Prentsa Oharren banner

Gasteizek gazteentzako aisialdi hezigarri, sortzaile eta osasungarria sustatzearen alde egin du, COVID-19aren kontrako prebentzioa bermatuz

Gasteizko Udalak gazteentzako aisialdi hezigarri, sortzaile eta osasungarria sustatzearen alde egin du, COVID-19aren kontrako prebentzioa bermatuz. Horren harira, Gazteria Zerbitzuak hiru programa aurkeztu ditu udazken-neguko denboraldirako. Xtraklub, Gauekoak eta Gazte Klik Klak dira, aisialdirako kalitateko aukerak, erakargarri eta seguruak.

“Gazteen aisialdirako eskaintzari eustearen alde egiten dugu, kulturari eta bertako artistei laguntzearen alde. Tokiko administrazioa garen aldetik, aisialdirako alternatibak eskaintzen jarraitu behar dugu, eta gazteei beren sormena garatzen laguntzeko aukera ematen. Oraingoan, 12 eta 30 urte bitarteko pertsonentzako jarduerak eskaintzen ditugu. Osasunaren arloko berme guztiekin beti. Ahalegin handia egin dugu protokoloak eta prebentzio-neurriak lantzen, jarduerak segurtasunez gara daitezen COVID-19ari dagokionez“, azaldu du Gazteriako zinegotzi Miren Fernández de Landak.

Hiru programa hauek aurkeztu dira gaur goizean:

Xtraklub: aisialdi, kultura eta abentura jardueren programa, 12-18 urtekoentzat. Informazio gehiago

Gauekoak: aisialdia eta kultura programa, 16-30 urtekoentzat. Informazio gehiago

Gazte klik Klak, argazki eta bideo lehiaketa, 14-25 urtekoentzat. Informazio gehiago

Share

Quan Zhou Wu ilustratzaileak bat egin du Gasteizko Zurrumurruen kontrako Agenteen Sarearekin

Gasteizko Udalaren Zurrumurruen kontrako estrategiak sentsibilizazio-jarduera bat diseinatu du, Bilbo, Getxo, Basauri eta Leioakoekin batera, ilustratzaile eta arrazakeriaren aurkako aktibista ospetsuaren eskutik.

 

Gasteizko Udalaren Zurrumurruen kontrako estrategiak sentsibilizazio-jarduera bat diseinatu du, Bilbo, Getxo, Basauri eta Leioakoekin batera, Quan Zhou Wu ilustratzaile eta arrazakeriaren aurkako aktibista ospetsuaren eskutik. Haren ibilbide profesionalean kolaborazioak egin ditu El Paísen edizio digitalean eta Radio 3 irrati-etxeko Hoy empieza todo saioarentzat; horrez gain, bi nobela grafiko argitaratu ditu, lehena 2015ean, Gazpacho agridulce, una autobiografía chino-andaluza izenekoa, eta haren jarraipena 2017an, Andaluchinas por el mundo izenpean.

Jardueraren mamia 5 biñeta izango dira, bakoitzak aholku edo gomendio bat duelarik “Zurrumurruen kontrako uda baterako”, eta Udalaren ohiko komunikazio bidez hedatuko dira, Zurrumurruen Kontrako Estrategian Euskadi osoan duten babesarekin.

Bizikidetza eta Aniztasunaren zinegotzi Miren Fernández de Landak azaldu duenez, “Ekimenaren helburua material gertuko baten bidez zurrumurruen kontrako eragileen zeregineko gakoak ezagutaraztea da, eta, batez ere zurrumurruen aurkako estrategien helburua diskriminazioa prebenitzeko eta elkarbizitza sustatzeko jarduera gisa ulertaraztea, betiere kulturartekotasun testuinguru batean. Gainera, ekimen honekin jatorri atzerritarreko pertsonen aurkako zurrumurru faltsu, aurreiritzi eta estereotipo horiek indargabetzeko lehen urratsa gure geure iruditeriak desegiten hastea azpimarratu nahi da, bai eta horien atzean dauden emozioak ere”.

Horrez gain, ekimenak badu beste asmo bat, “isiltasuna haustea eta parte-hartze aktiboa izatea pertsonen alde eta zurrumurruen kontra dagoen prozesu horretan. Zurrumurruen kontrako eragileek zubiak eraikitzen dituzte hitzaren eta entzumenaren bitartez, jarrerak elkarrengana hurbiltzen laguntzen diguten zubiak”.

 

Azkenik, biñeten bitartez, eta entzumena eta irakurmena tresna, arrazakeriaren aurkako borrokako erreferenteengandik ikasten laguntzea da, horietako batzuk dira Angela Davis, Lucía Asué Mbomío, Moha Gerehou, Paula Guerra, Míriam Hatibi, Chenta Tsai, Desirée Bela-Lobedde, Sani Ladan, Mamadou Dia, Mamadoy Ngom (Marra Junior), Afroféminas kolektiboa, Ex Menas Madrid, kolektiboa, Catarsia, Top Manta Barcelona, Mbolo Moye Doole, Emakume musulmanen Bidaya elkartea, eta beste asko.

Info +

Share

Udalak jardunbide egokien dekalogo bat zabalduko du udalerriko parke eta herrietara doazen bisitarientzat

 

Nekazaritza Eremuaren Zerbitzuak Gasteizko 63 administrazio-batzarrei eta kirol federazioei helaraziko die agiria.

 

Udalak jardunbide egokien dekalogo bat zabalduko du nekazaritza eremuan, udalerriko parke, bide eta herrietara hurbiltzen direnek zenbait jardunbide egoki kontuan har ditzaten eta hartara “nekazaritza eremuaz, mendiez eta espazio naturalez goza dezaten, baina begirunez. Azkenaldian, nekazaritza eremuetako bizilagunek kezka adierazi digute Gasteiz inguruan paseatzera hurbildu direnen artean errespetu gutxiko jarrerak ugaldu direlako, dela ezjakintasunagatik dela gizabide ezagatik. Duela egun batzuk hasi ginen pertsona horiek ohartarazten, baina orain agiri batean jaso nahi izan dugu, zenbait lekutan banatu ahal izateko”, azaldu du Nekazaritza Eremuaren zinegotzi Miren Fernández de Landak.

Nekazaritza Eremuaren Zerbitzuak Gasteizko 63 administrazio-batzarrei eta kirol federazioei helaraziko die agiria, haiek beharrezkotzat jotzen duten lekuetan bana dezaten. Gainera, komunikazio-kanpaina bat egingo du Udalaren ohiko hedabideetan eta irratian. Bestetik, zerbitzua Udaltzaingoarekin koordinatu da, zaintza areagotzeko.

Landa eremuak duen guztia eskaintzen digu, baina hartaz gozatzeko begirunez hurbildu behar dugu, gutxieneko arau batzuei jarraituz. Gehienek badute ezaupiderik, eta zuzen jokatzen dute. Gutxi dira zikintzen dutenak, soroak edo bideak hondatzen dituztenak eta behar ez den lekutik eta gehiegizko abiaduran zirkulatzen dutenak, baina zoritxarrez haien eragina ikusgarriagoa da eta, batzuetan, arriskutsua denen segurtasunerako“, azpimarratu du Miren Fernández de Landak.

Dekalogoa (pdf)

Share

Gasteizek hiri libre eta askotarikoa eraikitzeko dei egin du, pertsona lesbiana, gay, trans, bisexual eta intersexualen aurkako erasoen aurrean aktiboa

 

Ikusgune LGTBI+fobiaren aurkako Gasteizko behatokiak sexu-orientazioa eta genero-identitatea direla eta izandako erasoei buruz aurten landu duen txostena aurkeztu du

Udalak “Ez zaitzala LGTBIfobiak kutsatu” kanpaina aurkeztu du, maiatzaren 17a Lesbo-Gay-Transfobiaren aurkako Nazioarteko Eguna dela eta

 

Amets Martínez de Heredita audioa

Igandean Lesbo-Gay-Transfobiaren aurkako Nazioarteko Eguna dela eta, Udalak hiri libre eta askotarikoa eraikitzeko dei egin du, pertsona lesbiana, gay, trans, bisexual eta intersexualen aurkako erasoen aurrean aktiboa.

“Ez zaitzala LGTBIfobiak kutsatu” lemaren pean, Udalaren Berdintasun Zerbitzuak komunikazio-kanpaina bat jarriko du abian ohiko kanaletan, “aniztasuna eta arauzkoak ez diren sexualitateak, generoak eta desioak ikusarazten laguntzeko“. Ekintza zehatzen bitartez sexu- eta genero-aniztasuna agenda publikoan txertatzeko konpromisoa berresten dugu Udaletik, eta LGTBI pertsonen kontrako estigmatizatzea eta indarkeriari aurre egiteko inplikazioa. Gure ustez, eta aurreko agintalditik uste horri jarraituz ari gara, hausnarketa horiek guztiek udal politika guztiak zipriztindu behar dituzte: Berdintasun Zerbitzuaren sentsibilizazio eta laguntzatik edo gizarte-politiketatik hasita, hiri plangintza, kirolak, gizarte-etxeetako jarduera eta zerbitzuak, enplegua, gazteria eta beste kontuan hartzeraino. Soa altxatu eta ikuspegi zabalago baten beharrean ginen, hirian zer egiten den bere dimentsio errealean ikusteko”, nabarmendu du Berdintasun zinegotzi Miren Fernández de Landak.  

Kanpainaren irudiak askotariko auzokoak islatzen ditu, hainbat errealitate ikusarazteko, eta gaur egungo osasun krisia eta itxialdia ere argi aipatzen ditu.  Sentsibilizazio kanpainaz gain, udal talde politikoek erakunde adierazpena adostuko dute, urtero bezala; ostiralean zabalduko da hori.

 

Gasteizen izandako erasoei buruzko txostena

Lesbo-Gay-Transfobiaren aurkako Nazioarteko Egunarekin bat eginez, Ikusgunek sexu-orientazioa eta genero-identitatea direla eta izandako erasoei buruz aurten landu duen txostena (2019ko maiatzetik 2020ko apirilera arte) aurkeztu du.   Ikusgune-LGTBIfobiaren kontrako Gasteizko behatokiaren ordezkari Amets Martínez de Hereditak azaldu duenez, 25 gertakari jaso dira: 12 homofobiagatik; 3, lesbofobiagatik; 3, transfobiagatik; 3, genero barruko indarkeriagatik; 2, serofobiagatik, eta 2, LGTBIfobiagatik. Horiek alor ezberdinetan gertatu dira: lana, politika, erakundeak, familia, espazio publikoa, aisialdi espazioa, sare sozialak eta hitzorduen aplikazioak.

Hogeita bost gertakari horiek hazkunde nabarmena adierazten dute aurreko txostenen aldean, 2018-2019 txostenean 13 kasu jaso baitziren, eta 2017- 2018koan, 15 kasu. Ikusguneren arabera, hazkundearen arrazoia ez da gizartean LGTBI pertsonekiko gorrotoa handitu izana, baizik eta erasotutako pertsonek gero eta beldur gutxiago izatea salatzeari, eta Behatokiak bere lana betetzeko gaitasun handiagoa izatea. “Horretaz gain, herritarrek gertakariak jakinarazteko dituzten bideak hobeto ezagutzearekin lotzen dugu hazkundea. Irainak eta jazarpena dira eraso ohikoenak, eta ondoren, gorrotoaren diskurtsoa, zeina gero eta zabalduago baitago, egoera soziopolitikoa dela eta“, nabarmendu du Amets Martínez de Hereditak.

Ikusgune-LGTBIfobiaren kontrako Gasteizko behatokiak aurkeztu duen lehen txostena da, eta LUMAGORRI ZAT elkarteak elkarren segidan egindako hirugarrena.

Homofobia, lesbofobia, transfobia eta bifobiari dagokienez Gasteizen dagoen benetako egoera ikusaraztea da hirugarren txostenaren helburua, aurrekoena bezala. Izan ere, azken hamarkadetan udalerria asko aldatu bada ere, oraindik kultura sozial normatibo bat da nagusi, zapalkuntza egoerak sorrarazten dituena, baita arau soziala betetzen ez duten pertsonen aurkako erasoak ere.

Txostenean arakatuz, kasuen tipologia ezagut daiteke, baita bakoitzaren analisia ere; informazio hori oso baliagarria da errepikatzen diren patroiei edo espazio zaurgarriagoei buruzko ondorioak ateratzeko garaian. Aurtengo txostenean berrikuntza batzuk egin dira, eta hurbilketa zehatzagoa hiru arlotara, kezka sortzen baitute: genero barruko erasoak, lesbofobiaren egoera, eta zigor legediaren aplikazioa eraso tipologia ezberdinetan.

Txostenak aurrekoek urratutako bideari jarraitzen dio, haien helburu nagusia Gasteizen dagoen errealitate bat ikusaraztea baita, gizarte zein kultur egitura normatiboek ikusezin bihurtzen baitute.   Azken hamarkadetan izandako aurrerapenak gorabehera, LGTBI+fobiak oso presente jarraitzen du Gasteizen, bai zuzeneko erasoen bidez, bai era sotilagoan, iruditeria kolektiboan oso errotuta dauden portaerak izanik ere erasoa eta diskriminazioa baitakarte.

“LGTBI pertsonei dagokienez, gure helburu nagusia da txostenaren bitartez lesbiana, gay, transexual eta bisexualei ikusaraztea erasoak ez direla inola ere onargarriak, eta funtsezkoa dela erregistratzea eta publikoki salatzea. Erasorik ez erantzunik gabe. Gure bigarren helburua da esparru egokia bermatzea edonor sexu-orientazioagatik edo genero-identitateagatik egindako eraso bat identifikatzeko gauza izan dadin, eta informatu eta salatzeko mekanismoak ezagut ditzan. Horretarako, funtsezkoa da ikusarazteko beharra azpimarratzea, armairua beste gizarte eraso bat baita, desagerrarazi beharrekoa”, azaldu du Amets Martínez de Hereditak.

Ikusgune-LGTBI+fobiaren aurkako Gasteizko behatokiarekin harremanetan jartzeko:

– Telefono-zenbakia:  prentsa:  665 754 505/ salaketa: 633 309 653

– Posta elektronikoa:info@ikusgune.eus

– Web-orria: www.ikusgune.eus 

 

 

 

Share