Prentsa Oharren banner

(PDFaz eguneratuta) Segurtasun-sistema inteligenteak izango dituzte BEIren ibilgailuek, eta gidaritza automatikoa, zeinek autobusen ate guztiak nasatik 4 zentimetro baino gutxiagora gerturatzen direla bermatuko baitu

BEI Segurtasun Sistemak Dosierra

Gasteizen BEI martxan jartzea gero eta gertuago dago. 9 milioi euroko udal-inbertsioarekin, puntako teknologiako 13 ibilgailu elektrikok hiriko 14 auzo lotuko dituzte eta TUVISAren 2. linean zerbitzua emango, 3 milioi erabiltzaile izateko potentzialarekin. Mugikortasun-sistema iraunkorra izango da autobus elektriko inteligentea; berritzailea, eskuragarria eta segurua. Gainera, segurtasun-sistema inteligenteak izango ditu, eta gidaritza automatikoa, zeinek autobusen ate guztiak nasatik 4 zentimetro baino gutxiagora gerturatzen direla bermatuko baitu.

Irizar E-Mobility euskal enpresak egindako 13 unitateek izango dituzten zenbait berritasun aurkeztu dituzte gaur goizean Mugikortasunaren eta Espazio Publikoaren zinegotzi eta TUVISAko lehendakari Raimundo Ruiz de Escuderok eta Udalaren garraio-sozietatearen kudeatzaile María José Ajuriaguerrak, BEIren lau ezaugarri nagusietako biri, irisgarritasunari eta segurtasunari, dagokienez.

Izan ere, segurtasun- eta gidaritza-sistema aurreratuak izango dituzte ibilgailuek. Horien artean, nabarmentzekoa da talken prebentziorako ‘Mobileye’ sistema, zeinek, inteligentzia artifiziala dela medio, egoera arriskutsuez ohartaraziko baitie gidariei, modu akustiko eta bisualean. Ingurune dinamikoa etengabe ikuskatzen duen kamera-sistema bati konektatuta egongo da aparatua, eta piztu egingo da, eta soinu-alerta bat igorriko, aurrez aurreko talka egiteko nahiz oinezko edo ziklistak harrapatzeko arriskua egokitzen delarik. Praktikan, istripua gertatu baino lehen abisatuko du, eta, horrenbestez, gidariari denbora emango, erreakzionatzeko.

Oharkabean erreitik ateraz gero, BEIren ibilgailuek ohartarazi egingo diete gidariei, baita gainerako ibilgailuekiko segurtasun-tartea gordetzen lagundu ere. Orobat ohartarazi diete gehiegizko abiaduraz, eta automatikoki ezagutuko trafiko-seinaleak. Gainera, autobusek kamera digitalak izango dituzte atzerako ispiluen ordez, eta horrek ikuseremua hobetuko du, eta aukera emango BEIren inguruan jartzen diren erabiltzaile guztiak ikusteko, inongo oinezko ez dadin egokitu gidariak ez ikusteko moduan.

Ibilgailuetan ez ezik, seinaleztapenean eta bide-marretan ere egin ditu hobekuntzak Udalak, BEIren ibilgailuen segurtasuna areagotzeko. Hain zuzen ere, garraio publikoaren sistema berri hori igaroko den 61 bidegurutzeetatik 14etan, lehen semafororik ez zegoen lekuetan, izango da aurrerantzean. Eta bidegurutze horietatik 29tan lehen baino semaforo gehiago izango dira.

Aldi berean, oinezkoek lehentasuna izango ez duten igarobideak identifikatu dira, marka berde eta zuriekin, eta sakagailua duten 40 seinale jarri, itsuei BEIren presentziaz ohartarazteko. Era berean, argi-abisuak jarri dira, eta seinaleztapen osagarria izango da bizitegi-kaleetan, ibilgailuek abiadura moteldu dezaten. Eta BEI datorrela ohartarazteko kanpaia-hotsa tranbiek erabiltzen duten bera izango da.

 

Tartea murriztea

BEIren ibilgailuek izango duten beste hobekuntza bat gidatze automatikoko sistema izango da, zeinek aukera emango baitu autobusen ate guztiak nasatik 4 zentimetro baino gutxiagora gerturatzeko. Ibilgailu arruntetan, 12 eta 19 zentimetro artekoa izan ohi da tarte hori. “Erabiltzaileei, autobusera igotzeko orduan, askozaz ere zerbitzu hobea eskaintzeko aukera ematen digu horrek”, azaldu du TUVISAko kudeatzaile María José Ajuriaguerrak.

Ate guztietatik sartu ahal izango da BEIra. Eta horrek ere laburtuko du bidaiariak hartu eta uzteko denbora.

 

 

Share

BEIren korridore berdea itxura hartzen ari da, 500 zuhaitzetatik gehienak landatu baitira ibilbidean zehar

Dagoeneko 400 altzifreen % 80  landatu dira, batez ere markesinen ondoan.

 Datozen astean hasiko dira loreak eta zuhaixkak landatzen.

 

BEIren korridore berdea itxura hartzen ari da. Izan ere, Gasteizko Udala, Mugikortasunaren eta Espazio Publikoaren Sailaren bitartez, erritmo onean ari da BEI martxan jartzen denetik ibilbidean izango dituen 500 zuhaitzetako gehienak landatzen. Datozen asteetan hasiko dira proiektuan aurreikusitako 15.000 zuhaixkak eta lore-landareak landatzen. 

Mugikortasunaren eta Espazio Publikoaren zinegotzi Raimundo Ruiz de Escuderok proiektuaren egoeraren berri eman du gaur goizean. “Hiriko kaleetan ikus daitekeenez, landatzea aurreikusitako 405 altzifeen % 80 baino gehiago eta astigar zurien % 75 baino gehiago landatu da” azaldu du zinegotziak. Ahalegin berezia egin da altzifre-multzoak BEAren geltokietatik hurbil jartzeko. Eta  horien ikusgarritasun eta inpaktu bisuala handitu egingo da hazten eta handitzen doazen heinean.

Halaber, datozen asteetan, ibilbidearen iparraldeko eremuan aurreikusitako landare-zerrendak, lore-landareak eta zuhaixkak landatzen hasiko da Gasteizko Udala.

Korridore berdeak nabarmendu egingo du garraio publiko sistema berri iraunkorrago, irisgarriago, berritzaileago eta seguruago horren identitatea. 9 milioi euroko udal inbertsioarekin (landaketak barne), puntako teknologia duten 13 ibilgailu elektriko berriek Gasteizko 14 auzo lotuko dituzte eta TUVISAren 2. linean emango dute zerbitzua, 3 milioi erabiltzaile potentzial dituelarik ibilbidean zehar.

Baina, horretaz gain,  bere ezaugarriengatik da ‘green’ autobus elektriko adimentsua: ez du kutsatzen, ez du emisiorik, efektiboa da, errei esklusiboetatik zirkulatuko duten ahalmen handiko ibilgailu elektrikoek osatzen dute, kutsadura akustikoaren maila txikiak izango ditu…

Korridore berdeak BEIren izaera iraunkorra sendotuko du. “Ezagutzeko moduko elementu bat ezarri nahi izan dugu, zuhaitz- eta landare-landaketa. Altzifreak izango dira nasen ondoan eta ibilbide osoan, lore-eremuak, zuhaixkak eta bestelako zuhaitz handiak. Sistema oso bat eratuko da hartara. Zehazki, 405 altzifre izango dira, ehunetik gora astigar zuri eta haritz, eta 15.000 inguru zuhaixka eta lore-landare. Nabarmen berdetuko da” adierazi du Mugikortasunaren eta Espazio Publikoaren zinegotzi Raimundo Ruiz de Escuderok“Landaketa hauei esker hobetu egingo dugu BEIren ibilbideko landaretza, eta egin behar izan den obra zibilaren eragina arindu”

 

Altzifre multzoak

Garraiobide horren ibilbidean barrena izango diren markesinen inguruan egingo da landaketa-ahaleginik handiena —guztira, 10 kilometroko trazadura izango du ibilbideak, eta Gasteizko 14 auzo lotuko ditu—. Nasen ondoan, ahal den neurrian, lore- eta landare-parterreak izango dira, eta hainbat altzifre. Multzo apaingarri txiki horiek —guztira 405 altzifre izango dira— koherentzia estetikoa emango diete autobus elektriko adimentsuaren geltokiei, ingurumena aintzat hartzeaz gain. Baina geltokietatik kanpo ere izango da altzifrerik. Espezie horretako aleak landatu dira ibilbidean zehar ere, hainbat lekutan: Tomas Zumarraga Dohatsuaren kalean, Zaramaga kalean, Euskal Herriko Bulebarrean…

Beste elementu deigarri bat, landare-zerrenda bikoitz bat izango da, hiriaren iparralde osoa zeharkatuko duena, BEIren erreien ondoko erdibitzaileetan barrena. Oteizaren ‘Omenaldia Galindezi’ eskultura dagoen biribilgunetik —Telefónica eta Txagorritxuren eraikinaren parean— Jacinto Benavente kaleraino, “zuhaixka loredunen (teucrium fruticans eta viburnum tinus) zerrenda ‘berde’ bat sortuko da, 20 zentimetrotik metro eta erdira artekoa, gora eta behera egingo duena; ibilbideari jarraitutasun ‘berde’ iraunkorra ematea ahalbidetuko duen uhin bikoitz bat”. Zerrenda horrek altuerarik txikiena izango duen lekuetan, lore-eremu baten itxura hartuko du; hain zuzen ere, zebrabideetan eta ikuspen handiagoa behar den lekuetan.

 

Share

BEA abian jartzeak Gasteizko bizikleta-bideen sarea hobetuko du, 1.700 metro bidegorri sortu edo zaharberritzeko aukera ematen baitu  

Azpiegitura berriak orain arteko 170 kilometroko sarera gehituko dira

Bidegorri berriak dosierra 

Etenik ez Gasteizen Autobus Elektriko Adimentsua abian jartzeko prozesuan. BEA garraio publikoko sistema iraungarri, irisgarri, berritzaile eta seguruagoa izango da. Udalak 9 milioi euro inbertitu dituelarik, azken teknologiaren arabera eginiko 13 ibilgailu elektriko berriek Gasteizko 14 auzo lotuko dituzte, TUVISAren 2. Linea baliatuta. 3 milioi erabiltzaile garraiatuko dituela aurreikusten da.

Baina horrez gain, BEAri esker hiria bera ere bertako espazio publikoa ere hobetu egingo dira. Duela aste gutxi BEAren ibilbide guztian korridore berdea egingo dela jakinarazi zen, 500 zuhaitz eta 15.000 zuhaixka zein lore-landare landatuko direlarik. Bada, gaur Udalak BEA abian jartzearen ondoriozko bidegorri berriak erakutsi ditu. Autobus elektrikoa abian jartzeko lanak aprobetxatu ditu Udalak bizikleta-sarea zabaltzeko. Horrenbestez, bidegorri berriak sortu dira, eta beste batzuk zaharberritu, BEA abiarazteko kontratuko aurrekontuaren kontura. Hiriak 1.700 metro bidegorri irabazi ditu, batez ere Arabako Unibertsitate Ospitalearen inguruan eta Jacinto Benavente kalearen ardatzean. Hauek dira orain arte egindako esku-hartzeak:

– Pablo Neruda eta Leandro Viana kaleak: bidegorri bikoitz berria galtzadan, 426 metrokoa.

– Euskal Herria bulebarra (ospitaleko ingurua). Ipar espaloian bi norabideko bidegorri berria, aparkaleku-lerroan, 175 metrokoa Eta hego aldean bi norabideko bidegorri berria, trafikotik bereizia espaloi mailan aglomeratu gorri bidez (lehen ospitaleko espaloian margotua zen), 175 metrokoa.

Jacinto Benavente: berriro asfaltatu da oso-osorik zaharberritu da Florida eta Sutaustegi Zaharreko kalearen arteko bidegorria. Gainera, eta esku-hartze osagarri gisa, udarako aurreikusitako asfaltatze lanen artean, Esmaltaciones arterainoko zati osoa zaharberrituko da, gaur egun oso egoera txarrean baitago.

Dagoeneko burutu diren esku-hartze horiez gain, datozen asteetan beste batzuei ekingo zaie, horiek ere BEA abiarazteko kontratuaren barruan.

Euskal Herria bulebarra (Eusko jaurlaritzaren ingurua): Ipar espaloian dagoen noranzko bakarreko bidegorria galtzadara jaitsiko da, eta bi noranzkoko bihurtuko, 275 metrotan.

Latinoamerika / Paraguai zatia: Hego aldean bidegorri bikoitz berri bat egingo da galtzadan, 240 metrokoa.

Mugikortasunaren eta Espazio Publikoaren zinegotzi Raimundo Ruiz de Escuderok gaur goizean azaldu duenez, “Udal honek beti dauka bizikleta gogoan. Horrenbestez, espazio publikoa birmoldatzeko esku-hartzeren bat planteatzen edo mugikortasunean aldaketa garrantzitsuren bat sustatzen den aldiko bidegorrien sarea –zein berriki 170 kilometroko distantziara iritsi baita– zabaltzeko ere. Jokamolde horren adibide asko ditugu: Hegoaldera zuzenduriko tranbiak hobekuntzak eragin zituen bizikleta-sarean, gauza bera gertatuko da tranbia Salburura eramateko lanekin, eta hala gertatu zen baita Biktimen Oroimenezkoaren eta Arkupeen ingurunea eraberritzekoekin ere… Eta orain BEArekin”.

 

Share

500tik gora zuhaitz eta 15.000tik gora zuhaixka eta landare landatuko dira BEAren ibilbidean, identitate berdearekin bat eginez

Altzifreak jarriko dira nasen ondoan, eta zuhaixkak, lore-eremuak eta tamaina handiko zuhaitzak, korridore berde bat sortzeko, linea periferikoan

 

DOSSIER CORREDOR VERDE DEL BEIlabur

Are berdeagoa izango da autobus elektriko adimentsua. Izan ere, 500tik gora zuhaitz eta 15.000tik gora zuhaixka eta landare landatuko dira ibilbide osoan barrena, martxan jartzen denerako. Gasteizko Udalak ekin die dagoeneko landaketei, Mugikortasunaren eta Espazio Publikoaren Sailaren bitartez, autobus elektriko adimentsuaren ibilbide osoa berdetzeko. Garraio publiko iraunkor eta efizientearen modu horren identitatea nabarmenduko du korridore berde horrek. Izan ere, bere ezaugarriengatik da ‘green’ autobus elektriko adimentsua: ez du kutsatzen, ez du emisiorik, efektiboa da, errei esklusiboetatik zirkulatuko duten ahalmen handiko ibilgailu elektrikoek osatzen dute, kutsadura akustikoaren maila txikiak izango ditu, eta lehentasuna izango du semaforoetan.

Autobus elektriko adimentsuari esker, ingurumenaren arloko bestelako onurak gorabehera, urtean 1.520 tona CO2 emisio murriztuko da, egungo gasolio-ibilgailuen ordez batere emisiorik gabeko autobus erabat elektrikoak erabilita. Eta orain, gainera, eraztun berde propio baten antzeko zerbait izango du. “Zuhaitz- eta landare-landaketa masibo horren bitartez, autobus elektriko adimentsuaren izaera iraunkorra sendotu nahi dute udal gobernuak eta teknikariek. Altzifreak izango dira nasen ondoan eta ibilbide osoan, lore-eremuak, zuhaixkak eta bestelako zuhaitz handiak. Sistema oso bat eratuko da hartara. Zehazki, 405 altzifre izango dira, ehunetik gora astigar zuri eta haritz, eta 15.000 inguru zuhaixka eta lore-landare”, azaldu du Gorka Urtaran alkateak. “Landaketa-kanpaina horrekin, berdindu egingo dugu BEAren ezarpenak eragindako zuhaitzen saldoa.”

Garraiobide horren ibilbidean barrena izango diren markesinen inguruan egingo da landaketa-ahaleginik handiena —guztira, 10 kilometroko trazadura izango du ibilbideak, eta Gasteizko 14 auzo lotuko ditu—. Nasen ondoan, ahal den neurrian, lore- eta landare-parterreak izango dira, eta hainbat altzifre. Multzo apaingarri txiki horiek —guztira 405 altzifre izango dira— koherentzia estetikoa emango diete autobus elektriko adimentsuaren geltokiei, ingurumena aintzat hartzeaz gain. Baina geltokietatik kanpo ere izango da altzifrerik. Espezie horretako alerik izango da ibilbidean zehar ere, hainbat lekutan: Tomas Zumarraga Dohatsuaren kalean, Zaramaga kalean, Euskal Herriko Bulebarrean…

Beste elementu deigarri bat, landare-zerrenda bikoitz bat izango da, hiriaren iparralde osoa zeharkatuko duena, BEAren erreien ondoko erdibitzaileetan barrena. Oteizaren ‘Omenaldia Galindezi’ eskultura dagoen biribilgunetik —Telefónica eta Txagorritxuren eraikinaren parean— Jacinto Benavente kaleraino, “zuhaixka loredunen (teucrium fruticans eta viburnum tinus) zerrenda ‘berde’ bat sortuko da, 20 zentimetrotik metro eta erdira artekoa, gora eta behera egingo duena; ibilbideari jarraitutasun ‘berde’ iraunkorra ematea ahalbidetuko duen uhin bikoitz bat”, azaldu du alkateak. Zerrenda horrek altuerarik txikiena izango duen lekuetan, lore-eremu baten itxura hartuko du; hain zuzen ere, zebrabideetan eta ikuspen handiagoa behar den lekuetan. Tamaina handiko zuhaitzak landatzea posible den lekuetan, aldiz, astigar zuriak eta haritzak jarriko dira.

TUVISAren linea periferikoaren ibilbide osoan dago aurreikusia landaketa, eta badira arreta berezia merezi duten zenbait esku-hartze. Adibidez, ospitalean egindako hobekuntzak zirela eta Francisco Leandro de Viana kalean eraiki zen AUOko aparkaleku berrian 14 zuhaitz landatuko ditu Udalak. Nabarmen berdetuko den beste leku bat Madril kalea izango da. Bide horretan zehar, ‘landare-pantaila’ bat sortuko da, industria-pabiloien ondoan. Tamaina handiko zuhaixka horiek lantegien egungo inpaktu bisuala minimizatzea ahalbidetuko dute.

 

 

Share

Oinezkoen lehentasunik gabeko pasabideak seinaleztatu ditu Udalak BEAren ibilbidean

Bide-marra berde eta zuriak baliatuko dira bidegurutze horiek markatu eta pertsonen segurtasuna areagotzeko

 

Autobus elektriko adimentsuaren ibilbidean oinezkoen lehentasunik gabeko pasabideak seinaleztatzen hasi da Udala, Mugikortasunaren eta Espazio Publikoaren Sailaren bitartez. Bide-marra berde eta zuriekin markatuko dira jendeak modu naturalean gurutzatzen baditu ere BEAk —mugikortasun-sistema gisa dituen ezaugarriengatik— igarotzeko lehentasuna izango duen leku horiek. Hain zuzen ere, autobus elektriko adimentsuaren ibilbide osoan baliatuko da sistema hori, beharrezkotzat jotzen den lekuetan. Kasu gehienetan, zebrabidea dago leku horietan, baina BEAren erreia egiten delarik desagertu egingo dira halako pasabideak.

Bi parte bereizi izango dituzte bide-marra horiek. Alde batetik, piktogramak pintatuko dira, oinezkoei autobus elektriko adimentsuaren lehentasunaz ohartarazteko, aldamenean ‘kontuz’ hitza dutelarik. Bestetik, gidaria pasabidearen presentziaz ohar dadin, sigi-saga formako marra bat pintatuko da bertan. Dagoeneko egin da lehen esku-hartzea, Jacinto Benavente kalean, Angel Ganivet ikastetxearen ondoan.

“Segurtasun-sentsazioa indartzeko balioko digu neurri horrek; batetik, oinezkoen segurtasuna areagotuko baita, autobus elektriko adimentsuaren erreia zeharkatzen dutenean, eta bestetik, berriz, gidariei ohartaraziko baitzaie, oinezkoak igaro daitezkeela bertatik”, azaldu du Mugikortasunaren eta Espazio Publikoaren zinegotzi Raimundo Ruiz de Escuderok.

Share

Lehiaketara atera da BEIaren kargatze-unitate funtzionala eraikitzeko kontratua

Lanek 5,6 milioi euroko inbertsioa eskatuko dute, eta Udalak milioi bat jarriko du

Kargarako guneak 16.000 metro koadro hartuko ditu, eta markesinak, lantegia, aldagelak, bulegoak eta biltegia izango ditu

 

Gasteizko Udala, Eusko Jaurlaritza eta Arabako Foru Aldundia elkarlanean arituko dira BEAren kargatze-unitate funtzionala eraikitzeko. Kargatze geldoko sistema horrek 5,6 milioi euroko inbertsioa eskatzen du. Bai Udalak bai Aldundiak kopuru horren % 17 jarriko dute, hau da, 1.032.924,70 euro erakunde bakoitzak; Eusko Jaurlaritzak, berriz, % 65 jarriko du, hots, 3.836.577,48 euro. Joan den maiatzaren 14an sinatu zuten hiru erakundeek proiektua garatzeko behar den hitzarmena. Eta gaur, Gobernu Batzarrak kontratua lehiaketara ateratzea adostu du.

2018ko maiatzaren 10ean sinatu zen “Eusko Jaurlaritzaren eta Gasteizko Udalaren arteko Lankidetza Hitzarmena, Gasteiz hirian BEI ezartzeko sinatutakoaren osagarria” izeneko dokumentua. Hitzarmenaren xedea hiri-garraio publikoan elektrifikazioa ezartzeko jarduketa osagarriak sustatzea zen, hiria BEI sistemaz hornitzeko. Besteak beste, BEI sistemaren kargatze geldoko sistema hartuko duten kotxetegien eraikuntza proiektua idaztea.

BEIrako eta hiriko autobus flotarako kotxetegien eta tailerren eraikuntza faseka egingo da, bere garaian iragarri zen bezala. Lehenengo fasean autobus adimendunaren kargatze-unitate funtzionalerako beharrezkoak diren instalazioak egingo dira.

Gaur egun udal haztegiak dauden Udalaren jabetzako lursail batean jarriko dira kotxetegi berriak, zeinak 52.000 m2 baititu. Horietatik, 16.000 m2 BEAren kargatze-unitate funtzionalerako izango dira, autobus elektriko adimendunaren eraginkortasuna bermatzeko beharrezkoa den azpiegitura barne. Instalazioek 13 autobus elektrikoetarako aparkaleku plazak eta dagozkien markesinak, tailer mekanikoa, unitateak garbitzeko tokiak, aldagelak, perimetro-itxitura eta urbanizazioa izango dituzte.

Ondorengo fase batean, Gasteizko Udalak Tuvisako kotxetegiak, lantegiak eta eraikin administratibo berria eraikiko ditu lursail berean. Instalazioek bulegoak eta aldagelak izango dituzte, bi solairutan banatuta; orotara 1.878 m2 hartuko dituzte. Horrez gain, 1.213 m2-ko biltegia eta 2.884 m2-ko tailerra izango dituzte, BEAren mantentze-lanetarako eremuak aparte daudelarik. Garbiketarako eremuak berberak izango dira autobus guztientzat, eta 1.858 m2 hartuko dituzte. Nasen gune estaliak 110 autobus hartu ahalko ditu guztira, eta etorkizunean flota osoa elektrifikatuko dela kontuan hartuta, 10.029 m2-ko markesina bat izango du; panel fotovoltaikoak instalatuko dira horretan, ahalik eta energia-eraginkortasun handiena lortzeko.

Oinezkoentzako eta bezeroentzako arretarako sarbidea Juan Crisostomo de Arriaga kaletik egingo da, eta autobusak Zadorra hiribidetik sartuko dira, autobusen zirkulazioa hurbilen dauden etxebizitzetatik urruntzearren. Azpiegitura guztiaren lizitazioaren oinarrizko aurrekontua 17.895.628 eurokoa izango da, eta egikaritze-epea, 9 hilabetekoa.

 

 

Share

Juan Garai kaleak BEAren geltoki berriak estreinatuko ditu

 Bihartik aurrera, markesina berriek  L1, L2, L4 eta L8 lineei emango diete zerbitzu, eta geroago, autobus elektriko adimentsuari.

 

TUVISAk BEA modeloko geltoki berriak estreinatzen jarraitzen du, eta garraio sistema hori ezartzeko lanak aurrera doaz hiri osoan (orain Jacinto Benavente kalean ari dira gehien bat). Azaroan Hegoaldeko eta Zaramaga kaleko geltoki berriak hasi ziren erabiltzen; larunbatean, aldiz, beste bi estreinatuko dira Juan Garai kalean. Markesinek BEAri eta L1, L4 eta L8 lineei emango diete zerbitzu, baina garraio sistema berria ezartzen den arte, TUVISAren L1, L2, L4 eta L8 lineetarako erabiliko dira.

Geltoki hauek dira zehazki: Juan Garai/Arriaga, Arriagako San Joanen parkearen alde batean, lehengo autobus geltokitik oso hurbil (hori kendu egingo da), eta Juan Garai/Paraguai, aurreko espaloian, Paraguai kalearekiko bidegurutzetik oso hurbil. Azken horrek Juan Garai/Guatemala ordeztuko du, kendu egin baita. Erabiltzaileek Paraguai kalera joan beharko dute Guatemala kalera beharrean, espaloi berean. Hona hemen markesina berri horien kokaleku zehatza:

Larunbatetik aurrera, TUVISAren erabiltzaileek BEArako diseinatu diren geltoki berriak baliatu ahalko dituzte; horiek goi mailako irisgarritasuna eskaintzen diete pertsona guztiei, espaloiaren eta ibilgailuaren arteko distantzia nabarmen gutxitzen duten plataformak baitituzte. Nabarmentzekoak dira halaber geltokien  modernotasuna eta informazio-sistemak , nahiz eta horiek ez diren BEA abian jarri arte erabiliko.

 

 

BEAren geltokiak

BEAren geltokiek oso berrikuntza garrantzitsuak ekarriko dituzte gaur egungo autobus-geltokien aldean. Hiru tamaina ezberdinetakoak izan daitezke, handiak, ertainak edo txikiak, baina guztietan birkargatu ahalko da BAT txartela, eta tiketa erosi. BAT txartela balidatzeko gune bat ere izango dute, tranbian bezala; izan ere, ezinbestekoa izango da tiketa erostea edo txartela balidatzea BEAra igo aurretik, barruan ezinezkoa baita. Dena den, makinak ez dira funtzionatzen hasiko BEA ezarri arte, hau da, ordura arte ohiko autobus-geltokiak bezala funtzionatuko dute. Hurrengo ibilgailuaren etorrera iragartzen duen sistema ere ez da martxan egongo.

BEAren geltokiak hiru motatakoak izango dira:

– GELTOKI HANDIAK: BAT txartela erosi ahalko da horietan. Bidaia baterako tiketa erosteko eta BAT birkargatzeko aukera ere izango da, eskudirutan edo banku-txartelez.

GELTOKI ERTAINAK: tiketa erosteko eta BAT birkargatzeko aukera izango da, eskudirutan edo banku-txartelez.

GELTOKI TXIKIAK: tiketa erosteko eta BAT birkargatzeko aukera izango da, baina banku-txartelez bakarrik.

Juan Garai kaleko geltokiak txikien multzoan sartzen dira.

 

 

 

Share

Zumakadi ibilbidean jarriko dira BEA modeloko lehen markesinak, eta oraingoz TUVISAren L2 linearako erabiliko dira

‘Hegoalde’ izeneko geltoki berriek ‘Zumakadi 15’ eta ‘Zumakadi plazatxoa’ zirenak ordeztuko dituzte

 

BEA-autobus elektriko adimentsuaren etorrera gero eta hurbilago dago. Lanek aurrera jarraitzen dute hiri osoan, eta zerbitzua emango duen ibilgailuak ere probatan jarraitzen du; larunbatean, gainera, beste mugarri bat jarriko da Gasteizko garraio iraunkor berria ezartzeko bidean. Izan ere, bihar bertan hasiko dira erabiltzen BEAren lehen markesinak, Zumakadi ibilbidean, Tomás Alfaro Fournier kaleko unibertsitate egoitzaren parean.

‘Hegoalde’ izeneko bi markesina berriak aurrez aurre daude, eta TUVISAren 2 lineari emango diote zerbitzu BEA behin betiko ezartzen den arte. Geltoki berriek L2A lineako ‘Zumakadi 15’ eta L2B lineako ‘Zumakadi plazatxoa’ geltokiak ordeztuko dituzte, eta horiek behin betiko desagertuko dira. Geltoki berriak zaharretatik metro gutxi batzuetara jarri dira, BEA modeloko markesinak baliatuz.

Goi mailako irisgarritasuna eskaintzen diete pertsona guztiei, espaloiaren eta ibilgailuaren arteko distantzia nabarmen gutxitzen duten plataformak baitituzte. Erabiltzaileek geltoki berrietan nabarituko duten aldaketetako bat da hori; markesina moderno eta zabalak dira, eta informazio-sistemak ere nabarmentzekoak dira.

“BEI-a gero eta gertuago dago. Orain beste urrats bat eman dugu, Tuvisako 2. linean markesina berriak estreinatuz. Geltoki irisgarriagoak, modernoagoak eta bidaiarientzat erakargarriagoak dira. Eta BEIa martxan dagoenean, gainera, bere ahalmen teknologiko guztia eskainiko dute”, azaldu du Raimundo Ruiz de Escudero Mugikortasun eta Espazio Publikoko zinegotzi eta Tuvisako presidenteak.

BEAren geltokiak

BEAren geltokiek oso berrikuntza garrantzitsuak dakartzate gaur egungo autobus-geltokien aldean. Hiru tamaina ezberdinetakoak izan daitezke, handiak, ertainak edo txikiak, baina guztietan birkargatu ahalko da BAT txartela, eta tiketa erosi. BAT txartela balidatzeko gune bat ere izango dute, tranbian bezala. Berez, ezinbestekoa izango da tiketa erostea edo txartela balidatzea BEAra igo aurretik, barruan ezinezkoa baita.

Dena den, makinak ez dira funtzionatzen hasiko BEA ezarri arte, hau da, TUVISAren L2 linearen geltokia izaten jarraitzen duen bitartean, ohiko autobus-geltokiak bezala funtzionatuko du; hurrengo ibilgailuaren etorrera iragartzen duen sistema ere ez da martxan egongo.

Datozen asteetan, BEAren markesina gehiago instalatzen joango dira, zeinak Hegoaldekoak bezala erabiliko baitira, hots, L2 linearako, eta oraindik ez da martxan jarriko BEArako teknologia. Hiru geltoki mota izango dira:

– GELTOKI HANDIAK: BAT txartela erosi ahalko da horietan. Bidaia baterako tiketa erosteko eta BAT birkargatzeko aukera ere izango da, eskudirutan edo banku-txartelez.

GELTOKI ERTAINAK: tiketa erosteko eta BAT birkargatzeko aukera izango da, eskudirutan edo banku-txartelez.

GELTOKI TXIKIAK: tiketa erosteko eta BAT birkargatzeko aukera izango da, baina banku-txartelez bakarrik.

Hegoaldeko geltokiak azken motakoak dira. TUVISAk dagoeneko ohartarazi die inguruko auzokoei geltokien behin betiko kokapenaz.

 

Share

Zaramaga kalearen adar bat aldi baterako ixtea

Santa Isabel hilerriaren ondotik doan bidea goizeko 9:00etatik 13:00etara itxiko da

 

BEA-autobus elektriko adimentsua ezartzeko lanek aurrera jarraitzen dute hiri osoan. Bihar, urriak 8, zenbait lan egingo dira Agirrelandako biribilgunetik gertu, eta horrek aldi baterako eraginak ekarriko ditu inguruan.

Zehazki, Santa Isabel hilerriaren paralelo doan adarra trafikorako itxita geratuko da, eta ibilgailuek Zaramaga kaletik joan beharko dute galtzada-bidegurutzea egin eta kutxeta bat jartzen den bitartean. Mozketak 4 ordu besterik ez du iraungo.

Hori dela eta, Tuvisaren L2A lineako Juan Garai / Guatemala geltokian ez da L1 eta L2 lineen zerbitzurik izango, 9:00etatik 13:00 arte.

 

 

Share

Beste urrats bat BEAren kotxetegiak hartuko dituen eta TUVISA lekuz aldatuko den lursaila prestatzeko


Urtaranen gobernuak orain arteko udal mintegia izandakoaren eraikinak eraisteko lanak esleitu ditu. Bertan, udal garraio elkartearen instalazioak, aparkalekuak, zamalanetarako guneak, tailerrak eta bulegoak eraikiko dira

Urtaranen gobernuak beste urrats bat egin du gaur BEAren garajeak hartuko dituen lursaila prestatzeko lanetan. Epe luzeagora, Tuvisako instalazioak eta bulegoak lekuz aldatuko dira bertara. Gobernu Batzordeak Orizon Constructora y Medio Ambiente S.L. enpresari esleitu dizkio orain arte udal mintegia izandakoaren eraikinak eta instalazioak eraisteko lanak, 96.354 euroko aurrekontuarekin eta 8 asteko epearekin.

Kontratuaren bitartez, behar diren elementuak eraitsiko dira haztegiaren lursailean, gerora TUVISAren kotxetegiak instalatzeko. Zehazki, eraikin hauek eraitsiko dira: etxebizitza/bulegoa, ibilgailuak gordetzeko hangar bat, erabilera askotarako nabe bat, egurra eta bestelakoak gordetzeko teilape bat, berotegia eta etxola bat.

Haztegiko baso zabala ia osorik utziko da, hiriko azpiegitura berdearen barruan, ingurumen balioa baitu. Haztegian zeuden landareei dagokienez, berriz,  Parke eta Lorategien Zerbitzua horien zati bat hiri osoan landatzen aritu da azken hilabeteetan, haztegiko bolumena jeitsiz. Beste guztia Olarizuko ingurumen parkera eta lorategi botanikoko baratzeetara eramango da. Etorkizunean han garatuko da udal haztegia.

BEAren kargatze-unitate funtzionala aipatutako lursailean eraikitzeko erakundeen arteko lankidetza sinatzea onetsi zuen Udalak; kargatze geldoko sistemak 5,6 milioi euroko inbertsioa izango du. BEArako eta hiriko autobus flotarako kotxetegien eta tailerren eraikuntza faseka egingo da. Lehenengo fasean autobus adimendunaren kargatze-unitate funtzionalerako beharrezkoak diren instalazioak egingo dira.

Kotxetegi berriek 52.000 m2 hartuko dute. Horietatik, 16.000 m2 BEAren kargatze-unitate funtzionalerako izango dira, autobus elektriko adimendunaren eraginkortasuna bermatzeko beharrezkoa den azpiegitura barne. Instalazioek 13 autobus elektrikoetarako aparkaleku plazak eta dagozkien markesinak, tailer mekanikoa, unitateak garbitzeko tokiak, aldagelak, perimetro-itxitura eta urbanizazioa izango dituzte.

Ondorengo fase batean, Gasteizko Udalak Tuvisako kotxetegiak, lantegiak eta eraikin administratibo berria eraikiko ditu lursail berean. Instalazioek bulegoak eta aldagelak izango dituzte, bi solairutan banatuta; orotara 1.878 m2 hartuko dituzte. Horrez gain, 1.213 m2-ko biltegia eta 2.884 m2-ko tailerra izango dituzte, BEAren mantentze-lanetarako eremuak aparte daudelarik. Garbiketarako eremuak berberak izango dira autobus guztientzat, eta 1.858 m2 hartuko dituzte. Nasen gune estaliak 110 autobus hartu ahalko ditu guztira, eta etorkizunean flota osoa elektrifikatuko dela kontuan hartuta, 10.029 m2-ko markesina bat izango du; panel fotovoltaikoak instalatuko dira horretan, ahalik eta energia-eraginkortasun handiena lortzeko.

Oinezkoentzako eta bezeroentzako arretarako sarbidea Juan Crisostomo de Arriaga kaletik egingo da, eta autobusak Zadorra hiribidetik sartuko dira, autobusen zirkulazioa hurbilen dauden etxebizitzetatik urruntzearren. Bigarren fase horren horren lizitazioaren oinarrizko aurrekontua 17.895.628 eurokoa da, eta egikaritze-epea, 9 hilabetekoa

Share