Prentsa Oharren banner

Iradier Arenak Azkena Rock Special Edition 2021 jaialdia hartuko du gaurtik urriaren 3ra bitartean

Besteak beste, Loquillo, El Drogas, Carolina Durante, Lendakaris Muertos, M Clan, Kaotiko, Ray Collins Hot Club, Los Estanques eta Liher arituko dira

Gaur goizean aurkeztu dute Azkena Rock Special Edition jaialdia prentsaurrekoan, eta bertan parte hartu dute Gasteizko Udaleko Hezkuntza eta Kultura zinegotzi Estibaliz Cantok, Kultura eta Kiroleko foru diputatu Ana del Valek, Kutxabankeko Red Araba-ko zuzendari Jose Luis Bastarricak eta jaialdiko zuzendari Alfonso Santiagok.

Gaurtik, irailak 22, urriaren 3ra arte egingo da Azkena Rock Special Edition, Iradier Arenako Kultur Bizia gunean. Orotara 21 artista arituko dira, hamar rock gautan: besteak beste, Loquillo, El Drogas, Carolina Durante, Lendakaris Muertos, M Clan, Kaotiko, Ray Collins Hot Club, Los Estanques eta Liher.

“Osasun krisialdiko 18 hilabete hauek gauza ugari irakatsi dizkigute, maila guztietan. Horien artean, kultura segurua dela. Horregatik, rockaren jaiarekin bat egitera animatzen ditugu gasteiztarrak. Aurten, Iradier Arenan”, adierazi du Estíbaliz Cantok.

Cantok eta Del Valek nabarmendu dute udal ekipamendu hori segurua dela kulturarako, Kultura Bizia proiektuak erakutsi duen bezala. “Horren alde egitean asmatu dugula frogatu da, eta proiektua hilabete batzuk luzatzea erabakitzean ere asmatu dugulakoan nago, kultura programatzen jarrai dezan eta Kultura Biziak testuinguru jakin honetan eskaintzen dituen aukeren beharra duten eragileek ere horretan jarraitzerik izan dezaten“, azpimarratu du Ana del Valek.

Alfonso Santiagok, bestalde, Azkena Rock Special Edition-en programazioa aletu du; kontzertuak 19:30ean hasiko dira, eta oraindik bada sarrerarik emanaldi batzuetarako.

Lendakaris Muertos eta Ezpalak taldeek inauguratuko dute Iradier Arenako agertokia, gaur arratsaldean. Ondoren, Los Enemigos eta Liher (osteguna, hilak 23), El Drogas eta The Lizards (ostirala, hilak 24), Carolina Durante eta Biznaga (larunbata, hilak 25) eta Johnny Burning eta The soul Jacket (igandea, hilak 26) igoko dira agertokira.

Azkena Rock Special Edition-en emanaldien bigarren multzoa irailaren 29an (asteazkena) hasiko da, Kaotiko, Puraposse eta The Wax taldeekin; ostegunean, hilak 30, Ray Collins Hot Club eta Micky & The Buzz taldeek joko dute; ostiralean, urriak 1, Loquillok eta Sedak; larunbatean, urriak 2, Los Cigarros eta Los Estanques taldeek, eta igandean, urriak 3, M Clan eta Razkinek.

Kontzertuen edukiera indarrean dagoen araudiaren arabera kontrolatuko da, eta COVID-19aren aurreko prebentzio-neurri guztiak beteko dira.

Informazio gehiago

 

Share

Beñat Etxepare antzokiak distira berreskuratuko du “Arteak hegoak ematen dizkigu” programarekin

9 proposamen eszeniko eskainiko zaizkie Gasteizko ikasleei 2021-2022 ikasturtean

“Arteak hegoak ematen dizkigu” izeneko 2021-2022ko programazioa aurkeztu du Gasteizko Iparralde gizarte-etxeko “Beñat Etxepare antzokiak. 9 proposamen eszeniko eskainiko ditu, hezkuntza-ziklo desberdinetako ikasleentzat. Hezkuntza eta Kultura zinegotzi Estíbaliz Cantok eta Teatro Paraisoren zuzendari Pilar Lopezek aurkeztu dute prentsaurrekoan.

“Urte konplexua izan dugu aurrekoa, Beñat Etxepare antzokiko programa deszentralizatu egin behar izan dugu arte eszenikoak hiriko ikastetxeetara hurbiltzeko, edukiera murriztu behar izan dugu, higiene-eta osasun-neurriak bete….  Ikaskuntza handiko urtea izan da….. baina orain  ilusioz betetako denboraldia dugu berriz ere, eta Beñat Etxepare antzokira itzuliko gara” adierazi du Estibaliz Cantok.

Teatro Paraíso taldearen eta udalaren antzoki sarearen ustez, eskolara itzultzeak kultura eta zuzeneko arteekin elkartzea ere ekarri behar du. Programa honek hiriko haur eta gazteen sormena pizten jarraitu nahi du arte eszenikoen hegoen bitartez. “Gure helburua hiriko kultur eskaintza erabiltzeko eta gozatzeko ohiturak sustatzea da oraindik ere, eta horretarako artea dugu oinarri”, adierazi du Pilar Lopezek.

Programa

Ikasturte honetako programazioan hezkuntza-ziklo desberdinentzako 9 proposamen eszeniko daude.

Bigarren Hezkuntzako 2. zikloko gazteek literaturak hiria eraikitzen nola laguntzen duen ikusteko aukera izango dute, eta dolua landuko dute bere alderdi guztietan. Horretarako hiru lan eskaintzen dira:  Viridiana Centro de Producción Teatralen ‘Amor oscuro’ (sonetoak)’, Teatro de Ponienteren ‘La loca historia de la literatura’ eta Pikor Teatroren ‘Triple salto’.

Lehen hezkuntzako ikasleek, berriz, emozioak deskubrituko dituzte Ekhi txikiaren beldurren eta horiek gainditzeko duen moduaren bitartez; gizabanako bakoitzak askatasunerantz duen bidea ezagutuko dute pailazo maitagarri baten eskutik; zoriontsu izateko zer behar den hausnartuko dute, eta zirku-teknikak baliatuta, liburutegi batean bizitzea nolakoa izango zen ezagutuko. Proposamen horietaz gain, badira ziklo horretarako beste hainbat ere: Marie de Jonghen ‘Ikimilikiliklik’, Panta Rheiren ’Corre payasa’, Teatro Paraísoren ‘Gizon Zoriontsuaren alkandora’, eta Zirkozaurreren  ‘Vademekun’.

Haur Hezkuntzako ikasleei dagokienez, egunerokotik gure irudimenaren alde sakonerainoko bidea egingo dute, eta behaketa eta esperimentazioa landuko dute Teatro Paraisoren bi lanekin (Nomadak eta Leihoak).

Bertaratuen segurtasuna bermatzearren, neurri orokorrak eta partikularrak hartuko dira, prestakuntza-zikloaren arabera.

Erreserbak egiteko epea irailaren 13an hasi zen.Sarrerek 5 euro balio du (irakasleentzat doakoa).

 Bestelako ekintzak

Gasteizko alfabetizazio artistikoa sustatzea xede, Teatro Paraisok  Europako POCTEFA – Mind the Gap proiektuan parte hartzen du  2018tik, eta, hori dela eta, bestelako ekintza ugari ere izaten dira Beñat Etxeparen.

Horietako batzuk irakasleentzat izaten dira: aurkezpenetarako kafeak, lantegi didaktikoak, lantegi-klaustroak, arte- eta hezkuntza- ikastaroak, eta gida didaktikoak. Beste batzuek, ikusleentzako sari ezagunak, esaterako, ikusle gazteen begirada kritikoan jartzen dute arreta. Horretaz gain, beste ekintza hauek era badira: Vital Antzerki programa, Agertokira! programa, Unesco Etxearekiko lankidetza, proiektu artistikoetarako egoitzak, eta bitartekaritza artistikoari buruzko mintegia.

 Azpimarratu egin nahi dut Teatro Paraisoren eta Udal Antzoki Sarearen ahaleginaren emaitza islatu egiten dela gure agertokietara bertaratutako jende kopuruan, baita Gasteiz Hiri hezitzailearen proposamen eszenikoek ikasturte honetan izan duten eskarian ere, izan ere aurreikuspen oro gainditu ditu, eta uste dut Beñat Etxepareren kasuan ere horrela izan dela“, azpimarratu du Hezkuntza eta Kultura zinegotziak.

 

 

Share

Iradier Arenak hartuko du kultur programazioa 2022ko urtarrilera arte

Kultur Bizia ekimenak espazio seguru hori kudeatzen jarraituko du, Udaleko eta Foru Aldundiko Kultura sailen laguntza eta koordinazioarekin

 

Gasteizko Udalak, proiektuan laguntzaile diharduen Arabako Foru Aldundiarekin koordinaturik, aldatu egin du Kultura Bizia elkartearekin sinatutako lankidetza-hitzarmena, Iradier Arenan kultura-jarduerak antolatzen jarraitzerik izan dezan, 2022ko urtarrilaren 10era arte.

“Hasiera batean, urrian bukatzekoa zen Kultura Bizia programa, baina pandemiaren bilakaera dela eta, beharrezkotzat jo dugu hiriko kulturaren sektoreari laguntzen jarraitzea, bere jarduna espazio seguruetan gauzatzen jarraitzerik izan dezan, herritarrengan ahalik eta oihartzun sozialik handiena sortuz. Iradier Arenan ekitaldiak sustatzeko formula arrakastatsua izan da, eta urtarrilera arte jarraitzearen aldeko apustua egin dugu”, adierazi du Hezkuntza eta Kultura zinegotzi Estibaliz Cantok.

Hain zuzen ere, elkarte horri 50.000 euroko dirulaguntza ematea onetsi du Tokiko Gobernu Batzarrak gaur egindako bilkuran, Iradier Arenaren akustika hobetzeko eta espazioak egokitzeko, Kultura Bizia programaren esparruan sustatutako ekitaldiak bertan egin daitezen.

Kultura eta Kiroleko foru-diputatu Ana del Valek, berriz, honela adierazi du: “Bistakoa da espazio hori funtzionatzen ari dela; asmatu genuen horren aldeko apustu egin genuelarik, eta komeni da beste hilabete batzuez jarraitzea, Iradier Arenak eskaintzen dituen aukerak behar dituzten agenteen jarduera publikoa nahiz pribatua programatzen jarrai dezan. Ildo horretatik, Foru Aldunditik, Udalarekin koordinatuta, Kultura Bizia bideragarri egiteko elkarlanean jarraituko dugu urtarrilera arte, eta kultur eragile lokalei babesa ematen”.

Gogoratu beharra dago “Espacio Kultura Bizia Gunea” joan den apirilaren 12an aurkeztu zela eta maiatzaren 1etik aurrera hartu izan dituela jarduerak, eta lurraldeko kultur eragileek, Kultura Bizia elkartean antolaturik, era guztietako kultura-ekitaldiak programatu ahal izan dituztela bertan, Gasteizko Udalaren, Foru Aldundiaren, Eusko Jaurlaritzaren eta Laboral Kutxaren laguntzarekin, besteak beste, une bakoitzean beharrezko izan diren neurri sanitarioak hartzen zirelarik.

 

Share

Ongietorria, EHUren Arabako Campuseko ikasle atzerritarrei

Euskal Herriko Unibertsitatearen Arabako Campuseko ikasle atzerritarrei ongietorria emateko ekitaldian parte hartu du Hezkuntza eta Kultura zinegotzi Estibaliz Cantok gaur goizean, Letren Fakultateko areto nagusian.

Erasmus programaren balioa nabarmendu du —bertan behera geratu zen koronabirusa zela eta, eta orain ekin zaio berriro—, eta euskal unibertsitateak azken hilabeteotan egindako kudeaketa-lanak eskertu. “Aski ezaguna da ‘Kultura segurua da’ goiburua; zuek, berriz, neurri egokiak hartuz gero hezkuntza segurua dela erakutsi duzue.”

Ikasleei egindako agurrean, eskertu egin die esperientzia horretarako Gasteiz aukeratu izana. “Jakintza areagotzeko aukera ugari eskaintzen ditu gure hiriak. Ondarea, kultura-, kirol- eta gizarte-jarduerak… Bizikletaz edo garraio publikoz erraz mugitzeko moduko hiria da Gasteiz. Bertako txoko guztiak ezagutzeko gonbita egiten dizuet.”

Ekitaldian izan dira, halaber, Euskara, Kultura eta Nazioartekotze errektoreorde M. Juncal Gutiérrez Mangado, Arabako campuseko errektoreorde Manoli Igartua eta Arabako Campuseko Kultura eta Kirol zuzendari Gorka Iturriaga.

Share

Ireki dira Merkealdi eta Okasioko Liburuen XXXV. Azokako saltokiak

Merkealdi eta Okasioko Liburuen XXXV. Azoka inauguratu du Hezkuntza eta Kultura zinegotzi Estíbaliz Cantok. Urrezko Zeledonen plazan izango da, gaurtik —irailak 17— hasi eta urriaren 3ra bitartean. Euskadiko liburu-azoken koordinatzaile Asier Muniategi izan du lagun zinegotziak.

Euskal Autonomia Erkidegotik nahiz Estatuko beste leku batzuetatik —Madril, Andaluzia, Gaztela eta Leon eta abar— etorritako liburu-dendek 15 saltoki jarriko dituzte orotara. Gaztelaniazko eta euskarazko merkealdi eta okasioko liburuak izango dira salgai, euro batetik aurrera.

“Udalak laguntza ematen dio gaur irekiko den Merkealdi eta Okasioko Liburuen Azokari. Ekitaldi hau irakurketa sustatzeko ekimenen baitan sartzen da. Denboraldi berrirako liburuak erosteko aukera bikaina“ adierazi du Estibaliz Cantok.

11:00etik 14:00etara eta 17:00etatik 20:30era egongo dira zabalik saltokiak.

 

Share

Udal Musika Bandak 2020ko Urrezko Zeledonen galan joko du, irailaren 22an

Principal antzokian izango da emanaldia, 19:30etik aurrera

Gasteizko Udal Musika Bandak kontzertua eskainiko du Principal antzokian, irailaren 22an, ‘Urrezko Zeledon’ saria emateko egingo den galan. Arratsaldeko zazpi eta erdietan hasiko da ekitaldia.

Hezkuntza eta Kultura zinegotzi Estíbaliz Canto, Udal Musika Bandaren zuzendari Luis Orduña eta Urrezko Zeledonen lehendakari Josemari Velez de Mendizabal izan dira aurkezpen-prentsaurrekoan.

Oraingo honetan Mikel Delikak jasoko du saria, beirate historikoak zaharberritzen eta beirateen ondarea kontserbatzen eta mantentzen egindako lanagatik.

“Artisautza artistikoa, festa-artisautza, omentzeko aukera paregabea da. Mikel Delika festaren artisaua da, eta, horrenbestez, bakearen artisau” adierazi du Jose Mari Velez de Mendizabalek.

 Horretaz gain, aipamen berezia egingo zaio Deportivo Alavesi, bertako neska-mutilak gure hiriaren ordezkari baitira mailarik goreneko futbol txapelketetan “ gaineratu du zinegotziak..

Hori dela eta, Gasteizko bandak kirol-espiritua duen programa interpretatuko du. “Musikak futbol partidu bateko giroan murgilduko gaitu une batzuetan, baina baita une zeremoniatsuagoetan ere, bake unibertsalaren aldeko “oihu” batekin amaitzeko, baldintzarik gabekoa bizitzako arlo guztietan” adierazi du Luis Orduñak.

Pieza hauek entzun ahal izango dira: ‘Welcome Oberture‘,  Otto M. Schwarzena; ‘Alkate Soñua‘, Felix Sistiagarena; ‘Celedón’, Mariano San Miguelena, ‘Libertadores’, Óscar Navarrorena eta ‘Himno al Deportivo Alavés’, Alfredo Donnayrena.

Estibaliz Cantok eskertu egin dio Orduñari pandemian erakutsitako kemena, eta bandaren denboraldi berrirako abonamenduak agortuta daudela iragarri du. “Osasun-krisiaren eboluzio ona eta gure herrialdean egindako txertaketa-kanpaina arrakastatsua direla eta, edukiera handitu ahal izatea espero dugu, pertsona gehiagok izan dezan udal bandak hastear den ikasturterako proposatutako kontzertu interesgarriekin atsegin hartzerik” adierazi du.

Urrezko Zeledonen galarako sarrerak 3 eurotan eros daitezke, Principal antzokiaren ohiko bideak baliatuz.

Udalaren Folklore Akademiak ere hartuko du parte ekitaldian, eta streaming bidez jarraitu ahalko da Radio Vitoriaren webgunean.

Informazio gehiago

Share

Kulturak 15.000 euro emango ditu azaroan egingo den Liburuaren Azokarako

Gasteizko Udalak lankidetza-hitzarmena sinatu du Arabako Liburu Saltzaileen Elkartearekin eta, horren bitartez, Hezkuntza eta Kultura Sailak 15.000 euro jarriko ditu azaroaren 5etik 14ra bitartean Gasteizen Liburuaren Azoka egiteko.

Bestalde, Arabako Campuseko errektoreordetzarekiko lankidetza-hitzarmena onetsi du Tokiko Gobernu Batzarrak, Gasteizko Film Laburren XXV Jaialdia egiteko, datorren abenduan. Gasteizko Udalak 7.000 euro jarriko ditu horretarako.

Bestetik, Gasteizko Udalak 5.700 euro emango dizkio Arabako Dantzarien Biltzarrari 2021ean jarduerak garatu ditzan. Dantza autoktonoaren kultura mantentzea, berritzea eta sendotzea du helburu elkarteak, besteak beste, arabar eta euskal kulturaren zutabeetako bat baita hori.

“Kulturaren bideak ere irekitzen ari dira pandemia garai hauetan, eta lagundu egin behar diegu hura sustatzen dutenei. Esperientziak esaten digu ezarritako protokoloak jarraituz gero, berme osoz gozatu ahal izango dugula programatutako jarduerez”, esan du Hezkuntza eta Kultura zinegotzi Estibaliz Cantok.

 

 

 

Share

Gasteiz Hiri Hezitzailea programak 217 hezkuntza-jarduera aurkeztu ditu 2021-21 ikasturterako

Irailaren 14an hasiko da izena emateko epe orokorra

“Gasteiz, hiri hezitzailea” programaren 2021-22 ikasturteko jarduerak aurkeztu dira gaur goizean. Hezkuntza eta Kultura zinegotzi Estibaliz Cantok hiriko ikastetxeei zuzenduriko 217 jarduera aurkeztu ditu; izena emateko epea irailaren 14an hasiko da, Udalaren www.vitoria-gasteiz.org webgunearen bitartez.

Gai hauek landuko dira: ingurumena (13 jarduera), hiriaren ezagutza (21), euskararen erabileraren sustapena (10), artearen eta ikus-entzunezkoen alorreko hezkuntza (49), gorputz-hezkuntza eta kirola (9), eta berdintasunerako hezkuntza (4). Era berean, honako lantegiak izango dira: osasunerako hezkuntza (34), herritarren parte-hartzearen sustapena (13), gaitasun digitaletan heztea (38), bizikidetza eta aniztasuna (15), garapenerako lankidetza eta nazioarteko elkartasuna (2) eta babesa eta segurtasuna (9).

Hezkuntza-eskaintza honen bidez zenbait balio sustatu nahi ditugu, esaterako bizi-kalitatea, gizalegea, sormena, bakearen kultura, ekitatea, prestakuntza, identitatea, emakumeen eta gizonen berdintasun. Halaber, inklusioa, berrikuntza, partaidetza, erantzukizuna, elkartasuna, iraungarritasuna eta beste sustatu nahi ditugu. Gure xedea herritarrek eta eskolak balio horiek bereganatu eta horien arabera joka dezaten lortzea da”, esan du Cantok.

Osasun-egoeraren ondorioz, 2021-2022 aldirako eskaintza osatzen duten udal jarduerak egokitu egin dira eta uneko egoeraren eta aldian-aldian indarrean dagoen araudiaren arabera.

Programa hau posible da Udalaren 23 sail eta zerbitzuren planifikazio bateratuari esker, betiere Hezkuntza Zerbitzuak koordinatuta. Gainera, hiriko beste entitate eta elkarte batzuk ere lagundu dute.

Izen-ematea

Bigarren urtez jarraian, arreta eta sostengu behar handiagoa duten ikastetxeei erraztasunak emango zaizkie programan parte hartzeko. “Izena emateko epe orokorra irailaren 14an hasiko bada ere, ikastetxe horiek irailaren 9tik aurrera Gasteiz, hiri hezitzailea programaren jardueretan izena emateko aukera izatea aurreikusi dugu. Hartara, giza-kohesioa hobetzen lagunduko dugu, bai eta Gasteizko ikastetxeen artean aukera-ekitatea areagotzen ere”, esan du zinegotziak.

Hamaika Esku programan eta Magnet proiektua gauzatzen duten ikastetxeek izango dute izena ematean lehentasuna hori.

Hiri Hezitzaileen Estatuko Sarearen koordinatzailea

Jarduera-programa hau Gasteizko Udalaren Hezkuntza Zerbitzuak duela 30 urtetik hona garatzen duen estrategian kokatzen da; hain zuzen ere horrexegatik, estatuko 220 hirik parte hartzen duten Hiri Hezitzaileen Estatuko Sarearen (RECE) koordinatzailea izendatu izan dute Gasteiz.

“Zeregin horri amaiera emateko, 2022ko martxoan Hiri Hezitzaileen Estatuko Sarearen XV. Topaketa egingo da Gasteizen, “Hiri hezitzailea sendotu” izenburupean. Martxoaren 17an eta 18an izango da, Europa jauregian”, azpimarratu du zinegotziak.

Informazio gehiago

 

Share

Udal Musika Bandak gure zibilizazioen Historian barrena bidaia egitera gonbidatuko gaitu datorren denboraldian

Irailaren 8an hasiko da abonamenduen salmenta

 

‘Haec Est Victoria Quae Vincit’ (irabazten duen Garaipena’) izenburupean, abonamendu-denboraldi berria aurkeztuko du Gasteizko Udal Musika Bandak; bertan 7 emanaldi eskainiko ditu Bandak irailetik maiatzera, Principal antzokian, arratsaldeko 19:30ean.

Hezkuntza eta Kultura zinegotzi Estíbaliz Canto eta Udal Bandaren zuzendari Luis Orduña izan dira zikloa aurkezteko prentsaurrekoan. “2021-22 denboraldian gure zibilizazioetako Historiaren zati bat ezagutuko dugu, eta iraganaz, orainaz eta etorkizunaz jardungo dugu. Iraganeko kultura jakin batzuetara joko dugu –baskoiak, zeltak, erromatarrak…– eta gure gizarteraino iritsiko gara”, esan du Cantok.

Orduñak azpimarratu duenez, “denboraldiko kontzertu bakoitzak esapide ezagun bat izango du izenburu, eta bakoitzak unibertso desberdin batera eramango gaitu, bakoitzean historio desberdin bat kontatuko baitugu”.

Hartara, zikloa irailaren 29an hasiko da, asteazkenez, ‘Alea iacta est’ (‘Zotzak boteak dira’) izenpean, eta bertan María Hinojosa sopranoa eta Moisés Évora narratzailea arituko dira. Azaroaren 24an emakume bat gonbidatuko Bandak, zuzendari lanetarako, Margarita Lorenzo, zeinek ‘Veni, vidi, vici’ (‘Etorri, ikusi eta garaitu, dena bat’) izeneko kontzertua gidatuko baitu. Eta abenduaren 22an Steven Lin izango da Principalen, pianoaren aurrean; Udal Bandarekin batera ‘In perpetuum’ (`Betirako’) programaren baitako piezak joko ditu.

2022ko urtarrilaren 26an ‘Desideratum’ (‘Desiratzen dena’) izeneko programa eskainiko du Bandak, Pablo Urbina zuzendari gonbidatu hartuta, eta otsailaren 9an ‘Ad infinitum’ (‘Mugarik gabe’) izenekoa, Ibon Ariznabarreta flauta-jotzaile bakarlariaren laguntzarekin.

Martxoaren 16an abonamendutik kanpoko kontzertua izango da, ‘Errare Humanun est’ (‘Gizakion ezaugarria da huts egitea’) izenpean; Bandaren alboan Kloy raperoa, DJ Parrucho, Sofía Martínez konpositorea eta Gasteizko Arte eta Lanbide Eskola arituko dira. Kohntzertu horretarako sarrerak eguna iritsi ahala erosi ahalko dira.

Eta Gasteizko Udal Musika Bandaren 2021-2022 abonamendu-denboraldia maiatzaren 11n amaituko da, ‘Carpe diem’ (‘Goza ezazu momentua’) kontzertuarekin, Javier Bonet tronpa-jotzaile bakarlari arituko delarik.

Irailaren 8ko 17.30ean (asteazkena) jarriko dira salgai 6 kontzertutarako abonamenduak, 24 euroan, eta sarrera solteak, berriz, irailaren 22tik aurrera erosi ahal izango dira, 5 euroan. Principal antzokiaren ohiko salmenta-bideak baliatuz erosi ahal izango dira.

Egun horretan berean jarriko dira salgai 2020ko Urrezko Zeledonen Galarako (zein irailaren 22an egingo baita) sarrerak. Sarrera horiek 3 euro balioko dute.

Informazio gehiago: www.vitoria-gasteiz.org/banda

Share

Aire zabaleko kultur agendak 10 jarduera eskainiko ditu programaren bukaeran: musika, antzerkia, dantza, zirkua eta magia

Sarrera doakoa izango da, lekuak bete arte

Gasteizko Udaleko Kultura Zerbitzuak aire zabalean antolatutako jarduera programa datorren astean bukatuko da. Horren bitartez,  120 konpainiak guztira 150 ikuskizun eskainiko dituzte Arabako hiriburuan, uztailaren 6tik irailaren 5era arte.

Abuztua amaitzeko, hilaren 31n (asteartea) bi hitzordu interesgarri izango dira. Lanku konpainiak ‘Luze edo motz’ bertso-antzerkia aurkeztuko du 20:00etan, Aranbizkarreko parkean, eta Duluth bandak kontzertua emango du 20:30ean, Ibaiondoko gizarte-etxeko plazan.

Irailaren 1ean dagoeneko, Hodei magoak ‘Harritzearen abilezia’ izeneko ikuskizuna eramango du Hegoalde gizarte-etxera, 19:30ean, eta Arriagako anfiteatrora hurbiltzen den publikoak Elh Malick-en musikaz gozatu ahalko du, 20:30etik aurrera.

Irailaren 2an, berriz, Zirkozaurre taldearen ‘Kobr3’ zirku-ikuskizuna eskainiko da Zabalganeko gizarte-etxean, 19:30ean, eta Pez Limbo konpainiak ‘Txilin hotsak’ eta ‘Bittor eta Franky’ antzeztuko ditu Zulueta jauregiko lorategietan, 20:00etan.

Hilaren 3an, Amaia Elizaranek ‘Out’ dantza pieza aurkeztuko du Frai Zacariaseko elurzuloan, 19:00etan eta 20:00etan. Salburuko kirol esparruan (Gabriela Mistral), berriz, antzerkia izango da: Belén Cruz eta Mila Espigaren ‘Anarkia relacional’ lana.

Eidabe konpainiaren ‘Meri, Mari eta Lari’ lanak eta Malas Compañías taldearen ‘Zirkus’ ikuskizunak jarriko diote urrezko amaiera egitarauari, irailaren 5ean (igandea); lehena Hegoalde gizarte-etxean izango da, eta bigarrena, Arriagako anfiteatroan. 19:30ean hasiko dira bi saioak.

 “Hamar jarduera horiek emango diote amaiera Gasteizen denboraldirako egin dugun kultura apustuari. Gasteiztarrak proposamen horietara joatera animatzen ditugu. Izan ere, denetik dago, jende ororentzat. Udaz burua galdu gabe gozatzeko modua da”, adierazi du Hezkuntza eta Kultura zinegotzi Estíbaliz Cantok.

Sarrera librea izango da, erreserbatu beharrik gabe eta lekuak bete arte. Gune horiek guztiak aire zabalean izango dira, mugatuta, eta kopuru jakin bat onartuko da bakarrik. Ikusleak eserita egongo dira, eta segurtasun-neurria guztiak gordeko dituzte, Eusko Jaurlaritzaren indarreko araudia jarraiki.

Informazio gehiago

UDAKO KULTUR PROGRAMAZIOA

Amaia Elizaran

Mari, Mari eta Lari

Share