Prentsa Oharren banner

Gasteizek hitzarmena sinatu du Michelin fundazioarekin, ekintzaile zein enpresa txiki eta ertainei laguntzeko

Lehen alkateorde eta Ekonomia-Sustapenerako zinegotzi Maider Etxebarria eta Michelin España Portugal Fundazioaren Komunikazio-zuzendari Mónica Rius Aymamí andreek lankidetza-hitzarmena sinatu dute gaur goizean, berrikuntza eta garapen ekonomikoa sustatzeko, eta ekintzailetza eta Gasteizen enpresak sortzeko ekimenari laguntzeko.

Hitzarmenaren baitan, Udalak Michelin España Portugal Fundazioak enplegua sortzeko ematen dituen laguntza-programen berri zabalduko, eta aretoak eskainiko dizkio Udalaren enpresa-zentroetan, enpresa-proiektuen sustatzaileak hartzeko.

Bere aldetik, Michelin España Portugal Fundazioak (FMEP) bere laguntza-programen onuradun izateko aukera emango diete Gasteizko Udalak ekintzailetza sustatzeko antolatzen dituen programetan parte hartzen dutenei, bai eta Udalaren enpresa-zentroetan instalatutako enpresa txiki eta ertainei eta autonomoei.

Laguntza horiek era desberdinekoak dira: aholkularitza eta laguntza teknikoa; finantza-laguntza, banku-entitateren batek FMEPren babesarekin emandako mikrokredituen bidez; eta itzuli beharrik gabeko laguntza ekonomikoa onuradunaren eta FMEPren arteko hitzarmena sinatu osteko bi urteetan sortutako enplegu berri bakoitzeko.

Horrez gain, Michelin España Portugal Fundazioak ”Araba Ekinean” programan lagunduko du, informazio teknikoa eta praktika egokien trukearen bidez, zeinean jardunaldi, foro, lantegi eta abarretan izan duen eskarmentua eskainiko baitu.

Maider Etxebarria, lehen alkateordea eta Ekonomia Sustapenaren zinegotzia: “Itun honek Gasteizko ekintzaile, autonomo eta enpresa ertain eta txikiei laguntzeko estrategian aurrerapausoak ematea ahalbidetzen digu. Espero dugu hiriko enpresa-ehunaren berrikuntza eta garapena sustatzen lagunduko duela.

 

Share

Ekonomia Sustapenaren Sailak bikoiztu egin du enplegua babesteko laguntza-poltsa: 438.779 eurokoa izango da Gasteizko enpresetan 222 kontratu diruz laguntzeko

Kontratuen % 90 emakumeek sinatu dituzte

Tokiko Gobernu Batzarrak onetsi egin du 239.000 € gehiago bideratzea 50 langile baino gutxiago dituzten tokiko enpresetako enplegua babesteko laguntza ekonomikoen udal programa finantzatzeko. Hala, hasieran aurreikusitako baliabideak bikoiztu egingo dira, eta 439.000 € emango zaizkio programari.

Ekonomia Sustapenaren, Enpleguaren, Merkataritzaren eta Turismoaren Sailak zuzkidura ekonomikoa handitu izanak tokiko 216 enpresatan 222 kontratu diruz laguntzea ahalbidetuko du. Kontratu gehienak, % 90, emakumeentzat dira, eta % 79 lanaldi osokoak.

Laguntza-programa hori berria da Euskadin, orain arte ez baita udalerri batean ere egin, eta “oso esperientzia positiboa izan da, lehen alarma-egoeran galdutako kontratuak berreskuratzeko aukera eman digulako, pertsona berberak kontratatuz lan baldintza berdinekin edo hobeekin. Bestalde, aldi baterako kontratuak kontratu mugagabe bihurtzeko ere balio izan du”, adierazi du lehen alkateorde eta Ekonomia Sustapenaren, Enpleguaren, Merkataritzaren eta Turismoaren zinegotzia Maider Etxebarriak.

Enpresa onuradunek 750 eta 4.000 euro bitartean jasoko dituzte, dirulaguntzen ildoaren arabera. Bi ildo daude, bata kontratuak berreskuratzeko, eta bestea, kontratu mugagabeak sinatzea sustatzeko.

Share

Secretariado General Gitano Fundazioarekiko hitzarmena onetsi du udalak, ijito komunitatearen gizarte-sustapena eta gizarteratzea bultzatzeko

Ekonomia Sustapenerako Sailak 42.000 euroko laguntza emango dio hainbat jarduera gauzatzeko.

 Gasteizko udaleko Ekonomia Sustapenaren, Enpleguaren, Merkataritzaren eta Turismoaren Sailaren eta Secretariado General Gitano Fundazioaren arteko lankidetza-hitzarmena onetsi du gaur Tokiko Gobernu Batzarrak, ijitoen gizarte-bazterkeriaren aurka eta enpleguaren alde borrokatzeko jarduera-programa egitea xede.

Maider Etxebarria alkateordea buru duen sailak 42.000 euroko ekarpena egingo du “ijitoen komunitatearen bizi-baldintzak hobetzeko, eraldaketa sozialerako eta komunitatea sustatzeko jarduerak egin daitezen”. Txirotasunari eta desberdintasunari aurre egiteko tresna eraginkorra da gizarte-bazterkeriaren aurka borrokatzea eta ijitoen enplegua sustatzea, ijito gazteentzako enplegu-politika aktiboen bitartez”.

Udalaren ekarpenak osatu egingo du Europako Gizarte Funtsak POISES -Gizarte Inklusio eta Ekonomia Sozialerako Programa Eragilean eta POEJ -Gazteen Enplegurako Programa Eragilean aurreikusitako jardueren finantzazioa. Programa hauen bidez, gizarte-bazterkeria pairatzeko arriskua duten gazteak eta komunitate baztertuetakoak lan-merkatuan modu iraunkorrean sartzeko lan egiten da.

 

 

 

 

Share

Gasteizek 23.000 euroko laguntza emango dio teknologia birziklatzean oinarritzen den laneratze programa bati

 

Prestaturik elkartearekin sinatutako hitzarmenak ordenagailuak eta gailu mugikorrak konpontzeari buruzko prestakuntza eta enpresako praktikak uztartzen ditu

 

Ekonomia Sustapenerako Sailak eskatuta, Udal gobernuak lankidetza-hitzarmen bat onetsi du gaur Prestaturik elkartearekin, 2021ean enplegurako prestakuntza programa bat finantzatzeko. Programa hori immigranteei dago zuzenduta, haien gizarteratze prozesuaren barruan. Programaren helburua da pertsonei informazioa eta laguntza ematea, baita enpresetan praktikak egiteko aukera eskaintzea ere, gailu elektronikoak konpontzeko gai izan daitezen. Udalak 23.000 euro emango dizkio proiektu horri, eta EAJ-PSEren udal gobernuak eta Elkarrekin taldeak 2021erako egindako aurrekontu akordioaren emaitza da.

Programa 256 ordukoa izango da, eta hainbat ikasgai izango ditu, esaterako, mahai gaineko ordenagailuak, ordenagailu eramangarriak, tabletak eta gailu mugikorrak mantentzeko eta konpontzeko ikastaroak; modulu osagarriak ere eskainiko dira, hala nola, gizarteratzeari, ingurumenaren arloan sentsibilizatzeari, genero-berdintasunari eta ekintzailetza sustatzeari buruzkoak. Horretaz gain, proiektuak enpresetan praktikak egitea aurreikusten du.

Lehen alkateorde eta Ekonomia Sustapenerako zinegotzi Maider Etxebarriak azpimarratu duenez, “langabezian dauden immigranteen potentziala sustatzea oso erronka garrantzitsua da. Hori lortzeko, prestakuntza oso tresna indartsua da, pertsona horiek eransten duten giza kapitala eta kapital soziala eta ekonomikoa aprobetxatzeko aukera emango digulako. Etorkinen enplegagarritasuna areagotzeari ateak irekitzen dizkiogu hirian”.

Bestalde, Garbiñe Ruiz zinegotziaren esanetan, “Elkarrekin taldetik hitzarmen hau bultzatzen jarraitzen dugu; izan ere, iaz oso emaitza onak eman zituen, pandemiak eragindako zailtasunak gorabehera. Ekonomia zirkularrean enpleguak sortzea, proiektu honen kasuan bezala, gure udalerriak erreferentziako Green Capital izaten jarraitzea ahalbidetzen duen lan-ildoa da”.

 

 

 

Share

Maider Etxebarria: “Gasteizek helmuga seguru eta iraunkor gisa duen potentziala erakutsiko du, Euskadiko lehen Zikloturismo Foroa hemen egingo baita”

Lehen alkateordeak sektoreko profesionalen eta adituen topaketa aurkeztu du; hiru egunez egingo da Europa Jauregian, eta maiatzaren 8tik 16ra bitartean hainbat jarduera ere izango dira

Lehen alkateorde eta Ekonomia Sustapenerako zinegotzi Maider Etxebarriak Euskadiko lehen Zikloturismo Foroa aurkeztu du gaur. Topaketa Gasteizen egingo da eta Arabako hiriburuak “helmuga seguru, jasangarri eta familiar gisa duen potentziala erakusteko aukera” izango du. Zinegotziak, Eusko Jaurlaritzako Turismo, Merkataritza eta Kontsumo sailburu Javier Hurtadorekin batera, profesionalentzako topaketaren jarduera-egitaraua azaldu du. Sailburuak azpimarratu du, halaber, hitzordua Euskadi zikloturismoaren gaian “erreferente” bihurtuko duen estrategia bat sustatzeko “abiapuntua” izango dela. Foroa maiatzaren 12tik 14ra bitartean egingo da Europa jauregian (online formatuan ere egingo da), networking gune bat izango du, eta maiatzaren 8tik 16ra burutuko den jarduera-egitarau batek osatuko du.

Biltzarrak sektoreko adituak, profesionalak eta enpresen ordezkariak bilduko ditu eta ekitaldi zentrala maiatzaren 12tik 14ra bitartean egingo den foroa izango da. Parte-hartzaileen artean Mercedes Muñoz Bide Berdeen Europako Elkartearen zuzendaria, Ángeles Marín Garraio, Mugikortasun eta Hiri Agendako Ministerioko Mugikortasun estrategia bulegoaren zuzendaria eta Paco Nadal bidaia-kazetaria izango dira, besteak beste. Zikloturismoarekin lotura duten estatuko enpresen ordezkariak ere bertaratuko dira, adibidez, hotelak, marketin turistikoan espezializatutako teknikariak, eta BH Bikes, Orbea, Littium edo Bikefriendly Tours enpresetako zuzendariak. Maiatzaren 14an kirol ekitaldiei buruzko tarte bat egongo da eta bertan Quebrantahuesos, Orbea Monegros edo Transpyr Coast to Coast proben antolatzaileek hartuko dute parte.

Horretaz gain, zikloturismoari loturiko jarduerak ere antolatu dira. Adin guztientzako izango dira eta maiatzaren 8tik 16ra bitartean egingo dira:

  • Bisitaldi gidatuak bizikletan, Gasteizko turismo-zerbitzuetako enpresekin lankidetzan, Arabako hiriburua, Vasco-Navarro trenbidearen bide berdea Estibalizko Santutegiraino, edo Uribarri Ganboako urtegiaren ingurua ezagutzeko. Ataria zentroan bizikleta elektriko bat alokatu eta Eraztun Berdean zehar paseatzeko aukera ere egongo da.
  • Bizikleta gainean trebatzeko eskola, 7 eta 15 urte bitarteko neska-mutilek bizikleta hobeto kontrolatzen eta oztopo-zirkuitu batean ibiltzen ikasteko. Gamarrako parkean egingo da.
  • Merkataritzari eta ostalaritzari loturiko jarduerak, hainbat ekimenen bitartez. Gasteiz On elkarteko 70 denda baino gehiago bizikletaren enbaxadore izango dira: erosketen kontsigna izango dira, puzgailuak utziko dituzte edo hiri-txirrindularitzari buruzko liburuxkak banatuko dituzte. Gainera, El Boulevard merkataritza guneak Arabako Lautadako Ibilbide Zikloturista Handia birsortuko du QR kodeak erabiliko dituen jarduera baten bidez. Horretaz gain, lantegiak egingo dira kafetegi batean, bidaien, bizikletaren eta kafearen arteko harremana ezagutu eta hartaz gozatzeko.
  • “Euskadi Bizikletan” erakusketa aire zabalean, Europa jauregiaren kanpoaldean.

Naturari loturiko turismoa “ingurumenaren ikuspegitik beharrezkoa izateaz gain, hiria dinamizatzeko eta hiria-bizikleta bikotea indartzeko aukera asko eskaintzen ditu”, azpimarratu du Etxebarriak. Zinegotziak adierazi duenez, foro horri esker Gasteizek bere irudi berdea indartuko du, hamarkadatan zehar “bizikletarekin harreman estua” duela erakutsi ondoren.

 

Informazio gehiago: cicloturismoeuskadi.eus/eus/

 

 

 

 

Share

Itun Berdea Sarien zazpigarren edizioaren deialdia egingo du Gasteizek; sariek ingurumenarekin enpresek duten konpromisoa aitortzen dute 

 

Ostiral honetan, Itun Berdea Sarien VII. edizioa onetsi du Udal-gobernuak; sari horien bidez, ingurumena zaintzeko egiten duen ahalegina aitortzen zaio Gasteizko enpresa-sareari, ekoizpen-, banaketa- eta kontsumo-prozesuen kudeaketa efizienteago eta jasangarriagoa egiten baitu. 2021eko deialdiak 2.000 euroko sari bana izango du hiru sail hauetan: mikroenpresak (1 eta 9 langile bitarte dutenak), enpresa txikiak (10-49 langile dituztenak) eta enpresa ertain eta handiak (50 langile edo gehiagokoak).

Edizio honetako ekitaldi nagusia azaroaren 18an egingo da, Europa Jauregian, eta 2021eko sariez gain, 2020ko hiru proiektu irabazleei ere emango zaizkie sariak, ekitaldi hura atzeratu behar izan baitzen pandemiaren ondorioz.

Itun Berdearen komunitatea industria-sektorean zein merkataritzaren, nekazaritzaren eta zerbitzuen sektoreetan dago presente, eta ia 500 kide ditu dagoeneko, enpresak nahiz enpresa-arloko erakundeak kontuan hartuta, zeinek ingurumenarekiko begirunea txertatu baitute euren negozio-ereduan.

Aurreko edizioetan bezala, honako betekizun hauek bete behar dituzte enpresek, sarietan parte hartu ahal izateko: Arabako hiriburuan kokatuta egotea, 2020-2021 aldian ingurumen-inpaktua murrizteko neurriren bat ezarri izana, eta Itun Berdeari atxikita egotea.

Hautagaiak aurkezteko epea deialdia ALHAOn (Arabako Lurralde Historikoaren Aldizkari Ofiziala) argitaratu ondoren hasiko da, eta urriaren 1a arte egongo da zabalik.

Lehenengo alkateorde eta Ekonomia Sustapenaren zinegotzi Maider Etxebarriak 2021eko ekitaldian parte hartzera animatzen ditu Gasteizko enpresak. «Itun Berdea Sariak erakusleiho ona dira ikusarazteko nolako konpromisoa duen gure ekonomia-sareak ingurumena gehiago errespetatzen duten kudeaketa-eredu efizienteagoekin. Urtero proposamen interesgarriak aurkitzen ditugu, eta erreferente bihurtzen dira komunitate osoarentzat», azpimarratu du.

 

Share

Udalak berriz abiarazi du “Laborategi Hiria” programa; horrekin produktu berritzaileak probatu nahi dituzten enpresei eskaintzen die hiria  

Gaur, Udalak onespena eman dio “Vitoria Gasteizen Laborategi Hiria” programari; horren bidez proiektu teknologiko jasangarria edo berritzailea duten enpresei eskaintzen die hiria, ingurune errealetan probak edo erakustaldiak egin ditzaten. Gaur, ekimenaren deialdi publikoa onetsi du Tokiko Gobernu Batzarrak; azken edizioa 2017an egin zen, eta, orain, berriz ere egingo da.

“Laborategi Hiria” programak oinarrizko bi helburu ditu. Batetik, enpresa-berrikuntzan laguntzea. Eta, bestetik, arlo publikoaren eta pribatuaren arteko lankidetza sustatzea, konponbide berriak esperimenta dezaten errazteko produktu teknologiko jasangarri edo berritzaileak dituzten konpainiei. Hala, “euren garapen teknologikoa testatzeko aukera ematen diegu enpresei, merkatu nazionalean zein nazioartekoan duten potentziala handitzeko, eta, gainera, tokiko enpresek programa baliatu ahal izango dute euren burua ezagutarazteko bezero gehiago lortze aldera”, azaldu lehenengo alkateorde eta Ekonomia Sustapenaren zinegotzi Maider Etxebarriak. Zinegotziak oroitarazi du irekia dela deialdia, eta horrenbestez euren produktuak Gasteizen probatu nahi dituzten beste nonbaiteko enpresek ere baliatu ahal izango dutela. “Kanpoko ezagutza ere erakar dezakegu, eta, agian, hura aprobetxatu ahal izango du hemengo sektoreak, eta gure hiria berrikuntzaren arloko erreferente bilakatu”, gehitu du.

Programa Udalaren bi estrategiaren barruan dago, zein bere saileko planetan jasoa: Industriari Laguntzeko Plana (2021-2024), eta Ekonomia Zirkularreko Plana (2020-2025). Planek erantzuten diete bai gure hiriak duen industria-izaera nabarmenari (hiriko barne-produktu gordinaren % 30 eta enpleguaren % 25 industria-sektoretik datoz), bai garatzeko natura-baliabideen kontsumoaren beharrik ez duen ekonomia batera aldatzeko beharrari. Ildo horretan, tresnak proposatzen dituzte enpresek eboluzionatu ahal izateko inpaktu txikiagoko negozio-ereduetara eta aldi berean lehiakortasuna sortu.

 

Share

Gasteizek krisiaren aurkako borroka areagotuko du, 2 milioian balioetsitako laguntza-plan batekin

 

Etxebarriak gutxienez 600 euroko aparteko laguntzak iragarri ditu ehungintzarako eta bidaia agentzietarako 

Merkataritza eta ostalaritza modernizatzeko dirulaguntzek terrazak hornitzeko linea bat izango dute lehen aldiz

 

Gasteizko Udalak laguntza plan bat jarri du abian osasun krisiaren ondorioei aurre egiteko. Programa horren lehen faseak 2 milioi euroko aurrekontua du eta sostengu ekonomikoa eta pizgarri fiskalak barne hartzen ditu; urtean zehar neurri berriekin osatuko da plana. Planak indartu egiten ditu Arabako hiriburuak azken hilabeteetan ekonomia dinamizatzeko bideratu dituen politiken zutabeak, hainbat berritasunekin. Besteak beste, gutxienez 600 euroko aparteko laguntzak sortu dira bi sektore berezitarako: ehungintza (arropa-dendak eta zapata-dendak, besteren artean) eta turismoa (bidaia-agentziak, biltzarren antolaketa eta gidariak). Gainera, terrazen ekipamendurako dirulaguntzak emango ditu Udalak lehen aldiz, ostalaritza sektoreak hala eskatu baitu; enpresen arloan, berriz, ekonomia zirkularreko proiektuei laguntzeko lerro bat estreinatuko du.

Gaur, asteazkenarekin, aurkeztu dute plana alkateorde Maider Etxebarriak eta Merkataritza zinegotzi Igor Salazarrek; hain zuzen ere, “pandemiak kaltetutako sektoreen iradokizunetan oinarritzen da” plana. Ekonomia Sustapenaren zinegotziak adierazi duenez, programak hiru ardatz nagusi ditu, sailak agintaldi honetan bere estrategia politikoaren erdigunean jarri dituen arloei erantzuten dietenak: merkataritzari eta ostalaritzari, enpresa-ehunari eta turismo-sektoreari laguntzea. Zinegotziak azaldu duenaren arabera, laguntza horiek “beste erakunde batzuetakoekin osagarriak” izango dira, eta Udalak “laster” argitaratuko ditu betekizunak eta epeak zehazten dituzten deialdiak, teknikariek oinarriak amaitu bezain laster.

Laguntza-plan honen hiru ardatzetako lehena merkataritza eta ostalaritzari zuzentzen zaie, pandemiak gehien kaltetutakoen artean baitaude. Zehazki, urte hasiera honetan, Udalak 660.000 euro bideratuko ditu bi sektoreen defentsara, hau da, iazko aurrekontuan esleitutako zenbatekoa bikoiztuko du. Zenbateko hori hiru programatan banatuko da. Alde batetik, hirian merkataritza-enpresa txikiak eta ostalaritza-establezimenduak ezartzeko eta modernizatzeko laguntzak, 300.000 euro. Bigarrenik, murgiltze digitalarekin lotuta iaz sortutako dirulaguntzak mantenduko ditu Gasteizek. 60.000 euro jarriko dira digitalizazioan laguntzeko, alegia, sareko merkataritzarekin, telelanarekin edo web korporatiboen egokitzapen edo garapenarekin lotutako ekipamendu eta software informatikorako inbertsioak ordaintzeko.

Lehen ardatz horren berritasun nagusia ehungintzara bideratutako aparteko laguntzak dira. Ildo horrek 300.000 euro izango ditu eta arropa eta osagarrien denden eta zapata-denden gastu arruntera bideratuko da. Onuradunek zenbait betekizun bete beharko dituzte: besteren artean, lokalaren antzinatasuna eta plantillaren bolumena baloratuko dira. Laguntzak 600 eurokoak izango dira gutxienez, eta alokairu edo hipoteka gastuak zein autonomoen kuota ordaintzeko balioko dute, besteak beste. “Saldoa soberan badago, eskatzaileen artean banatzeko aukera aztertuko da, partida agortu arte”, adierazi du Salazarrek.

Era berean, zinegotziak adierazi du merkataritzari eta ostalaritzari dagokion kapituluak barne hartuko dituela hiriko taberna eta jatetxeen 2021. urte osoko terraza eta zaborren tasen salbuespenak; EAJ-PSE udal gobernuak berriki iragarri duen neurri horrek 820.000 euroko eragina izango du udal kontuetan. “Ostalaritzak salbuespena eskatu zigun, haien izenean defendatu genuen, eta Ogasun Sailak mahai gainean jarri du sektoreari laguntzeko, alkateak iragarri zuen bezala.

Sailen arteko lankidetzaren adibide garbia da “, azpimarratu du Salazarrek.

 

Ekonomia zirkularreko ildo berria

Laguntza-planaren bigarren ardatzak tokiko enpresa-ehuna izango du helburu, eta lau neurri barne hartuko ditu. Kapitulu honetan sartzen dira 50 langile baino gutxiagoko enpresak sortu eta finkatzeko laguntzak, 140.000 euro, zeinak 5 urte arteko antzinatasuna duten negozioengatik eskatu ahalko baitira; ekintzaileentzako bekak, 84.000 euro, Gasteizen enpresa-ekimen bat bultzatzen ari diren pertsonentzat; ikus-entzunezkoen sektorerako laguntzak, 100.000 euroko aurrekontuari eutsiko diotenak, zinema, telebista eta plataforma digitaletarako proiektuak, film laburren ekoizpena eta gidoien idazketa sustatzeko, eta 50.0000 euroko laguntza-ildo berria, ekonomia zirkularreko proiektuak finantzatzeko.

 

Turismoa

Hirugarren ardatzak iaz hasitako estrategia indartuko du, Gasteizen turismo-produktuak sustatzen eta sortzen lan egiten duten autonomoen eta enpresen jarduera babesteko. 2021eko laguntza-programan 100.000 euroko aparteko laguntza berriak jasoko dira sektore horretarako. Lerro horren helburua da bidaia-agentzien, gidarien, kongresuen antolaketari lotutako enpresen eta hotel-establezimendu txikien gastu arrunta ordaintzen laguntzea. Gutxieneko zenbatekoa 600 eurokoa izango da.

Laguntza-lerro bakoitzaren epeak irekitzeari dagokionez, Udalak deialdi bakoitzaren berri emango du jendaurrean. Deialdi horiek, gainera, udalaren webgunean eta Ekonomia Sustapenaren Sailaren buletinetan iragarriko dira.

AyudasPE2021

 

Share

Araba Ekinean programak 2021eko edizioa aurkeztu du, zeinak jarduera gehiago izango baititu online, eta ideia-lehiaketa indartsuagoa, sarietan 11.000 eurotik gora banatuta 

– Berritasunen artean, eskola enpresen azoka formatu digitalean, taldean jokatzeko ihes-gela eta ‘ekintzailetza kate’ bat

– ‘Zure ideiak balio du’ lehiaketaren 17. edizioak hamar kategoria barne hartuko ditu, krisirako irtenbideak proposatzen dituzten proiektuentzako saria sortu baita

Arabako ekintzailetza ekosistema aitortu eta sustatzea da 2021eko Araba Ekinean-en helburua. Urte osoan zehar garatuko da, eta jarduera-programan lineako ekintzak ere antolatu dira, pandemiari egokitzearren. Gasteizko Udalak, Arabako Foru Aldundiak, Eusko Jaurlaritzak  —SPRI taldearen eta BIC Arabaren bitartez— eta Vital Fundazioak Araba Ekinean-en edizio berria aurkeztu dute gaur, ‘Etorkizuna sortzen’ lema duena. Horrela, lehiaketa sustatzen duten erakundeek Arabak ekintzailetzarako duen potentziala nabarmendu nahi izan dute, egindako azterlan baten arabera Estatuko onena baita. Izan ere,  Impact HUB sareak 2020. urtearen amaieran ekintzailetza aktiboaz aurkeztutako txostenak ekintzailetzaren lehen lekuan jartzen du Araba, Madril, Gipuzkoa, Girona eta Bartzelonaren aurretik; ekintzaile komunitateak eraikitzera bideratutako munduko networking sare handienetako bat da hori. Gizartean sortzen dituen aldaketa positiboei begiratzen die azterlanak ekintzailetza neurtzeko, eta ekonomia, finantza, gizarte zein kultur adierazleak hartzen ditu kontuan, baita ingurumenarekin lotutakoak ere. Besteak beste, dentsitatea, jarioa, konektagarritasuna, dibertsitatea eta sostengu-politikak neurtu dira. Azken emaitzaren arabera, gure lurraldea da ekiteko lekurik aproposena.

Gasteizko lehen alkateorde eta Ekonomia Sustapenaren zinegotzi Maider Etxebarriak, Arabako Foru Aldundiko diputatu nagusiorde Pilar García de Salazarrek, Eusko Jaurlaritzako Ekintzailetza, Berrikuntza eta Informazio Gizarteko zuzendari eta  BIC Arabako lehendakari Leyre Madariagak eta Vital Fundazioen zuzendari exekutibo Axier Urrestik azaldu dituzte 2021eko Araba Ekinean-en xehetasunak, ekitaldia sustatzen duten erakundeak ordezkatuz. Pandemiaren ondoriozko zirkunstantzietara egokitu da aurtengo edizioa; hori dela eta, urteko lehen erdian ekintza eta topaketa gehiago antolatu dira online, eta aurrez aurreko ekitaldi garrantzitsuenak udazkenaren hasierarako utzi dira. Gaur bertan jarri da abian  ‘Zure ideiak balio du’ lehiaketaren 17. edizioa. Lehiaketak lurraldeko ekintzaileen ideia eta proiektu onenak saritzen ditu, eta aurten kategoria berria sortu da, krisirako irtenbideak proposatzen dituzten proiektuentzako saria, hain zuzen. Orotara 10 sari izango dira, eta 11.000 eurotik gora banatuko dira irabazleen artean. Hona hemen sariak:

– On4U saria, ideia onenari. 500 euro.

Aclima saria, ideia iraunkorrenari. 500 euro.

Gasteiz ON saria, merkataritza eta turismoaren alorrean. 1.000 euro.

Eroski saria, nekazaritzako elikaduraren alorreko ekimen onenari. 1.000 euro.

MIchelin saria, industriaren alorreko ekimen onenari. 1000 euro.

Ferrovial saria, zerbitzuen sektoreko ekimen onenari: 1.000 euro.

RPK sari berezia, enpresen eraldaketa sozialari: 1.000 euro.

-Vital Fundazioa saria, krisitik ateratzeko irtenbide eraldatzaileenei: 1.000 euro.

Metxa sari berezia, berrikuntzari: izen bereko azeleratzaileak emandakoa, proiektu berritzaileena denari eta hazteko ahalmen handiena duenari. Saria hurrengo Metxa Bootcamp-erako leku bat da, 4.000 euroan balioetsia.

Publikoaren sari berezia: ideia finalisten azken aurkezpenera doazenek aukeratuko dute. 300 euro.

Eskabideak aurkezteko epea gaur, otsailak 4, irekiko da, martxoaren 31ko 14.00ak arte. Oinarriak alavaemprende.com webgunean kontsultatu daitezke. Lurraldeko ekintzailetza agente ezberdinek osatutako dute epaimahaia, zeinak apirilaren hasieran hautatuko baititu finalistak. Aurten, berrikuntza gisa, zuzenean jakinaraziko da zein diren finalistak, apirilean egingo den online ekitaldi batean. Lehiaketa irabazi duten erreferentziazko proiektuetako batzuk izango dira bertan, gaur egun enpresa arrakastatsu eta sendotuak baitira. Gogoan izan behar dugu lehiaketatik 700 ekintzailetza ekimen baino gehiago igaro direla, eta horietako batzuk albiste izan direla berriki, Corowai esaterako; 2019an jasangarritasunaren eta publikoaren kategoriak irabazi zituen zuhaitzetan egurrezko etxolak jartzeko proiektu hori finalista izan da ‘Green Product Awards’ sarietan. Alias Robotics enpresa arabarrak, bestetik, zibersegurtasun laborategi bat eraikiko du Alemanian, Telefonicarekin batera.

Finalistek datorren irailaren 29an Europa Jauregian egitekoa den ekitaldi irekian aurkeztu beharko dituzte proposamenak, eta urriaren 5eko Ekin Day jardunaldiaren barruan jakinaraziko da zeintzuk diren irabazleak. Lehiaketaren iazko edizioan 43 proposamen aurkeztu ziren, eta antolatzaileek ekiteko ideia edo proiektu bat duten pertsona guztiak animatu dituzte aurtengo edizioan parte hartzera.

Europa Jauregian irailaren 29rako antolatu den jardunaldia bosgarren urtez jarraian B2B topaketa egiteko baliatuko da orobat. Bertan, ekintzaileek banakako bilerak egin ahalko dituzte aholkularitza-, finantzaketa- eta bizkortze-erakundeekin, bai eta beste ekintzaile batzuekin ere. Parte hartu ahal izateko www.alavaemprende.com webgunean eman behar da izena aurretik. Aurreko deialdietan aldebiko 150 bilera baino gehiago egin ziren, eta horietatik lankidetza berriak sortu ziren.

Gazteen artean ekintzailetza sustatzea

2021eko Araba Ekinean-ek gazteen artean ekintzailetza-bokazioa eta -talentua bultzatzeko ekintza-programa oso bat ere garatuko du. Ildo horretatik, pandemia gorabehera, bihar bertan egingo da ohiko Eskola Enpresen Azoka, baina oraingoan online ekitaldi baten bidez. Topaketan 40 ekintzailetza proiektu aurkeztuko dira, lurraldeko lanbide-heziketako 7 ikastetxetako ikasleek sortuak. Epaimahaiaren iritziz ekimenik original eta sortzaileena denak 200 euroko saria jasoko du.

Urtean zehar beste ekintza batzuk ere garatuko dira, besteak beste, ‘Etorkizuna sortzen elkarrizketak’ izenekoa. Elkarrizketa horiek bideoan grabatuko dira, eta Arabako ekintzailetzaren arloko hainbat erreferentek zenbait alderdiri buruz eztabaidatuko dute, hala nola ekonomia berriei buruz (lankidetzazkoa, soziala, zirkularra…) eta ekintzailetzaren inguruko joera edo eguneroko egoerei buruz. Guztira lau elkarrizketa egingo dira urtean zehar; horiek Araba Ekinean-en webgunean jarriko dira eta sare sozialen bidez zabalduko dira.

Ekiteko bokazioa sustatzeko eta pertsonek proiektu bat abiarazteko duten gaitasuna neurtzeko, lineako ‘ihes-gela’ bat ere sortuko da. Aplikazio hori berariaz ekintzailetzan zentratuko da, eta 40 minutu baino gutxiagoan parte-hartzaileek 10 erronka gainditu beharko dituzte ekintzailetzaren “sehaskara” iritsi aurretik. Gure ekintzaile harrobia jolasaren bidez handitzeko modu bat izango da. Taldeka jokatzeko eta horrela lankidetzarako espiritua sustatzeko pentsatutako dinamika da. ‘Escape room ‘hori edozein gailutatik erabili ahalko da, baita mugikorretatik ere. Azkenik, ate irekien jardunaldi batzuk ere programatuko dira, lurraldeko haztegiak ezagutzeko, hau da, Arabako proiektu berriak garatzen ari diren espazioak.

Ekin Day eta Pre-Ekin Day

Ekin Day izeneko topaketa nagusiari dagokionez ere izango du berrikuntzarik 2021eko edizioak. COVID-19k eragindako egoera dela eta, aurrez aurreko ekitaldia urriaren 5ean egingo da, baina maiatzean online deialdi bat egingo da. ‘Lurraldean ekin’ izenburupean, Araba osoko proiektu eta ekintzaileen adibideak erakutsiko dira, horien guztien artean harreman eta networking handiagoa sortzeko. Bestetik, Ekin Day jardunaldian Araba Ekinean sariak eta ‘Zure ideiak balio du’ lehiaketakoak banatuko dira, eta horretaz gain, etorkizuna moldatzen eta gizartean eragin positiboa sortzen ari diren pertsona eta ekimenen hainbat adibide inspiratzaile aurkeztuko dira. Behin betiko programak erreferentziazko zenbait pertsonekiko elkarrizketak barne hartuko ditu, eta laster ezagutaraziko da,  alavaemprende.com webgunean.

Ekintzailetzari buruzko online topaketen programa

Aurten ere Ekin Breakfast programa antolatuko da Araba Ekinean-en barruan: lurraldeko ekintzailetzarekin lotutako sektore eta alderdi ezberdinei buruzko gaikako topaketa txikiak. Hasiera batean aurrez aurrekoak ziren topaketa horiek, baina pandemia dela kausa birtual bihurtu dira, Arabako ekintzaileei ezagutza eta negozio-aukerak eskaintzen jarraitzeko asmoz. Hala, 2020an, horrelako sareko 9 topaketa egin ziren, 37 ekimen ekintzaile baino gehiago aurkeztu, eta 300 parte-hartzaile inguru bildu. Hala, krisi sanitarioaren erronkei erantzuteko birmoldatu diren Arabako enpresen adibideak erakutsi ziren, hasten ari diren proiektuetarako inbertsioa lortzeari buruz hitz egin zen, Araba/Gipuzkoa mugaren bi aldeetako adibide berritzaileei buruz edo Arabako Errioxako ekintzailetza disruptiboari buruz, besteak beste.

2021ean dagoeneko egin da Ekin Breakfast saio bat, joan den urtarrilaren 28an, lurraldeko ekintzaileek jaso ditzaketen laguntzak eta dirulaguntzak aurkezteko, eta 70 pertsonak baino gehiagok eman zuten izena. Otsailean beste bi programatuko dira, oso gai ezberdinekin: ‘Zer egin dezake marketin digitalak ekintzaileen alde?’, eta “Ekiteak ez du adinik”; azken horrek 45 urtetik gora proiektu berriak abiarazteko gai izan diren pertsonen adibideak erakusteko xedea du. Horrelako topaketak urte osoan zehar egingo dira, eta online izaten jarraituko dute osasun-baldintzak hobetu arte.

Ekintzailetza-katea

Edizio honetako beste berrikuntzetako bat enpresen eta lurraldeko ekintzaileen artean ekintzailetza-kate bat sortzea izango da. Arabako ekintzailetza-ekosistema hori bistaratzea eta balioestea da asmoa, protagonista nagusien laguntzarekin, Estatu osoko onena dela aitortu baita. Alavaemprende.com webgunean espazio bat sortuko da, nahi duen enpresa edo proiektu ekintzaileak bere balio-proposamena hobetzen lagundu dion beste ekimen bat nabarmendu dezan.

 

Share

Gasteizko Udalak enpresa txiki eta ertainetan berrikuntza sustatzeko hitzarmen bat onetsiko du

 

Ekonomia Sustapenaren Sailak eta Innobasquek lehiakortasuna hobetzen lagunduko diete enpresa txiki eta ertainei

 Ekonomia Sustapenaren, Enpleguaren, Merkataritzaren eta Turismoaren Sailak esparru-akordio bat sinatuko du Innobasque-Berrikuntzaren Euskal Agentziarekin, Gasteizko enpresa txiki eta ertainetan horretara bideratutako jarduerak sustatzen laguntzearren. Tokiko Gobernu Batzarrak gaur onetsi duen hitzarmenari esker, irtenbide berritzaileak ezartzeko bereziki diseinatutako tresna eta prozesuak erabiliko dira lehentasunezko sektoreetako enpresentzat gako diren erronkei aurre egiteko.

2021erako lankidetza-esparru berria onestearen ondorioz, talde tekniko bat eratu eta garatuko da enpresei etengabe eta era antolatuan laguntzeko, sektoreak dituen berrikuntza erronkei erantzun eraginkor eta efizienteak emango dizkieten irtenbideak eskura ditzaten.

Lehen alkateorde eta Ekonomia Sustapenaren zinegotziak nabarmendu du “zein garrantzitsua den jarduera berritzailearen sustapena eta sistematizazioa udalerriko enpresen lehiakortasuna hobetzeari begira. Hau beste urrats bat da ekintzaileei laguntzeko dugun estrategian, eta Gasteizko enpresa-ehunaren giharra garatzen eragin onuragarria izan dezan espero dugu”.

 

Share