Prentsa Oharren banner

[Argazkiekin eguneratua] Gasteiz eta Baiona elkarlanean arituko dira hainbat arlotan, hala nola mugikortasun iraunkorrari, auzo zaharrak birgaitzeko politikei, hiri-azpiegitura berdeak ezartzeari eta euskara sustatzeari dagozkienetan

Gasteizko ordezkaritzak bertatik bertara ezagutu ahal izan du BEIren antzeko planteamendua duen ‘trambus’ proiektua.

 

Gorka Urtaran alkatearen adierazpenak

Gasteiz eta Baiona elkarlanean arituko dira hainbat arlotan, hala nola mugikortasun iraunkorrari, arkitektura-ondarea babesteari eta hirigintzari, auzo zaharrak birgaitzeko politikei, hiri-azpiegitura berdeak ezartzeari eta euskara eta kultura sustatzeari dagozkienetan.

Horiek dira hemendik aurrera bi hiriek lankidetzan jardungo duten lan ildo nagusiak, Gasteizko alkate Gorka Urtaranek eta Baionako alkate Jean-René Etchegarayk hiri horretako udaletxeko ohorezko aretoan gaur goizean sinatu duten lankidetza-agirian jasota geratu denez. Asmoen protokolo hori sinatu ondoren bi agintari lokalek azpimarratu dutenez, ezagutza eta esperientziak partekatuko dituzte Gasteizek eta Baionak, elkarlanari esker, etorkizuneko erronkei aurre egiteko.

“Historiari, kulturari, hizkuntzari eta identitateari dagokienez elementu ugari partekatzen dituzten hiriak dira Gasteiz eta Baiona. Iragan eta orain komuna partekatzen ditugu, eta etorkizuna ere partekatu nahi genuke. Izan ere, proiektu eta ekimenetan elkarlanean jardunez, sendotu egingo dira gure hiriak, baita Euskal Herria bera ere. Egun historikoa da gaurkoa”, adierazi du Gorka Urtaranek bere mintzaldian.

Alkatearekin batera, bertan izan dira Ana Oregi —alkateordea eta Lurraldearen eta Klimaren aldeko Ekintzaren zinegotzia—, Raimundo Ruiz de Escudero —Mugikortasunaren eta Espazio Publikoaren zinegotzia— eta Jonatan Moreno — Alkatetzako koordinatzailea—. Lankidetza-dokumentua sinatzeaz gain, bertatik bertara ezagutu ahal izan ditu Gasteizko ordezkaritzak Baionan azken urteotan abian jarritako zenbait proiektu eta ekimen.

Hain zuzen ere, lankidetza-hitzarmena sinatu aurretik, lan-bilera tekniko batean parte hartu dute, eta mugikortasun iraunkorraren, azpiegitura berdeen eta ondare historikoaren arloko ekimenak aztertu. Argi geratu da etorkizunera begira antzeko erronkak dituztela bi hiriek, eta horretarako lana partekatu dezaketela.

Arratsaldean, berriz, proiektu horietako batzuk ikusiko dituzte. Besteak beste, Baiona eta Biarritz lotzen dituen BRT linea, zeinek Gasteizko BEIarenaren antzeko planteamendua baitu. Baionako arkitekturaren eta ondarearen interpretazio-zentroa eta Lapurdiko hiriburuko hirigune historikoa birgaitzeko hainbat lan ere bisitatuko ditu Gasteizko ordezkaritzak.

Aurreikuspenen arabera, hurrengo hilabeteetan bisitatuko dute Gasteiz Baionako Udalaren ordezkariek, ezagutza- eta esperientzia-truke horrekin jarraitzeko.

 

 

 

Share

Huerta La Esmeralda, Siteco eta Zayer, Itun Berdea sarien irabazleak

Gasteizko Udalak 2020an bertan behera utzitako edizioko irabazleak ere saritu ditu, hau da, Ideolab, Nabla Wind Power eta Electra Vitoria-Orona

 

Gaur arratsaldean, ingurumen-arloko enpresa-erreferente berriak ezagutarazi ditu Gasteizek. Eta gaur gauean, Huerta La Esmeralda, Siteco eta Zayer enpresek jaso dituzte 2021eko Itun Berdea sariak, Europa jauregian, honako kategoria hauetan, hurrenez hurren: mikroenpresak (1-9 langile), enpresa txikiak (10-49 langile) eta enpresa ertain eta handiak (50 pertsona baino gehiago). Sari horien VII. edizioan 2020ko aitorpenak ere eman dira, pandemiaren ondorioz eman gabe geratu baitziren. Ideolab, Nabla Wind Power eta Electra Vitoria Orona izan ziren sarituak.

Alkate Gorka Urtaranek, lehenengo alkateorde eta Ekonomia Sustapenaren zinegotzi Maider Etxebarriak eta Enplegu eta Merkataritza zinegotzi Igor Salazarrek banatu dituzte sari horiek Itun Berdearen X. Topaketan. Ekonomia berde eta zirkularrarekin —hori funtsezkoa da klima-aldaketaren aurkako borrokaren erronkari aurre egiteko— konprometitutako enpresek gehien espero duten ekitaldietako bat da hori.

2020ko edizioari dagokionez, Ideolab enpresak paketatzearen arloan egindako ekarpenagatik saritu dute, Añanako gatzerako ontzi jasangarri bat diseinatu baitu. Nabla Wind Power enpresa, berriz, enpresa txikien kategorian saritu dute, haize-parkeen bizitza baliagarria luzatzeko proiektuagatik; Electra Gasteiz-Oronak, azkenik, bere igogailuen diseinuan ingurumen-ikuspegia txertatzeagatik jaso du saria.

2021eko edizioari dagokionez, Huerta La Esmeraldak mikroenpresentzako saria lortu du Gamarrako Ostalaritza Eskolako ekoizpen ekologikoagatik. Sitecok enpresa txikientzako 2021eko Itun Berdea saria lortu du, birmanufakturan oinarritutako lan egiteko modu berriagatik. Azken saria Zayer enpresak lortu du, ekodiseinuaren bidez makinen optimizazio termikorako planagatik.

Topaketan, halaber, sei akzesit eman dira (Andrómeda Top Sport, Vulcanizados Algor, Aratubo, La Jabonería Almendra, Taller de Pinchos y Tapas (La Cocina de Senén) eta Herdit) eta bi aipamen berezi (Euskal Herriko Unibertsitatearentzat eta Arabako Teknologia Parkearentzat)

Itun Berdea sarien azken edizioan, 2019koan, Goxaki, Luznor eta Exercicle (BH) enpresak izan ziren irabazleak.

 

 

Share

Eldako alkate eta Valentziako Udalerrien eta Probintzien Federazioko presidentearen bisita instituzionala Gasteizera

Valentziako agintariak ezagutu ahal izan ditu Arabako hiriburuko oinezkoentzako espazioak bihurtzeko prozesuak

Eldako alkate eta Valentziako Udal eta Probintzien Federazioko presidente Ruben Alfaro Gasteizen izan da gaur goizean. Topaketa instituzional horren baitan, esperientziak partekatu ahal izan ditu Gorka Urtaran Gasteizko alkate eta EUDELeko presidentearekin eta Gasteizko Udaleko udal-teknikariekin.

Eldako alkatearen eta bere taldearen helburuetako bat Gasteizen azken urteotan egin diren oinezkoentzako alderdiak sortu eta trafikoa lasaitzeko prozesuak bertatik bertara ezagutzea zen. Horretarako, Saray Zarate Gasteizko Udaleko Lurraldeko, Klimaren aldeko Ekintzako, Mugikortasuneko eta Espazio Publikoko koordinatzaile nagusiak eta Ainhoa Etxeandia Mugikortasuneko eta Espazio Publikoko zuzendariak azalpenak eman dituzte. Adibidez, iaz Biktimen Memorialaren inguruan egindako espazio publikoaren esku-hartzea ikustera hurbildu dira.

 

Share

Minbiziaren kontrako bus aktiboa aurkeztu du Gasteizek, paziente eta senideentzako baliabideei buruzko informazioarekin

TUVISAk eta Minbiziaren kontrako Arabako Elkarteak ibilgailu bat errotulatu dute, minbizia dutenentzako doako zerbitzuak ezagutarazteko.

 

Minbiziaren kontrako bus aktiboa Gasteizko kaleetan barrena ibiliko da bihartik aurrera. TUVISAren ibilgailu bat da, eta Minbiziaren kontrako Arabako Elkarteak paziente eta senideentzat eskaintzen dituen doako baliabideei buruzko informazioa emango du.

TUVISA, CONTRA EL CÁNCER ÁLAVA eta Promedios elkarteen baterako ekintza horrek Vital Fundazioaren, Cafés la Brasileñaren eta Axa Zabalganaren lankidetza ere badu, eta elkarteak minbizia dutenentzat eta haien senideentzat eskaintzen dituen zerbitzuak zabaltzea du helburu. Ildo horretatik, lan-ildo hauek nabarmenduko dira biniloetan: prebentzioa, laguntza, gizarte-arreta, arreta psikologikoa, boluntarioak, ikerketa eta ‘Infocáncer’ doako telefonoa, 900 100 036.

Gasteizko alkate Gorka Urtaranek babesa adierazi dio Arabako Minbiziaren kontrako Elkarteari, eta oso modu positiboan baloratu du kaltetuen alde egiten duen lana. “Gaixotasun hori dutenei eta haien senide eta gertukoei laguntzeko egiten duzuen ahalegina harro egoteko modukoa da gasteiztarrontzat. Herritar guztiak eta, batez ere, minbizia dutenak animatzen ditut elkartearekin harremanetan jartzera eta doan izan ditzaketen baliabide guztiei buruz informatzera, beren bizitza apur bat errazagoa izan dadin”, nabarmendu du alkateak.

Arabako Minbiziaren kontrako Elkarteko presidenteak, Patxi Ormazabalek berriz, akordio honen garrantzia azpimarratu du “gure doako zerbitzuez informatzeko eta pertsona gehiagorengana iristeko. Jakin dezatela hemen gaudela eta dei diezaguketela behar dutenean. Autobus honek gure zerbitzuak ezagutzera emateko aukera emango digu, gaixotasunaren prozesuan psikologoren bat edo gizarte-langileren bat behar duten guztiek erraz eskura dezaten. Eskuragarri gaude 945 263 297 telefonoan edo gure egoitzan, Porticada Plazan 1, beheko solairuan.

Karmele López de Uralde paziente eta zerbitzu horien erabiltzailearen testigantza ere helarazi du elkarteak minbiziaren kontrako bus aktiboaren aurkezpenean. “Beldurrak gorputza harrapatu duen gaixotasun berria onartzea eta horri buruz hitz egitea eragozten dizunean, zein garrantzitsua den Arabako Minbiziaren kontrako Elkartea bezalako leku batera joatea, bertako profesionalek zuk baino hobeto baitakite zer gertatzen ari zaizun… Esperientziak, entzuten jakiteak, pazientziak, hurbiltasunak eta enpatiak galdutzat zenuen zerbaiten alde, zure bizitzaren alde borrokatzeko gai egiten zaituzte. Eskertuta egongo naiz beti, eta behar dutenean bertaratzera animatuko pertsona guztiak”, esan du Karmele López de Uraldek.

Urtebetez emango du zerbitzua autobus honek Gasteizko kaleetan zehar.

 

 

 

 

Share

Aurrekontuen gaineko negoziazioari ekin dio alkateak, ahalik eta akordiorik zabalena lortzeko asmoz

Negoziazio-fasean sartu da Gasteizko Udalaren 2022ko aurrekontuen proiektua. Kontuen aurkezpen orokorra egin ondoren, eta orobat gobernu-arloz arlo aurrekontu-konpromisoak xehatzeko zinegotzien agerraldiak, Gorka Urtaran alkateak iragarri du udal talde politikoekin elkarrizketatuko dela, akordioa lortzen ahalegintzeko. Gaur goizean bertan hasi ditu bilkura horiek, aurreko urteetan aurrekontuetan bazkide izan duen Elkarrekin taldearekin elkartu delarik. Gasteizko gizartearen eta ekonomiaren susperraldia helburu nagusi duen kontu-proiektu baten inguruko planteamendu politikoak ezagutzea xede duten lehen kontaktuak izango dira.

“Alkatea naizen aldetik, aurrekontua aho batez onar dadila nahiko nuke. Eta aho batez ezin bada, ahalik eta talde gehienek bat eginda. Guztiak kontuan izan behar ditugu; bereziki, ekarpenak egin, lagundu eta akordioak lortu nahi dituztenak”, adierazi du Gorka Urtaranek.

2022ko aurrekontuen proiektua 409,4 milioi eurokoa da, hau da, iazkoa baino % 5,52 handiagoa, eta atzo ekin zitzaion herritarren partaidetzaren fasea, entzunaldi publikoan aurkeztu zelarik. Gaur hasi eta azaroaren 25era bitartean, auzogune eta elkarguneen aparteko bilkurak izango dira, partaidetza-organo horiei aurrekontu-proiektuaren alderdi guztien berri emateko.

Share

409,4 milioi euroko aurrekontua aurkeztu du udal gobernuak, Gasteizko gizartea eta ekonomia erabat suspertzea ardatz

 

  • % 5,52 igo da iazkoaren aldean, europar funtsen esleipenaren zain.
  • Herrandarren kalea eraberritzeko lehen faserako 6,5 milioi euro izango dira.

 

Gorka Urtaran alkatearen adierazpenak

Aurrekontuen dossierra

Pandemiaren unerik okerrena gaindituta, 2022. urtea Gasteizko ekonomia eta gizartea erabat suspertzeko urtea dugu. Helburu horrekin, Urtaranen gobernuak 409.447.291 euroko aurrekontu-proiektua prestatu du (457,8 milioiko aurrekontu bateratua, udal sozietateena eta erakunde autonomoena kontuan hartuz gero). 2021eko aurrekontuan baino 21,4 milioi gehiago, beraz % 5,52ko igoera globala, batez ere hauei esker: diru-sarrera propio gehiago sortzea (+ 2,5 milioi), FOFELaren hazkundea (+22,5 milioi) eta Aldundiak Herrandaren kalea berritzeko jarriko duen finantzaketa osagarria (+ 4 milioi). Lurzoruaren salmentagatiko diru-sarrerak, berriz, jaitsi egin dira iazkoarekin alderatuta.

Azken hamarkadako aurrekonturik handiena da, eta udalaren arlo guztietan nabarituko da. Langileen gastuak alde batera utzita, sail hauek nabarmentzen dira: Lurraldea eta Klimaren aldeko Ekintza, 50,85 milioirekin ( % 6,3 gehiago 2021ekoaren aldean); Gizarte Politikak, Adinekoak eta Haurrak 46,46 milioirekin (% 5 gehiago), Ogasuna 45,56 milioirekin ( % 3,6 gehiago) eta Mugikortasuna eta Espazio Publikoa 32,94 milioirekin (% 11,6 gehiago). Lau arlo horiek dute zuzkidurarik handiena aurrekontu-proiektuan.

Beste arlo hauetan ere bada funts gehiago: Ekonomia Sustapena, Enplegua, Merkataritza eta Turismoa  (3,2 milioi euro, iaz baino  %1,5 gehiago),  Hezkuntza eta Kultura (12,28 milioi, % 33,9 gehiago) edo Kirola eta Osasuna (9,48 milioi, % 8,5 gehiago), hiriko gizarte eta ekonomiari bereziki lotutako sailak.

“Aurreko bi urteetan pandemiak asko baldintzatu du ekonomia. Bi urte horietan, hiru lehentasun nagusitan egin behar izan dugu ahalegin handiena: osasuna, ekonomia eta ongizatea. Orain Agenda Gasteiztarreko lan ildoak berreskuratzeko unea da, gobernuaren sei konpromisoak Gasteiz Europako superhiri bihurtzeko. Horretarako, indar ekonomikoa duen aurrekontua aurkezten dugu, ekonomiaren eta gizartearen susperraldia bizkortzeko urteari begira” adierazi du Gorka Urtaran alkateak.

Maider Etxebarria lehen alkateordeak adierazi duenez “ funtsezko une batean gaude, eta Gasteizek egoerak eskatzen duen mailan egon behar du. Aurrekontu-proiektu honetan erresistentzia etapa atzean uztearen aldeko apustua egiten dugu, berraktibazio etapari ekiteko”. Ekonomia Sustapenerako zinegotziak azpimarratu egin du udalak baliabide ekonomiko gehiago behar duela datorren urterako, izan ere “Gasteiz hiri bizi eta dinamiko gisa finkatuko duen etapa berri bat ireki nahi dugu. Gizarte- eta kultura-bizitzaz betetako hiria, ekiteko erraztasunak eta familientzako, adinekoentzako eta haurrentzako espazioak eskaintzen dituena. Ia bi urteko erresistentziaren ondoren, gure hiriak pultsua berreskuratzea merezi du”.

 

45 milioitik gora inbertsioetarako  

Gizarte bizitzaren susperraldia kulturarako eta kirolerako aurrekontuen hazkundean edo hiriko ekitaldi handietarako –Tour 2023 edo Green Capitalaren X. urteurrena dira berritasun nagusiak– zuzkiduran islatzen bada, bizitza ekonomikoaren susperraldia inbertsioetara bideratutako diru-kopuruan. Udalak eta bere sozietate eta erakundeek inbertsio propioetara bideratuko dituzten 45.621.027 euroak proiektu ugaritarako erabiliko dira. Horien artean nabarmentzekoak:

  • Terrorismoaren biktimen oroimenezko Zentroaren ingurua eraberritzeko lanen bigarren eta hirugarren faseak: 1.200.000 euro.
  • Udalaren ondareko eraikinak mantentzea eta balioztatzea: 1.000.000 euro, besteak beste, Goya eraikinean esku hartzeko.
  • Principal antzokiaren eraikuntza-proiektua: 950.000 euro
  • Animaliak Babesteko Zentroa eraberritzea: 1.200.000 euro
  • Udal eraikinak birgaitzea: 800.000 euro

 

Agenda gasteiztarraren garapena

Aurrekontu-proiektuaren zati handi bat hartzen duten lau ardatz Agenda gasteiztarrean jasotako jarduerak garatzekoak dira: Hauek dira:

  • Hiriko azpiegitura berdeak:  Herrandarren kalea eraberritzeko lehen fasea da arlo honetako proiektu izarra, eta 6.500.000 euro bideratu dira horretarako.
  • Mugikortasun iraunkorra eta segurua: Agenda gasteiztarraren erronka nagusi honen hiru jarduketa jaso dira aurrekontuan: tranbia Salburura eta Zabalganera luzatzeatxirrindularien mugikortasuna eta terrorismoaren biktimen Oroimenezko zentroaren ingurunea eraberritzeko lanen bigarren eta hirugarren faseak; 4.917.450 euroko inbertsio globala.
  • Gaikako bilketarako eta birziklapenerako politikak: 2022an berrikuntza garrantzitsuak ezarriko dira, garbitzeko eta zaborrak biltzeko zerbitzu berria martxan jarriko baita. Garbiketa, bilketa eta birziklapen arloko jarduerek 41.364.698 euroko gastu bateratua egiten dute.
  • Trantsizio energetikoa bultzatzea: arlo honetako jarduketek, eraikinak birgaitzeak eta energia berriztagarrien plana, besteak beste, 1.365.000 euroko inbertsioa izango dute.

 

Europako funtsen zain, eta GIHekin lerrokatuta

Gasteizko udala europar funtsak eskuratzeko hainbat deialditara aurkeztu da, eta diru horiei esker hobetu egingo dira 2022ko aurrekontuko kopuruak (hainbat arlotako zifrak errekorrak dira dagoeneko). Ildo horretan, 3.760.956 euroko partida bat gaitu da baliabide propioekin, Europako funtsez balizko etorrera hori osatzeko Finantzatuko diren proiektuen aurrekontu osoaren % 10 (gehi beza) jotzen du kopuru horrek.

Bestetik, aipatu beharrekoa da garapen iraunkorrerako helburuen arabera sailkatu dela, lehen aldiz, aurrekontu-proiektua. 409 milioiak Nazio Batuen Erakundeak finkatutako 17 helburuetako 16tan banatuta daude. Zuzkidura handiena dutenen artetik hauek nabarmentzen dira:

  • 11. GIH – Hiri eta komunitate iraunkorrak: 98,9 milioi euro.
  • 16. GIH: Bakea, justizia eta erakunde sendoak; 90,4 milioi euro.
  • 10. GIH – Desberdintasunak murriztea; 38,1 milioi euro.
  • 3. GIH – Osasuna eta ongizatea. 32,7 milioi euro.

  

Bultzada handiagoa enpleguari, merkataritzari eta turismoari

2022ko aurrekontu-proiektua arloka banatuta, Ekonomia Sustapenaren, Enpleguaren, Merkataritzaren eta Turismoaren Sailak 13,2 milioi euroko aurrekontua izango du 2022an, aurten baino % 1,5 gehiago

Aurten ere enpleguak izango du diru gehien sail honetan, 7,9 milioiko aurrekontua 2022an. Hau da, ekonomia-sustapenerako aurrekontuaren % 60 enplegura bideratuko da, lehentasunetakoa baita EAJ-PSEren gobernuarentzat, zalantzarik gabe. Kopuru horretan sartzen dira Lanbide bidez kontratatzeko partidak, eragile ekonoimikoekiko hitzarmenak eta enplegua egonkortzeko udal deialdia. “Oso argi dugu: kalitatezko kontratazio berdinzale eta inklusiboaren aldeko apustua egiten dugu” adierazi du Etxabarriak.

Gainera, proiektu ekonomiko horretan Merkataritza eta Ostalaritza Zerbitzurako igoera ere bada, 1,5 milioi esleitu baitzaizkio, 2020an baino % 13,5 gehiago; Biltzar eta turismorako 1,4 milioi bideratzea ere proposatzen da, hau da, aurtengo ekitaldian baino % 11 gehiago.

Baliabide gehiago Hezkuntza eta Kulturarako

Etxebarriak azpimarratu du aurrekontu-proiektuko hazkunde nabarmenetako bat Hezkuntza eta Kultura Sailarekin lotuta egongo dela, 12,2 milioi euroko aurrekontua esleitu baitzaio, hau da, % 33,9ko gehikuntza. “Pandemiak ahalbidetzen badigu, kultura jarduera aliatu ezin hobea izango da enplegua sortzeko eta bizitza soziala berpizteko“, esan du zinegotziak. Ildo horretatik, Udalak jai ekitaldi handiak berreskuratzeko asmoa du, hala nola Inauteriak (125.000 euro) eta Andre Maria Zuriaren jaiak (800.000 euro). Jazzaldiak eta Azkena Rock Festival jaialdiak ere izango dute partidarik, 130.000 eta 380.000 euro, hurrenez hurren.

 

Aurrekontuaren ahaleginik handiena, pertsonak zaintzeko

Gizarte alorrera etorrita, Gizarte Politiken, Adinekoen eta Haurren Sailak 46,4 milioi euroko aurrekontua izango du, hau da, ekitaldi honetan baino 2,2 milioi gehiago.

Etxean Laguntzeko Zerbitzuaren partida 2 milioi euro baino gehiago haziko da, 14,7 milioira iristeko, “egunerokoan laguntza behar duten pertsonek etxean bizitzen jarraitzerik izan dezaten“, azaldu du Etxebarriak.

Aurrekontu-proiektuak, besteak beste, helburu hauetarako partidak barne hartzen ditu: Florida parkeko Adinekoen Bulegoa (10.000 euro) eta Berpizkundearen plazako eguneko arreta zerbitzua (120.000 euro) irekitzea, eta Pilar auzoan adinekoentzako jantoki berria egokitzeko azterlana.

Laguntzen dagokienez, ia 10 milioi bideratuko dira udal prestazioetara eta gizarte larrialdietarako laguntzetara, beharra duten pertsona eta familiei sostengu emateko. “Beharrezko baliabideak jartzen ari gara pertsonen ongizatea bermatzeko, bereziki populazio sektore zaurgarrienei eta pandemiak gehien zigortutakoei laguntzeko, adinekoei eta baliabiderik ez duten familiei, esaterako”, erantsi du alkateordeak.

 

Herritarren Segurtasuna

Herritarren Segurtasunaren arloan, Udalak Udaltzaingoaren eta suhiltzaileen ekipoak eta bitartekoak berritzen jarraituko du. Zehazki, handitu egingo dira suhiltzaileen jantzietarako eta ibilgailuetarako partidak, eta % 250 handituko da Udaltzaingoaren ekipoak berritu eta ordezteko partida.

 

Hona hemen 2022ko aurrekontuan leku garrantzitsua duten beste zerbitzu batzuk:

  • Gazteria: 638.804 euro gazte plan berria sustatzeko, baita aisialdi eta denbora libreko programetarako ere.
  • Berdintasuna: 550.000 euro Jabetze Feministarako Eskolarako edo indarkeria matxista prebenitzeko.
  • Bizikidetza: lehenengo aldiz, 25.000 euroko ekarpen ekonomikoa aurreikusi da Martxoak 3 Oroimenezkoa fundaziorako.
  • Euskara: Gasteiz Antzokia eta Euskararen Etxea martxan jartzeko 365.000 euro jaso dira aurrekontuan.

 

Kudeaketa hurbila, arduratsua eta irekia 

Azkenik, herritarren partaidetzaren sustapena azpimarratu beharra dago, hainbat ekimenen bidez. Horien artean nabarmengarriena Gasteiz Hobetuz programa dugu; une honetan, proposamenak aurkezteko fasea garatzen ari da, eta horretatik sortuko dira 2022an eta 2023an gauzatzeko proiektuak, orotara 3.000.000 euroko aurrekontua aurreikusi delarik.

Horretaz gain, datorren urtean E-administraziorako Plan Gidariari bultzada esanguratsua emateko asmoa du udal gobernuak, 2021ean 170.000 euro izatetik 600.000 euro izatera igaroko baita 2022an. Ildo beretik, hirukoiztu egingo da informatika-ekipoak erosteko partida, 600.000 euroraino.

 

 

 

 

Share

(Audioz eguneratuta) Gasteiz Glasgowko COP29 goi-bileran izango da bioaniztasuna zaintzeko eta nekazaritzako elikagaien estrategiarekin lotutako bere politikekin

Alkatea, Gorka Urtaran; Ana Oregi alkateordea; eta CEAko zuzendaria, Imanol Zabaleta, mundu mailako hitzordura joango dira datorren astean

 

Gorka Urtaran alkatearen adierazpenak

Beste behin, Gasteiz Klima Aldaketari buruzko Nazio Batuen Konferentzian (COP26) izango da. Aurtengoa Glasgown egingo dute eta bioaniztasuna zaintzeko bere politikak eta nekazaritzako elikagaien estrategia ezagutaraziko ditu bertan.

Alkatea, Gorka Urtaran; Ana Oregi alkateordea; eta CEAko zuzendaria, Imanol Zabaleta, mundu mailako hitzordura joango dira datorren astean eta aurrez ikusita dituzten topaketen artean, bi adierazpenen sinaduran hartuko dute parte: Elikadurari eta Klimari buruzko Glasgowko Adierazpenean eta 2020 Ondorengo Aniztasun biologikoaren Mundu mailako Esparruari buruzko Edinburgoko Adierazpenean, gaur Tokiko Gobernu Batzordeak onartutakoan.

Alkateak honako honek duen garrantzia nabarmendu nahi izan du: “Gasteiz ingurumenarekin lotutako erabaki-foroetako abangoardian egoten jarraitzea. Klima-aldaketari buruzko munduko goi-bilera Gasteizko gizartearen eta administrazioaren artean partekatutako konpromisoa bistaratzeko eta gure hiria koka daitekeen eta kokatu beharko lukeen nazioarteko sare hori ehuntzen jarraitzeko aukera paregabea da. Aurreko COP25ean, Gasteiz Green Deal delakoa eta mugikortasun jasangarriko estrategiak partekatu genituen. Aurten, bioaniztasuna zaintzeko eta bultzatzeko gure eredua narriatutako naturaguneen lehengoratzearen, konektagarritasun ekologikoa hobetzearen eta ekosistemak babestearen bidez zabalduko dugu. Bestalde, elikagaien sistemetan mundu mailako eragina toki mailan babesten saiatzen garen Tokiko Nekazaritzako Elikagaien gure Estrategiako konpromisoak berretsiko ditugu ”.

 

 

 

 

 

 

 

 

 

Share

Gasteizko Udalak 25 urterako laga dio Etxezarra eraikina Euskaltzaindiari

·         Aurrerantzean, Euskaltzaindiaren Arabako ordezkaritzaren egoitza izango da Etxezarra.

·         Euskararen Akademiak eraikinaren barrualdea egokitu du, eta jarduera akademikoaz gain, kultur eta zabalkunde jarduerak antolatzea aurreikusi da. Euskararen ikerkuntzan sakontzeko ere erabiliko da azpiegitura berria, eta hiriko erakunde eta elkarteei ere eskainiko zaie, elkarlanerako gune bihurtu nahian.

·         Andres Urrutia (euskaltzainburua): “Gaurkoarekin euskarak espazio berri bat irabazi du Arabako hiriburuan… Ez da bakarra, beste bat izan nahi du, erakundeei, euskararen eta euskal kulturaren eremuan ari direnei, Arabako gizarteari irekia. Hau ez da Euskaltzaindiarena, guztiona baizik, erabil dezagun, bultzada eman diezaiogun euskarari eta euskal kulturari talaia, itsasargi honetatik”.

·         Gorka Urtaran (Gasteizko alkatea): “Etxe eder hau Euskaltzaindiari utziz bi gauza lortu ditugu: batetik, orain arte erabilera egonkorrik ez zuen eraikinaren zatiari erabilera ematea, edukiz betez; bestetik, euskara sustatzeko eta zabaltzeko jarduerak bultzatzea”.

 

GASTEIZ (2021-10-29). Gasteizko Udalak 25 urterako laga dio Etxezarra eraikina Euskaltzaindiari, eta aurrerantzean Euskaltzaindiaren Arabako ordezkaritzaren egoitza izanen da espazio hori.

Gaur, espazioa ezagutzeko aukera izan dute Arabako hainbat erakundetako ordezkariek. Gorka Urtaran alkatearekin eta Andres Urrutia euskaltzainburuarekin batera, bertan izan dira Bingen Zupiria Kultura eta Hizkuntza Politikarako sailburua, Pedro Elosegi Arabako Batzar Nagusietako lehendakaria, Joseba Lozano Herri Administrazioetan Hizkuntza Normalizatzeko zuzendaria, eta Lexuri Ugarte Arabako Foru Aldundiko Euskara eta Gobernu irekiko zuzendaria.

Gorka Urtaran Gasteizko alkateak lagapenak hiriari ekarriko dizkion onurak azaldu ditu hitzaldian: “Etxezarra etxea eraikin ezin hobea da gure hirian Euskaltzaindiaren egoitza izateko. Kokapenagatik, eraikina beragatik, ematen dituen aukerengatik… Gainera, etxe eder hau Euskaltzaindiari utziz bi gauza lortu ditugu: batetik, orain arte erabilera egonkorrik ez zuen eraikinaren zatiari erabilera ematea, edukiz betez; bestetik, euskara sustatzeko eta zabaltzeko jarduerak bultzatzea. Gure hiriarentzat Euskaltzaindiak egoitza egoki bat izatea oso positiboa da, Gasteizek euskararen hiriburua izan behar duelako eta hemendik aurrera, gure hiriak euskararen beste arnasgune bat lortzen duelako”.

Euskaltzaindiarentzat ere une garrantzitsua dela azpimarratu du Andres Urrutia euskaltzainburuak. “Gaurkoarekin euskarak espazio berri bat irabazi du Arabako hiriburuan… Ez da bakarra, beste bat izan nahi du, erakundeei, euskararen eta euskal kulturaren eremuan ari direnei, Arabako gizarteari irekia. Hau ez da Euskaltzaindiarena, guztiona baizik, erabil dezagun, bultzada eman diezaiogun euskarari eta euskal kulturari talaia, itsasargi honetatik”, esan du Urrutiak.

Iaz, Udalak lekuaren jabari-emakida onetsi zuen, eta aurrerantzean Euskaltzaindiak bere gain hartuko ditu horniduren gastuak, altzarien zuzkidura, garbiketa, prebentzio- eta konponketa-lanak eta higiezina zamatzen duten zergak eta bestelako gastuak.

Akademiak askotariko jarduerak lantzeko baliatuko du azpiegitura berria. Alde batetik, herritarrak eta elkarte publiko zein pribatuak artatu nahi ditu Akademiak, betiere arreta jarriz euskararen ikerkuntzaren eta zabalkundearen eremuetan. Beste aldetik, azpiegitura horretan egun Akademiak Gasteizen barreiatuta dauzkan eta etorkizunean abian jarri nahi dituen ikerketa-egitasmoak landuko ditu.

340 metro karratuko espazioa

Euskaltzaindiak eskuratu duen espazioak 340 metro karratu erabilgarri ditu goiko solairuan (behealdean jatetxea dago), baina jada egokituta dago. Honela, espazioak gune bat izango du ikastaro, hitzaldi edo liburu-aurkezpenak egiteko; beste bat Osoko bilkurak edo bestelako batzarrak egiteko; Akademiaren proiektuak bideratzeko leku bat ere izango da; kontsultak egiteko mediateka txiki bat eta, azkenik, Arabako ordezkariaren bulegoa.

Share

Gasteizko energia-trantsizioko politikak, NBEren Munduko Hirien Foroan

 

Gorka Urtaran alkatea bat dator NBEk antolatutako Munduko Hirien Foroan Vitoria-Gasteizek karbonozko lehen ehun hiri neutroen Europako misioan parte hartzearen alde egindako apustuarekin. Alkateak trantsizio energetikoaren, etxebizitzen birgaitzearen eta mugikortasun jasangarriaren arloan aktibatutako politikak eta planak ezagutzera eman ditu.

UNHabitat Aurkezpena  (pdf)

Share

Martin Fíz Maratoia Gasteizko kaleetara itzuliko da, 2.500 atletarekin

  • Elena Loyo atleta olinpikoak distantzia ertainean parte hartuko du

 

Urriaren 31n, igandez, Gasteizko Martín Fiz Maratoiaren 18. edizioa kaleetara itzuliko da, 2.500 parte-hartzailerekin. Cervantes ibilbidean izango da irteera, 8:30ean, eta hiru distantzia izango ditu probak: maratoia, maratoi erdia eta 10 kilometroko herri-lasterketa.

Gasteizko udaletxeko harrera-aretoan izan da aurkezpen-ekitaldia, eta bertan izan dira Gorka Urtaran alkatea, Martín Fiz —munduko maratoi txapelduna izana— eta ekitaldiaren zuzendari teknikoa.

Gasteizko kirol-egutegian funtsezkoa den ekitaldi hori berreskuratzearen garrantzia nabarmendu du Gorka Urtaranek. “Gure hiriaren kirol DNAren parte diren herri-lasterketak eta ekitaldiak itzuli dira kaleetara hilabete hauetan. Albiste onen kate horren guztiaren ginga da Martín Fiz Maratoia. Atletismoaren proba nagusiarekin kirola berreskuratzea da Gasteizko bizitza soziala eta jarduera ekonomikoa berreskuratzeko modurik onena”, adierazi du.

Martín Fizek eskerrak eman dizkie babesleei eta laguntzaileei, antolatzaileengan jarritako konfiantzagatik, baita parte hartzeko kupoa bete duten 2.500 parte-hartzaileei ere. Oso pozik agertu da atletek egindako harrerarekin. Orobat baieztatu du Tokioko Jokoetan aritutako Elena Loyo atleta olinpikoak 21 kilometroko proban parte hartuko duela.

Ondoren, elastiko ofiziala eman die Martín Fizek Gasteizko alkateari eta udalbatzako gainerako kideei.

Ekitaldiaren babesle ofizialak ere izan dira aurkezpenean: Ana del Val, Kultura eta Kirol foru diputatua, eta Jose Luis Bastarrica, Kutxabanen Araba Sareko zuzendaria.

Hiru distantzietako parte-hartzaile guztiei emango zaie babesle eta laguntzaile nagusien logotipoak jasotzen dituen elastiko ofiziala, korrikalari-poltsarekin batera, dortsalak jasotzean. Hain zuzen ere, Boulevard merkataritza-gunean jaso beharko dira dortsalak, ostiralean, urriak 29, edo larunbatean, hilak 30, 10:00etatik 14:00etara edo 16:00etatik 20:00etara bitartean.

Share