Prentsa Oharren banner
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  18 ekaina 2018 11:18

 

Ekainaren 21ean, osteguna, “Glutenik gabeko zaporeak” programa aurkeztuko da Erdi Aroko hiriguneko enpresa-zentroan. Ostalaritza eta hotel sektoreei zeliakoentzat egokitutako menuak diseinatzeko aholkularitza aholkuak ematean datza. EZEBA-Euskadiko Zeliakoen Elkarteak burutuko duen ekimen honen bidez, glutenik gabeko menu eta plateren eskaintza seguru eta bermatua lortzeko prestakuntza eta aholku integrala eman nahi zaie establezimendu parte-hartzaileei.

“Glutenik gabeko zaporeak” programak hainbat arlotako prestakuntza eta aholkularitza integrala eskaintzen du: karta egokitzea, kutsadura gurutzatuak saihestea, zeliakoentzako dieta mota eta merkatuan aurki daitezkeen glutenik gabeko produktuak.

“Programa honetan parte hartzean, ostalaritza-sektorea hobetzen jarraitzen dugu, pertsona guztien beharretara egokitutako kalitateko zerbitzua eskaintzerik izan dezan. Glutenari intolerantzia dioten askok bermea eskaintzen dien eta beren beharretara egokitutako menu eskaintzaren falta nabaritzen dute. Merkataritza eta ostalaritza gero eta sentsibilizatuta daude eskaera horrekin, eta hartara erantzuna emateaz gain, turismo iraunkorraren aldeko urrats berria ematen dugu” adierazi du Enpleguaren eta Garapen Ekonomiko Iraunkorraren zinegotzi Nerea Melgosak.

Gasteiz hiri atsegina, abegikorra eta guztien beharrekiko konpromisoa duen hiria izatea nahi dugu, horretan lan egingo dugu, gure konpromisoa da. Abaian jartzen dugun programa honen bidez zeliakia duenei segurtasuna eta arreta  emateko gai den erreferente gastronomiko gisa ikus gaitzatela nahi dugu ” gaineratu du Arabako Zeliakoen elkarteko arduradun Esther Obanosek.

Iaz elikadura begano eta begetarianoaren arloa egindakoari gehitzen zaio ostalaritza eta merkataritza zerbitzuei eskainitako aholkularitza eta prestakuntza programa hau. Iaz 23 establezimenduk hartu zuen parte ekimenean; 18 ostalaritza-establezimenduak eta 6 elikagai- establezimenduk. Menuan eskaintza begano/begetarianoa sartzeko aukera landu zen zortzi establezimendutan, eta beste bitan, pintxo beganoak. Horretaz gain, errezeta eta nutrizio-marketinaren inguruko klaseak eta langileak gaitzeko programak izanziren.

 

Informazio gehiago: ”Glutenik gabeko zaporeak” proiektua aurkezteko jardunaldia

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  13 ekaina 2018 11:21

 

 

 

 

 

 

 

  • Esparru berrian jarriko da ekitaldi horretako gastronomia eta kultur eskaintza, eta Integrazioaren plaza deiturikoa

Askotariko musika ikuskizunak, nazioarteko gastronomia eta Errusiako Munduko Txapelketako partiden emanaldiak (pantaila erraldoian) nabarmentzen dira Herrialdeen Jaialdiaren hamabigarren edizioan, zeina Konstituzio plaza berrituan egingo baita, ekainaren 14tik uztailaren 8ra arte.

Enpleguaren eta Garapen Ekonomiko Iraunkorraren zinegotzi Nerea Melgosak eta Kultura, Hezkuntza eta Kirol zinegotzi Estíbaliz Cantok aurkeztu dute ekitaldia, Sergio Frenkel zuzendariarekin eta Serafín Zubiri kantariarekin batera; azken horrek hilaren 22an (ostirala) abestuko du eta “X una causa justa” diskoa ezagutaraziko. Musikari nafarra da izen nabarmenetako bat musika eskaintzan; besteak beste, La Edad de Oro del Pop Español (ekainak 29) eta Raúl Fuentes gasteiztarra (uztailak 6) arituko dira Gasteizen.

Mulixka, Indarra eta Eguzki Lore taldeek ere ordezkatuko dute bertako talentua. Horretaz gain, bestelako dantzen erakustaldiak antolatu dira: arabiarra eta Bollywoodekoa, Giselarekin, Andaluziako koloreak, Al compás del alma taldearekin, eta swinga, Dame Swing & Lindy Hopen eskutik.

Herrialdeen Jaialdiaren aurtengo berrikuntzetako bat espazioen berrantolaketa da, Konstituzio plaza berritura egokitzeko. Herritarren partaidetzaren bidez hautatu zen plaza eraberritzeko proiektua, eta 350.000 euro inbertitu dira horretan. Plazak itxura moderno, funtzional eta irisgarriagoa du orain, eta horrek agertokia eta ostalaritza eskaintza beste modu batez antolatzea ahalbidetu du. Esparru koloretsua diseinatu da, eta erdiko guneari Integrazioaren plaza izena eman zaio. Handik aterako dira Elkartasunaren, Itxaropenaren eta Elkartzearen kaleak eta Emozioen plaza, agertoki nagusiaren ondoan.

“Ziur gaude plazaren banaketa berriak Herrialdeen Jaialdia sustatuko duela, ingurua dinamizatzeko, kultur trukerako eta bizikidetza ospatzeko balioko baitu”, adierazi du Nerea Melgosak.

Igandeetan, 12.30ean eta 17.30ean, umeentzako jarduerak izango dira, Prakidsek antolaturik. Bestetik, ekainaren 16an eta 30ean (larunbatak) familientzako topaketa gastronomikoak programatu dira, Gora Project tabernako Pablo Pauostalariaren eta Gorka Barredo gastronomo eta youtuber gasteiztar ezagunaren laguntzarekin.

Musikaren Egunak, ekainaren 21ean, osagai solidarioa izango du, Mugarik gabeko Musikariak GKEaren eskutik. Elkarteak Siriako musika-eskolen aldeko kanpaina egiten jarraituko du, kontzertua emanez; Ausartak, Lautada eta Erkametza abesbatzek hartuko dute parte horretan.

Munduko Futbol Txapelketarekin bat egiten duenez denboran, Herrialdeen Jaialdiak bereizmen handiko azken teknologia duen led pantaila instalatu du, partida interesgarrienak emateko. Azkenik, Konstituzio plazan egindako eraberritzea espazio “berdea” jartzeko baliatuko da, Gitma eta Gometxa euskal enpresen laguntzarekin. Iraunkortasuna kontuan hartuko da ekitaldian, kontsumo txikiko argiztapena jarriko baita, eta birziklatzeko hainbat ekintza sustatuko.

Share

 

  • Gorka Urtaranek Gasteiz mugikortasun iraunkorraren europar erreferentea dela adierazi die Michelinen CEOari eta Montrealeko alkateari

 

Montrealen emandako lehen egunean, Michelinek sustatutako Movin’On mugikortasun iraunkorraren munduko gailurrean izan dira alkate Gorka Urtaran eta Enpleguaren eta Garapen Ekonomiko Iraunkorraren zinegotzi Nerea Melgosa. Gasteizko ordezkaritza topaketa irekitzeko ekitaldian izan da, zeinean Michelineko CEO Jean Dominique Senard eta Montrealeko alkate Valérie Plante-k hartu baitute parte. Urtaran etorkizuneko mugikortasunaren garrantzi estrategikoaz mintzatu da haiekin, gailurraren bi jardunaldietako gai nagusia baita, eta alor horretan Gasteiz europar erreferentea dela adierazi die.

“Hiriok egin behar dugun ahaleginaz mintzatu gara, klima aldaketaren kontrako borrokan zein espazio iraunkorragoak osatzen. Mugikortasunak funtsezko egitekoa du helburu hori lortzeko, hala mugikortasun aktiboak, oinez edo bizikletaz mugitzea sustatuz, nola garraio publiko moderno eta elektrifikatuak. Esan dezakegu Gasteiz etxeko lanak egiten ari dela, munduko hiri nagusiak benetan iraunkorrak izateko urratzen ari diren bidetik”, adierazi du Gorka Urtaranek.

Ehun entitatetik gora (enpresak, udalak, gobernuak eta antolakundeak) bildu dira gailurrean; “Nahietatik ekintzara” lemaren pean, etorkizuneko mugikortasunerantz aurrerapauso zehatzak ematea da asmoa.  Horretarako, berrogeita hamar lan-saio antolatu dira, zeinetan 4.000 pertsonak baino gehiagok hartuko baitute parte. Besteak beste, erakustaldietarako eremu bat jarri da, eta mugikortasun iraunkorrari ekarpen berritzaileak egiten dieten 21 ibilgailu aurkeztuko dira bertan.

Arratsaldean, Gorka Urtaran Movin’On gailurrera joan diren hedabideekin bilduko da, Gasteiz promozionatu eta, besteak beste, Michelin Hirien Nazioarteko Sarearen II. Konferentzia aurkezteko, datorren urteko martxoan Euskadiko hiriburuan egingo baita.

Hain zuzen ere, Montrealeko biharko egitarauko ekitaldi nagusia Michelin Hirien Nazioarteko Sarearen biltzarra da. Gasteizen egitekoa den Michelin hirien bigarren konferentziarekin lotutako zenbait alderdi zehaztuko dira bileran, baita sarearen antolakuntzarekin lotutakoak ere.

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  22 maiatza 2018 10:04

Dagoeneko ireki da eskabideak aurkezteko epe ofiziala kontratazioan egonkortasuna sustatzeko laguntzak emateko deialdiaren barruan. Interesa duten enpresek irailaren 28ra arteko epea dute aldi baterako kontratuak kontratu mugagabe bihurtzeko diru-laguntzen ildoetako batez baliatzeko; orotara 400.000 euroko aurrekontua dago horretarako.

Berrogeita bost urtetik gorakoen aldi baterako kontratuak mugagabe bihurtzen dituzten enpresak baliatu ahalko dira laguntzez, kontratuak lanaldi osorako edo gutxienez lanaldiaren ehuneko berrogeita hamarrerako badira. Enpresa edo autonomo bakoitzeko gehienez bi kontratu aldatzeko laguntzak emango dira urtean, gizarteratze enpresen kasuan izan ezik, hiru kontratutarako eman ahal izango baita halakoetan.

Laguntzen eskabideak balioesteko adina eta generoa kontuan hartzen dituen baremoa erabiliko da. 55etik gorako pertsonei egindako kontratuengatik 30 puntu emango da. 50 eta 54 urte bitartekoei egindakoengatik, 20 puntu. 45 eta 49 urte bitarteko pertsonak kontratatzen badira, 15 puntu. Eta kontratuak emakumeei egindakoak badira, beste 20 puntu emango dira.

“Kontratazioan egonkortasuna sustatzeko laguntzak abian jarri genituenetik aldi baterako ehun kontratu baino gehiago bihurtu dira kontratu mugagabe. Laguntza horiek aldi baterako kontratua amaitzean lanik gabe geratzeko arrisku handiena dutenentzat dira, gainera, 45 urtetik gorakoentzat. Hartara, enplegu egonkor eta kalitatekoaren alde egiten dugu“, esan du Enpleguaren eta Garapen Ekonomiko Iraunkorraren zinegotzi Nerea Melgosak.

Informazio gehiago: Kontratazioan egonkortasuna sustatzeko laguntzak.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  11 maiatza 2018 12:31
  • Miguel Machalski analista ospetsuak gidoiak idazteari buruzko lantegia emango du Euskadiko hiriburuan

Gasteiz bertako ikus-entzunezko industria eta Arabako lurraldeak filmaketen agertoki gisa dituen aukerak promozionatzen ari da Canneseko Nazioarteko Zinema Jaialdiaren barruko Marché du Film azokan. Film Office Film Basque Country markaren babespean joan da hitzordu horretara, eta jaialdira joaten diren euskal profesionalak bezala, Basque Audiovisual ekimenak bertan jarri duen standaz baliatuko da.

Izan ere, Canneseko Nazioarteko Zinema Jaialdiaren barruko Marché du Film ikus-entzunezkoen azoka urteko hitzordu garrantzitsuena da zinemaren industriarentzat. Maiatzaren 8tik 17ra bitartean, munduko osoko profesionalak bilduko dira, haien artean sareak eta topaketak sustatzeko xedez.

Film Office maiatzaren 14ra arte egongo da ekitaldian, Gasteiz eta Araba era guztietako ekoizpenak egiteko agertoki gisa kokatu eta ezagutarazteko; lurraldean filmatzeak dituen abantailen berri emango dute, bertako industriaren azken lanak promozionatuko, eta estatuko zein nazioarteko ekoiztetxeekin sareak eta topaketa profesionalak lotzen lagunduko.

“Ikus-entzunezkoen alorreko merkatu garrantzitsuenean gaude, Euskadiko gainerako “film comission” edo komisioekin batera egon ere, ahaleginak batuz eta sinergia handiak sortuz. Azkenaldian, euskal ekoizpen batzuk arrakasta komertzial handia izaten ari dira, eta arrakasta horren zati bat elkarrekin lan egiteko dugun ahalmenari zor zaio, gure sorkuntza-industrietan dagoen talentu handiari lagundu eta kanpoan erakusteko”, adierazi du Enpleguaren eta Garapen Ekonomiko Iraunkorraren zinegotzi Nerea Melgosak.

Gidoiak idazteko lantegi profesionala, Gasteizen

Bestetik, Europa Creativa Desk MEDIA Euskadi bulegoak film luze eta dokumentalen proiektuen gidoiak idazteari buruzko lantegi bat antolatu du Gasteizen; Miguel Machalski gidoi-analista ospetsuak emango du, uztailaren 2tik 4ra bitartean. Euskadin egoitza duten gidoigileei eta gidoigile/zuzendari/ekoizle taldeei zuzendutako lantegia da, baldin eta film luze baten proiektua garatzen ari baitira.

Machalskik estudio handien eta zuzendari gailenen gidoiak gainbegiratu ditu: Clint Eastwood (MillionDollarBaby), Alejandro Amenabar (Mar adentro), Nagisa Oshima (Taboo), David Cronenberg (Spider), Sydney Pollack (La intérprete) eta Ingmar Bergman (Saraband). Bera arduratuko da parte hartzen duten proiektuak hautatzeaz. Maiatzaren 30ean amaituko da lantegian garatu daitezkeen proiektuak aurkezteko epea.

Hautatutako proiektuak aztertzeko aholkularitza pertsonalizatuez gain, gidoien idazkuntzari buruzko maisu eskola izango da uztailaren 2an, zinema industriako profesionalentzat.

Lantegiari buruzko informazio gehiago: info@europacreativaeuskadi.eu

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  9 maiatza 2018 13:41

 

Ehun pertsonatik gora ari dira parte hartzen NESI Klima foroan, Europa biltzar jauregian, ekonomia berriaren eta berrikuntza sozialaren ikuspegitik klima-aldaketari maila lokalean aurre egiteko irtenbideak hizpide dituztelarik.

Nazioartean ospea duten hizlariek hartzen dute parte: besteak beste, Nicola Cerantola Ecologing-en fundatzailea eta ekonomia zirkularrean aditua, eta Albert Cañigueral, Ouishare-ren nazioarteko konektorea eta kolaborazioaren ekonomian aditua. Global Hub for the Common Good fundazioak eta NESI foroak landutako “Ekonomia berriak eta berrikuntza soziala klima-aldaketari egokitzeko tresna gisa” gaitzat duen azterlanaren emaitzak ere aurkeztuko dira.

Enpleguaren eta Garapen Ekonomiko Iraunkorraren zinegotzi Nerea Melgosak inauguratu du foroa, eta azaldu du zergatik den Gasteiz leku ezin hobea horrelako biltzar bat hartzeko. “Europako Hiriburu Berdea gara, eta duela zenbait hamarkadatik erreferentea gara ingurumena herritarren bizi-kalitatearen funtsezko osagaitzat duten hirien artean. Mugitzeko moduan iraultza egin dugu, garraio publikoaren eta bizikletaren alde eginez. Kohesio politikak ere lantzen ari gara, iraunkortasun sozialaren oinarria baitira, pertsonak tokiko ekintzaren ardatz bihurtuta. Aitzindariak gara gizarte berrikuntzaren alorrean, baita kopartaidetzako eta kosorkuntzako proiektuetan ere. Horrek guztiak ongi bai ongi justifikatzen du zergatik garen lekurik onena jardunaldi hau egiteko”, adierazi du Melgosak.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  24 apirila 2018 12:15

 

  • Maiatzaren 6an amaituko da enpresei hasierako unean laguntzeko ekimen honetara ideiak aurkezteko epea

Gasteiz Fool’s Dinner ekimenaren seigarren edizioa azken xehetasunak prestatzen ari da, Enpleguaren eta Garapen Ekonomiko Iraunkorraren Sailaren laguntzarekin, zeinak Erdi Aroko Hiriguneko Enpresa Zentroa utzi dien antolatzaileei , bertan egiteko proiektuen aurkezpena. Ekimenaren xedea negozio-ideiei lehen unean laguntzea da.

Fool’s Dinner ekimena hasi zen networking-afari gisa, non pertsona ekintzaileak eta jende ipurterrea bilduko ziren, eta guztien artean erabakitako enpresari hasierakoan lagundu. 30 euro balioko dute afariko txartelek, eta kopuru horren erdia enpresa-proiektu irabazleak jasoko duen sarirako izango da. Edozein negozio-ideia onartzen da, non eta diru-laguntza txiki bat erabakigarria den, eta emaitzak denbora-epe laburrean ikusi ahal daitezkeen.

Martxoaren 1ean hasi zen  ideiak aurkezteko epea, zein maiatzaren 6an (igandea) amaituko den. Parte hartzeko, nahikoa da informazio-txosten labur bat bidaltzea (hiru orri asko jota), ideia ahalik eta mudurik argi eta zehatzen azalduaz, helbide honetara: foolsdinner@gmail.com . Aurkezten direnen artean, 3 eta 5 proiektu artean hautatuko ditu epaimahaiak finalerako. Maiatzaren 10ean jakinaraziko dira proiektu hautatuak, eta astebete izango dute horiek beren hautagaitza ezagutarazteko.

Azkenik, maiatzaren 17an, arratsaldeko 19:00etan aurkeztuko dira proiektu finalistak Erdi Aroko Hiriguneko Enpresa Zentroan, aurkeztu diren guzti-guztiak aipatuko direlarik. 21:00ean izango da dastaketa-afaria eta bozketa, Gora Projecten. 23:00etan jakingo da zein proiektuk irabazi duen.

Antolatzaileek Fool’s Dinnerren laguntza jaso duten hiru sostengu zehatz aipatu dituzte, adibide gisa: 3D inprimagailu bidez prototipo bat egitea, enpresa-proiektua aurkezteko ekimen batera joan ahal izatea, eta jarduera burutzeko baimen eta lizentziak ordaintzea.

“Fool’s Dinnerren antzeko ekimenen baliorik handiena da ekintzaile-komunitatea sortzek duen ahalmena, hots, lagun-talde baten lagun txiki bat nahikoa izan daitekeela enpresa-proiektu jakin bati sostengu erabakigarria emateko. Honen antzeko esperientziek kohesionatu egiten dute gure ekintzailetza-ekosistema eta indartu jarduera gehiago eta berriak sortzeko duen ahalmena”, esan du Enpleguaren eta Garapen Ekonomiko Iraunkorraren zinegotzi Nerea Melgosak.

Informazio gehiago: Fool’s Dinner Vitoria-Gasteiz

Share
Kategoriak: Fotonotizia  —  Etiketak: ,   —  Komunikazio Zerbitzua / Servicio de Comunicación  —  17 apirila 2018 11:08

 

 

 

 

 

 

Gaur goizean Industria Mahaia bildu delarik, Enpleguaren eta Garapen Ekonomiko Iraunkorraren zinegotzi Nerea Melgosak Industriari Laguntzeko 2017-2020 Planaren gauzatze-mailaren balantzea egin du; izan ere,Gasteizko Udalak abian jarritako ezaugarri horietako lehen ekimena da. Lan-ildoetako bat industrialdeetako hirigintza eta mantentze esku-hartzea da, zeinean dagoeneko 792.073 euro konprometitu batira Bitorialanda, Bitoriabidea, Arkatxa eta Larragana eraberritzeko —lanak esleituta daude jada—, eta industrialde guztietako seinaleztapen horizontala berriro margotzeko —laster esleituko da—. Aurtengo udaberrian eta udan egingo dira obra horiek.

Orobat, 2017an Industriaren Postontzian jasotako datuak ezagutarazi dira. Enpresen eskabideak hartzeko zerbitzu hori Herritarren Postontziaren adar bat da, eta iaz 89 eskabide jaso ziren; horietako 55 ebatzi dira dagoeneko. Eskabide gehienak bide publikoarekin lotuta daude; ondoren, berdeguneekin, argiteria publikoarekin eta garbiketarekin lotutakoak datoz.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  13 apirila 2018 14:02
  • Bestalde, Jundizko Enpresa Zentroan dauden lantegiek lana eman zieten 118 pertsonai 2017an

Enpleguaren eta Garapen Ekonomiko Iraunkorraren zinegotzi Nerea Melgosak Udalaren enpresa-zentroek 2017an izandako jardueraren berri eman du. Datu esanguratsuenen artean, Erdi Aroko Hiriguneko Enpresa Zentroak –erabilera-aniztasun handienekoak– artatu zituen 6.621 pertsonak. Guztizko zifra horretatik 3.492 pertsonek parte hartu zuten bertan instalatutako enpresen bilera eta jardueretan. Era berean, ekintzailetza sustatzeko prestakuntzak 1.170 pertsona erakarri zituen, eta bisita gidatuetan 780 pertsonek hartu zuten parte. Azpimarratu behar da baita 390 pertsona bildu zirela ekintzaileentzako aholkularitza-jardueretara, eta 332 enpresak sendotzeko prestakuntza-saioetara.

13 banakako bulego ditu erabilgarri zentroak, eta guztiak okupatu ziren, % 100, beraz, 2017. Bulego konpartituak, berriz, 6 dira, eta horietatik 5 erabili ziren, % 83ko okupazioa beraz. Erdi Aroko Hiriguneko Enpresa Zentroan dauden negozioen profilari erreparatuta, ikusten da 28 pertsona enplegatu zirela iaz, eta fakturazio-bolumena enpresako ia 50.000 eurokoa izan da kasu gehienetan.

 

Jundizko Enpresa Zentroa

Jundizko Enpresa Zentroaren erabilpen-datuak ere positiboak dira. 14 bulego erabilgarri ditu zentroak, eta iaz okupazioa % 100ekoa izan zen. Pabilioien kasuan, berriz, erabilera % 87,.5ekoa izan zen: 16 pabilioi erabilgarri daude, eta 14 erabili ziren. Instalazioen balorazioa oso ona izan da ia alderdi guztietan.

Autonomoen eta soldatapekoen artean, enpresa-zentro horretan instalatu diren enpresak lana eman die iaz 118 pertsonei.

Jundizko Enpresa Zentroko prestakuntza-aretoa 48 bider erreserbatu zen iaz, eta guztira 219 pertsonek erabili zuten.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  4 apirila 2018 10:51

Apirilaren 6tik 8ra arte egingo da Napoleon garaiko VIII. Azoka, Arriagako parkean; Ipar Arriaga elkartearen ekimenak aisialdia, kultura eta merkataritza dinamizazioa batzen ditu. Elikagaiak eta artisau produktuak eskainiko dituzten120 saltokiez gain, girotzeko berrogeita hamar jarduera baino gehiago egingo dira, parkean zehar banatuta.

Ekintza nabarmengarrienen artean, Gasteizko Batailaren 60 antzezleren esku hartzea dugu: frantsesen inbasioa eta atzera-egitea irudikatuko dituzte, soldaduen formazioa, eta artilleria salbak. Orobat, kanpaleku napoleonikoa jarriko dute, Independentzia Gerran parte hartu zuten armadak irudikatuz; “Vitoria 1813” elkartearekiko lankidetzan antolatu dira jarduera horiek.

Napoleonen azokaren beste erakargarrietako bat haurrentzako jolasgunea da; kanpalekuan bertan instalatuko da, eta zenbait jarduera didaktiko egingo dira han. Garaiko jantziak eta objektuak sortzeko lantegi praktikoak izango dira familientzat.

Enpleguaren eta Garapen Ekonomiko Iraunkorraren zinegotzi Nerea Melgosak eta Ipar Arriaga auzo-elkartearen lehendakari Ángel Lamelasek hiriko ekitaldi gisa aurkeztu dute Napoleonen garaiko VIII. Azoka, maila lokaletik haragoko oihartzuna baitu. “Lakua-Arriagarako jarduera eragile garrantzitsua da, eta inguruko auzoko, merkatari eta ostalarien inplikazio handia nabarmendu nahi dugu, beste hiri batzuetako bisitak erakartzeko hitzordua bihurtu dadin. Honelako dinamizazio jarduerak antolatzeko arlo publikoaren eta pribatuaren arteko lankidetzaren alde egiten dugu”, adierazi du Nerea Melgosak.

Ángel Lamelasek, berriz, Napoleonen Azoka hiriko eta estatuko kultura egutegian sendotuta dagoela nabarmendu du. “Honelako ekitaldiei esker, gertaera historikoekin lotutako turismoa oso errotuta duten eta ahalmen handia duten hiriek osatzen duten produktu turistiko baten komertzializazioan parte hartzen du Gasteizek. Izan ere, Gasteiz Hiri Napoleonikoen Europar Sarearen kide den Espainiako lehen hiria bihurtzea lortu dugu. Ahaztu gabe auzoko saltokiei eta hiriari dakarkien onura ekonomikoa, jakina”, esan du Ipar Arriaga elkartearen lehendakariak.

Jarduerak ostiralean, hilak 6, hasiko dira, 17:30ean haurrentzako txokoa irekiko baita; ordu erdi geroago, inauguratzeko pregoia izango da. Kalejirak, ipuin-kontalariak, antzerkia, gaitak, magia, malabareak eta umore girotzea aurki daitezke programan. Larunbat eta igandeko jarduerek 11:00etatik 14:00etara eta 17:00etatik 22:00etara iraungo dute.

Informazio gehiago: Napoleonen garaiko VIII. Azokaren egitaraua

Share

Aurrekoak »