Prentsa Oharren banner

(Argazkiez eguneratuta) Ekonomia Sustapenak bat egin du SEA ostalaritzak eta Gasteiz Onek ostalaritza bultzatzeko abiarazitako “Dastatu Vitoria-Gasteiz” kanpainarekin

  • Hamar afari zozketatuko dira uztailaren 26ra arte ekimenari atxikitako 220 establezimenduetan kontsumitzen dutenen artean.

Maider Etxebarria lehen alkateordea buru duen Ekonomia Sustapenaren, Enpleguaren, Merkataritzaren eta Turismoaren Sailak “Dastatu Vitoria-Gasteiz” ekimena aurkeztu du, gaur goizean, SEA ostalaritza eta Gasteiz Onekin batera. Gasteizko ostalaritzari laguntzeko ekimena da, pandemiak sektorean izan duen eraginaren ondoren.

220 establezimenduk egin dute bat ekimenarekin, eta azken hilabeteetan sektoreari leial izan zaizkion herritarrak saritzea du xede, eta bi pertsonentzako hamar afari zozketatuko dira. Gaurtik uztailaren 26ra bitartean, kutxak egongo dira atxikitako establezimenduetan, eta bezeroak beren datuak utzi ahalko dituzte bertan, zerbait kontsumitu ondoren, hamar afarien zozketan parte hartu ahal izateko.

Ekonomia Sustapenaren zinegotzi Maider Etxebarriak prentsaurrekoan adierazi duenez, “Gasteizko udalak hainbat neurri jarri ditu sektoreari laguntzeko, esaterako, kaleko mahaiak, laguntza ekonomikoak, tasak ordaintzeko salbuespenak eta dinamizazio-neurriak. Ildo horretan, Udalean erne jarraituko dugu, eta honelako kanpainen alde egiten “ gaineratu du. Halaber adierazi du “ostalaritza bidegabeki seinalatu dute eta merezi duten gutxienekoa da gure laguntza eta profesionaltasuna aitortzea”.

Bestalde, SEA ostalaritzako lehendakari Elena Martinek adierazi duenez, “ordezkatzen dudan sektoreak baikortasunez aurre egiten dio, baina zuhurtziaz, Gasteizko ostalaritzarako udarik onena izatea espero duenari, izan ere ostalaritzak gasteiztarren beharra du, eta gasteiztarrek beren ostalaritza behar dute”. Ildo horretan, Martinek adierazi du ostalaritza prest dagoela bezeroen behar eta gustuak betiko kalitatearekin asetzeko, higiene- eta segurtasun- neurri zorrotzak betez.

Gasteiz Oneko lehendakari Diego Martinez de San Vicentek adierazi duenez “ekimen honek ikusgarritasuna eman nahi dio pandemiak larriki jotako sektoreari, arreta-gunea izan baita pandemian, eta orain sektoreari buruz modu positiboan hitz egin dadila nahi du, hiriari ematen dion guztiagatik”. Halaber, herritarrei eskerrak eman dizkie kontsumitzeagatik. Bestetik, Martinez de San Vicente jaunak SEAren eta Gasteiz Onen arteko lankidetza goraipatu du. “Pandemiaren aurretik, baina batez ere pandemian, elkarrekin aritu gara ostalarien interesak defendatzen, gure indarrak batuta” adierazi du.

Share

Etxebarriak iragarri du enplegurako laguntzak gehituko direla, eta kultur industriari laguntza handiagoa emango

 

Gasteizko lehen alkateordeak akordioak eskatu ditu “pultsua berreskuratzen ari den” ekonomia sustatzeko

 

Gasteizko lehen alkateorde Maider Etxebarriak bertako ekonomia bultzatzeko akordioak lortzeko premia aipatu du, krisi sanitarioak jota jarraitzen duen arren, “pultsua berreskuratzen ari baita”. Ekonomia Sustapenaren, Enpleguaren, Merkataritzaren eta Turismoaren zinegotziak azaldu duenez, “alderdien arteko akordioak, baita beste erakunde batzuekikoak eta sektore pribatuarekikoak ere, inoiz baino garrantzitsuagoak dira, eta gakoa izango dira hasia den biziberritze ekonomikoko prozesuan.

Udal politikari buruzko eztabaida orokorraren bigarren saioan, Goiuri jauregian, Etxebarriak nabarmendu du Ekonomia Sustapenerako Sailak azken urtean 3,3 milioi euro txertatu dituela tokiko ekonomian, zenbait laguntza-ildoren bitartez, eta dirulaguntza horiek 1.800 onuradun ingururengana iritsi direla; gainera, beste erakunde batzuen laguntzekin bateragarri izan dira.

Bestetik, enplegurako udal laguntzetarako aurrekontua handitu egin dela aipatu du, “aldi baterako kontratuak mugagabe bihurtzen laguntzeko xedez”. Partida hori milioi erdi eurokoa izan da, iaz baino 50.000 euro gehiago, eta 2019an baino 100.000 gehiago.

Orobat, Convention Bureau entitatea sortzeko lehen urratsak egin direla nabarmendu du lehen alkateordeak: “lehen fase batean, biltzarrak eta profesionalen bilkurak erakarriko ditu horrek, arlo publikoaren eta pribatuaren arteko lankidetzaz, eta bigarren fase batean, funtzio gehiago hartuko lituzke, ekitaldiak erakartzeko”.

Ildo horretatik, Etxeberriak nabarmendu du berak gidatzen duen saila lehen aldiz “berariazko laguntzak lantzen ari dela (100.000 euro) ekitaldiak erakartzeko asmoz”, eta Europa jauregian aldagelak egokitzen ari direla, ikuskizunak hartzerik izan dezan, Principal antzokiko obrak egiten diren bitartean hura ordezteko.

Kultur industriari laguntzea

Maider Etxebarriak kulturak Gasteizko “ekonomiaren motor” gisa duen egitekoa aldeztu du. Horrekin lotuta, “kultur sektorearekiko konpromisoa” indartu nahi izan du, bai programazioari bai azpiegiturei dagokienez. Etxebarriak Principal antzokiaren garrantzia azpimarratu du, “kultur baliabide horrek Euskadiko hiriburuaren mailako kutxa eszenikoa eta besaulki patioa edukitzea merezi baitu”. Baieztatu duenez, “laster aurrepausoak emango dira arlo horretan, datozen asteetan lehiaketara aterako baita eraikuntza-proiektua”.

Bide batez, Etxebarriak Iradier Arena ekarri du hizpidera, Kultura Biziaren “etxea” bilakatu baita, “dagoeneko eredu bihurtu den kultur esperientzia”. Lehen alkateordeak bereziki eskertu nahi izan du elkartzen jakin duten sustatzaile pribatuen lana, “beste hiri batzuentzat eredugarria baita”. “Oso argi dugu Iradier Arenak egonkortzeko beharra duela, eta horretarako Aldundiarekin batera ari gara lanean, urriaz geroztik ere haren programazioari eusteko, urte bukaerara arte. Esparruaren kudeaketa akustiko eta klimatizazioa hobetzeko lanak egitearen truke kudeaketa esleitzeko aukera ere aztertzen ari gara”, zehaztu du Etxebarriak bere hitzaldian.

 

 

 

 

Share

Gasteizek bere turismo-eskaintza aurkeztu du Madrilen

Lan jardunaldia “Etorri bidaiatzera” kanpainaren parte da, eta horrekin Arabak bisitariak bilatu nahi ditu Espainiako hainbat hiritan

Gasteizek bere turismo-eskaintza “seguru eta jasangarria” aurkeztu du gaur Madrilen berrogeita hamar bat bidaia agentziaren, bidaia agentzia handizkariren eta prentsa espezializatuko kazetariren aurrean. Lehen alkateorde eta Ekonomia Sustapenaren eta Turismoaren zinegotzi Maider Etxebarriak hiriaren turismo-eskaintza goraipatu du “Etorri bidaiatzera” kanpainaren barruan antolatutako lan jardunaldian, Araba eta bere hiriburua nazio mailan ezagutarazteko pentsatua. Aurkezpenean bigarren diputatu nagusiorde eta Enplegu, Merkataritza eta Turismo Sustapenaren foru diputatu Cristina Gonzálezek, Gatz Harana Fundazioaren zuzendari Pablo de Oraák eta Santa Maria Katedrala Fundazioaren zuzendari Jon Lasak ere hartu dute parte.

Etxebarriak azpimarratu duenez, Gasteizek eskaintza “oso eta kalitatezko” bat dauka, eta ekoturismoa, ondarea eta gastronomia uztartzen ditu, besteak beste. “Oso hiri gutxik ematen diote bisitariari hain ondo zaindutako Erdi Aroko hiriguneaz gozatzen egon, eta oinez minutu gutxitan espazio naturaletara iristeko aukera, bertan erlaxatu, ibili eta kirola egiteko”, azpimarratu du.

Share

Merkataritza Ganberarekin hitzarmena sinatzea onetsi du udal gobernuak, Itun Berdeko enpresa txiki eta ertainen nazioartekotzea sustatzeko

17.000 euro bideratuko ditu Ekonomia Sustapenerako Sailak kanpo-sustapeneko ekintzak garatzera

Merkataritza eta Industria Ganbera Ofizialarekin hitzarmena sinatzea onetsi du gaur Tokiko Gobernu Batzarrak, Itun Berdeko komunitateari atxikitako enpresa txiki eta ertainek beren nazioartekotze-prozesua bultzatu ahal izan dezaten.

17.000 euroko ekarpena egingo du Ekonomia Sustapenaren, Enpleguaren, Merkataritzaren eta Turismoaren Sailak, enpresa txiki eta ertain horiek kanpo-sustapeneko jarduerak egin ditzaten, hala nola bisitak nazioarteko azoka sektorialetara, networking-topaketak edo merkataritza-misioak.

Hitzarmenari esker, 300 eta 600 euro arteko laguntzak jasoko dituzte enpresek, joan-etorrietako gastuei aurre egiteko, eta 450 eurokoak, kontaktu-agenden gastuetarako. 7.700 euro, berriz, Ganberaren zerbitzuetarako izango dira.

“Erakundeen arteko lankidetza-akordio honekin, kanpoan sustatzeko prozesuan lagunduko diegu ingurumena zaindu eta inpaktu ekologikoa murrizteko konpromisoa bere egina duten hiriko enpresei”, azaldu du Maider Etxebarria alkateordeak.

Share

Herritarren eskari nagusiei erantzutea xede duen aparteko inbertsio-plana aurkeztu du udal gobernuak

  • 7,2 milioi euro baliatuko dira espazio publikoa eta udal instalazioak mantendu eta hobetzeko
  • 2,7 milioi euro hiriko galtzadetako asfaltoa hobetzeko izango dira; besteak beste, Mendizabaleko aparkalekuko zoladura osoa berrituko da
  • Beste 2 milioi euro inguru gizarte-etxeak, ikastetxeak, kiroldegiak eta udal eraikinak hobetzeko hainbat neurri bideratzeko izango dira

Gorka Urtaran audioa

Dagoeneko erabaki da zertarako baliatuko den 2020ko aurrekontuaren emaitzaren saldo positiboa. Hain zuzen ere, Urtaranen gobernuak herritarren eskari nagusiei erantzuteko taxutu duen aparteko inbertsio-planean erabiliko dira. Horretarako, bi lan-eremu nagusi finkatu dira, espazio publikoa eta udal instalazioak, eta hainbat mantentze- eta hobekuntza-lan egingo dira bertan. Horrez gain, atal berezi bat izango da, pandemiak eragindako sektoreei laguntzeko. Gasteizko alkate Gorka Urtaranek eman ditu aparteko funts ekonomiko horren inguruko xehetasunak, lehen alkateorde Maider Etxebarriarekin eta alkateorde eta Ogasun zinegotzi Iñaki Gurtubairekin batera.

“Ez diegu inbertsio berriei ekingo, baizik eta lehendik ditugunak hobetu, eta, horretarako, herritarrek hainbat bidetatik helarazten dizkiguten lehentasunetan oinarritu gara. Pertsonen eguneroko bizitzan eragiten duten kontuak jo ditugu begiz, horien bizi-kalitatea hobetzen jarraitzeko. Hori da hiria egiteko gure modua, guztiongan pentsatuz, herritarrei entzunez, gero udal baliabideak ahalik eta modurik eraginkorrenean erabiltzeko”, adierazi du Gorka Urtaranek.

Orobat azaldu du zein diren plana posible egin duten hiru faktoreak: zorroztasuna, efikazia eta eraginkortasuna, baliabide publikoen kudeaketan. 2020ko aurrekontuetan izandako soberakina, nagusiki, Toki Erakundeak Finantzatzeko Foru Funtsaren bitartez Udalari egin zaion ekarpenari zor zaio batetik, eta bestetik, eta batez ere, pandemiak sortutako krisiaren hasieran udal gobernuak gastua kontrolatzeko abian jarri zituen neurri zorrotzei. “Hala jokatu izan ez bagenu, kontrako egoeran geundeke orain. 2020ko zorrak konpentsatzeko baliatu beharko genituzke 2021eko baliabideak”, gehitu du.

Aparteko inbertsio-planeko 7,2 milioi euroak zertarako baliatuko diren erabakitzeko, herritarrei modu aktiboan entzuteko udal ekosistema baliatu da, hau da, herritarren postontzia, webguneko “Alkateak entzuten dizu” atala, udal soziometroa eta herritarren partaidetza-organoen bitartez, hots, auzogune eta elkarguneen bitartez, jasotako ekarpenak. Jasotako eskaera guztiak gaika sailkatuz gero, hau da emaitza: % 67 bost multzotan biltzen dira, zein baitira udal eraikin eta instalazioetako inbertsioak, galtzadetako asfaltoaren konponketa —beharrezko den kaleetan—, zuhaitzak inausteko jarduketak, espazio publikoko argiteriako hobekuntzak eta pandemiak eragindako sektoreentzako laguntza.

Eraikin eta instalazioetako inbertsioak

Sozialisten esku dauden sailetatik udal ekipamenduak hobetzeko, jarduera ekonomikoa bultzatzeko neurriak garatzeko, administrazio elektronikoan aurrera egiteko eta kulturari laguntzeko egingo den ahalegin handia nabarmendu du Maider Etxebarriak.

Horretan guztian, 2,8 milioi euro inguru inbertituko dira. Besteak beste, kamerinoak eraikiko dira Europa jauregian, “Principal antzokiaren alternatiba izan dadin, hura eraberritzen hasten garenerako. Ehundik gora urte dituen antzokiko kultur jarduera hartuko duten agertokiak behar ditugu, eta Europa jauregia, Iradier Arenarekin eta Udalaren antzoki-sarearekin batera, aukera bikaina izango da, antzerki-konpainiek Gasteiza etortzen jarri dezaten”. 130.000 euro erreserbatu dira kamerinoak egiteko.

Handiagoa izango da Mendizorrotzeko udal-igerilekuetako eraikin soziala eraberritzeko baliatuko den partida, 550.000 euro inbertituko baititu bertan Mantentze Zerbitzuak, gehien bat irisgarritasuna hobetzeko obrak egiten. Era berean, 500.000 euro baliatuko dira Gamarrako kirol esparruko eraikina berritzeko.

Beste 376.000 euro ikastetxeetan pintatze-lanak egiteko, argiteria hobetzeko eta ekipamendu berriak jartzeko izango dira. Sansomendi eta Txagorritxun, berriz, 60.000 euro inbertituko dira bi osasun-parke eraikitzen, “adinekoek aukera izan dezaten ariketa egiteko eta aktibo mantentzeko, beren ongizate pertsonala eta bizi-kalitatea hobetzeko”, azaldu du Maider Etxebarriak.

Administrazio elektronikoaren hobekuntzan aurrera egiteko aukera emango duten neurrietan ere inbertsio nabarmena egingo da (250.000 euro), baita hirian jarduera ekonomikoa bultzatzeko ekintzetan ere (258.600 euro). Hezkuntza eta Kultura Sailak, berriz, 40.000 euro bideratuko ditu Kultura Bizia hitzarmenera, eta 73.000 euro baliatuko udal liburutegietarako bibliografia-funts berriak erosteko. Liburu-denda lokaletan gastatuko da kopuru hori, eta 2020ko aurrekontuetan jasotako 90.000 euroko partidari gehituko zaio.

Galtzadetako asfaltoa berritzea

Iñaki Gurtubai alkateordeak zehaztu ditu inbertsio-planeko gainerako atalak, espazio publikoari dagozkion kontuen ingurukoak. Nabarmentzeko da asfaltoa hobetzeko egingo diren inbertsioen blokea, guztira 2.724.000 euro. Gasteizko kaleetako zoladura konpontzeko azken agintaldietan egin den kanpainarik handienari ekiteko aukera emango du, autobus elektriko adimentsuaren ibilbide osoan lehendik egiten ari diren lanez gain. Aurreikusitako jardueren artean, nabarmentzekoa da Mendizabaleko aparkaleku osoan berrituko dela asfaltoa, guztira 25.000 m2tik gorako azalera.

Zuhaitz-inausketak

Hiriko zuhaitzak onik zaintzeko lanekin du zerikusia hirugarren blokeak. Hiriko inausketak hobetzeko 500.000 euroko inbertsioa aurreikusi da. 2021eko aurrekontuan auzoetako zuhaitzak kudeatzeko planerako lehendik zegoen 300.000 euroko kopuruari gehitu zaio hori, eta zuhaiztien gida-planeko 50.000 euroei.

Argiteria hobetzea

Laugarren multzoa, zenbatekoari dagokionez, argiteriaren hobekuntzari dagokio, 300.000 euro baliatuko baitira horretarako. Diru-kopuru hori ez da izango orain arteko luminarien ordez LED lanparak jartzeko, 150.000 euroko berariazko aurrekontu-partida baitago horretarako, ezpada argitasun gehiago emateko, beharrezko gertatzen den lekuetan.

Sektore ekonomikoei laguntzea

Herritarren eskari nagusiak aintzat hartzeaz gain, pandemiak eragindako krisiak gehien kaltetu dituen sektoreei laguntza ekonomikoa emateko erreserbatuko da funtsaren parte bat. Hain zuzen ere, 800.000 euro ostalaritzari eta jatetxeei emango zaizkien hobari fiskalak —mahaitxoen tasa eta zabor-tasa ordaintzetik salbuetsiz— berdintzeko izango dira. “Azken urtean egoera oso zailari aurre egiten ari diren mila bat negozio izango dira neurri horren onuradun”, adierazi du Iñaki Gurtubaik. Gorago aipatutako jarduera ekonomikoa sustatzeko 268.000 euroak gehitu behar zaizkio kopuru horri, eta kulturaren sektoreari laguntzeko 113.000 euroak.

 

 

Share

Ikerketa baten arabera, Gasteiz gai da industria-hondakinen erdia baino gehiago ekoizpen-katean aprobetxatzeko enpresen arteko hitzarmenen bitartez

Gasteiz izaera industrialeko hiria da eta ingurumenaren gainean eragin gutxiago duten ekoizpen sistemetara igarotzeko ahalmena du. Hala dio Ekonomia Sustapenerako Sailak eskatutako txosten batek, zeinaren bidez lehengaien sarrera, hondakinen sorrera eta ekonomia zirkularreko ereduetara igarotzea antolatzeko egon litezkeen sinergiak aztertzen diren. Azterlanaren arabera, orain industrialdeetan aprobetxatzen ez diren hondakinen % 58 ekoizpen prozesuetan berrerabil litezke. Lehen alkateorde Maider Etxebarriak eta Elkarrekin taldeko zinegotzi Garbiñe Ruizek aurkeztu dituzte gaur dokumentuaren ondorioak; izan ere, Elkarrekin taldeak diagnostiko hori egitea sustatu zuen 2020ko aurrekontuei baietza eman zienean.

Txostenak sinergia industrialak gauzatzeko oinarriak finkatzen ditu. Sinergia horiek ingurumen-onurak lortzea ahalbidetuko lukete emisioak murriztuta, lehengaiak erostean aurreztuta, eta, ondorioz, enpresen kostuak murriztuta. Diagnostikoari dagokion lehen fasean, berariazko software bat erabili da, besteak beste, enpresa batek sortutako hondakinetatik lehengai gisa inguruan zein erabil litekeen hautemateko. Kontuan hartu behar da euskal ETEen gastuen % 61 materialak erostearekin dutela zerikusia, eta material gehienak inportatuak direla.

Material-fluxuen azterketa hori “oso interesgarria da ingurumenaren eta ekonomiaren ikuspegitik Gasteiz bezalako hiri batean, non industria BPGaren % 27 den eta lau enplegutatik ia bat sektore horri dagokion”, azpimarratu du Etxebarriak. Alkateordeak esan duenez, “kontuan izango ditugu datu horiek sektorearekin lantzen ari garen Industriari Laguntzeko 2021-2024 Planean neurriak antolatzean”. Estrategia hori “ekonomia zirkularrera igarotzea, digitalizazioa eta berrikuntza bezalako euskarrietan oinarrituko da”.

Garbiñe Ruizek azaldu duenez, udalaren azterlanak “balio izan digu egiaztatzeko, aurreikusten genuen bezala, enpresek hobetzeko aukerak dituztela, sektorea ingurumen-eragin gutxiago duten negozio-ereduetara igarotzea errazteari begira”. Elkarrekineko zinegotziak nabarmendu duen moduan, “industriak pisu handia du ekonomian eta enpleguan. Sektore hori ezin da hiriaren izaera berdetik kanpo gelditu, ezta datorren hamarkadako eredu ekonomikotik kanpo ere. Premiazkoa da industriek ahalik eta azkarren egitea trantsizio ekologikoa, enpresen artean ekonomia zirkularreko prozesuak ahalbidetuz”.

Ruizek zehaztu duenez, Ekonomia Sustapenerako Sailaren azterlanak hautemandako aukera nagusiak honako hauek ustiatzearekin daude lotuta: eraikuntzako hondakinak, galdaketa hondarrak eta zepak, eraisteetako asfaltoa, lohi organikoak, garbiketa prozesuetako urak, edo ehun-hondakinak, besteak beste. Etxebarriak gogorarazi du 2020an egindako diagnostikoa hiru urteko proiektuaren lehen faseari dagokiola. Zirkularizazio-indizea identifikatu ondoren, Ekonomia Sustapenerako Sailak ekonomia eta ingurumen balantze bat kontratatuko du laster, estrategia horren eragina neurtu ahal izateko ingurumenaren, ekonomiaren eta enpleguaren ikuspegitik. Hirugarren fasean, 2022an, Gasteizek proiektu pilotu bat eta baterako lan saioak jarriko ditu abian.

 

 

 

 

 

Share

Udalak bi web-aplikazio aurkeztu ditu: VGReservas eta GeoVitoria-Gasteiz

Berrikuntza teknologiko horien bidez, udalaren instalazioen erreserbak kudeatu daitezke, eta kontsultak egin daitezke edozein gailu elektronikotik, erraz eta arin

 

Gaur goizean, bi berrikuntza teknologiko aurkeztu dira prentsaurrekoan: VGReservas eta GeoVitoria-Gasteiz web-aplikazioak, zeinak gaurdanik erabilgarri baitaude. Haien bidez Udalak aurrera egiten du bere eraldaketa digitalean eta herritarrei eskaintzen dizkien zerbitzuan.

Gaur goizean egindako prentsaurrekoan, Gasteizko lehen alkateorde Maider Etxebarriak eta Udal Administrazioaren eta Eraldaketa Digitalaren zinegotzi Borja Rodriguezek esku hartu dute.

“Gasteiztarrengandik gertuko administrazio baten aldeko apustua egiten dugu, herritarren bizi-kalitatea hobetzeko, zerbitzu publikoetarako sarbidea errazteko eta belaunaldi berrien beharrizanei zein gainerako pertsonen beharrizanei erantzuteko”, adierazi du Etxebarriak.

“Eraldaketa digitalak, zeina lortu nahi baitugu legegintzaldi honen hasieratik, garrantzi handiagoa hartu du pandemiaren ondorioz. Osasun-krisiak ahalegin handiak inbertiarazi dizkigu Udala herritarrekin komunikatzen den era hobetzen”, gehitu du.

Borja Rodriguezek, bestalde, baliabide horien berrikuntzak aurkeztu ditu, zeinek eskaera handia baitute herritarren partetik.

VGReservas

  1. urtean, 31.965 erreserba egin ziren, guztira, Udalaren instalazioetan. Horietatik, 19.359 kudeatu ziren Udalaren webgunearen bidez (www.vitoria-gasteiz.org), hau da, guztizko kopuruaren % 60, eta goranzko joera nabaria du.

“Horregatik, VGReservas web-aplikazioa sortu dugu, erabiltzailearen esperientzia nabarmen hobetzeko. Haren bidez, gure gailuetako edozeinetatik (mugikorra, tableta, smartTVa eta ordenagailua) erreserba dezakegu, esaterako, saskibaloi-kantxa bat partida bat jokatzeko, edo gela bat etxejabeen komunitatearen bilera egiteko. Eta modu erraz eta intuitiboan egin dezakegu hori guztia”, gaineratu du.

Web-aplikazioak aukera ematen du bilaketak egiteko eta erreserbak gogokoetan gordetzeko (hori oso erabilgarria da hurrengo erreserbetan denbora aurrezteko), bai eta ikono bat gehitzeko gailuaren hasierako orrian, hartara zerbitzura era erosoagoan iristeko.

 

GeoVitoria-Gasteiz

GeoVitoria-Gasteiz zerbitzuak, berriz, 94.815 bisita izan zituen 2020an, eta 40.843 bide kalkulatu zituen, guztira. VGBus aplikazioaren estatistikei dagokienez (GeoVitoria-Gasteizekiko loturarekin funtzionatzen du), 390.689 bisita izan zituen 2020, eta hori Udalaren webgunearen trafikoaren % 4 da.

Aplikazioak hainbat zalantza argitzeko balio du, hala nola: “Non dago gizarte-etxe bat?”, “Nola iritsi naiteke hara etxetik?”, “Non dago kale jakin bat?”, “TAO eremua da?”, “Egongo al da laster gure etxetik gertu Puntu Berde Mugikorra?”, “Zer autobus- edo tranbia-linea hartu behar dut ibilbide jakin bat egiteko?” eta abar.

GeoVitoria-Gasteiz web-aplikazio berriarekin, aurrerantzean, edozein gailutatik (mugikorra, tableta, smartTVa eta ordenagailua) erantzun ahal izango zaie horrelako galdera guztiei.  Eta, horretaz gain, Udalaren webgunean orain arte eskainitako abiaduran baino azkarrago egingo da, eta, horrenbestez, itxarote-aldiak laburragoak izango dira.

Honako berrikuntza nagusi hauek eskaintzen ditu aplikazioak, lehen eskaintzen zen zerbitzuaren aldean: erabiltzaileak gailuaren hasierako pantailan instalatu ahal izango du aplikazioaren ikonoa, eta gogokoak markatu ahal izango ditu, hurrengo aldietan berriro behar baditu ere. Gainera, ibilbide bat bilatzean, erabiltzailea non dagoen markatzen du, mugikorraren GPSa erabiliz. Oinez, bizikletaz zein hiri-garraioz egiteko ibilbideak kontsultatu daitezke.

“Hiri-garraioari dagokionez, funtzionaltasun berri oso interesgarri bat du: aplikazioak erakutsiko digu zenbat falta den autobusak gure geltokira iristeko. Halaber, linea bakoitzaren ibilbideari buruzko informazio guztia izango dugu”, nabarmendu du zinegotziak.

 “GeoVitoria-Gasteiz ezinbesteko tresna da, bakoitzari bere mapa edukitzeko aukera ematen baitio, beti eguneratua eta zenbait bistaratzerekin. Kale izendegi gisa zein satelite bidezko mapa gisa erabil daiteke”, gehitu du.

Nahi dugun bistaratze-modua aukeratu ostean, erakuts dezake non dauden Udalaren baliabideak, eta gainerako edukiekin lotu: kale-izendegi ofiziala, atariak zehaztuta; bizikleta-bideen mapa; trafikoaren dentsitatea; trafiko-gorabeherak eta abar.

Gainera, beste zenbait aukera ere eskaintzen ditu: informazioa “bildumetan” taldekatu daiteke, esaterako, “aparkaleku publiko guztiak”; gertuko baliabideak bilatu inguruetan, eta informazioa partekatu kontaktuekin.

 

 

 

Share

Logroñoko alkatea Gasteizko Herritarren Segurtasunaren Sailarekin bildu da, Gasteizko Udaltzaingoaren eredua ezagutzeko

Logroñoko udalaren ordezkari batzuk –bertako alkate Pablo Hermoso de Mendoza, lehen alkateorde Eva Tobías eta udaltzainen komisario buru Pedro Galarreta– Gasteizen izan dira gaur goizean, hemengo Udaltzaingoaren ereduaren berri izateko.

Gasteizko lehen alkateorde Maider Etxebarriak hartu ditu Gasteizko udalean, eta Herritarren Segurtasunaren zinegotzi Marian Gutierrezekin, saileko zuzendari Javier Sáez Lanasekin eta Roberto Garcia Tobalina komisarioarekin bildu dira.

Errioxako hiriburuak Gasteizko udaltzaingoa hartu du erreferente eskaintzen dituen hainbat zerbitzutan. Agirrelandako zenbait atalek, genero- eta familia indarkeriaren taldeak eta adin txikikoen taldeak esaterako, piztu dute Logroñoko ordezkarien interesa.

Lehen topaketa honen ondoren, Gasteizko udalak Logroñoko udala bisitatuko du.

Share

Aurrekontuen inguruko akordioak bidea ireki dio Gasteizen susperraldi sozial eta ekonomikoari

 

  • Elkarrekin taldeak planteatutako zuzenketak Urtaranen gobernuak aurkeztutako kontu-proiektura bilduko dira

 Gorka Urtaran audioa

Gasteizko alkate Gorka Urtaran, lehen alkateorde Maider Etxebarria eta Iñaki Gurtubai alkateordeak pozik agertu dira Elkarrekin udal taldearekin 2021eko aurrekontua onestea ahalbidetuko duen akordio politikoa lortu dutela eta. Hiriarentzat eta herritarrentzat ona dela azpimarratu du alkateak. “Gasteizerako onak diren proiektu, ekimen eta akordioak bultzatzea dugu helburu bakarra. Akordio hau, zalantzarik gabe, horietakoa da. Egin beharrekoa egin dugula uste dugu. Aurrekontu berria edukitzea zen 2021erako finkatu genuen mugarrietako bat, eta lortu dugu, adierazi du Gorka Urtaranek.

Elkarrekin taldeak aurrekontu-akordioa lortzeko erakutsi duen prestutasuna eta erantzukizuna nabarmendu ditu alkateak: “Beste ideologia eta pentsaera bateko taldea da, baina politikagintzan oso garrantzitsuak diren bi gauza partekatzen ditugu: hiriaren interes orokorra defendatzen dugu, alderdien interesen gainetik, eta ikuspegi zabala dugu, elkarlanean aritzera garamatzana, une konplikatu honetan, Covid-19ak eragin duen egoera sanitario, ekonomiko eta sozial zail honetatik ateratzeko aukera emango digun aurrekontu bat edukitzeko”, nabarmendu du.

Gorka Urtaranek azaldu duenez, hiria berreskuratzeko ekarpen handiagoa egin ahal izango du Udalak akordioari esker, “ahalegin kolektibo horretan askoz hondar-ale gehiago jarri ahal izango ditugu; zehazki, 388 milioi hondar-ale. Ilusio-bide bat urratu dugu gaur”, adierazi du, Alfredo Donnayren lan baten izenburua parafraseatuz, “ilusio-bide bat da, murgilduta gauden egoera pandemiko hau lehenbailehen gainditzeko denok egin nahi genukeen bidea.

Maider Etxebarriak azpimarratu duenez, “akordio hau oso garrantzitsua da, Udalak aurrekontu bat izango duelako urte oso gogor bat atzean utzi ondoren. 2021ean asko dugu jokoan, eta azkenean esan dezakegu ekonomia suspertzen, zerbitzu publikoak sendotzen eta okerren daudenei laguntzen lagunduko diguten kontuak izango ditugula”. Ildo horretan, adineko pertsonei “arreta berezia” eskainiko diela iragarri du lehen alkateordeak.

Etxebarriak gaineratu duenez, “beste behin ere, akordioa gailendu zaio konfrontazioari. Akordioak lortzen dituzten politikariak ditu Gasteizek. Hori nabarmendu beharra dago, eta are gehiago orain, gizartea klase politikoa gure herrialdeko arazo nagusietako bat delakoan dagoen honetan.”

2021erako aurrekontu-proiektuak 388 milioi euroko zenbatekoa du —458.344.818 euro, udal-sozietate eta -erakundeen kontuak gehituz gero— eta, Iñaki Gurtubaik azpimarratu duenez, inbertsio publikoaren hazkunde handiagatik nabarmentzen da —34,4 milioi euro—. Inbertsio horren ondorioz, 521 lanpostu berri izango dira. Eskualdeko Enplegu Planaren bidez kontratatuko diren 200 pertsonak gehituko zaizkio horri, eta Gazteen Enplegu Planeko 70 kontratu berriak.

Share

Migrazioen Estatuko idazkari Hana Jalloul-ek gazteak lan-munduan txertatzeko Hazia 23 programa babestu du Gasteizen

Lehen alkateorde Maider Etxebarriak azpimarratu du programak ehun pertsonari eman diela arreta abian jarri zenetik

Migrazioen Estatuko idazkari Hana Jalloul-ek zuzenean ezagutu du gaur gazteak lan-munduan txertatzeko Hazia 23 programa, zeina 2016/2017 jarri baitzuen abian Udalak. Lehen alkateorde Maider Etxebarria Jalloul eta  Gobernuaren Euskal Autonomia Erkidegoko ordezkari Denis Itxasorekin batera izan da CETIC-Informazio eta Komunikazio Teknologien Udal Zentrora egin duten bisitan, Castro Urdiales kalean. Ekonomia Sustapenaren zinegotziak nabarmendu du dagoeneko 103 pertsona igaro direla programatik, zeina ez prestakuntzarik ez lan-esperientziarik ez duten 23 urtetik beherako gazteei zuzentzen baitzaie. Parte-hartzaileen % 67k atzerriko jatorria du. “Estatuko idazkariaren bisitak proiektuaren arrakasta baieztatzen du. Udaleko Enplegu Zerbitzutik estrategiak koordinatzen ditugu gazteek erraztasun handiagoak izan ditzaten lanpostu bat lortzeko, bereziki tokiko enpresetan”, adierazi du Etxeberriak.

Hil honen hasieran, Udaleko Gobernu Batzarrak 50.000 euroko ekarpena onetsi zuen Hazia 23 programaren V. ediziorako; Adsis fundazioak, Vital fundazioak, Egibidek eta Cáritasek ere laguntzen dute programa garatzen.

CETICeko lantegietako batera egindako bisitan, Estatuko idazkariak gazteetako batzuen lana ikusi ahal izan du; ondoren, arduradunekin elkartu da, gako guztiak ezagutzearren. Hazia 23 egitasmoaren berrikuntza nagusia da erakunde laguntzaileek beren gazte-enplegurako politikak koordinatzen dituztela, laneratze prozesu baten fase guztiak barne hartzeko, programaz baliatu daitezkeen pertsonak identifikatzetik enpresan kontratatu arte. Une honetan, hogei gazte baino gehiago ari dira programan, talde eta leku ezberdinetan banatuta.

Programan, besteak beste, espezialitate hauek eskaintzen dira: fabrikazio mekanikoko lan lagungarriak, ibilgailuen elektromekanika mantentzeko lan lagungarriak, biltegiko lan lagungarriak, ile-apainketako lan lagungarriak, merkataritzako lan lagungarriak, iturgintza eta komunitate dinamizazioa.

 

Hana Jalloul, Maider Etxebarria, Denis Itxaso

Hana Jalloul

Maider Etxebarria

Maider Etxebarria, Denis Itxaso, Hana Jalloul

Share