Prentsa Oharren banner
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  12 martxoa 2019 10:45

 

 

 

 

 

 

 

 

 

 

Gaur eta bihar izango da Gasteizen eta Arabako Errioxan

– IWINETC 2019 Enoturismoren Nazioarteko Kongresuak gaurtik bilduko ditu Gasteizko Europa Jauregian mundu osoko 250 profesional baino gehiago: enoturismokoak eta ardoaren mundukoak, bidaia agentzietakoak, turoperadoreak eta bidaia agentzia espezializatuetakoak.

Arabako diputatu nagusi Ramiro González, Gasteizko alkate Gorka Urtaran, Eusko Jaurlaritzako Turismo eta Ostalaritzako zuzendari Maider Etxebarria, eta Arabako Errioxako Ardoaren Ibilbideko presidente María Asun Saenz de Samaniego izan dira gaur goizean sektoreko elkarraldi garrantzitsuenetakoa den hau inauguratzen.

IWINETC 2019 gaurtik hasita ostegunera arte izango da ‒martxoaren 12tik martxoaren 14ra‒ eta bi ponentzia-egun hartuko ditu Gasteizko Europa Jauregian, baita workshop jardunaldi bat ere Arabako Errioxan. Prentsa espezializaturako eta turoperadoreentzako bidaiekin osatzen da programa, Arabako Errioxako, Arabako eta Euskadiko erakargarritasunak haiei erakustearren.

Jarduera osagarri horiek martxoaren 17ra arte luzatuko dira.

Berrikuntza, marketin eta marka-sorkuntza, garapen profesional eta sareen arloko aditu nazionalak eta nazioartekoak izango dira gaur eta bihar protagonista Europa Jauregiko 25 ponentziatan. Hogei bat herrialdetako (Australia, Alemania, Kanada, Britainia Handia, Israel, India, Italia, Japonia, Errusia, Uruguai, AEB, Hegoafrika…) sektoreko 250 profesional inguru izango dira hitzaldi horietan.

Aurreneko bi ponentziek, hain zuzen ere, Euskadiren eta Arabako Errioxaren garrantzia nabarmendu dute helmuga enoturistiko gisa.

Bi egun hauetan, gainera, Europa Kongresu Jauregiak produktu enoturistikoen hornitzaileen erakusketa-eremu zabal bat hartzen du barruan: elkarteak, turismo-bulegoak, museoak, hotelak eta upeltegiak.

Ostegunean, martxoaren 14an, Arabako Errioxan eta, zehazki, Laguardian, lan-jardunaldi bat —workshop– egingo da, eta bertan parte hartuko dute enoturismoan espezializatutako 45 bidaia-agentziak eta turoperadorek. Arabako Errioxako, Arabako eta Euskadiko upeltegiek, hotelek eta zerbitzu-enpresek beren zerbitzuak aurkeztuko dituzte elkarraldi profesional honetan, etorkizuneko lankidetzak lortze aldera.

Mundu osoko enoturismoko agentzia espezializatuak izango dira elkarraldian: Estatu Batuak, Frantzia, India, Hong Kong, Alemania, Mexiko, Filipinak….

Egun horretan bertan hasiko dira press trip edo bisitaldiak, non enoturismoan espezializatutako hamabi hedabidek parte hartuko duten; Estatu Batuak, Australia, India, Erresuma Batua, Norvegia, Hegoafrika eta Australiatik etorriak, sektore enoturistikoaren ikuspegi zabal bat eskainiko zaie, EAEko enoturismoko upeltegi, baliabide eta lokalizazio nagusietako batzuetara hurbilduko dituzten bidaien programa batean oinarrituta.

Ostiralean, martxoaren 15ean, Fam trip bat egingo da, workshopean parte hartu duten turoperadoreei zuzendua. Fam trip edo familiarizazio-bidaiak marketineko estrategia bat dira, turoperadoreek helmuga ezagutu dezaten eta ondoren haien bezeroei konfiantzaz eta segurtasunez eskaini diezaieten.

Turoperadoreentzat familiarizazio-bidaia hori, Euskadiko enoturismoari lotutako baliabide nagusiak ezagutzera emango dizkiena, produktuaren erakusleiho onena da, ondoren egonaldiak salduko dituen bidaia-agenteak zuzenetik bizi dezakeelako esperientzia, eta gero bere bezeroei transmititu.

Familiarizazio-bidaiaren xedea Euskadiko erreferentzia enoturistiko onenetako batzuen ikuspegi panoramiko bat eskaintzea da. Lehenengo egunean Arabako Errioxako baliabideak bisitatuko dituzte, besteren artean, Baigorri, Eguren Ugarte, Almazara Moredan (Araba), Villa Lucía Ardoaren Zentroa, Casa Primicia… Martxoaren 15ean Gipuzkoa erakutsiko zaie, Donostiara eta Getariako Gaita upeltegira egingo duten bisitaldi batean. Azkeneko egunean, turoperadoreek Bilboko leku adierazgarrienak ezagutuko dituzte eta Despensa del Etxanobe bisitatuko dute, Fernando Canales chefarena.

Share
Kategoriak: Prentsa oharrak  —  Etiketak: , , , ,   —  Komunikazio Zerbitzua / Servicio de Comunicación  —  4 martxoa 2019 10:16

Aste honetan hasi dituzte obrak. Urtaranen gobernuak 539.512,57 euro inbertituko ditu berriztapenean eta lau hilabeteko epea ezarri da lanak gauzatzeko. Besteak beste, ingurua berriztatzeko eta espaloiak zabaltzeko egingo dira lanak, eta Balgorza enpresaren ardurapean egongo da esku-hartzea.

Salvador kalea (Pilar auzoan) zahartuta geratu da, eta hainbat arazo ditu, besteak beste, galtzada hondatuak, espaloi estuak eta egoera txarrean dauden zoladurak. Auzokoekin adostutako obrei esker, ordea, oinezkoentzako lekua zabaltzea eta ingurua modernizatzea lortuko da. Halaber, Udalaren Mugikortasun Iraunkorrerako Planak xedatzen duenari eta duela gutxi egindako beste jarduera batzuen ildoari jarraiki, bidegorri bat jarri eta zirkulazio-abiadura “lasaitu” egingo da, orain arte ibilgailuentzako zen erreietako bat kenduta. Horretaz gain, beste lan hauek egingo dira: zuhaitzak landatu, hiri-altzari berriak jarri eta argiteria-, saneamendu- eta drainatze-sareak hobetu. “Lan hauei esker kaleek hobera egingo dute, erakargarriago eta atseginagoa bihurtuko baitira. Berriz ere erakutsiko dugu herritarrekin eta auzoekin konplitzen dugula”, azaldu du Gorka Urtaran Alkateak.

Gobernu-taldeak bultzatutako berriztapen horrek jarduera-eremu ugari ditu. Ekialdean zabaldu egingo da espaloia —lau eserleku jartzeko tokia geratuko da— eta bateriako aparkamenduak ilarako aparkamendu bihurtuko dira. Mendebaldean ere zabaldu egingo da espaloia, eta bost eserleku jarri eta 17 zuhaitz landatuko dira. Alde horretako aparkamenduek bateriakoak izaten jarraituko dute, baina galtzadaren erdialdera aldatuko dira.

Zirkulazio erreietarako pentsatutako esku hartzeen ondorioz egin ahalko dira aipatutakoak. Desagertu egingo da orain arte hegoaren eta iparraren arteko lotura egiteko aukera ematen duena, eta horren ordez bidegorria margotuko da. Beste erreiak, iparretik hegora doanak, trafiko lasaitua izango du, “30 eremua” izatera pasata. Ohikoa denez, Udalak argiteria-, saneamendu- eta drainatze-sarea hobetzeko baliatuko ditu lanak.

Eraberritze lan hauek joan astean Peru kalean hasitakoei batu zaizkie. Lanek 580.000 euroko inbertsioa eskatuko dute, gutxi gorabehera

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  1 martxoa 2019 13:11

Urtaranen gobernuak Irizar E-Mobility, Yarritu eta LKS Buildingenia enpresek osatutako aldi baterako enpresa-elkarteari esleitu dio autobus elektriko adimentsuaren sistema ezartzeko kontratua. Proiektuak ia 35 milioi euroko inbertsioa izango du azkenean, eta “benetako iraultza ekarriko du hiriko mugikortasunean”, Gorka Urtaran alkatearen hitzetan. 13 ibilgailu elektriko eta abangoardista izango dira, 18 eta 12 metroko luzerakoak; orotara 10 kilometroko ibilbidea egingo dute, eta 24 geltoki jarriko dira noranzko bakoitzean. “Puntako teknologiako ekipoak izango dira, berritzaileak, zalantzarik gabe Gasteizi aurrera egiten eta modernoagoa izaten lagunduko diotenak, hau da, XXI. mendeko hiria, mugikortasun iraunkorraren politiketan eta garraio publikoaren elektrifikazioan erreferente”, nabarmendu du Gorka Urtaranek. TUVISA arduratuko da zerbitzua emateaz. Autobusen maiztasuna 8 minutukoa izango da, eta ibilbidearen zati handi batean errei esklusiboetatik joango dira, hiriko leku garrantzitsuenetan zerbitzu emateko (Txagorritxu ospitalea, Eusko Jaurlaritza eta Mendizorrotzeko futbol-zelaia) eta 14 auzo lotzeko.

Hiru erakundek lagunduko dute proiektua gauzatzen: Udalak (finantzaketaren % 17,5 jarriko du), Arabako Foru Aldundiak (beste % 17,5) eta Eusko Jaurlaritzak (% 65). Unitate txikiek gutxienez 65 pertsona (21 eserita) hartzeko lekua izango dute, eta artikulatuek, berriz, gutxienez 100 pertsona (30 eserita). Gurpil aulkietarako hiru espazio ere eduki beharko dute, eta artikulatuek, haur-kotxeentzako aparteko lekua. Irisgarriagoak izan daitezen, autobus artikulatuek lau ate edukiko dituzte: bi aurrealdeko zatian, eta beste bi atzealdean. Ateak labainkorrak izango dira, eta barrutik zein kanpotik irekitzeko botoia izango dute, tranbiak bezala. Denek balioko dute sartu zein irteteko, txartelak markesinetan balidatuko baitira.

Orobat, hiru led pantaila eramango dute, erabiltzaileek ibilbideei, aldaketei, itxarote-denborei, geltokiei eta abarri buruzko informazioa izan dezaten. USB kargagailuak ere jarriko dira erabiltzaileentzat, eta artikulatuek maletentzako kaiola ere izango dute. Gidarien kontsolak, berriz, ibilbideei buruzko informazioa denbora errealean emango dute, baita autobusaren alderdi teknikoei edo gerta daitezkeen gorabeherei buruzkoa ere, eta autobusaren kontrola erosoagoa izango da. Gidariari laguntzeko sistemaz hornitutako joango dira, gidatze automatikoz eta geltokira hurbiltzeko asistentziaz, zintarriaren eta ibilgailuaren distantzia txikiena izan dadin. Atzerako ispiluen ordez, kamerak izango dituzte.

Geltokiei dagokionez, markesinak tranbiak dituenen antzekoak izango dira, estetika modernokoak; txartelak erosteko eta balidatzeko makinez gain, informazio multimedia eta denbora errealean eskainiko da. Autobus elektriko adimentsua ezartzearekin batera, hainbat esku-hartze egin beharko dira espazio publikoan. Autobusek errei erreserbatuta batetik zirkulatuko dute, zeina 3,5 metro zabal izango baita, zatirik handienean, oraingo 2. linea periferikoa doan bidetik. Batzuetan, biribilguneak zeharkatuko dituzte, orain lorategi itxura duten lekuetatik. Esku-hartze handiagoak ere aurreikusi dira, esate baterako, Esmaltazioen inguruan, bi biribilgune batu eta biribilgune handi bat sortuko baita.

 

Share
Kategoriak: Prentsa oharrak  —  Etiketak: , , , ,   —  Komunikazio Zerbitzua / Servicio de Comunicación  —   12:08

Gasteizko Udalak 100.000 euro jarriko ditu aurten Arabako Foru Aldundiarekin Gasteizko udalerriko nekazaritza eremuko bideak mantendu eta hobetzeko sinatutako hitzarmenaren barruan; 2012az geroztik urtero sinatzen da hori. Ekitaldi honetan egin beharreko lanak zehazteko bilera egingo dute Udalak, Aldundiak eta Kontzejuen Elkarteak. Berrostegieta, Aretxabaleta, Mendiola ta Otazun. Menpeko toki erakunde bakoitzak lanen % 20 ordainduko dute. “Gasteiz 63 herrik osatutako udalerria da, eta gure betebeharra eta helburua da bertako herritarren bizi-kalitatea hobetzea. Azken lau urteotan 22 kilometro bide hobetu ditugu lankidetza honi esker”, nabarmendu du Gorka Urtaran alkateak.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   11:44

Udalak 80.000 euro eman ditu “Martxoak 3” filmaren zabalkunderako

Gorka Urtaran alkateak gaur, sarraskiaren 43. urteurrenaren bezperan, beste behin aldarrikatu du martxoaren 3an eraildakoentzako aitortza, ordaina eta justizia. “Ez dugu etsiko epaitegiek horretaz erabaki arte, baina bitartean, eman diezaiegun ordaina biktimei. Asmoa ez da errudunak bilatzea, ez eta mendekua ere. Baina, zalantzarik dabe, aitorpena laguntza handia litzateke gure hiriko historiaren kapitulu hori ixteko, oraindik uste baitu gertakari haiek bidegabeak izan zirela, eta pertsona haiek ez zuketela hil behar. Orobat, giza eskubideen errespetuan oinarritutako bizikidetzan aurrera egiten lagunduko luke” amaitu du Gorka Urtaranek.

“Duela 43 urte gertatutakoak odolez eta suz iltzatuta geratu dira Gasteizko gizartean, eta beraz, ez dira ahazten. Hiriaren historian gertatu den eraso handienetakoa izan zen. Igande honetan, gogoratuko dugu Poliziak Pedro María Martínez Ocio, Francisco Aznar Clemente, Romualdo Barroso Chaparro, José Castillo eta Bienvenido Pereda erail zituela San Frantzisko parrokian egiten ari ziren asanblada husteko prozesuan. Sinetsita gaudenez biktima guztiek merezi dutela tratu bera, egia ezagutzea, justiziaz tratatzea eta duintasuna itzultzea, Udaletik behin baino gehiagotan eskatu dugu Martxoaren 3an eraildako bost pertsonei aitorpena ematea eta terrorismoaren biktimekin parekatzea. Estatuari eskatzen diot ezen, justiziak aitorpen horretan aurrera egiten ez duen bitartean, gutxienez berak halakotzat jotzea eta frankismoaren biktimak terrorismoaren biktimekin pareka ditzan, haien duintasuna itzultzeko, nolabait“, azpimarratu du Gorka Urtaranek.

Gaur Tokiko Gobernu Batzarrak onetsi du 80.000 euro ematea “Martxoak 3” filmaren zabalkunderako. Ostegun honetan filmaren emanaldi berezia egin dute, baina maiatzean estreinatuko da gainerako aretoetan.

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  21 otsaila 2019 11:39

Gasteizko alkateak, Gorka Urtaran, araudia berregiteko eskatu die Eusko Jaurlaritzari eta Eudeli, tabernetan kontzertu gehiago egin ahal izatea baimentzeko. Azken egunotan Segurtasun sailburuarekin eta Eudeleko lehendakariarekin harremanetan izan da Gorka Urtaran, kontzertuak 12ra mugatzen dituen araudia alda dezaten eskatzeko. Bai Eusko Jaurlaritza bai Eudel norabide horretan pausuak emateko prest agertu dira. “Uste dugu malgutasun handiagoa behar dela, eta, horregatik, elkarrizketarako espazio bat sortu eta araudia berridazteko eskatu diet”, azaldu du Gasteizko udalburuak. Horren harira, atzo Udal gobernuak zuzenketa bat erregistratu zuen biharko osoko bilkurara begira.

“Gasteizko Udaletik Eudeli eta Eusko Jaurlaritzari eskatzen diegu araudia berridatz dezatela tabernetan egin daitezkeen kontzertuen kopurua handitu eta, hala, gure hiriko musika- eta kultura-jarduera sustatzeko. Uste dugu posible dela kultur dinamizazioaren eta auzokoen atsedena bermatzearen arteko oreka lortzea”, nabarmendu du alkateak.

Gorka Urtaranek hitzeman zuen bezala, azken bi asteetan Eusko Jaurlaritzak proposatutako araudia eta horrek hirian izango lukeen eragina aztertzen aritu da Udala.  Alde batetik, zentzu hertsian kontzertu aretoak diren espazioez gain, Gasteizen lau ostalaritza establezimenduk soilik dute kontzertuak egiteko baimena edo gaitze agiria, eta, horrenbestez,  gaur egun kontzertuak antolatzen dituzten establezimendu gehienei eragingo lieke araudiak. Egia da azken ekitaldian bi taberna eta kafetegik bakarrik egin zituztela 12 kontzertu baino gehiago urtebetean, eta  horietako bat ere ez zela heldu bere garaian Udalak auzokoen atsedena bermatzeko aldi baterako neurri gisa proposatu zuen 24 ekitaldiko mugara.

Eskura dauden datuak aztertu ondoren, alkatea sailburuarekin eta Eudeleko lehendakariarekin harremanetan jarri da, araudia alda dezaten eskatzeko. Horrez gain, Jendaurreko Ikuskizunen eta Jolas Jardueren abenduaren 23ko 10/2015 Legea garatzeko araudiaren inguruko hausnarketa egitea proposatuko du Udal Gobernuak biharko osoko bilkuran.

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  20 otsaila 2019 14:17

 

 

 

 

 

 

 

Gasteizko alkate Gorka Urtaran protagonista izan da, gaur goizean, “Sustainable Urban Mobility Bilbao 2019” biltzarreko saio batean. “Mugikortasun jasangarriago baterako estrategiak eta ikaskuntzak” gaia ardatz, Gasteizko alkateaz gain honakoek partekatu dituzte esperientziak: Valladolideko alkate Oscar Puentek, Cuencako alkate Ángel Luis Mariscalek eta Jinjako alkate eta Ugandako Tokiko Gobernuen Elkartearen presidente Majid Batambuzek.

Gorka Urtaranek mugikortasun iraunkorrarekin lotutako aditu eta profesionalez osatutako entzule askoren aurrean aurkeztu du Gasteizko eredua: “ hamar urte baino gehiagoz bultzatu ditugun neurrietan oinarritutako eredua da, eta hainbat aitorpen lortu ditugu neurri horiei esker. Horien artean, “European Green Capital 2012” titulua. Gasteizko alkateak lanean jarraitzen dugula eta Gasteiz Mugikortasun Iraunkorraren eta Espazio Publikoaren Planaren berrikuspenean murgilduta dagoela azpimarratu du. Alkateak adierazi duenez, “plan honetan oinezkoa da mugikortasunaren eskemaren protagonista nagusia, eta horren atzetik garraio publiko modernoa, elektrifikatua, irisgarria eta edukiera handikoa”. Horien atzetik beste zenbait neurri ere badaude, esaterako bizikletaren erabilera sustatzea, eta ibilgailu pribaturako konponbidea bilatzea.

Gasteizko alkateak Gasteizko mugikortasunaren bilakaerari buruzko hainbat datu eman ditu: “Hiriko joan-etorrien bi heren oinez edo bizikletaz egiten dira dagoeneko. 2002. urtean, joan-etorrien % 1 baino zertxobait gehiago ziren bizikletaz, eta, gaur egun % 15etik gora”  Tranbia 7 milioi pertsonak erabiltzen dute urtean; hiri autobusa, berriz, 15 milioitik gora pertsonak.

Horretaz gain, Gorka Urtaranek etorkizunean planak arrakastatsu izateko hainbat gako eman ditu; Gasteizen arrakasta finkatu duten gakoak: “herritarrak, teknikariak eta adituak kontuan izatea eta adostasun politikoa izatea. Alderdi horien guztien baturak erabakiak lasaitasunez hartzea ahalbidetzen du, ez inprobisatzea”.

 

Share
Kategoriak: Fotonotizia  —  Etiketak: , , ,   —  Komunikazio Zerbitzua / Servicio de Comunicación  —  14 otsaila 2019 12:58

 

 

 

 

 

 

 

Gasteizko alkate Gorka Urtaranek eta UPV-EHUren Arabako campuseko erretoreorde Ivan Igartuak ireki dituzte Empleo Gune foroaren bederatzigarren edizio honetako ateak; gaurko egunean zehar, lan bila dabiltzanen eta lana eskaintzera urreratu diren enpresen arteko topagunea izango da. Guztira, 34 enpresak hartuko dute parte ekimenean eta 316 lan-eskaintza ekarriko dituzte. Lan-eskaintza horiei lotuta, langileak hautatzeko hainbat aurkezpen eta elkarrizketa egingo dira. Ekitaldian informazio gune bat ere egongo da, Administrazio Publikoak eskaintzen dituen enplegu aukeren berri emateko, eta lan orientabideari loturiko alderdiak lantzeko lantegiak ere antolatuko dira.

 

 

 

 

 

 

Urtaranek nabarmendu du azken urteetan lan merkatuak hobera egin duela eta, batez ere, enpresek lanpostuak sortzeko eta lan bila dabiltzan pertsonek haien prestakuntza hobetzeko ahalegin handiak egin izanaren ondorioa izan dela hobekuntza hori. “Egoera on honen gakoa elkarlana da, bai enpresek bai prestakuntza-agenteek zein herritarrek Gasteiz hiri lehiakorra eta kalitateko enpleguduna izan dadin egindako lana”, azpimarratu du alkateak.

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  1 otsaila 2019 11:28

Gobernu Batzarrak aktibatu egin du Udalaren, Armentiako Administrazio Batzarraren eta lursailen jabeen arteko akordioaren ondoriozko hirigintza-berrikuspena

 

 

Gasteizko udalerriko Armentia herriaren hirigintza birmoldatuko da korridore berde bat eratzeko Ehari ibaiaren inguruan, aprobetxamenduak berrantolatzeko eta erabilera emateko antzinako hipikaren eraikinari (XVI. mendekoa).

Udalaren, Armentiako Administrazio Batzarraren eta ukitutako lursailen jabeen arteko akordioaren ondorioa da proiektua. Gaur, Tokiko Gobernu Batzarrak aktibatu egin ditu Armentiako toki-erakundearen HAPOren Berrikuspen Partziala hasteko behar diren izapideak. Hirigintza Batzordeak eta Osoko Bilkurak berretsi beharko dute berrikuspena.

Proiektua idazteko gaur onetsi diren irizpideen artean, nabarmentzekoa da Ehari errekaren ondoko korridore berdeari (herria zeharkatzen duen inguruan) jarraipena emateko asmoa, eta horretarako aldatuko da Armentia 2 egikaritze-unitatea, horretako lurzoruak birkalifikatzeko (gaur egun, bizitegi-erabilerakoak dira) espazio libreen tokiko sistema edo sistema orokor gisa; gaur egungo bertako eraikitze-eskubideak 16. sektoreko lurzati batera lekualdatuko dira, Ostatu Emaileen kalearen pareko muturrean.

Hirigintza-berrikuspenak dakarren beste ekintzetako bat da antzinako hipika zegoen lurzatiaren erabilera aldatzea, bizitegi-erabileratik ekipamendu-erabilerara. Aldaketa horrekin, administrazio-batzarrak erabilera eman ahal izango dio berriro XVI. mendeko eraikinari (Fernando I.a, Carlos V.a eta Maximiliano enperadore alemaniarren aurrean enbaxadorea izandako Juan Alonso de Gámiz gasteiztar ospetsuak eraiki zuen, eta 1992tik abandonatuta dago).

 

 

 

Share
Kategoriak: Prentsa oharrak  —  Etiketak: , , , ,   —  Komunikazio Zerbitzua / Servicio de Comunicación  —  24 urtarrila 2019 12:08

Gasteizek herritarrei laguntzeko bulegoen sare osoa baliatuko du kanpainan informazioa eta aholkularitza emateko; urtarrilaren 28an (astelehena) hasiko da kanpaina, eta otsailaren 7ra arte iraungo du

 Gerora matrikulazioa udal bulegoetan bertan egin ahal izatea da asmoa

 

Alkate Gorka Urtaranek, Hezkuntzako zinegotzi Estíbaliz Cantok eta Arabako Hezkuntzako ordezkari Blanca Guerrerok lankidetzarako ildo berri bat aurkeztu dute gaur, eskoletako matrikulazio-kanpainan familiei laguntzeko.

Horren bitartez, Gasteizek herritarrei laguntzeko bulegoen sare osoa eskainiko du matrikulazio-kanpainan informazio eta aholkularitza emateko; urtarrilaren 28an (astelehena) hasiko da kanpaina, eta otsailaren 7ra arte iraungo du. Hartara, informazioa eta aholkularitza guneen eskaintzari beste 12 leku gehituko zaizkio hirian barrena, hiru eskola-eremu bakoitzeko.

Familiei beharrezko informazioa eta orientabideak ematen laguntzea da helburua, eskolaratze orekatua lortze aldera. Lankidetza horri esker, arreta emateko ordutegia zabalagoa izango da, eta gertuko zerbitzua eskainiko, gizarte etxeetan kokatutako bulegoen bitartez.

Matrikulazio-epea bukatu ondoren, esperientzia pilotua ebaluatuko da, behar diren doikuntzak egin eta lankidetza egonkor bihurtu dadin; gerora matrikulazioa udal bulegoetan bertan egin ahal izatea da asmoa.

 “Hain zuzen ere, gizarteari eta hezkuntzari dagokionez Gasteiz modernizatzea zen agintaldirako gure konpromisoetako bat, azken helburutzat pertsona ororen berdintasuna bermatzea hartuta, giza eskubideak oinarri direla”, azaldu du alkateak.

Udalak eskumen mugatu eta partekatua du hezkuntzaren alorrean; alabaina, “ez da hori gertatzen berdintasunaren alorrarekin, giza eta funtsezko eskubideen markoan, eta konpromiso horretatik aurkezten dugu gaur hezkuntza-ekitatearen alorrean autonomia erkidegoko administrazio orokorrarekin lankidetzan aritzeko programa hau”, erantsi du Gorka Urtaranek.

Izan ere, gaur aurkeztu den ekimena Eusko Jaurlaritzako Hezkuntza Sailarekiko lankidetza-esparru zabalago baten barruan sartzen da, zeinak Gasteizko udalerrian hezkuntza-ekitatea sustatzeko interes komuneko jarduerak definitu eta koordinatzeko helburua baitu —laster aurkeztuko da hori—.

Hezkuntzako zinegotziak, berriz, “hezkuntza-politiketan beste batzuekin batera aritzeko konpromiso sendoa” berretsi du. “Gobernu honek berriro jarri zuen martxan Udaleko Eskola Kontseilua, eta kudeaketa-lan handia egin dugu: segregazioaren kontrako mahaia sortu genuen, zeina fruitu ematen ari baita pixkanaka eta zarata handirik egin gabe, eta ematen jarraituko baitu gerora ere. Gasteiz erreferentzia da estatuan hiri hezitzaileen alorrean, eta udalaren haur-eskolen kudeaketan ere ahalegina egin dugu —Eusko Jaurlaritzarekiko lankidetzaren beste adibide bat—, hainbat programarekin, hala nola Haur Antzerkia, Artea  eta Jolasa, Gurasoen Eskola eta aiten erantzunkidetasunerako proiektuak”, nabarmendu du Estíbaliz Cantok.

 

 

 

 

 

 

 

 

Share

« HurrengoakAurrekoak »