Prentsa Oharren banner
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  15 urtarrila 2020 12:17

 

 

 

 

 

 

 

 

Gorka Urtaran audioa

 

  • Ur handietarako ibilguak ibaiaren hustubide-ahalmena handituko du; lubetak, berriz, ur handiei eutsiko die, eta inguruko trafikoaren inpaktu bisuala eta akustikoa murriztuko du
  • Bi milioi euroko inbertsioa duen obrak erabilera publikorako gune berde bat egokitzea ere aurreikusten du, eta Eraztun Berdeko oinezkoentzako eta txirrindularientzako ibilbideei jarraipena emango die
  • Iñaki Arriola Ingurumen sailburuak adierazi duenez, obrek “uholdeak izateko arriskua nabarmen murriztuko dute, ibaiaren ibilgua hiri-parke gisa berreskuratzen den bitartean”

Iñaki Arriola Ingurumen, Lurralde Plangintza eta Etxebizitzako sailburuak eta Gorka Urtaran Gasteizko alkateak Zadorra ibaiaren uholdeetatik babesteko proiektuaren bigarren faseko obrak bisitatu dituzte. Ura Abetxuko zubiaren eta Gamarra Nagusiko zubiaren arteko zatian egiten ari da proiektua. Bisitan, Ernesto Martinez de Cabredo Uraren Euskal Agentziako zuzendaria, Ana Oregi Gasteizko alkateordea eta Cesar Fernandez de Landa Ingurumenaren Plangintza eta Kudeaketako zinegotzia ere izan dira.

Jarduketa Gamarra Nagusiko zubitik ibaian behera ur handiek hartuko duten ibilgu bat sortzean datza, Zadorraren ezkerraldean: ibaiaren hustubide-sekzioa handitzeko eta, horrela, uholdeen altuera eta hedadura murrizteko, bai tarte horretan, bai ibaian gora.

Behin ibilgu bikoitza sortuta, babes-lubeta bat eraikiko da ezkerreko ertzeko uholde-lautadan zehar, Zadorra etorbidearen paraleloan, bi helbururekin: errepikatze-denbora handiko uraldien (500 urte) ur-lamina industria-eremura iristea saihestea, eta ibilgailuen zirkulazioak aldameneko berdegunean eragiten duen inpaktu akustikoa eta bisuala murriztea.

Ubide bikoitza sortu denez, ingurumen-balio txikiko 500 zuhaitz inguru kendu behar izan dira (makalak, batez ere), eta horien ordez ibaiertzeko espezieen 800 ale berri landatuko dira, bai bidegorriaren parez pareko lubetan, bai birjarriko diren berdeguneetan.

Izan ere, obrak Zadorra ibaiaren parkean integratutako berdegune osoa erabilera publikorako egokitzea aurreikusten du, eta, hartara, hiriko Eraztun Berdearen zati diren oinezko eta txirrindularientzako ibilbideei jarraipena emango die.

Jarduera osoaren aurrekontua 2 milioi eurokoa da, eta 2020. urtearen amaieran amaitzea aurreikusten da.

Gainera, Zadorraren eskuinaldean, eremu berde bat eraikiko da: horretarako, gaur egun hondakin inerteak kontrolik gabe isurtzearen ondorioz degradatuta dagoen eremu baten paisaia lehengoratuko da, eta  oinezkoentzako bide-sare bat egitea aurreikusten da, besteak beste.

Arriola sailburuak proiektuaren izaera berritzailea nabarmendu du, “Inguru horretan uholdeak izateko arriskua nabarmen murrizteaz gain, ibilguaren ingurumena berreskuratzen da, eta  herritarrek gozatzeko hiri-parkea berriztatu egingo da“.

Bestalde, Gorka Urtaran Gasteizko alkateak ontzat jo du Eusko Jaurlaritzak hiriarentzat estrategikoak eta positiboak diren proiektuen alde egindako apustua. “Erakundeen arteko elkarlana funtsezkoa da garapen ekonomiko eta sozialean. Funtsezkoa da positiboan aurrera egiten jarraitzeko eta Gasteizko zonalde honetakoa bezalako beharrei erantzuna emateko, uholde-arriskuak murrizteko. Gainera, obra hauekin, hiriak Zadorra ibaiaren parkean integratutako gune berde bat izango du, oinezko eta txirrindularientzako ibilbideei jarraipena ematen diena eta gure bitxietako baten parte den Gasteizko Eraztun Berdea. Inbertsio honekin herritarrek irabazten dute, inguru naturalak irabazten du eta hiriak irabazten du ‘, nabarmendu du alkateak.

Uraren Euskal Agentziako zuzendari Ernesto Martínez de Cabredok nabarmendu duenez, “honako jarduketa hau mugarri garrantzitsua da Gasteiz Zadorraren uholdeetatik babesteko. Azpiegitura berde batez ari gara:  ibaiaren berezko portaera imitatzen du, hiri-bilbeari ur-goraldiaren berezko errepikapenarekin batera bizitzeko aukera ematen dio, eta Zadorra ibaiari hiritik igarotzean egoera hobetzeko aukera handitzen du“.

Fase honetako lanekin jarraitzea, dagoeneko ekin baitzaie

Orain egiten ari diren Zadorra ibaia uholdeetatik babesteko II. faseko lanek jarraipena ematen diete bere garaian aurreratu ziren beste jarduketa batzuei.

Alde batetik, 2018an amaitu zen Abetxukuko zubi zaharraren egokitzapen hidraulikoa eta arkitektonikoa; jarduketa horrek Zadorraren hustubide-ahalmena handitu zuen puntu horretan, 328 m ³/s-raino, 100 urteko errepikatze-denborako uholdeen pareko emaria, eta XIX. mendeko zubiaren egitura birgaitzea ahalbidetu zuen, kultura-ondasun izendatua. Proiektuak 850.000 euroko egikaritze- kostua izan zuen.

Bestalde, 2015ean, Abetxukuko oinezkoen pasabide zaharraren ordez (Gasteizerako hornidura-hodiek osatzen zuten pasabide horrek uren jario askea oztopatzen zuten), beste pasabide bat jarri zen, aurrekoaren bi aldiz sekzio hidraulikoarekin. Horren ondorioz, ubidearen azpian (bypass) hodi bat eraiki behar izan zen hiria hornitzeko, pasabide zaharrari eusten zioten hodien ordez.

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  10 urtarrila 2020 11:57

 

Gorka Urtaran alkateak berretsi egin du erronka, Gasteizek “kultur ekitaldietarako espazio duin, moderno eta erakargarria izan dezan, eta erdialdea eta lurperatzeak libre utzitako eremua biziberritzeko“.

 

BAI Center proiektua egin zuten arkitektoek (Mariano eta Pablo Bayón) hile amaieran azalduko diete udal-talde guztiei Auditorio berriaren eraikinaren proiektuaren egokitzapena Musikaren ibilbideko lursailera. Horixe iragarri du gaur Gorka Urtaran alkateak, zeinak berretsi egin baitu diputatu nagusiarekin duela hilabete batzuk iragarri zuten auditorioaren proiektua berreskuratzearen aldeko apustua, Gasteizek “kultur ekitaldietarako espazio duin, moderno eta erakargarria izan dezan, eta erdialdea eta lurperatzeak libre utzitako eremua biziberritzeko“, nabarmendu dute.

Bilera horretan, Bayónek Euskaltzaindiaren plazarako diseinatu zuten proiektua Musikaren ibilbidera nola egokituko duten azalduko die udal-taldeei; horrez gain, hirigintza-plangintza alorrean nahitaez egin beharreko eguneratze zehatz batzuen berri ere emango diete.

“Hiriarentzat on eta estrategikoa den proiektu bati buruzko xehetasun guztien berri eman nahi dugu. Talde guztiekin konpartitu nahi ditugu urrats guztiak eta bakoitza, konbentzituta baikaude talde gehienen konplizitatea positiboa ez ezik, beharrezkoa dela. Denok norabide bidean goazenean proiektu sinestezinak lortzen ditugu gure hiriarentzat”, azpimarratu du alkateak.

Musikaren ibilbidean egitekoa den entzunaretoak ia 10.000 m2 eta 1.550 pertsonarentzako edukiera izatea aurreikusi da. Kontzertuak, opera jakin batzuk, biltzar handietako osoko bilkurak, akziodunen batzar orokorrak eta beste zenbait ekitaldi hartu ahalko ditu aretoak.

Aretoaren ezaugarri teknikoek batez ere musika ikuskizunak hartzea ahalbidetzea da asmoa: kontzertu sinfonikoak (baita abesbatzak lagunduta ere), ganbera kontzertuak, kantari handien emanaldiak, piano errezitaldiak, kantautoreak, popa edo rocka, dantza, kontzertu formatuko operak eta abar. Efizientzia akustiko handia bermatzen duten baldintzak beteko lirateke horretarako. Orobat, biltzar handietako osoko bilkurak eta aurkezpen handiak ere hartuko lituzke, baita akziodunen batzar orokorrak eta formatu handiko proiekzioak ere.

BAI zentroaren proiektua egin zuten arkitektoek, Mariano eta Pablo Bayónek, proiektua guztiz bideragarria dela eta kokaleku berrira aldatzeko modukoa dela egiaztatu dute.

Entzunaretoaz gain, atondoa, zerbitzuetarako guneak, harrera, jantzitegia, leihatilak, biltegiak, zamalanetarako eremua, denda, kafetegi-jatetxea, areto teknikoak, itzulpen kabinak eta abar barne hartuko lituzke eraikinak. Orotara 9.688 m2-ko azalera erabilgarri itxia izango luke, eta 11.431m2-ko azalera eraikia. Behar den aurrekontua 24.608.000 euro da, BEZa eta obrarako segurtasun eta osasun plana kenduta eta altzariak eta ikus-entzunezko ekipamendua barne hartuta.

Beste proiektu estrategiko

Horrez gain, Gasteizko Agendaren beste proiektu batzuk, kultur azpiegiturei buruzkoak, aipatu ditu alkateak bere asteroko prentsaurrekoan.

Gorka Urtaranek iragarri duenez, atzo bertan sinatu zuten Gasteiz Antzokiaren proiektua idazteko eta obrak egiteko kontratua eta horrekin hasi dira kontatzen euskararekin lotutako kulturarako gune hori errealitate bihurtzeko epeak, duela urte batzuetatik hirian eskatutakoa.

Alkateak gogorarazi du, halaber, Principal Antzokia eraberritzeak bere bidea jarraitzen duela eta aurten bertan hobetzeko proiektuaren idazketa kontratatu ahal izango dela.

Udal Gobernuaren beste proiektu estrategiko eta “lehentasunezkoetako” bat da Iradier Arena, eta datozen lau urte hauetako planean jasota dago. Gorka Urtaranek azaldu duenez, oraingoz ez dago inongo erakunde pribaturen proposamen irmorik. Orain, ordea, eraberritzea nola eta zenbat kostatuko litzatekeen orain zehaztuko dutela iragarri du alkateak.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —   11:17

 

Gizalegez kanpoko portaerak izan dira herritarrek mugikorraren bitartez nagusiki salatu dituztenak, hala nola kalean tamaina handiko trasteak uztea edo leku jakinetako zikinkeria

 

 

 

 

 

Telefono mugikorraren bitartez Udalari hiriaren garbitasunaren inguruko iradokizunak eta kexak helarazteko VGarbi ohartarazpen-zerbitzuaren erabilerak gorakada handia izan du, duela hiru urte sortu zenez geroztik. Gorka Urtaran alkateak gaur egin duen zerbitzu horren balantzearen arabera, herritarrek Udalari bidalitako ohartarazpenen kopurua % 33,3 igo da aurreko urtekoen aldean, eta hirukoiztu 2017az geroztik.

2019an, guztira, 7.172 abisu jaso ziren plataforma mugikor horren bitartez, eta horietatik % 91,4 benetan izan ziren garbitasunaren ingurukoak.

Gizalegez kanpoko portaerak izan dira herritarrek nagusiki salatu dituztenak, hala nola kalean tamaina handiko trasteak utzi izana (3.287 abisu) edo leku jakinetako zikinkeria (1.073 abisu), baita hondakinak edukiontzietatik kanpo utzi izana (619 abisu), paperontzien inguruko garbiketa-arazoak (301 abisu) edo bilketa pneumatikoaren ontzien ingurukoak (71 abisu).

Jasotako estatistiken arabera, 1.646 pertsonek erabili zuten VGarbi joan den urtean, eta erdia baino gehiago erabiltzaile berriak izan ziren. Nabarmentzekoa da badirela ohiko erabiltzaileak diren hainbat pertsona: horietako 14k 50 abisu baino gehiago bidali zituzten, baita batek 500 baino gehiago ere, nahiz eta pertsona eta urteko batez bestekoa hamar mezutik beherakoa izan.

Eskerrak eman dizkie alkateak herritarrei, Herritarren postontziaren eta 010 telefonoaren osagarri sortu zen zerbitzu horrekin izandako inplikazioagatik, zeinen helburua baita mugikorraren bidezko komunikazio-bide zuzen bat eskaintzea, ahalik eta azkarren erantzun ahal izateko eta konpondu ahal izateko udalerriko kaleetan atzemandako egoera ezegokiak.

“Komunikazio-kanal bat jarri genuen martxan, guztion artean Gasteiz garbiago edukitzen lagundu ziezagun. Alde batetik, udalerriko auzotarrei entzuteko aukera ematen digu, eta arazo puntualak konpontzeko. Eta, gainera, hiriko lekurik gatazkatsuenak zein diren ikusteko aukera, hobetzen jarraitzeko”, azpimarratu du Gorka Urtaran alkateak. Herritarren laguntza txalotu du, “hartara, gizalegez jokaturik, hiria garbi edukitzeko oso baliagarria den informazioa ematen baitute”, eta komunikazio-tresna hori oraindik erabili ez dutenei gonbita egin die, ezagutu eta erabil dezaten.

 Nola funtzionatzen du?

VGarbiren erabilera oso erraza da. Nahikoa da Whatsapp edo Telegram deskargatu eta, aplikazio hori baliatuz, 681 102 020 zenbakira mezu bat idaztea, zikinkeria antzeman den lekuaren argazkiarekin, eta lekua ahalik eta zehatzen azaltzea. Udalak, informazioa jasotzean, garbiketa-kontratari ematen dio horren berri, ahalik eta azkarren joan daitezen garbitzera. Telefono-zenbaki horretan ez da telefono-deirik hartzen.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  8 urtarrila 2020 10:22

Borja Lázaro Kolonbian desagertu zenetik sei urte igaro diren honetan, hura gogoratzeko deia egin die Gasteizko Udalak herritarrei. Maitasuna eta gertutasuna adierazi nahi izan dizkie alkateak Cabo de la Velan (La Guajira, Kolonbia) desagertutako gaztearen familiari eta lagunei, eta, aldi berean, bilaketa-lanei berriro ekin dakiela eskatu du.

Gasteiztarraren ingurukoek kontzertu bat antolatu dute, larunbat honetarako, The Tap tabernan —Manuel Iradier kalea, 7—, Borja Lázarok desagertuta jarraitzen duela gogorarazteko. 19:30ean hasiko da kontzertua, eta bertan arituko dira Alison Keable, Beitia eta Victor Gutiérrez (Similar Interests).

Aurreko urteetan egin izan den elkarretaratzea ordeztuko du kontzertuak, xede berarekin, zein baita Borja Lázaro gogoratzea eta Hego Amerikako herrialde horretan hura bilatzeko lanei berriro ekin dakiela galdatzea. Udalak elkartasuna, sostengua ea hurbiltasuna adierazi nahi dizkio gazte gasteiztarraren familiari.

Desagerpenaren urteurren honetan, hiriak Borja eta haren familiari eskaintzen dizkien sostengua eta elkartasuna berretsi ditu gaur alkateak. Borja Lázaro gasteiztarra 2014ko urtarrilaren 7tik 8ra bitarteko gauean desagertu zen. Geroztik, haren familiak eta lagunek ez dute aurkitzeko itxaropena galdu, eta, horregatik, etengabe mobilizatzen jarraitzen dute, ikerketekin jarraitu dadin, zer gertatu zen argitu eta Borja non dagoen jakin arte.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  27 abendua 2019 12:21

 

Gaur esleitu dio Tokiko Gobernu Batzarrak Viveros Eskalmendi SL enpresari Gasteizko Eraztun Berdeko landaredia zaintzeko zerbitzua, 377.259,74 euroan, BEZa barne, eta bi urteko gauzatze-epearekin.

 

Aldian behingo zainketa- eta hobekuntza-lanak biltzen ditu kontratatutako zerbitzuak, hala nola ongarritzea, inaustea, ureztatzea, belarra moztea, jorratzea eta sasiak kentzea, besteak beste, eta Eraztun Berdeko landare-estalkia kontserbazio-egoera onean mantentzeko behar diren giza baliabideak eta baliabide materialak jasotzen ditu, azken urteetako esperientziaren ildotik.

Ekologiari eta paisaiari dagokienez balio handia duten hainbat parke eta zonek —aisialdirako korridore ekologikoen bitartez lotuak— osatzen dute Gasteizko Eraztun Berdea, eta 842 hektarea hartzen ditu gaur egun.

Biodibertsitatea eta paisaia babestea eta hobetzea, hiriguneko uholdeak galaraztea, ziklo hidrologikoa erregulatzen laguntzea, naturarekin harremanetan aisialdiaz gozatzeko aukera ematea eta ingurumen-hezkuntza sustatzea dira, besteak beste, Eraztun Berdeko parkeek betetzen dituzten zereginak eta eskaintzen dituzten zerbitzuak.

  1. urtearen inguruan Eraztun Berdearen kontzeptua errotu zenez geroztik —Gasteiz ingurua berritzeko eta berreskuratzeko xedearekin—, Eraztun Berdearen eta Biodibertsitatearen Atala arduratu izan da dagoeneko haren parte diren hiriaren inguruko parke horietako landaredia zaindu eta mantentzeko kudeaketa-lanez:
  • ARMENTIA. 159 hektarea. Armentiako basoa.
  • ZABALGANA. 84 hektarea. Zabalganeko baso-parkea, Ehari, Zarauna eta Torrogiko errekak barne.
  • ZADORRA. 194 hektarea. Zadorrako ibai-parkea, Gamarragutxitik Krispiñako ur-araztegiraino.
  • SALBURUA. 247 hektarea. Salburuko hezeguneak, Errekaleor, Santo Tomas eta Alegria errekak barne.
  • OLARIZU. 158 hektarea. Olarizuko lorategi botanikoa, Mendizabala, Batan erreka eta Nebera gaina.
  • JUNDIZ. 41 hektarea. Jundizko parkea, Lermanda, Mendebaldea eta Ariniz barne.

 “Parkeetako natura- eta paisaia-balioak kontserbatzeko eta horiek erabilera publikorako, aisialdirako eta hezkuntzarako egokitzeko, aldian behin mantentze-lanak egin behar dira, hala nola belar-sastrakak moztu, ureztatu, inausi, erein, landatu edo izurriteak kontrolatu. Urteetan, eremu hondatuak ekologiari eta paisaiari dagokienez lehengoratzeko eta erabilera publikorako egokitzeko munta handiko jarduerak egin izan dira, baina oraindik ere badira hiriaren kanpoaldean hainbat eremu hondatu, berreskuratzeke, eta espazio batzuk bestekin korridore ekologikoen bitartez lotuko dituen konexio-sistema osatzeke dago”, azaldu du alkateak.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:08

 

 

“Etorkizuneko proiektuz beteriko Agenda gasteiztarra dugu agintaldi honetan garatzeko”, azpimarratu du Gorka Urtaranek

 

Gorka Urtaran audioa

2019ko azken Tokiko Gobernu Batzarraren ostean, Gasteizko alkateak aurtengo udal kudeaketaren balantzea egin du, eta datorren urterako erronka eta proiektu nagusiak izan ditu hizpide. “Kudeatzen dakien, akordioak lortzen dakien eta proiektuak gauzatzen dakien udal gobernua osatzen dugu, eta gaitasun horiek guztiak areagotu egingo ditugu legealdian zehar. Etorkizuneko proiektuz beteriko Agenda gasteiztarra dugu agintaldi honetan garatzeko“, azpimarratu du Gorka Urtaranek.

Ekainean hasi zen lanean maiatzaren 26ko hauteskundeetatik sortutako udal korporazio berria. EAJ-PNVren eta PSE-EEren arteko gobernu-akordioak 13 kidez osatutako gobernu bat eman zuen emaitza gisa, hau da, azken bi hamarkadetako indartsuena, eta Agenda gasteiztarrak -2019-2023 agintaldiko programa- barne hartzen dituen proiektuak garatzea errazten du horrek.

Kudeaketarako gaitasunari dagokionez, aurten gure hirian arrakastaz garatu diren ekitaldiak nabarmendu ditu alkateak, nazioartean protagonismoa eman baitigute. Gasteizen egindako saskibaloiko Lauko Finala, Umbra Light Festival, Nazioarteko Enoturismo Kongresua, Michelin Hirien Munduko Goi Bilera, emakumezkoen saskibaloiko Erreginaren Kopa edo Euskadiko hiriburuak lehen aldiz hartu duen Ironmana izan dira ekitaldi nagusiak. Horiez gain, hiriak zenbait aitorpen jaso ditu, Global Green City 2019, esaterako, eta berriki ospatu den Klima Aldaketaren aurkako Goi Bileran ere partaidetza nabarmena izan du.

2019an, gainera, Udalaren zorra 7 milioi eurotik gora murriztu da, 86 milioitik 78 milioira igarota. Kopuru on horiek ez ezik, zerbitzu publikoek kalitate-maila mantentzen eta hobetzen dutela ere kontuan izan behar da. Atal horretan, enpleguarekin lotutako datuak ere nabarmentzen dira. Orain dela gutxi, ia 800 lanpostuko lan-eskaintza publikoa onartu da administrazioko, mantentze-lanetako, informazio eta kontroleko lanpostuetarako eta beste kategoria batzuetarako; udaberrian, berriz, 39 udaltzain sartu ziren, aurreko bi txandei gehituta. Bestetik, Udalak aurten 513 lanpostu sortzea lortu du Eusko Jaurlaritzak Gasteizerako dituen enplegu planei esker, iaz baino % 25 gehiago, Lanbidek 5 milioi eurotik gorako ekarpen ekonomikoa eginda. Aipatu behar da 2019an zehar euskal hiriburuko langabetuak 15.315 izatetik 14.479 izatera igaro direla, eta Gizarte Segurantzako afiliatuak 120.797 izatetik 124.867 izatera igaro direla.

Alkateak nabarmendu du, halaber, gobernua guztiekin akordioak lortzeko gai dela erakutsi duela 2019an, bai maila instituzionalean, bai esparru pribatuko eragileekin. “Espainiako Gobernuarekin, Eusko Jaurlaritzarekin eta Arabako Foru Aldundiarekin egin ohi diren akordioez gain, bereziki pozgarria da aurten elkar ulertzera iritsi izana Alderdi Popularrarekin, zerga-ordenantzak onartzeko, eta Elkarrekin taldearekin, udal aurrekontua onartzeko. Ez diogu inori marra gorririk jartzen, eta itunak egiten ditugu hiriak aurrera egitea nahi duten alderdi, erakunde eta kolektibo guztiekin“, gaineratu du. Garrantzi berezia du, halaber, Salburua eta Zabalganeko jabeekin lortutako birpartzelazio-akordioak.

Aurrekoa bezain garrantzitsua da proiektuak gauzatzeko gaitasuna. Urtaranek hainbat adibide jarri ditu: autobus elektriko adimentsua instalatzeko martxan dauden obrak eta proiektuak; Gasteiz Antzokiaren esleipena; Emakumeen Etxea irekitzea; LGTBIfobiaren aurkako Behatokia martxan jartzea; Santa Barbara plaza eta Terrorismoaren Biktimen Oroitzapenezko Zentroaren ingurua birmoldatzea; Tornay Medikuaren kalea eta Ospitaleko plaza eraberritzea; tranbiaren hegoaldeko luzapenaren amaiera hurbila; Salbururako luzapenaren lizitazioa; AMVISAren ur-kolektore berria; Lakua-Arriaga, Ariznabarra eta Adurtzako futbol-zelai berriak; Eraztun Berdean proiektu berriak gauzatzea (Olarizuko harrera- eta informazio-puntua, Euskadiko lorategi botanikoa, Larragorri parkearen lehen fasea, aire zabaleko antzoki berdea eta abentura-parkea); Trafikoko Ordenantzaren aldaketa abiatu izana, mugikortasun pertsonaleko ibilgailuak (patinete elektrikoak, etab.) arautzeko, eta abar.

“Gobernu honek ametsak errealitate bihurtzen ditu, eta urteetan zehar asko eztabaidatu diren proiektuak azkenean egitate ukigarri bihurtzen ari dira. Gainera, bizilagunei entzuteko eta haiekin hiria egiteko gai den gobernua gara; izan ere, proiektu horietako asko herritarren ekarpenei esker jarri dira abian, bai Gasteiz Hobetuz programaren bidez, bai parte hartzeko organoetan eta kanaletan egindako ekarpenen bidez“, erantsi du alkateak.

Aurrerapen horiek eta beste batzuk posible izaten ari dira udal gobernuak hiri-proiektu argi bat duelako, agintaldiko planean eta Agenda gasteiztarrean zehazten dena. “Etorkizunerako proiektu asko ditugu, eta garrantzitsuena da asko dagoeneko abian direla, hasi direla egiten. Agintaldi hau sendotzearena izango da, Gasteiz Europako superhiri gisa berrestearena, nazioartean erreferentzia izango baita bizi-kalitatean, lehiakortasun ekonomikoan eta iraunkortasunean “.

“Ziur nago guztion laguntzarekin 2020a urte ona izango dela hemen bizi garenontzat. Udalak egin berri duen ikerketa soziologikoaren arabera, segurtasuna, garbitasuna eta garraio publikoa dira kezka nagusiak, beraz, arlo horietan jarriko dugu arreta, gainerakoak alde batera utzi gabe. Era berean, ‘Vitoria-Gasteiz Green Deal’ delakoa garatzen ahalik eta gehien inplikatuko gara. Plan horren helburua da enpresak erakartzea, gure hirian agertoki egokia aurkituko baitute arazo globalei irtenbide lokalak ematen dizkieten ekonomia berdeko ekintzak garatzeko. Ingurumenaren ikuspegitik berdeak izatetik ekonomia berdearen erreferente izatera igaro nahi dugu “, azpimarratu du alkateak.

Datorren urterako ere berrikuntza garrantzitsuak aurreikusi dira: abiadura handiko trena lurperatzearekin lotutakoak; Principal antzokia eraberritzea; auditorioa abian jartzea; auzoetako inbertsioak, agintaldi osoan 100 milioi eurora iritsiko direnak; superetxadiak garatzea; Mendizorrotzeko futbol-zelaia handitzea;  Mobility Lab, gure hiria mugikortasunaren alorrean berrikuntzarako nazioarteko zentro bihurtu nahi duena, eta Agendan jasotako beste hainbat.

2020, ospatzeko asko duen urtea

Azkenik, alkateak aipatu du 2020an urteurren ugari izango dugula ospatzeko: Florida parkearen 200 urteak, Fournier enpresaren 150 urteak, Farolen Arrosarioaren 125 urteak, Baskoniaren 60 urteak, Eusko Legebiltzarraren 40 urteak, Forondako aireportuaren 40 urteak, Europa jauregiaren 30 urteak eta Araskiren 10 urteak, adibide batzuk jartzearren.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:01

 

Udal gobernuak Sorginenea-Tu Casa Feministarekiko luzapena onetsi du, Etxanobetarren etxea erabiltzen jarrai dezaten

 

 

 

 

Tokiko Gobernu Batzarrak Sorginenea-Casa de las Mujeres de Vitoria-Gasteiz elkartearekiko hitzarmena luzatzea onetsi du gaur, eta horrela aurten abian jarritako Emakumeen Etxearekiko konpromisoa berritu du hiriak. “Emakumeen Etxea kudeaketa-proiektu bateratua finkatzearen alde lan egiten jarraituko dugu, emakumeak ahalduntzeko espazio gisa ulerturik, partaidetzaren bitartez gizartea eraldatzeko, eta etxea topaketa, truke eta hausnarketarako espazio gisa ikusia izan dadin bultzatzeko”, adierazi du alkate Gorka Urtaranek.

Hitzarmenaren bitartez, elkarteak Etxanobetarren etxea erabil dezake Sorginenearen egoitza gisa, Berdintasun Zerbitzuak Ahalduntze Feministarako Eskolarako behar dituen espazio batzuk izan ezik.

Udalak 150.000 euro jarri ditu Sorginenea elkarteak 2020an bere ekintzak garatzerik izan dezan. Gainera, taldeak 30.000 euroko laguntza jasoko du eraikina egokitzen jarraitzeko. Orobat, higiezina mantendu eta garbitzeko gastuak hartzen ditu bere gain Udalak, besteak beste.

Sorginenea proiektua aurtengo irailean jarri zen abian, kolektibo feministetako eta berdintasunaren aldeko elkarteetako emakume desberdinekin kudeaketa eredua eta proiektuaren beharrak definitzeko partaidetza-prozesu bat egin ondoren; izan ere, aldarrikapen historikoa zen Emakumeen Etxea proiektua garatzeko eremu propio bat edukitzea. Prozesuaren buruan, hitzarmena sinatu zen 2019ko maiatzean, eta uda igaro ondoren ireki zen etxea.

Proiektuan bertan definitzen den bezala, emakumeen etxea inklusiboa, irekia eta askotarikoa da, eta honako helburu hauek ditu: Gasteizko erreferente bihurtzea emakume guztientzat eta feminismoaren eta berdintasunaren alde lan egiten duten kolektibo guztientzat, sormena, hausnarketa eta, batez ere, egiteko beste modu batzuk sustatzeko topagunea izatea, eta dibertsiorako toki goxoa eta ikasteko errespetu- eta ekitate-esparrua izatea.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  23 abendua 2019 13:48

EUDELen elkarteburu eta Vitoria-Gasteizko alkate Gorka Urtaranek BetiON Telelaguntza Zerbitzuko call centerrean hartu du parte, gaur goizean, Erandioko eta Portugaleteko alkate eta EUDELen Batzorde Eragilearen kide Aitziber Olibánekin eta Mikel Torresekin batera, bai eta beste alkateekin batera ere: Arrigorriaga, Maite Ibarra, Barakaldo, Amaia del Campo, Bilbao, Juan Mari Aburto, Elorrio, Idoia Buruaga, eta Laudio, Ander Añibarro.

11:00etatik aurrera, BetiONeko teleoperadoreekin aritu dira alkateak lanean, eta, hala, erabiltzaileen deiei erantzun diete. Bide batez, unea aprobetxatu dute beren udalerrietako herritar nagusiei Gabon zoriontsuak opatzeko. Euskadiko udalek pertsona nagusien segurtasunarekiko, ongizatearekiko eta bizi-kalitatearekiko konpromisoa dute.

Gorka Urtaranek zahartzearen erronka aipatu du, bai eta belaunaldien arteko elkarbizitza ere; azken horren harira, hau esan du: “Gizarte osoari dagokion erronka da. Bakartasuna arazoa da eta horri aurre egiteko, ikusgarritasun handiagoa eman behar zaio”. Alkate eta elkarteburuak zera baloratu du: “gertuen dagoen inguruko laguntza-sarea, hau da, instituzioetatik, gizarte-erakundeetatik eta herritarrengandik beraiengandik, bakarrik bizi direnei laguntza emateko”. Ildo horretatik, Urtaranek azaldu du udalek “enbaxadoreak” izan behar dutela, bai eta “BetiON zerbitzura sartzeko atea” ere.

Iñigo Urkullu Lehendakaria buru duten eta Eusko Jaurlaritzaren Enplegu eta Gizarte Politiketako Sailak antolatutako Jardunaldi Irekietan egin da ekintza hori. Jardunaldian, EAEko hainbat udalerritako adineko 15 pertsonek osatutako talde baten anfitrioi gisa jardun du sailburu Beatriz Artolazabalek; hain zuzen ere, gonbidapena egin zaie pertsona horiei, Bilboko San Inazio auzoko Aragoi kalean dauden BetiONen instalazioak ezagutu ditzaten.

Lehendakariak eta agintariek pertsona horiek zoriondu dituzte, eta, gainera, zerbitzuak 2020. urteari begira izango dituen berrikuntzak ezagutu dituzten lehenengoak izan dira aipatutako erabiltzaileak.

 

 

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  16 abendua 2019 12:08

 

 

Gorka Urtaran alkatearen adierazpenak

Gorka Urtaran alkatea eta Maider Etxebarria lehen alkateordea pozik agertu dira Elkarrekin udal taldearekin lortu duten akordioarekin, horri esker Gasteizek aurrekontua izango baitu 2020an. “Indar batasun honek gehiengoa edukitzea ahalbidetzen digu, ezinbestekoa baita hiriak datorren urterako aurrekontua izan dezan. Etapa berria irekitzen da Gasteizentzat, Agenda gasteiztarrak barne hartzen dituen etorkizuneko proiektu handiei aurre egiteko behar den bermearekin. Garai berri baterako akordioa”, azpimarratu du alkateak.

EAJ-PNV eta PSE-EEk Elkarrekin taldearekin lotu duten aurrekontu itunak datorren urterako proiektu ekonomikoan ezarritako lehentasunetako bat berresten du: agintaldiko inbertsio handiak abian jartzea. Beste bi lehentasunak, kalitateko zerbitzu publikoen aldeko apustua eta Gasteiz ekonomia berdearen alorrean erreferentea bihurtzea, indartuta geratu dira Elkarrekin-ek 2020rako aurrekontu-proiektuari egindako zuzenketak txertatuta.

“Bat etorri gara funtsezko bi printzipiotan: herritarren bizi-kalitatea hobetzea eta hiri are jasangarriago baterantz aurrera egitea. Helburuetan bat etortzeak eta Elkarrekin-ek asmo positiboz egindako proposamenak txertatzeak erraztu dute tokiko politikan dinamika berria ekarriko duen akordio hau. Hiria alderdien interesen gainetik jartzeak hau bezalako albiste onak dakartza beti”, erantsi du Gorka Urtaranek.

“Akordio garrantzitsua da, agintaldiko lehen aurrekontua onestea ahalbidetuko duelako. Gasteizek ezin zuen jasan hirugarrenez jarraian aurrekontua luzatzea etorkizunari bermearekin begiratu nahi bazion. Agiri ekonomiko berriak ekonomia, gizarte eta ingurumen garapenean jartzen du indarra, baita berdintasunean ere. Eta, gainera, itunen kulturaren adierazlea da, hain beharrezkoa dena duela bi hamarkadatatik gobernuak gutxiengoan izatera abonatuta zegoen udal batean. Dena eman behar dugu batzeko, lankidetzan aritzeko, aliantzak lotzeko eta elkarrekin arraun egiteko”, adierazi du Etxebarriak.

2020rako aurrekontu-proiektuak 392,6 milioi euro barne hartzen ditu orotara (438,7 milioi udal sozietateen aurrekontuak gehituz gero). Asteazkenean hasiko da zuzenketen eztabaida eta bozketa batzordean, eta Udalbatzak abenduaren 20an onestea aurreikusi da.

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  13 abendua 2019 13:35

 

Miñaoko berrikuntza zentroaren kolaboratzaile izan da hasieratik, patenteak eta ikergaiak partekatzen ditu 2019ko Kimikako Nobelaren irabazleetako birekin —John Goodenough eta Stanley Whittingham— eta nazioarteko zientzia komunitateak “etorkizuneko baterien hurrengo aita handitzat” jotzen du

 

Gasteizko alkate Gorka Urtaranek eta alkateorde eta Lurraldearen eta Klimaren aldeko Ekintzaren zinegotzi Ana Oregik CIC EnergiGUNEko zientzialari Michel Armand hartu dute gaur goizean. Izan ere, energiaren alorreko espainiar estatuko ikertzaile garrantzitsuena da Stanfordeko Unibertsitateak argitaratutako munduko 100.000 zientzialari nagusien zerrendaren arabera. Kaliforniako unibertsitate ospetsu horren sailkapenak munduan dauden 7 milioitik gora zientzialarien  lana aztertzen du, eta nazioarteko erreferentzia nagusia da zientzia eta ikerketaren profesionalentzat.

Udaletxean egindako ekitaldian, Maryse Armand emazteak eta CIC EnergiGUNEko zuzendaritza batzordeko kideak izan dira zientzialariarekin batera: Nuria Gisbert, Teófilo Rojo, Sara Ortiz, Asier Urzelai, Raquel Ferret, Javier Olarte eta Daniel Bielsa.

Michel Armandek patenteak eta ikergaiak partekatzen ditu 2019ko Kimikako Nobelaren irabazleetako birekin —John Goodenough eta Stanley Whittingham— eta nazioarteko zientzia komunitateak “etorkizuneko baterien hurrengo aita handitzat” jotzen du, mugikortasun elektrikoaren bidea markatuko duen bateria mota bat garatzen egin duen lanagatik.

Alkateak “CIC EnergiGUNE bezalako ikerkuntza zentroen garrantzia” azpimarratu du, “bertan proiektu erabakigarriak garatzen ari baitira Armand jauna eta beste zientifiko batzuk buru direla, eta Arabako Teknologia Parkea eta Gasteiz berrikuntzaren erreferente bihurtzen baitituzte nazioartean”.  Gorka Urtaranek erantsi du: “oso kontuan hartzen dugu lan garrantzitsu horrek duen balio erantsia, mugikortasun iraunkorraren bidea markatuko baitu, hau da, “Vitoria-Gasteiz Green Deal” planaren zutabeetako bat, zeinaren helburua baita berotegi efektua duten gasen isurketa murriztea, kalitateko enplegu berriak sortzea, ekintzailetza eta berrikuntza teknologikoa sustatzea, ekonomia berderanzko trantsizioa eta energia trantsizioa egitea energia berriztagarriak baliatuz, balio eta kultura berdeak hedatzea, eta gizarte kohesioa eta auzoen arteko oreka indartzea”.

Michel Armand Frantzian jaio zen, 1946an. 80ko hamarkadaren amaieran hasi zen litiozko bateria birkargagarriak ikertzen  —polimero solidozko elektrolitoarekin duen konbinazioaren bitartez—. Lan horiek erlazionatutako teknologia nagusiak garatzeko bide eman dute, ibilgailu elektrikoarena, besteak beste. Gaur egun, CIC energiGUNEko elektrolito solidoaren ikerketa sailaren arduraduna da, eta koordinatzen duen lantaldeak etorkizuneko ibilgailu elektrikoek eramango duten bateria solidoa lortzea du helburutzat.

CIC energiGUNE ikerketa zentroa erreferentziazkoa da Europan energia elektrokimikoa eta termikoa biltegiratzeari dagokionez. CIC energiGUNE Eusko Jaurlaritzako Ekonomiaren Garapen eta Azpiegitura Sailaren ekimen estrategikoa da energia biltegiratzearen ikerketan. Arabako Foru Aldundiaren eta Energiaren Euskal Erakundearen laguntza du, baita energiaren eta biltegiratzearen sektoreko Euskadiko enpresa nagusiena ere: Iberdrola, Cegasa Portable Energy, Sener, Siemens-Gamesa, Ormazabal, Idom, Solarpack, Mondragon Korporazioa eta Nortegas.

 

Share

Aurrekoak »