Prentsa Oharren banner
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  13 abendua 2019 13:35

 

Miñaoko berrikuntza zentroaren kolaboratzaile izan da hasieratik, patenteak eta ikergaiak partekatzen ditu 2019ko Kimikako Nobelaren irabazleetako birekin —John Goodenough eta Stanley Whittingham— eta nazioarteko zientzia komunitateak “etorkizuneko baterien hurrengo aita handitzat” jotzen du

 

Gasteizko alkate Gorka Urtaranek eta alkateorde eta Lurraldearen eta Klimaren aldeko Ekintzaren zinegotzi Ana Oregik CIC EnergiGUNEko zientzialari Michel Armand hartu dute gaur goizean. Izan ere, energiaren alorreko espainiar estatuko ikertzaile garrantzitsuena da Stanfordeko Unibertsitateak argitaratutako munduko 100.000 zientzialari nagusien zerrendaren arabera. Kaliforniako unibertsitate ospetsu horren sailkapenak munduan dauden 7 milioitik gora zientzialarien  lana aztertzen du, eta nazioarteko erreferentzia nagusia da zientzia eta ikerketaren profesionalentzat.

Udaletxean egindako ekitaldian, Maryse Armand emazteak eta CIC EnergiGUNEko zuzendaritza batzordeko kideak izan dira zientzialariarekin batera: Nuria Gisbert, Teófilo Rojo, Sara Ortiz, Asier Urzelai, Raquel Ferret, Javier Olarte eta Daniel Bielsa.

Michel Armandek patenteak eta ikergaiak partekatzen ditu 2019ko Kimikako Nobelaren irabazleetako birekin —John Goodenough eta Stanley Whittingham— eta nazioarteko zientzia komunitateak “etorkizuneko baterien hurrengo aita handitzat” jotzen du, mugikortasun elektrikoaren bidea markatuko duen bateria mota bat garatzen egin duen lanagatik.

Alkateak “CIC EnergiGUNE bezalako ikerkuntza zentroen garrantzia” azpimarratu du, “bertan proiektu erabakigarriak garatzen ari baitira Armand jauna eta beste zientifiko batzuk buru direla, eta Arabako Teknologia Parkea eta Gasteiz berrikuntzaren erreferente bihurtzen baitituzte nazioartean”.  Gorka Urtaranek erantsi du: “oso kontuan hartzen dugu lan garrantzitsu horrek duen balio erantsia, mugikortasun iraunkorraren bidea markatuko baitu, hau da, “Vitoria-Gasteiz Green Deal” planaren zutabeetako bat, zeinaren helburua baita berotegi efektua duten gasen isurketa murriztea, kalitateko enplegu berriak sortzea, ekintzailetza eta berrikuntza teknologikoa sustatzea, ekonomia berderanzko trantsizioa eta energia trantsizioa egitea energia berriztagarriak baliatuz, balio eta kultura berdeak hedatzea, eta gizarte kohesioa eta auzoen arteko oreka indartzea”.

Michel Armand Frantzian jaio zen, 1946an. 80ko hamarkadaren amaieran hasi zen litiozko bateria birkargagarriak ikertzen  —polimero solidozko elektrolitoarekin duen konbinazioaren bitartez—. Lan horiek erlazionatutako teknologia nagusiak garatzeko bide eman dute, ibilgailu elektrikoarena, besteak beste. Gaur egun, CIC energiGUNEko elektrolito solidoaren ikerketa sailaren arduraduna da, eta koordinatzen duen lantaldeak etorkizuneko ibilgailu elektrikoek eramango duten bateria solidoa lortzea du helburutzat.

CIC energiGUNE ikerketa zentroa erreferentziazkoa da Europan energia elektrokimikoa eta termikoa biltegiratzeari dagokionez. CIC energiGUNE Eusko Jaurlaritzako Ekonomiaren Garapen eta Azpiegitura Sailaren ekimen estrategikoa da energia biltegiratzearen ikerketan. Arabako Foru Aldundiaren eta Energiaren Euskal Erakundearen laguntza du, baita energiaren eta biltegiratzearen sektoreko Euskadiko enpresa nagusiena ere: Iberdrola, Cegasa Portable Energy, Sener, Siemens-Gamesa, Ormazabal, Idom, Solarpack, Mondragon Korporazioa eta Nortegas.

 

Share
Kategoriak: Prentsa oharrak  —  Etiketak: , , , , ,   —  Komunikazio Zerbitzua / Servicio de Comunicación  —   13:10

 

 

Gasteizko alkate Gorka Urtaranek baieztatu duenez, Eguberrien ostean hasiko dira ‘Connect Ibailakua’ proiektua egiteko eta Ospitale plaza eraberritzeko obrak. ‘Mejorando Vitoria-Gasteiz Hobetuz’  partaidetza programan proposatutako bi ekimen dira, eta 375.702 eta 362.034 euro inbertituko dira horietan, hurrenez hurren. Bi kasuetan, Balgorza enpresa arduratuko da lanez. “Herritarren ekimenak dira biak, eta datozen hilabeteetan mamituko dira. Gasteizko auzoak hobetzeko apustu irmoa egiten jarraitzen dugu”, azaldu du Gasteizko alkateak.

Lakua auzoan belaunaldien arteko aire zabaleko parke berria egingo da, hutsik dauden lursailak eta erabiltzen ez diren espazioak baliatuta. ‘Connect Ibailakua’ proposamenak azpiegitura berdearen filosofia du oinarri, eta Urtaranen gobernuaren Auzoen Planaren barruan sartuta dago.  Lanak egiteko 3 hilabeteko epea aurreikusi da.

Auzoko 11 lekutan egingo dira lanak, espazio hauek sortzeko:

1- Aisialdirako eta kirol askotarako gunea. Baia Ibaiaren kalearen eta Santa Engrazia Ibaiaren kalearen arteko bidegurutzean eta Inglares Ibaiaren kaleko familia bakarreko etxeen atzealdean dagoen lursail bat egokituko da, 9.000 metro koadrokoa. Beisbola, softbeisbola, criqueta edo lacrossea praktikatu ahalko dira, gaur egun zaila baita horietan jarduteko lekuak aurkitzea hirian.

2- Kometentzako lekua. Iruñea kaleko bidegorriaren eta Landaberde eta Xabier kaleen ondoan dagoen lursail trapezoidal batean —4.500 metro koadro ditu— haize-mahuka duen masta bat jarriko da, haizeak nondik jotzen duen jakiteko.

3- Agertokia. Ibaiondoko gizarte etxetik gertu dagoen berdegune biribilean —980 metro koadro ditu—, Wellingtongo Dukearen kalearen eta Landaberde kalearen artean, agertoki bat jarriko da, 12 metroko hiru eserleku jarraitu, eta eskailerak. Korten altzairuz egingo da egitura, eta gizarte etxeko jardueren osagarri izango da.

4- Aisialdi eta kirol espazioa. Bi lekutan (Belate kalearen eta Iruñea kalearen artean). Horietako batean, egoteko zona bat proposatzen da, muinoz osatua; bertan askaltzeko sei eserleku irisgarri jarriko dira, eta futbol-ateak, belar artifizialaren gainean. Bestean saskibaloiko saskiak instalatzea aurreikusten du proiektuak, hormigoizko zolata baitu.

5-Zirkuitu bio-osasungarria. Orio kalean dagoen espazio batean, Landaberde eta Bartzelona kaleen artean, zirkuitu bio-osasungarria jartzea proposatzen da (orain haur-jolas batzuk daude han). Pedalak, arrauna, eskia, bielak, eskailerak, masajea eta paralelak jarriko dira, baita informazio kartelak ere. Lau jolasez osatuko da eremua: mahai-teniseko 2 mahai, xakeko mahai bat, eta partxiseko beste bat.

6- Jolas inprimatuak. Girona kalean, Landaberde eta Bartzelona kaleen artean, jolasteko eta apaintzeko marrazkiak inprimatuko dira zoladuraren gainean. Kolore askotako suge bat eta taula zenbakidun bat, eskailera eta sugea dituena.

7-Badmingtona. Galeoia dagoen inguruan, erabiltzen ez den espazio batean, badmingtonean aritzeko pista bat egokitu nahi da.

8, 9 eta 10- Ori kaleko parke linealean, zolatuta dauden eta erabiltzen ez diren hiru espaziotan, hiru jarduera diseinatu dira: diana forma duen marrazki bat inprimatzea zoladuraren gainean (Irati kalearekiko bidegurutzean), kalistenia zirkuitu bat (Getaria kalearekiko bidegurutzean), eta altzairu galvanizatuzko saskibaloiko saski bat, bandaloen kontrakoa (Girona kalearekiko bidegurutzean).

11- BMX zirkuitoa.

Zarautz, Getaria eta Baiona kaleen arteko lursailean. Zirkuiturako pistak, muinotxoak eta donut bat sortuko dira, eta aisialdirako gune bat. Eserlekuak, argiak, landareak eta abar jarriko dira. Bi zirkuitu proiektatu dira: laburra, 65 metro luze eta 3 metro zabal izango dena, eta luzea, 190 luze izango dena.

Ospitale plaza

Gasteizko Udalak Ospitale plaza —Guardien plaza izenez ere ezaguna— eraldatuko du, irisgarriagoa eta modernoagoa izan dadin. Udalak plazaren 650 metro karratuko azaleran jardungo du, baita Frantzia kaleko 120 metro karratutan eta Santiago kaleko 200 metro karratutan ere. Lanak gauzatzeko epea lau hilabetekoa da.

Proiektuak hainbat helburu ditu: espazio horren erakargarritasuna eta estetika hobetzea, zoladura eta hiri-altzariak aldatuz; espazioa berrantolatzea, oinezkoentzat irisgarriagoa izan dadin, eta egoera txarrean dauden sareak eta azpiegiturak –argiztapena, saneamendua, hornikuntza eta drainatzea– berritzea. Ezkutatuta egotetik alboko kaleen maila berean egotera igaroko da, eta hala, jendea elkartzeko eta denbora pasatzeko gune atsegin bihurtuko.

Izan ere, plaza berriak 90º-ko sektore zirkularraren forma izango du. Kurba horren erdia Frantzia kalearen mailan egongo da. Santiago kaletik hurbil dagoen inguruan, berriz, plaza eta kalearen arteko garaiera aldeari irtenbidea emateko eskailerak jarriko dira. Gainera, plazaren muga gisa 14 eta 17 metroko bi banku luze jarriko dira, bertaratzen direnek atseden hartzeko. Gaur egun Ospitale plaza Frantzia eta Santiago kaleetatik bereizteko dauden hormak kendu egingo dira.

Udalak plazako lurra goitik behera aldatzeko helburua ere badu. Jarriko den zoladurak granitozko lauza horiak izango ditu erdigunean. Eraikinen eta plazaren artean, granitozko lauza grisak ipiniko dira. Estetika aldetik, Andre Maria Zuriaren plaza, Santa Barbara plaza eta Terrorismoaren Biktimen Oroimenezko Zentroaren ingurua ekarriko ditu gogora. Errege ateak etorkizunean izango duen itxura ere horien antzekoa izango da.

Urtaranen gobernuak espazio publikoan sustatu dituen beste esku-hartze batzuetan bezala, eraberritze-lanak argiztapena aldatzeko ere aprobetxatuko dira. Ildo horretan, argiztapen-puntu bakarra jarriko da, led lanparak txertatuta izango dituzten sei proiektatzailerekin. AMVISAk, berriz, drainatzea eta saneamendua berritzeko beharrezkoa lanak egingo ditu.

Espazio Publikoaren Zerbitzuak zuhaitzak landatzeko asmo ere badu –Celtis Australis motakoak–, eta lekuz aldatuko du iturri apaingarria. Iturria zaharberritu ere egingo da. Zuhaitzek 10 metroko altuera hartuko dute gutxi gorabehera, eta plazaren inguruan jarriko direnez, trafikoa eta egoteko lekua bereizteko balioko dute, itzala emateaz gain. Fatxadetatik nahikoa urrun jarriko dira, etxeei enbarazu ez egiteko.

Santiago kalean plaza ukitzen duen espaloia berrituko da, eta, horrez gain, Vitoria-Gasteiz modeloko sei-aparkaleku jartzea erabaki da, hondakinen kontainerren alboan. Frantzia kalean, plaza ukitzen duen espaloia berritzea da asmoa.

Esku-hartze gehiago Zabalganean

Alkateak jakinarazi du, halaber, aste honetan hasi direla Zabalganean jolas naturalizatuen zona bat sortzeko lanak. Zehazki, Nazio Batuen hiribidean dagoen lursail batean, Zabalganeko haur eskolaren eta Zabalgana Lehen Hezkuntzako ikastetxearen artean. Esku-hartze hori ere ‘Mejorando Vitoria-Gasteiz Hobetuz’ partaidetza-prozesuan hautatu zen.

Hartara, Udalak hiriko azpiegitura berdea garatzen jarraituko du, espazio naturalen sare horrek ingurumen, gizarte eta ekonomia onurak baitakartza. Oraingoan, jolasteko eta egoteko gune naturalizatua proiektatu da. Zuhaixken zerrenda batek mugatutako laukizuzen bat diseinatu da, eta bertan ohikoak ez diren jolasak jarriko dira: eskultura erako enborrak, harriekiko jolas bat, oreka egitekoa, jauzi egiteko enborrak… Sei masusta-arbola ere landatuko dira, geriza emateko. Bi hilabete iraungo dute lanek.

Zabalgana eta Armentiako basoa lotzeko oinezkoentzako egurrezko pasabidea bihar jarriko dela gogorarazi du alkateak. Lan horiek direla eta, goizeko seietatik moztuko da trafikoa N-102 errepidean. Gasteiztik autobiderantz Mariturri auzotik irteten diren ibilgailuak Gasteiztik Ibaiara doan bidetik desbideratuko dira eta hirian sartu nahi duten ibilgailuak, berriz, A-4163 Gometxa-Armentia errepidetik. Trafikoa arratsalde erdialdean irekitzea aurreikusita dago.

Pasabidea jarri aurretiko lanak (zimendua) irailean hasi zituzten. Orain lurra finkatua dagoenez, prest dago egitura jartzeko. Bihar lau pieza handi (bi erdian eta beste bi muturretan)  muntatuko dituzte lur gainean bertan, garabi eta makina handien bitartez. Lanak larunbatean egitea erabaki da N-102tik trafiko gutxien igarotzen eguna delako.

Esku-hartze hori ere ‘Mejorando Vitoria-Gasteiz Hobetuz’ partaidetza-programan hautatu zen; hain zuzen ere, bozkatuenetako bat izan zen. Lanek 342.000 euroko aurrekontua zuten, eta 6 hilabeteko gauzatze-epea.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:51

 

  • Prozesua amaitutakoan, behin-behinekotasun tasa % 38tik % 5era jaitsiko da
  • Gasteizko Udalaren historian inoiz egindako enplegu eskaintza publikorik handiena da

 

Tokiko Gobernu Batzarrak Gasteizko Udaleko C, D eta E taldeetan 407 lanpostu betetzeko sustapenaren eta enplegu-eskaintza publikoaren deialdia onetsi du gaur goizean; besteak beste, garbitzaileen, administrarien, informazio eta kontrol agenteen, eta mantentze lanetarako ofizial espezialisten lanbide kategoriei dagozkie horiek.

Duela urtebete talde horietarako onetsi ziren beste 275 lanpostuei gehitzen zaizkie 407 horiek, beraz, orotara 682 lanpostu betetzeko LEP bateratua egingo da. Datozen hilabeteetan onetsiko dira deialdiaren oinarriak, eta izena emateko epeak irekiko.

“Zalantzarik gabe, Gasteizko Udalaren historian inoiz egin den enplegu eskaintza handienaren aurrean gaude, 2001ean deitutako 462 lanpostuen gainetik. Mugarria da enplegu egonkorra eta kalitatekoa sortzeari dagokionez, eta udal plantillaren behin-behinekotasun portzentajea % 5era jaisteko hartu dugun konpromisoari erantzuten dio“, adierazi du Gorka Urtaran alkateak.

682 lanpostuen eskaintza globala honela banatuko da: 151 barne sustapenerako; 42, ezintasunak dituzten pertsonentzat, eta 489, txanda librerako. Gaur onetsi den deialdiaren barruko 407 lanpostuak, berriz, lanbide-kategoria hauei dagozkie: garbiketarako 143, administrazioarekin lotutako 84, eta informazio eta kontrol agenteen kategoriako 81.

C, D eta E taldeetarako prozesuaren hasierak bat egiten du goi eta erdi mailako titulazio-taldeetarako (A eta B) egindako LEParen amaierarekin. Azken horretan lanpostua lortzen duten 174 funtzionarioak martxoan jabetuko dira horietaz.

Enplegua sendotzeko beste LEP bat

Orobat, Enplegatu Publikoaren Oinarrizko Estatutuaren 4. xedapen iragankorrari dagozkion lanpostuen enplegu-eskaintza publikoaren deialdia onetsi du Urtaranen gobernuak. Izan ere, xedapen horrek bide ematen du aldi baterako lanpostuak enplegu finko bihurtzeko LEPak egiteko 2005eko urtarrilaren 1a baino lehenagotik bitarteko langileek etenik gabe betetakoak badira.

LEP mota horretan, probetako edukiak zerikusia izan behar du deialdiaren xede diren lanpostuetako ohiko prozedura, ataza eta eginkizunekin, berdintasun-, merezimendu-, gaitasun- eta publizitate-printzipioak bermatuta.

Lanpostuak sendotzeko onetsi den LEParen barruan  A, B, C, D eta E taldeetako 112 plaza sartu dira guztira. Garbiketarekin lotutako lanbide-kategoriak dira gehiengoa (46 lanpostu); mantentzearekin lotutako lanbideetan zein informazio eta kontrol zerbitzuetan ere badira horien artean. Finkapeneko LEPeko 112 plaza horiek, c, d eta e taldeetako LEParekin batera, eskaintzen diren lanpostuen bolumen osoa 794ra iristen da.

Enplegu gehiago adimen ezintasuna duten pertsonentzat

Azkenik, zenbait sailetako lanpostuen zerrendak aldatzea onetsi du Tokiko Gobernu Batzarrak. Besteak beste, adimen ezintasunen bat duten pertsonentzako hiru lanpostu sortzea dakar horrek. Lehen aldia da Udalean, tradizioz, dibertsitate funtzionalerako enplegu kupo bat gorde duela, eta adimen ezintasunerako berariazko kupo bat ezartzen duela.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:34

Gasteizko Udalaren 2020rako aurrekontu-proiektuak bere izapide-etapetako bat amaitu zuen atzo, zuzenketak aurkezteko epea atzo amaitu zelarik; datorren asteartean eztabaidatuko dira zuzenketa horiek. Urtaran gobernuak bere zuzenketak aurkeztu ditu, 18 guztira, non kontu-proiektuaren zenbait kontzeptu tekniko ñabartzen diren eta, batez ere, Gizarte Kontseiluak Auirrkontuari buruz nahitaez egin beharreko proposamenak gehitzen diren.

Gizarte Kontseiluaren ekimenez udal aurrekontuan txertatutako proposamenetako bat Eskola-mugikortasun Autonomo eta Segururako azpiegitura berriak sortzeari buruzkoa da. 150.000 euro erreserbatu dira horretarako, “Trafikoa lasaitzea Salburuko eta Zabalganeko superetxadietan” izeneko partida sortu berri baten bidez.

Baita mugikortasun iraunkorraren inguruan ere, Gizarte kontseiluak bizikletentzako bideen sarea areagotzeko inbertsio gehiago egitea planteatzen du. Udal gobernuak eskaera hori artatu du “Bizikletentzako sare nagusia” partida sortzeko proposatzeko zuzenketa baten bidez, eta 100.000 euro berezi dira horretarako.

Gizarte Kontseiluak aintzat hartu du bere txostenean herritarrengandik jasotako eskakizun gehiago, esaterako Lakua-Arriagakoa, autokarabanentzako aparkalekuaren ondorioz galdutako aparkaleku-kopurua berreskuratzekoa, auzoan bertan beste aparkaleku bat eginda. Horretarako, Urtaran gobernuak 150.000 euroko partida bat gehitu du Lakua-Arriaga auzoko aparkalekuak zaharberritzeko.

“Zenbait bide baliatuz, funtsezkoa da herritarren parte-hartzea udal-aurrekontua diseinatzerakoan. Azken urteetan ikusi dugu nola hazi diren Gasteiz Hobetuz eta antzeko zenbait programa, baina bizilagunen eskariekiko arreta ez da horretara mugatzen, eta zuzenketa hauek horren isla dira”, aipatu du Gorka Urtaran alkateak.

 

 

Share
Kategoriak: Sailkatu gabea  —  Etiketak: ,   —  Komunikazio Zerbitzua / Servicio de Comunicación  —  3 abendua 2019 13:56

 

Gaur, Euskararen Nazioarteko Egunean, haur literaturaren alorrean euskarara egindako itzulpenik hoberenentzako “Vitoria-Gasteiz” saria banatu da, Oihaneder Euskararen Etxean egindako ekitaldi batean. Aurtengo irabazleak, sarien 15. edizioan, Joana Pochelu eta Aiora Jaka itzultzaileak izan dira, Clotilde Perrinen Perrinen ‘À l’intérieur des méchants’ —‘Gaiztoak’— liburuaren itzulpenagatik.

Gasteizko alkate Gorka Urtaranek diploma eman dio Joana Pocheluri. Aiora Jakak ezin izan du Gasteizera bertaratu, kanpoan baitago lanean. Clotilde Perrinen ‘À l’intérieur des méchants’ —‘Gaiztoak’— liburuaren itzulpenagatik lortu dute saria eta 9.000 euro eskuratuko dituzte itzultzaileek. Hizkuntza-aberastasuna eta itzulpenaren doitasuna nabarmendu ditu epaimahaiak, eta itzulpen landua dela iritzi dio, ahozko literaturaren esamolde aberats eta egoki txertatuz hornitua.

Alkateak itzultzaileek egiten duten lana aldarrikatu du. “Euskaraz irakurtzeko aukera ematen diguzue euskaldunoi. Gainera, kultur bitartekari lanetan ere aritzen zarete. Beste kulturekin lotzen gaituzue. Beste hizkuntzekin, kulturekin eta sentimenduekin”, esan du Gorka Urtaranek.

Pocheluk “iparraldeko eta hegoaldeko” euskaldun txikiek ‘Gaiztoak’ ondo ulertzeko esfortzua azpimarratu du, baita Aiora Jakarekin egindako elkarlana.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  29 azaroa 2019 13:25

Bake Kaleko antzinako gartzelaren memoriagunearen inaugurazio ekitaldia

 

Udalak konpondu egingo ditu Santa Isabel hilerriko, Bake kaleko, Sagrado Corazón ikastetxeko, Karmengo elizako eta Senda ibilbideko plakak

 

Gorka Urtaran audioa

Gorka Urtaran alkateak gaitzetsi egin ditu hiriko bost memoriaguneei —Gasteizen frankismoaren biktima guztiei aitortza, elkartasuna eta maitasuna adierazteko jarritako memoriaguneei— egindako erasoak. Izan ere, pinturaz belztuta agertu dira gaur goizean.

“Nire gaitzespenik sendoena. Gasteiz hiri anitza da, memoria duen hiria, giza eskubideak errespetatzen dituen hiria, urraketa oro salatzen dituen hiria. Garai batean modu sistematikoan urratu ziren giza eskubideak, eta memoriaren leku horiek, plaka horiek, giza eskubideak urratuta ikusi zituzten ehunka eta ehunka gasteiztarren duintasuna eta memoria biltzen dituzte, haiek gogora ekartzen dizkigute. Erabat gaitzesgarria da hiri honetan pertsona horiei batere errespeturik ez erakustea. Gasteiz biktima guztiekin dago. Guztiek merezi dute aitortza eta begiramena”, adierazi du alkateak.

Erasotako plaka guztiak konponduko dituela Udalak, iragarri du Gorka Urtaranek.

Gasteizko Memoriaguneak

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   10:43

Gasteizek Europako Hiri Osasungarrien Sarearen VII. fasearekin bat egiteko akordioa onetsi du Tokiko Gobernu Batzarrak; Osasunaren Mundu Erakundeak sustatzen du sarea, udal gobernuen gizarte-, ekonomia- eta politika-agendetan osasunak leku nabarmena har dezan. 32 herrialdetako 100 hiri inguruk osatzen dute mugimendu horren muina. Duela 31 urte sortu zenetik, aitzindaria izan da hiri ingurune osasungarriagoak lortzeko bidean.

Gasteizek OMEk ezarritako irizpideei jarraituz egindako lanaren emaitza dira osasun planak, zeinak 2007an hasi baitziren lantzen. Europako Hiri Osasungarrien Sarearen VII. faseak 2024ra arte iraungo du, eta osasunarekin eta ongizatearekin lotutako ekintzak garatzea ahalbidetuko du, 2020 Osasun Agendarekin eta Nazio Batuen 2030 Agendarekin koordinatuta.

Besteak beste, alderdi hauei erreparatuko die Europako Hiri Osasungarrien Sarearen VII. faseak: pertsonengan inbertitzea, osasuna eta ongizatea hobetzen duten lekuak diseinatzea, politika osasungarriekin lotutako partaidetza sustatzea, eta ondasun eta zerbitzu komunen eskuragarritasuna hobetzea.

“Osasunaren alorreko munduko erakunde gorenarekin koordinatuta lan egiteak politika sorta zabala bideratzeko ikuspegi estrategikoa ematen digu. Kirolaren eta osasunaren arteko lotura estutzen ari gara, mugikortasun jasangarri eta osasungarria diseinatzen, elikadura osasungarriaren alde egiten, eta adinekoen bizi-baldintzak hobetzen, beste jarduera-ildo batzuen artean eta gure helburuak partekatzen dituzten beste ehun hiri europarren eskutik” adierazi du Gorka Urtaran alkateak.

OMEren Europako Hiri Osasungarrien Sarea 1988an sortu zen, osasun eta garapen iraunkorrerako tokiko estrategiak sustatu eta hirietan bizi eta lan egiten duten pertsonen ongizate fisiko, psikiko eta soziala, bai eta ingurumenekoa ere, lortzearren. Geroztik, Gasteiz sarearen kide izan da garapen faseetako batzuetan.

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  28 azaroa 2019 12:08

 

Gorka Urtaran Gasteizko alkateak Bai Euskarari Elkarteak antolatutako mintzodromoan parte hartu du gaur goizean, Udalak bultzatutako ‘Euskaraz 1+1 … Hamaika!’ programazioaren barruan. Oihaneder Euskararen Etxean egin den ‘mintzodromo’ horretan, Gasteizko alkateak hiriko 200 gazte ingururekin partekatu ditu hausnarketak.

Gorka Urtaranek nabarmendu du euskara dela “euskaldunok ditugun altxorren artean preziatuena”, eta eskertu egin ditu “gazteek emandako iritzi eta ikuspuntu ezberdinak, gure hizkuntzaren etorkizuna izango baitira”. Jardunaldian hiri adimenduna, mugikortasun iraunkorra eta Gasteiz euskararen hiria bezalako gaiak landu dira.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  27 azaroa 2019 12:15

Cambio 16 aldizkariko presidente Gorka Landaburu, alkate Gorka Urtaran eta Cambio 16 aldizkariko CEO Jorge Neri

 

Alkateak jaso du saria, Madrileko Palace hotelean egindako ekitaldi batean

Gorka Urtaran audioa

Gasteizek Cambio 16 saria jaso du “hiria” kategorian, “klima-aldaketaren kontrako borrokarekin konprometitutako udalerri eredugarri gisa erakutsitako lidergoa” aitortzeko. Alkate Gorka Urtaranek hartu du saria, Madrileko Palace hotelean egindako ekitaldi batean.

Alkatea Gasteizi eman dioten sariarekin

Sariak antolatzen dituen batzordeak “hiri berrikuntzarako eta trantsizio energetikorako proiektuak” nabarmendu ditu, baita mugikortasun iraunkorraren sustapena ere, “herritarren ongizatea bermatzeko udal kudeaketa baten ardatzak” baitira. Antolatzaileen hitzetan, estrategia horrek “begirada guztien fokuan” jarri du Gasteiz, “estatuan zein atzerrian, hiri berde eta gizatiarraren erreferente gisa”. Azken urteetan, Arabako hiriburuak Global Green City eta European Green Capital sariak jaso ditu, besteak beste.

Gorka Urtaranek hiriari eman dioten saria eskertu du

Alkate Gorka Urtaranek Cambio 16 aldizkariaren lehendakari eta zuzendari Gorka Landaburuk emandako saria eskertu du, eta gogorarazi du Gasteiz “Euskadiko, Europako eta munduko” Hiriburu Berdea dela. Orobat azpimarratu du Arabako hiriburuko eredu berdea beste hiri batzuentzat  ere baliagarria izan daitekeela. “Hirietan jardutea beharrezkoa da klima aldaketaren kontra borrokan, eta borroka hori adostasunetik egin behar dugu”, adierazi du.

Duela 48 urte hasi ziren Cambio 16 sariak ematen, bikaintasuna eta ekiteko zein berritzeko gaitasuna direla kausa nabarmendu diren liderrak, enpresak eta erakundeak aintzatesteko, baita iraunkortasunaren, elkartasunaren eta giza eskubideen defentsaren aldeko apustua egin dutenak ere. Aurtengo edizioan, Gasteiz hiriarekin batera, hainbat alorretako pertsonak eta entitateak saritu ditu aldizkariak, besteak beste, Rafa Nadal tenislaria, WWF España erakundea, Pablo Motos komunikatzailea, eta EFE Verde agentzia.

Sarituak eta antolatzaileak argazkia atera dute ekitaldiaren amaieran

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —   09:10

 

Gorka Urtaranek  Euskal Hiria biltzarrean hartu du parte; Donostian egiten ari da, Eusko Jaurlaritzak eta Nazio Batuen Erakundeko Habitat agentziak antolaturik.

 

Gasteizko alkate Gorka Urtaranek “Euskal Hiria: beste begirada bat” biltzarrean hartu du parte gaur goizean. Atzo eta gaur egin da topaketa, Donostiako Kursaal jauregian. Gasteizko alkateak kontzientziazio handiagoa eskatu du orokorrean, hiri jasangarriagoak lortzeko.

“Ingurumenaren aldetik jasangarria den hiria” gaia lantzeko mahaian, Bartzelonako Hiri Ekologiako Agentziako zuzendari Salvador Ruedak hiri garaikideek zein erronkari aurre egin behar dioten eta ingurune jasangarriagoetarantz nola hurbildu aztertu du. Ingurumen sailburuorde Elena Moreno, Trantsizio Ekologikorako Ministerioaren ordezkari Antxon Olabe eta “Sostenibilidad y Arquitectura” elkartearen lehendakari Miguel Angel Díaz ondoan zituelarik, alkateak adierazi du hirietan daudela planetari eragiten dioten arazo globalei erantzuteko irtenbideak.

Izan ere, munduko populazioaren erdia baino gehiago hirietan bizi da, eta 2050era arte kopuru hori bikoiztu egingo dela kalkulatzen da. Munduko hiriek energiaren % 70 kontsumitzen dute, berotegi efektua duten gasen % 70 isurtzen dute, eta hondakinen % 75 sortzen dute. Beraz, garrantzi handia du garapen iraunkorreko 11. helburua betetzea, hau da, hiriak eta giza kokaguneak inklusiboak, ziurrak, erresilenteak eta iraunkorrak izan daitezela lortzea.

Gorka Urtaranek azaldu duenez, Gasteizek lortutako sariak (Europako Hiriburu Berdea eta Munduko Hiri Berdea) azken hamarkadetan egindako lanaren aitortza dira, “baina oraindik lan handia egin beharra dugu”. Gogorarazi du, halaber, José Angel Cuerda alkatearen garaitik, udal agintariek noranzko berean arraun egin dutela, eta horrek ahalbidetu duela aurrera egitea iraunkortasunaren alorrean eta hiria gaur lehenengo postuetan egotea. “Baina nekez izango gara erreferente Europako eta munduko hiriburu berde gisa desberdintasunak, pobrezia eta langabezia baditugu. Horregatik, bizi-kalitatearen eta gizarte-ongizatearen alde egiten dugu, kalitateko baliabide publikoak, ingurumenaren babesa eta ekonomia berderanzko trantsizioa oinarritzat hartuta”, erantsi du.

 Alkateak azpimarratu du iraunkortasunarekiko kontzientziazioa asko handitu dela, baina oraindik bide luzea urratu beharra dagoela. Horren adibidetzat, garraiobide ezberdinen arteko bizikidetza (oinezkoak, bizikleta, patinetea, autoa…) eta kontsumoa aipatu ditu. “Kontsumoa gutxitzeaz gain, hobeto kontsumitu behar da”, adierazi du, mundu osoan egunero xahutzen den janari kopuru izugarria gogoan.  

Share

Aurrekoak »