Prentsa Oharren banner

Beñat Etxepare antzokiak kultura eta zuzeneko arteekin elkartu nahi ditu berriz ere ikasleak

Udazkenetik abendura bitarteko programazioak hezkuntza-ziklo desberdinentzako lau proposamen eszeniko eskaintzen ditu

Gasteizko Iparralde gizarte-etxeko Beñat Etxepare antzokiak udazkeneko programazioa aurkeztu du, eta lau proposamen eszeiko ditu, hezkuntza-ziklo desberdinetarako. Hezkuntza eta Kultura zinegotzi Estíbaliz Cantok eta Teatro Paraisoren zuzendari Pilar Lopezek aurkeztu dute prentsaurrekoan.

“Aurten formula alternatiboak proposatuko ditugu ikusleak antzokira seguru itzul daitezen.  Udalaren Antzoki Sarea eta Teatro Paraíso erabat konprometituta gaude proiektuaren erabiltzaileekin, eta aktiboki egingo dugu lan eskolara itzultzeak berriz ere kultura eta zuzeneko arteekin elkartzea ere ekar dezan” adierazi du zinegotziak.

Horretarako, neurri orokorrak eta prestakuntza-zikloaren araberako berariazko neurriak hartuko dira. Antzokien edukiera % 50era murriztuko da, eta gela bakoitza bizikidetza-unitatetzat joko da. Ikusleek maskara jantzita izan beharko dute.

Haur Hezkuntzan ikusleak ikastetxeetara eramatea zaila izaten denez, artistak joango dira ikastetxeetara. “Lehen Hezkuntzan, deszentralizatu egingo dugu Beñat Etxepare antzokiaren programazioa, ikastetxeetara hurbiltzeko eta hartara, ikastetxeei garraio-logistika errazteko. Hori dela eta, Félix Petite, Federico Garcia Lorca  eta Jesus Ibañez de Matauko antzokietan eta Zabalganeko gizarte-etxean ere izango dira emanaldiak. Gainera, eskola-garraioa behar duten ikastetxeek % 50eko laguntza izango dute” adierazi du Cantok.

Bigarren Hezkuntzari dagokionez, ikastetxetik Beñat Etxepare antzokirako garraio-kostearen % 30eko laguntza izango da.

Programazioa

Urritik abendura bitarteko programan, Faktoria Teatro taldearen “Novelas ejemplares. La española inglesa y las dos doncellas’, lana izango da, Beñat Etxepare antzokian, bigarren hezkuntzako ikasleentzat.

Teatro Paraísoren ‘Úniko’ lana, gizarte etxeetako antzokietan ikusi ahalko dute lehen hezkuntzako bigarren eta hirugarren ziklokoek.

Lehen hezkuntzako lehen ziklokoentzat Yarleku Antzerkia konpainiaren “Etxerik Txikiena” izango da. Hau ere, antzoki guztietan izango da ikusgai.

Azkenik, Teatro Paraísoren “Bihotz Bihotzez” lana ikastetxeetan izango da haur Hezkuntzako ikasleentzat.

Sarrerek 5 euro balioko dute (irakasleentzat doakoa).

Cantok eskertu egin nahi izan dio Teatro Paraísori ikusle berriak sortzen egiten duen lana, bereziki une zail hauetan. “Zorionak Pilarri eta Teatro Paraísoko taldeari. Antzoki Sarearekin eskuz esku egin dute lan proiektu zoragarri hau eskantzeko, zeinek bermatu egiten baititu oraingo eta geroko entzuleak gure antzokietan, eta hori nire sailaren lehentasunetako bat da” azpimarratu du.

Beñat Etxepare programa

Share

Gasteizek 19 hezkuntza-jarduera berri aurkeztu ditu 2020-2021 ikasturterako

Guztira, 212 proposamen dira, eta urriaren 8tik aurrera eman ahalko da izena.

“Gasteiz, hiri hezitzailea” programaren 2020-21 ikasturteko jarduerak aurkeztu dira gaur goizean. Hezkuntza eta Kultura zinegotzi Estibaliz Cantok 212 jardueraren berri eman du, eta urriaren 8tik aurrera eman ahalko da izena udalaren webgunean (www.vitoria-gasteiz.org).

Gai hauek landuko dira: ingurumena (13 jarduera), hiriaren ezagutza (21), euskararen erabileraren sustapena (9), artearen eta ikus-entzunezkoen alorreko hezkuntza (51), gorputz-hezkuntza eta kirola (9), eta berdintasunerako hezkuntza (3). Era berean, honako lantegiak izango dira: osasunerako hezkuntza (34), herritarren parte-hartzearen sustapena (13), gaitasun pertsonaletan heztea (34), bizikidetza eta aniztasuna (13), garapenerako lankidetza eta nazioarteko elkartasuna (3) eta babesa eta segurtasuna (9).

19 berrikuntza daude programan, horietako batzuk pandemiak eragindako osasun krisiari lotuak, esaterako  “Erlaxatzen ikasi. Antsietateari aurre egin” edo “Emozioen kudeaketa koronabirus garaietan”.

“Pandemiaren ondoriozko zailtasun eta ziurgabetasun une hauetan, indarrean jarraitzen dute jarduera hauen programazioaren helburuek eta sustatzen ditugun baloreek” nabarmendu du Cantok. Hauek dira balore horiek: bizi-kalitatea, gizalegea, sormena, bakearen kultura, ekitatea, prestakuntza, identitatea, emakumeen eta gizonen berdintasuna, inklusioa, berrikuntza, parte-hartzea, erantzukizuna, elkartasuna eta iraunkortasuna.

Jarduera-programa hau Gasteizko udaleko Hezkuntza Zerbitzuak azken 30 urteetan gauzatutako estrategiaren parte da. Estrategia horri esker, Hiri Hezitzaileen Estatu mailako Sareko (RECE) koordinatzaile izatea lortu du, Estatuko 220 hirik parte hartzen duen elkartekoa, hain zuzen ere. Halaber, Gasteizek “Hiri inklusiboa, hiri hezitzailea” izeneko sare tematikoa koordinatzen du nazio mailan.

 Gizarte kohesioa

Zinegotziak iragarri duenez, aurten, arreta eta sostengu behar handiagoa duten ikastetxeei erraztasunak emango zaizkie programan parte hartzeko. “Izena emateko epe orokorra urriaren 8an hasiko bada ere, ikastetxe horiek urriaren 5etik aurrera Gasteiz, hiri hezitzailea programaren jardueretan izena emateko aukera izatea aurreikusi dugu. Ezin dugu ahaztu gizarte-kohesioa hobetzeko erronka dugula, desberdintasunetan eraginez eta hiriko ikastetxeen arteko aukera-berdintasuna handiagoa izateko” azpimarratu du.

Hamaika Esku programan eta Magnet proiektua gauzatzen duten ikastetxeek izango dute izena ematean lehentasuna hori.

“Gasteiz, hiri hezitzailea” programa

 

Share

Gizarte etxeek ikuskizunen programa berria aurkeztu dute

Liburutegien Sarearen jardueren, jarduera artistikorako hastapen-ikastaroen eta Auzo Eszena programaren osagarri izango da proposamena

 

Gasteizko gizarte etxeen sareak kultur programazio oparoa prestatu du udazkenerako, adin orotakoentzako ikuskizunen programa berria delarik nabarmenena.

‘Ikuskizunak gizarte etxeetan’ programaren barruan, zortzi kultur emanaldi eskainiko dira urriaren 3tik abenduaren 19ra bitartean, Aldabe, Arriaga, Salburua eta Zabalganeko gizarte etxeetan. “Tokiko eta kalitateko sorkuntzaren alde egiten dugu, euskal artista eta konpainia profesionalekin batera, eta Gasteizko publikoak atsegin hartu ahalko du adin orotakoentzako antzerki, dantza edo magia proposamenekin“, iragarri du Hezkuntza eta Kultura zinegotzi Estíbaliz Cantok.

19:00etan hasiko dira ikuskizunak, hauek, zehazki: Imanolen magia, Noralairen antzerki musikala, La Pulgaren eta Miren Amurizaren flamenko eta bertsolaritzaren arteko fusioa, Ameztu Produkzioen txotxongiloak, Zirika Zirkusen zirkua, eta Les Bobé-Bobé, Didau eta Próspero Teatroren antzezlanak. Sei ikuskizun euskaraz izango dira, eta bi gazteleraz.

Ikuskizun bakoitza baino 15 egun lehenago jarriko dira sarrerak salgai, gizarte etxe eta kirol ekipamendu guztietan (pilotalekuak izan ezik), baita internetez ere (emanaldia hasi baino ordubete lehenagora arte). Sarrerek 3 euro balioko dute.

Auzo Eszena

Ekimen berriaz gain, ‘Auzo Eszena’ zikloa ere eskainiko da, zeinak Gasteizko talde eta artista ez profesionalei aukera ematen baitie beren proposamenak jendaurrean erakusteko.

Martxoan bertan behera utzi behar izan zen programa, pandemia zela eta; orain berriro ekingo zaio, guztira zortzi ikuskizun eskainiz: horietako bi euskaraz izango dira, eta hiru, haurrentzat. Umorea, antzerkia, magia, bakarrizketak, komedia eta musikalak barne hartzen dituzte proposamenek, haur eta familiei zein heldu eta gazteei zuzendutakoak. Hori dena, artista hauen eskutik: Juanjo Monago, Imperfeccionismo Mágico, Pro-Ismo 0, Tadir, Arrox Bola Sormen Elkartea, Pánico Escénico, Ipazapi eta Auskalhop.

Urriaren 18tik abenduaren 20ra bitartean izango dira saioak, 19:00etan hasita, Arana, Aldabe, Arriaga eta Zabalganeko gizarte etxeetan.

Urriaren 7an jarriko dira sarrerak salgai, gizarte etxe eta kirol ekipamenduetan zein internetez (emanaldia hasi baino ordubete lehenagora arte).

Sarrerek 3 edo 5 euro balioko dute.

Liburutegien Sarearen jarduerak

Udal Liburutegien Sareak, berriz, 46 jarduera antolatu ditu irailetik abendura bitartean. Hitzaldiak, liburuen aurkezpenak, errezitaldiak, ipuin-kontalariak, musika, lantegiak… Proposamen horietatik, 26 haurrentzat izango dira, eta 20, gazte eta helduentzat. 28 euskaraz eta 17 gaztelaniaz. Ingelesezko ipuinen kontalaria ere izango da haurrentzat.

Jardueretako batzuek euro bateko prezioa izango dute, eta beste batzuk doakoak izango dira, lekuak bete arte; lantegietan, berriz, izena eman beharko da. Jarduera baino bi aste lehenagotik eskuratu ahalko dira sarrrerak, edo lantegietan izena eman.

Jarduera artistikorako hastapen ikastaroak

Gizarte etxeetako udazkeneko programazioaren barruan, orobat, jarduera artistikorako hastapen ikastaroak ditugu, denboraldi honetan hilabetekoak izango direnak. Orotara 149 lantegi dira, eta 1.829 leku, hainbat alorretakoak, euskaraz edo gaztelaniaz: arte eszenikoak. arte plastikoak, dantza, musika, idazketa, eskulangintza eta irudia.

Irailaren 7an hasi zen izena emateko epea urriko ikastaroetarako. “Une honetan lekuen ehuneko 80 beteta dugu, baina interesdunak animatzen ditugu, ikastaro batzuetan oraindik badelako leku librerik; irail osoan eta ikastaroa hasten den egunera arte eman ahal da izena“, nabarmendu du Cantok.

Kultura segurua

Programa guztiak indarrean dauden jarduera-protokoloak kontuan hartuz diseinatu dira, eta garatuko,  eta segurtasun- eta higiene-neurriak une oro egokituko zaizkie osasun agintaritzak COVID-19aren prebentziorako ezartzen dituen osasunaren arloko arau eta gomendioei.

Azken batean, gizarte etxeak espazio seguruak direla aldezten dugu, eta herritarrek konfiantza izan dezakete, bertan kalitateko kultur eta arte jarduerez gozatzen jarrai dezaketelako“, amaitu du zinegotziak.

Bibliotecas_octubre_2020

Espectaculos_en_centros_civicos_otono_2020

Auzo_eszena_otono_2020

Share

Merkealdi eta Okasioko Liburuen XXXIV. Azokaren inaugurazioa

Merkealdi eta Okasioko Liburuen XXXIV. Azoka inauguratu du Hezkuntza eta Kultura zinegotzi Estíbaliz Cantok. Urrezko Zeledonen plazan izango da, gaurtik —irailak 18— hasi eta urriaren 3ra bitartean. Euskadiko liburu-azoken koordinatzaile Asier Muniategi izan du lagun zinegotziak.

Euskal Autonomia Erkidegotik nahiz Estatuko beste leku batzuetatik —Madril, Andaluzia, Gaztela eta Leon eta abar— etorritako liburu-dendek 12 saltoki jarriko dituzte orotara. Gaztelaniazko eta euskarazko merkealdi eta okasioko liburuak izango dira salgai, euro batetik aurrera.

“Irakurketa izan da gure babeslekuetako bat, pandemiak eragindako konfinamenduan. Itzul diezaiogun orain eman digun guztia, gure liburutegiak liburu berriz hornitzeko inbertituz. Udazken eta negurako irakurgai erakargarri eta ekonomikoak aurkituko dituzte gasteiztarrek azoka tradizional horretan”, adierazi du Estíbaliz Cantok.

11:00etik 14:00etara eta 17:00etatik 20:30era egongo dira zabalik saltokiak.

 

Share

Gasteizko Antzerki Jaialdian protagonismo berezia izango dute tokiko konpainiek

Datorren astean jarriko dira salgai abonamenduak

Urriaren 7tik abenduaren 21era bitartean egingo den Gasteizko 45. Antzerki Jaialdirako dituzten proposamenak aurkeztu dituzte tokiko antzerki konpainien ordezkariek, gaur, prentsaurrekoan. Jaialdian 32 ikuskizun izango dira, guztira, eta horietatik 20, euskal taldeenak.

“Aurtengo jaialdia 0 km-koa izango da. Tokiko sortzaileen bandera-ontzia izatea nahi izan dugu. Gure helburua da arlo honetako artista, langile eta ikusleek berriz ere segurtasun- eta normaltasun- sentsazioa izan dezatela antzokietan” adierazi du Gasteizko Hezkuntza eta Kultura zinegotzi Estibaliz Cantok.

Horren haritik, antzoki sarearen arduradun Marta Morfortek azpimarratu egin du Gasteizko jaialdian segurtasun-neurri guztiak beteko direla, saio bakoitzean edukieraren ehuneko 50a, eta jendearen artean eserleku bat libre. Artistei bertaratzeagatik eskerrak eman ondoren, hitza eman die, euren proiektuak azal ditzaten.

Lehenik, Zanguango taldeko Miguel Muñozek hitz egin du. Joan den astean kaleko ikuskizun onenaren Max Saria jaso zuen “Al otro lado” lanagatik. Oraingoan, ‘Aquí va a pasar algo’ aurkeztu du, pertsona guztientzat jolasa aldarrikatzen duen umore-ikuskizuna.

Teatro Paraísoko Pilar Lópezek, berriz, Úniko, el Príncipe destronado’ lanaren magiaren lilura sentitzera animatu ditu ikusleak. Etxera beste umetxo baten etorrerak lehentasuna galarazi diola sentitzen duen seme bakar baten istorioa kontatzen du. “Jelosia eta enbidia bezalako emozioen kudeaketaz ari da”.

“Enredados” deialdiaren baitan, beldurrari buruzko “No me toques” Juan 20:17’ lana aurkeztu du Thussiako Miguel Garcések . “Pandemia garaian pasaporte inmunitarioak kudeatzen dituen enpresa bati buruzko da” adierazi du.

Off Local

Ondoren, Off Lokal deialdian aurkeztutako proposamenak azaldu dituzte.

Ekomako Aitor Colladok ‘Con los pies por delante’ lanaren zentzua azaldu du: heriotza desmitifikatzea. Bi pertsonaiak heriotzari aurre egiteko dituzten ikuspuntu ezberdinak deskribatzen ditu umorezko lan honek.

Ondoren, Mananas Fruti Co. konpainiako Jasón Guerrak ‘Acoples & Desacoples lana defendatu du. Bertan, gure familia- eta gizarte-bizitzarekin konpromisoak izateari utziz gero beste mundu bat posible dela ikusarazten saiatzen da coach bat.

Pez Limbo konpainiako Unai López de Armentiak, berriz, ‘Marea baja’ lanaz eta gizonen arteko zainketaz hitz egin du.

Tranpola konpainiako Josune Velezek ‘Txilin Hotsak’ aurkeztu du. Kristalezko ontzi huts batean zer dagoen esango dute lan horretan.

Pizifaktoriako Mikel Ayllón ‘Elkar ezagutu genuen eguna’, lanaz aritu da; internet bidezko harremana duten bi pertsonen arteko istorioa. “Bakoitzak bide desberdina aukeratzen du zoriontasuna bilatzeko” azaldu du.

Amaitzeko, Ypárchoumeko Marina Suárezek hartu du hitza. Existentzia mugimendu gisa aztertzen du ‘Hara Nori’ lanean.

Irailaren 21ean hasiko da antzerki-jaialdirako abonamendu salmenta (abonamendu irekietarako hitz ordua eskatu beharko da aldez aurretik). Sarreren salmenta irailaren 28an hasiko da.

Informazio gehiago

Share

Nerea Lekonaren ‘Desataduras’ erakusketa aurkeztu du Montehermosok

Azaroaren 15era arte egongo da ikusgai kulturuneko lehen solairuko aretoan

 

Nerea Lekuonaren ‘Desataduras’ erakusketa aurkeztu dute Montehermoso kulturunean, eta bihartik, irailak 11, azaroaren 15era arte ikusgai izango da kulturuneko lehen solairuko aretoan. Hezkuntza eta Kultura zinegotzi Estibaliz Canto eta Nerea Lekuona egilea bera izan dira prentsaurrekoan.

 “Montehermoso kulturuneak 2019ko deialdian aukeratutako 4 proiektu artistikoetako bat da Desataduras; aurten erakutsiko den azkena. Trantsizioaren kontakizun zolia da, egungo praktika estetikotik kontatua, eta garai hartako imajinarioaz hausnarketa egitera gonbidatzen gaitu, baita Francok Eguberrietako mezu ezagun hartan esan zuenaz, “lotuta eta ondo lotuta” geratu zenaz” azaldu du Cantok

Nerea Lekuonaren lana ingurunera egokitzeko, eta intuizioa eta zolitasuna lantzeko ariketa izaten da beti. Bere proposamenetan gurutzatu egiten dira irudiak, idazketa, ekintza, bitartekaritza eta egungo egoeraren analisia.

Alderdi grafiko eta bisualetatik abiatuta, bere proiektu artistikoan gero eta gehiago dira instalazio, esku-hartze eta formatu zabalduak, eta bertan, gure munduari buruzko ikuspegi kritiko batekin elkartzen ditu bere adierazpen-baliabide guztiak.

Horrenbestez, bere lanak gaitasun tekniko ugari dakar berekin, non formatuen hibridazioak, hausnarketa politikoek, sentsibilizazio sozialak, abileziak eta ironiek arau eta ereduetatik aldentzera bultzatzen baitute.

Ibilbidea

Andoaingo Zine eta Bideo Eskolan irudi arloko goi mailako teknikaria titulua lortu ondoren, diseinu, zinema eta bideoaren arloan prestatzen jarraitu zuen, eta lantegiak eta ikastaroak egin zituen hainbat artistarekin: Esther Ferrer, Isidoro Valcárcel Medina, Daniel Canogar, Miguel Trillo eta Luis de la Alas, besteak beste.

Amarika Proiektuan (2008-2011) parte hartu zuen, Arabako  Foru Aldundiaren erakusketa-espazioen kudeaketa alternatiboko esperientzian.

2018an, Artiumek kudeatutako “Itineracciones” deialdian, aukeratua izan zen berak egindako “Bajo el agua” lana. Bertan, Uribarri Ganboako urtegiko uraren azpian desagertutako herrien memoria lantzen du.

Beste euskal artista batzuekin batera “APEIRON” Euskal bideo-artearen erakustaldian parte hartu zuen, Uruguaiko Montevideoko II. Festival Cervantino jaialdian.

Madrilen, Artbanchel 2018 jaialdian parte hartu zuen, In June we trust lanarekin.

2016an, Artium Arte Garaikideko Euskal Zentro Museoko “Praxis” programara gonbidatu zuten. Urte horretan bertan, Centro de Holografía y Artes Dados Negros zentroko “Procesos” erakusketan parte hartu zuen.

Hainbat sari eta beka lortu ditu, eta horien artean azpimarratzekoak dira Montehermoso kulturuneko “Plusmarca Euskadi” (2014), eta Bitamine Faktoriaren EAS-RIO beka. Azken honen bitartez, Rio de Janeiroko Capacete artisten egoitzara bidaiatu zuen 2018an.

Horretaz gain,  Bilboko Guggenheim museoko hainbat hezkuntza-programatan irakasle aritzen da 2018az geroztik.

Gaur egun, Gasteizko arte garaikideari eskainitako Zas Kultur Espazio independentearen edukiak eta programak kudeatzen laguntzen du, baita Euskadiko eta Nafarroako artista hasi berrien “Inmersiones” urteko kongresuan ere.

 

 

 

Share

Omenaldia Alberto Schommerri, haren heriotzaren bosgarren urtemugan

 

Alberto Schommer argazkilari gasteiztarrari eginiko omenaldi batean izan da gur goizean Gasteizko Udaleko Hezkuntza eta Kultura zinegotzi Estíbaliz Canto, haren heriotzaren bosgarren urteurrena bete den honetan.

Florida parkean izan da ekitaldia, zeinean lore-sorta bat paratu baita artista gasteiztarrari eskainitako xafla duen pagoaren aurrean.

Argazkilariaren senideek antolatu dute omenaldia, eta bertan izan da haren iloba, Nicolás Casla. Ekitaldian Estíbaliz Cantok esan duenez, “hiri honek zorra dauka Alberto Schommerrrekin, eta kitatu egin nahi dugu, argazkilaria bera eta hark egindako lana gogoratuko duen argazkilaritza-zentro baten bidez”.

 

Share

Sorkuntza koreografikoa bultzatuko du Gasteizko Udalak, Atalak 2020ren bitartez

‘Site Specific Ciudad en Creación’ aurkeztuko du Laida Aldazek hilaren 16an, Felix Petite antzokian

 

Sorkuntza koreografikoa bultzatzen jarraituko du Gasteizko Udalak, Sorkuntza Koreografikoaren Mugaz Gaindiko ‘Atalak’ Sarearen barruan. Eta Udalaren Antzoki Sarearen bitartez egingo du, baita Jose Uruñuela Udal Dantza Kontserbatorioaren bitartez ere.

“Sareko lan-egitura bat egituratzen du Atalak-ek, sortze-prozesuak eta koreografia-karreraren hasieran dauden artisten koreografia-proposamenak garatzen laguntzen duelarik. Hortik, parte hartzeko dugun interesa”, nabarmendu du Hezkuntza eta Kultura zinegotzi Estibaliz Cantok.

Bi asteko iraupena duten esperimentazio-laborategiak eskaintzen dizkie sareak Akitania-Euskadi-Nafarroa Euro-eskualdeko koreografoei, baita ekoizpen-egonaldiak ere, ekoizpen horiek batera eta bestera eramateko aukerarekin.

Denis Santacana, Laida Aldaz eta Eneko Gil dira aurten koreografo gonbidatuak. Ekoizpen-egonaldiari dagokionez, Carmen Larraz nafarrak gidatuko du Atalak 2020.

Dantzaz da mugaz gaindiko sare horren buru, eta honako hauek biltzen ditu sareak:  Gasteizko Antzoki Sarea, CCN Malandain Ballet Biarritz, Baluarte Fundazioa, Tabacalera eta Gipuzkoako Dantzagunea, eta laguntzaileen sare gero eta zabalagoa, hala nola Gasteizko Udal Kontserbatorioa, Dantzerti, Baiona-Biarrizko Kontserbatorioa, SGAE fundazioa, La Fundición eta Azala.

‘Site Specific Ciudad de Creación’

Atalak ekimenaren barruan, ‘Site Specific Ciudad en Creación’ aurkeztuko du Laida Aldaz koreografoak hilaren 16an, aste hauetan Felix Petite antzokian garatzen ari den laborategia. Leku horretan bertan izango da, arratsaldeko zortzietan.

Ingurunearen behaketan oinarritzen da proposamena, sorkuntza-jarduerarako inspirazio gisa. Hiriaren konposizio espaziala aintzat hartzen du Aldazek non, nola eta zer sortu nahi duen erabakitzeko, eta material koreografikoaren errealitatea espazio eta leku desberdinekin trukatzen, proposamen koreografikoak ohiko espazio eszenikotik kanporatuz.

Laida Aldaz (Etxarri Aranaz, 1980) Nafarroako Dantza Eskola Ofizialean graduatu zen, 2000an, eta PARTSen (Brusela) jarraitzen du prestakuntza. Hainbat artista eta konpainiarekin lan egin du, hala nola David Zambrano, Julyen Hamilton, Ali & Hedi Thabet, Mat Voorter, Irma Firma, Enclave Dance Company, Cacao Bleu, Zoo Dance company eta beste. Hainbat diziplinatako artistekin jarri du harremanetan bere ibilbide profesionala, eta hainbat lan sortu ditu, sariak eta dirulaguntzak jaso dituzten eta mundu osoan barrena erakutsi diren lanak —Japonia, Estatu Batuak, Belgika, Espainia, Portugal, Alemania, Erresuma Batua…—. Gaur egun, bere pieza propioak sortzeaz gain, Zinetika zinema eta dantza jaialdiko zuzendaria da, eta —Carmen Larraz eta Marta Coronadorekin batera— La Faktoria zentro koreografikoa zuzentzen du, Nafarroan.

Share

‘Berriro elkartzearen poza’ aurkeztu du udal bandak

Zazpi kontzertu izango dira abonamendu-denboraldi berrian, irailetik maiatzera bitartean, Principal antzokian.

 

‘Berriro elkartzearen poza’ izenburupean, abonamendu-denboraldi berria aurkeztuko du Gasteizko Udal Musika Bandak —irailetik maiatzera bitartean izango da, Principal antzokian—.

Hezkuntza eta Kultura zinegotzi Estíbaliz Canto eta Udal Bandaren zuzendari Luis Orduña izan dira zikloa aurkezteko prentsaurrekoan. “Berriro biltzeko unea iritsi da. Musika zoragarriz inguratuko gara, bakarlari bikainak entzungo, zuzendari gonbidatuak lanean ikusiko, zoriontasunez bete gaitzan musikak”, adierazi du Cantok.

Orduñak nabarmendu duenez, “baikortasunak markatzen du 2020-21 denboraldi hau, baita poesiak, historiak, umoreak eta aldarrikapenak ere. Izan ere, uste dut garaia dela emakumeek musikan duten papera agerian jartzeko, eta, beraz, emakumezko orkestra-zuzendari bat izango dugu lehenengo aldiz, gonbidatua”. Ildo beretik, emakumezko musikagileen lanak eskainiko dira kontzertuetan, eta emakumeei protagonismoa emango.

Irailaren 30ean hasiko da ziklo berri horren egitaraua, zikloari izena eman dion ‘Berriro elkartzearen poza’ kontzertuarekin. Luis Gonzálezek parte hartuko du bertan, tronpeta-bakarlari gisa. Gainera, azaroaren 25ean, asteazkenez, ‘Haizea alde’ entzun ahal izango dute ikusleek, Isabel Rubioren zuzendaritzapean. Eta ‘Beethovenen Gasteiz’ izango da protagonista abenduaren 16an, asteazkenez, bandaren 2020ko programazioa itxiko duen kontzertuan.

Otsailaren 10ean, Marcel Ortegak zuzenduko du banda, ‘XXI zerumuga’ musika-emanaldian. Martxoaren 10ean, ‘Bizia koloretan’ emanaldia izango da, Victor de Andrés tronboi-bakarlari dela.

Ensemble Rayuela saxofoi-laukotea, berriz, gonbidatu gisa arituko da, apirilaren 21ean, ‘Globaliz-acción!’ kontzertuan, eta, denboraldiari bukaera emateko, maiatzaren 12an, ‘Optimismorako bidean’ emanaldian.

Bihar, irailak 8, jarriko dira salgai abonamenduak, 14 euroan, eta sarrera solteak, berriz, irailaren 22tik aurrera erosi ahal izango dira, 3 euroan, Principal antzokiaren ohiko salmenta-bideak baliatuz.

“Behar diren neurriak hartuko dira segurtasuna bermatzeko, bai artistena, bai emanaldietara joaten diren ikusleena”, azpimarratu du zinegotziak, eta orobat animatu ditu gasteiztarrak Udal Bandaren denboraldi berriko abonamendua erostera. “Aire freskoa iritsi da bandara. Ez ezazue galdu”.

 

Informazio gehiago: www.vitoria-gasteiz.org/banda

 

 

 

 

 

 

 

 

Share

Asteartean, hilak 8, ekingo dio atzera Principal antzokiak Ganbera Zikloaren programazioari

Pandemiaren ondorioz bertan behera utzitako emanaldiak berreskuratuko dira

 

Datorren asteartean, irailak 8, hasiko da atzera Principal antzokiaren Ganbera Zikloa. Pandemiaren ondorioz bertan behera utzitako hainbat emanaldi berreskuratuko dira, irailerako eta urrirako programatuta zeudenak eskaintzeaz gain. Jesus Guridi Musika Kontserbatorioko areto nagusian izango dira emanaldiak, arratsaldeko zortzietatik aurrera —19:30ean irekiko dira ateak—.

“Krisi sanitarioaren ondorioz gauzatu ezin izan ziren jarduera guztiak atzera programatzeko egin den ahaleginaren erakusgarri dugu. Ziklo honen bidez, beste herrialde batzuetan proiekzioa lortu duten euskal eta arabar musikariak ezagutarazi nahi ditugu, espazio paregabe batean —musika kontserbatorioa— ganbera-musikako proposamenak eskainiz”, nabarmendu du Gasteizko Hezkuntza eta Kultura zinegotzi Estíbaliz Cantok.

Udaleko Hezkuntza eta Kultura Sailak Jesus Guridi kontserbatorioarekin elkarlanean antolatzen duen ziklo horren bederatzigarren edizioa izango da.

Egitaraua

Irailaren 8an ekingo zaio atzera programari, Kugel Ensemble saxofoi laukotearekin —Iñigo Setuáin Antoñanzas, Luis Homedes López, Cristina Arcos Cano eta Pedro Caballero García—. J. Haydn, Ivan Fedele, J. Torres eta  G. F. Haas-en lanak joko dituzte, besteak beste.

Irailaren 17an, Oreka Quartet-ek hartuko du lekukoa: Iñaki Lagos (biolina), Enrique Campos (biolina), Marina Barredo (biola) eta Iván Casado (biolontxeloa). L. V. Beethovenen eta Jesús Guridiren piezak joko dituzte.

Irailaren 22an, berriz, Adriana González soprano guatemalar gaztea entzun ahalko du publikoak, Iñaki Encina piano-jotzailea lagun duela. Jesús Guridi Bidaola, Isaac Albéniz, Hélène Covatti-Dussaut eta Robert Dussaut-en lanak ekarriko dituzte.

Irailaren 29an, J. S. Bachen ‘Viola da gambarako sonatak’ entzun ahal izango dira, Alejandra Saturno eta Izaskun Ihabenen eskutik.

Bukatzeko, Vocalia taldeak abestuko du urriaren 2an, Basilio Astúlezen zuzendaritzaren pean.

Abonamendutik kanpo, ‘Sagutxu tuntuna’ antzezlan musikala eskainiko da irailaren 26an Principal antzokiaren Ganbera Zikloaren barruan, 2 eta 6 urte bitarteko haurrentzat eta helduentzat; 11:00etan euskaraz eta 12:30ean gaztelaniaz.

Artisten eta ikusleen segurtasuna bermatzeko ezarri diren prebentzio-neurriak nabarmendu ditu zikloko zuzendari artistiko Carlos Secok.

Era berean, bertan behera utzitako kontzertuetarako erositako sarrerek data berrietarako balioko dutela jakinarazi du.

Share