Prentsa Oharren banner
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  10 urtarrila 2020 11:17

 

Gizalegez kanpoko portaerak izan dira herritarrek mugikorraren bitartez nagusiki salatu dituztenak, hala nola kalean tamaina handiko trasteak uztea edo leku jakinetako zikinkeria

 

 

 

 

 

Telefono mugikorraren bitartez Udalari hiriaren garbitasunaren inguruko iradokizunak eta kexak helarazteko VGarbi ohartarazpen-zerbitzuaren erabilerak gorakada handia izan du, duela hiru urte sortu zenez geroztik. Gorka Urtaran alkateak gaur egin duen zerbitzu horren balantzearen arabera, herritarrek Udalari bidalitako ohartarazpenen kopurua % 33,3 igo da aurreko urtekoen aldean, eta hirukoiztu 2017az geroztik.

2019an, guztira, 7.172 abisu jaso ziren plataforma mugikor horren bitartez, eta horietatik % 91,4 benetan izan ziren garbitasunaren ingurukoak.

Gizalegez kanpoko portaerak izan dira herritarrek nagusiki salatu dituztenak, hala nola kalean tamaina handiko trasteak utzi izana (3.287 abisu) edo leku jakinetako zikinkeria (1.073 abisu), baita hondakinak edukiontzietatik kanpo utzi izana (619 abisu), paperontzien inguruko garbiketa-arazoak (301 abisu) edo bilketa pneumatikoaren ontzien ingurukoak (71 abisu).

Jasotako estatistiken arabera, 1.646 pertsonek erabili zuten VGarbi joan den urtean, eta erdia baino gehiago erabiltzaile berriak izan ziren. Nabarmentzekoa da badirela ohiko erabiltzaileak diren hainbat pertsona: horietako 14k 50 abisu baino gehiago bidali zituzten, baita batek 500 baino gehiago ere, nahiz eta pertsona eta urteko batez bestekoa hamar mezutik beherakoa izan.

Eskerrak eman dizkie alkateak herritarrei, Herritarren postontziaren eta 010 telefonoaren osagarri sortu zen zerbitzu horrekin izandako inplikazioagatik, zeinen helburua baita mugikorraren bidezko komunikazio-bide zuzen bat eskaintzea, ahalik eta azkarren erantzun ahal izateko eta konpondu ahal izateko udalerriko kaleetan atzemandako egoera ezegokiak.

“Komunikazio-kanal bat jarri genuen martxan, guztion artean Gasteiz garbiago edukitzen lagundu ziezagun. Alde batetik, udalerriko auzotarrei entzuteko aukera ematen digu, eta arazo puntualak konpontzeko. Eta, gainera, hiriko lekurik gatazkatsuenak zein diren ikusteko aukera, hobetzen jarraitzeko”, azpimarratu du Gorka Urtaran alkateak. Herritarren laguntza txalotu du, “hartara, gizalegez jokaturik, hiria garbi edukitzeko oso baliagarria den informazioa ematen baitute”, eta komunikazio-tresna hori oraindik erabili ez dutenei gonbita egin die, ezagutu eta erabil dezaten.

 Nola funtzionatzen du?

VGarbiren erabilera oso erraza da. Nahikoa da Whatsapp edo Telegram deskargatu eta, aplikazio hori baliatuz, 681 102 020 zenbakira mezu bat idaztea, zikinkeria antzeman den lekuaren argazkiarekin, eta lekua ahalik eta zehatzen azaltzea. Udalak, informazioa jasotzean, garbiketa-kontratari ematen dio horren berri, ahalik eta azkarren joan daitezen garbitzera. Telefono-zenbaki horretan ez da telefono-deirik hartzen.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  8 urtarrila 2020 10:22

Borja Lázaro Kolonbian desagertu zenetik sei urte igaro diren honetan, hura gogoratzeko deia egin die Gasteizko Udalak herritarrei. Maitasuna eta gertutasuna adierazi nahi izan dizkie alkateak Cabo de la Velan (La Guajira, Kolonbia) desagertutako gaztearen familiari eta lagunei, eta, aldi berean, bilaketa-lanei berriro ekin dakiela eskatu du.

Gasteiztarraren ingurukoek kontzertu bat antolatu dute, larunbat honetarako, The Tap tabernan —Manuel Iradier kalea, 7—, Borja Lázarok desagertuta jarraitzen duela gogorarazteko. 19:30ean hasiko da kontzertua, eta bertan arituko dira Alison Keable, Beitia eta Victor Gutiérrez (Similar Interests).

Aurreko urteetan egin izan den elkarretaratzea ordeztuko du kontzertuak, xede berarekin, zein baita Borja Lázaro gogoratzea eta Hego Amerikako herrialde horretan hura bilatzeko lanei berriro ekin dakiela galdatzea. Udalak elkartasuna, sostengua ea hurbiltasuna adierazi nahi dizkio gazte gasteiztarraren familiari.

Desagerpenaren urteurren honetan, hiriak Borja eta haren familiari eskaintzen dizkien sostengua eta elkartasuna berretsi ditu gaur alkateak. Borja Lázaro gasteiztarra 2014ko urtarrilaren 7tik 8ra bitarteko gauean desagertu zen. Geroztik, haren familiak eta lagunek ez dute aurkitzeko itxaropena galdu, eta, horregatik, etengabe mobilizatzen jarraitzen dute, ikerketekin jarraitu dadin, zer gertatu zen argitu eta Borja non dagoen jakin arte.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  27 abendua 2019 12:21

 

Gaur esleitu dio Tokiko Gobernu Batzarrak Viveros Eskalmendi SL enpresari Gasteizko Eraztun Berdeko landaredia zaintzeko zerbitzua, 377.259,74 euroan, BEZa barne, eta bi urteko gauzatze-epearekin.

 

Aldian behingo zainketa- eta hobekuntza-lanak biltzen ditu kontratatutako zerbitzuak, hala nola ongarritzea, inaustea, ureztatzea, belarra moztea, jorratzea eta sasiak kentzea, besteak beste, eta Eraztun Berdeko landare-estalkia kontserbazio-egoera onean mantentzeko behar diren giza baliabideak eta baliabide materialak jasotzen ditu, azken urteetako esperientziaren ildotik.

Ekologiari eta paisaiari dagokienez balio handia duten hainbat parke eta zonek —aisialdirako korridore ekologikoen bitartez lotuak— osatzen dute Gasteizko Eraztun Berdea, eta 842 hektarea hartzen ditu gaur egun.

Biodibertsitatea eta paisaia babestea eta hobetzea, hiriguneko uholdeak galaraztea, ziklo hidrologikoa erregulatzen laguntzea, naturarekin harremanetan aisialdiaz gozatzeko aukera ematea eta ingurumen-hezkuntza sustatzea dira, besteak beste, Eraztun Berdeko parkeek betetzen dituzten zereginak eta eskaintzen dituzten zerbitzuak.

  1. urtearen inguruan Eraztun Berdearen kontzeptua errotu zenez geroztik —Gasteiz ingurua berritzeko eta berreskuratzeko xedearekin—, Eraztun Berdearen eta Biodibertsitatearen Atala arduratu izan da dagoeneko haren parte diren hiriaren inguruko parke horietako landaredia zaindu eta mantentzeko kudeaketa-lanez:
  • ARMENTIA. 159 hektarea. Armentiako basoa.
  • ZABALGANA. 84 hektarea. Zabalganeko baso-parkea, Ehari, Zarauna eta Torrogiko errekak barne.
  • ZADORRA. 194 hektarea. Zadorrako ibai-parkea, Gamarragutxitik Krispiñako ur-araztegiraino.
  • SALBURUA. 247 hektarea. Salburuko hezeguneak, Errekaleor, Santo Tomas eta Alegria errekak barne.
  • OLARIZU. 158 hektarea. Olarizuko lorategi botanikoa, Mendizabala, Batan erreka eta Nebera gaina.
  • JUNDIZ. 41 hektarea. Jundizko parkea, Lermanda, Mendebaldea eta Ariniz barne.

 “Parkeetako natura- eta paisaia-balioak kontserbatzeko eta horiek erabilera publikorako, aisialdirako eta hezkuntzarako egokitzeko, aldian behin mantentze-lanak egin behar dira, hala nola belar-sastrakak moztu, ureztatu, inausi, erein, landatu edo izurriteak kontrolatu. Urteetan, eremu hondatuak ekologiari eta paisaiari dagokienez lehengoratzeko eta erabilera publikorako egokitzeko munta handiko jarduerak egin izan dira, baina oraindik ere badira hiriaren kanpoaldean hainbat eremu hondatu, berreskuratzeke, eta espazio batzuk bestekin korridore ekologikoen bitartez lotuko dituen konexio-sistema osatzeke dago”, azaldu du alkateak.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:08

 

 

“Etorkizuneko proiektuz beteriko Agenda gasteiztarra dugu agintaldi honetan garatzeko”, azpimarratu du Gorka Urtaranek

 

Gorka Urtaran audioa

2019ko azken Tokiko Gobernu Batzarraren ostean, Gasteizko alkateak aurtengo udal kudeaketaren balantzea egin du, eta datorren urterako erronka eta proiektu nagusiak izan ditu hizpide. “Kudeatzen dakien, akordioak lortzen dakien eta proiektuak gauzatzen dakien udal gobernua osatzen dugu, eta gaitasun horiek guztiak areagotu egingo ditugu legealdian zehar. Etorkizuneko proiektuz beteriko Agenda gasteiztarra dugu agintaldi honetan garatzeko“, azpimarratu du Gorka Urtaranek.

Ekainean hasi zen lanean maiatzaren 26ko hauteskundeetatik sortutako udal korporazio berria. EAJ-PNVren eta PSE-EEren arteko gobernu-akordioak 13 kidez osatutako gobernu bat eman zuen emaitza gisa, hau da, azken bi hamarkadetako indartsuena, eta Agenda gasteiztarrak -2019-2023 agintaldiko programa- barne hartzen dituen proiektuak garatzea errazten du horrek.

Kudeaketarako gaitasunari dagokionez, aurten gure hirian arrakastaz garatu diren ekitaldiak nabarmendu ditu alkateak, nazioartean protagonismoa eman baitigute. Gasteizen egindako saskibaloiko Lauko Finala, Umbra Light Festival, Nazioarteko Enoturismo Kongresua, Michelin Hirien Munduko Goi Bilera, emakumezkoen saskibaloiko Erreginaren Kopa edo Euskadiko hiriburuak lehen aldiz hartu duen Ironmana izan dira ekitaldi nagusiak. Horiez gain, hiriak zenbait aitorpen jaso ditu, Global Green City 2019, esaterako, eta berriki ospatu den Klima Aldaketaren aurkako Goi Bileran ere partaidetza nabarmena izan du.

2019an, gainera, Udalaren zorra 7 milioi eurotik gora murriztu da, 86 milioitik 78 milioira igarota. Kopuru on horiek ez ezik, zerbitzu publikoek kalitate-maila mantentzen eta hobetzen dutela ere kontuan izan behar da. Atal horretan, enpleguarekin lotutako datuak ere nabarmentzen dira. Orain dela gutxi, ia 800 lanpostuko lan-eskaintza publikoa onartu da administrazioko, mantentze-lanetako, informazio eta kontroleko lanpostuetarako eta beste kategoria batzuetarako; udaberrian, berriz, 39 udaltzain sartu ziren, aurreko bi txandei gehituta. Bestetik, Udalak aurten 513 lanpostu sortzea lortu du Eusko Jaurlaritzak Gasteizerako dituen enplegu planei esker, iaz baino % 25 gehiago, Lanbidek 5 milioi eurotik gorako ekarpen ekonomikoa eginda. Aipatu behar da 2019an zehar euskal hiriburuko langabetuak 15.315 izatetik 14.479 izatera igaro direla, eta Gizarte Segurantzako afiliatuak 120.797 izatetik 124.867 izatera igaro direla.

Alkateak nabarmendu du, halaber, gobernua guztiekin akordioak lortzeko gai dela erakutsi duela 2019an, bai maila instituzionalean, bai esparru pribatuko eragileekin. “Espainiako Gobernuarekin, Eusko Jaurlaritzarekin eta Arabako Foru Aldundiarekin egin ohi diren akordioez gain, bereziki pozgarria da aurten elkar ulertzera iritsi izana Alderdi Popularrarekin, zerga-ordenantzak onartzeko, eta Elkarrekin taldearekin, udal aurrekontua onartzeko. Ez diogu inori marra gorririk jartzen, eta itunak egiten ditugu hiriak aurrera egitea nahi duten alderdi, erakunde eta kolektibo guztiekin“, gaineratu du. Garrantzi berezia du, halaber, Salburua eta Zabalganeko jabeekin lortutako birpartzelazio-akordioak.

Aurrekoa bezain garrantzitsua da proiektuak gauzatzeko gaitasuna. Urtaranek hainbat adibide jarri ditu: autobus elektriko adimentsua instalatzeko martxan dauden obrak eta proiektuak; Gasteiz Antzokiaren esleipena; Emakumeen Etxea irekitzea; LGTBIfobiaren aurkako Behatokia martxan jartzea; Santa Barbara plaza eta Terrorismoaren Biktimen Oroitzapenezko Zentroaren ingurua birmoldatzea; Tornay Medikuaren kalea eta Ospitaleko plaza eraberritzea; tranbiaren hegoaldeko luzapenaren amaiera hurbila; Salbururako luzapenaren lizitazioa; AMVISAren ur-kolektore berria; Lakua-Arriaga, Ariznabarra eta Adurtzako futbol-zelai berriak; Eraztun Berdean proiektu berriak gauzatzea (Olarizuko harrera- eta informazio-puntua, Euskadiko lorategi botanikoa, Larragorri parkearen lehen fasea, aire zabaleko antzoki berdea eta abentura-parkea); Trafikoko Ordenantzaren aldaketa abiatu izana, mugikortasun pertsonaleko ibilgailuak (patinete elektrikoak, etab.) arautzeko, eta abar.

“Gobernu honek ametsak errealitate bihurtzen ditu, eta urteetan zehar asko eztabaidatu diren proiektuak azkenean egitate ukigarri bihurtzen ari dira. Gainera, bizilagunei entzuteko eta haiekin hiria egiteko gai den gobernua gara; izan ere, proiektu horietako asko herritarren ekarpenei esker jarri dira abian, bai Gasteiz Hobetuz programaren bidez, bai parte hartzeko organoetan eta kanaletan egindako ekarpenen bidez“, erantsi du alkateak.

Aurrerapen horiek eta beste batzuk posible izaten ari dira udal gobernuak hiri-proiektu argi bat duelako, agintaldiko planean eta Agenda gasteiztarrean zehazten dena. “Etorkizunerako proiektu asko ditugu, eta garrantzitsuena da asko dagoeneko abian direla, hasi direla egiten. Agintaldi hau sendotzearena izango da, Gasteiz Europako superhiri gisa berrestearena, nazioartean erreferentzia izango baita bizi-kalitatean, lehiakortasun ekonomikoan eta iraunkortasunean “.

“Ziur nago guztion laguntzarekin 2020a urte ona izango dela hemen bizi garenontzat. Udalak egin berri duen ikerketa soziologikoaren arabera, segurtasuna, garbitasuna eta garraio publikoa dira kezka nagusiak, beraz, arlo horietan jarriko dugu arreta, gainerakoak alde batera utzi gabe. Era berean, ‘Vitoria-Gasteiz Green Deal’ delakoa garatzen ahalik eta gehien inplikatuko gara. Plan horren helburua da enpresak erakartzea, gure hirian agertoki egokia aurkituko baitute arazo globalei irtenbide lokalak ematen dizkieten ekonomia berdeko ekintzak garatzeko. Ingurumenaren ikuspegitik berdeak izatetik ekonomia berdearen erreferente izatera igaro nahi dugu “, azpimarratu du alkateak.

Datorren urterako ere berrikuntza garrantzitsuak aurreikusi dira: abiadura handiko trena lurperatzearekin lotutakoak; Principal antzokia eraberritzea; auditorioa abian jartzea; auzoetako inbertsioak, agintaldi osoan 100 milioi eurora iritsiko direnak; superetxadiak garatzea; Mendizorrotzeko futbol-zelaia handitzea;  Mobility Lab, gure hiria mugikortasunaren alorrean berrikuntzarako nazioarteko zentro bihurtu nahi duena, eta Agendan jasotako beste hainbat.

2020, ospatzeko asko duen urtea

Azkenik, alkateak aipatu du 2020an urteurren ugari izango dugula ospatzeko: Florida parkearen 200 urteak, Fournier enpresaren 150 urteak, Farolen Arrosarioaren 125 urteak, Baskoniaren 60 urteak, Eusko Legebiltzarraren 40 urteak, Forondako aireportuaren 40 urteak, Europa jauregiaren 30 urteak eta Araskiren 10 urteak, adibide batzuk jartzearren.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:01

 

Udal gobernuak Sorginenea-Tu Casa Feministarekiko luzapena onetsi du, Etxanobetarren etxea erabiltzen jarrai dezaten

 

 

 

 

Tokiko Gobernu Batzarrak Sorginenea-Casa de las Mujeres de Vitoria-Gasteiz elkartearekiko hitzarmena luzatzea onetsi du gaur, eta horrela aurten abian jarritako Emakumeen Etxearekiko konpromisoa berritu du hiriak. “Emakumeen Etxea kudeaketa-proiektu bateratua finkatzearen alde lan egiten jarraituko dugu, emakumeak ahalduntzeko espazio gisa ulerturik, partaidetzaren bitartez gizartea eraldatzeko, eta etxea topaketa, truke eta hausnarketarako espazio gisa ikusia izan dadin bultzatzeko”, adierazi du alkate Gorka Urtaranek.

Hitzarmenaren bitartez, elkarteak Etxanobetarren etxea erabil dezake Sorginenearen egoitza gisa, Berdintasun Zerbitzuak Ahalduntze Feministarako Eskolarako behar dituen espazio batzuk izan ezik.

Udalak 150.000 euro jarri ditu Sorginenea elkarteak 2020an bere ekintzak garatzerik izan dezan. Gainera, taldeak 30.000 euroko laguntza jasoko du eraikina egokitzen jarraitzeko. Orobat, higiezina mantendu eta garbitzeko gastuak hartzen ditu bere gain Udalak, besteak beste.

Sorginenea proiektua aurtengo irailean jarri zen abian, kolektibo feministetako eta berdintasunaren aldeko elkarteetako emakume desberdinekin kudeaketa eredua eta proiektuaren beharrak definitzeko partaidetza-prozesu bat egin ondoren; izan ere, aldarrikapen historikoa zen Emakumeen Etxea proiektua garatzeko eremu propio bat edukitzea. Prozesuaren buruan, hitzarmena sinatu zen 2019ko maiatzean, eta uda igaro ondoren ireki zen etxea.

Proiektuan bertan definitzen den bezala, emakumeen etxea inklusiboa, irekia eta askotarikoa da, eta honako helburu hauek ditu: Gasteizko erreferente bihurtzea emakume guztientzat eta feminismoaren eta berdintasunaren alde lan egiten duten kolektibo guztientzat, sormena, hausnarketa eta, batez ere, egiteko beste modu batzuk sustatzeko topagunea izatea, eta dibertsiorako toki goxoa eta ikasteko errespetu- eta ekitate-esparrua izatea.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  23 abendua 2019 13:48

EUDELen elkarteburu eta Vitoria-Gasteizko alkate Gorka Urtaranek BetiON Telelaguntza Zerbitzuko call centerrean hartu du parte, gaur goizean, Erandioko eta Portugaleteko alkate eta EUDELen Batzorde Eragilearen kide Aitziber Olibánekin eta Mikel Torresekin batera, bai eta beste alkateekin batera ere: Arrigorriaga, Maite Ibarra, Barakaldo, Amaia del Campo, Bilbao, Juan Mari Aburto, Elorrio, Idoia Buruaga, eta Laudio, Ander Añibarro.

11:00etatik aurrera, BetiONeko teleoperadoreekin aritu dira alkateak lanean, eta, hala, erabiltzaileen deiei erantzun diete. Bide batez, unea aprobetxatu dute beren udalerrietako herritar nagusiei Gabon zoriontsuak opatzeko. Euskadiko udalek pertsona nagusien segurtasunarekiko, ongizatearekiko eta bizi-kalitatearekiko konpromisoa dute.

Gorka Urtaranek zahartzearen erronka aipatu du, bai eta belaunaldien arteko elkarbizitza ere; azken horren harira, hau esan du: “Gizarte osoari dagokion erronka da. Bakartasuna arazoa da eta horri aurre egiteko, ikusgarritasun handiagoa eman behar zaio”. Alkate eta elkarteburuak zera baloratu du: “gertuen dagoen inguruko laguntza-sarea, hau da, instituzioetatik, gizarte-erakundeetatik eta herritarrengandik beraiengandik, bakarrik bizi direnei laguntza emateko”. Ildo horretatik, Urtaranek azaldu du udalek “enbaxadoreak” izan behar dutela, bai eta “BetiON zerbitzura sartzeko atea” ere.

Iñigo Urkullu Lehendakaria buru duten eta Eusko Jaurlaritzaren Enplegu eta Gizarte Politiketako Sailak antolatutako Jardunaldi Irekietan egin da ekintza hori. Jardunaldian, EAEko hainbat udalerritako adineko 15 pertsonek osatutako talde baten anfitrioi gisa jardun du sailburu Beatriz Artolazabalek; hain zuzen ere, gonbidapena egin zaie pertsona horiei, Bilboko San Inazio auzoko Aragoi kalean dauden BetiONen instalazioak ezagutu ditzaten.

Lehendakariak eta agintariek pertsona horiek zoriondu dituzte, eta, gainera, zerbitzuak 2020. urteari begira izango dituen berrikuntzak ezagutu dituzten lehenengoak izan dira aipatutako erabiltzaileak.

 

 

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  16 abendua 2019 12:08

 

 

Gorka Urtaran alkatearen adierazpenak

Gorka Urtaran alkatea eta Maider Etxebarria lehen alkateordea pozik agertu dira Elkarrekin udal taldearekin lortu duten akordioarekin, horri esker Gasteizek aurrekontua izango baitu 2020an. “Indar batasun honek gehiengoa edukitzea ahalbidetzen digu, ezinbestekoa baita hiriak datorren urterako aurrekontua izan dezan. Etapa berria irekitzen da Gasteizentzat, Agenda gasteiztarrak barne hartzen dituen etorkizuneko proiektu handiei aurre egiteko behar den bermearekin. Garai berri baterako akordioa”, azpimarratu du alkateak.

EAJ-PNV eta PSE-EEk Elkarrekin taldearekin lotu duten aurrekontu itunak datorren urterako proiektu ekonomikoan ezarritako lehentasunetako bat berresten du: agintaldiko inbertsio handiak abian jartzea. Beste bi lehentasunak, kalitateko zerbitzu publikoen aldeko apustua eta Gasteiz ekonomia berdearen alorrean erreferentea bihurtzea, indartuta geratu dira Elkarrekin-ek 2020rako aurrekontu-proiektuari egindako zuzenketak txertatuta.

“Bat etorri gara funtsezko bi printzipiotan: herritarren bizi-kalitatea hobetzea eta hiri are jasangarriago baterantz aurrera egitea. Helburuetan bat etortzeak eta Elkarrekin-ek asmo positiboz egindako proposamenak txertatzeak erraztu dute tokiko politikan dinamika berria ekarriko duen akordio hau. Hiria alderdien interesen gainetik jartzeak hau bezalako albiste onak dakartza beti”, erantsi du Gorka Urtaranek.

“Akordio garrantzitsua da, agintaldiko lehen aurrekontua onestea ahalbidetuko duelako. Gasteizek ezin zuen jasan hirugarrenez jarraian aurrekontua luzatzea etorkizunari bermearekin begiratu nahi bazion. Agiri ekonomiko berriak ekonomia, gizarte eta ingurumen garapenean jartzen du indarra, baita berdintasunean ere. Eta, gainera, itunen kulturaren adierazlea da, hain beharrezkoa dena duela bi hamarkadatatik gobernuak gutxiengoan izatera abonatuta zegoen udal batean. Dena eman behar dugu batzeko, lankidetzan aritzeko, aliantzak lotzeko eta elkarrekin arraun egiteko”, adierazi du Etxebarriak.

2020rako aurrekontu-proiektuak 392,6 milioi euro barne hartzen ditu orotara (438,7 milioi udal sozietateen aurrekontuak gehituz gero). Asteazkenean hasiko da zuzenketen eztabaida eta bozketa batzordean, eta Udalbatzak abenduaren 20an onestea aurreikusi da.

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  13 abendua 2019 13:35

 

Miñaoko berrikuntza zentroaren kolaboratzaile izan da hasieratik, patenteak eta ikergaiak partekatzen ditu 2019ko Kimikako Nobelaren irabazleetako birekin —John Goodenough eta Stanley Whittingham— eta nazioarteko zientzia komunitateak “etorkizuneko baterien hurrengo aita handitzat” jotzen du

 

Gasteizko alkate Gorka Urtaranek eta alkateorde eta Lurraldearen eta Klimaren aldeko Ekintzaren zinegotzi Ana Oregik CIC EnergiGUNEko zientzialari Michel Armand hartu dute gaur goizean. Izan ere, energiaren alorreko espainiar estatuko ikertzaile garrantzitsuena da Stanfordeko Unibertsitateak argitaratutako munduko 100.000 zientzialari nagusien zerrendaren arabera. Kaliforniako unibertsitate ospetsu horren sailkapenak munduan dauden 7 milioitik gora zientzialarien  lana aztertzen du, eta nazioarteko erreferentzia nagusia da zientzia eta ikerketaren profesionalentzat.

Udaletxean egindako ekitaldian, Maryse Armand emazteak eta CIC EnergiGUNEko zuzendaritza batzordeko kideak izan dira zientzialariarekin batera: Nuria Gisbert, Teófilo Rojo, Sara Ortiz, Asier Urzelai, Raquel Ferret, Javier Olarte eta Daniel Bielsa.

Michel Armandek patenteak eta ikergaiak partekatzen ditu 2019ko Kimikako Nobelaren irabazleetako birekin —John Goodenough eta Stanley Whittingham— eta nazioarteko zientzia komunitateak “etorkizuneko baterien hurrengo aita handitzat” jotzen du, mugikortasun elektrikoaren bidea markatuko duen bateria mota bat garatzen egin duen lanagatik.

Alkateak “CIC EnergiGUNE bezalako ikerkuntza zentroen garrantzia” azpimarratu du, “bertan proiektu erabakigarriak garatzen ari baitira Armand jauna eta beste zientifiko batzuk buru direla, eta Arabako Teknologia Parkea eta Gasteiz berrikuntzaren erreferente bihurtzen baitituzte nazioartean”.  Gorka Urtaranek erantsi du: “oso kontuan hartzen dugu lan garrantzitsu horrek duen balio erantsia, mugikortasun iraunkorraren bidea markatuko baitu, hau da, “Vitoria-Gasteiz Green Deal” planaren zutabeetako bat, zeinaren helburua baita berotegi efektua duten gasen isurketa murriztea, kalitateko enplegu berriak sortzea, ekintzailetza eta berrikuntza teknologikoa sustatzea, ekonomia berderanzko trantsizioa eta energia trantsizioa egitea energia berriztagarriak baliatuz, balio eta kultura berdeak hedatzea, eta gizarte kohesioa eta auzoen arteko oreka indartzea”.

Michel Armand Frantzian jaio zen, 1946an. 80ko hamarkadaren amaieran hasi zen litiozko bateria birkargagarriak ikertzen  —polimero solidozko elektrolitoarekin duen konbinazioaren bitartez—. Lan horiek erlazionatutako teknologia nagusiak garatzeko bide eman dute, ibilgailu elektrikoarena, besteak beste. Gaur egun, CIC energiGUNEko elektrolito solidoaren ikerketa sailaren arduraduna da, eta koordinatzen duen lantaldeak etorkizuneko ibilgailu elektrikoek eramango duten bateria solidoa lortzea du helburutzat.

CIC energiGUNE ikerketa zentroa erreferentziazkoa da Europan energia elektrokimikoa eta termikoa biltegiratzeari dagokionez. CIC energiGUNE Eusko Jaurlaritzako Ekonomiaren Garapen eta Azpiegitura Sailaren ekimen estrategikoa da energia biltegiratzearen ikerketan. Arabako Foru Aldundiaren eta Energiaren Euskal Erakundearen laguntza du, baita energiaren eta biltegiratzearen sektoreko Euskadiko enpresa nagusiena ere: Iberdrola, Cegasa Portable Energy, Sener, Siemens-Gamesa, Ormazabal, Idom, Solarpack, Mondragon Korporazioa eta Nortegas.

 

Share
Kategoriak: Prentsa oharrak  —  Etiketak: , , , , ,   —  Komunikazio Zerbitzua / Servicio de Comunicación  —   13:10

 

 

Gasteizko alkate Gorka Urtaranek baieztatu duenez, Eguberrien ostean hasiko dira ‘Connect Ibailakua’ proiektua egiteko eta Ospitale plaza eraberritzeko obrak. ‘Mejorando Vitoria-Gasteiz Hobetuz’  partaidetza programan proposatutako bi ekimen dira, eta 375.702 eta 362.034 euro inbertituko dira horietan, hurrenez hurren. Bi kasuetan, Balgorza enpresa arduratuko da lanez. “Herritarren ekimenak dira biak, eta datozen hilabeteetan mamituko dira. Gasteizko auzoak hobetzeko apustu irmoa egiten jarraitzen dugu”, azaldu du Gasteizko alkateak.

Lakua auzoan belaunaldien arteko aire zabaleko parke berria egingo da, hutsik dauden lursailak eta erabiltzen ez diren espazioak baliatuta. ‘Connect Ibailakua’ proposamenak azpiegitura berdearen filosofia du oinarri, eta Urtaranen gobernuaren Auzoen Planaren barruan sartuta dago.  Lanak egiteko 3 hilabeteko epea aurreikusi da.

Auzoko 11 lekutan egingo dira lanak, espazio hauek sortzeko:

1- Aisialdirako eta kirol askotarako gunea. Baia Ibaiaren kalearen eta Santa Engrazia Ibaiaren kalearen arteko bidegurutzean eta Inglares Ibaiaren kaleko familia bakarreko etxeen atzealdean dagoen lursail bat egokituko da, 9.000 metro koadrokoa. Beisbola, softbeisbola, criqueta edo lacrossea praktikatu ahalko dira, gaur egun zaila baita horietan jarduteko lekuak aurkitzea hirian.

2- Kometentzako lekua. Iruñea kaleko bidegorriaren eta Landaberde eta Xabier kaleen ondoan dagoen lursail trapezoidal batean —4.500 metro koadro ditu— haize-mahuka duen masta bat jarriko da, haizeak nondik jotzen duen jakiteko.

3- Agertokia. Ibaiondoko gizarte etxetik gertu dagoen berdegune biribilean —980 metro koadro ditu—, Wellingtongo Dukearen kalearen eta Landaberde kalearen artean, agertoki bat jarriko da, 12 metroko hiru eserleku jarraitu, eta eskailerak. Korten altzairuz egingo da egitura, eta gizarte etxeko jardueren osagarri izango da.

4- Aisialdi eta kirol espazioa. Bi lekutan (Belate kalearen eta Iruñea kalearen artean). Horietako batean, egoteko zona bat proposatzen da, muinoz osatua; bertan askaltzeko sei eserleku irisgarri jarriko dira, eta futbol-ateak, belar artifizialaren gainean. Bestean saskibaloiko saskiak instalatzea aurreikusten du proiektuak, hormigoizko zolata baitu.

5-Zirkuitu bio-osasungarria. Orio kalean dagoen espazio batean, Landaberde eta Bartzelona kaleen artean, zirkuitu bio-osasungarria jartzea proposatzen da (orain haur-jolas batzuk daude han). Pedalak, arrauna, eskia, bielak, eskailerak, masajea eta paralelak jarriko dira, baita informazio kartelak ere. Lau jolasez osatuko da eremua: mahai-teniseko 2 mahai, xakeko mahai bat, eta partxiseko beste bat.

6- Jolas inprimatuak. Girona kalean, Landaberde eta Bartzelona kaleen artean, jolasteko eta apaintzeko marrazkiak inprimatuko dira zoladuraren gainean. Kolore askotako suge bat eta taula zenbakidun bat, eskailera eta sugea dituena.

7-Badmingtona. Galeoia dagoen inguruan, erabiltzen ez den espazio batean, badmingtonean aritzeko pista bat egokitu nahi da.

8, 9 eta 10- Ori kaleko parke linealean, zolatuta dauden eta erabiltzen ez diren hiru espaziotan, hiru jarduera diseinatu dira: diana forma duen marrazki bat inprimatzea zoladuraren gainean (Irati kalearekiko bidegurutzean), kalistenia zirkuitu bat (Getaria kalearekiko bidegurutzean), eta altzairu galvanizatuzko saskibaloiko saski bat, bandaloen kontrakoa (Girona kalearekiko bidegurutzean).

11- BMX zirkuitoa.

Zarautz, Getaria eta Baiona kaleen arteko lursailean. Zirkuiturako pistak, muinotxoak eta donut bat sortuko dira, eta aisialdirako gune bat. Eserlekuak, argiak, landareak eta abar jarriko dira. Bi zirkuitu proiektatu dira: laburra, 65 metro luze eta 3 metro zabal izango dena, eta luzea, 190 luze izango dena.

Ospitale plaza

Gasteizko Udalak Ospitale plaza —Guardien plaza izenez ere ezaguna— eraldatuko du, irisgarriagoa eta modernoagoa izan dadin. Udalak plazaren 650 metro karratuko azaleran jardungo du, baita Frantzia kaleko 120 metro karratutan eta Santiago kaleko 200 metro karratutan ere. Lanak gauzatzeko epea lau hilabetekoa da.

Proiektuak hainbat helburu ditu: espazio horren erakargarritasuna eta estetika hobetzea, zoladura eta hiri-altzariak aldatuz; espazioa berrantolatzea, oinezkoentzat irisgarriagoa izan dadin, eta egoera txarrean dauden sareak eta azpiegiturak –argiztapena, saneamendua, hornikuntza eta drainatzea– berritzea. Ezkutatuta egotetik alboko kaleen maila berean egotera igaroko da, eta hala, jendea elkartzeko eta denbora pasatzeko gune atsegin bihurtuko.

Izan ere, plaza berriak 90º-ko sektore zirkularraren forma izango du. Kurba horren erdia Frantzia kalearen mailan egongo da. Santiago kaletik hurbil dagoen inguruan, berriz, plaza eta kalearen arteko garaiera aldeari irtenbidea emateko eskailerak jarriko dira. Gainera, plazaren muga gisa 14 eta 17 metroko bi banku luze jarriko dira, bertaratzen direnek atseden hartzeko. Gaur egun Ospitale plaza Frantzia eta Santiago kaleetatik bereizteko dauden hormak kendu egingo dira.

Udalak plazako lurra goitik behera aldatzeko helburua ere badu. Jarriko den zoladurak granitozko lauza horiak izango ditu erdigunean. Eraikinen eta plazaren artean, granitozko lauza grisak ipiniko dira. Estetika aldetik, Andre Maria Zuriaren plaza, Santa Barbara plaza eta Terrorismoaren Biktimen Oroimenezko Zentroaren ingurua ekarriko ditu gogora. Errege ateak etorkizunean izango duen itxura ere horien antzekoa izango da.

Urtaranen gobernuak espazio publikoan sustatu dituen beste esku-hartze batzuetan bezala, eraberritze-lanak argiztapena aldatzeko ere aprobetxatuko dira. Ildo horretan, argiztapen-puntu bakarra jarriko da, led lanparak txertatuta izango dituzten sei proiektatzailerekin. AMVISAk, berriz, drainatzea eta saneamendua berritzeko beharrezkoa lanak egingo ditu.

Espazio Publikoaren Zerbitzuak zuhaitzak landatzeko asmo ere badu –Celtis Australis motakoak–, eta lekuz aldatuko du iturri apaingarria. Iturria zaharberritu ere egingo da. Zuhaitzek 10 metroko altuera hartuko dute gutxi gorabehera, eta plazaren inguruan jarriko direnez, trafikoa eta egoteko lekua bereizteko balioko dute, itzala emateaz gain. Fatxadetatik nahikoa urrun jarriko dira, etxeei enbarazu ez egiteko.

Santiago kalean plaza ukitzen duen espaloia berrituko da, eta, horrez gain, Vitoria-Gasteiz modeloko sei-aparkaleku jartzea erabaki da, hondakinen kontainerren alboan. Frantzia kalean, plaza ukitzen duen espaloia berritzea da asmoa.

Esku-hartze gehiago Zabalganean

Alkateak jakinarazi du, halaber, aste honetan hasi direla Zabalganean jolas naturalizatuen zona bat sortzeko lanak. Zehazki, Nazio Batuen hiribidean dagoen lursail batean, Zabalganeko haur eskolaren eta Zabalgana Lehen Hezkuntzako ikastetxearen artean. Esku-hartze hori ere ‘Mejorando Vitoria-Gasteiz Hobetuz’ partaidetza-prozesuan hautatu zen.

Hartara, Udalak hiriko azpiegitura berdea garatzen jarraituko du, espazio naturalen sare horrek ingurumen, gizarte eta ekonomia onurak baitakartza. Oraingoan, jolasteko eta egoteko gune naturalizatua proiektatu da. Zuhaixken zerrenda batek mugatutako laukizuzen bat diseinatu da, eta bertan ohikoak ez diren jolasak jarriko dira: eskultura erako enborrak, harriekiko jolas bat, oreka egitekoa, jauzi egiteko enborrak… Sei masusta-arbola ere landatuko dira, geriza emateko. Bi hilabete iraungo dute lanek.

Zabalgana eta Armentiako basoa lotzeko oinezkoentzako egurrezko pasabidea bihar jarriko dela gogorarazi du alkateak. Lan horiek direla eta, goizeko seietatik moztuko da trafikoa N-102 errepidean. Gasteiztik autobiderantz Mariturri auzotik irteten diren ibilgailuak Gasteiztik Ibaiara doan bidetik desbideratuko dira eta hirian sartu nahi duten ibilgailuak, berriz, A-4163 Gometxa-Armentia errepidetik. Trafikoa arratsalde erdialdean irekitzea aurreikusita dago.

Pasabidea jarri aurretiko lanak (zimendua) irailean hasi zituzten. Orain lurra finkatua dagoenez, prest dago egitura jartzeko. Bihar lau pieza handi (bi erdian eta beste bi muturretan)  muntatuko dituzte lur gainean bertan, garabi eta makina handien bitartez. Lanak larunbatean egitea erabaki da N-102tik trafiko gutxien igarotzen eguna delako.

Esku-hartze hori ere ‘Mejorando Vitoria-Gasteiz Hobetuz’ partaidetza-programan hautatu zen; hain zuzen ere, bozkatuenetako bat izan zen. Lanek 342.000 euroko aurrekontua zuten, eta 6 hilabeteko gauzatze-epea.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:51

 

  • Prozesua amaitutakoan, behin-behinekotasun tasa % 38tik % 5era jaitsiko da
  • Gasteizko Udalaren historian inoiz egindako enplegu eskaintza publikorik handiena da

 

Tokiko Gobernu Batzarrak Gasteizko Udaleko C, D eta E taldeetan 407 lanpostu betetzeko sustapenaren eta enplegu-eskaintza publikoaren deialdia onetsi du gaur goizean; besteak beste, garbitzaileen, administrarien, informazio eta kontrol agenteen, eta mantentze lanetarako ofizial espezialisten lanbide kategoriei dagozkie horiek.

Duela urtebete talde horietarako onetsi ziren beste 275 lanpostuei gehitzen zaizkie 407 horiek, beraz, orotara 682 lanpostu betetzeko LEP bateratua egingo da. Datozen hilabeteetan onetsiko dira deialdiaren oinarriak, eta izena emateko epeak irekiko.

“Zalantzarik gabe, Gasteizko Udalaren historian inoiz egin den enplegu eskaintza handienaren aurrean gaude, 2001ean deitutako 462 lanpostuen gainetik. Mugarria da enplegu egonkorra eta kalitatekoa sortzeari dagokionez, eta udal plantillaren behin-behinekotasun portzentajea % 5era jaisteko hartu dugun konpromisoari erantzuten dio“, adierazi du Gorka Urtaran alkateak.

682 lanpostuen eskaintza globala honela banatuko da: 151 barne sustapenerako; 42, ezintasunak dituzten pertsonentzat, eta 489, txanda librerako. Gaur onetsi den deialdiaren barruko 407 lanpostuak, berriz, lanbide-kategoria hauei dagozkie: garbiketarako 143, administrazioarekin lotutako 84, eta informazio eta kontrol agenteen kategoriako 81.

C, D eta E taldeetarako prozesuaren hasierak bat egiten du goi eta erdi mailako titulazio-taldeetarako (A eta B) egindako LEParen amaierarekin. Azken horretan lanpostua lortzen duten 174 funtzionarioak martxoan jabetuko dira horietaz.

Enplegua sendotzeko beste LEP bat

Orobat, Enplegatu Publikoaren Oinarrizko Estatutuaren 4. xedapen iragankorrari dagozkion lanpostuen enplegu-eskaintza publikoaren deialdia onetsi du Urtaranen gobernuak. Izan ere, xedapen horrek bide ematen du aldi baterako lanpostuak enplegu finko bihurtzeko LEPak egiteko 2005eko urtarrilaren 1a baino lehenagotik bitarteko langileek etenik gabe betetakoak badira.

LEP mota horretan, probetako edukiak zerikusia izan behar du deialdiaren xede diren lanpostuetako ohiko prozedura, ataza eta eginkizunekin, berdintasun-, merezimendu-, gaitasun- eta publizitate-printzipioak bermatuta.

Lanpostuak sendotzeko onetsi den LEParen barruan  A, B, C, D eta E taldeetako 112 plaza sartu dira guztira. Garbiketarekin lotutako lanbide-kategoriak dira gehiengoa (46 lanpostu); mantentzearekin lotutako lanbideetan zein informazio eta kontrol zerbitzuetan ere badira horien artean. Finkapeneko LEPeko 112 plaza horiek, c, d eta e taldeetako LEParekin batera, eskaintzen diren lanpostuen bolumen osoa 794ra iristen da.

Enplegu gehiago adimen ezintasuna duten pertsonentzat

Azkenik, zenbait sailetako lanpostuen zerrendak aldatzea onetsi du Tokiko Gobernu Batzarrak. Besteak beste, adimen ezintasunen bat duten pertsonentzako hiru lanpostu sortzea dakar horrek. Lehen aldia da Udalean, tradizioz, dibertsitate funtzionalerako enplegu kupo bat gorde duela, eta adimen ezintasunerako berariazko kupo bat ezartzen duela.

Share

« HurrengoakAurrekoak »