Prentsa Oharren banner

12 kamera pertsonal eskuratu ditu Udaltzaingoak, arrisku- edo larrialdi-egoeretako esku-hartzeak grabatzeko

Bihartik aurrera, Udaltzaingoak 12 bideokamera pertsonal erabiliko ditu, Herritarren Segurtasunaren Sailak landutako erabilera-protokolo batean jasota dauden arrisku- edo larrialdi-egoerak grabatzeko.

Euskadiko Bideozaintza Batzordeak berriki baimendu dituen gailu horiek erabiliz, delituen prebentzioan eta jazarpenean aurrera egin nahi da, baita poliziaren lanari gardentasun handiagoa eman ere, segurtasun handiagoa emango baitie agenteei eta herritarrei.

“Esku-hartzeak grabatze hutsak momentuko tentsioa nabarmen murrizten laguntzen du. Disuasio-efektua du. Hala egiaztatu genuen duela zenbait hilabete egin genuen proba pilotuan. Bertan ikusi genuen kamerek lagundu egiten dutela egoera jakin batzuk azkarrago konpontzen, hain gatazkatsu ez izaten. Animoak baretzen laguntzen dute. Gainera, esku-hartzea grabatuta geratuko dela jakiteak segurtasun eta berme handiagoa ematen die herritarrari eta esku hartzen duten agenteei”, azaldu du Herritarren Segurtasuneko zinegotzi Marian Gutiérrezek.

Udaltzaingoak erositako 12 kamerak kalean lan egiten duten hurbileko patruilek diharduten segurtasun-eremuari izendatuko zaizkio. 160 gramo pasatxoko pisua dute, eta polizia-uniformeari lotuta joango dira; bateria-karga batekin, 8 bat orduz grabatu ahal izango dute.

Jarduketa-prozedura

Udaltzaingoak jarduketa-prozedura bat diseinatu du irudiak grabatu ahal izango diren egoerak finkatzeko, indarrean dauden lege eta araudietan xedatutakoaren ildotik. Hain zuzen ere, arrisku-egoeretan edo aparteko larrialdi-egoeretan aktibatuko dituzte agenteek bideokamerak.

Pertsonekin egiten diren esku-hartzeak grabatzekotan, jakinarazi egin beharko diete, datuak eskuratu, zuzendu, baliogabetu eta kontra egiteko eskubideez baliatzerik izan dezaten. Salbuespen bat egokitu daiteke: esku-hartzearen berehalakotasuna, konplexutasuna edo arriskua dela-eta aurretiko komunikazio hori ezinezkoa izatea. Kasu horretan, gerora jakinarazi beharko dute.

Grabazioen irudiak udal-zerbitzari batean gordeko dira, eta gehienez ere hilabeteko epean ezabatuko dira, non eta ez dauden lotuta segurtasun publikoaren arloko arau-hauste penal edo administratibo larriekin edo oso larriekin, abian den polizia-ikerketa batekin edo prozedura judizial edo administratibo ireki batekin.

Ekipamenduak berritzea

Herritarren Segurtasunaren Sailak agintaldi honetan ekipamenduak berritzeko abian jarritako estrategiaren parte dira kamerak, Udaltzaingoa baliabide hobeez hornitu nahi baita.

Ildo horretatik, 14 patruila-auto erosiko zirela  iragarri zen berriki —7 elektriko eta beste 7 hibrido—, 4×4 modelo batez gain, milioi bat euro pasatxoko aurrekontuarekin. Bestalde, balen kontrako txalekoak ere berritzen ari da Udaltzaingoa, eta motorzaleentzako kasko berriak ere erosi ditu, besteak beste.

Share

Gasteizeki bat egingo du Ponle Freno lasterketa solidarioarekin, hartara trafiko-istripuen biktimak babestuko dituelarik

Beste behin ere, Gasteizek Ponle Freno herri-ekimena hartuko du, hots, bide-segurtasuna sustatzen eta trafiko-istripuko biktimak babesten dituen lasterketa solidarioa.

Aurten, eta pandemia tarteko, kirol-jarduera birtuala izango da. Horrenbestez, parte hartu nahi dutenek partaide guztien geolokalizazioa eta sinkronizazioa ahalbideko duen Ponle Freno Virtual aplikazioa baliatu beharko dute.

Lasterketa estatuko 10 hiritan egingo da aldi berean, bi egunez: ekainaren 19aren (larunbata) goizeko 06:00etatik ekainaren 20aren (igandea) 23:00ak arte. Tarte horretan, partaideek hautatu duten distantzia egin beharko dute (5 edo 10 kilometro), eta aplikazioaren bitartez emaitza igo beharko dute gero. Hartara, partaide bakoitzaren mugikorrak izango dira euren chipak.

Ekimenaren xehetasunak azaldu ditu gaur goizean Herritarren Segurtasunaren zinegotzi Marian Gutiérrezek, Foru plazan egin den aurkezpen ekitaldian, alboan zituela lasterketaren komunikazio-zuzendari Natalia Rico eta Axa Fundazioaren zuzendari nagusi Josep Alfonso.

Gutiérrezek esker ona adierazi die antolatzaileei, “beste behin ere Gasteizen konfiantza jarri duzuelako ekimen hau egiteko. Aintzat hartzekoa da osagai hezigarri eta elkartasunezko oso nabarmenak dituela, hala baita trafiko-istripuen prebentzioa. Irakasten, prebenitzen eta kontzientziatzen badugu urrats sendo eta seguruak ematen ariko gara kale eta errepideak seguruagoak izan daitezen. Udaltzaingoan bide publikoaren erabiltzaileen arteko bizikidetza hobetzeko lanean dihardugu. Eta horrek bizitzak salbatzen ditu”.

Share

Ikasleentzako bide-segurtasunaren gaineko marrazki-lehiaketako sariak banatu ditu Udaltzaingoak

Lehen Hezkuntzako 5. eta 6. mailetako ehunka ikaslek parte hartu dute “Seguru bizi” lehiaketan

Isabela Escobar —Hogar San José ikastetxekoa—, Naroa Fernández de Mendia —Korazonisten ikastetxekoa— eta Giorgi Kurasbediani —San Martin ikastetxekoa— izan dira Udaltzaingoak urtero antolatu ohi duen “Seguru bizi” marrazki-lehiaketako lehen, bigarren eta hirugarren sarien irabazleak.

Lehen Hezkuntzako 5. eta 6. mailako ikasleek parte hartzen dute lehiaketan, zeinen helburua baita bide-hezkuntza sustatzea eta bide-segurtasuna eta bide publikoko erabiltzaileen arteko bizikidetza ona bultzatzen duten arauak betetzeko beharraz kontzientziatzea ikasleak.

Bizikleta bat, diploma bat eta ziklista-kit bat —kaskoa, argiak eta txirrina— jaso dute saritzat irabazleek. Beste 25 ikasleren lana ere saritu da, eta horiek ere jaso dute diploma eta ziklista-kita. Goiuri jauregian izan da sari-banaketa, Gorka Urtaran alkatea eta Herritarren Segurtasuneko zinegotzi Marian Gutiérrez bertan zirela.

Bide-hezkuntzako urteko egutegia argitaratuko du Udaltzaingoak saritutako 12 marrazki onenekin.

Lehen saria

Bigarren saria

 

Hirugarren saria

 

Share

Armentiako zelaietarako sarbideak kontrolatuko dituzte Udaltzaingoak eta Ertzaintzak, San Prudentzio egunean pilaketarik izan ez dadin  

Bertara ez joateko eskatu du Herritarren Segurtasunaren Sailak, eta Covid-19aren kontrako neurriak betetzeko

Kontrol eta zaintza berezia ezarriko dute Udaltzaingoak eta Ertzaintzak Armentian, apirilaren 28an, San Prudentzio eguna dela eta.

Bi polizia-kidegoak zelaietan egongo dira sarrera kontrolatzeko —mugatuta egongo baita, oso—, gasteiztarrak bertara saldoan jo ez dezaten, jaieguna dela eta.

Covid-19aren kontrako neurriak betetzeko, osasun publikoaren arloko arrazoiengatik eta pilaketak saihesteko, Armentiako zelaiak zedarritu egingo dira, eta edukiera kontrolatuko.  Horretarako, sartzeko zona bakarra jarriko da, eta irteera bat, biak ere basilikaren ondoko aparkalekuan.

Era berean, eta beharrezkoa bada, Armentiara sartzeko bideetan trafikoa mugatu ahal izango du Udaltzaingoak, eta bizilagunen, zerbitzu publikoen eta TUVISAren ibilgailuei bakarrik utzi igarotzen.

Armentiara ez joatea gomendatzen du Udalak, hurrengo baterako uztea jaia. “Pertsona guztien osasuna babesteari eman behar zaio lehentasuna orain, eta, horretarako, ezarritako neurri sanitarioak zorrotz bete behar dira, eta jende pilaketak saihestu”, azaldu du Herritarren Segurtasunerako Saileko zinegotzi Marian Gutierrezek.

Share

Delituak % 8 inguru jaitsi dira Vitoria-Gasteizen 2020an

Vitoria-Gasteiz hiri segurua da, mila biztanleko 55,06ko delitu-tasa du, 2019an baino % 9,13 gutxiago, eta Euskadiko hiru hiriburuetako baxuena da.

Nabarmen egin dute behera delitu-mota batzuek: etxeetako lapurretek (-% 51,46), enpresetako lapurretek (-% 50) eta indarkeria eta beldurra erabiliz egindako lapurretek (-% 30,54).

Gasteizen delituek % 8,3 egin zuten behera iaz, 2020an, 2019an 15.256 erregistratu baitziren eta iaz 13.984, Ertzaintzaren eta Udaltzaingoaren datu bateratuetan jasota dagoenez. Zifra horiek agerian uzten dute Arabako hiriburua hiri segurua dela COVID-19ak eragindako pandemiak markatutako urtean. Datuen analisiak egiaztatzen du behera egin zutela delitu estrategikoek, besteak beste, ondarearen aurkakoek, modalitate guztietan. Hauteman da zertxobait gora egin dutela sexu-askatasunarekin eta lesioekin, oro har, zerikusia duten delituek eta zertxobait gehiago iruzurrek, nagusiki Internet bidez egindakoek.

Martxoaren 14tik aurrera, alarma-egoera dekretatu eta koronabirusaren hedapena geldiarazteko osasun murrizketak eta mugak ezarri ondoren, egoera berria sortu zen eta aldatu egin zen unean uneko faktoreetan, denborarekin eta inguruarekin, besteak beste, asteko egunekin, jaiekin, urtaroekin edo ekitaldiekin, zerikusia duten faktoreetan, oinarritutako “delitu-patroi tradizionala”. Konfinamenduak, ordutegia, mugikortasuna eta distantziak murriztu izanak eta abarrek baldintzatu egin dituzte delitu-moten bilakaera eta azken urtean erregistratutako jaitsierak.

Ondarearen aurkako delituak: Nabarmen egin dute behera atal honetan sartzen diren delitu-mota gehienek: etxeetako lapurretek (-% 51,46), enpresetako lapurretek (-% 50), ebasketek (-% 40,53) eta indarkeria eta beldurra erabiliz egindako lapurretek (-% 30,54). Behera egin dute indarra erabiliz dendetan egindako lapurretek (-% 35,74) eta beste leku batzuetan egindakoek ere. Pandemiaren ondorioz ordutegian eta mugikortasunean ezarritako murrizketek eragina izan dute jaitsiera horretan. Hala ere, datuen analisiak agerian uzten du nabarmen egin dutela gora, % 91,71, hain zuzen ere, iruzurrek: 2019an 1.448 erregistratu baitziren eta iaz 2.776. COVID-19ari aurre egiteko ezarritako konfinamenduen ondorioz Internet bidez egindako erosketek gora egin izana da joera horren arrazoietako bat.

Pertsonen aurkako delituak: Epigrafe honetan etxeetan egiten diren arau-hausteak nabarmendu daitezke. Orokorrean zenbatuta, genero-indarkeriak % 10,8 egin du behera Gasteizen, baina gora egin dute lesio-delituekin zerikusia duten familia barruko tratu txarren kasuek. Era berean, lesioen aurka jarritako salaketekin zerikusia duten datuetan ere, orokorrean, igoera txiki bat izan da, % 4,58koa, alegia. Sexu-askatasunaren aurkako egintzengatik erregistratutako kasuak ere % 4,65 igo dira.

Segurtasun kolektiboaren aurkako delituak (droga-trafikoa): Substantzia sorgorgarrien trafikoarekin erlazionatutako egintzengatik instruitutako eginbideak % 9,45 jaitsi dira. Joera bera izan dute alkoholaren edo drogen eraginpean gidatzeagatik egindako delituek ere, 2019ko 267 kasuetatik 220ra jaitsi baitira (-% 17,60), gaueko orduetako ibilgailuen zirkulazioari eta aisialdiari eragin dioten ordutegi-mugekin zuzenean lotuta.

Datu horiekin, Gasteizeko mila biztanleko delituen tasak % 9,13 egin du behera, eta 60,59tik 55,06ra jaitsi da.

 

6.255 pertsona jarri zituzten epailearen eskuetan

Delituen kopuruak orokorrean behera egin badu ere, % 3 igo da atxiloketen kopurua, hain zuzen ere, 1.069tik 1.101era. Aitzitik, jaitsi egin da ikertutako pertsonen kopurua, eta zenbaketa globalean, beraz, Ertzaintzak eta Gasteizko Udaltzaingoak atxilotutako eta ikertutako pertsonen kopurua jaitsi egin da, eta 2019an 6.643 izan ziren eta 2020an 6.255, hau da, % 5,8 gutxiago.

 

Estrategia bateratua, prebentzioa, koordinazioa, informazioa eta analisia

Polizia-efizientzia, gertaeren aurrean eman beharreko erantzuna eta egindako delituak argitu ahal izateko ikerketa hobetzeko eta herritarren segurtasunaren arloan emandako arretan gogobetetasuna lortzeko, funtsezkoa da Gasteizko Udaltzaingoaren eta Ertzaintzaren arteko lankidetzan, koordinazioan eta elkarlanean oinarritutako estrategia bateratua.

Alde horretatik, bi polizia-kidegoek sarri egiten dituzte bilera bateratuak giza baliabideei eta baliabide teknikoei eta materialei probetxu hobea ateratzeko, polizia-operatibo koordinatuak ezartzeko, industria eremuak eta auzoak mugatzeko eta lortutako emaitzak ebaluatzeko.

2020an, koronabirusaren pandemiak markatu duen urtean, oraindik ere gehiago indartu da Ertzaintzaren eta Udaltzaingoaren arteko koordinazioa, etengabe aldatzen eta egokitzen joan den osasun-araudia barneratu eta betetzen dela zaindu behar izan baitute.

Lankidetza horrekin jarraituz elkartu da gaur Gasteizko Udalean Eusko Jaurlaritzako Segurtasun Saileko eta Udaleko Koordinazio Batzordea, Josu Zubiaga Segurtasuneko sailburuordea eta Gorka Urtaran alkatea buru direla. Bilera horretan beste akordio bat adostu da Ertzaintzaren eta Udaltzaingoaren koordinazio-protokoloa eguneratzeko, eta laster sinatzekoa den protokolo horrek, besteak beste, bi polizia-kidegoek aurre egin behar izaten dieten gertaeretan esleitu beharreko baliabideak koordinatuko ditu.

Share

Logroñoko alkatea Gasteizko Herritarren Segurtasunaren Sailarekin bildu da, Gasteizko Udaltzaingoaren eredua ezagutzeko

Logroñoko udalaren ordezkari batzuk –bertako alkate Pablo Hermoso de Mendoza, lehen alkateorde Eva Tobías eta udaltzainen komisario buru Pedro Galarreta– Gasteizen izan dira gaur goizean, hemengo Udaltzaingoaren ereduaren berri izateko.

Gasteizko lehen alkateorde Maider Etxebarriak hartu ditu Gasteizko udalean, eta Herritarren Segurtasunaren zinegotzi Marian Gutierrezekin, saileko zuzendari Javier Sáez Lanasekin eta Roberto Garcia Tobalina komisarioarekin bildu dira.

Errioxako hiriburuak Gasteizko udaltzaingoa hartu du erreferente eskaintzen dituen hainbat zerbitzutan. Agirrelandako zenbait atalek, genero- eta familia indarkeriaren taldeak eta adin txikikoen taldeak esaterako, piztu dute Logroñoko ordezkarien interesa.

Lehen topaketa honen ondoren, Gasteizko udalak Logroñoko udala bisitatuko du.

Share

Udaltzaingoak prestakuntza-ikastaro bat hasi du herritarrekiko agenteen interakzioa hobetzeko

Astelehenean, otsailaren 15ean, Udaltzaingoak plantilla osorako prestakuntza-ikastaro bat hasiko du, zeinak helburua baitu herritarrekiko interakziorako ahalmena hobetzea. Agirrelandako agente guztiek, agintariak barne, 6 orduko ikastaroa egingo dute; horretan “estrategia psikologikoak” irakatsiko dizkiete, Gasteizko bizilagunekiko komunikazioa eta harremanak hobetzeko.

“Gure agenteek ematen duten tratua, oro har, zuzena bada ere, hobetzeko aukera dago, eta hori aprobetxatuko dugu herritarrekiko haien interakzioa hobetzeko. Gure bizilagunengandik hurbilago egon nahi dugu, hurbileko polizia eta zerbitzu gisa benetan ikus gaitzaten.  Horretarako, arreta egokiena eskaini behar da egoera bakoitzean, eta horrela izan dadin behar diren tresnak eduki”, azaldu du Marian Gutiérrezek, herritarren segurtasuneko zinegotziak.

Udaltzaingoko psikologoak emango du prestakuntza-ikastaroa, lau bloketan antolatuta:

  • Udaltzaingoaren ereduaren azterketa eta gogoeta.
  • Herritarrekiko interakzioan eragina duten faktoreak aztertzea.
  • Pertsonen arteko harremanak sustatzeko eta arazoak konpontzeko teknikak bereganatzea: komunikazio-estiloak aztertzea, emozio-patroiak maneiatzea (etsaitasuna, herra, haserrea…) eta abar.
  • Berri txarren berri ematea.

400 agente baino gehiagok, agintaritza barne, parte hartuko dute egun bateko prestakuntza honetan, maiatzera arte. 22 saio emango dira, 20 bat pertsonako taldetan.

Prestakuntza Udaltzaingoan

“Herritarrekiko interakzioko estrategia psikologikoak” ikastaro hau arestian egindako LGTBI gaiari buruzko beste bati gehitzen zaio. Joan den abenduan, gaiari buruzko prestakuntza-jarduera bat amaitu zen; horretan, kolektibo horren kontrako gorroto-delituei aurre egiteko une bakoitzean nola jokatu den ikasi zuten Agirrelandako udaltzain guztiek.

Share

Udaltzaingoak patinete elektrikoen 24 erabiltzaile salatu ditu aste bakarrean  

Espaloietatik eta oinezkoen alderdietatik patinete elektrikoz zirkulatzeko debekua aplikatu den lehen astean, Udaltzaingoak 24 patinete-erabiltzaile salatu ditu.

Urtarrilaren 2an sartu zen indarrean mugikortasun pertsonaleko ibilgailu horien zirkulazioa mugatzeko Trafiko Zuzendaritza Nagusiak emandako errege dekretua. Urtarrilean zehar araudi berriaz ohartarazi zituen Udaltzaingoak erabiltzaileak, eta otsailaren 2an hasi zen ez-betetzeak zigortzen.

Otsailaren 2tik 8ra bitartean egindako 24 salaketak honela banatzen dira: 13, espaloitik eta oinezkoen alderdietatik zirkulatzeagatik; 3, patinete batean pertsona bat baino gehiago joategatik; 2, zirkulatzean mugikorra baliatzeagatik; 2, 1.000 wattetik gorako patinetea matrikulatu gabe eramateagatik; 2, kontrako noranzkoan joateagatik; 1, entzungailuak jantzita zirkulatzeagatik; 1, alkohol eta droga tasa gainditzeagatik, eta 1, semaforo gorria ez errespetatzeagatik.

Herritarren Segurtasunaren zinegotzi Marian Gutiérrezek eman ditu datu horiek gaur goizeko udal batzordean; orobat jakinarazi du datorren astean informazio-kanpaina bat egingo dela tokiko hedabideetan, patineteentzako arau berriak gogorarazteko.

Une honetan, Gasteizko Udala mugikortasunari buruzko ordenantza berria lantzen ari da, estatuko araudian jasota ez dauden alderdiak erregulatzeko.

 

 

Share

Gasteizko Udaltzaingoak erregistratutako delituen kopurua % 24 jaitsi zen 2020an

Pandemia hasi zenetik, Udaltzaingoak 6.509 salaketa jarri ditu covid-19aren kontrako neurriak ez betetzeagatik

 

Gasteizko Udaltzaingoak erregistratutako delituen kopurua % 24 jaitsi zen 2020an. 2019an, Udaltzaingoak 7.777 atestatu egin zituen eta iaz, 5.910, hau da, 1.867 gutxiago.

Herritarren Segurtasunaren zinegotzi Marian Gutiérrezek eman ditu datu horiek udal batzordean, bere ekimenez; hain zuzen ere, udal taldeen galderei erantzun ohi die batzordean, eta zuzentzen duen sailaren kudeaketaren kontu ematen.

Pandemiaren ondorioz ezarritako mugek eragin positiboa izan dute 2020an zenbatutako delituen kopuruaren jaitsieran; bereziki ondarearen kontrako delituetan nabaritu da hori, etxebizitzetako lapurretak % 50 jaitsi baitziren (iaz 54 izan ziren eta 2019an, 107). Ibilgailuen barruko lapurretak ere % 45 jaitsi ziren.

Era berean, % 36 gutxitu ziren 400 eurotik gorako lapurretak, eta % 29,5 indarkeria edo larderia erabiliz egindakoak. Lapurtutako ibilgailuen kopurua, berriz, handitu egin zen, 4 gehiago izan baitziren, eta 35 orotara.

Sexu-askatasunaren kontrako delituei dagokienez (sexu-erasoak, sexu-abusuak, exhibizionismoa…), 23 kasu erregistratu ziren 2020an, hau da, 2019an baino 4 gutxiago (% 15eko jaitsiera).

Pertsonen kontrako delituen alorrean, 221 atestatu egin ziren genero-indarkeria eta familia-indarkeria direla eta; 2019an, berriz, 272 izan ziren, beraz, ia % 19 gutxitu ziren. Lesioengatiko salaketak, ordea, handitu egin ziren, 65etik 119raino.

Covid-19arekin lotutako salaketak

 Herritarren Segurtasunaren zinegotziak, halaber, pandemia hasi zenetik covid-19aren kontrako neurriak ez betetzeagatik Udaltzaingoak egindako zigor-proposamenen berri eman du.

Martxoaren 14tik urtarrilaren 24ra bitartean, Udaltzaingoak 6.509 salaketa egin ditu: 2.639 lehen alarma egoeran (2020ko martxoaren 15etik ekainaren 21era); 1.809 “normaltasun berria” izendatutako aldian (2020ko ekainaren 21etik urriaren 24ra), eta 2.061 bigarren alarma egoeran, zeina urriaren 25ean jarri baitzen indarrean.

Arau-hausteei dagokienez, 2.416 zigor-proposamen egin dira maskara ez eramateagatik edo modu desegokian erabiltzeagatik; 366 1,5 metroko segurtasun distantzia ez betetzeagatik, eta 145 itxita egon behar zuten aretoetan egoteagatik: txokoak, gastronomia-elkarteak, gazteen lonjak, etab.

Balantzea egitean, Marian Gutiérrez zinegotziak “pandemia hasi zenetik Udaltzaingoa egiten ari den lan garrantzitsua” goraipatu du: “gure agenteak covid-aren kontrako borrokaren lehen lerroan daude, eta haien lana funtsezkoa izaten ari da osasun neurriak betetzen direla bermatzeko”.

Share

Radar berri bat erosiko du Herritarren Segurtasunaren Sailak, eta jantziak eta ekipoak berritzen jarraituko  

Herritarren Segurtasunaren Sailaren 2021erako aurrekontu-proiektua milioi bat eurotik gorakoa da (1.012.872 euro), sailaren arduradun politikoak, Marian Gutiérrez zinegotziak, gaur goizean jakinarazi duenez.

“2020koaren antzeko kontuak dira, baina Udalaren diru-sarrera orokorren jaitsieraren errealitatera egokituta”. Egungo egoera ekonomikoa gorabehera, jantziak eta ekipoak berritzeko ahaleginari eusten zaio sailaren aurrekontu-proiektuan, Udaltzaingoko eta Prebentzio, Su Itzaltze eta Salbamendu Zerbitzuko profesionalek zerbitzurik onena eta baldintzarik onenetan eman dezaten.

Udaltzaingoan, 245.000 euro baliatuko dira jantziak eta uniformeak berritzeko —balen kontrako txalekoak barne, 2020an hasitako bidetik, agente bakoitzak berea izan dezan—, baita motor-gidarien kaskoak ere, irrati-sistema bat integratzeko.

Suhiltzaileen jantziak berritzeari dagokionez, 2022an iraungiko diren esku hartzeko ekipoen parte bat ordeztea aurreikusten da, aurrekontu-proiektuan. 160.000 eurotik gora beharko dira jantzi horiek berritzeko, eta, horietatik, 40.000 euro 2021ean gastatuko dira. “Datorren urtean ekingo diogu horiek berritzeari, dena hurrengo ekitaldiaren kontura joan ez dadin”, azaldu du Marian Gutiérrezek.

Inbertsioen atalean, Prebentzio, Su Itzaltze eta Salbamendu Zerbitzuaren ibilgailuak berritzen jarraituko da (50.000 euro), baita Udaltzaingoarenak ere (67.500 euro), eta, gainera, beste radar bat erosiko, ekipamendu eta instalazioak erosteko partidaren kontura (60.000 euro).

 

 

 

Share