Prentsa Oharren banner
Kategoriak: Sailkatu gabea  —  Etiketak: , ,   —  Komunikazio Zerbitzua / Servicio de Comunicación  —  2 abuztua 2019 11:57

Gorka Urtaranek Gasteizko iraunkortasunerako eredua azalduko du Global Forum of Human Settlements izeneko foroan, zeina Addis Abeban (Etiopia) egingo baita, irailaren 5ean eta 6an 

“Saria lortuko bagenu gure proiekzioa handituko genuke nazioartean, bizi-kalitateari, lehiakortasun ekonomikoari eta iraunkortasunari dagokienez erreferente gisa sendotze aldera” 

Gasteizko alkate Gorka Urtaranek iragarri du Udalak hautagaitza aurkeztu duela Global Green City Award sarirako. Global Forum on Human Settlements irabazi-asmorik gabeko erakundeak ematen du saria, Nazio Batuen laguntzarekin. “Maila globaleko ‘European Green Capital’ sari moduko bat da”, zehaztu du alkateak. “Ingurugiro Gaietarako Ikastegiak koordinatu du hautagaitza, eta udal sail guztiek lagundu dute lantzen. Gure ustez, oso ondo justifikatuta dago. Funtsean, gure eredua bat datorrelako sariarekin. Izan ere, guztiz inplikatuta gaude Nazio Batuen 2030 Agendarekin eta garapen iraunkorreko helburuekin”, azaldu du Gasteizko alkateak.

Aipatutako erakundeak urtero antolatzen du Global Forum on Human Settlements izeneko foroa. Aurtengoa 14. edizioa izango da eta Addis Abeban (Etiopia) egingo dute, Nazio Batuen konferentzia zentroan. Gasteizko Udalaren delegazio bat bertan izango da, Gorka Urtaran buru delarik. Alkateak, 6an, Gasteizko ingurumen iraunkortasun eredua azalduko du bere hitzaldian. Hitzaldiaren ondoren, Arabako hiriburuak saria jaso duen jakinaraziko du ebaluazio batzordeak.

“Gasteiz superhiria izatea nahi dugu, Europan erreferente izatea; hori funtsezko ildoa da udal gobernuak sustatzen duen Gasteizko Agendan. Saria lortuko bagenu gure proiekzioa handituko genuke munduan, beste bultzada bat emango lioke hamarkadatan egindako lanari, eta beste urrats bat litzateke gure hiriaren nazioarteko proiekzioan. Hori guztia, bizi-kalitateari, lehiakortasun ekonomikoari eta iraunkortasunari dagokienez erreferente gisa sendotzen jarraitzearren“, adierazi du Gorka Urtaranek.

NBEren garapen jasangarriari buruzko agenda tokiko mailan sustatzeko balio du foroak, eta hirietako eta hiri kokalekuetako baldintzak hobetzea du azken helburutzat. Besteak beste, hiri jasangarriak neurtzeko sistemak garatzen dituzte, arduradun politikoei eta industriei erreferentziak emateko txostenak lantzen, eta Sustainable Cities and Human Settlements Awards sariak sustatzen. Aitorpen horien bidez gobernu, enpresa, komunitate, antolakunde eta banakoen lorpen gailenak nabarmendu nahi dituzte.  Global Green City da sari horietako bat.

Gasteizek aurkeztutako hautagaitza balioesten duen batzordeak 85 adierazle aztertuko ditu, sei ataletan banatuta: iraunkortasuna, ekitatea, identitatea, segurtasuna, oparotasuna eta zoriona. Sei multzo handi horien barruan 18 kategoria sartzen dira, askotarikoak eta zeharkakoak: mugikortasun jasangarria, energia-eraginkortasuna, ‘smart city’, ‘zero waste’, espazio publikorako politikak, lurraldearen erabilera jasangarria, ura, ingurumena, oinarrizko zerbitzuak, lurralde garapen jasangarria, ekonomia zirkularra, nekazaritzako elikagaien estrategia, gobernantza, berrikuntza, ondarearen babesa…

Aurreko edizioetan hiri hauek eskuratu dute saria, besteak beste: Viena (Austria); Cuenca (Ekuador); Vancouver (Kanada); Oakland (AEB); Curitiba (Brasil); Nantes (Frantzia); Mannheim (Alemania); Surabaya (Indonesia); Yokohama (Japonia); Rockdale (Australia); Bogota (Kolonbia); HuaHin (Tailandia); Indore (India); Port Vila (Vanuatu); Lijiang, Sanya, Dali, Wuxi, Changsha, Jiangshan, Sino-Singapore Tianjin Ecocity eta Qingdao Sino-German Ecopark (Txina).

 

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  22 uztaila 2019 11:51

Aukeraketaren bidez, haien lan desinteresatua eskertu nahi izan du alkateak, eta pertsona gehiagok lan asebetegarri horrekin bat egin dezaten lagundu  

Gorka Urtaran alkatearen adierazpenak

Abuztuaren 4ko seietan 2019ko Andre Maria Zuriaren jaietako suziria nork jaurtiko duen iragarri du Gasteizko alkate Gorka Urtaranek. Imanol Vega traumatologoa, Adela Fonseca erizain eta ebakuntza gelako instrumentista eta Francisco Granados ortopedista dira; osasun arloko langile horiek aste batzuk igarotzen dituzte urtero Bolivian eta Benin errepublikan, osasun larriak dituzten eta baliabiderik ez duten biztanleei arreta emateko.

Agintaldi hasi berriaren lehen urtean, Eusko Alderdi Jeltzalearen udal taldeari dagokio aukeratzea nortzuek jaurtiko duten jaien hasiera eta Zeledonen jaitsiera markatzen duen suziria. Gorka Urtaranek azaldu duenez, aukera hori eginez hiriak esker ona adierazi nahi die sufritzen dutenei eta arazoei aurre egiteko baliabiderik ez dutenei laguntzen beren denbora eta dirua ematen duten pertsonei.

“Zehazki, osasun arloko langile kooperanteez ari gara, eta hiru pertsona hauen bidez sinbolizatu ditugu, nahiz eta beste asko diren inplikatzen direnak, mugarik gabeko elkartasuna eta eskuzabaltasuna erakutsiz. Medikuntza eta ekonomia baliabiderik ez duten pertsonei lagundu ahal izateak poz handia ematen die. Eta gu, hiri gisa, oso harro gaude lan hori musu truk egiten duten auzokideak izateaz, oso baldintza gogorretan bizi diren beste batzuei hainbesteko ongizatea ematen baitiete. Beren lanaren emaitza ikusi ahal izateak, eta besteen bizitza nola aldatzen den ikusteak —esan du Gorka Urtaranek— oso asebetegarria izan behar du”.

“Aurtengo txupinero izendatuz, haien lana aitortu nahi dugu, eta gure esker ona eta miresmena adierazi, beren familiak eta lana aldi batez uzten baitituzte lan zoragarri hori egiteko; aldi berean, egiten dutena ezagutarazi nahi dugu, hartara pertsona gehiagok har dezaten parte horrelako ekintzetan, leku horietara joanez edo dirua eta materiala emanez. Grina handiz egiten dute lan hori, eta eskertzeko egin dezakegun gutxienekoa da”, erantsi du alkateak.

Imanol, Adela eta Franciscok Gasteizen egiten dute lan, baina urteak dira aste batzuk erreserbatzen dituztela Afrika eta Hego Amerikara era altruistan bidaiatzeko. Han ebakuntza ugari egiten dituzte, eta material ortopedikoa ematen pertsona kopuru handiari —horietako asko, adingabeak—, gobernuz kanpoko zenbait erakunderekiko lankidetzan: Denok Osasunaren Alde (DOA) eta Les énfants du Noma; haiek ere sortu dute irabazi-asmorik gabeko elkarte bat,  Asociación de Ayuda en Traumatología y Ortopedia (ADATO) izenekoa. Malformazioak, anputazioak, hausturak edo elikadura gabeziak dituzten pertsonei ematen diete arreta. Oro har, haien herrialdeetan bertan ematen dizkiete arreta eta materiala, baina batzuetan Gasteizera ere etorri dira gaixoak arreta jasotzera. Esate baterako, orain bizkarrezur arazo larriak dituen 12 urteko neska bati egingo diote ebakuntza hirian.

Imanol Vega traumatologoak hitz egin du bere lankideen izenean: “Ez dago Andre Maria Zuriaren jaietako txupineroa izatea baino ohore handiagorik, baina metxa pizteak eta suziriaren leherketak, jaiak hasteko ez ezik, “eskerrik asko” handia izatea nahi dut, itzalean lan egiten duten eta gaur hemen egoterik ez duten osasun arloko langileen zein osasun arlokoak ez diren kooperanteen eskerrak. Eskerrik asko kooperazio guztiaren izenean”.

Vega doktoreak —Arabako Medikuen Elkargoak ere haren lan solidarioa saritu zuen 2018an— Benin eta Bolivian egiten duten lana azaldu du: lan ordu ugari, ahalik eta gaixo gehiei arreta eman eta ebakuntza egitearren. “Kirurgia guztiak bertako langileekin egiten ditugu, prestakuntza emateko premisarekin, urteko gainerako egunetan gure urratsei jarraitzerik izan dezaten. Baina nabarmendu nahi dut haiek gure teknikak ikasi ez ezik geuk ere ikasten dugula haiengandik, eta asko, ezagutza eduki badutelako, baliabiderik ez izan arren. Beti esaten dugu misioetatik eramaten duguna baino askoz ere gehiago ekartzen dugula”, azpimarratu du.

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  14 urtarrila 2019 13:06

Gasteizko alkate Gorka Urtaranek gaur goizean iragarri duenez, Gasteiz Antzokiaren proiektua “abiatzear da” eta gauzatu egingo da, agintaldia amaitu baino lehen lizitatuko baita. Une honetan, Euskararen Etxea jartzekoa den Ruiz de Bergaratarren jauregiaren egoeraren azterlan teknikoa azkentzen ari da Udala, baita akustikari buruzko txostena ere. Bi agiri horiek bukatutakoan zehaztuko da aurreproiektua, proiektua eta obra lehiaketara atera ahal izateko.

Euskaltzale taldeekin batera taxututako beharren programaren zenbait xehetasun azaldu ditu Gasteizko alkateak. Adostutakoaren arabera, Gasteizko Kafe Antzokia 1.250 metro koadroko espazioa izango da, lau solairutan banatuta. Osagai hauek izango ditu: sarrera nagusia, Zapatari kaletik (jantzitegi eta sarrera-saltegia barne); erdiko espazioa, agertokiarekin (274 metro koadro); aldagelak; kontrol teknikorako kabina; ostalaritza espazioa (103 metro koadro); ekitaldi aretoa; erakusketa aretoa; lantegiak; lan egiteko espazioak (bulegoak, bilera gelak), eta bestelako espazioak (komunak, biltegiak…).

“Gasteiz Antzokia gero eta hurbilago dago, gainditu behar izan ditugun eragozpenak gorabehera. Agintaldi osoan egindako lanari eta Elkargunea osatzen duten euskaltzale taldeen konpromisoari esker, proiektua abiaratzear da”, azaldu du Gorka Urtaranek.

Gasteizko alkateak proiektuak orain arte egindako bidea laburtu du gaur goizean: 2017. urtearen hasieran ideia-lehiaketara deitu zen, Gasteiz Antzokia Eskoriatza-Eskibel jauregian jartzeko, eta ondoren akordio batera iritsi zen, pilotalekua bertan uzteko, adostasun sozial eta politikoa lortze aldera; geroago, ordea, fuel depositu bat agertu zen lorategian, eta hori kendu beharra zegoen, lurra deskutsatu eta ingurunearen alderdi arkeologikoak aztertu. Eskoriatza-Eskibelen inguruan beste bi depositu agertu dira azken urteetan: bata gasarena zen, eta 2014an atera zen; bestea Harategi kantoiaren eta Frai Zacarias Martinez kalearen arteko bidegurutzean agertu zen, eta aparrez inertizatu zen.

Azaldutakoaren ondorioz, Gasteiz Antzokia eta Euskararen Etxea jartzeko beste leku bat bilatu behar izan zen, eta Euskara Elkargunean Ruiz de Bergaratarren jauregira aldatzea erabaki zelarik bertan kokatuko dira azkenean. Une honetan ez dago inolako erabilera zehatzik aurreikusita Eskoriatza-Eskibel jauregiarentzat, baina egitura sendotzeko eta estalkiak iragazgaizteko proiektu teknikoa kontratatu beharko da, baita dagokion lana gauzatu ere; horrek milioi euro inguruko kostua izango du.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  1 otsaila 2018 13:56

Alkatea eta Datuak Babesteko Euskal Bulegoko zuzendaria buru izan duen ekitaldian, bulego honen ikertze eta zabalkunde lanak goraipatu dira, baita datuak babesteko arloan bere jarduteak ere

Datuak Babesteko Euskal Bulegoak gaur egin du, Arte Garaikideko Euskal Zentro-Museoan Artium, Datuak Babesteko Sarien banaketa ekitaldia. DBEBk urtero ematen dizkie sariak ibilbide profesionalagatik, ikerkuntza lanengatik, komunikazioa eta zabalkundeagatik eta datuak babesteko jardunbide onengatik urtean zehar nabarmendu diren pertsonei, enpresei eta erakundeei.

Gasteizko alkate Gorka Urtaranek eta Datuak Babesteko Euskal Bulegoaren zuzendari Margarita Uriak ekitaldia zuzendu eta sariak banatu dituzte.

  1. edizioko sariak honela banatu dira: “Ibilbide profesionalagatik” Iñaki Vicuñari eman zaio, DBEBren lehenengo zuzendaria izan zenean egindako lanagatik Bulegoa abian jartzen; Botere Judizialaren Kontseilu Nagusiaren Gardentasuneko Lan Taldeko kide izateagatik eta jurisprudentziaren zabalkundean egindako anonimizazio lan garrantzitsuagatik; Botere Judizialaren Kontseilu Nagusiaren Datuak Babesteko Batzordeko kidea izateagatik, eta datu babesaren arloan izan dituen erakunde kargu ugariengatik.

“Datu Babesaren Ikerkuntza Arloan” saritua da Daniel López Carballo, honako lanagatik: “Datu babes eraginkorraren bidean Iberoamerikan. Datuak Babesteko Iberoamerikako Behatokiaren ekimenaren adierazpenak”. Kategoria honetan accesit bate ere eman diote Sofía Lucas Areizagari, honako lanagatik: “PNR Zuzentarauak planteatzen dituen erronka juridiko nagusiak”.

“Datu Babesaren Komunikazio eta Zabalkundearen Arloko Saria” El Diario Vascori eman diote, herritarrak kontzientziatzen egindako lanagatik, teknologia berriak eta pribatutasunaren babesa behar bezala erabil ditzaten. Kategoria honetan ere accesita eman da, eta Pribatua-Pribatutasun eta Informazio Segurtasuneko Euskal Elkarteak jaso du, etengabe egindako lanagatik pribatutasunaren eta informazioaren segurtasunaren zabalkundearen arloan.

Azkenik, datu babesaren arloko “Jardunbide Onenei” saria eman diote Vitoria-Gasteizko Ingeniaritzako Unibertsitate Eskolari, datuen babesaren eta segurtasunaren arloan egiten dituen jardunaldien kalitateagatik.

DBEBren zuzendari Margarita Uriak saritu guztiak zoriondu ditu, lanen kalitateagatik eta egin dituzten ekarpenengatik, erakundeek eta herritarrek gero eta argiago izan dezaten zein garrantzitsua den esparru hau, etengabe garatzen ari den esparrua baita, eta etorkizunerako erronka ugari dakarrena. Erronka berrien artean nabarmendu du Datuak Babesteko Erregelamendu Orokorra. Izan ere, Europako zuzentarau bat da, eta herrialde guztiek nahitaez bete beharrekoa aurtengo maiatzaren 25etik aurrera. Eta azpimarratu du “Erregelamendu berri hau erronka handi bat dela Bulegoarentzat eta Euskadiko erakunde guztientzat, laneko metodologiak egokitu beharko dituztelako Erregelamendura, eta askotan egiturak ere bai. Gainera, herritarren eskubideei berme handiagoa emateko helburua ere badu, batez ere haien datu pertsonalak babestea eta gordetzea dela eta”.

Bestalde, Gorka Urtaranek azpimarratu du herritarrak konturatu behar direla zein garrantzitsua den norbere datu pertsonalak babestea, batez ere gazteak. “Guzti-guztiok, gutariko bakoitzak baliarazi behar ditugu esparru honetan dauzkagun eskubideak. Datu-babesa herritar guztien eskubidea da, eta txikitatik ikasi behar du baliatzen, are gehiago teknologia berriak erabiliz gero. Jakin behar dugu zer-nolako arriskuak izan ditzakeen gure informazioak: lapurretak, baimenik gabeko zabalkundea, informazioa aldatzea, galtzea edo ezabatzea; eta guzti horrek ekar ditzakeen ondorioak ere bai; adibidez, sarean dugun ospea kaltetzea, jazarpen psikologikoak edo diskriminazioa jasatea edo identitatea lapurtzea mota guztietako iruzurrak egiteko”. Horrez gain, nabarmendu du oso garrantzitsua dela esparru pribatuak eta publikoak, biek tratatzea datu pertsonalak begirunez osoz, eta zorrotz betez indarrena dagoen legedia.

 

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  3 urria 2017 14:26

 

Gasteizko alkate Gorka Urtaranek ‘Belfast international homecoming 2017’ (belfasthomecoming.com) biltzarrean hartuko du parte bihar arratsaldean. Gasteizko alkatea irlandar diasporaren urteroko bilerara gonbidatu dute, Gasteizko eredua azal dezan bizikidetza eta aniztasunari, ekintzailetzari, talentu adimentsuari, turismoari eta mugikortasunari dagokienez. Ipar Irlandan egiten den nazioarteko bileran hainbat herrialdetako buruzagiek eta lehen mailako enpresek hartuko dute parte. Gasteizko alkateak ‘Belfast international homecoming 2017’ biltzarraren inaugurazio jardunaldian emango du hitzaldia, ‘Basque lessons for Belfast – Leading the 21st Century City’ izenburuarekin.

Gorka Urtaranek azken urteetan Arabako hiriburuak hainbat arlotan izan duen eboluzioa azalduko du. Besteak beste, Gasteiz Euskadiko hiriburua dela azalduko die Irlandako entzuleei, eta 2012az geroztik Europako Hiriburu Berdea dela, hiriaren ingurumenarekiko konpromisoa dela eta. Orobat, mugikortasun iraunkorraren goraldiaren berri emango du, hiriko joan-etorrien % 70 oinez edo bizikletaz egiteraino.

Gasteiz ikerketaren eta berrikuntzaren aldeko apustua egiten duen hiri modernoa dela azalduko du halaber, industriak pisu garrantzitsua baitu, eta enpresa handiak —hala nola Michelin eta Mercedesen— baitaude bertan. XXI mendeko hiri bat, gizarte eta ekonomiaren ikuspuntutik erronka handiei aurre egin behar diena. Gizartearen alorrean, bizikidetza bermatzeko erronkari, aniztasunean elkarrekin bizitzea sustatuz, eta Euskadin urte askotan indarkeria eta giza eskubideen urraketa larriak izan direla gogoratuz. Ekonomiari dagokionez, Gasteizek eta Euskadik bi erronka nagusiri egin behar diete aurre: tokiko industria 4.0 molde berrira egokitzea, eta abiadura handiaren etorrera, barrutik eta kanpotik ondo konektatutako hiria bihurtzearren.

Horiek alde batera utzita, Gorka Urtaranek hiriak turismo-helmuga gisa dituen onurak aipatuko ditu, eta biltzarreko parte-hartzaileak Gasteiz ezagutzera gonbidatuko, gastronomia, jaiak, turismo iraunkorra eta, bereziki, Arabako hiriburuko biztanleak goraipatuz.

 

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  9 ekaina 2017 12:29

Urtaranen gobernuak Erdigunerako Masterplana aurkeztu du hiriko alderdi estrategiko hori eraldatzen inplikatutako gizarte, ekonomia eta merkataritza agenteen aurrean

Proiektua oraindik lantzen ari da, eta eztabaidatzeko eta ekarpenak egiteko aukera izango da

Gorka Urtaranek denen konpromisoa eskatu du ekimenak arrakasta izango badu

 MASTERPLAN EKINTZAK                MASTERPLAN BIDEOA

Urtaranen gobernuak Erdigunerako Masterplana aurkeztu du gaur goizean, Gasteizko erdigunea birgaitu, biziberritu eta berpizteko 20 ekintzatik gora biltzen dituena. Erdigunerako Masterplana 3 B-en filosofian oinarritzen da: espazio publikoak berpiztea, erabiltzen ez diren eraikinak berrerabili eta birgaitzea, eta  merkataritza eta ostalaritza biziberritzea. Gorka Urtaran alkateak “guztion konpromisoa” beharrezkoa dela esan du “proiektu honek aurrera egiteko. Erdiguneko Masterplana ez da dokumentu itxi bat. Ekarpen berrietara irekita dago, beti erdigunea biziberritzeko helburua duten proiektu eta jardueretara irekia, hain zuzen ere. Izan ere, eremu estrategikoa da hiriarentzat. Guztion artean erdigunean beste garai batzuetan izan zuen indarra berreskuratzea lortuko dugu”, esan du alkateak.

 

Espazio publikoak berpizteak bizitza sozialak  —eta, horrekin batera, merkataritza eta ostalaritza jarduerak— protagonismo handiagoa hartzea du helburutzat. Gaur egun dinamismoa eragozten duten muga fisikoak dituzten lekuak dira, elkartzeko leku gisa paper garrantzitsuagoa izan dezaketenak. Erdigunerako Masterplanak espazio horiek berpiztea aurreikusten du, irisgarriagoak, ibiltzeko errazagoak eta erakargarriagoak bihurtu eta bertan jarduera berriak sor daitezen. Alegia, inguruan bizi direnentzat atseginagoak.

 

Eraikinak berrerabiliz eta birgaituz, gaur egun erabiltzen ez diren higiezin ugari berreskuratu nahi dira hiriarentzat. Jarduera ekonomikoak, etxebizitzak edo administrazioa hartu duten eraikinak dira, denborarekin hutsik geratu direnak. Udalak, jabeekin batera, eraikin horiei bizitza berria eman nahi die, hondamena geldiarazteko , eta erabiltzeko aukera berriak emanez, haien ingurua eraldatzeko motorra  bihurtu daitezen.

 

Merkataritza eta ostalaritza biziberritzeari dagokionez, sektoreko enpresekin adostutako hirigintza jarduerak eta merkataritza politikak abiatuko  dira, hirugarren sektorea funtsezkoa baita erdialderako.

Hiru B horiek —espazio publikoak berpiztea, eraikinak berrerabili eta birgaitzea, eta merkataritza eta ostalaritza biziberritzea— konbinatuz, Erdigunerako Masterplanak Erdi Aroko hirigunetik trenbideraino doan hiri-bilbe osoan banatutako ekintzak barne hartzen ditu.

 

Santa Barbara eta garai bateko Espainiako Bankua eraldatzea eta trenbidea lurperatzea

 

Hiriko alderdi estrategiko hori eraldatzen inplikatutako gizarte, ekonomia eta merkataritza agenteen aurrean, alkateak planean jasotako jarduera-ildo nagusiak azaldu ditu. Ekitaldia Vital Fundazioaren Aretoan izan da, Dendaraban. Horien artean hiru dira nabarmengarrienak: Santa Barbara plazaren berpiztea, 9,6 milioi euroko aurrekontua duena eta “Bost Enparantza” proiektuaren gunea dena, zeinaren bidez hiri eta merkataritza ardatz handia sortu nahi baita, Posta kalean barrena Andre Maria Zuriaren plaza, Plaza Berria, Foru plaza, Santa Barbara plaza eta Leizaola Lehendakariaren kalea lotuz; Espainia Bankua izandakoaren ingurua eraldatzea, inguratzen duten kaleak berrantolatuz oinezkoentzako lekua irabazteko, oztopoak kentzeko eta merkataritza eta ostalaritza jarduera sustzeko; azkenik, trenbidea lurperatzeak libre utziko duen lekua, zeinean garraio publikorako bideak sortuko baitira, hiriko ekialdea eta mendebaldea komunikatzeko bideak, eta dotaziozko eraikin berriak (ikastetxeak) eta neurri txikiagoan, bizitegiak. Horrekin lotuta, intermodala izateko asmoa duen tren geltokia egingo da, Green Capital plazatik Dato kalera doan ardatza dinamizatuko duena.

 

Santa Barbara,  garai bateko Espainiako Bankua eta trenbidea lurperatzea hiria biziberritzeko hiru proiektu handi dira, eta horiei erabiltzen ez diren eraikinak berrerabili eta birgaitzeko ekimen ugari gehitu behar zaizkie.

Jarduera multzoa

ARICHen egoitza izandakoa barrutik birgaitzea eta irisgarritasunarekin lotutako berrikuntzak egitea saltoki bihurtzeko. Higiezin hori hutsik egon zen bost urtez, eta dagoeneko merkataritza-jarduera ezarri da oinezko gehien dabilen erdialdeko leku batean.

Udal Ogasuneko bulegoak izandakoak eraldatzea, bizitegi-erabilera emateko. Gainera, beheko solairuan eta sotoan erabilera tertziario berriak sortuko dira.

Dato kalearen, Araba Jeneralaren kalearen eta San Prudentzio kalearen arteko etxadia berrantolatzea. Oraingo espazioak —aparkalekua lehen eta bigarren solairuetan— berrantolatuko dira, beheko solairuan erabilera tertziarioko espazioak —handiagoak eta oraingo beharretarako erakargarriagoak— utzita eta kaleak elkarren artean komunikatuta.

Banco Santanderren egoitza (Arka plaza) izandakoaren erabilera aldatzea. Gaur egun higiezin horren jabeekin hitz egiten ari da, hirigintza-plangintza aldatzearren. Erabilera tertziarioko sailkapena aldatzea proposatzen da, “bulegoetarako tertziarioa” kategoriatik “hoteletarako tertziarioa” kategoriara.

Gizarte Ongizaterako Foru Erakundearen egoitza berria. San Prudentzio kaleko 30.ean orain San Martinera aldatu diren udal bulegoetako batzuk zeuden. Irtenbide bat aurkitu da eraikina hutsik gera ez dadin, barrutik eraberrituz eta Gizarte Ongizaterako Foru Erakundearen bulegoak hartzeko egokituz.

Ertza eraikina bizitegi-erabilerara aldatzea. Fatxadak mantendu eta eraikina barrutik eraldatzea da asmoa, etxebizitzak jartzeko eta beheko solairuan eta sotoan erabilera tertziarioa sortzeko. Hartara, erabilera berria emango litzaioke udalaren bulego berriak inauguratu ondoren hutsik geratutako beste higiezin bati.

 Alfarotarren etxea osorik birgaitzea. Gaur egun Udala higiezin babestu horren jabeekin hitz egiten ari da, eta osorik birgaitzeko proiektu bat gauzatzeko aukerak aztertzen, arkitektura sailkapena errespetatuz. Finantza-erakunde baten egoitza bihurtu daiteke.

Zulueta jauregiaren erabilera berria. Osorik babestutako eraikina da, beraz, barruko eta kanpoko itxura zein lorategiarena mantendu beharra dago. Promozio enologiko eta gastronomikoarekin lotutako erabilera eman nahi zaio, Arabako Errioxako turismoa promozionatzeko egiteko garrantzitsua egin dezan.

Turismo bulego berria jartzea Goya gasolindegia izandakoan. Eraikinaren egitura osorik gorde nahi da, erabilera ezberdinak emanez. Barrutik eraberritzea aurreikusi da, beheko solairuan turismo bulego berria eta elektrizitate karga-gune bat jartzeko. Lehen solairuan Alberto Schommer museoa jarriko litzateke, eta ostalaritzako jarduera osagarri bat.

“Bike station” jartzea Txoroleku izandakoan. Eraikinaren egungo egoera aztertzen ari da, eta  “bike station” bihurtzeko egin beharreko egokitzapenak. Bizikleta elektrikoak alokatzeko sistema bat sortzeko aukera ere aztertzen ari da, handik metro gutxira dagoen turismo bulegoarekin lotuta.

Merkataritza espazio berria Dendaraban. Higiezin horren barrualdea birmoldatzea aurreikusi da, lehen solairuan areto txikiek osatzen duten merkataritza galeria espazio jarraitua bihurtzeko. Beheko solairuan ere aretoak berrantolatuko dira, denda galeriaren zati bat utzita eta gainerakoak batuz, merkataritza espazio jarraitua sortzeko. Dena dela, Independentzia, Posta eta Bake kaleak lotzen jarraituko du Dendarabak.

Gizarte Segurantzaren diruzaintza izandakoa berrerabiltzea. Gizarte Segurantzaren Diruzaintza Nagusiaren bulegoak lekuz aldatu ondoren, Posta kaleko 42.eko eraikina ere hutsik geratu zen. Udala azterlanak egiten ari da, eta jabeekin hitz egiten, higiezin hori berrerabiltzeari begira.

Florida kaleko 28.eko eraikina. Bizitegi-eraikina da, birgaitu beharrekoa, eta Udala da gehienaren jabea. Beheko solairuari erabilera tertziarioa emateko aukerak aztertzen ari dira, ostalaritza edo merkataritza negozioren bat jartzeko.

Jose Erbina kaleko 1.eko lursaila.  Trenbide azpiegituraren sailkapena du, eta leku estrategikoan dago, lurperatzekoa den trenbidearen ondoan; beraz, oso interesgarria litzateke bizitegi-erabilerarako edo enpresaren baten egoitzarako. Lursailaren erabilera aldatzeko egin beharko litzatekeen hirigintza-plangintzaren aldakuntza izapidetzeko aurretiazko azterlanak egiten ari dira.

Florida kaleko 53.eko lursaila. Zainpeko apartamentu batzuk egitea aurreikusi zen, baina azkenean ez zen asmoa gauzatu. Lursailari bizitegi-erabilera ematea aztertzen ari da, beheko solairuan eta sotoan erabilera tertziarioa izateko aukerarekin.

Postetxea. Higiezinaren jabeekin hitz egiten ari da, enpresaren jardueraren erabilera osagarriak txertatzeko asmoz. Hartara, etekin handiagoa aterako litzaioke katalogatutako eraikin horri, Bost Enparantza proiektuari eta Espainiako Bankua izandakoaren eraberritzeari esker leku estrategikoan geratuko baita.

Bonilla. Ekimen pribatuko proiektua, eraikin horretan adinekoentzako egoitza (49 pertsonarentzat) jarrita; hartara, gaur egun hutsik dagoen eraikinaren zatia erabiliko litzateke.

Iradier Arena. Eraikinaren efizientzia akustikoa hobetzeko inbertsioa, ekitaldi, kontzertu eta abarretarako baliatu ahal izateko eta hartara benetan erabilera askotarakoa izan dadin. Aparkalekuan txandakatzeko leku ugari erreserbatuko dira, trenbidea lurperatzearekin lotutako geltokiari eta erabilera askotarako eraikinaren jarduerari lotuta. Gainera, 200 leku inguru inguruko auzokoei besterenduko litzaizkieke.

Zabalgunerako laguntzak. Udalak lehentasunezko zonatzat jo du hiriaren erdialdea birgaitzeko laguntzen deialdian, eta beste laguntza-ildo batzuen barruan, berariazko programak sortu ditu begiratokiak konpontzeko, hiriaren ezaugarria baitira.

Diagnostikoa

Erdigunerako Masterplanak erantzuna ematen dio diagnostiko bati. Krisi ekonomikoa, enpresak eta erakundeak beste leku batzuetara aldatzea, bizitegietarako gune berriak sortzea eta beste faktore batzuk direla eta, hiri sendotuak erritmoa galdu du lehen zuen jarduera ekonomikoaren eta okupazioaren aldean. Lursail hutsak, eta erabili gabeko eraikinak eta aretoak erdialdeko paisaiaren zati bihurtzen ari dira, eta inguruak beste garai batzuetako pultsua berreskuratu nahi du, eta behar du. “Honetarako moldatzen den hirigintzaren kontzeptua erabiliko dugu oinarritzat. Garai berri hauek behar berriak dituzte, eta gaurko beharrei erantzuna emateko aproposa da moldatu daiteken hirigintza hori, betiko hirigintza baino malguagoa izango baita. Erabilerarik gabeko eraikin eta lokalak bizirik dauden puntuetan bihurtu behar ditugu, gure hiriko bizitza kolektiboa ere berriztatzeko”.

Gaur egun, 8.154 pertsona bizi dira Gasteizko Zabalgunean. Hau da, duela 10 urte baino mila gutxiago ia. Gainera, populazio horren batez besteko adina gero eta handiagoa da, 47 urtetik gorakoa. Eta erdigunean bizi direnen laurden batek 65 urte edo gehiago ditu. Horri gehitu behar zaio Zabalguneko 4.615 etxebizitzen erdia ia duela mende erdi baino gehiago eraiki zela.

Ehun ekonomikoari dagokionez, azken bost urteetan irekitako establezimenduen kopurua nabarmen jaitsi da. Epe horretan 200 negozioa inguru itxi dira. Gaur egun  2.005 aretotan dago jarduera: erdia banku eta aseguru-etxeak dira, eta heren bat baino zertxobait gehiago merkataritza eta ostalaritzakoak dira. 2016ko hasieran, 8.048 pertsonak egiten zuten lan sektore horretan.

Gasteizko zona enblematiko horren gainbehera eragozteko sortu da Erdigunerako Masterplana, ekimen publikoak eta pribatuak batzeko gauza izan dadin eta epe motz eta ertainera neurri eraginkorrak hartzeko bide eman dezan.

Proiektu batzuk dagoeneko obra kontratatzeko fasean daude; beste batzuetan behar diren azterlanak egiten ari dira, eta gainerakoetan hirigintza-plangintzaren aldakuntzaren izapideak aurreratzen ari dira, eraikinak berraktibatu edo berrerabiltzeko.

Masterplana ez da agiri itxia. Erdigunea biziberritzeko filosofia partekatzen duten ekarpen, proiektu eta ekimen berriak egin dakizkioke.

 

Share