Prentsa Oharren banner

Gazteen artean espiritu ekintzailea sustatzeko Escape room bat abian jarri du Araba Ekinean-ek, on line

Aplikazioa deskarga daiteke dagoneko, eta urriaren 16ra arte egongo da erabilgarri

Gasteizko Udalak, Arabako Aldundiak, Eusko Jaurlaritzak —SPRI eta BIC Araba taldeen bitartez— eta Vital Fundazioak antolatutako Araba Ekinean ekimenak Escape room bat abian jarri du, on line —‘Ekintzailetzaren arrastoan’ izenburuarekin—, Arabako gazteek beren espiritu ekintzailea frogatzerik izan dezaten, bahitutako pertsona-talde bati laguntzeko ahaleginean. Urriaren 16ra arte egongo da eskuragarri abentura, AdventuriQ doako aplikazioaren bitartez, bai iOSen, bai Androiden. “Ekintzailetza publiko gazteago batengana hurbiltzea da helburua, modu ludikoan eta gure lurraldean jarraitzaile asko dituen formatu baten bidez”, nabarmendu du Gasteizko lehen alkateorde eta Ekonomia Sustapeneko zinegotzi Maider Etxebarriak. 12 urtetik gorako edonorentzat gomendatzen da jarduera.

Araba Ekinean-en Escape Room horretan parte hartzeko, urrats hauek egin behar dira:

– AdventuriQ aplikazioa deskargatu, doan, mugikorrean edo tabletean.

– Alta eman, erabiltzaile bat sortuz, helbide elektronikoarekin eta pasahitzarekin.

– “Ekintzailetzaren arrastoan” abentura bilatu eta kargatu, Game Pin honekin: 674637845.

Abentura puntuaziorik handienarekin eta denborarik laburrenean osatzen duenak 50 euroko opari-txartela jasoko du sari gisa, hiriko saltoki batean gastatzeko.

Araba Ekinean-en ekitaldi nagusien hilabetea

Europa jauregiak Araba Ekinean-en bi ekitaldi nagusiak hartu baino egun batzuk lehenago ekin zaio ekimen horri. Irailaren 29an, 19:00etan, “Zure ideiak balio du” lehiaketako finalisten 20 ideien aurkezpena izango da, eta 15:30ean, berriz, ekintzaileen eta finantza-, babes- eta aholkularitza-entitateen arteko B2B IV. topaketa. Urriaren 5ean, asteartez, 17:00etatik aurrera, Ekin Day jardunaldi nagusia izango da, Araba Ekintzailea 2021, Ekintzaile Handia eta Araban Ekiten sarien eta ideia-lehiaketako irabazleen sariak banaketa barne. Sarrera doakoa da, baina izena eman beharra dago, alavaemprende.com webgunean.

Share

Udalak milioi erdi euro inbertitu du tokiko enpresei laguntzeko

  • Irekita dago aldi baterako kontratuak behin betiko bihurtzeko asmoa duten dirulaguntzak eskatzeko epea
  • Aurten iaz baino 50.000 euro gehiago banatuko, eta 2019an baino 100.000 euro gehiago

Lehen alkateorde Maider Etxebarriak zuzentzen duen Ekonomia Sustapenaren, Enpleguaren, Merkataritzaren eta Turismoaren Sailak milioi erdi euro inbertitu ditu Gasteizen enplegu egonkor eta kalitatezkoa sortzen laguntzeko asmoz. Irekita dago jada aldi baterako kontratuak kontratu mugagabe bihurtzeko asmodun dirulaguntzak eskatu eta izena emateko epea udalerrian dauden tokiko enpresentzat.

“Adierazle positiboak sumatzen hasi garen arren, helburua gure hirian galdu diren enplegu-kopuru guztia berreskuratzea da, betiere enplegu duin, egonkor eta kalitatekoz ari garelarik”, esan du Ekonomia-sustapeneko zinegotzi Maider Etxebarriak.

Inbertsio horri esker, Udalak 2021eko martxoaren 2tik abenduaren 31ra bitartean egin diren edo egingo diren aldi baterako kontratuak kontratu mugagabe bihurtzeko gastuak estaliko ditu. Zehazki, bi kontratu arte izapidetuko dira enpresa eta urteko, mugagabe biuhurtu den aldi baterako kontratuei dagokien soldata gordinaren % 30eraino finantzatuko da, muga jakin batekin: 6.000 euro kontratu bakoitzeko.

2019tik hona % 25 hazi da udal-laguntza hauetara zuzendutako aurrekontua: orduan 400.000 euro ziren guztira, eta aurten milioi erdi euro. 2020an aurrekontua 50.000 eurotan igo zen, eta aurtengoan beste hainbestean.

Ekonomia-Sustapenaren, Enpleguaren, Merkataritzaren eta Turismoaren Sailak enplegurako emandako laguntzei esker Gasteizen 445 lanposturen sorrera zuzena erazgin dute pandemia hasi zenetik hona. Azken urtean tokiko enpresetako 222 kontratuk jaso izan dute udal-laguntzarik. Gainera, Eskualde Planaren azken deialdiaren bidez 124 pertsona kontratatu izan da Udalean lanean jarduteko. Eta Gazte Planaren azken deialdiaren bitartez beste 44 pertsona kontratatu ziren. Azkenik, Udalak Lanbideren eskutik eskaintzen dituen Kontratatzeko Laguntzei esker beste 55 kontraturi dirulaguntza eman ahal izan da.

 

 

Share

Tokiko merkataritza eta ostalaritzarako laguntzak eskatzeko azken egunak

 

  • Laguntzek ildo berri bat dute, terrazetarako altzariak erosteko

Ekainaren 18an amaituko da txikizkako merkataritzaren, zerbitzu pertsonalen eta ostalaritzaren arloetako enpresa txikiak —50 enplegatu, gehienez— ezarri eta berritzeko udal laguntzak eskatzeko epea. Deialdiak 300.000 euroko aurrekontua du, eta egindako inbertsioaren %25etik %40ra arteko laguntza lor dezakete proiektuek.

Ekonomia Sustapenerako zinegotzi Maider Etxebarriak adierazi du “dirulaguntzak ahalik eta lokal gehienetara iristea espero dugu, atzeraeraginezkoak izango direlako gainera”. Zehazki, 2020ko uztailaren 18tik ekainaren 18ra bitartean egindako gastuetarako izango dira.

Laguntza-ildoaren helburua da hiriko enpresa txikien lehiakortasunaren hobekuntza sustatzea. Honako hauei zuzentzen zaie deialdia: abian jartzeko edo berritzeko inbertsioa egiten duten saltokiak, tabernak, jatetxeak, hotel txikiak, eta zerbitzu pertsonalen negozioak —hala nola ile-apaindegiak eta estetika-zentroak—.

Diruz lagundu daitezke, besteak beste, ekintzak hauek: lokalak zaharberritzekoak, ekipoak hobetzekoak —jarduera nagusiarekin zerikusia duten makinak eta altxariak, eguzki-oihalak, pertsianak, aire-garbigailuak eta manparak—, eta pandemiak eragindako aholkularitza-gastuak.

Berrikuntza gisa, deialdiak ildo bat dauka Udalak baimendutako terrazak ekipatzeko elementuak erostea diruz laguntzeko. “Ostalaritzari laguntzeko beste pauso bat da, terrazak ahalik eta gehien aprobetxatu behar dituelako” gaineratu du Etxebarriak. Laguntza hauekin eguzki-oihalak, mahaiak, aulkiak, aldi baterako itxiturak edo lorontziak erosteko dirulaguntzak emango dira.

Share

Ehun ekonomiko lokala bultzatuko du Gasteizko Udalak, Jundizko enpresariekin eta Ajebaskekin hitzarmen bana sinatuta

Gasteizko Udalaren eta ehun ekonomiko lokala bultzatzen duten bi elkarteren arteko lankidetza-hitzarmenak onetsi ditu Tokiko Gobernu Batzarrak. Zehazki, Maider Etxebarria lehen alkateordea buru duen Ekonomia Sustapenerako Sailak, bi hitzarmen sinatu ditu, Arco Sur N-1 Jundizko Enpresarien Elkartearekin bata, eta AJEBASK-Arabako Enpresari Gazteen Elkartearekin bestea.

Udalak AJEBASK-Arabako Enpresari Gazteen Elkartearekin duen hitzarmena berrituko du, eta 10.500 euro emango dizkio zortzi jarduera profesional dituen proiektu bat gauza dezan. Jarduera horiek Gasteizko ekintzaile gazteen proiektuak abiarazten eta sendotzen lagunduko dute. Horrez gain, Goiuri jauregiko eta Europa biltzar-etxeko aretoak doan erabiltzeko aukera emango zaio, jarduera horiek antola ditzan.

Arco Sur N-1 elkarteari, berriz, 6.500 euro emango dizkio Ekonomia Sustapenerako Sailak, komunikazio-estrategia hobetu dezan. Jundizko industrialdea sustatzeko ekimenak bultzatzeaz arduratzen den elkarte horrek lan egingo du sare sozialetan duen presentzia handitzeko eta hilero albiste-buletin bat argitaratzeko.

“Erakunde hauek enpresa-ehun lokala egituratzeko egiten dute lan, bai eta hiriko enpresari eta enpresei aholku eta laguntza estrategikoa emateko ere. Hitzarmen hauek tresna on bat dira enplegua eta jarduera ekonomikoa sustatzeko”, adierazi du lehen alkateorde Maider Etxebarriak.

 

 

Share

Gasteizek 40.590 euroko laguntza eman dio AENKOMERri, tokiko merkataritza sustatu eta hobetzera zuzendutako ekimenak sustatzeko

Arabako Merkataritza eta Zerbitzu Enpresaburuen Federazioarekin (AENKOMER) lankidetza hitzarmena egitea onetsi du ostiralean Tokiko Gobernu Batzarrak, 2021ean Gasteizko tokiko merkataritzako enpresak sustatu, kudeaketan lagundu eta horien lehiakortasuna hobetzeko.

Hitzarmenaren zuzkidura ekonomikoa 40.590 eurokoa da, eta lehen alkateorde Maider Etxebarriak zuzentzen duen Ekonomia-Sustapenerako Sailak emango ditu. “Tokiko merkataritza defendatzen dugu, gure hiriko kaleak piztu, dinamizatu eta alaitzen duen hori, Covid-19ak eragindako oztopo guztien gainetik etengabeko berrikuntzan dagoena, beti amaiera gabeko bilakaeran. Gaur egun inoiz baino arrazoi gehiagoz babesten dugu”, azpimarratu du Etxebarriak.

Aurrekontuak zenbait monumentu enblematiko lorez apaintzea, tokiko produktuen azoka abiaraztea eta Hiria eta merkataritza dinamizatzeko sarien III. edizioa antolatzeko gastuak estaliko ditu.

 

Share

Gasteizek bost panel digital jarriko ditu Udalaren jarduerak eta ekitaldiak zabaltzeko

Euskarriak Urrezko Zeledonen plazan, Europa jauregian, Jesus Guridi kalean, autobus geltokian eta Zaramaga kalean instalatuko dira

 

Komunikazio-eredu berria Udalak Basquetourrekin sinatutako hitzarmen baten emaitza da, eta hiria Turismo Helmuga Adimentsuen Sareari atxiki izanarekin du lotura

 

Gasteizko Udalak bost panel digital instalatuko ditu herritarrei jarduera eta ekitaldi instituzionalen berri emateko. Tokiko Gobernu Batzarrak gaur onetsi duen proiektu, hiria 2020an Turismo Helmuga Adimentsuen Sareari atxiki izanaren ondorioz sortu da, eta komunikazio eredu berri bat osatuko du. Informazio puntuak, Ekonomia Sustapenaren Sailak eta Espazio Publikoaren Sailak Basquetour Turismoaren Euskal Agentziarekin sinatutako hitzarmen bati esker jarriko dira. Panelak instalatu eta mantentzeaz JCDecaux enpresa arduratuko da, Gasteizko hiri altzarien esleipenduna, kanpoko gainazaleko publizitatea ustiatzearen truke.

Komunikazio euskarri berriek Udalak bere olanak jartzeko orain erabiltzen dituen egitura metalikoak ordezkatuko dituzte. Hiru aldeko euskarri horiek zaharkituta daude dagoeneko eta Urrezko Zeledonen plazan, Europa jauregian, Jesus Guridi kalean —Corte Inglésen ondoan—Justizia Jauregian eta Lakua merkataritza-gunean daude. ‘Mupi’ digital berriak lehen hiru kokapenetara iritsiko dira, bai eta Gasteizko beste bi leku estrategikotara ere, hala nola autobus geltokia eta Zaramaga kalea, El Boulevard merkataritza-gunearen aurrean. Gailuak bertikalak izango dira eta bi alde izango dituzte: bata 75 hazbeteko pantaila digitalarekin, eta bestean ohiko paperezko kartelarekin.

Lehen alkateorde eta Ekonomia Sustapenaren, Enpleguaren, Merkataritzaren eta Turismoaren zinegotzi Maider Etxebarriak esan duenez, panelek “bideoak, argazkiak eta testuak jartzeko aukera emango dute, aldi berean informazio desberdina erakutsi ahal izateko. Eragin handiagoa izateaz gain, sistema berriak edukiak arinago kudeatzen lagunduko digu”. Mugikortasunaren eta Espazio Publikoaren zinegotzi Raimundo Ruiz de Escuderok, berriz, Udalak bultzatutako Vitoria-Gasteiz Smart Green City planean kokatu du jarduketa hori, zeinak pantaila digital handiak dituzten 20 markesina eta geralekuko 47 argibide gune ere instalatzea aurreikusten baitu. “Hiri altzariak berrituko ditugu XXI. mendeko hiri erakargarriago bat izateko, informazio gehiago eta hobea emango diguten elementu teknologikoekin”, adierazi du zinegotziak.

 

 

Share

Ekonomia-Sustapenerako Sailak 14.400 euroko dirulaguntza emango dio Gorbeia kaleko Merkatari Elkarteari, bere jarduerak finantzatzeko

Laguntza dinamizazio komertzialeko lau kanpaina garatzeko baliatuko da

Udalaren Gobernu Batzarrak erabaki du gaur goizean lankidetza-hitzarmena egitea Gorbeia kaleko Merkatarien Elkartearekin, horren bidez inguru horretako merkataritza dinamizatu eta berpizteko jarduerak sustatzeko, bai eta merkataritza jarduera iraungarri egiteko ere.

Ekonomia-Sustapenaren, Enpleguaren, Merkataritzaren eta Turismoaren Sailak bideratu duen hitzarmenaren bitartez 14.400 euro erabiliko dira Gorbeia kalean merkataritza sustatzeko lau kanpaina garatzeko: sareetan sentsibilizazioa egiteko kanpaina, “Gorbeia pasaportea” lehiaketa, udazken-negua kanpaina, eta, azkenik, 2 orduz doan aparkatzeko txartelen kanpaina.

Ekonomia-Sustapena, Enplegua, Merkataritza eta Turismoa Saileko zinegotzi Maider Etxebarriak azaldu duenez, “laguntza hauen bidez antolatu dituzten kanpainetako gastuei aurre egin ahalko die Gorbeia kaleko Merkatarien Elkarteak, zein merkataritza-ehuna sustatzeko asmodun jarduerak garatzen jarduten baitu. Ahalegin handia egiten dute gure hiriaren alde; izan ere, merkataritzak hiria sendotzen du”.

Share

Merkataritza Ganberarekiko hitzarmena onetsi du udalak, salmentetako profesionalak prestatzeko

Udalak 10.000 euro emango ditu Arabako Merkataritza Eskolaren jarduerarako.

Tokiko Gobernu Batzarrak Gasteizko Udalaren eta Arabako Merkataritza eta Industria Ganbera Ofizialaren arteko lankidetza-hitzarmena onetsi du, Arabako Merkataritza Eskolako 2021eko gastuak finantzatzen laguntzeko.

Udalak 10.000 euroko laguntza emango dio merkataritza arloko prestakuntzarako eskolari, eta honek salmenten arloko profesionalak enpresen eskura jarriko, sektore honetako jarduera ekonomikoa eta enplegua sustatzeko xedez. Arabako Foru Aldundiaren laguntza ere izango da proiektuari ekiteko.

Ekonomia Sustapenaren, Enpleguaren, Merkataritzaren eta Turismoaren Saileko zinegotzi Maider Echevarriak azaldu duenez, “eskolak banakako ibilbide pertsonalizatua eskainiko die parte-hartzaileei, eta merkataritzaren eta salmenten alorreko profesional bihurtzeko behar duten laguntza eta tuturetza emango. Udalak babestu egiten ditu sektorea profesionalizatzeko eta gure udalerrian enplegua bultzatzeko ekimenak”.

Share

60.000 euro bideratuko ditu Udalak teknologia berrien inguruko prestakuntza gizarteratze-tresna gisa baliatzen duen Saregune proiektura

Sartu Arabarekiko hitzarmena berritu du Ekonomia Sustapenerako Sailak

Sartu Arabak garatzen duen Saregune prestakuntza-proiektuari laguntza ekonomikoa emateko hitzarmena onetsi du Tokiko Gobernu Batzarrak, Erdi Aroko hirigunea biziberritzeko eta elkartasunez integratzeko lanarekin jarraitzerik izan dezan, teknologia berrien inguruko prestakuntza tarteko. 60.000 euro bideratuko ditu Ekonomia-sustapen, Enplegu, Merkataritza eta Turismo Sailak horretara.

Egungo testuinguruan, eta etorkizuneko erronka berriei aurre egiteko, pandemiak sortutako egoerara egokitutako bertsio berri bat aurkeztu du Saregune proiektuak.

Oinarrizko trebetasun digitalak irakasteaz gain —nabigatzaileak, posta elektronikoa edo testu-prozesadorea—, banako laguntza eta tutoretza-zerbitzua eskainiko die hainbat programa eta aplikazioren inguruko prestakuntza behar dutenei. Ezagutza informatiko espezializatuen eskariari erantzuteaz gain, on-line prestakuntza-espazioen diseinuari eta mantentze-lanei ere erantzuten die, eta gizartea sentsibilizatu eta dinamizatzeko beste zenbait ekintza egingo.

Lankidetza-hitzarmenari esker, harreman eta partaidetza komunitariorako leku gisa bere balioa erakutsia duen espazio bat dinamizatzen jarraituko du 2002. urteaz geroztik integrazio-lanak egiten diharduen Sartu Alavaren ekimenak.

Ekonomia Sustapenaren, Enpleguaren, Merkataritzaren eta Turismoaren Saileko zinegotzi Maider Etxebarriaren ustez, “eten digitalaren haustura gainditzen laguntzen duten ekimenak babesten ari gara. Gainera, auzoko beste arrakala batzuk gainditzeko aukera ematen du oinarrizko gaitasun digitalei buruzko prestakuntzak, hala nola soziala edo ekonomikoa. Eta hori, zalantzarik gabe, balio handiko zeregina da”.

Hogeita hamahiruna ordenagailuz hornitutako bi gela ditu Saregune proiektuak, Bueno Monreal kalearen eta Santa Maria kantoiaren arteko lokalean.

Share

Ekonomia Sustapenerako 2021eko aurrekontuak enplegua du ardatz, eta merkatari eta ostalarientzako laguntzak % 35 handitzea proposatzen du

Datorren urtean sailak 12,8 milioi kudeatzea proposatu du lehen alkateorde Maider Etxebarriak , hau da, % 7,5 gehiago.

 

Proposamenak 1,2 milioiko inbertsioa ere jasotzen du Gasteiz turismo-helmuga gisa sustatzeko.

 

Lehen alkateorde eta Ekonomia Sustapenaren zinegotzi Maider Etxebarriak eskua luzatu die gaur oposizioko taldekoei, 2021eko aurrekontua onesteko, pandemiak eragindako kaltearen ondoren Gasteizko enpleguaren eta ehun ekonomikoaren aldeko apustu irmoa egiten duen agiria. Ogasun batzordean, zinegotziak bere arloari datorren urterako esleitutako aurrekontu-partida garrantzitsuenak azaldu ditu, 388 milioiko proiektu ekonomikoa, non osasuna, gizarte ongizatea eta inbertsio publikoak nabarmentzen diren, 34,4 milioi eurotan.

Alkateordeak adierazi duenez, PNV-PSE gobernuak adostutako aurrekontu-proiektuak 12,8 milioi euro ditu esleituta 2021ean Ekonomia Sustapenaren, Enpleguaren, Merkataritzaren eta Turismoaren Sailerako: “aurten baino % 7,5 gehiago, eta horrek erakusten du ziurgabetasun egoeran bete egiten dugula tokiko ekonomiaren aldeko apustua egiteko dugun konpromisoa”.

Etxebarriak azpimarratu du proiektu ekonomikoaren oinarrietako bat enplegua dela. Zehazki, 2021ean, 7,6 milioira iristen da kapitulu horretara bideratuko aurrekontua, % 11,7ko igoera, alegia. “Bestela esanda, Ekonomia Sustapenerako aurrekontuaren % 60 enplegurako politika aktiboetarako da, eta horrek argi uzten du kapitulu honi ematen diogun garrantzia. Zenbateko horrek barne hartzen ditu enplegu-planen bidez kontratatzeko partidak, enpresentzako kontratazio-laguntzak, prestakuntza, zein eragile ekonomikoekiko hitzarmenak.

Merkataritzari eta ostalaritzari laguntzea

Pandemia osasuna eta ekonomia itotzen ari den une honetan, zinegotziak plan ekonomikoa defendatu du, arreta enpleguan jartzeaz gain, tokiko ehun ekonomikoari laguntzeko hainbat laguntza biltzen dituen plana, merkataritzarako, ostalaritzarako, ikus-entzunezkoen sektorerako, enpresak sortzeko eta ekintzaileentzako beketarako pizgarriak biltzen dituena.  Programa horiek milioi eurotik gora dira (1.095.000), beraz % 53,4ko gehikuntza.

Zentzu horretan, bi berrikuntza azpimarratu ditu Etxebarriak: Lehena, 450.000 eurora iristen direla merkataritza eta ostalaritzarako laguntzak, hau da, 2020aren aldean % 35,5 gehiago Bigarrena, 200.000 euroko partida sortzea aurreikusten dela dinamizazio ekonomikorako, eta horrek aukera emango duela pandemiaren eraginez laguntza behar duten sektore ekonomikoak “indartzeko”.

Gainera, plan ekonomikoak kontuan hartzen du Gasteiz turismo-helmuga gisa sustatzen jarraitu behar dela, eta horrek 1,2 milioitik gorako ahalegina eskatuko du.

 

 

 

 

Share