Prentsa Oharren banner
Kategoriak: Fotonotizia  —  Etiketak: ,   —  Komunikazio Zerbitzua / Servicio de Comunicación  —  17 apirila 2018 11:08

 

 

 

 

 

 

Gaur goizean Industria Mahaia bildu delarik, Enpleguaren eta Garapen Ekonomiko Iraunkorraren zinegotzi Nerea Melgosak Industriari Laguntzeko 2017-2020 Planaren gauzatze-mailaren balantzea egin du; izan ere,Gasteizko Udalak abian jarritako ezaugarri horietako lehen ekimena da. Lan-ildoetako bat industrialdeetako hirigintza eta mantentze esku-hartzea da, zeinean dagoeneko 792.073 euro konprometitu batira Bitorialanda, Bitoriabidea, Arkatxa eta Larragana eraberritzeko —lanak esleituta daude jada—, eta industrialde guztietako seinaleztapen horizontala berriro margotzeko —laster esleituko da—. Aurtengo udaberrian eta udan egingo dira obra horiek.

Orobat, 2017an Industriaren Postontzian jasotako datuak ezagutarazi dira. Enpresen eskabideak hartzeko zerbitzu hori Herritarren Postontziaren adar bat da, eta iaz 89 eskabide jaso ziren; horietako 55 ebatzi dira dagoeneko. Eskabide gehienak bide publikoarekin lotuta daude; ondoren, berdeguneekin, argiteria publikoarekin eta garbiketarekin lotutakoak datoz.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  13 apirila 2018 14:02
  • Bestalde, Jundizko Enpresa Zentroan dauden lantegiek lana eman zieten 118 pertsonai 2017an

Enpleguaren eta Garapen Ekonomiko Iraunkorraren zinegotzi Nerea Melgosak Udalaren enpresa-zentroek 2017an izandako jardueraren berri eman du. Datu esanguratsuenen artean, Erdi Aroko Hiriguneko Enpresa Zentroak –erabilera-aniztasun handienekoak– artatu zituen 6.621 pertsonak. Guztizko zifra horretatik 3.492 pertsonek parte hartu zuten bertan instalatutako enpresen bilera eta jardueretan. Era berean, ekintzailetza sustatzeko prestakuntzak 1.170 pertsona erakarri zituen, eta bisita gidatuetan 780 pertsonek hartu zuten parte. Azpimarratu behar da baita 390 pertsona bildu zirela ekintzaileentzako aholkularitza-jardueretara, eta 332 enpresak sendotzeko prestakuntza-saioetara.

13 banakako bulego ditu erabilgarri zentroak, eta guztiak okupatu ziren, % 100, beraz, 2017. Bulego konpartituak, berriz, 6 dira, eta horietatik 5 erabili ziren, % 83ko okupazioa beraz. Erdi Aroko Hiriguneko Enpresa Zentroan dauden negozioen profilari erreparatuta, ikusten da 28 pertsona enplegatu zirela iaz, eta fakturazio-bolumena enpresako ia 50.000 eurokoa izan da kasu gehienetan.

 

Jundizko Enpresa Zentroa

Jundizko Enpresa Zentroaren erabilpen-datuak ere positiboak dira. 14 bulego erabilgarri ditu zentroak, eta iaz okupazioa % 100ekoa izan zen. Pabilioien kasuan, berriz, erabilera % 87,.5ekoa izan zen: 16 pabilioi erabilgarri daude, eta 14 erabili ziren. Instalazioen balorazioa oso ona izan da ia alderdi guztietan.

Autonomoen eta soldatapekoen artean, enpresa-zentro horretan instalatu diren enpresak lana eman die iaz 118 pertsonei.

Jundizko Enpresa Zentroko prestakuntza-aretoa 48 bider erreserbatu zen iaz, eta guztira 219 pertsonek erabili zuten.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  4 apirila 2018 10:51

Apirilaren 6tik 8ra arte egingo da Napoleon garaiko VIII. Azoka, Arriagako parkean; Ipar Arriaga elkartearen ekimenak aisialdia, kultura eta merkataritza dinamizazioa batzen ditu. Elikagaiak eta artisau produktuak eskainiko dituzten120 saltokiez gain, girotzeko berrogeita hamar jarduera baino gehiago egingo dira, parkean zehar banatuta.

Ekintza nabarmengarrienen artean, Gasteizko Batailaren 60 antzezleren esku hartzea dugu: frantsesen inbasioa eta atzera-egitea irudikatuko dituzte, soldaduen formazioa, eta artilleria salbak. Orobat, kanpaleku napoleonikoa jarriko dute, Independentzia Gerran parte hartu zuten armadak irudikatuz; “Vitoria 1813” elkartearekiko lankidetzan antolatu dira jarduera horiek.

Napoleonen azokaren beste erakargarrietako bat haurrentzako jolasgunea da; kanpalekuan bertan instalatuko da, eta zenbait jarduera didaktiko egingo dira han. Garaiko jantziak eta objektuak sortzeko lantegi praktikoak izango dira familientzat.

Enpleguaren eta Garapen Ekonomiko Iraunkorraren zinegotzi Nerea Melgosak eta Ipar Arriaga auzo-elkartearen lehendakari Ángel Lamelasek hiriko ekitaldi gisa aurkeztu dute Napoleonen garaiko VIII. Azoka, maila lokaletik haragoko oihartzuna baitu. “Lakua-Arriagarako jarduera eragile garrantzitsua da, eta inguruko auzoko, merkatari eta ostalarien inplikazio handia nabarmendu nahi dugu, beste hiri batzuetako bisitak erakartzeko hitzordua bihurtu dadin. Honelako dinamizazio jarduerak antolatzeko arlo publikoaren eta pribatuaren arteko lankidetzaren alde egiten dugu”, adierazi du Nerea Melgosak.

Ángel Lamelasek, berriz, Napoleonen Azoka hiriko eta estatuko kultura egutegian sendotuta dagoela nabarmendu du. “Honelako ekitaldiei esker, gertaera historikoekin lotutako turismoa oso errotuta duten eta ahalmen handia duten hiriek osatzen duten produktu turistiko baten komertzializazioan parte hartzen du Gasteizek. Izan ere, Gasteiz Hiri Napoleonikoen Europar Sarearen kide den Espainiako lehen hiria bihurtzea lortu dugu. Ahaztu gabe auzoko saltokiei eta hiriari dakarkien onura ekonomikoa, jakina”, esan du Ipar Arriaga elkartearen lehendakariak.

Jarduerak ostiralean, hilak 6, hasiko dira, 17:30ean haurrentzako txokoa irekiko baita; ordu erdi geroago, inauguratzeko pregoia izango da. Kalejirak, ipuin-kontalariak, antzerkia, gaitak, magia, malabareak eta umore girotzea aurki daitezke programan. Larunbat eta igandeko jarduerek 11:00etatik 14:00etara eta 17:00etatik 22:00etara iraungo dute.

Informazio gehiago: Napoleonen garaiko VIII. Azokaren egitaraua

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  27 martxoa 2018 12:04
  • Herrialde hartako gida turistiko garrantsitsuenetako batean agertuko da gure hiria

Martxoaren 28an eta 29an, Marco Polo gidako bi kazetari alemaniar etorriko dira Gasteizera bisitan, Euskadiko hiriburuko erakargarri nagusiak ezagutzera; gida hori herrialde hartako garrantsitzuenetako bat da. Historia eta kultura ondarearekin, iraunkortasunarekin eta enogastronomiarekin lotutako eskaintza erakutsiko zaie. Kazetariek jasotzen duten informazioa Marco Polo gidak Espainiari buruz egiten duen hurrengo edizioan sartuko dute, zeina 2019ko martxoan argitaratzekoa baita.

“Prentsa-bidaia horrek eta antzeko beste askok 2018an Gasteiz hainbat hedabidetako kazetariei erakusteko balioko dute, hiria bertatik bertara ezagut dezaten eta ditugun turismo erakargarri eta baliabide guztien berri eman dezaten beren argitalpenetan. Alemaniarekin airetiko lotura zuzena dugunez, bidaia hau bereziki interesgarria da hiria promozionatzeko gure estrategiaren barruan. Joan den astean erakunde misioan joan ginen Coloniara, eta Alemanian merkatu-nitxo garrantzitsua dugula egiaztatu ahal izan genuen. Hori azaldu ziguten hainbat turismo-eragilek. Aukera horri ahalik eta etekin handiena atera behar diogu“, adierazi du Enpleguaren eta Garapen Ekonomiko Iraunkorraren zinegotzi Nerea Melgosak.

Kazetari alemaniarrek bihar eta etzi Gasteizera egingo duten bisita Espainiak Frankfurten duen Turismo Bulegoaren eta Basquetour Euskal Turismo Agentziaren laguntzarekin antolatu da.

 

 

 

 

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —   11:10

 

 

 

 

 

 

  • Ikastaro horietan Administrazioan enplegua aurkitzeko aukerak erakutsiko dira, eta zenbait tresna digital aztertuko dira, enplegua bilatzerakoan lagungarri
  • Luzatu egingo da enplegua bilatzen laguntzeko coaching programaren iraupena

 

Enpleguaren eta Garapen Ekonomiko Iraunkorraren zinegotzi Nerea Melgosak 2018ko Enplegua Bilatzeko Orientazio Plan Integrala aurkeztu du. Ekimen horren bitartez, Gasteizko Udalak gainditu egin nahi du iazko parte-hartzaileen kopurua, 742 pertsonakoa, besteak beste ikastaro labur espezializatuei esker, zeinen bitartez enplegua bilatzeko prozesurako irtenbide praktiko zehatzak eskaini nahi diren.

Lantegi horiek batetik, berariaz bideo-curriculuma egitera zuzenduriko beste bat, bestetik, eta enplegua bilatzen laguntzeko coaching programaren luzapena, horiek dira berritasun nagusiak, bi indargune hauek ezaugarritzen duten programaren baitan: tratu pertsonalizatua eta akonpainamendu iraunkorra partaideei, harik eta xedeak lortzen dituzten arte.

“Enplegu bila Udalera jotzen duen orok jakin dezake bere beharretara egokituko garela, eta aurrez aurre arituko garela lanean haren profilari hobekien egokitzen zaion ibilbide profesionala diseinatzeko. Orientatzaile talde bikaina dugu, oso ondo ezagutzen duena lan-merkatu gero eta aldakorrago baten bilakaera, eta eskura duena enplegua aurkitzeko baliabide-sorta zabal bat”, esan du Nerea Melgosak.

Enplegua Bilatzeko Orientazio Plan Integrala hiru ildo nagusitan egituratzen da. Bada arreta pertsonalizatuko lehen fase bat, enplegu bilaketa eraginkorragoa egitea behar duen orori eskainia. Bertan, orientatzaileen lantaldeak pertsona bakoitzaren profil profesional eta pertsonala aztertuko du, hobetu daitezkeen alderdiak identifikatuko ditu, hobekuntza hori gauzatzeko estrategia eraginkorrak garatuko, eta enplegua bilatzeko teknika eraginkorrak ezarriko.

Bigarren lan-ildo bat profil profesionala eguneratzera zuzentzen da, lehiakorrago egitera, eta, asmo horri begira, bere beharren arabera zuzenduriko prestakuntzarik onena bilatzera zuzentzen dira partaideak. Horrenbestez, paraideen eskuetan jartzen da Udalaren prestakuntza-eskaintza, zein, 2018ko lehen seihileko honetarako aurrez aurreko 40 ikastaroz (600 leku guztira) eta 233 on line ikastaroz osatzen den.

Azkenik, Orientazio Planak enplegua lortzeko trebetasun gakoak lantzen dituzten taldeetan parte hartzeko aukera eskaintzen du. Azpimarratzekoak dira, ildo horretatik, lantegi labur espezializatu berriak, zeinetan gai hauek planteatzen diren 2018rako:

  • Symbaloo: Web-orri gogokoenak era bisual eta pertsonalizatuan uneoro eskura izateko tresna ezagutzeko, eta enplegu bilaketan erabiltzeko.
  • Oposizioak egin: Administrazio publikoko enpleguari buruzkoa.
  • Lan-elkarrizketa: Lan-elkarrizketari arrakastaz aurre egiteko gaitasunak garatzeko lantegia.
  • Linkedin: Linkedin zer den eta lana bilatzeko zein erabilgarritasun duen ezagutzeko lantegia.

 

Lantegi laburren iraupena hirui ordukoa izango da eta hileroko maiztasunez programatuko dira; horiekin bat, bideo-curriculuma egiten ikasteko berariazko lantegi bat ere eskainiko da, non partaideek ikasiko duten norberaren eskarmentua eta gaitasunak islatzeaz gain, lan-eskaintza baten aurrean lehiakideengandik bereizteko aukera ematen duen curriculum-formatu jakin bat baliatzen. Lantegi horren iraupena 24 ordukoa izango da.

Bestalde, luzatu egingo da enplegua bilatzen laguntzeko coaching programaren iraupena: 2016 abiarazitako ekimenak 23 orduko iraupena zuen, baina aurten 35ekoa izango da. Programa horren bitartez partaideei beren talentua aurkitzen eta garatzen lagunduko zaie, baita beren bereizgarriak identifikatzen, eta marka pertsonala nabarmendu eta sustatzen ere. Horretarako talde-dinamikak eta elkarrizketa profesionalak egiten dira, zortzi saiotan egituratuta. Ekimen hori lan merkatuan txertatzeko arazoak izanik, 45 urtetik gorako eta 30etik beherako pertsonei zuzentzen zaie.

Beste aukera dagoeneko sendotu bat lan aktibazioko lantegiena da: 30 orduko iraupena dute, 3na orduko 10 saiotan banatuta, eta astelehenetik ostiralera egiten dira, elkarren segidako bi astetan. “Lantegi horien bitartez partaideen enplegua aurkitzeko aukera guzti-guztiak jorratu nahi ditugu, harreman pertsonalen bitarteko lan-eskaintzak eskuratzetik, hautatze-elkarrizketa ahalik eta modurik eraginkorrenean prestatzeraino”, esan du Nerea Melgosak.

Horri guzti horri gehitu behar zaio Udalaren“Enplegu zentroa”, gune bat non biltzen den ekipamendu informatikoa, baliabide materialak eta teknikariak, informazioa bilatu, lan-eskaintzetarako izen-emateak izapidetu, curriculuma osatzen edo enpresa jakin batzuei buruz informazioa bilatzen adituak. Gainera, Lan orientabiderako udal zerbitzua Lanbideren zentro laguntzailea da, lan-eskaerarako izena eman eta eskaera hori eguneratzeko.

 

Iazkoan 1.000 elkarrizketatik gora

Enplegua Bilatzeko Orientazio Plan Integralaren iazko edizioaren balantzean, azpimarratu behar da 742 pertsona artatu zirela eta 1.171 orientazio-elkarrizketa banakako egin zirela. 35 eta 54 urte bitarteko langabetuek osatzen dute zerbitzuaren erabiltzaileen profil nagusia. jasotako artaren balorazioari dagokionez, pertsonen % 97,33k uste du zerbitzua lagungarri izan zitzaiola, eta beren helburuei erantzun zietela; % 98,62k gomendatu egingo luke.

Iazkoan 64 pertsonak hartu zuten parte enplegua bilatzen laguntzeko coaching programan, eta 114k lan aktibazioko lantegietan. Guztira, talde-orientazioko 17 jarduera burutu ziren.

Informazio gehiago: Enplegu Bilaketarako Orientabideak emateko Plan Integrala

 

 

 

 

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  22 martxoa 2018 12:27

Enoturismoa eta gastronomia erakutsi ditu erakargarri nagusi gisa

Arabako erakundeak, ekonomia eta merkataritza misio baten barruan, beren turismo erakargarri nagusiak erakusten ari zaizkie asteon Alemaniako bidaia agentziei eta prentsa espezializatuari xede batekin, eta da lurraldea oporretarako helmuga gisa kokatu nahi dutela Europako merkatu nagusietako batean, aprobetxatuta hegaldiak daudela Gasteiz eta Kolonia artean.

Arabako Foru Aldundiak, Gasteizko Udalak eta Eusko Jaurlaritzak gaur aurkeztu dizkie lurralde historikoko turismo eskaintzaren eduki nagusiak eta haien kapitalak Kolonian kokatuta dauden eta Espainiara eta Portugalera zirkuituak taldean egin eta oporrak taldean igarotzea programatzean espezializatuta dauden handizkako bidaia agentzia biri (Conti-Reisen eta Olimar-Reisen).

Arabako ordezkaritzaren buru Ramiro González diputatu nagusia da, baina harekin batera beste hauek era badaude: Pilar García de Salazar Ekonomia Garapenaren Saileko diputatua, Cristina González Enplegu, Merkataritza eta Turismo Sustapenaren Saileko diputatua, Maider Etxebarria Eusko Jaurlaritzako Turismo zuzendaria, Nerea Melgosa Ekonomia Garapenaren zinegotzia, Gregorio Rojo Arabako Merkataritza Ganberako lehendakaria eta Eduardo Mozo de Rosales erakunde horretako idazkaria.

Oraingoan, Cristina Gonzalezek, Maider Etxebarriak eta Nerea Melgosak parte hartu dute bilera horietan, eta beste bilera bat egin dute Koloniako Turismo Bulegoarekin, informazioa trukatzeko eta lankidetza aukerak aztertzeko.

Agenda hori jarraipen bat da atzo arratsaldean hiri berdineko hotel batean izaniko aurkezpen batena; izan ere, Araba turismo helmuga gisa aurkeztu zen, eta aurkezpen horretan, Alemaniako txikizkako berrogeita hamarren bat bidaia agentzia eta bidaietan eta aisialdian espezializaturiko tokiko kazetariak eta blogariak egon ziren. Haren xedea izan zen jakinaraztea zer eskaintzen duten Gasteizek eta Arabak.

Enoturismoa eta gastronomia

Maider Etxebarria Turismo zuzendariak Alemaniako agentzia eta komunikabideei Arabako ondarearen, kulturaren eta naturaren baliabideen berri eman zien, eta bereziki nabarmendu zituen enoturismoa eta gastronomia. Aurkezpen horretan bi ikus-entzunezko baliatu ziren, bata Arabako Errioxari eta haren eskaintza enoturistikoari buruzkoa, eta bestea lurraldeko taberna eta jatetxeei buruzkoa.

Ekitaldia bukatzeko, Arabako Errioxako ardoak eta Arabako Txakolina jatorrizko deiturako ardoak dastatu ziren.

Arabako Foru Aldundiak, Eusko Jaurlaritzak, Gasteizko Udalak eta Arabako Merkataritza Ganberak koordinatutako erakunde lan honen xedea da Araba oporretarako helmuga gisa kokatzea Alemanian, zeina baita Europako turismo merkatu nagusietako bat, aprobetxatuz hegaldi erregularrak daudela Gasteiz eta Kolonia artean bi aldiz astean.

Alemania nazioarteko hirugarren merkatua da Arabako turismo sektorerako, eta Euskadikorako, eta, hain zuzen ere, Renaniatik –eskualde horretan dago Kolonia– etortzen dira bisitari gehienak. 10.500 alemaniar inguruk eman zuten gaua iaz, 2017an, Arabako hotel eta nekazal turismoetan, eta azkeneko bost ekitaldian % 28ko hazkundea izan du.

 

Alemaniako turismoa oraindik garrantzitsuagoa izan daiteke Araban, kontuan izanda, batez ere, 2017. urtearen azkenetatik hegaldiak daudela Gasteizko eta Koloniako aireportuen artean. Kontuan izan behar da, gainera, turista alemaniarrak nabarmendu egiten direla egunero egiten duten gastuan eta beren helmugetako batez besteko egonaldietan (alemaniarren urteko gastua bidaietan 60.000 euro dira urtean).

Alemaniako bidaia agentziek nahi dutena da beren produktuak bereiztea, xede duten publikoari modu segmentatuan zuzentzeko, eta horretan Araban aukerak ditu helmuga erakargarri gisa kokatzeko, batez ere lehen mailako eskaintza enoturistikoa bilatzen dutenentzat, gastronomiaz gozatzen dutenentzat edo natura ondo zainduta, jendetzarik gabe, bilatzen dutenentzat.

Turismo sustapeneko bilera horiek kokatzen dira Arabako Foru Aldundiak, Eusko Jaurlaritzak, Gasteizko Udalak eta Arabako Merkataritza Ganberak osatutako ordezkaritza bat aste honetan Alemaniako Ipar Westfaliako Renania estatura Arabako ekonomia eta turismo ahalmenak erakusteko xedez egiten ari den bidaia instituzional baten barruan.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  7 martxoa 2018 11:51

 

 

 

 

 

 

  • Aurtengo lehen seihilekorako aurrez aurreko 40 ikastaro antolatu dira, guztira 600 leku dutenak

 

Enpleguaren eta Garapen Ekonomiko Iraunkorraren zinegotzi Nerea Melgosak 2018ko lehen seihilekorako udalaren enplegurako prestakuntza-eskaintza aurkeztu du; berritasun gisa, industria aurreratu eta adimentsuarekin  lotutako bost ikastaro antolatu dira. Prestakuntza programazioaren multzo nagusia aurrez aurreko 40 ikastarok osatzen dute —orotara 600 leku— eta horiei ordenagailu bidezko 233 prestakuntza-ikastaro gehitzen zaizkie, leku mugarik gabe.

Eskaintza zabala proposatzen dugu, lan-merkatuaren eskaerei egokitua, eta hiru helburu nagusi dituena: enplegurako prestakuntzan diharduten gainerako agenteekiko koordinatzea,  profesionalak eskatzen dituzten enpresei ahalik eta erantzun egokiena ematea, eta lanpostua lortzeko behar handiena duten langabe taldeei lehentasuna ematea“, adierazi du Nerea Melgosak.

Prestakuntza-eskaintzan lau profili eman zaie lehentasuna: kalifikazio-maila txikia duten 16 eta 30 urte bitarteko langabeak; langabezian denbora luzea daramaten 45 urtetik gorakoak; emakumeak,  neurriz beherako ordezkaritza duten jarduera-sektoreetan, eta prestakuntza edo esperientzia izanik lan-merkatuaren benetako eskaerari egokitu beharra duten pertsonak.

 

Aurrez aurreko prestakuntza 

Alor horretan, informazio- eta komunikazio-teknologien sektore estrategikoan eskaintzen da ikastaro gehien. Orotara 21 ikastaro dira, eta gai hauek landuko dituzte: eraikuntzara bideratutako diseinu teknikoa, e-commerce-ko soluzioak, diseinu grafikoa, web diseinua, errealitate handitua zein irakasleentzako STEAM metodologia. Enpresetan erabiltzeko programazio lengoaiei eta merkataritzarako errealitate handituari buruzko ikastaroak ere eskainiko dira.

Multzo horrekin batera, 4.0 industriari buruzkoa nabarmentzen da, espezialitate aurreratuenetako batzuei buruzko ikastaroak barne hartzen baititu. Bost modulu izango  dira, gai hauek lantzeko:  big data, droneen erabilera, blockchain bidezko zibersegurtasuna, eta  IoT soluzioak. Ikastaro horiek egin ahal izateko informatika edo elektronika adarrekin lotutako prestakuntza edo esperientzia eskatuko dira, moduluaren arabera.

Azken urteetan bezala, eraikuntza eta birgaikuntza iraunkorrari buruzko ikastaroak ere sartu dira enplegurako prestakuntzaren barruan. Zazpi ikastaro izango dira, espezialitate hauetan: pintura, prefabrikatuak, eguzki instalazio termiko edo fotovoltaikoak, biomasa instalazioak, lan bertikalak eta zoruen instalazioa. Multzo horretako ikastaroak dira luzeenak: prefabrikatuen bidezko eraberritzeari buruzko ikastaroak 315 ordu irauten du, eta eraikuntzara bideratutako pinturari buruzkoak, 290.

Prestakuntza-eskaintzaren bosgarren sektore estrategikoa enplegu berdeari eta iraunkortasunari dagokiona da; lau ikastaro dira: horietako hiru, nekazaritza ekologikoarekin lotutakoak, eta laugarrena, Dialux baliatuz argiztapen-proiektuak lantzeari buruzkoa.

Horietaz gain, mendekotasuna duten pertsonei etxean gizarte eta osasun arreta ematearekin lotutako bi moduluk osatzen duten lehen seihilekorako aurrez aurreko ikastaroen eskaintza.

 

Aurrez aurrekoa ez den prestakuntza  

Beti bezala, aurrez aurreko ikastaroei ordenagailu bidezko prestakuntza-eskaintza zabala gehitzen zaio; aurten 233 ikastaro izango dira guztira, leku mugarik gabe, hainbat arlotan: enpresen kudeaketa eta administrazioa, programazioa, sistemak, diseinua eta komunikazioa, multimedia, ofimatika, etab.

Bestetik, jardunaldi monografikoak antolatzen dira ikastaroen osagarri: astearte teknologikoak, teknologia berrien arloko enplegu aukera berriak aurkezteko, eta eraikuntza eta birgaikuntza iraunkorrari buruzko jardunaldiak.

Ekintzailetzari dagokionez, enpresak sortzeari buruzko bi hastapen ikastaro nabarmentzen dira, horiek amaitutakoan lantegi praktikoetan parte hartzeko aukera emango baitute. Helburu praktikoekin, halaber, enpleguaren bilaketa hobetzeko hiru lantegi antolatu dira, trebetasunak lantzeko, lana bilatzeko coaching-a baliatzeko, eta Linkedin eta antzeko tresnak eraginkortasunez baliatzeko.

 

Beste prestakuntza-programa batzuk

Enplegurako prestakuntzarako seihilekoko eskaintzarekin batera, Gasteizko Udala beste zazpi prestakuntza-proiektutan buru edo partaide da:

  • Hazia 23 proiektua:23 urtetik beherako gazteei zuzendua, eta beste lau prestakuntza-agenterekiko lankidetzan garatua.
  • Genera 30 proiektua: 30 urtetik beherako gazteak lan-merkatuan sartzeko xedea du; Europar Batasunak diruz laguntzen du zati handi batean.
  • SEA EmpleoAraba proiektua: lurraldeko enpresek eskatzen duten kualifikazioaren estandarrak betetzen ez dituzten pertsonei zuzendutako jarduerak.
  • 4.0 industriari buruzko informazio, sentsibilizazio eta prestakuntza programa: hainbat erakunde eta prestakuntza-ikastegirekin batera, eta  AGORA 4.0 proiektuaren barruan, informazio-jardunaldiak eta prestakuntza espezializatua eskaintzen dira.
  • Udalaren IV. Gazte Plana: gazteentzako prestakuntza-ekintzak eta laguntza.
  • Arabako Foru Aldundiarekin batera mendekotasuna duten pertsonentzako arretaren arloan garatzen den prestakuntza-proiektua: horretan aritzeko behar den profesionaltasun-ziurtagiria lortzeko bide ematen du.
  • Basaldea proiektua: nekazaritza ekologikoa bultzatzeko.

Informazio gehiago: Enplegurako prestakuntza, 2018

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  2 martxoa 2018 10:40

 

 

 

 

 

 

 

  • Besteak beste, ekonomia zirkularrean, guztien ongiaren ekonomian, kontsumo kontzientean eta kolaborazioaren ekonomian adituak elkartuko dira, klima-aldaketari buruzko proposamenak aztertzeko.
  • Klima-aldaketari maila lokalean aurre egiteko erronkari erantzuteko ekonomia berriak eta berrikuntza soziala izango dira gai nagusiak.

Enpleguaren eta Garapen Ekonomiko Iraunkorraren zinegotzi Nerea Melgosak eta NESI foroaren zuzendari Diego Isabel La Monedak NESI Klima foroa aurkeztu dute, zeina maiatzaren 9an egingo baita Europa biltzar-jauregian. Nazioarteko ospea duten adituek hartuko dute parte hitzorduan, ekonomia berria, berrikuntza soziala eta klima-aldaketari maila lokalean aurre egiteko irtenbideak hizpide dituztelarik.

“Agintaldi honen hasieratik pausoak eman ditugu udal politikak iraunkortasun hirukoitzaren bidetik joan daitezen. Ingurumenari lotua ez ezik, iraunkortasun ekonomikoa eta soziala, pertsonak tokiko ekintzaren erdigunean jarriz. Berrikuntza sozialean aitzindariak izaten ari gara, baita kopartaidetza eta kosorkuntza proiektuetan ere, eta maiatzean hirian egingo dugun foroaren bidez, Gasteizek bidea markatzen jarraitu nahi du eredu ekonomiko bidezkoagoa diseinatzen”, azaldu du Nerea Melgosak.

Global Hub for the Common Good fundazioa eta NESI (Nuevas Economías e Innovación Social) foroa “Ekonomia berriak eta berrikuntza soziala klima-aldaketari egokitzeko tresna gisa” gaitzat duen azterketa lantzen ari dira. Gasteizen maiatzaren 9an Gasteizko Udalaren laguntzarekin egingo den NESI Klima foroan aurkeztuko dira azterketa horren emaitza nagusiak, eta parte-hartzaileekin batera, galdera hauei erantzuten saiatuko dira: nola lagun dezakete ekonomia berriek klima-aldaketa aritzen eta horri moldatzen?; zein proposamen eta jardunbide egoki zehatz proposatzen dizkigute?; nola aplikatu sektore gakoetan: energia, industria, mugikortasuna, hirigintza, eraikuntza, turismoa edo finantzak?; zein dira udalek egin beharreko lehen urratsak proposamen horiek aplikatzeko?

 

Zer da NESI?

“Global Hub por el Bien Común” fundazioa irabazi-asmorik gabeko antolakundea da, NESI (Nueva Economía e Innovación Social) markaren bidez ezaguna. Think-do-be tank bat da, zeinaren helburua baita “ekonomia berria kosortzea, iraunkorragoa, bidezkoagoa, demokratikoagoa, eta pertsonengan zentratua”.

2017ko apirilean, Ekonomia Berriari eta Berrikuntza Sozialari buruzko Foro Globalean, “mugimendu ekonomiko berriak” deritzonen nazioarteko ordezkari nagusiak bildu zituen NESIk Málagan, lehenengo aldiz historian. Lau egun iraun zuen Foroak, eta 35 herrialdetako 600 parte-hartzaile baino gehiago bildu ziren bertan, gizartearen hiru sektoreak —pribatua, publikoa eta zibila— ordezkatuz. Lau gai nagusi aztertu ziren: dirua birpentsatzea (bankaren eta finantzen etorkizuna); guztion ongiarentzako antolakundeak birmoldatzea; globalizazioa eta lokalizazioa, eta hezkuntza eta ikaskuntza.

 

NESI Klima foroa

NESI Klima foroa topaketa eta partaidetza gunea izango da, ekonomia berriek klima aldaketaren erronkari aurre egiteko dituzten proposamenak ezagutu nahi dituztenentzat: udal teknikariak, tokiko eta eskualdeetako administrazio publikoen ordezkariak, enpresak, GKEak, unibertsitateak, ikerketa zentroak eta herritarrak.

 

Hauek dira foroaren helburu nagusiak:

  • Jardunbide egokiak ezagutzea: ekonomia berriek hiri inguruneetarako dituzten irtenbide berritzaileen aplikazioa, isurketak gutxitzeko eta hainbat sektoretan (energia, industria, garraioa, hirigintza, eraikuntza, turismoa eta finantzak) klima-aldaketari egokitzeko.
  • Politika publikoak (toki, eskualde eta nazio mailan) garatzeko ardura dutenak informatu eta ekonomia berrien inplementazioan inplikatzea, baita gizarte eta ekonomia agenteak eta herritarrak ere, karbono emisioak gutxitzearren.
  • Inplementaziorako bide-orri praktikoak landu eta eskaintzea toki-erakundeentzat zein eskualde/nazio mailako politika publikoentzat.

Foroan nazioartean ospea duten hizlariak mintzatuko dira; besteak beste, Nicola Cerantola (Ecologing-en fundatzailea eta ekonomia zirkularrean aditua) eta Albert Cañigueral (Ouishare-ren nazioarteko konektorea eta kolaborazioaren ekonomian aditua).

Izen-ematea doakoa da. Parte-hartzaileek bereiz eman beharko dute izena aurretiazko jardunaldirako (maiatzaren 8an, asteartea) eta NESI Klima fororako (maiatzaren 9an, asteazkena). Maiatzaren 9rako izen-emateak bazkaria barne hartzen du. Hori dela eta, foroaren aurretik berriro asistentzia berresteko eskatuko da.

Foroa Gasteizko Europa biltzar jauregian izango da, maiatzaren 8an eta 9an. Hilaren 8an, 17:30etik 20:30era, eta 9an, 08:30etik 18:30era.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  28 otsaila 2018 11:15

 

 

 

 

 

 

 

 

 

 

 

  • Hainbat sektoretako hogeita hamar dendek % 70erainoko deskontuak eskaintzen dituzte

Enpleguaren eta Garapen Ekonomiko Iraunkorraren zinegotzi Nerea Melgosak XXI. Outlet Gasteiz On-Beherapenen Feria irekitzeko ekitaldian izan da, Europa jauregian; feriak larunbatera arte, martxoak 3, iraungo du. Hogeita hamar dendak % 70erainoko deskontuak eskainiko dituzte beren produktuetan (ehungintza, moda, oinetakoak, osagarriak, jostailuak, kirol-ekipamendua, etxeko gauzak eta liburuak), neguko beherapenen kanpainari amaiera ematen dion ekimen horren bidez.

Melgosak gogoratu duenez, gaur hasten den azokaren eta antzekoen bidezko merkataritza dinamizazioa agintaldi honetan abian jarritako Merkataritza eta Ostalaritza Plan Estrategikoaren ardatz nagusietako bat da. “Kontsumoa sustatzeko ekitaldi eta ekintza ezberdinen bidezko dinamizazioa eragin positiboa izaten ari da sektorean. Esate baterako, txikizkako merkataritzak %2tik gorako salmenta-hazkundearekin itxi zuen iazko ekitaldia. Era berean, ostalaritza sektorean % 5,5 hazi da enplegua Plan Estrategikoa abian jarri zenetik. Datu horiek bide onetik goazela adierazten digute”, azpimarratu du Enpleguaren eta Garapen Ekonomiko Iraunkorraren zinegotziak.

Beherapenen Feria 10.00etatik 14.00etara eta 17.00etatik 20.30era irekiko da. Aurreko edizioetan bezala, umeentzako doako lantegiak antolatu dira, baita kafetegi zerbitzua ere.

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  15 otsaila 2018 14:07

Vitoria-Gasteiz Film Office bihartik aurrera izango da European Film Market (EFM) delakoan, zein ikus-entzunezkoen industriako Europako hitzordu handienetakoa baita, Euskadiko beste profesional ugarirekin batera. EFM Berlinaleren (Berlingo Zinema Jaialdiaren) 68. edizioaren barruan kokatzen da.

Aurtengoan, eta berrikuntza gisa, Euskadiko hiru Film Commissionetako ordezkariak izango dira EFMn, lehen aldiz, Film Basque Country markapean. Elkarrekin agertze honek plataformaren aurkezpen ofiziala da, bai eta aukera bat, Euskal Herrira filmaketak erakartzeko bide berriak bilatzeko.

Otsailaren 16tik 20ra bitartean izango da Vitoria-Gasteiz Film Office EFMn, eta egun horietan saiatuko da loturak estutzen ikus-entzunezkoen esparruko beste ekoiztetxe, zinema-institutu, Film Comission eta sektoreko beste eragile batzuekin, gure lurraldea filmaketa-leku gisa promozionatzeko asmoz, eta, hartara, hirian ikus-entzunezkoen ekoizpena bultzatzeko.

“Gasteiz Berlinen egoteak argi eta garbi erakusten du sormen-industriak sustatzearen alde egiten ari garen erronka, eta zehatzago, ikus-entzunezkoen sektorea. Euskal Herriko zinemari buruzko bulegoak ikus-entzunezkoen hitzordu garrantzitsu batean elkarrekin agertzeak erakusten du zenbaieraino den garrantzitsua erakundeen arteko lana koordinatzea, tokikoa defendatuz nazioarteko merkatuan lekua irabazteko”, esan du Enpleguaren eta Garapen Ekonomiko Iraunkorraren zinegotzi Nerea Melgosak.

Vitoria-Gasteiz Film Officez gain, aurtengoan arabar ekoiztetxe bat ere izango da Berlinen, David Pérez Sañudoren Amania Films S.L ekoizketxe gasteiztarra, zeina beste, 18 euskal ekoiztetxerekin batera, leku berezi bat izango duten beraientzako ICEXen standean, bilduta Basque Audiovisual markapean, eta Martin Gropius Bau (#24) delakoan. Hori posible egin du Zineuskadik Etxepare Institutuarekin eta Eiken Clusterrekin lortu duen lankidetzak.

 

 

Share

Aurrekoak »