Prentsa Oharren banner

Asteburuan badmintonik onena izango dugu berriz ere Gasteizen, senior mailako Espainiako txapelketa jokatuko baita

  • Autonomia erkidego guztietako 250 kirolarik hartuko dute parte

Irailaren 24tik 26ra Estatuko badmintonik onena izango da Aranaldeko kiroldegian. Seniorren Espainiako txapelketan autonomia-erkidego guztietako 257 kirolari arituko dira. Txapelketa honek azaroaren amaieran Huelvan egingo den Munduko Txapelketarako balioko du. Datorren asteburuan, kategoria eta modalitate desberdinetako egungo Espainiako txapeldunek ere jokatuko dute.

Hainbat urtez Estatuko badminton-zirkuituetan izandako esperientzien ondoren, Gasteizek lehen aldiz hartuko du txapelketa hau. 50 pertsona inguruk parte hartzen du antolakuntzan, muntatze-lanetan, edukieren kontrolean, arbitrajean, match kontrolean  eta txapelketako epaile lanetan. Arabako Federazioak lan handia egin du partiduetako laguntzaileak prestatzen.

Kirol eta Osasun zinegotzi Livia Lopezek  aurkeztu du txapelketa, eta berarekin izan dira Arabako Badminton Federazioko lehendakari Angel Ruiz eta erakunde laguntzaileen ordezkariak: Gerardo Escarza, Arabako Foru Aldundiko Kirol Zerbitzuko burua, eta Arantxa Ibáñez de Opacua, Vital fundazioaren zuzendaria. Halaber izan dira aurkezpenean Hector Tobar, Aronova klubeko lehendakari eta jokalaria; Dina Abouzeid, Just Bádminton klubeko lehendakari eta jokalaria; eta Gorka Moso, Euskadiko Federazioko ordezkari eta probako epaile arbitroa.

“Aintzatetsi egin nahi dugu Badminton Federazioak eta hemengo badminton klubek egiten duten lan handia, bereziki, pandemiak eragindako murrizketek zaildutako garai honetakoa. Lan horri esker Gasteizek gero eta protagonismo handiagoa du kirol honetan, eta horren adibiderik argiena dugu datorren asteburuko txapelketa“ adierazi du Livia Lopezek.

Gure helburua badminton nazionalean erreferente izatea da, eta hirira datozen jokalari guztiek berriz itzultzeko gogoz alde egin dezaten saiatuko gara” adierazi du Ángel Ruiz Arabako Badminton Federazioko lehendakariak.

Aranalde kiroldegiko zortzi pistetan 180 partida jokatuko dira egunero, irailaren 24an eta 25ean (larunbatean eta igandean) . 21 tantoko 3 setetik onenak pasako dira. 9:00etan hasiko dira partidak. Bi egun horietan, talde-fasea, final-laurdenak eta finalerdiak jokatuko dira kategoria eta modalitate desberdinetan. Kategoriak: bederatzi adin-tarte. Modalitateak: emakumezkoak banaka, gizonezkoak banaka, emakumeak binaka, gizonezkoak binaka, biko talde mistoa. 45 final partidak igandean jokatuko dira, eta sariak eguerdian banatuko. Ez da ikuslerik izango, baina partidak Espainiako Badminton Federazioaren Youtube kanalaren bitartez ikusi ahalko dira zuzenean.

Espainiako senior mailako txapelketako 257 kirolariak —174 gizon eta 83 emakume– 30 urtetik 79 urtera bitartekoak dira. 80 klubetako kirolariak dira eta, horien artean Arabako taldeetako 14 kirolari. Esaterako, egun Espainiako txapeldun diren Dina Abouzeid eta Héctor Tobar. Txapelketa honen historian izan den parte-hartze bolumen handienetakoa izango du Gasteizko hitzorduak.

+info: Campeonato de España Sénior de Bádminton

 

 

Share

Herri-kirolak izango dira Landatxoko kiroldegian abuztuaren 6an, 7an eta 8an

Herri-kirolak programatu ditu Gasteizko Udalak abuztuko hiru egunetarako; hain zuzen ere, hilaren 6, 7 eta 8rako. Ezingo da erabili halakoetan ohikoa den lekua, Foru plaza, egoera sanitarioaren ondoriozko murrizketak direla eta, baina alternatiba bat aurkitu da, Landatxoko kiroldegia. Kirol-ekitaldiak ikusleekin egiteko aukera bermatzen du ekipamendu horrek, 119 lagunentzako edukierarekin abuztuaren 6an eta 8an, eta 107 lagunentzakoarekin, hilaren 7an —ikusle batzuk harmailetan, besteak aulkietan—.

Udalak bultzatu eta Arabako federazioak diseinatutako programazioak hainbat modalitate bilduko ditu, ezagunenak eta hain ezagun ez direnak. Programak Laboral Kutxaren laguntza dauka, gainera. Herri-kiroletan aritzen diren emakumeei ikusgarritasuna eman nahi izan zaie, eta, horrenbestez, programazio orekatua bilatu da, emakumezko nahiz gizonezko modalitateekin, baita modalitate mistoekin ere.

Hiru egun izango dira, eta herri-kiroletako erreferente lokalak ikusteko aukera izango da. Nabarmentzekoak, Garbiñe López de Uralde eta Ruth Linaza, ‘lasto jasotze’ modalitateko Arabako txapelduna eta txapeldunordea. Orobat parte hartuko du ‘lasto jasotze’ modalitateko Arabako txapeldun eta Euskadiko txapeldunorde Andoni Elizondok. ‘Trontza’ modalitate mistoan, Garbiñe López de Uralde eta Jon Lapazaran arituko dira, hainbat urtez txapeldun izanak. Jon Lapazaran, gainera, ‘ingude’ eta ‘sega’ modalitateetako Euskadiko txapelduna izana da. Nabarmentzekoa, era berean, Kerman Perez de Heredia, hainbat urtez Arabako eta Euskadiko ‘txinga’ modalitateko txapeldun izana.

Kirol eta Osasun zinegotzi Livia Lópezek aurkeztu du egitaraua, Arabako Herri-kirolen Federazioko lehendakari eta lehendakariorde Jesus Atxa eta Jon Lapazaranekin batera. “Urte gogorra izan da kirolarentzat. Bereziki gogorra euskal kirolei dagokienez. Izan ere, espazio irekietan egin ohi dira, gure kale eta plazetan, eta horietan oraindik ere ez da ikuslego handirik biltzea. Hala ere, uda honetan, herri-kirolak izango ditugu hiru egunez, beren protagonista handiekin eta Landatxoko kiroldegira jotzen duten ikusleen harrera beroarekin”, adierazi du Livia Lópezek.

Hau izango da egitaraua:

2021eko abuztuaren 6an:

  • Zaku eramatea: Zakua sorbalda gainean hartuta, ibilbide jakin bat egin behar da ahalik eta azkarren. 4 gizonek parte hartuko dute.
  • Harri jasotzea: Lurretik bizkarrera altxatu behar da harria, eta bertan berdindu. 2 gizonek parte hartuko dute.
  • Orga Jokoaren Arabako Txapelketa: Gurdi bat altxatu behar da atzealdetik, eta behin altxatuta, endaitza ardatz gisa hartuta eta punta lurreko leku finko batean finkatuta, haren inguruan birarazi, gurpilek lurra ukitu gabe, eta ahalik eta distantziarik handiena egin. 4 gizonek parte hartuko dute.
  • Txinga eramatea: Ahalik eta distantziarik handiena egin behar da, bi txingarekin, denbora mugarik gabe. 2 gizonek eta 2 emakumek hartuko dute parte.

2021eko abuztuaren 7a: 

  • Arabako trontza txapelketa: Helburua neurri jakineko enborrak ahalik eta azkarren moztea da, horretarako trontza erabilita 4 gizonek eta 4 emakumek parte hartuko dute.
  • Lokotx bilketa: Ilaran jarritako lokotxak (1.25 metroko tartea lokotxen artean) saski batean ahalik eta azkarren batu behar dira. 2 gizonek eta 2 emakumek parte hartuko dute.
  • Arabako lasto-jasotze txapelketa, emakumeak: Ahalik eta gehienetan jaso behar da lasto-zama altuera jakin bateraino. 4 emakumek parte hartuko dute.
  • Zaku eramatea: Zakua sorbalda gainean hartuta, ibilbide jakin bat egin behar da ahalik eta azkarren. 4 emakumek hartuko dute parte.

2021eko abuztuaren 8a:

  • Arabako lasto-jasotze txapelketa, gizonezkoak: Lasto-zama altuera jakin bateraino ahalik eta gehienetan jaso behar da. 4 gizonek parte hartuko dute.
  • Arabako ingude txapelketa, emakumeak: Ahalik eta gehienetan igo behar da burdinazko ingudea oinarri jakin batetik altuera jakin batera. 4 emakumek parte hartuko dute.
  • Aizkolaritza: Aizkoraz halako neurriko enborrak albait azkarren moztea da jokoa. 3 gizonek parte hartuko dute.
  • Harri jasotzea: Lurretik bizkarrera altxatu behar da harria, eta bertan berdindu. Gizon batek parte hartuko du.

12:00etatik 13:00etara bitartean egingo dira saioak. Sarrera librea izango da, erreserbatu beharrik gabe eta lekuak bete arte. Ateak 11:45ean irekiko dira ikusleentzat.

 

Share

Ogeta frontoian egingo dira aurten XXVI. Andre Maria Zuria torneoa eta Emakumeentzako Green Capital paleta txapelketa

Foru plazako pilotalekuan egin ohi izan dira Andre Maria Zuria torneoa eta Emakumeentzako Green Capital paleta txapelketa, Gasteizko jaietako kirol-programazioaren barruan, baina aurtengoan Ogeta frontoian izango dira txapelketa biak, osasun-egoeraren aurreko neurri prebentibo gisa.

Pandemiaren ondorioz, iaz ezin ziren egin ez Andre Maria Zuria torneoaren XXVI. edizioa, ezta Emakumeentzako Green Capital paleta txapelketaren X.a, eta aurten lehen asmoa erdialdeko pilotalekua berreskuratzea zen, herritarrek kalean betan goza ahal izateko gure kirolaz. Alabaina, pandemiaren bosgarren uhinaren bilakaerak hitzordu biak Ogeta pilotalekura eramatera behartu du; izan ere, frontoi horretan segurtasun-neurri guztiak bermatu daitezke: gehieneko edukiera, ikusleen sarrera-irteeren kontrola, distantzia soziala, eta segurtasun-protokoloen aplikazioa.

Green Capital eta Andre Maria Zuria txapelketen sustatzaile nagusi diren (hurrenez hurren) Udalak eta Vital Fundazioak elkarrekin aurkeztu dituzte torneoak –zeinek amaiera ematen baitiote pilota-denboraldiari–, xede konpartitu batekin: udako kirol-jarduerei ekitea, ahalik eta gehien aprobetxatuz COVID-19 prebenitzeko araudiak eskaintzen dituen aukerak.

“Ederrena euskal pilota berriro Foru plazan ikustea litzateke, ikuslek ematen duten giro eta bero hori tarteko, zeinaren bitartez kirol femeninoa sustatzeko asmoz sortu zen txapelketa batek pisu handia irabazi duen urte gutxitan. Egoerak ez digu uzten plazara itzultzen, baina, hala ere ikusledun torneoak izango ditugu Ogeta frontoi berrinauguratuan, tartean paletan diharduten emakumeen arteko protagonista handiak”, esan du Kirol eta Osasun zinegotzi Livia Lópezek, zeinek alboan izan baititu ekitaldian Vital Fundazioko zuzendari nagusi Axier Urresti, eta Arabako Euskal Pilota Federazioko presidenteorde Raúl Angulo.

Hiru kategoriatan jokatuko da Andre Maria Zuria torneoa. Kadete kategoriakoek lau eta erdian arituko dira; aldiz, gazte eta senior kategorikoek (lau eta hamabi bikote, hurrenez hurren), ohiko distantzian jokatuko dute. Ligaxka eta final zuzena jokatuko dute gaztek; aldiz, senior mailakoek ligaxka, finalerdiak eta finala.

Green Capital torneoan, berriz, eliteko zortzi pilotari arituko dira, lau aurrelari eta lau atzelari. Denek denen aurka jokatuko dute, hartara  bi aurrelari eta bi atzelari onenak bilatzeko, tanto-kopuruaren arabera (partida irabazien bidez baino).

Uztailaren 28an (asteazkena) hasiko dira txapelketa biak. Partidak arratsaldez izango dira uztailean, eta goizez abuztuan.

Share

Udalak abian jarri du “Bularreko kume bati lagundu” programa, aldi baterako etxean katakumeak hartu eta zaintzeko

Gasteizko Udalaren Osasun Publikoaren Zerbitzuak abian jarri du “Bularreko kume bati lagundu” programa, zeinaren xedea baita Animaliak Babesteko Zentroan jasotzen diren bularreko katakumeak zaintzen laguntzeko aukera ematea herritarrei. Zehazki, laguntza eskatzen da bularreko katuak hainbat astez etxe partikularretan hartu, eta janaria eta zaintzak emateko, hartara haien sozializazio prozesua sustatzeko, eta etorkizunean adoptatuak uizan daitezen prestatzeko.

“Bularreko kume bati lagundu” programak bigarren aukera bat eman nahi die oraindik beren kabuz moldatzeko gai ez diren bularreko katutxo umezurtzei, etorkizunerako aukera bat emanez, aurrerago behin betiko adoptatu ahal izan daitezen. “Helburu nagusia herritarren laguntzarekin ahalik eta bularreko katu gehien aurrera ateratzea da. Kumeak dira onuradun nagusiak, baina besterik ere bada; izan ere, haurrak animaliak babestearen garrantziaz sentsibilizatzeko aukera ematen die familiei ekimenak”, esan du Kirol eta Osasun alorretako zinegotzi Livia Lópezek.

Parte hartzen duten familia eta partikularrek kumearekin edo kumeekin batera, horiek zaintzeko behar den material guztia jasoko dute: kutxa/garraioa, esne-hautsa, biberoia eta tetinak. Boluntarioek 3-4 ordutik behin elikatu beharko dituzte katakumeak, esne maternizatu espezifiko batekin. Hartualdi bakoitzaren ondoren, pixa eta kaka egiteko estimulatu beharko dira, sabelaldean eta uzki- eta gernu-eremuetan masaje leunak eginez. Gainera, ingurune garbi eta beroan eduki behar dira.

Harrera-familian 2-5 aste inguru emango dituzte, esnearen elikaduraren eta elikadura solidoaren arteko igarobidea gertatu arte (2 hilabete inguru). Katakumeak elikatzeko eta zaintzeko jarraibideei buruzko informazioa ere jasoko dute zaindariek. Kontsultak egin edo zalantzak argitu ahal izango dituzu telefonoz eta posta elektronikoz, animaliaren bilakaera zuzena delako lasaitasun osoa izan dezazun.

Irailaren amaiera arte eman daiteke izena “Bularreko kume bati lagundu” programan parte hartzeko, Internet bidez edo 010 telefonora deituta.

Bularreko kumeei laguntzeko programaren helburua da etxe harreragileen poltsa indartzea, animalia horiekin eta beste batzuekin lanean ari baitira, harrera-premiak areagotu daitezkeen egoerei erantzuteko, batez ere kumeen jaiotza-aldian.

INFORMAZIO GEHIAGO: “Bularreko kume bati lagundu” programa

 

Share

Udal langileek parte hartuko duten loaren kalitateari buruzko ikerketa hil honetan hasiko da

  • BioArabak eta Osakidetzak Gasteizko Udalaren eskutik burutzen duten Vitoria-Gasteiz Sleep Smart City proiektuaren barruan egingo da

 

Ekainaren 4an, ostiralean, irekiko da epea loaren efizientziari buruzko ikerketa aitzindari batean parte hartu nahi duten udal langileek boluntario gisa izena eman dezaten. Epea ekainaren 16an amaituko da, eta 202 pertsonaz osaturiko lagin bat lortu nahi da, Vitoria-Gasteiz Sleep Smart City proiektuaren barruan egingo den ikerketa burutu ahal izateko.

Loaren alorrean aditu diren medikuek gomendioak emango dizkiete banaka eta modu interaktibo eta birtualean parte-hartzaileei, txat baten bidez, eta gomendio horiek lo-defizita duten pertsonen loaren kantitatea zein kalitatea hobetzen duten egiaztatzea izango da ikerketaren helburua. Parte-hartzaileen loari buruzko datuak bi modutan bilduko dira: modu objektiboan, jarduera-eskumuturreko baten bidez, eta modu subjektiboan, astero loari buruzko galderak eginez, web-galdetegi baten bidez.

Laginarekin honako ezaugarri hauek dituzten pertsonen talde adierazgarri bat osatu nahi da: 18 eta 65 urte bitarteko pertsonak, osasuntsuak, gutxi edo gaizki lo egiten dutenak, eta loaren arloko patologiarik diagnostikatu edo tratatu gabekoak. Lagina 101 pertsonako bi lantaldetan banatuko da. Aldez aurretik ikerketaren ezaugarrien berri emango zaie eta jarduera-eskumuturrekoak jasoko dituzte; izan ere, eskumuturrekoek hainbat datu bilduko dituzte, hala nola loaldian egiten dituzten mugimenduak, guztira lo egiten duten edo esna dauden denbora, eta loaren efizientzia.

Parte-hartzaileen erdiak —ausaz hautatua— kontsulta birtuala izango du astean behin Osakidetzako Loaren Unitateko mediku-taldearekin, zuzeneko online txat baten bidez, programatutako ordu-tarte batean, zalantzak argitu eta banakako aholku eta gomendioak emateko.

Parte-hartzaileen beste erdiak ez du ¨live-chat¨ sistema baliatuko mediku-taldearekin komunikatzeko. Haien kasuan, astero aztertuko dira jarduera-eskumuturrekoen datuak, baina loarekin lotutako gomendiorik eman gabe.

Urtebetez iraungo dute datu-bilketak eta gomendio-bidalketak. Ondoren, azken neurketa bat egingo da, eta lortutako emaitzak alderatuko, behin betiko azterketari forma emateko. Horren guztiaren helburu nagusia da loaren inguruko laguntzaile birtual bat garatzea, zeinek gomendio banakatuak emango baititu, loaldia areagotu eta efizientzia hobetzeko.

“Gero eta hobeto dakigu gaizki lo egiteak ondorio negatiboak dituela osasunean, errendimendu kognitiboan eta produktibitatean. Udal langileek parte hartuko duten ikerketa honekin pauso garrantzitsu bat emango da loaren kalitatea hobetzeko; horrek onura pertsonalak ekarriko dizkie parte-hartzaileei, eta ikerketaren emaitzek onura komunitarioa izan dezakete guztiontzat”, azpimarratu du Kirol eta Osasun zinegotzi Livia Lópezek.

Vitoria-Gasteiz Sleep Smart City proiektua Vitoria-Gasteiz Green Deal delakoaren ekintzetako bat da. eta protagonista izan zen atzo Ingurumenaren Biltzar Nazionalaren azken jardunaldian, Arabako ESIko Loaren Unitate Funtzionalaren buru eta Bioaraba Osasun Ikerketaren Institutuko ikertzaile Carlos Egeak egindako aurkezpenari esker.

 

Share

Animaliak Babesteko Zentroa zabaltzeko eta hobetzeko proiektu berria aurkeztu dute

  • Txakurrentzako ostatu guneak ugaritu dituzte beste 32 txakurtegirekin
  • Aisialdiko guneetan 3.500 metro koadro gehituko dituzte
  • Administrazioko eraikineko instalazioak berriro banatu eta handituko dituzte

 

Animaliak Babesteko Zentroa erreformatzeko proiektua

Kirol eta Osasuneko zinegotziak, Livia Lópezek, Gasteizko Udalaren Animaliak Babesteko Zentroa erreformatzeko proiektua aurkeztu die Animalien Elkarbizitzarako, Defentsarako eta Babeserako elkargunean parte hartzen duten kolektiboei. Obrak 1.100.000 euroko lizitazio-aurrekontua du eta, horri esker, zentroak animaliei modu espezifikoan eskaintzen dien eremuan eta administrazioko eta albaitaritzako lanak egiten diren eraikinean zentroak instalazio berriak izango ditu. Bestalde, Animaliak Babesteko Zentroaren ondoko guneak egokitu egingo dira txakurrentzako aisialdi gune izan daitezen.

 

“Gasteizko Udalak animalien ongizatearekin lotuta bere gain hartu duen konpromisoak urrats berri bate ematea ahalbidetzen digu. Animaliak Babesteko Zentroaren erreforma bertako animalien arreta hobetzeko, lan-baldintzak hobetzeko eta instalazioetara joaten direnen arreta hobetzeko funtsezko proiektua da. Funtsezko erreforma egingo dugu Animaliak Babesteko Zentroa  behar berrietara egokitzeko. Horrek gainazala zabaltzea eta eremu ugarien banaketa hobetzea ahalbidetuko digu”, zehaztu du Livia Lópezek.

 

 

Esku-hartzeen bloke handia animalien eremuan

 

Zabalkuntza-lan nagusiaren bidez, txakurrei ostatu emateko 32 txakurtegi berri eraikiko dituzte. Nabe itxura duen eraikuntza da eta behar bezala garbitu eta desinfektatu ahal izateko uren kanalizazioko eta drainatzeko sistema eta material egokiak erabiliko dira horretarako. Txakurtegiek zoru bero-emaileko sistema izango dute beharrezkoa denean txakurrentzako guneak girotu ahal izateko. Eremu horretan itxituren bidez egokitu ahal izango da instalazioetan sartu berriak diren txakurrek koarentena egiteko gunea.

 

Txakurtegi bakoitzak elikagaiak hornitzeko eta sartzeko sistema modernoak izango ditu eta, horri esker, zaintzaileen segurtasuna erraztu eta animalien erosotasuna hobetuko dira garbiketa-prozesua egitean. “32 txakurtegi berri hauekin, batez ere, Animaliak Babesteko Zentroan dauden animalien egonaldiko baldintzak hobetuko ditugu; izan ere, bakoitzak bere gunea izango du.”, aipatu du Kirol eta Osasuneko zinegotziak.

 

Era berean, Animaliak Babesteko Zentroan sartu berriak diren katuentzako koarentenarako gune berria egokituko da haien osasun-egoera monitorizatu ahal izateko. Osasun-arazoren bat detektatuz gero, katu horiek bi gune berritara eramango lituzkete; haietako bat arnas-gaixotasunarekin lotutako kasu espezifikoetarako izango da, eta bestea gainerako patologietarako. Bestalde, koarentena behar bezala amaitu duten katuentzako eta infekziosoak ez diren gaixotasun edo prozesuak dituztenentzako hirugarren gune bat ere aurrez ikusi dute.

 

Amaitzeko, kanpoan ere gune bat izango dute katuek haien bizimodua erdi-askatasunean egin dezaten. Gune horretako animaliek adoptatu ahal izateko baldintzak beteko dituzte. Gune honek izan ezik, gainerako esparruek girotze-sistemak izango dituzte.

 

Animaliak Babesteko Zentroa berritzeko proiektuak animalientzako zonalde barruan beste gune osagarri batzuk ere jasotzen ditu.

 

  • Eriondo dauden, ebakuntza ondoren suspertzeko, txakurkumeen kumaldietarako edo zainketa berezietarako gune espezifikoa.
  • Txakurrak eta katuak ez diren beste espezie batzuetako animalientzako eremua (hegazti exotikoak, adibidez).
  • Hiru biltegi elikagaiak, laneko makina eta tresnak, garbiketa-produktuak, parasito-kontrakoak eta abarrak behar bezala kudeatzeko.
  • Garbigailu industriala duen gunea askak eta uraskak zein katuentzako hondar-erretiluak garbitu eta desinfektatzeko. Eremu honetan bertan egin ahal izango dituzte ile-apainketako lanak.

 

Zonalde ugariak lotzen dituzten korridoreak eta ibilbideak biosegurtasuna kontuan hartuta diseinatu dituzte. Hala, ahalik eta gehien mugatuko dira gune garbien eta zikinen arteko kutsadura gurutzatuak, instalazioetako erabiltzaileen eta langileen segurtasuna ere kontuan izanda.

 

 

Txakurrentzako aisialdirako gune berriak

 

Aldi berean, eraikinaren iparraldean txakurrak paseatzeko eta haien aisialdirako hiru gune berri egokituko dituzte. Haien gutxi gorabeherako azalera 3.500 metro koadrokoa da. Hesituta eta elkarri komunikatuta egongo dira.

 

Eremu horietan, kontrolatutako talde txikitan edo banaka paseoak egin ahal izango dituzte, eta “agility” eremua instalatu ahal izango da.

 

 

Administrazio-eraikina zabaltzea eta berriro banatzea

 

Gaur egungo eraikinaren azalera handitu eta banaketa hobetuko dute. Administraziorako eremu bat egongo da, bulegoekin eta arreta emateko guneekin. Hiritarrek instalazioetara sartzeko eta harrera jasotzeko gaur egun erabiltzen dutena da.

 

Gainera, Animaliak Babesteko Zentroak adopzio arduratsuarekin eta animalien ongizatearekin lotuta betetzen duen lana hedatzeko jarduerak egin ahal izateko, ikasleen taldeei harrera egin ahal izateko erabilera anitzeko areto bat ere gehitu dute. Horrez gain, Zentroko langileentzako eremua hobetuko da aldagela eta komun propioekin.

 

Bestalde, “albaitaritzako” eremua berrantolatu eta handitu egingo da sendaketen gela, ebakuntza-gela independente bat eta albaitaritzako langileentzako bulego bat sortuta.

 

Eraikineko sarbide ugariak diseinatzeko garaian, kontuan hartu da bertan egiten diren lanak modu bereizian egin behar direla, barneko langileen zein hiritarren joan-etorriak antolatuta. Eraikinerako sarbidea ere berritu egin da eta hemendik aurrera estalitako gunea izango du. Ibilgailuak aparkatzeko gunea berriro urbanizatuko da. Horren arabera, autobusek bertara sartzeko aukera izango dute eta edukiera handituko da.

 

Amaitzeko, animaliak jasotzeko ibilgailuentzako sarrera independente bat sortu da animalien estresa minimizatu eta biosegurtasuneko neurriak errespetatu ahal izateko.

 

Animaliak Babesteko Zentroko instalazioak 1983an ireki zituzten eta Udalak 1989an hartu zituen bere gain. Harrezkeroztik, orain arte, zentroa eraldatu eta garatu egin da, 30 urte pasatxo hauetan sortu diren beharrei erantzuteko, bai animaliak zaintzeko eta haiei arreta emateko moduagatik, bai zabalkunde- eta prestakuntza-jarduerengatik.

Share

6.900 plaza baino gehiagok osatzen dute Gasteizko Udalaren udako kirol-programazioa

 

  • Gehienak, 5.534, gizarte-etxeetako eta kirol-instalazioetako jarduerak dira.
  • 576 plaza jarduera nautikoen kanpainakoak dira; hastapeneko bost modalitate eskaintzen dira haren barruan.
  • 55 urtetik gorakoentzako natura-inguruetako irteeren kanpainan, 15 irteera egingo dira, eta bakoitzean 50 pertsonak hartuko dute parte gehienez.

 

DOSSIER UDAKO KIROL PROGRAMAZIOA

Barietatea da uda honetarako Gasteizko Udalak programatu dituen kirol-jardueren eskaintzaren ezaugarri nagusia. Bai jarduera motetan —arinetatik gogorrenetara—, bai helburu diren pertsonen profiletan —8 urtetik 99 urtera—, askotarikoak dira. Gizarte-etxeetako eta kirol-instalazioetako udako jardueren programa, jarduera nautikoen kanpaina eta 55 urtetik gorakoentzako ibilaldiak gehituta, guztira 6.910 plaza eskaintzen dira.

“Eskaintza seguru, askotarikoa eta, batez ere, udarekin batera herritarrei datorkien erritmo-aldaketarako pentsatua aurkezten ari gara. Gainera, saiatu gara kirol-jarduerak ahalik eta ondoen egokitzen hilabete hauetan egoten den eskaerara, eta hor daude aire zabaleko eta igerilekuetako hainbat aukera. Eta, hirugarren helburu bat izan dugu: aukera erakargarriak proposatzea bai kirol ohitura handia dutenentzat, bai urtearen gainerakoan kirola egiteko aukerarik izan ez dutenentzat”, adierazi du Kirol eta Osasun zinegotzi Livia Lopezek.

 

Gizarte-etxeetako eta kirol-instalazioetako jarduerak

Gizarte-etxeetako, kiroldegietako eta Mendizorrotzeko eta Gamarrako esparruetako udako kirol-jarduerek 259 ikastaroko programa bat osatzen dute, eta guztira 5.534 eskaintzen dira horretan. Mendizorrotzeko eta Gamarrako esparruetako udako kanpainetan gertatzen den bezala, programazio guztiak egokituta dago indarrean dauden osasun-murrizketetara.

Uztailean eta irailean egingo dira jarduerak. Programatutako 259 ikastaroetatik, 201 hilabetekoak izango dira, eta beste 58 hamabost egunekoak, honela banatuta:

Hilabeteko ikastaroak:

  • Uztailean: 3tik 30era bitartean.
  • Irailean: 1etik 28ra bitartean.

 

Hamabost egunekoak:

  • Uztailaren lehen hamabostaldian; 3tik 16ra bitartean.
  • Uztailaren bigarren hamabostaldian: 17tik 30era bitartean.
  • Irailaren lehen hamabostaldian; 1etik 14ra bitartean.
  • irailaren bigarren hamabostaldian: 15etik 28ra bitartean.

Aurreikusitako hamabost eguneko espezialitateetakoak dira padela (gazte zein helduentzat) eta tenisa (hiru adin-tartetan). Halaber, 8 urtetik 12 urte bitarteko haurrentzat ere programatu dira erraketa-jokoak, baita adin guztietarako hondartza-boleiboleko ikastaroak eta igeriketa estiloetakoak, haiek ere adin guztietarako.

Honakoa hauek izango dira hilabeteko ikastaroak: aquagima, aquaerobica, sasoia lantzea, luzaketak, mantentze-gimnasia, padela, tai jia eta yoga, besteak beste. Jarduera horiek ere hainbat adin-tartetarakoak dira, eta hainbat ordutegi-tartetan programatu dira, ahalik eta herritar gehienen beharretarako egokitzeko.

Izena emateko epea 2021eko ekainaren 9an hasiko da, 08:30ean. Gizarte-etxe eta kiroldegietako informazio-zerbitzuetan, Mendizorrotzeko kirol-esparruan, Gamarrako parkean eta herritarrei laguntzeko bulegoetan eman ahal izango da izena jarduera horietarako. 010 informazio-telefonoaren eta udalaren webgunearen bidez ere egin ahal izango da.

Udalaren kirol-instalazioetako abonamendua duten pertsonek baino ezingo dute eman izena Mendizorrotzeko kirol-esparruan programatutako jardueretan. Gamarran progamatuetakoetan, ordea, abonamendua dutenek zein udako abonamendua dutenek eman ahal izango dute izena.

 

2021eko jarduera nautikoen kanpaina

Mendizorrotzeko eta Gamarrako udako jardueren programazioarekin batera, udako hilabeteetarako kirol nautikoen zenbait modalitatetako hastapen-jardueren eskaintza aurkeztu du Kirol eta Osasun Saileko zinegotziak.

2020an horrelako jarduerak programatu ezin izan ondoren, espero da herritarrek harrera ona egingo dietela uda honetarako aurreikusitako bost espezialitateei:

  • Kanoa-kayak
  • Belarako hastapenak
  • Windsurfa
  • Haurrentzako bela (optimist)
  • Stand up paddle surfa

Guztira 54 ikastaro programatu dira, eta haiekin, 392 plazakoa da eskaintza, betiere kontuan hartuta jarduerako parte-hartzaileen ratioa osasun-egoeraren ondoriozko prebentzio-neurrietara egokitzen dela. Plaza horiei izena emateko epea apirilean izan zuten eta berariaz 7-15 urte bitartekoentzat ziren jarduera nautikoen kanpuseko plazak gehituz gero, guztira 576 plaza dira. Jarduera guztiak Vitoria Klub Nautikoan egingo dituzte, Uribarri-Ganboan, eta ekainaren hirugarren astetik abuztuaren amaierara arte iraungo dute.

Maiatzaren 31n hasiko da Jarduera Nautikoen Programan izena emateko epea. Nahitaezkoa da igeri egiten jakitea, eta ikastaroa hasten den unean 11 urte beteak izatea, gutxienez, salbu eta Belarako hastapen-ikastaroan (horretan, 16 urte beteak izan behar dituzte) eta Haurrentzako bela-ikastaroan (hori 7 eta 15 urte bitarteko pertsonentzakoak da). Ohiko tokietan eman ahal izango da izena: gizarte-etxeak eta Udalaren kirol-instalazioak, Udalaren webgunea eta 010 telefonoa.

ARGIBIDE GEHIAGO: Jarduera nautikoen kanpaina

 

+55 ibilbideak

Azkenik, uda honetarako Gasteizko Udalak antolatu duen kirol-programazioaren hirugarren blokea 55 urtetik gorakoentzako natura-inguruetako irteerei dagokie. Natura-inguruetako irteeren kanpaina urteko bi garaitan banatu ohi da: ekaina-uztaila aldia, eta iraila-urria aldia. 2021eko uda-udaberri garaiko irteeren kasuan, COVID-19a prebenitzeko osasunaren arloko neurrietara egokitu da haien formatua, eta, ondorioz, parte-hartzaileen kopurua murriztu da; ibilbide mota aldatu da (Gasteiztik hurbilagokoak) eta ezberdin banatu dira asteko egutegian.

Ekainaren 7an hasiko dira irteerak, eta haien helburua da 55 urtetik gorako pertsonak mendira eta natura-ingurune hurbilenera gerturatzea; horretarako irteerak erraz egiteko modukoak dira, eta zailtasunaren arabera sailkatuta daude ibilaldiak. Irteeretan, honako mendi hauetara igoko dira, besteak beste: Zaldiaran, Pikozorrotz, Basotxo eta Egaña (Gasteizko Mendiak).

Irteerak gehienez 50 lagunentzat izango dira eta astelehenetik ostiralera.

Ibilbide guztiak zirkularrak dira, 8km-tik 14km-ra bitartekoak, eta irteera ordua guztientzat berdina bada ere (9:30 h), topalekua ibilbidearen arabera aldatuko da.

Izen-emateak gizarte-etxeen eta udal kirol-instalazioen sarean egin ahal izango dira, irteera bakoitza baino 7 egun lehenago hasi eta irteera baino 2 egun lehenago arte, eta parte-hartzaileei ibilbideari buruzko informazio osoa eskura emango zaie.

 

ARGIBIDE GEHIAGO: +55 irteerak natur inguruetan

 

Share

APASOS elkartearekiko lankidetza amaitzea erabaki du Udalak

Hurrengo egunetan, Gasteizko Udalak amaitu egingo du APASOS elkartearekiko lankidetza. Orain arte hitzartutako jarduerak egiteko urtarrilaren 1etik aurrera izandako gastuak konpentsatuko dizkio kolektiboari, eta, aurrerantzean, baliabide propioekin beteko ditu Udalak lan horiek. Horrenbestez, Udalak ez du asmorik, oraingoz, aurtengo lankidetza-hitzarmena sinatzeko.

Elkartearekiko desadostasunak daude APASOSekiko lankidetza amaitzearen oinarrian, bai Animaliak Babesteko Zentroa hobetzeko 2019an hasitako prozesuari dagokionez, bai harrezkeroztik egiten ari den prozesu berrien ezarpenari dagokionez. Txosten tekniko batek eta txosten juridiko batek babesten dute lankidetza amaitzeko erabakia.

Hobetze-prozesu horren barruan daude instalazioak berak eraberritzea eta Animaliak Babesteko Zentroari esleitutako profil profesionaletan zenbait aldaketa egitea, eta barne-funtzionamenduko jarraibide, metodo eta modu berriak ekarri dizkio berekin zentroari. Horrekin guztiarekin, honako helburu hauek lortu nahi dira: osasun-segurtasuna handitzea, langileentzako zein erabiltzaileentzako osasunaren eta segurtasunaren arloko arriskuak gutxitzea, bertan ostatutako animalien ongizatea hobetzea, eta herritarrei zabalik dagoen antolaketa eraginkorrago bat ezartzea.

Aldaketa horiek abian jarri zirenetik desadostasun ugari egon dira APASOSen eta Udalaren artean. Elkartea uzkur agertu da barne-antolakuntzako arauak onartzeko. Halaber, desadostasunak erakutsi ditu Udalaren eskumeneko zenbait kontu teknikoren, animaliei ematen zaizkien albaitaritzako tratamenduen eta Udaleko langileek ezarritako animalien elikaduraren arloetan. Horretaz gain, kolektiboa zentroaren biosegurtasun-arauak betetzearen aurka egon da, horiek murrizketak ezartzen baitituzte berrogeialdian edo gaixorik dauden animalien eremura sartzeko. Zentroan jarraituz gero erraz adopta litezkeen animaliak etxeetan aldi baterako hartzeko eraren inguruan ere badira irizpide-desadostasunak.

“Animaliak Babesteko Zentroa hobetzeko prozesuak dakarren guztiari etengabe aurre egite horren eraginez, ezinezkoa da lankidetzan jardutea animalien eta herritarren interes orokorraren alde. Udalak proposamenak egin ditu, eta jarrerak hurbiltzeko borondatea erakutsi du, baina horrek ez du egoeraren hobekuntzarik ekarri. Horregatik, oraingoz lankidetza etetea beste biderik ez zaigu geratzen. Espero dugu etorkizunean berriro ekitea elkarlanari, baina gaur egun ezinezkoa da”, adierazi du Kirol eta Osasun Saileko zinegotzi Livia Lopezek.

Lankidetza amaitu ondoren, baliabide propioekin helduko die Udalak orain arte APASOSek egindako zereginei. Esaterako, aurrerantzean, Osasun Publikoaren Zerbitzuak egingo ditu albaitaritza-tratamendu eta antzutze guztiak. Harrera-etxeak bilatzea eta adopzioak sustatzea, berriz, udal-langileek zuzenean kudeatuko dute. Animaliak Babesteko Zentroko plantilla indartu eta berrantolatzeak aukera emango du animalien paseoak eta sozializazio-uneak ere udal-langileek egin ditzaten. Eta, azkenik, albaitaritza-zerbitzuaren ordutegia indartuko da.

“Planteamendu hori berehala ezarriko dugu, baina aldi baterako izan dadin nahi dugu. Horrela jardungo dugu lanean aldi batez, Zerbitzuak egoeraren bilakaera aztertzen duen bitartean”, zehaztu du Kirol eta Osasuneko zinegotziak. “Nolanahi ere, Animaliak Babesteko Zentroaren kudeaketan elkarteen munduarekin eta boluntarioekin lankidetzan aritzeko helburuari eusten dio Udalak. Betiere, animalia guztiei arreta eta ongizatea bermatzea oinarri hartuta”, esan du amaitzeko Livia Lopezek.

 

 

 

Share

Udan ez da erreserbarik beharko Mendizorrotzera eta Gamarrara sartzeko

  •  Igerilekuetara sartu ahal izateko, denbora errealean kontrolatuko da edukiera eta pertsona bakoitza egunean, gehienez, bost orduz egon ahal izango da
  • Udako denboraldia maiatzaren 28an hasiko da
  • 1.500 udako abonamendu inguru eskainiko dira Gamarrarako

 

Mendizorrotzeko eta Gamarrako kirol-esparruek normaltasuna berreskuratuko dute pixkanaka aurtengo udako kanpainan, oraindik ere pandemia egoeran gaudela ahaztu gabe. Izan ere, koronabirusa agertu aurreko ordutegiak eta zabaltze-aldia berreskuratu dira, eta erabiltzaileak aldez aurretik erreserbatu gabe sartu ahal izango dira. Hala ere, edukiera errespetatu beharko da, eta osasun eta segurtasun neurriak mantendu.

“Uda honetan, iaz bezala, aisia eta segurtasuna uztartu beharko ditugu, baina jakin badakigu egoera ez dela berdina. Ohiz kanpoko urte honetan kirol-instalazioak kudeatzen ikasi duguna kontua hartuta, udako kanpaina erosoago eta luzeago bat proposatzen dugu, gure kirol-esparruak bereizten dituen zerbitzuaren kalitatea mantenduta eta osasun egoerak exijitzen dituen berme guztiekin”, adierazi du Kirol eta Osasun zinegotzi Livia Lópezek.

Udako kanpaina honetan, berritasun garrantzitsuena sartzeko eta edukiera kontrolatzeko sisteman egongo da, aurten ez baita aldez aurretik erreserbarik egin beharko igerilekuetara sartzeko. Gehieneko edukiera gainditzen ez bada, posible izango da sartzea. Denbora errealean egiaztatu ahal izango da Mendizorrotzeko eta Gamarrako betetze-maila, bai Udalaren webgunean, bai eta instalazioetako hiru sarreretan egongo diren informazio-pantailen bidez.

Beste berritasun bat ere egongo da: pertsona bakoitza egunean 5 orduz egon ahal izango da igerilekuetan. Ordu horiek egunean zehar banatu ahal izango dira, eta bi instalazioetan, betiere leku libreak badaude. Eguneko muga behin eta berriro gainditzen duten erabiltzaileei sarrera mugatuko zaie.

“Bi neurri horiekin, alegia, hitzordua eskatu behar ez izatea eta sartzeko baldintzak malguagoak izatea, erabiltzaileak erosoago egongo dira. Gainera, pertsona gehiagok izango dute instalazioak erabiltzeko aukera. Iaz, bi kirol-esparruak kontuan hartuta, egunean 12.000 pertsonara arte sar zitezkeen, eta aurten edukiera hori ia % 50ean gainditu ahal izango dugu”, azpimarratu du Livia Lópezek.

Gehieneko edukierak

 Mendizorrotzeko kirol-esparruan 3.000 pertsona sartu ahal izango dira, eta Gamarrako parkean 3.500 (lur-eremua handiagoa delako eta ur azalera handiagoa duelako). Kupo horiek zehazteko orduan, iaz fase pilotua amaitzean zehaztu zirenen antzekoak, kontuan hartu da aurreko kanpainan ondo funtzionatu zutela, ia eskari osoari ematen baitzitzaion zerbitzua segurtasun-berme guztiak mantenduz. Edonola ere, edukiera horiek osasun egoeraren arabera aldatu ahal izango dira.

Oraingoan ere, zirkuluak marraztuko dira lurrean, pertsonak ondo banatu eta segurtasun neurriak errespetatzen direla bermatu aldera. 1.800 zirkulu inguru markatuko dira, 2 eta 4 metroko diametroarekin, eta igerilekuetatik hurbil jarriko dira.

Irekiera egunak eta ordutegiak

2021eko udako kanpainak ohiko hasiera- eta amaiera-datak berreskuratuko ditu. Maiatzaren 28an irekiko dituzte ateak bai Mendizorrotzek, bai Gamarrak; azken eguna, berriz, irailaren 5a izango da Gamarran eta irailaren 19a Mendizorrotzen.

Ordutegiari dagokionez, 8:00etatik 22:00etara egongo dira zabalik. Aurten ez dute eguerdian itxiko, eta, horri esker, instalazioen edukiera handituko da.

Sartzeko baldintzak eta abonamendu berria Gamarrarako

Iaz bezala, bazkideek lehentasuna izango dute, eta, horregatik, Mendizorrotzeko kirol-esparrua haiek bakarrik erabiltzeko izango da.

Hala ere, bazkide ez diren pertsonek abonamendu bat erosi ahal izango dute Gamarrarako hasieratik. 1.500 udako abonamendu inguru eskainiko dira kirol-gune horretan sartzeko, eta herritarrek Udalaren webgunean —Herritarren Udal Txartela badute— edo aurrez aurre herritarrei laguntzeko bulegoetan —hitzorduarekin— erosi ahal izango dituzte.

Ezingo dira eguneko sarrerak erosi, ezta txartela ahaztuz gero igerilekura sartu ahal izateko sarrera bereziak ere. Iaz bezala, bi urtetik gorako haurrek abonamendua beharko dute igerilekuetara sartzeko, eta abonamendua doakoa izango da 5 urte bete arte. Abonamendu hori eskuratu nahi duten familiek herritarrei laguntzeko bulegoetan eskatu ahalgo izango dute, aldez aurretik hitzordua hartuta.

Erabilgarri egongo diren ekipamenduak

 Kirol esparruetan iaz baino instalazio eta gune gehiago erabili ahal izango dira. Esaterako, aurten txirristak eta haurren jolastokiak irekita egongo dira. Gauza bera gertatuko da futbitoko, saskibaloiko, hondartza-boleiboleko eta mahai-teniseko kirol-pistekin, eta Gamarrako minigolfarekin, edukiera mugatuta egongo den arren eta jokatzeko hainbat arau errespetatu beharko badira ere.

Bestalde, tenis eta padel pistak aldez aurretik erreserbatu beharko dira erabili ahal izateko. Edonola ere, kontuan hartu behar da zelai horiek erreserbatuta ere, ezinbestekoa izango dela kirol-esparruetara sartzeko leku libreak egotea. Edukiera beteta egonez gero, erreserbaren dirua itzuli egingo zaio erabiltzaileari.

Aldagelak eta barruko dutxak irekita egongo dira, baina edukiera % 35ekoa izango da. Ez da hamaka-zerbitzurik egongo, baina nork bere hamaka erabili ahal izango du. Mendizorrotzen solariumean soilik jarri ahal izango dira. Gamarrako barbakoa gunea ezingo da erabili.

COVID-19ari aurre egiteko beste segurtasun neurri batzuk

Maskara erabiltzea derrigorrezkoa izango da beti, bereziki sarrera gunean eta gune komunetan. Salbuespen gisa, ez da beharrezkoa izango bainatzeko unean edo erabiltzailea bere lekuan eserita/etzanda dagoenean. Ezinbestekoa izango da, ordea, bainu-txanoa erabiltzea bainatzeko.

Azkenik, garbiketa indartuko da, eta, ateak ireki aurretik eta itxi ondoren, sakonean desinfektatuko dira instalazioak egunero. Gainera, egunean zehar ere desinfektatzeko txandak egingo dira, batez ere igerilekuetako ontzietan maiz ukitzen diren gainazalak garbitzeko.

DOSSIERRA

Share

Laurogeita hamarretik gora entitatek parte hartu dute kirolaren arloko dirulaguntza-deialdiari buruzko informazio-jardunaldian

Interesa zuten entitate guztientzako informazio-jardunaldi ireki bikoitza egin zuen atzo Kirol eta Osasun Sailak, kirolaren arloko 2021eko dirulaguntza-deialdiaren xehetasunak emateko. Bideokonferentziaz egin ziren saioak, eta hainbat zalantza argitzeko balio izan zuten: deialdiko betebeharrak, aurkeztu beharreko dokumentazioa eta laguntzen tramitazioaren inguruko bestelako kontuak. Era berean, aurten sartutako berrikuntzen berri eman zen. Estu-estu harturik kirolaren arlokoak diren entitateez gain, guraso elkarteek, eremu soziosanitarioko eta auzoetako elkarteek ere parte hartu zuten, horientzat ere zabalik baitago deialdia. Guztira 90 entitate baino gehiagok parte hartu dute.

Joan den ostiralean —hilak 16— zabaldu zen deialdira eskabideak aurkezteko epea, eta maiatzaren 17ra arte egongo da zabalik. Bost laguntza-ildo bereizten dira bertan, garatuko den jarduera-motaren arabera, hala nola ekitaldi handiak, urteko programak, kirol autoktonoaren sustapena edo lehiaketa nazional federatuan parte hartzea. Nabarmentzekoa da, era berean, bost ildo horietako bat pandemiak ekarri dituen mugapenak gorabehera herritarren artean kirolaren praktika sustatzeari jarraipena emateko lanean jarraitzen duten entitateei laguntzeko diseinatu dela salbuespen gisa.

“Aurten, ahalegina egin dugu kirolaren arloko laguntza-deialdia errazteko, bi helbururekin: batetik, ahalik eta entitate gehienek izan dezatela parte hartzeko aukera, eta bestetik, berriz, laguntzak ebatzi eta kolektibo hartzaileei emateko epea laburtzea. Horregatik, kirol eta gizarte sare osoa gonbidatu nahi dut dirulaguntza hauek eskaintzen dituzten aukeren inguruan informatzera eta deialdian parte hartzera”, adierazi du Kirol eta Osasun zinegotzi Livia Lópezek.

346.500 euroko zuzkidura du kirolaren arloko 2021eko dirulaguntza-deialdiak. Udalaren webgunean kontsulta daiteke betebeharren eta aurkeztu beharreko dokumentazioaren inguruko informazioa.

Informazio gehiago: Kirolaren arloko 2021eko dirulaguntza-deialdia

Share