Prentsa Oharren banner
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  17 apirila 2019 09:38

Ortzai elkartearekiko urteko hitzarmena ere onetsi du

Gaur, Estíbaliz Cantok zuzentzen duen Kultura, Hezkuntza eta Kirol Sailaren proposamenez, Tokiko Gobernu Batzarrak bi hitzarmen onetsi ditu.

Lehenengoa, EHUren Arabako campuseko Errektoreordetzarekin sinatuko da Gasteizko Film Laburren XXIII. Jaialdia antolatzeko, eta 6.000 euroko zenbatekoa izango du.

Bigarrena, Ortzai kultura-elkartearekin sinatuko du. Udalaren iritziz, interesgarria da Ortzai kultura-elkarteak egiten dituen ekimenei laguntzea, kolektibo ugariren onurarakoak baitira, eta, horrenbestez, 2019an zenbait jarduera egiteko hitzarmena onetsi du. Horretarako, 20.000 euro jarriko ditu Udalak.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  9 apirila 2019 11:35

 

Sare osoan dohainik sartu ahal izango dira 18.000 eurotik beherako urteko errenta duten familiak

 

 

 

Haur Eskolak izena ematea

Maiatzaren 2tik 10era bitartean izango da Gasteizko Udalaren haur-eskoletan eta Haurreskolak Partzuergoaren haur-eskoletan 2019-2020 ikasturterako matrikulatzeko aldia; 1.428 plaza izango dira guztira.

Udalaren haur-eskoletan (0-3 urte), 2017an, 2018an eta 2019an jaiotako haurrak matrikulatu ahal izango dira, eta, Partzuergoan (0-2), 2018an eta 2019an jaiotakoak.

Bi berrikuntza egongo dira. Garrantzitsuena da sare osoan doakoa sarbidea izango dutela 18.000 eurotik beherako urteko errenta duten familiek.

Horretaz gain, datorren ostegunean (hilak 11) hitzaldi batzuk emango dira matrikulazio-prozesuari buruz, beharrezkoa balitz ere.

– Apirilaren 11n (osteguna), 11:00etan, Zabalgana gizarte-etxean (euskaraz)

– Apirilaren 11n (osteguna), 18:00etan, Salburua gizarte-etxean (gaztelaniaz)

Matrikula egiteko epeak:

  • Maiatzaren 2tik 10era bitartean: Eskabideak eta agiriak aurkezteko epea.
    • 2019ko maiatzaren 5etik 19ra bitarteko haurren kasuan, maiatzaren 6tik 22ra bitartekoa izango da izena emateko epea.
  • Ekainaren 7an: onartuen behin-behineko zerrendak eta itxarote-zerrendak argitaratuko dira.
  • Ekainaren 7tik 12ra: erreklamazioak aurkezteko epea.
  • Ekainaren 24an: behin betiko zerrendak argitaratuko dira.
  • Ekainaren 24tik 28ra: matrikula formalizatzea.

Eskabideak eta agiriak aurkezteko lekua: Herritarrei Laguntzeko Bulegoa (San Antonio kalea 10) eta gizarte-etxeetako herritarrei laguntzeko bulegoak. Hezkuntza-premia bereziak dituzten haurrak matrikulatzeko, hobe da dokumentazioa Udalaren Hezkuntza Zerbitzuan aurkeztea (Frai Zacarias Martinez 3.ean, 08:30etik 14:00etara).

 Informazio gehiago.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  5 apirila 2019 12:38

 

 

 

 

 

 

 

EHUrekin batera proiektu artistikoak zabaltzeko egiten den deialdian hautatutako lau lanetako hirugarrena da; dagoeneko eman daiteke izena 2019/2020 ediziorako, ekainaren 2ra arte

 

Gaur aurkeztu da  Jean Pierre Vargaen “The eye of the banopticon” (“Banoptikoko begia”) erakusketa, Montehermoso kulturuneak EHUrekin batera proiektu artistikoak zabaltzeko egiten duen deialdian hautatutako lau lanetako hirugarrena; maiatzaren 5era arte egongo da ikusgai, Jovellanos aretoan. Egilearekin batera, Kultura, Hezkuntza eta Kirol zinegotzi Estíbaliz Canto, komisario Cristina Aráosla-Oñate eta EHUko kide Edurne González izan dira aurkezpenean.

The eye of the banopticon (“Banoptikoko begia”) identitate-kontrolaren eta zaintzaren teknologia biometrikoei buruzko erakusketa-proiektua da. Sistema horiek gizartearen zenbait eremutan erabiltzen hasi dira; horien artean, nagusienetako bat migrazio- eta aireportu-kontrolena da. Halako lekuetan ikusi daiteke teknologia horiek identitatea kudeatzeko eite administratibo arriskutsua dela, intrusibo eta baztertzailea, herritartasun kontzeptua bera ere kolokan jartzeraino.

Zenbait bitarteko baliatuta, Jean Pierre Vargasek sistema horien eta noiznahi eta nonahi salbuespen-egoera ikusteko joera politikoaren arteko harremanak aztertzen ditu… aintzat hartuta joera horrek indarra hartu duela gaur egun, batez ere 2001eko irailaren 11z geroztik, egun horretatik aurrera mendebaldeko estatuek terrorismoaren mediatizazioa norbanakoekiko kontrola areagotzeko baliatu baitute.

Azken bi urteetan egindako ikerketa-lanaren emaitza biltzen duen katalogoa ere argitaratu da.

Jean Pierre Vargasek (1987) 2018an bukatu zuen Arte Garaikide Teknologiko eta Performatiboa Masterra  EHUn; Arteko Gradua ere egin zuen han. Banako zein taldeko proiektuak egin ditu Medialab Pradon (2018), Bizkai Aretoan (2018) eta Getxoarten (2018), besteak beste. Artegintzan ez ezik, 3D grafikoetan ere interesatuta dago; esparru horretan era autodidaktan hasi zen, eta Delirium Studios enpresako grafista lan egitera iritsi da, 2018an. Gaur egun, kultura-kudeaketako praktikak egiten ari da Kunsthalle Lissabon-en (Lisboa, 2019), Global Training beka baten bidez.

2019-2020 deialdia eta datuak

Erakusketaz gain, EHUrekin batera proiektu artistikoak zabaltzeko deialdi berria aurkeztu da. Arte Ederretako ikasleen eta prestakuntza-aldian ari diren artisten proiektuak ezagutaraztea da deialdiaren helburua, bai eta ekoizpen- eta prestaketa-eremuen artean eztabaida eta trukerako gune bat sortzea ere, hartara artistei eremu profesionalarekin eta testuinguru lokalarekin harreman zuzena osatzen laguntzeko. Orain arte 35 artistak egin ahal izan dituzte lehen urratsak horri esker.

Ekainaren 2ra arte eman ahalko da izena. Honi erantsita doaz oinarriak.

Bestetik, astelehenean amaitu zen proiektu artistikoen deialdira aurkezteko epea, eta 145 proposamen jaso dira (2018an 88 izan ziren).

Share
Kategoriak: Fotonotizia  —  Etiketak:   —  Komunikazio Zerbitzua / Servicio de Comunicación  —  4 apirila 2019 13:59

 

Gasteizko Udalak harrera egin die gaur Alemaniako Spaichingen Gymnasium ikastetxeko ikasle eta irakasleei, Gasteizko Vera Cruz ikastetxearekin trukea egiten ari baitira Kultur Trukeen programaren barruan.

 

 

 

 

 

Hezkuntza, Kultura eta Kirol zinegotzi Estibaliz Cantok hartu ditu, udaletxeko harrera aretoan, eta ondoren bilkuren aretoa bisitatu dute.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  26 martxoa 2019 10:59

Liburutegien sareak, Liburuaren Eguna aitzakia hartuta, hamar jarduera programatu ditu apirilaren 2tik maiatzaren 9ra bitartean

 

 

Liburu Egunak programa

Udalaren Liburutegien Sareak gaur aurkeztu du “Liburu Egunak” ekimenaren aurtengo edizioa, Liburuaren Egunaren (apirilaren 23a) inguruan irakurzaletasuna sustatzeko antolatzen den jarduera-sorta, alegia. 10 jarduera egingo dira apirilaren 2tik maiatzaren 9ra bitartean.

Kultura, Hezkuntza eta Kirol zinegotzi Estibaliz Cantok aurkeztu du gaur egitaraua eta, Cantok berak adierazi duenez, horren helburua “kulturaren eta herritarren arteko topaguneak sortzea da, irakurketaren, liburuen, musikaren eta dantzaren bidez. Bai eta kulturguneen sorrera sustatzea ere, kultura eta irakurtzeko zaletasuna zabal dezaten”.

Hona hemen jarduera aipagarrienak:

  • Toti Martínez de Lezea, “La magia de Nur”. Emakumezko pertsonaia bat haur literaturan. Apirilaren 2an Goiuri jauregian. Jende ororentzat da.
  • Mamen Moreu. “Los límites del humor que nos imponen o nos autoimponemos por el hecho de ser mujer”. Ilustratzaile eta komikigile honek umore handiz kontatuko dizkigu bere esperientziak. Apirilaren 3an, 18:30ean. Salburuko liburutegian.
  • Manuel Vilas idazleak bere azken eleberria aurkeztuko du: Ordesa. Ordesa literatur fenomeno itzela izan da Espainian 2018an: 14 edizio izan ditu urtebete baino gutxiagoan eta 100.000 ale saldu dira. Apirilaren 8an Goiuri jauregian.
  • Arantxa Urretabizkaia, Idazleekin Solasean kanpainaren barruan. “Kontraesanaren kontaera”. Euskal literaturaren historian onarpen handienetakoa izan duten ahots eta idazleen artean dago Arantxa, eta, oraingo honetan, Patxi Zubizarretarekin solastuko da bere Bidean ikasia saiakera-liburuaren inguruan. Apirilaren 10ean Pilarreko liburutegian. Euskaraz.
  • Bernardo Atxaga eta Jose Kruz Gurrutxaga. “Martuteneko kartzelan”. Irakurketa dramatizatua, euskaraz. Duela zenbait urte, euskal literatura zaharrari buruzko hitzaldia eman zuen idazleak Martuteneko kartzelan. Ekitaldi hura gogoan duela prestatu du irakurketa hau, orduan izandako bizipenak kontuan hartuz. Jose Kruz Gurrutxaga aktorea izango du lagun. Euskaltzaindiaren mendeurrenean estreinatu zen. Apirilaren 15ean Goiuri jauregian.
  • Yolanda Mosquera. “La pequeña Roque” (Guy de Maupassant). 2018ko Euskadi Saria jaso zuen ilustrazioen kategorian. Sormen-prozesu baten aurkezpena. Apirilaren 23an Goiuri jauregian.
  • Álvaro Arbina. “De arquitecto a escritor”. Istorio kontalari baten ibilbidea. Maiatzaren 6an Judimendiko liburutegian.
  • Olatz Salvador. “Saio linbikoak”. Musika, literatura eta emozioak uztartzen dituen ikuskizuna. Euskaraz. Maiatzaren 7an Goiuri jauregian.
  • Javier Alcázar. El Principito eleberriaren egokitzapena egin du irakurketa errazera. Javier Alcázar-ek urteak daramatza APDEMA elkartearekin batera irakurketa errazaren arloa lantzen. Hitzaldi hau elkarlan horren emaitza da. Maiatzaren 9an Goiuri jauregian.

Jarduera guztiak 19:00etan hasiko dira (apirilaren 3an Salburun egingo dena ezik, hori 18:30ean hasiko da) eta sarrera librea izango da lekuak bete arte.

Gainera, apirilaren 23an, Liburuaren Nazioarteko Egunean, “Liburu batekin hitzordu itsua” ekimena antolatuko da sareko liburutegi guztietan.

Jarduera horrek mailegu berezia proposatzen digu Liburuaren Eguna ospatzeko. Liburuak paperez bilduko dira eta liburutegira hurbiltzen direnei horietako bat aukeratzeko gonbita luzatuko zaie, gero, etxera eraman, bilgarria kendu eta ustekabeko irakurgai horretaz goza dezaten.

Horrez gain, komeni da bi kontu hauek ere gogoan hartzea:

12 eta 30 urte bitarteko gazteek martxoaren 31era arteko epea dutela GAZTEENTZAKO V. NANOIPUIN LEHIAKETAN parte hartzeko. Oraingo honetan nanoipuinek “sare” hitza izan beharko dute (edozein dela atxikitzen zaion kasu marka edo zentzua).

Bigarrenik, maiatzaren 31ra arte martxan dagoela IRAKURRI, GOZATU ETA OPARITU kanpaina.

Informazio osoa:

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  22 martxoa 2019 08:54

 

 

 

 

 

 

 

Estibaliz Canto zinegotziak “Kirola Hiri Handietan” izeneko nazioarteko biltzarrean azpimarratu du berebizikoa dela kirol-ekitaldi handien antolakuntza guztiontzako kirolaren filosofiarekin uztartzea

Gaur Kultura, Hezkuntza eta Kirol zinegotzi Estibaliz Canto hizlari aritu da atzotik Bartzelonan egiten ari diren “Kirola Hiri Handietan” izeneko nazioarteko biltzarrean, eta, zehazki, “Ekitaldi Handiak” izeneko multzoan hartu du parte.

Eztabaida-mahaiari Kiroletako Estatu Idazkari ohia eta F.C. Barcelonako egungo kirol profesionalen zuzendaria den Albert Soler-ek eman dio hasiera, eta, besteak beste, Triatloiaren Nazioarteko Batasuneko lehendakari Marisol Casadok, Londresko kirolen buru den Simon Cooper-ek, Bartzelonako Diputazioko Kirol diputatu Maite Fandos-ek eta Joko Olinpiarretako batzorde antolatzaileetako proiektuen kudeatzailea den Federica Sechi-k hartu dute parte.

Cantok eredu gisa baliatu du Gasteiz, aurten Saskibaloiko Erreginaren Kopa eta Lauko Finala hartuko baititu, besteak beste.

Honakoa izan da Cantoren tesi nagusia: “Gasteizen tamainako hiri bat horrelako kirol ekitaldi handiak antolatzeko gai da, batez ere, udal gobernutik guztiontzako kirola sustatzen delako eta gizarte-ingurunean engaiatzen diren hiritar aktiboak ditugulako.”

Hau da, –azpimarratu du– kirol ekitaldi handi baten antolakuntzan inbertitzean ezin da norgehiagokak dirauten bitartean eragina izango duten, edo ez duten, ekitaldiak ekartzean bakarrik pentsatu, baizik eta kirol-politika integral baten gailurra izan behar dute ekitaldi horiek. Kirol-politika horren lehen pausoa oinarria zaintzea da, eta ondoren datoz kirol-eskaintza, kirol-instalazioetan inbertitzea, harpidedunak eta zaleak zaintzea eta klubak eta federazioak sortzea; horrek guztiak ahalbidetzen du kirola eta bizi ohitura osasungarriak beren egunerokotasunaren zatitzat dituen hiria eraikitzea”.

Ildo horretan, Cantok adierazi du Gasteiz “Buenos Aires, Londres edo Bartzelonarekin alderatuta hiri txikia dela bere handitasunean eta, hala ere, esperientzia handia hartu duela azken urteotan arrakasta handia eta itzulkin soziala ekarri duten kirol ekitaldiak antolatzen”, gero, kirolen arduradunak nabarmendu du hori posible dela “hainbat hamarkadaz geroztik lan handia egin delako kirola zio eta helburu dituen hiria eraikitzeko”.

Horren ondorioa daharpidedunentzako txartelak eskaintzen dituzunean 95.000 pertsonak izena ematea; kirol-instalazioak dituzten 14 gizarte-etxe eraikitzen dituzunean horiek goraino betetzea; ekitaldiak ekartzeko inbertsio publiko-pribatu bat egiten duzunean instituzioak eta erakundeak antolakuntzan sartzea eta jendeak ekitaldiak betetzea; baina, batez ere, azpimarragarriena da ekitaldi horiek hirian uzten dutela arrastoa, eta bizimodu osasungarri eta betea garatzeko bidea irekitzen dutela”. “Hori da nire iritziz Gasteizen sekretua”, laburbildu du.

Bestalde, Cantok azpimarratu du zeinen garrantzitsua den, hiritarrei begira, ekitaldiak antolatzen direnean inbertsio publikoari dagokionean guztiz gardena izatea: “Izan ere, ez bagara gai inbertitutako euro bakoitzaren itzulkina azaltzeko eta irabaziak erakusteko, azkenean, beren hiria Monopoly-joko bihurtu delako sentipena izaten dute hiritarrek eta ez benetako ekitaldiak direlakoa. Horretarako, garrantzitsua litzateke hiriok inbertsioak zenbatesteko irizpide objektiboak ezartzea, ekitaldiak antolatzean ekitaldi-hiri binomioko bi aldeek probetxu argia ateratzea ardatz izan dadin”.

Zentzu horretan, –jarraitu du– ezinbestekoa zen Erreginaren Koparen eta Lauko Finalaren aldeko apustua egitea, desberdinak baina hiriarentzat oso garrantzizkoak diren zenbait arrazoi direla medio. Lauko Finalak izango duen itzulkina begi bistakoa da: jende-kopurua, nazioartean hiria ezagutarazteko aukera eta abar. Saskibaloiko Erreginaren Kopari dagokionean, ekitaldi horren garrantzia emakumezkoen kirola ikusaraztean eta indartzean zetzan; hau da, ez genuen ekitaldiak irauten zuen bitartean soilik igarriko zen eragina lortu nahi, baizik eta diziplinaren etorkizuna aldatuko zuena, emakumezko kirolariak gaur egun oraindik ere neskato eta mutikoei falta zaizkien erreferente bihurtuko dituena”.

Hala, kirol ekitaldiaren emaitza zehatzak gutxienekoa izan beharko luke administrazio publikoarentzat, funtsezkoena ekitaldi horiek kuantitatiboki eta kualitatiboki neur daitekeen itzulkin soziala uzteko ahalmena izatea baita. Eta uste dut onura lortzea ez dela inoiz posible izango hiriak ez badu kirola oinarri-oinarritik lantzen”, aipatu du amaitzeko.

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  14 martxoa 2019 14:12

 

 

 

 

Bartzelonan izango da martxoaren 20an eta 21ean, eta Estíbaliz Canto zinegotzia izango da ordezkaritzaren buru

Kirol Zerbitzuaren ordezkaritza batek, Estíbaliz Canto zinegotzia buru duela, Bartzelonan martxoaren 20an eta 21ean egingo den “Kirola Hiri Handietan” izeneko nazioarteko biltzarrean hartuko du parte. Antolatzaileek Gasteiz gonbidatu dute hizlari gisa parte har dezaten eta azal dezaten zer ezaugarrik ahalbidetzen duten gure hiria kirol ekitaldi handiak antolatzeko egokia izatea eta zer kirol-politika aktibo garatzen diren Gasteiz kirolaren hiri izateko.

Biltzar hori foro bat izango da eta, horretan, kirolari eta/edo udal ekintzari loturiko hainbat esparrutako (unibertsitatea, kirola, politika, esparru teknikoa) adituek “kirola hiri handietan” gaia aztertu eta horren inguruko eztabaida egingo dute, etorkizunera begira. Hala, hiri handietan kirolaren, ariketa fisikoaren eta bizimodu osasungarriaren sustapenean aldaketa positiboak eragiteko helburua duten zenbait ildo politiko nagusi ezartzeko aukera izango dute eta, gero, ildo horien barruan ekintza berariazkoak zehaztekoa. Horretarako, esperientzien arteko sinergia, prestakuntza eta parte-hartzea izango dira ardatz.

Cantok nabarmendu du biltzarra “beste hiri batzuek kirol-hiri gisa garatzeko zer eredu duten ikasteko ez ezik, Gasteizek bere eredua esportatzeko ere aukera ederra izango dela ”.

Ildo horretan, Gasteizko ordezkaritzak aukera izango du azaltzeko zer ezaugarrik eta kirola era integralean garatzeko zer politikak ahalbidetu duten Gasteiz kirolaren hiri izatea eta hirian zenbait lorpen erdiestea; izan ere, besteak beste, Gasteizko kirol-instalazioek 95.000 harpidedun dituzte, hiria bera kirol-instalazio gisa erabiltzen da eta kirol ekitaldi handiak egiteko ahalmena ere badu. Gainera, beste hiri batzuek garatzen dituzten esperientzietatik ere ikasteko aukera izango du ordezkaritzak Sailak eman nahi duen salto kualitatiboaren estrategia hobetzeko; hau da, hiria kirolaren hiriburu eta kirola hiriaren kalitate-ardatz bihurtzeko estrategia fintzeko.

Biltzarra bost alorretan banatuta egongo da:

  • Instalazioak: Zer instalazio eta nolakoak beharko ditugu etorkizun hurbil eta ertainean ariketa fisikoa eta kirola egiteko? Oraindik baliozkoak al dira orain arte jarraitutako irizpideak? Nola erreformatu behar dira? Nolakoa izan behar du kudeaketa ereduak?
  • Espazio Publikoa. Gaur egun ariketa fisikoak eta kirolak horretarako bereziki sortutako instalazioak gaineztu dituzte, eta hiri-ingurunea eta ingurune naturala berenganatu dituzte. Nola kudeatu behar da gertakari hori era iraunkorrean gara dadin eta ez dadin erabilera desberdinen arteko gatazkarik sortu? Zer berariazkotasun dituzte hiri-inguruek zentzu horretan?
  • Hiri aktiboak: Ariketa fisikoa eta kirola besterik gabe sustatzeaz gain, hiri-inguruetan ariketa fisiko osasungarria bultzatzea eta erraztea ezinbestekoa da. Nola egin daiteke hori? Zer jardunbide egoki aurkitu dira gai honi dagokionean? Nondik jo behar dute sustapen-ildoek?
  • Kirola eta gobernantza: Aro aldaketa baten muin-muinean gaude. Posible ahal da kirola eta ariketa gobernatzeko lehengo eredu berei eustea? Zer norabide hartu horiek aldatzeko? Zer alderdi gehitu behar zaizkie eta nola moldatu behar dira lehendik zeudenak? Zer modelok dirudite egokienak helburuak lortzeko?
  • Ekitaldi handiak: Hiriak jadanik ez dira nazioarteko kirol txapelketa handien jokaleku hutsak. Bestalde, iraganeko harremanak –helburu komertzialak soilik zituztenak– aldatuz joan dira udalentzat eta, batez ere, hiritarrentzat aberatsagoak eta onuragarriagoak diren formatuei lekua uzteko. Nola egin behar da aurrera zentzu horretan? Zer ikuspuntu dute horretan zeresana duten instituzio publikoek?

 

 

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   12:24

 

 

 

 

 

 

 

2018ko proiektu artistikoen deialdiko bigarren proiektua da.

Gaur aurkeztu da 2018ko proiektu artistikoen deialdiko bigarren proiektua. Irati Inorizaren “Blue: contact line: Red”. Artistak berak egin du aurkezpena Kultura, Hezkuntza eta Kiroleko zinegotzia den Estíbaliz Cantorekin batera. Martxoaren 15etik apirilaren 21era bitartean egongo da ikusgai Montehermoso kulturuneko lehen solairuan.

“BLUE: Contact Line: RED” pieza aribidean dagoen eta harremanak –estekatze-ekintza gisa ulertuta– aztertzen dituen ikerlan artistiko baten zati da. Irati Ironizak bestearekiko harreman fisiko edo birtualak eragindako ukimena bitarte, gorputzen artean gertatzen den hori aztertzen du proiektu honetan.

Horretarako, borroka hartzen du abiapuntu –bereziki, emakumeena– eta performance bihurtzen du. Koreografia oso bat da, zein, bere keinu eta gorputz-posizioetan, gertatzeko dagoenaren gertakari den. Harremanezko konexio gero eta sarriago eta ugariagoen garaia, zenbait denbora-espazio sistematan.

Proiektua ikus-entzunezko instalazio batean islatuta aurkezten digu egileak, lan-prozesuan zehar sortutako objektu eta marrazkiak lagun.

Proiektuan parte hartu dute Aranako Borroka Klubak, Burlatako Borroka Klubak eta Munoako Borroka Klubak.

 

 

 

 

 

 

Jarduera osagarri bat ere egongo da, performance/lantegi bat. Lantegi hori apirilaren 13an izango da 11:30etatik 13:30etara eta Iratik berak zuzenduko du. Erakusketaren azalpen bat emango du, performancea prestatuko da eta 13:00etatik aurrera jendaurrean aurkeztuko da landutakoa. Horretan parte hartzeko aurretiaz eman behar da izena info.montehermoso@vitoria-gasteiz.org. helbidean. Doako jarduera da.

Balmaseda, (1992) EHUn egin ditu bai graduko ikasketak, bai eta Ikerketa eta Sormena Artean izeneko masterra ere. Ondoren, Tomas Rullerrek zuzendutako Atelier de Performancen osatu zituen ikasketak, VUT Unibertsitatean (Brno, Txekiar Errepublika). 2017an Casal Solleric Artista Erakusketaren Saria irabazi zuen, eta FUTURO PRESENTEra gonbidatu zuten (INJUVE, Madril), 30 urtetik beherako artista emergenteen kategorian. 2018an, bere proiektuak, Montehermosoko deialdian (INJUVE 2018) hautatua izateaz gain, Bizkaiko Foru Aldundiaren dirulaguntza jaso zuen WHAT A BLUE! proiektua garatzeko.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  5 martxoa 2019 11:21

Bihartik aurrera eman ahalko da izena hautaketa-prozesurako, eta maiatzean eta ekainean egitea aurreikusi da; Donostiako Eskolak koordinatuko du, eta probetako batzuk Gasteizen egingo dira

Luis Aranburu Musika Eskolak eta José Uruñuela Udal Dantza Kontserbatorioak ikasturtean zehar sortzen diren beharrak betetzeko lan-poltsa bateratua osatuko dute Euskadiko beste 30 ikastegirekin batera, Donostiako Musika eta Dantza Eskolak koordinaturik.

Eraginkortasun arrazoiak direla eta, bi erakunde publiko horiek, zeinen lehendakaria Estíbaliz Canto zinegotzia baita, kudeatzeko gomendioa egingo diote Donostiako Musika eta Dantza Eskolari lan-poltsak batera kudeatu ditzan eta hautatze-prozesu bateratu horiek sustatu ditzan.

30 eskola hitzartu izana arrakasta handia da, eta etorkizunean erakundeen artean lankidetzan aritzeko bidea erakusten du”, nabarmendu du Cantok. “Gainera, zalantzarik gabe, irakasteko dugun gaitasuna hobetzea ekarriko du, eta beraz, ikasleei eskaintzen dizkiegun zerbitzuak”.

Bihar, hilak 6, hasiko da izena emateko epea, apirilaren 4ra arte. Udalaren web-orrian (www.vitoria-gasteiz.org/procesosselectivos) egin ahalko da, baita herritarrei laguntzeko bulegoetan ere.

Probak maiatzean eta ekainean egitea aurreikusi da; horri esker, Kontserbatorioak lan-poltsa propioa izango du, orain arte ez baitzuen horrelakorik. Musika Eskolari dagokionez, 2013ko eta 2015eko LEPen ondorioz osatutako zerrenden eta 2015ean osatutakoaren osagarria izango da lan-poltsa berria, horiek agortzen badira, batzuetan gertatzen den bezala.

Bestetik, Musika Eskolan zenbait ikasgaitako probak egingo dira: zurezko haizea, antzinako musika-tresnak, harmonia, musika-hastapenak eta musika-informatika.

 

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  1 martxoa 2019 12:03

Legegintzaldi honetan sortu zen kultura-dirulaguntzen lerroa, 100.000 eurorekin, eta pixkanaka handitzen joan da, legegintzaldi honetan 192.000 eurora iritsi arte

Gaur, Estíbaliz Cantok zuzentzen duen Kultura, Hezkuntza eta Kirol Sailak proposatuta, Tokiko Gobernu Batzarrak onetsi ditu 2019ko kirol-dirulaguntzetarako deialdi orokorrak, bai eta aurtengo kultura-proiektuei eta finkatutako ekitaldi eta jaialdiei laguntzeko deialdia ere.

2019an egitekoak diren kultura-proiektuei eta finkatutako ekitaldi eta jaialdiei diruz laguntzeko deialdiak 192.000 euroko zuzkidura izango du aurten.

Kontuan hartu behar da 2016an sortu zela partida, 100.000 eurorekin, eta geroago handitzen joan dela: 150.000 euro, 2017an; 175.000 euro, 2018an; eta, azkenik, 192.000 euro, aurten. Cantok adierazi duenez, “apustu argia egin dugu gure herritarrei zuzenduriko izaera irekiko ekimenen laguntzarako, udal-jardueraren osagarria den kultura-sustapen, -sorkuntza, -prestakuntza eta -hedapena baitakarte”. Ildo horretan, ziurtatu duenez, “kultura-eragileekiko gure konpromisoetako bat izan da udal-laguntzaren apustu bat egitea, esperientzia berrietarako zein funtzionatzen duten esperientzietarako; horrexegatik egin dira pixkanakako igoerak, eta horiek, gainera, Kulturako Plan Estrategikoaren filosofiari eta helburuekin batera doaz”.

Iaz, 36 proiektuk jaso zituzten dirulaguntza horiek.

Kirol-dirulaguntza

Bestetik, Kirol Zerbitzuak proposatuta, Batzarrak onetsi ditu 2019rako kirol-dirulaguntzetarako oinarri espezifikoak eta deialdia, 352.000 euro zenbatekoarekin (azken urteotan egonkor iraun du zenbatekoak).

Udalak udalerriko irabazi-asmorik gabeko erakundeei kirol-jarduerak antolatzen lagundu ohi die, batez ere aisialdiarekin eta herritarren partaidetzarekin lotutakoak, bi helbururekin: batetik, talde pribatuek Gasteizko herritarrentzako kirol-eskaintza hobetu dezaten sustatzea; bestetik, kirol-erakundeei beren jarduera gauzatzen laguntzea, elkarteetan oinarritutako egitura horiek jarraitzea, egonkortzea eta haztea bermatzeko ahal den neurrian, udalerriaren interesekoak direlakoan, bai planteamenduagatik beragatik bai haien ekintza eta helburuengatik.

Ildo horretan, iaz, 169 dirulaguntza eman zitzaizkien 73 elkarteri, eta “eragin positiboa izan zuten hirian eta herritarrengan”, esan du Cantok amaitzeko.

Share

Aurrekoak »