Prentsa oharrak

Prentsa Oharren banner

“Uda honetan ondo pasa burua galdu gabe”, Udalaren mezua ongi pasatzeko eta aldi berean osasuna zaintzeko

Alkateak eta Kultura zinegotziak atseden hartzeko eta dibertitzeko dei egin dute, baina birusaren transmisioa eragozteko gomendioak ahaztu gabe

Gorka Urtaran audioa

“Uda honetan ondo pasa burua galdu gabe” mezua zabaldu nahi du Gasteizko Udalak herritarren artean, ongi pasa dezaten, baina beren osasuna eta gainerakoena zainduz. Alkate Gorka Urtaranek eta Kultura zinegotzi Estibaliz Cantok atseden hartzeko eta dibertitzeko dei egin dute gaur goizean, baina covid gaixotasunaren transmisioa eragozteko gomendioak ahaztu gabe.

Alkateak azaldu duenez, “aurten, inoiz baino gehiago, atseden hartu behar dugu, disfrutatu, dibertitu. Indarrak berreskuratu behar ditugu, urte eta erdi hau oso gogorra izan baita, baina burua galdu gabe egin behar dugu, zentzuz, zuhurtziaz eta buruz jokatuz“.

Kultura zinegotziak adierazi duenez, “aurtengo udan aire zabaleko kultur programa antolatu dugu, beharrezko neurriak hartuta. Gasteiztarrek arte eszenikoez gozatzea nahi dugu, leku seguruetan”.

Helburu bikoitza iruditan eta eslogan batean islatzeko, Udalak naturaltasuna eta umorea baliatzearen alde egin du, burua galdu gabe dibertitzen den eta besteak dibertitzen dituen pertsona bat irudikatuz. Horretarako, buruhandien konpartsako zenbait pertsonaia erabili ditu, baina jai-giroan ibili ordez, beste mota bateko jardueretan ondo pasatzen agertzen dira.

Esate baterako, ikuskizun bati begira; bidaian; igerilekuan, urtegian edo hondartzan, edo ostalaritzaz gozatzen. Erakunde mezua uda osorako da, jaiak izango liratekeen datetan bereziki azpimarratuz, logikoa denez. “Iaz ez zen jai-ekitaldirik izan. Aurten, kultur jardueraren bat mantendu nahiko genuke, baina birusaren intzidentzia datuek eta dagozkien segurtasun arauek markatuko dute agenda; horiek esango dute zer egin dezakegun, betiere segurtasun-neurriak bermatuz”, azaldu du alkateak.

Kontzientziazio-kanpaina aste honetan zabalduko da bide publikoan (opiak, mupi digitalak, autobusak, San Migeleko elizako balkoia eta neurri handiko kuboak), udal instalazioetako eta TUVISAren autobusetako pantailetan, era guztietako hedabideetan, sare sozialetan eta udalaren webgunean.

 

Share

Udalak Gazteentzako Psikologia Aholkularitzarako zerbitzuan atentzioa bikoiztu du Pandemia dela eta

– Kontsultak handitu egin ziren 2020ko itxialdian, baita 2021ean ere. 

– 2021eko lehen seihilekoan, Gazteria Zerbitzuak 516 pertsonari eman die arreta; 2020an, berriz, 271 izan ziren, eta 2019an, 249. 

– Kezka-iturri nagusiak gizarte-, familia- eta bikote-harremanetako zailtasunak dira. 

– Kontsultatzeko bete arrazoi batzuk hauek izan dira: umore-aldaketak, orainarekiko interes eza, etorkizunarekiko kezka, antsietatea, elikadura-arazoak, dolua eta depresioa.

 

COVID-19ak eragindako pandemiaren ondorioz, nabarmen handitu da eskaera Gasteizko Udalaren Gazteentzako Psikologia Aholkularitzan. Gazteria Zerbitzuak sustatutako baliabide hori Udalaren Gazte Planaren helburuekin bat dator, 14-30 urte bitarteko pertsonei aholkularitza argi eta eraginkorra eman nahi baitie beren sentimendu, portaera eta harremanekin lotutako gaietan. Orobat, nortasun osasungarri bat eraikitzen lagundu nahi die, eta arrisku-egoerak sor ditzaketen jarrera eta jokabideak prebenitu.

Kontsulta, hitzordu eta beharren hazkunde horren ondorioz, Tokiko Gobernu Batzarrak kontratua aldatzea onetsi du gaur goizean, ikastetxeetan ematen diren hitzaldien kopurua handitu ahal izateko datorren ikasturtean. Martxoaren 15etik aurrera psikologia aholkularitzaren beraren arreta-orduak % 22,5 handitzea ere onetsi zen, eta itxarote-zerrenda nabarmen murriztea ahalbidetu du horrek.

Dagoeneko 2020ko martxoan hazi ziren zerbitzuak erregistratutako kontsultak, alarma egoera ezarri ondoren. Urte osoko datuak kontuan hartuz, 2020an 1749 kontsulta egin ziren; 2019an, berriz, 1274 izan ziren, eta 2018an, 1239. Baina “normaltasunera itzuli” ondoren ere kopuruak hazten jarraitu du. Zehazki, 2021eko lehen seihilekoan 516 pertsonari eman zaie arreta; 2020an, berriz, 271 izan ziren, eta 2019an, 249.

Izan ere, pandemiak askotariko erreakzioak eragin ditu gazteengan. Gazteria Zerbitzuaren arabera, kezka berriak sortu dira: beldurra heriotzari eta besteak kutsatzeari, antsietatea eta hipokondria, itxi gabeko doluak, harremanetarako zailtasunak, tristezia eta bakardade sentipena, familia barruko gatazkak, askatasun beharra eta familia ingurunetik urruntzekoa, edo amorrua eta inpotentzia.

Dena dela, hauek dira Aholkularitza Psikologikoan erregistratutako kezka ohikoenak: umore-aldaketak, orainarekiko interes eza, etorkizunarekiko kezka, antsietatea, elikadura-arazoak, dolua eta depresioa.

 

 

Share

Alkatetza Sailak 40.000 euro bideratuko ditu komunitatearen balioa sustatzen duten proiektuetara

Giza eskubideak, berdintasuna, justizia, gizarte kohesioa eta bizikidetza lantzen dituzten proposamen berritzaileak hautatuko ditu deialdiak

 

 

Alkatetzaren eta Erakunde Harremanen Sailak Gasteizen komunitatearen balioa sustatzen duten proiektuak aurkezteko epea ireki du gaur.

Proiektu eta ekintza berritzaileak izango dira, animazio komunitarioan oinarrituz —prestakuntza-jarduerak, kultur zabalkundea, arte-adierazpena, jarduera ludikoak edo sozialak— hiriaren testuinguruan hainbat arlotan agertzen diren aldaketa eta erronkei erantzuteko helburua izango dutenak: giza eskubideak, berdintasuna, justizia, gizarte-kohesioa eta bizikidetza. Ez dira proiektuen poltsa osatzeko deialdi honen xede izango entitate eskatzailearen ohiko programazio jarraitua osatzen duten jarduerak edo ekintzak.  Gasteizko Udalak kontratatuko ditu hautatutako proiektuak; horretara 40.000 euroko partida bideratutako da, eta aurtengo urritik abendura bitartean gauzatuko dira.

2021eko uztailaren 16an amaituko da proiektuak aurkezteko epea; interesa duten pertsonek edo elkarteek egoitza elektronikoa baliatu dezakete horretarako, edo herritarrei laguntzeko bulegoetan aurkeztu.

“COVIDaren pandemiak sortutako larrialdiak gogorarazi digute zein garrantzitsuak diren komunitatea eta espazio komunitarioaren erabilera demokrazian sakontzeko, horrek ahalbidetuko baititu ongizatea eta herritartasun osoa ziurgabetasunak eta ahultasun-egoeren hazkundeak ezaugarritutako garaiotan . Zirkunstantzia hauen aurrean, inoiz baino garrantzitsuagoa da komunitatea indartzea, Gasteizko Udaleko Alkatetzaren eta Erakunde Harremanen Sailaren ustez ezinbestekoak diren ikuspegiak batuko dituzten ekimenak ahalbidetuz, inor atzean uzten ez dituen politika publikoa indartzeko eta gizarte-kohesioa eta pertsona guztien berdintasunezko bizikidetza bultzatzeko ezinbestekoak, hain zuzen“, nabarmendu du Miren Fernández de Landa zinegotziak.

Share

Kulturak 65.000 euro emango dizkio Magialdiari

Gasteizko Udalak lankidetza-hitzarmena sinatu du Arabako Ilusionisten Elkartearekin eta, horren bitartez, Hezkuntza eta Kultura Sailak 65.000 euro jarriko ditu 2021eko Magialdiko programaziorako. Gasteizko Magialdiaren 33. edizioa aurtengo irailean egingo da.

“Txertaketa-kanpainaren erritmoa lagun, pandemiaren bilakaera ona da azkenaldian; horri esker, Arabako kultur egutegiko hitzordu saihestezin bat berreskuratu ahalko dugu, Magialdia alegia”, nabarmendu du Hezkuntza eta Kultura zinegotzi Estíbaliz Cantok.

 

Nazioarteko Zuzenbideko eta Nazioarteko Harremanetako Ikastaroak

Bestalde, Udalak lankidetza-hitzarmena sinatu du Euskal Herriko Unibertsitatearen Udako Ikastaroen Fundazioarekin, “Gasteizko Nazioarteko Eskubide eta Harremanen ikastaroak” burutzeko, Gasteizen, 2021eko uztailaren 13tik 16ra bitartean. Hezkuntza eta Kultura Sailak 21.500 euroko laguntza emango du horretarako.

 

 

Share

Covid-19ari aurre egiteko Udalak baliatu dituen 23,12 milioi euroek eskatu duten ahalegin ekonomiko handia azpimarratu du alkateak

  • Pandemiaren kontrako borrokan buru-belarri aritu direnei omenaldia egingo zaiela udazkenean, iragarri du Gorka Urtaranek

 

Gorka Urtaran alkatearen adierazpenak

Gasteizko Udalak Covid-19ri aurre egiteko abian jarritako ekimenen balantzea egin du alkateak udal politikaren inguruko debate orokorreko mintzaldiaren lehen partean. Datu bat nabarmendu du Gorka Urtaranek: pandemia hasi zenetik, 23,12 milioi euro bideratuak ditu Udalak Covid-19ari eta horren ondorioei aurre egitera. Orain Gasteiz Planeko hogeita hamar neurrien bitartez eman zaio bide ahalegin ekonomiko horri, eta aurrekontuan jasotako hainbat ekimen eta proiektu gehitu zaizkie horiei.

“Zailtasunik izan bada ere, eta izan da, Udalean, maila eman dugu. Ondo egindakoak eta akatsak gorabehera, pandemiari aurre egiteko baliabideak jarri ditugu”, adierazi du alkateak, pandemia hasi zenetik aste gutxira Orain Gasteiz Plana bezalako tresna bat edukitzearen garrantzia azpimarratu du. Urtebete geroago, plan horren % 80 gauzatua dago jada, eta hartutako konpromiso guztiak urtea bukatu aurretik bete ahal izango direla aurreikusten du alkateak. Hiru lehentasunetan zentratutako konpromisoak izan dira: osasuna babestu, pertsona guztien ongizatea bermatu eta gure ekonomia aldeztu.

Alderdi bat nabarmentzen da Covid-19ari aurre egiteko baliatu diren 23,12 milioi euroen banaketan, politika sozial eta soziosanitarioena. Izan ere, arlo horretan hainbat laguntza emateko baliatu dira 15 milioi euro baino gehiago. Ekonomia lokala garatzeko zuzeneko laguntzetara bideratu dira ia 4 milioi euro; besteak beste, merkataritzarako, ostalaritzarako edo enplegua sortzeko dirulaguntzetara. Beste 3,7 milioi euro gehitu behar zaizkio kopuru horri, pandemiak gehien kaltetu dituen sektoreentzako laguntza fiskalak direla eta. Pandemiaren ondorioz beren jarduerak bertan behera utzi behar izan zituzten kulturaren eta kirolaren arloetara 1,5 milioi euro bideratu dira.

Hau da burututako jardueren banaketa ekonomikoa:

 

Omenaldia, pandemiaren kontra borrokatu direnei

Alkatearen ustez, pandemiaren kontrako borroka, administrazio publikoen lehentasuna izateaz gain, gizarte osoaren ahalegina izan da. Batez ere osasun-langile guztiena, zeini esker ona helarazi baitie berriro ere. “Pandemiaren kontrako borrokan buru-belarri aritu direnei omenaldia egingo geniela agindu genuen orain urtebete; pandemiaren bilakaerak oraingo joerari eusten badio, urteko azken hiruhilekoan egingo dugu, ongi merezia baitute”, adierazi du Gorka Urtaranek.

Argiro erakusten dute datuek nolako ahalegina egin den: 210.000tik gora txerto jarri dira Arabako Erakunde Sanitario Integratuan; dagoeneko, 90.000 inguru pertsonak txerto osoa hartua dute, eta beste 120.000 pertsonak lehen dosia. “Bizitzak salbatzen dituzten zenbakiak dira, geure bizitza berreskuratzen lagunduko diguten zenbakiak”, nabarmendu du alkateak.

Gasteizen Covid-aren eraginez hildako 618 pertsonak ere gogoan izan ditu Gorka Urtaranek, eta haien senideak. “Ez ditugu ahazturik. Haien oroigarri iraunkorra izango da irailean inauguratutako Sempervirens espazioa”, adierazi du alkateak.

 

 

Share

Urtaranen gobernuak hiriko garraio publikoa babesteko 2,8 milioi euroko laguntza lortu du estatuko ezohiko funtsetatik

Urtaranen Gobernuak estatuko funtsetatik 2,8 milioi euroko laguntza lortu du hiriko garraio publikoa babesteko eta, zehazki, COVID-19ren pandemiak TUVISAn eragindako diru-sarreren murrizketa konpentsatzeko. Garraio publikoaren zerbitzua ematen duten toki-erakundeei zuzendutako diru-laguntza horien ebazpena gaur goizean argitaratu da Estatuko Aldizkari Ofizialean (BOE).

“Gasteizen, bidaiarien kopurua % 50 inguru jaitsi zen (8 milioi pertsona) 2020an. Beherakada horrek, jakina, sarrerak nabarmen murriztu zituen ticket salmentetan. Laguntza hau albiste bikaina da gure hiriarentzat eta Tuvisarentzat”, azaldu du Raimundo Ruiz de Escudero Mugikortasun eta Espazio Publikoko zinegotzi eta Tuvisako presidenteak. Gasteizko Udaleko garraio enpresak 2.844.271,24 euroko diru-laguntza jasoko du.

Share

Leku gehiago egongo dira “Kirol bidean” kanpainan

  • 12 eta 30 urte bitarteko gazteen artean kirola egitea sustatzeko ekimen horrek 118 plaza gehiago izango ditu

 

Astelehenetik aurrera Udalak 118 leku gehiago eskainiko ditu “Kirol bidean” kanpainaren baitan udaberri-udarako antolatutako jardueretarako. Joan den asteazkenean indarrean sartutako osasun-neurri berriei esker, plaza gehiago egongo dira honako jarduera hauetan: arroilak, espeleologia, zaldi erronka, ferrata bidea, kayak zeharkaldia, bizikleta+SUP/kayak eta eskalada haitzetan.

Maiatzaren 31ko 26/2021 Dekretua indarrean jartzearekin batera, desagertu egin ziren aire zabalean kirola egiteko ezarrita zeuden pertsona-taldeei jarritako mugak, ordura arte taldeak ezin baitziren 6 pertsona baino gehiagokoak izan.  Aldaketa horri esker, Udalak 118 leku gehiago eskaini ahal ditu ekaineko, uztaileko, abuztuko eta iraileko asteburuetan egingo diren 28 saioetarako.

Izena emateko epea ekainaren 7an zabalduko da, 8:30ean, eta Udalaren web orrian edo aurrez aurre Gizarte Etxeetan eta Gazteen Argibideetarako Bulegoan egin ahal izango da.

Izen-emate berri horiek COVID-19ari aurre egiteko osasun neurrien aldaketen menpe egongo dira, taldeko pertsona kopurua mugatu baitezakete. Kasu horretan, izena eman duten pertsonei jakinaraziko zaie inskripzioa ezeztatzeko eta dirua itzultzeko.

“Kirol bidean” kanpainaren helburua da ariketa fisikoa sustatzea Gasteizko gazteen artean (12 eta 30 urte bitartekoak), batez ere, 12 eta 18 urte bitartekoen artean, kirol desberdinak eginez oinarrizko maila batean. Jarduerak Arabako natur inguruneetan egingo dira, eta guztiak dira ohikoaz bestelako esperientziak, edukiari zein aritzeko inguruneari (mendia, itsasoa, airea) dagokienez. Kirol erakundeetako (klubak eta federazioak) eta enpresa espezializatuetako begirale kualifikatuak izango dira gidari.

Informazio gehiago eta izen-emateak: Kirol bidean kanpaina (udaberri-uda)

Share

Bizanetako kafetegiak eta elkartzeko guneak irekiko dituzte bihar

Zentro bakoitzean mahai kopuru mugatua egongo da eta ezingo dira 45 pertsona baino gehiago bildu

 

Bizan sarea —lehen, adinekoentzako zentro soziokulturalak— normaltasunera itzultzen ari da pixkanaka zerbitzuen funtzionamenduari dagokionez. Pandemia zela eta, itxi egin behar izan zituzten iaz, eta, orduz geroztik, osasun egoerak utzi ahala zabaltzen joan dira berriro.

Jantokiak izan ziren ateak ireki zituzten lehenak, eta haien atzetik beste zerbitzu batzuk jarri ziren berriz martxan, hala nola informazioa, ile-apaindegia, podologia, osasun-parkeak, lantegiak eta ikastaroak, betiere COVID-19aren kontra ezarritako segurtasun-protokoloa errespetatuz.

Bihartik aurrera, kafetegiak eta elkartzeko guneak ere erabilgarri egongo dira. Mahai kopuru mugatua izango dute eta 45 pertsonarentzako lekua egongo da gehienez ere.

Kafetegian derrigorrezkoa izango da maskara erabiltzea kontsumitzeko unean izan ezik; ezingo da zutik kontsumitu; mahai bakoitzeko 2 pertsona soilik egon ahal izango dira eta erabiltzaileen artean 1,5 metroko distantzia mantendu beharko da. Gainera, gehienez ere ordubete egon ahal izango da bertan.

Erabiltzaileek barran eskatu beharko dute horretarako ezarritako lekuetan, momentuan ordaindu, eta langileek esaten dieten mahaian eseri.

Neurri horiekin batera, segurtasun arau orokorragoak ere errespetatu beharko dira bi zerbitzuetan.

Kafetegiak eta elkartzeko guneak ireki ondoren, hemerotekak dira Bizan sarean itxita jarraitzen duten zerbitzu bakarrak, eta, horiek ere, osasun egoerak uzten duenean irekiko dira.

 

 

 

Share

Gasteizek sexu-orientazioa eta genero-identitatea direla eta izandako erasoei buruzko aurtengo txostena aurkeztu du

 

Maiatzaren 17aren harira, Ikusgune LGTBI+fobiaren aurkako Gasteizko behatokiak sexu-orientazioa eta genero-identitatea direla eta izandako erasoei buruzko txostena aurkeztu du gaur; txostenak 2020ko maiatzetik 2021eko apirilera bitarteko datuak jasotzen ditu.

Txosten hori IKUSGUNEk Berdintasunerako Zerbitzuaren bitartez Udalarekin lankidetzan kaleratzen duen bigarrena da, eta laugarrena Lumagorri ZAT elkarteak 2017an datuak biltzen hasi zenetik.

Berdintasuneko zinegotzi Miren Fernández de Landak eta Ikusguneko ordezkari Amets Martínez de Herediak 2020ko datu esanguratsuenak aurkeztu dituzte: “2020. urteak zeharo aldatu ditu gure bizitzak. COVID-19aren pandemiak eta ezarritako osasun neurriek eragina izan dute LGTBI+ pertsonengan. Ikusezintasunak eta armairura bueltatzeak protagonismoa hartu dute berriz ere defentsa-mekanismo gisa, 2020ko martxoan, apirilean eta maiatzean etxean konfinatuta egon ginenean etsaitasunezko giroetan itxita bizi behar izan zutelako. Ikusezintasun hori oztopo handia da LGTBI+fobia hautemateko orduan, oro har, giro horiek ez direlako ez salatzen, ez eremu publiko eta ekintzailean ezagutzera ematen”, nabarmendu du Berdintasuneko zinegotziak.

Bestalde, Amets Martínez de Herediaren esanetan, “transen aurkako gorroto hitzek protagonismoa hartzen jarraitu duten azken urte honetan. Premiazkoa da diskurtso hori moztea. Zentzu horretan, txostenean transfobiaren egoera eta transen aurkako indarkeria desagerrarazteko politika publikoak sortzeko beharra aztertzen dituen atal berezi bat ere badago.

Horrez gain, txostenean LGTBI+fobiaren inguruko egungo egoeran eta antzemandako erasoetan sakontzen da, datuak aztertzen dira, emaitzak eztabaidatu, eta, berriz ere, gorroto-delituak eta -diskurtsoak desagerrarazteko gomendioak ematen dira.

Ikusgune txostena

 

 

Share

Udan ez da erreserbarik beharko Mendizorrotzera eta Gamarrara sartzeko

  •  Igerilekuetara sartu ahal izateko, denbora errealean kontrolatuko da edukiera eta pertsona bakoitza egunean, gehienez, bost orduz egon ahal izango da
  • Udako denboraldia maiatzaren 28an hasiko da
  • 1.500 udako abonamendu inguru eskainiko dira Gamarrarako

 

Mendizorrotzeko eta Gamarrako kirol-esparruek normaltasuna berreskuratuko dute pixkanaka aurtengo udako kanpainan, oraindik ere pandemia egoeran gaudela ahaztu gabe. Izan ere, koronabirusa agertu aurreko ordutegiak eta zabaltze-aldia berreskuratu dira, eta erabiltzaileak aldez aurretik erreserbatu gabe sartu ahal izango dira. Hala ere, edukiera errespetatu beharko da, eta osasun eta segurtasun neurriak mantendu.

“Uda honetan, iaz bezala, aisia eta segurtasuna uztartu beharko ditugu, baina jakin badakigu egoera ez dela berdina. Ohiz kanpoko urte honetan kirol-instalazioak kudeatzen ikasi duguna kontua hartuta, udako kanpaina erosoago eta luzeago bat proposatzen dugu, gure kirol-esparruak bereizten dituen zerbitzuaren kalitatea mantenduta eta osasun egoerak exijitzen dituen berme guztiekin”, adierazi du Kirol eta Osasun zinegotzi Livia Lópezek.

Udako kanpaina honetan, berritasun garrantzitsuena sartzeko eta edukiera kontrolatzeko sisteman egongo da, aurten ez baita aldez aurretik erreserbarik egin beharko igerilekuetara sartzeko. Gehieneko edukiera gainditzen ez bada, posible izango da sartzea. Denbora errealean egiaztatu ahal izango da Mendizorrotzeko eta Gamarrako betetze-maila, bai Udalaren webgunean, bai eta instalazioetako hiru sarreretan egongo diren informazio-pantailen bidez.

Beste berritasun bat ere egongo da: pertsona bakoitza egunean 5 orduz egon ahal izango da igerilekuetan. Ordu horiek egunean zehar banatu ahal izango dira, eta bi instalazioetan, betiere leku libreak badaude. Eguneko muga behin eta berriro gainditzen duten erabiltzaileei sarrera mugatuko zaie.

“Bi neurri horiekin, alegia, hitzordua eskatu behar ez izatea eta sartzeko baldintzak malguagoak izatea, erabiltzaileak erosoago egongo dira. Gainera, pertsona gehiagok izango dute instalazioak erabiltzeko aukera. Iaz, bi kirol-esparruak kontuan hartuta, egunean 12.000 pertsonara arte sar zitezkeen, eta aurten edukiera hori ia % 50ean gainditu ahal izango dugu”, azpimarratu du Livia Lópezek.

Gehieneko edukierak

 Mendizorrotzeko kirol-esparruan 3.000 pertsona sartu ahal izango dira, eta Gamarrako parkean 3.500 (lur-eremua handiagoa delako eta ur azalera handiagoa duelako). Kupo horiek zehazteko orduan, iaz fase pilotua amaitzean zehaztu zirenen antzekoak, kontuan hartu da aurreko kanpainan ondo funtzionatu zutela, ia eskari osoari ematen baitzitzaion zerbitzua segurtasun-berme guztiak mantenduz. Edonola ere, edukiera horiek osasun egoeraren arabera aldatu ahal izango dira.

Oraingoan ere, zirkuluak marraztuko dira lurrean, pertsonak ondo banatu eta segurtasun neurriak errespetatzen direla bermatu aldera. 1.800 zirkulu inguru markatuko dira, 2 eta 4 metroko diametroarekin, eta igerilekuetatik hurbil jarriko dira.

Irekiera egunak eta ordutegiak

2021eko udako kanpainak ohiko hasiera- eta amaiera-datak berreskuratuko ditu. Maiatzaren 28an irekiko dituzte ateak bai Mendizorrotzek, bai Gamarrak; azken eguna, berriz, irailaren 5a izango da Gamarran eta irailaren 19a Mendizorrotzen.

Ordutegiari dagokionez, 8:00etatik 22:00etara egongo dira zabalik. Aurten ez dute eguerdian itxiko, eta, horri esker, instalazioen edukiera handituko da.

Sartzeko baldintzak eta abonamendu berria Gamarrarako

Iaz bezala, bazkideek lehentasuna izango dute, eta, horregatik, Mendizorrotzeko kirol-esparrua haiek bakarrik erabiltzeko izango da.

Hala ere, bazkide ez diren pertsonek abonamendu bat erosi ahal izango dute Gamarrarako hasieratik. 1.500 udako abonamendu inguru eskainiko dira kirol-gune horretan sartzeko, eta herritarrek Udalaren webgunean —Herritarren Udal Txartela badute— edo aurrez aurre herritarrei laguntzeko bulegoetan —hitzorduarekin— erosi ahal izango dituzte.

Ezingo dira eguneko sarrerak erosi, ezta txartela ahaztuz gero igerilekura sartu ahal izateko sarrera bereziak ere. Iaz bezala, bi urtetik gorako haurrek abonamendua beharko dute igerilekuetara sartzeko, eta abonamendua doakoa izango da 5 urte bete arte. Abonamendu hori eskuratu nahi duten familiek herritarrei laguntzeko bulegoetan eskatu ahalgo izango dute, aldez aurretik hitzordua hartuta.

Erabilgarri egongo diren ekipamenduak

 Kirol esparruetan iaz baino instalazio eta gune gehiago erabili ahal izango dira. Esaterako, aurten txirristak eta haurren jolastokiak irekita egongo dira. Gauza bera gertatuko da futbitoko, saskibaloiko, hondartza-boleiboleko eta mahai-teniseko kirol-pistekin, eta Gamarrako minigolfarekin, edukiera mugatuta egongo den arren eta jokatzeko hainbat arau errespetatu beharko badira ere.

Bestalde, tenis eta padel pistak aldez aurretik erreserbatu beharko dira erabili ahal izateko. Edonola ere, kontuan hartu behar da zelai horiek erreserbatuta ere, ezinbestekoa izango dela kirol-esparruetara sartzeko leku libreak egotea. Edukiera beteta egonez gero, erreserbaren dirua itzuli egingo zaio erabiltzaileari.

Aldagelak eta barruko dutxak irekita egongo dira, baina edukiera % 35ekoa izango da. Ez da hamaka-zerbitzurik egongo, baina nork bere hamaka erabili ahal izango du. Mendizorrotzen solariumean soilik jarri ahal izango dira. Gamarrako barbakoa gunea ezingo da erabili.

COVID-19ari aurre egiteko beste segurtasun neurri batzuk

Maskara erabiltzea derrigorrezkoa izango da beti, bereziki sarrera gunean eta gune komunetan. Salbuespen gisa, ez da beharrezkoa izango bainatzeko unean edo erabiltzailea bere lekuan eserita/etzanda dagoenean. Ezinbestekoa izango da, ordea, bainu-txanoa erabiltzea bainatzeko.

Azkenik, garbiketa indartuko da, eta, ateak ireki aurretik eta itxi ondoren, sakonean desinfektatuko dira instalazioak egunero. Gainera, egunean zehar ere desinfektatzeko txandak egingo dira, batez ere igerilekuetako ontzietan maiz ukitzen diren gainazalak garbitzeko.

DOSSIERRA

Share