Prentsa Oharren banner
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  30 azaroa 2018 11:24

Berpizkundearen plazako eguneko arreta zerbitzu berria eraikitzeko lanak kontratatzeko dosierra abiaraztea onetsi du gaur Tokiko Gobernu Batzarrak, 599.913 euroko aurrekontuarekin.

 

 

Gizarte Politiken eta Osasun Publikoaren Sailak sustatutako gizarte baliabide berria Udalak Iradier Arenaren ondoan jabetzan duen lokal batean jarriko da, zeinak ia 500 metro koadroko azalera baitu.

Besteak beste, jantokia, erabilera askotarako gela, atseden gela, sendaketak eta azterketak egiteko gela, bulegoak, komunak, bainugela geriatrikoa eta aldagelak izango ditu. Horiek denak erabiltzaileak eragozpenik gabe mugitu ahal izateko egokituko dira, horietako batzuek gurpil aulkiak eta eskorgak behar baitituzte.

Berpizkundearen plazako eguneko arreta zerbitzuak mendekotasun-arriskua duten edo mendekotasun-egoera moderatuan dauden adinekoak hartuko ditu, eta gizarte arreta, estimulazioa eta errehabilitazioa eskainiko ditu bereziki.  “Zerbitzuaren bidez, adinekoei arreta emango diegu egunez, eta haien beharrizan pertsonal oinarrizkoak, terapeutikoak eta soziokulturalak beteko ditugu. Zerbitzuak laguntza handia ematen die familiei, eta erabiltzaileen bizi-kalitatea hobetzen, haien osasuna zaintzen eta gaitasun sozialak sustatzen dituen jarduera-eskaintza zabalaren bidez”, azaldu du Gizarte Politiken eta Osasun Publikoaren zinegotzi Peio López de Munainek.

Gizarte zerbitzuak helburu hauek ditu, besteak beste:

  • Adinekoak bere ohiko ingurunean jarrai dezan sustatzea.
  • Erabiltzaileek autonomia pertsonaleko albait mailarik handiena izaten jarraitzea edo berreskuratzea.
  • Adinekoen gizarteratzea eta harremanak sustatzea.
  • Familiari atsedena eta laguntza ematea.
  • Adinekoei banakako arreta integrala eskaintzea.

Berpizkundearen plazako eguneko arreta zerbitzua eraikitzeko obrek 6 hilabete iraungo dute.

DOSSIER CAD RENACIMIENTO

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  12 azaroa 2018 17:50

Gizarte Politiken eta Osasun Publikoaren zinegotzi Peio López de Munainek bere sailaren aurrekontu-proiektua aurkeztu du gaur, zein 41,4 milioi eurokoa izango baita 2019an, hau da, aurtengo ekitaldian baino % 6,5 gehiago.

“Kontu hauekin egiten dugun ahalegin ekonomikoak gure politikei beti eman izan diegun izaera sozialari erantzuten dio. Horregatik, Gasteizko hogeita hamarretik gora kolektibo soziosanitarioren programa eta zerbitzuak bultzatzen dituen aurrekuntu bati buruz ari gara; premia-egoeran dauden familia eta pertsonei laguntzen die; adinekoei arreta eskaintzen die, merezi duten bizi-kalitatea izan dezaten; haurrak babesten ditu, eta osasun publikoa sustatzen du”, azaldu du López de Munainek, Ogasun Batzordeko agerraldian.

Agintaldi honetan, 12,3 milioi euroan handitu du aurrekontu Gizarte Politiken eta Osasun Publikoaren Sailak, eta hirugarren udal saila bihurtu da diru-zuzkidurari dagokionez, Ingurumenaren eta Espazio Publikoaren Sailaren eta Ogasun Sailaren ondotik.

Aurrekontu-proiektua

Komunitate Jardueraren Zerbitzuan 22,9 milioi euroko gastua aurreikusten da, Adinekoen Zerbitzuan 7,9koa, Gizarte Inklusioaren Zerbitzuan 4,7koa, Haurtzaro eta Senitarte Zerbitzuan 3,2koa, Osasun Publikoaren Zerbitzuan 1,3koa eta Administrazio Zerbitzuan 1,2koa.

Etxean laguntzeko zerbitzuaren partidaren igoera nabarmentzen da Komunitate Jardueraren Zerbitzuan, 11,1 milioi euro —1,8 milioi gehiago— bideratuko baitira horretara, baita gizarte-larrialdiko laguntzetarako eta laguntza sozialetarako erreserbatutako 9 milioiak ere.

Adinekoentzako zentro soziokulturalen kudeaketak hartzen du Adinekoen Zerbitzuaren partidarik handiena —2,9 milioi euro—. Orobat nabarmentzen dira Adineko pertsonak zaintzen dituzten familiei laguntzeko programa —100.000 euro—, elikagaietarako 1,6 milioiak eta beste hainbat partida txiki, hala nola adinekoei buruzko estereotipoak hausteko 5.444 euroko partida, edo  Adinekoekin Lagunkoi diren Hirien Sarearen II. Ekintza Planean laguntzeko 12.000 euroko partida.

Gizarte Inklusioaren Zerbitzuan, % 2,5eko igoera izango dute udal zerbitzuak eskaintzen dituzten kolektibo eta elkarteekiko hitzarmenek, sektoreko hitzarmen kolektibora egokitzeko. Hala izango da kasu hauetan: Hiesaren aurkako Batzordearen Etxe Irekia —340.000 euro—, zainpeko etxebizitzak —297.000 euro—, Estrada Zentroa —464.854 euro—, Aterpea —470.000 euro—, zainpeko etxebizitzak kudeatzen dituen afroamerikar elkartea —522.150 euro— eta Clara Campoamor elkarteak indarkeria matxistaren biktima diren emakumeei harrera emateko dituen etxebizitzak —300.000 euro—.

Haurtzaro eta Senitarte Zerbitzuan, adingabeak atenditzen dituzten zentro sozioedukatiboek 1,2 milioi euro izango dituzte, Seme-alaben Gurasoekiko Indarkeria-egoeretan Garaiz Esku Hartzeko Programak 83.993 euro, gurasotasun positiboa, emozioak eta erresilientzia lantzen dituzten programek, berriz, 112.000 euro, 200.000 euro eta 252.349 euro, hurrenez hurren.

Osasun Publikoaren Zerbitzuak eutsi egingo die Gasteizko hogeita hamar bat elkarte soziosanitariorekin dituen hitzarmenei, guztira ia milioi erdi euro jasoko baitituzte, arreta-programak garatzeko. Orobat eutsiko die Gadenekiko hitzarmenari —18.500 euro—, kaleko katu koloniak kudeatzeko, eta Apasos elkartearekin duenari —15.000 euro—, Animaliak Babesteko Zentroan egiten duen lanerako.

Azkenik, nabarmentzekoa da 213.000 euro bideratuko dituela Osasun Publikoaren Zerbitzuak droga-mendekotasunen prebentziora.

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  9 azaroa 2018 12:38

Gizarte Politiken eta Osasun Publikoaren Saila eta Deustuko Unibertsitatea elkarlanean arituko dira familien eta seme-alaben inguruko egoeren arloko ikerkuntzan eta esku-hartzean. Helburu horrekin, Psikologia eta Hezkuntza Fakultatearekin lankidetza-hitzarmena sinatzea onetsi du Tokiko Gobernu Batzarrak.

Peio López de Munain zinegotziaren ustez, “bi erakundeak jakitun gara nolako garrantzia duen lankidetza-harreman egonkorrak ezartzeak, aukera eman diezaguten ezagutzak partekatzeko eta ikerkuntza sustatzeko interes komuneko gaietan, nola den familia-ingurunea”.

 Zentzu horretan, hainbat ekintza proposatzen ditu hitzarmenak. Besteak beste, honako hauek:

  • Ebidentzian oinarritutako programetan esku hartzea, familiei arreta eskaintzeko.
  • Ezagutzaren transferentziarako ekintza komunitarioak.
  • Ikasle, profesional eta erabiltzaileen prestakuntza.
  • Baliabideen erabilera partekatua.
  • Programen ebaluazioa.
  • Eta beste.

Lau urteko indarraldia izango du hitzarmenak, zeinek ez baitu diru-ekarpenik jasotzen.

Hitzarmenak luzatzea

 Orobat onetsi du gaur Tokiko Gobernu Batzarrak droga-mendekotasunen eta ludopatiaren arloetan diharduten bi elkarterekin dituen hitzarmenak luzatzea.

Luzapen horiek direla medio, 96.447 euroko ekarpena egingo dio Gizarte Politiken eta Osasun Publikoaren Sailak Jeiki fundazioari, drogazale-ohiak gizarteratzeko, eta 20.200 eurokoa Asajer elkarteari, ludopatiaren inguruko informazio-, prebentzio- eta orientazio-programa eta zerbitzuak garatzeko.

 

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  29 urria 2018 12:33

UNICEFek gaur iragarri du Haurren Lagun den Hiritzat aitortu duela Gasteiz, haur eta nerabeen eskubideak sustatzeko egiten duen lanagatik.  Azaroaren 28an jasoko du Udalak aitorpenaren zigilua, Oviedon.

Zigiluak egiaztatzen du Udalak haurren alorrean garatzen dituen politikek Haurren Eskubideei buruzko Hitzarmenean jasotako eskubideak errespetatzen eta ezartzen dituztela, eta familiek, komunitateek, gizarteak eta udal gobernuak haien ideiak eta iritziak kontuan hartzen dituztela.

Orobat, ziurtatzen du ume guztiek aukera berdinak dituztela, haien jatorria, erlijioa, maila ekonomikoa, generoa edo gaitasuna edozein delarik; esplotazio, abusu eta indarkeriatik babestuta daudela; lagunekin elkartzeko eta jolasteko espazioak dituztela; gizarte eta kultur ekitaldietan parte hartu dezaketela, eta oinarrizko zerbitzuak (osasuna eta hezkuntza horien artean) jasotzen dituztela.

Gizarte Politiken eta Osasun Publikoaren zinegotzi Peio López de Munainen  ustez, “Udalak eta hiriak haur eta nerabeen eskubideak betetzeko hartutako konpromisoaren aitorpena da; txikienen bizi-baldintzak hobetu, haien ahotsak entzun eta haien beharrak eta lehentasunak kontuan hartzeko egunero egiten dugun lanaren aitorpena”. 

Udalaren Haurtzaro eta Senitarte Zerbitzuak lan handia egin du azken hilabeteetan Haurren Lagun den Hiriaren ziurtagiria lortzeko: Haur eta Nerabeentzako Tokiko II. Plana idatzi eta onetsi da, haur eta nerabeen egoerari buruzko ikerketa-diagnostikoa egin da, eta Haur eta Nerabeen Elkargunea sortu da, besteak beste. 

“Horrek agerian uzten du txikienak gure politiken erdigunean daudela, alegia, haien garapen integrala eta eskubideak bermatzeko garatzen ditugula politikak, eta pozik egon beharko genuke horretaz. Bide zuzenetik goaz, eta hortik jarraituko dugu”, esan du López de Munainek.

Haurren Lagun den Hiriaren aitorpenak lau urteko indarraldia du, eta Udala bere gain zenbait konpromiso hartzera behartzen du, besteak beste, UNICEFi txosten bat eman beharko dio, apirilean onetsi zen II. HANUParen aplikazioaren aurrerapenari buruz.

Plana lantzen 650 pertsona inguruk hartu zuen parte: hainbat erakunde eta gizarte kolektiboetakoak, udal sailetakoak, eta umeak zein nerabeak. Orotara 100 ekintza proposatzen ditu umeen eta haien familien eskubideak eta ongizatea bermatzeko.

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  15 urria 2018 12:35

Gizarte Politiken eta Osasun Publikoaren Sailak bizitoki ematen jarraituko du eraikinen egituraren egoera txarra zela eta etxetik alde egin behar izan zuten familiei.

Gizarte Politiken eta Osasun Publikoaren zinegotzi Peio López de Munainek udaletxean gogorarazi duenez, “duela urte bat esan genien ez zirela kalean geratuko birgaitzeko lana bukatzen ez bazen. Horregatik, luzatu egingo dugu orduan eman genien bizileku baliabidea”.

 Udalaren laguntza jasotzeko, eragindako familiek Familian Esku Hartzeko Planean jasotako konpromisoak bete behar dituzte. “Beren etxebizitzak konpontzeko behar dena egiten ari dira. Hala ere, birgaitzeko epeak sinatu zuten kontratuaren hasierako iraupena baino luzeagoak izango direnez, iaz aurreratu genuena egingo dugu, eta udal etxebizitzetan jarraituko dute”.

 2017ko urriko ebazpen baten bidez, Hirigintzako zinegotzi ordezkariak Santo Domingo kaleko 40. eta 42.ean bizi ziren pertsonei etxetik ateratzeko agindu zien, bi eraikinen egituraren egoera txarra zela eta, leku batzuetan “behea jotzeko arriskua” baitzuten. Gizarte Politiken eta Osasun Publikoaren Sailak kasuak banan-banan aztertu eta familia bakoitzaren etxebizitza eskaerari erantzun zion, gizarte balioespena kontuan hartuz.

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  5 urria 2018 12:14

Tokiko Gobernu Batzarrak helburu sozialeko bi hitzarmen sinatzea onetsi du gaur: bat ONCErekin eta beste bat Gao Lacho Drom elkartearekin.

Lehenak 8.430 euroko aurrekontua du, gizartea ikusmen desgaitasuna duten pertsonen arazoez informatu eta sentsibilizatzeko jarduerak egiteko xedez, gizarte-integrazio handiagoa lor dezaten. Herritarrei ONCEren gizarte eta asistentzia lana ezagutarazteko ere balioko dute jarduerek.

Bigarren hitzarmenak 60.765 euroko zuzkidura du, eta horrek aukera emango dio Gao Lacho Drom elkarteari aurten Gasteizko ijito komunitateko pertsona, familia eta taldeak gizarteratzeko prozesuetan lagundu eta jarraipena egiteko programa finantzatzeko.

Gizarte Politiken zinegotzi Peio López de Munainen iritziz, “horrelako ekintzak oso garrantzitsuak dira, populazio sektore bat gizartetik bazter geratzeko arriskuari aurrea hartzen laguntzen baitigute, haien integrazioa, autonomia eta ongizatea landuz”.

 Kontratuak luzatzea

Bestetik, Gizarte Politiken eta Osasun Publikoaren Sailak erabaki du urtebete luzatzea sailaren zenbait zerbitzu eta programatan eskaintzen diren gizarte eta komunitate jarduerak garatzeko kontratuak. Zehazki, 1.071.851  euro erabiliko dira horretan diharduten sei enpresek lanean jarrai dezaten aurtengo urritik 2019ko abuztura arte.

 

 

Share
Kategoriak: Fotonotizia, Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  1 urria 2018 19:01

Adinekoen zentro soziokulturalek Adinekoen Nazioarteko Eguna ospatu dute gaur arratsaldean; zenbait jarduera antolatu dituzte Espainia plazan, eta jai giroko ibilaldia egin dute erdialdeko kaleetatik.

Gizarte Politiken eta Osasun Publikoaren zinegotzi Peio López de Munain arduratu da ekitaldietara joan direnei ongi etorria emateaz; hark esan duenez, “adinekoek erakusten dute adinak axola duela, adinekoa izatea ez dela geldi egotearen sinonimoa, baizik eta bizitasunarena, egiteko ahalmenarena, dinamismoarena. Estereotipoak apurtzeko unea da”.

Aurten, Adinekoen Nazioarteko Egunean Gasteizen talde horretan dagoen kultur aniztasuna nabarmendu nahi izan da, milaka baitira duela urte asko jatorrizko herri eta erkidegoetatik migratu zutenak; “horrenbestez, migrazioaren esperientzia bizi izan zuten, eta orain  Gasteizen adineko eta etorkin izatearen erronkari aurre egin behar diote”, azaldu du López de Munainek.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  28 iraila 2018 10:31

Tokiko Gobernu Batzarrak lau kontratu luzatzea onetsi du gaur, beste horrenbeste gizarte programa eta baliabideei eusteko. Gizarte Politiken eta Osasun Publikoaren Sailak euro baino zertxobait gehiago bideratuko du horretara.

Diru-kopuru handieneko kontratua Tomas Zumarraga Dohatsuaren kaleko adinekoentzako eguneko arreta zerbitzua, jantokia eta zainpeko apartamentuak kudeatzeari dagokio, zeina 2019ko urriaren 1era arte luzatuko baita, 540.800 euroan. Zainpeko apartamentuetan 40 leku eskaintzen dira, eta eguneko arreta zerbitzuan, 23.

Bestetik, Gizarte Politiken Sailak 498.998 euro jarriko ditu arrisku egoeran dauden familientzako laguntza eta garapen programa (ADA) datorren urteko azarora arte luzatzeko. Babes gabezia izateko arrisku moderatua duten haur eta nerabeak dituzten 26 familiari gehienez ematen die arreta programak. Gizarte, hezkuntza eta psikologia aldetiko laguntza ematen da, familien barruan.

Santa Maria kantoiko, Hedegile kaleko eta Paula Montal kaleko gizarte eta heziketarako zentroak kudeatzeko kontratuaren luzapena ere onetsi da; babes-gabezia arrisku moderatuan dauden 3 eta 18 urte bitarteko haur eta nerabeei ematen diete arreta zentro horiek. “Haurrek hezitzaile talde batekin ematen dute eguna zentroetan, zeinek garapenean laguntzen eta arreta sozial eta psikologikoa eskaintzen baitiete. Esku-hartzearen barruan, familiei ere laguntza ematen diegu”, azaldu du Gizarte Politiken zinegotzi Peio López de Munainek; 447.085 euro jarriko dira baliabide horiek jarrai dezaten.

Luzatuko den azken programa Bidatu da; gizarte zein hezkuntza alorretan esku-hartzeko baliabidea da, babesgabetasun egoera moderatuan dauden 0 eta 8 urte bitarteko seme-alabak dituzten amek osatutako familiei zuzendua, baldin eta familia zein gizarte laguntza-sarerik ez badute. Programa Udalaren jabegoko bi etxebizitzatan gauzatzen da. Gehienez 6 ama eta 12 umeri eman dakieke arreta aldi berean. Haurtzaro eta Senitarte Zerbitzuak 199.045 euro jarriko ditu baliabide hori urtebetez eskaintzeko.

Hitzarmena

Azkenik, Zubia Gurutzatzen elkartearekin lankidetza-hitzarmena sinatzea onetsi du Tokiko Gobernu Batzarrak, 2018an Abetxukuko ekimen etxearen proiektua garatzeko.

Gizarte ahultasun-egoeran daudelarik garapen pertsonala eta autonomia sustatzeko okupazio-jardueraren batean aritzeko beharra duten pertsonekin  egiten du lan elkarteak. Udalaren ekarpena 77.000 eurokoa izango da.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  20 iraila 2018 09:13

Irailaren 24an hasiko da izen ematea, programazio berriko lehenengo jardueretarako 

Adinekoak zaintzen dituzten 152 familiari eta 220 zaintzaileri lagundu zien Gizarte Politiken eta Osasun Publikoaren Sailak Adinekoak zaintzen dituzten familiei laguntzeko programaren bitartez. Arnasa hartzeko zerbitzuaren laguntza jaso zuten, baita laguntza psikosoziala eta besteak eta norberaren burua hobeto zaintzeko prestakuntza ere.

Familiei laguntzea du helburu aurki jarduera berriei ekingo dien Adinekoak zaintzen dituzten familiei laguntzeko programak. “Gure adinekoen ongizatea bezain garrantzitsua da zaintzen dituztenena. Izan ere, estres-iturria da haientzat adineko bat zaindu behar izatea, ondorio fisikoak eta emozionalak izan ohi baititu horrek. Horregatik, familiei laguntzen diegu eta, aldi berean, adinekoek —ahalik eta baldintzarik onenetan— etxean jarraitzea ahalbidetzen”, azaldu du Gizarte Politiken zinegotzi Peio López de Munainek.

Joan den urtean 152 familiari eskaini zion arreta programak, arnasa hartzeko zerbitzu baten bitartez: asteburuko eguneko zentroa (60 familiak baliatu zuten) eta etxean laguntzeko zerbitzua (92 familiak). Zerbitzu horietako lehena larunbat eta igandeetan eskaintzen da, San Prudentzioko eguneko zentroan, eta bigarrena, berriz, familia-langileek ematen dute, familia zaintzaileek egiteko hori familia-, lan- edo gizarte-bizitzarekin bateratzerik izan dezaten.

Era berean, 112 pertsonek laguntza psikosoziala jaso zuten, eta 108k 10 prestakuntza-jardueratan parte hartu zuten, beren intereseko gaiak jorratzeko: legedia, besteak eta norberaren burua zaintzeko estrategiak eta abar.

 

Programazio berria 

Datorren astelehenean —irailak 24— hasiko da laguntza-programa horren programazio berriko lehenengo jardueretarako izena emateko epea. Urritik ekainera bitartean iraungo du programazioak.

Jarduera ugari biltzen ditu programazioak: Adinekoen Zerbitzuak eskaintzen dituen baliabideei buruzko informazioa emateko solasaldiak (laguntza psikologikoa, etxean laguntzeko zerbitzua), hainbat gai lantzeko hitzaldiak —aurretiazko borondateak, zaintzaren planifikazioa, erorikoen prebentzioa—, erlaxazio-lantegia, mantentze-gimnasia, adinekoak mugitzeko eta lekuz aldatzeko teknikak eta abar.

Aurreko programazioaren aldean, berritasun gisa, prestakuntza-jardueren ordutegia hobetu da, familien eskaerari erantzunez. Orobat antolatuko dira bilerak zaintzaileekin, beren intereseko kontuez jarduterik izango duten elkargune bat sortzeko.

Hauek izango dira martxan jarriko diren lehenengo jarduerak: Laguntza Psikologikorako Zerbitzuari eta “Hobeto zaintzen ikasten, etxean” baliabideari buruzko solasaldia, eta mantentze-gimnasiako lantegia, zaintzaileen sasoia, indarra eta erresistentzia hobetzeko.

Kasu batean nahiz bestean, urrian hasiko da jarduera, eta irailaren 24tik aurrera eman beharko da izena. 945 13 56 16 telefonora deituz apuntatu ahal izango dira parte hartu nahi dutenek, eta informazio gehiago jaso.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  14 iraila 2018 14:50

 

Gasteizko adinekoentzako zentro soziokulturalen sareko “Piztu zure auzoa” programak Eusko Jaurlaritzak antolatutako “Lagunkoitasuneko jardunbide egokiak Europan-Euskadi Lagunkoia” jardunaldietan banatutako hiru akzesitetako bat lortu du. Proiektuak lehen saria lortu nahi zuen, baina azkenean Bilboko udaleko “Begirada aktiboa -bakardade egoerak antzematen” ekimenak eskuratu du lehen saria.

Peio Lopez de Munain lehen alkateordeak topaketen inaugurazioan adierazi duen bezala, “Piztu zure auzoa programak” auzoak adinekoentzako atseginagoak eta irisgarriagoak egitea du xede. Enplegu eta Gizarte Politiken Sailburu Beatriz Artolazabal izan da topaketen buru.

Jardunaldiak Euskadin lagunkoitasuna bultzatzeko balioko duten esperientzia berri eta sortzaileak partekatzea izan du helburu.

Share

Aurrekoak »