Prentsa Oharren banner
Kategoriak: Sailkatu gabea  —  Etiketak: ,   —  Komunikazio Zerbitzua / Servicio de Comunicación  —  10 abendua 2019 14:34

Agintariak tranbia estraluzearen aurkezpenean (1)

  • Tranbiaren erabilera handiari erantzuteko CAFek fabrikatuko dituen 7 unitateetatik lehena da
  • Unitate berria azaroaren amaieran iritsi zen Gasteizera, eta Euskotrenen Ibaiondoko kotxetegietan egokitzen eta probatzen ari dira, abenduaren 17an probak trazatuan has daitezen

  • Unitate berriek 7 modulu dituzte, gaur egungo 5 moduluen aldean, eta 44 metroko luzera, edukiera 400 erabiltzaileraino handitzeko

 

Euskotrenek, Arantxa Tapia Eusko Jaurlaritzako Ekonomiaren Garapen eta Azpiegituretako sailburuaren eskutik, Gasteizko tranbia-material mugikorreko tailerretan aurkeztu du Arabako hiriburuan ipiniko dituzten tranbia berri “estraluzeen” lehen unitatea. Ekitaldian, sailburuak ondoan izan ditu Ramiro Gonzalez Arabako ahaldun nagusia, Gorka Urtaran Gasteizko alkatea, Imanol Leza Euskotreneko zuzendari nagusia eta Josu Imaz CAF taldeko Negozio eta Teknologia zuzendaria.

CAF ari da Gasteizko 7 tranbia berriak fabrikatzen Irungo lantegian, 25 milioi euroren truke. Unitate berri horiek 7 modulu dituzte, egungo 5 moduluen aldean, eta 44 metroko luzera dute, edukiera 400 erabiltzaileraino handitzeko aukera emanez. Martxan jarri zenetik etenik gabeko hazkundea izan du tranbia-zerbitzuak, eta Green Capitaleko mugikortasuneko hiri-garraioaren ardatz egituratzaile bihurtu da.

Trazadua handitzearekin batera, beharrezkoa izan da Euskotrenen tranbia‑zerbitzuak eskainitako plazak handitzea, batez ere berehala hegoaldera zabalduko delako eta puntako orduetan eta hiriko ekitaldi nagusietan egoten den eskari handiari erantzuteko.Lehen unitate hori une honetan Ibaiondoko Euskotrenen tailerrean dago, Gasteizen, eta martxan jarri aurreko proba estatikoak egiten ari dira, tranbiak trenbideetara sartzean modu seguruan zirkulatu ahal izango duela egiaztatzeko. Abenduaren 17ko gauean hasiko da ibilbidean zirkulatzen proba-fasean.

Tailerreko jarduerak, hala ere, ez du etenik izango, urtea amaitu baino lehen CAFek 600 serie berri horretako beste hiru unitate entregatuko baititu, zehazki, abenduaren 16an, 26an eta 30ean, eta horiek martxan jartzeko prozedura bera jarraitu beharko dute.

% 100 solairu baxuko ibilgailua, bertara erraz sartzeko modukoa

Tranbia “estraluzea” %100 solairu baxuko ibilgailua da, noranzko bikoitzekoa; 16 sarrera-ate izango ditu (8 alde bakoitzean), eta guztira 58 eserleku, gehi 6 eserleku tolesgarri (mugikortasun urriko pertsonentzako 4 guneetan daude). Tranbiaren azalera osoa altuera bakarrera dago, eta horrek modu errazean sartzeko aukera ematen die mugikortasun murriztua duten pertsonei, gurpildun aulkian edo haurtxoen orgatxoekin dabiltzan erabiltzaileei, esaterako.

Horri esker, tranbiaren erabiltzaileen eskari gero eta handiagoari erantzun ahal zaio; izan ere, puntako orduetan, tranbia erabat betetzen da. Behar horiei erantzuteko, zerbitzu bakoitzean plaza gehiago eskaintzea da aukerarik onena, eta, horri esker, hiriko trafikoarekin batera hobeto zirkula dezake eta hiriaren barne-funtzionamendua hobetu daiteke.

Maiztasunak handitzearen ordez, tranbien edukiera handitzea erabaki da; izan ere, 5 kotxetik 7ra igaroz gero, eskaria modu eraginkorrean arindu ahal izango litzateke, ohiko tranbien erabiltzaile-kopurua areagotu ahalko baita: 270 pertsona ordez, 7 kotxeko tranbia batek 400 pertsona garraiatu ahal izango ditu.

Agintariak tranbia estraluzearen aurkezpenean (2)

Ezaugarri teknikoen alderaketa:

Ezaugarri teknikoak Unitate berriak Unitate zaharrak
Modulu-kopurua 7 5
Luzera guztira 44.211 mm 31.380 mm
Zabalera 2.400 mm 2.400 mm
Pisua (tara) 52.970 kg 41.000 kg
Gehieneko abiadura 70 km/h 70 km/h
Edukiera 400 pertsona 270 pertsona
Trenbidearen zabalera 1.000 mm 1.000 mm
Sarrera-ateen kopurua 16 12

Eusko Labeldun nazioarteko tranbiakCAFek tranbien linea propio bat garatu du, Urbos izenekoa, jada hiri ugaritan ezarri dutena, konpainiak nazioartean duen esperientzia zabalaren erakusgarri. Gasteizko etorkizuneko tranbiak ere konfigurazio horretakoak dira, baina ez da CAFek tranbia “estraluzeak” garatzen dituen lehen aldia. Hala, adibide gisa, Budapesten kasua dugu. 2014ko martxoan, CAFek lehen kontratua sinatu zuen BKKrekin (Budapesti Közlekedési Központ), Budapest hiriko garraioaz arduratzen den enpresarekin, 47 tranbia hornitzeko (5 moduluko 35 tranbia eta 9 moduluko 12 tranbia). Dagoeneko fabrikatu dituzte guztiak, eta zerbitzu komertziala eskaintzen dute, bidaiariekin.

  1. urtearen amaieran, bezeroak berriro jarri zuen konfiantza CAFen, eta bigarren eskaera bat egin zuen 26 tranbia fabrikatzeko (5 moduluko 21 tranbia eta 9 moduluko 5 tranbia). Tranbia horiek Irunen egiten ari dira, Gasteizko unitate berriekin batera.

Bederatzi moduluko tranbiak, 56 metroko luzera dutenak, 562 bidaiari garraiatzera irits daitezke, munduko luzeenetakoak izanik.

Geralekuak egokitzeaTranbiaren geralekuak unitate berrien ezaugarrietara egokitzeko lanekin jarraitzen du Euskal Trenbide Sareak. Gaur arte, Ibaiondo, Landaberde, Lakuabizkarra, Wellington, Txagorritxu, Euskal Herria, Intermodal, Forondako Atea, Gernikako Arbola, Arriaga, Artapadura, Kristo eta Angulemako geralekuetan amaitu dituzte lanak.

Kañabenta eta Antso Jakituna geralekuetako lanak exekuzioan daude, bietan obra zibila amaituta eta instalazioa falta delarik; Lovainan eta Hondurasen, berriz, obra zibila hasita dago dagoeneko. Azkenik, hurrengo egunetan Abetxuko, Europa eta Legebiltzarra geralekuetan hasiko dira lanak.

 

 

 

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  29 azaroa 2019 13:11

 

Vitoria-Gasteiz Green Deal plana aurkeztu du alkate Gorka Urtaranek

Urtaran mahai-inguru baten protagonista izango da, eta bertan azalduko du hiriaren etorkizunerako plan hori, zeina ekonomia berdean, gizarte kohesioan eta natur ingurunearen babesean oinarritzen baita

Orobat, hiri iberoamerikarren foroan hartuko du parte, espainiar estatuko eta Latinoamerikako beste alkate batzuekin batera, eta Estatu Batuetako lehendakariorde ohiak emango duen hitzaldian

 

Audioa: alkate Gorka Urtaran

VG Green Deal dokumentua

Gasteizko alkate Gorka Urtaranek COP25 Klimaren Gailurraren zenbait jardunalditan hartuko du parte; abenduaren 2tik 13ra arte iraungo du horrek. Irekiera-egunean, mahai-inguru batean parte hartuko du, Estatu Batuetako lehendakariorde ohi Al Goreren fundazioak gonbidaturik. “Vitoria-Gasteiz Green Deal” plana azalduko du foro horretan hiriaren etorkizunera plana, zeina ekonomia berdean, gizarte kohesioan eta natur ingurunearen babesean oinarritzen baita. Ondorengo egunetan, hiri iberoamerikarretako alkateen foroan hartuko du parte, baita Gorek hautatutako entzuleen aurrean emango duen hitzaldian ere.

Gaur goizean aurkeztu du alkateak “Vitoria-Gasteiz Green Deal” plan sortu berria, Salburuko hezeguneak interpretatzeko Ataria zentroan. Datorren astelehenean, aldiz, ordezkari publiko eta pribatuekiko mahai-inguru batean partekatuko du, Nazio Batuek Madrilen antolatutako Klimaren Gailurreko eremu ofizialean (eremu urdina).

Al Gorek sortutako The Climate Reality Project irabazi-asmorik gabeko entitateak antolatu du solasaldia, eta Gasteizko esperientzia izango da aztergai nagusia. Izan ere, fundazio horri arreta eman dio gure hirak ingurumenaren kontserbazioan urratutako bideak, garapen iraunkorraren alorrean nazioarteko erreferente bihurtu baikaitu; orobat, klima aldaketaren kontra abian jarritako ekintzei erreparatu diete, eta “Vitoria-Gasteiz Green Deal” planaren bidez ingurumenarekin, ekonomiarekin eta gizarte politikekin lotutako alderdietan egiten den apustuari. Hiriak klima aldaketaren erronkari egokitzea izango da solasaldiaren hizpide nagusia.

“Dagoeneko lanean hasiak gara, hiri berdetik —joan den irailean mundu mailan halakotzat aitortu gintuzten, Etiopian— ekonomia berdera igarotzeko. Eta proposatzen dudan planak hori lortzeko garatzen ditugun ekimenak bideratuko ditu. Planetak dituen erronkei aurre egiteko irtenbide eta ekimenak erakartzeko plana da, gure hirian garatu daitezen”, azaldu du alkateak. Gorka Urtaranek azpimarratu du oso garrantzitsua dela “VG Green Deal” nazioarteko foro goren horretan aurkeztea, itunaren zutabeetako bat sinbolizatzen duten ordezkariak bildu baitira mahaian: erakundeen, enpresen eta ikerkuntza zentroen arteko lankidetza.

Udal agintariak Euskadiko hiriburuaren hiri-eredua plazaratuko du, eta gaur ezagutarazi duen planaren abiatzea. Hain zuzen ere, Estatu Batuetako biltzarkide gazteen Alexandria Ocasio-Cortez-ek 2019ko otsailean “Green New Deal” izeneko proposamena argitaratu zuelarik urratutako bideari jarraitzen dio: klima aldaketaren kontrako eta eraldaketa ekonomikorako plan handinahi bat, zein mundu osoko pertsona eta erakunde askorentzat erreferente bihurtu baita. Horren haritik, Europako Batzordeko presidente Ursula Von Der Leyenek “European Green Deal” bat aurkeztea proposatu du. Gasteizko lanak ere ildo horri jarraitu nahi dio.

“Klima-aldaketaren ekonomia, ingurumen eta gizarte ondorioak begi bistakoak dira. Lasaitasunez baina irmotasunez lan egiteko unea da, elkarrizketa eta adostasuna baliatuz. Hiriaren aldeko itun bat da Gasteiz Green Deal, hurrengo belaunaldien etorkizunaren aldekoa, baita planetaren aldeko ituna ere. Gure bizi-kalitate handia sendotzeko eta etorkizun ekonomiko eta sozial sendo eta bideragarri baten oinarriak finkatzeko plan bat, akordio zabal eta plurala, ikuspegi askotarikoak baina osagarriak biltzea helburu duena“, adierazi du.

Vitoria-Gasteiz Green Deal plana aurkeztu du alkate Gorka Urtaranek

Beharrezkoa izango den transformazioa prestatzeko Gasteizen gara litezkeen ekintzen bidez gauzatuko da plana, eta horietako batzuek nazioarteko garrantzia lukete. Hiriaren eredu ekonomiko eta sozial berrirako trantsizio “berdea”. “Bat egiten badugu, eta erabakitasunez lan egiten, lor dezakegu aldaketa horietatik hiri hobea ateratzea, puntako zerbitzu publikoekin, ekonomia dinamiko eta modernoarekin eta jarraitu beharreko eredu izaten jarraituko duten azpiegitura berdeekin”, nabarmendu du alkateak.

“Badakigu nola ekin hiri-aldaketa handi bati; gainera, eredu ekonomiko eta industrial sendoa dugu, badakigu zer-nolako balioa duten hitzartzeak eta akordioetara iristeak gauza handiak lortzeko. Horiek dira aurrean dugun erronkarako behar ditugun osagaiak”, argudiatu du. Hainbat alderdi hartu dira aintzat planean: mugikortasun iraunkorra (zeinean berebiziko zeregina baitute oinezko eta bizikleta bidezko mugikortasunak, superetxadiek, autobus elektriko adimentsuak, tranbiak eta Mobility lab-ek), hiri azpiegitura berdeak (bereziki, Eraztun Berdea), izaera industriala (neurri handi batean automobilgintzan oinarritua), logistika (abiadura handiko trena eta Jundizko garapen logistikoa lehen lerroan direla) eta zerbitzu publikoen hobekuntza (garbiketatik hasita hiriaren mantentzeraino, segurtasunetik eta gizarte kohesiotik igarota).

Alor horretan garatzen diren ekintza guztiek hiru jarraibide hauek hartu beharko dituzte kontuan: garapen ekonomiko iraunkorra, gizarte kohesioa eta ingurumen iraunkortasuna. Eta hauek dira lortu nahi diren helburuak: negutegi efektuko gasen isurketa gutxitzea; kalitateko enplegu berriak sortzea; ekintzailetza eta berrikuntza teknologikoa bultzatzea; ekonomia berderanzko trantsizioa; hirian konexio handiagoa izatea ahalbidetuko duten azpiegiturak; trantsizio energetikoa, energia jasangarriak sustatuz; gizarte kohesioa indartzea, eta auzoen arteko oreka.

Gaur alkateak aurkeztu duen agiria proposamen bat da, eta era guztietako entitate eta gizarte eragilerekin eztabaidatu eta aberastuko da. Nolanahi ere, oso konpromiso argiak ditu:

  • Hemendik eta 2030era arte, proiektu eta multzo bat bultzatzea, zein jarduera-plan bateratu batean jasoko baitira, ezarritako helburuei erantzuteko —2020. urtean aurkeztuko da plan hori—.
  • Hartutako konpromisoen jarraipena egiteko eta kontuak emateko lantalde bat sortzea.
  • Horren barruan garatzen diren ekimenak giza baliabidez eta baliabide ekonomikoz hornitzea.
  • Itun horren esparruan hartutako konpromisoak eta egindako aurrerapenak defendatu eta zabaltzea, beste eragile batzuk inplikatzeko eta beste erakunde batzuentzat eredu izan daitezen.

Beste esku-hartze batzuk Klimaren Gailurrean

Klimaren Gailurreko asteleheneko hitzorduaz gain, zeinean “Vitoria-Gasteiz Green Deal” aurkeztuko baitu ofizialki, Urtaranek beste bi ekitalditan hartuko du parte. Abenduaren 7an, hiri iberoamerikarren foroan hartuko du parte, espainiar estatuko eta Latinoamerikako beste alkate batzuekin batera; abenduaren 10ean, berriz, Estatu Batuetako lehendakariorde ohi The Climate Reality Project-en fundatzaile Al Gorek emango duen hitzaldian —bereziki hautatutako entzuleen aurrean hitz egingo du, eta Gasteizko alkatea berariaz gonbidatu dute—.

Alkateorde eta Lurraldearen eta Klimaren aldeko Ekintzaren zinegotzi Ana Oregik ere parte hartuko du Gailurraren zenbait forotan.

 

 

 

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  28 azaroa 2019 15:09

Gizarte-politiken arloko esperientzia berritzaileei buruzko Berrituz Lehen Topaketa izan da Europa jauregian

Gasteizko alkate eta EUDEL Euskadiko Udalen Elkarteko lehendakari Gorka Urtaranek eta Eusko Jaurlaritzako Enpleguaren eta Gizarte Politiketako sailburu Beatriz Artolazabalek gonbita egin diete euskal udalerriei gizarte-zerbitzuen kudeaketa iraunkorrean sustapena eta jardunbide egokiak gidatzen jarrai dezaten, kolektibo guztiei —adinekoak, mendekoak, zaintzaileak, desgaituak, gizarte-bazterketa bizi dutenak eta abar— sarbidea erraztuz. Gizarte-politika lokalen arloko esperientzia berritzaileen inguruan antolatutako Berrituz Lehen Topaketan parte hartu dute Urtaranek eta Artolazabalek, Europa jauregian.

“Berrikuntza, kalitatea eta ezagutzaren kudeaketa funtsezko kontzeptuak dira esku-hartze sozialaren plangintza eta praktika lantzeko. Gizarte-zerbitzuak, jatorriagatik eta ibilbide historikoagatik, ongintzarekin edo premiazko erantzuna behar zuten larrialdi-egoerei arreta ematearekin identifikatu izan dira. Testuinguru horretan, esku hartzea nahikotzat jotzen zen, arazoa konpontzeari zegokionez”, zehaztu du Artolazabalek.

“Gizarte zerbitzuetatik aurre egin behar zaien arrisku berriak ez ahaztea” gomendatu du Artolazabalek. “Eusko Jaurlaritzak ezagutzaren kudeaketa eta berrikuntza soziala bultzatzen ditu, hori baita Euskal Autonomia Erkidegoko Gizarte Zerbitzuen Plan Estrategikoan ezarritako helburuetako bat”.

Gorka Urtaranek, berriz, adierazi du: “Udalak gara Gizarte Zerbitzuen Euskal Sisteman sartzeko atea. Pertsonengandik, haien premietatik hurbil gaudelarik, berritzen ari gara, udaletako gizarte-zerbitzu modernoak  —herritar guztientzat hurbileko erreferenteak izango direnak— sendotzeko. Helburu horrekin, Berrituz programan parte hartzera animatzen ditu EUDELek udalak, jardunbide onak eta esperientzia aitzindariak partekatzeko tresna baliotsua baita”.

berrituz.eus webgunea 2019ko ekainaz geroztik dago erabilgarri. Tokiko gizarte-zerbitzuen esparruko esperientzia interesgarrienak eta dokumentazioa detektatzea, aztertzea, sailkatzea eta zabaltzea du eginkizun. Berrituz Topaketak aldian-aldian egitea da asmoa —lehen edizioa izan da gaurkoa—, interesaturik dauden eragileak biltzeko, esperientzien trukea bultzatzeko eta ikaskuntza kolektiboa ahalbidetzeko.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  19 azaroa 2019 11:47

Gorka Urtaran eta Amaia Barredo

Mugikortasunari buruzko araudi berria Dosierra

Gasteizko alkate Gorka Urtaranek trafikoa arautzen duen ordenantza aldatzen hasteko dekretua sinatu du gaur. Udal gobernuak eguneratu egin nahi du araudia, Gasteizko mugikortasunaren egungo egoerari moldatzeko. “Azken urteetan, bi egoera nabarmengarri sortu dira. Lehena, bizikletaren “booma”, gaur egun hirian egiten diren joan-etorrien % 13 bizikletaz egiten baita. Bigarrena, mugikortasun pertsonaleko ibilgailu (MPI) txikien agerpena, patineteak, esaterako, zeinak batzuetan elektrikoak izaten baitira”, azaldu du Gasteizko alkateak. “Garai berriek eta haziz doan gizartearen eskaerak bultzatu gaituzte hiriko zenbait espazio publikotan oinezkoen, txirrindularien eta ibilgailu berrien arteko erabilera partekatua berraztertzera. Segurtasuna bermatu nahi dugu, eta mugikortasun modu ezberdinen arteko bizikidetza sustatu, kontuan izanik oinezko joan-etorriak ere ugaritu direla, eta horrek pertsona dentsitate handiagoa sortu duela zona jakin batzuetan“, adierazi du Gorka Urtaranek. “Mugikortasun iraunkorra, segurua eta berritzailea sustatzen dugu gure superhiriaren ereduan, Europan erreferentea baita”, azpimarratu du.

Dekretuaren bidez, ordenantza aldakuntzari buruzko aurretiko kontsulta publikorako aldia irekitzen da, zehazki, 15 egun balioduneko epea emango da eragindako pertsona eta erakundeek iritzia ematerik izan dezaten. Lantalde tekniko bat ere osatuko du Udalak, udal proposamena lantzeko. Tokiko Gobernu Batzarrak onetsi beharko du ordenantza-proiektua, eta irizpena dagokion batzordean zein Udalbatzan ere aurkeztuko da, udal taldeei zuzenketak egiteko epea emanda. Udalbatzak onesten duelarik, jendaurrean jarriko da, erreklamazioak aurkezterik izan dadin.

Urtaranen gobernuak hasierako proposamen bat egingo du antzemandako behar nagusiei aurre egiteko: oinezkoen alderdietan ibilgailuak sartzea eta MPIen agerpena. Alkateak eta Mugikortasunaren eta Espazio Publikoaren zinegotzi Amaia Barredok udal gobernuak proposatuko dituen neurrietako batzuk laburtu dituzte prentsaurrekoan.

Bizikletak: Irizpide orokor gisa, txirrindulariek galtzadatik joan beharko dute, eta bizikleta-bideetatik, ingurabidearen barruan*. Salbuespen bakarra 14 urtetik beherakoak izango dira, horiek oinezkoen alderdietatik joan ahalko baitira; hiriaren kanpoaldeko auzoetan ere salbuespena egingo da. Ibilgailu motordunen abiadura orduko 50 kilometrokoa den inguruetan, eta bizikletentzako azpiegitura oraindik nahikoa garatua ez badago,bizikletak oinezkoen alderdietatik ibiltzea baimenduko da.

 

Mugikortasun pertsonaleko ibilgailuak:

-Motorrik ez duten mugikortasun-gailuak: patineteek, skateek… bizikleta-bideetatik zirkulatu beharko dute, 30eko alderdietatik, eta bizitegi-zonatzat seinaleztatuta dauden bideetatik. 14 urtetik beherakoak oinezkoentzako bidetik joan ahalko dira.

-A motako ibilgailuak (motordunak, baina tamaina txikikoak, gehienez 1 x 0.60 metro eta 25 kilokoak, pertsona bakarrarentzat eta balaztatze-sistema dutenak): bizikleta-bideetatik eta 30eko zonetatik joan beharko dute, orduko 20 kilometroko abiaduran, gehienez. Erabiltzaileek 16 urtetik gorakoak izan beharko dute, eta bizikletentzako lekuetan aparkatu. Debekatuta izango dute 50eko zonetatik zirkulatzea. Argiak, txirrina eta islatzaileak eduki beharko dituzte.

-B motako ibilgailuek (motordunak, gehienez 1,90 x 0,80 metro eta 50 kilokoak) galtzadatik baino ezingo dute zirkulatu, orduko 30 kilometroko abiaduran gehienez. Debekatuta izango dute bizikleta-bideetatik eta 50eko zonetatik zirkulatzea. Motorrentzat egokitutako lekuetan aparkatu beharko dute. Argiak, txirrina eta islatzaileak eduki beharko dituzte. 16 urtetik beherakoek debekatuta izango dute erabiltzea.

Horrenbestez, mugikortasun pertsonaleko ibilgailu eta gailuak, oro har, ezingo dira espaloi, parke publiko eta oinezkoen alderdietatik zirkulatu. Hala  ere, bizikleten zirkulazioa baimenduta dagoen ibilbideetatik joan ahalko dira, oinezkoen lehentasuna errespetatuz. 14 urtetik beherakoak espaloi eta oinezkoen alderdietatik ibili ahalko dira zero taldeko mugikortasun-gailuetan (monopatinak edo motorrik gabeko patineteak), oinezkoen abiadura berean eta haiei enbarazu egin gabe.

0 taldeko mugikortasun-gailuetan edo A taldeko ibilgailuetan doazen pertsonek trafikotik fisikoki bereizita dauden bizikleta-bideak edo bidegorriak erabiliko ahalko dituzte.

Oinezkoek lehentasuna duten bizikleta-ibilbideetatik ere joan ahalko dira mugikortasun-gailuak edo A taldeko ibilgailuak, baldin eta dagoen seinaleztapena eta oinezkoen lehentasuna errespetatzen badute eta gehieneko abiadura orduko 10 kilometrokoa bada; gainera, metro bateko segurtasun distantzia gorde beharko dute oinezko bat aurreratu edo gurutzatzean. Oinezkoen multzoak haiek aurreratzea eragozten badu, gidariak ibilgailutik jaitsi beharko du, eta oinez jarraitu.

 

Galtzadak

Zero taldeko patineteak ezingo dira inola ere galtzadatik joan. A taldeko patinete elektrikoek, galtzadatik badoaz, eskuineko erreitik joan beharko dute.

A motako MPIak bizikleta-bideetatik eta galtzadatik zirkulatu ahalko dira. B taldekoak, berriz, bakarrik galtzadatik joan ahalko dira, zirkulazioa berariaz debekatuta duten kaleetan izan ezik. Gehienez orduko 30 kilometroko abiadura hartu ahalko dute, eta ezingo dira zirkulatu garraio publikorako erreserbatutako erreietatik edo autobus-bideetatik.

Alkate Gorka Urtaranek azaldu duenez, araudi berriarekin batera informazio eta kontzientziazio kanpaina egingo da, eta bestelako neurriak ere hartuko dira: bidegorriak luzatzea, trafikoa moteltzea, eta azpiegiturak hobetzea, oro har. Araudi berria ezartzen denean, orobat, zigor kanpaina egingo da. “Araudi berriak bizikletak eta patineteak espaloietatik ateratzea ahalbidetuko du”, laburbildu du Gasteizko alkateak.

* Hiriaren erdialdeko kaleen luzera (garai bateko ingurabidearen barruan): 108.005 metro

Oinezkoentzako kaleak: 23.405 (% 21,6)

20ko kaleak (S28 seinalea): 2.808 (% 2,6)

30eko kaleak (seinaleztatua): 13.098 (% 12,2)

30eko kaleak, ordenantzaren arabera (seinaleztatu gabe): 38.795 (% 35,9)

50eko kaleak: 29.900 (% 27,6)

50eko kaleen luzera ingurabidearen barruan: 29.900 metro

Bidegorria dutenak: 11.000 metro (% 37)

Bidegorririk ez duten 50eko kaleak: 18.900 metro.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  16 urria 2019 14:17

 

 

 

 

 

 

 

Alkateak medikuntzak hiriarekin duen lotura handia nabarmendu du

 

Arabako Medikuen Elkargoak bere egoitza berria inauguratu du gaur eguerdian, Gasteizko Done Jakue hiribideko 7.ean. Elkargoaren lehendakari Kepa Urigoitia pozik agertu da, 120 urte bete dituen honetan erakundeak instalazio berriak erabili ahalko dituelako. Gainera, berriki jakin duenez, Aldundiak  Arabako Urrezko Domina emango dio 2020an.

 

 

 

 

 

 

Inaugurazio-ekitaldian, alkate Gorka Urtaranek hiriak medikuntzarekin duen lotura handia nabarmendu du, eta arloko profesionalen lana eskertu du, “herritarrei gehiago eta hobeto bizitzen” laguntzen baitiete.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  3 urria 2019 11:19

 Hiria nazioarteko erreferente bihurtzeko eta Agenda gasteiztarrean aurrera egiteko lanean diharduela azaldu du Urtaranek udal politikari buruzko eztabaida orokorrean

 

Gorka Urtaran alkatearen audioa

Egonkortasun instituzionala eta konfiantza- eta ziurtasun-giroa sortzeko konpromisoa hartu du Gasteizko alkateak, hiriaren etorkizuneko erronkei aurre egiteko. Hala adierazi du gaur goizean, 2019-2023 agintaldiko udal politikari buruzko aurreneko eztabaida orokorrean. Orobat zehaztu ditu hiria nazioarteko erreferente bihurtzeko eta Agenda gasteiztarrean aurrera egiteko ekintzak. Guztia ere 6 ekintza-ardatz eta 18 ildo estrategiko dituen eta 85 proiektu biltzen dituen gobernu-plan batean oinarrituta, zeinen kontu urtero emango baitu, agintaldi osoan.

Urtaranek gogora ekarri du joan den maiatzaren 26an gasteiztarrek babesa eman ziotela EAJk eta PSEk eratutako gobernuak azken lau urteetan bultzatutako hiri-ereduari. “Gasteiz Europako superhiri gisa berresteko izan behar du agintaldi honek, bizi-kalitatean, lehiakortasun ekonomikoan eta iraunkortasunean nazioarteko erreferente gisa sendotzeko”, adierazi du.

Alkateak gogora ekarri du gobernu-taldea sendotuta dagoela aurreko agintaldiaren aldean, baina gutxiengo izaten jarraitzen duela, eta erabateko erantzukizun politikoz jokatzera behartzen duela horrek. “Adostasuna lortu nahi du gobernu honek gainerako formazio politikoekin, eta lortu beharra dauka. Errespetua, elkarrizketa eta akordioa eskaintzen dizkizuet. Alkatea naizen aldetik —azpimarratu du—, hitz egin eta entzun beharra daukat, oraina hobeto kudeatu eta hiriaren etorkizuna sustatzeko. Horretarako, funtsezkoa da egonkortasun instituzionala, baita ziurtasun-giroa ere, erronkei aurre egiteko konfiantza sortze aldera. 

Udalaren kudeaketa hurbil, fidagarri eta egonkorrean oinarritzen da alkateak eskaini duen eta partekatu nahi duen gobernantza-eredua, esan nahi baita partaidetzan, gardentasunean, kontu-ematean eta datu irekietan.

“Ingurumen-iraunkortasunaren alorrean ez ezik, beste batzuetan ere Gasteiz nazioarteko hiri erreferentea izan dadila lortu nahi dugu, superhiri bat”. Ongi planifikatutako hiri iraunkor, sozialki kohesionatu, ongi komunikatu eta zerbitzu publiko onak eskaintzen dituztenei dagokie kontzeptu hori. European Green Capital bihurtu zuten horiek guztiek Euskadiko hiriburua 2012an, eta Global Green City izendapena ekarri diote 2019an. Horrez gain, garapen iraunkorreko helburuak gehien betetzen dituzten Estatuko udalerrietako bat ere bada.

 

Agenda gasteiztarra

Agenda gasteiztarrean aurrera egiten jarraitzea da udal gobernuaren helburua. Bertan, izan ere, hurrengo lau urteetan ekitea aurreikusten den jarduerak daude bilduta, modu ordenatu eta planifikatuan, hiru helburu nagusiren inguruan: zerbitzu publikoen kalitatea —garbiketa, mugikortasuna, segurtasuna, gizarte-zerbitzuak eta abar—, lehiakortasun ekonomikoa eta ingurumen-iraunkortasuna. Helburu horiek oposizioko alderdiekin partekatzea proposatu du, “hiri garbiagoa izan dezagun, seguruagoa, solidarioagoa, anitza eta plurala, askeagoa eta berdintasunezkoa, hiri-mugikortasunaren sistema on bat izango duena; bertan bizi garenontzat pentsatutako hiria”. Eta erronka garrantzitsu batekin: hiriaren marka berdea ekonomia berdeari lotzea, eta, zehazki, hiri-mugikortasunaren eta automozioaren industria berriari.

Udal Politikaren Eztabaidako Gorka Urtaran alkatearen hitzaldia

 

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  25 iraila 2019 10:42

Goiuri jauregian aurkeztu du Araski taldeak 2019/2020 denboraldirako lehen ekipoa; ekitaldian, Gasteizko alkate Gorka Urtaranekin batera, Udalbatzako eta gainerako erakundeetako ordezkariak izan dira. Gainera, hitz egin dute Araski AESeko presidentea, Iratxe Rodríguez, eta lehen ekipoko kapitaina, Laura Pardo.

Gaur bertan jakin izan da lantalde teknikoaren buru dabilen Made Urieta izendatu dutela joan den denboraldiko Estatuko entrenatzaile hoberen. Horregatik zoriontzeaz gain, Gorka Urtaranek esker ona eman dio klub guztiari, eredu izateagatik, batez ere neska askorentzat, non, eta kirola praktikatzeko eta ikusteko zaletasun handiko hiri batean. “Lehen mailako emakume, kirolari eta pertsonak zarete. Askatasun eta berdintasun erreferentzia bihurtu zarete, emakumeak sarri askotan bigarren leku batera baztertu dituen kirol batean”, gehitu du alkateak.

Duela gutxi Euskal Kopan izandako arrakastaren ostean, datorren igandeko (irailak 29) 11:00etan Araski AES taldeak hasiera emango dio emakumezkoen saskibaloi Ligaren 2019/2020 denboraldiari, Club Polideportivo Bembibreren aurka. Partida hori eta Ligaren lehen jardunaldiko gainerako seiak Zaragozako Siglo XXI pabilioian jokatuko dira. Estreinakoa Mendizorrotzena urriaren 9an izango da, Valencia B.C.-ren aurka, saldutako abonamenduen marka gainditu delarik.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  9 iraila 2019 13:19

Global Green City Award saria lortu du Gasteizek gaur arratsaldean. Nazio Batuen Erakundeak bultzatutako Global Forum on Human Settlements organizazioak ematen du saria, eta erakunde horrek Addis Abeban —Etiopiaren hiriburuan— duen biltzar-etxean egin den zeremonian eman da jakitera. Beste sari batzuen berri ere eman da bertan: ‘global green smart city’ (Country Garden Forest City, Malasia) eta ‘global model of smart city development’ —Udaipur Smart Cityk (India) eta Ekisehir Smart Cityk (Turkia) partekatua—.

Gorka Urtaran alkateak jaso du saria. Gasteizek hiri iraunkorren —jendearentzat pentsatuen— garapenarekin hartutako konpromisoa azpimarratu nahi izan du. “Bizi-kalitate oneko hiriak, ikuspegi ekonomikotik lehiakorrak, ingurumenaren arloan erreferenteak izango direnak”.

Orobat baloratu du alkateak Gasteiz bezalako tamaina ertaineko hiri europar batentzat horrelako sari bat lortzeak zer esan nahi duen. “Hirian garatzen ari garen politikak egokiak direla berresten du sari honek, Nazio Batuen garapen iraunkorreko helburuekin lerrokatuta daudela, baita 2030 Agendarekin ere. Gainera, orain arte ez bezalako nazioarteko proiekzioa dakarkio sariak hiriari, eta ildo hori jorratzen jarraitzeko akuilu izango dugu, hurrengo urteetan aurre egin beharko diegun erronkei heltzeko. Eta, jakina, harro egoteko motiboa ere bada hiriarentzat. Berriro ere erakutsi dugu nabarmentzeko gauza garela, ez Europan bakarrik, baizik eta mundu osoan”, laburtu du alkateak.

Gaur goizean, nazioarteko entzuleen aurrean Gasteizko hiri iraunkorraren eredua azaltzeko baliatu du aukera Gasteizko alkateak: superhiri europarraren eredua, garapen iraunkorreko helburuekin eta 2030 Agendarekin lerrokatua. Aurkezpenak interes handia sortu du beste herrialde batzuetako agintari eta gobernu-ordezkarien artean. “Klima-aldaketaren kontrako borrokarekin, berrikuntza urbanoarekin, trantsizio energetikoarekin, mugikortasun iraunkorrarekin, hiri berdeak —gizakiaren neurrira eginak, haien ongizatea bermatzen dutenak— sortzearekin erabat konprometitutako hiria da gurea”, xehatu du.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  6 iraila 2019 12:23

Global Green City Award sarirako Arabako hiriburuaren hautagaitza aldeztu du Gasteizko alkate Gorka Urtaranek gaur goizean. Global Forum on Human Settlements erakundeak ematen du saria, Nazio Batuen laguntzarekin. Gaur arratsaldean emango dute jakitera epaimahaiaren erabakia antolatzaileek, Nazio Batuek Addis Abeban —Etiopiako hiriburua— duten biltzar-etxean izango den ekitaldian. 14th Global Forum on Human Settlements biltzarraren barruko ekimen bat da. 52 herrialdetako 500 lagunetik gora ari dira bertan parte hartzen.

Nazioarteko entzuleen aurrean Gasteizko ingurumen-eredua azaltzeko baliatu du aukera Gasteizko alkateak: superhiri europarraren eredua, garapen iraunkorreko helburuekin eta 2030 Agendarekin lerrokatua. Gure hiriaren irudi eta bideoekin lagundutako aurkezpenak interes handia sortu du beste herrialde batzuetako agintari eta gobernu-ordezkarien artean. “Klima-aldaketaren kontrako borrokarekin, berrikuntza urbanoarekin, trantsizio energetikoarekin, mugikortasun iraunkorrarekin, hiri berdeak —gizakiaren neurrira eginak, haien ongizatea bermatzen dutenak— sortzearekin erabat konprometitutako hiria da gurea”, laburbildu du alkateak.

 

Horrela, Gasteizen iraunkortasun hirukoitza lortze aldera garatutako politikak nabarmendu ditu Gorka Urtaranek: “ingurumenaren, gizartearen nahiz ekonomiaren arlokoa”, xehatu du. Orobat azpimarratu ditu, bere mintzaldian, zenbait estrategia arrakastatsu, hala nola Udalak bultzatutako Mugikortasunaren eta Espazio Publikoaren Plana, hiriko hirigintza-plangintza, espazio hondatuen berreskurapena eta Eraztun Berdearen sorkuntza, baita ekonomiaren eta desberdintasunen kontrako borrokaren arloko neurriak ere. Zentzu horretan, industriak Gasteizko ekonomian duen pisu espezifikoa ere nabarmendu du, haren eraldaketa azpimarratuz, eta 4.0 industriaren eredurako bilakaera.

Gainera, nazioarteko biltzar horretan ‘Global Green City Award’ saria eskuratzeko itxaropena du Gasteizek. Gaur arratsaldean bertan —17:30ean hasiko den ekitaldian— emango du sari horretako ebaluazio-batzordeak bere erabakiaren berri.

NBEren garapen iraunkorrari buruzko agenda tokiko mailan sustatzeko balio du foro horrek, eta hirietako eta hiri-kokalekuetako baldintzak hobetzea du azken helburutzat. Besteak beste, hiri iraunkorrak neurtzeko sistemak garatzen dira, arduradun politikoei eta industriei erreferentziak emateko txostenak lantzen, eta Sustainable Cities and Human Settlements Awards sariak sustatzen. Aitorpen horien bidez gobernu, enpresa, komunitate, antolakunde eta banakoen lorpen gailenak nabarmendu nahi dituzte. Global Green City da sari horietako bat.

Gasteizek aurkeztutako hautagaitza balioetsiko duen batzordeak 85 adierazle aztertuko ditu, sei atal nagusitan: iraunkortasuna, ekitatea, identitatea, segurtasuna, oparotasuna eta zoriona. Sei multzo handi horien barruan 18 kategoria sartzen dira, askotarikoak eta zeharkakoak: mugikortasun jasangarria, energia-eraginkortasuna, ‘smart city’, ‘zero waste’, espazio publikorako politikak, lurraldearen erabilera jasangarria, ura, ingurumena, oinarrizko zerbitzuak, lurralde garapen jasangarria, ekonomia zirkularra, nekazaritzako elikagaien estrategia, gobernantza, berrikuntza, ondarearen babesa… Aurreko edizioetan saria eskuratu duten hirien artean hauek daude, besteak beste: Viena (Austria); Vancouver (Kanada); Oakland (AEB); Curitiba (Brasil); Nantes (Frantzia); Mannheim (Alemania); Yokohama (Japonia).

 

Share
Kategoriak: Sailkatu gabea  —  Etiketak: , ,   —  Komunikazio Zerbitzua / Servicio de Comunicación  —  24 uztaila 2019 12:24

Alkate Gorka Urtaranek eta Kultura zinegotzi Estíbaliz Cantok Andre Maria Zuriaren Kofradiaren ordezkari batzuk —Ricardo Sáez de Heredia abadea buru zutela— hartu dituzte gaur goizean udaletxean.

Urtero bezala, alkatea eta Kultura arduradunak Gasteizko jaien aurreko bilera egin dute kofradiako kideekin. Izan ere, talde horrek Andre Maria Zuriaren ohorezko hainbat ekintzatan parte hartzen du, eta horietako batzuek jendetza handia biltzen dute, hala nola Farolen Prozesioa eta Egunsentiko Arrosarioa .

Abadeak kofradiak argitaratzen duen “La hornacina” aldizkariaren ale bat eman die Gorka Urtaran eta Estibaliz Cantori; alkatearen agurraz gain, Txema Blasco aktore gasteiztarraren deskribapena, 5. Misterio Pozgarriaren garraiolariei buruzko erreportajea, Andre Maria Zuriaren koroei buruzko informazio osoa eta abar barne hartzen ditu aurtengo aldizkariak.

Share

Aurrekoak »