Prentsa Oharren banner

Udalak 30.000 euro bideratuko ditu baliabide ekonomiko eskasak dituzten pentsiodunen energia-gastua finantzatzeko

Baliabide ekonomiko eskasak dituzten pentsiodunek ohiko etxebizitzan duten energia-gastua finantzatzeko laguntza ekonomikoen urteko bigarren deialdia onetsi du Tokiko Gobernu Batzarrak.

Gastu hauek lagunduko dira diruz: elektrizitatearen, gasaren edo beste erregai batzuen kontsumoari dagozkionak, edo komunitate gastuak, horiek berokuntza barne hartzen badute.

“Laguntza-ildo honekin ahulezia ekonomikoko egoeran dauden pertsona hauei energia-hornidura ez zaiela moztuko laguntzen dugu”, adierazi du Gizarte Politiken, Adinekoen eta Haurren Saileko zinegotzi Jon Armentiak.

Sail horrek 30.000 euro baliatuko ditu xede horretarako, 2021eko uztailaren 1tik abenduaren 31ra bitartean sortutako gastuak ordaintzeko. Laguntzak deialdia ALHAOn argitaratu ondoren eskatu ahalko dira.

Lehen deialdia 2021eko lehen seihilekoari zegokiona izan zen, eta orduko hartan 40 laguntza eman ziren.

 

 

Share

AMAPASEren gurasotasun positiboaren programari lagunduko dio Udalak  

Banandutako gurasoen Arabako elkartearekiko (AMAPASE) lankidetza-hitzarmena onetsi du Tokiko Gobernu Batzarrak, “Gurasotasun positiboa eta dolua” programa garatzeko, 2021ean.

Akordio horri esker, 15.000 euro jasoko ditu elkarteak, krisi egoeran edo dolu prozesuan dauden familiei lehen mailako arreta emateko, gurasotasun positiboan eta doluan laguntzeko talderako eta Gurasotasun positiboaren inguruko VIII. Jardunaldia antolatzeko.

“Programa horren bitartez, banantze- edo dibortzio-prozesuan daudenek arreta espezializatua izatea lortu nahi dugu. Bat-bateko aldaketa ekarri ohi du horrek seme-alaben bizitzara, eta, hortaz, gurasoek beren harremanak moldatu beharra daukate, ahalik eta eraginik txikiena izan dezaten haiengan, eta zaintza eta heziketa egoera berrira egokitzeko”, adierazi du Gizarte Politiken, Adinekoen eta Haurren zinegotzi Jon Armentiak.

 

Share

Adineko boluntarioek ikastaroak emango dituzte BIZAN sarearen jarduera-programazio berriaren barruan; urritik aurrera, 361 lantegi eskainiko dira

Dagoeneko eman daiteke izena, aurrez aurre, 010 telefonoz edo udalaren webgunearen bitartez

BIZAN sareak —lehengo adinekoentzako zentro soziokulturalak— 21-22 denboraldirako prestatu duen jarduera-programa urrian abiaraziko da, 361 ikastaro eta 3.907 leku eskainita. Berritasun nagusia lantegi sortzaileak dira: 60 urte edo gehiago duten boluntarioek emango dituzte, haien ezagutzak gainerako herritarrekin partekatzeko.

Lantegi sortzaileak 10 urtetik gorakoentzat izango dira, lantzen den gaiaren arabera. Esate baterako, gazteenak poesiaren txokora joan ahalko dira, eta 60 urtetik gorakoek, berriz, areto-dantzak ikasi edo literatur solasaldi batean parte hartu ahalko dute. Belaunaldien arteko baratzea, yoga hastapenak eta Veneziako maskaren lantegia ere sartzen dira jarduera multzo horretan. Kasu guztietan, irakasleak 60 urtetik gorako pertsonak izango dira, zeinek beren burua eskaini baitute dituzten ezagutzak partekatzeko.

Orobat, San Martineko BIZANeko adinekoek laguntza akademiko eta emozionala eskainiko diete inguruko ikastetxeetako ikasleei. Koroatzeko eta San Prudentzioko BIZANetan, berriz, Konektatu programa garatuko dute, beste pertsona batzuei aukera emateko teknologia berriak baliatuz maite dituzten pertsonekin online konektatzerik izan dezaten.

Gizarte Politiken, Adinekoen eta Haurren zinegotzi Jon Armentiak nabarmendu du “lantegiak emateko izena eman duten adinekoen eskuzabaltasuna, edo belaunaldien arteko lantegietan laguntzen dutenena, antolaketan eta garapenean esku hartzen baitute. Horretaz gain, beste adin-talde batzuei balioak helaraztea da benetan garrantzitsuena, haientzat eredugarri baitira. Horrela, haiek ere estereotipoei eta adinkeriazko jarrerei aurre egiten diete, eta pertsona gisa duten gaitasuna eta autonomia agerian jartzen”.

Datorren ikasturtean, BIZAN sareak bi ikastaro multzo eskainiko ditu: batean, izen-ematearen hurrenkeraren arabera banatuko dira lekuak (138 ikastaro); bestean, zozketa bidez esleituko dira lekuak (223 ikastaro), irailaren 3an.

Lantegi sortzaileez gain, zozketarik gabeko ikastaro hauek eskainiko dira:

  • Belaunaldien arteko ikastaroak, zeinetan adinekoen taldeek beren ezagutzak eta bizipenak partekatuko baitituzte beste adin batzuetako pertsonekin: familiarteko dantza, ipuin-kontalariak, ahozko tradizioa, etab.
  • 18 urtetik gorako herritarrei irekitako lantegiak, BIZAN sarearen txartela izan beharrik gabe: sare sozialak, artea kaleetan, cardioswing, podcastak, nutrizioa, etab.
  • Erorketen prebentziorako ikastaroak.
  • Gela irekiak: pintura, zura lantzea, mugikorra erabiltzen ikasi, hiri-baratzea, ingelesa, euskaraz bizi, bideo-edizioa…

Zozketa duten ikastaroen artean gai hauek eskaintzen ditu programazio berriak:

  • Hezkuntza-, eskulangintza- eta teknologia-ikastaroak: poesia, zeramika, sukaldaritza, argazkigintza digitala, euskara, ingelesa, informatika, irratia, etab.
  • Zaintza fisiko, kognitibo eta psikologikoarekin zerikusia duten jarduerak: aerobika, abesbatza, suspertze psikosoziala, emozioen kudeaketa, pilates, antzerkia, euskara 55 urtetik gorakoentzat, etab.

Orobat, 75 urtetik gorakoentzako taldeak antolatuko dira BIZAN sarearen 21-22 ikasturterako eskaintzan, haientzat berariaz pentsatutako jarduerak egin ditzaten. Ahulago dauden pertsonen eskaerei erantzungo diete: gimnastika arina, mugimendu eta ariketa arinak, psikomotrizitatea eta suspertze psikosoziala.

Horiek osagarri, badira adinekoek parte hartu dezaketen beste zerbitzu eta programa batzuk, hala nola Piztu zure auzoa edo hirian banatutako 10 osasun-parkeetan egin daitezkeen ariketa saioak.

 

Izen-emateak

Dagoeneko ireki da izena emateko epea zozketa eskatzen duten lantegi eta ikastaroetarako. 010 telefonoaren bidez, www.vitoria-gasteiz.org/bizan udal webgunean edo aurrez aurre egin daiteke, BIZAN sarearen 16 zentroetako batean zein gizarte etxeetako eta kirol instalazioetako herritarrei laguntzeko bulegoetan. Azken kasu horretan, hitzordua eskatu behar da.

Zozketarik behar ez duten jarduerei dagokienez, irailaren 2an hasiko da izena emateko epea.

 

Share

Gizarte Politikak trizikloan paseatzeko programa bat antolatu du adinekoentzat, haien bizi-kalitatea hobetzeko eta belaunaldien arteko harremanak sustatzeko

Hamabost boluntario arduratuko dira trizikloak gidatzeaz

2012an Danimarkan sortutako “Biziz adinik ez” nazioarteko mugimenduaren baitako ekimena da.

Datorren astetik aurrera, etxebizitza komunitarioetan bizi direnek eta udalaren Eguneko Arreta Zerbitzukoek aukera izango dute mugitzeko dituzten zailtasunengatik aspaldian ikusi gabeko –eta agian ahaztutako– lekuak bisitatzeko eta berriz ezagutzeko.

Trizikloen gainean egingo dituzte bisita horiek Gizarte Politiken, Adinekoen eta Haurren Sailak abian jarriko duen “Biziz adinik ez” programari esker, eta trizikloak gidatuko dituzten 15 boluntariorekin lankidetzan.

Ekimena duela 9 urte Danimarkan sortutako nazioarteko “Cycling Without Age” ekimenaren parte da, eta adinekoak berriz ere bizikletaz ibil zitezela zuen xede. Haietako askoren mugikortasun mugatuak sortzen zuen zailtasuna gainditzeko, sustatzaileak trizikloak erabiltzen hasi ziren eta boluntarioek gidatzen zituzten egoitzetako adinekoekin doako ibilaldiak egiteko.

Jon Armentia zinegotziak adierazi duen bezala, “boluntarioen eskuzabaltasun handiari zor zaion ideia” hori munduan zehar hedatu zen eta orain Gasteizera iritsi da.

Arabako hiriburuak bat egiten du esperientzia honekin; adinekoak paseatzera ateratzeaz gain, belaunaldien arteko lotura sortu nahi du triziklo-gidarien bitartez. “Trizikloa elkarrizketak eta esperientziak partekatzeko topagunea ere izatea nahi dugu”. Paseo bakoitza gogoratzeko, berrezagutzeko, elkar ezagutzeko eta hitz egiteko aukera izatea. Konfiantza, zoriontasuna eta bizi-kalitatea sortzen laguntzen duten harremanak eraikitzeko aukera” azaldu du Armentiak.

Programan erabiliko diren trizikloak elektrikoak izango dira, pedalei eragiteko laguntza izango dute eta bi bidaiarirentzat lekua, gidariaz gain. Orduko 8 kilometroko abiaduran ibiliko dira, gutxi gorabehera, izan ere zinegotziak azpimarratu duenez “ kontua ez da korrika egitea, ibilbideaz eta konpainiaz gozatzea baizik. Hori da filosofia”.

Ordu eta ordu eta erdi inguruko ibilaldiak izango dira. Aldez aurretik ezarri eta udaltzainekin adostutako hainbat ibilbide daude; izan ere ibilgailuak, behar bezala aseguratuta, baimenduta duten guneetatik ibiliko dira.

Hiru gurpilen gainean, bidaiariak eta laguntzaileak Arriagako, Olarizuko eta Floridako parkeetara, hiriaren erdialdera, Lakuako galeoi pirataren parkera eta beste hainbat lekutara joan ahalko dira, abiapuntuaren arabera.

Prestakuntza jaso duten 15 boluntariok gidatuko dituzte trizikloak, eta beste 60 boluntario daude Gizarte Politiken, Adinekoen eta Haurren Sailak sortutako zerrendan, izan daitezkeen hutsegiteak estaltzeko eta programak ondo funtziona dezan.

Adinekoentzako 7 baliabidetan erabilgarri

Trizikloan egiten diren ibilaldi hauek bizi-kalitatea hobetu nahi diete Aurora, Los Molinos eta San Prudentzio  etxebizitza komunitarioetan bizi direnei eta Olarizu, Blas de Otero,, Tomas Zumarraga Dohatsua eta San Prudentzio eguneko arreta zerbitzuen erabiltzaileei.

Udal zerbitzu horietako bakoitzak irteera-ordu eta -egun zehatzak izango dituenez, erabiltzaileek aldez aurretik programatu ahalko dute ibilaldia. Horretarako, aldez aurretik izena eman behar dute, eta ordu eta egun horretan boluntario batek trizikloan eramango diu paseatzera, eta “haizea ilean sentitu” eta esperientziaz gozatu ahalko dezaten.

“Gasteizen, halaber, adinekoek haizea ilean sentitzeko, aktiboki zahartzeko, harreman berriak hasteko, eta triziklo-gidariren jarrera solidarioaz gozatzeko duten eskubidea defendatzen dugu. Bere ohiko ingurunetik irten ahal izatea eta segur aski ahaztuta dituzten lekuak berrezagutzeko aukera izatea defendatzen dugu, emozioak eta zoriontasun ikaragarria piztuko baitie. Ziur gaude ibilaldi hauek arrakasta handia  eta oso emaitza onak izango dituztela” adierazi du Jon Armentiak.

“Biziz adinik ez” programak City Changer Cargo Bike (CCCB) europar proiektuaren 5.700 euroko finantzaketa du. Proiektu honek zama-bizikleten erabilera publikoa, pribatua eta komertziala sustatzen du, eta Ingurugiro Gaietarako Ikastegiak proiektuan parte hartzen du. Europako laguntza hori Ingurugiro Gaietarako Ikastegiari esker lortu ahal izan da.

Share

Gizarte Politiken Sailak MIKASA programa jarriko du abian, familiei dituzten baliabide ekonomikoak kudeatzen irakasteko eta etxebizitza gal dezaten eragozteko

Arrisku-faktoreak antzematen dituen bizikidetza-unitateekin esku hartuko du.

Elkarrekin taldearekin lotutako aurrekontu-akordioaren barruko proiektua da.

Gizarte Politiken, Adinekoen eta Haurren Sailak programa bat jarriko du abian irailean, familiei dituzten baliabide ekonomikoak kudeatzen irakatsiko diena, beren oinarrizko premiei erantzun diezaieten eta etxebizitza gal ez dezaten.

Gaur aurkeztu dute MIKASA izeneko proiektu berria Gizarte Gaien arloko zinegotzi Jon Armentiak eta Elkarrekin-eko zinegotzi Gema Zubiaurrek, udaletxean; aipatutako udal taldeak proposatu zuen aurrekontu-proiektuan programa hori sartzea.

MIKASA programaren helburua da baliabideen kudeaketa txar batek ekar dezakeen bizitegi-bazterketa prebenitzea, pertsonek edo familiek diru-sarrera txikiak dituztenean edo baliabide ekonomiko aski izan arren horiek oker erabiltzen dituztenean.

“Etxebizitzarik ez izateak estresa, ziurgabetasuna eta babesgabetasun-egoerak sortzen ditu familiengan. Hori dela eta, beharrezkoa da familiaren ekonomia ongi kudeatzea, oinarrizko premien estaldura bermatzearren“, azaldu du Armentiak.

Gizarte Politiken, Adinekoen eta Haurren zinegotziak zehaztu duenez, “bi prebentzio-maila izango dira: bata, arrisku-egoeran dauden familientzat, alarma pizten duten egoerak antzeman direnean, esaterako, aurrekontuaren % 50etik gora etxebizitza ordaintzeko erabiltzea edo oinarrizko zerbitzuen ordainketan zorrak izatea; bigarrena, kudeaketa ekonomiko eskas baten ondorioz etxea utzarazteko jakinarazpena jaso duten edo aurretik etxebizitza galdu zuten bizikidetza-unitateentzat”.

Horrelakoetan, udalaren gizarte-zerbitzuek gizarte-integratzaile baten laguntza eskainiko diete familiei, zeinak aurrekontua egoki administratzeko behar diren gaitasunak irakatsiko baitizkie.

MIKASA programaren bidez, ikasiko dute

  • Familia-aurrekontua lantzen eta doitzen.
  • Oinarrizko erosketak egiteko prezioak alderatzen.
  • Telefono- eta aseguru-konpainien eta abarren prezioak alderatzen.
  • Etxebizitzaren bilaketa aktiboan jarduten, baldintza ekonomiko onenak aurkitzeko.
  • Mailegu pertsonalen sistema ezagutzen.
  • Familiaren gastua kontrolatzeko doako aplikazio mugikor bat erabiltzen.

Familientzako prestakuntzak menuak lantzea ere hartuko du barne, “haien elikaduran eragin positiboa izan dezan“.

Elkarrekin taldeko zinegotzi Gema Zubiaurreren iritziz, “baliabide ekonomikoen kudeaketa okerrak eragindako ahultasun-egoerak eta etxea galtzeko arriskua goiz antzematea oinarrizkoa da etxe-kaleratzeak prebenitzeko. Elkarrekin-ek bultzatu duen jarduera-ildo hori udal gobernuarekin aurrekontu-akordioaren barruan adostu genituen beste batzuei gehitzen zaie, Gasteizen bizi diren pertsona guztien bizi-kalitate duina bermatzearren. Azpimarratu beharra dugu etxebizitza duina eta egokia izatea legeak aitortutako eskubide subjektiboa dela, eta administraziook hori bermatzeko betebeharra dugula“.

Familiekiko esku-hartzea banakakoa izango da batez ere, helduei zuzendua eta lau hilabetez gehienez, baina taldekako jarduerak ere antolatuko dira.

Esaterako, Kontsumobidek 6-15 pertsonarentzako bi prestakuntza saio eskainiko ditu, erosketa-saskiari eta etxeko ekonomiari buruz, eta Goienerrek energia-hornikuntzaren fakturak aztertzen irakatsiko du taldeka.

MIKASA programa garatzeko aurrekontua 100.000 euro da.

Share

Haur eta nerabeek parte hartzeko Aktibat(tu) programak udalean izandako harrera-ekitaldiarekin eman dio amaiera ikasturteari

Gorka Urtaran alkateak, haurtzaroko zinegotzi Jon Armentiak eta gainerako taldeetako ordezkariek Salburuko gizarte-etxean gaur goizean egindako harrera-ekitaldiak eman dio amaiera haur eta nerabeentzako partaidetza-programari.

Hiriko 18 ikastetxetako 2.000 ikasletik gora aritu dira 2020-2021 ikasturtean Aktiba(tu) programan. Ikasleek txikitatik parte hartzea bultzatzen du programa horrek, hiru helbururekin: haur eta nerabeen eskubideak ikusaraztea, haurrek beren eskubideen defentsaz jabetzea, eta udal bizitzan parte hartzea ekarpen eta erabakiak tarteko.

Salburuko gizarte-etxeko ekitaldi-aretoko harrerara hiru ikastetxetako irakasle eta ikasleak bertaratu dira, Aktiba(tu) programan parte hartu duten ikastetxeen ordezkari gisa.

 

Share

Gurasoen aurkako indarkeria-egoeretan garaiz esku hartzeko programak online jardunaldi bat egingo du profesionalekin eta artatutako familiekin

2017an jarri zuen abian Udaleko Haurtzaro eta Senitarte Zerbitzuak

Urtero familia askok jasotzen dute Gizarte Politiken, Adinekoen eta Haurren Sailak orain dela 4 urte abian jarri zuen gurasoen aurkako indarkeria-egoeretan garaiz esku hartzeko programaren laguntza.

Batez ere, indarkeria psikoemozionalari hasierako fasean aurre egiteko sortu zen. Horretarako, nerabeekin, gurasoekin eta familiarekin saioak egiten ditu, hezkuntza- eta psikologia-arloko esku-hartzearen bidez gatazka bideratu ahal izateko.

Maiatzaren 28an, hainbat arlotako profesionalek —psikologia, gizarte lana, hezkuntza, etab.—, udal sailetako teknikariek, eta artatutako familiek Udaleko Haurtzaro eta Senitarte Zerbitzuak antolatutako online jardunaldian parte hartuko dute.

Topaketan programaren eraginkortasuna aztertuko da epe labur eta ertainera, eta esperientziei buruzko mahai bat egongo da, non programan parte hartzen duen familia batek bere lekukotasuna emango baitu.

“Gure esku-hartzeari esker, gurasoen kontrako indarkeria psikologikoa eta fisikoa jaitsi egiten dela egiaztatu dugu, eta familia-harremanen hobetze hori mantendu egiten dela programa amaitu eta hilabete batzuetara. Gurasoek egoera horietan dituzten erantzun agresiboek ere behera egiten dute eta familiako kideen arteko enpatia hobetu egiten da”, azaldu du Gizarte Politiken, Adinekoen eta Haurren zinegotzi Jon Armentiak.

Gurasoen aurkako indarkeria-egoeretan garaiz esku hartzeko programak hiru mailatan jarduten du, hainbat helbururekin:

  • Nerabeekin, etxeko portaera arazoak gutxitu edo desagerrarazten saiatzen da, etorkizunean gurasoekiko indarkeria fisiko edo psiko-emozional larria eragoztek; horretarako, trebetasun eta baliabide psikologikoak sustatzen ditu, nerabeak eguneroko egoeretara hobeto egokitu daitezen.
  • Gurasoei begira, seme-alaba nerabeekin autoritatea berreskuratzen eta haien portaera agresiboak gobernatzen lagunduko dieten trebetasunak eskuratzea lantzen du.
  • Familian, harreman positiboak, eta errespetuan eta maitasunean oinarritutako familia-giroa sustatzen ditu, familia barruko kohesioa handiagoa izan dadin.

12 eta 17 urte bitarteko seme-alabak dituzten familiek, gurasoen aurkako indarkeria-egoeran badaude, 647304752 telefonora deitu dezakete informazio gehiago eskatzeko (astelehenetik ostegunera 10:00etatik 13:00etara eta 16:00etatik 19:00etara, eta ostiraletan 9:00etatik 13:00etara).

Share

Adinekoentzako Zentro Soziokulturalek bere irudia berritu dute eta BIZAN Sarea bihurtu dira, estereotipoei aurre egiteko eta erabiltzaile berriak erakartzeko

Bizi + Izan hitzak elkartzetik sortu da izen berria eta bizitasunaren ideia islatu nahi du

Adinekoentzako Zentro Soziokulturalek irudi eta izen berria dute. Hemendik aurrera BIZAN deituko dira, irudi hurbilagoa eta irekiagoa emateko, erabiltzaileei eta zentroei lotutako estereotipoetatik urrun.

Gizarte Politiken, Adinekoen eta Haurren zinegotzi Jon Armentiak izen berria eman du ezagutzera eta esan duenez, prozesu luze baten emaitza da, orain dela sei urte, 2015ean, hasi baitzen “erabiltzaileek adierazi zigutenean zentroen irudi positiboagoa helarazi nahi zietela herritarrei, sailaren barruan genuen izena aldatzeko ideiarekin bat etorriz”.

2019an egindako azterketa batek agerian utzi zuen adinekoei buruzko estereotipoak zeudela, eta estereotipo horiek zentroei ere eragiten zietela. Horregatik, erretiratzear edo erretiratu berri ziren pertsonek ez zituzten ez ezagutu ez erabili nahi. AZSKak ez ziren begi onez ikusten haien izena zela eta, ez baitzen erakargarria ez erabiltzaile posibleentzat, ez adin-talde gazteagoentzat.

Ondorio hori ikusita, AZSKei izena aldatzeko prozesu bat abiarazi zen eta bertan profesionalek, adin desberdinetako taldeek eta zentroetako erabiltzaileek hartu dute parte. Prozesu horren emaitza BIZAN izena izan da, Bizi eta Izan hitzak elkartzetik sortua, “adinekoen bizitza eta izatea gogora ekartzeko. Haien benetako izaera islatzen du izenak: parte hartzea, jendea ezagutzea, ondo pasatzea eta gizartean ekarpenak egitea gustuko duen jende aktiboa da”, azaldu du zinegotziak.

Izen berriaren ondoan “Esperientziak bizitasunarekin bat egiten duen tokia” lema agertuko da. Goiburuak, Jon Armentiaren esanetan, “errotik desagerrarazten du estereotipo hedatuenetako bat: adinekoak, bizitzan esperientzia zabala izanik ere, pertsona inaktiboak eta motibaziorik gabekoak direla uste izatea. Ez da hala”.

 

Izena probatu egin da

Apirilean zentroetako 60 erabiltzaileri eta bertako langileei aurkeztu zitzaien izena. “Ilusio handiz hartu zuten. Asko gustatu zitzaien”, azaldu du zinegotziak.

16 zentro soziokulturalen irudi aldaketa ekainetik aurrera egingo da, pixkanaka. Fatxadetan izen berria jarriko da, Koroatzean eta Ariznabarren biniloak jarriko dira elementu grafikoekin, eta Udalaren webgunean baliabide horiei buruzko atala berrituko da.

BIZAN Sareak irailetik aurrera burutuko duen programazioan ere sumatuko da aldaketa hori; izan ere, herritar guztientzako jarduera gehiago egongo dira, bai eta lantegi sortzaile gehiago ere, adinekoek haien ezagutzak beste pertsona batzuekin partekatzeko aukera izan dezaten.

“Azken batean, helburua da herritarrek toki horiei buruzko ideia argi izatea: harreman berriak hasteko, ikasteko eta ondo pasatzeko aukera ematen duten lekuak dira. Pertsonen ekarpenei garrantzi handia ematen diete, eta adinekoek beren ezagutzak, gaitasunak eta balioak parteka ditzakete bertan beste pertsona batzuekin, estereotipoei eta adinkeriari aurre eginez”, esan du Jon Armentiak.

Share

Gizarte Politiken Sailak lankidetza-hitzarmenak adostu ditu 4 elkarterekin haur eta nerabeak babesteko programak egiteko  

Tokiko Gobernu Batzarrak 4 lankidetza-hitzarmen onetsi ditu gaur AVAIM, UNICEF, Movimiento Contra la Intolerancia eta Save The Children elkarteekin haur eta nerabeak babesteko programak egiteko; Gizarte Politiken, Adinekoen eta Haurren Sailak 47.000 € inguru jarriko ditu horretarako.

“Hitzarmen hauen bitartez haurren eta nerabeen eskubideak babestu nahi ditugu eta haien ongizatea bermatu. Horretarako, prebentzio-jarduerak eta ekintzak egingo dira, haien eta haien familien premiei erantzuten zaiela bermatzeko”, azaldu du Jon Armentia zinegotziak.

AVAIM-Tratu Txarrak Jasotako Haurren Laguntzarako Euskal Elkarteak 11.780 € jasoko ditu, besteak beste, Aktiba(tu) partaidetza-programako ikasturte amaierako jardueran parte hartzeko eta profesionalak haur eta nerabeenganako tratu onari buruz sentsibilizatzeko.

UNICEFi kopuru berdina emango zaio, 11.780 €; Udalak 2020ko aurrekontuetan haurrei zuzendutako gastuaren azterketa egingo du elkarteak, eta, horrez gain, haur eta nerabeen ahotsa izango da azaroaren 20an, Haurtzaroaren Egun Unibertsala.

Movimiento Contra la Intolerancia elkarteak eskola-jazarpena eta -ziberjazarpena saihesteko hitzaldiak eta lantegiak dinamizatuko ditu ikastetxe eta gizarte-etxeetan. Beste ekintza batzuk ere burutuko ditu, hala nola haurren eta nerabeen eskubideei buruzko inkesta bat, edo haurrak komunikabideetan eta sare sozialetan nola azaltzen diren aztertzeko ikerlan bat. Hitzarmen horretarako ere Udalak 11.780 € emango ditu.

Azkenik, Save The Children elkarteak 11.724 € jasoko ditu, eskola-arrakasta eta aisialdi eta denbora libreko jarduerak sustatzeko programa gauzatzeko. Programa hori Pilarreko eta Aldabeko gizarte-etxeetan burutzen du duela urte batzuetatik hona.

Adinekoentzako aholkularitza juridikoa

 Tokiko Gobernu Batzarraren bilkura berean Gizarte Politiken, Adinekoen eta Haurren Sailaren beste hitzarmen bat onetsi da. Kasu horretan, Arabako Abokatuen Elkartearekin sinatutakoa, adinekoei aholkularitza juridikoa emateko.

Zerbitzuaren helburua da adinekoek eta zaintzaileek dituzten eskubideei buruzko aholkularitza espezializatua ematea, abokatuak esku hartzea aginduzkoa ez den kasuetan, prozesu judizialaren aurretik orientabideak eskainiz.

Hitzarmena urtebeterako sinatu da eta udalak 10.000 euroko ekarpen ekonomikoa egingo du.

Share

Adinekoentzako zentro soziokulturalek 94 lantegi eta 1.137 leku eskaintzen dituzte udako jardueren programazioan

Osasun parkeetako 200 adinekok haien ariketa-errutinak erakutsi dituzte Mendizorrotzeko futbol-zelaian

Uda iristear da eta adinekoentzako zentro soziokulturalek udako jarduera-programa abian jarriko dute berriz ere; oraingo honetan, 94 ikastaro eta lantegi eskainiko dituzte, eta 1.137 leku egongo dira guztira.

Eskaintza zabal horretan, era guztietako ikastaroak egongo dira, hala nola, kultura lantegiak, TikTok koreografiak, eta ohiko informatika ikastaroak, norberaren zaintzari edo ariketa fisikoari buruzkoak, edo osasun parkeak, besteak beste.

“Adinekoak fisikoki zein mentalki hobeto sentitzea eta harreman berriak hastea nahi dugu; horri esker bere autonomia mantendu edo hobetuko dute, lagunduta sentituko dira eta bakardadeari aurre egin ahal izango diote, bakarrik sentitzen badira”, azaldu du Jon Armentiak, Gizarte Politikak, Adinekoak eta Haurrak Saileko zinegotziak.

Programazioaren % 70 aire zabalean egingo da eta % 30 herritar guztientzako izango da “adina kontuan hartu gabe, oso garrantzitsua baita belaunaldiek kezkak eta jarduerak partekatzeko aukera izatea”, esan du zinegotziak.

Teknologia berriekin lotutako jarduerek ere garrantzi berezia izango dute, esaterako, ordenagailuak eta telefono adimendunak erabiltzen ikasteko ikastaroak, izapideak on line egiten ikastekoak eta abar; eskaeraren % 13 osatzen dute.

Jon Armentiaren esanetan “informatikaren gaia azpimarratzen dugu, informazioaren teknologia berriak gero eta gehiago erabiltzen direlako gure gizartean. Argi geratu da pandemiaren ondorioz bizi dugun gizarte- eta osasun-egoera honetan”.

Ariketa fisikoa Mendizorrotzen

Jon Armentia zinegotziak Mendizorrotzeko futbol-zelaian eman du programazio horren berri; izan ere, 200 adinekok hara eraman dituzte osasun-parkeetan egin ohi dituzten ariketa-errutinak, adinekoen zentroek antolatzen dituzten jardueren adibide gisa, eta Deportivo Alavesen omenez, aurten mendeurrena ospatzen baitu.

“Denboraldi honetan babazorroek osasuna kendu eta eman digute, nahiz eta, azkenean, lehen mailan mantentzearen pozak une txarrak ahantzarazi dizkigun. Taldeari aitortu beharreko gauza da hori, are gehiago 100 urterekin osasun ona duela kontuan hartuta. Beraz, zorionak”, gehitu du Jon Armentiak.

Osasun-parkeetan 60 urtetik gorako pertsonak elkartzen dira, ariketa fisikoa egiteaz gain, harreman sozialak ere indartzeko. Erabiltzaileak nahi dutenean joan daitezke parkeetara edo entrenatzailea dagoen ordutegian, aparatuak erabiltzen eta ariketa-errutinak egiten ikasi nahi badute. Saio horiek doakoak dira.

Urte batzuetatik hona, nabarmen igo da parke horien erabiltzaile kopura eta egun 600 baino gehiago dira.  Pandemia egoeran adinekoek jarduera segurutzat daukate aire zabalean egiten delako. Gainera, erabiltzaile askorentzat mugitzeko, sozializatzeko, eta, azken batean, bizi-kalitatea hobetzeko aukera bikaina dira.

Gasteizek 12 osasun-parke ditu, eta joan den astean Maider Etxebarria alkateordeak iragarri bezala, legegintzaldi honetan beste bi jarriko dira, Sansomendin eta Txagorritxun. Aparteko inbertsio planaren barruan izango da, zeina 2020ko aurrekontuaren likidazio positiboarekin gauzatu ahal izango baita.

Izen-emateak

Adinekoentzako zentro soziokulturaletako udako ikastaro eta lantegietan izena emateko epea maiatzaren 20an hasiko da. Ekainaren 2ra arte, interesdunek 1.137 lekuetako bat betetzeko aukera izango dute, eta izena ematen den hurrenkeran esleituko dira.

Horretarako, adinekoentzako zentro soziokulturaletara, gizarte-etxe eta kiroldegietako informazio zerbitzuetara eta herritarrei laguntzeko bulegoetara jo beharko dute. Udalaren webgunean eta 010 telefonoan ere erregistratu ahal izango dira.

Ekainaren 5ean, bete gabe geratu diren plazetan izena emateko epea zabalduko da.

Programazio guztia COVID-19ari aurre egiteko babes neurriak errespetatuz egingo da eta nahitaezkoa izango da maskara erabiltzea.

Share