Prentsa Oharren banner

Suhiltzaileek ibilgailu berria gehitu dute flotara, lan teknikoetan aritzeko

Prebentzio, Su Itzaltze eta Salbamendu Zerbitzuak (PSISZ) ibilgailu arin berria gehitu du daukan flotara, talde operatiboari laguntzeko.

Pick up ibilgailua da, eta laguntza teknikoa emateko erabiliko da nagusiki. 47.101 euroko gastua sortu du horrek.

Urtebete baino gutxiagoan bost ibilgailu eskuratu dituzte suhiltzaileek beren flotarako. Izan ere, 2020an ibilgailu hauek gehitu zituzten flotara: 30 metroko altuerako eskailera artikulatua duen kamioia (750.079 €), lantegi-furgoneta bat (64.444 €), eta prebentzio, ikuskapen, prestakuntza eta mantentze lanetarako zein esku-hartzeetan laguntzeko beste bi ibilgailu (41.000 € baino zertxobait gehiago).

 

Share

Pertsona bat erreskatu dute Jundizko biokonpost-lantegiko deskarga-hobitik

Bart goizaldean, agiririk gabeko gizon bat erreskatu dute Jundizko biokonpost-lantegiko deskarga-hobitik; ustez, udalaren garbiketa zerbitzuko zabor-bilketarako kamioi batetik erori da bertara.

04:25ean gertatu da. Hondakinak deskargatu ondoren, kamioiaren gidaria konturatu da gizonezko bat zegoela, eta berehala ohartarazi die larrialdietarako zerbitzuei zein lantegiko arduradunei.

Suhiltzaileak, udaltzainak eta anbulantzia bat joan dira pertsona hori erreskatatzera; bere kordean zegoen, baina zango batean zauritua, eta ospitale batera eraman dute laguntza medikoa eman ziezaioten.

Share

Suhiltzaileek 125 alditan esku hartu behar izan dute erlaitzetako elurra kentzeko

Agirrelandako Prebentzio, Su Itzaltze eta Salbamendu Zerbitzuko (PSISZ) langileek 125 irteera egin behar izan dituzte hiriko eraikinetako erlaitzetatik eta beste egitura batzuetatik elurra kentzeko.

Izan ere, 2021. urteari hasiera eman dioten elurteen ondorioz teilatuetan metatu den elurra kalera erortzeko arriskua dago. Urtarrilaren 1az geroztik izandako prezipitazioak direla eta, Gasteizko suhiltzaileek esku-hartze ugari egin behar izan dute elur edo izotz blokeak bide publikora eror ez daitezen, horrek kalte materialak eta, bereziki, pertsonalak ekar baititzake.

Azken orduetan elurra erlaitz eta hegaletatik desagertzen joan den arren, oinezkoei kontuz ibiltzeko gomendatzen zaie; orobat, larrialdi zerbitzuek mugatutako inguruetatik ez paseatzeko eskatzen zaie, elurra edo bestelakorik erortzeko arriskua baitago.

Esate baterako, Foru kalean instalatutako aldamio bateko babes-olana erori zen atzo elurraren eraginez, baina zorionez inork ez zuen kalterik izan.

Share

Suhiltzaileek 392 desinfekzio egin dituzte orain arte adinekoentzako ia berrogeita hamar egoitzetan

 

 

 

 

 

 

Hiru pertsonako talde bat arduratzen da lan hori egunero egiteaz

Gasteizko suhiltzaileek 392 desinfekzio egin dituzte orain arte adinekoentzako 48 egoitza eta laguntza-zentrotan. Udalak pandemiari aurre egiteko sortu duen antolaketaren barruan egiten da lan hori, COVID-19aren mahaiarekin —koronabirusaren aurkako borroka koordinatzeko udal organoa—, Arabako Foru Aldundiarekin eta Eusko Jaurlaritzako Larrialdiei Aurre Egiteko Zuzendaritzarekin koordinatuta.

Martxoaren 24an ekin zioten lan horri. Geroztik, Prebentzio, Su Itzaltze eta Salbamendu Zerbitzuan horretaz arduratzen diren langileek bost egunean behin desinfektatzen dute zentro bakoitza. Besteak beste, San Prudentzio egoitza, zeina dagoeneko 10 aldiz desinfektatu baita pandemia hasi zenetik.

Aldez aurretik programatutako zazpi desinfekzio egiten dituzte suhiltzaileek batez beste egunean. Hiru pertsonak osatzen dute taldea, kabo batek eta bi suhiltzailek, behar bezala babestuta: gai kimikoetatik babesteko buzoak, begiak babesteko betaurrekoak, FFP3 maskarak, nitrilozko eskularruak eta gomazko botak. Sodio hipokloritozko disoluzio desinfektatzailea erabiltzen dute, eta sulfatatzeko motxilak baliatuz fumigatzen dute.

“Osasun krisia hasi zenetik, talde hori aparteko lana egiten ari da espazio horietan segurtasuna eta osasungarritasuna bermatzeko. Ez dezagun ahaztu leku horietan kontuz ibili beharra dagoela kutsatzearekin, gaixotasunarekiko bereziki sentiberak diren pertsonak daudelako, hala nola adinekoak eta haiek zaintzaileak”, azaldu du Herritarren Segurtasunaren zinegotzi Marian Gutiérrezek.

Suhiltzaileen taldeak egoitza eta laguntza-zentroetako kanpoaldean zein barruko leku komunetan esku hartzen du: korridoreak, egongelak, jolas guneak, aldagelak, komunak eta abar, instalazioen arduradunek aldez aurretik zehaztutakoari jarraituz.

Share

Suhiltzaileen Zerbitzuak bi ibilgailu berri gehitu dizkio flotari

Prebentzio, Su Itzaltze eta Salbamendu Zerbitzuak (PSISZ) bi ibilgailu berri gehitu dizkio gaur flotari; prebentzio, ikuskapen, prestakuntza eta mantentze lanetarako erabiliko ditu. Esku-hartzeetan laguntzeko ere erabiliko dira, materiala garraiatuz.

Herritarren Segurtasunaren Sailak 41.012,29 euro bideratu diru ibilgailu horiek erostera. Laster 30 metroko altuera duen eskailera-kamioi bat ere iritsiko da, zeinean 750.079 euro inbertitu baitira.

Share

Atxilotua errekisitoria judiziala ez betetzeagatik

Udaltzainek atzo errekisitoria judiziala zuen 37 urteko gizonezko bat atxilotu zuten.

Gertakariak 17:30 inguruan jazo ziren, Karlos I.a plazan zegoen patruila batek bi pertsona zihoazen furgoneta bati geratzeko agindu zionean. Gidariaren datuak egiaztatzean, epaitegian aurkezteko errekisitoria judiziala indarrean zuela egiaztatu zuten. Ondorioz, Agirrelandako poliziaren bulegoetara eraman eta gero epailearen esku utzi zuten.

COVID-19

Udaltzaingoak 40 pertsona salatu zituen atzo itxialdi-neurriak ez betetzeagatik.

Suhiltzaileek adinekoen 10 egoitzatan egin zituzten desinfekzio-lanak.

Share

Atxilotuta itxialdia behin eta berriro ez betetzeagatik

Udaltzainek 39 urteko gizonezko bat atxilotu zuten atzo itxialdia ez errespetatzeagatik eta agintaritzak esandakoa modu larrian ez betetzeagatik. Izan ere, arrazoi beragatik salaketa jasotzen zuen seigarren aldia zen.

Gertakariak 17:19an jazo ziren Errege Katolikoen kalean, patruila batek bizikletaz zirkulatzen ikusi zuenean. Azalpenak eskatu zizkiotenean, lehenengo eta behin estanko baten bila ari zela esan zuen, baina gero etxean itxita ezin zuela denbora gehiago egon onartu zuen.

Itxialdia ez betetzeagatik eta agintarien aginduak modu larri eta errepikakorrean ez betetzeagatik, atxilotu eta Agirrelandako polizia-bulegoetara eraman zuten. Gaur geratuko da epailearen esku.

Horixe da koronabirusaren pandemiaren hedapena saihesteko itxialdia dekretatu zenetik Udaltzaingoak atxilotu duen seigarren pertsona. Gainera, atzora arte, Udaltzaingoak 1.111 pertsona salatu eta 5.771 ibilgailu kontrolatu ditu.

Bestalde, suhiltzaileek egoitzak desinfektatzen jarraitu zuten. Atzo, 8 zentrotan izan ziren lanean.

Share

Droga-trafikoagatik atxilotuta

Udaltzainek larunbatean 25 eta 34 urteko bi gizonezko atxilotu zituzten agintaritza-agenteei ustez desobedientzia larriko hainbat delitu egiteagatik eta droga-trafikoagatik, hurrenez hurren.

Gertakariak 20:30 pasatxoan izan ziren: Alde Zaharrean zaintza-lanetan zebilen patruila batek Santa Maria kantoian taxi bat ikusi zuen, eta barruan azken egunetan alarma-egoeraren neurriak ez betetzeagatik salatutako gizonezko bat ezagutu zuten.

Agenteek harekin hitz egin zuten eta adierazi zien etxera zihoala gaua pasatzera. Baina azaletik egin zioten miaketan substantzia estupefaziente bat eta 300 euro inguru atzeman zizkioten. Jarraian, udaltzainak helburu zuen etxebizitzako pertsonarekin harremanetan jarri ziren. Hark, bere kabuz eta agenteekin kolaboratuz, aitortu zien taxiko gizonezkoa bere etxean egon zela droga erosten.

Gertakari guztiak ikusita, bi pertsonak atxilotu zituzten. Droga-trafikoaren ustezko egilea aske utzi zuten Guardiako Epaitegiko eginbideak osatutakoak. Aldiz, desobedientzia larriaren egilea atzo goizean geratu zen epailearen esku.

Genero-indarkeria

Udaltzainek 29 urteko gizonezko bat atxilotu zuten atzo eguerdian genero-indarkeria delituaren ustezko egilea izateagatik.

Gertakariak 13:00 baino lehentxeago izan ziren. 092 zenbakira egindako dei batean Zaramaga auzoan etxe batean genero-indarkeriaren kasu bat izan zitekeela jakinarazi zuten. Patruila batek zerbitzua eskatu zuen lekukoarekin hitz egin zuen. Hark kontatu zien pisukideak bikotekidearen erasoa jasan zuela.

Biktimarekin eta ustezko erasotzailearekin hitz egin ondoren, eta lesioen marka batzuk ikusi ostean, udaltzainek gizonezkoa atxilotu zuten. Gaur goizean geratuko da epailearen esku.

Agenteei mehatxuak

Udaltzainek ostiral arratsaldean 50 urteko gizonezkoa atxilotu zuten, desobedientzia-delituaren, agintaritza-agenteen aurkako atentatuaren eta mehatxuen ustezko egile izateagatik.

Gertakariak 20:00ak baino lehentxeago gertatu ziren. Pertsona hura Zumaia plazako bizilagunen arreta erakartzen ari zen, bide publikoan zuen jokabideagatik. Patruila bat bertaratu zen eta dokumentazioa eskatu ziotenean uko egin zion behin eta berriz, eta azkenean ihes egin zuen. Agenteek atzeman zutenean, haien aurka egin zuen eta mehatxatu egin zituen; beraz, atxilotu egin zuten.

Share

Atxilotua etxean hartu zuen pertsonari labana batekin mehatxu eta eraso egiteagatik

Udaltzaingoak 21 urteko gazte bat atxilotu zuen atzo arma zuriarekin mehatxu egitearen eta lesioak eragitearen ustezko delituagatik.

Gizonezko batek eguerdian Poliziaren Koordinazio Zentralera deitu zuen laguntza eske eta Alaba Jeneralaren kaleko etxeko logela batean giltzaperatuta zegoela adierazi zuen etxean hartu zuen pertsonak labana batekin mehatxu egin ziolako.

Bertara joandako udaltzainek gizonezko bat urduri eta eskuan zauri bat odoletan zuela topatu zuten. Pisukideak, bost egun lehenago bere etxean hartu zuenak, etxebizitza utzi behar zuela esan zionean sukaldeko labana batekin mehatxu eta eraso egin ziola adierazi zuen.

Udaltzainek erasotzailearekin hitz egin eta hark gertaerak onartu zituen. Ondorioz, atxilotu egin zuten. Gaur jarriko dute epailearen esku.

Covid-19

Udaltzaingoak 34 pertsona salatu zituen atzo pandemia geldiarazteko neurriak ez betetzeagatik.

Bestalde, PSISZek adinekoen egoitzak desinfektatzeko lanekin aurrera jarraitzen du. Atzo, 8 zentrotan aritu zen zerbitzua lanean.

Share