Prentsa Oharren banner

Udalak ingurumena babesteko mezuak grabatzera animatu ditu gazteak eta helduak, TikTok sareko lehiaketa baten bitartez

Lehiaketa uztailaren 16an amaituko da eta sare sozialean #VitoriaGasteizporunplanetamejor traola jarrita igotako bideorik onenak sarituko ditu.

 

Gasteizko Udalak “Vitoria-Gasteiz planeta hobe baten alde – TikTok lehiaketa” aurkeztu du gaur. #VitoriaGasteizporunplanetamejor traola jarrita, ingurumena zaintzeko beharraz kontzientziatzeko bideoak bilduko ditu lehiaketak.

Ez da ekipo profesionalik behar parte hartzeko; aski dira mugikorra eta kontatzeko istorio ona. Oso erraza da lehiaketan parte hartzea: bideo bat igo behar da TikTok plataformara, lehiaketaren traola jarrita, eta izena emateko imprimakia bete (oinarriak ere bertan kontsultatu ahalko dira).

“Deialdiaren xedea ingurumena zaintzeari buruzko hausnarketa eta sormen-gaitasuna sustatzea da. Horretarako TikTok plataforma aukeratu da, gazteenek asko erabiltzen dutelako eta ikus-entzunezkoak sortzeko aukera erraza ematen duelako” adierazi du Lurraldearen eta Klimaren aldeko Ekintzaren zinegotzi Ana Oregik.

Lehiaketaren gaia ingurumena defendatu beharraz kontzientziatzea da (klima-aldaketa, kutsadura, baso-soiltzea, energia berriztagarrien erabilera, birziklatzea, arriskuan dauden espezieen babesa, ur-eskasia, biodibertsitatearen galera, lurzoruaren degradazioa…). Bideoek gehienez minutu bateko iraupena izango dute, eta TikTok sareak eskaintzen dituen sormen-aukera guztiak erabil daitezke.

Lehiaketan parte hartu ahal izateko, Gasteizen bizi, ikasi, edo lan egin behar da, edo bertan jaioa izan.

Lehiaketak bi sari ditu: lehena, 200 eurokoa, eta bigarrena, 100 eurokoa. Uztailaren 16an amaituko da izena emateko epea, eta uztailaren 23an jakinaraziko dira irabazleen izenak.

Oinarriak eta izena emateko inprimakia

 

Share

Autokontsumorako instalazio fotovoltaikoak jarriko dira udalaren 5 eraikinetan

Elkarrekin taldearekin lortutako akordioari esker, kontsumitzen duten energia elektrikoaren % 33 ekoiztuko dute Hegoalde eta Ariznabarreko gizarte-etxeek, Lourdes Lejarreta haur eskolak, Aranaldeko kiroldegiak eta Ariznabarreko BIZANek.

 

Alkateorde eta Lurraldearen eta Klimaren aldeko Ekintzaren zinegotzi Ana Oregik eta Elkarrekin taldeko eledun Oscar Fernendezek gaur goizean iragarri dutenez, Gasteizek autokontsumorako instalazio fotovoltaikoak izango ditu udalaren 5 eraikinetan urte amaierarako.  Izan ere, Elkarrekin taldearekin lortutako akordioari esker, Hegoalde eta Ariznabarreko gizarte-etxeek, Lourdes Lejarreta haur eskolak, Aranaldeko kiroldegiak eta Ariznabarreko BIZANek kontsumitzen duten energia elektrikoaren % 33 ekoiztuko dute.

“Gasteizek klima-aldaketaren kontrako borrokan modu aktiboan parte hartzeko konpromisoa du, nazioartean egiten dituen itun, akordio eta politiken ildo beretik. Gure helbururik anbiziotsuena 2030erako bide-orria adostea da, 2050a baino lehen karbono-neutraltasuna lortzea xede. Ildo horretan, lanean ari gara kontsumoa murrizteko, instalazio eraginkorragoak sustatzeko eta energia berriztagarriren ekoizpena bultzatzeko politiketan, eta gaur aurkezten dugun proiektu hau ekintza horiekin bat egiten du” nabarmendu du Ana Oregik.

Elkarrekin taldeko eledun Oscar Fernandezek azpimarratu duenez, “udal instalazioetan eguzki-energian inbertitzea trantsizio energetikoaren aldeko beste pausu bat da Gasteizen. Elkarrekin taldean uste dugu erakundeek eta gizarteak norabide berean joan behar dutela, energia-sistema berriztagarri eta banatua bermatzeko. Gaur, datozen urteetan azkartu nahi dugun bideari jarraitzen diogu, gure Green Capital energia garbiaren arloan ere erreferente izan dadin”.

Gasteizko udalaren eraikinetan instalazio fotovoltaiko hauek giltza eskura hornitzean datza aurkeztutako proiektua.

MULTZOAKOKALEKUAPOTENTZIA
1. MULTZOAHEGOALDE GIZARTE-ETXEA100 kWn
 

2. MULTZOA

ARIZNABARREKO GIZARTE-ETXEA15 kWn
ARIZNABARREKO BIZAN30 kWn
LOURDES LEJARRETA HAUR ESKOLA30 kWn
ARANALDEKO KIROLDEGIA15 kWn

Kontratu honen bitartez, udalaren eraikin eta instalazioetan energia elektrikoa hornitzen duten instalazio berriztagarrien kopurua handitu nahi da. Instalatu beharreko potentzia nominala 190 kW-koa da guztira.

Multzo guztien lizitazioaren oinarrizko aurrekontua 258.024 eurokoa da (BEZa barne) eta egikaritze-epea, 4 hilabetekoa.

5 instalazio fotovoltaikoek 260.000 kWh ekoiztuko dute, gutxi gorabehera, eta bost eraikinen gutxi gorabeherako kontsumo elektrikoa 785.000 kWh da urtean. Instalazio fotovoltaikoen ekoizpen fotovoltaikoak kokatuko diren eraikinen kontsumo elektrikoaren % 33a da.

Share

Urbanizatu gabeko lurzorua zaintzera, finkatutako auzoak biziberritzera, herriak babestera, oreka ekonomikora eta osasuna eta ingurumen-kalitatea hobetzera bideratu du bere hirigintza-eredua Gasteizek

Hiri Antolamenduko Plan Orokorra berrikusteko batzorde txostengileak datorren astean aztertuko du behin betiko idazkuntzaren oinarri izango den helburu eta irizpideen agiria

Ana Oregi audioa

Azken urteotan berrikusten ari den HAPOren behin betiko idazkuntzaren oinarri izango den helburu eta irizpideen agiria prest dauka dagoeneko Udalak. Lurraldearen eta Klimaren aldeko Ekintzaren arloko zinegotzi Ana Oregik aurkeztu ditu proposamen nagusiak, teknikariek, udal talde politikoek eta gizarte-eragileek —partaidetza-prozesuaren bitartez— egindako lanaren emaitza.

Hiri Antolamenduko Plan Orokorraren batzorde txostengilean aztertuko da testu hori datorren astean, eta bertan espero da zehaztea Gasteizek hirigintza-arauak eguneratu ditzan beharrezko diren onespenen behin betiko egutegia. Izan ere, azken bi hamarkadetan ez da eguneratu plan hori, nahiz eta, unean uneko premien arabera, hainbat aldaketa egin izan diren.

Etorkizuneko Gasteizen eredua markatuko duten helburu nagusi eta irizpideak biltzen ditu gaur aurkeztutako testuak, 2030 Agendaren eta garapen iraunkorreko helburuen ildotik.

“Hiri trinko, konplexu eta kohesionatu bat definitzen du hiri-eredu berriak, landa-ingurunea bultzatu eta herriak babesten dituena, kultur, natura- eta paisaia-ondareari balioa ematen diona. Hiri iraunkor eta energetikoki eraginkorra, baliabideak eraginkortasunez kudeatzen dituena, emisioetan neutro izatea lortzeko, bere burua energiaz eta elikagaiz hornitzeko gai izateko. Jarduera ekonomikoa lehen sektorearen, hirugarren sektorearen eta industria-jardueraren arteko oreka koordinatutik bultzatuko duen eredua. Azken batean, Gasteizen bizi garenon bizi-kalitatea hobetuko duen eredu bat proposatzen dugu, planeamenduaren irizpideei orientazio berria emanez eta eguneroko bizitza aberastuko duten dinamikak ahalbidetuz”, azaldu du Ana Oregik.

6 helburu estrategikoetako bakoitzeko proposamenak

 “Hainbat dira plan orokor berriaren sei helburu estrategikoetako bakoitzean biltzen diren proposamenak, zeinen ezaugarriak hauek baitira: urbanizatu gabeko lurzorua zaintzea, hiri finkatuko hiri-jardueraren aurreikuspenak sendotzea, auzoak eta ondare eraikia berreskuratzea, klima-gorabeherei erantzutea eta industria-lurzoruen edukiera areagotzea, hiri orekatu eta kohesionatua lortzea helburu”, azaldu du Lurraldearen eta Klimaren aldeko Ekintzaren arloko zinegotziak, zeinek dokumentuan jasotako proposamenak zehaztu baititu.

 1) Lehen helburuari dagokionez —hiri trinko, konplexu eta kohesionatua—, hainbat dira agirian jaso diren proposamenak. Besteak beste, hiriko urbanizatu gabeko sektoreak, Salburuko eta Zabalganeko partzelazio berriarekin zerikusirik ez dutenak, desklasifikatzea proposatzen da. Era berean, Jauregilandako industrialdea birkalifikatzea azter dadila proposatzen da, bizitegi-erabilera, tertziarioa edo ekipamenduena izan dezan. Beste proposamenetako bat da Borinbizkarran, Hiru Santuetako inguruan eta trenbidea hirian integratzeko espazioan kudeaketa-eremu espezifikoen garapena aztertzea, eta Lakuan hutsik dauden erabilera mistoko lurzatiak birkalifikatzea.

Hiri finkatuari dagokionez, Gasteizko auzoak berroneratu, egokitu eta biziberritzeko 2020-2040 Plan Nagusitik eta dagoeneko abian jarrita dauden birgaitze- eta berroneratze-estrategietatik datoz proposamenak.

2) Bigarren helburu estrategikoari dagokionez —landa-ingurunea eta herriak bultzatu eta babestea—, herrietan garatu gabe dauden lurzoru urbanizagarriko sektoreak oro har desklasifikatzea da irizpidea. Herrien tipologiaren eta kokalekuaren arabera aztertuko dira herri bakoitzaren premiak eta hirigintza-arauak eta parametroak. Orobat baztertzen da Abetxukun eremu berri bat —planaren aurrerapenean planteatutako alternatiba—, eta nekazaritza- eta abeltzaintza-erabileren eta -jardueren erregulazioa berrikustea planteatzen da, herrietako populazioa mantentzeko.

3) Hirugarren helburu estrategikoari dagokionez —natura-, kultura- eta paisaia-ondareari balioa ematea—, hainbat lurzoru eta sektore urbanizagarri desklasifikatzea proposatzen da, hala nola Armentiako parkea, hiriaren inguruan garatu gabeko lurzoruak —Eraztun Berdea osatzeko—, Nekazaritza Eraztuna arautzea eta udal-katalogoa berrikustea, kultura-, paisaia-, arkitektura- eta hiri-balioak aldezteko.

4) Baliabideak eraginkortasunez kudeatzea da laugarren helburu estrategikoaren gakoa, lurralde iraunkorra eta energiari dagokionez eraginkorra ahalbidetzeko. Ildo horretatik, proposamen hauek egiten dira, besteak beste: eraikuntza- eta urbanizazio-ordenantzetan energia-efizientziara eta klima-aldaketara egokitzera bideratutako diseinu- eta eraikuntza-irizpideak txertatzea; ondare eraikia birgaitzeari lehentasuna ematea, hedapen berrien aldean; Lasarteko legar-hobien azpiegitura lurzoru urbanizaezinaren sistema orokor gisa sartzea, eta energia berriztagarrien instalazioak ezartzea erraztea.

5) Jarduera ekonomikoaren galerari aurre egiteko, lurraldearen oreka ekonomikoaren irizpidea aintzat harturik egin ere, hainbat ekintza jasotzen dira agirian, bosgarren helburu estrategikoan. Horrela, hirugarren sektoreko jardueraren alde egiteko, auzoen arteko konexioa sustatzen duten merkataritza-ardatzak sortzea aldezten da, edo merkataritza-lokalak irekitzeko eskakizunak malgutzea. Jarduera ekonomikoetarako lurzoru-erreserbei dagokienez, aireporturako aurreikusitakoak murriztea proposatzen da, VIAPerako lurzoru urbanizagarria mantenduz, baina egungo erreserba (% 80) desklasifikatuz. Orobat proposatzen da Arabako Teknologia Parkean lurzoru urbanizagarria % 70 murriztu eta desklasifikatzea. Aurrerapenean Mercedes handitzeko aurreikusitako erreserbari dagokionez, beharrak aztertuko dira.

Industrialde finkatuei bultzada emateko, berroneratze-eragiketak ahalbidetuko dituzten antolamendu- eta gauzatze-eremuak mugatuko dira.

6) Seigarren helburu estrategikoan —Gasteiz, guztiona eta guztiontzat—, gainerako helburuetarako proposatutako ekintza guztiekin lortu nahi den ondorio nagusia jasotzen da: “osasuna hobetzea, egunerokotasunean mugitzeko beste modu batzuen bidez eta etxebizitzen kalitatea hobetuz; hiri inklusiboa eta genero-bereizkeriarik gabea sustatzea, espazio publiko seguru eta irisgarriak eta gizarte- eta merkataritza-bizitza izango dituena; ingurumen-kalitatea hobetzea, hirigunean integratutako berdeguneekin; inpaktu akustikoak murriztu eta airearen kalitatea hobetzea; kultur ondareari balioa ematea, gasteiztarren ezaugarri gisa, eta berdintasunezko hiri ekitatibo eta bidezkoa sustatzea”, bukatu du Ana Oregik.

Talde politikoek eta teknikariek batzorde txostengilearen datorren asteko bileran aztertu eta onetsi ondoren, Hiri Antolamenduko Plan Orokorra idazteko oinarria izango da agiria, hainbat onespen eman dakizkion tramitatzen hasiko baita jadanik.

Hiri Antolamenduko Plan Orokorraren Irizpide eta Helburuen Proposamena 

Share

Hiri plangintza, auzoen birgaitzea eta energiaren arloko zein klimaren aldeko ekintzarako estrategiak dira udalaren sail “eragilearen” aurrekontuko ardatz nagusi

Lurraldearen eta Klimaren aldeko Ekintzaren Saileko zinegotzi Ana Oregik eta Ingurumen Plangintza eta Kudeaketako zinegotzi César Fernández de Landak  udalaren sail “eragilearen” aurrekontu-proiektuaren ildo nagusiak azaldu dituzte gaur Ana Oregik adierazi duenez, hirigintza arloko saila, plangintza eta antolamendu ataletik, “funtsezkoa” da hiriko proiektuak eta jarduerak gara daitezen.  Aurrekontu-aurreikuspenean arabera, sailak 46,4 milioi euro kudeatzen ditu, guztira.

Hiri plangintzara bideratutako partidez gain,  honakoak nabarmentzen dira gaur aurkeztutakoen artetik : hirigune historikoko plan berezia berrikustea (150.000 euro inguru), animaliak babesteko zentroa hobetzea, Principal antzokia eraberritzea (320.000 euro), erdigunerako Masterplaneko ekintzak (250.000 euro), Eskoriatza-Eskibel jauregiko hobekuntzak (110.000 euro), Ancora eraikinerako proiektua (500.000 euro), 2030 Agenda garatzea (55.000 euro), Energia Iraunkorreko Ekintza Plana (70.000 euro), Mendizorrotza eraberritzeko aldez aurreko lanak eta Gardelegiko zabortegia zigilatzea (1,4 milioi euro).

 

 

 

 

Share

Gasteizek berriro lortu du klima ekintzaren eta gardentasunaren alorretako kalifikazio gorena CDPren zerrendan

Bigarren urtez jarraian lortu du ‘A List’ zerrendan sartutako munduko 88 hirien artean egotea, zeina 2020an hiriek klimaren alorrean jakinarazitako informazioetan oinarrituta osatu baita

 Ana Oregi audioa

Gasteizek kalifikazio gorena lortu du berriroklima ekintzaren eta gardentasunaren  alorretan CDP erakundeak osatzen duen zerrendan; nazioarteko erakunde horrek enpresa eta hiriei laguntzen die beren ekintzek duten ingurumen-inpaktua ezagutarazten. Euskadiko hiriburuak bigarren urtez jarraian lortu du aitorpena, ekintza hauen berri eman baitu: komunitate mailako berotegi-efektuko gasen inbentarioa, emisioak murrizteko helburuaren definizioa, arrisku eta ahuldadeen analisia, eta klima-aldaketa arindu eta hartara egokitzeko klimaren aldeko ekintza-plana argitaratzea; gaur egun eta etorkizunean emisioak eta klima-arriskuak nola murriztuko dituen erakusten dute horiek guztiek.

Gasteiz ingurumen ekintza gidatzen duten 88 hirietako bat da “osasun larrialdiari aurre egiteko presioak gorabehera.  Aurtengo A zerrenda osatzen duten hiriek erakusten dute posible dela ekintza eraginkor eta urgentea”. Antolatzaileek azaldu dutenez, “Gasteiz klima-aldaketarekin lotuta estrategia sendoak garatzeagatik hartu dute aintzat, isuriak murriztu eta ebaluatzeko eta klima-arriskuak arintzeko azterketak eta ekintzak sustatzeagatik, eta CDPrentzat 2020an egindako txostenean horiei buruzko informazio gardena emateagatik.

Hiriak aparteko lekuan daude premiazko neurriak hartzeko. Aurten aitortutako 88 hiriok nola egin erakusten dugu, eta besteei eredu ematen. Hiri eta eskualdeek bermatzen dute kudeaketa eraginkorrena klima aldaketaren aurrean; izan ere, prebentzio- eta arintze-neurri nagusien % 80 inguru hurbilenean diseinatu eta garatzen dira, beharrezkoak ez diren energia-kontsumoak saihestuz, garraio orekatuak sustatuz, hondakinak murriztuz eta azpiegitura berriak eraikitzean lurralde-plangintza hobea eginez”, nabarmendu du Lurraldearen eta Klimaren aldeko Ekintzaren zinegotzi Ana Oregik.

Estatu osoan Bartzelonak eta Murtziak lortu dute aitorpen hori Gasteizekin batera. Iaz ere nazioarteko sari gorena eskuratu zuen euskal hiriburuak, Parisen egindako ekitaldi batean.

CDP (Carbon Disclosure Project) irabazi-asmorik gabeko nazioarteko antolakundea da,  eta enpresa, hiri eta gobernuak  berotegi-efektuko gasen emisioa murriztera eta ur eta baso baliabideak babestera bultzatzen ditu. 2019an, 8.400 enpresak baino gehiagok —merkatu globaleko kapitalizazioaren % 50etik gora dutenak— zabaldu zituzten ingurumenarekin lotutako datuak CDPren bidez. Horietaz gain, 920 hiri, estatu eta eskualdek zabaldu zuten informazioa CDP plataformaren bidez, zeina  informazio-iturri aberatsenetako bat bihurtu baita mundu osoan enpresak eta gobernuak klima aldaketaren aurrean egiten ari direna ezagutzeko.

Hirien zerrenda osoa hemen.

Gasteizko kasua

 

 

 

Share

Aurrera doaz SmartEncity proiektuaren barruan Koroatzearen auzoan bero-sarea ezartzeko obrak, Eulogio Serdan kalean barrena

 

 

Gaurtik aurrera, Eulogio Serdan kalean barrena jarraituko du Koroatzearen auzoko SmartENcity proiektuko bero-sarearen hedapenak.  Giroa enpresa arduratuko da kanalizazio berria instalatzeaz, hilabete luze iraungo duten obrak direla medio. Zirkulazio-lerro bakarra izango da —alboko aparkalekuetako bat baliatuko da horretarako— eta 40 aparkaleku baino gehiago kenduko dira aldi batez, ahal den neurrian, pixkanaka, atzera zabalduko badira ere.

Astelehenean hasiko dira eremua hesiekin ixten, lanerako zona seguru bat prestatu eta inguratzen, bizilagunengandik bereizita gera dadin.

Bi aparkaleku-ilarak kenduko dira, lanek irauten duten bitartean trafikoa eten ez dadin, ezkerreko aparkalekuan barrena desbideratuko baita.

Hodien ‘ferraria’

Tarte horretan, sarearen bi hodi nagusiak instalatuko ditu enpresak, joaneko eta itzulerakoa, argot profesionalean mota horretako hodien ‘ferrari’tzat jotzen diren instalazioak. Hoditeria zurruna da, 12 metroko barretan; isolamendu termikoa dentsitate handiko PUR aparrezkoa, 0,027 W/mK-ko lamdarekin, hodiari eta inguratzaileari gogor atxikitzen zaiona, erresistentzia mekanikoa eta, aldi berean, galera termiko minimoak dituen material konposatua eratuz, eta ihesak antzemateko sistema bat du, +/- 1 m-eko zehaztasunarekin.

Bidegorria baliogabetu egingo da tarte horretan, bi noranzkoetan, harrapatzeko arriskua dela eta; 3,5 metroko arauzko espazioa baino ez baita geratuko, ibilgailuentzat.

Joan den uztailean hasi ziren Koroatzearen auzoan energia berriztagarria darabilen bero-sarea ezartzeko lanak, SmartEncity proiektuari atxikitako auzokoak ur beroz eta berokuntzaz hornitzeko. Aldabe gizarte-etxeko aparkalekuaren inguruan hasi zituen obrak instalazioa eraikitzeaz arduratzen ari den Giroa Veolia enpresak, bertan egongo baita galdara-gela, eta Eulogio Serdan pasabidean.

Obrek 12-14 hilabete irautea aurreikusten da. Une horretatik aurrera hasiko dira auzokoei zerbitzu ematen. Oraingoz, 28 bizilagun-komunitatek egin dute bat bero-sarearen proiektuarekin, Domingo Beltran de Otazu kaleko gimnasio batek, Eulogio Serdan kaleko Koroatzearen parrokiak eta Aldabeko gizarte-etxeak.

“Energia berriztagarria baliatzen duen bero-sareak etxebizitzak energetikoki birgaitzeko proiektua osatzen du. Proiektua oro har aukera paregabea da Koroatzeko auzokoen bizi-kalitatea hobetzeko, eta etxebizitzen energia-eskaria % 50 inguru murriztea lortzeko, dagoeneko eraberritu diren etxeetako emaitzek erakusten dutenez; horri esker, gainera, CO2 emisioak nabarmen gutxitzen dira. Gaur egun, eraikin gehienek ez dute isolamendurik ez fatxadetan ez estalietan, beraz, elementu horiek energetikoki birgaitzeak nabarmen hobetuko ditu etxebizitzen baldintza termikoak eta barruko erosotasuna”, azaldu du Lurraldearen eta Klimaren aldeko Ekintzaren zinegotzi Ana Oregik.

Koroatzearen auzoko bero-sareak energia termikoa (ur beroa) banatuko du bide publikoan barrena, sarera konektatzen diren etxebizitza eta eraikin pribatu guztiak ur bero sanitarioz eta berokuntzaz hornitzeko. Zehazki, ur beroa auzoko espaloietatik banatuko da, lurpetik doazen hodi aurreisolatuen bitartez, eraikin bakoitzaren hartuneraino.

Gasarekin bezala, hodi batek ur beroa igoko du eraikinean gora, etxebizitza bakoitzaren trukagailuetaraino, zeinek oraingo galdarak ordeztuko baitituzte. Energia termikoa (ur beroa) Aldabeko gizarte etxearen atzealdean jarritako galdara-gelan sortuko da. Auzoko galdara horrek biomasa erabiliko du erregai nagusitzat.

Udalak Europako sei herrialdetako beste 34 bazkiderekin batera hartzen du parte H2020 I+G+B europar programaren barruko “Hiri eta komunitate adimentsuak” proiektuan; Gasteiz ereduzko hiria da horretan, eta energia-eraginkortasunaren, garraioaren eta IKTen inguruko irtenbideak modu integratuan aplikatuko dira bertan. Proiektua 2016ko otsailaren 1ean abiarazi zen, eta bost urte eta erdi iraungo du.

Energia-eraginkortasunaren arloan, Gasteizko Udalak orain hasitako bero-sareak Visesa sozietate publikoa (Etxebizitza Sailburuordetza) eraikinetan egiten ari den birgaikuntza-lanen osagarri da.

Koroatze auzoaren birgaikuntza energetikorako proiektu hau izan zen Europar Batasunak aukeratutako lau proiektuetako bat —guztira 42 proiektu aurkeztu zituzten 100 hirik baino gehiagok—, eta biomasa baliatuko duen hiri-berokuntzako sistema bat instalatzea aurreikusten du.

Aldi berean, Gasteizko Udalak espazio publikoan esku hartuko du, beste 2 milioi jarrita. Auzokoek egindako partaidetza-prozesuan erabakitakoari jarraituz, obra hauek egingo dira: Aldabe kalea oinezkoentzat izango da zati batean, eta modernoagoa; Aldabe plaza egoteko eta elkartzeko lekua bihurtuko da, eta Ziudadela plaza, parterreak kenduta, oinezkoak igarotzeko errazagoa izango da. Inguruko argiztapena ere hobetuko da.

Hiriko bero-sarearen ezaugarriak

Koroatzeko Plan Berezian zedarritutako esparruan ezarriko da sarea: iparraldetik, Andre Maria Zuriaren Koroatzearen kaleraino eta Ziudadela plazaraino iritsiko da; ekialdetik, Arriagako ateraino eta Jesusen Zerbitzarien Fundatzailearen kaleraino; hegoaldetik, Badaia kaleraino eta Aldabe plazatxoraino; mendebaldetik, azkenik, Domingo Beltran de Otazu kaleraino. Era berean, bero-sarea alboko kaleetara hedatzeko aukera aurreikusten da.

Giroa enpresaren ordezkari Juanma Taracenak nabarmendu duenez, “azpiegitura honen onura nagusiak dira energia-kontsumoa gutxitzea, auzoko galdara eraginkorragoa erabiliz; atmosferara isuritako CO2 emisioak murriztea; energia berriztagarriak erabiltzea, eta erregai fosilak erabiltzeak dakarren kanpoko energiarekiko mendekotasuna ere apaltzea. Gainera, baliabide propioen balioa nabarmentzen da, Gasteiztik gertuko basoetako ustiapen jasangarrietatik datorren biomasa erabiliko baita”.

Galdara-gela Aldabeko gizarte etxean jarriko da. Biomasa eta gas naturaleko galdarek osatuko dute, eta biomasa gordetzeko silo bat ere izango da, gero beroa sortzeko.

Antzeko instalazioetan esperientzia duten teknikari kualifikatuak arduratuko dira galdara-gelaz, eta azken belaunaldiko kontrol-sistema bat baliatuko da zerbitzua bermatzeko.

Bestalde, birgaitutako eta sarera konektatutako etxebizitzen kalifikazio energetikoa hobetuko da. OHZren murrizketa eskatu ahalko dute horri esker. Etxebizitzen segurtasuna ere handituko da, kendu egingo baitira horietan lehendik dauden tximiniak.

Auzoko berokuntza-sistema zentralera konektatuta dagoen etxebizitza bakoitzari dagokion faktura egingo zaio, eta gutxienez kontzeptu finkoa edo eskuragarritasuna ordaindu beharko ditu, gehi erregistratutako kontsumoari dagokion kontzeptu aldakorra. Etxebizitza hutsik badago, kontzeptu finkoa edo eskuragarritasuna ordaindu beharko ditu, ez zati aldakorra, ur, argi edo gas gastuekin gertatu ohi den bezala.

Sistema berria auzoko etxebizitzetan orain dauden gainerako guztiak —gas naturaleko galdara zentrala, gas naturaleko banakako galdara, butanoko galdara, berogailu elektrikoak— baino merkeagoa izango da. Kontuan izan behar da, gainera, etxebizitzen jabeek ez dutela oraingo instalazioaren mantentze-gasturik ordaindu beharko, ezta etorkizunean berritzeko gasturik ere.

Share

2030 Agendaren garapen iraunkorreko helburuak garatzeko toki-erakundeen sareari atxikitzea erabaki du Gasteizko Udalak

Gasteizko Udala 2030 Agendaren garapen iraunkorreko helburuak garatzeko toki-erakundeen sareari atxikitzea onetsi du gaur goizean Tokiko Gobernu Batzarrak.  Udal politika publikoetan, zeharka, 2030 Agendaren garapen iraunkorreko helburuak lokalizatu eta inplementatzeko konpromisoa hartzen duten gobernu lokalek osatzen dute sarea.

Toki-erakundeen artean jarduketak koordinatzen laguntzera zuzenduta dago sarea, hartara emaitza hobeak lortzeko udalerrietan 2030 Agenda inplementatzean, esparru lokaleko garapen iraunkorreko helburuak lokalizatu eta garatuz.

Covid-19ak eragindako krisialdiari aurre egiteko tresnak, jarraibideak, informazioa eta proposamenak emango dituen tresna bat da; hain zuzen ere, 2030 Agendaren premisa nagusietako bat, zein baita inor atzean ez uztea, aintzakotzat hartuta. Bertako kide diren gobernu lokalen artean esperientziak trukatzeko foroa izan nahi dut sareak, eta orobat eskaini horiei aholkularitza- eta laguntza-zerbitzuak, eta teknikariei prestakuntza.

2030 Agendaren garapen iraunkorreko helburuak garatzeko toki-erakundeen sareari atxikiz, jarduketa-multzo bat definitzeko konpromisoa hartzen du Gasteizko Udalak, eta Jarduketa Plan batean edo Estrategia Lokalaren Plan batean bildu beharko da hori, egoeraren analisiarekin eta 2030 Agendaren garapen iraunkorreko helburuak lokalizatu eta inplementatzeko plan batekin batera.

Aldi berean, agente lokal eta ekonomiko guztiek eta udal-bizitzan ordezkaritza duten herritar-organizazioek parte hartzeko informazio- eta sentsibilizazio-prozesu bati ekin beharko zaio, 2030 Agendaren inplementazio lokalean inplikatu daitezen.

“2030 Agendaren garapen iraunkorreko helburuak garatzeko toki-erakundeen sarearen helburuak guztiz lerrokatuta daude Gasteizko Udalaren helburuekin, eta Udala sare horri atxikitzea aukera ona dela uste dugu, balio eta helburu beren inguruan konpromisoak hartuak dituzten beste udalerriko batzuekiko elkarlana sendotzeko orduan”, azaldu du Ana Oregik, zeinek ordezkatzen baitu Gasteizko Udala 2030 Agendaren garapen iraunkorreko helburuak garatzeko toki-erakundeen sarean.

Share

Astelehenean hasiko dira SmartEncity proiektuaren barruan Koroatzearen auzoan bero-sarea ezartzeko lanak

 

 

Giroa enpresa arduratuko da instalazioa eraikitzeaz; horren bidez, atxikitako etxebizitzak ur bero sanitarioz eta berokuntzaz hornitzeko energia termiko berriztagarria banatuko da

Astelehenean hasiko dira Koroatzearen auzoan energia berriztagarria darabilen bero-sarea ezartzeko lanak, SmartEncity proiektuari atxikitako auzokoak ur beroz eta berokuntzaz hornitzeko. Giroa Veolia enpresa arduratuko da instalazioa eraikitzeaz. Aste honetan hasiko da Aldabeko gizarte etxeko aparkalekua okupatzen, bertan jartzekoa baita galdara-gela.

Lanek 12-14 hilabete irautea aurreikusi da. Une horretatik aurrera hasiko dira auzokoei zerbitzu ematen. Oraingoz, 28 bizilagun-komunitatek egin dute bat bero-sarearen proiektuarekin, Domingo Beltran de Otazu kaleko gimnasio batek, Aldade gizarte etxeak eta Koroatzearen parrokiak (Eulogio Serdan kalea).

Laster informazio bilera bat egingo da atxikitako zein interesatutako auzokoei proiektuari buruzko xehetasun gehiago emateko.

Koroatzearen auzoko bero-sareak energia termikoa (ur beroa) banatuko du bide publikoan barrena, sarera konektatzen diren etxebizitza eta eraikin pribatu guztiak ur bero sanitarioz eta berokuntzaz hornitzeko. Zehazki, ur beroa auzoko espaloietatik banatuko da, lurpetik doazen hodi aurreisolatuen bitartez, eraikin bakoitzaren hartuneraino.

Gasarekin bezala, hodi batek ur beroa igoko du eraikinean gora, etxebizitza bakoitzaren trukagailuetaraino, zeinek oraingo galdarak ordeztuko baitituzte. Energia termikoa (ur beroa) Aldabeko gizarte etxearen atzealdean jarritako galdara-gelan sortuko da. Auzoko galdara horrek biomasa erabiliko du erregai nagusitzat.

Udalak Europako sei herrialdetako beste 34 bazkiderekin batera hartzen du parte H2020 I+G+B europar programaren barruko “Hiri eta komunitate adimentsuak” proiektuan; Gasteiz ereduzko hiria da horretan, eta energia-eraginkortasunaren, garraioaren eta IKTen inguruko irtenbideak modu integratuan aplikatuko dira bertan. Proiektua 2016ko otsailaren 1ean abiarazi zen, eta bost urte eta erdi iraungo du.

Energia-eraginkortasunaren arloan, Gasteizko Udalak orain hasitako bero-sareak Visesa sozietate publikoa (Etxebizitza Sailburuordetza) eraikinetan egiten ari den birgaikuntza-lanen osagarri da.

Koroatze auzoaren birgaikuntza energetikorako proiektu hori izan zen Europar Batasunak aukeratutako lau proiektuetako bat —guztira 42 proiektu aurkeztu zituzten 100 hirik baino gehiagok—, eta biomasa baliatuko duen hiri-berokuntzako sistema bat (District Heating) instalatzea aurreikusten du.

“Energia berriztagarria baliatzen duen bero-sareak etxebizitzak energetikoki birgaitzeko proiektua osatzen du. Proiektua oro har aukera paregabea da Koroatzeko auzokoen bizi-kalitatea hobetzeko, eta etxebizitzen energia-eskaria % 50 inguru murriztea lortzeko, dagoeneko eraberritu diren etxeetako emaitzek erakusten dutenez; horri esker, gainera, CO2 emisioak nabarmen gutxitzen dira. Gaur egun, eraikin gehienek ez dute isolamendurik ez fatxadetan ez estalietan, beraz, elementu horiek energetikoki birgaitzeak nabarmen hobetuko ditu etxebizitzen baldintza termikoak eta barruko erosotasuna“, azaldu du Lurraldearen eta Klimaren aldeko Ekintzaren zinegotzi Ana Oregik.

Aldi berean, Gasteizko Udalak espazio publikoan esku hartuko du, beste 2 milioi jarrita. Auzokoek egindako partaidetza-prozesuan erabakitakoari jarraituz, obra hauek egingo dira: Aldabe kalea oinezkoentzat izango da zati batean, eta modernoagoa; Aldabe plaza egoteko eta elkartzeko lekua bihurtuko da, eta Ziudadela plaza, parterreak kenduta, oinezkoak igarotzeko errazagoa izango da. Inguruko argiztapena ere hobetuko da.

Hiriko bero-sarearen ezaugarriak

Koroatzeko Plan Berezian zedarritutako esparruan ezarriko da sarea. iparraldetik, Andre Maria Zuriaren Koroatzearen kaleraino eta Ziudadela plazaraino iritsiko da; ekialdetik, Arriagako ateraino eta Jesusen Zerbitzarien Fundatzailearen kaleraino; hegoaldetik, Badaia kaleraino eta Aldabe plazatxoraino; mendebaldetik, azkenik, Domingo Beltran de Otazu kaleraino. Gainera, ondoan dauden beste kaleetako auzokidei aukera emango diete.

Giroa enpresako ordezkari Juanma Taracena -k nabarmendu duenez, “azpiegitura honen onura nagusiak dira energia-kontsumoa gutxitzea, auzoko galdara eraginkorragoa erabiliz; atmosferara isuritako CO2 emisioak murriztea; energia berriztagarriak erabiltzea, eta erregai fosilak erabiltzeak dakarren kanpoko energiarekiko mendekotasuna ere apaltzea. Gainera, baliabide propioen balioa nabarmentzen da, Gasteiztik gertuko basoetako ustiapen jasangarrietatik datorren biomasa erabiliko baita”.

Galdara-gela Aldabeko gizarte etxean jarriko da. Biomasa eta gas naturaleko galdarek osatuko dute, eta biomasa gordetzeko silo bat ere izango da, gero beroa sortzeko.

Antzeko instalazioetan esperientzia duten teknikari kualifikatuak arduratuko dira galdara-gelaz, eta azken belaunaldiko kontrol-sistema bat baliatuko da zerbitzua bermatzeko.

Bestalde, birgaitutako eta sarera konektatutako etxebizitzen kalifikazio energetikoa hobetuko da. OHZren murrizketa eskatu ahalko dute horri esker. Etxebizitzen segurtasuna ere handituko da, kendu egingo baitira horietan lehendik dauden tximiniak.

Auzoko berokuntza-sistema zentralera konektatuta dagoen etxebizitza bakoitzari dagokion faktura egingo zaio, eta gutxienez kontzeptu finkoa edo eskuragarritasuna ordaindu beharko ditu, gehi erregistratutako kontsumoari dagokion kontzeptu aldakorra. Etxebizitza hutsik badago, kontzeptu finkoa edo eskuragarritasuna ordaindu beharko ditu, ez zati aldakorra, ur, argi edo gas gastuekin gertatu ohi den bezala.

Sistema berria auzoko etxebizitzetan orain dauden gainerako guztiak —gas naturaleko galdara zentrala, gas naturaleko banakako galdara, butanoko galdara, berogailu elektrikoak— baino merkeagoa izango da. Kontuan izan behar da, gainera, etxebizitzen jabeek ez dutela oraingo instalazioaren mantentze-gasturik ordaindu beharko, ezta etorkizunean berritzeko gasturik ere.

Share