Prentsa Oharren banner
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  8 ekaina 2018 11:35

Bestetik, 18/19 ikasturterako Gasteiztxo programaren antolakuntza esleitu du

Estíbaliz Canto zinegotziak gidatzen duen Kultura, Hezkuntza eta Kirol Sailak proposaturik, Tokiko Gobernu Batzarrak 2018ko Azkena Rock jaialdiaren babesa onetsi du.

Hiriko ekitaldi handienetako bat da jaialdia, eta aurten ekainaren 22 eta 23an egingo da. Udalak oso garrantzitsutzat jotzen du ARF jaialdiari sostengu  ematea, kultur ekitaldi horrek hiria estatuan zein nazioartean promozionatzeko bide ematen baitu; horrenbestez, 270.000 euroko babesa (BEZa barne) emango dio.

Gasteiztxo

Horretaz gain, Tokiko Gobernu Batzarrak komunikabideetan hezteko Gasteiztxo hezkuntza-programa antolatzeko asistentzia teknikoari dagokion kontratua  esleitzea onetsi du, aipatutako sailaren proposamenari jarraituz.

Zehazki, Mastaller SLri esleitu zaio, 140.928 euroan, 2018ko urriaren 1etik 2019ko ekainaren 30era arte gauzatzeko.

 

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —   11:31

Tokiko Gobernu Batzarrak Kirol Zerbitzuak —Estíbaliz Canto da arduraduna— proposatutako hiru hitzarmen onetsi ditu gaur.

Lehena Motorpress Ibérica SArekiko hitzarmena da, Emakumeen Lasterketa (runner 2018 zirkuitua) antolatzeko; igandean egingo da hirian, eta 6.000 emakume inguruk hartuko dute parte.

Bigarrena Bola Jokoaren Arabako Federazioarekin hitzarmena da, 2018an kirol hori sustatzeko eta Foru plazako eta Abetxukuko udal bolatokiak dinamizatzeko. Hitzarmenak 5.817,07 euroko zuzkidura du.

Hirugarrena, berriz, Euskal Herriko Unibertsitateko Arabako campusarekiko hitzarmena da, ikasleen jarduera fisiko eta kirol jardueraren prestakuntza, irakaskuntza eta garapenerako.

Izan ere, haien ustez unibertsitateko kirol eskaintzaren helburu bakarra ez da kirola praktikatzea, baizik eta prestakuntza osatzea, unibertsitateko ikasleen bizitza-kalitatea eta taldearen kohesioa handitzen laguntzen baitu.

Hitzarmenak bi xede ditu: batetik, Arabako campuseko ikasleen jarduera fisikoaren eta kirol jardueraren prestakuntza, irakaskuntza eta garapena; bestetik, jarduera fisikoa Gasteizko gazteen artean sustatu eta zabaltzea.

Horretarako, behar dituen instalazioak lehentasunez utziko dizkio Udalak unibertsitateari, ahal duen neurrian eta zentzuzko erabilera politika baten barruan; graduatugaiei ikasketetako praktikak edo praktika osagarriak egitea erraztuko zaie, eta unibertsitario pasea duten pertsonei kirol-instalazio orotan sartzen utziko zaie.

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  7 ekaina 2018 12:24

Gaur zenbait artista eta konpainiak prentsaurrekoa eman dute Montehermoso kulturunean, abiapuntu gisa

 

Egitaraua

Bihar, ekainak 8, hasiko da KALDEaRTEren XIII. edizioa. Gasteizko kaleko arteen nazioarteko erakustaldian 38 konpainiak formatu handi, ertain eta txikiko ikuskizunak eskainiko dizkiete hiriko ikusleei, 70 emanalditan (2017an baino zazpi emanaldi gehiago izango dira aurten).

Abiapuntu gisa, zenbait artista eta konpainiak prentsaurrekoa eman dute gaur, Montehermoso kulturunean. Zehazki, hauek hartu dute parte: Estíbaliz Canto, Kultura, Hezkuntza eta Kirol zinegotzia; Irantzu Lekue, “Txoriak” ikuskizunaren sortzailea; Arantzazu Sunsunaga, José Uruñuela Udal Dantza Kontserbatorioko dantza irakaslea, zeinak Sol Picórekin batera “Halab” landu baitu, eta Aurelien Prost, Mariona Moya eta Jordi Montmany, Cirque Rouages konpainiako zuzendari artistikoa eta aktoreak, hurrenez hurren; azken horiek inauguratuko dute jaialdia, “Sodade” lanarekin.

Sei ikuskizun kalean estreinatuko dira (Espainian lehen aldiz), hiru erabateko estreinaldiak izango dira eta zenbait KALDEaRTEren laguntzarekin ekoitzi dira. Konpainien jatorriari dagokionez, Gasteizko 9 konpainiak, Euskal Herriko 10ek, Espainiako 10ek eta atzerriko 9k hartuko dute parte. Horien artean, jaialdi ospetsuenetako azken edizioetan saritutako lanak ikusi ahalko dira.

Cantok adierazi duenez, “aurten hazi egin da erakustaldia, handitu egin baita larunbat goizeko emanaldien programazioa, eta espazio berriak sartu baitira –Arkupeak, eta Juan Aiala plaza, esaterako–, hori guztia berezko ezaugarriei eutsiz: ezagutzeko moduko programazio-egitura, Europa osoan arrakasta lortzen ari diren atzerriko produkzioen oreka, bertako kaleko sorkuntzari laguntzea,  gehien bat emakumez edo emakumez bakarrik osatutako konpainiak, euskarazko emanaldien presentzia…. filosofia horrek guztiak nazio mailako kale arteen hamar jaialdien artean jartzen gaitu, eta ez da kasualitate hutsa”.

Bestalde, ekainaren 2tik KALDEaRTEren standa jarri da Urrezko Zeledonen plazan, postetxearen aurrean; ikuskizunei buruzko liburuxka eta leku mugatuko ikuskizunetarako gonbidapenak eskuratu ahal dira bertan. Doctor Sax eta Irune Goñi ikusteko eta Hermanos Picohueso taldearen bi emanaldietarako gonbit-txartelak agortuta daude dagoeneko.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  4 ekaina 2018 11:39

 

 

 

 

 

 

 

Igandean, ekainak 10, Gasteizko Emakumeen Lasterketa hamaikagarren edizioa egingo da. Urtero bezala, 6.000 emakume inguruk hartuko dute parte, berdintasuna eskatzeko eta bularreko minbiziaren eta genero-indarkeriaren kontra borrokatzeko.

Hauek aurkeztu dute gaur prentsaurrekoan: Estibaliz Canto, Kultura, Hezkuntza eta Kirol zinegotzia; Joseba Pérez de Heredia, Euskara, Kultura eta Kirol foru zuzendaria; Elena Sagaseta, Clara Campoamor elkarteko kide eta edizio honetako amabitxia; Marisa Pérez, Asamma Vitoria elkarteko ordezkaria; Patxi Ormazabal, Arabako AECCko lehendakaria, eta Martín Fiz, atleta wta Emakumeen Lasterketako lehendakaria.

Ekainaren 11ko 10:00etan irtengo da lasterketa Mendizorrotzetik, eta bost kilometro egin ondoren leku berean bukatuko da. Ostiralean, goizeko 11:00etatik aurrera, Emakumearen Feria irekiko da Iradier Arenan.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  24 maiatza 2018 09:20

Zinema Gaur Udaberria 2018

Montehermosoko ohikoaz bestelako zinema zikloa sendotu egin da, eta uztailaren 9ra arte 9 film eta bi lantegi eskainiko dira

Montehermoso kulturuneko ohikoaz bestelako zinema zikloak, Zinema Gaur zikloak, maiatzaren 28an ekingo dio udaberriko programari, eta uztailaren 9ra arte 9 film eta bi lantegi eskainiko ditu.

Kultura, Hezkuntza eta Kirol zinegotzi Estíbaliz Cantok eta zikloaren koordinatzaile Garbiñe Ortega aurkeztu dute prentsaren aurrean.

Zinema Gaur aukera paregabea da hala ohikoa ez den zinema gustuko dutenentzat nola zinema oro har gustuko dutelarik hori ezagutzeko jakin-mina dutenentzat. Bi edizio besterik egin ez bada ere, zikloa sendotuta dago zinemarekiko grina partekatzeko espazio gisa”.

Aurten ere zikloa bi zatitan banatuko da, udaberrikoa eta udazkenekoa, eta hiru ardatz izaten jarraituko du: batetik, Ortegak aukeratutako filmen proiekzioa; bestetik, zikloak eta lantegiak; azkenik, ekitaldi bereziak.

“Aurten, berrikuntza gisa, hainbat belaunalditako tokiko artisten programazioa sortu da, nazioarteko zirkuituan zer esana ematen ari direlarik horren berri ematera eta ikusleekin hitz egitera etorriko baitira.

Film hauek eskainiko dira:

  • Maiatzak 28, 19:30 La idea de un lago. Milagros Mumenthaler. 2016. Argentina. 82 min.
  • Ekainak 4, 19:30. Donkeyote. Chico Pereira. Espainia. 2017. 86 min.
  • Ekainak 12, 19:30 Euskal zinema berria* (hiru proiekzio, zinemagileak bertan direla)
    • Plágan. Koldo Almandoz. 2017. 10 min.
    • Cicha Symfonia (Sinfonia isila). Aitor Gametxo. 2017. 25 min.
    • Irati Gorostidi, Arantza Santesteban. 2017. 21 min.
  • Ekainak 18, 19:30. Beyond the one. Anna Marziano. Alemania. 2017. 70 min.
  • Ekainak 25, 19:30. Paisaia eta desioa: Laida Lertxundiren zinema
    • 025 Sunset Red
    • Vivir para Vivir
  • Uztailak 2. Baronesa. Juliana Altunes. Brasil 2017. 70 min.
  • Uztailak 9. Soldado. Manuel Abramovich. 2017. Argentina. 72 min.

Horretaz gain, bi lantegi izango dira:

  • Argazkitik animaziora eta vj-ing-era. Irakaslea: Itziar Garaluce, ikusizko artista; ekainaren 16an (larunbata), 10:00-14:00 / ekainaren 17an (igandea), 10:00-14:00. 15 pertsona gehienez.
  • Mashup table: zinema edizio kolektiboa (haurrak eta helduak) Irakaslea: Drac Magic; 2 ordu haurrentzat // 4 ordu helduentzat.

Lantegietan izena emateko epea bihar zabalduko da; 945 161830 telefonora deituz edo info.montehermoso@vitoria-gasteiz.org helbidera idatziz egin daiteke.

Ziur gaude zikloak berriro ere arrakasta lortuko duela. Iazko asistentzia datuek (600 pertsona inguru) hori pentsarazten digute. Gainera, Montehermoson ikus-entzunezkoen aldeko apustua egiten ari gara, ziklo honetaz gain, Distopiak zikloa eskaini baitugu, eta alor horretako proiektu artistikoentzako diru-laguntza sendotzen ari baita”, amaitu du Cantok.

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  17 maiatza 2018 13:04

 

 

 

 

 

 

 

 

 

11ko futboleko, 7ko futboleko eta errugbiko entrenamenduak eta partida ofizialak egin ahalko dira

Hainbat hilabete iraun duten lanen ondoren, Lakua 03ko kirol instalazioetan belar artifizialeko zelaietako bat berreskuratu da, klubek eta herritarrek oro har erabil dezaten; izan ere, urteak zeramatzan itxita, egoera txarrean zegoelako.

Kiroleko zinegotzi Estíbaliz Canto eta Udal Administrazioko zinegotzi Carlos Zapatero izan dira gaur zelaia ikusten, zeina udal zelaien artean harearen ordez belar artifiziala zuten lehenetakoa izan baitzen, duela 19 urte. Obrari esker, eskaera handia duen kirolgune bat berritu eta modernizatu da, eta aurrerantzean 11ko eta 7ko futbolean eta errugbian aritu ahalko da bertan.

650.000 euro baino zertxobait gehiago inbertitu da lan hauek egiteko: belar artifiziala jartzea, saneamendu berriak, ureztapen-sistema eta kirol-ekipamendua (ateak, eserlekuak, eta abar).

Kirol denboraldia bukatzearekin bat burutu dira lanak, beraz, instalazioa berriro irekitzen denean orain arte ondoko zelaian entrenatzen eta jokatzen zuten futbol-taldeak izango dira lehen erabiltzaileak, han espazioa partekatu behar izan baitute. Zelai berriak instalazio hori arintzeko balioko du, eta errugbi taldeei ere aukera emango zaie azalera berri batean jokatzeko.

Kirol instalazioak luzaroegi egon dira geldi —adierazi du Cantok— eta horren ondorioz mantentzeko lana handiagoa izan da garaiz eta behar bezala egin izan balitz baino”. Kirol arduradunaren esanetan, gai horrek “hasieratik kezkatu gaitu bi sailetan, eta horretan jardun dugula erakusten du lan honek; gure instalazioak berritzea gure lehentasunetako bat da, are gehiago kirolaren hiria izan nahi dugunean. Hori dela eta, —amaitu du— gainerako instalazioetan ere urratsak egiten jarraitzeko asmoa dugu”.

Lakua 03ko futbol zelaiak 105×65 metro ditu. Sorreran hondarrezkoa zen eta 1999an pasa zen belar artifizialekoa izatera. 2016an hondatzen hasi zen, eta kirola egiteko egoki izateari utzi zion. Iaz egindako azterlan teknikoek jolas-eremua erabat berritu beharra ikusi zuten, eta orain amaitu dira lan horiek.

Kirol instalazioak hobetzea lehentasunetako bat da udal gobernuarentzat. Aurretik, Ariznabarreko futbol-zelaiko aldagelak eraberritu zituen, eta datozen hilabeteetan Aranbizkarreko futbol-zelaiko aldagelak eraikitzeko asmoa du.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —   10:59

 

 

 

 

 

 

AFRICA EGUNA programa

Afrikaren Eguna dela eta, zenbait jarduera antolatu dira maiatzaren 19tik 26ra bitartean

Gasteizko Udalak Kultura, Hezkuntza eta Kirol Sailaren bitartez emandako laguntzarekin, Afrika Euskadi kultur elkarteak hainbat jarduera antolatu ditu Afrikaren Eguna ospatzeko, ‘Afrikarrak Euskadin’ jaialdi soziokulturalaren lehen edizioan: futbol-partidak, dantza senegaldar eta nigeriarren lantegiak, antzerkia, hitzaldiak, “pintxopotea” eta desfileak. Maiatzaren 19an (larunbata) hasi eta 26an amaituko dira.

Kultura, Hezkuntza eta Kirol zinegotzi Estíbaliz Cantok, Afrika Euskadi kultur elkarteko kide Jesús Prietok, Sahara-Gasteiz saharar immigranteen kultur elkarteko kide Baba Ahmed Hamadik eta Afro herritar afroamerikarren elkarteko kide Filomena Abrantesek aurkeztu dute egitaraua prentsaren aurrean.

Jarduera asteak Afrikaren aniztasuna ospatu nahi du, dagoeneko Gasteizko kulturaren zatia baita, eta hori aldarrikatu nahi dugu, hiri irekia, heterogeneoa eta kosmopolita garelako, kultura ezberdinak izateaz harro dagoena, denen arteko elkarbizitzaren bidez kultura komuna osatuz“, nabarmendu du Cantok.

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —   07:26

 

 

 

 

 

 

UCI Women’s World Tour egutegian lehenengoz sartu dute proba, zeinean 140 txirrindularik hartuko baitute parte, besteak beste, erlojuaren kontrako munduko txapelduna, UCI sailkapeneko lehena, eta erlojuaren kontrako Espainiako txapelduna, Lourdes Oiarbide arabarra

Gaur aurkeztu da Montehermoso kulturunean  XXXI. Emakumeen Bira; maiatzaren 19an (larunbata) hasi eta 22an amaituko da, eta bigarren etapa erlojuaren kontrako bat izango  da, Aguraindik Gasteizeraino. Kultura, Hezkuntza eta Kirol zinegotzi Estíbaliz Cantok, Arabako Foru Aldundiko Euskara, Kultura eta Kirol zuzendari Joseba Pérez de Herediak eta lasterketaren antolatzaile Agustín Ruiz Larringanek aurkeztu dute.

Orotara 24 talde izango dira (UCI sailkapeneko 15 talde onenen arteko 13); bakoitzak sei kide duenez, 140 txirrindulari baino gehiago lehiatuko dira Euskadi  eta Gasteizko errepideetan barrena.

Hauek izango dira faboritoak:  erlojuaren kontrako munduko txapelduna, Annemiek van Vleuten; UCI sailkapeneko lehena, Anna van der Breggen; iazko irabazlea, Ashleigh Moolman-Pasio, eta aurtengo hainbat probaren irabazlea, Elisa Longo Borghini italiarra. Erlojuaren kontrako Espainiako txapeldun Lourdes Oiarbide arabarrak etxean jokatuko du.

Cantok aldarrikatu duenez, Gasteiz “kirolaren hiria da, emakumeen kirolaren aldeko apustu gogotsu eta irmoa egin duena”; antolatzaileei eskerrak eman dizkie hirian etapa bat bukatzeagatik, eta herritarrei eskatu die “igandean kalera atera daitezen, txirrindulariei animatzera”.

 

  • 1. etapa: Legazpi-Legazpi.
  • 2. etapa: Agurain-Gasteiz / Erlojuaren kontrakoa. Irteera: maiatzaren 20ko (igandea) 16:00etan. Azkena 18:45ean aterako da, eta ondoren sariak banatuko dira.
  • 3. etapa: Aretxabaleta-Aretxabaleta.
  • 4. etapa: Iuerreta-Iurreta.

Informazio gehiago: http://www.birawwt.eus/

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  15 maiatza 2018 14:32

2018/2019 ikasturterako matrikula ostegunean, hilak 17, hasiko da;  Hasierako 144 leku eskainiko ditu Zabalgana eta Salburuko gizarte etxeetan, “gela hedatuak” izeneko formatuan, auzo guztietara zabaltzeko xedez

Maiatzaren 17an (osteguna) hasiko da Luis Aranburu musika eskolan 2018/2019 ikasturterako izena emateko epea. Aurten inoizko kopuru handienera iritsiko da, 1.300 ikasle, azken bi urteetan pixkanaka lanaldiak luzatu egin baitira; gainera, “gela hedatuak” deritzenak sortuko dira, eskola auzoetara gerturatzeko.  Halaxe iragarri du eskolako lehendakari Estíbaliz Canto zinegotziak, Zuzendaritza Kontseiluan.

Berritasun handiena Zabalgana eta Salburuko gizarte etxeetan eskainiko  diren Musika Hasiera ikasgaiko 144 lekuak dira, alegia, “gela hedatuak” deritzenak, “Luis Aranburu eskola auzo guztietako gerturatzeko“.

Cantok azaldu duenez, “musika eskolak eskaera handia du espezialitate horretan, urtero 300-350 pertsonak sartu nahi izaten baitute Musika Hasieran”. Hori dela eta, 1., 2. eta 3. mailetako bi talde sortuko dira (4, 5 eta 6 urtekoentzat, hurrenez hurren).

Eskaera handi horri erantzun ahal izateko, Zuzendaritza Kontseiluaren lehendakaritzak gizarte etxeen sarea erabiltzea pentsatu du. “144 leku horiei beste 80 gehitu behar zaizkie, hurrengo ikasturtean lanaldiak luzatu egin baitira zenbat instrumentu espezialitatetan, hala nola kontrabaxua, perkusioa, kantua, biolina, biolontxeloa, biola, fagota eta oboea; horrenbestez, 224 leku gehiago izango dira guztira eta, aurretik gehitutako lekuak kontuan hartuz gero, 302 leku gehiago sortu dira hiru ikasturtetan”, zehaztu du Cantok.

Jardunaldiak pixkanaka luzatzeko plana onartu zenetik, 302 pertsona gehiagok eskuratu ahal izango dute musika irakaskuntza; beraz, 2018/2019 ikasturtean 1.300 ikasle izatera iritsiko da musika eskola, inoizko kopuru handiena.

Lanaldiak luzatzea

Ildo horretatik, hiru urtetan % 319,56 hazi dira ikasgaiak musika eskolan, baita langileen lanaldiak ere; 147.480,27 € bideratu da horretara.

 Izan ere, azken bi ikasturteetan eskolako irakasleen lanaldiak progresiboki luzatzeko plan bat aplikatu da. Plana abian jarri zenetik, orotara % 181,29 luzatu da lanaldia eta, ondorioz, 77.342,08 euro handitu da lehen kapitulua.

2018/2019 ikasturtean % 175 gehiago haziko da, hots, 74.687,60 euro gehiago beharko da.

Zehazki,  ikasgaiak proportzio hauetan handitzea proposatu da:

  • Oboea: % 16,3.
  • Fagota: % 11,95.
  • Tronpa: % 17,6.
  • Biola: % 16.
  • % 25.
  • Biolontxeloa: % 25.
  • Kantua: % 25.
  • Perkusioa: % 22,61.
  • Baxua/kontrabaxua: % 9,39.

Musika Eskola 2018-19

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   13:48

 

Musika komunitarioko ekintza horrek emango dio amaiera Música, Arte y Proceso institutuarekin urtebetez egindako lanari

 

 

Hilaren 20an, 18:00etan, Udal Musika Bandak “Creando y recreando Peter Pan” lana eskainiko du Principal antzokian, “Familientzako musika” zikloaren barruan.  Autismo Araba elkarteko kideek eta Música, Arte y Proceso institutuko musikoterapeutek landu dute.

Kultura, Hezkuntza eta Kirol zinegotzi Estibaliz Cantok, Musika Bandaren zuzendariorde Iker Olazabalek, Música, Arte y Proceso (MAP) institutuko musikoterapeuta Jaione Oribek eta Autismo Araba elkarteko lehendakari Marta Martín Freirek aurkeztu dute gaur, prentsaurrekoan.

Autismo espektroa duten 11 pertsonak gidatuko dituzte ikusleak Sekula Betiko Lurralderako bidaian,  Iker Olazabal zuzendariaren, Bandaren eta Puri Santamaría kontalariaren laguntzarekin.

Hainbat hilabete eman dituzte gizarte-inklusioko proiektua prestatzen, “pertsonak batzea eta bizikidetza erraztuz gizarte hesiak ezabatzea” helburu zutelarik, Cantok azaldu duenez.

Share

Aurrekoak »