Prentsa Oharren banner

Gasteizek 100.000 euro bideratuko ditu turismoa dinamizatzeko eta hiria promozionatzeko laguntzetara

Udalak doako bost bisita gidatu antolatu ditu Turismoaren Nazioarteko Egunaren harira, eta horietako bat gauez izango da, Armentiako basoan barrena.

 

Tokiko Gobernu Batzarrak turismoa dinamizatzeko eta hiria promozionatzeko laguntza-programa onetsi du gaur, eta 100.000 euroz hornitu. Deialdi publiko hori 2021eko Laguntza Planaren berritasunetako bat da; “sektorearen iradokizunak aintzat hartuz diseinatu da, turismo-jarduera berpizteko eta Gasteiz helmuga iraunkor gisa promozionatzeko estatuko zein nazioarteko merkatuetan”, lehen alkateorde eta Ekonomia Sustapenaren zinegotzi Maider Etxebarriak azaldu duenez.

Onetsi berri den deialdiak bi laguntza-ildo barne hartzen ditu. Batetik, biltzarrak, jardunaldiak, ekitaldiak eta mintegiak antolatzeko proiektuak lagunduko dira diruz, haien originaltasunagatik edo ezaugarriengatik beste hiri, erkidego edo herrialde batzuetako bisitariak erakartzen dituztelarik.

Bestetik, laguntza ekonomikoa emango zaie Gasteizen egiten diren ekitaldiak, jaialdiak edo jarduerak kanpoan promozionatu eta komunikatzeko ekintzak barne hartzen dituzten proiektuei, “estatuko zein nazioarteko merkatuetan hiriaren irudia sustatzeko erreferentziazko helmuga turistiko, kultural eta enogastronomiko iraunkor gisa” adierazi du Etxebarriak.

Zinegotziak erantsi du udal gobernuak Turismo Mahaian hartutako konpromisoa zela hori, eta Udalak aurten sektoreari berariaz zuzenduta abiarazi duen bigarren laguntza plana dela honakoa. Lehenengoak ere, martxoan onetsitakoak, 100.000 euroko aurrekontua zuen, eta pandemiak eragindako bidaia-agentzien, turismo-gidarien, egoitza txikien eta biltzarrak antolatzen dituzten enpresen gastu arrunta estaltzeko baliatu zen.

Bisita berriak

Bestalde, datorren astelehenean, hilak 27, Turismoaren Mundu Eguna ospatuko da, eta Udalak doako bost bisita tematiko antolatu ditu horren karietara, urriaren 1ean, 2an eta 3an. Lehenengoa gauez egingo da, ostiraleko 21.30ean hasita, Armentiako basora. Naturgune horretan aditua baten laguntzarekin barneratzeko aukera emango du.

Larunbatean, urriak 2, doako hiru proposamen eskainiko dira. Batetik, ‘bisita berdea’, Gasteizi turismo-helmuga iraunkorra izateak zer dakarkion zabaltzeko eta herritarrek ingurumenarekin hartutako konpromisoa sendotzeko xedea duena (11.45ean gaztelaniaz eta 12.15ean euskaraz); bestetik, Erdi Aroko hiriguneko etxarteen bisita (10.15ean gaztelaniaz eta 12.15ean euskaraz); azkenik, eskulturen ibilbidea (17.45ean).

Igandean, asteburuari amaiera emateko, Turismo Bulegoak Florida parkea bisitatzeko aukera emango du ‘Hegazti-fauna’ ibilbidearen bitartez (9.30ean euskaraz), zeinean parkeak ‘hiri-birika’ gisa duen potentziala azpimarratuko baita.

Oraingoan, bisitak doakoak izango dira. Turismo Bulegoan eskuratu daitezke informazioa eta erreserbak, astelehen irailaren 27ko 12.00etatik aurrera. Bulegoan bertan (9.30etik 18.30era lanegunetan eta 10.00etatik 14.00etara igande eta jaiegunetan) edo telefonoz (945 16 15 98 zenbakia) egin ahalko da.

Share

Irudika 2021 ilustrazioaren bosgarren topaketa profesionalari lagunduko dio Gasteizko Udalak

Euskal Irudigileak elkartearekin hitzarmena egitea onetsi du gaur goizean Tokiko Gobernu Batzarrak, Maider Etxebarria zinegotzia buru duen Ekonomia Sustapenaren, Enpleguaren, Merkataritzaren eta Turismoaren Sailak proposatuta, IRUDIKA nazioarteko ilustrazioaren topaketa profesionalaren 5. edizioa antolatzeko.

9.100 euroko dirulaguntza emango die Gasteizko Udalak antolatzaileei, iazko esperientzia birtualaren ondoren formatu fisikoa berreskuratu dezan topaketak. Hain zuzen ere, Artium Museoan izango da, urriaren 28tik 30era bitartean, plataforma digitala ere irekita edukiko badu ere, eduki guztiarekin eta hitzordu profesionalekin.

Nazioarteko Ilustrazioaren Euskadiko Topaketa Profesionala da IRUDIKA, Euskal Irudigileen Elkarte Profesionalaren ekimenez sortua. Hitzaldiak, lantegiak, lan-mahaiak, sareko lana eta beste tarteko, nazioarteko edozein azokaren aukerak eskaini nahi dizkie bertaratzen direnei. Euskadiko, Estatuko nahiz atzerriko hizlariak izango dira, eta hitzordu profesionalak. Portugal, Txile eta Belgikatik etorritako gonbidatuak izango dira aurten.

“Gure hiria ilustrazioaren arloko nazioarteko erreferente bihurtzen duen ekimen bat delako laguntzen diogu IRUDIKAri, eta aukerak sortzen dituelako Gasteizentzat eta kulturaren sektorearentzat”, nabarmendu du Ekonomia Sustapenerako zinegotzi eta lehen alkateorde Maider Etxebarriak.

 

 

Share

Ekonomia Zirkularra sustatzeko plana eta 2030 estrategia izango du agintaldi honetan Gasteizek

Hiriak ekonomia zirkularraren arloan dituen aukerei buruzko hausnarketa egin ahal izateko diagnostiko bat egiteko lehiaketa bat plazaratzea onetsi du gaur IGIk, gerora, hori oinarri hartuta, partaidetza-prozesu baten bidez 2030erako marko estrategikoa eta ekintza-plana egiteko

 

 

Gasteizek Ekonomia Zirkularreko plan propioa eta 2030erako marko estrategikoa izango ditu agintaldi honetan, tokiko ekonomia linealetik tokiko eredu zirkular baterako trantsizioa bizkortzeko. Lurralde eta Klimaren aldeko Ekintzaren eta Ekonomia-Sustapenaren sailek batera bultzatuko dute. IGIko Kontseiluak gaur goizean egin duen bileran diagnostiko bat egiteko laguntza teknikoa lehiaketara ateratzea onetsi du, hiriak ekonomia zirkularraren arloan dituen aukerei buruzko hausnarketa egin ahal izateko, eta, horretan oinarrituta, bigarren fase batean, 2030erako esparru estrategikoa eta ekintza-plana egitea partaidetza-prozesu baten bidez. Kontratuko lote guztien aurrekontua 96.050 eurokoa da.

Kontratuaren xedea da 3 laguntza tekniko espezializatu izatea, 2030erako Tokiko Estrategia eta Ekintza Plana diseinatzeko eta idazteko proiektuan laguntzeko. Plan horrek 4 urteko iraupena izango du, eta adierazle-sorta bat, partaidetza- eta komunikazio-prozesuaren diseinua eta egikaritzea, eta ekonomia zirkularraren inguruko kontsumo-ohiturei eta herritarren pertzepzioari buruzko azterlan bat“, azaldu du IGIko presidente Ana Oregik, zeinak, aldi berean, azpimarratu baitu zeinen garrantzitsuak diren “bultzada koordinatua eta sail eta diziplinen arteko estrategia partekatua, Europak eskatzen diguten bidean jarraitzeko”. “Gasteiz erreferentea da oraindik ere hirigintza-, ekonomia- eta ingurumen-jarduketetan, betiere jasangarritasuna jomugan, eta hala izan nahi du zirkulartasunaren esparruan ere, Europako politikekin bat egingo duen estrategia propio eta zehatz baten bidez”.

Ekonomia-Sustapenerako zinegotzi Maider Etxebarriak nabarmendu duenez, “Klima-aldaketaren aurkako eta trantsizio ekologikoaren aldeko politikek sendotu egiten dituzte gure enpresak, gure ekonomia modernizatzen dute eta enplegua sortzen“. Ildo horri jarraiki, Gasteizko Udalak “azken urteetan jarduera garrantzitsuak egin ostean, ekonomia zirkularrarekin lotutako estrategia indartu” behar duela azpimarratu du. Adibide gisa, lehen alkateordeak 2017ko bat gogorarazi du: orduan Udalak “diziplina anitzeko talde tekniko bat osatu zuen, Enpresen, Plangintzaren eta Ingurumen Kudeaketako (Hondakinak Kudeatzeko Unitatea) zerbitzuetako langileekin, eta horri esker hainbat proiektu garatu ahal izan dira, materialen kudeaketari dagokionez ikuspegi diferentzial bat txertatuta, tokiko ikuspuntua alegia“. Diziplina anitzeko talde horretara Jasangarritasun, Klima eta Energia Zerbitzua eta Ingurumen Gaietarako Zentroa gehitu dira berriki, barne-harremanak sendotzeko, ahaleginak bateratzeko eta talde bakoitzaren know-howen bidez aberasteko.

 

 

Share

Tokiko artisautzaren ‘Lanberri’ azoka jarriko da bihartik Gasteizen

  • Eskulangintza ezberdinetako 14 saltoki irekiko dira Independentzia kalean

Ekonomia Sustapenaren Sailak eta Artisau Arabako artisautza elkarteak antolatu dute ‘Lanberri’ azoka, pandemiak eragindako geldialdiaren ondoren Arabako hiriburuan egiten den lehena. Bihar hasita, uztailak 3, uztailaren 11ra arte, askotariko lanbideekin lotutako hamalau saltoki jarriko dira Independentzia kalean.

Eskulangintzarena da azken urtean bide berriak asmatu behar izan dituzten sektoreetako bat. “Lanberri” azokak eskulangileen lana bistaratuko du, haiek landutako produktuen salmentaren bidez. Besteak beste, arlo hauekin lotutako produktuak aurkitu ahalko dira: zeramika, ehungintza, kosmetika, egurra, erretxina edo estanpazio botanikoa.

Azoka egunero irekiko da, 11:00etatik 14:00etara zein 17:30etik 21:30era, uztailaren 11n izan ezik, egun horretan bakarrik goizean irekiko baita

Share

(Argazkiez eguneratuta) Ekonomia Sustapenak bat egin du SEA ostalaritzak eta Gasteiz Onek ostalaritza bultzatzeko abiarazitako “Dastatu Vitoria-Gasteiz” kanpainarekin

  • Hamar afari zozketatuko dira uztailaren 26ra arte ekimenari atxikitako 220 establezimenduetan kontsumitzen dutenen artean.

Maider Etxebarria lehen alkateordea buru duen Ekonomia Sustapenaren, Enpleguaren, Merkataritzaren eta Turismoaren Sailak “Dastatu Vitoria-Gasteiz” ekimena aurkeztu du, gaur goizean, SEA ostalaritza eta Gasteiz Onekin batera. Gasteizko ostalaritzari laguntzeko ekimena da, pandemiak sektorean izan duen eraginaren ondoren.

220 establezimenduk egin dute bat ekimenarekin, eta azken hilabeteetan sektoreari leial izan zaizkion herritarrak saritzea du xede, eta bi pertsonentzako hamar afari zozketatuko dira. Gaurtik uztailaren 26ra bitartean, kutxak egongo dira atxikitako establezimenduetan, eta bezeroak beren datuak utzi ahalko dituzte bertan, zerbait kontsumitu ondoren, hamar afarien zozketan parte hartu ahal izateko.

Ekonomia Sustapenaren zinegotzi Maider Etxebarriak prentsaurrekoan adierazi duenez, “Gasteizko udalak hainbat neurri jarri ditu sektoreari laguntzeko, esaterako, kaleko mahaiak, laguntza ekonomikoak, tasak ordaintzeko salbuespenak eta dinamizazio-neurriak. Ildo horretan, Udalean erne jarraituko dugu, eta honelako kanpainen alde egiten “ gaineratu du. Halaber adierazi du “ostalaritza bidegabeki seinalatu dute eta merezi duten gutxienekoa da gure laguntza eta profesionaltasuna aitortzea”.

Bestalde, SEA ostalaritzako lehendakari Elena Martinek adierazi duenez, “ordezkatzen dudan sektoreak baikortasunez aurre egiten dio, baina zuhurtziaz, Gasteizko ostalaritzarako udarik onena izatea espero duenari, izan ere ostalaritzak gasteiztarren beharra du, eta gasteiztarrek beren ostalaritza behar dute”. Ildo horretan, Martinek adierazi du ostalaritza prest dagoela bezeroen behar eta gustuak betiko kalitatearekin asetzeko, higiene- eta segurtasun- neurri zorrotzak betez.

Gasteiz Oneko lehendakari Diego Martinez de San Vicentek adierazi duenez “ekimen honek ikusgarritasuna eman nahi dio pandemiak larriki jotako sektoreari, arreta-gunea izan baita pandemian, eta orain sektoreari buruz modu positiboan hitz egin dadila nahi du, hiriari ematen dion guztiagatik”. Halaber, herritarrei eskerrak eman dizkie kontsumitzeagatik. Bestetik, Martinez de San Vicente jaunak SEAren eta Gasteiz Onen arteko lankidetza goraipatu du. “Pandemiaren aurretik, baina batez ere pandemian, elkarrekin aritu gara ostalarien interesak defendatzen, gure indarrak batuta” adierazi du.

Share

Udaltzaingoak kaleak zaintzeko ibilgailu hibrido eta elektrikoak gehituko dizkio flotari

 14 patruila-auto berri eskuratuko ditu: 7 hibrido eta 7 elektriko. 

Udal-talde guztiek ordezkaritza duten batzorde txostengile politiko batek definituko du polizia-zerbitzuaren geroko egitura.

 

Udaltzaingoak bere flotaren jasangarritasunaren aldeko apustu irmoa egin du, hemendik gutxira 7 patruila-ibilgailu elektriko eta 7 hibrido gehituko baitizkio flotari; hartara,  zaintza-lanetan erabiltzen diren ibilgailuetan emisioak murrizteko konpromisoa hartzen duten lehenengoetakoa izango da Espainiako udal polizien artean.

Lehen alkateorde eta sozialisten eledun Maider Etxebarriak iragarri du hori udal politikari buruzko eztabaidaren bigarren saioan, eta udaltzaingoaren ibilgailu horiek berritzeko Herritarren Segurtasunaren Sailaren, Ogasun Sailaren eta Udal Administrazioaren Sailaren arteko lankidetza nabarmendu du. “Ez da patruila-ibilgailuetan mugikortasun iraunkorraren eta emisioak murriztearen alde hain apustu irmoa egin den beste udaltzaingorik“, azaldu du Etxebarriak.

Lehen alkateordeak iragarri du, orobat, udal-talde guztiek ordezkaritza duten batzorde txostengile politiko bat osatuko dela, “udaltzaingoaren egitura definitzeko datozen urteetarako. Gure poliziaren geroa garatzeko une erabakigarrian gaude, berrikuntza garrantzitsuak biziko baititu”.

Berritasunetako bat Erbina kaleko egoitza berria izango da, tren-geltokitik hurbil; publikoarentzako arreta eskainiko da bertan, eta orain Agirrelandan kokatutako ataletako batzuk ere hartuko ditu. “Erdialdera hurbiltzeko aukera emango digu, eta oraingo polizia-etxean leku gehiago izatea; hartara, udaltzainen lan-baldintzak hobetuko ditugu, baita poliziak herritarrei ematen dien zerbitzua ere”.

Hurbileko polizia

Maider Etxebarriak oraingo udal gobernuak azken bi agintaldietan deitutako 110 agente-lanpostu nabarmendu ditu, halaber. “Udalean ez da sekula egin hainbesteko ahaleginik gure udaltzaingoa langile gehiagoz hornitzeko, eta desiratutako hurbileko polizia ezartzeko bide emango digu horrek”.

 

Share

Turismo Bulegoak gaikako 225 bisita gidatu eskainiko ditu aurtengo udan

Uztailean kanpaina bati ekingo dio, bi bisita baten prezioan erosi ahal izateko

Hiriko hegaztiak behatzeko bisita berri batek Arriagako eta Iparraldeko parkeak hartuko ditu barne

 

Gasteizko Turismo Bulegoak gaikako 225 bisita gidatu eskainiko ditu aurtengo udan; bi ibilbide berri eta bisitak sustatzeko zein bertako gidari-enpresei laguntzeko kanpaina bat ere sortu ditu.

Aurten hainbat gairi buruzko 225 bisita gidatu antolatu dira, mota ezberdinetako publikoari zuzenduta, bereziki iraunkortasuna, natura eta aire zabaleko ariketa fisikoa azpimarratuz. Ildo horretatik, eta berritasun gisa, hiri barruan hegaztiak behatzeko ibilbideak eskainiko dira (birding urbanoa). Hartara, zirkuitu turistikoetan lehen sartzen ez ziren Gasteizko inguruak ezagutu ahalko dira, Iparraldeko eta Arriagako parkeak, esaterako, eta leku horietako biodibertsitatearen balioa nabarmendu.

Gasteiz hiri berdea ibilbidea ere estreinatuko da: horren bidez, Gasteizen garapenean iraunkortasunak izan duen eta duen garrantzia azalduko da, eta zergatik bihurtu den hiria turismo iraunkorreko helmuga nagusietako bat.

Naturari eskainitako eskaintzak Florida parkea ezagutzeko ohiko bisita ere hartzen du barne, eta etxarteak eta hilerria ezagutzeko bisitak egiten jarraituko da aire zabaleko eskaintzaren barruan, baita bizikletaz eta lasterka aritzeko ibilbideak ere. Horretaz gain, umore ibilbideak, muralen ibilbidea eta eskulturena egin ahalko dira kanpoaldean, modu seguruan.

Bestetik, Turismo Bulegoak —Ekonomia Sustapenaren, Enpleguaren, Merkataritzaren eta Turismoaren Sailaren mende dago, zeinaren buru Maider Etxebarria lehen alkateorde baita— bisitaldi gidatuak sustatzeko kanpaina bat egingo du uztailean. Zehazki, bi bisita gidatu eskainiko dira baten prezioan, 1.000 plaza agortu arte. Uztailaren 1eko 12:00etatik erreserbatu ahalko dira, txartelak zuzenean www.vitoria- gasteiz.org/turismo web-orrian erosiz.

Maider Etxebarria: “Gasteizko Turismo Bulegoak duen bisita gidatu profesionalen eskaintza zabala ikusarazi nahi dugu, eta haren balioa nabarmendu. Une garrantzitsu honetan gure hirian turismo segurua berpizteko beste urrats bat da hau”.

Share

Gasteizek merkataritza eta ostalaritza-enpresak ezarri eta modernizatzeko laguntzak eskatzeko epea ireki du

Maider Etxebarriak dioenaren arabera, aurkeztutako proiektuek “inbertsioaren % 25 eta % 40 bitarteko dirulaguntza jaso ahal izango dute”.

Laguntzek ildo berri bat dute, terrazetarako altxariak erosteko.

Gasteizko Udalak txikizkako merkataritzaren, zerbitzu pertsonalen eta ostalaritzaren arloetako enpresa txikiak —50 enplegatu, gehienez— ezartzeko eta berritzeko laguntzak eskatzeko epea ireki du. Eskabideak ekainaren 18ra arte aurkeztu ahal izango dira eta deialdiak 300.000 euroko aurrekontua du. Maider Etxebarria lehen alkateorde eta Ekonomia Sustapenerako zinegotziak azaldu duenez, “sektorearen eskaerak aintzat hartu ditugu eta aurkeztutako proiektuek inbertsioaren % 25 eta % 40 bitarteko laguntzak eskuratu ahal izango dituzte. Dirulaguntzak ahalik eta lokal gehienetara iristea espero dugu, atzeraeraginezkoak izango direlako gainera. Zehazki, 2020ko uztailaren 18tik hil honetako 18ra bitartean egindako gastuak ordainduko dituzte”.

Laguntza-ildoaren helburua da hiriko enpresa txikien lehiakortasunaren hobekuntza sustatzea. Honako hauei zuzentzen zaie deialdia: abian jartzeko edo berritzeko inbertsioa egiten duten saltokiak, tabernak, jatetxeak, hotel txikiak, eta zerbitzu pertsonalen negozioak —hala nola ile-apaindegiak eta estetika-zentroak—. Diruz lagundu daitezke, besteak beste, ekintzak hauek: lokalak zaharberritzekoak, ekipoak hobetzekoak —jarduera nagusiarekin zerikusia duten makinak eta altxariak, eguzki-oihalak, pertsianak, aire-garbigailuak eta manparak—, eta pandemiak eragindako aholkularitza-gastuak.

Berrikuntza gisa, deialdiak ildo bat dauka Udalak baimendutako mahai hankabarrak ekipatzeko elementuak erostea diruz laguntzeko. “Pauso hau ematen dugu ostalaritzari laguntzeko, terrazak ahalik eta gehien aprobetxatu behar dituelako. Laguntza hauekin eguzki-oihalak, mahaiak, aulkiak, aldi baterako itxiturak edo lorontziak erosteko dirulaguntzak emango dira”, gehitu du Etxebarriak.

 

Share

Gasteizek abian jarri du 2021erako laguntza-plana, ikus-entzunezkoen sektoreari eta ekintzaileei zuzendutako dirulaguntzak onetsita

Ekonomia Sustapenaren Sailak 184.000 euro jarriko ditu bi deialdi horietarako

 

Ekonomia Sustapenaren, Enpleguaren, Merkataritzaren eta Turismoaren Sailaren 2021erako laguntza-planaren barruko lehen bi dirulaguntza-ildo onetsi ditu gaur Tokiko Gobernu Batzarrak; asteazkenean aurkeztu zen plan hori. Zehazki, ikus-entzunezkoen proiektuak ekoizten laguntzeko ildoa eta ekintzaileentzako bekak jarri ditu abian udal gobernuak, zeinek orotara 184.000 euroko aurrekontua izango baitute (184.000 eta 84.000 euro, hurrenez hurren); oinarriak laster argitaratuko dira ALHAOn.

Lehen alkateorde Maider Etxebarriak azpimarratu duenez, “Ekonomia Sustapenaren alorreko laguntza-planaren lehen fasearen diseinua amaitu eta bi egunetara, iragarritako zortzi ildoetako bi aktibatu ditu jada gobernuak. Hain une zailean, pandemiak eragindako jarduerei laguntzeko aurrerapausoak emateko beharrari erantzuten diote dirulaguntza hauek. Oraingoan, sorkuntza-enpresei eta krisiak krisi ekiteko eta autoenplegua lortzeko ausardia duten pertsonei”.

Batetik, sorkuntzaren eta ikus-entzunezkoen alorretako industrientzako laguntzak onetsi dira, 100.000 euroko aurrekontuarekin. Deialdiak hiru jarduera-ildo barne hartuko ditu: lehenengoa, zinema, telebista eta plataforma digitaletako proiektuak garatzeko (50.000 euro); bigarrena, film laburrak ekoizteko (40.000 euro), eta hirugarrena, gidoiak idazteko (10.000 euro).

Bestetik, ekintzaileentzako beken programari dagokion partida onetsi da, zeinak 84.000 euro jasoko baititu 2021erako udal-aurrekontuaren kontura. Laguntza horiek ekonomia jardueren gaineko zergan alta emanda ez dauden eta enpresa-ekimen bat garatzen ari diren pertsona fisikoei zuzenduta daude. Negozio-ideia bat duten pertsonek jaso ditzakete, baldin eta proiektuaren ezaugarri bereziek dena delako pertsonak aldi batez erabat proiektuari emana jardutea eskatzen badute, proiektua behar bezala ondu ahal dezan, Ekonomia Sustapenaren Saileko adituen laguntzarekin.

Ohikoa denez, deialdiak Arabako Lurralde Historikoko Aldizkari Ofizialean (ALHAO) argitaratzen diren unean irekiko dira laguntza bakoitzerako eskabideak aurkezteko epeak.

 

 

 

Share

Udalak luzatu egin du industrialdeetarako mugikortasunari buruzko inkestari erantzuteko epea; 142 enpresatako 2.244 pertsonak erantzun dute jada

-Maider Etxebarria alkateordeak eta Raimundo Ruiz de Escudero Mugikortasunaren zinegotziak parte-hartzaile guztien artean zozketatutako lehenengo bizikleta elektrikoa eman dute gaur.

-Mercedes Benz enpresako enplegatua den Sergio Iglesiasek irabazi du ibilgailua

-Hemendik aurrera inkesta betetzen duten pertsona guztiek beste bizikleta elektriko tolesgarri bat irabazteko aukera izan dezakete; bigarren epe hau amaitzean zozketatuko da.

Raimundo Ruiz de Escudero, Sergio Iglesias eta Maider Etxebarria

Gasteizko Udalak erabaki du otsailaren 15era arte luzatzea industrialdeetarako mugikortasunari buruzko inkestari erantzuteko epea, langile eta enpresa gehiagori aukera emateko lanerako mugikortasuneko beren ohiturak azaltzeko. Gaur egun arte, 2.244 pertsonak eta 142 enpresak erantzun dute, eta parte-hartzaile guztien artean zozketatu da lehenengo bizikleta elektriko tolesgarria; Sergio Iglesias Mercedes Benzeko langilea izan da irabazlea. Kasualitatez, Sergiok garraiobide hori erabili ohi du lantokira joateko.

 

Gasteizko Udaleko alkateorde Maider Etxebarriak eta Mugikortasunaren eta Espazio Publikoaren zinegotzi Raimundo Ruiz de Escuderok eman diote gaur bizikleta elektrikoa zozketaren irabazleari, eta iragarri dute beste bizikleta elektriko tolesgarri baten zozketan sartuko direla bigarren txanda honetan mugikortasunari buruzko inkestari erantzuten diotenak. “Eskerrak eman nahi dizkiegu orain arte inkesta bete duten pertsona eta enpresa guztiei. Oso datu garrantzitsuak ematen ari zaizkigu gure industrialdeetako mugikortasun iraunkorrerako planari heltzeko. Hain zuzen ere, langile eta enpresa gehiagok beren mugikortasunaren benetako irudia erakusteko aukera izan dezaten erabaki dugu inkestari erantzuteko epea handitzea. Inkesta horien bidez benetako datuetan oinarrituta elkarlanean landu ahal izango dugu lanerako mugikortasuna”, azpimarratu du Gasteizko Udalak. Udalaren webgunean dago inkesta, bertan erantzun ahal izateko: https://www.vitoria-gasteiz.org/wb021/was/contenidoAction.do?idioma=es&uid=u_18359735_175d9d01609__7e89

 

Gasteizko industrialdeetarako mugikortasunari buruzko inkesta tresna nagusietako bat da haietarako mugikortasun iraunkorraren plan bat egiteko; egunero, 37.000 pertsona baino gehiago joaten dira hiriko industrialdeetara. Udalerriko industrialdeez gain (haren barruan dago Arabako Teknologia Parkea), Gasteizekin harreman estua duten gertuko beste bi poligono ere hartzen ditu galdetegiaren lan-eremuak: Goiain eta Subillabide. Bi inprimaki-eredu daude: bata langileei zuzendua, eta bestea, enpresei. Dagoeneko erantzun duten 140 enpresa baino gehiagotatik, zortzik baino ez dute adierazi mugikortasun plan bat eginda dutela; horrek argi erakusten du alderdi horretan sakontzeko beharra dagoela; izan ere, Klima Aldaketari buruzko Euskal Legeak mugikortasun-plan propio bat abian izatea eskatzen die plantillan 100 pertsona baino gehiago dituzten enpresa guztiei.

 

Inkestei erantzuteko epea amaitutakoan, Udalak lortutako emaitzak aztertuko ditu, abiapuntu bat proposatzeko, zeinetik abiatuta gainerako eragilerekin batera lan egingo baitu hiriko industrialdeetarako Mugikortasun Iraunkorreko Plana sortzeko.

 

 

Share