Prentsa Oharren banner

Gasteizko Udalak Espainiako Gobernuak emandako 37.000 maskara jaso ditu

 

Gorka Urtaran alkatearen adierazpenak

Gasteizko alkate Gorka Urtaranek Espainiako Gobernuak hiriari emandako 37.000 maskarako multzoaren zati bat jaso du, Gobernuak Euskal Autonomia Erkidegoan duen ordezkari Denis Itxasoren eskuetatik. Bidalketa horretaz gain, beste 13.000 maskara eman ditu Arabako Foru Aldundiak lurraldeko gainerako udalerrietan banatu ditzan. Administrazio zentralak 13.000 ale emango dizkie EAEko udalei orotara.

 

Gorka Urtaranek zein Denis Itxasok koronabirusak sortutako pandemiari aurre egitean erakundeen artean izandako lankidetzaren balioa azpimarratu dute. Gizarte entitateek, Eusko Jaurlaritzak, aldundiek, udalek eta EUDELek lagunduko dute babesteko materialak banatzen gaurtik aurrera.

Gasteizko alkateak Gobernuaren laguntza eskertu du. “Laguntza oro ongi etorria da, eta maskara hauei esker, zalantzarik gabe, Udalak babes-material gehiago izan dezake egunez egun gure plantillaren eta herritarren premiei erantzun eraginkorragoa emateko”, adierazi du Urtaranek, eta gogoratu du babesteko materiala arduraz  erabili beharra dagoela. “Higiene neurrien garrantzia aintzat hartzen jarraitu behar dugu, eta maskarak zuzen eta egoera bakoitzean behar den bezala erabili”, erantsi du.

Gobernuak Euskal Autonomia Erkidegoan duen ordezkari  Denis Itxasok, berriz, itxialdia arintzean ere “euskal herritarrak erantzukizun eta gizabide eredua ematen ari” direla nabarmendu du. “Banaketaren arrakasta ez da neurtuko ematen diren maskaren kopuruagatik, baizik eta gaurtik aurrera erabiltzea nahitaezkoa zela ez zekitenei —gutxienak— eman ahal izateagatik, ziur aski. Normaltasun berrirantz ematen ari garen pauso zuhurrak ez ziren posible izango herritarren kontzientziaziorik gabe. Haien konpromisoari esker ari gara lortzen helburuak”, esan du.

Share

Gasteizko Udalak gomendio batzuk argitaratu ditu maiatzaren 2tik aurrera kirola egitera edo ibiltzera doazenentzat

  • “Ganoraz jokatu. Birusa ez da desagertu eta kontuz jokatzen jarraitu behar dugu”, azpimarratu du Livia Lopezek
  • Oro har, erabiltzen den bidearen eskuinetik zirkulatzea gomendatzen da, zirkulazioaren noranzkoak argi zehaztuz

 

Gasteizko Udaleko Kirol eta Osasun Sailak bihartik aurrera paseatzeko edo kirola egiteko hainbat gomendio prestatu ditu, COVID-19 gaixotasunak sortutako krisiaren deseskalada delakoaren barruan Normaltasun Berrirako Trantsiziorako Plana dela eta. Biztanleriaren talde bakoitzerako jarraibide eta ordutegi espezifikoekin batera, Udalak herritarrek jarraibide zehatz batzuk izatea nahi du, bi pertsona-talderi bereziki zuzenduak: kirol-jarduera neurritsua eta erregularra aurretik egiten ari zirenei, eta kirola egiteko ia ohiturarik ez dutenei.

 

“Entrenamenduak berreskuratzeko edo kalean jarduera fisiko bat hasteko orduan sen ona alde batera ez uztea da gure lehen aholkua. Zalantzarik gabe, albiste ona da kanpoan berriro kirola egin ahal izatea, baina oso gogoan izan behar dugu nondik gatozen eta epidemia horrek gizartean eragin duen mina. Hori dela eta, zuhurtzia eta kontzientzia osoa eskatzen dugu, birusa ez baita desagertu eta kontuz jokatzen jarraitu behar dugulako”, adierazi du Livia Lopez Kirol eta Osasun zinegotziak.

 

Bai oinez ibiltzeko, baita espazio publikoan egingo diren kirol-jardueretarako, osasun publikoaren arloko zenbait jarraibide daude. Lehenengoa zirkulazioa antolatzea da, gainerako pertsonekiko distantzia soziala mantentzen dela bermatzeko. Horretarako, Udalak arau orokor gisa gomendatzen du erabiltzen den bidearen eskuinetik zirkulatzea, zirkulazioaren noranzkoak argi eta garbi zehaztuta gera daitezen.

 

Era berean, gomendagarria da ziurrenik jendea ibiliko den eremuetara ez gerturatzea, ahal den neurrian ordezko bideak erabiltzen saiatuz eta Udalak jarduera-ordutegiek Gasteizko herrietan izango duten eraginari buruz argitaratu dituen zehaztapenak errespetatuz. Running-a edo antzeko diziplinak praktikatuz gero, ezarrita geratu den bezala, bakarka egin beharko dira.

 

Guzti hau kontutan hartuz, honako dekalogoa planteatzen du Udalak kirol jarduerara begira:

 

  1. Erabili arropa erosoa, baldintza klimatologikoetarako egokia eta gainerako pertsonek erraz ikus zaitzaten aproposa.
  2. Helburu eskuragarriak ipini eta zure gorputza entzun.
  • Konfinamenduaren aurretik kirolen bat egiten hasi bazara, ez ezazu utzi zenuen jarduerari berriro ekin nahi izan intentsitate berdinarekin. Ahaztu erritmoak.
  • Kirol berri batekin hasi nahi baduzu, egin modu egoki eta ordenatuan. Gomendagarria da kontserbadorea izatea.
  1. Gorputza “desentrenatuta” dago. Ahal den neurrian lesioak saihesteko, jarduerarako prestatu behar dugu, eta saioaren zati bat aktibatzeko erabili behar dugu. Ondo mugituko ditugu artikulazioak eta leunki luzatuko ditugu giharrak. Ariketa hauek amaitzean ere errepikatuko ditugu.
  2. Ez da beharrezkoa entrenamenduan baimendutako denbora guztia erabiltzea.
  3. Ez entrenatu egunero, atsedena ere erabakigarria da gorputza egokitzeko. Zure hasierako mailaren arabera, 2 edo 3 egunean behin entrenatu dezakezu. Eta gainerako egunetan, paseatzera atera.
  4. Indar-lana egin. Txandakatu zure lasterketak tonifikazio eta indartze ariketekin (sentadilak, flexioak, abdominalak). Egin ariketa horiek ahalik eta gehien errepikatu gabe, utzi neke tarte handia zure giharrei.
  5. Kirola egiteko ordu-tarteak ez dira tenperaturak oso altuak izango diren orduak, baina kontuan hartu ondo hidratatzea garrantzitsua dela. Eraman botila bat eta begiratu eguraldiaren igarpenak irten aurretik.
  6. Etxera iritsi bezain laster, dutxatu, horrela ez hozteko.
  7. Erantzi zapatilak etxera sartu aurretik eta sartu arropa azkar garbigailuan. Interesgarria izan daiteke zapatilak eguzkitan eta balkoi edo leiho batean uztea.
  8. Goza ezazu eta hurrengo egunetarako gogo gehiagorekin geratu.

 

Azkenik, gogorarazi behar da Udaltzaingoak, Ertzaintzarekin koordinatuta, alarma-egoeraren etapa berri hori zainduko duela, dekretuaren arabera egin dadin eta pertsonen osasuna arriskuan jar ez dadin. Ildo horretan, udaltzainek ezarrita dituzte zaintza bereziko eremuak eta, hala badagokio, zirkulazioa antolatzeko ezarri beharreko neurriak.

Share

Santa Barbarako azoka bueltan izango da ostegunean

Eusko Jaurlaritzak apirilaren 8an argitaratutako aginduaren aldaketa dela eta, Santa Barbarako merkatuak bere jarduerari ekingo dio berriro datorren ostegunean. Hala jakinarazi die Gasteizko Udalak astero ostegun eta larunbatetan merkatu horretara joaten diren ekoizleei. Merkatua, alarma-egoera aitortu zenetik egiten duen bezala, segurtasun-distantziak mantentzeari, babes- eta higiene-neurriei buruzko jarraibide guztiak errespetatuz egingo da, COVID-19 birusaren transmisioa eragozteko.

Informazio gehiago http://www.vitoria-gasteiz.org/koronabirus

Share

Santa Barbarako azoka bertan behera geratu da

Gasteizko Udalak, Eusko Jaurlaritzako Osasun Sailak emandako agindua betez, Santa Barbara plazako salmenta merkatua bertan behera utziko du hemendik aurrera. Azoka hori ostegunetan eta larunbatetan egiten da. COVID-19ren transmisioa saihesteko neurrien artean, eta alarma-egoera aitortu ondoren, Simon Bolivar eta Lakuako merkatu ibiltariak bertan behera uztea ezarri zen, batez ere ez dituztelako elikagaiak saltzen. Orain, Eusko Jaurlaritzak elikagaiak eta nekazaritzako eta abeltzaintzako produktuak zuzenean saltzeko merkatu eta azoka tradizionalak aldi baterako eteteari buruz emandako aginduaren ondoren, Santa Barbarako merkatua ere jarduerarik gabe geratuko da.

 

Etenaldi hori martxoaren 14an koronabirusak eragindako osasun krisia kudeatzeko ezarritako alarma egoera amaitu arte egongo da indarrean. Osasun Sailaren Aginduak, halaber, merkatuak behar bezala garatzeko jarraibideak jasotzen ditu, baldin eta alarma-egoera amaitzen bada baina osasun-larrialdiak bere horretan jarraitzen badu. Kasu horretan, segurtasun-distantziei eta higiene-neurriei buruzko zenbait gomendio bete beharko dira.

INFORMAZIO GEHIAGO: JAURLARITZAREN AGINDUA

www.vitoria-gasteiz.org/koronabirus

 

Share

Udalak ia 13 milioiko aurrezpen garbiarekin itxi zuen iazko ekitaldia

Gasteizko Udalak badu, dagoeneko, 2019ko ekitaldiko udal aurrekontuaren likidazioa, eta aurtengo kontuetara iazkoan sortutako diru-soberakinak gehitzeko moduan da. 2019ko aurrekontuaren itxierak 12.737.620,66 euroko aurrezpen garbia eman du; kopuru hori da ohiko diru-sarreren eta ohiko gastuen arteko aldea gehi epe luzerako mailegu-amortizazioaren gastuak. Kopuru horrek udal-kontuen osasun ona islatzen dute, Gorka Urtaran alkatearen aburuz: “datu positiboa da, eta horren harira esan dezakegu iazko ekitaldiko aurrekontua egoki kudeatu zela, eta horrek zorpetzeko ahalmena bermatzen dio Udalari”.

Iazko kontuen likidazioaren funtsezko beste magnitude ekonomiko bat aurrekontu-emaitza doitua da, zein baita lortutako diru-sarrera guztien eta gastu guztien (ez soilik ohikoen) arteko aldearen emaitza. Adierazle horrek 8.268.844,03 euroko zifra positiboa ematen du.

Azkenik, beste datu garrantzitsu bat diruzaintza-soberakina da, hots, indarreko aurrekontura joan den urteko ekitalditik ekarri daitekeen diru-soberakina, hain zuen ere 34.718.742,12 eurokoa. Kopuru hori bi ataletan bana daiteke: lotutako soberakina, hots, nahitaez xede jakin batera aldatu beharrekoa (21.737.624,53 eurokoa) eta zerbitzu orokorretarako soberakina, 2019an eskatu arren, artean esleitu gabe dauden lan eta proiektuak finantzatzera bideratuak (12.981.117,59 euro). Lotutako soberakina zenbait proiektu ea lanetara bideratuko da (autobus elektrikoa, Terrorismoaren Biktimen Oroimenezko Zentroaren ingurunea eraberritzea), eta baita Eskualdeko Enplegu Plana bezalako ekimenetara ere.

“Iazko ekitaldi ekonomikoa positiboa izan zen. Lan, ekimen eta proiektu ugari bultzatu ahal izan genituen gure hirian. Hori guztia kontuan hartuta, esan dezakegu 13 milioi garbiko aurrezpena izateak erakusten duela Udal honen aurrekontu-magnitudeak eta magnitude ekonomikoak egoera positiboa islatzen dutela, datozen hilabeteetarako indarraldian jartzen gaituen (beti ikuspuntu ekonomikotik) egoera, alegia”, amaitu du alkateak.

Share

Udalak elikadura-establezimenduetan COVID-19ren aurkako segurtasun-neurriak kontrolatzeko kanpaina hasi du

Gasteizko Udalak, Osasun Publikoko zerbitzuaren bidez eta Eusko Jaurlaritzarekin koordinatuta, elikadura-establezimenduen ikuskapen-erronda hasi zuen atzo, COVID-19ren transmisioa geldiarazteko beharrezkoak diren segurtasun-neurriak behar bezala betetzen direla egiaztatzeko. Aldi berean, gomendio horiei buruzko informazio difusioa indartzen ari da, establezimenduetako langileei, instalazioei eta bezeroei eragiten baitie.

 

Segurtasun-gomendioek honako alderdi hauek jorratzen dituzte: eskuen higienea (nola eta zein egoeratan egin behar den), laneko eskularruak erabiltzeko jarraibideak, maskara erabiltzea komeni den ala ez, laneko arropa garbitzea, establezimenduaren beraren higienea (gomendatutako produktuak eta zer azaleratan jardun behar den), garbiketa- eta desinfekzio-maiztasunak, manipulatzaileen sintomak zaintzea eta kasu positibo bat detektatzeko jarraibideak.

 

Bezeroei dagokienez, establezimenduaren eta erostera joaten direnen erantzukizuna da gehienezko edukiera errespetatzea, bai barruan, bai kanpoan, pertsonen arteko 1,5 metroko prebentzio-distantzia bermatzeko. Ahal den neurrian, saihestu egin behar da bezeroek elikagaiak zuzenean manipulatzea, bereziki ontziratu gabeak. Autozerbitzuko establezimenduen kasuan, erabilera bakarreko erabili eta botatzeko eskularruak erabiltzea gomendatzen da, beti erabiltzeko moduan egon beharko dutenak.

 

“Egungo pandemia-egoeran elikadura-establezimenduek gomendio horiek betetzea oso garrantzitsua da. Batetik, birusa kutsatzeko eta zabaltzeko arriskua ahalik eta gehien gutxitzeko, eta, bestetik, elikagaien hornikuntza bermatzeko, produktu horien hornikuntza oinarrizko zerbitzua baita, egungo egoeretan huts egin ezin duena “, gogorarazi du Livia Lopez Kirol eta Osasun zinegotziak.

 

Sektoreko elikadura-establezimenduei eta elkarteei egindako jakinarazpenaz gain, Udal webguneak elikadura-establezimenduetako segurtasun-neurriei buruzko informazio guztia sartu du esteka honetan.

 

+INFO: vitoria-gasteiz.org/koronabirus

Share

Udalak areto bat eta material osagarria laga dizkio Gasteizen koronabirusaren kontra eratu den maker komunitateari

Gasteizko Udalak Simon Bolibar plazako areto bat aldi baterako laga dio COVID-19aren kontra eratu den maker komunitateari, 3D baliatuz osasun materiala egiten laguntzearren. Izan ere, boluntario talde horren lanak bolumen handia hartu du, eta leku bat behar zuten koordinatzeko eta produktuak eta material dohaintzak biltegiratzeko.

 

Aretoa uzteaz gain, Udalak PVCzko ia 7.000 lamina garden eman dizkie, material hori baliagarria baita maker komunitatea egiten ari den zipriztinen aurkako biserak fabrikatzeko. PVC ez ezik, 3D-ko inpresiorako harizpi bobinak eta biserak burura lotzeko gomak ere hartzen dituzte makerrek.

 

3D-ko inpresioan aditu diren boluntarioek osatu dute koronabirusaren kontrako Euskadiko maker komunitatea, eta osasun arloko langileek berek baliozkotutako modelo batean oinarrituz hasi dira  zipriztinen aurkako biserak fabrikatzen. Besteak beste, ingeniaritza eta diseinuaren arloko profesionalek osatzen dute komunitatea, eta arnasketa-aparatu homologagarri baten bila ere ari dira.

 

 

VGBiziz sarean isunik ez

 

Bestetik, Gasteizko Udaleko Mugikortasunaren eta Espazio Publikoaren Sailak ebazpen bat sinatu du VGBiziz aparkaleku seguruen sarean erregimen zigortzailea aldi baterako eteteko, alarma egoerak indarrean jarraitzen duen aldirako. Hartara, bizikleta sareko guneren batean gordeta duten pertsonek bertan utzi ahalko dute, ordenantzak aurreikusten dituen zigorren beldurrik gabe.

 

Izan ere, Gasteizko Udalak ulertzen du alarma egoeraren ondorio diren murrizketek ezinezko bihurtzen dutela VGBiziz sistemak zuzen funtzionatzea, batez ere bizikletak epearen barruan jaso eta eramateko beharrari dagokionez.

Share

Udalak indarkeria matxista jasateko arriskuan dauden pertsonei gogorazi nahi die arreta-baliabide guztiak martxan dituela

 

  • Herritar guztiei dei egiten die gure inguruan gertatzen denaz kontzientzia har dezaten eta erantzukizunez joka dezaten; horrela, indarkeria- edo desanparo-egoeraren baten lekuko izanez gero, hirian eskuragarri dauden baliabideak eta zerbitzuak erabil ditzaten

 

Gorka Urtaran alkatearen adierazpenak

 

Udalak indarkeria matxista jasateko arriskuan dauden pertsonei gogorarazi nahi die arreta-baliabide guztiak martxan dituela. “Gogoratu nahi dugu Udalak bere gizarte zerbitzuak eta indarkeria matxistaren arretara zuzendutako baliabide guztiak martxan mantentzen dituela eta beste erakundeekin koordinazioan ari dela, egungo egoerak ekar ditzakeen egoerei erantzuna emateko. Gainera, egun hauetan gertatutako emakumeen azken hilketen aurrean gure gaitzespenik irmoena errepikatzeko aprobetxatzen dugu eta elkartasuna adierazten diegu biktimen gertuko familiei eta pertsonei”, nabarmendu du Gorka Urtaran alkateak.

 

COVID-19k eragindako osasun-krisiko egoera kudeatzeko konfinamendu-neurrien eta alarma-estatuarekin lotutako beste neurri batzuen aurrean, Udala jakitun da sor daitezkeen krisi- edo gatazka-egoerez, bai eta adingabeen babesgabetasun-egoerek edo indarkeria matxistaren emakumeentzako eta beste biktima batzuentzako arrisku-egoerek eragin ditzaketen larriagotzeaz ere. “COVID-19ren hedapena geldiarazteko beharrezko neurria bada ere, derrigorrezko bizikidetza arrisku larria bihur daiteke, eta larriagotu egiten ditu tentsio-egoerak eta indarkeria-arriskua erasotzaileekin bizi direnentzat. Horregatik, herritar guztiei dei egin nahi diegu gure inguruan gertatzen denaz kontzientzia har dezaten eta ardura har dezaten; horrela, indarkeria edo babesgabetasun egoeraren baten lekuko izanez gero, gure hirian dauden baliabideak eta zerbitzuak erabil ditzagun, azaldu du alkateak.

 

Ildo horretan, Udalak gogorarazi du zer udal-baliabidetara jo daitekeen, behar izanez gero:

  • Gizarte Larrialdietako Udal Zerbitzua (SMUS) 24:945 13 44 44
  • Udaltzaingoa 24 ordu: 092
  • Emakumeentzako Zerbitzu Espezializatua (SATEVI), Eusko Jaurlaritzak kudeatua, eta EAE osoan erabilgarri 24h (doakoa eta arrastorik uzten ez duena): 900 840 111 eta satevi@zerbitzuak.org

Horrez gain, Udalak gogoan du LGTBIfobiaren Aurkako Behatokiaren harremanetarako telefonoa ere, Ikusgune: 633309653.

Udalak Familia Indarkeriaren Unitateko kideak indartuko ditu konfinamendu aldi horretan.

Share

Zurrumurruen kontrako bideo baten bidez gogoratu nahi dute Arrazagatiko Diskriminazioa Desagerrarazteko Nazioarteko Eguna

 

Aitor Mendiluze, Aitor Sarriegi, Amets Arzallus, Beñat Gaztelumendi, Igor Elortza, Maialen Lujanbio, Sustrai Colina eta Unai Agirre bertsolariak estereotipoen aurka aritu ziren 500 pertsona bildu zituen bertso-saio batean

‘Zurrumurruek pertsona ardi bihurtzen dute… eta gizartea, artalde’. Amets Arzallusen bertso hori aukeratu dute izenburutzat Gasteizko Udalak eta Arabako Foru Aldundiak martxoaren 21a Arrazagatiko Diskriminazioa Desagerrarazteko Nazioarteko Eguna dela gogoratzeko atera duten bideoarentzat, Zurrumurruen kontrako Estrategiaren barruan. Migratzaileen Nazioarteko Eguna zela eta 2018ko abenduaren 18an zurrumurruen kontra egindako bertso-saioko une gogoangarrien bilduma da. Aitor Mendiluze, Aitor Sarriegi, Amets Arzallus, Beñat Gaztelumendi, Igor Elortza, Maialen Lujanbio, Sustrai Colina eta Unai Agirre bertsolariek hartu zuten parte, eta 500 pertsonatik gora bildu zituzten.

“Herritarrak sentsibilizatzea da bideoaren xedea; horregatik, aukeratu diren bertsoek hausnarketa esanguratsuak egiten dituzte estereotipoez, aurreiritziez, jatorriagatiko diskriminazioaz eta horrek guztiak bizikidetzari dakarzkion ondorio negatiboez”, nabarmendu du Bizikidetza eta Aniztasunaren zinegotzi Miren Fernández de Landak.

‘Begiak itxi behar ditugu, eta begiradak zabaldu’. Maialen Lujanbioren bertso horrek ematen dio amaiera bideoari, ezin hobeto definitzen baitu Zurrumurruen kontrako Estrategia.

Bai bertso-saioa bera bai bideoaren grabaketa eta zabalkundea Zurrumurruen kontrako Estrategiaren parte dira, zeinak ekintza berritzaile eta parte-hartzaileen bitartez pentsamendu kritikoa eta sentsibilizazioa sustatzeko xedea baitu.

2016ko bukaeran hasi zen Zurrumurruen kontrako Udal Estrategia lantzen Gasteizen, entitate eta pertsona konprometituen sare bat osatzeko, informazioaren, prestakuntzaren eta kontzientziazioaren bitartez gizartean migrazioaz eta atzerritarrez zabaltzen diren estereotipo negatiboak eta zurrumurru faltsuak desaktibatzeko  xedez, jarrera baztertzaile eta xenofoboak sorraraz ez ditzaten.

Arabako Foru Aldundiak berriz, 2016ko ekainean egin zuen bat ZAS! Zurrumurruen aurkako Euskal Sarearekin, lurraldeko herrietan bizikidetza sustatzeko estrategia bat aurrera eramatearren eta agerian uztearren Arabako herritarrek “ez dutela utziko” migratzaileen eta errefuxiatuen gaineko zurrumurru, gezur eta aurreiritzi xenofoboek “nahas” ditzaten.

Bideoa Zurrumurruen aurkako bertso-saioa: https://youtu.be/JrySM3jI5M4

 

 

 

Share

Alkateak neurri ekonomiko eta sozialen multzo berri bat aurkeztu du COVID-19 pandemiaren ondorioak arintzeko

 

  • Atzeratu egingo da hiru zerga nagusienak ordaintzeko aldia
  • Elkartasun-sare batek bideratuko du boluntarioen beharra eta eskaintza
  • Berrantolatu egin dira bizitegi-bazterketako zerbitzuak
  • Alternatiba bat bilatuko zaio adinekoentzako zentro soziokulturaletako jantokien itxierari
  • Eten egin da TAO, besterik esan arte

 

 Gasteizko alkate Gorka Urtaranek neurri multzo berri bat aurkeztu du, neurri batez ere ekonomiko eta sozialak, koronabirusaren pandemiaren ondorioak arintze aldera. Alkateak gogorarazi egin du oro har kalera irtetearen debekua, nahitaezko gutxieneko aferetarako ez bada, eta beti ere kutsatzea eragotziko duen gutxieneko tartea gordeta.

“Gasteizko Udalean lanean jarraitzen dugu bakarrik bizi direlarik, adinekoak diren edo arrisku-patologiak dituzten pertsonak artatzeko, beren beharrak asetze aldera. Udala hor izango da, laguntzen, beste erakunde eta entitate batzuekin batera. Bestalde, gur familia, enpresa eta autonomoei gauzak errazteko neurriak diseinatzen ari gara, bizi dugun osasun-krisiaren aurrean”, azaldu du Gorka Urtaranek.

 Hiru udal-zerga nagusienak ordaintzeko aldia zabaltzea

 Gasteizko Udalak luzatu egin du hiru udal-zerga garrantzitsuenak ordaintzeko epea, hartara errazteko herritarrek bizitzen ari garen egoeraren aurrean egin beharreko izapideak, kontuan hartuta ezin direla izapide horiek aurrez aurre egin.

Horrenbestez, Ondasun Higiezinen gaineko Zerga ordaintzeko epea irailaren 15era luzatuko da. Bi hilabete eta erdiz luzatuko da ordainketa-aldia, zein, berez, apirilaren 15etik ekainaren 30era bitarteko baitzen.

Ibilgailuen zerga ordaintzeko aldia irekita dago (martxoaren 13tik maiatzaren 13ra bitarte), baina hori ere irailaren 15era bitartean ordaindu ahalko da, lau hilabetez luzatzen delarik epea.

Zabor-tasa ordaintzeko epea ere irailaren 15ean amaituko da, nahiz eta berez ekainaren 30ean ezarrita zegoen epemuga, Ondasun Higiezinen gaineko Zergaren kasuan bezala.

Horiek dira orain artean aintzat hartutako zergatik, baina ez da inolaz ere ixten aurrerantzean beste zerga eta tasa batzuetan ere ordainketa-aldia luzatzeko aukera.

Jarduera Ekonomikoen gaineko Zerga ordaintzeko aldia irailaren 5ean irekiko da eta azaroaren 5ean amaituko. Kasu horretan ez da beharrezkotzat jo ordainketa-aldia atzeratu beharra.

Elkartasun antolatuko programa berria

Alkateak bihar Osasun sailburu Nekane Murgak aurkeztuko duen Elkartasun Antolatuko Sarea aipatu du. Sare horrek zentralizatuko ditu boluntario eske guztiak, zeinek laguntza emango baitieten zenbait zeregin egin ezin dutenei: erosketak egin, botikara joan, etab. Halaber, telefono bidezko jarraipena egingo zaie kasu horiei.

“Sare horretan zentralizatuko dira ez soilik beren burua boluntario gisa eskaini nahi duten pertsonen eskaintzak, baita ahulezia egoeran dauden kolektiboek eta arriskuan eta babes sozialik gabe dauden pertsonek egiten dizkiguten eskaerak ere. Benetan eskertzekoa da pertsona askok laguntza boluntarioa emateko erakutsi duten jarrera, baina eskaintza hori guztia modu antolatuan bideratu behar da. Gutxieneko prestakuntza jaso behar dute, prebentzio-neurriak izan behar dute kasu jakin batzuetan, baita erantzukizun zibileko aseguru bat ere, eta boluntarioen lanaren kudeaketa eraginkorra bermatuko duen euskarri informatikoa ere prestatu behar da. Guztion osasuna zaintzeak mugimenduak guztiz ezinbestekoa denera murriztea eskatzen du. Pertsona artatuen osasuna zaintzeak laguntza emango dieten boluntarioen kopurua ahalik eta gehien murriztea eskatzen du”, gehitu du Gorka Urtaranek.

Euskadiko udal guztietan emango du zerbitzu sare horrek.

Bizitegi-bazterketako zerbitzuak

Bihartik aurrera, kalean bizitegi-bazterketa egoeran bizi diren pertsonak Udalak eta Gurutze Gorriak duela bi urte Pio Baroja ikastetxean egokitu zuten eta gaur egun hutsik dagoen iragaitzazko migratzaileentzako zentrora eramango dira. Literak eta dutxak ditu ikastetxearen gimnasioan paratu zen leku horrek.

Bizitegi-bazterketari aurre egiteko udal-zerbitzuetan COVID-19 gaitzaren aurreko segurtasun-neurriak betearaziz, Gizarte Politiken, Adinekoen eta Haurren Sailak birbanatu egin ditu Aterpeko erabiltzaileak zerbitzu horren eta Arkupeetako egoitza ohiaren artean, hain zuzen ere 12 pertsona bideratu dita horra.  Arkupeetako egoitza ohian gelak eta jantoki zerbitzua daude.

Era berean, erabaki da Aterpeko eta Neguan ostatu emateko bitartekoko erabiltzaileak baliabide horietan geratu ahalko direla egunean zehar, eta, horri begira, bazkariak ere emango dira horietan.

Adinekoentzako jantokiak

Ezarritako segurtasun-neurriak betearazteko, bihartik aurrera eten egingo da jantoki zerbitzua adinekoentzako zentro soziokulturaletan.

Urrats horri ekin aurretik, telefonoz jo izan da balioespen soziala duten erabiltzaileengana, beren egoera aztertzeko. Elkarrizketa horien bidez egoera zaurgarrian dauden 100 pertsonen kasuak atzeman dira, eta horiei etxera emango zaie janaria. Gurutze Gorriak banatuko du janaria bi egunetik behin, hozkailudun ibilgailuen bidez. “Jantoki zerbitzua jasotzen zuten pertsona guztientzako alternatibaren bat izango dutela brmatu dugu”, azpimarratu du Gorka Urtaran alkateak.

Azken egunetan % 60 arteraino jaitsi da adinekoentzako jantokietara joaten dirnen kopurua. Atzo (igandea), 25 pertsonak baliatu zuten zerbitzua.

Garbiketa-zerbitzua, ohi bezala lanean

Alkateak azpimarratu egin sendotu egin dela garbiketa-zerbitzua, nola espazio publikoan, hala uda-instalazioetan eta garraio publikoan. “Garbiketa prebentzio-neurri funtsezkoa da, eta Udalak sendotu egin behar du zerbitzua”, gogoratu du Gorka Urtaranek. Horregatik, bio-alkohola duten desinfektagarriak eta garbigarriak erabiltzen ari dira Horrez gain, Ingurumen Plangintza eta Kudeaketa Zerbitzuak hartu dituen prebentzio-neurrien artean, Birziklagunea ixtea erabaki da. Garbigunea irekita egongo da.

Gasteizko hondakinak bildu eta garraiatzeko zerbitzuak ohiko moduan dihardu, nahiz eta prebentzio-neurriak hartuta, esaterako ostiral arratsaldean garbiketa-kontrataren esleipendunak enpresa barruan koronabirusarekin kutsatzeko aukera albait gehien murrizteko asmoz hartutakoak.

Joan de astean aldageletan sartzeko txandak ezarri ziren, eta langileei eskatu zitzaien ez daitezela taldetan bilduta edo leku itxietan egon. Behin lan-txanda bakoitza amaituta, lantokia ahalik eta azkarren eta ahalik eta jende gutxienarekin harremana izanda uztea eskatu zitzaien langileei.

Telelana

Gaur egun, 250 langile inguru ari dira zein bere etxetik lanean, edo ordutegia malgutzeko formulen arabera lanean. Beharrezkoak egiten ari dira egun pare batean 1.100 izan daitezen telelanean arituko direnak. Horren guztiaren atzean Giza Baliabideen Sailaren eta hori ahalbidetzeko nahitaez behar den euskarri teknologikoa bideratzen duen Udal Administrazioaren eta Eraldaketa Digitalaren Sailaren arteko lankidetza dago.

TAO zerbitzua, etenda

Bestalde, Gasteizko Udalak TAO zerbitzua besterik esan arte etetea erabaki du gaur. Horrenbestez, Gasteizko kaleetan aparkatzeko mugak indar gabe geratu dira. Halaber, indar gabe geratu da Geltoki plazako eta Aldabe gizarte-etxeko aparkalekuetako araubide eta mugak. Ez dute zerbitzurik emango taloiak emateko makinak, eta zerbitzuaren zaindariek utzi egingo dituzte beren ohiko zereginak.

Aldaketak udal-azoketan

Santa Barbara plazako, Lakuako eta Simon Bolibar plazako aire zabaleko azoketako saltokietan diharduten diren elkarteak kontsultatu ostean, salgairik dagoen bitartean Santa Barbara plazako azokari eustea erabaki da, behar-beharrezko produktuak saltzen direlako betan.

Aldiz, eten egin dira, besterik esan arte, Lakuako eta Simon Bolibar plazako azokak.

Eledunen Batzarrerako deialdia

Biharko, alkateak Eledunen Batzarra deitu du beste behin ere, Udaleko talde politikoekin batera azkenaldian hartzen ari diren neurriak aztertzeko. Era horretako hirugarren bilera izango da joan den astetik.

Informazio gehiago: COVID-19 gaitzaren eragina murrizteko aurretiaz hartutako neurrien laburpena

 

 

 

Share