Prentsa Oharren banner
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  24 urtarrila 2020 11:46

 

Europa jauregiak hartuko du otsailaren 1ean Gasteizko Zurrumurruen kontrako Sarearen urteko lehen bilera.

 

 

Joan den agintaldian Udalak sustatutako “Elkarrekin bizitzen ikasi” programaren baitan kokatzen delarik, 2017an eman zituen lehen urratsak Gasteizen Zurrumurruen kontrako Estrategiak, ordutik hona bide luzea egin duelarik. Hauek izan dira mugarri garrantzitsuenetako batzuk: Pilar-Iparralde, Salburua eta Araneko taldeen sorrera eta –gero– batasuna, adinekoen taldearen sorrera, eragileen sareak Bizikidetza eta Aniztasun Zerbitzuarekin batera abiarazitako Zurrumurruen kontrako jarduera ugariak, eta sare sozialetan (Facebook eta Instagram) profilak irekitzea, informazioa ahalik eta gehien zabaltzeko.

Otsailaren 1eko saioan, eta zenbait baliabideren bitartez, partaideek hausnarketa egingo dute Zurrumurruen kontrako Estrategiak sortu zenetik Gasteizen egindako ibilbideaz, eta, horrez gain, proiektuaren etorkizunari begiratuko diote, hobekuntza posibleak, interesak, helburuak eta Zurrumurruen kontrako herritar sarea indartzeko formulak identifikatuz.

Asier Gallastegi kontsultore eta prestatzaileak dinamizatuko du saioa, zeinek jarduera ikuspegi sortzaile eta berritzaile batetik abiatuta girotuko duen, zenbait ustekabe tarteko.

Zurrumurruen kontrako Udal Estrategia eraldaketa sozialaren aldeko sentsibilizazio-proiektua da, eta xede hauek ditu: pertsona-kopuru handi bat –bakarka edo erakunde eta elkarteen izenean– inplikatu eta gaitzea, eta estereotipo, aurreiritzi eta zurrumurru faltsuen eragin negatiboen gainean pentsaera kritikoa eta sentsibilizazioa sustatzea, eta aniztasunari buruzko kontakizun negatiboak kolokan jartzea. Gainera, agenda politikoan eta sozialean eragin nahi du, aurreiritziak murriztea eta diskriminazioa prebenitzea hiriaren helburu kolektibo oso garrantzitsua dela onartu dadin.

Gorka Urtaran alkateak Zurrumurruen kontrako Sareko boluntarioen inplikazioa eskertu du, “horiek bezain pertsona konprometituek Gasteiz hiri inklusiboagoa egiten dutelako, bizi errealitateaz kontzienteagoa, eta auzo bakoitzak bizitzaren etorkizunari ikuspegi konstruktibo eta positibo batekin begiratzen diona”. Ildo horri eutsita, alkateak animatu egin ditu gasteiztarrak otsailaren 1ean Europa jauregira hurbildu daitezen eta Zurrumurruen kontrako Estrategia ezagutu dezaten.

Informazio gehiago

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —   11:27

Tokiko Gobernu Batzarrak Eusko Jaurlaritzako Ingurumen, Lurralde Plangintza eta Etxebizitza Sailarekin hitzarmen bat egitea onetsi du gaur, zeinaren bidez Alokabideren esku utziko baitira erabiltzen ez diren zenbait udal etxebizitza, alokairu sozialerako baliatu ditzan.

Gorka Urtaran alkateak gogorarazi duenez, aurreko agintaldian Iñaki Arriola sailburuarekin adostutako neurrietako bat da hori, eta alkateak berak 2018ko azaroan iragarri zuen Etxebizitza Planean sartuta zegoen

Alkateak hau proposatu zuen, zehazki: “etxebizitza gehiago eraikitzeari uko egitea, lurzoru gutxiago kontsumitzearren, eta inbertsio berarekin etxebizitza gehiago eskaintzea Gasteizen horren premia duten familiei; gazteek eta pertsona ahulenek dituzten etxebizitza premiei erantzutea, eta legez kanpoko okupazioari aurre egitea“.

 Gorka Urtaranen hitzetan, irtenbide hori arduratsu eta iraunkorragoa da, lurzoru gehiago kontsumitzea eragozten duelako; proposamen ekonomikoagoa da, eta errentagarritasun sozial handiagokoa, inbertsio berarekin etxebizitza gehiago egokitu daitekeelako; planteamendu integratzaileagoa da, ez duelako bizilagun profil jakineko etxebizitza-blokerik sortzen; herentzian jasotako arazo bati —hirian erabiltzen ez diren hainbat etxebizitza izatearena— erantzuten dio behingoz, eta legez kanpoko okupazio posibleak eragozten ditu“.

 Lehenengo zazpi etxebizitzak

Lehenengo fasean, Udalak zazpi etxebizitza lagako dizkio Alokabideri, alokairu sozialerako baliatu ditzan. Etxebizitza Sailak, berriz, kanon bat ordainduko dio Udalari, hots, alokairu gisa biltzen duen diruaren ehuneko bat.  Geroago, Udalak etxebizitza gehiago lagatzea aurreikusi da.

 Izan ere, Udalak, 21 Zabalgunearen bitartez, hainbat etxebizitza ditu (hainbat egoeratan), eta horiek sartuko lirateke udal gobernuak aurreko agintaldiaren amaieran sustatu zuen Etxebizitza Planean, hutsik dauden udal etxebizitzak gazteei eta familia ahulei eskaintzeko. Planak aurreikusten du epe laburrean etxebizitza hutsak eraberritzea, eta bizi ahal izateko hainbat esku-hartze behar duten etxebizitza gehiago egokitzen joatea.

Garai hartan egin zen azterlanaren arabera, hiriko hainbat lekutan banatuta dauden etxebizitza huts horietatik, batzuk egoera onargarrian daude, eta bizitzeko modukoak izan daitezke etxebizitza bakoitzeko 6.000 € baino gutxiagoko inbertsioarekin; beste batzuk 6.000 eurotik gorako inbertsioa beharko lukete, eta beste batzuek, eraberritze integrala; azkenik, 6 etxebizitza legez kanpo okupatuta zeuden.

 

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  20 urtarrila 2020 13:43

 

 

 

 

 

 

 

  • Txirrindularien Europako Federazioak aitortu egin du enpresak bere langileen egunerokoan bizikletaren erabilera sustatzeko egindako ahalegina.  

 

Gasteizko BH enpresa Estatuan Cycle Friendly Employer ziurtagiria lortu duen lehen enpresa bihurtu da aste honetan. Europar Batasunaren esparruan sustatutako ziurtagiria da eta dagoeneko hamalau herrialdetako enpresa ugari atxiki dira.

Txirrindularien Europako Federazioak (ECF) aitortu egin du Gasteizen kokatutako BH enpresak langileen eguneroko joan-etorrietan bizikletaren erabilera sustatzeko egiten duen ahalegina. 

Bertako enpresen inplikazioa ezinbestekoa da mugikortasun iraunkorreko politikak garatzeko” azpimarratu du Gorka Urtaran alkateak bereizgarria banatzeko ekitaldian.“Mugikortasun Planak atal berezia du industrialdetara, Jundizera adibidez, bizikletaz joateko loturak hobetzeko. Hainbat ekintza bideratu ditugu ildo horretan, baina jarraitu egin behar dugu joan-etorritan aldaketa modala lortzeko estrategiarekin” adierazi du alkateak. Urtaranek adierazi duenez, “hiri berdetik ekonomia berdera pasatu behar dugu, eta horretarako dugu Gasteiz Green Deal bezalako plan bat. Guztion artean burutu behar dugu gure hiriaren aldeko itun hori, eta berderanzko trantsizioa egin ekonomia eta gizartean.

Cycle Friendly Employer (bizikleten lagunak diren enpresak) proiektuak nabarmendu egin nahi ditu egunerokoan mugikortasun iraunkorrarekin emisio kutsagarrien murrizketarekin lotutako neurrien aldeko apustua egiten duten erakunde publiko eta pribatuak. 

BH izan da auditoria gainditu duen Estatuko lehen enpresa. Gaur goizean jaso du ziurtagiria, eta ekitaldian bertan izan dira Gorka Urtaran alkatea eta Ingurumen eta Hirigintza Saileko foru diputatu Josean Galera. 

BH-rentzat ohorea da ziurtagiri hau eskuratzea eta, halaber, bizikleta garraiabide gisa sustatzen jarraitzeko pizgarri. Gero eta jende gehiago modu iraunkorrean mugitzeko aurrekari izatea nahi dugu” adierazi du BH-ko komunikazio arduradun Alvaro Olasolok.

Bikefriendly Group enpresa arduratzen da, nazio mailan, erakunde publiko eta pribatuek duten egokitze maila ebaluatzeaz eta ECF-k ezarritako parametroak betetzen dituzten enpresak aitortzeaz, eta bertako aholkulari Carlos Martinek adierazi duenez, “BH enpresak ahal bezainbeste errazten die langileei lanera bizikletaz joan ahal izatea, eta hainbat ekintza gauzatzen ditu bizikletaren erabilera sustatzeko”.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  15 urtarrila 2020 12:17

 

 

 

 

 

 

 

 

Gorka Urtaran audioa

 

  • Ur handietarako ibilguak ibaiaren hustubide-ahalmena handituko du; lubetak, berriz, ur handiei eutsiko die, eta inguruko trafikoaren inpaktu bisuala eta akustikoa murriztuko du
  • Bi milioi euroko inbertsioa duen obrak erabilera publikorako gune berde bat egokitzea ere aurreikusten du, eta Eraztun Berdeko oinezkoentzako eta txirrindularientzako ibilbideei jarraipena emango die
  • Iñaki Arriola Ingurumen sailburuak adierazi duenez, obrek “uholdeak izateko arriskua nabarmen murriztuko dute, ibaiaren ibilgua hiri-parke gisa berreskuratzen den bitartean”

Iñaki Arriola Ingurumen, Lurralde Plangintza eta Etxebizitzako sailburuak eta Gorka Urtaran Gasteizko alkateak Zadorra ibaiaren uholdeetatik babesteko proiektuaren bigarren faseko obrak bisitatu dituzte. Ura Abetxuko zubiaren eta Gamarra Nagusiko zubiaren arteko zatian egiten ari da proiektua. Bisitan, Ernesto Martinez de Cabredo Uraren Euskal Agentziako zuzendaria, Ana Oregi Gasteizko alkateordea eta Cesar Fernandez de Landa Ingurumenaren Plangintza eta Kudeaketako zinegotzia ere izan dira.

Jarduketa Gamarra Nagusiko zubitik ibaian behera ur handiek hartuko duten ibilgu bat sortzean datza, Zadorraren ezkerraldean: ibaiaren hustubide-sekzioa handitzeko eta, horrela, uholdeen altuera eta hedadura murrizteko, bai tarte horretan, bai ibaian gora.

Behin ibilgu bikoitza sortuta, babes-lubeta bat eraikiko da ezkerreko ertzeko uholde-lautadan zehar, Zadorra etorbidearen paraleloan, bi helbururekin: errepikatze-denbora handiko uraldien (500 urte) ur-lamina industria-eremura iristea saihestea, eta ibilgailuen zirkulazioak aldameneko berdegunean eragiten duen inpaktu akustikoa eta bisuala murriztea.

Ubide bikoitza sortu denez, ingurumen-balio txikiko 500 zuhaitz inguru kendu behar izan dira (makalak, batez ere), eta horien ordez ibaiertzeko espezieen 800 ale berri landatuko dira, bai bidegorriaren parez pareko lubetan, bai birjarriko diren berdeguneetan.

Izan ere, obrak Zadorra ibaiaren parkean integratutako berdegune osoa erabilera publikorako egokitzea aurreikusten du, eta, hartara, hiriko Eraztun Berdearen zati diren oinezko eta txirrindularientzako ibilbideei jarraipena emango die.

Jarduera osoaren aurrekontua 2 milioi eurokoa da, eta 2020. urtearen amaieran amaitzea aurreikusten da.

Gainera, Zadorraren eskuinaldean, eremu berde bat eraikiko da: horretarako, gaur egun hondakin inerteak kontrolik gabe isurtzearen ondorioz degradatuta dagoen eremu baten paisaia lehengoratuko da, eta  oinezkoentzako bide-sare bat egitea aurreikusten da, besteak beste.

Arriola sailburuak proiektuaren izaera berritzailea nabarmendu du, “Inguru horretan uholdeak izateko arriskua nabarmen murrizteaz gain, ibilguaren ingurumena berreskuratzen da, eta  herritarrek gozatzeko hiri-parkea berriztatu egingo da“.

Bestalde, Gorka Urtaran Gasteizko alkateak ontzat jo du Eusko Jaurlaritzak hiriarentzat estrategikoak eta positiboak diren proiektuen alde egindako apustua. “Erakundeen arteko elkarlana funtsezkoa da garapen ekonomiko eta sozialean. Funtsezkoa da positiboan aurrera egiten jarraitzeko eta Gasteizko zonalde honetakoa bezalako beharrei erantzuna emateko, uholde-arriskuak murrizteko. Gainera, obra hauekin, hiriak Zadorra ibaiaren parkean integratutako gune berde bat izango du, oinezko eta txirrindularientzako ibilbideei jarraipena ematen diena eta gure bitxietako baten parte den Gasteizko Eraztun Berdea. Inbertsio honekin herritarrek irabazten dute, inguru naturalak irabazten du eta hiriak irabazten du ‘, nabarmendu du alkateak.

Uraren Euskal Agentziako zuzendari Ernesto Martínez de Cabredok nabarmendu duenez, “honako jarduketa hau mugarri garrantzitsua da Gasteiz Zadorraren uholdeetatik babesteko. Azpiegitura berde batez ari gara:  ibaiaren berezko portaera imitatzen du, hiri-bilbeari ur-goraldiaren berezko errepikapenarekin batera bizitzeko aukera ematen dio, eta Zadorra ibaiari hiritik igarotzean egoera hobetzeko aukera handitzen du“.

Fase honetako lanekin jarraitzea, dagoeneko ekin baitzaie

Orain egiten ari diren Zadorra ibaia uholdeetatik babesteko II. faseko lanek jarraipena ematen diete bere garaian aurreratu ziren beste jarduketa batzuei.

Alde batetik, 2018an amaitu zen Abetxukuko zubi zaharraren egokitzapen hidraulikoa eta arkitektonikoa; jarduketa horrek Zadorraren hustubide-ahalmena handitu zuen puntu horretan, 328 m ³/s-raino, 100 urteko errepikatze-denborako uholdeen pareko emaria, eta XIX. mendeko zubiaren egitura birgaitzea ahalbidetu zuen, kultura-ondasun izendatua. Proiektuak 850.000 euroko egikaritze- kostua izan zuen.

Bestalde, 2015ean, Abetxukuko oinezkoen pasabide zaharraren ordez (Gasteizerako hornidura-hodiek osatzen zuten pasabide horrek uren jario askea oztopatzen zuten), beste pasabide bat jarri zen, aurrekoaren bi aldiz sekzio hidraulikoarekin. Horren ondorioz, ubidearen azpian (bypass) hodi bat eraiki behar izan zen hiria hornitzeko, pasabide zaharrari eusten zioten hodien ordez.

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  10 urtarrila 2020 11:57

 

Gorka Urtaran alkateak berretsi egin du erronka, Gasteizek “kultur ekitaldietarako espazio duin, moderno eta erakargarria izan dezan, eta erdialdea eta lurperatzeak libre utzitako eremua biziberritzeko“.

 

BAI Center proiektua egin zuten arkitektoek (Mariano eta Pablo Bayón) hile amaieran azalduko diete udal-talde guztiei Auditorio berriaren eraikinaren proiektuaren egokitzapena Musikaren ibilbideko lursailera. Horixe iragarri du gaur Gorka Urtaran alkateak, zeinak berretsi egin baitu diputatu nagusiarekin duela hilabete batzuk iragarri zuten auditorioaren proiektua berreskuratzearen aldeko apustua, Gasteizek “kultur ekitaldietarako espazio duin, moderno eta erakargarria izan dezan, eta erdialdea eta lurperatzeak libre utzitako eremua biziberritzeko“, nabarmendu dute.

Bilera horretan, Bayónek Euskaltzaindiaren plazarako diseinatu zuten proiektua Musikaren ibilbidera nola egokituko duten azalduko die udal-taldeei; horrez gain, hirigintza-plangintza alorrean nahitaez egin beharreko eguneratze zehatz batzuen berri ere emango diete.

“Hiriarentzat on eta estrategikoa den proiektu bati buruzko xehetasun guztien berri eman nahi dugu. Talde guztiekin konpartitu nahi ditugu urrats guztiak eta bakoitza, konbentzituta baikaude talde gehienen konplizitatea positiboa ez ezik, beharrezkoa dela. Denok norabide bidean goazenean proiektu sinestezinak lortzen ditugu gure hiriarentzat”, azpimarratu du alkateak.

Musikaren ibilbidean egitekoa den entzunaretoak ia 10.000 m2 eta 1.550 pertsonarentzako edukiera izatea aurreikusi da. Kontzertuak, opera jakin batzuk, biltzar handietako osoko bilkurak, akziodunen batzar orokorrak eta beste zenbait ekitaldi hartu ahalko ditu aretoak.

Aretoaren ezaugarri teknikoek batez ere musika ikuskizunak hartzea ahalbidetzea da asmoa: kontzertu sinfonikoak (baita abesbatzak lagunduta ere), ganbera kontzertuak, kantari handien emanaldiak, piano errezitaldiak, kantautoreak, popa edo rocka, dantza, kontzertu formatuko operak eta abar. Efizientzia akustiko handia bermatzen duten baldintzak beteko lirateke horretarako. Orobat, biltzar handietako osoko bilkurak eta aurkezpen handiak ere hartuko lituzke, baita akziodunen batzar orokorrak eta formatu handiko proiekzioak ere.

BAI zentroaren proiektua egin zuten arkitektoek, Mariano eta Pablo Bayónek, proiektua guztiz bideragarria dela eta kokaleku berrira aldatzeko modukoa dela egiaztatu dute.

Entzunaretoaz gain, atondoa, zerbitzuetarako guneak, harrera, jantzitegia, leihatilak, biltegiak, zamalanetarako eremua, denda, kafetegi-jatetxea, areto teknikoak, itzulpen kabinak eta abar barne hartuko lituzke eraikinak. Orotara 9.688 m2-ko azalera erabilgarri itxia izango luke, eta 11.431m2-ko azalera eraikia. Behar den aurrekontua 24.608.000 euro da, BEZa eta obrarako segurtasun eta osasun plana kenduta eta altzariak eta ikus-entzunezko ekipamendua barne hartuta.

Beste proiektu estrategiko

Horrez gain, Gasteizko Agendaren beste proiektu batzuk, kultur azpiegiturei buruzkoak, aipatu ditu alkateak bere asteroko prentsaurrekoan.

Gorka Urtaranek iragarri duenez, atzo bertan sinatu zuten Gasteiz Antzokiaren proiektua idazteko eta obrak egiteko kontratua eta horrekin hasi dira kontatzen euskararekin lotutako kulturarako gune hori errealitate bihurtzeko epeak, duela urte batzuetatik hirian eskatutakoa.

Alkateak gogorarazi du, halaber, Principal Antzokia eraberritzeak bere bidea jarraitzen duela eta aurten bertan hobetzeko proiektuaren idazketa kontratatu ahal izango dela.

Udal Gobernuaren beste proiektu estrategiko eta “lehentasunezkoetako” bat da Iradier Arena, eta datozen lau urte hauetako planean jasota dago. Gorka Urtaranek azaldu duenez, oraingoz ez dago inongo erakunde pribaturen proposamen irmorik. Orain, ordea, eraberritzea nola eta zenbat kostatuko litzatekeen orain zehaztuko dutela iragarri du alkateak.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  8 urtarrila 2020 10:22

Borja Lázaro Kolonbian desagertu zenetik sei urte igaro diren honetan, hura gogoratzeko deia egin die Gasteizko Udalak herritarrei. Maitasuna eta gertutasuna adierazi nahi izan dizkie alkateak Cabo de la Velan (La Guajira, Kolonbia) desagertutako gaztearen familiari eta lagunei, eta, aldi berean, bilaketa-lanei berriro ekin dakiela eskatu du.

Gasteiztarraren ingurukoek kontzertu bat antolatu dute, larunbat honetarako, The Tap tabernan —Manuel Iradier kalea, 7—, Borja Lázarok desagertuta jarraitzen duela gogorarazteko. 19:30ean hasiko da kontzertua, eta bertan arituko dira Alison Keable, Beitia eta Victor Gutiérrez (Similar Interests).

Aurreko urteetan egin izan den elkarretaratzea ordeztuko du kontzertuak, xede berarekin, zein baita Borja Lázaro gogoratzea eta Hego Amerikako herrialde horretan hura bilatzeko lanei berriro ekin dakiela galdatzea. Udalak elkartasuna, sostengua ea hurbiltasuna adierazi nahi dizkio gazte gasteiztarraren familiari.

Desagerpenaren urteurren honetan, hiriak Borja eta haren familiari eskaintzen dizkien sostengua eta elkartasuna berretsi ditu gaur alkateak. Borja Lázaro gasteiztarra 2014ko urtarrilaren 7tik 8ra bitarteko gauean desagertu zen. Geroztik, haren familiak eta lagunek ez dute aurkitzeko itxaropena galdu, eta, horregatik, etengabe mobilizatzen jarraitzen dute, ikerketekin jarraitu dadin, zer gertatu zen argitu eta Borja non dagoen jakin arte.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  27 abendua 2019 12:21

 

Gaur esleitu dio Tokiko Gobernu Batzarrak Viveros Eskalmendi SL enpresari Gasteizko Eraztun Berdeko landaredia zaintzeko zerbitzua, 377.259,74 euroan, BEZa barne, eta bi urteko gauzatze-epearekin.

 

Aldian behingo zainketa- eta hobekuntza-lanak biltzen ditu kontratatutako zerbitzuak, hala nola ongarritzea, inaustea, ureztatzea, belarra moztea, jorratzea eta sasiak kentzea, besteak beste, eta Eraztun Berdeko landare-estalkia kontserbazio-egoera onean mantentzeko behar diren giza baliabideak eta baliabide materialak jasotzen ditu, azken urteetako esperientziaren ildotik.

Ekologiari eta paisaiari dagokienez balio handia duten hainbat parke eta zonek —aisialdirako korridore ekologikoen bitartez lotuak— osatzen dute Gasteizko Eraztun Berdea, eta 842 hektarea hartzen ditu gaur egun.

Biodibertsitatea eta paisaia babestea eta hobetzea, hiriguneko uholdeak galaraztea, ziklo hidrologikoa erregulatzen laguntzea, naturarekin harremanetan aisialdiaz gozatzeko aukera ematea eta ingurumen-hezkuntza sustatzea dira, besteak beste, Eraztun Berdeko parkeek betetzen dituzten zereginak eta eskaintzen dituzten zerbitzuak.

  1. urtearen inguruan Eraztun Berdearen kontzeptua errotu zenez geroztik —Gasteiz ingurua berritzeko eta berreskuratzeko xedearekin—, Eraztun Berdearen eta Biodibertsitatearen Atala arduratu izan da dagoeneko haren parte diren hiriaren inguruko parke horietako landaredia zaindu eta mantentzeko kudeaketa-lanez:
  • ARMENTIA. 159 hektarea. Armentiako basoa.
  • ZABALGANA. 84 hektarea. Zabalganeko baso-parkea, Ehari, Zarauna eta Torrogiko errekak barne.
  • ZADORRA. 194 hektarea. Zadorrako ibai-parkea, Gamarragutxitik Krispiñako ur-araztegiraino.
  • SALBURUA. 247 hektarea. Salburuko hezeguneak, Errekaleor, Santo Tomas eta Alegria errekak barne.
  • OLARIZU. 158 hektarea. Olarizuko lorategi botanikoa, Mendizabala, Batan erreka eta Nebera gaina.
  • JUNDIZ. 41 hektarea. Jundizko parkea, Lermanda, Mendebaldea eta Ariniz barne.

 “Parkeetako natura- eta paisaia-balioak kontserbatzeko eta horiek erabilera publikorako, aisialdirako eta hezkuntzarako egokitzeko, aldian behin mantentze-lanak egin behar dira, hala nola belar-sastrakak moztu, ureztatu, inausi, erein, landatu edo izurriteak kontrolatu. Urteetan, eremu hondatuak ekologiari eta paisaiari dagokienez lehengoratzeko eta erabilera publikorako egokitzeko munta handiko jarduerak egin izan dira, baina oraindik ere badira hiriaren kanpoaldean hainbat eremu hondatu, berreskuratzeke, eta espazio batzuk bestekin korridore ekologikoen bitartez lotuko dituen konexio-sistema osatzeke dago”, azaldu du alkateak.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:01

 

Udal gobernuak Sorginenea-Tu Casa Feministarekiko luzapena onetsi du, Etxanobetarren etxea erabiltzen jarrai dezaten

 

 

 

 

Tokiko Gobernu Batzarrak Sorginenea-Casa de las Mujeres de Vitoria-Gasteiz elkartearekiko hitzarmena luzatzea onetsi du gaur, eta horrela aurten abian jarritako Emakumeen Etxearekiko konpromisoa berritu du hiriak. “Emakumeen Etxea kudeaketa-proiektu bateratua finkatzearen alde lan egiten jarraituko dugu, emakumeak ahalduntzeko espazio gisa ulerturik, partaidetzaren bitartez gizartea eraldatzeko, eta etxea topaketa, truke eta hausnarketarako espazio gisa ikusia izan dadin bultzatzeko”, adierazi du alkate Gorka Urtaranek.

Hitzarmenaren bitartez, elkarteak Etxanobetarren etxea erabil dezake Sorginenearen egoitza gisa, Berdintasun Zerbitzuak Ahalduntze Feministarako Eskolarako behar dituen espazio batzuk izan ezik.

Udalak 150.000 euro jarri ditu Sorginenea elkarteak 2020an bere ekintzak garatzerik izan dezan. Gainera, taldeak 30.000 euroko laguntza jasoko du eraikina egokitzen jarraitzeko. Orobat, higiezina mantendu eta garbitzeko gastuak hartzen ditu bere gain Udalak, besteak beste.

Sorginenea proiektua aurtengo irailean jarri zen abian, kolektibo feministetako eta berdintasunaren aldeko elkarteetako emakume desberdinekin kudeaketa eredua eta proiektuaren beharrak definitzeko partaidetza-prozesu bat egin ondoren; izan ere, aldarrikapen historikoa zen Emakumeen Etxea proiektua garatzeko eremu propio bat edukitzea. Prozesuaren buruan, hitzarmena sinatu zen 2019ko maiatzean, eta uda igaro ondoren ireki zen etxea.

Proiektuan bertan definitzen den bezala, emakumeen etxea inklusiboa, irekia eta askotarikoa da, eta honako helburu hauek ditu: Gasteizko erreferente bihurtzea emakume guztientzat eta feminismoaren eta berdintasunaren alde lan egiten duten kolektibo guztientzat, sormena, hausnarketa eta, batez ere, egiteko beste modu batzuk sustatzeko topagunea izatea, eta dibertsiorako toki goxoa eta ikasteko errespetu- eta ekitate-esparrua izatea.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  23 abendua 2019 13:48

EUDELen elkarteburu eta Vitoria-Gasteizko alkate Gorka Urtaranek BetiON Telelaguntza Zerbitzuko call centerrean hartu du parte, gaur goizean, Erandioko eta Portugaleteko alkate eta EUDELen Batzorde Eragilearen kide Aitziber Olibánekin eta Mikel Torresekin batera, bai eta beste alkateekin batera ere: Arrigorriaga, Maite Ibarra, Barakaldo, Amaia del Campo, Bilbao, Juan Mari Aburto, Elorrio, Idoia Buruaga, eta Laudio, Ander Añibarro.

11:00etatik aurrera, BetiONeko teleoperadoreekin aritu dira alkateak lanean, eta, hala, erabiltzaileen deiei erantzun diete. Bide batez, unea aprobetxatu dute beren udalerrietako herritar nagusiei Gabon zoriontsuak opatzeko. Euskadiko udalek pertsona nagusien segurtasunarekiko, ongizatearekiko eta bizi-kalitatearekiko konpromisoa dute.

Gorka Urtaranek zahartzearen erronka aipatu du, bai eta belaunaldien arteko elkarbizitza ere; azken horren harira, hau esan du: “Gizarte osoari dagokion erronka da. Bakartasuna arazoa da eta horri aurre egiteko, ikusgarritasun handiagoa eman behar zaio”. Alkate eta elkarteburuak zera baloratu du: “gertuen dagoen inguruko laguntza-sarea, hau da, instituzioetatik, gizarte-erakundeetatik eta herritarrengandik beraiengandik, bakarrik bizi direnei laguntza emateko”. Ildo horretatik, Urtaranek azaldu du udalek “enbaxadoreak” izan behar dutela, bai eta “BetiON zerbitzura sartzeko atea” ere.

Iñigo Urkullu Lehendakaria buru duten eta Eusko Jaurlaritzaren Enplegu eta Gizarte Politiketako Sailak antolatutako Jardunaldi Irekietan egin da ekintza hori. Jardunaldian, EAEko hainbat udalerritako adineko 15 pertsonek osatutako talde baten anfitrioi gisa jardun du sailburu Beatriz Artolazabalek; hain zuzen ere, gonbidapena egin zaie pertsona horiei, Bilboko San Inazio auzoko Aragoi kalean dauden BetiONen instalazioak ezagutu ditzaten.

Lehendakariak eta agintariek pertsona horiek zoriondu dituzte, eta, gainera, zerbitzuak 2020. urteari begira izango dituen berrikuntzak ezagutu dituzten lehenengoak izan dira aipatutako erabiltzaileak.

 

 

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  16 abendua 2019 12:08

 

 

Gorka Urtaran alkatearen adierazpenak

Gorka Urtaran alkatea eta Maider Etxebarria lehen alkateordea pozik agertu dira Elkarrekin udal taldearekin lortu duten akordioarekin, horri esker Gasteizek aurrekontua izango baitu 2020an. “Indar batasun honek gehiengoa edukitzea ahalbidetzen digu, ezinbestekoa baita hiriak datorren urterako aurrekontua izan dezan. Etapa berria irekitzen da Gasteizentzat, Agenda gasteiztarrak barne hartzen dituen etorkizuneko proiektu handiei aurre egiteko behar den bermearekin. Garai berri baterako akordioa”, azpimarratu du alkateak.

EAJ-PNV eta PSE-EEk Elkarrekin taldearekin lotu duten aurrekontu itunak datorren urterako proiektu ekonomikoan ezarritako lehentasunetako bat berresten du: agintaldiko inbertsio handiak abian jartzea. Beste bi lehentasunak, kalitateko zerbitzu publikoen aldeko apustua eta Gasteiz ekonomia berdearen alorrean erreferentea bihurtzea, indartuta geratu dira Elkarrekin-ek 2020rako aurrekontu-proiektuari egindako zuzenketak txertatuta.

“Bat etorri gara funtsezko bi printzipiotan: herritarren bizi-kalitatea hobetzea eta hiri are jasangarriago baterantz aurrera egitea. Helburuetan bat etortzeak eta Elkarrekin-ek asmo positiboz egindako proposamenak txertatzeak erraztu dute tokiko politikan dinamika berria ekarriko duen akordio hau. Hiria alderdien interesen gainetik jartzeak hau bezalako albiste onak dakartza beti”, erantsi du Gorka Urtaranek.

“Akordio garrantzitsua da, agintaldiko lehen aurrekontua onestea ahalbidetuko duelako. Gasteizek ezin zuen jasan hirugarrenez jarraian aurrekontua luzatzea etorkizunari bermearekin begiratu nahi bazion. Agiri ekonomiko berriak ekonomia, gizarte eta ingurumen garapenean jartzen du indarra, baita berdintasunean ere. Eta, gainera, itunen kulturaren adierazlea da, hain beharrezkoa dena duela bi hamarkadatatik gobernuak gutxiengoan izatera abonatuta zegoen udal batean. Dena eman behar dugu batzeko, lankidetzan aritzeko, aliantzak lotzeko eta elkarrekin arraun egiteko”, adierazi du Etxebarriak.

2020rako aurrekontu-proiektuak 392,6 milioi euro barne hartzen ditu orotara (438,7 milioi udal sozietateen aurrekontuak gehituz gero). Asteazkenean hasiko da zuzenketen eztabaida eta bozketa batzordean, eta Udalbatzak abenduaren 20an onestea aurreikusi da.

Share

Aurrekoak »