Prentsa Oharren banner
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  28 martxoa 2019 09:50

Salburua auzoko zenbait banbu-parterreren lekuan soropila jarriko du Udalak, eta bideak egingo ditu beste batzuetan, garbiketa errazteko. Auzotarrek eskatutako esku-hartzea da. Espazio sarri horiek desagerraraztea da proiektuaren azken helburua, ingurune horretako mantentze-lanak errazago gerta daitezen. Izan ere, karraskari txikiak ikusi izan dira bertan. Gaur goizean bertan esleitu dio Enviser enpresari Tokiko Gobernu Batzarrak lan horiek egiteko kontratua, 188.288,48 euroko inbertsioarekin.

“Hogeita hiru lekutan jarriko da soropila banbuaren ordez. Beste hemeretzi lekutan, berriz, bide txikiak egingo dira parterreen barruan. Inguru hori hobetu egingo da, esku-hartze honi esker. Bizilagunek orain dela denbora asko eskatutako ekimena da. Orain behar bezalako erantzuna emango diegu”, azaldu du Gorka Urtaran alkateak.

Zehazki, Berlingo ibilbidean, Viena kalean, Atenas ibilbidean eta Estrasburgo ibilbidean egingo dira Hiri Paisaiaren Atalak diseinatutako lan horiek. Azken horretan, hogeita hiru parterre daude, eta belarra jarriko da haien ordez. Aurrekoetan, funtsean, zatitu egingo dira espazioak, eta 1,2 metro zabaleko bideak egingo, mantentze-lanak errazte aldera. Berlingo ibilbideko sei parterretan esku hartuko da, Viena kaleko bostetan eta Atenas ibilbideko zortzitan.

Estrasburgo ibilbideko lanak gauzatzeko epea bi hilabetekoa izango da. Gainerako lanak egiteko epea, berriz, hiru hilabetekoa.

DOSSIERRA

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  4 martxoa 2019 12:54


 

  • Erakundeek bulego bat eta enpresa sektoreari laguntzeko web orri bat jarriko dute abian, industria lizentziak eta aholkularitza eskuratzeko.

 

 

Gasteizko Udalak, Arabako Foru Aldundiak eta Eusko Jaurlaritzak, Arabako Enpresarien Elkartearekin (SEA) lankidetzan, abian jarriko dute SmartEkin, Arabara etorri nahi duten enpresei edo kokaturik egon arren negozioa garatu nahi duten enpresei izapideak egiten laguntzeko bulegoa. Mahai gainean denbora luzez dugun eskaera bat izan da izapide burokratikoak arintzea eta, batez ere, industria kokapenak Garate eta handitzeari buruz ari garenean. Baina eskaera horrek ez du indarrik galdu, alderantziz, izapideak gero eta konplexuagoak dira eta gero eta premiazkoagoa da arazo horri aurre egitea.

SmartEkin programaren bidez bulego bat jarriko da abian, industria enpresei laguntza emateko instalazio berrietarako lizentziak eskuratzeko izapideak egiten. Horren bidez, erakundeek hainbat helburu lortzeko asmoa dute: erantzuteko epeen kontrol zehatza eta dokumentatua egitea, enpresariei era eraginkorrean laguntzeko eskatzen zaizkien legezko eta zentzuzko epeak betetzen; identifikatzea zein arlotan, sailetan edo ataletan eskatzen den ahalegin berezia edo horietako zeinetan ikusten den lamen handiagoa prozedurak eta prozesuak hobetzeko; eta, horretarako guztirako, ezinbesteko baldintza izango da ziurtatzea enpresek baldintzak betetzen dituztela eta lizentzia proiektuak aurkezten dituztela baldintza tekniko arrazoizkoetan, legezkoa eskakizunak betez.

Erakundeek, kezka hau zuten beste erakunde pribatu batzuekin batera, arazo horren espediente adierazgarri batzuen bilakaera berrikusi dute. Lanaren ondorioak deigarriak dira. Kasu batzuetan, pare bat hilabetean ebatzita egon behar zuten prozedura batzuk luzatu egin dira eta bi urte gainditu dituzte. Batez beste, espedienteak osorik amaitutzat emateko, legez aurreikusitako epeen halako 2,5 behar izan dute.

“Uste dugu gure etorkizunaren zati handi bat dugula jokoan industriarako Araba lurralde erakargarria izateko ditugun gaitasunak garatzea lortzeko eginkizun horretan; izan ere, legealdi honetan etengabea izan da gure ekipoak izan duen kezka horrelako izapide burokratikoak arintzeko ahaleginak egiteari dagokionez. Horretarako, politikak eta prozedurak hobetzeko edo kasuan kasuko zerbitzuak baliabide gehiagoz hornitzeko ahalegin handiak egin dira antolamendu aldetik. Halaber, esku hartze zehatzak egin dira elkarguneak bilatzeko eta impasse egoeran zeuden espedienteak arintzea errazteko”, adierazi du Ramiro González diputatu nagusiak.

Bulego hori Araba Garapen Agentziak jarriko du abian, talde tekniko espezializatuekin lankidetzan. Arabako enpresak SEAra hurbiltzera animatu nahi ditugu, gure zerbitzu berriaren xehetasunak eman diezazkiegun eta horretarako gaitu den web orrian izena eman dezaten (www.smartekin.eus). Zuhurtzia eta eraginkortasunagatik, programa hau industria enpresetara bideratu da hasiera batean, eta duen bilakaeraren arabera, gainerako jarduera ekonomikoetara zabaldu ahal izango da.

“Neurri handi batean, Gasteizen etorkizuna industriaren menpe dago. Sektore gakoa da, eta Europako Hiriburu Berde bihurtu gaituen iraunkortasun integralaren ikuspuntutik izan dadin egiten dugu apustu, hau da, ingurumena, gizartea eta ekonomia kontuan hartuz. Hori oinarritzat dugula, ahalik eta industria-jarduera mota zabalena ezartzen lagundu nahi dugu, baina jarduera horiek gizartearen eta ingurumenaren ikuspuntutik jasangarriak izatea nahi dugu, alegia, ingurunea errespetatu dezaten eta arriskuen prebentzioaren alorrean jardunbide egokienak ezar ditzaten; enpresek eta administrazioek hobeto koordinatzea eskatzen du horrek”, erantsi du Gasteizko alkate Gorka Urtaranek. “Badugu tresnarik horretarako, esate baterako, Industriaren Mahaia, non Gasteizko enpresa nagusiek beren proposamenak helarazten baitizkigute. Gainera, Hirigintza Sailaren eta Ingurumen Sailaren bitartez, ekimen berriak garatzen ari gara prozedurak hobetzeko eta antolakuntza konponbideak bilatzeko, prozesuak azkarragoak eta gardenagoak izan daitezen, administrazio-bidean sor daitezkeen buxadurak identifikatuz”.

“Gure iritziz, Araba eta Gasteiz industria garapenerako lurralde erakargarri eta lehiakor egin nahi baditugu, gaurkoa adibide ona da gauzak nola egin behar diren erakusteko: arazoei aurre eginez, errazak ez diren arren, eta denek bere gain hartuz asmo handiko programa berritzaile bat taxutzeak eta abian jartzeak dakarren arriskua, lankidetzan, talde lanean eta gardentasunez jardunez”, azaldu du Pascal Gómez SEAko lehendakariak.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  1 martxoa 2019 13:44

 

Gasteizko alkate Gorka Urtaranek iragarri du taxi elektrikoak erosteko laguntzen bigarren edizioa deituko duela Udalak laster. 2018an atera zuen Gasteizko Udalak helburu horretako lehen laguntza-sorta. Oso harrera ona izan zuen taxilari gasteiztarren artean, eta sei taxi erosteko finantzaketa banatu zen, 10.000 euro ibilgailu bakoitzeko. Sei taxi elektrikoak hirian zehar dabiltza dagoeneko. Aurtengo deialdiari dagokionez, Tokiko Gobernu Batzarrak gaur goizean onetsi du laguntza horien ebazpena.

Udalak ibilgailu elektrikoei bultzada emateko antolatu duen ekitaldi batean iragarri du alkateak laguntza horren bigarren edizioa egingo dela. Ekitaldian, Gasteizko udalburuak Udalak gaur egun dituen sei ibilgailu elektrikoak eta aipatu berri dugun laguntzari esker erositako sei taxi elektrikoak zituen inguruan. Gaur egun, TUVISAk Renault Zoe bat eta Renault Twizy bat ditu; IGIk bi Peugeot Partner elektriko, eta Atezaintza Zerbitzukoek Nissan E-NV200 modeloko bi furgoneta eskuratu dituzte berriki. Asociación Alavesa del Taxi (ALATAX) elkarteak ere bere ibilgailuak aurkeztu ditu: bost Hyundai Ioniq EV eta Nissan Leaf bat.

Gorka Urtaranek azpimarratu duenez, “Gasteiz apustu handia ari da egiten garraiobideak elektriko bihurtzeko. Horretarako, garrantzitsua da tranbia luzatzea eta autobus elektriko adimentsuak ezartzea, baina baita gure flotan zero emisioko ibilgailu elektrikoak sartzea eta garraio publikoan ezinbesteko papera duten taxilariei beren autoak modernizatzen laguntzea ere”.

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  28 otsaila 2019 14:02

 

 

 

 

 

 

 Alkateak nabarmendu du “herritarrek dagoeneko bere egin” dutela “espazioa”

Fruta eta barazki azoka pergolaren azpian egin da lehenengoz

Casto Solanok ‘Oreka’ eskultura-multzoak Salburuko hezeguneekin duen harremana azpimarratu du

 Gorka Urtaran alkatearen adierazpenak

Gasteizko alkate Gorka Urtaran buru zela egin da erakundeen bisita gaur goizean Santa Barbara plaza eta inguru eraberrituetara. Lanek 6,7 milioi euroko inbertsioa izan dute, eta horretaz gain milioi eta erdi euro erabili da aparkalekuaren egiturazko arazoak konpontzeko. “Kaleak eta auzoak hobetzearren ari gara lanean, atseginago, modernoago eta erakargarriago izan daitezen. Santa Barbara plazaren kasuan, herritarren eskaerei erantzun diegu berriro ere. Lanak bukatu direlarik, bizitzaz beteriko lekua dugu, herritarrek dagoeneko bere egin duten espazioa, eta inguruko merkataritza eta ostalaritza dinamizatzen lagunduko duena“, nabarmendu du Gorka Urtaranek.

Casto Solano artistak ere hartu du parte erakundeen bisitan, ‘Oreka’ eskultura-multzoa ezagutarazteko; orobat izan dira bertan udal teknikariak, inguruko merkatari eta ostalarien ordezkariak, eta eraikuntza egin duen ABEE osatu duten Ferrovial, Agroman eta Onandia enpresen arduradunak. Gainera, frutak eta barazkien azokako ekoizleek kokaleku berria estreinatu dute, 80 metro luze den pergolaren azpian.

Santa Barbara plaza eraberritzeko lanak 2017ko urrian hasi ziren, eta aurreikusitako epeak beteta bukatu dira. Esku-hartzearen diseinua lantzeko prozesua luzea izan zen; udal gobernuak, Ingurumenaren eta Espazio Publikoaren Sailak eta Enpleguaren eta Garapen Ekonomiko Iraunkorraren Sailak hainbat bilera egin zituzten inplikatutako talde eta eragileekin —auzokoak, merkatariak, Gasteiz On, ostegun eta larunbatetako azokako ekoizleak, Azoka plaza—, proiektua zehazteko.

 

 

 

 

 

Urtaranen gobernuaren helburu nagusia espazio publiko bat, Santa Barbara plaza, hiriarentzat berreskuratzea izan da, zati batean oinezkoentzat izango den super-etxadi moderno, funtzional eta atseginagoa sortuz. Gainera, inguruan trafikoa hobetzeko neurriak hartu dira, eta alderdi osoa biziberritu da, ekonomia- eta merkataritza-berpizteari bultzada ematearren, alkateak iragarritako ‘erdialdeko masterplana’ ekimeneko esku-hartze guztien ildo beretik. Santa Barbara plazaren irudi berriaren alderdi deigarrienetako bat Posta kaleko aldean jarritako pergola da: 80 metro luze den egitura funtzionala, 36 saltoki jartzeko lekuarekin; hain zuzen ere, gaur erabili dira horiek estrainekoz.

Lehengo plazak labirinto itxura zuen, espazio txiki ugari eta oso zatikatuak baitzituen, parterreak zirela eta. Horretaz gain, ingurunetik isolatuta zegoen, eta irisgarritasun zailekoa zen, diseinuaren eraginez. Hori zela eta, espazioa duintzea bilatu zen, oinezkoen igarobidea errazteko, parterreak kenduz eta oraingoa baino espazio zabalagoa sortuz, eta aldi berean, landare gehienak utzita.

 

 

 

 

 

 

 

 

Oinezkoentzako ibilbideak

Posta eta Bake kaleen arteko bidegurutzean pasabide goratua eraiki da, Posta kaletik Leizaola plazaraino doan oinezkoentzako ardatz luzeari jarraipena emanez eta Gasteizko Zabalguneko bost plaza lotuz: Andre Maria Zuriaren plaza, Espainia plaza, Foru plaza, Santa Barbara plaza eta Leizaola plaza. Bestetik, nabarmen zabaldu dira Urriaren Hamabiaren kaleko espaloiak, eta Azoka plazako zamalanetarako ibilgailuak baino ezin dira bertatik igaro.

Leizaola Lehendakariaren plazan altzariak berritu dira, eta kendu egin da Santa Barbaratik hurbilen zegoen parterrea, pertsonen joan-etorria eragozten baitzuen. Horretaz gain, txorkoak handitu egin dira, eta argiztapena berritu.

 

 

 

 

 

 

Hiru pieza berde handi

Udalak hiru multzo handitara murriztu ditu parterreak, labirinto itxurako trazatuaren barruko korridoreak kenduta. Mendebaldean, El Corte Inglésetik hurbilen dagoen aldean,  landare mediterraneoen zerrendak dituen berdegune bat sortu da;  lehendik zeuden altzifre ikusgarriak eta balio handiko araukaria bat utzi dira bertan. Zurezko eserleku luze bat ere jarri da, ur-zurrustez hornitutako urmael baten inguruan.

Ekialdean ere eserleku luzea duen beste berdegune bat osatu da, eta haurrentzako jolasgune handia jarri da, kautxuzko zoru baten gainean. Hirugarren berdegunea, berriz, Azoka plazatik gertueneko eremuan jarri da; arteak eta balio handia duen hagina daude bertan.

 

Pergola eta azokak

Plazaren iparraldean, Posta kalearen ondoan, pergola handi bat jarri da, 10 metro zabal eta 80 metro luze dena. Egitura horrek ostegun eta larunbatetako azokak hartuko ditu; eremu estali hori haurrentzako jolasgunearen osagarria izango da, halaber.

Azoka plazaren aldean, Santa Barbara plazara ematen duen irteera berria egokitu da, eskailerez eta arrapalaz osatua: horrek mahaitxoak jartzeko aukera emango die gastrotabernei, eta Santa Barbaratik Azoka plazara sartzea erraztuko.

 

Aparkalekua, argiztapena eta saneamendua

Udalak osorik eraberritu du lurpeko aparkalekua, Eraikuntzaren Kode Teknikoaren betekizunei egokitzearren, eta airea kanporatzeko sistemak berritu eta suteen kontrako segurtasuna hobetu dira. Aparkalekuaren irisgarritasuna ere hobetu da. Erabiltzaileentzako sarbideak bikoiztu egin dira,  bitik laura (horietako bitan igogailua dago). Aparkalekura sartu eta bertatik irteteko “etxolek”, bestalde, aireztatzeko eta airea kanporatzeko balio dute.

Gasteizen egiten ari diren beste obra garrantzitsuetan bezala, Udalak inguruneko argiztapena hobetzeko baliatu du aukera, oraingo argien ordez led teknologia instalatuz, eta AMVISAren saneamendu eta hornikuntza sarea ere berritu ditu.

Argazki +

Bisitako argazkiak

Laneko timelapsea

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  27 otsaila 2019 11:15

 

 

 

 

 

 

Bizi-kalitatea bermatzea eta ongizatea hobetzea direla bere helburuak esan du alkateak Europa Forumean

Gorka Urtaran alkatearen adierazpenak

Gasteizko alkate Gorka Urtaranek Europa Forumean hartu du parte gaur goizean, Bilbon; hark nabarmendu duenez, erakunde egonkortasuna, etorkizun ekonomikoaren bermea eta superhiri izaera dira gaur egungo Euskadiko hiriburuaren ezaugarri nagusiak. Urtarenek udal agintaldiaren laburpena egin du, eta bere helburua bizi-kalitatea hobetzea eta ongizatea alor guztietan hobetzea dela adierazi du.

“Gasteiz bezalako hiri bat kudeatu eta gidatzea ardura handia bezain erakargarria da. Argi dut alkatearen zeregina entzutea dela, hiriaren oraina hobeto kudeatzeko eta etorkizuna sustatzeko”. Hitz horiekin eman dio hasiera alor guztietako ia 300 entzuleren aurrean egin duen mintzaldiari. Agintaldian beretzat garrantzi berezia izan duten hiru ideia azaldu ditu alkateak.

Lehena, erronkei aurre egiteko behar den erakunde egonkortasuna. “Egonkortasun hori lortzeko, funtsezkoa da ingurune fidagarria, egonkorra eta konfiantza ematen duena bermatzea”, azaldu du Gorka Urtaranek; aldi berean, Udalaren egunerokoa kudeatzean bizi izandako zailtasunak gogoratu ditu. Esate baterako, garbiketa eta hondakinen kudeaketaren zerbitzuan izandako greba mehatxuak, elkarrizketaren bidez gainditu zirenak, zorionez; aurreko gobernuak utzitako zorra eta zulo ekonomikoa, gaur egun bideratuta daudenak, eta aurrekontua blokeatzeko saiakerak, konfiantza-arazoa aurkeztuz gainditu zuena.

 

 

 

 

 

Horien aurrean, erakundeen arteko akordioek hainbat lorpen ekarri dituzte: hiriburutza kanona handitzea, mugikortasun iraunkorreko inbertsioak, trenbidea lurperatzea eta abiadura handiaren etorrera, Biktimen Oroimenezko Zentroaren ingurunea eraberritzea, Koroatzearen auzoaren birgaitze integrala, auzoetako inbertsioak, hezkuntza eta osasun azpiegitura berriak, Forondaren gorakada, etab. “Hainbat instantziatan akordio horiek lortzeko, elkarrizketa, ulermen eta akordio giroa sortzea izan da nire lehentasuna. Konfiantza sortzea, estrategia eta proiektuak partekatzeko. Hiriak horren beharra zuen, eta beharra izaten jarraitzen du”, erantsi du.

Alkateak plazaratutako bigarren ideia etorkizun ekonomikoa bermatzearen garrantzia da. “Argi dut —azpimarratu du— Gasteizen etorkizuna gure industriaren etorkizunaren mende egongo dela neurri handi batean. Izan ere, sektore horrek sortzen du gure hiriaren barne produktu gordinaren % 26tik gora. Etorkizuneko industria gaikuntza, ekintzailetza, teknologia, berrikuntza eta kanpoko merkatuetara zabaltzea da. Gure industriari lagundu behar diogu, eta 4.0 ereduranzko trantsizioa bideratu. Argi dut politikak eta ekonomiak eskutik helduta joan behar dutela, eta halaxe egiten ari gara”.

Hirugarren ideia Gasteiz superhiria bihurtzea da; Europan tamaina ertaineko hiriak izendatzeko sortutako kontzeptua da hori. “Superhiriak dira tamaina horrekin bikaintasun, bizi-kalitate, zerbitzu eta aukera paregabeak dituztelako. Hiri ongi planifikatuak dira, iraunkorrak, sozialki kohesionatuak, ongi komunikatuak, eta zerbitzu publiko onak dituztenak. Eta geuk osagai guztiak ditugu hori izateko eta izaten jarraitzeko”, azaldu du.

Helburu hori lortzen laguntzeko, 2025 Estrategia izeneko proiektua landu du udal gobernuak. Estrategia hori “Gasteizen indarguneetan oinarrituta dago, ideologien gainetik identifikatzen eta batzen gaituen horretan: gure kokapen estrategikoa, gure logistika eta industria potentziala, gure izaera berdea eta iraunkorra —nazioartean aitortua— eta gure bizi-kalitatea. Horrekin guztiarekin, herritarrengan harrotasuna pizten duten proiektuak garatzen jarraitzen dugu”.

Urtaranek esan du Eusko Jaurlaritzaren, Aldundiaren eta Udalaren arteko adostasunean aurkitu duela gakoa. Hark deskribatu duenez, “Gasteiz hiri erakargarria bihurtzeko lankidetza espiritua, goi mailako ekitaldien bitartez distira egiten duen hiria, kanpoan superhiri gisa agerrarazten baikaituzte”.

Laburbilduz, “agintaldi hau etorkizunaren aldeko akordioena” izan dela eman du aditzera, eta horren adibidetzat kanpoaldearekin konektatuta eta barnetik komunikatuta izan dadin lortutako akordioak aipatu ditu. “Forondako aireportua hegaldatzea lortu dugu. Abiadura handiko trena lurpetik iristea definitu dugu, eta geltoki berria onetsi. Hiriaren erdialdea biziberritzeko plana sustatu dugu. Tranbiaren luzapena abian jarri dugu. Autobus azkar elektrikoaren alorrean Europan aitzindari bihurtzekotan gara”, azpimarratu du.

Bukatzeko, gehitu du: “hauxe da gure eredua. Eredu honetan, axola duena ez da tamaina, hiri baldintzak, zerbitzuak, bizi-kalitatea eta aukerak baizik. Ingurumenarekiko eta kulturarekiko konpromisoak, iraunkortasunak, industriaren apustuak eta etorkizun ekonomikoak axola dute”.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  25 otsaila 2019 12:54

 

Gasteizko Udalak eta Jundizko Enpresaburuen Elkarteak aplikazio mugikor berri bat aurkeztu dute. Horren bidez, udalerriko industrialde nagusiaren inguruko gaiei buruzko berehalako informazioa lortu ahalko da. Albisteak, agenda konpleto bat, enpresen direktorio bat, mapa interaktibo bat, intereseko zerbitzuak eta trafikoaren eta Jundizera heltzearekin zerikusia duten utilitateak; horra hor industrialdearen promozioa eta komunikazioa sustatzeko diseinatu den tresnaren ezaugarri nagusiak.

Gorka Urtaran alkateak nabarmendu du aplikazio mugikor berriak Udalak legealdiaren hasieran martxan jarri zuen Industriari Laguntzeko Planaren ardatzetako bat duela xede: poligonoko azpiegiturak modernizatu eta sustatzea, 4.0 industriari arreta berezia jarrita. “Enpresen arteko komunikazio hobetzeko teknologia berriak baliatzea eta enpresa-alorrean gako diren eragileekin elkarlanean aritzea dira Industria Planean ezarri genituen helburuetako bi, eta gaur aurkeztutakoa beste urrats bat da helburu horiek konplitzeko bidean”, adierazi du udalburuak.

Bestalde, Jundizeko Enpresaburuen Elkarteko lehendakari Javier Sáenz-ek azpimarratu du aplikazio berriaren tankerako tresnek elkartearen xede nagusietako bati erantzuteko balio dutela: parkearen jarduera handitzeko eta elkartekideei eta bisitariei zerbitzu profesionala eta kalitatezkoa eskaintzeko, alegia. Eta hori guztia, komunikazioa, digitalizazioa eta mugikortasun iraunkorra oinarri dituen politika berriaren barruan kokatuta. “Tresna eraginkor eta praktiko honek abangoardiara darama elkartea, azken horren eta elkartekideen arteko komunikazioa errazteaz gain, langile eta bisitariekikoa ere errazten baititu, eta, hala, industrialdean egunean-egunean sortzen diren egoerei berehalako erantzuna emateko aukera eskaintzen baitigu”, adierazi du Sáenz-ek.

Aplikazioa eskuragai dago dagoeneko Android gailuentzat, eta laster deskargatu ahalko dute iPhone erabiltzaileek. Honako funtzionalitate hauek dakartza:

 

  • Gertakarien eta gainera intereseko gaien inguruko jakinarazpenak
  • Erabiltzaileen arteko komunikazio zuzena
  • Networking-a
  • Partekatu zure autoa
  • Enpresa eta zerbitzuei buruzko informazioa
  • Berriak eta ekitaldiak
  • Elkartekide bihurtzeko gunea

Gasteizko Udalaren eta Jundizko Enpresaburuen Elkartearen arteko hitzarmenak 8.000 euroko zuzkidura du, eta horri esker sortu ahal izan dira bai aplikazio mugikorra bai elkartearen webgune korporatibo berria, zeinak Jundizeko industrialdearen promozioa egiteko balioko duen, bestak beste.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  19 otsaila 2019 10:17

Balgorza enpresa arduratuko da lanez; bidegorri bat sortuko da, espaloiak zabalduko, galtzada konponduko eta hogei zuhaitz landatuko

Eserleku berriak ere jarriko dira, eta argiteria-, saneamendu- eta drainatze-sareak hobetuko

Urtaranen gobernuak 581.033,45 euro inbertituko ditu Peru kalea eta ingurunea eraberritzeko; lau hilabetetan gauzatu beharko dira lanak. Ingurumenaren eta Espazio Publikoaren Sailak diseinatutako lanak aste honetan bertan hasi ditu Balgorza enpresak.  Lanek Costa Rica kalea ere hartuko dute barne. Kontratuaren lehia-oinarria 780.434,44 euro zen, eta enpresak % 25,55eko beherapena eskaini du enpresak.

Peru kalea (Pilar auzoan) ezerosoa da, eta hainbat arazo ditu: galtzadak hondatuta daude, espaloiak estuak dira, eta zoladura egoera txarrean dago. Auzotarrekin adostutako esku-hartzeari esker, oinezkoentzako lekua irabaziko da, eta espazioa modernizatuko. Orobat, bidegorri bat sortuko da, zirkulazioaren abiadura motelduko, eta ibilgailu motordunentzako erreiak murriztuko. “Obra honi esker kalea hobetzen dugu, atseginagoa eta erakargarriagoa egiteko. Hiritarrekin agindutakoa betetzen dugu, baita auzoekin ere, eta gainera auzoetatik egiten dizkiguten eskaerei erantzuna ematen diegu”, azaldu du alkate Gorka Urtaranek.

Gobernu taldeak sustatutako eraberritzeak hainbat jarduera-eremu izango ditu. Peru kalearen iparraldean, espaloia metrotik gora zabalduko da, zirkulazio-errei bat kenduta. Espaloia zabalduko denez, hamalau zuhaitz landatuko dira —garatzeko nahikoa leku izango baitute— eta lau eserleku berri jarriko dira. Aparkalekuen kopurua ia ez da aldatuko, baina espaloia zabaldu behar denez, hegoalderantz mugituko dira. Ondo-ondoan bidegorri bat margotuko da, Domingo Beltran de Otazu kaletik Arriagako ateraino, ibilgailu motordunen kontrako noranzkoan. Costa Rica kalearekiko bidegurutzera iristean, bizikletek autoen erreitik joan behar dute, “30eko zona” izango baita.

Peru kalearen hegoaldeko espaloian, berriz, bost eserleku berri jarriko dira. Bateriako aparkalekuak lineako bihurtuko dira. Izan ere, alde horretan bizilekuetako eraikinen fatxadak eta atariak daude, eta baterian aparkatutako ibilgailuek enbarazu handiagoa egiten zuten. Arriagako atearen ondoko zatian zamalanetarako lekuak utziko dira. Peru kalearen erdialdean, bestetik, oinezkoen pasabidea sortuko da, edukiontzien irla dagoen lekuan. Ohikoa denez, Udalak argiteria-, saneamendu- eta drainatze-sarea hobetzeko baliatuko ditu lanak.

 

 

Costa Rica kalean, berriz, esku-hartze soilagoa egingo da, duela hamar urte ere egin baitziren lanak. Divino Maestro ikastetxearen ondoko espaloia metro inguru zabalduko da, eta sei zuhaitz landatuko. Trafiko errei bat ere kenduko da, eta bertan bidegorria margotuko da, Peru kaletik Arriagako Kofradiaren kaleraino.

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  15 otsaila 2019 11:03

 

 

 

 

 

 

Alkateak marka berria aurkeztu eta iragarri du jarduera-egutegi bat sortu dutela “gure taldeekiko dugun harrotasuna eta hiriak kirol-balio positiboekin duen lotura erakusteko”  

Igandean hasiko dute adin guztietako zaletuek datorren hilabeteetan hirian gertatuko diren bi txapelketa handietarako atzera kontaketa: Erreginaren Kopa eta Lauko Finala

Gasteizek saskibaloiarekiko duen grina erakusteko aukera izango du datorren hilabeteetan, alkateak gaur aurkeztu duen “Vitoria-Gasteiz Basket Capital 2019” kanpainan programatutako hiri-ekintzen bidez.  Izan ere, 2019an, hiriko talde nagusien ohiko norgehiagokez gain, beste bi kirol-hitzordu garrantzitsuren egoitza izango da Gasteiz: Erreginaren Kopa eta Euroligako Lauko Finala.

“Hainbat ekintza hari gara antolatzen kirol norgehiagoka horiek hirian izango duten eragina indartzeko, ez soilik tokiko ekonomian eta turismoaren eta ostalaritzaren sektorean eragina izango dutelako, baita gure hiriak kirolaren eta ohitura osasungarrien aldeko apustua egiten duela agerian uzten duelako, Gasteizen DNAren parte diren balioak –hiri osasungarri eta iraunkor baten aldekoak– proiektatzen dituelako, eta kirolari eta osasungarritasunari loturiko turismo-helmuga gisa indartzen gaituelako ere”, azpimarratu du Gorka Urtaran alkateak.

“Vitoria-Gasteiz Basket Capital 2019” kanpaina igande honetan abiatuko da ofizialki, nahiz eta urtarrilaz geroztik Udala ekintza batzuk antolatzen aritu den, besteak beste, hiria promozionatzeko bideoa eta Arabako Pastelgile eta Gozogileen Elkartearekin elkarlanean sortutako saskibaloi baloien itxurako txokolatezko bonboien aurkezpena.

Atzera kontaketa eta banderatxoak

Lehen ekintza horiek burututa, datozen norgehiagoketarako atzera kontaketa literalki martxan jartzeko unea heldu da: igande honetan Plaza Berrian egingo den ekitaldi sinbolikoan Baskonia, Araski eta Zuzenak taldeetako adin guztietako zaleek Udaletxeko fatxadan esekiko den kontagailu bat aktibatuko dute. Xabier Añúa entrenatzaile historikoak eta Sara Ortega jokalariak saskibaloiko pilota saskiratzen duten unean jarriko da martxan atzera kontaketa hori. Baloia Buesa Arenatik abiatuko da goiz horretan eta, pasez pase, errebotez errebote, hiriko hainbat kale zeharkatuko ditu Mendizorrotzetik igarota Plaza Berrira heldu orduko.

Gainera, hiriko kale nagusietan ikus daitezke jada Gasteiz saskibaloiaren hiriburua dela aldarrikatzen duten banderatxoak, eta datozen egunetan ekintza gehiago iragarriko dira.

Ekintza horiei edota kirol hitzorduei buruzko informazioa eskuratzeko, jo helburu horretarako beren beregi sortutako web orrira:  www.vitoria-gasteiz.org/vgbasketcapital 

 

 

Share
Kategoriak: Prentsa oharrak  —  Etiketak: , , , ,   —  Komunikazio Zerbitzua / Servicio de Comunicación  —  11 otsaila 2019 13:34

Euskadiko GGKEen Koordinakundeak eta Gasteizko Udalak Ariznabarreko muralaren bitartez ospatu dute garapenerako lankidetzarekiko konpromisoaren 30. urteurrena

 

Alkate Gorka Urtaranek, Euskadiko Garapenerako GKEen Koordinakundeko lehendakari Sofía Marroquínek eta alkate ohi José Angel Cuerdak Ariznabarreko kiroldegian egindako mural berria inauguratu dute, ordezkari politikoekin eta beste erakunde eta elkarteetako ordezkariekin batera; Gasteizek garapenerako lankidetzarekin hartutako konpromisoa gogorarazten du horma-irudiak, hiria aitzindaria izan baitzen alor horretan. Izan ere, 2018an bete zituzten 30 urte bai Euskadiko GGKEen Koordinakundeak bai Gasteizko Udalaren lankidetzak, 1988an onetsi baitzuen lehen aldiz aurrekontuaren % 0,7 garapenerako lankidetzara bideratzea.

Fill in Culture taldeak landu du urteurren bikoitza ospatzeko murala.

Programa eta proiektu askoren bitartez, 30 urte horiek aztarna utzi dute beren bizi-baldintzak eta ahalmenak hobetuta ikusi dituzten pertsonengan eta komunitateetan, giza eskubideen defentsan, eta euskal gizartearen elkartasunean. “Oraindik ere, Gasteizko Udalak lankidetza hirian garatutako elkartasun politiken luzapena  dela uste izaten jarraitzen du ,eta bere egitekoa José Ángel Cuerda alkateak definitutako bera izaten jarraitzen duela: elkartasunaren kultura sustatzea, lankidetzara baliabide ekonomikoak bideratzea, eta erakundearen beraren eta udalerriaren ahalmenak lankidetza-proiektu eta programetarako erabiltzea. 30 urtez, erakundeok zein GGKEak lankidetzan aritzeko modua hobetzen ahalegindu gara. Gasteizko Udalak garrantzitsutzat jo du proiektu puntualetatik jarraipena duten proiektuetara igarotzea, ebaluazioa baliatzea ikasteko tresna gisa, hiriko biztanleen eta taldeen benetako inplikazioa lortzea proiektuetan, eta hegoaldeko erakunde lokalekin batera aritzea, dela Euskal Fondoaren bitartez, dela zuzenean. Pozik gaude, halaber, udal sailek kooperazioan izandako inplikazio teknikoaz, bereziki AMVISAk uraren alorrean egindakoaz, baita beste udal zerbitzu batzuek landutako garapenerako lankidetzaren inguruko hezkuntza-programez ere”, nabarmendu du alkateak.

 

Euskadiko Garapenerako GKEen Koordinakundeko lehendakari Sofía Marroquínek ere hitz egin du; koordinakundeak nazioarteko lankidetzaren alorrean diharduten 79 GKE batzen ditu, eta horietako 31k badute presentziarik Araban. Zehazki, hau adierazi du: “Geroztik, hiri honek era eredugarrian erakutsi du nola arlo lokaletik, konpromisoa hartuz eta epe luzera begira, gure gizartea aldatzen lagundu daitekeen eta, aldi berean, nola eman dakiekeen sostengu giza eskubideak eta garapen jasangarria aldezteko ekimenei hain gertuko ez diren lekuetan —Afrika, Latinoamerika edo Asia— eta ahultasun handiko egoeretan”.

Haren hitzetan, “mundu interkonektatu batean bizi gara, non leku batean egindakoak eta erabakitakoak eragin zuzena baitu milaka kilometrotara. Mundu globalizatu batean, non milioika pertsonak ezin baitute oraindik bizitza duin batez gozatu. Etengabe kargu hartzen digun mundua da, ez dezagun inor atzean utz. Mundu horretan inoiz baino beharrezkoagoak dira euskal kooperazioaren hogeita hamar urte hauek posible egin dituztenen antzeko pertsona eta ekimenak. Hori guztia dela eta, inoiz baino premiazkoagoak dira lankidetza-politika konprometituak, solidarioak eta koherenteak ”, erantsi du. “Euskadiko elkartasuneko 30 urte hauek  erakusten dute erakundeen, garapenerako GKEen eta gizartearen arteko lankidetza eta adostasunerako borondatea izanez gero posible dela estatuko buru izatea lankidetzaren alorrean. Eskerrik asko elkarteei, herritarrei eta erakundeei lankidetzarekin, giza eskubideekin eta pertsona ororekin erakutsi duzuen konpromisoagatik”, amaitu du Marroquínek.

 

Euskal lankidetza, dirua baino gehiago

Euskal kooperazioak ezaugarri propioak ditu eta ospe handia du estatuan, haren jaiotza goiztiarragatik eta izan duen eboluzioagatik, bideratzen dituen baliabideen ugaritasunagatik, eta esku-hartzeen kalitate eta  eraginagatik. Erreferentea da genero berdintasunaren sustapenean, eta asistentzialismoa saihesten saiatu da, giza eskubideetan oinarritutako lankidetzaren alde eginez, beti eskuzabaltasunez eta doan, diru-transferentzia hutsera mugatu gabe. Epe luzera jokatzen du, Euskadiren eta herrialde pobretuen arteko lanaren bitartez, giza garapen jasangarria eragozten duten oztopoak desagerrarazteko. Izan ere, pobrezia eta ezberdintasunak ez dira berez sortzen, salatu beharreko kausak dituzte atzean, eta horiei aurre egiteko modu bat lankidetza da.

Gainera, euskal herritarrak sentsibilizatzen ditu, haien kontzientzia kritikoa handitzeko eta gure inguru hurbilena eraldatuz aldaketa globalak lortzen laguntzeko.

Lankidetza euroak eta aurrekontuak baino gehiago da; izan ere, herrialde pobretuetan bizi diren eta pobrezia eta desberdinkeria pairatzen dituzten milaka pertsonaren funtsezko eskubideak bermatzen laguntzen du (hezkuntza, osasuna, emakume eta gizonen arteko berdintasuna, ura eta saneamendua izatea, gosearen aurkako borroka…). Gure ingurune hurbilena eraldatzen ere laguntzen du, maila handiagoko aldaketak lortzearren.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  31 urtarrila 2019 14:34

 

 

 

 

 

 

  • Biltzarra 2019ko apirilaren 11tik 13ra egingo da, “Ondo lo egin, luzaro bizi, hobeto bizi” lelopean.
  • Programatutako jarduerak ez dira soilik Europa biltzar-jauregian eta Goiuri jauregian egingo, hiriko beste hainbat txokotara ere helduko dira.
  • Ikeak lau logela eraikiko ditu, eta Loaren Espainiako Elkarteak ezarritako oinarri zientifikoei jarraituko die koltxoia, hezetasuna, tenperatura eta argiztapena zehazteko garaian.
  • Aurreikusitako partaidetzak Europa mailan egiten diren biltzar askoren zifrak gainditzen ditu; izan ere, 4.500 pertsona baino gehiago urreratuko direla uste da.

 

Loaren Espainiako Elkarteak (LEE) Gasteizen egingo du bere Urteroko XXVII. Biltzarra, apirilaren 11tik 13ra bitartean, eta bere biziko garrantzia izango du, bere izaera irekia dela medio, biltzar zientifikoen artean mugarri bihurtuko baita. Izan ere, Gasteiz ‘loaren hiri’ bihurtuko duen ekitaldi horren xedea jarduerak hiri osora zabaltzea da (eta ez, ohi bezala, areto bakar batean geratzea), hala, ezaguera zientifikoa esperientzia partekatu bihurtzeko.

“Hiru egunez arreta handia erakarriko dugu osasun politiken barruan guztiz funtsezkoa den gai honen inguruan. Bizi-kalitatearekin lotutako hainbat alderditan Gasteiz erreferentea dela badakigunez, eta hizlari, biltzarkide eta bisitari andana etorriko dela aprobetxatuz, gure helburuetako bat pertsona horiei hiriaren ahalik eta irudirik onena helaraztea da. Beste helburu bat loaren medikuntzaren eta Gasteizentzat estrategikoak diren alorren (kirola eta iraunkortasuna, besteak beste) arteko sinergiak eratzea da, hala, areagotu egingo baita biltzar honek hiriari egingo dion ekarpen soziala”, azpimarratu du Gorka Urtaran alkateak.

“Hiritarrei zuzendutako biltzarra dugu hau; ez da hiritarrei irekitako biltzar bat, baizik eta Loaren Espainiako Elkartearen bidez zientzialariak eta hiritarrak hibridatuko dituen ekimen bat, zientzialarien etorkizuna eta ezaguerak sustatuko dituena, baina baita hiritarrenak ere. Uste dugu loa ez dela medikuek eta zientzialariek soilik landu beharreko gaia, biztanleria osoari eragiten baitio”, dio Loaren Espainiako Elkarteko zuzendari den Alejandro Iranzo doktoreak.

LEEren, hiritarren eta esparru horretako enpresen arteko aliantza sortzeko asmoz sinatutako “Gasteizko Ituna”  akordioaren parte da ekimen hau.  Itun horren xedea bikoitza da: alde batetik, hiritarren artean loaren inguruko ezaguera sustatzea, eta, bestetik, loaren medikuntzan dabiltzan profesionalek egiten dituzten ahalegin zientifikoak eta laguntzakoak pazienteei soilik ez ailegatzea, hiritar guztiei baizik.

 

Hiritarrei zuzenduriko programa

Komunitate zientifikoak duen parte hartze bera izango dute herritarrek beren osasuna eta etorkizuna sustatzea eta ezagutzak handitzea asmo duten jarduera horietan. Hau da, biltzarrerako ezarritako helburu zientifikoak herritarrengana ere eramango dira”,  azaldu du biltzarraren batzorde antolatzaileko zuzendari Carlos Egeak.

Horretarako, hitzaldi eta jarduera zientifikoz jositako programa bat diseinatu da, bizitzaren hasierako, erdiko eta bukaerako etapetan dauden pertsonentzako jarduerak batzen dituena, ezagutza eta etorkizuna bizitzako aldi guztietan bultzatzea baita asmoa.  Hitzaldietan, gehienezko pertsona-kopurua 400 eta 850 bitartekoa izango da eta, esan beharra dago, interes handia pizten ari direla, kasu batzuetan, baita haien nondik norakoak iragarri baino lehen ere. Horren adibide dira DBHko eta unibertsitateko ikasleentzat programatutako saioak: urtea bukatu baino lehen, eta oraindik promozioa egin gabe zegoelarik, gutxi falta zen “txartel guztiak salduta” kartela esekitzeko. Hori ikusita, antolakuntzakoek erabaki dute saio horiek streaming bidez ematea.

Hitzaldiez gain, hiritarrentzako programa osatzeko, beste eragile batzuen parte hartzea baliatuko da, besteak beste, euskal kirol talde nagusiena. Eragile horiek loa eta kirola lotzen dituen kongresuan egingo dute beren ekarpena: Athletic Club, Real Sociedad, Deportivo Alavés, Eibar eta Baskonia taldeek eta Euskal Herriko Itzuliak bat egin dute LEErekin loaren eta kirolaren arteko dualtasuna ikertzeko eta sustatzeko. Klub horiek beren zuzendari medikoak eta lehen taldeetako kirolari batzuk jarri ditu biltzarraren esku, eta hori gutxi balitz, Joseba Beloki, Silvia Trigueros eta Luis Arconadaren mailako kirolariak ere egongo dira tartean. Gainera, ekitaldi horretan herritarrei irekita egongo den debate bat antolatu da, honako helburu honekin: ahalik eta errendimendu handiena lortzeko loa eta ariketa fisikoa nola baliatu behar diren jakitea eta identifikatzea”, adierazi du Egeak. 

 

Ikeak lotarako hobezina den gela bat eraikiko du 

Herritarrei zuzenduriko programaren azken atala Ezagutzaren Feria izenekoa da. Loaren medikuntzaren alorrean paper garrantzitsua duten enpresa eta erakundeen arteko topalekua izango da eta, bertan, lantegiak eta jarduerak antolatu eta produktuak erakutsiko dira. “Gure asmoa da enpresa-balioa gehitzea loaren ezagutzari. Oinarri zientifikoa duten produktuak bilatzen ari gara ferian sartzeko”, adierazi du Egeak.

Horrez gain, Ezagutzaren Ferian LEE-Ikea gunea ere instalatuko da.  Horretan, altzarien multinazional suediarrak bere diseinuko lau logela berreraikiko ditu eta Loaren Espainiako Elkarteak ezarritako oinarri zientifikoei jarraituko die koltxoia, hezetasuna, tenperatura eta argiztapena hautatzeko garaian. “Lehen aldia da logela bat diseinatzean loaren medikuntzan adituak direnek ezarritako irizpideei jarraitzen zaiena”. Asmoa da logela horietan lo-zikloak gehienez bi minutu irautea, hala, bisitariek in situ ikusi ahal izateko, besteak beste, nolako argia behar den lokartzean eta esnatzean”, azaldu du Batzorde antolatzaileko lehendakariak.

Azkenik, eta hiritarrek biltzarrean izango duten papera indartzeko, 1992ko Bartzelona joko olinpikoetan baliatu zenaren tankerako boluntario-programa bat jarriko da martxan, hiritarrak 4.500 bisitari baino gehiago jasoko dituen biltzarraren kudeaketan sar daitezen; izan ere, partaidetza-aurreikuspen horrek Europa mailako kongresu askoren zifrak gainditzen ditu.

 

Programa zientifikoa 

Biltzarraren aurre-programa zientifikoa nahikoa landuta dago eta iragartzen digu, loaren gaia baliatuz, osasunari lotutako mota guztietako alderdiak landuko direla: apnearen tratamendua, ordutegi-aldaketaren eragina, narkolepsiaren aldaerak, loaren kalitateari lotutako narriadura kognitiboa, hanka urdurien sindromea haurretan, loari lotutako terapia miofuntzionala, etab.

Horretarako, alor guztietako puntako profesionalek sortutako talde bat ekarriko da eta, horien artean, beren alorrean erreferente diren Eduardo Anitua eta Eduard Estivill doktoreak egongo dira.

Saioez, biltzarrez eta satelite motako sinposioez gain, bada beste atal bat programa zientifikoan: ahozko aurkezpenei dagokiena, alegia. Horien bidez, parte hartzeko interesa duten aditu eta ikertzaileei haien ekarpena egiteko aukera luzatu nahi zaie. Batzorde batek jasotako proposamenen artean hautaketa egingo du eta, bukaeran, bi sari emango zaizkie aurkezpen txukunenei.

“Talde, adin eta zientzialari bakoitzak bere neurriko jarduerak aurkitu ahalko ditu. Esan liteke biltzar pertsonalizatua izango dela etorkizuna eta ezagutza sustatzeko konpromiso sendoa duen hiri honetan egingo dena”, diote Loaren Espainiako Elkartekoek.

 

Gasteiz, hiri berezia 

Gasteiz biltzar hau egiteko hiri egokia dela iruditu zaigu, oso hiri erakargarria eta berezia delako. Ahalegin handia egiten du bizi-kalitatea hobetzeko eta, ondorioz, loarekin zerikusia duten arazoen eta horien aniztasunaren zabalkundean ere aitzindari da. Horren erakusgarri da hirian loaren medikuntzak duen tradizioa, besteak beste, Joaquín Durán eta Carlos Egea doktoreak buru dituena”, azpimarratu du Loaren Espainiako Elkarteko zuzendariak.

Gasteizko alkate Gorka Urtaranek eskertu egin ditu laudorioak eta nabarmendu du apirilean egingo den ekimen hori mugarria izango dela hiriko biltzar-jarduerari dagokionean. Aipatzekoa da Gasteizko Udala loaren biltzarraren antolakuntzan sartuta dagoela, hiru betebehar nagusirekin: jarduerak egiteko espazioak lagatzea (jarduera zientifikoak zein publiko orokorrari irekiak izan), hiritarrentzako jardueren batzordean parte hartzea, eta partaidetza sustatzearekin, boluntarioekin eta instituzioarteko koordinazioarekin zerikusia duten kontuetan laguntzea.

Informazio gehiago: http://www.congreso-ses.com/

 

 

 

 

 

 

Share

« HurrengoakAurrekoak »