Prentsa Oharren banner

Gizarte etxeek 2.657 jarduera eta 29.510 leku eskainiko dituzte

Gizarte Etxeen zinegotzi Borja Rodriguezek eta Osasun eta Kirol zinegotzi Livia Lópezek Gasteizko gizarte etxeen sarearen 2021-2022 kanpainarako jarduera eta ikastaroen programa aurkeztu dute gaur goizean, prentsaurrekoan. Jardueretan covid-19aren prebentziorako protokoloak errespetatu arren, denboraldi honetan izena emateko eta plazak zozketatzeko ohiko sistemari berrekiteko asmoa dute gizarte-etxeek. Horrela, udal sailek gaur egungo testuingurura egokitutako kultura, hezkuntza, kirol, osasun eta gizarte programazioa diseinatu dute.

“Gizarte-etxeen sarea ezinbestekoa da gasteiztar askorentzat, hurbileko ekipamendu eta zerbitzuak eskaintzen baititu. Aurtengo programazioa gaur egungo testuinguruan ahalik eta seguruena izateko egokituta dago oraindik, eta ziur gaude, udal teknikarien ahaleginarekin, arrakastatsua izango dela berriro gure hiriarentzat eta bertako biztanleentzat “, nabarmendu du Gizarte Etxeen zinegotzi arduradun Borja Rodríguezek.

Guztira, programak 546 mota ezberdinetako jarduerak barne hartzen ditu; eta lehen hiruhilekorako eskaintzan 2.657 talde eta 29.510 leku sartzen dira guztira; konparagarria den azken urtean (2019) baino 396 talde gehiago izango dira, baina ia 6.000 plaza gutxiago, espazioen edukiera murriztearen ondorioz. Zerrenda udalaren webgunean dago eskuragarri, eta gizarte-etxeetan bertan egongo da ikusgai. Iaz erabaki zen bezala, informazio-liburuxka ez da inprimatuko, jasangarriagoak izateko eta paper-gastua murrizteko.

Baina leku gehienak esleitzeko ohiko sistema bai, itzuliko da. Zehazki, uztailaren 15ean irekiko da izena emateko epea, eta irailaren 2ra arte egongo da zabalik. Irailaren 3an egingo da zozketa, 11:00etan, eta egun horretako 12: 30etik aurrera irailaren 7ra arte ordaindu ahalko da matrikula. Denbora hori igarotakoan, plaza libre geratuko da.

Beste jarduera batzuetan, berriz, izena emateko ordenaren araberako esleipen-sistemari eutsiko zaio: euskara, berdintasuna, irakurketa klubak, kirol eta kultur jarduera batzuk eta adinekoen kultur zentroetako ikastaroak.

Prebentzioari dagokionez, berariazko neurri ugari hartu dira, eta hartzen jarraituko da, hala nola edukiera edo zirkulazioa kontrolatzea eta desinfektatzea. Zentroetara sartzeko, indarrean dauden osasun-arauak bete beharko dira, orain arte bezala: barnealdeetan maskara nahitaez erabiltzea, distantziak mantentzea eta eskuak maiz garbitzea. Gainera, baliteke erabilitako eremua desinfektatu behar izatea ikasleek edo/eta irakasleek, saioa bukatzean. Halaber, jarduera batetik bestera gutxienez 15 minutuko tartea utziko da, sarrera eta irteeretan jendea gurutzatzea ekiditeko eta lekuak aireztatzeko. Bestetik, kirol-jardueretan ezinbestekoa izango da eskuoihal eta ur-botila indibidualak erabiltzea, eta kaleko oinetakoen ordez kirol-oinetakoak janztea.

Murrizketa guztiak gorabehera, eskaintzak ez du bistatik galduko helburu nagusia: aisialdi-ohitura osasungarriak sustatzea, Gasteizko herritarren bizi-kalitatea hobea izan dadin.

Ikastaroetako izen-emateak azkar eta eroso ordaindu ahalko dira, edozein banketxetako kreditu- edo zordunketa-txartelaren bidez. Prezioei dagokienez, % 40ko murrizketa izango dute abonatuek, euskara-ikastaroetan izan ezik, horiek beste murrizketa-irizpide batzuk baitituzte. Era berean, langabezian daudenek % 15eko murrizketa gehigarria izango dute.

 

Ia 15.000 plaza kirol-jardueretan

Datorren ikasturterako kirol-programazioaren eskaintza iazkoa baino nabarmen handiagoa da —plazen % 53 gehiago—, osasun-egoeraren ondoriozko mugek baldintzatzen duten arren. Guztira 73 jarduera desberdin eta 14.699 plaza prestatu dira, eta honela banatzen dira adin-tarteen arabera:

 

  • 3.114 plaza haurrentzat.
  • 338 plaza gazteentzat.
  • 8.697 plaza helduentzat.
  • 895 plaza adin guztietarako (jarduera irekiak).
  • 1.695 plaza adineko pertsonentzat.

 

Livia Lopezek Udala pandemiaren aurreko kirol eskaintza maila berreskuratzeko egiten ari den etengabeko ahalegina azpimarratu du, egungo murrizketek ahalbidetzen duten neurrian. “Oraindik ere beharrezkoa da edukiera kontrolatzea, instalazioen barruko zirkulazioa antolatzea, jarduera-saioen artean lekuak egoki aireztatzea, pertsonen arteko distantzia mantentzea eta ezarritako babes- eta higiene-neurriak hartzea. Hala ere, kirol-jardueren programazioa aurrera ateratzeko lan egiten duten pertsona guztien dedikazioak eta herritarren jarrera arduratsuak aukera ematen digute kirola modu seguruan egiteko gero eta aukera gehiago izateko. Eta hori lorpen kolektibo handia izaten ari da”, adierazi du.

Segurtasunari dagokionez garrantzitsua izango da programazio osoan bermatzea gutxienez ordu laurdeneko aireztapena izatea kirol-saio baten eta beste baten artean, prebentzio-neurri eraginkorrenetako bat delako.

Joan den urtearekin alderatuta bada berreskuratu den beste alderdi bat, berriro ere hiruhilekoak izango baitira horietako batzuk. Oro har, kirol-eskaintza hiru hileko, bi hileko eta hileko jardueratan banatuko da.

Berrikuntzen atalean, gazteentzat pentsatutako bi jarduera datoz: eskalada eta haurrentzako abentura (8 eta 14 urte bitarteko adingabeentzat), eskalada, boulder jarduerak eta Salburuko rokodromoko abentura parkeak eskaintzen dituen aukerak konbinatzen dituena, eta G-PUMP (gazteentzat), lan aerobikoa eta muskulazio ariketak bateratzen dituena koreografia espezifikoak erabiliz.

Azken urtean gertatu den bezala, kirol-programazioa dinamikoa izango da, eta osasun-egoeraren bilakaeraren arabera egokituz eta berrituz joango da, edukierei dagokienez, esaterako.

 

3.452 leku praktika artistikoan

Udalaren kultur eskaintzaren barruan, praktika artistikoan hasteko ikastaroak nabarmentzen dira. Guztira, 292 ikastaro eskaintzen dira, 120 espezialitate desberdinetakoak haur, gazte eta helduentzat. Zozketarako 3.452 plaza eskainiko dira, eta hiruhileko guztien batura 8.539 plaza dira. Hona hemen berrikuntza batzuk: dantzaren alorrean, swing, dance hall edo bollywood dantza; eskulanetan, brodatu sortzailea; haurrentzako ikastaroetan, arkitektura eta arte laborategia edo antzerkiaren bidez irakurzaletasuna sustatzea; lehen aldiz euskaraz eskaintzen diren ikastaroak, hala nola dantza flamenkoa edo idazketa sortzailea; eta beste berrikuntza batzuk, hala nola antzerki-podcastak edo umorezko bakarrizketen ikastaroa. Ikastaroen % 33 euskaraz eskaintzen da, eta ehuneko hori % 75era iristen da haurrentzako ikastaroetan.

2021-2022 kanpainan, kultur ikastaroak ere eskainiko dira: espezialistek emandako kultur ikastaro teorikoak izan ohi dira horiek, eta herritarrek kulturaren hainbat alorretako ezagutzak era didaktikoak eskuratzea dute helburutzat. Guztira 17 ikastaro antolatu dira martxan, eta eskainitako plazak 355 dira. Azpimarratzekoa da irakasleen lanbide-prestakuntza, kasu guztietan adituak baitira ematen diren gaietan, hala nola Juan Ibarrondo idazle eta kazetaria, Jasone Arrausi edo Ricardo Garay arte-historialariak, La Otra Mitad astronomia elkartea, Egoitz Conte edo Sandra Masiá arkitektoak, Alejandra Spagnuolo musikaria eta Jorge Barrio zinema-ekoizle eta zuzendaria.

Bestalde, Udal Liburutegien Sareak irakurzaletasuna sustatzeko jarduera ugari eskainiko ditu, esaterako, haurrentzako eta helduentzako ipuin kontaketak, hitzaldiak edo liburu aurkezpenak. Halaber, sei irakurketa klub jarriko dira martxan. Azken horietan parte hartzeko ez da zozketarik izango, eta izen-emateak irailaren 2an hasiko dira. Ohi bezala, Liburutegi Sareak berak emango ditu klubetan parte hartzeko behar diren liburuak.

 

Ludoteken eta familien eskaintza

Gizarte Sustapeneko kategorian, 2021-2022 kanpaina honetan 86 jarduera eskainiko dira, eta hiruhileko bakoitzeko 1.350 plaza inguru. Berrikuntza gisa, banantze- edo dibortzio-egoeran dauden familiei laguntzeko programa jarriko da abian ikasturte honetan. Lantegi horien bidez familiako kideen arteko harreman eta komunikazio egokia errazteko tresnak eskaintzen saiatuko da.

Era berean, eutsi egin zaio haur eta familientzako eskaintzari. Besteak beste, motibazioa eta ikasteko ohiturak lantzeko jarduerak izango dira, bai eta sozializazio-prozesua, emozioen adierazpena edo haurren ongizatea bultzatzeko jarduerak ere. 0 eta 11 urte bitarteko haurrentzako ludoteka eta ludoklubetan 137 txanda eskaintzen dira, 1.835 plazarekin.

Senidegune programa ere itzuliko da, 0-3 urte eta 4-6 urte bitarteko haurren gurasoei heziketan laguntzeko.

 

Share

Hiria hobetzeko 315 proiektu aurkeztu dituzte gasteiztarrek Hobetuz programaren hirugarren edizioan

  • Parte-hartzea % 85 igo da, udal aurrekontuen zati bat zertara bideratu erabakitzeko zuzeneko demokraziarako tresna honen bitartez
  • Horretaz gain, haurrek egindako 8 proposamen jaso dira haurrentzako AKTIBATU programaren bitartez.

Aurrekontu parte-hartzaileen Gasteiz Hobetuz programak, zeina Borja Rodriguez zinegotzia buru duen Partaidetzaren eta Gardentasunaren Zerbitzuak sustatzen baitu, 315 proposamen jaso ditu hirugarren edizioan. Beraz, parte-hartzea % 85 igo da, iazko edizioan 170 ekarpen egin baitziren guztira. Gainera, eta berrikuntza gisa, Gasteizko haurren 8 proposamen ere jaso dira, haurrentzako AKTIBATU programaren bitartez.

Gasteiz Hobetuz aurrekontu parte-hartzaileak egiteko programa da, eta hari esker herritarrek erabaki dezakete Gasteizko aurrekontuko 3 milioi euro zertara bideratzen diren. Zuzeneko demokraziaren tresna da, eta herritar guztiak gonbidatu dira maiatzaren hasieratik ekainaren 28ra bitartean proposamenak aurkeztera.

Jasotako proposamenen artean, % 20 baino gutxiago aurkeztu dituzte elkarteek eta bestelako herritar taldeek, eta gainerako ideiak norbanakoek aurkeztu dituzte. Besteak beste, kaleen konponketa eta oineztatzea (57 proposamen), parkeen hobekuntza (39), bidegorri gehiago (25) edo hirian kirola egitearekin lotutako ideiak (20) dira interes gehien piztu duten gaietako batzuk. Ondoren datoz ideia sozialak (20), ingurumen-gaiei buruzkoak (14) edo kulturarekin lotutako proposamenak (13).

Herritarren Partaidetzaren, Gardentasunaren eta Gizarte Etxeen zinegotzi Borja Rodríguezek adierazi duenez: “Hobetuz aurrekontu parte-hartzaileen programak eraginkorra dela erakutsi du. Gasteiztarrek gero eta hobeto ezagutzen dituzte parte-hartzeko bideak, baina, batez ere, azken urteetan programaren emaitzak ikusi dituzte, herritarrek egindako 30 eskaera baino gehiago gauzatu baita. Herritarren Partaidetzaren Zerbitzua pozik dago edizio honetan izandako erantzunagatik eta lanean jarraituko dugu Gasteiz hobetzeko. Uda ondoren, edonork bozkatu ahalko du bere ustez garrantzitsuen diren aldaketa-proposamenen alde, eta 3 milioi euroko aurrekontua gordea dugu, lehentasun horiek entzuteko eta oso kontuan izateko”.

Proiektuak balioesten direlarik, urriaren 4an argitaratuko dira udalaren webgunean, Gasteizko bizilagunek azarotik aurrera gustukoenak aukeratzerik izan dezaten. Bozketak online edo aurrez aurre egin ahalko dira, herritarrei laguntzeko bulegoetan (gizarte-etxeetan zein San Antonio kaleko bulegoan), San Martineko bulego teknikoetan, eta, lehen aldiz, adinekoentzako zentro soziokulturaletan.

Aurreko edizioetan bezala, zenbait haztapen-irizpide ezarri dira: belaunaldien arteko bizikidetza, genero-berdintasuna,eta kultura aniztasuna eta/edo dibertsitate funtzionala. Aurten hiru irizpide berri gehitu dira: talde ahulenen gizarte-inklusioa, iraunkortasuna eta ingurumenaren babesa, eta arrakala digitala txikitzea.

Ospitale plaza

Connect Ibailakua

Share

Herritarrek parte hartzeko Hobetuz programak 200 proposamen jaso ditu orain arte

  • Ideiak aurkezteko epea datorren astelehenera arte egongo da irekita, baina dagoeneko aurreko edizioan baino 30 proiektu gehiago ditu Udalak mahai gainean

 

Aurrekontu parte-hartzaileen Gasteiz Hobetuz programak, zeina Udaleko Partaidetzaren eta Gardentasunaren Zerbitzuak sustatzen baitu, 200 proposamen jaso ditu gaur arte. Aurreko edizioaren aldean handitu egin da kopurua, orduan 170 jaso baitziren. Ekainaren 28ra arte (astelehena) jarraituko du zabalik proposamenak aurkezteko epea.

 

Herritarren Partaidetzaren zinegotzi Borja Rodríguez:  “Aurtengo edizioa arrakastatsua izaten ari da parte-hartzeari dagokionez, eta oraindik bada ekarpenak egiteko denborarik. Gasteizko bizilagunak dituzten ideiak aurkeztera animatu nahi ditut. Hiria hobetu nahi dugu, haien proposamenak entzunez. Eskaerak gauzatzeko 3 milioi euroko aurrekontua erreserbatu dugu”.

 

Hobetuz aurrekontu parte-hartzaileak egiteko programa da, eta hari esker herritarrek erabaki dezakete Gasteizko aurrekontuko 3 milioi euro zertara bideratzen diren. Azken batean, zuzeneko demokraziarako tresna da, gasteiztarrek zuzenean erabaki dezaten zertan inbertitu nahi duten udal aurrekontua.

Aurtengo edizioan, maiatzaren 3tik ekainaren 28ra arte aurkez ditzakete proposamenak herritarrek. Proiektuak balioesten direlarik, urriaren 4an argitaratuko dira udalaren webgunean, herritarrek azarotik aurrera gustukoenak aukeratzerik izan dezaten. Bozketak online edo aurrez aurre egin ahalko dira, herritarrei laguntzeko bulegoetan (gizarte-etxeetan zein San Antonio kaleko bulegoan), San Martineko bulego teknikoetan, eta, lehen aldiz, adinekoentzako zentro soziokulturaletan.

Aurreko edizioetan bezala, zenbait haztapen-irizpide ezarri dira: belaunaldien arteko bizikidetza, genero-berdintasuna,eta kultura aniztasuna eta/edo dibertsitate funtzionala. Aurten hiru irizpide berri gehitu dira: talde ahulenen gizarte-inklusioa, iraunkortasuna eta ingurumenaren babesa, eta arrakala digitala txikitzea.

Hobetuz programak badu beste berritasunik: hiriko haurrek ere parte hartu ahalko dute programan, eta udal aurrekontuko 200.000 euro zertan gastatu erabaki. Gainera, lehen aldiz, aurrekontu osoaren % 20 jarduera-programetara bideratuko da, eta gainerako % 80a inbertsioetara.

 

 

Share

Jarduera-lizentzien eta obra handien lizentzien prozeduretan Jakinarazpen elektronikoa abiarazita, Udalak bizkortu egingo du tramitazio administratiboa uztailaren 1etik aurrera

Prozesu horietakoren batean dauden enpresek berehala jasoko dituzte jakinarazpenak, orain artean tramite horrek 10 eguneko epea hartu zezakeenean.

 

Udal Administrazioaren eta Eraldaketa Digitalaren Sailak jakinarazpen elektronikoa jarriko du abian uztailaren 1ean Jarduera-lizentzien eta obra handien lizentzien prozeduretan. Neurri horrek tramite administratiboak arintzen lagunduko du.

Orain artekoan, Udalak ez zuen jakinarazpen elektronikorik ematen, bi kasu hauetan izan ezik: udal-kontratazioa eta trafiko-isunak.

“Jakinarazpen elektronikoari esker epeak laburtu egingo dira, eta horrek izapide administratiboak arintzea eragingo du. Gainerako udal-prozeduretan jakinarazpen elektronikoa pixkanaka txertatuko da”, azaldu du Borja Rodríguez, Udal Administrazioaren eta Eraldaketa Digitalaren zinegotziak.

Pertsona juridikoek eta elkargo profesionaletako kideek tresna elektronikoen bidez jarri behar dira harremanetan nahitaez Administrazioarekin. Herritarrek, aldiz, Administrazioarekiko harremana bideratzeko modua hautatu dezakete, dela jakinarazpen elektronikoaren bidez, dela paperezko bide tradizionalaren bitartez.

Jakinarazpen elektronikoak jasotzeko alta eman beharko da nahitaez, formulario bat beteta; bertan adierazi beharko da posta elektronikoko zein helbidetan jaso mezuak.

Mezuok esteka bat eramango dute, jakinarazpena irakurtzeko aukera ematen duen atarira, alegia, Eusko Jaurlaritzaren ‘Platea’ tramitazio-plataformara. Nahitaez, ziurtagiri digital edo NAN elektroniko bidez identifikatu beharko da.

“Eusko jaurlaritzarekin sinatutako hitzarmen bati esker eskaintzen dugu bide berria. Horren bitartez,  batu eta sinplifikatu egiten da Udalaren, Aldundiaren zein Eusko Jaurlaritzaren jakinarazpen guztientzako lekua, Eusko jaurlaritzaren beraren egoitzan”, gehitu du Rodríguezek.

Jakinarazpen elektronikoak emandakotzat joko dira horien edukia irekitzearekin bat, edo bidali zirenetik 10 egun naturaleko epea igaro denean.

Nahita bide elektronikoa hautatu eta gero bide tradizionalera itzuli nahi dutenek, edozein unetan egin ahalko dute.

“Honelako neurrien bitartez –zein prozedura administratiboak gainbegiratu eta hobetzera zuzendutako programa batean kokatzen baitira–, aurrera egingo dugu Administrazioaren digitalizazioaren bidean, hots, kudeaketa arduratsua, efiziente, gertu eta gardenago baterako bidean.  Neurri honek, gainera, tramitazioa hobetzen lagunduko du, bai eta -papera saihesten den aldetik- baita Udalak iraungarritasunaren bidean aurrerapausoak ematen ere”, azpimarratu du zinegotziak.

Aurrerapen teknologiko berria 2021ean aurkeztu ditugun beste batzuei batzen zaie, esaterako Herritarren Udal Txartela (HUT) telefono mugikorrean txertatzea, VGReservas eta GeoVitoria-Gasteiz web aplikazioak (udal instalazioetako erreserbak kudeatzeko lehenak, kontsultak egiteko bigarrena). Baita WhatsAppen bidez Enplegu Zerbitzuaren ikastaroei buruzko informazioa ematekoa ere.

Herritarren eta Administrazioaren arteko harremana errazteko erabiltzen dituzte horiek guztiek teknologia berriak, hori baita Udal Administrazioaren eta Eraldaketa Digitalaren Sailaren lehentasunetako bat.

 

Informazio gehiago

 

 

 

 

 

 

 

 

 

Share

288.000 euroko inbertsioa egingo du udalak Iparralde gizarte-etxeko kirol eremuko estalkia hobetzeko

Iparralde gizarte-etxeko gimnasioko eta kirol kantxako estalkia hobetzeko obren kontratazio-dosierra onetsi du gaur Tokiko Gobernu Batzarrak. Kontratuak 288.067,93 euroko aurrekontua du (BEZa barne), eta 90 egun naturaleko gauzatze-epea.

Esku hartzeak ur-filtrazio arazoak konpontzea du xede. “Lan hauen bitartez, Iparralde gizarte-etxearen egoera hobetuko da, eta gasteiztarrek baldintza egokietan jarraitu ahalko dute kirola egiten bertan”, adierazi du Udal Administrazioaren eta Eraldaketa Digitalaren zinegotzi Borja Rodríguezek.

 

Informatika-aplikazioak mantentzea

Bestalde, Udal Administrazioaren eta Eraldaketa Digitalaren Sailak 2.180.012 euroko (BEZ barne) inbertsioa egingo du udaleko sailei zerbitzu ematen dieten udal informazio-sistemetako informatika-aplikazioak mantentzeko. 

“Administrazio-digitala garatzeak erraztu egin du udalaren eta herritarren arteko harremana, tramiteak modu erraz eta arinean egiteko aukera eman baitu. Horretarako, hainbat informatika-aplikazio aktibatu behar dira, eta horiek modu eraginkorrean mantendu funtzionamendua bermatzeko”, adierazi du Rodriguezek.

INETUM ECNA GIS 2021 aldi baterako enpresa-elkarteak egingo ditu lan horiek datozen hiru urteetan.

Share

Adela Cortina katedratikoak etika kosmopolitari buruzko hitzaldia emango du Herritartasunerako Eskola Irekian

Bihar izango da Europa biltzar-jauregian.

 

Adela Cortinak, etika eta filosofia politikoan erreferenteak, bihar emango dio hasiera Gasteizko Udalek Herritarren Partaidetzaren Zerbitzuak antolatutako Herritartasunerako Eskola Irekiaren ikasturteko azken zatiari. ‘Ética cosmopolita: por una ciudadanía lúcida y responsable’ hitzaldiarekin emango dio hasiera.

Ekitaldia Europa biltzar-jauregian izango da, 19:00etan. Bertan, idazle ospetsuak bere azken lana –“Ética cosmopolita”– aurkeztuko du bideokonferentziaz: partaidetzari, elkartasun aktiboari eta elkarren laguntzari buruzko hausnarketa bat, egungo pandemia garaian.

Covid-19ak eragindako osasun-, ekonomia- eta gizarte-krisian inoiz baino zentzuzkoagoa da partaidetzaren kulturaren garapen ebolutiboa helburu duen topaketa-, hausnarketa- eta eztabaida- gune hau” azpimarratu du Herritarren Partaidetzaren, Gardentasunaren eta Gizarte Etxeen zinegotzi Borja Rodriguezek, zeinek hasiera emango baitio ekitaldiari.

Adela Cortina Zientzia Moral eta Politikoen Errege Akademiako kidea da; akademia sortu zenetik akademian sartu zen lehen emakumea, eta  Elsa Punset eta Maria Calafekin batera, HEIko ekitaldietan parte hartu dutenen arteko  hizlari ospetsuenetakoa.

Hitzaldirako sarrera doakoa izango da, baina aldez aurretik izena eman behar da 010 eta 945 161 100 telefonoetara deituta, edo Herritarrei laguntzeko bulegoetara joanda. Ekitaldia zuzenean ere jarraitu ahal izango da HEIren webgunetik.

Adela Cortinaren hitzaldiaz gain, beste hainbat jarduera izango dira Herritartasunerako Eskola Irekiaren maiatzeko programan: elkarteentzako lantegi bat, zine-forum saio bat, eta bisita gidatuak udaletxera.

Hainbat bide daude jarduera-datei buruzko Informazio zehatza lortzeko  (guztiak doakoak) edo izena emateko: webgunea, mugikorretarako HEI aplikazioa, 010 telefonoa, edo hiriko edozein gizarte-etxe.

 

 

Share

INDESA arduratuko da Gasteizko udal eraikinen garbiketaz, 2.860.000 euroren truke

INDESA sozietate publikoaren esku utzi du Tokiko Gobernu Batzarrak Gasteizko udal eraikinen garbiketa integrala, 2021eko abendura arte, 2.862.562,86 euroren truke (BEZik gabe).

“Enkargu honen bitartez, dibertsitate funtzionala duten pertsonen lan-inklusioa sustatuko dugu, enplegu egonkorra eta kalitatekoa sustatuz”, azaldu du Udal Administrazioaren eta Eraldaketa Digitalaren zinegotzi Borja Rodríguezek.

Hiriko gizarte-etxe hauek garbitu eta onik zaintzeaz arduratuko dira INDESAko langileak: Aldabe, Ariznabarra, Hegoalde, Judimendi, Lakua, Salburua, Zabalgana eta Iparralde.

Eta, horiez gain, baita beste hauek ere: Amaia zentro soziala, Olarizuko Santa Maria zainpeko apartamentuak —Eguneko Arreta Zerbitzua barne—, Santa Isabel eta Salbatzailearen hilerriak, Europa jauregia, San Andres kiroldegia eta San Prudentzio egoitzako unitate lagundua eta garbiketa-tunela.

 

Share

Udalak lehiaketa egingo du Aldaiako pista berriak gauzatzeko; hori izan zen “Mejorando Vitoria-Gasteiz Hobetuz” programan herritarrek bozkatu zuten partaidetzako proiektuetako bat

Zabalganak erabilera askotarako kirol-eremu berria izango du; parte hartzeko programatik irten da, gaur gobernu-batzarrak hura lizitatzea onetsi ondoren.

 

Gaur goizean, Tokiko Gobernu Batzarrak, Herritarren Partaidetzaren, Gardentasunaren eta Gizarte Etxeen Sailak proposatuta, Aldaiako pista berriak gauzatze-lanak kontratatzeko lizitazioa; erabilera askotarako kirol-azpiegiturako proiektua “Mejorando Vitoria-Gasteiz Hobetuz” partaidetza-prozesuaren ondorioz irten zen eta herritarrek bozkatu zuten programa horren azken edizioan.

Pandemiak eragindako etenaldiaren ondoren, proiektua lehiaketara irtetea berraktibatzeari esker Zabalgana auzoak patin-pista eliptikoa eta erabilera askotarako beste kirol-eremu bat izango du datorren urterako.  Aldaian eraikiko da aire zabaleko kirol-esparru hori, gaur egun erabili gabe dagoen 7.000 bat metro koadroko partzela batean, Pablo Picasso, Clara Campoamor eta Antoni Tàpies kaleen eta Nazio Batuen hiribidearen artean; ia 400.000 euroko inbertsioa izango da.

Herritarren Partaidetzaren, Gardentasunaren eta Gizarte Etxeen Sailak sustatzen du programa, eta hari esker herritarrek zuzenean erabaki dezakete zertara bideratzen den udal-aurrekontuaren zati bat, Gasteiz hobetzea helburuarekin. Herritarren Partaidetzaren zinegotzi Borja Rodríguezen iritziz, “proiektu honek auzotarren eskari bati erantzuten dio, eta esan nahi du eskaria entzun dela eta auzoaren ordezkaritzarekin adostuta diseinatu dela. Gobernu honek partaidetzaren aldeko apustu irmoa egiten duelako beste adibide bat da, hurbiltasun- eta gertutasun-elementu gisa eta gizarte-bilbearen bidez errealitatearekiko iragazkortasun elementu gisa, eta demokrazia baliatzearen elementu gisa. Udal-gobernuan, herritarren parte hartzearekiko gure konpromisoa defendatzen jarraitzen dugu, eraginkorra eta bizikidetzarako eta auzoen funtzionamendu onerako ezinbestekoa baita”.

Mugikortasunaren eta Espazio Publikoaren Sailak diseinatu du proiektua, eta sei hilabeteko epean gauzatuko da. “Udal-gobernuan, sustatzen ari gara Gasteizek aurrera egin dezan lagunduko duten proiektuak eta obrak jasotzen dituen auzoen plan bat. Inbertsioen aldeko apustua egin nahi dugu hiri hau herritarren nahien neurrirako bizi-kalitatea dagoen tokia izan dadin”, azaldu du Gorka Urtaran alkateak.

Elipse formako 300 bat metro leuneko luzerako eta 4 metroko zabalerako patin-pista bat izango du kirol-eremu berriak. Asfalto leunduzko zoladuraz egina izango da pista, irristatzez errazte aldera, eta kirol-kantxak eta ingurunea bereiziko ditu; oinezkoentzako pasabide batez zatituko du, zeinean zuhaitzak (zedroak eta ezkiak) eta egoteko guneak egongo baitira. Gainera, “oztopoak” izango ditu lurzoruan marraztuta, patinajerako zaleen trebetasuna hobetzeko.

Kirol-azpiegiturek, bestalde, behaldean zenbait diziplinatan jarduteko hutsuneak izango ditu (futbol-, saskibaloi-, boleibol- badminton-, pilota-, eskalatze-kantxak eta abar). Proiektuaren berezitasun aipagarrienetako bat da estandarizatu gabeko neurritan diseinatu direla edozein jarduerarako pistak, haien helburua baita kirol inklusiboa sustatzea. Diseinu horiek bat datoz Udalak sustatu dituen eta lehiakor ez diren balio horietara egokitu nahi dituzten beste zenbait kirol-ekimenekin bat datoz, halako moduz non sakiak edo ateak elkarren parean ez baitaude.

Aire zabaleko kirol-konplexu horren beste gai garrantzitsuetako bat da eremu osoa landaretzaz, altzifre-lerro batez, eserlekuz eta Nazio Batuen hiribidearen ondoko urmael batez inguratuta egongo dela. Espazioaren barrualdean soropil naturala, soropil artifizialeko azalerak eta aisialdirako eta atsedenerako kautxuzko eremuak izango ditu. Hura mantentzeko aurreikusita dago ureztatze- eta argiztapen-sistema automatiko bat. Hiri-altzariak ere egongo dira konplexuarekin batera: iturri bat, paperontziak eta eserlekuak, besteak beste.

ALDAIAKO PISTEN DOSIERRA

 

Share

Gizarte-etxeen sareko aisialdi eta denbora libreko zerbitzuen kontratua lehiaketara atera du Udalak, hurrengo hiru urteetarako

Borja Rodríguezen ardurapean dagoen Partaidetza eta Gizarte Etxeen Sailak proposaturik, Aldabe, Landatxo, Iparralde, Judimendi, Arana, Hegoalde, Ariznabarra, Pilar, Arriaga, Lakua, Abetxuku, Ibaiondo, Salburua eta Zabalganeko gizarte-etxeetako aisialdi eta denbora libreko zerbitzuak kontratatzeko dosierra onetsi du gaur Tokiko Gobernu Batzarrak. Hauek barne hartuko ditu kontratuak: ludoteken, ludokluben, kanpoko jolas-jardueren, elkartze-aretoen eta Ibaiondo, Pilar, Salburua eta Zabalganeko gizarte-etxeetako lau kafetegien funtzionamendurako giza baliabideak eta baliabide materialak, inbertsioak izan ezik, guztira 6.115.760,18 euroko balioa baitute —5.358.832,54 euro, gehi BEZa: 757.025,05 euro—.

Aisialdiko eskaintzan baliabideak optimizatzeko helburuak bete beharko dituzte proposamenek, eta jarduerak modu koordinatuan konektatu gizarte-etxeen sareko jarduera-ildoekin, Udalaren zeharkako planen eta plan estrategikoen nahiz garapen iraunkorreko helburuen arabera, aisialdiko eskaintza erronka horretan laguntzeko tresna bihurtzeko.

2021eko irailaren 1etik 2024ko abuztuaren 31ra arte iraungo du kontratuak, eta gehienez beste bi urtez luzatu ahal izango da.

 

 

Share

Partaidetza zuzena, ikasgelatik: HEI Txiki Vital programak herritar gazteenengana hurbilduko du Udala

  • ‘Hitzordua…’ jardueraren bitartez, udal sailetako arduradunak eskoletara joatea eska dezakete ikastetxeek

Herritar gazteenei zuzendutako HEI Txiki Vital programako ‘Hitzordua…’ jarduerari ekin diote berriro Gasteizko Udalak eta Vital Fundazioak, aste honetan.

Gasteizko Udaleko Herritarren Partaidetzaren Zerbitzuko arduradunak geletara agertzea ahalbidetzen da horren bitartez, eztabaida, hausnarketa eta partaidetza zuzena sustatzeko ikasleen artean. Adin guztietako ikasleei zuzenduta dago programa, lehen hezkuntzatik hasi eta batxilergora arte, DBH eta lanbide-heziketa barne.

Udal sailetako langileak eskoletara joan daitezela eskatu ahal diote irakasleek Udalari, eskoletan lantzen ari direnari buruzko hitzaldi pertsonalizatuak ematera. Udalaren webgunean eskura daitekeen formulario bat bete behar da horretarako, edo 010 telefonora deitu. Landu nahi den gaiaren deskribapena baino ez da behar, Herritarren Partaidetzaren Zerbitzuak bertara joan eta haur edo gazteei azalpenak emango dizkien udal-arduraduna aukera dezan.

“Gazteek udal-politikaren funtzionamendura hurbiltzeko lanean ari gara Herritarren Partaidetzaren Zerbitzuan, gure ustez funtsezkoa baita hiriko udal-zerbitzuak lehen eskutik ezagutzea eta erakundeei norberaren kezka eta proposamenak helarazteko gaitasuna eskuratzea”, adierazi du Herritarren Partaidetzaren eta Gardentasunaren zinegotzi Borja Rodríguez zinegotziak.

“Vital Fundazioarentzat garrantzitsua da haurrak herritar guztiei eragiten dieten gaietan parte hartzeko moduan hezteko programak bultzatzea. HEI Txiki Vital programa osatzen duten jarduerak familiei eta haurrei zuzenduta daude, eta komunitatean bizitzeko dituzten trebetasun sozialak hobetu nahi dira horien bitartez, baita herritarrek parte hartzeko dituzten bide nagusiak ezagutarazi ere”, nabarmendu du Vital Fundazioko zuzendari Arantxa Ibañez de Opacuak.

Dagoeneko jaso dira Gasteizko hainbat ikastetxe eta instituturen eskabideak, bai lehen eta bai bigarren hezkuntzako ikasgeletakoek eginak. Ostegun honetan bertan, Herritarren Partaidetzaren Saileko bi teknikari Sansomendi ikastetxera joan dira, lehen hezkuntzako 4. mailako ikasgela bateko ikasleekin hitz egitera. Udalaren betebeharraren eta dituen zerbitzu eta eskumenen inguruan jardun zen bertan. Bederatzi urteko haurren galderak gai hauen ingurukoak izan ziren: kirol-instalazioak, ikastetxea dagoen auzoko altzari publikoak eta beste.

Share