Prentsa Oharren banner
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  26 azaroa 2018 13:23

Ikus-entzunezkoen ekoizpenerako Gasteizko Udalak sustatu duen bigarren laguntza-deialdia ebatzi delarik, orotara hamar ekimenek jasoko dute laguntza, film luzeak eta laburrak, sorkuntza-dokumentalak, gidoien idazketa eta zinema eta telebistarako proiektuak barne. Deialdiak 100.000 euroko aurrekontua zuen orotara, eta besteak beste, Juanma Bajo Ulloa egitekoa den film luze berriari, Paul Urkijoren hurrengo gidoiari eta Myriam Ballesteros zuzendaria prestatzen ari den animaziozko laburrari emango die sostengu.

Laguntza-deialdiak dituen lau kategorien artean, film luzeak eta sorkuntza-dokumentalak ekoizteko modalitateak hartzen du zatirik handiena, 40.000 euro. Kopuru hori bi proiekturen artean banatu da: “Ane”, Amania Films-ena, eta “Baby”, Frágil Zinema-rena. Ikus-entzunezkoen ekoizpenerako lehen laguntza-deialdian ere “Ane” izenburuko film labur batek lortu zuen sostengua, zeina berriki jaialdietan aurkezten hasi baita. “Baby”, aldiz, Juanma Bajo Ulloaren seigarren film luzea izango da, eta une honetan ekoizpen aurreko fasean dago.

Film laburren kategoriak 25.000 euroko zuzkidura du, eta hiru proiektuk jasoko dute laguntza. Batetik, “Cenicienta Swing” 2Dko animazio digitaleko lanak, Myriam Ballesteros Producciones-enak; ipuinetako pertsonaiak ditu oinarritzat,  eta 8.750 euroko laguntza lortu du. Kopuru bera jasoko du Everywhere Films-en “El Comité” lanak;  Imanol Ortizen “Oculto” laburrari, azkenik, 7.500 euroko diru-laguntza esleitu zaio. Egile horrek “Moda” lana filmatu du 2018an, ikus-entzunezkoen ekoizpenerako lehen laguntza-deialdian Udalak emandako laguntza ekonomikoarekin.

Zinema eta telebistarako proiektuak garatzeko kategoriak ere 25.000 euroko aurrekontua du, eta beste hiru proiektuk jasoko dute laguntza.  Hauek dira: “Irati”, Ikusgarri Films-ena (tokiko ekoiztetxe horrek “Errementari” filmean ere hartu zuen parte); “The Pact”, Everywhere Films-ena, eta “Northabout – Contra el cambio climático”, Área Audiovisual-ena. Azken proiektuaren xedea da Miguel Gutiérrez gasteiztarrak gidatutako Mars Gaming Northabout espedizioa irudietan islatzea.

Azkenik, ikus-entzunezkoen ekoizpenerako bigarren laguntza-deialdiaren barruan gidoiak idazteko laguntzen kategoriari dagokionez —10.000 euro— bi proiektu hauek jasoko  dute laguntza: “Las tres olas”, Paul Urkijorena, eta “Ruma”, Juan Félix Fernández Gallegorena.

“Ikus-entzunezkoen sektorea indarra hartzen ari da Gasteizen, eta deialdiaren bidez Udalaren laguntza lortu duten proiektuen aniztasuna da horren froga argiena. Zenbatekoaz haratago, nabarmendu nahi dugu laguntza hauek duten garrantzia beste erakunde batzuen sostengua lortzeko eta finantzaketa errondetan indar handiagoa izateko”, adierazi du Enpleguaren eta Garapen Ekonomiko Iraunkorraren zinegotzi Nerea Melgosak.

Gasteizko Udalaren ikus-entzunezkoen ekoizpenerako lehen laguntza-deialdian “Errementari” filmak (Paul Urkijo zuzendariaren azken lana, 190 herrialdetan saldua), “Vitoria, 3 de marzo” (Donostiako Zinemaldian aurkeztu zena eta zinemetan estreinatzear dagoena) eta “En busca de la ciudad perdida” dokumentalak jaso zuten laguntza, besteak beste.

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  26 urria 2018 12:46

Vitoria-Gasteiz Film Office-k “Shooting in the Basque Country” jardunaldian hartuko du parte gaur, Bilboko  Seriesland serie digitalen jaialdiaren barruan. Lehiaketa laugarren ediziora iritsi da, eta aurten 25 herrialdetako ekoizpenak ezagutu ahalko dira horren bidez. Nazioarteko zein estatuko ikus-entzunezkoen produkzio-etxeentzako berariazko gunea ere badu, zeinean Film Office aurkeztuko baita.

Bilbao-Bizkaia Film Commission eta Eiken-Euskadiko ikus-entzunezkoen klusterrarekin batera, Vitoria-Gasteiz Film Officek Gasteizek eta Arabak era guztietako ikus-entzunezkoen produkzioak hartzeko eskaintzen dituzten abantailak eta aukerak ezagutaraziko ditu, filmaketak Euskal Herri osora erakartzeko asmoz sektoreko hainbat agenteren artean egitekoa den jardunaldian.

Film Office-k Gasteizen ikus-entzunezkoen produkzioarekin lotutako profesionalen sarea zabaltzen jarraituko du jaialdian, EITBren egoitzan antolatutako bilera azkarren bitartez: Estatu osoko ikus-entzunezkoen  produkzio-etxeekiko buruz buruko elkarrizketak egingo ditu, lurraldea ezagutaraztearren.

“Duela gutxi Donostiako Zinemaldian izan ginen, eta filmatzeko agertokiak bilatzen diharduten profesionalak aurki daitezkeen ekitaldi espezializatu orotara joan nahi dugu, gure hiriak eta inguruak eskaintzen dituzten aukera zabalak ezagutarazteko. Izan ere, Gasteizen ikus-entzunezkoen industriak izan duen bultzadaren arrazoietako bat gure lurraldean filmatzeko pizgarriak aurkitu dituzten ekoizpenen etorrera da”, azaldu du Enpleguaren eta Garapen Ekonomiko Iraunkorraren zinegotzi Nerea Melgosak.

 

Informazio gehiago: http://www.seriesland.eus/

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  24 urria 2018 11:07
  • Enpresak Sendotzeko Programaren barruko ekimena da

Gasteizko Udalak lantegi berria antolatu du, enpresek salmenta politika hobetzen ikas dezaten zuzeneko kontaktuaren bidez. “Aurrez aurre negoziatu eta saltzea” izenburua duen lantegia Enpresak Sendotzeko Programaren barruan eskainiko da, lau saiotan; jarduera sendotu eta hedatzeko, merkatu berriak bilatzeko edo lehiakortasuna hobetzeko beharra duten enpresei zuzendutako programa da hori.

Azaroaren 13an hasiko da, enpresaren merkataritza-jardueraren oinarri eta premisei buruzko azalpen teorikoarekin. Hurrengo astean, aurreko saioan ikasitakoa praktikatu da, itxurazko elkarrizketa bat grabatuz. Hirugarren saioan, grabazioak banan-banan aztertuko dira, alderdi indartsuak eta ahulak antzematearren. Azkenik, elkarrizketa horiek taldean ikusiko dira, zer hobetu daitekeen gomendatzeko.

“Enpresa bat martxan jartzen denean, salmenta politika izan ohi da alderdi ahuletako bat. Batzuek uste dute zaila dela, eta ez dutela horretarako gaitasunik; hori dela kausa, bazter uzten da enpresa-proiektuak arrakasta lortzeko ezinbestekoa den alderdi bat. Lantegiaren helburua da ekintzaileek merkataritza negoziazioa prestatzea eta salmenta elkarrizketari eraginkortasunez aurre egitea”, azaldu du Enpleguaren eta Garapen Ekonomiko Iraunkorraren zinegotzi Nerea Melgosak.

Erdi Aroko Hiriguneko Udal Enpresa Zentroan egingo dira merkataritza errendimenduari buruzko lantegiaren lau saioak, 09:30etik 13:30era. Izen-ematea doakoa da, eta online egin daiteke.

 

 

 

Share

 

 

 

 

 

  • 360º-ko tour birtualek atxikitako establezimenduen ikusgarritasuna handitzen dute, eta lehiakorrago bihurtzen

Enpleguaren eta Garapen Ekonomiko Iraunkorraren zinegotzi Nerea Melgosak eta Aenkomerreko zuzendari-kudeatzaile Edurne Parrok bisita birtualak baliatuz merkataritza sektorea digitalizatzeko programaren balantzea egin dute; Gasteizko Udalak laguntza eman dio programa horri azken urteetan. Gaur egun, tokiko 126 saltoki daude digitalizatuta Gasteizen (169 Araba osoan), establezimenduaren barnealdearen 360º-ko ikuspegiak online eskaintzen dituen tour bat egitea ahalbidetzen duen teknika baten bidez. Bisitak ordenagailutik zein gailu mugikorretatik egin daitezke, Google bilatzailearen eta saltokien web-orrien bitartez. Gasteiz buruan da Euskadi osoan hobekuntza teknologiko horren ezarpenean.

Gasteizko denden % 55ek du bisita birtuala udalaren laguntza ekonomikoari esker. Aurten, zehazki, hamasei establezimendu digitalizatuko dira, Udalaren  eta AENKOMER-Arabako Merkataritza eta Zerbitzuetako Enpresaburuen elkartearen arteko lankidetza-hitzarmenaren bitartez. Tour birtual bakoitza saltokiari aholkularitza eman, edukiak sortu eta plataforman ezartzeko prozesu baten emaitza da; ondoren, emaitzaren jarraipena egiten da.

“Bisita birtualak lehen urratsa dira tokiko saltokien bezero potentzialak hara fisikoki joatera animatu daitezen. Sektorearen digitalizazioa ez da bakarrik online denda martxan jartzea. Badira beste tresna batzuk, bisita birtualen programa hau, esaterako, zeinen bidez kontsumitzaileen esperientzia aberasten laguntzen baitugu, eta establezimenduei promozionatzeko era berria eskaintzen”, azaldu du Nerea Melgosa zinegotziak. “Are gehiago: saltoki batzuk espazio fisikoa antolatzeko modu berriak aurkitzen ari dira bisitek ematen duten informazioari esker”, erantsi du.

 

Abantaila horietaz gain, 360º-ko birek interneten txikizkako denden ikusgarritasuna handitzen dute, bilatzaileetan duten kokapena hobetzen baita, eta espazio fisikoa eta espazio birtuala (web-orria, sare sozialetako profilak, etab.) lotzeko ere balio dute.

“Ekimenaren helburua da Arabako merkataritza eta zerbitzuen enpresen lehiakortasuna hobetzea, enpresaren estrategiarekin eta haren komunikazio-profilarekin bat egiten duen bisita birtualen programa bat ezarriz. Era berean, merkataritza sektorea digitalizatzeko abiapuntua da, saltoki askok oraindik ez baitu web-orririk ez online estrategiarik”, azaldu du Edurne Parrok.

Bisita birtualen bidezko digitalizazio programa tokiko saltoki guztiei zuzenduta dago, ez bakarrik Aenkomerren kide direnei, eta tokiko saltoki txikiak birmoldatzeko egiten ari den prozesuan laguntzeko ekintza da. Nerea Melgosa eta Edurne Parrok sektorea indartzeko, lehiakorrago bihurtzeko eta kontsumitzaileen eskaera berriei egokitzeko proposamen horietan parte hartzera animatu dituzte dendak.

Gasteizko Udalaz gain, Arabako Foru Aldundiak eta Eusko Jaurlaritzak ere eman diote laguntza tokiko saltokien bisita birtualen programari.

360º-ko bisita birtualen adibideak:

Delicatessen La Blanca

Boutique Kets

Saracibar Interiores

 

 

 

 

 

 

 

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  3 urria 2018 08:58

Urriaren 10ean amaituko da “Itun Berdea IV. sarietara hautagaitzak aurkezteko epea; ekimen horren bitartez, Udalak ingurumen alorreko jardunbide egokiak sustatu nahi ditu enpresen munduan. Guztira 6.000 euro banatuko dira saritan, 2.000 euro sail bakoitzeko: mikroenpresak (1-9 langile), enpresa txikiak (10-49 langile) eta enpresa ertain eta handiak (50 langile baino gehiago).

Aurten, Itun Berdea sariek berrikuntza garrantzitsu bat izango dute, tokiko enpresen jarduera berdeen berri zabaltzekoa, alegia. Hiru sari nagusiez gain, hemendik aurrera aurkeztutako jardunbide egoki guztiei, sarituak gertatu ala ez, zabalkundea emango zaie, Gasteizek iraunkortasunarekin eta ingurumenarekin hartua duen konpromisoari Itun Berdearen Enpresa-Komunitateak egiten dizkion ekarpenen erakusle diren aldetik.

“Itun Berdea sariak Gasteizko enpresek ingurumenaren alorrean garatzen dituzten jardunbide egokiak jendartean ahalik eta gehien ezagutaraztea nahi dugu. Ekintzaileek aplikatzen dituzten berrikuntzetatik batzuk ezagutarazteko modukoak dira. Sarritan errentagarritasun hirukoitza –ekonomikoa, soziala eta ingurumenekoa– duten neurriak dira, etorkizuneko ekonomia berdearen ateak irekitzen dituzten horietakoak”, esan du Enpleguaren eta Garapen Ekonomiko Iraunkorraren zinegotzi Nerea Melgosak.

Itun Berdea sarietako aurreko edizioetan hondakinak ahalik eta gehien murrizteko, euri-urak berreskuratzeko, ekoizpen prozesuan sortutako hondakinak aprobetxatzeko edo bizikletaren erabilera sustatzeko sistemak saritu izan dira, besteak beste. Hautagaitzak bi modutan aurkeztu daitezke: San Martineko eta herritarrei laguntzeko bulegoetan, eta sarean, horretarako baliatuta erregistro elektronikoa.

Informazio gehiago: Itun Berdea IV. sariak

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  27 iraila 2018 13:30

 

 

 

 

 

 

 

Alkateak gaur eta bihar egingo den biltzarra irekitzeko ekitaldian hartu du parte

 Gaur eta bihar, V. RSEncuentro izeneko biltzarra egingo da Gasteizko Europa jauregian, zeinean gizarte-erantzukizunaren alorrean diharduten pertsona eta entitateak biltzen baitira. Zehazki, garapen iraunkorreko helburuak eta lurraldean duten inpaktua izango dira gai nagusiak. Denboran NBEren Helburu Iraunkortasun Astearekin bat eginez, erakundeek, enpresek eta gizarte antolakundeek esperientziak partekatuko dituzte negozio arduratsuaren aldeko apustuarekin lotuta, eta aldaketa globala arintzen laguntzeko eta paradigma berriari egokitzeko garapen iraunkorreko helburuak kontuan hartzeari dagokionez.

Gorka Urtaran alkateak ongi etorria eman die Estatu osotik etorritako parte-hartzaileei, eta Udalak garapen iraunkorraren gizarte, ekonomia eta ingurumen alderdiekin duen konpromisoa eta horretan jarraitzeko asmoa agertu ditu.

Erakundeek alorrean duten bide-orria azaltzeari eskainitako atalean, Enpleguaren eta Garapen Ekonomiko Iraunkorraren zinegotzi Nerea Melgosak Udalaren estrategiaren berri eman du.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  30 abuztua 2018 13:40

Enplegurako prestakuntzako udal eskaintzari beste ikastaro bat gehituko zaio aurtengo udazkenean, autobus-gidari emakumeak, prestatzeko, guztira 15 leku eskainiko dituelarik. Ekimen horren bidez emakumeak garraio kolektiboko ibilgailuak gidatzeko nahitaezkoa den D mailako gidabaimena eskuratzeko prestatzea nahi da. Hartara, handitu egin nahi dugu emakumeen presentzia batez ere gizonezkoak aritzen diren lan-eremu batean.

Ikastaroak 182 ordu iraungo du, betiere goizez. Baldintzak 24 urte betetako emakumea izatea eta, aukeran 30 urtetik beherakoa, hartara enplegu gaztea ere sustatzeko asmoz. Horrez gain, indarreko B mailako gidabaimena eduki behar da, eta Derrigorrezko Bigarren Hezkuntza titulua edo horren parekidea. Ikastaroaren prezioa 40,28 eurokoa izango da, prestakuntza mota horretan ohikoa dena baino dezente murritzagoa.

“Autobus-gidari lanpostua eskuratzerakoan benetako berdintasuna egon dadin, nahitaezkoak dira udazkenean abiaraziko dugunaren antzeko ikastaroak. Kontuan izan behar da TUVISAren kasuan emakume gidarien portzentaia oso urria dela, plantilla osoaren % 12 baino ez. Portzentaia hori handitzeko konpromisoa dugu gure gain, eta horretarako beharrezkoa da prestakuntza eskaintzea”, jakinarazi du Enpleguaren eta Garapen Ekonomiko Iraunkorraren zinegotzi Nerea Melgosak.

Gaur egun ia 400 pertsonek osatzen dute TUVISAren plantilla (urte-sasoiaren arabera aldakorra da kopurua), horietatik 41 emakume dira gidari, hots, kolektiboaren % 12 (duela bi urte kuota % 10ekoa zen). TUVISAren beste profil profesional batzuetan emakumeen presentzia handiagoa da: % 20 ingurukoa garajeko gidarien kasuan, % 40koa aparkalekuko zaindarien kasuan, eta % 80koa administrazioan.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  18 uztaila 2018 12:36

  • Txikientzako Upelen Lasterketa ere egingo da aurten, lehen aldiz

Enpleguaren eta Garapen Ekonomiko Iraunkorraren zinegotzi Nerea Melgosak Blusa eta Nesken Egunean (uztailak 25) egitekoa den Kupelen Lasterketaren III. edizioa aurkeztu du, ekimenean parte hartzen duten entitateen arduradunekin batera: Eduardo Aguinaco, Nekazaritzako foru diputatua; Josune Albizu, Vital fundazioaren zuzendaria; Luis Izaga, Kupelen Lasterketaren arduraduna; Blusen eta Nesken Batzordea, eta Francisco Javier Elejalde, Wine City elkarteko idazkaria. Martín Fiz atleta ere izan da bertan, lasterketari irteera emateaz arduratuko baita aurten. Blusen eta Nesken 15 kuadrilletako 26 taldek (4 lagun talde bakoitzean) hartuko dute parte lasterketan, Plaza Berrian hasi eta bertan amaitzeko.

Wine City elkarteak eta Blusen eta Nesken Elkarteak antolatutako Upelen lasterketaren III. edizioak Gasteizko Udalaren, Vital Fundazioaren, Arabako Foru Aldundiaren eta Eusko Jaurlaritzaren babesa du.

Aurten lehenengoz egingo den Txikientzako Upelen Lasterketarekin hasiko da jardunaldia, eta ondoren etorriko da helduen lasterketako taldeen desfilea. Segidan, Martin Fiz olimpiar atleta arduratuko da hiru txanda izango dituen helduen lasterketako irteerako banderakada emateaz.

Ekimen nahiko berria bada ere, Upelen Lasterketa dagoeneko erreferentzia bihurtu da Andre Maria Zuriaren ohorezko jaien atarikoan. Jai-giroko ekitaldi horren bidez, Arabako Errioxako ardoak eta Aiarako txakolinak merezitako omenaldia jasotzen dute.  “Duela hiru urte Arabako kalitateko ardoa eta Gasteizko jaiak uztartzea erabaki genuenean, konbentzimendu osoa geneukan ekimenak harrera ona izango zuela; alabaina, iaz bildutako jendetzak ustekabean harrapatu gintuen. Aurten, baina, iazko edizioko 25.000 ikusleren kopurua gainditzea aurreikusten dugu”, azaldu digu Francisco Javier Elejaldek, Blusen eta Nesken Elkartearekin batera Upelen Lasterketa antolatzen duen Wine City elkarteko idazkariak.

“Bertan ditugun jaietan eta antzeko uneetan erakusten du bereziki Gasteizek lehen mailako helmuga enogastronomikoa dela. Kupelen Lasterketaren bidez hiriak ardoaren kulturarekin bat egiten duela erakutsi nahi dugu, turismo eta merkataritza jarduera dinamizatzen duen ekitaldia baita”, adierazi du Nerea Melgosak.

Iazko ibilbideak izandako arrakasta ikusirik, aurten ere ibilbide bera egingo da, antolatzaileek gaurko prentsaurrekoan adierazi dutenez. 26 taldeak Plaza Berritik abiatuko dira, Andre Mari Zuriaren plaza zeharkatu, Mateo Morazatik gora igo, Lehendakari Agirretik (Espainiako Bankua zenetik) igaro eta berriro ere Plaza Berrira itzuliko dira. Bi blusak/neskak bultzatuko dute upel bakoitza eta ibilbidea burutzen dutenean, taldeko beste bi kideri utziko diete lekua (hiru txanda osatu arte).

Gainera, komisarioak (Gaztedi Rugby Taldeko boluntarioak) egongo dira ibilbidean zehar banatuta, upela ibilbide osoan lurrean biraka doala eta pertsona bat gutxienez upelarekin kontaktuan dagoela egiaztatzeko.

Aurten, helmugara iristen den lehen talde mistoak eskuratuko du sari berezia: Mitarte upategiko 225 litroko upela. Izan ere, Arabako Errioxako ardoak, Arabako txakolina, esperientziak Arabako Errioxan eta beste sari asko ere banatuko dira Santiago Egunean; Sariak Plaza Berrian banatuko dira: Sari Nagusia ez ezik, beste hiru sari ere bai, horien artean helmugara iristen den lehen talde mistoarentzako sari berezia.

Umeentzako lasterketa

Txikientzako Upelen Lasterketa Plaza Berrian egingo da eta 2 kidez osatutako taldeek 100 metroko ibilbidea egingo dute, txandarik gabe.  12 talde egongo dira guztira, eta horietako bakoitzean 10 eta 15 urte bitarteko bi neska-mutil. Ascensores Bertako enpresaren eskutik jasoko du saria talde irabazleak.

Helduen lasterketan nahiz umeentzako lasterketan, Arabako Atletismo Federazioa arduratuko da ibilbidearen amaierako denborak hartzeaz.

Hurrengo edizioan, parte hartuko duten taldeen kopurua handitzea pentsatzen ari da antolakuntza, lasterketak sortu duen interesa ikusirik.

Upelen lasterketaren III. edizioan, laguntzaileak dira Mitarte upategia, Ascensores Bertako, Arabako Atletismo Federazioa, El Corte Inglés, Eroski, Arabar Errioxako Ardoaren Ibilbidea, Arabako Errioxako Upategien Elkartea (ABRA), Arabako Txakolina eta Gurutze Gorria.

 

 

 

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  16 uztaila 2018 12:59

Gorbeia kaleko dendetan Rebajazz feria hasiko da bihar. Merkatari eta ostalarien elkarteak Gasteizko Udalaren laguntzarekin antolatu ohi duen jardueran oso prezio lehiakorreko eskaintzak aurkitu eta askotariko musika girotzeaz gozatu ahalko da. Uztailaren 17tik (asteartea) 20ra (ostirala), 10:00etatik 13:30era eta 16:30etik 20:00etara, hamabi dendak saltokiak jarriko dituzte establezimenduen aurreko espaloian, uztaileko stock-eko produktuak % 70eraino ere beheratuta.

Hartara, ehungintza sektorearen denboraldi bukaera baliatuko dute saldu gabekoak kanporatzeko, oso modu onean. Gainera, Gasteizko Nazioarteko Jazzaldia dela eta, arratsaldeetan musika girotzea izango da: Kumbalayé batukada, Detractors taldea, gaita-jotzaileak eta, bukatzeko, Priscilla Band soul-funk taldea; azken horrek uztailaren 20an (ostirala) joko du, Gorbeia kalearen eta Antso Jakitunaren kalearen artean. “Beherapen feriaren eta musikaren nahasketa ona izango da, zeinari Rebajazz deitu baitiogu”, azaldu du Gorbeia kaleko Merkatarien Elkarteko presidente Víctor Manuel Ibáñezek.

“Salgai berrirako lekua egiteaz gain, gure bezero potentzialei hurbiltzeko modu ezberdina bilatzen dugu, beherapen eta promozioen bidez. Kalea aire zabaleko merkataritza-gune bihurtuko da, eta hirian mugimendua sortuko”, erantsi du Ibáñezek.

Enpleguaren eta Garapen Ekonomiko Iraunkorraren zinegotzi Nerea Melgosa ere izan da Rebajazz feriaren aurkezpenean, zeinak merkataritza dinamizatzeko jardueretan arlo publikoaren eta pribatuaren arteko lankidetzaren garrantzia azpimarratu baitu. “Gasteizko merkataritza-alderdi nagusietan ekitaldiak sortzeko elkarlana da modurik onena jendea establezimenduetara joan dadin sustatzeko eta tokiko dendetan kontsumitzea bultzatzeko. Azken hilabeteetan salmentak etengabe hazten ari dira txikizkako merkataritzan, eta horrek ondo erakusten du bide onetik goazela”, adierazi du Nerea Melgosak.

Enpleguaren eta Garapen Ekonomiko Iraunkorraren Saileko zinegotzi Nerea Melgosak azpimarratu ditu aurtengo merkataritza eta ostalaritzaren datu positiboak. Urte honetan, Gasteizek 18 denda eta 31 ostalaritza-establezimendu irabazi ditu. Datu horiek merkataritza-jarduera –zeinean establezimendu ireki eta itxien artean negatiboa izan den– gorantz ari dela erakusten dute. Ostalaritzari dagokionez, 2018an bikoiztu egin da saldo positiboa, 15 enpresa berrirekin. Era berean, txikizkako merkataritzako salmenta-indizea, ehuneko 2,3koa izan da urtearen lehen hiruhilekoan.

Gorbeia kaleko Merkatari eta Ostalarien Elkarteak hainbat jarduera antolatzen ditu Gasteizko erdigunearen dinamismoa , auzoko saltoki txikiak eta gizarte-kohesioa berreskuratzeko, eta Rebajazz feria da horietako bat. Gorbeia kaleko Merkatarien Elkartea eta Udalak sinatutako lankidetza-hitzarmenari esker bederatzi jarduera antolatzen dira, besteak beste, hiru merkataritza azoka, Eguberrietako kanpaina eta ostalaritza sustatzeko bi ekimen berezi. Udalaren diru-laguntza 15.000 eurokoa da.

 

 

 

Informazio gehiago: Programatutako musika emanaldiak Rebajazz ferian:

Uztailak 17, asteartea                     Kumabalayé 18:00

Uztailak 18, asteazkena                  Detractors 18:00

Uztailak 19, osteguna                      Gaita-jotzaileak 18:00

Uztailak 20, ostirala                         Priscilla Band 19:00

 

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  4 uztaila 2018 13:09

 

Gasteizek ordezkaritza izango du garapen iraunkorrarekin konpromiso handiena duten enpresei ematen zaizkien Ingurumenaren Europar Sarietan. Izan ere, A&B Laboratorios de Biotecnología enpresa gasteiztarra aukeratu dute azken faserako, zeina Itun Berdearen komunitatean sartuta baitago; ekonomia iraunkorrarekin lotutako ekimenak garatzen dituzten enpresak eta antolakundeak biltzen ditu Udalak sustatutako talde horrek.

Orotara, 9 herrialdetako 28 enpresa iritsi dira Ingurumenaren Europar Sarien azken fasera. Gasteizko ordezkaria kudeaketaren kategorian lehiatuko da, Erresuma Batuko, Frantziako eta Greziako enpresekin. Finalera heltzeko, A&B Laboratorios enpresak kudeaketaren aitorpena lortu zuen Euskadi zein estatu mailan.

“Gasteizko enpresa bat Ingurumenaren Europar Sarien azken fasean egoteak argi erakusten du iraunkortasunarekiko konpromisoa eta errentagarritasuna guztiz bateragarriak direla. Horixe aldezten dugu Itun Berdean, komunitate horren bidez ezagutza partekatzen baitugu, jardunbide egokiak hedatzen, eta apustu egiten gero eta enpresa lokal gehiago etorkizuneko ekonomian erreferente izan daitezen”, adierazi du Enpleguaren eta Garapen Ekonomiko Iraunkorraren zinegotzi Nerea Melgosak. 

A&B Laboratorios de Biotecnología enpresa txikia da, erabilera industrial eta profesionaleko produktu kimiko eta biologikoak ikertu, diseinatu, ekoitzi eta merkaturatzen dituena. Bere sektorean erreferente bihurtu da, eta nazioartean merkatu berriak irekitzea lortu du produktu ekologiko arduratsuak eskainiz, ekoizpen prozesuan lehengai arriskutsuak bazter utzita.

European Business Awards for the Environment sarien batzordeak enpresak zabalkunde eta nazioartekotze prozesuan erakutsitako lehiakortasuna nabarmendu du; prozesu horretan Basque Country 2030 agendarekin lerrokatzen jakin du, eta Europar Batasunaren garapen iraunkorreko helburuak integratzen estrategian eta eguneroko kudeaketan.

2018ko azaroaren 14an banatuko dira Ingurumenaren Europar Sariak, Vienan, goi mailako zeremonia batean.

SARIEI BURUZKO INFORMAZIO GEHIAGO: http://ec.europa.eu/environment/awards/index.html

ITUN BERDEARI BURUZKO  INFORMAZIO GEHIAGO: Itun Berdearen Komunitatea

 

Share

Aurrekoak »