Prentsa Oharren banner

Hitzarmena Geu Elkartearekin, sektore sozioekonomikoan, gazteetan eta Gasteizko auzoetan euskararen erabilera sustatzeko

Gasteizko Udalak lankidetza-hitzarmen bat sinatuko du GEU Elkartearekin, besteak beste, sektore sozioekonomikoan, gazteetan eta hiriko auzoetan euskararen erabilera sustatzeko proiektu bat garatzeko. Euskaraldia ekimenaren hirugarren edizioa 2022rako dago aurreikusita, eta ekimen horren baitan sinatuko da akordioa. Tokiko Gobernu Batzarrak ostiralean onartu zuen hitzarmena sinatzea. 50.000 euroko partida du proiektuak eta Elkarrekin udal-taldeak babestu zuen, aurrekontu-akordioaren esparruan.
“Gasteizek euskararen hiriburua izan behar du, eta Geu Elkarteak planteatzen dituen ekimenek eta Euskaraldiak ildo horretan lan egiten laguntzen digute. Gainera, Elkarrekin udal-taldeak hizkuntza-politikaren arloan akordioak lortzeko erakutsi duen gaitasuna azpimarratu nahi dut. Positiboa da gure hiriarentzat”, azaldu du Iñaki Gurtubai Euskara zinegotziak.

Elkarrekin Udal taldeak euskara jendarte kohesioaren elementutzat hartzen dugu. Ikuspegi honetatik, bere defentsa eta bere ezagutza eta erabilera handitzea sustatu nahi dugu. Hori dela eta, euskararen normalizazioan lan egiten duten agenteen kohesioa bermatzeko ekimen eraginkorrak bultzatzearen aldekoak gara, GEU elkartearen bezalakoak“, azpimarratu du Gema Zubiaurre Elkarrekin udal taldearen zinegotziak.

GEUren proiektua 2022ko otsailera arte garatuko da, eta hainbat helburu ditu: herritarrek eta Euskaraldia osatzen zuten taldeek ekimen horri eutsiko diotela bermatzea, ekimenaren etorkizuneko edizioei begira parte-hartzaile kopurua handitzeko lan egitea eta datorren urteari begira egin daitezkeen hobekuntzak aztertzea.

GEU elkarteak, Gasteizko Udalarekin batera, euskararen erabilera sustatzeko hainbat jarduera bultzatzen ditu. Bereziki, sektore sozioekonomikoa eta gazteak bezalako esparruak sustatu nahi dira. Beste helburu bat euskara ezagutzen ez duten baina hizkuntzarekiko jarrera positiboa duten pertsonekin harremanetan jartzea da.

2018ko edizioan 13.000 gasteiztarrek hartu zuten parte Euskaraldian. 2020an, berriz, ahalegina egin zen erakundeek parte har zezaten, eguneroko funtzionamenduan hizkuntza-ohituren aldaketak bultzatzeko. Gasteizen, 120 erakundek egin zuten bat ekimenarekin. Besteak beste, Udalak berak.

 

 

Share

Udalak eta Euskaltzaindiak berretsi egin dute Gasteizen euskararen erabilera sustatzeko lankidetza-hitzarmena

 

Hitzarmenak bere baitan hartzen du gure udalerriko toponimia historikoa aztertzeko Elena Martínez de Madina egiten ari den lana. Jada Arratzuko seriea amaitu du ikerlariak.

 

Gasteizko Udalak eta Euskaltzaindiak berriki berretsi duten lankidetza-hitzarmena aurkeztu dute gaur goizean, bai eta Gasteizko udalerriko toponimia historikoaren saileko beste liburuki bat ere, hain zuzen Gasteizko toponimia. Arratzua III izenekoa. Liburukia aurkezteko prentsaurrekoan parte hartu dute Iñaki Gurtubai Gasteizko alkateorde eta Euskarako zinegotziak, Roberto González de Viñaspre euskaltzain oso eta Euskaltzaindiaren Arabako ordezkariak, eta Elena Martínez de Madina ikerlari eta euskaltzain urgazleak.

Elena Martínez de Madinak eginiko ikerlanak Gasteizko udalerri osoko toponimia historiko eta gaur egungoa aztertzen du, hots, hiria bera eta 63 herri. 

Arratzuko merindadearen ohiko toponimiak aztertzen dituen liburuki honekin amaitzen da berari eskainitako hiru aleko seriea. Oraingo lan honetan zazpi herri aztertu dira: Ilarratza, Jungitu, Lubinau, Matauku, Oreitia, Uribarri Arratzua eta Zerio.

Lankidetza-hitzarmena Udalarekin

Gasteizko Udalak eta Euskaltzaindiak toponimia-ikerkuntzako lanaren aurkezpena urteko lankidetza-hitzarmena sinatzeko baliatu dute. Hitzarmen berriaren eskutik, hirian euskara sustatzen ahaleginduko da Udala, Euskaltzaindiaren eskutik.

Hitzarmen berriaren bidez, Udalak 63.000 euro emango dizkio Euskararen Akademiari, urte osoan kultur zabalkunderako jarduerak, ikastaroak eta hitzaldiak egin ditzan. Horrez gain, Euskaltzaindiak euskararekin lotutako gaietan aholku emango die Udalari eta udal-zerbitzuei. Gainera, hirian hizkuntza babesten, zaintzen eta sustatzen jarraituko du Akademiak. Gasteizko alkateorde eta Euskarako zinegotzi Iñaki Gurtubaik eskertu egin dio Euskaltzaindiari euskararen alde egiten duen guztia, eta berretsi egin du Udalak euskararekiko duen konpromisoa.

Share

Ia 200 ikertzaile gazte bilduko dira Ikergazte kongresuan Gasteizen ekainaren hasieran

 

Ekainaren 9, 10 eta 11an Gasteizen egingo den IKERGAZTE kongresuan 200 ikertzailek parte hartuko dute elkar ezagutu eta euskarazko produkzio zientifikoa sustatzeko helburuarekin. 150 artikulu zientifiko aurkeztuko dira eta antolatzaileek ekitaldi arrakastatsua izango dela aurreikusten dute. Hiru egunetan zehar nazioarteko ikertzaileen hitzaldiak, mahai-inguruak, aurkezpenak eta ekintza ludikoak antolatu ditu UEUk.

 

Prentsaurrekoan Iñaki Gurtubaik, Vitoria-Gasteizko Udaleko alkateordeak eta Euskara zinegotziak; Lexuri Ugartek, Arabako Foru Aldundiko Euskara Zuzendariak; Kepa Sarasolak, UEUko zuzendariak; Inma Arostegik, EHU/UPVko Ikerketa errektoreordeak eta Olatz Arbelaitzek, IKERGAZTEko zuzendariak parte hartu dute.

 

Iñaki Gurtubaik, Vitoria-Gasteizko Udaleko alkateordeak eta Euskara zinegotziak eman dio hasiera prentsaurrekoari. “Euskarazko ikerkuntza eta hezkuntza ekimenak babestea Gasteiz bezalako hiri batentzat pozgarria da oso. Euskadiko hiriburuaz gain, euskararen hiriburua ere izan nahi dugu. Eta horretarako, IKERGAZTE bezalako kongresu erreferenteak gurean egiteak grrantzi handia du”.

Lexuri Ugartek, Arabako Foru Aldundiko Euskara Zuzendariak ere IKERGAZTE kongresuaren balioa azpimarratu eta Arabak azken urte hauetan euskararen esparruan egin duen lana balioan jartzeko ekimen ezinhobea dela aipatu du.

Kepa Sarasolak, UEUko Zuzendariak, UEUrentzat egitasmo honek duen garrantzia azpimarratu du: “Ia 50 urteko ibilbidean, UEUren helburu garrantzitsuenetako betidanik izan da euskal komunitate zientifiko-intelektuala trinkotzea. Elkarren berri izatea ezinbestekoa da ezagutzak aurrera egin dezan, are gehiago gure kasuan, euskaraz lanean dihardugun ikerlariak hain sakabanatuta egonda. Gaur egun ikertzaile euskaldunak inoiz baino gehiago dira, eta beraien arteko eta lanen ezagutza bideratzeko asmoz antolatu genuen 2015ean lehen aldiz IKERGAZTE kongresua Durangon, bigarren aldiz 2017an Iruñean eta hirugarren aldiz 2019an Baionan. Edizio bakoitzean 150 ikertzaile baino gehiagok parte hartu dute, eta argi geratu zen horrelako foro bat beharrezkoa zela. Dagoeneko gune erreferentziala bilakatu da ikertzaile euskaldunentzat, eta arrakasta horren atzean dago unibertsitate eta erakunde desberdinekin egiten ari garen bide oparoa, #ElkarEkin”.

Inma Arostegi, EHU/UPVko Ikerketa Errektoreordearen esanetan, “gure hizkuntzak terminologia zientifikoa, bibliografia, material didaktikoa eta, batez ere, euskara lanean erabiliko duten ikertzaileak behar ditu. Euskal Herriko Unibertsitateak eta Udako Euskal Unibertsitateak elkarlan handia egin dute guzti hori sortzearen alde. Poliki-poliki baina eten gabe doa gure hizkuntza ikerketan ere bere bidea egiten”.

Olatz Arbelaitzek, kongresuko zuzendariak aurtengo antolakuntza ez dela batere erraza adierazi du: “COVID-19a dela eta sortutako osasun krisiak zailtasunak jarri dizkigu. Une askotan kongresua aurrez aurre antolatzeko ideia zalantzan jarri bada ere, argi izan dugu IKERGAZTEren izaerak presentzialtasuna eskatzen zuela. Alegia, beste helburu batzuen artean ikertzaile gazteek elkar ezagutzea duen kongresua ezin imajina genezakeen urruneko moduan eginda. Ez zaigu buruhauste gutxi kostatu, eta B plana ere landu behar izan dugu, baina aitortu beharra dugu, aurtengo ekitaldirako hautatutako hiria Gasteiz izateak eta Europa Biltzar Jauregian antolatzeak erraztu duela dena”.

Arbelaitzek aurreko edizioetako helburu berberekin bidea urratzen segitzeko asmoz datozela adierazi du: “Ikertzaile gazteek egiten duten nazioarte mailako ikerkuntza etxean ezagutu dadila nahi dugu, eta ikertzaileei Gasteiz eta inguruak ezagutzeko aukera ere eman nahi diegu. Aurten sekula baina ekarpen gehiago jaso dugu, 163, eta gainbegiratze-prozesua gainditu duten 150 lan aurkeztuko dira kongresuan: 58 ahozko aurkezpen eta 92 poster. Ezin aurrera egin beraz, jasotako lan guztiak zintzotasunez berrikusi dituzten batzorde zientifikoko kideei eskerrak eman gabe”.

  • Giza Zientziak eta Artea :18
  • Gizarte Zientziak eta Zuzenbidea : 39
  • Zientzia Zehatzak eta Natur Zientziak : 42
  • Ingeniaritza eta Arkitektura : 24
  • Osasun Zientziak : 27

 

IKERGAZTEko Zuzendariak aipatu du jakintza-alor bakoitzeko lanik onenari saria emango zaiola kongresuaren azken egunean, Gasteizko Udalaren eskutik. Era berean, sari berezi bat ere egongo da, Udalbiltzak emango duena, Euskal Herriko garapenean eragin handiena izango duen ikerketa aintzat hartuko duena.

Ikertzaileen filiazioari dagokionez, aurreko edizioetako joera mantendu da. Jasotako komunikazioen artean Euskal Herriko Unibertsitatea (UPV/EHU) da maizen aipatu dena eta ondoren Mondragon Unibertsitatea, aurreko edizioetako ekarpen kopurua bikoiztuz. Horiez gain, Nafarroako Unibertsitate Publikoa, Nafarroako Unibertsitatea, Deustuko Unibertsitatea, Bartzelonako Unibertsitate Autonomoa, Bordeleko unibertsitatea, University of Illinois at Urbana-Chamapaign, Vic-eko Unibertsitatea eta Granadako Unibertsitateko lanak ere kongresuan egongo dira. Hauez gain unibertsitateei atxikitako ikerketa-zentroak eta taldeak ere aipatzen dira beste argitalpen askotan. Ildo honetatik nabarmentzekoa da, aurtengo edizioan 14 ikerketa talde laguntzaile izango direla, aurreko ekitaldietako kopuruaren bikoitza.

Arbelaitzen esanetan zenbakiek adierazten dute oso pozik egoteko arrazoiak dituztela, IKERGAZTE ekimen arrakastatsu eta erreferentzia bilakatu dela adierazten baitute: “Zalantzarik ez dugu alor desberdinetako ikertzaileek besteen lanak ezagutzeko aukera izango dutela, eta aurretik gertatu den bezala, ziurrenik elkarlan berriak ere sortuko dira bertatik”.

Edizio hau COVID-19a dela eta sortutako osasun krisiari egokituta antolatu behar izan dute, eta betiko espiritua mantenduko duten arren, osasun neurri zorrotzek baldintzatuta egongo da eta horrek egitaraua zertxobait moldatzera behartu ditu, baina aurreko edizioetakoa bezain interesgarria aurreikusten dutela adierazi du Olatz Arbelaitzek.

 

EGITARAUA Xehetasun guztiak www.ueu.eus/ikergazte

Asteazkena, ekainak 9

08:10-09:00 Harrera mahaia irekiko da

09:00-09:30 Harrera ekitaldia eta ongietorria

09:30-10:30 Hitzaldi gonbidatua: “What is feminist research in art history?” (Middlesex Unibertsitatea)

10:30-11:15 Hitzaldi gonbidatua: “Hizkuntza teknologiaren bilakaera: IXA taldearen esperientzia. Erabili zientzia gure gizartearen alde. Arantza Diaz de Ilarraza (UPV/EHU, UEU)

11:15-12:00 Atsedenaldia

12:00-14:15 Mikroaurkezpenak

14:15-16:15 Bazkari etena

16:15- 17:50 Solasaldia: “Ezagutzaren dibulgazioa, ahalduntzeko tresna”

18:00-20:00 Saio osagarriak

Gasteiz eta Arabako historia, herri mugimenduak eta euskalgintzako eragileak ezagutzeko aukera.

Osteguna, ekainak 10

09:00-10:00 Hitzaldi gonbidatua: “Datuen zientziak COVID-19aren aurkako borrokan”. Nuria Oliver (Telekomunikazio ingeniaria eta Inteligentzia Artifizialeko doktorea)

10:00-11:15 Mikroaurkezpenak

11:15-12:00 Atsedenaldia

12:00-14:15 Ahozko aurkezpenak

14:15-16:15 Bazkari etena

16:15- 17:50 Mahai ingurua: “K++: Koronabirus osteari buruz esandakoei atzera begirada”

18:00-20:00 Saio osagarri berezia eta afaritxoa

Ostirala, ekainak 11

09:00-10:00 Hitzaldi gonbidatua: “Biomaterial eta material biologikoen propietate fisikoak”. Eneko Axpe (Marie Curie doktore osteko ikertzaile bekaduna Stanford University-n, NASA, UPV/EHU)

10:00-11:15 Mikroaurkezpenak

11:15-12:00 Atsedenaldia

12:00-13:30 Sari banaketa eta Amaierako ekitaldia

 

WEB GUNEA: www.ueu.eus/ikergazte

TWITTER: @ikergazte_

Facebook: @IkergazteKongresua

 

 

Share

2020ko aurrekontua 6 milioi euro baino gehiagoko aurrezpen garbiarekin itxi da

Gasteizko Udalaren 2020ko aurrekontua ixteko dekretua arestian sinatu da, eta emaitza positiboak eman ditu bere magnitude nagusietan. Hala gertatu da aurrezpen garbiarekin, 6.191.811,18 eurokoa izan baita; zenbateko hori diru-sarrerei gastu arruntak, urteko amortizazio teorikoa eta interesak kenduz kalkulatzen da. “Oso garrantzitsua da iazko aurrekontua aurrezpen garbiaren zenbateko positiboarekin itxi izana, oso testuinguru korapilatsutik abiatu baikinen; izan ere, azkar baino azkarrago erreakzionatu behar izan genuen koronabirusaren krisiak Udalaren egoera ekonomikoari kalte larriak egin ziezazkion saihesteko. Aurrezpen garbia sortu izanaren ondorioz, ez dugu onetsi beharko finantzak onbideratzeko planik. Hori egin behar izango genukeen, gastuak diru-sarrerak baino handiagoak izan balira”, zehaztu du alkateorde eta Ogasuneko zinegotzi Iñaki Gurtubaik.

Aurrekontu-emaitza doitua ere positiboa izan zen, 10.929.124,55 eurokoa. Zenbateko hori lortutako diru-sarreren guztizkoaren eta sortutako gastuen guztizkoaren (ez bakarrik arruntak, aurrezpen garbiaren kasuan bezala) arteko aldea da.

2020ko aurrekontuaren itxieraren hirugarren magnitude garrantzitsua gerakinak dira. Pasa den ekitaldian, 40.146.576,04 euroko diruzaintzako azken gerakina sortu zen. Magnitude horri kendu behar zaio kobrantza zalantzagarriko diru-sarreren marjina (15.254.400 euroan zenbatetsia): hala, 24.892.175,53 diruzaintzako guztizko gerakina ateratzen da, eta zenbateko hori gehitzen zaie 2021eko aurrekontuei, aurreko ekitalditik datozen funts gisa. Aurrekontuen mekanikak bi kontzeptutan banatzen du zenbateko hori:

  • Diruzaintzako gerakin lotua14.064.441,30 euro—: ezinbestean erabili behar da proiektu eta obra jakinetan (BEArako eta haren kargatze-unitate funtzionalerako Udalaren ekarpena finantzatzea, Eskualde Planaren bidez enplegua sortzea eta abar).
  • Gastu orokorretarako diruzaintzako gerakina10.827.734,24 euro—: lizitatze-fasean edo adjudikatuta dauden obra eta proiektuetan erabiltzen da (hala nola Ariznabarreko aparkalekua amaitzea, Triana zubiaren irisgarritasun-proiektua burutzea, bertan Gasteiz Antzokia jartzeko Ruiz de Bergaratarren jauregia birgaitzeko lanak eta abar).

Oraingo ekitaldi ekonomikora gehitzen den beste zenbateko bat Ekarpen-konpromiso sendoak kontzeptua da; zenbait proiektutarako beste administrazio batzuek egindako azken ekarpenei dagokie, eta 24.394.180,76 eurokoa da. Kontzeptu horren eta diruzaintzako guztizko gerakinaren batura, 49.286.356,30 eurokoa da.

2020ko aurrekontuaren itxieraren beste adierazle bat diruzaintzako gerakin likidoa da; haren zenbatekoa honela lortzen da: lehen adierazitako 49,2 milioi euroko zenbatekoa ken 2021eko martxoaren 26ra arte kreditu-gerakin erantsien guztizkoa (46.102.478,14 euro); guztira 3.183.878,16 euro dira, eta zenbateko hori hainbat helbururi eslei dakiekeen ekonomia-funts bihur daiteke.

COVID-19aren pandemiak eragindako ziurgabetasun ekonomiko eta sozialaren gaur egungo testuinguruan, berri ona da ikustea Gasteizko Udalak 2021eko aurrekontuari gehitu ahal izango dizkiola behar diren gerakinak abian dauden obrak eta proiektuak amaitzeko eta ekonomiaren zein gizartearen arloetan egundo ikusi gabea den egoera honi sendotasun handiagoz aurre egiteko, ondorioztatu du Iñaki Gurtubaik.

Share

Beste aurrerapausu bat Udalaren hurrengo LEPerako

 

  • Azaroaren amaieran edo abenduaren hasieran irekiko da C1 taldeko 163 plazetarako eskaintzan izena emateko epea.

 

Giza baliabideen zinegotzi Iñaki Gurtubaik sinatu ditu C1 taldeko lan-eskaintza publikoaren oinarriak, eta aste honetan bertan argitaratuko dira Arabako Lurralde Historikoaren Aldizkari Ofizialean. Horixe da izen-emateko aldia ireki ahal izateko azken izapidea, eta azaroaren amaieran edo abenduaren hasieran irekiko da. Hori guztia, azterketak Aste Santua baino lehenago egiterik izan dadin, osasun-egoerak aukera ematen badu.

C1 taldeko LEPa C1, C2 eta E taldekoen deialdi orokorraren atal bat da,  administrari-, mantentze-, argibide eta kontrol-lanpostuetan eta beste kategoria batzuetan enplegu publikoan sartzeko. C1 taldeko lanpostuetan Batxilergoa eta Lanbide Heziketa tituluak behar dira, eta 163 lanpostu  eskainiko dira kategoria horretan. Horietatik gehienak, ehunetik gora, administrari lanpostuak dira. Musikaren arloan, hamaika plaza eskaintzen dira, gehienak irakasleentzat. Horietaz gain, delineatzaile-teknikarientzat bederatzi plaza, mantentze-teknikarientzat beste bederatzi eta informatika-teknikarientzat zazpi leku ere eskainiko dira. Gainerako plazak obra, ikuskaritza eta abarrekin lotutako kategoria-profesionaletako lanpostuetarako dira.

LEPa goi mailako eta erdi mailako taldeentzako deialdiarekin hasi zen, eta hau LEP horren beste pausu bat da. Aurreko fase hartan 169 funtzionario sartu ahal izan dira udal plantillan, eta une honetan praktikak egiten dihardute. C1, C2 eta E taldeei dagokienez, datozen bi urteetan ia 700 postu izango dituen lan-eskaintza osatzea aurreikusten da. C1 taldekoen azterketak amaituta, C2 eta E taldeetako eskaintzaren oinarriak negoziatzen hasiko da.

“ Aurrera jarraitzen dugu udal enplegua sendotzeko, bitarteko langileen tasa murrizteko eta administrazio lokala modernizatzeko konpromisoarekin. Aurreko legegintzaldian abiarazitako enplegu-eskaintza guztien prozesua amaitzen denean, ia mila lanposturen sustapena egina izango dugu, eta bitartekotasun-tasa % 10etik behera jaitsita. Hori guztia, gero eta zerbitzu publiko hurbilagoa, arinagoa eta eraginnkorragoa eskaintzeko; herritarren eskaerei erantzuteko gai izango den zerbitzu publikoa” gogorazi du Iñaki Gurtubaik.

 

Share

Udalbatzak 2021erako zergak, tasak eta prezio publikoak izoztea berretsi du

Udalbatzaren bilkuran datorren urterako ordenantza fiskalen proiektua eztabaidatu ondoren, ia zerga guztiak izoztea erabaki da. Hain zuzen ere, 2021ean oraingo tarifa berak mantenduko dira udalaren bost zergetan (OHZ, EJZ, ibilgailuak, EIOZ eta gainbalioa), gobernu taldeak proposatu bezala. “Ez diegu ahalegin gehigarririk eskatuko pertsonei, datorren urtean beharrak areagotu egiECngo direla jakinda. Horretarako, eraginkortasunez eta seriotasunez kudeatuko dugu daukagun euro bakoitza”, berretsi du Ogasun zinegotziak Iñaki Gurtubai.

Izozteak udal tasa guztiei eragiten die, bati izan ezik: udalaren tratamendu-plantetan hondakinak utzi eta horiek tratatzeari dagozkien tasak, hau da, Gardelegiko zabortegiari eta Jundizko tratamendu-plantari dagozkienak. Esate baterako, arriskutsu ez diren industria-hondakinengatiko tasa tonako 5 euro igoko da. Industria-hondakin gutxiago sortzen laguntzea da igoera horren helburu nagusia.

Orobat, energia garraiatzeko instalazioentzako tasa berria sortzea berretsi du Udalbatzak. Horren bidez, jabari publikoko lurzorua goi tentsioko lineak, gas edo hidrokarburoen kanalizazioak, instalazio hidroelektrikoak eta antzekoak garraiatzeko erabiltzeagatik kobratuko da. Tasa horrekin 300.000 euro inguruko kopurua jasotzea espero da.

Datorren urterako ordenantza fiskalen eztabaidan beste berritasun hauek onetsi dira:

–  Luis Aranburu musika-eskolako eta Jose Uruñuela dantza-kontserbatorioko matrikularen prezioaren gainean % 50eko beste hobari bat sartzea, guraso bakarreko familientzat.

– Tarifa modalitate berri bat sortzea bizikletentzako aparkaleku seguruetan, egoiliarren urteko abonamendua, zeinak egoiliarrentzat egokitutako aparkalekuetan bizikleta urte osoan aparkatzeko aukera emango baitu, 72,72 euro ordainduta.

– Udal Ogasunarekiko zorren ordainketa zatikatzeko aukera luzatzea. Orain arte gehienez 24 hilabeteko epea zegoen finkatua Udalarekiko zerga-zorraren ordainketa zatikatzeko; datorren urtetik, berriz, 60 hilabetekoa izango da epe hori.

Udalbatzaren erabakia ALHAOn argitaratu ondoren, ordenantza fiskalei alegazioak eta erreklamazioak aurkezteko epea irekiko da, abenduaren 10era arte. Gobernu Batzarrak eta Ogasun Batzordeak ebatzi beharko ditu alegazio horiek; azkenik, Udalbatzak behin betiko onetsiko ditu datorren urterako zergak, ziur aski abenduaren 23an egingo den osoko bilkuran.

Share

2021eko ordenantza fiskalen eztabaidan, izoztu egin dira zergak, Ogasun Batzordean

2021eko ordenantza fiskalen proiektua eztabaidatu da gaur Ogasun Batzordean, eta izoztu egingo dira zergak, udal-gobernuak egindako planteamendutik ia batere urrundu gabe. Ostiralean izango den udalbatzaren osoko bilkuran berresten bada, ez zergek, ez tasek, ez prezio publikoek ez dute igoerarik izango datorren urtean, kasu puntual batzuetan izan ezik. Aurrera atera da Urtaranen gobernuak ibilgailuen zerga eta eraikuntza, instalazio eta obrena izozteko egindako proposamena. Ondasun higiezinen zergari, gainbalioaren zergari eta ekonomia-jardueren zergari dagokienez, berriz, luzatu egin dira aurtengo ordenantzak datorren urterako, eta, beraz, izoztuta geratu dira horiek ere.

Gaur goizeko eztabaidan sortu diren berritasunen artean, nabarmentzekoa da tratamendu-plantetan hondakinak utzi eta horiek tratatzeari dagozkien tasei buruzko akordioa. Izan ere, funtsean industria-hondakin gutxiago sortzera bideratutako igoerak izango baitituzte datorren urtean. Hain zuzen ere, % 4ko igoera izango dute Jundizko hiri-hondakin solidoen plantara iristen diren hondakinek; aldiz, Gardelegiko zabortegira iristen diren industria-hondakinen kasuan % 26,5era iritsiko da igoera.

Beste berritasun bat Luis Aranburu musika-eskolako eta Jose Uruñuela dantza-kontserbatorioko tasei dagokie. Izan ere, % 50eko beste hobari bat sartzea erabaki da, matrikularen prezioaren gainean, guraso bakarreko familientzat, beste zerga batzuetan ere aplikatzen diren genero-berdintasunaren arloko politikekin bat etorriz.

Gainera, tarifa berri bat sortu da bizikletentzako aparkaleku seguruei dagozkien prezio publikoetan; izan ere, egoiliarren urteko abonamendua 72,72 eurokoa izango dela erabaki da —egoiliarrentzat egokitutako aparkalekuetan bizikleta urte osoan aparkatzeko aukera emango du—.

Azkenik, tasa berri bat sartu da datorren urteko ordenantza fiskalen proiektuan: jabari publiko lokalaren erabilera pribatibo edo aprobetxamendu bereziaren tasa —energia elektrikoa, gasa, ura eta hidrokarburoak garraiatzeko instalazioak—. Diru-iturri berri bat izango da tasa hori Udalarentzat, eta 300.000 euro inguruko kopurua jasotzea espero da.

Datorren urteko zergen proiektuak ez du barne hartuko, azkenik, udal gobernuak 2022 eta 2023rako aurreikusitako tasa eta prezio publikoen % 2ko igoera. Hala ere, Udalaren diru-sarreren eztabaidan koherentziaz jokatzeko premia gogorarazi du Ogasun zinegotziak. “Udal zerbitzuak mantendu nahi baditugu —hurrengo urteetan eskari handiagoa izango duten zerbitzu horiek—, diru-bilketa maila onargarri bati eutsi beharko diogu”, berretsi du Iñaki Gurtubaik.

Gizarte Kontseiluak helarazitako planteamenduei dagokienez, izango dute eraginik Udal Ogasunarekiko zorren ordainketa zatikatzeko aukeran. Orain arte gehienez 24 hilabeteko epea zegoen finkatua Udalarekiko zerga-zorraren ordainketa zatikatzeko; datorren urtetik, berriz, 60 hilabetekoa izango da epe hori.

Share

Gizarte Kontseiluak begi onez ikusi du Urtaranen gobernuaren 2021ean zergak izoztearen proposamena

Udal-gobernu lantaldeak datorren urterako prestatutako zerga, tasa eta prezio publikoen proiektuaz Gizarte Kontseiluak egin duen txostena aztertu du gaur goizean Ogasun Batzordeak. Agiri horretan, Gizarte Kontseiluak balorazio positiboa egin dio Urtaran Gobernuak 2021rako zergak izozteaz egin duen proposamenari, “kontuan hartuta pandemiak eragindako krisi ekonomiko eta sozialaren egoera”. Zerga-proiektu horrek berak 2022 eta 2023 urtetan tasa eta prezio publikoak % 2 igotzeko aurreikuspena jasotzen du; horren aurrean, Gizarte Kontseiluak zergadunen errenta kontuan hartzearen alde agertzen da, justizia sozialaren eta progresibitatearen printzipioak lehenetsita.

Ogasuneko zinegotziak azpimarratu du talde politikoek eta herritarren parte-hartzeak (Gizarte Kontseiluaren bitartez ordezkatuta) bat datozela 2021ean zergak izozteko proposamena. “Urte benetan berezia da, eta ezin diegu herritarrei” ahalegin gehiagorik eskatu, azpimarratu du Iñaki Gurtubaik. “Datozen urteetan zergak % 2 igotzeko aukera planteamendu irekia da; izan ere, denok, oroi har, onartzen badugu Udalaren aurrezpen garbia sortzeko ezintasuna, eztabaida hori  zerga-arlora eraman behar da nahitaez”, gehitu du.

Gurtubaik nabarmendu egin du Gizarte Kontseiluak Zerga-tarifa lauaren formulari eman dio garrantzia, “jende askori bere eguneroko ekonomia kudeatzen lagundu diezaiokeen formula bat, zeinaren alde egingo dugun”. Horrez gain, aurten indarrean jarritako neurri jakin baten –zergen-ordainketa atzeratzea– ontasunak azpimarratu ditu: “horrek zenbait hilabetez 70 milioi euro familien eta enpresen esku geldi zitezen ahalbidetu du, hilabete horietan likidotasuna nahitaezko izan delarik”.

Ogasuneko zinegotziak bermatu du herritarrei parte-hartzea egiteko aukera emango zaiela zenbait zerga jakini buruz (esaterako: zabor-tasa, gizarte-etxeetako jardueren prezioak…) aurki egitekoak diren berariazko eztabaida jakin batzuen bidez.

Share

Hasi da euskara ikastaroetan matrikulatzeko kanpaina

 

Udalak, Aldundiak eta Euskaltegiek batera lan egin dute hiritarren euskalduntzea sustatzeko ikasturte berezi honetan 

Aurten ere indarrak batu dituzte Gasteizko Udalak, Arabako Foru Aldundiak eta lurraldeko euskaltegiek, helduen euskalduntzea sustatzeko. Gaur goizean aurkeztu dute Merezi du! Matrikulazio kanpaina Euskara zinegotzi Iñaki Gurtubaik, Aldundiko Euskara zuzendari Lexuri Ugartek eta euskategien ordezkariek Hasi da ikastaro eta programetarako matrikulazio-epea. COVID19aren izurrietaren ondorioz, hainbat dira aurtengo berezitasunak. “Gehienbat, osasun prebentzioarekin zerikusia dutenak: distantziak, maskaren erabilera eta jarduerak modu telematikoz egiteko aukera (hala behar bada)”, azaldu du Iñaki Gurtubai euskara zinegotziak.

Gasteizko Udalak, bi lerrotan planteatu du bere laguntza. Gizarte etxeetako ikastaroak, alde batetik, eta diru laguntzak, bestetik.

Ikastaroei dagokionez, 61 talde eskeintzen ditu Euskara zerbitzuak, 931 ikasposturekin eta horrela banatuta:

Gurasoentzako ikastaroak: 43 talde eskaintzen dira guztira, A1 hastapen-mailaren eta C1 mailaren arteko maila guztiak, hiriko gizarte-etxe guztietan, kiroldegi batzuetan eta ikastetxe batean. Ikastaro hauen helburua da, euskara ikasteaz gain, familia-esparruan hizkuntza praktikatzea, seme-alabek eskolan ikasten dutena indartzeko.

55 urtetik gorakoentzako ikastaroak: lau urteko programa da, oinarrizko erabiltzaileari dagokion A2 maila lortzeko. Guztira 13 talde eskaintzen dira. Aurten, lehenengo aldiz, horietako hiru adinekoentzako zentro soziokulturaletan (san Kristobalen, Lakua-Arriagan eta Sansomendikoan, hain zuzen).

Atzerriko nazionalitatea duten pertsonentzako ikastaroak: hastapeneko hiru talde eskaintzen dira, atzerriko pertsonei hizkuntza-harrera egiteko eta euskarara lehen hurbilpena izateko, hau da, oinarrizko euskara ikasteko eta gizartea ere ezagutzeko.

Merkataritza edo ostalaritzako langileentzako ikastaroak: bi talde. Bata, hastapenekoa (A1); eta bestea, berriz, B1.2 mailakoa, B edo D ereduetan ikasi eta DBHko titulua dutenak zuzenean matrikulatu ahal izango dira ikastaro horretan.

Informazio guztia www.vitoria-gasteiz.eus/euskara webgunean topatu daiteke. Esteka honetan.

 

Diru laguntzen kasu, hau da eskaintza:

  1. Herritarrek euskara ikasteko dirulaguntza: uztailaren 31n bukatu zen 2019-2020 ikasturtean euskara ikasi dutenentzako dirulaguntza deialdia, eta ikasturte honetarako 237 herritarrek dirulaguntza eskatu dute; 237 horietatik 57 guraso dira, eta beste bi, berriz, begiraleak.
  1. Hainbat esparrutan euskara sustatzeko dirulaguntza deialdia indarrean dago, eta irailaren 15ean bukatuko da epea eskaerak aurkezteko. Dirulaguntza deialdi honek hainbat lerro ditu: (1) euskaltegiek antolatutako jarduerei laguntzekoa; (2) guraso-elkarteek euskara sustatzeko antolatutako jarduerei laguntzekoa; (3) aisialdian edo kirolean euskararen erabilera sustatzeko; (4) tokiko hedabideei laguntzekoa; (5) elkarteek Euskararen Astean barruan jarduerak antolatzekoa; (6) aisialdi- eta kirol-begiraleak prestatzeko eskolei laguntzekoa.
  1. Hurrengo astean ALHAOn argitaratuko da Udako Euskal Unibertsitatean ikasi dutenentzako dirulaguntza-deialdia.

Aldundiaren laguntzak

Gasteizko udalarekin batera, lurraldean euskararen ezagutza eta erabilera sustatzeko esfortzuan laguntza lerroa argitaratu du Arabako Foru Aldundiak. Euskara eskoletan trinkotasun irizpidez jokatu nahi du, trinkotasunak gaitasunaren antzekotasuna handia duela sumatuz. Hori dela eta, laguntza deialdia argitaratu du trinkotasunaren arabera banatuta:

 

Aurrez aurre ikastaroetan:

  • 248-400 orduko moduluak: 75 euro.
  • 401-600 orduko moduluak: 120 euro.
  • 601 ordu baino gehiagoko moduluak: 240 euro.

 

Autoikaskuntzako ikastaroetan:

  • 190 ordu edo hori baino gehiagoko autoikaskuntza moduluak: 75 euro.

“Urte berezia da eta izaten ari da 2020 hau, COVID19a dela eta. Euskara ikasteko ikastaroei ere eragin die martxotik aurrera izandako ikastaroetan, baina garbi asko erakutsi dute Arabako euskaltegiek pandemiak sortutako egoera larriari aurre egiteko gai izan direla. Baliabideak eskainiz bide berriak jorratu dira aurrera egiteko”, esan du Lexuri Ugartek.

Batez beste 5.000 dira euskarazko ikastaroetan matrikulatuak direnak. Baina gehiago izan daitezke, askoz gehiago! Izan ere, badakigu, 35 eta 44 urte bitartean euskaraz ulertzen dutenak (%52,96) gehiago direla Araban elebakarrak baino (%47,04). Adin tartea oso emankorra da, bai lanean, bai seme-alaben etxeko hazkuntzan ere, kalean sozializazio bideak irekiz hizkuntzaren bidez.

Guztira, Aldundiak 85.000 euro bideratuko ditu laguntza hauetara.

 

Share

Andre Mari Zuriaren XXV. Txapelketaren eta Emakumeen Paleta IX. Green Capital txapelketaren aurkezpena

Gaur goizean bi txapelketa aurkeztu dira: Andre Maria Zuriaren XXV. Txapelketa afizionatuentzat eta emakumeen IX. Green Capital Txapelketa.

Axier Urresti, Vital Fundazioen zuzendariak; Iñaki Gurtubai, Gasteizko Udaleko alkateordeak; Raúl Angulo , Arabako Euskal Pilota Federazioko presidente ordeak eta  Mikel Rafael, zuzendari teknikoak eman dituzte xehetasunak.

Txapelketan parte hartuko duten pilotarietako batzuk izan dira ekitaldian.

Share