Prentsa Oharren banner

Milioi bat eurotik gorako inbertsioa Lakua eta Arriaga auzoen artean oinezkoentzako lotura bat sortzeko Forondako Ateko erdibitzailean, eta Julian Arrese kalean aparkaleku berria egiteko

“Konpromiso bat genuen auzokoekin eta bete egingo dugu”, esan du Gorka Urtaran alkateak

 

DOSSIERRA

Urtaranen gobernuak Lakua eta Arriaga auzoen arteko oinezkoentzako lotura hobetuko du Forondako ateko erdibitzailean “pasealeku” urbanizatu bat sortuz; pasealeku horretan sartzeko, semaforoz araututako bi zebra-bide egongo dira. Horretaz gain, aparkaleku berria egingo du Julian Arrese kalean. Azpiegitura horrek Arriaga auzoko aparkalekuan (Forondako Atea) galduko diren plazak konpentsatuko ditu, bertan merkataritza-azalera bat eraikitzea aurreikusten baita.

“Konpromiso bat genuen auzokoekin, hobekuntza horiek eskatu zituztelako, eta bete egingo dugu. Auzoko beharrak ezagutzen dituztenekin aritu gara lanean, eta Forondako Atearen inguruan bide-segurtasuna hobetzeko eta aparkalekuan galduko diren plazak konpentsatzeko irtenbide on bat proposatu dugu”, adierazi du Gorka Urtaran alkateak gaur goizean.

Gobernu Batzarrak lehiaketara ateratzea onetsi duen proiektuak 908.770,38 euroko aurrekontua du eta gauzatzeko epea 9 hilabetekoa da. Gainera, proiektuak Jose Maria Diaz de Mendibil kalean hasi eta Eskualdeetako Etxeetako iparraldeko fatxadatik igarotzen den oinezkoentzako ardatza egungo aparkalekutik luzatzea ere aurreikusten du. Horretarako, orain dagoenaren zabalera bereko zati bat zolatuko da eta inguruaren estetika mantenduko da (duen marrazki geometriko bereizgarriarekin) Forondako Atearaino.

Mugikortasunaren eta Espazio Publikoaren Sailak diseinatutako esku-hartzearen helburuetako bat da Arriagako egungo aparkalekuaren murrizketa konpentsatzea, merkataritza-azalera bat eraikiko baita bertan. Helburu horrekin, Udalak 124 ibilgailurentzako aparkaleku berria sortuko du orain erabili gabe dagoen ondoko lursail batean; plaza horietatik 7 mugikortasun murriztuko pertsonentzako izango dira. Julian Arrese kaletik sartuko dira ibilgailuak gune honetara. Kanpoko perimetroan zein barruan lorategi-eremuak, tamaina txikiko landaketak eta zuhaitz handiak jarriko dira.

Hala ere, bide-segurtasuna da proiektuaren funtsezko alderdietako bat. Zolaturiko pasealeku bat egingo da Forondako Ateko erdibitzailean Lakua eta Arriaga auzoak segurtasunez lotu ahal izateko. Oinezkoentzako bide berriak bi noranzko bidegorria ere izango du, eta orain auzotarrek bere egin duten lur-ibilbide bat dagoen lekuan eraikiko da. Hara iristeko, gainera, semaforoz araututako bi zebra-bide erabiliko dira (bai Lakuarantz, bai Arriagarantz).

Jarduketa osoan argiteria sare berri bat jarriko da, argi-puntu berriekin (aparkalekuan, oinezkoentzako ardatzean eta erdibitzailean) eta inguruko instalazioetan hobekuntzak egingo dira.

 

Share

Superetxadien proiektuak Zabalgana eraldatuko du, Ilustrazioaren eta Mediterraneoaren hiribide handietan trafikoaren igarobidea eteteko berdeguneak jarriko baitira

Ibilgailurik gabeko “lotune” naturalizatu horiek oraingo oinezkoen ibilbideetatik igarotzea bermatuko dute, eta herritarrak egoteko eta aisialdiko jarduerak egiteko lekuak izango dira  

“Autoentzako 7.500 metro koadro zoladura pertsonentzako gune bihurtuko ditugu”, azaldu du alkateak 

Ekintza horiei esker handitu egingo da auzoko bide-segurtasuna, trafikoaren abiadura motelduko baita superetxadien barruan  

Zabalganean aurten bertan 2 milioi euro inbertitzeko asmoa du udal gobernuak, eta lanean ari da plana beste auzo batzuetara hedatzeko

 

 

Gorka Urtaran alkatearen adierazpenak

DOSSIER SUPERETXADIAK ZABALGANA

Gasteizko Udalak, Mugikortasunaren eta Espazio Publikoaren Sailaren bitartez, Zabalgana auzoa eraberrituko du, superetxadietan oinarritutako proposamen ausart batekin. Alkateak iragarri duenez, udal gobernuak bi milioi euro inbertituko ditu aurten bertan espazio publikoan hamar bat esku-hartze burutzeko, orain autoentzako zoladura dagoen lekuetan berdegune berriak sortu ahal izateko. Herritarrak egoteko eta elkartzeko aukera emango dute espazio horiek, eta Ilustrazioaren eta Mediterraneoaren hiribide handietan trafikoaren igarobidea eteteko balioko dute, dauden oinezkoentzako pasealekuei jarraitutasuna emanez. Gaur arratsaldean aurkeztuko zaie proposamena auzokoei, Zabalganeko gizarte-etxean egitekoa den auzogunean, 18.00etan.

“Superetxadia Gasteizen apustua da nazioarte mailan abangoardian jartzeko. Urteak daramatzagu eredu hori lantzen, eta beste bultzada emateko unea iritsi da. Zabalganean hiri-diseinu berritzailea baliatuko dugu, oinezko eta bizikletazko joan-etorriak sustatuz, kaleak bizigarriago eginez eta bide-segurtasuna indartuz, ibilgailu pribatuentzat zen espazio publikoa pertsonentzat berreskuratuz, berdegune berriak egokituz, eta inguruneko merkataritza dinamizatuz”, aletu du Gorka Urtaran alkateak. Gasteizko alkateak Mugikortasunaren eta Espazio Publikoaren zinegotzi Raimundo Ruiz de Escuderorekin batera aurkeztu du proposamena; azken horrek “hiria eraldatzeko garrantzitsutzat” jo du proiektua.

Superetxadia da hiriko espazio publikoa birdiseinatzeko oinarrizko pieza, Mugikortasunaren eta Espazio Publikoaren Planak ezarritakoari jarraituz. Auzoen barrualdea ibilgailuen trafikotik babestea da helburua. Nola? Abiadura nabarmen murriztuz (orduko 20 eta 10 kilometrora), trafikoa etenez eta kaleak oinezkoentzat utziz.

Orain Zabalganerako proposatzen den esku-hartze eredua harago doa, hiriko bideen sarearen babesa —Mugikortasunaren eta Espazio Publikoaren Planean jasoa— hartu baita abiapuntutzat. Udalaren helburua da oinezkoen ibilbide horiek babestea. Hori dela eta, Ilustrazioaren eta Mediterraneoaren hiribide handietan berdegune berriak sortzea proposatzen da. “Autoentzako 7.500 metro koadro zoladura eraldatuko dugu, pertsonei emateko“, azaldu du alkateak.

Espazio horiei esker, batetik, oraingo oinezkoentzako bideak lotu ahalko dira, jarraitutasuna emanez; bestetik, eragindako zirkulazio-bideak joan-etorrikoak bihurtuko dira, eta hartara, auzotik abiadura handiz igarotzen den trafikoa desagerraraziko da. “Igarotzeko kaleak izateari utzi eta egoteko kaleak bihurtuko dira”, azaldu du alkateak.

Aurreikusitako esku-hartzeen bidez, asfaltoaren ordez parke txikiak egokituko dira; horretarako, herritarren iritzia ezagutu nahi da, auzoak eskatzen dituen proiektuak garatze aldera: piknikerako guneak, xakean aritzeko mahaiak, haurrentzako jolasak, mahai-tenisa… Mediterraneoaren hiribidean, Gurutze Gorriaren ibilbideko parketik datorren ibilbide naturala jarraitu nahi da. Ilustrazioaren hiribidearen kasuan, bi lotune berde sortzea aurreikusi da. Bestetik, auzoko garaje komunitarioetarako sarbidea une oro bermatuko da.

Ilustrazioaren hiribidean eta Mediterraneoaren hiribidean egin nahi diren esku-hartze deigarrienez gain, Udalak esku har daitekeen hamar gune identifikatu ditu (Labastida, Salvador Dalí, Iruña Veleiako hiru eremu… Proposamenetako bat da superetxadien barruko kaleetan sarbidea errei batera murriztea, parterre txikiak jarriz. Neurri horiek dagoeneko probatu dira hiriko beste leku batzuetan, eta baliagarriak dira inguru horietara sartzean ibilgailuek abiadura moteldu dezaten.

Share

1.000 haritzeko baso berri bat izango da Gasteizen, Zabalganean, enpresa lokal baten ekimenez

Karbono-aztarna konpentsatzeko proiektu bati ekin dio Albia taldeak, eta basoa landatuko du Gasteizko 2.500 metro koadroko eremu batean 

1.000 erkametz (Quercus faginea) landatuz, hiriko karbono-isuriak murrizten lagundu nahi du

 

Gorka Urtaran alkatearen adierazpenak

1.000 haritzeko baso berri bat izango da Gasteizen, Zabalganean, enpresa lokal baten ekimenez. ‘Albia basoa’ ekimena aurkeztu du gaur Albia taldeak, hiriko karbono-isuriak murrizten laguntzea helburu, iraunkortasunaren eta ingurumen-inpaktua gutxitzearen aldeko konpromisoaren haritik.

Zabalganeko basoan egin den aurkezpen-ekitaldian, landaketa sinboliko bat egin dute ehorztetxearen eta Udalaren ordezkariek —Gasteizko alkate Gorka Urtaran eta Ingurumen Plangintzaren eta Kudeaketaren zinegotzi César Fernández de Landa izan dira bertan—, eta Eraztun Berdeko baso horretako 2.500 metro koadroko eremuan landatuko diren 1.000 erkametzetatik —Quercus faginea— lehena landatu.

Alkateak eskertu egin dio ekimena Albiari, eta orobat basoa landatzeko hiria aukeratu izana, gerora beste herri batzuetan besterik landatzeko asmorik badu ere. “Larrialdi klimatikoko egoeran gaude. Zorionez, duela ia hiru hamarkada jabetu ziren horretaz hiri hau eta erakunde hau, eta neurriak hartzen hasi ginen, planak idazten, bide hori urratzen jarraitzeko ongi kokatuta egotera garamatzaten politikak bideratzen. Pozik ikusten dugu zenbateraino kontzientzia hartu duten herritarrek eta enpresek, mundu osoan, baita gure inguruko enpresek ere, eta honen gisako ekintzak bideratzen dituzten, edo beren lan-prozesuetan irizpide arduratsuak txertatzen. Oso pozgarria zait landaketa honetan parte hartzea, uste baitut denok bat egin beharra daukagula klima-aldaketaren kontrako borrokan. Modu kolektibo eta indibidualean konprometitzen gaituen erronka bat dugu”, nabarmendu du alkateak, eta bidenabar azaldu du 1.000 erkametz horien landaketa hiriak aldian-aldian egiten dituen landaketei gehitu behar zaiela. “Eraztun berdean eta landa-eremuan moztutako zuhaitz bakoitzeko, beste 15 landatu ditu Udalak, azken bi urteotan”, gaineratu du.

Albiaren agenda berdearen barruan sartzen den erkametz-landaketa horren bitartez, CO2 nabarmen murriztuko dela kalkulatzen da. Izan ere, espezie horretako zuhaitz bakoitzak 0,13 t CO2 xurgatzen du.

Horrela, ingurumenarekiko konpromisoa sendotu nahi du Albia enpresak, bere jardueran ingurumen-arriskuen kudeaketa hobetzeko egiten dituen beste ekintza batzuei gehituz ekimen hori. Orobat eskaintzen dizkie familiei ingurumenarekin begirunez jokatzen duten produktu eta zerbitzuak, hala nola material biodegradagarriekin egindako errauts-kutxatila eta hilkutxak, besteak beste. “Gasteizko proiektu honek bereziki pozten gaitu, eskualdearekin dugun konpromisoagatik, baina baita naturarekiko eta ingurumenaren zaintzarekiko dugun errespetuaren adierazgarri gisa ere. Energia-efizientziaren printzipioa aintzakotzat hartuta lan egiteko aukera ematen diguten azpiegiturekin lan egiten dugu beti, energia berriztagarriak eta horien erabilera efizientea uztartuz, CO2 isuriak murrizteko eta, hartara, kutsadura atmosferikoa eta ingurumen-inpaktua gutxitzeko”, nabarmendu du Albia taldeko Juan Rodríguezek.

Share

Gasteizko Udalak eta Garraio Sailak berretsi egin dute Zabalganarako tranbia zabaltzeko konpromisoa

  • Gorka Urtaran alkatea eta Eusko Jaurlaritzako Lurralde Plangintza, Etxebizitza eta Garraioetako sailburu Iñaki Arriola bildu dira tranbia-proiektuaren egoera eta horrek Euskal Y-an dituen ondorioak aztertzeko
  • Bi erakundeek uste dute aurrera egin behar dela Gasteizen mugikortasun jasangarria bultzatuko duten eta Zabalgana auzoa hiriko gainerako auzoekin lotuko duten irtenbideetan

Gorka Urtaran Gasteizko alkateak eta Iñaki Arriola Eusko Jaurlaritzako Lurralde Plangintza, Etxebizitza eta Garraioetako sailburuak lan-bilera bat egin dute astelehen honetan Eusko Jaurlaritzak Lakuan duen egoitzan. Bileraren helburua izan da aztertzea zain egoeratan dagoen hiriko tranbia Zabalgana auzora zabaltzearen eta trenbide-azpiegitura horren etorkizunaren inguruan egiten ari diren informazio-azterlana. Pedro Marco Azpiegitura eta Garraioetako sailburuordeak eta Raimundo Ruiz de Escudero Mugikortasun eta Espazio Publikoko zinegotziak ere parte hartu dute bileran.

Bi erakundeek berretsi egin dute beren konpromiso irmoa tranbia Zabalganara zabaltzeko. Izan ere, horri esker, Gasteizko hiri-kohesioa indartuko da eta mugikortasun jasangarria bultzatuko da hirian, auzoa lotuko baitu erdialdearekin eta ahalmen handiko beste garraiobide publiko batzuekin, baita tranbiaren gainerako lineekin eta Bus Elektriko Iraunkorrarekin ere.

Ibilbideak —jendaurrean jarri da eta alegazio-fasean dago— 6 kilometroko trazadura du. Kilometro batzuk Gasteizko igarobidean trena lurperatuta geratuko litzatekeen espaziotik doaz. Hala, ibilbideak hamaika geraleku ditu eta 120 milioi euroko aurrekontua du —elementu mugikorrak, obra zibila eta instalazioak barne hartuta—.Dena den, Euskal Trenbide Sareak (ETSk) egindako informazio-azterlanean beste trazadura posible batzuk aurreikusten dira, eta horiek ez lukete eraginik izango lurperatzeko epeei dagokienez.

Bileran, bi erakundeek konpromisoa hartu dute aipatutako alternatibak aztertzeko. Horien bidez, Zabalganako tranbiaren zabaltzea gainerako tranbia-sistemarekin eta Gasteizko erdialdearekin lotuko litzateke, Lovaina eta Antxo Jakitunaren geltokien inguruan.

Share

Alkateak iragarri du Aldaialderen inguruan zeuden segurtasun juridiko faltak gainditu direla, eta obrak lizitatzeko “behin betiko urratsa” izatea espero du

 

Gorka Urtaran alkatearen adierazpenak

DOSSIERRA ALDAIALDE (1)

Gorka Urtaran alkateak Aldaialde ikastetxea eraikitzeko espedientean sortutako azken arazo juridikoa desblokeatu duela iragarri du gaur. Hezkuntza sailburuak proiektuan oztopo berri bat zegoela baieztatu du azkenaldian, baina gaur alkateak baieztatu du irtenbide teknikoa aurkitu dutela.

Gorka Urtaran alkateak iragarri duenez, dagoeneko desblokeatu da Aldaialde ikastetxea eraikitzeko dosierrean sortutako azken oztopo juridikoa. Duela gutxi, Hezkuntzako sailburuak esan zuen beste oztopo bat sortua zela proiektuan, baina gaur alkateak baieztatu duenez irtenbide teknikoa aurkitu dute.

Lanak lizitatuta ikusteko behin betiko urratsa izatea espero eta desio dut. Proiektua jaso dugu, eta lizentzia eman, eta benetan uste dugu dosierrak aurrera egin dezakeela”, adierazi du Gorka Urtaranek, eta konpromisoa hartu du “lanean jarraitzeko eta Aldaialde burutu arte ez gelditzeko”.  

 “Proiektuak arazo asko izan ditu, eta egia da denbora gehiegi hartzen ari dela. Ulertzen dugu gurasoen aldartea, amorrazioa eta sinesgogortasuna”,esan die alkateak batzordean parte hartu duten hezkuntza komunitatearen ordezkariei, eta erantsi du: “tramitazio osoa printzipio honi jarraituz egin dugu:  irtenbideak bilatzea, zintzotasunez eta gardentasunez jokatuz. Sortu den arazo bakoitzeko irtenbide bat proposatu dugu”.

Gorka Urtaranek proiektua zein fasetatik igaro den azaldu du, aurreko korporazioak ikastetxea eraikitzekoa den lursaila aukeratu zuenetik, 2015eko martxotik; lan hori ez zen erraza izan, inguruko lursailek ez baitzituzten betetzen proiektuak eskatzen zituen ezaugarriak.

Alkateak gogorarazi du 2016an beste arazo bat sortu zela dosierrean, lursailak bizitegi-erabilera baitzuen. Esku hartzerik ez zegoenez, baldintzatzaile hori kentzeko behar zen hirigintza-aldaketa abiarazi zuen Urtaranen gobernuak.  Eta kendu egin zen.

Hurrengo eragozpena 2018an sortu zen, Udalari aurkeztutako proiektua ADIFen trenbidearen trazaduran sartzen zela ohartu baitziren. Alkateak azaldu duenez, 2019ko udaberrian bi agertoki zeuden arazoa konpontzeko: lehena, ADIFek baimena ematea trazatua “zapaltzeko”, baina enpresak ezezkoa eman zion eskaerari; bigarrena, beste aukera bat bilatzea. Hain zuzen ere, Udalak baldintzapeko lizentzia proposatu zuen. Beste arazo bat, beste irtenbide bat. Udalak 2019ko urrian eman zuen lizentzia, “gakoa aurkitua genuelako uste osoarekin. Gobernuak proiektua berregin zuen, eta lizentzia eman genuen, eraikinari mugatuz“.

Eusko Jaurlaritzak, ordea, proiektua lehiaketara ateratzeko zenbait ziurgabetasun juridiko izan zitekeela antzeman zuen, Eusko Jaurlaritzak idatzitako proiektuan agertzen den zortasun-lerroa —trenbidearen informazio-azterlanetik hartua— ez baitator bat Gasteizko hiri plangintzak baimenduta distantziarekin, 3 metro baino zertxobait gehiagotik, zehazki. Beste arazo bat, beste irtenbide bat. Jaurlaritzak baldintza horretara egokitu du proiektua, eta dagoeneko jaso du lizentzia berria, baldintzarik gabea oraingoan.

 

 

 

 

Share

Alkatea, ONCEko kriskitin Lasterketaren 25. edizioan

Lehen aldiz modu birtualean egin da pandemiaren ondorioz

 

Gasteizen egin da gaur ONCEk antolatzen duen kriskitin lasterketaren 25. edizioa, lehen aldiz modu birtualean. Webgune ugarik dituzten irisgarritasun-arazoak frogatzea izan da aurtengo ekimenaren helburua. Gizarteak gero eta sarriago jo behar du baliabide horietara, are gehiago pandemia-egoera honetan.

’Gizarte inklusiboaren alde’ lelopean, alkateak ONCEk antolatutako jardunaldian parte hartu du. Gorka Urtaranek azaldu duenez, lasterketaren aurreko bertsioa, oinez edo korrika, eta gaurkoa, Internet bidez, “Enpatiaren eta sentsibilizazioaren aldeko lasterketa” dira. Hori dela eta, ONCE eta itsuak zoriondu ditu; izan ere, inguru digitalean egunerokotasunean dauden era guztietako zailtasunak agerian utzi dituzte saioan. Alkateak oztopo horiek ezabatzen laguntzeko konpromisoa hartu du, eta aldarrikapenak helarazten jarraitzeko deia egin die.

Jardunaldian zehar, ONCEko lau pertsona itsu ibili dira hainbat webgunetan nabigatzen, eremu irisgarri eta inklusiboak lortzearen garrantziaz sentsibilizatzeko, baita online ere.

Share

Espainiako Biltzar Jauregien Elkartearen urteko topaketa inauguratu da Europa jauregian

Gasteizko alkate Gorka Urtaran, lehen alkateorde Maider Etxebarria eta Espainiako Biltzar Jauregien Elkartearen lehendakari Iker Goikoetxeak hartu dute parte APCEren XVII. Kongresuaren inaugurazio ekitaldian; topaketan estatuko biltzar jauregi garrantzitsuenetako zuzendaritza taldeak elkartu dira. Berrogeita hamar profesional inguruk hartuko dute parte antolatutako hitzaldi, mahai-inguru eta aurkezpenetan, zeinetan presentzialtasunaren aldarrikapena izango baita protagonista, profesionalen arteko bilera eta hitzorduetan teknologiak pisu handia hartu duen garai batean.

Gorka Urtaranek zorionak eman dizkio APCEri 25. urteurrenean, eta biltzar, bilera eta konbentzioen turismoaren zeregina azpimarratu du, funtsezko sektorea baita tokiko BPGari egiten dion ekarpena dela kausa. “Biltzar jauregiak funtsezko eragileak zarete hirietan, ekonomia garatzeko ez ezik, baita gizartea, kultura eta kirola garatzeko ere. Azken batean, etorkizunerako funtsezko elementua zarete”, adierazi du alkateak, eta kongresurako Euskadiko hiriburuaren aldeko apustua egin izana eskertu du.

Maider Etxebarria, berriz, pozik agertu da Gasteizen berriro ekin zaiolako aurrez aurreko biltzar jarduerari, eta eskerrak eman dizkio APCEri, horrelako ezaugarriak dituen ekitaldi bat Europa jauregian antolatzeko ahaleginagatik. Ekonomia Sustapenaren zinegotziak hiriak biltzarren turismorako dituen balioak nabarmendu ditu, eta bertako erakargarriak aipatu ditu, hala nola Eraztun Berdea. Orobat, esparru profesional askotan digitalizazio prozesuak banakoei eta taldeei eskatzen dien erronka aipatu du, eta gaur hiriak hartzen duenaren antzeko topaketa presentzialen balioa azpimarratu.

Espainiako Biltzar Jauregien Elkartearen lehendakariak, bestalde, azpiegitura horien zeregina goraipatu du, biltzar eta bileren turismoaren ardatza baitira. Gaur eta bihar eztabaidatzekoak diren gaien artean  jauregien COVIDen garaiko kudeaketari buruzko analisia nabarmendu du, zeinak pandemiaren osteko garaira ere so egingo baitio.

Gasteizko alkate Gorka Urtaran, lehen alkateorde Maider Etxebarria eta Espainiako Biltzar Jauregien Elkartearen lehendakari Iker Goikoetxeak hartu dute parte APCEren XVII. Kongresuaren inaugurazio ekitaldian; topaketan estatuko biltzar jauregi garrantzitsuenetako zuzendaritza taldeak elkartu dira. Berrogeita hamar profesional inguruk hartuko dute parte antolatutako hitzaldi, mahai-inguru eta aurkezpenetan, zeinetan presentzialtasunaren aldarrikapena izango baita protagonista, profesionalen arteko bilera eta hitzorduetan teknologiak pisu handia hartu duen garai batean.

Gorka Urtaranek zorionak eman dizkio APCEri 25. urteurrenean, eta biltzar, bilera eta konbentzioen turismoaren zeregina azpimarratu du, funtsezko sektorea baita tokiko BPGari egiten dion ekarpena dela kausa. “Biltzar jauregiak funtsezko eragileak zarete hirietan, ekonomia garatzeko ez ezik, baita gizartea, kultura eta kirola garatzeko ere. Azken batean, etorkizunerako funtsezko elementua zarete”, adierazi du alkateak, eta kongresurako Euskadiko hiriburuaren aldeko apustua egin izana eskertu du.

Maider Etxebarria, berriz, pozik agertu da Gasteizen berriro ekin zaiolako aurrez aurreko biltzar jarduerari, eta eskerrak eman dizkio APCEri, horrelako ezaugarriak dituen ekitaldi bat Europa jauregian antolatzeko ahaleginagatik. Ekonomia Sustapenaren zinegotziak hiriak biltzarren turismorako dituen balioak nabarmendu ditu, eta bertako erakargarriak aipatu ditu, hala nola Eraztun Berdea. Orobat, esparru profesional askotan digitalizazio prozesuak banakoei eta taldeei eskatzen dien erronka aipatu du, eta gaur hiriak hartzen duenaren antzeko topaketa presentzialen balioa azpimarratu.

Espainiako Biltzar Jauregien Elkartearen lehendakariak, bestalde, azpiegitura horien zeregina goraipatu du, biltzar eta bileren turismoaren ardatza baitira. Gaur eta bihar eztabaidatzekoak diren gaien artean  jauregien COVIDen garaiko kudeaketari buruzko analisia nabarmendu du, zeinak pandemiaren osteko garaira ere so egingo baitio.

Share

Alkateak Gasteizen interesa jarri du guztiaren gainetik Subillan gasa dagoen ikertzeko lizentzia eman ala ez erabakitzerakoan

Gorka Urtaran bat dator Energiaren Euskal Estrategiarekin, baina hiriaren eta Plan Orokorraren defentsa lehenetsiko ditu gauza guztien gainetik

 

Gorka Urtaran alkatearen adierazpenak

Gorka Urtaran Gasteizko alkateak adierazi duenez, trantsizio energetikoari aurre egiteko irizpideak edozein direla ere, udalerrian gasa dagoen ala ez ikertzeko baimenaren inguruan Gasteizen defentsa lehenetsiko du.Lehentasuna Plan Orokorra eta udaleko hirigintza-arauak defendatzea da“. Orain eta beti, hemen eta beste edozein lekutan, beti defendatuko dut Gasteizen interes gorena“, azaldu du.

Alkateak azaldu duenez, Subillan gas naturala dagoen ala ez ikertzeko proiekturako udal lizentzia eskatu da, baina Udala ez da ekimen horren sustatzailea edo arduraduna. “Lurpean zer dagoen jakin nahi da, eta Udalak oraindik ez du iritzirik eman lizentzia emateari buruz. Hirigintza eta legedi azterketaren zain gaude”.

Gorka Urtaranek adierazi du guztiz bat datorrela Energiaren Euskal Estrategiarekin, “errealista delako eta ahalik eta eperik laburrenean % 100 berriztagarriak eta erabat garbiak diren energiak erabiltzea errazten duelako“. Helburu hori lortu artean, ordea, “urte batzuetan trantsizio aldi bat igaro beharko dugu, % 100ean energia berriztagarriekin elikatzeko helburu hori lortu arte“, zehaztu du.

Gogora ekarri duenez, “duela gutxi, Europako Batzordeak berriro esan du gasa ez dela trantsizio-energia txarrena. Gasa trantsizio-energia gisa onartzen da nazioartean, ikatzaren errekuntzaren CO2 erdia isurtzen duelako. Horregatik, trantsizio garairako zero kilometroko gasaren aldeko apustua egiten dut. Gas-garraioaren ingurumen-kostuagatik, sektorean lan egiten duten pertsonen lan-baldintzengatik, erauzketa-teknikengatik eta abarrengatik besterik ez bada, justifikatuta dago hemen egitea milaka kilometrora egitea baino”.

Urtaranen ustez, herritarrek eskubidea dute beren udalerrian energia-baliabiderik dagoen ala ez jakiteko, betiere ingurumena ahalik eta gehien errespetatuz egiten bada. Nolanahi ere, honako ideia hau azpimarratu du: “ni Gasteizko alkatea naiz beste ezeren gainetik, eta Hiri Antolamenduko Plan Orokorra eta udal ordenantzak defendatuko ditut, beste edonork bezala, gure udalerria arautzeko eta babesteko xedatu baititugu horiek. Gasteiz da nire interes gorena. Herritar guztiak ordezkatzen ditut, orain eta beti, hemen eta beste edozein lekutan, eta beti defendatuko dut Gasteizen interes gorena”.

Horrenbestez, txosten teknikoak ikerketa baimentzen ez badu, alkateak oso argi dauka hiriaren interes orokorra guztiaren gainetik dagoela. “Ez dut Gasteizen interes orokorra inongo estrategiaren mende jarriko, ez energiarenean, ez bestelakoetan, ados egon arren. Ororen gainetik, nire hiriko alkatea naiz eta hiria defendatzeko nago hemen“, amaitu du.

 

 

 

Share

Patxi Zubizarreta eta Xabier Olarrak haur eta gazte literaturaren alorreko Vitoria-Gasteiz itzulpen sariak jaso dituzte

Gaur, Euskararen Nazioarteko Egunean, Udalak sustatutako haur eta gazte literaturaren alorrean euskarara egindako itzulpenik hoberenentzako “Vitoria-Gasteiz” sariak banatu dira, Oihaneder Euskararen Etxean egindako ekitaldi batean. Aurtengo irabazleak, sarien 17. edizioan, Patxi Zubizarreta eta Xabier Olarra itzultzaileak izan dira, ‘Plein plein plein d’animaux’ eta ‘Catriona’ obrengatik. Bide batez, Udalbatza osatzen duten talde politikoen bozeramaileek Euskararen Nazioarteko Egunarekin lotutako erakunde-adierazpena irakurri dute.

Gasteizko alkate Gorka Urtaranek diploma eman die bi itzultzaileei. Alexandra Garibalen ‘Plein plein, plein d’animaux’ —‘Animalia asko, pila bila’— liburuaren itzulpenagatik lortu du saria Patxi Zubizarretak, eta 9.000 euro eskuratu ditu. Jatorrizko liburuaren berezitasuna, hitz-jokoak eta umorea euskarara ekartzeko gaitasuna azpimarratu da. Gainera, epaimahaiak adierazi du oso maila altuko itzulpena dela Zubizarretarena.

Xabier Olarrak, ordea, Robert Louis Svensonen ‘Catriona’ren itzulpenagatik lortu du saria. 9.000 euro eskuratu ditu ere. Kasu honetan, egindako lanaren kalitatea eta itzulpenean lortutako hizkuntza-maila altua goraipatu dute. Epaimahaiaren hitzetan, “itzulpen borobila” da. “Euskara dotore eta, aldi berean, erraz eta lehen irakurketan ulertzeko modukoa da”, esan dute.

Alkateak itzultzaileek egiten duten lana aldarrikatu du. “Zuen ahalegina eskertzen dizuet horrelako lanak gurera ekartzeagatik”, esan du Gorka Urtaranek. “Haizeak eramaten ditu hitzak, baina idatzita dagoena betirako geratzen da. Euskararen kasuan, biak bateragarriak eta beharrezkoa da. Beharrezkoa da gure hizkuntzak hegan egitea, baina baita gure hizkuntza liburuetan finkatzea”, aipatu du.

 

Adierazpena

‘Vitoria-Gasteiz’ sariak banatzearekin batera, Euskararen Nazioarteko Egunarekin lotutako erakunde-adierazpena irakurri da ekitaldian. Alkateaz gain, euskara zinegotzi Iñaki Gurtubai eta talde politiko guztien ordezkariek hartu dute parte: Igor Salazar (PSE-EE), Miren Larrion (EH Bildu), Ainhoa Domaica (PP) eta Gema Zubiaurre (Elkarrekin).

2020KO EUSKARAREN NAZIOARTEKO EGUNERAKO ADIERAZPENA https://bit.ly/36AIa05

 

Share

Gasteizek estatuko hirien buruan jarraitzen du garapen jasangarriko helburuen betetze-mailan

Udalak Garapen Jasangarrirako Espainiako Sareari eskatu dio datozen edizioetan txostenean adierazle guztiak jasotzeko; izan ere, oraingo honetan, EAEko hiriburuaren 101 adierazleen arteko 20 ebaluatu gabe geratu dira.

 

Gorka Urtaran alkatearen adierazpenak

Gasteiz Estatuko hirien buruan dago berriz ere Garapen Jasangarriko Helburuen betetze-mailari dagokionez, Garapen Jasangarrirako Espainiako Sareak bi urtean behin egiten duen txostenean egiaztatzen denez. Hala ere, Gasteizko Udalak datozen edizioetan txostenean adierazle guztiak jasotzeko eskatu dio erakunde antolatzaileari, oraingo honetan 101 adierazleen arteko 20 ebaluatu gabe geratu baitira.

Udalak “GJHak Espainiako ehun hiritan” txostena aurkezteko ekitaldian parte hartu du gaur, horien betetze-mailan buru denez gonbidatu berezia izan baita udalerria. Azterketaren bigarren edizio honetan egiaztatu da Gasteizek buru izaten jarraitzen duela helburu horien betetze-mailan.  Hiriak hobera egin du. Izan ere, nota ona lortu du txostenak berak udal ekintzarekin lotuagotzat jotzen dituen jasangarritasun-adierazleetan.

Emaitzak ez dira ranking moduan aurkezten, panelen eta banakako fitxen bidez baizik, baina, oro har, euskal hiriburuak hobera egin du. GJH gehiagotan betetze-maila gorena lortu duen udalerria da, sei guztira, duela bi urteko bosten aldean, eta bat ere ez gorriz, orduan bezala.  Rankingaren punturik gorenean dauden ekintzak hauek dira: 5 (genero-berdintasuna), 6 (ur garbia eta saneamendua), 12 (ekoizpen eta kontsumo arduratsua), 13 (klimaren aldeko ekintza), 16 (bakea, justizia eta erakunde sendoak) eta 17 (helburuak lortzeko aliantzak).

Gorka Urtaran alkatea pozik agertu da ikerketak “berresten duelako Nazio Batuek 2030 Agendaren barruan 2015ean ezarritako GJHak gehien betetzen dituzten hirien artean dagoela gurea “.  Txostenak berretsi egiten du konpromisoari eusten diogula, eta ildo beretik lan egiten jarraitzera animatzen gaitu, udal ekintzaren alderdi guztietan.

Balorazio on hori gorabehera, udala kritiko agertu da erabilitako metodologiarekin, hogei adierazle ez direlako baloratu Gasteizen kasuan. Alkatetzako koordinatzaile nagusi Jonatan Morenok azaldu duenez, esate baterako, 1. GIHa (pobreziaren amaiera) ez da ebaluatu, eta hiria ere ez da “aztertu” beste GIH batzuk osatzen dituzten adierazle askotan, nahiz eta horretarako datuak izan. Barnealdeko hirietarako ebaluatu zitezkeen 101 adierazleetatik, 81 adierazle baino ez dira aintzat hartu Gasteizi dagokionez. Eremu sozioekonomikoko hogei adierazle dira, horietako batzuk oso garrantzitsuak, hala nola biztanleko gastu soziala. Bazegoen datu horiek eskuratzerik kaudimen handieneko erakunde ofizialetan, EUSTATen (Euskal Estatistika Erakundea), esate baterako.

Ebaluazioa, beraz, osagabea da; izan ere, adierazle horiek kontuan hartu izan balira emaitza orokorra hobea zatekeen, eta betetze-maila handiagoa. Hori dela eta, Gasteiz desabantaila-egoeran dago beste hiri batzuekin alderatuta, horien azterlanean kontuan hartu baitira adierazle posible guztiak. Hala ere, “analisiak ahalik eta argazki errealistena egitea du helburutzat, hobetzen jarraitu ahal izateko“, argitu du Morenok. Horregatik, dagoeneko eskatu dio REDSi datozen edizioetan txostenak iturri ofizial gehiago erabil ditzan adierazle guztiak ebaluatu ahal izateko. Irudi fidela emateko, datu-iturri ofizial guztiak hartu beharko lirateke kontuan.

Nolanahi ere, alkateak argi utzi nahi izan du emaitza on horiek “erakundeen arrakastaz gain herritarren arrakasta dela bereziki, helburu horiek lortzen inplikatu direlako“. Era berean, tokiko gobernuen lana nabarmendu nahi izan du, argi izan baitute hiriak norantz bideratu behar duen, “planetarekiko eta bertan bizi garen pertsonekiko errespetua gidari dela. Hobetzeko tartea dugu, eta lan horretan ahaleginduko gara”.

 

Share