Prentsa Oharren banner

Gasteizek 40.000 bideratuko ditu udalerriko herrietako ekipamenduak hobetzen laguntzera

2021ean Gasteizko udalerriko menpeko toki-erakundeen jabegoko ekipamenduetan egindako obrak finantzatzeko dirulaguntza-deialdi publikoa onetsi du Tokiko Gobernu Batzarrak; 40.000 euro baliatuko dira.

Xedea Gasteizko udalerriko herrietako ekipamenduak eraberritzeko gastuak finantzatzea da, ekipamenduen egoera hobetzeko, oinarrizko hornidura jartzeko, irisgarritasun legera egokitzeko, eta erabilera baldintzak hobetzeko bestelako egokitzapen eta horniduratarako.

“Beti esaten dugu Gasteiz hiri bat baino gehiago dela, eta lan handia egiten duten 63 herrixkak osatzen dutela. Deialdi honen bitartez, bilakatzen eta hobetzen laguntzen diegu, bertako bizilagunek bizi-kalitate hobea izan dezaten. Lan hauek menpeko toki-erakundeetako zentro sozialak, pabilioiak, liburutegiak, frontoiak eta bestelako zerbitzu publikoak modernizatzeko balio dute” adierazi du Gorka Urtaran alkateak.

Share

Udal Gobernuak mugikortasun-ordenantza berri bat proposatu du, bide-segurtasunaren alde egiteko eta garraiobide guztien arteko bizikidetza bermatzeko asmoz

 

Mugikortasun-ordenantza dosierra

 

“Orain arte, permisiboak izan gara bizikletekin, erabilera sustatzeko; orain, espaloietatik eta oinezkoentzako guneetatik atera behar ditugu, galtzadatik joan daitezen”

Gorka Urtaran alkatea: “Mugikortasun pertsonaleko ibilgailuen ugaritzeak Gasteizen horien erabilera arautzeko beharra ekarri du. Galtzadatik eta bidegorrietatik joan beharko dute

15 urtetik beherakoek oinezkoen guneetan eta espaloietan erabili ahalko dute bizikleta, eta 12 urtetik beherakoak badira, heldu batek lagunduta joan ahalko dira

Isun pedagogikoak sortuko dira falta arinentzat, 40 eurokoak, eta horien barruan sartuko da espaloi eta oinezkoentzako guneetatik MPIz eta bizikletaz ibiltzea

 

Gasteizko Udala mugikortasun-ordenantza berri bat lantzen ari da, “bide-segurtasunaren alde egiteko eta garraiobide guztien arteko elkarbizitza bermatzeko“, Gorka Urtaran alkateak gaur goizean azaldu duenez. Gaur goizean onetsi du Tokiko Gobernu Batzarrak araudi berria; ondoren, batzordean eztabaidatu eta Osoko Bilkuran onartu beharko da, udazkenean indarrean sartuko dela aurreikusi baitute. Gainera, udal gobernuak gizarte taldeekin eta mugikortasunaren arloko elkarteekin lan egiten jarraituko du dagokion elkargunean, haien ekarpenak jasotzeko.

Bizikletak eta mugikortasun pertsonaleko ibilgailuak (patineteak) galtzadatik eta bidegorrietatik ibiltzea aurreikusten du ordenantzak, eta ibilgailu horiek espaloietatik eta oinezkoentzako guneetatik igarotzeari uztea. “Azken urteotan, garraiobide berrien hazkunde esponentziala izan dugu, hala nola bizikleta eta patinete elektriko edo mugikortasun pertsonaleko ibilgailuena, azken horiek askoz fenomeno berriagoa badira ere. Orain arte, Udala permisiboa izan da, bereziki bizikletekin, hirian erabilera sustatzeko eta oso apustu sendoa egin dugulako horren alde. Baina argi dago bide-segurtasuna bultzatu behar dugula, oinezkoa babestu, eta kaleetan ikusten ditugun garraiobide guztien arteko bizikidetza sustatu“, adierazi du Mugikortasunaren eta Espazio Publikoaren zinegotzi Raimundo Ruiz de Escuderok. 15 urtetik beherakoek, ordea, baimena izango dute oinezkoentzako guneetatik eta espaloietatik bizikletaz ibiltzeko, eta 12 urtetik beherakoak heldu batek lagunduta joan ahalko dira.

Gobernu taldeak proposatutako testuak hainbat berrikuntza ditu. Adibidez, 16 urtetik beherakoek kasko homologatua erabili beharko dute bizikletan nahiz patinete elektrikoan ibiltzeko. Eta, jakina, gauez eta ikuspen gutxi dagoenean, argiak eta arropa islatzaileak eraman beharko dira, bai bizikletaz bai MPIz ibiltzeko.

Era berean, debekatuta egongo da aurikularrak edo telefono mugikorra erabiltzea edo animaliak uhalarekin lotuta eramatea. Bestetik, oinezkoentzako pasabideetatik ezingo da bizikletaz edo mugikortasun pertsonaleko ibilgailuz zirkulatu. “Nahitaezkoa izango da ibilgailutik jaistea horretarako. Leku horietan segurtasuna handitzea ahalbidetuko duen neurria da“, azaldu du zinegotziak.

Mugikortasun urriko pertsonentzako ibilgailuak eta motorrik gabeko mugikortasun pertsonaleko aparatuak (adibidez, patinete ez-elektrikoak), berriz, oinezkotzat hartuko dira. Beraz, oinezkoentzako guneetatik ibili ahalko dira. Hori bai, oinetan lotutako patinetan doazenek bizikleta-bideetatik joan beharko dute.

Segurtasunari dagokionez, bada beste neurri berritzailerik: debekatuta egongo da geldirik dagoen edo oinezkoentzako pasabide baten aurretik abiadura murrizten ari den beste ibilgailu bat aurreratzea.

Garraiobideen arabera, hauek dira ideia nagusiak:

BIZIKLETAK

  • Galtzadatik edo bidegorrietatik zirkulatu beharko dute.
  • 15 urtetik beherakoak bizikletaz ibili ahalko dira oinezkoentzako eremuetan eta trafiko mugatuko bideetan. 12 urtetik beherakoak adindun batek lagunduta ibili ahalko dira, zein bere bizikletaz, eta hura izango da adingabearen arduraduna.
  • 7 urtetik beherako bi haur eraman ahalko dira, aulki homologatuetan.
  • Bizikletek txirrina eraman behar dute.
  • Bizikletek paraleloan zirkulatu ahalko dute, binaka.

PATINETE ELEKTRIKOAK

  • Galtzadatik eta bidegorrietatik zirkulatu beharko dute.
  • 15 urtetik beherakoek ezin izango dute MPIrik erabili.
  • MPIek ezingo dute orduko 25 kilometroko abiadura gainditu.

MOTORRAK

  • Oinezkoentzako guneetan ziklomotorrak edo motozikletak aparkatzeko lekuak ezar daitezke, baina debekatuta dago bertara sartzea motorra martxan dagoela.

BESTE

  • MPAk (motorrik gabeko patineteak) oinezkotzat hartzen dira; beraz, oinezkoentzako guneetatik zirkulatu ahalko dute, eta lehentasuna izango dute oinezkoentzako pasabideetan. Ezin izango dira espazio publikoetan aparkatu edo utzi.
  • Mugikortasun urriko pertsonentzako ibilgailuak oinezkotzat joko dira oinezkoen eremuetan, edo txirrindularitzat bizikleta-bideetan.
  • Oinetan lotutako patinez mugitzen diren pertsonek bizikleta-bideetatik joan beharko dute.

Aparkalekuak

Aparkalekuei dagokienez, bizikletak eta mugikortasun pertsonaleko ibilgailuak bizikleta-aparkalekuetan utzi beharko direla ezarriko du Udalak araudi berrian. Zonan horrelakorik ez badago, edo une horretan tokirik ez badago, ibilgailuak hiri-altzarietara lotu ahalko dira, gehienez ere 24 orduz, zuhaitzei edo eserlekuei izan ezik.

Udal Gobernuak atal berezi bat idatzi nahi izan du alokairu-enpresen patineteak gaizki aparkatuta uztea eragozteko, gerora hirian horrelakorik instalatzen bada ere. Horrekin lotuta, Udalak hirian horrelako ekimenak baimentzeko edo ez baimentzeko eskubidea du.

Zigorrak

Udalak zigorren zerrenda berria landu du, falta arinak isun txikiagoz zigortzeko xedez. “Betetzen ez duenari zigorra ezartzea nahi dugu, baina ez dirua biltzeko asmoz, neurri pedagogiko gisa baizik“, azaldu du Raimundo Ruiz de Escuderok. Ildo horretatik, arau-hauste berria sortuko da, 40 euroko isunarekin zigortzen duena “MPIz edo bizikletaz zirkulatzea espaloietatik, oinezkoentzako guneetatik edo horretarako gaituta ez daudenetatik“. Horrez gain, antzeko beste zigor batzuk izango dira.

 

Share

Bederatzi entitatek bat egin dute sendagaiek ingurumenean sortzen duten kutsadura ikertu eta horren kontrako konponbideak aplikatzeko

 

Gorka Urtaran alkatearen adierazpenak

Gasteizko Udalak, Arabako Foru Aldundiak, Euskal Herriko Unibertsitateak, Bioaraba Osasun Ikerketako Institutuak,  Vital Fundazioak, Arabako Sendagaigileen Elkargo Ofizialak, BIC Arabak,  AMVISAk eta AquaDatek protokolo bat sinatu dute gaur goizean, farmakutsaduraren alorreko berrikuntza-programa bat garatzeko; Gasteizen eta Araban sendagaiek ingurunean sortzen duten kutsaduraren aurkako irtenbideak ikertu, aplikatu eta ezagutarazteko konpromisoa hartu dute horren bitartez.

Alkate Gorka Urtaranek, diputatu nagusi Ramiro Gonzálezek eta EHUko errektore Eva Ferreirak eman dute hitzarmenaren berri prentsaren aurrean; ekitaldian beste hauek ere izan dira: Mª Ángeles García Fidalgo, Bioaraba Osasun Ikerketako Institutuko zuzendari zientifikoa; Jon Urresti, Vital fundazioko lehendakaria; Milagros López de Ocariz, Arabako Sendagaigileen Elkargo Ofizialeko lehendakaria; David Montero, BIC Arabako zuzendaria; Ángeles Gutiérrez, AMVISAko lehendakaria, eta Jorge García del Arco, Aquadat startup-aren fundatzaileetako bat. Bederatzi entitate horien ordezkariek sinatu dute lankidetza-protokoloa, zeina oinarria baita berariazko hitzarmenen bidez garatzekoak diren ekintzetarako.

Besteak beste, planetak gero eta toxikotasun-arazo gehiago izateak ekarri du ituna hitzartzea. Zehazki, “kutsatzaile izendatu berriak” deritzenek gero eta kezka handiagoa sortzen dute, eta horrek farmakutsadurari erreparatzea ekarri du, alegia, sendagaiek beren bizi-zikloaren etapa bakoitzean ingurumenean eragin dezaketen kalteari.

 

Berariazko ikerketa-proiektua 

Zenbait alderdi aipatzeagatik, protokoloak aurreikusten du ikerketa proiektu bat abian jartzea hondakin-uretan eta ekosistemetan kutsatzaile izendatu berririk dagoen eta horrek zein eragin izan dezakeen zehazteko. Orobat, ikerketa zientzialarien artean eta gizartean ezagutarazten lagunduko da, jardunaldi, mintegi edo biltzarren bitartez.

Sendagaiak zentzuz erabiltzea

Hartutakoen arteko beste konpromiso bat da sendagaiak zentzuz erabiltzeko irtenbideak identifikatzen eta garatzen lan egitea, eta farmakutsadurak duen inpaktuari buruzko prestakuntza ematea osasun alorreko langileei. Entitate sinatzaileek, orobat, irtenbide teknologikoak sustatuko dituzte farmazia-produktuak eraginkortasun handiagoz desagerrarazi ahal izateko.

Gasteiz eta Arabarentzat garrantzi handia duen ekimen honek badu aurrekaririk orain protokoloan parte hartzen duten ikertzaileen eta entitateen arteko lankidetzari dagokionez:  hondakin-uren epidemiologiari buruzko azterlana, SARS-CoV2 garaiz antzemateko, farmakoak kuantifikatzeko eta substantzia toxikoak analizatzeko, Gorka Orive eta Unax Lertxundi zientzialariek egindakoa. 

Gasteizko alkate Gorka Urtaranen ustez, Gasteiz eta Araba ezin egokiagoak dira laborategi-lurralde gisa: “ikerketa zientifikoa funtsezko tresna da errealitatea ezagutu eta hobetzeko, eta neurri eta ekintza politikoak erabakitzen laguntzen digu. Gaur mahai berean eseri gara erakundeen, zientziaren, ikerketaren eta ekintzailetzaren alorretako eragileak, nire irudiko Vitoria-Gasteiz Green Deal denaren adibide grafikoa osatuz, zeina gure hiriaren aldeko ituna baita, hurrengo belaunaldien etorkizunaren aldekoa, baita planetaren aldekoa ere”.

Arabako diputatu nagusi Ramiro Gonzálezek, berriz, “prestakuntza eta ikerketaren beharra eta teknologia aliatutzat izatearen beharra” azpimarratu du, “agertzen ari diren arazo berriei aurre egiteko, farmakutsaduraren kasuan bezala. Aldundiak berrikuntzaren aldeko apustua egin du, eta aspalditik ari da bultzatzen alor publikoaren eta pribatuaren zein erakundeen arteko lankidetza-eredu hauek, hainbat eragilerekin. Egiaztatu da aliantza horiek funtzionatzen dutela Arabako etorkizuna sendotzeko xedea duten proiektuetan. Akordio honen bidez, teknologiaren alorrean I+G+B lantzeko ezagutzaren oinarriak ezartzen ditugu, urak farmakutsatsailez arazteko“.

EHUko errektore Eva Ferreirak ere Arabako zenbait erakundek eta entitatek gaur sinatu duten protokoloaren garrantzia aipatu du: “Berriro ere, gaur sinatu dugun asmo-akordioak erakusten du zein balio handia duen unibertsitate-ikerkuntzak gizarteari zerbitzu emateko. Farmakutsadura lehen mailako arazoa da. Horregatik, ingurumena aldezteko konpromiso politiko eta sozialak ikerketa zientifikoaren laguntza behar du, besteak beste, euskal unibertsitate publikoarena“.

EHUko ikertzaile Gorka Oriveren hitzetan, “akordio hau beharrezko oinarri eta pizgarria da gure inguruan jarduera multzo bati ekiteko, hala nola kalitateko ikerketa, alorrean aintzindaria izango den prestakuntza, eta herritarrei farmakutsaduraren arazoa ezagutarazteko zabalkundea“.

 

Share

Alkateak Gasteizko superetxadien eredua defendatu du aldaketa klimatikoaren aurkako estrategia gisa SUM Bilbao biltzarraren aurkezpenean

Gasteizko alkate eta EUDELen elkarteburu Gorka Urtaranek parte hartu du, modu telematikoan, gaur goizean SUM Bilbao biltzarra aurkezteko egin den ekitaldian.

Gorka Urtaran alkateak azaldu duenez, EUDEL Itun Berde handi bat bultzatzen ari da, ‘Euskal Udalen Green Deal’ delakoa, hirien eta herrien eraldaketa iraunkorraren protagonista izan daitezen.  Urtaranek azpimarratu duenez, “Euskal Udalok planetaren erronka nagusiekin konprometituta gaude: klima-aldaketa eta trantsizio energetikoa, garraio publiko modernoa eta pertsonei lehentasuna emango dien hiri-mugikortasuna”. Adibide zehatzen artean, alkateak Gasteizen ‘superetxadien’ proiektua nabarmendu du, eta proiektu horren ardatza “espazio publikoa pertsonei ematea” dela adierazi du.

Share

Gasteizko Udalak, Aldundiak, Eusko Jaurlaritzak eta Elizbarrutiak erabaki dute martxoaren 3ko Biktimen Oroimenezko Zentroa jartzea Zaramagako San Frantzisko elizan

  • Lekua kudeatuko duen fundazio bat sortzea sustatuko dute lau erakundeek

 

  • 2014tik ez da elizkizunik egin eliza horretan

Gorka Urtaran audioa

Gasteizko Zaramaga auzoan dagoen San Frantzisko Asiskoaren elizak hartuko du martxoaren 3ko Biktimen Oroimenezko Zentroa. Hala erabaki dute gaur goizean, Beatriz Artolazabal Eusko Jaurlaritzako Berdintasuneko sailburuak, Ramiro Gonzalez Arabako ahaldun nagusiak, Gorka Urtaran Gasteizko alkateak, eta Juan Carlos Elizalde Gasteizko Elizbarrutiko gotzainak.

Lau erakundeek asmoen protokolo bat sinatu dute gaur Zaramagako elizan bertan. Dokumentu horretan, era berean, alderdiek fundazio bat edo antzeko formula bat sortzea adostu dute, oroimen-zentroa sustatu eta kudeatzeko, eta Arabako hiriburuko Elizbarrutiak elizaren erabilera lagako dio sortutako fundazioari, martxoaren 3ko Biktimen Oroimenezko Zentroaren sorreran aurrera egin dezan.

San Frantzisko Asiskoaren elizan eta haren ingurune hurbilean 1976ko martxoaren 3an gertatutakoei lotutako karga emozional handia dela-eta, dokumentuan jasotzen denez, “oroimen-zentroa kokatzeko lekurik egokientzat” jotzen da eliza hori. Gainera, tenpluak ez du elizkizunik hartzen 2014tik.

1976ko martxoaren 3an, bost pertsona hil ziren polizia armatuak elizan eta inguruetan egindako tiroen ondorioz. José Castillo García, Bienvenido Pereda Moral, Romualdo Barroso Chaparro, Francisco Aznar Clemente eta Pedro María Martínez Ocio izan ziren. Gainera, ehunka pertsona zauritu ziren.

Eusko Jaurlaritza, Foru Aldundia, Udala eta Gasteizko Elizbarrutia bat datoz esatean data hori “Gasteizko memoria kolektiboan grabatuta” dagoela eta gertakari horien oroitzapena “San Frantzisko Asiskoaren elizari lotuta” dagoela. Hain zuzen, oraindik ere tiro-markak ikus daitezke tenplu horren fatxadan.

Egun ‘historikoa’

Erakundeak bat etorri dira gaurkoa egun “historikoa” dela adieraztean. “Gaur behin betiko kitatzen hasiko gara martxoaren 3ko gertaerekin eta haien biktimekin dugun zorra”, adierazi du horren harira Beatriz Artolazabal Eusko Jaurlaritzako Berdintasun, Justizia eta Gizarte Politiketako sailburu eta Zaramaga auzokoak. “Erakunde-lidergotik eta gizarte-lankidetzatik abiatzen den proiektu baten aldeko apustua egiten dugu, erakunde memorialisten, biktimen familiartekoen eta martxoaren 3ko biktimen militantzia zuten langileen sindikatuen parte-hartzea duen proiektuaren aldekoa. Norabide horretan ari gara lanean, eta, horretarako, bilerak eta kontaktuak izan ditugu azken hilotan”.

“1976ko martxoaren 3an, gertaera tragiko eta tamalgarri batzuk izan ziren eliza honetan. Gaur, lehen harria jarri dugu hemendik aurrera oroimenaren gune eta elkarbizitzarako itsasargi izan dadin”, azpimarratu du. Artolazabalen ustez, “oroimenerako, egiarako eta aitortzarako eskubidea ez da preskribatzen”, eta beharrezkoa da “egiarako oroimen bat, etorkizunerako oroimen bat, bizikidetzarako oroimen bat” gogoan izatea. Ildo horretatik, sailburuak adierazi duenez, “Estatua da martxoaren 3an Gasteizen polizia armatuak indarkeria modu indiskriminatu eta ez-legitimoan erabiltzearen erantzulea”, eta “Espainiako estatuak, egindako kaltea aitortzeaz gain, bere autokritikan eta aitorpenean irmoa izan behar du: bidegabea izan zen, erabat bidegabea”.

Ildo beretik mintzatu da Ramiro González Arabako diputatu nagusia, eta honako hau azpimarratu du: “indarkeriaren biktima guztiek dute egiarako, erreparaziorako eta justiziarako eskubidea”. Era berean, esan duenez, “kasu honetan, denbora gehiegi behar izan da. 45 urte igaro behar izan dira zentro hau posible izateko. Urte asko daramatza Arabako gizarteak aldarrikapena egiten”.

Era berean, honako hau gogorarazi du: “urte hauetan guztietan, biktimak, askotan, aitorpenik eta erakunde-laguntzarik gabe sentitu dira”. “2008. urtera arte itxaron behar izan zen erakunde-aitorpena egiteko”, esan du Arabako Foru Aldundiak Arabako Domina martxoaren 3ko biktimei eman izanaren harira; kolektibo horri egiten zaion lehen erakunde-aitorpena da.

Bestalde, Gorka Urtaran Vitoria-Gasteizko alkateak gogorarazi du justizia hitza Gasteizko gizarteak urteotan baliatu duen estandartea izan dela. “Duela 45 urte, sarraskiaren ondoren, baten batek pintada ikonikoa egin zuen, odolez, eliza honetatik hurbil dagoen zoladuran, eta, haren bidez, justizia eskatzen zuen, bost langile horien erailketagatik”.

Alkatearen iritziz, justizia eta erreparazioa egoteko, “ezinbestekoa da memoria egotea. Gaur urrats garrantzitsua eman dugu, 1976an Vitoria-Gasteizen erail zituzten bost langileak, oraindik merezi duten aintzatespena jaso ez dutenak, azkenean aintzatetsi ditzaten, polizia-abusuen biktima gisa –terrorismoaren biktimekin parekagarri–. Martxoaren 3ko Biktimen Memoria Zentroa gertakariak izan ziren elizan bertan egotea erreparazioaren eta memoriaren alde irmotasunez lan egitea da, eta horretan jarraituko dugu Udalean”.

Juan Carlos Elizaldek amaitu du hitzaldien txanda, eta eskerrak eman ditu Eusko Jaurlaritzak, Foru Aldundiak eta Udalak elkarrekin antolatu duten ekimen honengatik. Erakunde horiek Gasteizko Elizbarrutia ere gonbidatu dute proiektu horretan parte hartzera. “Apezpikutzak atsegin handiz onartu du gonbidapen hau; izan ere, guztion borondatea da hemen eta leku honen inguruan oraintsuko historiako une kritiko eta erabakigarri batean bizitza galdu zuten bost pertsona horiei omenaldia egitea, halako gertakaririk berriz gerta ez dadin”. Apezpikuak honako hau ekarri du gogora: “duela lau hamarkada, oraindik demokraziarik ez zegoenean, Espainiako Trantsizioan, bete-betean, parrokietan bilera asko egiten ziren eta, haietan, apaizek obreroen bileretarako ireki zituzten tenpluak. Haiek guztiak ere gogora ekarri nahi ditugu”.

Prelatuak, gainera, honako hau nabarmendu nahi izan du: “Zaramagako eliza honek tenplu honi bizitza eman zion eta auzoan, Artzain Onaren eta Belengo Amaren parrokietan, bizirik jarraitzen duen kristau-elkartearen memoria gordeko du, igandero, tenplu honetan, euskaristia ospatzen zuten eta kristau-erantzukizunean oinarritzen ziren obreroen familia horien fedearen oinordeko gisa”. Beraz, “Arabako elizak ere uste du elkarlanean jardun behar duela gainerako erakundeekin eta, horretarako, gure historia kolektiboaren une hau idazten lagundu, zerbitzatzen jarraitu nahi duen gizarte honen zati den aldetik”.

 

 

 

Share

Gaurtik aurrera, San Martinen landatutako gereziondo batek omenduko ditu minbizia duten haur eta nerabeak

Aspanafoa elkarteko eta Udaleko ordezkariek hartu dute parte landaketan, gaixotasun hori duten umeei eskainitako nazioarteko egunean

 Gaur goizean, gereziondo bat landatu da Gasteizen, San Martineko skate pistaren ondoan, minbizia duten edo izan duten haur eta nerabeak omentzeko. Aspanafoa-Minbizia duten Haurren Gurasoen Arabako Elkarteko eta Udaleko ordezkariek hartu dute parte landaketan, gaixotasun hori duten umeei eskainitako nazioarteko egunean.

Aspanafoako lehendakari Mikel Garcíak familiek minbizia duten seme-alabei laguntzeko egiten duten lana aipatu du. Ondoren, Arkaitz Secok —gaixotasuna gainditu duen nerabea— eta Gorka Ortiz de Urbinak —”Zeledon”—  gaurko egunarekin lotutako adierazpen bat irakurri dute. Alkate Gorka Urtaranek, berriz, elkartearen lana eskertu du, eta nabarmendu du: “ez dago gure seme-alaben bizitza baino ezer garrantzitsuagorik, eta kasu honetan, zailtasunak gainditzearen benetako ereduak dira“. Orobat, familiek seme-alabei eskaintzen dieten laguntza morala goraipatu du, eta tratamendu mediko berriak lortzearren egiten duten lan nekaezina, minbiziari arrakasta portzentaje handiagoz aurre egin ahal izateko. “Zuen lana funtsezkoa da”, esan die.

Ondoren, Udalak dohaintzan emandako gereziondo autoktono bat (Prunus avium) landatu da, eta elkarteko zenbait umek koloretako paperez egindako eskutxoak eta urre koloreko begiztak zintzilikatu dituzte arbolaren adarretatik, umeen minbiziaren aurkako borrokaren sinboloa baita; gaixotasun hori sendatu egiten da ehuneko handi batean. Osasun zinegotzi Livia Lópezek eta Espazio Publikoaren zinegotzi Raimundo Ruiz de Escuderok ere hartu dute parte ekitaldian.

Eraikinak argiztatzea

Gasteizko Udalak bat egin du Minbizia duten Haurren Nazioarteko Egunarekin, eta gaur, otsailak 15, urre kolorez argiztatuko ditu udaletxea, Arkupeak eta Floridako kioskoa.

2002an aukeratu zen data hori, Luxenburgon, jendea ume eta gazte askori eragiten dien gaixotasun horretaz kontzientziatu eta sentsibilizatu dadin. Familiei ere lagundu nahi die, seme-alabek diagnostiko egokia izan dezaten, eta bizitzeko eskubideaz gozatzea ahalbidetuko dien tratamendua jaso.

Urre koloreko begizta aukeratu da mundu osoan minbiziaren kontra borrokatzen ari diren umeei sostengua adierazteko. Hiriko zenbait ikastetxetako ikasleek ere urre koloreko begiztak eramango dituzte, eta egun hori gogoratzeko jarduerak egingo.

 

 

Share

Ostalaritzak Covid-19aren ondorioei aurre egin diezaien, neurri berriak proposatu ditu alkateak

  • Sektore hori, 2021. urte osoan, mahaitxoen tasa eta zabor-tasa ordaintzetik salbuestea proposatu du
  • Milioi bat euro inguruko eragin ekonomiko positiboa izango du neurri horrek ostalaritzan

Gorka Urtaran alkateak neurri berriak proposatu ditu ostalaritzari eta jatetxeei laguntza fiskala emateko, egoera sanitarioak eragindako krisiak gehien kaltetu duen sektoreetako bat izaki. Hain zuzen ere, 2021. urte osoan mahaitxoen tasa eta zabor-tasa ordaintzetik salbuestea proposatu du alkateak. 820.000 euro inguruko eragin ekonomiko positiboa izango du neurri horrek sektorean —300.000 euro ingurukoa, mahaitxoen kasuan, eta 520.000 euro ingurukoa, aldiz, zabor-tasaren kasuan—.

“Ostalaritzako profesionalek ez dute gertatzen denaren erantzukizun zuzena, baina herritarren osasuna bermatzeko hartzen diren erabakiak ordaintzen ari dira. Bizi dugun eta hilabeteetan luzatzen ari den salbuespen-egoera dela eta, neurriak hartu beharra dago, tasak bertan behera uzterik izan dadin 2021ean ere, iaz bi alditan egin genituen bezala”, azaldu du Gorka Urtaranek, zein neurri berriak prestatzen ari baita, Ogasun Sailarekin eta Ekonomia Sustapenaren Sailarekin elkarlanean, ostalaritza-enpresei laguntzeko. Aste honetan bertan hainbat bilera egin dituzte sektoreko eragileekin.

Alkateak azaldu duenez, beharrezkoa da udalbatzaren akordio bat tasetan salbuespena egiteko eta Batzar Nagusietan araudia aldatzeko, zerga horiek urtarrilaren 1ean sortzen baitira. Zentzu horretan, Gorka Urtaranek ontzat jo du PPk egindako proposamena, Ogasun batzordeak datorren astean eztabaidatuko duena. “Positiboa iruditzen zaigu, baina gobernu-talde honentzat ez da nahikoa. Guk proposatzen dugunarekin osa daiteke”, gaineratu du alkateak.

Urtaranen gobernuaren lehen ardatzak laguntza fiskalen arloko neurriek biltzen ditu. Bigarren ardatza pandemiak gehien kaltetu dituen sektore ekonomikoei laguntzeko plana da, zeinen xehetasunak laster aurkeztuko baitira. Hartara, neurri fiskalekin eta ezohiko laguntzekin, “Orain Gasteiz” planaren hiru ardatz nagusietako batean eragingo da, zein baita ekonomiari babesa ematea.

Ostalaritzarako 550.287 euroko aparteko laguntzak eman ziren 2020an “Orain Gasteiz” planaren barruan, premia nagusiei erantzuteko asmoz. Babesteko materiala erosteko eta beste gastu osagarri batzuei aurre egiteko laguntzak gehitu behar zaizkio horri. Guztira, 928.000 euroko laguntza ekonomikoa eman zitzaion ostalaritzari, hainbat ildotan.

Eusko Jaurlaritzak bultzatutako merkataritza-, turismo- eta ostalaritza-bonuen programan ere parte hartu du Udalak. Zergei dagokienez, bi alditan utzi ziren iaz bertan behera mahaitxoen tasa eta zabor-tasa, murrizpen sanitarioen ondorioz establezimenduak itxi behar izan zirelarik. Era berean, mahaitxoak errazago instalatzeko neurri gehigarriak bultzatu ziren: erraz desmunta daitezkeen terraza estaliak baimendu ziren, Eguzkilore kaleetako aparkalekuetan mahaiak jartzeko aukera eman zen eta arkupeetan mahaiak jartzeko nahiz gas-berogailuak instalatzeko aukera eman zen.

Share

Gasteizek 105.000 eurorekin sustatuko du ingurumenaren arloko proiektuak aurten, beste erakunde batzuekin elkarlanean

Gasteizek zenbait erakunde eta entitaterekin jardungo du elkarlanean ingurumenaren arloko ikerkuntza eta zabalkundean; 135.000 euro bideratuko ditu horretarako. Gasteiz Greenen ildo estrategikoetakoa da klima-aldaketaren kontra borrokan diharduten entitate eta erakunde espezializatuekin lankidetzan eta ikerkuntzan aritzea.

Alkateak gogorarazi du Gasteizek konpromisoa duela klima-aldaketaren kontrako borrokarekin, Europar Batasuneko alkateen itunean jaso bezala, eta, halaber, hau adierazi du: “hiri berdetik ekonomia berdera igarotzeko agenda argia daukagu, gure Gasteiz Green Dealek ezarria. Gasteizko Green Deal planak bideratzen ditu hori lortzeko egiten ari garen ekimenak. Planetaren erronkei aurre egiteko maila globalean proposatzen diren eta gure hirian aplikagarriak diren konponbideak gureganatzea da kontua. Erronka horiei aurre egiteko proposatzen diren eta gure hirian ondo egin daitezkeen konponbide eta ekimenen barruan daude Ingurugiro Gaietarako Ikastegia egiten ari den ikerketa-lerroak“ nabarmendu du Gorka Urtaran alkateak.

Aurten, beste bi lerro gehitu zaizkio Ingurugiro Gaietarako Ikastegia egiten ari den ikerkuntzako lankidetzari: bata Unesco Katedrarekin, kultura-paisaien eta ondarearen arloko ikerkuntza aplikatuko jarduerak egiteko, eta lerro horretarako 15.000 euro bideratuko dira; eta bestea Euskal Herriko Hazien Sarearekin, nekazaritza-dibertsitateari eta lursailen ondarea kontserbatzeari buruzko prestakuntza- eta zabalkunde-esperientziak trukatzeko eta sustatzeko, eta beste lerro horretarako ere 30.000 euro bideratuko dira.

Ingurugiro Gaietarako Ikastegiak hiri-ingurunetako naturari buruzko ikerketa-lerro batean dihardu, Basque Centre for Climate Change – Klima Aldaketa Ikergai (BC3) elkartearekin elkarlanean. Udalak 15.000 euro bideratuko ditu aurten ikerketa-lankidetzako proiektu horretarako.

Bestalde, Gasteizek landare-espezieak landatzearen bidez eta beste konponbide naturalen bidez lurzoru hondatuak leheneratzeko ikerketa- eta praktika-ekintzekin jarraituko du, EHUren eskutik. Horretarako ere 15.000 euro bideratuko ditu.

Ingurugiro Gaietarako Ikastegia hidrogeologia arloko ikerkuntzan ere aritzen da EHUrekin lankidetzan, eta horretarako ere 15.000 euro bideratuko ditu.

Ingurugiro Gaietarako Ikastegiaren eta Neiker-Tecnaliaren artean ireki dituzten ikerketa-lerroetako bat lurzoruen kontserbazioan zentratuta dago, eta horretara 15.000 euro bideratuko dira aurten.

Share

Urarteko (Abetxuku) hiri-baratzeak erabiltzeko baimenak eskatzeko epea zabaldu da

Hurrengo 30 egunetan, Ingurugiro Gaietarako Ikastegiarekin harremanetan jarri ahal izango dute Urarteko hiri-baratzeetako lursailen bat eskuratu nahi dutenek. Gaur onetsi baita Abetxukuko udal-baratze horietako lursailak adjudikatzeko deialdi publikoa.

“Natura hirian bertakotzeko oinarrizko elementu dira hiri-baratzeak, baita pixkanaka autoekoizpen-estrategiak eta iraunkortasunaren inguruko sentsibilizazioa garatzen joateko ere. Horrelako ekimenei esker da posible neurri handi batean gizartean oinarrizko kontzeptuak zabaltzea; besteak beste, elikadura-burujabetza, bertako produktuak, elikadura osasungarria eta osasunerako hezkuntza”, nabarmendu du Gorka Urtaran alkateak.

Ekimen horien artean leku nabarmena hartzen dute Abetxukuko aisialdiko hiri-baratzeek, zeinek partikularrek aldi batez baliatzeko 225 lursail biltzen baitituzte. 2021eko urtarrilean libre zeuden lursailak eskainiko zaizkie herritarrei, deialdi horretan.

Share

(Argazkiaz eguneratua) Merkataritza-establezimenduen kanpoaldean salgai-erakustokiak instalatzea arautuko du Udalak, ordenantza berri baten bidez

  • Alkateak araudiaren idazketa abiarazteko dekretua sinatu du gaur goizean
  • Eragindako pertsona eta erakundeek 15 egun balioduneko epea izango dute beren ekarpenak emateko

 

  Gasteizek berariazko ordenantza izango du merkataritza-establezimenduen kanpoaldean salgai-erakustokiak instalatzea arautzeko. Araudia lantzeko izapideak abiarazteko dekretua sinatu du gaur goizean Gorka Urtaran alkateak. “Hiriko merkatariei entzun diegu. Eta haien eskaerak aintzat harturik, horrelako elementuen erabilera sustatu nahi dugu. Badakigu merkataritza dinamizatzen laguntzen dutela. Baina irizpide batzuk bete ditzaten nahi dugu halaber, enbarazu egin ez dezaten”, azaldu du alkateak.

 Ordenantza berriak eragindako edo horretan interesatutako pertsona eta erakundeek 15 egun balioduneko epea izango dute iritzia emateko. Ondoren, Mugikortasunaren eta Espazio Publikoaren Sailak proposamen teknikoa landuko du, sektorearen ekarpenak kontuan hartuz. Batzordean eztabaidatuko da agiria, eta Udalbatzak onetsi beharko du. Merkataritza Mahaiak datorren astean egiten duen bileran ere aurkeztuko du udal gobernuak proposamena, profesionalen ikuspegia ezagutzearren.

 

Share