Prentsa Oharren banner

300 atletak baino gehiagok hartuko du parte Gasteiz Duatloiaren I. edizioan

Kirol ekitaldien tokiko egutegian beste hitzordu bat dugu: urriaren 10ean Gasteiz Duatloiaren I. edizioa egingo da. Probak ikusmina sortu du, izan ere 300 pertsonak baino gehiagok eman du izena (federatuen kategoriakoak eta kategoria herrikoikoak batuta). Zazpi autonomia erkidegotako duatletek baieztatu dute oraindik dortsalak dituzten ekitaldi batean parte hartuko dutela, eta izena emateko epea urriaren 4an amaituko da.

Duatloi sprint distantziako Arabako txapelketa izango da, hau da, bost kilometro lasterka, 20 kilometro bizikletan, eta 2,5 kilometro oinez. Ibilbidea Salburuan zehar izango da. Buesa Arenatik irten eta bi buelta eman beharko zaizkio korrika 2,5 kilometroko zirkuituari.

Bizikleta gaineko proba sei kilometro baino zertxobait gehiagoko zirkuitu batean egingo da, eta 3 itzuli eman beharko zaizkio. Zurbanoko atearen ingurutik, Hezeguneen ibilbidetik eta Betoñuko industrialdetik igaroko da.

Kategoria herrikoiaren kasuan beste distantzia batzuk dira: 2,5 kilometro korrika (buelta bat zirkuituari), 13,4 kilometro bizikleta gainean (zirkuituari bi buelta) eta 2,5 kilometro korrika  (zirkuituari buelta bat).

Kirol eta Osasun zinegotzi Livia Lopezek aurekztu du Gasteizko lehen duatloia, eta berarekin izan dira probaren antolatzaile eta laguntzaileak: Mikel Garcia, La Blanca klubeko presidentea; Ander Pérez, Triatlon LEA La Blancako zuzendari teknikoa; Urko Herrán triatleta;  Ana del Val Kirol eta Kultura diputatua; eta Axier Urresti Vital Fundazioetako zuzendari exekutiboa.

Livia Lopezek azpimarratu duenez, Gasteiz Duatloiaren I. edizio hau kirola bizi duen hiriaren  beste erakargarrietako bat bihurtzen da, bereziki kaleko kirola, kirolerako  garairik onenetakoan. “Bakakigu pandemiak baldintzatu egin duela lehen edizio honen zirkuitua diseinatzeko, eta prebentzio-neurriak hartzeko orduan, baina, zalantzarik gabe, probak gorantz egingo du” adierazi du Kirol eta Osasunaren zinegotziak.

Federatuen mailan 250 pertsonak eta kategoria herrikoian 100 pertsonak hartuko dute parte, Covid-19ari dagozkion segurtasun-neurri guztiak beteko dituen ekitaldi honetan, Kategoria herrikoian 10:00etan abiatuko dira, eta federatuak bi ordu beranduago, hau da, 12: 00etan. Boxen gunea Buesa Arenaren kupularen azpian egongo da, eta parte-hartzaileak eta akreditazioa dutenak bakarrik sartu ahalko dira bertara. 14: 00etan amaitzea aurreikusten da.

Informazio gehiago: Web Duatlón Vitoria-Gasteiz

Share

Gizarte etxeek 2.657 jarduera eta 29.510 leku eskainiko dituzte

Gizarte Etxeen zinegotzi Borja Rodriguezek eta Osasun eta Kirol zinegotzi Livia Lópezek Gasteizko gizarte etxeen sarearen 2021-2022 kanpainarako jarduera eta ikastaroen programa aurkeztu dute gaur goizean, prentsaurrekoan. Jardueretan covid-19aren prebentziorako protokoloak errespetatu arren, denboraldi honetan izena emateko eta plazak zozketatzeko ohiko sistemari berrekiteko asmoa dute gizarte-etxeek. Horrela, udal sailek gaur egungo testuingurura egokitutako kultura, hezkuntza, kirol, osasun eta gizarte programazioa diseinatu dute.

“Gizarte-etxeen sarea ezinbestekoa da gasteiztar askorentzat, hurbileko ekipamendu eta zerbitzuak eskaintzen baititu. Aurtengo programazioa gaur egungo testuinguruan ahalik eta seguruena izateko egokituta dago oraindik, eta ziur gaude, udal teknikarien ahaleginarekin, arrakastatsua izango dela berriro gure hiriarentzat eta bertako biztanleentzat “, nabarmendu du Gizarte Etxeen zinegotzi arduradun Borja Rodríguezek.

Guztira, programak 546 mota ezberdinetako jarduerak barne hartzen ditu; eta lehen hiruhilekorako eskaintzan 2.657 talde eta 29.510 leku sartzen dira guztira; konparagarria den azken urtean (2019) baino 396 talde gehiago izango dira, baina ia 6.000 plaza gutxiago, espazioen edukiera murriztearen ondorioz. Zerrenda udalaren webgunean dago eskuragarri, eta gizarte-etxeetan bertan egongo da ikusgai. Iaz erabaki zen bezala, informazio-liburuxka ez da inprimatuko, jasangarriagoak izateko eta paper-gastua murrizteko.

Baina leku gehienak esleitzeko ohiko sistema bai, itzuliko da. Zehazki, uztailaren 15ean irekiko da izena emateko epea, eta irailaren 2ra arte egongo da zabalik. Irailaren 3an egingo da zozketa, 11:00etan, eta egun horretako 12: 30etik aurrera irailaren 7ra arte ordaindu ahalko da matrikula. Denbora hori igarotakoan, plaza libre geratuko da.

Beste jarduera batzuetan, berriz, izena emateko ordenaren araberako esleipen-sistemari eutsiko zaio: euskara, berdintasuna, irakurketa klubak, kirol eta kultur jarduera batzuk eta adinekoen kultur zentroetako ikastaroak.

Prebentzioari dagokionez, berariazko neurri ugari hartu dira, eta hartzen jarraituko da, hala nola edukiera edo zirkulazioa kontrolatzea eta desinfektatzea. Zentroetara sartzeko, indarrean dauden osasun-arauak bete beharko dira, orain arte bezala: barnealdeetan maskara nahitaez erabiltzea, distantziak mantentzea eta eskuak maiz garbitzea. Gainera, baliteke erabilitako eremua desinfektatu behar izatea ikasleek edo/eta irakasleek, saioa bukatzean. Halaber, jarduera batetik bestera gutxienez 15 minutuko tartea utziko da, sarrera eta irteeretan jendea gurutzatzea ekiditeko eta lekuak aireztatzeko. Bestetik, kirol-jardueretan ezinbestekoa izango da eskuoihal eta ur-botila indibidualak erabiltzea, eta kaleko oinetakoen ordez kirol-oinetakoak janztea.

Murrizketa guztiak gorabehera, eskaintzak ez du bistatik galduko helburu nagusia: aisialdi-ohitura osasungarriak sustatzea, Gasteizko herritarren bizi-kalitatea hobea izan dadin.

Ikastaroetako izen-emateak azkar eta eroso ordaindu ahalko dira, edozein banketxetako kreditu- edo zordunketa-txartelaren bidez. Prezioei dagokienez, % 40ko murrizketa izango dute abonatuek, euskara-ikastaroetan izan ezik, horiek beste murrizketa-irizpide batzuk baitituzte. Era berean, langabezian daudenek % 15eko murrizketa gehigarria izango dute.

 

Ia 15.000 plaza kirol-jardueretan

Datorren ikasturterako kirol-programazioaren eskaintza iazkoa baino nabarmen handiagoa da —plazen % 53 gehiago—, osasun-egoeraren ondoriozko mugek baldintzatzen duten arren. Guztira 73 jarduera desberdin eta 14.699 plaza prestatu dira, eta honela banatzen dira adin-tarteen arabera:

 

  • 3.114 plaza haurrentzat.
  • 338 plaza gazteentzat.
  • 8.697 plaza helduentzat.
  • 895 plaza adin guztietarako (jarduera irekiak).
  • 1.695 plaza adineko pertsonentzat.

 

Livia Lopezek Udala pandemiaren aurreko kirol eskaintza maila berreskuratzeko egiten ari den etengabeko ahalegina azpimarratu du, egungo murrizketek ahalbidetzen duten neurrian. “Oraindik ere beharrezkoa da edukiera kontrolatzea, instalazioen barruko zirkulazioa antolatzea, jarduera-saioen artean lekuak egoki aireztatzea, pertsonen arteko distantzia mantentzea eta ezarritako babes- eta higiene-neurriak hartzea. Hala ere, kirol-jardueren programazioa aurrera ateratzeko lan egiten duten pertsona guztien dedikazioak eta herritarren jarrera arduratsuak aukera ematen digute kirola modu seguruan egiteko gero eta aukera gehiago izateko. Eta hori lorpen kolektibo handia izaten ari da”, adierazi du.

Segurtasunari dagokionez garrantzitsua izango da programazio osoan bermatzea gutxienez ordu laurdeneko aireztapena izatea kirol-saio baten eta beste baten artean, prebentzio-neurri eraginkorrenetako bat delako.

Joan den urtearekin alderatuta bada berreskuratu den beste alderdi bat, berriro ere hiruhilekoak izango baitira horietako batzuk. Oro har, kirol-eskaintza hiru hileko, bi hileko eta hileko jardueratan banatuko da.

Berrikuntzen atalean, gazteentzat pentsatutako bi jarduera datoz: eskalada eta haurrentzako abentura (8 eta 14 urte bitarteko adingabeentzat), eskalada, boulder jarduerak eta Salburuko rokodromoko abentura parkeak eskaintzen dituen aukerak konbinatzen dituena, eta G-PUMP (gazteentzat), lan aerobikoa eta muskulazio ariketak bateratzen dituena koreografia espezifikoak erabiliz.

Azken urtean gertatu den bezala, kirol-programazioa dinamikoa izango da, eta osasun-egoeraren bilakaeraren arabera egokituz eta berrituz joango da, edukierei dagokienez, esaterako.

 

3.452 leku praktika artistikoan

Udalaren kultur eskaintzaren barruan, praktika artistikoan hasteko ikastaroak nabarmentzen dira. Guztira, 292 ikastaro eskaintzen dira, 120 espezialitate desberdinetakoak haur, gazte eta helduentzat. Zozketarako 3.452 plaza eskainiko dira, eta hiruhileko guztien batura 8.539 plaza dira. Hona hemen berrikuntza batzuk: dantzaren alorrean, swing, dance hall edo bollywood dantza; eskulanetan, brodatu sortzailea; haurrentzako ikastaroetan, arkitektura eta arte laborategia edo antzerkiaren bidez irakurzaletasuna sustatzea; lehen aldiz euskaraz eskaintzen diren ikastaroak, hala nola dantza flamenkoa edo idazketa sortzailea; eta beste berrikuntza batzuk, hala nola antzerki-podcastak edo umorezko bakarrizketen ikastaroa. Ikastaroen % 33 euskaraz eskaintzen da, eta ehuneko hori % 75era iristen da haurrentzako ikastaroetan.

2021-2022 kanpainan, kultur ikastaroak ere eskainiko dira: espezialistek emandako kultur ikastaro teorikoak izan ohi dira horiek, eta herritarrek kulturaren hainbat alorretako ezagutzak era didaktikoak eskuratzea dute helburutzat. Guztira 17 ikastaro antolatu dira martxan, eta eskainitako plazak 355 dira. Azpimarratzekoa da irakasleen lanbide-prestakuntza, kasu guztietan adituak baitira ematen diren gaietan, hala nola Juan Ibarrondo idazle eta kazetaria, Jasone Arrausi edo Ricardo Garay arte-historialariak, La Otra Mitad astronomia elkartea, Egoitz Conte edo Sandra Masiá arkitektoak, Alejandra Spagnuolo musikaria eta Jorge Barrio zinema-ekoizle eta zuzendaria.

Bestalde, Udal Liburutegien Sareak irakurzaletasuna sustatzeko jarduera ugari eskainiko ditu, esaterako, haurrentzako eta helduentzako ipuin kontaketak, hitzaldiak edo liburu aurkezpenak. Halaber, sei irakurketa klub jarriko dira martxan. Azken horietan parte hartzeko ez da zozketarik izango, eta izen-emateak irailaren 2an hasiko dira. Ohi bezala, Liburutegi Sareak berak emango ditu klubetan parte hartzeko behar diren liburuak.

 

Ludoteken eta familien eskaintza

Gizarte Sustapeneko kategorian, 2021-2022 kanpaina honetan 86 jarduera eskainiko dira, eta hiruhileko bakoitzeko 1.350 plaza inguru. Berrikuntza gisa, banantze- edo dibortzio-egoeran dauden familiei laguntzeko programa jarriko da abian ikasturte honetan. Lantegi horien bidez familiako kideen arteko harreman eta komunikazio egokia errazteko tresnak eskaintzen saiatuko da.

Era berean, eutsi egin zaio haur eta familientzako eskaintzari. Besteak beste, motibazioa eta ikasteko ohiturak lantzeko jarduerak izango dira, bai eta sozializazio-prozesua, emozioen adierazpena edo haurren ongizatea bultzatzeko jarduerak ere. 0 eta 11 urte bitarteko haurrentzako ludoteka eta ludoklubetan 137 txanda eskaintzen dira, 1.835 plazarekin.

Senidegune programa ere itzuliko da, 0-3 urte eta 4-6 urte bitarteko haurren gurasoei heziketan laguntzeko.

 

Share

Elikadura osasungarria sustatzeko ikastaroak berritu ditu udalak, gizarte-etxeetako jardueren denboraldi berrirako

 

  • Iraupen desberdinetako lantegi espezializatu ugari eskainiko da.

 

Osasuna sustatzeko atalak berrikuntza garrantzitsuak izango ditu gizarte-etxeetako 2021-2022ko jardueren programan. Gasteizko Udaleko Osasun Publikoaren Zerbitzua elikadura eta bizimodu osasungarria sustatzeko lantegiak eta ikastaroak berrantolatzen ari da  Amaitu den denboraldian hainbat proposamen berritzaile sartu ziren, baina berrikuntza nabarmenagoa izango da udazkeneko jarduerak hastean.

Espezializazioa izango da programazio berriaren bereizgarria. Aurreko urteetan, lantegiek gai orokorrak zituzten, baina datorren denboraldirako eduki espezifikoak prestatu dira; adibidez, lekaleak, barazkiak, gozogintza…. Espezializazio hori dela eta, elikaduran gaur egun dauden joerak landuko dira, esaterako batch cooking teknika, edo gosari, hamaiketako eta askari osasungarriak egiteko ideia berritzaileak…

Jardueren iraupena ere berrikuntza izango da, izan ere, saio bateko, biko, hiruko eta lauko lantegiak daude, aurreko denboraldietako hiruhileko lantegiez gain. Beste aldaketa garrantzitsu bat da dietista eta sukaldeko profesionalak batera izango direla lantegi gehienetako saio batean, eta hartara teoria eta praktika aldi berean egingo dira, mezua indartuz.

Halaber, aipagarriak dira elikadurarekin lotutako hainbat alderdiri buruzko berariazko hitzaldien eskaintza anitza eta hainbat lantegi ingelesez eta euskaraz izatea.

“Datorren denboraldian, elikadura osasungarrira hurbiltzeko aukera handiagoa izango dute herritarrek. Osasun Publikoaren Zerbitzuak lantegi-eskaintza anitza, interesgarria eta berritzailea prestatu du, egun elikadura eta nutrizioaren inguruan sortzen diren zalantza ugariri erantzuteko eskaintza” adierazi du Kirol eta Osasun zinegotzi Livia Lopezek.

Hainbat gai lantzeko aukera dugu lantegietan: haurren elikadura, sasoiko barazkiak, artea frutarekin, smothieak prestatzea, “clean baking” gozogintza, glutenik gabeko sukaldaritza edo Gabonetako lantegi bereziak, errezeta osasungarri merkeak prestatzen ikasteko. Halaber, hitzaldietan ere aukera anitza dago, eta gai hauek jorratuko dira, besteak beste: nutrizio-etiketen irakurketa, elikadura eta diabetesa eta “mindfull eating”.

Indarrean dauden osasun-neurriak direla eta ezin da lantegietan prestatutakoa sukaldean dastatu, eta hori dela eta, lantegietako parte hartzaileek tuper bat eraman behar dute.

Elikadura osasungarria sustatzeko lantegiez gain, bizimodu osasungarrirako funtsezko alderdiei buruzko bi modulu berezi gehitu dira:

  • “Hobetu zure osasuna” programa: Bizi-ohitura osasungarriagoak eskuratu nahi dituzten 18 urtetik gorako pertsonei zuzenduriko osasun-programa.  Aldaketa eraginkor eta osasungarri bat egiteko tresnak emango zaizkie parte-hartzaileei, psikologiaren, sukaldaritzaren, erizaintzaren, nutrizioaren, jarduera fisikoaren eta loaren alorreko profesionalen eskutik.
  • Ongizate emozionalerako programa. Ordu eta erdiko hiru saioko lantegia, COVID egoerak eragindako herritar orori zuzenduta, egoera zailak gainditzeko gaitasuna indartzeko beharra antzeman baitzen. Psikologiaren arloko aditu batek hainbat tresna emango ditu emozioak kudeatzeko, erresilientzia handitzeko eta egunero sortzen diren arazoei modu osasungarrian aurre egiteko, estrategia kognitibo eta emozional errazak aplikatuta.

Elikadurari buruzko lantegiei dagokienez, hau da horien deskribapen laburra.

  • Haurren elikadura: 8 eta 11 urte bitarteko haurrentzako sukaldaritza-lantegia (hiruhilekoa). Hainbat errezeta egingo dira, batez ere, fruta, barazki eta lekaleekin, eta umeek gosari, hamaiketako eta askari alternatiboak, elikagarriak eta osasungarriak prestatzen ikasiko dute haien eguneroko bizitzan egin ditzaten.
  • Batch cooking: Bi orduko saio honetan, aste osorako menu osasungarri bat ordu eta erdian prestatzen irakatsiko dute dietetika eta nutrizioko profesional batek eta sukaldaritzako beste batek
  • Elikadura osasungarria: Elikadura eta sukaldaritza osasungarriari buruzko hiruhileko lantegia. Sukaldaritzako eta dietetika eta nutrizioko profesionalek elikagai-talde desberdinetako errezeta osasungarriak egingo dituzte eta elikadura ohiturak hobetzeko tresnak emango dituzte. Derrigorrezkoa da teoriara eta praktikara joatea.
  • Tokiko eta sasoiko barazkiei buruzko lantegia: Tokiko eta sasoiko barazkiei buruzko lantegi monografiko honek lau saio ditu. Dietetika eta nutrizio arloko aditu batek gure inguruan ditugun barazkiez hitz egingo du eta haien propietateak, ezaugarriak eta abar azalduko dizkigu. Sukaldaritzako profesional batek errezeta alternatiboak egingo ditu barazkiekin. Hori dena, gure egunerokoan prestatu ahal izango ditugun barazki-errezeta berri, erakargarri eta zaporetsuak egiten ikasteko.
  • Ikasi gosari, hamaiketako eta askari osasungarri berriak egiten: Herritar guztiei zuzendutako bi saioko lantegia. Dietetika eta nutrizioko profesional batek eta sukaldaritzan aditu batek, aldi berean, otordu horiek osasungarriak izateko behar dituzten ezaugarriak azalduko dituzte, eta era askotako errezeta erakargarri eta zaporetsuak prestatuko dituzte, eguneroko bizitzan berritu ahal izateko.
  • Berezia, glutenik gabe: Inguruan zeliakoak dituzten herritarrentzat pentsatutako lantegia. Sukaldaritzako zein dietetika eta nutrizioko profesionalen laguntza izango da. Glutenik gabeko elikaduran kontuan hartu beharrekoak azalduko dituzte eta errezeta orekatuak, erakargarriak eta zaporetsuak prestatuko dira 4 saiotan.  Glutenik gabe elikatzeak dituen arriskuak ere azalduko dira.
  • Clean baking; gozogintza osasungarria: Lantegian postre osasungarriak egiteko printzipioak eta ezaugarriak azalduko dira, dietetika eta nutrizioko eta sukaldaritzako profesionalen laguntzaz. Gainera, errezeta zoragarriak prestatuko dituzte.
  • Berezia: Gabon osasungarri eta merkeak Herritar guztiei zuzenduriko Gabon osasungarriei buruzko lantegi berezia. Hiru saiotan zehar, dietetika eta nutrizioko profesional batek aholkuak emango ditu eta sukaldaritzan aditu batek Gabonetako errezetak prestatu eta azalduko ditu.
  • Lekaleei buruzko lantegia: Lekaleei buruzko lau saioko monografikoa. Dietetika eta nutrizioko profesional batek eta sukaldaritzako beste batek, aldi berean, elikagai-talde honen barietateen, propietateen, ezaugarrien eta osasunerako dituen onuren berri emango digute eta errezeta alternatiboak, erakargarriak eta gozoak prestatuko dituzte lekaleekin.
  • Artea frutarekin: Saio bateko lantegi honetan, 8 eta 11 urte bitarteko haurrek koadro bat egingo dute frutarekin, sukaldaritzan aditu baten laguntzaz.
  • Smoothieak, irabiatuak eta frutazko beste zenbait edari: Hiru saioko lantegi honetan dietetika eta nutrizioko profesional batek eta sukaldaritzako beste batek fruten ezaugarriak eta propietateak azaldu eta gomendioak emango dituzte, eta smoothieak, irabiatuak eta frutazko beste edari batzuk egiten irakatsiko.

Lantegi hauetaz gain, elikadurari buruzko 11 hitzaldi emango dituzte dietetika eta nutrizio arlok profesionalek hiriko gizarte-etxeetan.

Share

Esklerosi anizkoitzaren aldeko ‘Mojate-Busti Zaitez’ kanpaina abian da

  • Esklerosi Anizkoitzaren Arabako Elkarteak antolatu du kanpaina, eta Vital Fundazioaren, Arabako Foru Aldundiaren, Eusko Jaurlaritzaren eta Vitoria-Gasteizko Udalaren babesa jaso du     

 

Esklerosi Anizkoitzaren Arabako Elkarteak (AEMAR) ‘Mojate-Busti Zaitez’ kanpaina berreskuratu du, iaz pandemiaren ondorioz bertan behera utzi behar izan ostean. Edizio hau, XXIV.a, datorren igandean, hilak 11, egingo da Arabako Lurralde Historikoko hainbat igerilekutan eta ekitaldi nagusia eguerdiko 12:00etan izango da Estadio Fundazioaren instalazioetan. Kanpainak Vitoria-Gasteizko Udalaren, Vital Fundazioaren, Arabako Foru Aldundiaren eta Eusko Jaurlaritzaren babesa du.

‘Mójate- Busti Zaitez’ esklerosi anizkoitza pairatzen duten pertsonekiko sentsibilizazio- eta elkartasun-kanpaina da. Ekimenari atxikitako Euskal Autonomia Erkidegoko igerilekuetan eta hondartzetan egiten da, eta pertsona guztiek parte har dezakete bertan, gaixoen bizi-kalitatea hobetzeko behar dituzten birgaitze-zerbitzuak mantentzen laguntzeko dirua biltzeko.

Arabako 2021. edizioaren aurkezpenean, ekimena babesten duten erakunde guztietako ordezkariek hartu dute parte: Livia López Kirol eta Osasun zinegotziak; Axier Urresti Vital Fundazioen zuzendari exekutiboak; Iratxe Asurmendi AEMAReko jardueren koordinatzaileak; Emilio Sola Gizarte Politiketako foru diputatuak; eta Marian Olabarrieta Eusko Jaurlaritzako Gizarte Politiketako zuzendariak.

Gizartea gaixotasun horren inguruan sentsibilizatzeko, Mojate-Busti Zaitez ekimena antolatzen da udaro, duela hogeita hiru urtetik hona (nahiz eta iazkoa ezin izan zen aurrez aurreko eran burutu pandemiagatik). Oraingoan, Estadio Fundazioko, Mendizorrotzako eta Aldaieta Klub Nautikoko igerilekuetan parte hartu ahal izango da Araban.

Parte-hartzaile bakoitzak nahi dituen metroak igeri egiteko aukera izango du, eta bukatzean, boluntarioen taldeak diploma egiaztatzailea bana emango die. Jardunaldia amaitzean, esklerosi anizkoitza duten pertsonei laguntzeko ekintza sinboliko batean igeri egindako metro guztiak zenbatuko dira. Gainera, egun osoan zehar, boluntarioek informazioa emango dute eta diptikoak banatuko dituzte, esklerosi anizkoitza zer den eta kanpaina honetan parte hartzeko eta laguntzeko modua azaltzeko.

Ahalik eta diru gehien lortzeko, ekimena gauzatuko den leku guztietan stand bat jarriko da, eta bertan kanpainako merchandising-objektuak jarriko dira salgai, hala nola kamisetak, poltsak, mantalak edo koadernoak, besteak beste. Guztiek daramate Mikel Urmenetak, Katuki Saguyaki enpresaren buruak, diseinatu eta dohaintzan eman duen irudia. Gainera, objektu horiek guztiak elkartearen egoitzan ere erosi ahal izango dira.

Iratxe Asurmendi AEMAReko koordinatzaileak esklerosi anizkoitza dutenen alde bustitzeko deia egin dio Arabako gizarteari. “Igande honetan zuen zain izango gaituzue. Igeri eginez busti zaitezkete, edo kamisetak eta gaixotasunak jotako pertsonei arreta eta errehabilitazio zerbitzu espezializatuak eskaintzen lagunduko dieten beste produktu batzuk erosiz”, adierazi du.

“Esklerosi anizkoitza duten pertsonei laguntzeak guztiok inplikatzen gaitu. Erakundeak, baliabide materialak eta ekonomikoak ematen dituztelako AEMAR bezalako elkarteek sustatzen dituzten programa terapeutikoak gara daitezen. Eta herritarrak, esklerosi anizkoitzak sortzen dituen arazo eta premiekiko sentsibilitaterik gabe, ezinezkoa izango litzatekeelako Busti Zaitez kanpaina bezalako ekintzek sortzen duten elkartasun olatu handia”, gehitu du Livia López Gasteizko Udaleko Kirol eta Osasun zinegotziak.

“Kanpaina hori Vital Fundazioak AEMAR-Esklerosi Anizkoitzaren Arabako Elkartearekin duen lankidetza-hitzarmenaren barruan antolatu da. Lankidetza horri esker, Arabako Lurralde Historikoan programa estentsibo batzuk garatu eta gauzatuko dira hamabi hilabete hauetan, esklerosi anizkoitzak eragindako pertsonen eta haien familien bizi-kalitatea hobetzeko”, nabarmendu du Axier Urresti Vital Fundazioen zuzendari exekutiboak.

Iaz pandemiaren ondorioz Busti Zaitez derrigorrez bertan behera utzi ondoren, Emilio Sola Gizarte Politiketako foru diputatuak adierazi du Arabako Foru Aldundiak AEMARek antolatzen duen udako kanpainarekin duen konpromisoa berritu nahi duela, “ilusio eta inplikazio handiagoz, posible bada, Arabako herritarrek esklerosi anizkoitza pairatzen duten pertsonekiko elkartasuna erakusteko bide bat ireki ahal izateko”. Ildo horretan, Arabak eta Arabak “txonbo solidarioen errekorra” osatzeko deia egin du.

Bestalde, Marian Olabarrieta Eusko Jaurlaritzako Berdintasun, Justizia eta Gizarte Politiketako Saileko Gizarte Zerbitzuetako zuzendariak adierazi duenez, “egunen batean lortuko da gaixotasun hori zerk eragiten duen jakitea, eta esklerosi anizkoitza duten gaixoen bizi-kalitatea hobetzen jarraituko dugu. Horregatik, garrantzitsua da txonbo horrek administrazio publikoen babesa jasotzea, gaur hemen bildu garenona bezalakoa, baina baita herritarrena ere”.

 

Gaixotasunaren egoera

Esklerosi anizkoitza da heldu gazteen artean gaixotasun neurologiko ohikoena. Normalean 20 eta 40 urte bitartean diagnostikatzen da, eta gehiago eragiten die emakumeei gizonei baino. Gaixotasun kronikoa da, eta bizi-kalitatea mugatzen duten ondorioak eragin ditzake; beraz, eragin handia du gizartean. Bost ordutik behin kasu berri bat diagnostikatzen da Estatuan. Gaur egun, 2.800 pertsonak baino gehiagok dute gaixotasun hori Euskadin, 56.000 pertsonak Estatuan. Sintomarik ohikoenak honako hauek dira: nahasmendu sentsitiboak, orekaren eta hizketaren nahasmenduak; dardarak, gorputz-adarren ahultasuna eta, kasurik larrienetan, gorputz-adarren paralisia; eta alterazio urologikoak, bertigoa, nekea, inurridurak eta ikusmen-alterazioak. Ez da gaixotasun kutsakorra, ez hereditarioa, ez hilgarria.

Share

Saharako futbol selekzioaren kontzentrazioa hartuko du Gasteizek, uztailaren 2tik 4ra

  • Abetxuko ADC taldearen kontrako lagunarteko partida izango da ekitaldi nagusia, egitarauan

 

Mendebaldeko Saharako futbol selekzioak kontzentrazioa egingo du Gasteizen uztailaren 2an, 3an eta 4an. Berrogeita hamarretik gora lagun —jokalariak, teknikariak, Saharako Kirol Federazioko kideak, kazetariak eta politikariak— izango dira Euskadiko hiriburuan, selekzio horrek egiten duen kategoria horretako lehen ekitaldian.

Hurrengo egunetarako aurreikusitako kirol prestakuntzaz gain, Arabako talderik zaharrenetako baten kontrako, Abetxuko ADC taldearen kontrako lagunarteko partida jokatuko du Saharako selekzioak San Martineko futbol-zelaian. Larunbatean izango da, 19:00etan, eta ikusleak izango dira harmailetan, Covid-19aren protokoloa errespetatu beharko bada ere, eta, hortaz, edukiera mugatuta egongo bada ere. Saharako Kirol Federazioaren sare sozialen eta RASD TV telebistaren bitartez ere jarraitu ahal izango da partida.

Kirol-jarduerekin batera, hainbat jarduera instituzional eta kultural aurreikusi dira, Gasteizko eta Saharako herrien arteko harremanak estutzen jarraitzeko aukera emango dutenak.

Kirol eta Osasun zinegotzi Livia Lópezek aurkeztu du kirol ekitaldia, eta, berarekin batera, Saharako Kirol Federazioko presidente Ahmed Baba Bohubeinik. Horren bitartez, beste esparru batzuetara zabalduko da Gasteizek saharar herriari erakusten dion elkartasuna, kasu honetan kirolera. “Gure hiriak Saharako Errepublika Arabiar Demokratikoarekin hainbeste urtez izandako adiskidetasun-, laguntza- eta harrera-harremanetan beste urrats bat egin dugu, kirolaren esparrura hedatuz. Transmititzen dituen balioengatik eta zubiak eraikitzeko duen gaitasunagatik, modu paregabea da kirola harreman horretan aurrera egiteko”, adierazi du Livia Lópezek.

Hainbat arrazoik bultzatu dute Saharako Kirol Federazioa futbol selekzioaren kontzentrazioa egiteko Gasteiz aukeratzera. Saharar komunitateak diasporan duen populaziorik handienetako bat hirian bizi da, tartean Arabako Futbol Federazioko klubetan jokatzen duten hainbat futbolari, eta, batez ere, “Kirolarekin eta munduko bidezko kausekin konprometitutako hiria da”, Ahmed Baba Buhubainiren hitzetan.

Saharako futbol selekzioak ez du nazioarteko partida ofizialak jokatzeko aukerarik izan, FIFAk ezagutzen ez duenez gero, baina, epe luzera, Mendebaldeko Sahara nazioarteko ekitaldietan ordezkatzera iristea du helburu. “Loturak sortu eta gure selekzioa ikusarazteko aukera ematen digute horrelako kontzentrazioek”, nabarmendu du Saharako Kirol Federazioko presidenteak.

Saharako futbol selekzioak Gasteizen egin duen kontzentrazioaren aurkezpenean M. Liman Mohamed Ali Euskadiko saharar ordezkariak parte hartu du. Gasteizko Udalak Mendebaldeko Sahararekin duen lankidetza-historia errepasatu du.

Kirol eta Osasun zinegotziak, bere aldetik, eskerrak eman dizkie Arabako Futbol Federazioari eta Abetxuko ADC taldeari ekimenean parte hartzeagatik.

Share

20 herrialdetako 100 emakumetik gora lehiatuko dira Gasteizen Araba World Tennis Tour txapelketaren bigarren edizioan

Uztailaren 12tik 18ra bitartean Araba World Tennis Tour Vitoria-Gasteiz 2021 “Araba en femenino” txapelketa jokatuko da Peña Vitoria-ren instalazioetan;  ITF 60000 kategoriako txapelketa da, eta Euskadiko hiriburua erreferente egiten du proba hauetan nazio mailan. 20 herrialdetako 120 jokalari inguruk —zeinak WTA sailkapenaren 100 zenbakitik aurrera baitaude— hartuko dute parte munduko zirkuiturako puntuagarria izango den proban, eta ITF-Nazioarteko Tenis Federazioak ikuskatuko du.

Kirol eta Osasun arloko zinegotzi Livia Lopezek hartu du parte ekitaldiaren aurkezpenean. Iaz bertan behera geratu zen pandemia zela eta, eta aurten jarraipenaren eta sendotzearen aldeko apustua egin du, Gasteizko Udalaren, Arabako Foru Aldundiaren eta Eusko Jaurlaritzaren babesari esker.

Azalera gogorreko lau pistatan jokatuko dira partidak, b banakako eta binakako kategorietan. Banaka multzo nagusian 32 jokalari arituko dira: 17, zuzenean onartuak; 6, aurretiazko fasean sailkatuak; 5, ITFren sailkapena dutenentzat erreserbatuak, eta 4, “Wild card” bidez antolakuntzak gonbidatuak, horien artean, Arabako sailkapeneko 1. lekua duen Marta García. Banakako aurretiazko fasean 24 jokalari izango dira: 20, zuzenean onartuak, eta 4,  “wild card” bidezkoak. Binakakoetan 16 bikotek osatuko dute txapelketaren multzo nagusia.

20 bat herrialdetako jokalariek hartuko dute parte; gehienak leku hauetatik etorriko dira: Espainia, Grezia, Paraguai, Argentina, Austria, Alemania, Errusia, Holanda, Frantzia, Norvegia, Brasil, Mazedonia, Venezuela, Italia, Erresuma Batua, Belgika eta Mexiko.

Ekitaldia Gasteiz hirira zabaltzeko asmoz, jarduera bat antolatuko da Andre Maria Zuriaren plazan, mini tenis-pistak erabiliz; Peña Vitoriana-ko entrenatzaileekin eta txapelketako jokalariren batekin aritu ahal izango da. Horrekin batera, jarduera paraleloak izango dira; horien artean, Proam txapelketa, gurpildun aulkiko tenis-erakustaldia eta umeekin clinic bat, Peña Vitoria-ren instalazioetan.

Share

Hemen da berriz “Kirol bidean” programa, 500 leku baino gehiago eta jarduera berriak dituela

Kirol Bedean liburuxka

 

Gasteizko Udalak “Kirol bidean” kanpainaren udaberri-udako edizioa abiarazi du, eta 526 leku eskainiko dira. Maiatzetik irailera bitartean, 10 asteburutan, kirol jarduera ugarirekin atsegin hartzeko aukera izango dute 12 urtetik 30 urte bitarteko gazteek. Gaur, maiatzak 3, hasi da izena emateko epea, eta maiatzaren 29an izango da aurreikusitako lehen jarduera. Aurten hiru jarduera berri izango dira: yoga naturan, geocaching eta bizikleta + SUP/Kayak.

Kirol bidean programaren helburua da Gasteizko 12 eta 30 urte bitarteko gazteen artean jarduera fisikoa sustatzea, bereziki 12 urtetik 18ra bitartekoen artean, hainbat kirol modalitatetako kiroletako hastapen ikastaroen bitartez. Jarduerak Arabako natur inguruneetan egingo dira, eta guztiak dira ohikoaz bestelako esperientziak, edukiari zein aritzeko inguruneari (mendia, itsasoa, airea) dagokienez. Kirol erakundeetako (klubak eta federazioak) eta enpresa espezializatuetako begirale kualifikatuak izango dira gidari.

“Iritsi da aire zabaleko jarduerak gozatzeko garairik onena, eta kirol bidean kanpainaren aurtengo edizioak proposamen erakargarri ugari ditu inguruneak eskaintzen dizkigun aukerei etekina ateratzeko. Bostehun plazatik gora eskaintzen dira, osasunaren arloko gomendioei jarraituz prestatutako jardueretan. Ez dago bizigiroa aldatu eta lur, aire edo itsasoz kirol bidean ez jartzeko aitzakiarik” adierazi du Kirol eta Osasun zinegotzi Livia Lopezek.

Hauexek dira udaberri-udarako programatutako jarduerak:

  • Arroilak: Antoñanan egingo da; ibaiak jaitsiko dira, oinez, saltoka zein igerian.
  • Espeleologia:  Iguaranen (Opakua), Arabako kobazulo klasikoan.
  • Parapentea: parapentean hegan egiten hasteko ikastaroa, Olarizun eta Garaion.
  • Plaza biko parapentea: aldez aurretik parapente jarduera egina dutenentzat bakarrik.
  • Zaldi-erronka: hipikan hastea, Gaubeako haranean.
  • Ferrata bidea: mendia eta eskalada, Sobronen.
  • Kayak: piraguismoaren oinarrizko kontzeptuak ikastea, Sobronen.
  • Yoga naturan: Gorbeiako Parke Naturalean aurreikusita, erlaxazioa eta ohitura osasungarriak sustatzea xede.
  • Geocaching: lokalizazio-jarduera, pisten eta GPSaren laguntzaz. Gasteizko Eraztun Berdean.
  • Bizikleta + SUP/kayak: Anglo-Vasco-Navarro trenbidearen bide berdea ezagutzeko jarduera konbinatua, Uribarri-Ganboako urtegiaren inguruan.
  • Eskalada haitzean: hastapen ikastaroa, Eginon.

 

Jarduera gehienak bi taldetan banatzen dira adinaren arabera: 12-17 urte bitartekoak, eta 18-30 urte bitartekoak.  Lehen taldean, jardueraren inguruko hastapenak landuko dira gehien bat.

Jarduera guztiek COVID-19aren prebentziorako osasun protokoloa betetzen dute, baita osasun agintariek gomendatutako neurriak ere. Zentzu horretan, eskaintza aldatu ahal izango da prebentzio-neurrien aldaketen arabera.

Izena emateko hainbat aukera dago: Udalaren webgunean, udalaren gizarte-etxeen eta kiroldegien sarean eta Gazteen Argibideetarako Bulegoan.

Kirol bidean kartela

+INFO: Kirol bidean – 2021eko udaberri-uda

 

 

 

 

 

 

Share

Udalak hobekuntzak egingo ditu igerileku estalietan lekua erreserbatzeko sisteman

Apirilaren 1etik aurrera, hainbat aldaketa egingo dira igerileku estalietan igeri egiteko edo bestelako jarduera libreetarako lekua erreserbatzeko sisteman, zerbitzuaren kalitate hobetze aldera. Pertsona bakoitzeko gehieneko erreserba-kopuru bat finkatuko da, aldatu egingo da lekua eskatzeko aldez aurretik dagoen denbora-tartea, eta hobeto definituko dira egunean egiten diren erreserbak. Horren bitartez, igerilekuen erabilera optimizatu ahal izango da —gaur egun, guztira 2205 leku eskaintzen dira egunean, murrizketa sanitarioak direla eta—.

Erreserben gehieneko kopuruari dagokionez, apirilaren 1etik aurrera erreserba bakarra egin ahal izango du pertsona berak egunean. Erabiltzaile gehiagok izango dute aukera, hartara, lekua hartzeko.

Aurreko 48 orduen barruan egin beharko da igerileku-erreserba, lehengo 72 orduko tartea murriztu egingo baita. Hartara, hitzordu gutxiago baliogabetu behar izango dituzte erabiltzaileek segurki.

Azkenik, erreserba egun berean egiteari dagokionez, era berean, igerileku mota bakoitzeko erreserba bakarra egin ahal izango du pertsona berak, baldin eta aldez aurretik egun horretarako erreserbarik egin ez badu. Abonatuei nahiz abonatuta ez daudenei aplikatuko zaizkie baldintza horiek.

“Ezohiko egoeran daude kirol-instalazioak, eta pandemiaren ondorioz ezarritako murrizketek lekuak modu ekitatiboan banatzera behartzen gaituzte. Hori da igerileku estalien erreserba-sisteman egingo ditugun aldaketekin lortu nahi duguna”, azaldu du Kirol eta Osasun zinegotzi Livia Lópezek.

 

 

 

Share

Gasteiz Sport Business biltzarraren bigarren edizioa izango da otsailaren 25ean, Europa jauregian

  • Kirolari lokal handiak eta kirol-kudeaketaren arloko profesionalak bilduko dira, Covid-19aren aurrean seguru izateko asmoz diseinatutako biltzarrean

 

Kirol eta Osasun zinegotzi Livia Lópezek, Kultura eta Kirol foru diputatu Ana del Valek eta Meta Finalen zuzendari fundatzaile Juan Canterok aurkeztu dute Gasteiz Sport Business biltzarraren bigarren edizioa. Otsailaren 25ean izango da, ostegunez, Europa biltzar-jauregian, eta kirolaren kudeaketa profesionala izango du ardatz.

Ekitaldi presentzial seguru gisa diseinatu da, entzuleentzako berariazko babes-neurriekin — 350 eserlekutara murriztutako edukiera, akreditazio-aplikazioa, tenperatura-kontrolak eta beste—. Hizlarientzako eta laguntza-langileentzako neurririk ere izango da —distantzia, lan-eremu seguruak eta beste—.

Lehen edizioko eskemari eutsiko zaio: mahai-inguruak, hitzaldiak eta solasaldiak izango dira, eta hainbat gai jorratzeko, hala nola eliteko kluben kudeaketa, berrikuntza —saskibaloiko Euroligan, kasu—, marken trataera kirolean, edo datuen erabilera, kirolaren arloko profesionalei laguntzeko tresna gisa.

Modu paritarioan egindako 29 hizlariren zerrendan bertako hainbat kirolari izango dira: Iván Fernández —Ruth Brito triatletarekin solasean—, Tania Calvo, Tania Lamarca, Laura Pardo eta Patxi Peula. Era berean, aipatzekoa da FIFAren, Euroligaren, Espainiako Futbol Federazioaren, Euskaltel Fundazioaren, futbol-ligako negozio-eskolaren eta Lehen Mailako lau euskal kluben ordezkariak bertan izango direla.

Berrikuntza gisa, otsailaren 25eko jardunaldiak jarraipena izango du, kirol-entitate eta federazio lokalei zuzendutako hiru prestakuntza-lantegiren bitartez. Martxoaren 9an (Babesa), 16an (Komunikazioa) eta 23an (Ekitaldien kudeaketa) izango dira. Tailerretan izena ematea doakoa izango da toki-erakundeentzat.

Kirol eta Osasun zinegotzi Livia Lópezek eskertu egin du Gasteiz Sport Business biltzarraren antolatzaileek bigarren edizio hori posible egiteko erakutsi duten kemena. “Gauzak ez dira errazak orain. Zail dago kirola egitea, eta zail biltzarrak egitea. Baina kirolak erakusten digun balio nagusietako baten erakusgarria dugu hau, zailtasunei aurre egiteko nahiarena”, nabarmendu du.

Joan den astetik dago zabalik izena emateko epea, eta webgune honetan egin daiteke: http://www.gasteizsportbusiness.com/

 

Share

Berriz ere bada “Kirol bidean” kanpaina, gaur egungo osasun-murrizketetara egokituta

Aste honetan hasi da izena emateko epea “Kirol bidean” kanpainaren neguko aldian; kanpaina 12 eta 30 urte bitarteko gazteei zuzentzen die Gasteizko Udalak, jarduera fisikoa egin dezaten sustatzeko. Aurtengo berrikuntza nagusia jarduerak baliatzeko bi adin-tarte (12-17 eta 18-30 urte) sortzea da, eta horri esker homogeneoagoak izango dira sortzen diren taldeak. Guztira, 144 plaza daude eskuragarri kanpainan honetan.

Gaur egungo osasun-murrizketak direla eta, udalerrikako konfinamendua barne, jarduera-eskaintza egokitu behar izan da, aurreko urteetan beste lurralde batzuetara joaten baitziren neguko kirolak praktikatzera. Horrelako irteerak behin-behinean eten dira, osasun-egoerak horretarako aukera berriro duen arte.

Mantentzen den programazioa otsailaren 21ean hasiko da. Ordurako 6 eta 16 urte bitarteko haurrentzako kirol-jarduerek etenda jarraitzen badute, kanpainan parte hartzeko gutxieneko adina 17 urtekoa izango da.

Gaur egun eskuragarri dauden jardueren artean, nabarmentzekoak dira multiaktibitatea izotz-pistan eta patinajea. Bi kasuetan, bi adin tarte ezartzen dira (12-17 urte, eta 18-30 urte); patinajearen kasuan, hastapena-mailakoa izango da, eta multiaktibitatea, berriz, gutxieneko eskarmentua duten pertsonentzakoa da.

Beste bi aukera, ur-azpiko jolasak (12-18 urtekoentzat) eta urpekaritza hodiekin (12-30 urte) dira. Biak Lakuako gizarte-etxea egingo dira. Ezinbestekoa da igeri egiten jakitea, eta material osagarriaren beharrak oso ezberdinak dira jardueraren arabera.

Azkenik, Salburuko gizarte-etxean multiaktibitatea rokodromokon ere egin ahal izango da “Kirol bidean” kanpainaren barruan; horietan, eskalada-hastapena eta altuera-parkeko eta tirolina jarduerak egingo dira.

Jarduera hauek eten dira behin-behinean, udalerrikako konfinamendua irauten duen bitartean: snowboard-a, elurretako erraketak, eski nordikoa, mendira neguan igotzeko teknikak eta ekipamendua eta espeleologia.

“Jarraitzen dugu ahalegin guztiak egiten osasun-egoerak egiten uzten digun kirol-jarduera ahalik eta gehien sustatzen. Hala gertatzen da kanpaina honekin, bereziki izan baitugu gogoan pandemia hasi zenetik bizimodua mugatuen izan duen herritar-taldeetako bat” adierazi du Kirol eta Osasun zinegotzi Livia Lópezek.

“Kirol bidean” kanpainan izena emateko hainbat aukera dago: Udalaren webgunean, udalaren gizarte-etxeen eta kiroldegien sarean eta Gazteen Argibideetarako Bulegoan. Udalaren kirol instalazioen sarean abonamendua dutenei kuota murriztua kobratuko zaie. Adingabeek behar den baimena aurkeztu behar izango dute.

Informazio gehiago: Kirol bidean kanpaina

 

 

 

 

 

 

 

 

Share