Prentsa Oharren banner

(Argazkiez eguneratuta) Azken 20 urteotan konkistatutako espazio publikoaren aldarrikapenarekin hasi da Mugikortasunaren Europako Astea, Gasteizen

– Enara Barón artista lokalaren performance bat izan da Andre Maria Zuriaren plazan, zeinetan autorik gabeko espazio publikoen onurak bistaratu baitira

– Bi hamarkadaz, eraldaketa handien probaleku izan da Mugikortasunaren Europako Astea —Antso Jakitunaren kalea, Foru kalea, San Frantzisko aldapa, San Antonio kalea eta Tornay Medikuaren kalea, besteak beste—

Gorka Urtaran audioa

Gaur hasi da Mugikortasun Iraunkorraren Europako Astea —irailaren 22ra arte iraungo du—, zein, Gasteizen bezala, kontinenteko 2.500dik gora hiritan ospatuko baita. Arabako hiriburuaren kasuan, jarduera-programari ekin zaiolarik, ibilgailu pribatuari irabazitako espazio publikoak desplazamendu-modu iraunkorragoen aldeko lanean azken bi hamarkadetan bereganatu duen garrantzia aldarrikatu nahi izan da.

Mezu horrekin, Enara Baron artista lokalak esku-hartze bat egin du, atzo —neurri bereko espazio huts batekin batera— Andre Maria Zuriaren plazan jarri zen auto baten gainean. Hiriko mugikortasun iraunkorrari buruzko ilustrazioekin itxuratu da autoa, esku-hartzean. Espazio publikoaren ‘konkista’ hori erakusteko balio izan du ekintzak.  Eta espazio hutsean hainbat objektu jarri dira, ibilgailuei irabazitako kale eta plazetan herritarrek egin ahal dituzten jarduera ugarietako zenbait irudikatzeko. “Arlo horretan egindako aurrerapenak bistaratzeko modu bat da: oinezkoentzako alderdiak, superetxadiak, zirkulazio baretuko 30 zonak, irisgarritasunaren eta garraio publikoaren arloko hobekuntzak eta bizikletaz ibiltzeko azpiegitura berriak. Auto batek hartzen duen lekuan oinezko ugari sar daitezke, haurrak jolastu; sar daitezke bizikleta gehiago, ostalaritza-terrazak, merkataritza-espazioak…”, adierazi du Gorka Urtaran alkateak.

Hurrengo egunotan, hainbat jarduera izango dira Mugikortasunaren Europako Astearen barruan, hirian. Nabarmentzekoak dira bihar hiriaren erdialdean barrena espazio publikoan izandako aldakuntzak deskubritzeko egingo den oinezko martxa, Biktimen Memorialaren ondoan egingo den azoka —mugikortasunaren eta osasunaren inguruko hainbat lantegi eta jarduerarekin— eta BEIk bidaiariekin egingo dituen lehen ibilbideak, hilaren 22an. Mugikortasun iraunkorrari buruzko web-mintegi bat ere egingo da, hilaren 20an. Besteak beste, mugikortasun iraunkorraren arloko aditua den Salvador Ruedak parte hartuko du. Udalaren webgunean kontsulta daitezke jarduera guztiak. Orobat eman daiteke izena bertan.

Mugikortasun iraunkorrak 20 urte

Hain zuzen ere, 20. urtea du aurten Mugikortasunaren Europako Asteak. Gasteizen, herritarrak modu iraunkorrean mugitzearen garrantziaz sentsibilizatzeko aukera eman du, baita neurri eta jarduketa berriak probatzeko ere, Udalak gauzatu aurretik. Eraldaketa handiak izan baitira, hala hola Antso Jakitunaren kalean, Foru kalean, San Frantzisko aldapan, San Antonio kalean eta Tornay Medikuaren kalean, besteak beste.

Mugikortasun iraunkorraren politika garatzeko funtsezko tresnetako bat izan da Mugikortasunaren Europako Astea, eta hiriko Espazio Publikoaren eta Mugikortasun Iraunkorraren Planaren aliaturik onenetako bat. Aldaketa asko bultzatzeko erakusleihoa izan da, eta eraginkorrak eta ikusgarriak suertatu dira aldaketa horiek, eta Estatuan nahiz atzerrian goraipatu izan dira.

Europako Batzordearen ekimenak 20. urte bete dituen honetan, bada mugikortasun iraunkorraren aldaketak herritarren osasunaren hobekuntzarekin lotzen dituen goiburu komun bat: ‘Zure osasunagatik, mugi zaitez modu iraunkorrean’.

 

 

Share

BEI protagonista izango da Mugikortasun Iraunkorraren Europako Astearen 20. urteurrenean

Irailaren 16tik 22ra bitartean Gasteizen izango diren ekintzen artean, nabarmentzekoak dira lehenengoz joaterik izango dutela herritarrek BEIn, erakustaldi modura; hilaren 18an, larunbatez, Terrorismoaren Biktimen Memorialaren inguruan egingo den kale-jarduera, eta mugikortasunari eta osasunari buruzko informazio-ibilbideak.

 

Irailaren 16tik 22ra bitartean kontinente osoko 2.000 hiritan egingo den Mugikortasun Iraunkorraren Europako Astearen aurtengo edizioa aurkeztu du Gasteizko Udalak gaur. Hain zuzen ere, 20 urte beteko ditu Europako Batzordearen ekimenak, mugikortasun iraunkorraren aldaketak herritarren osasunaren hobekuntzarekin lotzen dituen goiburuarekin: “Zure osasunagatik, mugi zaitez modu iraunkorrean”. Azken bi hamarkadetako lorpenak aldarrikatzeko programa bat prestatu du Arabako hiriburuak. Izan ere, aste horretan probatu ziren proiektu pilotuak izan ziren horietako zenbait, hala nola, Judimendiko Tornay Medikuaren kalean berriki egin den esku-hartze berria, edo beste zenbait, Antso Jakitunaren kalekoa, Foru kalekoa eta San Antonio kalekoa kasu, edo erdialdeko superetxadia.

 “Estatuko lehen hirietako bat izan zen gurea, aste hau ospatzen, eta geroztik izan dituen edizioak laborategi gisa baliatu izan dira, mugikortasunean eta espazio publikoan izan diren hainbat aldaketa probatu eta bultzatzeko. Herritarrengana hurbiltzen, hiriko mugikortasun-proiektuak hurbiletik azaltzen eta herritarren iradokizunak bertatik bertara jasotzen laguntzen digu aste hori ospatzeak”, nabarmendu du Mugikortasunaren eta Espazio Publikoaren zinegotzi Raimundo Ruiz de Escuderok.

Datorren ostegunean, irailak 16, hasiko da programa, kale-jarduera batekin, Andre Maria Zuriaren plazan, urte hauetan guztietan ibilgailu pribatuari irabazitako espazioari buruz ohartarazteko asmoz, horrek gure eguneroko bizitzan izan duen eragina erakutsiz —osasunean, aisialdian, harreman sozialetan, baita ekonomikoan ere, merkataritza-ardatz berriak bultzatu baititu—. Egun berean, Tecnaliak bultzatutako mugikortasun iraunkorraren inguruko jardunaldia egingo da Atarian.

Irailaren 17an, ostiralez, oinezko martxa bat egingo da, 20:00etan, “Hiri lasaitua eta osasungarria” izenburupean, Mugikortasun Iraunkorraren Planaren barruan eraldatu diren espazio urbanoetan barrena. Udal-teknikariek eta osasunaren arloko profesional batek gidatuko dute jarduera hori, zeinek azalduko baitute bai espazioaren eraldaketa, bai gure ongizatean duen eragina. Parte hartu nahi dutenek Udalaren webgunearen bitartez eman ahal izango dute izena, eta kamiseta bana jasoko dute, doan.

Asteko jarduera nagusia irailaren 18an izango da, larunbatez, Terrorismoaren Biktimen Memorialaren inguruan; izan ere, birmoldatu egingo da espazio hori aurki, eta herritarrek erabiltzeko plaza handi bat egingo bertan. 11:00etatik 14:00etara bitartean, mugikortasun iraunkorraren eta gure osasunean dituen onuren inguruan sentsibilizatzeko jarduerak egingo dira. Bertaratzen direnek, Euskal Herriko Fisioterapeuten Elkargo Ofizialaren eskutik, modu iraunkor eta osasungarrian nola mugitu jakin ahal izango dute, eta oinez, korrika nahiz bizikletaz modu egokian ibiltzeko aholkuak jasoko dituzte. Osasun mentalari buruzko lantegietan ere parte hartu ahal izango dute, Ediren kooperatibaren eskutik, eta haurrek, berriz, lantegi artistikoetan, beren hiri ideala eraikitzeko. Bestalde, mugikortasunarekin zerikusia duten hiriko hainbat saltoki ere instalatuko dira bertan, aholkuak eta produktuak eskaintzeko, eta Udalak bultzatutako proiektuak ezagutaraziko dira, hala nola Bici-Cargo. Leku berean, BEI bertatik bertara ezagutzeko aukera izango da, unitateetako bat bertan izango baita, herritarrak igotzerik izan dezaten. Informazio-gune zentral bat izango da, musikarekin.

Irailaren 20an, astelehenez, mugikortasunari eta osasunari buruzko jardunaldi bat izango da, bi alor horietako adituekin, mugikortasun iraunkorragoak gure bizi-kalitatea eta osasun fisiko eta mentala zenbateraino hobetzen duen eztabaidatzeko. Udalaren webgunearen bitartez eman ahal izango da izena.

Irailaren 21ean, asteartez, Egibideko ikasleek eta Udalaren adinekoen zentroetako pertsonek “8 80 hiriak” lantegiko ondorioak azalduko dituzte udaletxean. Hain zuen ere, bi kolektibo horiek hirian barrena mugitzeko dituzten benetako beharrak azaleratzea baitu helburu lantegiak.

BEIren lehen ibilbidea, bidaiariekin 

Irailaren 22an bukatuko da programa, ‘Hiria nire autoa gabe’ Europar Egunean, BEI garraiobide berria herritarrengana hurbildu nahi duen ekimen batekin: Boulevardeko eta Mendizorrotzeko geltokien arteko ibilbide gidatuak. Ibilbide horietan, ibilgailua probatu ahal izango dute herritarrek, eta bertatik bertara ezagutu garraio-sistema horren ezaugarriak: irisgarritasuna, segurtasuna, iraunkortasuna, maiztasunak, txartelak eskuratzeko modua eta abar. Parte hartu nahi dutenek Udalaren webgunearen bitartez eman ahal izango dute izena, lekua bermatzeko, baina sarrera librea izango da, edukiera bete arte.

Udalak, halaber, hiriko mugikortasun iraunkorraren 20 urte hauei buruzko bideo bat kaleratuko du, aldaketen berri emateko, bertatik bertara bizi izan dituzten gasteiztarren ahotik.

Share

Zabalganeko superetxadien proiektuko lehen esku-hartzea Ilustrazio hiribidean hasiko da, berdegune eta oinezkoentzako gune berriak jarriz trafikoa eteteko

Gasteizko Udalak, Mugikortasunaren eta Espazio Publikoaren Sailaren bitartez, Zabalgana auzoko hiribide luzeetako batzuk eraldatuko ditu, superetxadien ereduan oinarritutako proposamen ausart batekin. Plan horretako lehen esku-hartzea Ilustrazioaren hiribidean egingo da. Bertan, trafikorako asfaltoa eten egingo da berdegune berriak eta oinezkoek lehentasuna izango duten guneak sortuz, eta gaur egun dauden oinezko ibilbide naturalei jarraipena emango dieten lotura berriak eginez. Auzoa seguruagoa, erosoagoa eta modernoagoa izango da.

“Zabalgana eta Gasteiz nazioarteko abangoardian kokatuko dira proiektu honekin. Errepideak herritarrentzako berdegune bihurtuko diren lehen lekuetako bat izango dira. Auzoak modernitatea, oinezkoen lehentasuna, bide-segurtasuna, bizikleten mugikortasuna, espazio berdeak, merkataritza dinamizatzeko aukerak eta abar irabaziko ditu bere kaleetan“, adierazi du Mugikortasunaren eta Espazio Publikoaren zinegotzi Raimundo Ruiz de Escuderok.

Tokiko Gobernu Batzarrak bihar onartuko du lan horiek egiteko kontratazio-dosierra; 380.630 euroko aurrekontua izango dute lanek, eta kontratua esleitzen denetik 4 hilabeteko epea emango da gauzatzeko.

“Superetxadia da, oraindik ere, hiriko etorkizuneko espazio publikoa birdiseinatzeko funtsezko pieza, Mugikortasunaren eta Espazio Publikoaren Planak ezartzen duenaren arabera. Hori dela eta, auzoen barrualdea ibilgailuen zirkulaziotik babestea da asmoa. Nola? Abiadura nabarmen murriztuz (orduko 20 eta 10 kilometroko abiadurara), trafikoa etenez eta bestelako esku-hartzeak eginez, oinezkoentzako guneak sortzea, esaterako“, azaldu du Mugikortasunaren eta Espazio Publikoaren zinegotziak.

Zabalganerako planteatzen den esku-hartzea Mugikortasunaren eta Espazio Publikoaren Planean jasotako hiri-bideen sarea babestea du helburu eta  abiapuntu. Izan ere, Udalaren helburua da oinezkoen ibilbide horiek babestea eta egoteko eremu berriak sortzea. Espazio horiei esker, alde batetik, lehendik dauden oinezkoentzako bidezidorrak lotu ahalko dira, jarraitutasuna emanez, eta bestetik, eragindako zirkulazio-bideak joan-etorrikoak bihurtuko. Horrela, kale horiek igarobide gisa erabiltzen dituzten ibilgailuen trafikoa desagerraraziko da, abiadura handian baitoaz. “Igarotzeko kaleak izateari utziko diote, eta egoteko kale bihurtuko dira“, azaldu du Raimundo Ruiz de Escuderok.

Ilustrazioaren hiribidearen kasuan, Nazio Batuen eta Giza Eskubideen hiribideen arteko perimetroaren barruan esku hartuko da. Zuzengune horretan zehar, bost esku-hartze egingo dira.

1) Ilustrazioaren hiribidetik Nazio Batuekin hiribidera sartzea.

Puntu horretan, espaloiaren mailan txorko bat jartzea proiektatu da, berdegune txiki bat sortuko duena eta erreiak estutzeko balioko duena. Superetxadien barnealdeko kale guztietarako sarbidea errei batera murriztuko da, parterre txikiak sortuz, ibilgailuek abiadura moteldu dezaten espazio horietara sartzen direnean. Gasteizko beste toki batzuetan probatu den neurri mota bat da, emaitza onekin.

2) Ilustrazio hiribidearen eta UNESCOren ibilbidearen arteko bidegurutzea.

Hor espaloia zabaltzea aurreikusi da, UNESCOren ibilbideko oinezkoentzako korridoreari jarraitutasuna emateko, eta, aldi berean, zirkulazioa nabarmen baretu eta murrizteko, moztu gabe. Egoteko berdegune berri bat ere eratuko da auzoarentzat, eta txirrindularientzako korridoreak.

Hasteko, asfaltoa eraldatuko da, altxatu egingo baita berdegune berria eta oinezkoentzako gunearen zoladura egiteko. Bidearen konfigurazio berria dela eta, erreiak errei bakarrera estutuko dira bi galtzadetan, eta abiadura-muga bermatuko hartara.

Esku-hartze horrek ez du trafikoa moztea ekarriko, baina inguruetatik bizilagunek, merkatariek eta larrialdietako ibilgailuek bakarrik zirkulatzea da helburua.  Horretaz gain, erdibitzailean irekidura bat jarriko da ibilgailuek noranzkoa aldatzerik izan dezaten.

3) Ilustrazioaren hiribidearen eta Ehari ibaiaren bidezidorraren arteko bidegurutzea.

Kaleko puntu horretan egingo da eraldaketa garrantzitsuena; izan ere, oinezkoentzako gune berde berri bat sortuko da, eta horrek motordun ibilgailuei trafikoa etetea ekarriko du. Horretarako, zoladura guztia altxatu beharko da.

Eremuaren konfigurazio berriak berekin ekarriko du joan-etorriko bideak sortzea oinezkoentzako espazioaren mutur bakoitzean, eta horrek biraraztera behartuko ditu autoak, jarraitzea eragotziko duten elementu fisikoekin. Oinezkoentzako gunean aurreikusitako berdegunea izango da gune horretako protagonista nagusia; alde bakoitzean irekidura bat izango du noranzkoa aldatu ahal izateko, baina abiadura oso mugatuan. Txirrindularientzako korridoreak ere egokituko dira.

4) Ilustrazioaren hiribidearen eta Gurutze Gorriaren pasealekuaren arteko bidegurutzea.

­Gune horretan, jarraipena eman nahi zaio Gurutze Gorriaren ibilbideko oinezkoentzako korridoreari. Horretarako, oinezkoentzako zoladura handituko da, noranzko bakoitzeko zirkulazio-erreiak bakarrera estutuko dira, eta abiadura nabarmen mugatuko da. Jarduera horrek ez du esan nahi trafikoa etengo denik, baina hemen ere bizilagunek, merkatariek eta larrialdietako ibilgailuek bakarrik erabiltzea da helburua. Beste kasu batzuetan bezala, egoteko eta aisialdirako berdegune bat sortuko da amaitzeko.

5) Giza Eskubideen hiribidetik Ilustrazioaren hiribidera sartzea.

Kalearen sarreran bezala, txorko bat proiektatu da espaloiaren mailan, berdegune txiki bat sortzeko. Horrek erreia estutuko du, eta superetxadian sartzeko ‘ate efektua’ sortuko du.

Zurezko pergolen, piknik-mahaien, jolas naturalizatuen eta landare igokarien eremuak.

Mugikortasunaren eta Espazio Publikoaren Sailak, halaber, inguruan aisialdirako eta gozamenerako elementuak jartzea proposatu zien auzokoei. Hala, Gurutze Gorriaren ibilbidean zurezko pergolez hornitutako bi gune egongo dira, eta horien barruan piknik mahaiak jarriko. Gune horiek berdegunez inguratuko dira, eta horiekin batera gereziondo basatiak, landare igokariak eta abar jarriko dira, parterre txikietan. Pergola horietatik gertu putzu txikiak ere sortuko dira, narrastien babesleku izango direnak, biodibertsitatea sustatzeko asmoz. Udalak harriz eta enborrez osatutako jolas naturalizatuak ere jarriko ditu.

Plan honetan aurreikusitako esku-hartzeak hiriko beste espazio batzuetara eramango dira etorkizunean. Ilustrazioaren hiribidekoa izango da lehena, eta Zabalganeko bizilagunekin batera esperientzia aztertzeko aukera emango du gero.

Zabalganeko superetxadien proiektua dossierra

 

Share

Udalak eta Arabako Taxiaren Elkarteak zazpi leku berezi hitzartu dituzte BEIaren ibilbidean taxiek bidaiariak hartu eta utz ditzaten

Gasteizko Udalak eta ALATAX-Arabako Taxiaren Elkarteak hitzartu dutenez, zazpi leku egokitu eta identifikatuko dira BEIaren ibilbidean, bidaiariak errazago hartu eta uzteko. Mugikortasunaren eta Espazio Publikoaren Saila, Trafiko Zerbitzuaren bitartez, taxientzako ‘geraleku’ esklusiboak margotzen hasi da, horietako batzuk, oinezkoen alderdietan. Leku hauek dira, zehazki:

  1. Jacinto Benavente kaleko espaloia, 17-19. zenbakien ondoan.
  2. Jacinto Benavente eta Vicente Aleixandre kaleetako biribilguneko kanpoaldea, hego-ekialdean, trafikorik gabeko eremuan.
  3. Etxezarra kalea, Fontetxako Gazteluaren kaleko 19. zenbakiaren ondoan.
  4. Lantarongo Gazteluaren kalea, ekialdeko tartean.
  5. Zumakadi ibilbidea, 1. eta 19. atarien artean.
  6. Zumakadi ibilbidea, 23. eta 35. atarien artean.
  7. Francisco Leandro Viana kalea, Tomas Zumarraga Dohatsuaren eta Pablo Neruda kaleen artean, TUVISArentzat erreserbatutako eta bizikletetarako erreserbatutako erreien artean dagoen zerrendan. Azken geraleku horretan, taxi gidariak Tomas Zumarraga Dohatsuaren kaletik sartu beharko dira, eta TUVISAko ibilgailuak eta bizikletak ahalik eta gutxien oztopatu.

“Gasteizko taxilariei lagundu nahi diegu, gure hirian lehen mailako zerbitzua ematen baitute. Geltoki mota berri hori dagoeneko erabiltzen ari zen beste leku batzuetan, Olagibel kaleko anbulatorioaren aurrean, esaterako; horiei esker zerbitzua erosoagoa izango da taxien erabiltzaileentzat, eta sektoreko profesionalak bezeroengandik hurbilago egon ahalko dira“, azaldu du Mugikortasunaren eta Espazio Publikoaren zinegotzi Raimundo Ruiz de Escuderok.

“Erabiltzaileek taxia ahalik eta erosoen, arinen eta azkarren baliatzerik izan dezaten nahi dugu elkartean. Gure ezaugarria den atez ateko zerbitzua egokituko dugu leku horietan, BEI garraio sistema berriarekin batera bizitzeko asmoz. Akordio hau beste urrats bat da Gasteizko taxi-zerbitzua hobetzeko”, azaldu dute ALATAX elkartetik.

 

Share

Erdi Aroko hirigunearen goialdea oinezkoentzako alderdi bihurtzen delarik, herritarren arteko bizikidetza eta topaketarako espazio seguruak sortuko dira

 

Aste honetatik aurrera, Erdi Aroko hirigunearen goiko aldea oinezkoentzat izango da. Seguruago, pertsonekiko abegikorrago eta ingurumenaren ikuspegitik iraunkorrago bihurtuko dute asteazkenerako aurreikusita dauden trafiko-aldaketa berriek Gasteizko zona enblematiko eta ikoniko hori. Udalak, auzotarrek eta eragile sozial eta ekonomikoek hirigune historikoaren jarduera integralerako landu duten estrategiaren parte da ekimena. Joan den apirilean, 12 hilabetetan 24 ekintza martxan jarriko zituela iragarri zuen Gorka Urtaran alkateak Aldabeko auzogunean. Horietako bat, hain zuzen ere, Erdi Aroko hirigunean oinezkoentzako uharte hori sortzea zen.

Zirkulazioaren sarbidea itxi egingo da Santa Ana kantoian, Eskola kalearen parean, eta Frai Zacarias kalean, Santa Maria plazako sarreran. Santa Maria kalearen itxierari —Falerinaren parean— gehituko zaizkio ekintza horiek. Gainera, Frai Zacarias kaletik Jauregi kalerako eta Euskal Herriaren Adiskideen Elkartearen kalerako sarbideetan zirkulazioa debekatuko da. Santa Maria plaza ibilgailu motordunen inbasiotik babesteko, Pulmonien kantoiaren noranzkoa aldatuko da, hartara hura trafikotik libratuko.

Kale horiek oinezkoentzako kale bihurtzen direlarik, kendu egingo dira Euskal Herriaren Adiskideen Elkartearen kaleko, Pulmonien kantoiko eta Eskola kaleko aparkalekuak. Santa Ana kantoiko aparkalekuak kendu egingo dira, ez baitute oinezkoentzako tarteak inbaditzea saihesteko aukera eman lezakeen irteerarik. Santa Maria kantoian dauden aparkalekuetarako sarbidea Txikita kaletik egin beharko da, eta atera, berriz, Bilbo plazatik edo Antepara kaletik.

“Orain arte, hainbat arrazoirengatik sartzen ziren ibilgailuak auzora, egoiliarren ezinbesteko beharrez gain: dendak eta ostalaritza hornitzeko, aparkalekua bilatzeko eta hiriaren alde batetik bestera igarotzeko bideen bila. Muinoaren goiko aldea eta bertako elementu erakargarrienen ingurua ibilgailuetatik libratzea da proiektu honen helburua, eta elkarbizitza- eta topaketa-leku seguruak bultzatzea”, azaldu du Mugikortasunaren eta Espazio Publikoaren zinegotzi Raimundo Ruiz de Escuderok. “Oinezkoentzako hiria dugu helburu, hiri iraunkorra, abegikorra eta segurua. Eta horren adibide izan behar du Erdi Aroko hiriguneak”.

Erdi Aroko hirigunearen ezaugarriek —kale estuak eta espazio libre gutxi— joan-etorriak egiteko modu desberdinen arteko bizikidetza eragozten zuten, baita gizarte-harremanak eta aisialdia lasaitasun- eta kalitate-baldintza egokietan egiteko espazio libreak lortzeko aukera ere.

Azken aste hauetan, Erdi Aroko hirigunean kargatu eta deskargatzeko ordutegiak ere aldatu ditu Udalak; hain zuzen ere, aurreratu, hartara ostalaritza errazteko. Auzokoei, eragile sozialei eta neurriek eragingo dieten eragile ekonomikoei azalpenak emateaz gain, haiekin adostu du jarduera Udalak. Nolanahi ere, hobetu daitekeen edozein egoera detektatuz gero, aldaketa txikiak egin ahal izango dira. Gainera, Erdi Aroko hirigunearen inguruan zenbait aparkaleku espres sortzea adostu da merkatarien kolektiboarekin, haien jarduera errazteko.

Share

BEA abian jartzeak Gasteizko bizikleta-bideen sarea hobetuko du, 1.700 metro bidegorri sortu edo zaharberritzeko aukera ematen baitu  

Azpiegitura berriak orain arteko 170 kilometroko sarera gehituko dira

Bidegorri berriak dosierra 

Etenik ez Gasteizen Autobus Elektriko Adimentsua abian jartzeko prozesuan. BEA garraio publikoko sistema iraungarri, irisgarri, berritzaile eta seguruagoa izango da. Udalak 9 milioi euro inbertitu dituelarik, azken teknologiaren arabera eginiko 13 ibilgailu elektriko berriek Gasteizko 14 auzo lotuko dituzte, TUVISAren 2. Linea baliatuta. 3 milioi erabiltzaile garraiatuko dituela aurreikusten da.

Baina horrez gain, BEAri esker hiria bera ere bertako espazio publikoa ere hobetu egingo dira. Duela aste gutxi BEAren ibilbide guztian korridore berdea egingo dela jakinarazi zen, 500 zuhaitz eta 15.000 zuhaixka zein lore-landare landatuko direlarik. Bada, gaur Udalak BEA abian jartzearen ondoriozko bidegorri berriak erakutsi ditu. Autobus elektrikoa abian jartzeko lanak aprobetxatu ditu Udalak bizikleta-sarea zabaltzeko. Horrenbestez, bidegorri berriak sortu dira, eta beste batzuk zaharberritu, BEA abiarazteko kontratuko aurrekontuaren kontura. Hiriak 1.700 metro bidegorri irabazi ditu, batez ere Arabako Unibertsitate Ospitalearen inguruan eta Jacinto Benavente kalearen ardatzean. Hauek dira orain arte egindako esku-hartzeak:

– Pablo Neruda eta Leandro Viana kaleak: bidegorri bikoitz berria galtzadan, 426 metrokoa.

– Euskal Herria bulebarra (ospitaleko ingurua). Ipar espaloian bi norabideko bidegorri berria, aparkaleku-lerroan, 175 metrokoa Eta hego aldean bi norabideko bidegorri berria, trafikotik bereizia espaloi mailan aglomeratu gorri bidez (lehen ospitaleko espaloian margotua zen), 175 metrokoa.

Jacinto Benavente: berriro asfaltatu da oso-osorik zaharberritu da Florida eta Sutaustegi Zaharreko kalearen arteko bidegorria. Gainera, eta esku-hartze osagarri gisa, udarako aurreikusitako asfaltatze lanen artean, Esmaltaciones arterainoko zati osoa zaharberrituko da, gaur egun oso egoera txarrean baitago.

Dagoeneko burutu diren esku-hartze horiez gain, datozen asteetan beste batzuei ekingo zaie, horiek ere BEA abiarazteko kontratuaren barruan.

Euskal Herria bulebarra (Eusko jaurlaritzaren ingurua): Ipar espaloian dagoen noranzko bakarreko bidegorria galtzadara jaitsiko da, eta bi noranzkoko bihurtuko, 275 metrotan.

Latinoamerika / Paraguai zatia: Hego aldean bidegorri bikoitz berri bat egingo da galtzadan, 240 metrokoa.

Mugikortasunaren eta Espazio Publikoaren zinegotzi Raimundo Ruiz de Escuderok gaur goizean azaldu duenez, “Udal honek beti dauka bizikleta gogoan. Horrenbestez, espazio publikoa birmoldatzeko esku-hartzeren bat planteatzen edo mugikortasunean aldaketa garrantzitsuren bat sustatzen den aldiko bidegorrien sarea –zein berriki 170 kilometroko distantziara iritsi baita– zabaltzeko ere. Jokamolde horren adibide asko ditugu: Hegoaldera zuzenduriko tranbiak hobekuntzak eragin zituen bizikleta-sarean, gauza bera gertatuko da tranbia Salburura eramateko lanekin, eta hala gertatu zen baita Biktimen Oroimenezkoaren eta Arkupeen ingurunea eraberritzekoekin ere… Eta orain BEArekin”.

 

Share

Hasi dira dira Mendizorrotzetik Esmaltazioetara arteko bideak asfaltatzeko lanak; 1,7 milioko inbertsioa egingo da 23.000 metro koadrotan esku hartzeko

Gaur hasi dira dira Mendizorrotzetik Esmaltazioetara arteko bideak asfaltatzeko lanak. Udalak 1,7 milioi euroko inbertsioa egingo du Salbaterrabide, Araba eta Zumakadi kaleak asfaltatzeko, lerro zuzenean 2 kilometroko ibilbidea osatuz, eta 23.000 metro koadrori eragingo dio. Lanak amaituta, bertatik igaroko dira garraio publikoa (TUVISA eta BEA) eta trafiko pribatua. Mugikortasunaren eta Espazio Publikoaren Sailak gaur hasi ditu lehen lanak, makina eta langileekin. Trafikoari eta TUVISAren ibilbideei eragingo die.

Firmes Alaveses eta Yarritu enpresek osatutako aldi baterako enpresa-elkarte esleipendunak bost hilabete izango ditu lanak egiteko. “Oso esku hartze sakona izango da” adierazi du Mugikortasunaren eta Espazio Publikoaren zinegotzi Raimundo Ruiz de Escuderok. Izan ere, 25 zentimetro fresatuko dira eta ondoren hiru asfalto-geruza jarriko. Zati horretako zoladura egoera txarrean dago, eta bertatik egunero pasatzen diren herritarrek eta gidari profesionalek egindako erreklamazioa da.

Lehenengo lanak gaur hasi dira, eta trafikoari eragingo diote. Lanak hainbat fasetan egingo da eragozpenak gutxitze aldera. Lehen faseak hainbat aste iraungo du eta Zumakadin egingo da – Esmaltazioak eta Izardui Komandantearen kaleen artean–; gainerako etapetan Mendizorrotzerantz, mendebalderantz, egingo dira lanak.

Gaurtik ibilgailuek debekatuta izango dute bertatik zirkulatzea, mendebaldeko noranzkoan, TUVISAK izan ezik (beti ere lanek uzten badute) Halaber, debekatuta egongo da tarte horretan aparkatzea.

Lehen faseak bi azpifase izango ditu. Lanak iparraldeko aldean egiten direnean (atari bakoitien ondoan), zirkulazio-bide bakarra utziko da, Esmaltazioetarako noranzkoan). Adurtza eta Alberto Schommer kaleetara ere ezingo da sartu, sarrera-irteera bakarrekoak izango baitira Heraclio Fournier eta Txalaparta kaleetatik. Lanek aurrera egin ahala zabaldu egingo dira bidegurutze horiek. Bestalde, Errota kalea ez da Zumakadi ibilbidearekin lotuta izango, sarrera-irteera bakarrekoa izango baita Heraclio Fournier kaletik.  Lan hauek TUVISAri ere eragingo diote. Hain zuzen ere, L2a (Mendizorrotzerantz) eta L10 lineak Esmaltazioak- Iturritxu-Izardui Komandantearen kaletik desbideratuko dira. Hori dela eta hiru geltokitan ez da zerbitzurik emango (Zumakadi 61, Zumakadi 29 eta Hegoalde). Geltoki berriak jarriko dira martxan  Esmaltazioen biribilgunean (Heraclio Fournier eta Zumakadi artean), Iturritxu kalean (Gurutzmendi haur eskolan) eta 3/9 lineako Zumakadi/Izarduy komandantearen geltokian (L2A linearentzat). L2Baren Hegoaldeko geltokia zerbitzurik gabe geratuko da, baina Zumakadi plazara aldatuko da behin-behinean.

Bidearen beste aldeko lanak egitean (atari bikoitietan), mantendu egingo da ekialdeko noranzkoa eta mendebalderako noranzkoa baimenduko zaio TUVISAri (ibilbidea eta geltokiak berreskuratuko ditu). Ibilgailuek ere Adurtza, Errota eta Alberto Schommer kaleekiko konexioa berreskuratuko dute. Eta baimenduta egongo da Zumakadi ibilbidearen hegoaldeko aparkalekuetan sartzea.

AFECCIONES AL TRAFICO ESMALTACIONES

Share

Taxi elektrikoak erosteko laguntza deialdi berria

Gasteizko Udalak hiriko taxi-flotari ibilgailu elektrikoak gehitzen laguntzeko deialdia egin du laugarrenez. Gaur goizean onetsi ditu Tokiko Gobernu Batzarrak deialdiaren oinarriak, Raimundo Ruiz de Escudero zinegotziak zuzentzen duen Mugikortasunaren eta Espazio Publikoaren Sailak sustaturik. Urtaranen gobernuak 40.000 euro jarriko ditu horretarako aurten, eta ibilgailu bakoitzeko 10.000 euroko dirulaguntza jaso ahalko da.

Mugikortasun iraunkorreko politiken barruko deialdi horren bitartez, Udalak gure hiriko airearen kalitatea hobetzen lagundu nahi du, eta kutsadura akustikoa eta berotegi-efektuko gasen emisioak murrizten, baita energia-kontsumoa ere. “Garraio publikoaren elektrifikazioa funtsezkoa da Gasteizen etorkizuna eraikitzeko. BEIa abian jartzeko, tranbia-sarea hedatzeko Salburua eta Zabalganera, TUVISAko flota hobetzea… ari gara lanean, baita taxiaren sektorea modernizatzeko ere, azaldu du Raimundo Ruiz de Escudero zinegotziak.

Gasteizko Udalaren taxi-lizentzia baten jabe diren pertsona fisikoek jaso ahalko dituzte laguntzak, baldin eta dirulaguntzaren xede den ibilgailua aurretik lizentzia horri esleitutako ibilgailua ordezteko bada; Gasteizko taxilarien elkarteek ere jaso ahalko dituzte laguntzak, horren xede den ibilgailua Gasteizko taxi-lizentzia duten ibilgailuak ordezteko erabiltzekoa bada. Taxi-lizentziaren titularrek 2021an erosi dituzten edo erostekoak diren ibilgailu elektriko huts berriengatik bakarrik jaso ahalko da diru-laguntza. Diruz lagundutako taxiek lau urtez eman beharko dute zerbitzu Arabako hiriburuan.

Aste batzuk barru eskatu ahalko dira laguntzak, Diru-laguntzen Datu-base Nazionalean eta ALHAOn argitaratzen direnean.

 

Share

Etxauri plaza jolastoki moderno, naturalizatu eta berritzaile bihurtuko da Erdi Aroko hirigunearen erdi-erdian

Haurren Auzoa proiektua “Mejorando Vitoria-Gasteiz Hobetuz” partaidetza-prozesuaren emaitza da eta hirigune historikoko bizilagunekin batera diseinatu da; 573.512 euroko aurrekontua izango du

 

Esku-hartzeak inklinatutako berdegune bat jartzea proposatzen du, ipuin kontalarientzako espazio txiki batekin eta Gasteizko Mendietara begira dagoen balkoi batekin

 

Eskalada gune bat, txirristak eta zabuak, egurrezko oreka-jolasak, ping-pong mahai bat eta saski bat, eta zuhaitzak eta arrosa-landareak izango ditu

  

Haurren Auzoa proiektuak guztiz eraldatuko du Etxauri plaza, Erdi Aroko hirigunearen bihotzean. Udalak jolastoki moderno, naturalizatu eta berritzaile bihurtuko du gunea. Proiektua, “Haurren Auzoa” izenarekin ezaguna eta “Mejorando Vitoria-Gasteiz Hobetuz” partaidetza-prozesuaren barruan sortua, auzokoekin batera diseinatu da. Bihar, Herritarren Partaidetzaren, Gardentasunaren eta Gizarte Etxeen Sailak lizitaziora aterako du Mugikortasunaren eta Espazio Publikoaren Sailak diseinaturiko lanak burutzeko kontratua. Lanek 573.512 euroko aurrekontua izango dute eta zortzi hilabeteko gauzatze-epea.

Herritarren Partaidetzaren zinegotzi Borja Rodríguezek adierazi duenez, “proiektu honek argi uzten du Udalak kontuan hartzen dituela herritarrek Hobetuz programaren bidez egiten dituzten iradokizunak”. Zinegotziak azpimarratu duenez, Erdi Aroko hiriguneak “topagune berri bat izango du Etxaurin eta egungo plaza ordezkatuko du, premiazkoa baitzen hura eraberritzea”.

“Proiektu honekin Erdi Aroko hirigunea osorik biziberritzeari ekingo diogu”, azaldu du Mugikortasunaren eta Espazio Publikoaren zinegotzi Raimundo Ruiz de Escuderok. “Etxauri plaza berdeagoa, atseginagoa eta modernoagoa izango da. Hirigune historikoaren bihotzean egoteko gune bat, familiekin batera diseinatua izan dena”.

Espazio berria diseinatzean, Udalak Erdi Aroko hirigunean bizi diren haurren eta bere familien proposamenak integratu nahi izan ditu. Horregatik, guneak jolas-eskaintza zabala izango du: alde batetik, gaur egun dagoen ping-pong mahaia mantenduko da, eta, bestetik, proposamen berritzaileagoak ere jarriko dira, hala nola, eskalada gune bat eta ipuin kontalarientzako espazio bat. Azken hori inklinatutako landare-hegal batean sortuko da, eta Gasteizko Mendietara begira dagoen balkoi ere izango da.

Egun, esku hartuko den eremua zaharkituta dago. Oinezkoen joan-etorria oztopatzen duten parterreak ditu, egoera txarrean dagoen saskibaloi-kantxa bat, bai eta berritu beharreko haurrentzako jolasgunea eta bankuak ere. Aisialdirako espazio horren ondoan eta metalezko itxitura baten bidez bereizita, Erdi Aroko hiriguneko aparkalekua dago.

Gunea eraldatzeko burutuko den proiektuak hiru jolas-eremu izango ditu:

Inklinatutako gunea. Gasteizko Mendietara begiratuko duen landare-hegal bat proiektatu da eta balkoi horrek itsasontzi-branka forma izango du. Proiektuak Europako lur-gotorlekuak hartzen ditu erreferentziatzat (Kopenhageko Kastellet, Errenteriako San Markos gotorlekua). Naturalizatutako zerrenda hori egoteko eta erlaxatzeko eremua izango da, bankuak izango ditu eta ipuin kontalarientzako gune gisa ere funtzionatuko du. Alboetan arrosa-landare ederrez inguratuta egongo da.

Egurrezko horma. Oraingo metalezko hesiaren ordez egurrezko horma bat jarriko da parkea eta aparkalekua bereizteko. Hesi horren inguruan hainbat jolas jarriko dira: eskalada sokekin, hormaren kontra jarritako txirristak, oreka enborren eta harrien gainean, egokitutako zabu bat,… Zoruak, gainera, gomaren ordez azalezkoak izango dira, jasangarriagoak izateko.

Erdiko gunea. Antzokiaren eta hormaren arteko eremua partzialki zolatutako espazio bat izango da eta zulaturiko lorategi bat izango du erdian, arrapalez inguraturik. Naturalizatutako eremu horretan zumezko habi bat eta enborrekin egindako espiralak jarriko dira, oreka-jolasak egiteko. Induskatutako espazio horretako hegal txikietan sokak jarriko dira gora eta behera ibiltzeko. Zolatutako eremuan ping-pong mahai bat eta saski bat jarriko dira, azken hori zuhaitz moduan antolatutako hiru uztairekin.

Altzariak. Aulkiak eta bankuak Gasteiz modelokoak izango dira.

Zuhaitzak. Hamar lizar handi landatuko dira, itzala eman eta eremua berda dezaten. Gainera, bankuak jarriko dira zuhaitz horien inguruan.

Tirolina Etxanoben. Proiektuak Etxanobetarren lorategian tirolina bat jartzea ere aurreikusten du. Izan ere, Ramón Bajoko haurrak horren alde azaldu ziren eta Udalak instalatzeko konpromisoa hartu zuen.

HAURREN AUZOA DOSSIERRA

Share

100.000 euroko inbertsioa, Koroatzearen auzoko argiteria hobetzeko  

Koroatzearen auzoko Badaia kaleko, Kutxa kaleko, Domingo Beltran de Otazu kaleko eta Andre Maria Zuriaren Koroatzearen kaleko argiteria publikoa hobetuko du Gasteizko Udaleko Mugikortasunaren eta Espazio Publikoaren Sailak. Gaur goizean onetsi du Tokiko Gobernu Batzarrak lan horiek egiteko kontratua lizitaziora ateratzea, 115 faroletan ‘led’ teknologia duten argiak instalatzea barne. 99.912,05 eurokoa da aurrekontua da, eta 5 hilabetekoa lanak egiteko epea.

“Lanean dihardugu, hiriko auzoak hobetzeko. Oraingo honetan, Koroatzearen auzoko argiteria modernizatuz, kaleak hobeto argiztatzeko eta energia-efizientzia eta ingurumena hobetzeko”, azaldu du Mugikortasunaren eta Espazio Publikoaren zinegotzi Raimundo Ruiz de Escuderok.

LED teknologiako 115 luminaria instalatuko dira kale horietan, orain artekoak baino eraginkorragoak izaki. Energia-kontsumoa murrizteko aukera ematen du horrek —kontsumo elektrikoa (kwh) eta atmosferara egiten diren CO2 emisioak—, eta argiteria publikoaren energia-eraginkortasunaren araudiarekin bat datozen argiztapen- eta uniformetasun-mailak lortzekoa.

Gainera, orain dauden argiek eragiten duten itsutzea eta argi-kutsadura ekidin nahi dira, baita mantentze-kostuak gutxitu ere, luminaria horien bizitza baliagarria konbentzionalena baino askoz luzeagoa baita. A energia-kalifikazioa lortuko da berrikuntzaren ondoren.

 

Share