Prentsa Oharren banner

Berriz ere, Gasteiz magiaren hiriburua izango da irailaren 13tik 19ra

‘Magialdiak’ estatuko zein nazioarteko mago talde handi baten presentzia baieztatu du

 

Gasteizko Magialdiaren 33. edizioa irailaren 13tik 19ra bitartean egingo da. Arabako Ilusionisten Elkarteak antolatzen du ekitaldia, zeina egokitu egin baita parte-hartzaileen segurtasuna bermatzeko.

Gasteizko Hezkuntza eta Kultura zinegotzi Estíbaliz Cantok, Eusko Jaurlaritzako Ostalaritza eta Turismo zuzendari Goyo Zurrok eta Magialdiaren zuzendari  José Ángel Suárezek aurkeztu dute jaialdia prentsaren aurrean.

“2020an, mundu osoan aurrez aurre egindako magia biltzar bakarra izan zen Magialdia. Aurten bere distiraren zati bat berreskuratu du ekitaldiak, osasun egoerak ahalbidetzen duen neurrian, eta munduko artista onenetako batzuk aurkeztuko ditu, programa zabal eta kalitate handiko batekin“, nabarmendu du Cantok.

José Ángel Suárezek, bestetik, programaren berrikuntzak aurkeztu ditu, zeinean estatuko zein nazioarteko ilusionistek parte hartuko baitute. “Santa Maria katedralak “Linterna Magikoan” oinarritutako ikuskizun bat hartuko du, magia ibilbideen barruan Villa Sofía sartuko da, eta Amaiera Gala Iradier Arenan egingo da”, jakinarazi du jaialdiaren zuzendariak.

Orobat, Nazioarteko Magia Gala egingo da Principal antzokian, Gertuko Magiako Nazioarteko Gala,eta Haurrentzako Gala. Horietaz gain, magia ikuskizunak izango dira Ignacio Aldecoa kultura etxean eta Atarian, magia ibilbideak hiriaren erdialdean, eta magia emanaldiak erakusleihoetan.

Aurtengo ediziorako mago profesional hauen presentzia baieztatu da:

Espainiatik:

  • Jandro
  • Jessica Guloomal
  • Martilda
  • Dream
  • Samuel Arribas
  • Luis Boyano y Rocío
  • Dani Polo
  • Pipo Villanueva
  • Joaquín Matas
  • José Arcario

Beste herrialde batzuetatik:

  • Ricardo Rodríguez (Txile)
  • Roberto Mansilla (Argentina)
  • Daniel Ketchedjian (Uruguai)
  • Ton Stone (Suedia)
  • Nikola Arkane (Irlanda)
  • Rafael Scholten (Holanda)
  • Dion (Holanda)
  • Jimmy Delp (Frantzia)
  • Jaana (Alemania)
  • Roberto Giobbi (Suitza)
  • Henry Evans (Argentina)

“Gasteiztar oro gonbidatu nahi dut 2021ko Magialdiaren barruan irailaren 13tik 16ra Gasteizen antolatutako hitzordu interesgarrietara”, adierazi du zinegotziak.

Aurreko edizioetan bezala, 200 mago, profesional zein amateur, etorriko dira estatu osotik eta beste herrialde batzuetatik Magialdiaren programa profesionalean parte hartzera; Europa biltzar etxean izango da, irailaren 17tik 19ra bitartean.

Magialdiaren aurretik Magialdiaraba jaialdia egingo da, magia ikuskizunak probintzia osora zabaltzeko asmoz.

 Informazio gehiago

 

Jandro

Jessica Guloomal

 

 

Share

Europa jauregiak Hiri Hezitzaileen Topaketa hartuko du 2022ko martxoan

Topaketak –zein Hezkuntza Zerbitzuak antolatuko baitu– komunikazio eta hausnarketarako gune bat irekiko du Estatuko hainbat hiritako udal eta eragile sozioedukatiboen artean

Europa biltzar-jauregiak Hiri Hezitzaileen Estatuko Sarearen (RECE) Topaketa hartuko du 2022ko martxoaren 17an eta 18an, ‘Hiri hezitzailea sendotu’ lelopean.

Ekimena bi formatutan egingo da, aurrez aurre eta online, jardueretako batzuk streaming bidez jarraitzeko aukera emango da, Udalaren webgunean propio egokitutako gune baten bidez.

Hezkuntza eta Kulturako zinegotzi Estíbaliz Cantok esan duenez, “2020ko martxoan Gasteiz RECEko hirien koordinatzailea hautatu zen 2020-2022 aldirako. Orduan gure gain hartu genituen konpromisoen artean topaketa hau antolatzea zegoen. Ekimen honek komunikazio eta hausnarketarako gune bat irekiko du Estatuko hainbat hiritako udal eta eragile sozioedukatiboen artean”.

Erakundeetako ordezkari, eragile sozioedukatibo eta ikasleen artean, 300 pertsona inguru bilduko direla espero da. Izena emateko epea 2021eko abenduaren 1ean hasiko da, eta 2022ko otsailaren 18an amaituko, egun horiek biak barne.

Programak hainbat hitzaldi, solasaldi eta aurkezpen hartzen ditu baitan, bai eta RECEren Batzar Nagusiaren bilkura ere.

Topaketak RECEn bildutako 91 hiritan egindako lana ezagutzeko aukera emango du, 4 gai-multzotan berezita: ‘Hiri inklusiboa, hiri hezitzailea’, ‘Hiri berdinzale eta genero-indarkeriarik gabeak’, ‘Lan kooperatiboaren ereduak: Hizi Hezitzaileen erreakzioa’ eta ‘Garapen jasangarriaren helburuak, haurren inplikazioarekin (II. fasea)

Horrez gain, RECEko hiri kideek 4 gai-multzo horien inguruko esperientziak azalduko dituzte.

Partaideek lehen eskutik ezagutu ahalko dituzte Gasteizko leku eta baliabide hezigarriak zein artistiko eta kulturalak, Topaketarako propio antolatutako bisita gidatuen bitartez.

Zer da RECE?

Hiri Hezitzaileen Estatuko Sarea (RECE) elkarte bat da, Hiri Hezitzaileen Kartarekin bere gain konpromisoa hartu duten tokiko gobernuen lankidetza-egitura iraunkorra da. Gaur egun 226 dira RECEko kide, Espainiako estatuko autonomia-erkidego guztietakoak.

Informazio gehiago

 

 

 

 

 

 

 

 

 

 

 

 

 

 

Share

Kulturak 5.000 euro emango dizkio Urrezko Zeledonen erakundeari

Gasteizko Udalak lankidetza-hitzarmen bat sinatu du Urrezko Zeledonen Erakundearekin eta, horren bitartez, Hezkuntza eta Kultura Sailak 5.000 euro jarriko ditu 2021ean jarduerak antolatzeko.

Astelehenean bertan izan dugu Urrezko Zeledonen hitzaldi-zikloarekin atsegin hartzeko aukera, eta Antonio Altarribak Arabako komikiaren adeigabeko historiaz jardun zuen bertan. Zoragarria, benetan”adierazi du arloko zinegotzi Estíbaliz Cantok.

Urrezko Zeledonak

Urrezko Zeledonen Erakundea, “Urrezko Zeledona” saria irabazi duten pertsona eta kolektiboen artean adiskidetasun harremanak gorde eta sustatzen asmoz sortutako kultur elkartea da. 1962tik hona urtero ematen da saria Gasteizen.

Urteroko sari hori emanez, Instituzioak aintzatetsi egiten ditu hiriaren alde egindako zerbitzuengatik edo zernahi motatako kultura, gizarte, arte edo zientzia agerpenen bidez hiria goresteko, edo ospetsu nahiz eredugarri bihurtzeko egindako lanarengatik nabarmendu diren pertsona biziak zein erakundeak, mugarik egon gabe denboran edo egoitzan.

 

Share

USN World Summer Cup txapelketa hartuko du Gasteizek uztailaren 10ean

 

Iradier Aretoan egingo da rap-kantarien arteko lehia, segurtasun-neurri guztiak beteta

 

Uztailaren 10ean, Unity Stars Nation World Summer Cup txapelketako sailkapen jardunaldietako bat egingo da Iradier Arenan, munduko freestyler rap-kantaririk onenak lehiatzen diren kultur ekitaldia, hain zuzen ere. Ekitaldian osasun agintariek ezarritako neurri guztiak beteko dira parte-hartzaileen segurtasuna bermatzearren.

Espainiako hamar hiritan egingo da txapelketa, eta horietako bat dugu Arabako hiriburua, eta Argentina, Mexiko, Kolonbia, Txile, Peru eta Espainiako rap-dantzariak arituko dira lehian aurten.

“Iradier Arenak kultur -eta aisialdi- programazio heterogeneoaren aldeko apustua egiten du, askotariko hartzaileak erakartzeko. Rap-musikak joan den mendeko 80ko hamarkadan ditu erroak, baina, gure lurraldean orain erakarri ditu gazte gehien. Ekitaldi honekin, Gasteiz estatuko freestyle mapan kokatu da” azpimarratu du Hezkuntza eta Kultura zinegotzi Estíbaliz Cantok, eta ekitaldira joatera animatu du.

Gasteizen errimak egiten trebeenak direnak finalerdietarako sailkapen-probak egingo dituzten beste hirietako irabazleekin lehiatu beharko dira. Hiri hauetan egingo dira gainerako sailkapenak:  Almería (uztailak 9), Murtzia (uztailak 11), Malaga (uztailak 16), Gijón (uztailak 17) eta A Coruña (uztailak 18).

Finalerdikoak Bartzelonan (uztailaren 21ean), Madrilen (uztailaren 23an) eta Alacanten (uztailaren 25ean) egingo dira. Finala, berriz, Valentzian, uztailaren 31n.

Maiatzaren amaieran jakingo da lehen sailkapen-probetan parte hartuko duten taldeen osaera. Guztietan, nazioarteko artista bat, nazioko beste bat, profesional bat eta “rooki” edo talentu berri bat egongo dira. Rap-kantari berri horiek Espainiako hirietan aukeratuko dituzte.

Gasteizko ekitaldiari amaiera emateko, Endika Gutiérrez ‘Invert’ euskal rap-kantariaren emanaldia izango da, ikastetxeetan freestyle bidez bullying-aren aurkako borrokan aritzeagatik kantari ezaguna.

Unity Stars Nation World Summer Cup ekitaldiak Gasteizko Udalaren eta Arabako Foru Aldundiaren babesa du.

Sarrerak maiatzaren 26ko (asteazkena) 12:00etatik aurrera erosi ahalko dira.

 

Informazio gehiago

 

 

 

Share

José Uruñuela Dantza Kontserbatorioak Museoen Eguna ospatuko du Artiumen

 

Bihar hasiko da ikasle berriek 2021-22 ikasturterako izena emateko epea

 

Bihar, maiatzak 18, Museoen Nazioarteko Eguna dela eta, jarduera-programa anitza antolatu du Artium-Arte Garaikideko Zentro Museoak. Joan den larunbatean hasi zen, eta asteazkenean, hilak 19, amaituko da, Jose Uruñuela” udal dantza kontserbatorioko ikasleen emanaldiarekin.

17:45etik aurrera, Elvira Illanaren dantza garaikideko ‘47847. ariketa’ pieza dantzatuko dute Oihane Aramendia, Nawal Boteffah, Lucía Eizaguirre, Haizea López, Isabel Middlebrook, Naia Nieto eta Marina Olcoz dantzariek, ikusle guztien atseginerako.

 Aukera bikaina da gure kontserbatorioan ikasten duten dantzari gazteen talentua ezagutzeko, Euskal Autonomia Erkidegoan ikasketa mota horiek ematen dituen zentro ofizial bakarreko ikasleen lana” azpimarratu du Hezkuntza eta Kultura zinegotzi Estibaliz Cantok, eta, ekitaldira joateko gonbita egin du.

Dantzari batek 47847 ariketa egiten ditu gutxi gora-behera dantza kontserbatorioko ikasketa-aldian. Pieza horretako koreografia-mugimenduek eskolan egin ohi diren ariketen errepikapena eta automatizazioa erakusten dute. Koreografia-pieza horrek eguneroko ariketa, egoera edo ekintzetara igorriko gaitu, eta objektuen bitartez sortutako soinu-konposizioa izango da hondo-musika.

Ekitaldian, Juncal Ballestínen “El pedestal invisible” bideoa ere erakutsiko da,  izan ere proposamena “Juncal Ballestín. Bizitza ariketa gisa’ erakusketari lotuta dago, zein maiatzaren 23ra arte izango baita ikusgai museoan.

Leku-kopurua mugatua denez, erreserba egin behar da 945 20 90 20 telefonoan.

Izena emateko kanpaina

Egun bat lehenago, hilaren 18an, ikasle berriek 2021-2022 ikasturterako izena emateko epea irekiko da Dantza kontserbatorioan. Dantza-ikasketa arautuak eskaintzen ditu ikastetxe horrek; zehazki, Dantza Klasikoko oinarrizko ikasketak eta ikasketa profesionalak.

Covid-19aren pandemia dela eta, ez da sarrera-probarik egingo arautu gabeko ikasketetarako —Lehen Kontaktua (5-6 urte) eta Dantza Aurrekoa (7 urte)—. Eskabideak jasotzen diren hurrenkeran beteko dira lekuak, maiatzaren 18ko 9:30etik aurrera. Dantza Kontserbatorioko idazkaritzan aurkeztu ahal izango dira matrikulak, baita herritarrei laguntzeko bulegoetan ere, hitzordua eskatua, edo posta elektronikoz, dokumentazioa helbide honetara bidaliz: cmdanza.administracion@vitoria-gasteiz.org

Sarrera-probak

Oinarrizko Ikasketen edo Ikaskuntza Profesionalen ziklora sartzeko proba egin behar duten ikasleek, baita ziklo horietan sartu nahi duten ikasle berriek ere, bi fase burutu beharko dituzte. Lehenik eta behin, maiatzaren 18tik ekainaren 4ra bitartean, sarrera-probarako izena eman beharko dute. Eta, proba gaindituz gero, ekainaren 22tik 30era bitartean egin ahal izango dute matrikula.

Matrikula horiek, era berean, Dantza Kontserbatorioko idazkaritzan edo herritarrei laguntzeko bulegoetan —hitzordua eskatuta— aurkeztu beharko dira, edo posta elektronikoz, helbide elektroniko honetan: cmdanza.administracion@vitoria-gasteiz.org

Euskal Autonomia Erkidegoan horrelako ikasketak eskaintzen dituen zentro ofizial bakarra da Gasteizko kontserbatorioa. Ikasgai hauek eskaintzen ditu: ‘Dantza Klasikoa’, ‘Dantza Tradizionala’ (Euskal dantza), ‘Errepertorioa’, ‘Puntak’, ‘Dantza garaikidea’, ‘Izaerako dantza’, ‘Binako dantza’, ‘Dantzaren Historia’, ‘Anatomia eta elikadura’, ‘Interpretazioa’ eta ‘Musika’.

Informazio gehiago: 945 16 26 06 telefonoan, 09:00etatik 14:00etara, astelehenetik ostiralera, edo helbide elektroniko honetan: cmdanza.administracion@vitoria-gasteiz.org.

 

Share

Lau kontzertu eskainiko ditu Dazz Jazz jaialdiak  Gasteizen, uztailaren 5etik 8ra bitartean

Jesus Guridi musika-kontserbatorioan izango dira, Udalaren babesarekin

 Guztira lau kontzertu eskainiko ditu Dazz klubak antolatutako Dazz Jazz jaialdiak Gasteizen, uztailaren 5etik 8ra bitartean, Gasteizko Udalaren, Jesus Guridi musika-kontserbatorioaren eta Vital Fundazioaren laguntzarekin.

Hezkuntza eta Kultura zinegotzi Estíbaliz Canto, Jesus Guridi musika-kontserbatorioko zuzendariorde Ibon Zamacola, Vital Fundazioko zuzendari Arantxa Ibáñez de Opacua eta jaialdiaren antolatzaile Beñat Lasagabaster izan dira ekimenaren seigarren edizioaren aurkezpenean.

Antolatzaileek egin duten ahalegina azpimarratu du Estíbaliz Cantok. “Pandemia dela eta, ahalegin berezia egin beharra daukagu kultur jarduerak eskaintzeko, parte-hartzaileen segurtasuna bermatzeko behar diren neurri guztiak hartuz, eta kostu handia dauka horrek, baina merezi du. Artistak publikoarekin berriro biltzea da saririk onena.”

Uztailaren 5ean, astelehenez, hasiko da egitaraua, Jorge Pardo Tríoren kontzertuarekin, eta hilaren 6an Alfredo Rodríguez Tríoren txanda izango da. Andrea Motis Quartet hilaren 7an arituko da, asteazkenez, eta hilaren 8an, ostegunez, Sacatubón.

Jesus Guridi musika-kontserbatorioan izango dira emanaldiak, 20:00etan. Sarrerak erosi daitezke, www.musikaze.net webgunean, eta abonamenduak, berriz, bai webgune horretan, bai Dazz klubean (Aiztogile kalea, 60; Gasteiz).

Bi master class ere izango dira. Hilaren 8an, ostegunez, Roberto Pachecorena, eta hilaren 9an, ostiralez, Alfredo Rodríguezena, biak ere 11:00etan.

 “Dazz Jazz jaialdiaren seigarren edizioarekin bat egitera gonbidatzen ditugu gasteiztarrak. Finkatua dugu jaialdia egutegian, eta hiriaren kultura suspertzen lagunduko du.  Kultura segurua baita”, azpimarratu du Cantok.

 

 

 

Share

Ikasle berriek izena emateko epea irekiko du datorren astelehenean, maiatzak 17, Luis Aranburu eskolak

Udalaren webgunearen bitartez egin ahal izango da, maiatzaren 26ra arte

 

Ikasle berriek 2021-2022 ikasturterako izena emateko epea irekiko du datorren astelehenean, maiatzak 17, Luis Aranburu Musika Eskolak. Eskolak eskaintzen duen musika-prestakuntza jaso nahi dutenek internetez eman ahal izango dute izena, Udalaren webgunean —www.vitoria-gasteiz.org—. Maiatzaren 26an bukatuko da epea.

“Protokolo zorrotza ezarri du eskolak, irakasle eta ikasleen segurtasuna bermatzeko, eta, horri esker, ikasturte hau normaltasunez egin ahal izan da. Musika eta kultura, oro har, baltsamoa izan dira garai zail hauetan, eta, hortaz, are garrantzi handiagoa bereganatu du ikastegiaren lanak, hirian”, adierazi du Hezkuntza eta Kultura zinegotzi Estíbaliz Cantok.

Gasteizko hirigune historikoaren erdian dago Luis Aramburu Musika Eskola, eta adin orotako zaleei prestakuntza musikal praktikoa eskaintzea du helburu nagusitzat, baita aparteko bokazioa eta gaitasuna erakusten dutenei ikasketa profesionaletarako orientabidea eta prestakuntza ematea ere.

2021-2022 ikasturtean, hainbat musika-tresna jotzen ikasi ahal izango dute ikasleek: eskusoinua, baxu elektrikoa, klarinetea, klabezina, kontrabaxua, fagota, zeharkako txirula, gitarra, oboea, pianoa, saxofoia, tronboia, tronpa, tronpeta, tuba, biolina, biola eta biolontxeloa.

Beste ikasgai batzuk ere eskaintzen ditu eskolak: Musika Hastapenak (I. maila), Musikaren Lengoaia, Harmonia Modernoa, Talde Korala, Instrumentu Taldeak, Konboak, Bakarlaria, Eskolania eta Perkusioa.

“Luis Aranburu Musika Eskolan izena ematera animatzen ditugu gasteiztarrak, erreferentziazko zentroa baita Gasteizen, ikasiz gozatzeko”, esan du zinegotziak.

Zozketa egin ondoren, eskolako hallean egongo dira ikusgai zerrendak, ekainaren 14tik aurrera. Ekainaren 21etik 25era bitartean adjudikatuko dira lekuak, eta ekainaren 21etik uztailaren 2ra bitartean egin beharko da matrikula.

Argibide gehiago, 945 16 88 telefonoan.

Entzunaldiak

Bestalde, aurtengo ikasturtea bukatzeko, hainbat entzunaldi programatuko ditu Luis Aranburu Musika Eskolak, bai auditorioan, bai hiriko beste leku batzuetan.

“Emanaldi horiei esker, ikasturte honetan egindako lan bikaina erakutsi ahal izango diete ikasleek gasteiztarrei. Behar diren segurtasun-neurri guztiak hartuko dira kontzertuetan”, adierazi du Cantok.

 

 

 

 

 

 

 

 

Share

2022an EHUko artisten lanei zabalkundea emateko deialdia egin du Montehermoso kulturuneak

Ekainaren 11ra bitartean aurkeztu ahal izango dituzte beren proiektuak interesdunek

Prestakuntzaren azken etapetan diharduten artisten lanari zabalkundea emateko EHUko Arte Ederretako fakultatearekin elkarlanean urtero egin ohi duen deialdira aurkezteko epea zabaldu du Montehermoso kulturuneak.

“Artistak mundu profesionalera hurbiltzeko plataforma bat da deialdi hau, eta, bidenabar, gizartearekin zuzeneko lotura ezartzeko. Aukeratzen diren proiektuek 900 euroko laguntza jasoko dute, eta erakusketa egin eta zabalkundea emango zaie, Montehermoso kulturunean”, adierazi du Gasteizko Hezkuntza eta Kultura zinegotzi Estíbaliz Cantok.

Gasteizko Udalak eta Arte Ederren Fakultateak sorkuntzaren alorreko azken joerei zabalkundea emateko sinatu zuten hitzarmenaren barruan kokatzen da ekintza hori.

Aurkezten diren proiektuen artetik, guztira lau aukeratuko dira, eta Montehermosoko langileen aholkularitza izango dute, bertako aretoetan erakusketa egin arte. Erakusketa antolatu eta gauzatzeko prozesu osoan parte hartuko dute ikasleek, baita muntatzeko lanetan eta aurkezpen-prentsaurrekoan ere.

Ekainaren 11ra bitartean aurkeztu ahal izango dituzte beren proposamenak interesdunek, Udalaren webgunearen bitartez —wwww.vitoria-gasteiz.org— edo aurrez aurre, herritarrei laguntzeko bulegoetan.

Miguel Alejos, Jugatx Astorkia, Gaspar Avilés eta Rocío Agudoren lanak aukeratu ziren aurreko edizioan, eta 2021. urtean zehar egiten ari dira horien erakusketak, kulturunean.

 

Informazio gehiago

Share

Dantza Plazan segurua egingo da Florida parkean, maiatzetik irailera arte

Lehen hitzordurako gonbidapenak maiatzaren 3tik aurrera lortu ahal dira

Udal Folklore Akademiak Dantza Plazan programaren beste edizio bat antolatu du maiatzaren 7tik irailaren 17ra arte. Ekimen horri esker, herritarrek dantzaz gozatzeko aukera izango dute.

Osasun krisia dela eta, oraingo honetan ekitaldia Florida parkean izango da, kioskoaren inguruan mugatuko den eremu batean, eta ezinbestekoa izango da gonbidapenak erreserbatzea. Hitzordu bakoitzaren aurreko astelehenean egongo dira eskuragarri, 9:00etatik aurrera, wwww.entradium.com helbidean edo 945 16 16 18 telefonoan. 80 pertsonarentzako lekua egongo da, eta eskatzaile bakoitzak 4 sarrera erreserbatu ahalko ditu gehienez.

Beraz, maiatzaren 3an, astelehenean, lehen saiorako gonbidapenak lortu ahalko dira, hau da, maiatzaren 7rako. Gainerako datak hauek dira: maiatzak 14, 21 eta 28, ekainak 4 eta 18, eta irailak 10 eta 17 dira. Maiatzean eta ekainean arratsaldeko zortzietan hasiko da, eta, irailean, berriz, 19:30etan.

“Dantza Plazan parte hartzera gonbidatzen ditugu gasteiztarrak, dantza egiten ikasi eta dantza tradizionalak dantzatu ditzaten. “Aurten Florida parkean egingo da, beharrezko segurtasun neurri guztiekin” azpimarratu du Hezkuntza eta Kultura zinegotzi Estíbaliz Cantok.

 

Share

KaldeArte 2021k 33 konpainiaren 63 ikuskizun aurkeztuko ditu

Ekainaren 11, 12 eta 13an izango da Gasteizko Kaleko Arteen Nazioarteko XV. Erakustaldia

 

KaldeArteren 2020ko edizioa bertan behera utzi ondoren, Gasteizko Kaleko Arteen Nazioarteko Erakustaldiak XV. edizioa egingo du 2021eko ekainaren 11, 12 eta 13an.

Aurreikusita dago 33 konpainiak parte hartzea eta 63 ikuskizun eskaintzea. Konpainiak tokikoak, EAEkoak eta estatukoak izango dira gehienbat, atzerriko konpainien kopurua murriztu baita, segurtasun-arrazoiak direla eta. Kasu askotan, hainbat ikuskizun ordutegi berean egingo dira, hartara, ikusle andana ez ibiltzeko eszenatoki batetik bestera.

2020ko martxoaz geroztik gure hirian egingo den lehenengo kale-jaialdi handia izango da, eta Euskal Autonomia Erkidegoan 2021ean egingo den lehenengo kaleko arteen jaialdi handia.  “Kultura Zerbitzuan sektore honekiko gure konpromisoari eta laguntzari eusten diegu, eta indarrean dagoen araudia zorrotz beteko duen KaldeArte bat antolatzearen aldeko apustua egiten dugu, arte eszenikoek gure kale eta plazak har ditzaten”, adierazi du Gasteizko Hezkuntza eta Kultura zinegotzi Estibaliz Cantok.

Hala, 2021. urte honetan, bere esentziari eutsiko dion arren, erdigune-erdigunekoak eta ikusle ugari bildu ohi dituzten esparruak alde batera utzi, eta beste ingurune batzuetara aldatuko da, zeinak erdialdekoak izanik ere ez baitira Gasteizko erdigunean ekitaldi handiak hartzen dituzten ohiko esparruak. Horrek guztiak helburu du esparru segurua eskaintzea eta une oro jende-pilaketak saihestea. Aire zabaleko esparru mugarrituak izango dira; gehieneko ikusle-kopurua zehaztuta izango dute, denak eserita; segurtasun-neurri guztiak errespetatuko dira, Eusko Jaurlaritzaren indarreko araudiarekin bat.

Esparru berriak

Hiriaren erdialdeko oinezkoentzako esparruak (Andre Maria Zuriaren plaza, Foru plaza eta Arka plaza), beste toki batzuei utziko die bere tokia, hala nola Iparraldeko parkeari, Santa Maria plazari, Errenazimendu plazari, Artium museoaren barruko plazari, Zuluetako eta Falerinako lorategiei, Florida eta Judimendi parkeei eta abarri.

Ordutegiei dagokienez, gaur egungo araudia kontuan hartuta, Eusko Jaurlaritzak zehaztutako aurreikuspenei estu lotuko zaie programazioa: emanaldiak goizeko, arratsaldeko eta iluntzeko ordutegietan banatuko dira, eta aurreikusiko da antzezpen guztiak amai daitezen ekaineko egun horietarako ezartzen diren jarraibideek zehazten duten orduan. Hori guztia aldatu ahal izango da, pandemiaren bilakaeraren arabera.

“KaldeArte ezinbesteko hitzordu bihurtua da dagoeneko, gasteiztar guztientzat (edozein dela ere euren adina, generoa, jatorria…), baita kulturarekiko eta batik bat kale-arteekiko grina duen pertsona ororentzat ere. Diziplina anitzeko hitzordua izango da (antzerkia, zirkua, dantza, musika, esku-hartzeak…), eta Gasteizen, estatuan eta nazioartean arte eszenikoen abangoardia denaren hautaketa handia da”, gaineratu du Cantok.

Oso edizio berezia izango da 2021ekoa, zalantzarik gabe, 2020. urteak sektoreari ekarri zion gelditzearen ondoren. Sormenaren eta kulturaren sektorea izan da COVID-19aren pandemiak gogorren jo zuen sektoreetakoa. Aurtengo edizioak, iazko udan egin zen kultura-programaren antzera (zeina aurten, 2021ean, itzuliko baita), helburu nagusietakoa du kulturaren sektoreari, oro har, eta kaleko arteen sektoreari, bereziki, laguntzea.

KaldeArtek aukera paregabea eskainiko du zuzeneko ikuskizunak etxetik gertu ikusteko. Jaialdiak ikuskizuna hurbilduko digu, denon eskura jarri, eta beste ikuspegi batzuk erakutsi geure inguruan gertatzen denari buruz. Aurten, erronka bat gehitu zaio: jaialdia gozatzeko ingurune seguruak eskaini behar dira, eta kalera irten daitezen animatu behar dira ikusleak (adina edozein dutela ere), eta, hala, kulturarekiko haren grina piztu.

Arte eszenikoen jaialdien estatuko koordinakundeak (COFAE) egindako azterlan baten arabera, jaialdi haietan parte hartzen duten gehien-gehienek aldez aurretik planifikatzen dute zer ikuskizunetara joan nahi duten; % 22k jaialdian bertan daudela planifikatzen dituzte ikuskizunak, eta % 15 inguruk unean bertan inprobisatzen dute eta topo egiten dute haiekin. Gasteizko erdialdearen kasuan, kopuru hori handia da, eta, hain zuzen, ohitura horri eragin nahi zaio hala gerta ez dadin.

Gasteizko Udalaren Kultura Zerbitzuak antolatutako kaleko arteen jaialdia den aldetik, betiere ahantzi gabe oraindik ere pandemia ari garela bizitzen, eta, horrenbestez, direnik eta prebentzio-neurri guztiak hartuta, KaldeArte funtsezko ekitaldi gisa agertzen da mugitzen hasteko eta herritarrei zein sektoreari ikuspegi itxaropentsua emateko, zeinak errutina hautsi eta atzean utziko baitu. Izan ere, kulturak eskaintzen dizkigu aldaketa horri aurre egiteko tresnarik onenak, eta ondorio positiboak ematen dizkio hiriari zein herritarrei.

Informazio gehiago 

 

 

Bideoa ikusi 

 

 

 

 

 

 

Share