Prentsa Oharren banner

Udalak eta Aldundiak kanpaina bat abiarazi dute Araba eta Gasteiz destino seguru eta berde gisa kokatzeko

Gasteizko Udalak eta Arabako Foru Aldundiak turismoa sustatzeko kanpaina berri bat egingo dute datozen asteetan, Araba eta Gasteiz destino seguru gisa kokatzeko eta probintzia mugakideetako bisitariak erakartzeko helburuarekin. ‘Hartu arnas Araban’ leloa du kanpainak, eta hiriko euskarrietan, komunikabideetan eta sare sozialetan izango du presentzia.

Maider Etxebarria lehen alkateorde eta Ekonomia, Merkataritza eta Turismoa Sustatzeko zinegotziak eta Cristina González Enplegua, Merkataritza eta Turismoa Sustatzeko Saileko foru diputatuak kanpaina baten mezuak, sormenak eta bideoak aurkeztu dituzte gaur. Kanpaina horren helburua da barneko turismoa sustatzea eta, batez ere, Bizkaia, Gipuzkoa, Nafarroa, Errioxa, Burgos eta Kantabriatik datorren hurbileko turismoa erakartzea.

Kanpaina honen abiapuntua da testuinguru berezi bat: covid-19aren osasun krisia eta destinoa aukeratzeko orduan bidaiariek dituzten motibazioetan duen eragina. “Bidaiariek -azaldu du Cristina Gonzálezek- gaur egun destino lasaiak eta jendetzarik gabeak eskatzen dituzte, ingurune seguruak, aire zabaleko jarduerak, natura eta espazio irekiak… Beste destino batzuek berrasmatu egin behar dute balio aldaketa horiei erantzuteko, baina guk ez”.

Ildo beretik, Maider Etxebarriak azpimarratu du Gasteizek eta ingurumena errespetatzeko eta zaintzeko dituen estrategiak “aukera ematen dutela gure hiria eta, hedaduraz, Araba osoa sustatzeko, arnas eta atseden hartzeko eta natura, ondarea eta lehen mailako gastronomia gozatzeko destino gisa, jendetzarik gabe. Kanpaina honekin gonbidatzen dugu kultura, plazak eta parkeak, Erdi Aroko Almendrako txokoak eta biztanle eta bisitarientzat bizi kalitate handia duen hiri batek eskaintzen duen guztia ezagutzera etor daitezen”.

Atseden hartu eta gozatu

Kanpainaren helburua da Araba eta Gasteiz oporretarako alternatiba gisa kokatzea hurbileko turismorako. Gune seguruak, jendetzarik gabeko inguruneak, natura eta esperientzia kultural eta gastronomikoak eskaintzen ditu, kalitatekoak eta jasangarriak. Eta ‘arnasa hartu’ terminoarekin jokatzen du, atseden hartu, lasaitasuna berreskuratu eta bakarrik, familian edo lagunekin gozatzeko destino osasuntsu eta segurua deneko ideia helarazteko.

Filosofia hori hurrengo asteetan Gasteizko hiri euskarrietan, probintzia mugakideetako komunikabideetan eta sare sozialetan zabalduko diren sormen, irrati iragarki eta ikus-entzunezko guztietan agertzen da. Araban eta Gasteizen aire garbia eta natura ‘arnasten’ dela, kirola eta abentura ‘arnasten’ dela, kultura ‘arnasten’ dela eta gastronomia ‘arnasten’ dela transmititzen duten sormenak, bideoak eta iragarkiak dira.

Kanpaina hau, era berean, zehazten da argitaratzean natura, historia eta kultura, abentura, familia turismoa eta enogastronomia maite dutenek Araban eta Gasteizen ‘arnasa har dezaten’ ideia eta plan iradokitzaileak dituen diseinu zainduko liburuxka bat. Argitalpenak 32 orrialde ditu eta datozen egunetan egongo da eskuragarri, paperean Arabako turismo bulegoetan, eta formatu digitalean www.alavaturismo.eus web orrian.

Azkenik, ikus-entzunezko bat du, azoketan eta turismoa sustatzeko beste ekitaldi batzuetan bultzatzeko tresna gisa erabiltzeko. Gainera, formatu txikiagoko bost bideo tematiko ditu, sare sozialetan hedatuko direnak. Bideo tematiko horien bidez, naturako turismoa, turismo aktiboa, familia turismoa, turismo gastronomikoa eta turismo kulturala bilatzen dutenen arreta erakarri nahi da.

Estrategia integrala

‘Hartu arnas Araban’ kanpaina Arabako Foru Aldundia eta Gasteizko Udala uda honetan elkarrekin garatzen ari diren turismoa sustatzeko estrategia integralaren barruan dago. Estrategia hori oraindik garatzen ari den ‘Gera zaitez’ kanpainarekin hasi zen, barne turismoa sustatzeko; eta jarraitu zuen merkatu nazionalari zuzendutako Antonio Resinesen bideo bat sare sozialetan zabaltzearekin.

Orain, eta hirugarren lan ildo gisa, hurbileko turismoari bideratutako kanpaina berri hori abiatu dute. ‘Hartu arnas Araban’ kanpainak lehen ekintza izan zuen, duela bi aste Bilboko erdigunean turismo informazio gune bat irekita, bizkaitar eta bisitariei Gasteizko eta Arabako natura, kultura, ondare eta enogastronomia eskaintza osoa ezagutarazteko.

 

Share

Gasteizek bat egin du turismo, merkataritza eta ostalaritza bonoen euskal programarekin

  • Besteak beste, Eusko Jaurlaritzak eta Arabako Foru Aldundiak finantzatzen dute tokiko kontsumoa sustatzeko kanpaina

 

Lehen alkateorde eta Ekonomia Sustapenaren, Enpleguaren, Merkataritzaren eta Turismoaren zinegotzi Maider Etxebarriak eskaturik, Gasteiz turismo, merkataritza eta ostalaritza bonoen euskal programari atxikitzea onetsi du gaur Tokiko Gobernu Batzarrak. Gasteizko Udalak bi protokolo sinatu ditu horretarako.

‘Euskadi Turismo Bono 2020’ eta ‘EuskadiBonoDenda’ izeneko programak hainbat erakunderen arteko koordinazioaren emaitza dira: Eusko Jaurlaritza, Arabako Foru Aldundia, Eudel eta autonomia erkidegoko beste aldundi eta udal batzuk. Ostalaritza, turismo eta merkataritza establezimenduetan kontsumitzea sustatu nahi da horien bidez, koronabirusaren krisialdiak ekonomian izandako eraginari aurre egiteko.

“Erakundeen arteko lana funtsezkoa da une honetan tokiko merkataritza eta turismoa bultzatzeko. Bonoen formulak iraganean funtzionatu du, eta orain gure hirian kontsumoa suspertzeko balioko dute”, azaldu du Ekonomia Sustapenaren, Enpleguaren, Merkataritzaren eta Turismoaren zinegotzi Maider Etxebarriak.

Sektorea biziberritzea eta dinamizatzea da bonoen helburua, beste neurri batzuekin batera, hala nola sustapen kanpainak eta laguntzak. Merkataritzari dagokionez, txikizkako establezimenduetako kontsumoa piztea da xedea. Programaren oinarrian dagoen erakundeen arteko akordioak pizgarri sistema bera sustatzen du Euskadi osoan: deskontu-bonoak herritarren eskura jartzea haien lurralde-eremuko merkataritza-establezimenduetan. Turismoaren kasuan, enpresa turistikoetan kontsumitzera bultzatu nahi da, deskontuak eskainiz ostatu, jatetxe, taberna edo jardueretan.

 

 

Share

Gasteizek 40.000 euroko laguntza onetsi du tokiko turismo-enpresentzat

Ekonomia Sustapenaren, Enpleguaren, Merkataritzaren eta Turismoaren Sailak eskaturik —Maider Etxebarria zinegotziak gidatzen du hori—, Tokiko Gobernu Batzarrak 40.000 euroko partida bat onetsi du gaur, produktu eta esperientzia turistikoak sortu eta garatzeko dirulaguntzak emateko. Covid-19aren krisialdiak eragindako tokiko turismo-enpresak sustatzeko balioko du aparteko partida horrek.

Deialdiak bi jarduera-ildo hartzen ditu barne: batetik, iraunkortasuna sustatzen duten produktu edo esperientzia turistikoak sortu, hobetu edo garatzea; bestetik, Arabako hiriburuan topaketak, jardunaldiak eta jarduerak antolatu eta garatzea.

“Gasteizek bere indarguneetan izan behar du konfiantza, orain inoiz baino gehiago ekoturismoaren aldeko apustua egin, eta biltzarren eta familien turismoa, aktiboa eta iraunkorra erakartzen saiatu. Badugu biltzarrekin lotutako azpiegitura eta jardueren sare zabala, eta turismo berdearekin lotutako irudia. Deialdi honen bidez, tokiko turismo-enpresei produktu edo esperientzia turistiko iraunkorrak garatzen lagundu nahi diegu, baita hemen jardunaldiak eta topaketak egitea sustatzen dutenak ere”, zehaztu du lehen alkateorde eta Turismo zinegotzi Maider Etxebarriak.

Laguntza horiek Gasteizko Udalak ekonomia suspertzeko bultzatu duen planean daude jasota, zeinaren helburu nagusia baita osasun krisialdiaren eragina gehien nabaritu duten kolektiboak babestea, hala nola hiriko merkataritza, ostalaritza, enpresa txikiak eta autonomoak.

Fidelizazioa eta iraunkortasuna

Euskadi turismo-helmugaren hazkundea etengabea eta jasangarria izan da covid-19aren pandemia zabaldu arte. EUSTATen datuen arabera, turismoaren sektorea Euskadin BPGd-aren % 6,1 izan zen 2019an, eta ia 107.000 enplegu zituen, guztien % 11; hazkundea, bestetik, ekonomiaren hazkundearen gainetik zegoen. Sektoreak potentzial handia du, eta aberastasun ekarpen ekonomiko zein kulturala sortzen du. Datu horiek kontuan hartuta,Udalaren helburua da bisitariak urte osoan etortzea Gasteizera, eta horiek fidel bihurtzea, turismoaren itzulera ekonomikoa handitzearren, bai jarduerari bai enpleguei dagokienez.

 

Share

Gasteizko merkatari, ostalari eta enpresa txiki eta ertainek ekain erdialdean eskatu ahalko dituzte suspertze planaren barruko laguntzak

Lehen alkateorde Maider Etxebarriak gogorarazi duenez, maskarak, babes-pantailak, gelak eta desinfektatzaileak erosteko dirulaguntzak emango dira

Lehen alkateorde Maider Etxebarriak gaur iragarri duenez, Udalak abian jarri du administrazio-izapidea bere sailak landutako Gasteizko Ekonomia Suspertzeko Planak jasotzen dituen laguntzak aktibatzeko. Joan den astean aurreratu zuenez, besteak beste, 750.000 euroko partida bat sortu da hiriko enpresek eta autonomoek segurtasun-materiala eros dezaten.

Zinegotziak iragarri du deialdiaren oinarrietan eskabideak aurkezteko epea “ekain erdialdera” hastea aurreikusten dela. Hala ere, zehaztu du horrelako prozesuek —aurrekontu-aldaketa garrantzitsuetatik eratorritakoak izanik— administrazio-bide bati jarraitu behar diotela, eta horren buruan dagozkien iragarkiak Arabako Lurralde Historikoaren Aldizkari Ofizialean (ALHAO) argitaratu behar direla.

“Sektoreari laguntzak abian jarriko genituela hitz eman genion, eta gure hitza betetzen ari gara. Epea ahalik eta azkarren irekiko da, ekain erdialdera ziur aski, administrazio prozesua errespetatu beharra baitago”, azaldu du Ekonomia Sustapenaren, Enpleguaren, Merkataritzaren eta Turismoaren arduradunak.

Laguntza horiek Gasteizko Ekonomia Suspertzeko Planaren bost ardatzetako lehenean jasotzen dira, eta hiriko sektore ekonomikoen eskaera nagusietako bati erantzuten diote. Diruz lagundu daitezkeen gastuen artean daude maskarak, eskularruak, aurpegia babesteko pantailak, manparak, prebentzioko eta higiene sanitarioko materiala eta instalazioak desinfektatzeko materiala, hala nola gel edo xaboi desinfektatzaileak.

Birusak eragindako aholkularitza- eta kontsultoria-gastuak ere finantzatuko dira, baita itxialdian egindako eraldaketa digitalarekin lotutako inbertsioak ere. Zehazki, hamar langile baino gutxiago dituzten enpresa txikientzat izango dira laguntzak.

 

 

Share

Gasteiz Turismo Helmuga Adimentsuen Sare Nazionalean sartu da

Gasteizek bat egin du Turismo Helmuga Adimentsuen Sare Nazionalarekin. Industria, Merkataritza eta Turismo Ministerioak sustatutako plataforma horrek alderdi hauetan nabarmentzen diren lekuak identifikatzeko balio du: berrikuntza, abangoardiako azpiegitura teknologikoak, irisgarritasuna, bisitariaren integrazioa eta bertako biztanleen bizi-kalitatearen hobekuntza. Arabako hiriburuak urtarrilean aurkeztu zuen DTI sarean sartzeko hautagaitza, Madrileko turismo nazioarteko azokan (FITUR). Eta maiatzaren 20an onetsi zen eskabidea Espainiako Turismo Helmuga Adimentsuen Sarearen batzorde eragilean, Industria, Merkataritza eta Turismo ministro Reyes Maroto buru zela.

Turismo Helmuga Adimentsuak proiektua, zeina SEGITTUR sozietatearen bitartez kudeatzen baita, aitzindaria da estatuan eta nazioartean; haren helburua da lehiakortasuna hobetzea eta turismoaren garapena gobernantzan eta erantzukidetasunean oinarritzea, teknologia berrien laguntzarekin. Batzordearen ondoren, ministroak nabarmendu zuen udalerrien egitekoa funtsezkoa dela turismo adimentsu eta segurua sustatu eta bermatzeko, eta protagonistak izango direla sektore hori suspertzen, sektore gakoa baita, bai ekonomian duen pisuagatik bai gizarte- eta lurralde-kohesioari egiten dion ekarpenagatik.

“Covid-19aren krisiak are arrazoi gehiago ematen dizkigu gure indarguneak aldezteko eta turismo-helmuga berritzaile eta jasangarriaren eredua sendotzeko. DTI sareari atxikitzea beste urrats bat da helmuga seguru, irisgarri, osasungarri eta masifikatu gabe gisa kokatzeko estrategian. Azken batean, kalitate handiko helmuga gisa”, nabarmendu du Ekonomia Sustapenaren, Enpleguaren, Merkataritzaren eta Turismoaren zinegotzi Maider Etxeberriak.

Share

Turismo Zerbitzuak ‘Horrelakoa da Gasteiz’ lehiaketa antolatu du, hiriko lekurik erakargarriak parteka ditzagun

Parte-hartzaileek hainbat sari irabazi ahalko dituzte: gau bat hotel edo landetxe batean, bazkari edo afari bat, bonu bat bertako txikizkako saltokietarako eta bisita gidatu bat

Gasteizko Udalaren Turismo Zerbitzuak lehiaketa bat antolatu du gasteiztarrek hirian gustukoen dituzten txokoak ezagutarazteko. Arabako hiriburuko anfitrioi perfektuen bila dabiltza.

Beren bisitariei zein leku erakutsiko lieketen pentsatzeko eskatzen die ekimenak gasteiztarrei; maiatzaren 11ra arte hartu ahalko da parte. Leku horietan ateratako argazkiak partekatzean datza lehiaketa, txoko historikorik gogokoena hoberen agertzen duen irudia, natura-espazio bat, tradizio bat, kultura-jarduera bat, saltoki bat edo hiriko enogastronomia.

“Sare sozialetan aktibitate handia dago asteotan, eta gure hiriaren erakargarriak partekatu eta ezagutarazi ditzakegu horien bidez. Eta zein garai hoberik hau baino denen artean egiteko, gasteiztarren laguntzarekin, haiek ezagutzen baitituzte inork baino hobeto bertako txokoak”, azaldu du Gasteizko Ekonomia Sustapenaren, Enpleguaren, Merkataritzaren eta Turismoaren zinegotzi Maider Etxebarriak.

Parte-hartzaileek hainbat sari irabazi ahalko dituzte: bi pertsonarentzako gau bat hotel edo landetxe batean, bi pertsonarentzako bazkari edo afari bat, 100 euroko bonu bat bertako txikizkako saltokietarako eta bisita gidatu bat.

Parte hartzeko, nahikoa da irudia #HorrelakoaDaGasteiz eta #TurismoVitoria traolekin argitaratzea eta zerbitzuak sare sozialetan dituen profilei jarraitzea: @TurismoVitoria Twitter eta Facebooken, eta @Turismo_Vitoria Instagramen.

‘Horrelakoa da Gasteiz’ lehiaketa

Share