Prentsa Oharren banner

José Uruñuela Dantza Kontserbatorioak abuztuaren 24an irekiko du berriro aurretiaz izena emateko epea

Irailaren 2tik 4ra bitartean egingo dira ikasketa oinarrizko eta profesionaletan sartzeko probak

José Uruñuela Dantza Kontserbatorioak ikasle berriek 2020-21 ikasturterako aurretiaz izena emateko epea irekiko du datorren abuztuaren 24an. Oraindik eman gabe dauden zentroko lekuak eskuratu nahi dituzten haurrek abuztuaren 28ra arte izango dute tartea, ikasketa arautuen kasuan, eta irailaren 3ra arte ikasketa ez arautuenean.

8 eta 13 urte bitarteko ikasleak oinarrizko Ikasketetan hasiko dira, eta 12 urtetik gorakoak Ikasketa profesionaletan sartu ahalko dira. Ikasle gazteenei dagokienez, hauek dira matrikulatzeko gutxieneko adinak: ‘Lehen harremana 5’ egin ahalko dute 2015ean jaiotako ikasleek, eta ‘Lehen harremana 6’ 2014an jaiotakoek. 2013an jaiotakoek ‘Dantza aurrekoa’ egin dezakete.

Irailaren 2tik 4ra bitartean egingo dira ikasketa oinarrizko eta profesionaletan sartzeko probak. Salbuespenez, eta pandemiaren eraginez, 2020-21 ikasturterako ez da sarrera-probarik egingo Lehen Harremanak eta Dantza Aurrekoa irakaskuntza ez arautuetarako, eta lekuak izen ematearen hurrenkeran esleituko dira.

Matrikula izapidetzeko epea irailaren 3an amaituko da ikasketa ez arautuen kasuan, eta irailaren 7an ikasketa arautuenean. 

 

José Uruñuela Dantza Kontserbatorioaz

Jose Uruñuela udal dantza kontserbatorioa era horretako ikasketak eskaintzen dituen bakarra da Euskal Autonomia Erkidegoan. Ikasgai hauek eskaintzen ditu zentroak: ‘Dantza Klasikoa’, ‘Dantza Tradizionala’ (Euskal dantza), ‘Errepertorioa’, ‘Puntak’, ‘Dantza garaikidea’, ‘Izaerako dantza’, ‘Binako dantza’, ‘Dantzaren Historia’, ‘Anatomia eta elikadura’, ‘Interpretazioa’ eta ‘Musika’.

Zentroak instalazio modernoak ditu, bai eta profesional kualifikatuen lantalde bat, zeinen bitartez gauzatzen dituen zentroak bere hezkuntza-proiektua. Eskaintzen dituen baliabideen artean piano-jotzaileen akonpainamendua eta fisioterapia-zerbitzua daude.

Hezkuntza eta Kulturako zinegotzi Estibaliz Cantok esan duenez, “Kontserbatorioaren helburuak dira dantzaren promozioaren eta hedapenean laguntzea, diziplina hau herritarrengana hurbilduta, bertan sortutako pieza koreografikoak zein errepertorio klasikokoak jendaurrean aurkeztuta, eta beste erakunde hezigarri eta sozial batzuekin lankidetza-proiektuak ezarrita”.

Informazio gehiago: telefonoz, 945 16 26 06 zenbakian; posta elektronikoz, cmdanza.administracion@vitoria-gasteiz.org helbidean, edo Udalaren webgunean (https://sedeelectronica.vitoria-gasteiz.org/j30-01s/contenidoAction.do?idioma=eu&uid=trami_133)

Share

Udalaren aste honetako kultur programazioa, aire zabalean: zirkua, dantza, Lobo&Carmine eta ‘Chicos buenos’, Olarizun

  • Gaurtik erreserba daitezke gonbidapenak, online edo telefonoz

 

Abuztuaren 18tik 21era bitartean, hainbat emanaldi izango dira, aire zabalean, Gasteizko auzoetan: dantza, zirkua, zinema eta musika. Udaleko Kultura Zerbitzuak bultzatutako kultur programazioa da. Gaurtik erreserbatu ahal izango dira gonbidapenak.

Kultur sektoreari entzutetik sortua da kultur programazio hori. Zehazki, ekainaren 16an egin zen Kultura Elkargunearen bitartez jaso ziren proposamenen ondorio. “Gure helburu nagusia tokian tokiko kultura babestea izan da, zuzeneko ikuskizunaren ilusioa berreskuratzea, betiere Covid-19aren prebentziorako arau zorrotzak betez. Horretarako, Kultura Zerbitzutik, tokiko konpainia eta taldeetan soilik oinarritutako programazioa antolatu dugu, bai Gasteizkoak bai Arabakoak”, adierazi du Hezkuntza eta Kultura zinegotzi Estibaliz Cantok.

 

Programazioa

Hiriko kultur aste honi ekiteko, asteartean eta asteazkenean, abuztuak 18 eta 19, bi zirku-emanaldi izango dira. ‘Bapatean zirko’ taldeak “Adabaki” ikuskizuna eskainiko du asteartean, 20:00etan, Hegoalde gizarte-etxearen kanpoaldean. Asteazkenean, hilak 19, Sarini Zirko arituko da, “Txoriak txori” ikuskizunarekin, Salburuko Gabriela Mistral kirol gunean.

Ostegunean, abuztuak 20, osatuko da aste honetako programazioa, Doos Colectivo-ren dantza-ikuskizun batekin. ‘Gorpuztu’ + ‘El fin de las cosas’ izenburuarekin, 20:00etan eskainiko dute, Aranbizkarreko parkean, futbol-zelaiaren ondoan.

Musika-programazioari dagokionez, abuztuaren 21ean, 20:30ean, Lobo&Carmine taldeak joko du, Zabalganeko gizarte-etxearen kanpoaldean. Eta 16 urtetik gorako zinemazaleentzat, hurrengo egunean, abuztuak 22, ‘Chicos buenos’ filma proiektatuko da Olarizuko parkean, 21:30ean.

Kultur ikuskizun horietako edozeinetara joateko, online egin ahal izango da eskaera, edukiera bete arte, http://www.vitoria-gasteiz.org/kultura estekan, edo telefonoz —945 161618—, 09:00etatik 15:00etara bitartean. Erreserba bakoitzeko gehienez bi leku eskatu ahal izango dira.

 

Covid-19aren prebentziorako araudi zorrotza

Ikuskizuna hasi baino ordu erdi lehenago irekiko dira emanaldirako sarbideak. Era berean, sartzeko eta ateratzeko ibilbideak adieraziko dira, pertsonen arteko gurutzaketak saihesteko, eta zein eserleku dagokion adieraziko diote antolatzaileek ikusle bakoitzari, iritsi ahala.

Ikuskizun osoan eserlekuetan egon beharko da. Antzezpena egiten den bitartean esparrutik irten behar izanez gero, ezin izango da berriro bertara sartu. Haurrak ezingo dira zutik egon, ezta esparruan mugitu ere, eta familia edo tutoreak arduratuko dira adingabeei segurtasun-arau guztiak betearazteaz. Era berean, debekatuta dago jatea, edatea eta erretzea, esparru osoan. Arau horiek bete ezean, esparrutik alde egin beharko dute. Hustea mailaka egingo da, antolakuntzaren argibideei jarraituz.

Share

‘#PHEdesdemibalcón’ erakusketa,  ikusgai Gasteizen

 

Herrandarren kaleko kirol instalazioetan izango da erakusketa ikusgai, abuztuaren 31ra arte.

 

dossierra_fotos_desde_mi_balcon

Gasteizko Udalaren Hezkuntza eta Kultura Sailak ‘#PHEdesdemibalcón’ erakusketa ipiniko du ikusgai, uztailaren 28tik abuztuaren 31ra bitartean. Herrandarren kaleko kirol instalazioek hartuko dute erakusketa, zeinaren jatorria Argazkigintza eta Ikus-Arteen Nazioarteko PHotoESPAÑA Jaialdiak COVID-19ak eragindako osasun-larrialdiaren harira antolatutako ekimen bat baita.

Ekimenaren bidez, herritarrei eskatzen zitzaien argazkiak egitea beren leiho eta balkoietatik, une hartan esangura berezi batez jantzi ziren elementu haietatik, zein, bestalde, garrantzi handiko erreferenteak izan baitira Artearen Historian. “Ekimen hau gasteiztarrei zuzenduriko omenaldia da, hala eskertzeko osasun-larrialdiko egunik zailenetan, konfinamenduko haietan, agertu duten konpromisoa eta egindako ahalegina”, esan du Hezkuntza eta Kultura zinegotzi Estíbaliz Cantok.

Ekimena estatu osoan deitu zen, eta hiri ugari atxiki ziren, besteak beste Madril, Bartzelona, Valentzia, Santander, A Coruña, Sevilla, Iruñea, Zaragoza, Santa Cruz Tenerifekoa eta Granada.

Maiatzaren 17ra arte jende asko mugitu zen sare sozialetan ,hiri horietan balkoien inguruan hartutako argazki onenak erakusteko. Edonork har zezakeen parte, argazkilari profesional zein zale, baita gainerako jendeak ere. Ilusio kolektiboaren aldeko deia izan zen, gai librean. Ekimena ixtean, 63.000 irudi ipini zituzten antolatzaileek Instagramen. PHotoESPAÑAk kalean ikusi ahalko diren 2.450 argazkiak hautatu ditu.

“Herrandarren kaleko kirol instalazioak izango dira erakusketaren agertoki, erakusketa-gune ez ohikoa, aire zabalean, Gasteizko udako kultur programaziora gehituko dena”, esan du Cantok. “PHotoESPAÑAko epaimahaiak Arabako hiriburuan egindako 50 argazki onenak hautatu ditu, sormena eta esplorazio artistikoa bor-bor, gasteiztarren eskutik datorkiguna, eta eskertu egin nahi duguna. Izan ere, arteak beti aurkitzen du bidea, baita unerik tristeenetan ere”, gehitu du.

Zinegotziak animatu egin nahi ditu gasteiztarrak partaideen lanak ikustera, “pandemiak derrigorrez etxean egotera behartuta zirelarik, denboraren zati bat balkoietan zuten edertasuna islatzeko tartea hartu zuten”.

Hiriz hiri egingo diren erakusketak emango diote hasiera 2020ko PHotoESPAÑAri, La Fábricak antolatuta udan zehar (irailaren amaiera arte) garatuko den ekitaldiari.

Informazio gehiago

 

Share

Gasteizek udako kultur programazioa aurkeztu du

Herritarrek 48 emanaldiz gozatu ahalko dute: kale antzerkia, dantza, kontzertuak, magia, antzerkia, bertso saioak, bakarrizketak, zirkua, aire zabaleko zinema eta pintura lehiaketa.

Kartela

Gasteizko Udalak 2020ko udako kultur programazioa aurkeztu du, zeina uztailaren 14tik irailaren 4ra bitartean garatuko baita. “Normaltasun berriaren” barruan Gasteizko kultura suspertzeko asmoz sortu da ekimena.

“Gure helburu nagusia tokiko kultura babestea da, berriro kalera ateratzea eta, azken finean, zuzeneko ikuskizunen ilusioa berreskuratzea. Horretarako, Kultura Zerbitzutik, tokiko konpainia eta taldeetan soilik oinarritutako programazioa antolatu dugu, bai Gasteizkoak bai Arabakoak“, adierazi du Hezkuntza eta Kultura zinegotzi Estibaliz Cantok. “Joan den ekainaren 16an egindako Kultura Elkargunean proposamen interesgarriak jaso genituen, eta horietako asko udan babestu nahi izan ditugu“, gaineratu du.

Tokiko konpainiak eta taldeak izango dira, beraz, uztailaren 14tik irailaren 4ra arte egingo den aire zabaleko kultur programazioaren protagonistak; arratsaldez izango dira ikuskizunak, asteartetik ostiralera. 48 ekitaldik osatuko dute programazioa: kaleko antzerkia, dantza, kontzertuak, magia, antzerkia, bertso saioak, bakarrizketak, zirkoa, aire zabaleko zinema eta pintura lehiaketa.

Ikuskizun guztiak aire zabalean egingo dira, esparru hesituetan eta edukiera mugatuarekin. Jarduerak hiriko hainbat lekutara iritsiko dira, hala nola Arriagako parkea, Aranbizkarreko parkea, Zulueta jauregiko lorategiak, Hegoalde gizarte etxearen eta Zabalganeko gizarte etxearen kanpoaldea, elurtegia, Salburuko Gabriela Mistral kirol-gunea eta apaizgaitegia.

Uda honetan, aire zabaleko zine emanaldiak izango dira Gasteizko hainbat lekutan. Uztailaren 31n (ostirala) abiatuko da programa, ‘Detective pikatxu’ filmarekin, Santa Maria Katedraleko plazan, eta abuztuaren 29an (larunbata), amaituko da, ‘Padre no hay más que uno’ filmaren emanaldiarekin, espazio berean.  ‘La pequeña Suiza’, ‘Aladdín’, ‘Vitoria, 3 de marzo’, ‘Chicos buenos’ eta ‘Los Goonies’ lanek osatzen dute zikloa. Play Gasteiz-ekin elkarlanean antolatu da.

Uztailaren 18an, berriz, Aire Zabaleko Pintura Lehiaketaren XIV. edizioa egingo da. Parte hartu nahi dutenek uztailaren 6tik 16ra bitartean (biak barne) egin ahalko dute eskabidea, udalaren web orriaren bidez eta 010 telefonoaren bidez (945 161100 Gasteiztik kanpo izanez gero), eta lehiaketaren egunean bertan; gehienez 55 pertsonak hartu ahalko dute parte.

Aurtengo gaia ‘Hirigintza XXI. mendean: Salburua auzoa’ izango da, azken urteetan hiriaren ekialderantz izan den hedapen urbanistikoa erakusteko xedez. Larunbat goiz osoan zehar, gasteiztarrek lehiaketan parte hartzen duten artistak lanean ikusi ahalko dituzte Salburuan.

Amaitutako lanak 17:00ak baino lehen entregatu beharko dira, eta 19:30ak arte egongo dira ikusgai gizarte etxearen kanpoaldean. Orduan jakinaraziko da epaimahaiaren epaia.

Lehen sariak 1.600 euroko zuzkidura du, eta bigarrenak, 1.400 euro. Horietaz gain, lehenengo ‘Gasteiz’ sariari 1.200 euro egokituko zaizkio eta bigarrenari, 1.000 euro. Azken bi sari horiek ohiko bizilekua Araban duten eta aurreko bi sarietako bat ere jaso ez duten artisten artean aukeratuko dira.

 

Datozen egunetan itxiko dugu udako kultur programazioa, eta horren barruan sartu diren azken proposamenen berri emango dizuegu, oraindik tokiko eragileekin zehazten ari baikara“, iragarri du Cantok.

 

Oro har, kultur genero desberdinetako proposamenek osatuko dute programazioa:

  • Arte eszenikoak: Zanguango, El Mono Habitado, Pez Limbo, Zurrunka, Kolectivo Monstrenko, Gag Street Boys, Panta Rhei…
  • Zirkua: Sarini Zirko, Hutsun + Ortzi, Bapatean…
  • Dantza: Larrua, Doos Colectivo…
  • Magia: Sun Magoa, D’Albeniz Magoa, Asier Kidam…
  • Bakarrizketak: Gorka Aginagalde, Belén Nevado, Kike Loiola, Jose Cruz Gurrutxaga, Josune Vélez de Mendizabal + Ane Gebara…
  • 2 bertso-saio, Arabako Bertsozale Elkartearen eskutik.
  • Musika: Mice, Izaki Gardenak, Moni Garage, Shiny Red Mood, Aldakan Beltz, Raul Romo, Moonshine Wagon, Los Misterios, Turukutupá…

 

 

Bandaren itzulera

Gainera, Uraren Lorategi Sekretuak Gasteizko Udal Musika Bandaren zazpi kontzertu hartuko ditu uztailaren 10etik 24ra eta irailaren 4tik 25era. Gasteizko publikoarekiko berrelkartzean, Udal Bandak, Luis Orduña eta Iker Olazabalen zuzendaritzapean, ‘Música de km.0’, ‘Héroes y villanos’, ‘Música Latina’, ‘Personajes históricos’ eta ‘una aventura espacial’ deitutako emanaldiak eskainiko ditu.

Aurreko astean Principal antzokiak, Oihaneder Euskararen Etxeak eta Montehermoso kulturuneak aurkeztutako programazioak gehitu behar zaizkio aipatutakoari.

 

Kultura segurua

Sailak protokolo bat ezarri du programatutako ikuskizun guztietara modu seguruan joateko, osasun-segurtasuna bermatzeko eta indarrean dagoen araudia betez:

 

  • Ikuskizun guztiak aire zabalean egingo dira, esparru hesituetan, edukiera mugatuarekin eta sarrera-kontrolarekin, lekua erreserbatu beharko baita.
  • Ezingo da zutik egon, eta, horretarako, aulkiak jarriko dira, metro eta erdiko tartea utzita. Aulkiak desinfektatu egingo dira emanaldi bakoitzaren aurretik eta ondoren.
  • Nahikoa denboraz joan beharko da, arazorik gabe sartu eta eseri ahal izateko. Ikuskizuna hasi baino 30 minutu lehenagotik sartu ahalko da.
  • Sartzeko eta irteteko ibilbideak adieraziko dira, pertsonen arteko gurutzaketak saihesteko. Antolatzaileek ikusle bakoitzari zein eserleku dagokion adieraziko diote, iritsiera-ordenaren arabera.
  • 6 urtetik aurrera, maskara erabili behar da esparrura sartzeko eta bertatik irteteko. Eseri ondoren bakarrik egon ahalko da maskararik gabe. Ikusle bakoitzak bere maskara eraman beharko du.
  • Ikuskizun osoan eserlekuetan egon beharko da. Antzezpena egiten den bitartean esparrutik irten behar izanez gero, ezin izango da berriro bertara sartu.
  • Haurrak ezingo dira zutik egon, ezta esparruan mugitu ere.
  • Familia edo tutoreak arduratuko dira adingabeek segurtasun-arau guztiak betetzeaz. Bete ezean, esparrutik alde egin beharko dute.
  • Ezin da esparruaren barruan erre.
  • Ezin da animaliarik sartu.
  • Hustea mailaka egingo da, antolakuntzaren argibideei jarraituz.
  • Lekua erreserbatzeko unean, ezarritako protokoloa irakurri dela eta onartzen dela adierazi beharko da.

 

Lekuak ikuskizunaren egunean bertan erreserbatuko dira, 9:00etatik aurrera, udalaren webgunean edo telefonoz (laster jarriko da). Erreserba ikuskizun bakar baterako eta emanaldi bakar baterako izango da, eta pertsona bakoitzak gehienez bi plaza erreserbatu ahalko ditu. 

 

Kontzertu-aretoak

Bestalde, Gasteizko Udalak kolaborazio garrantzitsuak egingo ditu kontzertu-aretoekin, Dazzekin adostutakoa kasu. Horren bidez, Vital Fundazioa Kulturuneak bost jazz emanaldi hartuko ditu uztailaren 10etik 14ra. Hauek, zehazki: Raynald Colom Trio (10ean), Roman Filiú Trio (11n), The Cuban Jazz Syndicate Feat. Pepe Rivero (12an), Félix Rossy & Toni Saigi (13an) eta Pacheco & Seppere & Regidor (14an). Guztiak 20:00etan hasiko dira.

Horrez gain, Urban Rock Concept aretoak zortzi kontzertu eskainiko ditu, uztailaren 18tik irailaren 15era. Joaquín Sabinari omenezko kontzertuak irekiko du programa, uztailaren 18an, Sabin Joaquina eta Viceversaren eskutik, zeinek Mairuren rockarekin partekatuko baitute gaua. Abuztuaren 1ean Red Iron Squad taldearen txanda izango da eta 29an, Bonustrackena.

Irailean, berriz, rock zaleek bost taldez gozatu ahalko dute: Matt Woods, hilaren 1ean; Amann & The Waywards Sons, 5ean; Demian Band, 10ean; Lobo y Carmine, 11n, eta Rober J. Hunter, 15ean.

Helldoradori dagokionez, areto horrek bi saio egingo ditu kontzertu bakoitzeko, bata eguerdian (bermut saioa), 13: 00etan eta bigarrena 18: 30ean. Irailaren 5etik 20ra arte, MFC Chicken (5ean), Faitheless (12an) eta Victimas Club (20an) izango ditugu.

Areto bakoitzaren ohiko salmenta-kanalera jo beharko da kontzertu horietarako sarrerak erosteko.

 

 

 

 

Share

Montehermoso kulturuneak Susana Viñoloren ‘The sky is inside’ erakusketa aurkeztu du

Otsailaren 28tik martxoaren 29ra arte egongo da ikusgai

 

 

 

 

 

 

Otsailaren 28tik martxoaren 29ra arte  Susana Viñoloren  ‘The sky is inside’ erakusketa ikusi ahalko da Montehermoso kulturuneko Jovellanos aretoan. Udalaren kultur zentroak Euskal Herriko Unibertsitateko Arte Ederren Fakultatearekin batera sustatzen duen deialdian hautatutako proiektuen arteko bigarrena da.

‘Montehermoso+UPV/EHU’ lemaren pean, programak komisario baten laguntzarekin proiektu artistikoak garatzeko aukera eskaintzen die bigarren zikloko, gradu-ondoko eta doktoretzako ikasleei, ondoren Montehermoson bakarka aurkezteko.

2012an abiarazi zen programa honek profesionalizatzeko bidean dauden sortzaileen lanak ikustarazten laguntzen du, lanerako plataforma eskaintzen die mundu profesionalera hurbiltzeko, eta bide batez gizartearekin zuzenean lotzeko“, azpimarratu du Kultura zinegotzi Estíbaliz Cantok erakusketaren aurkezpenean. Harekin batera  Euskal Herriko Unibertsitateko Arte Ederren Fakultateko dekano Arantza Lauzirika, Susana Viñolo artista eta Cristina Arrázola komisarioa izan dira prentsaurrekoan.

Erakusketa

Susana Viñolo artista arte teknologikoan eta arte garaikidearen kontserbazio eta erakusketetan espezializatuta dago. ‘The sky is inside’ erakusketan, aurrerapen teknologikoen eta ezagutzaren paradigma historikoki aldakorren arteko erlazioaz hausnartzen du, astronomiaren alorreko teknologiak ikergaitzat hartuz.

Egileak azpimarratu nahi izan du ezagutza-prozesu horretan zehar lortutako irudiak ez direla ez objektiboak, ez inozoak; aitzitik, egungo teknologien subjektibitatearen eta horiekin lotzen diren botere-harremanen mende daude.

Cristina Arrázola komisarioak babestu du erakusketaren garapena. Otsailaren 28tik martxoaren 29ra arte ikusi ahalko da, Montehermoso kulturuneko Jovellanos aretoan.

Susana Viñola artistak bere proiektuaren ezaugarrien berri emango du inaugurazio-egunean, hilaren 28an. Arratsaldeko zortzietan izango da.

KATALOGOA MH-UPV_2019-20 SUSANA VIÑOLO

 

Share

Teatro Paraíso taldeak nazioartean duen presentzia sendotuko du, bira bat egingo baitu Europa eta Ekialdetik

Besteak beste, Italia, Frantzia eta Belgikara joango dira ‘Pulgarcito’, ‘Kubik’ eta ‘Xocolat’ lanekin.

 

 

 

 

 

Teatro Paraíso konpainia gasteiztarrak nazioarteko birari ekingo dio beste behin: hiru ikuskizun eskainiko ditu, Arabako antzerkia atzerriko agertokietara esportatzeko asmoz. ‘Pulgarcito’, ‘Kubik’ eta ‘Xocolat lanak hautatu dituzte oraingo abentura honetarako.

Kultura eta Hezkuntza zinegotzi Estíbaliz Cantok, Teatro Paraísoko zuzendari Pilar Lópezek eta konpainiako zuzendari artistiko Tomás Fernández eta Rosa A. Garcíak aurkeztu dute proiektua prentsaren aurrean. “2020ko biran eramango ditugun hiru ikuskizunak Gasteizko Antzoki Sarearen laguntzari esker sortu dira, eta Nazioarteko Antzerki Jaialdiaren barruan estreinatu. Izan ere, nire sailetik Teatro Paraísok eskaintzen duen kalitateko antzerkiaren alde egiten dugu”, azpimarratu du Estíbaliz Cantok.

‘Pollicino’, Erpurutxoren italierazko bertsioa, 37 aldiz antzeztu dute, eta atzerriko ikuskizun onenarentzako Eolo saria lortu zuen Milango Segnali jaialdian.

Maletak Italiako esperientziez bete ondoren, konpainiak Frantziara joko du, eta han ia hilabete emango dute ‘Kubik’ lanarekin. Lan horrek ikuskizun onenarentzako Feten saria lortu zuen 2013an eta hainbat herrialdetan eskaini dute Frantziara iritsi aurretik: Mexiko, AEB, Hungaria, Errumania, Italia eta Irlanda. Frantzian 21 emanaldi dituzte programatuta, Loira eta Normandia eskualdeetako herri eta hirietan, hala nola Bouloire, Le Mans eta Préaux-du-Perche.

Maiatzaren 24 eta 25ean, berriz, ‘Xocolat’ antzeztuko dute Belgikako Pépites jaialdiaren barruan. Ondoren Txinara joatea da asmoa, baldin eta herrialde hartan piztutako osasun krisiak ahalbidetzen badu.

 Beste Feten sari bat

Bide batez, Kultura eta Hezkuntza zinegotziak zorionak eman dizkio Gasteizko konpainiari  ‘Úniko, el Príncipe destronado’ ikuskizunarekin interpretazio onenarentzako 2020ko Feten saria lortu duelako;  Iñaki Rikartek zuzendutako lana martxoaren 15ean estreinatuko da Principal antzokian. “Teatro Paraísok azken lau hamarkadetan egindako lana bide onetik doala berresten du sari horrek. Zorionak Paraísori zein Maite Bayón aktoreari”.

 

Share

2020ko Fotoartek dantzari buruzko irudirik onena bilatuko du

 

 

 kartela_fotoarte_2020

 

Otsailaren 24an (astelehena) hasiko da lanak aurkezteko epea, eta martxoaren 27an (asteazkena) amaituko 

Udaleko Kultura Sailak Fotoarte lehiaketaren 16. edizioa aurkeztu du; aurten “Dantza” izango da gai nagusia. Otsailaren 24tik martxoaren 27ra arte aurkeztu ahalko dira lanak.

Kultura zinegotzi Estíbaliz Cantok deialdiaren helburuak azaldu ditu. “Fotoarteren helburua da herritarrak argazkilaritzara hurbilaraztea, alor horretan sorkuntza sustatzea, eta irudi iradokitzaileen bidez jarduera artistikoa modu erakargarrian ikusten laguntzea.”

Cantok ekimenari egindako harrera ona azpimarratu du. “Aurreko edizioan, 474 artistak 844 lan aurkeztu zituzten, eta horrek erakusten du lehiaketa hitzordu sendotua dela argazkigintzaren zaleen agendan.”

Lanak bide elektronikoz aurkeztu beharko dira, www.vitoria-gasteiz.org/fotoarte web-orrian ageri den formularioa baliatuz.

Epaimahaiak 32 argazki aukeratuko ditu, eta horiekin erakusketa ibiltaria egingo da gizarte etxeetan; udalaren webguneko espazio birtual batean ere erakutsiko dira.

Lehenengo saria 1.000 eurokoa izango da; bigarrena, berriz, 400 eurokoa. “Aurten, hirugarren sariaren ordez, tokiko artistarentzako saria sortu dugu, 400 euroko zuzkiduraz, Gasteizen bizi diren edo bertan ikasi edo lan egiten duten pertsonek aurkeztutako argazkirik onenarentzat“, azaldu du Kultura zinegotziak.

Orobat, bi accesit emango dira, bakoitza 150 eurokoa. Maiatzaren 27an banatuko dira sariak, Ibaiondoko gizarte etxean.

Argazkigintzarekin lotutako zenbait jarduera paralelo antolatu dira lehiaketaren osagarri: hitzaldiak, lantegiak, mahai-inguruak, etab.

Fotoarte_2020 oinarriak

Informazio gehiago: www.vitoria-gasteiz.org/fotoarte

Share

Udalaren Antzoki Sareak mugikorren erabilerarekin lotutako kanpaina bat abiatu du

Emanaldietan gailuak guztiz itzaltzeko eskatuko dio publikoari

 

Udalaren Antzoki Sareak bere mendeko ekipamenduetan mugikorrak egoki erabiltzeko kanpaina bat abiatu du. Emanaldi batzuk hasi aurretik, aktore batek gailuak arduraz erabil ditzan gomendatuko dio publikoari. Orobat, eskuorri hezitzaileak banatuko dira, galdera zuzena eginez: “mugikorra alde batera utz dezakezu 90 minutuz?”.

laren Antzoki Sareak deitoragarritzat jotzen ditu instalazioetan gertatu ohi diren egoera ezerosoak. Izan ere, mugikorrek noiznahi jotzen dute ikuskizunetan zehar, aktoreak eteten dituzte, baita antzezpenak geldiarazi ere zenbaitetan. Horretaz gain, etengabe erabiltzen dira mezuak bidaltzeko, sare sozialak kontsultatzeko eta bestetarako.

Sareko arduradunek azpimarratu dute antzokia guztiz ilun dagoelarik pantailen argiak agertokitik zein gainerako lekuetatik ere ikus daitezkeela. Horri telefonoak bibrazio moduan egiten duen soinua gehitu behar zaio, aretoan hori ere entzuten baita, eta bereziki ezatsegina gertatzen.

Kultura eta Gizarte Etxeen zinegotzi Estíbaliz Cantok azaldu duenez, “arazo gero eta zabalagoa da, Espainiako aretoetan ez ezik baita mundu osoan ere, eta zenbait neurri ezartzen ari dira, hala nola frekuentzia-inhibitzaileak, mugikorren zaindegia, etab. Gasteizen, horretaraino iritsi aurretik, publikoa kontzientziatu nahi dugu, egoeraz jabetu eta ikuskizunetan mugikorra guztiz itzal dezan.”

mugikorra kanpaina

 

Share

Principal antzokiaren Ganbera Zikloak 8 musika hitzordu proposatuko ditu otsailaren 13tik urriaren 2ra arte

 

Sarreren salmenta otsailaren 10ean (astelehena) hasiko da

 

 

 

 

PRINCIPALEKO GANBERA ZIKLOA

Udaleko Hezkuntza eta Kultura Sailak Principal antzokiaren Ganbera Zikloaren bederatzigarren edizioa aurkeztu du, Jesús Guridi kontserbatorioarekiko lankidetzan. Otsailaren 13tik urriaren 2ra arte, abonamenduko 7 kontzertu, kontzertu berezi bat  eta jarduera osagarri bat eskainiko dira kontserbatorioan.

Gasteizko Kultura zinegotzi Estíbaliz Canto, zikloaren zuzendari artistiko Carlos Seco, eta Laboral Kutxako ordezkari Kepa Koldo Ortiz de Urbina izan dira zikloa aurkezteko prentsaurrekoan.

Estibaliz Cantok azaldu duenez, “ziklo honen bidez, beste herrialde batzuetan proiekzioa lortu duten euskal eta arabar musikariak ezagutarazi nahi ditugu, espazio paregabe batean —musika kontserbatorioa— ganbera-musikako proposamenak eskainiz“.

Kultura Sailaren asmoa da musika klasikora publiko berriak erakartzea eta etorkizunerako entzuleak bermatzea. “Kontserbatorioko ikasleentzat, berriz, maisu eta musikari horiek ikusteko aukera bat da, eta etengabe ikasten jarraitzeko, kezkak eta topaketak partekatuz”, erantsi du Cantok.

Egitaraua

Aurtengo programa otsailaren 13an hasiko da: Alfonso Gómez piano-jotzaile gasteiztarrak Ludwig van Beethovenen piezak joko ditu. Bigarren emanaldia martxoaren 12an izango da. Egun horretan, María Alejandra Saturno Pérezek (biolontxelo- eta viola da gamba-jotzaile italiar-venezuelarra) eta Izaskun Ihaben Arostegik (piano- eta klabe-jotzailea) Johann Sebastian Bachen lanak joko dituzte.

Martxoaren 16an, berriz,  Adriana González soprano guatemalar gaztea entzun ahalko du publikoak, Iñaki Encina piano-jotzailea lagun duela. Jesús Guridi Bidaola, Isaac Albéniz, Hélène Covatti-Dussaut eta Robert Dussaut-en lanak ekarriko dituzte.

Maiatzaren 14an, ‘Brahmsen trioak’ izenburua duen kontzertuaren txanda izango da. Zenbait bakarlarik  Johannes Brahmsen lanez osatutako programa joko dute: Adrián García Carballo (tronpa), Mikel Ibáñez (biolina), Jon Larraz (biolontxeloa) eta Joana Otxoa de Alaiza (pianoa); lehenengo biak Euskadiko Orkestra Sinfonikoko kideak dira.

Ekainaren 18an, Kugel Ensemble saxofoi laukoteak bisitatuko du kontserbatorioko areto nagusia; Iñigo Setuáin Antoñanzas, Luis Homedes López, Cristina Arcos Cano eta Pedro Caballero García dira laukoteko kideak. J. Haydn, Ivan Fedele, J. Torres eta  G. F. Haas-en lanak joko dituzte, besteak beste.

Oporren ostean, irailaren 17an, Oreka Quartet-ek hartuko du lekukoa: Iñaki Lagos (biolina), Enrique Campos (biolina), Marina Barredo (biola) eta Iván Casado (biolontxeloa). L. V. Beethovenen eta Jesús Guridiren piezak joko dituzte.

Amaitzeko,  Vocalia Taldeak abestuko du urriaren 2an, Basilio Astúlezen zuzendaritzaren pean. 

Berrikuntzak

Aurten bi jarduera berritzaile ekarriko ditu Principal antzokiaren Ganbera Zikloak. Ekainaren 20an, ‘Sagutxu tuntuna, el ratón tontorrón’ antzezlan musikala eskainiko da, 2 eta 6 urte bitarteko haurrentzat eta helduentzat (euskaraz eta gaztelaniaz).

‘Guridi Gazteak’ programaren bidez, bestetik, musika ikasleek kontzertu bakoitzaren hasieran joko dute, atariko gisa.

Otsailaren 10ean (astelehena) hasiko da abonamendu eta sarreren salmenta, kontserbatorioko idazkaritzan eta eventbrite.com web-orrian.

Abonamenduaren prezioa 30 euro da; sarrera solteena, 6 euro. 30 urtetik beherako ikasleentzat eta langabetuentzat doakoa izango da.

Udalak 15.000 euro jarriko ditu ziklorako, Antzoki Sarearen bitartez. Kopuru hori nabarmen handitu da azken urtean, gasteiztarren aldetik harrera ona izan duten ekitaldiak lagundu nahi baititu Kultura Sailak.

2019an, 1.122 pertsonak parte hartu zuten Principal antzokiaren Ganbera Zikloan, hau da, aurreko urtean baino ehuneko 20 gehiagok.

Share

Gasteizen dena prest da hilaren 4an (asteartea) 32 abesbatzak Santa Ageda bezpera kalez kale ospa dezaten

Joan den urtean baino 7 abesbatza gehiagok hartuko dute parte, eta abeslarien kopuruak nabarmen egingo du gora aurten, 1.267tik 1.595era

Bihar, otsailak 4, 32 abesbatza ibiliko dira Gasteizko kaleetan barrena Santa Ageda bezpera ospatzen, 17.00etatik 21:30era bitartean, gutxi gorabehera. Hiriko hainbat talde aterako dira hirian zehar ohiko errondak egitera; santa horren ohorezko kopla zaharrak kantatzen dituzte auzoetan zehar, eta makilak eramaten dituzte koplaren erritmoarekin bat lurra kolpatzeko.

Aurtengo datuak deigarriak dira: izena emateko epea urtarrilaren 16tik 29ra bitartean egon zen zabalik, eta 1.595 kidek eman dute izena, 32 abesbatzatan banatuta. “Gorakada nabarmena izan da, joan den urtean 25 talde eta 1.267 pertsonak hartu zuten parte, egin kontu. Horrek erakusten du herritarrek tradizio hau berreskuratzeko eta zaintzeko nahia dutela”, azpimarratu du Kultura eta Gizarte Etxeen zinegotzi Estíbaliz Cantok.

Abesbatzek Kultura Sailaren sari bat jasoko dute. Hona hemen abesbatzen izenak eta bakoitzaren erronda gunea:

Izena eman duten lekuaAbesbatzaren izenaErronda guneaPertsona-kopurua
Aldabeko g. e.LaukaleAntso Jakituna45
Aldabeko g. e.Haritz hostoaSan Prudentzio / Diputazio kalea / Andre Maria Zuria / Arka50
Aldabeko g. e.PEC IparraldeIparralde12
Aldabeko g. e.Araba AbesbatzaErdialdean38
Ariznabarreko g. e.Armentia ikastolaAriznabarra / Zabalgana110
Pilarreko g. e.Marianistas IkastetxeaAlde Zaharra15
Pilarreko g. e.AusartakPilar / Erdialdea13
Pilarreko g. e.AmetsakAntso Jakituna32
Pilarreko g. e.Berakah TaldeaAlde Zaharra25
Hegoalde g. e.Adurtza Lan ZentroaSan Kristobal / Adurtza12
Hegoalde g. e.IratxoaSan Kristobal / Adurtza25
Hegoalde g. e.JudimendikoakJudimendi / Erdialdea30
Ibaiondoko g e.Ibaiondo SotIbaiondo100
Iparralde g. e.Samaniego 1LHIparralde / Bilbo plaza / San Anton plaza93
Iparralde g. e.Samaniego 2LHEroski / San Anton plaza / Bilbo plaza49
Iparralde g. e.Samaniego 3LHIparraldeko parkea / Iparralde43
Iparralde g. e.Samaniego 4LHEroski / Iparralde / Iparraldeko parkea86
Iparralde g. e.Samaniego 5/6LHKatedral Zaharra / Arkupeetako egoitza / Andre Maria Zuria115
Iparralde g. e.Samaniego Haur HezkuntzaEstenaga Apezpikua93
Iparralde g. e.Zokozorri Guraso ElkarteaZaramaga / San Prudentzio60
Iparralde g. e.Centro Ocupacional HeliosSan Prudentzio / Zaramaga30
Judimendiko g. e.Angel GanivetSanta Luzia / Judimendi80
Judimendiko g. e.Centro Ocupacional SalburuaArana auzoa40
Lakuako g. e.Toki Eder Gurasoen AbesbatzaIbaiondo – Lakuabizkarra12
Zabalganeko g. e.Aldaialde EskolaZabalgana80
Zabalganeko g. e.Zabalgana Batuz Auzo ElkartZabalgana30
Zabalganeko g. e.Zabalgana Euskara TaldeaZabalgana50
Zabalganeko g. e.Kalez KaleZabalgana12
Zabalganeko g. e.Zabalganeko EskolaZabalgana80
Zabalganeko g. e.Mariturri LHHHZabalgana80
Zabalganeko g. e.Zabalgana InstitutoaZabalgana30
Goiuri jauregiaZazpigarrenakErdialdea /Judimendi25
 ABESBATZAK, GUZTIRA: 32 1595

 

 

 

Share