Prentsa Oharren banner
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  20 maiatza 2019 11:34

Afrikar etorkinen hamar elkartek osatutako partzuergoak antolatu du, Afrikaren Egunarekin lotuta, eta Kultura Sailaren laguntza du  

Gaur hasiko da “Afrikarrak Euskadin, 2019” Afrikaren Astearen II. edizioa, 19:00etan, Aldabeko gizarte etxeko ekitaldi aretoan, “Afrikar gazteak ekinean” emanaldiarekin. Maiatzaren 20ra arte askotariko jarduera-programa antolatu da horren barruan.

Kultura, Hezkuntza eta Kirol zinegotzi Estíbaliz Cantok aurkeztu du gaur, partzuergoko kide Abdourahamane Ba, Baba Ahmed Hamadi Embarec eta Lenda Akue-rekin batera. Sailak 5.200 euroko dirulaguntza eman du ekitaldirako.

Afrikaren aniztasuna ezagutarazteak hiriko bizikidetza hobetzea dakarrela jakitun, afrikar etorkinen zenbait elkarte sentsibilizazio-ekintzak antolatzen hasi zen iaz, Arabako GGKEen, Estíbaliz Cantok gidatzen duen Kultura, Hezkuntza eta Kirol Sailaren eta Garapenerako Lankidetzaren Euskal Agentziaren laguntzarekin.

Helburu hauek ditu ekitaldiak: pertsona eta talde afrikarrek Euskadin egiten duten lana ikusaraztea; gobernu erakundeak, enpresa pribatuak eta gizarte zibila oro har motibatzea horrelako ekimenei sostengu  eman diezaieten; Afrika, Araba eta oro har Euskadiko biztanleriaren arteko ezagutza eta bizikidetza osasungarria sustatzea; afrikar eta euskal kulturen ezagutza sustatzea, besteak beste, Afrikako artea, musika, dantza, moda tradizionala eta gastronomia ezagutaraziz; Euskadin bizi diren afrikar artisten arteko harremanak erraztea, elkarrizketa eta kultur eta arte trukeak ahalbidetzeko; hausnarketa eta pentsamendu kritikoa piztea, antolatutako topaketa eta eztabaiden bitartez, eta lankidetza eta elkartasun balioak sustatzen dituzten espazioak eskaintzea.

Horretarako, askotariko jarduera-programa erakargarria antolatu da, afrikarren eta afrikar jatorrikoen kultura mosaikoaren eta potentzialaren zati bat erakusteko.  Dantza eta musika lotuko dira. Antzerkiak, poesiak eta modak leku handia izango dute. Baita gastronomiak ere, sukaldaritza afrikarreko lantegi batekin. Afrikako aktibistek ere hartuko dute parte, zeinak gizaldeko kasuak salatzen eta ezagutarazten ari baitira, espainiar estatuko zenbait probintziatan dauden afrikarren migrazio-fluxuak, esaterako.

Emakume afrikarrek ere partaidetza aktiboa izango dute, “Arrastoa uzten duten emakume afrikarrak” erakusketaren bidez.

Iaz bezala, Gasteizen presentzia duten Afrikako herrialdeen arteko futbol txapelketa jokatuko da asteari amaiera emateko. Agenda arazoak direla eta, Gasteizko udaletxean egitekoa den erakunde ekitaldia ekainaren 10erako (astelehena) utzi da, eta orduan hartuko ditu alkateak hirian bizi diren afrikarrak.

Bestetik, Afrikultura jaialdia antolatu da, herritarren partaidetza bultzatzeko asmoz. Astearen helburuetako bat Afrikan gertatzen diren ezberdintasun eta bidegabekeriak ezagutaraztea eta horiei buruzko hausnarketa kritikoak sortzea da, informazio eta prestakuntza jardueren bitartez. Ildo horretatik, hitzaldiak, eztabaidak zein zine emanaldiak antolatu dira, Afrikako gaurkotasuneko zenbait gai jendaurrean argitzeko.

Bigarren ediziorako, Gasteizko afrikarren elkarteek partzuergo bat osatu dute, Arabako eta oro har Euskadiko herritarren artean Afrikaren irudi positiboa zabaltzeko xedez.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  17 maiatza 2019 12:24

Lehenak UPV-EHUrekiko hitzarmenarekin du lotura eta, bigarrenak, Proiektu Artistikoak programarekin; ekainaren 16ra eta 30era arte egongo dira ikusgai, hurrenez hurren 

Gaur aurkeztu dira Montehermoso kulturunean Raquel Asensiren “Erresistentzia Moldatu Gabea” eta Jon Gorosperen “Metropolis” erakusketak. Lehenak UPV-EHUrekiko hitzarmenarekin du lotura eta, bigarrenak, Proiektu Artistikoak programarekin. Kultura, Hezkuntza eta Kirol zinegotzi Estíbaliz Cantok, Raquel Asensi eta Jon Gorope egileek eta UPV-EHUko Arte Ederretako Fakultateko Dekanoa den Arantza Lauzirikak aurkeztu dituzte.

Raquel Asensiren “Erresistentzia Moldatu Gabea” MH – UPV-EHU programaren 2019ko deialdian hautatutako lanetako bat da.

Mundu zabalean zehar ekoizten diren plastikozko ontzi gehienak –eta minutuko milioi bat ontzi ekoizten da– ez dira ez birziklatzen, ez eta berrerabiltzen ere: lehorreko zabortegietara edo itsasora jaurtitzen dira. Erakusketa honetako pieza gehienak eskultura zeramikoak dira, modu anbibalente batean eder eta artifizial, leun eta agresibo, bigun eta gogor, efimero eta betiereko… Esperimentu gisa eginak dira, elementu plastiko, landare eta algekin. Guk geuk sortzen ditugun hondakinekin batera munduan dagokigun lekua birpentsatzeko saioa dira, lehen uste eta begiratuan aurkakoak diren elementuak uztartuz (esaterako elementu natural eta artifizialak), hain zuzen ere bizi dugun aldaketa postindustrial sakoneko garai hauetan.

Artistak materialak ikertzen ditu, eta sortzen diren piezek edertasun apaingarriaren eta iraultza edo transgresioaren arteko jolas anbibalentearen eragin handia dute. Asensiren erakusketan Cristina Arrázola-Oñatek egin ditu komisario-lanak.

Raquel Asensik (Barakaldo, 1989) Bilbon bizi eta lan egiten du. 2015an Zeramika, Artea eta Funtzioa masterra bukatu zuen, eta gaur egun doktoregaia da EHUko Eskultura Saileko “Ikerketa Arte Garaikidean” izeneko Doktorego Programan. Portzelanaren diseinuan diharduen Sargadelos lantegi galiziar entzutetsuan egin zuen praktikaldia. 2018ko ERTIBIL erakusketarako hautatu zuten eta BilbaoArte Fundazioaren ekoizpen-beka bat jaso zuen, bai eta Eusko Jaurlaritzaren Ikusizko Arteetarako dirulaguntza zenbait proiektutarako eskuratu ere. Gainera, sorkuntza eta ikerketa uztartzen dituen proiektu batean murgilduta dabil, perspektiba feministek 70eko eta 80eko hamarkadetan zeramikari loturiko praktika artistikoetan izan zuten eragina aztertzen. Bere ekoizpen artistikoa diziplinartekoa da; zeramikazko eskulturak, argazkigintza eta gorputz-ekintza uztartzen ditu. Informazio gehiago: www.raquelasensi.com

Erakusketaren iraupena: 2019ko maiatzaren 17tik ekainaren 16ra

KATALOGOA RAQUEL ASENSI

 

Jon Gorosperen “Metropolis” lana Proiektu Artistikoak programako 2018ko deialdian hautatutakoen artean dago.

Proiektu honetarako funtsean bi ikuspegi hartu dira: espazio publikoen erabilera ludikoa —eta horrek unibertso digitalean duen proiekzioa— eta irudien birziklatzea eta ekonomia. Hiri handiak erretratatzen dituzten ikusizko piezen bilduma izango da Jon Gorosperen proposamenaren emaitza materiala. Irudiak “Streetview” (Google-rena) eta “Total View” (Baindu baliokide txinatarrarena) aplikazioak baliatuz hartu dira.

Irudiek mosaiko handiak osatzeko balioko dute: lauki-sarean jarritako irudi-egitura trinkoak. Azkenik, hainbat liburuki —diseinu eta koadernatze berdinekoak— editatuko dira, artxiboaren, dokumentu antropologikoaren irudia indartuko dutenak. 

Jon Gorospe (Vitoria-Gasteiz, 1986) Oslon eta Gasteizen bizi eta lan egiten du. Gasteizko Arte eta Diseinuko goi mailako Eskolan graduatu zen, Artean, eta truke-programa Vilnius Faculty of Arts-en egin zuen (Vilnius, Lituania). Gradu amaierako lana, berriz, Maltan egin gauzatu zuen. Prestakuntza artistikoa hainbat egilerekin argazkigintza/artea ikasiz osatu du, hona hemen horietako batzuk: Pep Bonet Juan Valbuena, José Muñoz, Matías Costa, David Jiménez eta Xavier Rivas. Zenbait sari eta beka lortu ditu. 2018an VIPHOTO argazkigintza garaikidearen jaialdiaren lehen edizioa zuzendu zuen. Informazio gehiago: www.jongorospe.com.

Amaitzeko, gogoan izan MH –UPV/EHU programaren aurtengo edizioan proiektuak aurkezteko epeak zabalik dirauela ekainaren 2ra artean.

Katalogoa Jon Gorospe

Bi erakusketak gaur 20:00etan inauguratuko dira, eta kulturune osora hedatuko dira, baita atarira (Asensiren erakusketa )eta klaustroaren barnera ere (Gorosperen erakusketa). Iker de Aresti DJak girotuko du ekitaldia.

 

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  23 urtarrila 2019 11:33

ON:GIZ elkarteak antolatu du, eta aldez aurretik bi informazio-hitzaldi egingo dira urtarrilaren 30ean eta otsailaren 5ean, parte-hartzaileekin ordutegiak adosteko

20190123 liburuxka

Udalaren Hezkuntza Zerbitzuak —Estíbaliz Canto zinegotzia da buru— “Gure seme-alaben hazieraz eta hezkuntzaz arduratzen den aitatasuna eraikiz” lantegia antolatu du bigarren urtez, Udaleko haur-eskoletako zein Haurreskolak Partzuergoko 0 urtetik 3 urtera bitarteko haurren aitentzat.

Zinegotziak berak eta ON:GIZ elkarteko bi kideetako batek, Eduardo Portillak aurkeztu du gaur prentsaurrekoan; hain zuzen ere, elkarte horrek genero-berdintasunaren alde egiten du lan, gizonak bide horretan inplikatzeari bereziki erreparatuz.

“Denbora erabilerari buruzko inkestek berriro ere adierazten dute ugalketa-lana ez dela berdin banatzen gizon eta emakumeen artean, eta beraz, etxean eta zaintzan lan-zama eta erantzukizuna ez da parekidea. Hori galga handia da emakumeentzat, espazio publikoan ez ezik baita publikoan ere”, azaldu du Cantok, eta orobat adierazi du zen den ikastaroaren helburua: “aitek erantzukizun handiagoa hartzea umeen zaintzan eta hazieran, hausnarketaren eta prestakuntzaren bidez”.

Orotara 12 ordu iraungo du, eta otsailetik maiatzera bitartean egingo da, interesdunek zehazten dituzten egun-orduetan. Horretarako, aldez aurretik bi informazio-hitzaldi egingo dira:

  • Urtarrilaren 30ean, asteazkenez, 16:00etatik 17:00etara, Zaramagako haur-eskolan (Nafarroako Errege-Erreginen kalea, 16B)
  • Otsailaren 5ean, asteartez, 16:00etatik 17:00etara, Zabalganeko haur-eskolan (Ilustrazioaren hiribidea, 46).

“Ikastaroa eginez, interesdunek aita arduratsuak bihurtu ahalko dira, hori nahi badute, eta, batez ere, beren etxeak guztion artean eraikitzen ahalegintzen ari garen berdintasunezko gizartearen isla izango dira”, amaitu du Cantok. Orobat iragarri du ekimen hori ez dela bere sailak berdintasunaren alorrean prestatutako bakarra, 2018an hasitako proiektu pilotua errepikatuko baita otsailean, Zaramagako haur-eskolan, gizonek erantzukizun eta inplikazio handiago izan dezaten sustatzeko, eta Lourdes Lejarreta haur-eskolara zabalduko da.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  12 azaroa 2018 11:17

 

Kulturan, plan estrategikoa ezartzeko ia partida guztiak handituko dira, eta Principal eraberritzeko partida bat sortuko da.

Kultura, Hezkuntza eta Kirol zinegotzi Estíbaliz Cantok gaur aurkeztu duen aurrekontuak % 14,11ko hazkundea dakar iazkoaren aldean, eta hark zuzentzen dituen hiru zerbitzuetan aurreko ekitaldiko goranzko joerari eusten dio. Zehazki, 17,8 milioitik 20,3 milioira igaroko da.

Cantok adierazi duenez, “aurrekontua aurreko ekitaldietakoa baino hobea da objektiboki, ia partida guztiak handitzeaz gain, kualitatiboki ere hobea delako, hezkuntza komunitatearekin, kirol federazioekin eta kultur eragileekin egindako lanari esker”.

Gainera —erantsi du—, kulturari dagokionez aurreko garaietako maila pixkanaka berreskuratzeko eragileekin hartutako konpromiso politikoa du aurrekontuak, Gasteiz kirolaren hiria bihurtzeko konpromisoa, eta hiri hezitzaile gisa erreferentea izaten jarraitzekoa”.

 

Kultura

Kulturarako aurrekontuaren filosofia da “ia partida guztiak handitzea edo aurreko aurrekontuetan handitutakoak mantentzea, plan estrategikoa ezarri eta abiarazteko lanaren ondorioz, zerbitzu osoari eragiten baitio”.

Zinegotziak lau zatitan banatu du:

 

  • Kultura Plan Estrategikoaren partida orokorrak 40.000 euro gehiago izango du, 90.000 euro guztira.
  • Egitura eta kudeaketa programak: Montehermoso kulturuneak 50.000 euro gehiago izango du; Musika Eskolak, 60.000 gehiago; Dantza Kontserbatorioak, 15.000 gehiago; Musika Bandak, 9.000 gehiago, eta liburutegiek, 27.000 euro gehiago. Aurreko urteetan handitutako partidak mantendu egingo dira.
  • Kultur eragileek antolatutako jarduerak finantzatu eta laguntzea: zertxobait handituko dira zenbait partida, hala nola Valentin de Foronda Fundazioarena, World Presss Photorena, Argazkilarien Elkartearekiko hitzarmenarena, Teatro Paraísorena, Baratza Aretoarena, Fernando Buesa Fundazioarena, eta Inauterietako konpartsentzako deialdiarena (6.000 euro handituko da hirugarrenez). Bost alderdi nabarmendu behar  dira bereziki:
    • 25.000 euroko hazkundea blusa eta nesken elkarteekiko hitzarmenerako.
    • 14.000 euro gehiago liburu-saltzaileekiko hitzarmenerako, Gasteizek merezi duen mailako liburu-azoka egiteko.
    • 25.000 euroko hitzarmena sortzea Lumagorrirekin, Gasteizek merezi duen mailako Harrotasunaren Eguna egiteko.
    • 10.000 euro gehiago lurralde etxeekiko hitzarmenerako.
    • Lau hitzarmen sortzea sendotuta dauden jaialdiekin: Poetak maiatzean, Big Band, Korterraza eta inTacto, eta horien partida 15.000 euro handitzea. Hartara, diru-laguntzen deialdia, zeina 0 eurotik 175.000 eurora igaro baitzen hiru urtetan, aurten ez da handituko, baina 45.000 gehiago izango ditu aurkezten diren proiektuen artean banatzeko.
  • Principal antzokia eraberritzeko partida bat sortuko da, laster aurkeztekoa den  azterlana ezagutu eta aldeek finantzatzeko era erabaki arte. “Gobernu honen borondate politikoa eraberritzea da, jakina”, adierazi du Cantok. Bestetik, Antzoki Sarearen aurrekontua 40.000 euro haziko da.

 

Kirola

Kirol Zerbitzuari dagokionez, zinegotziak hiru bloke nabarmendu ditu.

Lehenengo eta behin, kirol-instalazioak hobetzeko bi milioi euro baino gehiago erabiliko dira, hainbat sailetan banatuta eta Kirol Zerbitzuak koordinaturik.

Saskibaloiko Erreginaren Koparako 60.000 euroko partida erreserbatuko da, eta inbertsioek Mendizorrotzeko estadioan izango dute eragina. Horrekin lotuta dago emakumeen kirolaren aldeko apustua, besteak beste, Araskirekiko hitzarmena 20.000 euroan handitzeko.

Azkenik, beste hitzarmen batzuk pixkanaka handitzen ari dira (Zuzenak, Apdema, Autismo Araba, Araberri eta Bola Jokoaren Federazioa), baita kontratu eta programa batzuenak ere: kirol-instalazioak, udako kirol esparruak, kirol entitateekiko lankidetza, kirol ekintzen gastuak, kirol jardueren programa, txirrindularitza itzulia, “Kirol bidean” gazteentzako programa eta kirol materialak.

 

Hezkuntza

Hiri Hezitzailearekin lotutako programak handitzeaz eta politika hori garatzeko filosofia sustatzeaz gain, 90.000 euroko partida sortuko da segregazioaren kontra borrokatzeko.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  30 urria 2018 08:47

Kontratua bi multzotan banatu da, eta interesa duten enpresek azaroaren 12ra arte aurkeztu ahalko dituzte eskaintzak

Joan den ostiralean, Tokiko Gobernu Batzarrak kontratazio-dosier berria onetsi zuen Udalaren rokodromoetako jarduerak eta zerbitzua gauzatzeko, 2019ko urtarrilaren 1etik uztailaren 31ra arte. Halaxe jakinarazi du gaur Kultura, Hezkuntza eta Kiroleko zinegotzi Estíbaliz Cantok.

Interesa duten enpresek azaroaren 12ko 13:00etara arte aurkeztu ahalko dituzte eskaintzak. Hona hemen baldintza-agiriaren xehetasunak:

 

  • Salburuko gizarte etxeko rokodromoa sartu da.
  • Kontratuak urtarrilaren 1etik uztailaren 31ra arte iraungo du, irailaren 1etik abenduaren 31ra arte luzatzeko aukerarekin —abuztua ez da sartzen, baliogabea baita—.
  • Bi multzotan banatu da, entitate gehiago erakartzearren edo entitate bakarrak kontratu osora aurkezterik izan dezan, Sektore Publikoko Kontratuei buruzko Legearen ildotik.
    • multzoa: instalazioa irekitzea erabilera librerako, eta horri dagozkion mantentze-lanak.
    • multzoa: hiru motarako udal ikastaroak: eskola kirola, topaketak eta hastapenak. Ikastaro gehiago izango dira, Salburuko rokodromoan hastapenetako berariazko ikastaroak eta topaketak eskainiko baitira.
  • Hiru instalazioak irekitzeko orduak zehaztu dira; lehiatzaileek, berriz, ezagutza teknikoak eskaini eta irekitzeko ordutegia osatu beharko dute, ordu kopuru jakin bat bete arte.
    • multzoa: 4.842,30 ordu.
    • multzoa: 456 ordu.
  • Orobat, orduko prezioa ezarri da administrazioek eskatutako kirol jardueretako; hartara, entitateei segurtasuna ematen zaie, eta berariazko informazioa ematen da beste baliabide ekonomiko batzuk lortzeari buruz.
    • Orduko prezioa 22,97 euro da, BEZik gabe. Lehen 19,85 euro ziren.
  • Entitate adjudikaziodunak oinarrizko mantentze-lanak egin beharko ditu, eta berrikuntza nahiz inbertsio premiak identifikatzeko txostenak landu, Udalak horien egokitasuna balioetsi eta gastua bere gain har dezan, aurrekontu erabilgarririk bada.
  • Kirol materiala erosteko diru-kopurua kontratuaren tipologia eta iraupenari egokitu zaio.
  • Udalaren kirol eskaintza definitu da, eta gauzatzeari dagokion zenbatespen
  • Era berean, beste baliabide ekonomiko batzuk lortzeko aukera aipatzen da, Udalak gainbegiratu eta baimenduta, udal eskaintzaren osagarri diren kirol jardueren bidez.
  • Lehiatzaileei segurtasun ekonomikoa ematen zaie, gastua eta sarrerak identifikatuz.

 

Ixteko arrazoiak

Baldintza-agiria aurkezteaz gain, Kirol Zerbitzuko zinegotziak zerbitzua bertan behera uzteko zituzten arrazoiak azaldu nahi izan ditu: “esan denaren kontra, aurkeztu zen enpresa bakarrak eragotzi egin zuen juridikoki kontratua hari ematea, eskatutako orduak gainditu zituztelako”.

Horren haritik, hau erantsi du Cantok “kontuan izan behar da Udalak ezin dituela baldintza-agiriak enpresekin negoziatu, eta 2.000 ordu gehiago fakturatu nahi izatea zilegi den arren, ezin  da exijitu, bezeroa Udala baita. Guk  orduak handitu ditugu, eta are garrantzitsuago, langileengan eragin zuzena izango baitu, fakturatutako ordua 2 euroan igo dugu”, azpimarratu du.

Bestetik —erantsi du—, zerbitzua pixkanaka pribatizatzea leporatu digute, eta hori ez da egia, kontratu eredu honek 15 urte baitarama indarrean. Nolanahi ere, etorkizunean emakida bat egitea da gure asmoa, kudeaketa hobea izango baita, jende gehiagorengana iristearren”.

Bukatzeko, irmo agertu da: “gobernu honek eskaladaren aldeko apustua egiten du, eta horren froga dira hirugarren rokodromoa eraiki izana, baita kirol horri ikusgarritasun handiagoa emateko eta jende gehiago erakartzeko egiten ari garen ahalegina ere. Udalarentzat ez da atsegina izan zerbitzua itxita edukitzea, baina baldintza-agiri honekin berriro segurtasunaren alde egiten dugu berez inguruetako rokodromo seguruenetan, orduak era planifikatuan handitzearen alde, eta orduko prezioa handitzearen alde, eta zerbitzua berriro irekiko da urtarrilaren batean”.

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  10 urria 2018 13:57

Ogasun Batzordeak ontzat eman du EAJ-PNV, PSE-EE eta EH-Bildu taldeek lortutako akordioa, Adurtza, Abetxuku eta Astronomoetako futbol-zelaiak zein Beti Jai pilotalekuak eraberritzeko. 2019ko aurrekontuan 2.500.000 euro sartzea ahalbidetuko duen zuzenketa adostu bat bozkatu dute, lan horiek konpromiso-kredituaren bidez gauzatu ahal izateko. Datorren urteko lehen hiruhilekoan idatziko dira lanak kontratatu ahal izateko proiektuak; kirol taldeek berek erabakiko dute horien garapena eta lehentasuna, horretarako sortu den jarraipen-batzordean, lehiaketei albait gutxien eragiteko moduan.

“Hiriak aurrera egin dezan akordioak lortzeko gauza garela erakutsi da berriro. Duela egun gutxi, zerga-ituna lotu genuen borondate horri esker, eta gaur beste akordio bat onetsi dugu, zeinak bultzada handia emango baitio kirol-instalazioetan egiten ari garen inbertsio-ahaleginari. Agintaldi honetan dagoeneko hiru milioi eurotik gora erabili dugu xede horretarako, aurreko gobernuak baino gehiago. Akordio honen bidez, abiadura handiagoa hartuko  dute Gasteizen ezaugarri behinenetakoa den ekipamendu-sarea eguneratzeko lanek”, adierazi du Ogasuneko zinegotzi Itziar Gonzalok.

Kultura, Hezkuntza eta Kirol zinegotzi Estíbaliz Cantok ere positibotzat jo du gaur Ogasun Batzordean emandako pausoa. “Gobernu honek akordioak lotzen ditu, eta lan egiten du halaber; izan ere, bultzada ekonomikoa ahalbidetzen duen itun hau bi urteko geldialdiaren ondoren instalazioetan egiten ari ginen inbertsioari gehitzen zaio, beraz, poztu besterik ez dugu. Lehen urratsa da kirol politikan urratu nahi dugun bidean, Gasteiz kirolaren hiriburua bihurtzeko”, azpimarratu du.

Udalak AMVISA udal sozietatearen bitartez handituko ditu hiru futbol-zelai eta Beti Jai pilotalekua eraberritzeko plana abian jarri ahal izateko behar diren diru-sarrerak.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  9 urria 2018 11:51

Liburutegien Egunaren harira egingo da ekitaldia, eta bost liburu trukatu ahalko dira pertsona bakoitzeko

 

Urriaren 20an eta 21ean egingo da Liburuak Trukatzeko X. Azoka, Iradier Arenan. Gaur aurkeztu du Kultura, Hezkuntza eta Kirol zinegotzi Estíbaliz Cantok urriaren 24an ospatzen den Liburutegien Egunaren harira egitekoa den azoka.

Cantoren ustean, “Azokak irakurtzearen plazera sustatu nahi du liburu-trukearen bitartez, baita liburutegi-sarearen zerbitzuak sustatu eta ezagutzera eman ere. Horrez gain, modu egokia da etxean ditugun liburutegiak eguneratzeko”.

Aurtengoan, eutsi egingo zaie 2016ko bi berrikuntza nagusiei: batetik, bost liburu trukatu ahalko ditu pertsona bakoitzak, eta bestetik, helduentzako literaturaren alorrean, hiru kategoria egongo dira: 2011ren ondorengo argitalpenak, 2000tik 2010era arteko argitalpenak, eta 1999aren aurreko argitalpenak.

Horrez gain, bi sail handi egongo dira: helduentzako eta haurrentzako liburuak. Ez da era hauetako materialik onartuko: aldizkariak; entziklopediak; bideoak; DVD eta CDak; testuliburuak; unibertsitate-liburuak; informatikari buruzko liburuak edo teknikoak; liburu azpimarratu, hautsi edo egoera txarrean daudenak; ale solteak; bidaia-gida;, geografia-liburuak, etab.

Zenbait jarduera antolatu dira trukea sustatu eta animatzeko.

  • 5.000 liburu baino gehiago eramango dira, trukerako.
  • Zuzeneko musika ere izango da, Clave Duo taldearen eskutik. Deborah Crivellare abeslariak (Brasil) eta Gaetan de Backer gitarra klasikoaren jotzaileak (Belgika) osatzen dute, eta Brasilgo klasikoak, bossak eta baladak joko dituzte. Larunbatean (urriak 20), 12:30etik 14:00etara eta 18:30etik 20:00etara.
  • Irakurketarekin lotutako haurrentzako lantegiak eta ipuin kontalariak izango dira.
    • “Zure aurpegia liburu bat da”, Iñaki Carreteroren eskutik (urriak 20, larunbata, 11:15etik 13:45era). Ele bietan.
    • “Istorioak gordetzeko tresna: liburuak”, Iñaki Carreteroren eskutik (urriak 20, larunbata, 17:45etik 20:15era). Ele bietan.
    • Cola de Perro : Marta C. Dehesaren eta haren taldearen eskutik, adin-tarte ezberdinetarako bi lantegi (urriak 21, igandea, 11:00etatik 12:30era):
      • Gazte eta helduentzat: “Ilustramatoia: erretratu makinatxoa”.
      • 5 urtetik 12 urtera bitarteko haurrentzat: “Gasteiz HIRI TXIKIA”. Gogoan izan 5 urte beherako umeek heldu batek lagunduta egon behar dutela lantegian parte hartzeko.
    • “Ipuinen lapikoa”, Izaskun Mujikaren eskutik. Ipuin kontaketa euskaraz (urriak 21, igandea, 12:45etik 13:45era).

 

Azokaren ordutegia:

Trukearen ordutegia:

  • Urriak 20, larunbata, 11:00etatik 13:45era eta 17:30etik 20:15era.
  • Urriak 22, igandea, 11:00etatik 13:45ean.

Jardueren ordutegia:

  • Larunbatean, hilak 21: 11:00etatik 14:00etara eta 17:30etik 20:30era.
  • Igandean, hilak 22: 11:00etatik 14:00etara.

2017ko datuak

2017an, 2.885 pertsonak hartu zuten parte, eta 7.639 liburu trukatu ziren (aurreko urtean baino 820 gehiago). Atalen arabera, 4.275 liburu helduen literaturakoak izan ziren; 790, helduentzako gaiei buruzkoak, eta 2.574, haur eta gazteentzako literaturakoak.

Share
Kategoriak: Prentsa oharrak  —  Etiketak: , , ,   —  Komunikazio Zerbitzua / Servicio de Comunicación  —  27 iraila 2018 12:52

2018ko proiektu artistikoen deialdian hautatutakoetatik jendaurrean jartzen den lehen lana da

2018ko proiektu artistikoen arteko lehena, Ainhoa Akutainen “lúcu_lúcu (ikusi, begiratu)”, iralaren 28tik azaroaren 18ra arte egongo da ikusgai Montehermosoko lehen solairuan.

Kultura, Hezkuntza eta Kirol zinegotzi Estíbaliz Cantok eta egileak berak aurkeztu dute gaur prentsaren aurrean.

Cantok nabarmendu duenez, programaren xedea da “tokiko artisten proiektuak landu, erakutsi eta zabaltzea, horien bitartez jardun artistiko garaikidearen alorrean lantzen ari diren lengoaia eta diskurtso berriak ezagutarazi eta horietaz hausnartzearren”.

“Lúcu_lúcu (ikusi_begiratu) lanak espazio bizituaren eta espazio eraikiaren arteko zirrikituetan miatu nahi du, abiapuntu hartuta eskulturaren berezitasunekiko konpromisoa, betiere eskultura ulertzen dugularik zentzu zabalean, eta ulertzen dugularik, baita, sormen-prozesu gisa, zeinaren praxi diferentziala osotasun baten zatien arteko prozesu dinamikoak eta eraldaketa-aukerak errekonozitzeko ahalmenaren berdefinizio etengabetik eratortzen den.

Artistak leku bakoitzean aurkitzen dituen baliabideek elikatzen dute proiektua, eskultura, argazkia, bideoa eta idatzizko lanak zein grafikoak txertatuz, eta hizkuntzaren, zeinuaren eta gizarte errepresentazioen artean tartekatzen den distantziari erreparatuz.

Ibilbide horretan, pidginaren bitartez sakonduko da deskribatutako tentsioa. Pidgina hizkuntza ez-perfektua da eta, hala ere, pragmatismoaren paradigma. Pidginak lekua izan zuen euskal arrantza-tradizioan, eta baita, beste leku batzuen artean, Kuban ere, han bozal izenpean; bozala “adierazpen-gaitasunik gabeko beltzen alterazio linguistikotzat” jotzen zen. Alabaina, bozalak hautsi egiten zituen eredu genealogiko indoeuropar tradizionalak: beste horietan ez bezala, egitura zein moldeen sistematikotasun eza nabaritzen da bozalean, mestizaia linguistikoak berezko duen transmisio-prozesua eten izanaren ondorioz.

Azken batean, pentsamendu nagusi eta menderatzaileari molde alternatibo bat esleitzen dion (de)formazio bat da, haren interrogazioa, alegia.

Azalpenekiko bisitak ere egin ahalko dira: irailaren 28an, 20:00etan, egileak berak emango ditu azalpenak; urriaren 6an eta 11n eta azaroaren 3an eta 9an, Montehermosoko hezitzaile taldeak.

Ainhoa Akutain,

Eskulturako doktorea da, EHUtik. Artean aritzeaz gain, artearen irakasle eta ikerlaria ere bada. Zenbait beka eta sari nazional zein nazioarteko jaso ditu; beken artean nabarmentzekoak dira Eusko Jaurlaritzaren bi (ikerlarien prestaketa sustatzekoa, eta sormenaren aldekoa), Bizkaiko Foru Aldundiarena eta Etxepare Euskal Institutuarena. Sarien artean, berriz, aipatzea merezi dute Grand Prix de la Découverte, EAC Uruguay, Arte Laguna Prize, The Story of The Creative, Stockholm Fringe Festival eta IPA International.

Akutainek banakako erakusketak egin ditu, eta kolektiboetan parte hartu izan du, arte-zentro nazional eta nazioartekoetan, esaterako hauetan: Veneziako Arsenale, Montevideoko Espacio de Arte Contemporáneo, New Yorkeko Angel Oresanz Foundation, Bartzelonako Disseny Hub, Londresko Asia House eta PIAF – Peckham International Art Fair, Miamiko ArtBasel, Stockholmeko Kulturhuset, besteak beste.

 

 

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  25 iraila 2018 11:57

Jarduera horietako 37 euskaraz izango dira, 38 gaztelaniaz eta bi ingelesez;  Paul Urkijorekiko solasaldia nabarmentzen da, Errementari sortzeko prozesuaren berri emango baitu.

 

Gazte eta helduentazko jarduerak-1

Haur eta familientzako jarduerak-2

Kultura, Hezkuntza eta Kirol zinegotzi Estíbaliz Cantok  Udalaren Liburutegi Sareak  irakurtzeko zaletasuna lantzeko urritik abendura bitartean eskainiko  duen programa aurkeztu du gaur prentsaurrekoan; orotara 77 jarduera barne hartzen ditu: 37 euskaraz, 38 gaztelaniaz eta bi ingelesez

Cantok azaldu duenez, “programaren helburua da herritarrak Udalaren Liburutegi Sareak dituen espazio eta zerbitzuetara hurbilaraztea eta irakurtzeko ohitura hartu eta sendotzen laguntzeko tresna dinamizatzailea izatea“.

2018ko urrian, azaroan eta abenduan garatuko da programa, gizarte etxeetako liburutegietan, eta haur, familia, gazte eta helduentzako jarduerak biltzen ditu.

Batetik haur eta familientzako jarduerak ditugu, euskaraz eta gaztelaniaz (ipuin-kontalariak, lantegiak, antzerkia, pailazoak, txotxongiloak, musika); bestetik, gazte eta helduentzako jarduerak.

Umeekin eta familiekin batera hainbat alderdi landuko dira: adiskidetasuna, dibertsitatea, desberdinarekiko sentiberatasuna, tolerantzia, artea, jolasa, musika, zientzia, poesia, genero berdintasuna, jakin-mina eta irudimena.

Gazte eta helduentzako jardueren artean idazleekiko topaketak izango ditugu, irakurketa-klubak, hitzaldiak, lantegiak, antzerkia, ipuin kontalariak, musika, bakarrizketak eta errezitaldiak.

Karmele Jaiok koordinatzen duen “Idazleekin solasean” programan Miren Gorrotxategik eta Xabier Etxeberriak hartuko  dute parte. Susana Rodríguez Lezaun, Charo Poletinos eta Laura de la Sernak ere emango dituzte hitzaldiak, gaztelaniaz. Nabarmentzekoa da Paul Urkijorekiko solasaldia, Errementari sortzeko prozesuaren berri emango baitu; Miren Amurizak, Oihana Bartrak eta Urtxintxak berdintasunaz eta emakumeak letren munduan ikustarazteaz hitz egingo dute, eta Indie letra kolektiboa autoedizioaz mintzatuko da.

Horretaz gain, emanaldiak, irakurketa-klubak eta irakurketa errazeko kluba  izango dira; Álvaro Arbinak gidatzen duen literatura garaikideari buruzko kluba ere itzuliko da.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  17 iraila 2018 11:26

 

 

 

 

 

 

 

Emankizuna irailaren 19an izango da, asteazkenean, Principal antzokian, eta bertan Julio Roca ospetsua sarituko da.

Esku-programa

Datorren asteazkenean, hilaren 19an, Urrezko Zeledonen saria emateko ekitaldia izango da Principal antzokian. Aurtengoan Julio Rocari emango zaio saria, eta, berriro ere, Udal musika Bandaren emanaldia izango da tartean.

Prentsaurreko eman dute gaur goizean Kultura, Hezkuntza eta Kirol zinegotzi Estíbaliz Cantok, Udal Bandaren zuzendari Hilario Extramianak eta Urrezko Zeledonak elkartearen lehendakari, Josemari Vélez de Mendizábalek.

Udal Bandak emango duen kontzertuak José Mardones abeslari arabarra (baxua) omenduko du. Gasteizko Adopziozko Seme izendatu eta 1932an zendu zen abeslaria munduko baxu liriko onentzat zuten bere garaian.

Horrez gain, kontzertuaren amaierak beste omenaldi bat ekarriko du, oraingoan Zeledon kalejirari; abuztuaren 2an jaiotzaren mendeurrena bete zen Mariano San Miguel Urzelay izan zen haren egile.

Kontzertu bitartean, Urrezko Zeledona emango zaio Julio Rocari. Epaimahaiak ebatzi du saria merezi duela, batetik, egin duen ekarpen zabal eta joriagatik, garrantzizko kultur, kirol eta gizarte ekimen guztietan izaten baita, argazki kamera beti alboan, eta bestetik, kirolaren bitartez gizarte-integrazio eta -normalizazio lanean diharduen Zuzenak Fundazioaren zuzendari gisa aritzeagatik.

Share

Aurrekoak »