 30 lantegi gehiago eskainiko dira —319ra iritsi arte—–, eta 450 leku gehiago; beraz, 4.000 adinekok gozatu ahalko dute askotariko jarduerez.

Era berean, osasun-parkeen erabiltzaileentzako arreta 713 ordutan handituko da, eta osasun-parke gehiagotan izango da dinamizazioa, gaur egungo 8etatik 12ra igarota.

Azkenik, Abetxuku, Judimendi eta Sansomendiko zentroek ordubetez luzatuko dute informazio-zerbitzuen ordutegia: egunean 4 ordutik 5 ordura igaroko dira, astelehenetik ostiralera.

Share

Astelehenean irekiko dira berriro adinekoentzako zentro soziokulturaletako bederatzi jantokiak, 566 lekurekin

Datorren astelehenean, ekainak 15, irekiko dira berriro adinekoentzako zentro soziokulturaletako bederatzi jantokiak. Hasteko 566 leku eskainiko dira, segurtasun- eta higiene-neurri zorrotzak hartuta erabiltzaileen osasuna zaindu eta bermatzearren.

Alarma egoerak zerbitzua ixtera behartu aurretik ezarritako neurri berak bete beharko dira. Hau da:

  • Bi metroko tartea mahaien artean.
  • Pertsona bakarra mahai bakoitzeko, edo bi bikotekideak edo elkarrekin bizi diren senideak badira.
  • Sarreran tenperatura hartzea.
  • Eskuak nahitaez garbitzea.
  • Jantziak eta norberaren gauzak poltsa batean gordetzea, ezingo baitira esekitokiak erabili.
  • Zerbitzua amaitutakoan jantokia, mahaiak eta abar garbitu eta desinfektatzea.

Urruntze sozialeko neurriak aplikatu direnez, jantokiek leku gutxiago izango dute. Hori dela eta, bi txanda egingo dira jende gehien joaten den jantokietan: Arana, Koroatzea, Herrandarrak, Txagorritxu, San Prudentzio eta Zaramaga. Lehen txanda 13:00etan izango da, eta bigarrena, 14:15ean. Erabiltzaileek zerbitzua hasi baino 15 minutu lehenago egon beharko dute bertan.

“Beste urrats bat da normaltasunerako bide luzean. Adineko asko zeuden une horren zain, jantoki-zerbitzuak laguntza handia ematen baitie egunerokoan eta, gainera, erlazionatzeko aukera baitute, nahiz eta oraingo egoeran distantzia eta segurtasun-neurriak betez egin beharko duten” gogoratu du Gizarte Politiken, Adinekoen eta Haurren zinegotzi Jon Armentiak.

Zerbak eta odolkia

Bitxitasun gisa, deseskalatzearen lehen egunean adinekoentzako jantokiek zerbak patata eta azenarioekin eta odolkia tomate eta piperrekin zerbitzatuko dute, San Prudentzioko sukalde zentralean eginak.

Share

Adinekoentzako zentro soziokulturalek aire zabalean egiteko udako programazioa landu dute, 83 ikastaro eta lantegik osatua

Informazio liburuxka honetan

Bihar irekiko da izena emateko epea eskaintzen diren 800 lekuetarako

Adinekoentzako zentro soziokulturalak jarduerak eta programak berreskuratzen ari dira pixkanaka. Duela gutxi informazio, podologia eta ile-apainketa zerbitzuak ireki ziren, eta laster udako programazioa jarriko da abian; aurten, osasun-segurtasuna dela eta, aire zabalean egingo da oso-osorik.

Bihar, ekainak 5, irekiko da izena emateko epea, eta orotara 83 ikastaro eta lantegi eskainiko dira ekainaren 15etik irailaren 30era bitartean. Guztira 800 leku 60 urte edo gehiago dutenentzat. Askotariko jarduerak izango dira: txikung, biodantza, gimnasia, smartphoneen erabilera, internet, ibilaldiak, etab.

Jardueretan 2-6 saio izango dira, 60-90 minutukoak, eta espazio irekietan emango dira: parke eta lorategietan (Zadorra eta Arana), plazetan (Santa Barbara eta Laudio) edo barruko patioetan (Landazuri), besteak beste.

“Koronabirusa dela eta bizitzen ari garen egoera kontuan izanik, programazioa aire zabalean egiteko moldatu dugu, adinekoek segurtasunez parte hartu dezaten. Jarduerak kalean egiteaz gain, beste neurri batzuk hartuko dira osasuna babesteko, hala nola distantziak ezartzea eta espazioak mugatzea”, azaldu du Gizarte Politiken, Adinekoen eta Haurren zinegotzi Jon Armentiak.

Jardueretan izena emateko prezioa merkea izango da, saio kopuruaren araberakoa. Esate baterako, bi saioko lantegiek —ordubetekoak— euro 1 balioko dute, eta sei saiokoek —ordu eta erdikoak— 3,50 euro.

Izen-ematea telefonoz

 Izen-ematea telefonoz egin beharko da, zentro hauetako batean: Abetxuku, Arana, Aranbizkarra, Ariznabarra, Koroatzea, Pilar, Lakua-Arriaga, Landazuri, Herrandarrak, San Kristobal, San Prudentzio, Txagorritxu eta Zaramaga.

Udalaren web-orrian eta adinekoentzako zentro soziokulturaletako sarreran eskuratu daiteke informazio guztia.

Udako programazioaz gain, beste jarduera batzuk antolatu dira bakarrik bizi diren eta ahultasun egoeran egon daitezkeen adinekoentzat.  “Piztu zure auzoa” programak beste pertsona batzuekin biltzeko aukera eskaintzen die, gaurkotasuneko gaiez hitz egiteko eta laguntza eman eta jasotzeko. Harremanak izatea eta bizipenak eta esperientziak partekatzea da helburua.

Interesdunek Aldabe, Pilar eta Landazuriko zentro soziokulturaletara deitu dezakete informazioa eskatzeko.

Share

Adinekoentzako zentro soziokulturalek podologia eta ile-apaindegi zerbitzuak irekiko dituzte

Maiatzaren 25ean (astelehena) irekiko dira adinekoentzako zentro soziokulturaletako informazio, ile-apaindegi eta podologia zerbitzuak, itxita egon baitira koronabirusaren pandemia dela eta.

Deseskalatzearen 2. fasearekin batera irekiko dira zerbitzu horiek, behar diren segurtasun-neurriak hartuta eta aldez aurretik hitzordua eskatuta.

Zentro hauetako ile-apaindegiak irekiko dira: Arana, Ariznabarra, Koroatzea, Pilar, Lakua-Arriaga, San Kristobal, Sansomendi, Txagorritxu eta Zaramaga. Ohi bezala, zerbitzua ematen duen langilearekin zuzenean hartu beharko da hitzordua.

Podologia kontsultei dagokienez, zentro hauetakoak irekiko dira: Arana, Koroatzea, Lakua-Arriaga, San Kristobal, San Prudentzio, Txagorritxu eta Zaramaga. Ekainean, covid-19aren ondorioz hitzorduak bertan behera utzi zitzaizkien erabiltzaileei emango zaie arreta. Uztailaren aurrera emango dira hitzordu berriak.

Hala ile-apaindegian nola podologia zerbitzuan areagotu egingo dira garbiketa eta desinfekzio lanak, eta segurtasun-neurriak hartuko dira, hala nola eskularruak eta maskarak erabiltzea edo lekuak egokitzea itxarongeletan hainbat pertsona elkartu ez daitezen.

Tenperatura hartzea

Zentro soziokulturaletako informazio-zerbitzuak ere berriro hasiko dira lanean: aipatutako zerbitzuetarako sarbidea kontrolatuko dute, eta tenperatura hartuko dute kutsatzerik ez gertatzeko.

Share

Adinekoek eta Santa Maria ikastetxeko ikasleek adore emateko mezuak trukatzen dituzte koronabirusari aurre egiteko

Belaunaldien arteko programan hartzen dute parte, eta egun hauetan bideoak eta marrazkiak landu eta partekatzen ari dira.

Adinekoentzako zentro soziokulturaletako erabiltzaileak eta Santa Maria HLHIko ikasleak adore emateko mezuak trukatzen ari dira covid-19aren pandemiari aurre egiteko.

Batzuek zein besteek Udalak sustatzen duen “Piztu zure auzoa” belaunaldien arteko jardueran hartzen dute parte, eta horren bidez lotura estuak sortu dira ikasleen eta adinekoen artean.

Bazirudien osasun krisiak errotik moztuko zuela harreman hori, baina azkenean mantendu egin da, esperientzian ari diren 22 umeek mezuak, bideoak eta marrazkiak bidali baitituzte. Jardueran parte hartzen ari ziren 25 adinekoak, berriz, esker oneko bideo bat egitera animatu dira.

2018an hasi zen Santa María de Vitoria ikastetxea “Piztu zure auzoa” programan parte hartzen. Adinekoak eta umeak zenbait gai lantzeko elkartzen dira: irakurtzeko laguntza, abegikortasuna hirian, ibilbide seguruak, migrazio esperientziak, eta abar. Belaunaldien arteko lan horretatik harreman ugari sortu dira eta orain, koronabirusaren garai hauetan, bizirik jarraitzen dute, teknologia berriei esker.

Share