Prentsa Oharren banner

BIZAN sareko zentroek Adinekoen Nazioarteko Eguna ospatu dute

Adinekoen Nazioarteko Eguna ospatu dute gaur Bizan sareko erabiltzaileek, Andre Maria Zuriaren plazan egindako hainbat jarduera tarteko. Horien artean nabarmentzekoak dira “Jar ezazu adineko bat zure bizitzan” pregoiaren irakurketa, adinekoek gizartearengandik espero dutenaren inguruko eztabaida, aldarrikapen-ibilaldia hiriaren erdialdetik, eta azken adierazpenaren irakurketa.

Gorka Urtaran alkateak eta Gizarte Politiken Adinekoen eta Haurren zinegotzi Jon Armentiak ongietorria eman diete parte hartzaileei, eta BIZAN sareko zentroetan egiten duten lana eta gizarteari egindako ekarpenak eskertu dizkiete.

Share

2022ko zergak izozteko proposamena onetsi du Gobernu Batzarrak

2022ko ordenantza fiskalen 49 proiektuak onetsi ditu gaur goizean Tokiko Gobernu Batzarrak. Aste hasieran iragarri bezala, datorren urtean zergak izoztea proposatzen du Urtaranen gobernuak. Udalaren diru-sarrera fiskal guztien bi heren egiten duten zerga horiek izozteaz gain, orobat proposatu da tasa eta prezio publikoak urtetik urterako KPI oinarritzat harturik eguneratzea, + % 3. Gizarte Politiken Sailak eskaintzen dituen zerbitzuen tasa eta prezio publikoen kasuan, % 1,5eko izango da igoera.

Zergak izozteko proposamen horrekin, pandemiak sortutako krisiaren ondoren iristen ari den bizitza sozial eta ekonomikoaren susperraldian lagundu nahi die udal-gobernuak familia, enpresa eta negozioei.

Berrikuntzarik ere badakar 2022ko ordenantza fiskalen proiektuak, hainbat zergari dagokionez. Hilerrien tasan, esaterako, ordainketa zatikatzerik izango da, orain arte ez bezala. Orobat islatuko da ordenantza fiskaletan zergak tramitatzeko prozesuen hobekuntza, ez baita beharrezkoa izango Udalak administrazioen arteko datu-trukearen bidez lor dezakeen informazioa aurkeztea hobariak eskatzen dituztenek.

Proiektu fiskala tramitatzeko hurrengo urratsa Ogasun Batzordean aurkeztea izango da, datorren asteazkenean, irailak 22. Egun horretan bertan, jendaurreko entzunaldian aurkeztuko zaie herritarrei.

 

 

 

Share

(Argazkiez eguneratuta) Azken 20 urteotan konkistatutako espazio publikoaren aldarrikapenarekin hasi da Mugikortasunaren Europako Astea, Gasteizen

– Enara Barón artista lokalaren performance bat izan da Andre Maria Zuriaren plazan, zeinetan autorik gabeko espazio publikoen onurak bistaratu baitira

– Bi hamarkadaz, eraldaketa handien probaleku izan da Mugikortasunaren Europako Astea —Antso Jakitunaren kalea, Foru kalea, San Frantzisko aldapa, San Antonio kalea eta Tornay Medikuaren kalea, besteak beste—

Gorka Urtaran audioa

Gaur hasi da Mugikortasun Iraunkorraren Europako Astea —irailaren 22ra arte iraungo du—, zein, Gasteizen bezala, kontinenteko 2.500dik gora hiritan ospatuko baita. Arabako hiriburuaren kasuan, jarduera-programari ekin zaiolarik, ibilgailu pribatuari irabazitako espazio publikoak desplazamendu-modu iraunkorragoen aldeko lanean azken bi hamarkadetan bereganatu duen garrantzia aldarrikatu nahi izan da.

Mezu horrekin, Enara Baron artista lokalak esku-hartze bat egin du, atzo —neurri bereko espazio huts batekin batera— Andre Maria Zuriaren plazan jarri zen auto baten gainean. Hiriko mugikortasun iraunkorrari buruzko ilustrazioekin itxuratu da autoa, esku-hartzean. Espazio publikoaren ‘konkista’ hori erakusteko balio izan du ekintzak.  Eta espazio hutsean hainbat objektu jarri dira, ibilgailuei irabazitako kale eta plazetan herritarrek egin ahal dituzten jarduera ugarietako zenbait irudikatzeko. “Arlo horretan egindako aurrerapenak bistaratzeko modu bat da: oinezkoentzako alderdiak, superetxadiak, zirkulazio baretuko 30 zonak, irisgarritasunaren eta garraio publikoaren arloko hobekuntzak eta bizikletaz ibiltzeko azpiegitura berriak. Auto batek hartzen duen lekuan oinezko ugari sar daitezke, haurrak jolastu; sar daitezke bizikleta gehiago, ostalaritza-terrazak, merkataritza-espazioak…”, adierazi du Gorka Urtaran alkateak.

Hurrengo egunotan, hainbat jarduera izango dira Mugikortasunaren Europako Astearen barruan, hirian. Nabarmentzekoak dira bihar hiriaren erdialdean barrena espazio publikoan izandako aldakuntzak deskubritzeko egingo den oinezko martxa, Biktimen Memorialaren ondoan egingo den azoka —mugikortasunaren eta osasunaren inguruko hainbat lantegi eta jarduerarekin— eta BEIk bidaiariekin egingo dituen lehen ibilbideak, hilaren 22an. Mugikortasun iraunkorrari buruzko web-mintegi bat ere egingo da, hilaren 20an. Besteak beste, mugikortasun iraunkorraren arloko aditua den Salvador Ruedak parte hartuko du. Udalaren webgunean kontsulta daitezke jarduera guztiak. Orobat eman daiteke izena bertan.

Mugikortasun iraunkorrak 20 urte

Hain zuzen ere, 20. urtea du aurten Mugikortasunaren Europako Asteak. Gasteizen, herritarrak modu iraunkorrean mugitzearen garrantziaz sentsibilizatzeko aukera eman du, baita neurri eta jarduketa berriak probatzeko ere, Udalak gauzatu aurretik. Eraldaketa handiak izan baitira, hala hola Antso Jakitunaren kalean, Foru kalean, San Frantzisko aldapan, San Antonio kalean eta Tornay Medikuaren kalean, besteak beste.

Mugikortasun iraunkorraren politika garatzeko funtsezko tresnetako bat izan da Mugikortasunaren Europako Astea, eta hiriko Espazio Publikoaren eta Mugikortasun Iraunkorraren Planaren aliaturik onenetako bat. Aldaketa asko bultzatzeko erakusleihoa izan da, eta eraginkorrak eta ikusgarriak suertatu dira aldaketa horiek, eta Estatuan nahiz atzerrian goraipatu izan dira.

Europako Batzordearen ekimenak 20. urte bete dituen honetan, bada mugikortasun iraunkorraren aldaketak herritarren osasunaren hobekuntzarekin lotzen dituen goiburu komun bat: ‘Zure osasunagatik, mugi zaitez modu iraunkorrean’.

 

 

Share

Gasteizko mugetara bisita

Alkateak eta zinegotziek aurtengo mugarrien ibilbideko 9 kilometroak egin dituzte

Gorka Urtaran audioa

Joan den urtean ere hartu ziren prebentzio-neurri sanitarioekin, Korporazioak ibilaldia egin du udalerriko mugetan barrena, duela bost mendetik hona urtero egin ohi denez mugarriak ikuskatzeko, alkatea —basozain nagusi zereginetan— taldeburu dela.

Erretana, Gamarra, Gamarragutxia, Durana, Artzubiaga, Betoñu, Zurbano, Elorriaga, Arkauti, Arkaia, Ilarratza, Jungitu eta Uribarri Arratzu herrietako lurretan kokatutako 28 mugarri ikuskatu dituzte aurten alkateak eta zinegotziek. Guztira, 9,4 kilometro egin dituzte.

 

 

Share

Olarizuko Erromeria eta Gasteizko 840. urteurrena kupoian

Irailaren 13an eta 26an zozketatuko dira

Gasteiz, 2021eko irailaren 9a (ONCE). ONCEren kupoiak Arabako bi gai nabarmenen berri emango du hilabete honetan. Alde batetik, irailaren 13an (astelehena) zozketatuko den eguneroko kupoia, Olarizuko Erromeria tradizionalari eskainia, eta asteburuko kupoia, irailaren 26an (igandea) zozketatzekoa, Gasteiz hiriaren fundazioaren 840. urteurrenaren ospakizunarekin batera. Bi irudiak salgai daude dagoeneko, eta 11 milioi kupoitan (5,5 milioi irudi bakoitzean) islatuko dira, estatu osoan zehar bi efemerideak ezagutzera emateko.

Kupoien xehetasunak jakinarazi zituzten, Gasteizko Udalean egin zen aurkezpenean, Gorka Urtaran Alkateak; Juan Carlos Andueza ONCEren Euskadiko lurralde-Ordezkariak; Rafael Ledesma ONCEren Euskadiko lurralde Kontseiluko presidenteak, eta Teresa Salgado ONCEren agente saltzaileak.

Gorka Urtaran Gasteizko alkateak eskerrak eman dizkio ONCEri “hain gureak ditugun bi efemerideak” azpimarratzeagatik. “Olarizuko erromeria Gasteizeko bereizgarrietako bat da, udari agur esan eta ikasturte berriari ongietorria emateko. Eta belaunaldien arteko topaketa batean egiten dugu, oso gasteiztarra. Gasteiz 1181. urtean sortu zela ospatzea ere harro egoteko modukoa da hiriarentzat, harro egoteko moduko aberastasun historiko eta kulturala erakusten baitu” ere adierazi du alkateak.

Bestalde, ONCE Euskadiko lurralde-ordezkari Juan Carlos Anduezak gogorarazi duenez, “Iaz pandemiaren ondorioz izandako geldialdiaren ondoren, agente saltzaileek ONCEren joko-produktuak eskaintzen jarraitzen dute herri eta hirietako kaleetan, eta, aurten, Euskadin 17 milioi euro baino gehiago banatu dira sarietan, eta udalerri saridunen zerrenda luzea da“.

ONCEk Euskadiko ekitaldi esanguratsuenetako batzuk jasotzen eta islatzen jarraitzen du, eta, horrela, herritarrek ONCEren jokoetan jartzen duten konfiantza eskertzen du; izan ere, joko horiei esker, 3.400 pertsona-itsu edota ikusmen murriztuko pertsona inguruk, EAEko Erakundeko afiliatuek, beharrezko prestazio sozial eta teknikoak jasotzen dituzte, eta erabat haien gizarteratzearen alde egiten dute.

Olarizuko Erromeriako kupoia

Olarizuko Erromeriari eskainitako kupoia irailaren 13an (astelehena) zozketatuko da, eta, beraz, ONCEren eguneroko kupoia denez, 1,5 euroren truke, 35.000 euroko 55 sari eskainiko ditu bost zifratan. Beste 0,5 euroren truke, seriean jokatuz gero, 25 urtez hilean 3.000 euroko “paga” bat irabaztea eskaintzen du, 35.000 euroko ordainsariari gehituta.

Aurten pandemiaren aurrean prebentzioagatik erromeria egingo ez den arren, XIX. mendetik, Ama Birjinaren jaiotzaren jaiaren ondorengo astelehenean (irailak 8), erromeria herrikoia egiten da Gasteizko hegoaldeko Olarizuko zelaietan, Olarizuko muinoa koroatzen duen gurutzeraino igotzeko.

Goiz horretan bertan, Udalbatzaren urteroko bisita egiten da udalerria mugatzen duten mugarrietara. Duela 500 urte baino gehiagoko administrazio-ohitura da, eta Montero Mayor delakoaren jarduneko alkatea du buru. Arratsaldean, hainbat jarduera ludiko izaten dira landetan, familia osoarentzat. Erromeria honekin udako zikloa ixten da eta uztak biltzeagatik eskerrak emateko nekazarien erritua betetzen da.

Gasteizko 840. urteurreneko kupoia

Toki gutxik dute izen eta abizena, Vitoria- Gasteizek duen bezala. Nafarroako Antso VI.a erregeak eman zion “Victoria Berria” izena, hiria 1181ean sortu zuenean. Garai hartan, harresiz inguratutako hiribildu bat zen, Nafarroako erresumaren defentsarako aurreratua zena. “Gasteiz” abizena muinoan zegoen herrixkarena da.

Gasteizko fundazioaren 840. urteurrenari eskainitako kupoiak, ONCEren asteburuko kupoia izanik, sari nagusi bat eskaintzen du bost zifra eta 300.000 euroko serieari, gehi 5.000 euro hilean 20 urtez jarraian, lehenengo erauzketan saritutako zenbakiaren eta seriearen kupoi bakar bati. Gainera, hilean 2.000 euroko sariak ere eskaintzen ditu 10 urtez jarraian, bigarrenetik bosgarrenera bitartean egindako ateraldietan saritutako zenbaki eta serieen lau kupoiei.

ONCEren kupoiak ONCEko 20.000 agente saltzailek merkaturatzen dituzte. Gainera, www.juegosonce.es webgunetik eta baimendutako establezimendu laguntzaileetan eros daitezke.

 

Share

Klimari dagokionez neutralak diren Europako lehen 100 hirietako bat izateko posizionatu da Gasteiz

Hirian emandako pausoak azaldu ditu alkateak Senatuan egin den bileran, baita hiri-iraunkortasuna eta klima-neutraltasuna lortze aldera egitekoak direnak ere

 

Estatuko hainbat hiritako ordezkariek parte hartu duten Senatuko bileran izan da gaur goizean Gorka Urtaran alkatea. Trantsizio Ekologikorako ministroa, Teresa Ribera, buru izan duen bilera horretan, hiri-iraunkortasunaren eta neutraltasun klimatikoaren bidea urratzeko Espainiako udalerri horiek egindako ahalegina aitortu, partekatu eta babestu da.

Ildo horretatik, alkateak berriki aurreratu zuenez, klimari dagokionez neutralak izango diren Europako lehen 100 hirietako bat izan nahi du Gasteizek, “Europako Batzordeak eta Parlamentuak 2030ean Europako 100 hiri klimari dagokionez neutralak izan daitezen finkatutako bost misioetako baten parte izan. Europako Batzordearen Hirien Europako Misio horrek hiri horien eraldaketa babestu nahi du, Parisko Akordioa eta 2030 Agenda azkarrago betetzeko, eta hautagai bikaina da Gasteiz, europar misio horretan parte hartzeko. Karbonoa murrizteko konpromiso argiak burutzeko oinarriak jarri ditugu, hainbat arlotako proposamen ausartak tarteko —hiri-mugikortasuna, hiri-plangintza, hiri-azpiegitura berdeak, karbono-hustubideen sorkuntza eta lurzoruak berreskuratzea, natura-tratamenduen bidez, besteak beste—, planetarekiko konpromiso horretan gure udalerriak nazioarteko abangoardian jarrai dezan garatu eta bultzatuko ditugun beste politika batzuez gain”, nabarmendu du alkateak.

Gasteizko alkateaz eta Teresa Ribera ministroaz gain, orobat izan dira bileran Senatuko presidentea, Espainiako Udalerri eta Probintzien Federazioko idazkari nagusia, Garraio, Mugikortasun eta Hiri-agendaren ministroa, Gizarte Eskubideen eta 2030 Agendaren ministroa eta Zientzia eta Berrikuntza ministroa, baita Madril, Bartzelona, Valentzia, Sevilla, Toledo, Soria, Lugo eta Cacereseko alkateek ere, besteak beste.

Gaur goizean izan den bileraren bitartez zabalkundea eman nahi izan zaio citiES·2030 ekimenari, zeinen bitartez eraldaketa bizkortzeko trakzio-efektua erdietsi nahi baita, funtsezko diren hiri, eragile eta sektoreen arteko lankidetza-modu berritzaileak sustatuz. Karbono-neutraltasunaren aldeko europar misio horren parte izatera iristeko asmoarekin egin du bat Gasteizek proiektuarekin.

Share

Alkateak Gasteizko bizitza soziala eta ekonomikoa berreskuratzeko, udal zerbitzuak hobetzeko eta hiria hobetzen jarraitzeko Europako funtsetan parte hartzeko apustua egin du

Gorka Urtaran Gasteizko alkateak gaur goizean azaldu du Udal Gobernuak urteko azken lauhilekoan izango duen ibilbide orria, eta baikortasun mezua helarazi die herritarrei datozen hilabeteei begira. Ildo horretan, hiriko bizitza soziala eta ekonomikoa pandemiaren aurreko mailetara berreskuratzearen, udal-zerbitzuak hobetzeko planetan aurrera egitearen eta hiria Europako funtsei esker eraldatzearen aldeko apustua egin du alkateak.

Alkateak azaldu duenez, lehenengo jarduera “hiriaren indarra berreskuratzea” da. Ildo horretan, helburua “datozen hilabeteetan gizarte, kultura eta kirol programazioaren eskaintza handitzea da, gure kaleetako bizitza soziala berreskuratzeko”, zehaztu du Gorka Urtaranek.

Gorka Urtaranek hiriaren egoera ekonomikoaren hobekuntza ere azpimarratu du. “Urte amaierarako enplegua eta Gizarte Segurantzan afiliatutako pertsonen kopurua berreskuratzen lagundu nahi dugu. Eta, zentzu horretan, argi geratu behar da Gasteizko Udala aliatua dela gure hiriko enpresentzat eta eragile ekonomikoentzat. Ekimen pribatuarekin elkarlanean aritu nahi dugu”, adierazi du alkateak.

Era berean, ordenantza fiskalen edo aurrekontuaren alorrean akordioak lortu behar direla esan du alkateak, Gasteiz berreskuratzeko bidean aurrera egiteko. “Zentzuzko proposamena aurkeztuko dugu”, aurreratu du.

Datozen hilabeteetarako Urtaranen Gobernuaren beste erronketako bat Gasteizko Agenda bultzatzen jarraitzea eta udal zerbitzuak eta azpiegiturak hobetzea izango da. Garbiketa-kontratu berria abiaraztearen, autobus elektriko adimendunaren zerbitzua abiaraztearen, tranbiaren obrak Salburura aurreratzearen, obra-planaren eta espazio publikoko ekimenen jarraipenaren bidez egingo da.

Udal politikaren hirugarren ildo nagusia Europako funtsen aldeko apustua izango da. “Gure esentziari eta arima berdeari eutsiz, Gasteiz eraldatzeko proiektuak bultzatu nahi ditugu, lehiakorragoa eta erakargarriagoa izan dadin”. Egunotan proiektuak prestatzen dabil Udala, irekiko diren edo ireki diren deialdietara aurkezteko.

 

Share

Behin-behineko aldamio eta hesietako publizitatea arautuko duen ordenantzaren tramitazioari ekin zaio

Publizitate-mezuak kontrolatuko ditu Udalak, eta halakoak jartzeko baimena ukatuko, iraingarri, laidogarri edo ezegokiak baldin badira

 

Aldamioak eta behin-behineko aldamio eta hesietan aldi baterako publizitate-elementuak jartzea arautzeko ordenantzaren proiektua onetsi du gaur Tokiko Gobernu Batzarrak. Hortaz, tramitatu eta batzordean eta osoko bilkuran onetsi ondoren —gutxienez sei hilabete beharko dira—, publizitatea jarri ahal izango da bi euskarri horietan. Publizitate-mezuak kontrolatu egingo ditu Udalak, eta halakoak jartzeko baimena ukatuko, iraingarri, laidogarri edo ezegokiak badira.

Gasteizen, aldamioen instalazioa ez dago araututa, ez Hiri Antolamenduko Plan Orokorrean, ez berariazko inongo ordenantzatan. Udal-gobernuak uste izan du beharrezkoa dela aldamioak eta horietan eta behin-behineko hesietan aldi baterako publizitatea jartzeko aukera arautuko duen udal-araudi bat edukitzea.

“Publizitatearen sektorearen bilakaerak eta azken urteetan birgaitze-lanek izan duten hazkunde nabarmenak irizpide jakin batzuk ezartzea eskatzen dute, kasu jakin batzuetan publizitatea jartzerik izan dadin. Aldamio edo hesiak behar dituzten birgaitze- edo eraberritze-obretarako finantzaketa-iturri osagarri bat lortzeko aukera emango du publizitatea jartzeak. Eta, gainera, obrak egin bitartean eraikinen ingurunea eta irudi urbanoa edertzen, babesten eta hobetzen lagunduko du”, azaldu du Gorka Urtaran alkateak.

Behin-behineko aldamio edo hesiak estaltzeko elementuetan publizitatea jartzeko aukera arautuko du ordenantzak. Ordenantzaren aplikazio-eremutik kanpo geratuko da obrak egiten dituzten enpresa sustatzaileak edo eraikitzaileak iragartzeko elementuak jartzeko aukera.

Helburua da leku eta euskarri jakin batzuetan —obra-lizentzia indarrean den bitartean— kanpoko publizitatea instalatzeko aukera ematea. Kontua ez da edozein lekutan eta zirkunstantziatan publizitatea jartzeko aukera liberalizatzea.

Publizitate-edukiak eta -mezuak kontrolatu egingo dituzte udal-zerbitzu teknikoek, eta orobat egongo dira araudi espezifikoen mende —alkoholari eta tabakoari buruzkoak, kasu— eta sexu, arraza, adin edo bestelakoengatik ez diskriminatzea galdatuko da. Hauteskunde-garaian nahiz hauteskunde-garaitik kanpo publizitate instituzionala edo propaganda politikoa egiten duten mezuak hauteskunde-araudiaren eta ezartzen diren mugen arabera onartuko dira. Lizentzia eskatzen delarik, iraingarri, laidogarri edo ezegokitzat jotzen diren mezuak ukatzerik izango du Udalak.

Hiri-ingurunea eta ingurumena babestea izango du xede ordenantzak, eta, bereziki, etxebizitzen eta eraikinen birgaitzea sustatzea.

Ordenantza-proiektuaren arabera —ekarpenak egin ahal izango direnez, aldakuntzarik izan badaiteke ere—, argiztapen-sistema perimetralak edo publizitate-irudiaren goiko edo beheko muturretakoak jarri ahal izango dira, gehieneko luminantzia-maila jakin batzuk gainditzen ez badira.

 

 

Share

KEAOk arrazoia eman dio Udalari, eta atzera bota du ‘FCC Medio Ambiente’ enpresak garbiketa eta hondakin-bilketaren kontratua zela eta aurkeztutako errekurtsoa

Kontratuen inguruko Errekurtsoen Administrazio Organoak (KEAO) arrazoia eman dio Gasteizko Udalari, eta ‘FCC Medio Ambiente’ enpresak maiatzaren 5ean aurkeztutako errekurtsoan egindako alegazio guztiak ezetsi ditu. Kontratazioaren arloko errekurtso berezia aurkeztu zuen enpresa horrek, garbiketa egin eta hondakinak bildu eta garraiatzeko zerbitzua CESPA aldi baterako enpresa-elkarteari adjudikatzeko Tokiko Gobernu Batzarrak hartutako erabakiaren kontra.

Errekurtsoa aurkeztu zuen enpresak azaldutako eragozpen guztiak ezetsi ditu KEAOk. Esaterako, CESPA aldi baterako enpresa-elkarteak aurkeztutako eskaintza bazter zedila eskatzen zuen hark, eskainitako prezioaren zenbatekoaren eta enpresa horren eskaintzako XVIII. eranskineko informazioaren arteko koherentziarik ezagatik. Aitzitik, KEAOk uste izan du eskaintza ekonomikoa automatikoki baloratzen dela eskainitako prezioa besterik behar ez duen formula baten bitartez, eta, langileen benetako orduak eta makineria salbu, XVIII. eranskinean jasotako gainerako zehaztapenek ez dutela kontratu-konpromisoaren izaerarik.

Era berean, kontratazio-mahaiak hartutako erabakien eta egindako lanaren zuzentasuna berretsi du Kontratuen inguruko Errekurtsoen Administrazio Organoak.

Orobat argudiatu zuen ‘FCC Medio Ambiente’ enpresak baldintza teknikoen agiria betetzen ez duen edukiontzi-sarraila elektronikoa eskainia zuela lehiakideak. KEAOk berretsi du ezen, hasiera batean, CESPA aldi baterako enpresa-elkarteak eskainitako sarraila elektronikoaren ereduak erabat betetzen duela urratu dela salatzen den preskripzio teknikoa, eta, nolanahi ere, CESPA aldi baterako enpresa-elkarteak eskainitako konponbide teknikoa kontratua gauzatzean galda daitekeen kontratu-konpromisoa dela.

KEAOk errekurtso berezia ebatzi ondoren, Gasteizko Udalak kontratua formalizatuko du CESPA aldi baterako enpresa-elkartearekin. Hurrengo hilabeteetan, aurreko kontratuaren likidazioa egingo da, eta kontratu berria gauzatzeari ekingo, hainbat berrikuntza nabarmenekin: hiriko edukiontzi guztiak berrituko dira eta makineria berria jarriko da.

 

 

 

Share

Hitzarmena Aldundiarekin, euskararen erabilera sustatzeko

Dagoeneko hainbat urte joan dira Udala eta Aldundia elkarrekin lanean hasi zirenetik, hirian eta lurraldean Euskara Biziberritzeko Plan Nagusia garatzen. Tokiko Gobernu Batzarrak onetsi du gaur goizean lankidetzarako esparru-hitzarmen berri bat egitea, lau urteko iraupenarekin, ildo berean lanean jarraituko. Udalak 75.000 euro bideratuko ditu urtero horretara. “Aldundiarekin lankidetzan jardutea funtsezkoa da Araba osoan eta Gasteizen herritar guztien eskubide linguistikoak bermatu ahal izatea ahalbidetuko duten politika koherente eta kohesionatuak garatzeko”, azpimarratu du Gorka Urtaran alkateak.

Hitzarmenak erakunde bien arteko lankidetza bideratzeko aukera emango du, bai eta horietako bakoitzak euskararen erabilera sustatzeko plan nagusien alorrean Gasteizen zein Araban garatuko dituen jarduerek elkar osatuko dutela bermatzeko ere. Gainera, euskararen ikaskuntza eta erabilera bultzatzeko kanpainen maila teknikoan eta ekonomikoan parte hartuko dute bi erakundeek, euskararen presentzia gizartearen arlo guztietan areagotzeko asmoz: komunikazio- eta sentsibilizazio-kanpainak; enpresei, merkatariei eta ostalariei zuzendutako kanpainak, eta kirolaren eta aisialdiaren esparrura nahiz lehentasunezkotzat jotzen den beste edozeinetara zuzenduak.

 

 

Share