Prentsa Oharren banner

“Aire zabaleko musika” zikloaren aurtengo edizioa aurkeztu du Musika Bandak

Denboraldi honetan 14 kontzertu egingo dira, ekainaren 4tik urriaren 1era bitartean, Zulueta jauregiko lorategietan eta Zabalganeko eta Hegoalde gizarte-etxeetan.

 

Gasteizko Udal Musika Bandak “ Aire zabaleko musika” zikloaren aurtengo edizioa aurkeztu du: guztira 14 kontzertu emango ditu ekainaren 4tik urriaren 1era bitartean.

“Programa Zulueta jauregiko lorategietan gauzatuko da, bi emanalditan izan ezik, haiek Hegoalde eta Zabalgane auzoetan egingo baitira. Guztiak, 19:00etan izango dira”, iragarri du Hezkuntza eta Kultura Saileko zinegotzi Estíbaliz Cantok.

Udal Bandaren zuzendari Luis Orduñak eta Bandaren zuzendariondoko Iker Olazabalek zuzenduko dituzte kontzertuak. Biek zinegotziarekin batera parte hartu dute gaur goizean egin den prentsaurrekoan. ““Aire zabaleko musika” zikloarekin, kalitateko musika eskaini nahi diegu herritarrei kalean bertan, eta horrekin lagundu gure hiriaren suspertze kulturalean”, adierazi du Cantok.

Orduñak, aldiz, egitarauaren xehetasunak azaldu ditu; horretan, “publiko guztiak kontuan hartzen dituen askotariko errepertorio” baten alde egin dute apustua.

Zulueta jauregiko lorategiak ekainaren 4an estreinatuko dira, lehenengo kontzertuarekin. “Jatorrian” izenburuarekin, Euskal Herriko zein nazioarteko zenbait autorek 1816tik 1926ra bitartean idatzitako musika joko du: Beethoven eta Arriaga, Saint-Saëns eta Sebastián Iradier eta Vaughan Williams eta Luis Aramburu. Beste hitzordu batzuk ere egongo dira ekainean, hala nola “Gerra eta Bakea” (hilaren 18a, ostirala), “New Orleansetik Abbey Roadera” (hilaren 21a, astelehena) eta “Konbergentziak” (hilaren 25a, ostirala).

Hegoalde gizarte-etxeak, berriz, uztailaren 9an hartuko du Banda, “Pertsonaia zinematografikoak” proposamenarekin, hainbat filmetako musikan oinarritua: “Spiderman”, “Zorba Greziarra”, “Gladiator”, “Batman” eta “How to train your dragon”. Eta ostiralean, uztailaren 16an, Zabalganeko gizarte-etxearen txanda izango da, John Williams konpositore estatubatuarraren omenezko monografikoa batekin; horretan, Bandak film hauetako soinu-bandak joko ditu: “Hook”, “Star Wars”, “Harry Potter” eta “Terminala”.

Abuztuan, Gasteizko ikusleek bost emanaldi gozatu ahal izango dituzte Zulueta jauregian: “Eguzkia berriz irtengo da” (abuztuaren 4a, asteazkena), “Musika eta ardoak” (abuztuaren 5a, osteguna), “Dantza eta antzerkia” (abuztuaren 6a, ostirala), “…ren abenturak” (abuztuaren 7a, larunbata) eta “Gure adinekoentzat” (abuztuaren 8a, igandea).

Hiru emanaldirekin itxiko du bere egitaraua Bandak: “So British” (irailaren 10a), “Besteren begiradak” (irailaren 17a) eta “Koktela” (urriaren 1a).

Ostiraletako kontzertuetarako gonbidapenak kontzertua egingo den asteko astelehenean lortu ahal izango dira, Udalaren webgunean, 09:30etik aurrera, eta 945 16 16 18 telefonoan, 09:30etik 14:00etara bitartean, lanegunetan. Salbuespen gisa, ekainaren 4an (ostirala) egitekoa den lehenengo kontzerturako gonbidapenak bihartik aurrera (ekainaren 1a, asteartea) erreserbatu ahal izango dira, 09:30etan, bide berberak erabiliz. Pertsona bakoitzak 2 gonbidapen erreserbatu ahal izango ditu, gehienez.

“Gasteiztar guztiak gonbidatzen ditugu “Aire zabaleko musika” zikloaren edizio honetan parte hartzera. Osasun-agintariek ezarritako neurriak beteko dira emanaldietan. Kultura segurua baita”, azpimarratu du Cantok.

Informazio gehiago: www.vitoria-gasteiz.org/banda

 

 

Share

“Baikortasunerantz” kontzertuarekin amaituko du abonamenduko bere denboraldia Udal Bandak

Principal antzokian izango da emanaldia, maiatzaren 12an (asteazkena), 19:00etan

Kartela_banda_kontzertua_

Maiatzaren 12an (asteazkena), arratsaldeko zazpietan, “Baikortasunerantz”, abonamenduko azken kontzertua, emango du Gasteizko Udal Musika Bandak, Principal antzokian. Luis Orduñak zuzenduko du, eta Annelien van Wauwe eta Raül Verdú klarinete-joleak izango dira emanaldiko gonbidatuak.

Honako pieza hauek osatuko dute errepertorioa: Joselu Ruiz de Gordoaren “Txori Gorria”, erabateko estreinaldia; Eric Whitacre-ren ‘Godzilla eats las Vegas’; Dirk Brossé-ren ‘War Concerto’, eta Kimberly Archer-en ‘Common Threads’, zeina lehenengo aldiz joko baitu Bandak.

Kontzertua aurkezteko prentsaurrekoan, Gasteizko Udal Bandaren zuzendari Luis Orduñak eta Raül Verdúk hartu dute parte. Horretaz gain, bideo bat proiektatu da, Annelien van Wauwe artistaren mezu batekin.

Zuzendariaren oharrak

“Kontzertu honetan, Gasteizko Udal Musika Bandak emozioetan zehar bidaiatzera gonbidatuko gaitu, eta, hala, tristezia eta goibeltasunetik positibismo eta umorera eramango gaitu ikusleok. Hori da, hain zuzen ere, kontzertuaren benetako hari nagusia: Balkanetako gerratik, betiere “esna” dagoen Las Vegas hiriraino eramango gaituzte Bandak eta bakarlari gonbidatuek, eta, soinuaren bidez, gerrek eragindako mina nabarituko dugu, baina baita umore-sena eta dibertsio hutsa ere.”

“Kimberly Archer konpositore amerikarraren musikarekin hasiko da kontzertua. Lehenengo lan horren izena “hari komunak” edo izango litzateke euskaraz. Eta konposizioaren diskurtsoan autoreak mantentzen duen umore-sena da, hain zuzen, lanak jorratzen duen “hari” hori. Lanak, indartsu eta erritmikoa, hasiera bizkor-bizkorra emango dio kontzertu optimista honi.”

“Egitarauko hurrengo lana, askoz ere serioago, sakonago eta konplexuagoa da, Dirk Brossé konpositore belgikarraren “War Concerto” edo gerra-kontzertua. Lan honetan, Udal Bandak eta Annelien van Wauwek gerrak eragindako ondorio suntsitzaileetan murgilduko gaitu, horretan gurasoak galdu dituen haur tolesgabe baten begietatik, kasu honetan. Konpositoreak gerrarekiko errefusa eta protesta sendoa erakutsi nahi ditu, baina, aldi berean, hobea izango den etorkizunerantz gidatu nahi gaitu oso modu sentikor eta baikorrean, betiere atzean utzi duen hondamendi ikaragarriak ahantzi gabe.”

“Hurrengo lana Gasteiztarrek ondo ezagutzen duten Joselu Ruiz de Gordoa konpositorearen estreinaldi bat da; mundu fantastiko batera eramango gaitu Raül Verdú Selles-en klarinetearen eta Bandaren bitartez. Ikusten dugunean berehalako ongizatea eragiten digun natura eder, aratz eta birjina hori irudikatzen du “Txori gorria” lanak. Eta halakoxea da Ruiz de Gordoa arabarraren musika: lañoa eta atsegina, eta, aldi berean, positibista eta magikoa.”

“Oso obra berezi batekin, musika ia zinematografikoarekin amaituko da kontzertua. Eric Whitacre konpositore estatubatuarrak fikziozko istorio bat kontatuko du musikaren bidez: film japoniarretako Godzilla munstroak bizia lortu, eta Las Vegas hiria suntsituko du. Lan honek, seguruenik ez du epel utziko inongo entzulerik.”

 

 

 

Share

‘Globaliz-acción!’ kontzertua egingo da Principal antzokian apirilaren 21ean 19:00etan

Udal Bandaren abonamenduko seigarren kontzertuan Rayuela Ensemble laukoteak hartuko du parte

 

Gasteizko Principal Antzokian izango da Udal Musika Bandaren abonamenduko seigarren kontzertua, apirilaren 21ean (asteazkena), arratsaldeko zazpietan; “Globaliz-acción” du izenburu. Rayuela Ensemble saxofoi-laukotea izango da bakarlari gonbidatua eta Luis Orduña zuzendariaren esanetara arituko da.

Gasteizko taldeak Oscar Mussoren “Covidzation” abestia joko du (erabateko estreinaldia izango da), Raquel Sánchezen “Alhambra, el último reino”, eta Julie Girouxen “Khan”. Errepertorioan kanta gehiago egongo dira: Otto M. Schwarzen “Around the World in 80 Days”, Thomas Dossen “Spotlights” eta Philippe Geissen “Sir Patrick”.

Abesti guztiak lehen aldiz joko ditu bandak, “Sir Patrick” izan ezik.

Kontzertua aurkezteko prentsaurrekoan Luis Orduñak eta Rayuela saxofoi-laukotearen bozeramale Nahikari Olorizek hartu dute parte. Azken honek ilusioa erakutsi  du osasun krisia izanik ere emanaldi hau egin ahal izateagatik.

Zuzendariaren oharrak

“Globalizazioa da Udal Musika Bandak eta Ensemble Rayuelak kontzertu honetan irudikatu nahi duten helburua. A priori, gaur egungo kontzeptu bat da erabat. Hala ere, globalizazioa elkarren menpekotasuna duten lurraldeen eta herrialdeen arteko komunikazio gisa ulertzen badugu, merkataritza-, gizarte-, kultura- zein politika-mailan, ikusiko dugu ez dela inolaz ere errealitate moderno bat. Aldiz, gizateriaren historian beti bilatu izan den helburu bat dela esatera ausartuko nintzateke.

Kontzertu honetan Julie Giroux konpositore estatubatuarraren musika entzun ahalko dugu. Bere melodien bidez, historiako pertsonarik ospetsuenetako bati jartzen dio soinua, Gengis Khani hain zuzen ere. Gudari eta konkistatzaile mongoliar honek gizateriak inoiz ezagutu duen bigarren inperiorik zabalena eraiki zuen XIII. mendeko lehen bi hamarkadetan: Mongolen Inperioa.

Mende horretan bertan, 1238an hain zuzen, Muhammad ibn Nasrek Nazari Erresuma edo Granadako Emirerria sortu zuen, zeina Iberiar penintsulako azken estatu musulmana izango baitzen: garai bateko Al-Andalus. Agintaritza horren emaitza Granadako Alhambra izan zen. Gaur, hura “bisitatzeko” aukera izango dugu Raquel Sánchez konpositore valentziarraren musikaren bitartez.

Esan bezala, Mongolen Inperioa bigarren inperiorik hedatuena izan zen, eta Britainiar Inperioak soilik gainditu zuen. Eta hemen kokatzen da kontzertuko beste obretako bat: “Around the World in 80 Days”, Otto M. Schwarz konpositore austriarrarena, eta, jakina, Jules Verne idazle frantsesaren istorio ezagunean oinarritua.

Azkenik, Oscar Musso konpositore andaluziarraren lanak egun bizi dugun fenomenora eramango gaitu, azken hamarkadetan gertatu den garrantzitsuena: COVID-19aren pandemia.

Honekin guztiarekin argi geratzen da globalizazioa gizakiak berezkoa duen gauza bat dela, eta, gainera, historian aurrera egin ahala gero eta azkarrago gertatzen dela. Erdi Aroan hamarkadak behar zituzten inperio hauek sortzeko, eta urteak haietan barrena ibiltzeko; XIX. mendean azalera handi horiek aste batzuetan zeharkatu zitezkeela erakusten digu Phileas Foggek. COVID-19arekin ikusi dugu Txinan sortutako birus batek egun batzuk baino ez dituela behar mundu osoan zehar zabaltzeko, edo ordu gutxi batzuk.

Luis Orduña

 

Share

Gasteizko Udal Bandak “Bizitza kolorean” aurkeztuko du

Martxoaren 10ean (asteazkena) izango da Gasteizko Udal Musika Bandaren abonamenduko 5. kontzertua, Principal Antzokian

Gasteizko Principal Antzokian izango da Udal Musika Bandaren abonamenduko 5. kontzertua, martxoaren 10ean (asteazkena), arratsaldeko zazpietan; “Bizitza kolorean” du izenburu. Gasteizko Bandaren zuzendari Luis Orduñak zuzenduko du emanaldia, eta Víctor de Andrés izango da tronboi-jole bakarlaria.

Aukeratutako errepertorioan pieza hauek daude: “Dalí”, Aldo Rafael Forterena; “Fantasy of the Elements”, Silvia San Miguelena, eta “Colors”, Bert Appermont-ena. Lehenengo aldiz joko du Bandak hiruretako bakoitza.

Silvia San Miguelek bere lanari buruz hitz egin du gaur goizeko prentsaurrekoan. “‘Elementuen fantasia’ deitzen diot, asko gustatzen zaidalako Young. Konposatu nuenean, pertsonalitateei buruz egiten zuen analisiari buruz irakurtzen ari nintzen, eta pertsonalitate horiek lau elementuekin lotzen zituen, eterraz gain, zein ez baitut obran sartu”.

“Jarraitu Bandari” ekimenari esker, kontzertua streaming bidez ikusi ahal izango da udalaren webgunean.

Zuzendariaren oharrak

“Olinpon Zeus oroimenaren jainkosa Menmosinerekin maitemindu zen, eta pasioz betetako bederatzi gauetan giza inspirazioaren iturri diren bederatzi musak sortu zituzten, mitologia greziarraren arabera. Jainkosa haiek lurrera jaisten ziren haiei dei egiten zienei ideiak xuxurlatzera eta inspirazioa ematera.”

“Baina inspirazio-iturriak beste esparru lurtarragoetatik etor daitezke, noski. Arkitektoek, margolariek, eskultoreek edo idazleek naturako elementuetan, kolorean, batik bat, aurkitu dute hain “irrikatutako inspirazioa”. Musika-konpositoreek, jakina, gauza bera egin dute, eta horren hiru adibide entzun ahalko dituzue programa honetan.”

“Gasteizko konpositore Silvia San Miguelek naturaren oinarrizko lau elementuetan aurkitu du sorkuntza-bultzada, airea-lurra-ura-sua elementuetan, alegia, eta suiteko mugimendu bana dedikatu die. Aldo Rafael Forte kubatarrak, berriz, gauza bera egingo du Salvador Dalí artistaren obra koloretsu, komiko eta surrealistekin. Azkenik, obra ikusgarri bat aurkeztuko dugu, Bert Appermont belgikarrarena, tronboi eta bandarakoa; horretan, kolore bakoitzak mugimendu bat inspiratu du.”

“Zein garrantzitsua den kolorea gure bizitzetan! Eta zein beharrezkoa musika! Eta nolako bategite txundigarria ateratzen den kontzertua zentzumen guztiekin goza dezagun elkar hartzen dutenean musikak eta koloreek!”

Luis Orduña

Streaming bidez ikusi 

 

 

Share

Udal Bandak ‘Beethovenen Gasteiz’ aurkeztuko du abenduaren 16an

Principal antzokian izango da kontzertua, eta streaming bidez ere jarraitu ahalko da

Udal Musika Bandak abonamenduko hirugarren kontzertua aurkeztu du:  ‘Beethovenen Gasteiz’ izenburua du, eta abenduaren 16an (asteazkena) eskainiko du, Principal antzokian. Bandaren zuzendari Luis Orduñak eta Patxi Viana historialariak hartu dute parte prentsaurrekoan.

Orduñak azaldu duenez, abenduaren 16an, hau da, kontzertuaren egunean, konpositore alemaniarrak 250 urte beteko zituen. “Jada gure artean ez badago ere, haren legatua funtsezkoa izan da, eta izango da, geroko konpositoreentzat. Eta horixe da nolabait aurkezten ari garen kontzertuaren gaia, iraganaz eta etorkizunaz ari baita, tradizioa eta abangoardia nahastuz”, haren hitzetan.

Hasteko, ‘In the Shadow of Napoleon’ (Napoleonen itzalean) lana joko dute, Bert Appermont egile belgikarrarena. Napoleon Bonapartez gain, Louis-Joseph Marchand lekaioa da pieza horren protagonista.

Ondoren, gaur egunera egingo dute jauzi, Amparo Edo Biol konpositore valentziarraren ‘Snapan’ lanarekin. Lan erritmikoa da, apurtzailea eta indartsua, oraingo komunikatzeko moduak eta sare sozialak gaitzat dituena.

Hirugarrenik, saioko pieza nagusia eskainiko dute, ‘Gasteizko Bataila’. Beethovenek Arabako hiriburuan 1813an izandako gertakari historikoa kontatzen du, zeinak Napoleonen inperioaren gainbeheraren hasiera markatu baitzuen.

Bandaren zuzendariak adierazi duenaren arabera, lan programatiko eta komertziala da, artistaren ospea mundu osoan zabaltzen lagundu zuena; hain zuzen ere, Zazpigarren Sinfoniarekin batera estreinatu zuen, eta protagonismoa kendu zion lan horri.

Patxi Viana historialariak, berriz, sarrera historikoa egin du, Beethovenek sinfonia zein testuingurutan idatzi zuen eta zein baliabide erabili zituen azalduz. “Deigarrien gertatu zaidana da 1907an Beethovenen sinfonia horri Garaipen Sinfonia izena eman ziotela Gasteizen.  Oso izendapen bitxi eta interesgarria deritzot“, nabarmendu du.

Amaitzeko, ‘Extreme Beethoven’ lanaz gozatu ahalko du publikoak. Horren bidez, Johan de Meij holandarrak omenaldia egiten dio konpositore alemaniarrari, eta haren sinfonia, sonata eta oberturen motiboak nahastuz lan izugarria sortu.

Streaming bidez ere entzun ahalko da kontzertua, udalaren web-orrian, ‘Jarraitu bandari’ ekimenari esker.

 

Share

‘Berriro elkartzearen poza’ aurkeztu du udal bandak

Zazpi kontzertu izango dira abonamendu-denboraldi berrian, irailetik maiatzera bitartean, Principal antzokian.

 

‘Berriro elkartzearen poza’ izenburupean, abonamendu-denboraldi berria aurkeztuko du Gasteizko Udal Musika Bandak —irailetik maiatzera bitartean izango da, Principal antzokian—.

Hezkuntza eta Kultura zinegotzi Estíbaliz Canto eta Udal Bandaren zuzendari Luis Orduña izan dira zikloa aurkezteko prentsaurrekoan. “Berriro biltzeko unea iritsi da. Musika zoragarriz inguratuko gara, bakarlari bikainak entzungo, zuzendari gonbidatuak lanean ikusiko, zoriontasunez bete gaitzan musikak”, adierazi du Cantok.

Orduñak nabarmendu duenez, “baikortasunak markatzen du 2020-21 denboraldi hau, baita poesiak, historiak, umoreak eta aldarrikapenak ere. Izan ere, uste dut garaia dela emakumeek musikan duten papera agerian jartzeko, eta, beraz, emakumezko orkestra-zuzendari bat izango dugu lehenengo aldiz, gonbidatua”. Ildo beretik, emakumezko musikagileen lanak eskainiko dira kontzertuetan, eta emakumeei protagonismoa emango.

Irailaren 30ean hasiko da ziklo berri horren egitaraua, zikloari izena eman dion ‘Berriro elkartzearen poza’ kontzertuarekin. Luis Gonzálezek parte hartuko du bertan, tronpeta-bakarlari gisa. Gainera, azaroaren 25ean, asteazkenez, ‘Haizea alde’ entzun ahal izango dute ikusleek, Isabel Rubioren zuzendaritzapean. Eta ‘Beethovenen Gasteiz’ izango da protagonista abenduaren 16an, asteazkenez, bandaren 2020ko programazioa itxiko duen kontzertuan.

Otsailaren 10ean, Marcel Ortegak zuzenduko du banda, ‘XXI zerumuga’ musika-emanaldian. Martxoaren 10ean, ‘Bizia koloretan’ emanaldia izango da, Victor de Andrés tronboi-bakarlari dela.

Ensemble Rayuela saxofoi-laukotea, berriz, gonbidatu gisa arituko da, apirilaren 21ean, ‘Globaliz-acción!’ kontzertuan, eta, denboraldiari bukaera emateko, maiatzaren 12an, ‘Optimismorako bidean’ emanaldian.

Bihar, irailak 8, jarriko dira salgai abonamenduak, 14 euroan, eta sarrera solteak, berriz, irailaren 22tik aurrera erosi ahal izango dira, 3 euroan, Principal antzokiaren ohiko salmenta-bideak baliatuz.

“Behar diren neurriak hartuko dira segurtasuna bermatzeko, bai artistena, bai emanaldietara joaten diren ikusleena”, azpimarratu du zinegotziak, eta orobat animatu ditu gasteiztarrak Udal Bandaren denboraldi berriko abonamendua erostera. “Aire freskoa iritsi da bandara. Ez ezazue galdu”.

 

Informazio gehiago: www.vitoria-gasteiz.org/banda

 

 

 

 

 

 

 

 

Share

‘0 km-ko musika’ izenburuaren pean, Udal Banda gasteiztarrekin elkartuko da berriro datorren ostiralean

Gasteizko taldeak doako zazpi kontzertu emango ditu irailera arte, eta horretarako sarrera erreserbatu beharko da.

 

Gasteizko Udal Musika Banda uztailaren 10ean, ostiralean, bilduko da berriro bertako publikoarekin, Covid-19ak eragindako nahitaezko geldialdiaren ostean. Eta ahalik eta ondoen egin nahi du, jai-giroko kontzertu alai eta oso gertukoekin.

“Gure publikoarekin berriro elkartzeko Uraren Ezkutuko Lorategia aukeratu dugu, gure egoitzaren ondo-ondoan. Eta bultzatu eta sendotu nahi dugun ildo baten barruan egingo dugu: Gasteizko eta Arabako atzoko eta gaurko musikagileei ahotsa ematea“, adierazi du Bandako zuzendari Luis Orduñak.

Hain zuzen ere, ‘0 km-ko musika’ proiektuak musikagile klasikoen lanak ez ezik, hala nola Felipe Hernando, Jesus Guridi eta Luis Arambururenak, artista garaikide garrantzitsuenak ere barne hartuko ditu, besteak beste, Bingen Mendizabal, Joselu Ruiz de Gordoa, Eduardo Moreno eta Silvia San Miguelenak.

“Konfinamenduan zehar konturatu gara zein garrantzitsua den gure inguruan dugun guztia, gure familia eta lagunak, bizilagunak eta gure baratzetako produktuez hornitu gaituzten saltokiak. Izan ere, aurreko hilabeteetan bizi izandako egoerak eta antzekoak baliagarriak izan daitezke dugunaz hausnartzeko eta hori baloratzeko, “esku-eskura edukitzeagatik” ez baitugu beti behar bezala baloratzen“, adierazi du Orduñak.

Zikloa uztailaren 10ean hasiko da, arratsaldeko zazpietan, eta iraileko beste bi egunetan jarraituko du. Lehenengo bi kontzertuak Araban XIX. eta XX. mendeetan jaiotako egileei eskainiko zaizkie, eta hirugarrena, Gasteizen jaio ez arren, ibilbide profesionala edo bizitza pertsonala Gasteizen edo Araban garatu duten egileei. Luis Orduñak zuzenduko ditu hiru saioak.

Nabarmenduak

Errepertorioak estreinaldi bat eta Udal bandak lehen aldiz joko dituen zenbait lan barne hartzen ditu. “Guretzat plazer handia da estreinaldiko lan bat aurkeztea, Urrezko Zeledon den Joselu Ruiz de Gordoa konpositorearen oparia. Bals dotore eta delikatua da, positibotasunez betea, eta ‘Izarren dantza’ izenburua du”, nabarmendu du zuzendariak.

Taldeak lehen aldiz interpretatutako piezei dagokienez, Eduardo Moreno, Silvia San Miguel edo Bingen Mendizabalen lanak ditugu, oso leku ezberdinetan estreinatu zirenak: Guardia, Estatu Batuak edo Televisión Españolako ekoizpenak. Horiez gain, Emilio Serrano, José Fresco eta Felipe Hernando egile arabarren lanak ere joko dituzte.

Beste hitzordu batzuk

Gasteizko Udal Bandak musikarekiko beste lau hitzordu eskainiko ditu irailera arte.

Uztailaren 17an, ‘Heroiak eta makurrak’ izenburua duen kontzertua eskainiko du Musika Bandak Uraren Ezkutuko Lorategian, eta besteak beste Conan el Barbaro, Alatriste eta Aitajauna pertsonaia ezagunei eskainitako konposizioak eskainiko ditu. Berriki zendu den Ennio Morriconeren omenaldia ez da faltako.

Uztailaren 24an, ‘Musika latindarra’-ren txanda izango da. Bandak lan ezagunak joko ditu, ‘La Cumparsita’ tangoa edo Perez Pradoren estiloko mamboa, esaterako.  Soinuzko bidaia izango da, Habanatik abiatuta Amerika osoa zeharkatuko duena, Oscar Navarro konpositore valentziarraren ‘Paconchita’ obertura latinoarekin amaitzeko.

Bi kontzertu horiek Iker Olazabalek gidatuko ditu.

Abuztuaren 4an jada, Udal Bandak ‘Urrezko Zeledon’ galan joko du, Principal antzokian, ‘Euskal Herriko jaiak’ izenburupean eta Luis Orduña zuzendari dela.

Programak irailean jarraituko du, eta Iker Olazabalek bi kontzertu tematiko gidatuko ditu Uraren Ezkutuko Lorategian. Irailaren 11n, ‘Pertsonaia historikoak’ saioak beren ideia, asmakizun, ekintza edo aurkikuntzen bidez munduan eragin erabakigarria izan duten ehunka pertsonaia ospetsu omenduko ditu. Esploratzaileak, filosofoak, konkistatzaileak… historiako pertsonaia garrantzitsu horiei eskainitako musika programatikoa.

‘Espazioko abentura’ saioak emango dio amaiera programazioari, irailaren 25ean. Konposizio asko eskaini zaizkio espazioarekin lotutako gaiei, edo horietan inspiratu dira, horregatik, bandak ‘Apollo 13’  filmeko musika hartuko du abiapuntutzat, Marcel Peetersek meteoritoei buruz landutako musikarekin jarraitzeko, Richard Strauss edo Gustav Holst bezalako konpositore historikoez ahaztu gabe.

Sarrerak

Sarrera erreserbatu beharko da doako ekitaldi horietara joateko, online, udalaren webgunearen eta Entradium plataformaren bidez, edo 945 16 16 18 telefonoan, 09:00etatik 15:00etara.

Share