Prentsa Oharren banner
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  18 urtarrila 2019 14:34

 

Gaur goizean, Gorka Urtaran alkateak, Peio López de Munain alkateordeak eta Udalbatzako beste kide batzuek harrera egin diete 2017ko azarotik 2018ko abendura bitartean erretiratu diren udal langileei.

Harrera aretoan egin da ekitaldia, eta eskualdeko enplegu programako gazteek landu duten bideo bat ere proiektatu da.

 

 

Udaletxean tradiziozkoa den ekitaldi horren bidez, Udalak “esker ona eta aitorpena adierazi nahi die zuen guztion dedikazioari, zuengatik funtzionatzen baitu benetan erakundeak”, esan du alkateak.

Aipatutako epean erretirora iritsi diren langileak 100 izan dira guztira.

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:20

 

Feria horretan Arabako Pastelgile Elkarteak txokolatez egindako saskibaloiko baloiak banatuko dira, orotara 10 kilo

Udalak Gasteizera hurbilduko du FITUR, urtarrilaren azken asteburuan jarduerak antolatuta

Gasteizek iragan historikoa, Euskadiko lehen helmuga iraunkor gisa lortu duen ezagutza eta 2019ko ekitaldi-agenda osoa erakutsiko ditu 2019ko FITUR azokan, hiriko hainbat sektorerekin batera landu duen eskaintzaren bidez.

Alkate Gorka Urtaranek, Arabako Pastelgile eta Gozogileen Elkarteko lehendakari Luis López de Sosoagak eta ARKIKUS enpresa gasteiztarreko CEO Arantxa Satrústeguik aurkeztu dituzte Gasteizek Estatuko turismo-azoka garrantzitsuenera eramango dituen plater nagusiak;, hirian ere izango du oihartzunik azokak, hainbat jarduera antolatu baitira urtarrilaren azken asteburuan.

1850eko Gasteizera bidaiatzeko aplikazioa

Udalak 1850eko Gasteizera bidaiatzeko gonbita egingo du, irudikapen birtualeko aplikazio mugikor baten bidez, horrek aukera ematen baitu hiriko leku batzuek 1850ean zuten itxura eta egungoa alderatzeko. Aplikazioa doan deskargatu daiteke bai Google Play-n (Android) bai App Store-n (IOS), eta denboran bidaiatzeko eta Andre Maria Zuriaren plazak edo Montehermoso jauregiak garai hartan zuten itxura zuzenean ikusteko bide ematen du.

Teknologia berriak baliatuz kulturarekin lotutako turismoa sustatzeko modu berritzailea da, galdutako arkitekturak birtualki berreraiki eta espazioak girotzen baititu. Horrek ondarearen zabalkundea sustatuko du, eta turismoa espazio horietara eta inguruetara erakarriko”, nabarmendu du alkateak; orobat, zorionak eman dizkio hori garatu duen enpresa gasteiztarrari, zeinak azken urteetan aitortza lortu baitu estatuko hainbat ekintzailtzetza-programatan.

Aplikazioa baliatuz berreraikitako irudiei esker, ikusleek denboran bidaiatu dezakete, eta hiriak Erdi Aroko itxura gordetzen zuen garai batera joan; izan ere, Andre Maria Zuriaren plazara ematen duten gremio-kaleek ateak zituzten artean.

Aplikazioak lokuzioak ditu, irudiak ikusten diren bitartean informazioa eta deskribapenak entzun ahal izateko, testuak irakurri beharrik gabe. Bai testuak bai lokuzioak 4 hizkuntzatan eskaintzen dira: euskara, gaztelania, ingelesa eta frantsesa.

Bi erabilera sistema ditu: ukimenezkoa, edukiak hatzez eskuratu eta maneiatzeko, eta VR, errealitate birtualeko betaurrekoak erabiltzeko egokitua, zeinak hobeto murgiltzeko aukera ematen baitu, eskuak erabili beharrik gabe. Batak zein besteak giroskopioa dute, gailu mugikorra mugitze hutsarekin irudia biratzea ahalbidetzen duena.

Saskibaloia, Gasteizko txokolatezko bonboietan

Horretaz gain, Gasteizek bere DNAren parte diren bi ezaugarri elkartuko ditu: gozogintza tradizioa eta saskibaloiarekiko zaletasuna. Arabako Pastelgile eta Gozogileen Elkartearen laguntzarekin, saskibaloi baloien itxura duten txokolatezko 10 kilo bonboi banatuko ditu Udalak Fiturren, bi zaporetan: laranja, eta Arabako oliba-olioa eta Añanako gatza.

Izan ere, Arabako Gozogileen Elkarteak hainbat hamarkada daramatza hiriko ospakizun bereziekin bat egiten. Gainera, urtarrileko azken asteburutik aurrera, elkarteko gozotegi guztiek eskainiko dituzte beren erakusleihoetan datozen hilabeteeko Gasteizko agendan nagusitzen diren lehen mailako saskibaloi txapelketarako (Erreginaren Kopa eta Lauko Finala) berariaz sortutako gozoak.

Gasteiz, iraunkortasun erreferentzia eta aitorpen berria

Biosphere Destinations Community-ren standean ere hartuko du parte Udalak: bere esperientzia eta arrakasta-eredu bihurtzeko egindako lana azalduko ditu azokaren bigarren egunean hiri iraunkorrek egingo duten topaketa batean.

Bestetik, hiriak beste aitorpen bat jasoko du Fiturren, alkateak iragarri duenez. Hain zuzen ere,  SICTEDen 2018ko helmuga oneraren kategorian 1. finalista hautatu dute hiria, sektoreko enpresen lehiakortasunaren alde erakutsi duen konpromisoa dela eta. SICTED-Espainiako turismo kalitatearen destinoko sistema integralaren sustapenaren aitorpen hori 2018-2020 aldirako Turismoko Gida Planarekin uztartzen da, haren helburua baita prestakuntza eta enpresen hobekuntza sustatzea, baita enpresa ekimen berriak garatzeko berrikuntza ere. Hori guztia gakoa da helmugaren pertzepzioa eta bisitariaren esperientzia hobetzeko. Horrexegatik, Gasteizek lanean jarraituko du sektorearen kalitatea eta lehiakortasuna hobetzearren, Gasteizko Udalak zein beste erakunde batzuek (Basquetour-Turismoaren Euskal Agentzia, Arabako Foru Aldundia eta Arabako Merkataritza Ganbera) eskaintzen dituzten prestakuntza programen bitartez.https://blogs.vitoria-gasteiz.org/medios/files/2018/04/DOSSIER.pdf

Orobat, Udalak hainbat bilera eta topaketa tekniko itxi ditu, turismoaren sektorerako aliantza estrategikoak indartzen jarraitzearren.

Asteburuko jarduerak Madrilen… eta Gasteizen

Nazioarteko turismo feriaren amaiera gisa, Gasteizek jende orori zuzendutako ekintza ugariren bidez erakutsiko ditu bere erakargarriak, eta 2019an hiria bisitatzeko aitzakia izango den ekitaldi-agenda ezagutaraziko.

Arabako Foru Aldundiaren, Basquetourren eta ekitaldien antolatzaileen laguntzarekin, Nazioarteko Enoturismo Biltzarra, Lauko Finala eta Magialdia aurkeztuko dira, besteak beste. Aurten hiria promozionatzeko landu den bideoa ere proiektatuko da.

Gasteizen bertan, berritasunak dakartzaten planak proposatuko dira Fiturren astebururako, besteak beste, Basmoon Shiners vodka arabarraren dastatzeak, eta bisitak eta dastatzeak Mamia okidegiko lantegian.

Ibilbide Gozoa ere antolatu da. Hiriko gozotegietako erakusleihoetan erakutsiko dute sortutako gozo berria. Parte hartzen duten gozotegiak: Confituras Goya, Sosiega, Los Artesanos, Pastelería Txistu, Pastelería La Peña Dulce, Confitería Nalda, La Fábula de Olga.

Gainera, Arabako patataz egindako vodka artisauaren dastatzeak, ardo-dastatze itsuak, Azoka plazako bisitak eta bisita gidatuak eskainiko dira.

+Info

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  17 urtarrila 2019 13:11

 

Lur azpitik joango den tarteak 3.610 metroko luzapena izango du Pedro Asua kalearen eta Salburuako Bulebarraren artean, eta gainazalean 90.000 metro karratuko azalera utziko du libre hiri erabileretarako

Geltoki berria egungo eraikinaren moldaketa izango da; bolumen osagarria gehituko zaio eta lur azpiko bi solairu izango ditu

 Sustapen Ministerioak, Eusko Jaurlaritzak, Arabako Foru Aldundiak eta Gasteizko Udalak osatzen duten “Vitoria-Gasteiz Abiadura Handia” sozietate publikoaren administrazio kontseiluak baieztatu duenez, abiadura handiaren Vitoria-Gasteizko sarbideak egungo Madril-Hendaia linea konbentzionalak hiritik pasatzean eratzen duen igarobidea baliatuko du, hirian zehar lur azpitik joateko, Pedro Asua kalearen eta Salburuako Bulebarraren artean. 3.610 metro luze den lur azpiko tarteak gainazalean 90.000 metro karratu utziko ditu libre, hiri erabileretarako.

José Luis Ábalos Sustapen Ministroak, Arantxa Tapia Eusko Jaurlaritzako Ekonomiaren Garapen eta Azpiegitura sailburuak, Ramiro González Arabako Diputatu Nagusiak eta Gorka Urtaran Vitoria-Gasteizko alkateak, Sustapen Ministerioaren (ADIF) eta Eusko Jaurlaritzaren (ETS) artean, trenbidea Arabako  hiriburuan integratzeko proiektuari buruz prestatu duten soluzioaren aurkezpen ekitaldian hartu dute parte gaur goizean. Administrazio horiek osatutako erakunde arteko batzordeak 2018ko irailaren 13an berretsitako soluzioa da.

Jarduketaren hasiera Jundizko zentro logistikoaren ondoan egongo da, eta amaiera Euskal Y-aren hasieran, Arrazua/Ubarrundia-Legutiano tartean, hain zuzen ere. Hori dela eta, 14,3 kilometroko luzera izango du. Horrez gain, azterlanaren barruan Iruñerako abiadura handiko linearekin Arkauten egingo den lotunea ere jasotzen da.

Abiadura handiaren Gasteizko sarbidea, zabalera estandarreko (UIC) bi trenbiderekin bidaiarientzat eta trenbide misto batekin (hiru harikoa) merkantzien trafikorako eta distantzia ertainerako, proiektatu da. Lehenengo 3 kilometroetan hiru trenbideak paraleloan joango dira, aire zabalean. Pedro Asua kalearen inguruan linea 1.126 metroko tunel faltsu batean sartuko da, geltokira heltzeko.

Epeen aurreikuspenaren arabera, aurten informazio azterlana onetsi eta jende aurrean aurkeztuko da, eraikuntza proiektuen idazketa lizitatzen den bitartean, 2020an amaitzeko. Obrak egiteko aurreikusten den epea 36 hilabete ingurukoa da. Jarduketaren aurrekontu osoa 724 milioi eurokoa da, BEZ barne. Horietatik 434 geltokiaren lur azpiko tarteari dagozkio, 206 Arkauteko lotuneari, 41 Burgos-Gasteiz linearekin egin behar den konexioari eta 42 proiektuen idazketari eta obren zuzendaritzari.

Eraikuntzaren ezaugarriak

Eraikiko den geltokia, lur azpian egongo den gainerako tartea bezala, pantailen babesean egindako hondeaketa bitartez egikarituko da (cut&cover izenez ezagutzen den eraikuntza sistemaren bitartez) eta 17 metro ingurura egongo da kaleko kotaren azpitik. Merkantzien trafikoak nasen gunetik fisikoki bereizita egongo dira.

Geltokia gainditu ondoren, trazatuak 1.460 metroko tunel faltsuan jarraituko du, Salburuako Bulebarraren azpitik igaro arte. Ondoren, trenbidea gainazalera irtengo da, gorako arrapalan, Errekaleor errekaren gainetik bide-zubi bitartez gurutzatu arte.

Obrak egiten ari diren bitartean trenbideko trafikoei eutsiko zaie, eta horrek garestitu egingo du operazioaren kostua. Hartutako soluzioaren barruan konexioa ezarriko da Jundizeko portu lehorrarekin eta etorkizunean eraikiko den trenbideko autopistarekin, eta, gainera, 750 metroko bazterbidea eraikiko da, zabalera estandarreko merkantzien trenentzat.

 

Geltoki berriaren xehetasunak

Geltoki berria Dato kaleko egungo eraikinaren moldaketa izango da. Kanpotik erabat kristalezkoa izango den bolumen berria gehituko zaio. Horrek 3.140 metro karratuko azalera gehituko du, eta lur azpiko bi solairu izango ditu.

Instalazioek bi sarbide izango dituzte, egungoa eta Unibertsitateko pasealekutik egongo den beste bat. Higiezinak hainbat zerbitzu jasoko ditu, itxaroteko gunea, sarbideen kontrola, salmentarako eta herritarren arretarako gunea eta baita komun publikoak eta merkataritza lokalak ere.

Minus bat solairura eskailera mekaniko, eskailera finko eta igogailu bitartez helduko da, eta bertan egongo dira abiadura handiko ontziratze aretoa eta aldirietarako sarbidea. Solairu horretan 400 plazako aparkalekua dago aurreikusita.

Minus bi mailan hiru nasa egongo dira (bi erdian eta bat alde batean) eta zabalera estandarreko bost trenbide abiadura handirako, eta baita beste nasa bat ere, aldirietarako trenbide batekin, zabalera mistoko (hiru hari) aldirietako trenbidetik bereizita.

Aukera gune berria

Trenbideak hartzen duen hiru kilometro eta erdi baino gehiagoko tartea lur azpian sartzeak hiri erabileretarako libre utziko ditu gainazaleko 90.000 metro karratu, horietatik 44.000 geltokiaren ingurunean. Horrela, gurpil gaineko trafikorako ahalmen handiko ekialde-mendebalde luzexkako beste bide bat eraikitzea planteatzen da, bi errailekin noranzko bakoitzean, Gaztelako Atetik abiatuta Carmelo Bernaola Pasealekuaren hegoaldera lurgainetik joango dena, egungo trenbide igarobidetik, 200 metrotan. Musikaren Pasealekuko glorietan bidea lur azpian sartuko da, eta San Kristobal kalearen azpitik igaro eta gero berriro ere azaleratu egingo da.

Gaur egun lur azpian edo trenbide gainean dauden zeharkako kaleak gainazalera irtengo dira (Senda pasealekua, San Antonio, Foruak, Errioxa eta San Kristobal), trenbidearen trintxera desagertu egingo da eta. Halaber, Unibertsitateko pasealekuan egokitzapen lanak egitean, tranbiaren geralekua egokitu ahal izango da geltokiko eraikin berriaren ondoan, eta horrek intermodalitatea erraztuko du.

GASTEIZKO ABIADURA HANDIKO TREN GELTOKI BERRIA

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  15 urtarrila 2019 14:37

 

 

 

 

 

Gorka Urtaranek erakunde, federazio eta kluben artean  txapelketa antolatzeko izandako lankidetza nabarmendu du, eta “hiriak dena emango” duela.

Gasteizko alkate Gorka Urtaranek emakumeen saskibaloiko Erreginaren Kopa  jaso du gaur, Espainiako Saskibaloi Federazioko lehendakari Jorge Garbajosaren eskuetatik. Gasteiz izango da txapelketaren egoitza, otsailaren 28tik martxoaren 3ra bitartean. Udaletxeko harrera aretoan egin da ekitaldia, eta Gasteizko alkateaz eta Federazioko lehendakariaz gain bertan izan dira Kultura, Hezkuntza eta Kirol zinegotzia, Estíbaliz Canto; Euskadiko Saskibaloi Federazioko lehendakaria, Germán Monge; Arabako Saskibaloi Federazioko lehendakaria, Luis Miguel Corres, eta Araski emakumezkoen saskibaloi-klubeko lehendakaria, Livia López.

Gorka Urtaranek erakunde, federazio eta kluben arteko lankidetza nabarmendu du, “lan egiteko modurik onena baita. Denok elkarrekin batu egiten dugu”.  Gasteizko alkateak gogoratu du, halaber, “Gasteiz hiri zoragarria [dela], eta kirola gustuko [dugula]. Gustuko dugu kirola egitea, eta gustuko dugu Erreginaren Koparen antzeko ekitaldiak gure udalerrian egitea. Hiriak dena emango du hitzordu horretan, aurten aurreikusita dauden beste batzuetan bezala, urte biribila izango baita“. Eta erantsi du: “Estatuko gainerakoei, Europari eta munduari erakutsiko diegu lehen mailako ekitaldiak har ditzakegula, bikaintasunez“.

Jorge Garbajosa presidenteak esan du “saskibaloiaz hitz egitean Gasteizen pentsatzen duzu” eta “Kopa honi esker, gero eta gehiago identifikatuko da hiria emakumeen saskibaloiarekin”. Garbajosak espero du “guztion oroimenean” geratuko dela kopa hau.

 

 

 

 

 

 

 

 

 

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  10 urtarrila 2019 13:57

 

 

 

 

 

 

– Txirrindulariek eta oinezkoek Natura 2000 Sareko natura gune den Zadorra ibaiaren ertzetatik doan kilometro eta erdiko ibilbide hori egin dezakete hemendik aurrera. Esku hartze horri esker, gainera, lurrazal andeatu zaharrak itxuraberritu ahal izan dira ingurumen aldetik.

– Proiektuaren bukaeran, Zadorraren ibilbide berdeari esker Gasteiz eta Iruña Oka lotuko dira bizikletaz egiteko 16,2 kilometroko tartean

Ramiro González Arabako diputatu nagusiak eta Josean Galera Ingurumen Saileko foru diputatuak, Gorka Urtaran Gasteizko alkatea lagun, gaur goizean inauguratu dute Arabako hiriburuko eraztun berdea eta Jundizko industrialdea eta Krispiña lotzen dituen Zadorraren ibilbide berdearen tarte berria.

Mugikortasun jasangarriko igarobide berri hori egokitzeko hainbat esku hartze egin da, hala nola zorua egokitu bizikletak, gurpildun aulkiak eta haurrentzako gurditxoak igaro daitezen; seinale berriak jarri, eta andeaturiko lurrazal zaharrak berreskuratu, zikin eta isurketekin egon baitira, eta orain natura gunean bertan txertatuak daude.

Txirrindularientzako eta oinezkoentzako ibilbidea da, hari esker herri guneak lotu ditzakegu, baita hobeto ezagutu ere gure natura balioak eta aurrerapausoa eman mugikortasun jasangarriaren alde esanez poztu da Ramiro González, eta dioenez ibilbide berde berri honek jarraitzaile asko izango ditu: ez bakarrik aisialdi osasuntsu baten alde oinez eta bizikletaz ibiltzera zaletuak direnak, ezpada beste aukera bat ere izango dute industrialdean lan egiten dutenek, bizikleta erabili ahalko baitute garraiobide beren lanetara joateko.

Bestalde, Gorka Urtaran Gasteizko alkateak esku hartze hori kokatu du eraztun berdearen etengabeko hobekuntzan, hura ingurumen, gizarte eta turismoko lehen mailako baliabidea baita, zeinak 2018an 25. urteurrena bete baitu asmo askorekin eta erreferente berriekin; hain zuzen ere, Olarizuko parke botanikoa. Gasteizko alkateak gogorarazi duenez erakundeetan lan egiten ari gara hiri inguruetako parkeen sarea zabaldu, hobetu eta finkatzeko. Eta Zadorraren ibilbide berdearen tarte berri hori lankidetza horren ondorio da. Hiriko txirrindularientzako eta oinezkoentzako loturak hobetzeko modua ere bada, baita hirian eta lurraldean oinez eta bizikletaz ibiltzen laguntzeko modua ere azaldu du. Alkateak, era berean, esan du erakundeen arteko koordinazioa Gasteiz eta Araba hobetzeko tresna dela.

Izan ere, Gasteizko Udalak dozenaka jardun dauzka aurreikusiak eraztun berdea finkatzeko datozen urteetan. Hain zuzen ere, Larragorri parkea atontzea, Áncora irin lantegia zaharberritzea, Zadorra hidraulikoki egokitzea Gamarra eta Abetxuku artean, edo Armentiako basoa eta Zabalgana lotzea igarobide garai baten bidez.

Lotura jasangarria Krispiña, Margarita eta Lermandarako

Gaur goizean inauguratu den tartea proiektu handiago baten zati da, hari esker 16,2 kilometroko ibilbidea egin ahalko baita Gasteiz, Tresponde, Billoda eta Iruña Oka artean, eta Iruña Veleiako aztarnategira ere iritsi ahalko da. Gainera, ibilbideak –Zadorraren ur ibilgua du erreferentzia– berariazko bideak ditu Santa Katalinako lorategiraino eta Jundizko muinoraino; hau da, interes historiko eta ekologikoa duten toki horietaraino.

Ibilbide berde berriak jada irteera atsegina eta bizikletaz eta oinez ibiltzeko konexioa eskaintzen die Krispiñako herritarrei, eta ibilbide osoa amaitzen denean, Margarita eta Lermandakoei eskainiko die, zeinei Jundizko industrialdea hazteak eragin baitie; izan ere, Gasteiz eta Iruña Okarekin loturik egongo baitira Zadorraren ibilbide berdearen bidez.

Hain zuzen ere, ibilbidearen lehenengo zatia, Billoda eta Iruña Oka lotzen dituena, 2017ko uztailean jarri zen martxan, eta horretarako, 4,7 kilometro atondu ziren. Guztira, Arabako Foru Aldundiko Ingurumen Sailak ia 300.000 euro inbertitu ditu ibilbide horretan, eta hartarako, guztira 850.000 euroko inbertsioa aurreikusten da. Esku hartze guztiak % 50ean finantzatuta daude Europako EGEF funtsekin.

Ibilbide berdeen 1.080 kilometroko sarea

Diputatu nagusiak garrantzia eman die Arabako ibilbide berdeei, eta gogorarazi duenez, gure ibilbide berdeak estatuan ondoen kontserbatuak daudenak dira, eta elkarri guztiz konektatuta dauden bakarrak; guztira, 1.000 kilometro baino gehiago dituzte. Irmoa da mugikortasun jasangarriaren eta ez motorizatuaren aldeko gure apustua. Gainera, ibilbide berdeen bidez, herriak elkarrekin lotzea lortzen dugu, bai eta gure lurraldearen oreka sendotzea ere, gure kultura eta historia balioak indartuz.

Horretarako, agintaldia bukatzen denean, foru gobernuak 3,8 milioi euro inbertitu izango ditu azpiegitura estrategikoetan, esaterako: Vasco-Navarroren ibilbide berdearen bidea, Antoñanara doana; Amurrio eta Nerbioiko parke lineala lotzea; ibilbide berriak, hala nola Zadorraren ibilbide berdea edo etorkizunean egingo den harriaren ibilbidea, zeinaren bidez Santa Maria katedrala eta Axarteko harrobiak (Trebiñu) lotuko baitira, eta proiektu horrek Erdi Aroko antzinako bidea, 14 kilometrokoa, berreskuratuko du.

Share
Kategoriak: Prentsa oharrak  —  Etiketak: , , , ,   —  Komunikazio Zerbitzua / Servicio de Comunicación  —  28 abendua 2018 13:03

 

  • Lanerako aurrekontua 3.036.000 eurokoa da, eta horietatik 1.700.000 euro kanpo-finantziaziotik datoz
  • Esku-hartzeak bost kale hauek ukituko ditu: San Frantzisko, San Frantzisko aldapa, San Bizente aldapa, Gernikako Estatutua eta Mateo Moraza
  • Azpimarratzekoak dira oinezkoentzako sortuko diren eremu berriak eta Erdi Aroko hiriguneko irisgarritasunaren hobekuntza

Tokiko Gobernu Batzarrak Terrorismoaren Biktimen Oroimenezko Zentroaren ingurunea eraberritzeko lanen kontratazio-dosierra onetsi du. Lanen aurrekontua 3.036.000 eurokoa da, eta horietatik 1.700.000 euro kanpo-finantziaziotik etorriko dira, hain zuzen ere Estatuko aurrekontu orokorretik. Obrak gauzatzeko epea 11 hilabetekoa izango da, eta horien ondorioz bost kaletako espazioa berrantolatuko da: zoladura aldatuko da (leku askotan zaharkitu eta narriatuta baitago), berritu egingo dira instalazio eta zerbitzuak (esaterako argiztapena eta saneamendua), oinezkoentzako lekua irabaziko da eta hobetu egingo da Erdi Aroko hiriguneko irisgarritasuna, igogailu eta eskailera mekaniko berrien bitartez.

Udalak erredaktatu eta lehiaketara deitu duen proiektuak berekin ekarriko du la gaur egun Arkupeen alboan dabilen trafikoaren desagerpena. Gune hori guztia oinezkoentzako izango da, halako moduan non are gehiago nabarmenduko den Justo Antonio Olagibel arkitektoaren lana, eta ostalaritza-terrazetarako gunea sortuko da bertan. Trafikoarentzako beste bide bat sortuko da Gobernuaren Ordezkariordetzaren eta Oroitzapenezko Zentroaren artean, Gernikako Estatutuaren kaletik.

San Frantzisko kalean ere esku-hartze handia egingo da. Gaur egungo zoladura erabat aldatuko da 18. zenbakitik aurrera, eta inguru horretako aparkalekuak desagerraraziko dira. Nabarmen handituko da hego aldeko espaloia, eta ipar aldekoan (ikusita zeharkako malda handia duela) zabalera aldakorreko terraza proiektatu da, luzean. Zarama bilketa pneumatikorako ontziak bi gunetan bilduko, eta ez hirutan (gaur egun horrela antolatuta daude), eta hondakinak biltzeko ohiko edukiontziak lurperatzea aurreikusi da. Horrez gain, zuhaitz berriak landatuko dira, eta argiztapen apaingarriaz hornitutako Virgen Blanca modeloko eserleku luzeak instalatuko dira bi espaloietan, bai eta Vitoria modeloko aulkiak ere hegoaldekoan.

Beste alde handiak Gernikako Estatutuaren kaleari eragingo dio: trafikoarentzako bide berriaz gain, Erdi Aroko hiriguneko irisgarritasuna hobetzeko bi elementu aurreikusten dira bertan. Batetik, edukiera handiko (1.500 kg / 20 pertsona) igogailu panoramikoa, 5,45 metroko gorabehera gainditzeko. Eta igogailuaren alboan eskailera mekanikoak ere instalatuko dira, igotzeko eta jaisteko alda banarekin, bakoitza metro bat zabal. Orduero 6.000 pertsona eramateko gaitasuna izango du.

Eraberritze lanek San Bizente aldapa ere ukituko dute: arazoak eman dituen lauzazko zoladura altxatuko da, eta horren ordez aglomeratu asfaltikoko zoladura jarraitu malgua ipiniko da, zeinak kale honen azpian dauden Aihotz plazako lokaletako hezetasun-arazoak ekiditea ahalbidetuko duen.

Mateo Moraza kalearen galtzada luzatu egingo da Gernikako Estatutuaren kaleko bide berriarekin lotzeraino, eta trafikotik aske utziko ditu Oroimenezko Zentroaren sarrera eta Postetxearen atzealdearekiko lotunea. eraikin zaharberrituaren paraleloan joango den bide paralelo horren zabalera 4,7 metrokoa izango da guztira, eta 3 metroko zabaleradun espaloiak bereziko du. Inguru horretan argiztapenaren tratamendu berezia egingo da, aintzat hartuta Erdialdearen eta haren inguruaren ezaugarriak. Kale horretan dagoen bilketa pneumatikorako buzoien gunearen alboan bi edukiontzi lurperatu paratuko dira (beira eta ontziak biltzeko, hurrenez hurren); hartara, ekidin egin ahal izango da gaur egun Arkupeen ondoan daudenen ikus-inpaktua.

Berrikuntzaren beste elementu bat Oroimenezko Zentroaren, San Frantzisko aldaparen eta Gernikako Estatutuaren kalearen arteko hirukian dagoen erdialdeko parterrea izango da. Erabat aldatuko da parterrea, halako moduan non hegoaldera lekua irabaziko den, gaurko gaztainondo-ilara gordeko da eta zuhaixka berriak landatuko dira. Kendu egingo da gaur egun bertan dagoen iturri apaingarria, eta horren ordez beste bat ipiniko, turrusta bikoitzekoa eta geiser erakoa.

Bizikleten mugikortasunak tratamendu berezia izango dute Terrorismoaren Biktimen Oroimenezko Zentroaren ingurua eraberritzeko proiektuan; izan ere, bi errei sortuko dira Gernikako Estatutuaren kalean (2,15 metroko zabalerakoak) eta luzatu egingo da Mateo Morazako Oroimenezko Zentroaren alboan (1,7 metroko zabalera). Hartara, nabarmen hobetuko da Olagoibel kaletik datorren bidegorriaren jarraikortasuna.

Lehiaketara aurkeztuko diren enpresen eskaintzen balorazioan kontuan hartuko da egin beharreko lanen memoria, esaterako lanak egin bitartean ahalik eta eragin urriena izatea (30 puntu gehienez), eskaintza ekonomikoa (35 puntu gehienez) eta berme-epea luzatzea (10 puntu gehienez).

Lan horiek guztiak ez dute eraberritze baten lehen fasea baino osatzen; ondotik egingo direnekin, plaza bat sortuko da Oroimenezko Zentroaren eta Postetxearen atzealdean, zein Oroimenaren plaza deituko den. Horri guztiari esker, espazio berezi bat sortuko da Oroimenezko Zentroaren inguruan, non gerora, eskultura edo elementu sinbolikoren bat jartzea aurreikusi den.

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:55

Gasteizko aireportuko hegaldi erregularren operatiboaren jarraitutasunak Urtaranen gobernuaren babesa jaso du gaur, VIA elkartearekiko 2018ko lankidetza-hitzarmena onetsi delarik Tokiko Gobernu Batzarrean. Ekimen horren bitartez, 182.000 euroko ekarpen ekonomikoa egingo du Gasteizko Udalak, Gasteizko aireportuan aurten merkantzien eta bidaiarien trafikoa gehitzera zuzenduta garatu diren hainbat ekintza finantzatzen laguntzeko.

Aireportua hiriko, lurraldeko eta Euskadiko turismoaren sustapeneko funtsezko pieza bihurtzera zuzendutako ekintzak bideratzeko Gasteizko Udalaren, Arabako Foru Aldundiaren eta Eusko Jaurlaritzaren arteko lau urterako akordioaren barruan sartzen da gaur onetsi den hitzarmena. Forondaren sustapenerako lehiaketa bat abian jartzea ekarri zuen ekimen horrek, Estatu barruko eta nazioarteko hegaldiak egiten dituzten konpainiei zuzendua, hegaldi erregularren operatiboa martxan jartzeko aukera izan zedin hartara.

Forondako aireportua bultzatzeko euskal erakundeek modu bateratuan zertutako ekintzen ondorioak bereziki bidaiarien trafikoan nabaritu dira. 2014an guztira 7064 bidaiari izan ziren; aldiz, lau urte geroago, 20 bider handiagoa izan da kopuru hori. Abenduko datuak zenbatu gabe badaude ere, dagoeneko 129.808 bidaiariko bolumena lortu da.

Charter hegaldien bilakaera onak hainbat lekutara hegaldatzeko aukera eskaini du aurten, hala nola Praga, Malta, Polonia, Herrialde Baldikoak, Bukarest, Estrasburgo, Mosku-San Petersburgo, Vilnius-Tallin, Dubrovnik-Pula eta Varsovia-Katowice. Hegaldi erregularrak gehitu behar zaizkie horiei, honako hauek izan baitira 2018an: Kolonia-Bonn, Milan-Bergamo, Sevilla eta Tenerife Sur.

Kargari dagokionez, orobat izan da positiboa bilakaera, nahiz eta aldakuntza ez den hain handia izan. 2014an 42.160.653 kg merkantzia garraiatu ziren guztira; aurten, berriz, 57.336.248 kg-ra iristen da zifra, abendu bukaerako datuen faltan. Garraiatutako merkantzien pisu globalaren egonkortzeko joera gehitzen zaio horri, nahiz eta mugitzen den merkantzia-kopurua handiagoa izan. Garraiatzen den karga-motaren aldakuntzari zor zaio horri, nabarmen igo baita pakete-garraioa.

 

 

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —   12:50

838 luminariaren ordez LED teknologia eraginkorragoa baliatzen duten lanparak jartzeko lehiaketa deitu du udal gobernuak, energia-kontsumoa gutxitu eta argiztapen hobea lortzeko

 398.809 euro inbertituko ditu 23 kale eta plazatan argiteria publikoa hobetzeko

Lakua, San Martin, Ariznabarra eta Anglo auzoetako kale nagusietako argiteria publikoa hobetuko du Udalak. 398.809 euro inbertituko ditu datorren urtean, hiriko zona horietako 23 kaletako argiztapena eta energia-eraginkortasuna hobetzeko, udal gobernuak onetsitako lehiaketa publikoaren baldintzetan jasotzen denez.

Argiteria publikoaren kontsumo elektrikoa murriztea da hobekuntza horren helburua, eta instalazioak argiteria publikoaren energia-eraginkortasunaren araudira egokitzea. Gasteizko kaleetako luminarien parte bat ordeztuko da horretarako. Orotara, 838 luminaria.

838 luminaria, 23 kale eta plazatan.

Zehazki, 463 luminaria ordeztuko dira Lakua auzoan, eta 375 San Martin, Ariznabarra eta Anglo auzoetan.

 

 

 

 

 

 

Hauek dira luminariak ordeztuko diren kale eta plazak: Zadorra hiribidea, Wellingtongo Dukearen kalea, Landaberde kalea, Baiona kalea, Iruñea kalea, Blas de Otero kalea, Donostia kalea, Pedro Asua kalea, Etxezarra kalea, Fontetxako Gazteluaren kalea, Abendaño kalea, Adrian Aldekoa Margolariaren kalea, Ignacio Diaz Ruiz de Olano Margolariaren kalea, Buztinzuri kalea, Herrandarren kalea, Prudencio Maria Berastegi kalea, La Paloma kalea, Esperantza kalea, Logroño kalea, Jose Antxeta kalea, Jose San Martin kalea eta Judimendi hiribidea.

LED teknologiko luminariak instalatuko dira, orain artekoak baino eraginkorragoak izaki. Energia-kontsumoa murrizteko aukera ematen du horrek —kontsumo elektrikoa (kwh) eta atmosferara egiten diren CO2 emisioak—, eta argiteria publikoaren energia-eraginkortasunaren araudiarekin bat datozen argiztapen- eta uniformetasun-mailak lortzekoa. Gainera, orain dauden argiek eragiten duten itsutzea eta argi-kutsadura ekidin nahi dira, baita mantentze-kostuak gutxitu ere, luminaria horien bizitza baliagarria konbentzionalena baino askoz luzeagoa baita. A energia-kalifikazioa lortuko da berrikuntzaren ondoren.

Argitze publikoa

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —   12:42

2019ko diru-laguntzetarako deialdien oinarri orokorrak onetsi ditu gaur Tokiko Gobernu Batzarrak. Pertsona, entitate eta elkarteei Udalaren jarduera edo programen osagarri diren jarduera edo programak garatzeko ematen zaizkien diru-laguntzak arautzen dira horien bitartez.

30 diru-laguntza ildo ezarriko ditu Udalak datorren urtean. Auzo-elkarteentzako eta berdintasun-proiektuetarako diru-laguntzak izango dira lehenengoak, gaurko Gobernu Batzarrean onetsi baitira horiek ere.

Auzo-elkarteak

 2019an auzoak dinamizatu eta partaidetza soziala bultzatuko duten proiektuak garatzeko Gasteizko auzo-elkarteentzako diru-laguntzen deialdiaren oinarriak ontzat eman ditu udal gobernuak gaur, ostiraleko ohiko bilkuran.

Partaidetza eta Gizarte Etxeen Sailak, zeinen mende baitaude laguntza horiek, 180.000 euro bideratuko ditu aldez aurretik izapidetu duen deialdi horretara, “auzo-elkarteek beren proiektuak lehenbailehen aurkezterik izan dezaten, eta, hartara, beren lanean lagunduko dieten diru-laguntzak eskuratu, eta garatzen dituzten programa eta jardueren gastuei aurre egin”, adierazi du Isabel Martínez zinegotzi ordezkariak.

Kontzeptu hauek barne hartzen dituzte diru-laguntzek:

  • Jarduera- eta zerbitzu-programa burutzeko laguntza ekonomikoak, bulego-gastuak barne.
  • Udal titulartasuneko lokalak erabiltzeko baimena.

Otsailaren 28ra artekoa izango da eskabideak aurkezteko epea.

50.000 euro berdintasun-proiektuetarako

Bestalde, 2019an Gasteizko udalerrian genero-berdintasunaren alorreko jarduerak eta proiektuak garatzeko diru-laguntzen deialdi publikoaren oinarriak onetsi ditu Tokiko Gobernu Batzarrak, oinarri orokorretan ezarritako diru-laguntzen ildoetako bat izaki. 50.000 euro bideratuko ditu Udalak horretara.

Emakume-elkarteak, talde feministak eta LGBTI kolektiboak sendotzen lagundu nahi du Udalak laguntza horien bitartez, ikuspegi feminista edo genero-ikuspegi argia duten proiektuak finantzatuz, eta, aldi berean, entitatean bertan emakumeen partaidetza aktiboa sustatzeko eta beren jarduera eremuan —kirola, hezkuntza, arlo soziala, kulturala eta abar— genero-berdintasunerako proiektu edo jarduerak egiteko sortutako espazio bat duten entitate mistoen proiektuak sustatu.

80.000 euro lankidetza-politiketarako

Bestalde, Euskal Fondoari 80.000 euroko beste ekarpen bat egitea onetsi du udal gobernuak, 2018ko Plan Operatiboan laguntzeko.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —   12:37

Gobernu Batzarrak C, D eta E taldeetarako deialdia onetsi du, zeina agintaldi honetan deitutako besteei (goi mailako taldeetarako, Udaltzaingorako eta Suhiltzaile Zerbitzurako) gehitzen baitzaie

 2019an beste deialdi bat egingo da behe mailako taldeetarako

 Tokiko Gobernu Batzarrak  C1, C2 eta E (C, D eta E) taldeetako 275 lanpostu betetzeko sustapenaren eta enplegu-eskaintza publikoaren deialdia onetsi du gaur; besteak beste, lanpostu hauek sartzen dira aipatutako kategorietan: administrariak, mantentze ofizialak, informazio agenteak, garbitzaileak, hainbat zerbitzutako laguntzaileak, jagoleak eta hainbat lanbidetako langileak.  Orotara, 275 lanpostu betetzeko deialdia onetsi du Udalak: 76, barne-sustapenez; 19, desgaitasuna duten pertsonentzat, eta 180, txanda irekian —sustapenean bete gabe geratzen direnak gehitu dakizkieke horiei—.

275 lanpostu horietaz gain, 2019an beste lanpostu batzuk eskainiko dira kalifikazio-maila beretan, beste deialdi batean.  Bi deialdietarako oinarriak datorren urtean onetsiko dira.

Gorka Urtaran alkateak agintaldiaren hasieran iragarri zuenari jarraituz, Udalaren 2017-2019ko Enplegu Planaren barruan hainbat ekintza jarri dira martxan; planak hurrenez hurren hornikuntza-prozesuak (administrazio karrera) eta enplegu-eskaintza publikoak egitea aurreikusten zuen, udal enpleguan aldibatekotasun-tasa % 37tik % 10era murrizteko helburu zehatzarekin.

 Ondorioz, 60 udaltzain lanpostu, 15 suhiltzaile lanpostu  eta goi kategorietako 132 lanpostu eskaini ditu Udalak agintaldi honetan. Orotara, 482 lanpostu dira, gehi datozen hilabeteetan eskaintzen direnak .  “Agintaldiaren hasieran hitz eman nuen udal enpleguarekin lotutako hainbat hautatze prozesu abian jarriko nuela, udal plantillaren behin-behinekotasuna murrizteko. Pausoak ematen eta gure konpromisoa betetzen jarraitzen dugu, Udalaren historian egin den enplegu-eskaintza publiko handienetako bat osatzeko”, nabarmendu du Gorka Urtaran alkateak.

Udalaren enplegu-eskaintzari buruzko informazioa

Share

Aurrekoak »