Prentsa Oharren banner
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  15 apirila 2019 11:54

 

  • EHUren Gasteizko Ekonomia eta Enpresa Fakultatean eskaintzen da berezko titulu hori, eta Araban ezaugarri horiek dituen lehena da

 

 

Gasteizko alkate Gorka Urtaranek eta Euskal Herriko Unibertsitateko Ekonomia eta Enpresa Fakultateko dekano Jon Barrutiak lankidetza-hitzarmen bat sinatu  dute, 2018/19 ikasturtean ‘Digital Management & ERP: Gestión de la Empresa 4.0’ masterra izeneko berezko tituluari dagokion prestakuntza programa garatzeko, EHUko organo eskudunak onetsitako ikasketa planari jarraituz.

Euskal Herriko Unibertsitateak erabaki du ‘Digital Management & ERP: Gestión de la Empresa 4.0’ masterra izeneko berezko tituluari dagozkion ikasketak ezartzea Gasteizko Ekonomia eta Enpresa Fakultatean; hain zuzen  ere, Arabako Lurralde Historikoan ekonomia eta enpresaren alorrean eskaintzen den lehen graduondoko titulua da. Gasteizko Udaleko Enpleguaren eta Garapen Ekonomiko Iraunkorraren Sailak 15.000 euro jarriko ditu 2019ko ekitaldian titulu horri dagozkion gastuak finantzatzen laguntzeko.

“Lan-merkatua enpresen eraldaketa digitala kudeatzeko gauza diren profesionalak eskatzen ari da, eredu ekonomiko berrirantz eboluzionatzearren. Eskaera horri erantzuteko, zer hoberik enpresa, erakunde eta akademiako eragileen ahaleginak batzea baino, teknologia berrietan, negozio eredu berrietan eta talentuaren sorkuntzan prestakuntza irtenbideak martxan jarriz. Azken bi urteetan 4.0 eremuko titulazio berriak sortu dira Gasteizen unibertsitatearen, Lanbide Heziketako ikastetxeen eta prestakuntzaren alorreko beste eragile batzuen eskutik. Gaurkoa beste aurrerapauso bat da bide horretan”, adierazi du Gorka Urtaran alkateak.

Hainbat alorretako titulatu berriei (Enpresa Kudeaketa eta Zuzendaritza, Ekonomia, Marketina, ingeniaritzak, Informatika, Negozio Kudeaketa, Enpresa Zientzietako Diploma…) eta enpresa-kudeaketaren alorreko profesionalei zuzentzen zaie masterra. Modulukako egitura malgua du. Bi espezialista ikastarok osatzen dute, bakoitza 300 ordukoa, zeinak aldi berean edo bi ikasturtetan egin baitaitezke: “Enpresaren kudeaketa digitala” espezializazio ikastaroa, eta “Enpresa kudeaketarako sistemak-ERP” espezializazio ikastaroa. Ikasleak bi modutara egin dezake matrikula: espezializazio ikastaroetako edozeinetan izena eman eta EHUko “Espezializazioa” berezko titulua lortu, edo bi ikastaroak egin, urte berean edo urte ezberdinetan, eta “Master” titulua lortu.

Jon Barrutiaren iritziz, “master horrek aukera ematen du gaitasun profesionalak garatzeko osagarri digitala oinarri duen eremu ekonomiko eta sozial berri batean jarduteko. Berritzailea eta zeharkakoa denez, ibilbide profesional sendo baterako bidea izan daiteke, eta 4.0 enpresarekin lotutako profil profesional ugari betetzen ditu. Hainbat alorretako prestakuntza eskaintzen du, hala nola negozio digitalen modelizazioa, agile metodologiak, marketin digitala (SEO, SEM, datuen analisia), ERP, informazioaren teknologiak… Horretaz gain, enpresetan borondatezko praktikak egiteko programa eskaintzen du, eta lan-poltsa

Ikasturte honetan hasi da ‘Digital Management & ERP: Gestión de la Empresa 4.0’ masterra ematen, eta prestakuntza proposamen horretan beste eragile batzuek hartu dute parte EHUz gain: SEA-Arabako Enpresariak eta Ekonomisten Euskal Elkargoak.

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  12 apirila 2019 11:28

-Vitoria-Gasteiz Smart Green City Planean jasotako neurrietako bat da, eta egitura guztiak onik uzteko eta irisgarritasunaren aldetik egokitzeko balioko du

-Horrelako kontratuetan ohikoa den bezala, enpresa adjudikaziodunak inbertsio handia egin beharko du, eta Udalari gutxienez 70.000 euroko kanona ordaindu euskarriak publizitaterako ustiatzearen truke

-Kontratuak 28 milioi eurotik gorako prezioa du, inbertsioa eta hiri-altzariak 15 urtez mantentzea barne

 Hiru enpresa aurkeztu dira hiri-altzariaren kontratu berriaren lizitaziora: JCDecaux, Promedios eta Induze. Bukatu da eskaintzak aurkezteko epea. Kontratua otsailaren 22an onetsi zuen Urtaranen Gobernuak, Tokiko Gobernu Batzarrean. Gasteizko markesinak berritzeko eta modernizatzeko, eta Vitoria-Gasteiz Smart Green City Plana garatzeko, kontratuak barne hartuko du tamaina handiko pantaila digitala duten 20 markesina berri jartzea eta geralekuko 40 argibide-gune berri jartzea, besteak beste.

Horrelako kontratuetan ohikoa den bezala, enpresa adjudikaziodunak inbertsio handia egin beharko du hiri-altzarietan (ia bost milioi euro), eta Udalari kanon bat ordainduko dio espazio publikoa erabiltzeagatik. Gutxienez 70.000 eurokoa izango da, baina lehiaketara aurkezten diren enpresek kopuru hori gainditu ahalko dute eskaintzan. Horren truke, markesinen eta kontratuan aurreikusitako hiri-altzarien publizitate-ustiapena kudeatuko du adjudikaziodunak; dena den, udalaren publizitaterako tarteak erreserbatu beharko ditu. Udalak kalkulatu du kontratuaren prezioa 28 milioi eurotik gorakoa dela, inbertsioa eta altzarien mantentzea barne; gauzatzeko epea 15 urtekoa da. Inbertsioak zazpi hilabeteko epean egin beharko dira.

Markesinei dagokienez nabarmendu beharra dago Patxi Mangado arkitekto nafarraren jatorrizko diseinuarekin jarraitzea erabaki dela, dagoeneko Gasteizekin identifikatzen den diseinu modernoa eta funtzionala dela iritzita. 20 markesina berriek, dena den, tamaina handiko LCD pantaila digital bana izango dute; pantailek eguneko 24 orduetan eta asteko 7 egunetan funtzionatuko dute. Erasoen kontrako eta eguraldi txarretik babesteko elementuak ere izango dituzte. Konektagarritasunari dagokionez, Ethernet, 3G/4G, Bluetooth, Wifi eta NFC teknologiak baliatzeko prestatuta egongo dira.

Geralekuko 40 argibide-gune berri instalatzea ere barne hartzen du kontratuak, baita kontratuan sartutako altzari guztien metalezko egitura eguneratzea ere. Gaur egun, honako elementu hauek daude Gasteizen: 222 markesina, hirian eta industrialdeetan, eta beste 28, kontzejuetan; 4 argibide-taula elektroniko; 178 MUPI; 10 komun; 20 erloju-termometro; 96 zutoin, autobus geralekuetan; 17 zutoin, taxi geralekuetan, 53 informazio-panel, eta geralekuko 98 argibide-gune.

Onik uztea eta irisgarritasunaren aldetik egokitzea

Onik uzteak lan hauek hartuko ditu barne: osorik garbitzea (baita eranskailuak kentzea ere), herdoildutako zatiak lixatzea, korrosio-kontrako inprimaketa duen pinturaren esku bat ematea, eta herdoilaren aurkako ezaugarriak dituen pinturaren bi esku. Binilo apaingarriak eta TUVISAren binilo korporatiboak eta informaziozkoak aldatuko dira.

Orobat, irisgarritasunaren arloko araudira egokituko dira geralekuak, eta euskarri iskiatikoa duten eserlekuak jarriko dira. Altzarien gutxieneko altuera ere aldatuko da, itsuei edo ikusmen-desgaitasuna duten pertsonei irisgarritasuna bermatzearren.

Halaber, enpresa adjudikaziodunak pantailadun 20 markesina berriez hornitzeaz gain, gaur egungoetako 40 ordeztuko ditu —BEAren markesina berriak jarriko ditu haien ordez—. Horretaz gain, lekuz aldatuko ditu autobus-geralekuko 30 zutoin.

BEAren markesinen mantentzea eta publizitate-ustiapena ere kontratu honen adjudikaziodunaren ardura izango da, eta berez garbitzen diren zortzi komun jarri beharko ditu, TUVISAko gidarientzat. Gainera, pantaila sarean erakundearen komunikaziorako tarteak utzi beharko dizkio Udalari.

Nabarmendu beharra dago adjudikatzeko irizpideetan proposamen tekniko eta ekonomikoaz eta ingurumen- eta irisgarritasun-irizpideez gain beste alderdi batzuk hartuko direla kontuan, hala nola kontratuaren luzapena laburtzea, Udalari publizitate-tarteak uztea, eta pantaila kopurua handitzea.

Abuztuan lizitatu zuen Udalak kontratua, eta enpresa bakarra aurkeztu zen. Enpresa hark ez zituen betetzen eskatu beharreko gutxieneko betekizunak, Udal Zerbitzu Teknikoen arabera. Horren ondorioz, adjudikazioa hutsik geratu zela deklaratu zuen Tokiko Gobernu Batzarrak. Enpresak errekurtso berezia jarri zuen bera prozeduratik kanpo uztearen aurka. Ondoren, Euskal Autonomia Erkidegoko Kontratuen inguruko Errekurtsoen Administrazio Organoak ebatzi zuen enpresaren errekurtsoa ezestea, eta zuzentzat jo zuenadjudikazioa hutsik geratu zela deklaratzeko Tokiko Gobernu Batzarraren erabakia.

Share
Kategoriak: Fotonotizia  —  Etiketak: , ,   —  Komunikazio Zerbitzua / Servicio de Comunicación  —  11 apirila 2019 13:38

 

 

 

 

 

 

Gasteizko alkate Gorka Urtaranek, alkateorde Peio López de Munainek, Hezkuntza, Kultura eta Kirolaren zinegotzi Estíbaliz Cantok eta erakundeetako hainbat ordezkarik Euskal Herriko Itzuliaren laugarren etaparen hasierako zinta-ebaketan hartu dute parte. Itzulia Arrigorriagarantz abiatu da Gasteiztik.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  10 apirila 2019 10:46

 

 

 

 

 

 

Berrehun pertsonatik gora hurreratu dira Goiuri jauregira Gasteizko lehen Udalbatza demokratikoak egindako lana aitortzera, hura eratu zenetik 40 urte igaro direnean. Ekitaldian 1979an hautatu zituzten hamabi udalkidek hartu dute parte, bai eta zendutakoen senideek ere. Gainerako legealdietan zinegotzi lanetan aritu direnetako batzuk ere hurbildu dira, egungo Udalbatzako kide gehienekin batera.

Omenaldiari hasiera emateko Luis Aranburu Musika Eskolako eta Jesus Guridi kontserbatorioko Ariadna hari-laukoteak Sebastian Iradierren “La Paloma” konposizioa jo dute; gero, Gasteizko alkate Gorka Urtaranek hitz batzuk esan ditu lehen udalbatza demokratikoak egindako lana eskertzeko eta historiako berrogei urte hauetan erdietsi diren lorpen handienen gainbegiratua egiteko.

“Aitzindariak izan zineten euskal udalgintza berrian. Gure hirian gizarte, ekonomia eta ingurumen arloko garapena gauzatzeko oinarriak ezarri zenituzten. Errealitatetik hurbileko politikan, pertsonekin harreman zuzena duen horretan, lehen urratsak eman zenituzten. Zuei eskerrak egun Gasteiz hiri modernoa da”, azpimarratu du Urtaranek. Izan ere, alkatearen ustetan, etengabeko aldaketa sakonez jositako testuinguru sozial eta politiko zail hartan egindako lanari esker daukagu gaur egun dugun superhiria, tokiko politika askotan aitzindari eta erreferente dena.

Lehen udalbatza hura osatu zuten 34 pertsonen izenak irakurri bezain laster ohorezko aurreskua dantzatu diete, eta horren ondoren, lehen Udal hura osatu zuten lau alderdi politikoetako ordezkari banak hitz egin die bertaratutakoei: Severino Rodríguez de Yurre, Luis Alberto Aguiriano eta Alfredo Marco Tabar zinegotzi ohiak mintzatu dira lehenik, eta amaitzeko, José Ángel Cuerda, lehen alkate demokratikoaren txanda izan da.

Cuerdak “besarkada hunkitua” helarazi die lehen udalbatza hura osatu zuten guztiei, eta jada gure artean ez daudenekin oroitu da bereziki. 1979ko apirilaren 3aren inguruko gertakari historikoei gainbegiratua eman eta gero –orduan izan baitziren lehen udal hauteskundeak–, hiriak demokraziaren barruan duen funtsezko balioa nabarmendu du, eta, azpimarratu, udalak oinarrizko komunitate politikoak direla ongizatea eta pertsonen arteko berdintasuna bermatzeko. Alkate-zereginetan hogei urtez aritutakoak politikagintzaren hiru ardatz nagusi azpimarratu ditu: solidaritatea, hezkuntza eta partaidetza. “Printzipio horiek zuenganatu eta, norberak bere ikuspuntutik, noski, guztion ongizatea bermatuko duen hiri bat lortzeko bidean urratsak ematen jarrai dezazuen animatzen zaituztet”.

Gaur egin den aitorpen ekitaldiaz gain, zeina Jesús Guridiren musikaz amaitu den, Goiuri jauregiak Udalbatza demokratikoaren 40. urteurrena ospatzeko argazki-erakusketa bat ere hartuko du egunotan.

Hona hemen lehen Udalbatza demokratikoa osatu zuten eta gaurko ekitaldira hurreratu direnen izenak: José Ángel Cuerda, Mª Lourdes Aburto Ascolizaga, Patxi Ormazabal Zamacona, Pablo López De Heredia, Benedicto Barrios, Alfredo Marco Tabar, Miguel Angel Echevarria, Jose Vidal Sucunza, Luis Alberto Aguiriano, Augusto Borderas, Severino Rodriguez De Yurre, Guillermo Perea

Zendutako udalkide hauen senitartekoak ere bertan izan dira: Mª Jesús Agirre, Luis Aldaiturriaga, Mercedes Villacian, Enrique Villar, Primitivo Prieto, José Pérez Valderrama, Jesús Ignacio Ibáñez de Matauco, José Ramón Molinuevo

 

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  5 apirila 2019 11:36

 

 

 

 

 

 

Gasteizko udaletxeko harrera aretoan Elikagaien Bankuen Euskadiko Federazioari harrera egin zaio gaur goizean. Gorka Urtaran alkatea eta Federazioko lehendakari Daniel Fernandez buru izan dituen ekitaldira hainbat pertsona hurreratu dira, besteak beste: ehundik gora boluntario, EAEko hiru elikagai-bankuetako arduradunak, Enplegu eta Gizarte Politiken sailburu Beatriz Artozabal eta foru diputatu Marian Olabarrieta.

 

 

 

 

 

 

 

 

Alkateak aipamen berezia egin nahi izan dio elikagaien bankuetan egiten duten “ezinbesteko lanari”, “herritar guztiok harrotzeko modukoa” baita. Elikagaien Bankuek krisiak kolpatutako familiei elikagaiak bermatu dizkiete, eta, hein handi batean, boluntarioz osatuta daude –gehienenak erretiratu edo aurre-erretiratuak–. Aurten Araban antolatuko da Euskadiko Elikagaien Bankuen Ohiko Asanbladara Orokorra, hemendik aurrerako jarduerak, proiektuak eta helburuak bateratze aldera.

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —   11:00

 

Udalak 235.000 euro baino gehiago inbertituko ditu hiru kale horiek eraberritzen, trafikoa lasaitzeko eta oinezkoen segurtasuna hobetzeko neurriak barne

Hiriak 160 kilometro bidegorri baino gehiago izango ditu

 

BIDEGORRIAK LEGUTIANO-ZUAZO DOSIERRA

Gasteizko alkate Gorka Urtaranek Legutianoko atea eta Zuhatzuko atea  eraberritzeko kontratuak esleitu direla eman du ezagutzera gaur goizean. Esku-hartze horiei esker hiriak 160 kilometro bidegorri baino gehiago izango ditu

Lanek 235.826,68 euroko inbertsioa izango dute, eta trafikoa lasaitzeko eta oinezkoen segurtasuna hobetzeko neurriak barne hartuko dituzte. “Hainbat talderen eskaera eta ekarpenei esker egingo dira ekimen hauek. Mugikortasun Iraunkorrerako Planean oinarrituak dira”, nabarmendu du Gorka Urtaranek. Aipatutakoekin lotuta bi dosier onetsi ditu gaur goizean Tokiko Gobernu Batzarrak, bata Leza kalean (Zabalgana) egitekoak diren lanak. 264.742,82 euroko aurrekontua dute lanek eta 10 astetako epea. Construcciones Aguillo eta Balgorza enpresek egingo dituzte lanak.

Gaur abiarazi den bigarren eraberritzea Legutianoko atean egitekoa da, Nafarroako Errege-Erreginen kaletik Zuiako Taldearen kaleraino. Esku-hartzearen helburuak antzekoak dira: trafikoa moteltzea, oinezkoen mugikortasuna hobetzea, garraio publikorako irisgarritasunaren hobetzea, eta bidegorria jartzea. Kale horretatik ibilgailu ugari zirkulatzen dira, eta horretarako dago diseinatuta. Zehazki, 3,75 metroko zabalerako espaloiak ditu, bateriako aparkalekuak bi aldeetan, hiru zirkulazio-errei noranzko bakoitzean, eta bi metroko erdibitzailea. Kaleak merkataritza-jarduera garrantzitsua du. “Disenuak ez dio jarduera horri laguntzen, espaloiak estuak baitira, eta trafikoa, azkarra eta dentsitateko handikoa”, azaldu du alkateak.

Udalaren proiektuaren arabera, galtzadan bi bidegorri jarriko dira, 2,40 metro zabal izango direnak, bereiziak eta bi noranzkorekin. Iparraldetik zein hegoaldetik (Burgos kaleraino) joango dira. Orobat, baterian aparkatzen duten gidarientzako espazioa ere utziko da horien ondoan. Horretarako, zirkulazio-errei bat kenduko da alde bakoitzean. TUVISAren geltokiak ere egokituko dira, nasa irisgarriagoak eraikita (autobusarekiko desnibela murrizteko). Bidegorria 330 metro luze izango da iparraldeko zatian, eta 350 metro luze hegoaldean.

Espazio Publikoaren Zerbitzuak Zuhatzuko aterako ere antzeko esku-hartzea proposatu du. Kale horrek 7 metroko espaloiak ditu, 16,50 metroko galtzada, bi zirkulazio-erreitan banatuta, eta bateriako aparkalekuak bi aldeetan. “Esku-hartzearen bitartez trafikoa moteldu eta mugikortasun aktiboa sustatu nahi da. Bereziki, inguruan Zabalganeko gizarte etxea zabaldu dela kontuan hartuz”. Proiektuaren arabera, galtzadan bidegorri bat jarriko da, bereizia eta bi noranzkorekin, UNICEFen hiribidea eta Sofia Erreginaren hiribidea Mariturri bulebarrarekin lotzeko. Orain dagoen bateriako aparkalekua baliatuko da 2,40 metroko bidegorria sortzeko, 0,80 metroko babesarekin eta 2,5 metro hartzen duen bateriako aparkalekua utzita. Zirkulazio-erreia estutu egingo da, halaber.

Sofia Erreginaren hiribidean eta Mariturri bulebarrean badira bi noranzkoko bidegorriak, espaloian. Sofia Erreginaren hiribidetik Juan Gris kaleraino, bizikleta bidea iparraldeko espaloiaren ondotik joango da. Juan Gris kaletik aurrera, hegoaldetik. Oinezkoentzako pasabide jaso baten ondotik gurutzatuko da. Orobat, oinezkoentzako bi pasabide egingo dira. Bata Moreda ibilbidean eta bestea Salvador Dalí kalean. Trafikoa lasaitzeko eta oinezkoak hobeto ikusteko hainbat neurri ere hartuko dira.  Bidegorri honek 835 metroko luzera izango du.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   10:14

Urtaranen Gobernuak onespena eman dio gaur goizean Gasteizko Udalean euskararen erabilera normalizatzeko Planari. Udalak sustatzen duen laugarren plana da, eta 2022ra arte izango da indarrean. Planaren xede nagusia da hizkuntzaren arloko helburuak ezartzea eta behar diren neurriak ezartzea herritarrek udalarekiko harremanetan nahi duten hizkuntza ofiziala (euskara ala gaztelania) aukeratzeko duten eskubidea bermatzeko. “Lanean jarraitu nahi dugu, herritarrei euskarazko arreta ematea bermatzeko, hartara Gasteiz euskararen hiria bihurtzen lagunduko baitugu”, nabarmendu du Gorka Urtaran alkateak.

Gaur onetsi den bide-orriak zenbait neurri proposatzen ditu Udalak herritarrekin dituen idatzizko eta ahozko harremanetan euskararen presentzia eta erabilera bermatu eta areagotzeko. Bereziki landu beharreko arlo batzuk identifikatu dira. Zehazki, irudi korporatiboa, idatzizko arreta eta ahozko arreta.

Irudi korporatiboari dagokionez, Planaren bidez 2022rako % 100era iritsi nahi da portzentaje hauetan: errotulazio eta ikus-entzunezko elebidunak (orain % 96 da); Udalaren argitalpen, iragarki, publizitate-kanpaina, prentsa-ohar eta paper elebidunak (orain, % 98), baita Udalaren web-orrian eta sare sozialetan argitaratutako edukiak ere (gaur egun, % 75 da euskaraz). Euskararen presentzia ekitaldi publikoetan ere % 55eraino handitu beharko da (orain % 45 da).

Herritarrekiko arretari dagokionez, idatzizko harremanen % 100 elebidunak izatea da erronka, eta euskaraz egiten diren galderen % 100i euskaraz erantzutea (egun % 97 eta % 98 dira portzentajeak, hurrenez hurren).  Beste helburu bat da herritarrei ahoz harrera egitean euskara edo bi hizkuntzak erabiltzea % 70ean (orain % 51an egiten da), eta euskaraz egindako eskaerei % 84an euskaraz erantzutea (orain, % 77,39an).

Hori guztia lortzeko neurrietako bat udal plantillan euskara laneko hizkuntza gisa sustatzea izango da. Horretarako zenbait bide planteatzen da: lanarekin lotutako hizkuntza paisaia euskarazkoa dela bermatzea, euskarri informatiko ohikoenen euskarazko bertsioak izatea, beste administrazio batzuekiko eta hornitzaileekiko harremanetan euskararen erabilera handitzea, edo beste keinu sinpleago batzuk, esaterako, karpeta eta armairuetan zein kafe-makinetan euskarazko errotuluak jartzea. Ildo horretatik, Euskara Zerbitzuak laguntzak, baliabideak eta orientabideak eskainiko dizkie udal langileei.

Horretaz gain, hizkuntza-irizpideak aplikatzen jarraituko da beste arlo askotan: dokumentazioa, komunikazio telematikoak, Udalaren web-orriko edukiak, telefono-aplikazioak, Udalaren irudi korporatiboa, dirulaguntzak eta hitzarmenak, etab.

 

Share
Kategoriak: Fotonotizia  —  Etiketak:   —  Komunikazio Zerbitzua / Servicio de Comunicación  —  4 apirila 2019 14:22

 

 

 

 

 

 

 Alkate Gorka Urtaranek, alkateorde Peio López de Munainek eta talde politikoen ordezkariek harrera egin diote gaur Erizaintzako XI. Biltzar Nazionalaren batzorde antolatzaileari; komunitate-erizaintzaren eta lehen mailako arretaren alorreko 500 profesional baino gehiago bilduko dira Gasteizen.

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  3 apirila 2019 14:48

 

Lan horrek hiriko musika-kulturaren potentzial izugarria erakusten duela azpimarratu du alkateak

Vitoria-Gasteiz sinfoniak amaiera bikaina emango dio San Prudencio Lan Fundazioaren 50. urteurrenari; bihar, hilak 4, estreinatuko da, Principal antzokian. Entitate horren ordezkariek, partituraren egile Bingen Mendizabalek, orkestra-zuzendari Juanjo Menak, diputatu nagusi Ramiro Gonzálezek eta alkateak hartu dute parte aurkezpenean. Lan horrek hiriko musika-kulturaren potentzial izugarria erakusten duela azpimarratu du Gorka Urtaranek.

Ilusio handia jarri da Sinfoniaren proiektuan. Fundazioa Juanjo Mena maisuarekin jarri zen harremanetan, eta ideia hau azaldu: L.W. Beethovenek 1813an Napoleonen soldaduen kontra borrokatutako Gasteizko Bataila —Independentzia Gerran erabakigarria— gogoratzeko konposatu zuen sinfoniaren kontrapuntua izango zen beste bat hiriari eskaintzea. Lan hura benetako poema sinfonikoa da, eta zazpigarren sinfoniaren kidea; garaiko bataila baten berezko soinuak tradizio ingeles eta frantziarreko melodiekin tartekatzen ditu.

Fundazioaren asmoa zen “bataila eta garaipena”, “ahalegina eta aurrerabidea” eta “borroka eta itxaropena” islatzen zituen poema sinfonikoa aurkeztea. Azken batean, “soinudun monumentu bat eraikitzea gure hiriaren ohoretan. Izan ere, hiriak  ez dira paisaiak eta eraikinak bakarrik, haien esentziarik puruena inspirazio iturria baita artistentzat milaka modutara begiratzen diotenean. Musika honen bidez sentimenduak mugiaraztea eta sentsazioak ernetzea da gure xedea”.

Proiektuaren sorkuntzak eta interpretazioak osorik arabarrak izan behar zuten. Hori dela eta, Bingen Mendizabali agindu zitzaion partituraren konposizioa. Ruper Ordorika poetak, berriz, abesbatzaren letra landu zuen, eta Kike Suárez-Albak, elektroakustikako elementuak. Juanjo Mena maisuaren zuzendaritzaren pean,“Camerata Gasteiz” taldea osatu da, zeinean 60 musikari arabarrek hartuko baitute parte, Jesús Guridi goi mailako musika kontserbatoriorekiko koordinazioan; kontserbatorioko haurren abesbatzak ere hartuko du parte, ahots teknika handikoa baita.

Aurkezpen-ekitaldian, alkateak San Prudencio Fundazioak hiriarekin duen lotura handia aipatu du, eta gizarte arloan, ingurumenean, osasunaren sustapenean eta jardunbide egokien arloan oro har egiten duen lan garrantzitsua azpimarratu. Era berean, berrogeita hamargarren urteurrena ospatzeko entitateak azken urtean antolatu dituen ekitaldiak goraipatu ditu Gorka Urtaranek. “Vitoria-Gasteiz sinfonia da gailurra, Euskadiko hiriburuko musika-kulturaren eta bertan jaiotako artisten potentzial izugarria ondo erakusten duen lana. Bingen Mendizabal eta Juanjo Mena nazioartean proiekzioa duen tokiko talentuaren adibide bikaina dira, eta oso harro gaude haietaz”, azpimarratu du Gorka Urtaranek.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  29 martxoa 2019 08:55

 

 

 

 

 

 

  • Oslo, Nijmegen (Herbehereak), Lisboa eta Gasteizek hiriburu berde izateko beren gakoak zein izan ziren azaldu diete Michelin hiriei, eta etorkizunera begira zer erronka dituzten azaldu.
  • Konferentziakideek Arabako Teknologia Parkea eta gizarte-etxeak bisitatu dituzte, eta Europa jauregiaren eta Zaramaga eta Koroatze auzoen birgaikuntza iraunkorraren nondik norakoak ezagutu dituzte. Horrez gain, Eraztun Berdera urreratu dira eta ibilbide bat egin dute hirigintza eta hiri-planifikazioari loturiko zenbait proiektu ikusteko.
  • Gaur arratsaldean sareko alkateek topaketa bat egingo dute 16:30ean, hirien artean beren aurrerapenak eta erronkak partekatzeko.

Gasteizen gertatzen ari den Michelin Hirien Nazioarteko Sarearen II. Biltzarraren bigarren egun honi hasierako emateko, Europar Batasunaren “Hiriburu berde” izendapena jaso duten 10 hirietako 4ren esperientziak entzun ahal izan dituzte parte-hartzaileek. Olso, Nijmegen (Herbehereak), Lisboa eta Gasteizek sareko gainerako hiriei erakutsi diete zein diren hiri iraunkorragoak eraikitzeko gakoak. Norvegiako hiriburuak –2019ko hiriburu berdea– lantzen ari den gaien zerrenda paregabea aurkeztu du, besteak beste, “klima-aurrekontua” –horren bidez hiriaren abantzamendua klima-aldaketaren eraginak arintzeko neurriekin lotzen dute– eta mugikortasun elektrikoaren aldeko apustu itzela –joan den urtean Oslon erosi ziren autoen % 40 elektrikoak ziren–. Horiez gain, hiri eskandinaviarreko udaleko teknikari den Kjersti Kanestrom-en ustez badira giltzarri izan diren beste zenbait alderdi, esaterako, “200dik gora partner publiko eta pribatu izatea, eskoletarako klima-aldaketari buruzko programa eta enpresen engaiamendua”.

Nijmegen-dik, Ultsje Van Gorkum Europa berdeago bat eraikitzeko berearen tanketako hiri ertainen paper garrantzitsuaz aritu da. Nijmegenek 177.000 biztanle ditu eta, hiru aldiz saiatu eta gero, Europako hiriburu berde izatea lortu zuen, besteak beste, honako lorpen hauei esker: eguzki-energiak hiriko kontsumoaren % 10 hartzea, 6 urtean ur-kontsumoa % 20 gutxitzea eta hondakinen birziklatze-tasa % 67an kokatzea.

Lisboak, 2020ko hiriburu berdea, bere prestakuntza-lanak eta etorkizuneko erronkak partekatu ditu. Erronka horien ardatza hiria goitik behera eraldatzea da, udalerri osora zabalduko den azpiegitura berdeen sarearen bidez; beti ere, hiritarrentzat onuragarriagoak izango den espazio publikoak lortzeko.  Portugalgo hiriburuan aholkulari lanetan ari den Duarte D´Araujo-k azaldu du proiektu horren garrantzia kanpoaldeko berdea baino askoz sakonagoa dela, “gizarteratzea, herritarren partaidetza eta klima-aldaketari egokitzeko neurriak ere sustatzen dituen ekimena da eta”. Lisboako ordezkariek hango hiri espazioetan gertatu den eraldaketa ikusgarria erakutsi dute, eta, horrez gain, ura berrabiltzeari loturiko proiektu batekiko egin duten konpromiso irmoa ere aipatu dute; iberiar penintsulan gero eta latzagoa den euri eskasiaren ondorio argia.

Azkenik, Gasteizen txanda izan da. Hasteko, 2012an Green Capital izatera eraman zuen bideoa erakutsi die parte-hartzaileei eta, gero, ordutik egin diren aurrerapenen berri eman die, mugikortasun iraunkorra eta eraztun berdea ardatz hartuta; izan ere, ibilgailu pribatuen erabileran gertatu den murrizketa nabarmena handienetarikoa da Europan, % 10 murriztu baititu garraioak sorturiko berotegi-efektuko gasak 2013az geroztik. Erantzun berdea, berriz, kanpoaldetik barnealdera ekarri da, hala, azpiegitura berde hori hirigunean ere sartzeko. IGIko Iraunkortasunerako Informazio eta Berrikuntza Arloko buru den Juan Carlos Escuderok azpimarratu du hiri berde bat eraikitzeko bidean berebiziko garrantzia duela hiritarrekiko kontsentsuak eta eraikuntza partekatuak, eta nabarmendu du Green Capitalen eta Michelin Hirien sareek egiten duten lana ezinbestekoa dela, etorkizun iraunkorrago bat sortze aldera, esperientziak partekatzeko eta elkarlanean aritzeko topaguneak sortzeko.

 Gaikako bisitak eta alkateen arteko topaketa

Hiri berdeen mahai-inguruaren ostean, konferentziakideek gure hiriko zenbait proiektu eta ekimen bisitatu dituzte: Arabako Teknologia Parkea, Eraztun Berdea, Mugikortasun Iraunkorrerako Plana, eta birgaikuntza energetikoaren eredu diren Europa jauregia, Koroatzearen auzoko SmartEnCity proiektua eta Zaramagako eraikin batzuk. Ibaiondo eta Zabalganeko gizarte-etxeetan zehar ere ibili dira.

Gaur arratsaldean, parte-hartzaileek gaika antolatutako lantegiak egiten dituzten bitartean, sarea osatzen duten hirietako alkateek lan-saio bat egingo dute Europa jauregian. Horren asmoa herrien artean lankidetza- eta eraikuntza-politika komunak bultzatzea da, gero eta iraunkorrago bihurtzeko. Gasteizko alkate Gorka Urtaran izango da bilera horren buru eta, besteak beste, Oviedo, Clermont-Ferrand, Pirot (Serbia), Cuneo (Italia) eta Anderson (AEB) hirietako udalburuak izango ditu mahaikide.

 

Share

Aurrekoak »