Prentsa Oharren banner

12 kamera pertsonal eskuratu ditu Udaltzaingoak, arrisku- edo larrialdi-egoeretako esku-hartzeak grabatzeko

Bihartik aurrera, Udaltzaingoak 12 bideokamera pertsonal erabiliko ditu, Herritarren Segurtasunaren Sailak landutako erabilera-protokolo batean jasota dauden arrisku- edo larrialdi-egoerak grabatzeko.

Euskadiko Bideozaintza Batzordeak berriki baimendu dituen gailu horiek erabiliz, delituen prebentzioan eta jazarpenean aurrera egin nahi da, baita poliziaren lanari gardentasun handiagoa eman ere, segurtasun handiagoa emango baitie agenteei eta herritarrei.

“Esku-hartzeak grabatze hutsak momentuko tentsioa nabarmen murrizten laguntzen du. Disuasio-efektua du. Hala egiaztatu genuen duela zenbait hilabete egin genuen proba pilotuan. Bertan ikusi genuen kamerek lagundu egiten dutela egoera jakin batzuk azkarrago konpontzen, hain gatazkatsu ez izaten. Animoak baretzen laguntzen dute. Gainera, esku-hartzea grabatuta geratuko dela jakiteak segurtasun eta berme handiagoa ematen die herritarrari eta esku hartzen duten agenteei”, azaldu du Herritarren Segurtasuneko zinegotzi Marian Gutiérrezek.

Udaltzaingoak erositako 12 kamerak kalean lan egiten duten hurbileko patruilek diharduten segurtasun-eremuari izendatuko zaizkio. 160 gramo pasatxoko pisua dute, eta polizia-uniformeari lotuta joango dira; bateria-karga batekin, 8 bat orduz grabatu ahal izango dute.

Jarduketa-prozedura

Udaltzaingoak jarduketa-prozedura bat diseinatu du irudiak grabatu ahal izango diren egoerak finkatzeko, indarrean dauden lege eta araudietan xedatutakoaren ildotik. Hain zuzen ere, arrisku-egoeretan edo aparteko larrialdi-egoeretan aktibatuko dituzte agenteek bideokamerak.

Pertsonekin egiten diren esku-hartzeak grabatzekotan, jakinarazi egin beharko diete, datuak eskuratu, zuzendu, baliogabetu eta kontra egiteko eskubideez baliatzerik izan dezaten. Salbuespen bat egokitu daiteke: esku-hartzearen berehalakotasuna, konplexutasuna edo arriskua dela-eta aurretiko komunikazio hori ezinezkoa izatea. Kasu horretan, gerora jakinarazi beharko dute.

Grabazioen irudiak udal-zerbitzari batean gordeko dira, eta gehienez ere hilabeteko epean ezabatuko dira, non eta ez dauden lotuta segurtasun publikoaren arloko arau-hauste penal edo administratibo larriekin edo oso larriekin, abian den polizia-ikerketa batekin edo prozedura judizial edo administratibo ireki batekin.

Ekipamenduak berritzea

Herritarren Segurtasunaren Sailak agintaldi honetan ekipamenduak berritzeko abian jarritako estrategiaren parte dira kamerak, Udaltzaingoa baliabide hobeez hornitu nahi baita.

Ildo horretatik, 14 patruila-auto erosiko zirela  iragarri zen berriki —7 elektriko eta beste 7 hibrido—, 4×4 modelo batez gain, milioi bat euro pasatxoko aurrekontuarekin. Bestalde, balen kontrako txalekoak ere berritzen ari da Udaltzaingoa, eta motorzaleentzako kasko berriak ere erosi ditu, besteak beste.

Share

Bere flotaren iraunkortasunaren aldeko apustua egin du Udaltzaingoak, eta ibilgailu hibridoak eta elektrikoak eskuratuko ditu

Udaltzaingoari —errenta-sistemaren bidez— hamabost ibilgailu hornitzeko kontratazioa ontzat eman du Tokiko Gobernu Batzarrak. Zehazki, 7 patruila-auto elektriko izango dira, beste 7 hibrido eta 4×4 modeloko bat, azken hori diesel motorrekoa. Udalak orain artean eskuratu duen polizia-ibilgailu elektriko eta hibridoen sortarik handiena izango da, helburua baita patruila-lanak egiten dituzten autoen emisioen murrizketarekiko konpromisoan aitzindari izatea Estatuan.

Herritarren Segurtasunaren Sailaren, Ogasun Sailaren eta Udal Administrazioaren Sailaren arteko elkarlanak egingo du posible poliziaren unitate horiek berritzea, 1.065.600 euroko aurrekontua tarteko. Ibilgailu mota bakoitzaren ezaugarri espezifikoei dagokienez, 7 auto elektrikoek —SUV motakoak, 5 lekukoak— gutxienez 450 kilometroko autonomia izango dute; 7 auto hibridoek —SUV motakoak, 5 lekukoak, horiek ere—, entxufatzen ez diren motakoak izango dira, gasolina-motorrarekin, eta 4×4 modeloa, diesel-motorrekoa, Euro 6 emisio-mailara egokituko da.

Kontratuaren iraupena berrogeita zortzi hilabetekoa izango da, ibilgailuak entregatzen diren egunetik, gehienez ere beste 12 hilabetez luzatzeko aukerarekin. Kontratuan aurreikusten denez, 2022ko apirilean entregatuko dira ibilgailu hibridoak, eta ibilgailu elektrikoak, berriz, urte bereko uztailean.

 

Share

Udaltzaingoak kaleak zaintzeko ibilgailu hibrido eta elektrikoak gehituko dizkio flotari

 14 patruila-auto berri eskuratuko ditu: 7 hibrido eta 7 elektriko. 

Udal-talde guztiek ordezkaritza duten batzorde txostengile politiko batek definituko du polizia-zerbitzuaren geroko egitura.

 

Udaltzaingoak bere flotaren jasangarritasunaren aldeko apustu irmoa egin du, hemendik gutxira 7 patruila-ibilgailu elektriko eta 7 hibrido gehituko baitizkio flotari; hartara,  zaintza-lanetan erabiltzen diren ibilgailuetan emisioak murrizteko konpromisoa hartzen duten lehenengoetakoa izango da Espainiako udal polizien artean.

Lehen alkateorde eta sozialisten eledun Maider Etxebarriak iragarri du hori udal politikari buruzko eztabaidaren bigarren saioan, eta udaltzaingoaren ibilgailu horiek berritzeko Herritarren Segurtasunaren Sailaren, Ogasun Sailaren eta Udal Administrazioaren Sailaren arteko lankidetza nabarmendu du. “Ez da patruila-ibilgailuetan mugikortasun iraunkorraren eta emisioak murriztearen alde hain apustu irmoa egin den beste udaltzaingorik“, azaldu du Etxebarriak.

Lehen alkateordeak iragarri du, orobat, udal-talde guztiek ordezkaritza duten batzorde txostengile politiko bat osatuko dela, “udaltzaingoaren egitura definitzeko datozen urteetarako. Gure poliziaren geroa garatzeko une erabakigarrian gaude, berrikuntza garrantzitsuak biziko baititu”.

Berritasunetako bat Erbina kaleko egoitza berria izango da, tren-geltokitik hurbil; publikoarentzako arreta eskainiko da bertan, eta orain Agirrelandan kokatutako ataletako batzuk ere hartuko ditu. “Erdialdera hurbiltzeko aukera emango digu, eta oraingo polizia-etxean leku gehiago izatea; hartara, udaltzainen lan-baldintzak hobetuko ditugu, baita poliziak herritarrei ematen dien zerbitzua ere”.

Hurbileko polizia

Maider Etxebarriak oraingo udal gobernuak azken bi agintaldietan deitutako 110 agente-lanpostu nabarmendu ditu, halaber. “Udalean ez da sekula egin hainbesteko ahaleginik gure udaltzaingoa langile gehiagoz hornitzeko, eta desiratutako hurbileko polizia ezartzeko bide emango digu horrek”.

 

Share

Bizikletaz ibiltzen diren poliziak berriro ere hiriko berdeguneak eta kaleak patruilatzen ari dira  

Bizikleta bidezko patruila-zerbitzuari atxikitako udaltzainek hiriko berdeguneak eta kaleak patruilatuko dituzte aste honetatik aurrera. Bizikleta berriekin, hasi dira parkeak, lorategiak, oinezkoentzako guneak, kirolguneak eta bidegorriak zaintzen. Irailaren amaierara arte, pedalei eragiten dieten bitartean, hiritarren eta bideko segurtasuna zainduko dute Udaltzaingoak agerian utzi duen mugigarritasun jasangarriaren aldeko konpromisotik abiatuta.

Bizikleta gainean ibiltzen diren udaltzainen eguneroko lana izango da gune publikoen erabilera egokiaren inguruan heztea, txirrindularien, oinezkoen eta motordun ibilgailuen gidarien arteko harremanetan errespetua bultzatzea eta bideko gainerako erabiltzaileen gidatze arduragabea prebenitzea.

Informazioa emateaz, aholkatzeaz eta kontrolatzeaz gain, udaltzainek zaintza-lan horietan hautematen dituzten arau-hausteak ere salatuko dituzte. Era berean, derrigorrezko elementurik ez duten edo txirrindularien eta gainerako gidari eta oinezkoen segurtasunean eragina izan dezaketen gabezia larriak dituzten bizikletetan esku hartuko dute.

Bestalde, Bide Segurtasuneko Udal Plan Estrategikoaren baitan udako hilabeteetan egingo dituzten bizikleten eta mugikortasun pertsonaleko ibilgailuen kanpainetan esku hartuko dute.

Berrehun esku-hartze

 2020an, bizikletaz ibiltzen diren poliziek 206 esku-hartze egin zituzten pandemiak murrizketa ugari ezarri zuen arren. Ugarienak zirkulazioko arau-hausteekin eta gorabeherekin (34) eta delituen prebentzioarekin eta pertsekuzioarekin (33) lotutakoak izan ziren. Jarraian, udal-ordenantzen arau-hausteekin (19) eta borroka eta liskarretako esku-hartzearekin lotutakoak (13) aipatu behar ditugu.

Share

Bi aldiz atxilotuak 24 ordu baino gutxiagoan saltokietan lurringintzako ehunka produktu lapurtzeagatik

Bizitokia Madrilen duten bi gizonezkoak 6.500 euroko balioa zuten lapurtutako merkantzia zeraman auto batean hiritik alde egitear zeuden

 

Gaur goizean jarri dituzte epailearen esku 24 ordu baino gutxiagoan bi aldiz atxilotutako 33 eta 21 urteko bi gizonezko. Ebatsitakoa lurringintzako produktuak ziren eta 6.500 euro inguruko balioa zuten.

Udaltzainek astelehenean atxilotu zituzten lehen aldiz Gasteiz hiribideko supermerkatu batean aurpegiko eta eguzkitako 50 krema inguru ebasten saiatu ostean. Produktu haien balioa 800 euro ingurukoa zen.

Zegozkien izapidetze polizialak eta judizialak egin ostean, atxilotuak asteartean, ekainaren 1ean, aske geratu ziren, baina Udaltzaingoko Ikerketa Unitateak bere ikerketekin aurrera jarraitu zuen. Ikerketa horren ondorioz, bi gizonezkoak berriro atxilotu zituzten egun berean Armentiaganan, 14;40an, Audi Q7 baten barruan hiritik alde egitera zihoazenean.

Ikerketa Unitateko udaltzainek gelditzeko agindu eta ibilgailua erregistratu zieten. Autoaren maletategian 36 zabor-poltsa topatu zituzten eta, haien barruan, gordeta, kosmetikako eta lurrindegiko ehunka produktu (baita elikadurakoak ere).

Zehazki, Udaltzaingoak honako hauek guztiak topatu zituen: eguzkitako 200 krema inguru, 50 likore-botila, aurpegiko kremen eta serumen 100 poto baino zertxobait gehiago, b90 pakete, eskuila elektrikoen buruen hamar pakete inguru, ilerako 6 laka-poto inguru eta elikadurako hainbat produktu. Guztizko balioa 6.500 euro ingurukoa zen. Era berean, lapurreten aurkako etiketa magnetikoak banantzeko gailu bat topatu zuten.

Hori ikusita, udaltzainek materiala konfiskatu eta bi gizonezkoak atxilotu zituzten (era horretako ebasketetan aurrekariak zituzten). Gaur goizean geratu dira epailearen esku.

Ikerketa Unitateak lanean jarraitzen du artikulu guztien jatorria aurkitzeko. Ondorioz, Udaltzaingoak eragindako saltoki posibleei dei egin die dagokien salaketa jartzea Agirrelandara joan daitezen.

Udaltzaingoaren ustez, baliteke produktu horietako batzuk beste probintzia batzuetako establezimenduetatik lapurtutakoak izatea atxilotuek egoitza Madrilen dutelako eta Estatuko lurralde osoan ibiltzen direlako. Bestalde, susmoen arabera, lapurtutako merkantzia bazar eta azoketara bideratu behar zuten.

Share

Udaltzaingoak mila droga-konfiskatze baino gehiago egin zituen 2020. urtean eta 15 pertsona atxilotu zituen

Udaltzaingoak, 2020an, 1.007 droga-konfiskatze egin zituen substantzia estupefazienteen trafikoaren, jabetzaren eta kontsumoaren kontra egindako jardueretan eta Herritarren Segurtasuna Babesteko Lege Organikoa aplikatuta.

Esku-hartze horien garapenean, 2019an egindakoak baino % 4 gehiago, udaltzaingoak 15 pertsona atxilotu zituen eta horietako 11 utzi dituzte epailearen esku.

Marihuana eta haxisa izan ziren Agirrelandako kideek gehien atzemandako substantziak. Joan den urtean zehar, Udaltzaingoak 26 kilo marihuana (haziak, kukuluak, landareak) inguru konfiskatu zituen, baita 4 kilo haxis ere. Horiez gain, 280 gramo kokaina, anfetaminikoen 270 gramo, opiazioen 150 gramo eta psikotropikoen 41 gramo ere atzeman zituen. Orotara, urtebetean 31 kilo droga atzeman dituzte.

Atzemandako substantziekin batera, hauek atzeman ziren: 17.159 euro, ibilgailu bat, salmentarako dosiak prestatzeko erabilitako zehaztasuneko 21 balantza eta trafikatzaileek erabilitako arma desberdinak: taser pistola, labana eta kuter bat.

Jarduerak 2021ean

2021ean Udaltzaingoak droga-trafikoaren kontrako hainbat ikerketa egin ditu. Urtarrilean Ariznabarrako etxebizitza batean droga-salmentan ari ziren 3 pertsona atxilotu zituzten. 70 gramo kokaina eta 6.000 euro inguru atzeman zizkieten.

Maiatzean, Agirrelandako Ikerketa Unitateak Tomas Zumarraga Dohatsuaren kaleko etxebizitza batean drogarekin trafikatzen ari zen 35 urteko gizonezko bat atxilotu zuen. Erregistroetan, dagoeneko landatutako marihuana-landaketa atzeman zen; baita kukulu lehorren 800 gramo ere.

Duela gutxi, joan den astean, Udaltzaingoak 37 urteko gizonezko bat atxilotu zuen. Gizonezkoak kokaina eramaten zuen Zaramagako ostalaritzako establezimenduetara, industrialdeetara eta partikularrei ere kokaina saltzen zien. Bete etxebizitzan egindako erregistroan, 3 kilo haxis inguru, 629 gramo kokaina eta billetetan 46.620 euro atzeman zitzaizkion. Gainera, saldu ahal izateko dosiak prestatzeko, pisatzeko bi baskula ere bazituen.

 

 

 

Share

Abiadura kontrolatzeko kanpaina berezia, gehienez 30 km/h-ko muga duten bide eta zonetan

Abiadura kontrolatzeko kanpaina berezia egingo du Udaltzaingoak bihartik aurrera, gehienez 30 km/h-ko muga duten bide eta zonetan. Hain zuzen ere, Zirkulazio Araudi Orokorra eta Ibilgailuen 2003ko eta 1998ko Araudi Orokorrak aldatzeko azaroaren 10eko 970/2020 Errege Dekretuan jasotako aldaketak indarrean jarriko dira bihar, maiatzak 11, asteartez, eta Herritarren Segurtasunaren Sailak hori dela eta planifikatuta zituen ekintzetako bat izango da hori.

Araudi berrian jasotako aldaketak urtarrilaren 2an gauzatzen hasi baziren ere, Zirkulazio Araudi Orokorraren 50. artikuluari dagozkionak hilaren 11n jarriko dira indarrean, dekretu hori indarrean jarri zenetik sei hilabetera.

Berrikuntza horrekin, hiri barruko bideetan, abiadura-muga orokorra 20 km/h-koa izango da galtzada- eta espaloi-plataforma bakarra duten bideetan; 30 km/h-koa, noranzko bakoitzeko errei bakarra duten bideetan, eta 50 km/h-koa noranzko bakoitzeko bi errei edo gehiago dituzten bideetan.

Hortaz, abiadura-kontrolak egingo dizkie Udaltzaingoak —hilabetez— 30 km/h-ko abiadura-muga duten bide eta zonetatik zirkulatzen duten ibilgailuei. Kanpaina horren bitartez, bada, segurtasuna areagotu nahi da, 30eko bideetan, kolektibo ahulenak —adingabeak eta adindunak— ibili ohi diren ordu eta lekuetan presente egonik, radar-kabina finkoak dauden bideetan abiadura-urraketak prebenituz eta, azken batean, herritarrak abiadura-mugak errespetatzeko beharraz kontzientziatuz.

 

Share

Ikasleentzako bide-segurtasunaren gaineko marrazki-lehiaketako sariak banatu ditu Udaltzaingoak

Lehen Hezkuntzako 5. eta 6. mailetako ehunka ikaslek parte hartu dute “Seguru bizi” lehiaketan

Isabela Escobar —Hogar San José ikastetxekoa—, Naroa Fernández de Mendia —Korazonisten ikastetxekoa— eta Giorgi Kurasbediani —San Martin ikastetxekoa— izan dira Udaltzaingoak urtero antolatu ohi duen “Seguru bizi” marrazki-lehiaketako lehen, bigarren eta hirugarren sarien irabazleak.

Lehen Hezkuntzako 5. eta 6. mailako ikasleek parte hartzen dute lehiaketan, zeinen helburua baita bide-hezkuntza sustatzea eta bide-segurtasuna eta bide publikoko erabiltzaileen arteko bizikidetza ona bultzatzen duten arauak betetzeko beharraz kontzientziatzea ikasleak.

Bizikleta bat, diploma bat eta ziklista-kit bat —kaskoa, argiak eta txirrina— jaso dute saritzat irabazleek. Beste 25 ikasleren lana ere saritu da, eta horiek ere jaso dute diploma eta ziklista-kita. Goiuri jauregian izan da sari-banaketa, Gorka Urtaran alkatea eta Herritarren Segurtasuneko zinegotzi Marian Gutiérrez bertan zirela.

Bide-hezkuntzako urteko egutegia argitaratuko du Udaltzaingoak saritutako 12 marrazki onenekin.

Lehen saria

Bigarren saria

 

Hirugarren saria

 

Share

Delituak % 8 inguru jaitsi dira Vitoria-Gasteizen 2020an

Vitoria-Gasteiz hiri segurua da, mila biztanleko 55,06ko delitu-tasa du, 2019an baino % 9,13 gutxiago, eta Euskadiko hiru hiriburuetako baxuena da.

Nabarmen egin dute behera delitu-mota batzuek: etxeetako lapurretek (-% 51,46), enpresetako lapurretek (-% 50) eta indarkeria eta beldurra erabiliz egindako lapurretek (-% 30,54).

Gasteizen delituek % 8,3 egin zuten behera iaz, 2020an, 2019an 15.256 erregistratu baitziren eta iaz 13.984, Ertzaintzaren eta Udaltzaingoaren datu bateratuetan jasota dagoenez. Zifra horiek agerian uzten dute Arabako hiriburua hiri segurua dela COVID-19ak eragindako pandemiak markatutako urtean. Datuen analisiak egiaztatzen du behera egin zutela delitu estrategikoek, besteak beste, ondarearen aurkakoek, modalitate guztietan. Hauteman da zertxobait gora egin dutela sexu-askatasunarekin eta lesioekin, oro har, zerikusia duten delituek eta zertxobait gehiago iruzurrek, nagusiki Internet bidez egindakoek.

Martxoaren 14tik aurrera, alarma-egoera dekretatu eta koronabirusaren hedapena geldiarazteko osasun murrizketak eta mugak ezarri ondoren, egoera berria sortu zen eta aldatu egin zen unean uneko faktoreetan, denborarekin eta inguruarekin, besteak beste, asteko egunekin, jaiekin, urtaroekin edo ekitaldiekin, zerikusia duten faktoreetan, oinarritutako “delitu-patroi tradizionala”. Konfinamenduak, ordutegia, mugikortasuna eta distantziak murriztu izanak eta abarrek baldintzatu egin dituzte delitu-moten bilakaera eta azken urtean erregistratutako jaitsierak.

Ondarearen aurkako delituak: Nabarmen egin dute behera atal honetan sartzen diren delitu-mota gehienek: etxeetako lapurretek (-% 51,46), enpresetako lapurretek (-% 50), ebasketek (-% 40,53) eta indarkeria eta beldurra erabiliz egindako lapurretek (-% 30,54). Behera egin dute indarra erabiliz dendetan egindako lapurretek (-% 35,74) eta beste leku batzuetan egindakoek ere. Pandemiaren ondorioz ordutegian eta mugikortasunean ezarritako murrizketek eragina izan dute jaitsiera horretan. Hala ere, datuen analisiak agerian uzten du nabarmen egin dutela gora, % 91,71, hain zuzen ere, iruzurrek: 2019an 1.448 erregistratu baitziren eta iaz 2.776. COVID-19ari aurre egiteko ezarritako konfinamenduen ondorioz Internet bidez egindako erosketek gora egin izana da joera horren arrazoietako bat.

Pertsonen aurkako delituak: Epigrafe honetan etxeetan egiten diren arau-hausteak nabarmendu daitezke. Orokorrean zenbatuta, genero-indarkeriak % 10,8 egin du behera Gasteizen, baina gora egin dute lesio-delituekin zerikusia duten familia barruko tratu txarren kasuek. Era berean, lesioen aurka jarritako salaketekin zerikusia duten datuetan ere, orokorrean, igoera txiki bat izan da, % 4,58koa, alegia. Sexu-askatasunaren aurkako egintzengatik erregistratutako kasuak ere % 4,65 igo dira.

Segurtasun kolektiboaren aurkako delituak (droga-trafikoa): Substantzia sorgorgarrien trafikoarekin erlazionatutako egintzengatik instruitutako eginbideak % 9,45 jaitsi dira. Joera bera izan dute alkoholaren edo drogen eraginpean gidatzeagatik egindako delituek ere, 2019ko 267 kasuetatik 220ra jaitsi baitira (-% 17,60), gaueko orduetako ibilgailuen zirkulazioari eta aisialdiari eragin dioten ordutegi-mugekin zuzenean lotuta.

Datu horiekin, Gasteizeko mila biztanleko delituen tasak % 9,13 egin du behera, eta 60,59tik 55,06ra jaitsi da.

 

6.255 pertsona jarri zituzten epailearen eskuetan

Delituen kopuruak orokorrean behera egin badu ere, % 3 igo da atxiloketen kopurua, hain zuzen ere, 1.069tik 1.101era. Aitzitik, jaitsi egin da ikertutako pertsonen kopurua, eta zenbaketa globalean, beraz, Ertzaintzak eta Gasteizko Udaltzaingoak atxilotutako eta ikertutako pertsonen kopurua jaitsi egin da, eta 2019an 6.643 izan ziren eta 2020an 6.255, hau da, % 5,8 gutxiago.

 

Estrategia bateratua, prebentzioa, koordinazioa, informazioa eta analisia

Polizia-efizientzia, gertaeren aurrean eman beharreko erantzuna eta egindako delituak argitu ahal izateko ikerketa hobetzeko eta herritarren segurtasunaren arloan emandako arretan gogobetetasuna lortzeko, funtsezkoa da Gasteizko Udaltzaingoaren eta Ertzaintzaren arteko lankidetzan, koordinazioan eta elkarlanean oinarritutako estrategia bateratua.

Alde horretatik, bi polizia-kidegoek sarri egiten dituzte bilera bateratuak giza baliabideei eta baliabide teknikoei eta materialei probetxu hobea ateratzeko, polizia-operatibo koordinatuak ezartzeko, industria eremuak eta auzoak mugatzeko eta lortutako emaitzak ebaluatzeko.

2020an, koronabirusaren pandemiak markatu duen urtean, oraindik ere gehiago indartu da Ertzaintzaren eta Udaltzaingoaren arteko koordinazioa, etengabe aldatzen eta egokitzen joan den osasun-araudia barneratu eta betetzen dela zaindu behar izan baitute.

Lankidetza horrekin jarraituz elkartu da gaur Gasteizko Udalean Eusko Jaurlaritzako Segurtasun Saileko eta Udaleko Koordinazio Batzordea, Josu Zubiaga Segurtasuneko sailburuordea eta Gorka Urtaran alkatea buru direla. Bilera horretan beste akordio bat adostu da Ertzaintzaren eta Udaltzaingoaren koordinazio-protokoloa eguneratzeko, eta laster sinatzekoa den protokolo horrek, besteak beste, bi polizia-kidegoek aurre egin behar izaten dieten gertaeretan esleitu beharreko baliabideak koordinatuko ditu.

Share

Astelehenean hasiko da COVIDaren aurkako txertaketa udaltzaingoan eta suhiltzaileen zerbitzuan

Datorren astelehenetik aurrera, martxoak 1, Gasteizko Udaleko Laneko Osasunaren Atalak AstraZeneca txertoa jarriko die udaltzaingoko eta Prebentzio eta Su Itzaltze Zerbitzuko 55 urtetik beherako langileei. Eusko Jaurlaritzako eta beste bi euskal hiriburuetako Osasun Publikoaren Zerbitzuekin koordinatuta dago ekintza, eta Osakidetzak zehaztutako txertaketa-estrategiaren parametroei jarraitzen die.

8:30an hasiko da txertaketa –borondatezkoa da–, orduko 10 pertsonako taldetan. Erreserbako langileak ere izango dira hutsegiteak bete eta dosirik ez galtzeko, eta horretarako egun bakoitzerako zerrendak prestatu dira. Aste honetan bertan Laneko Osasunaren Atalak txertoak jartzeko prestakuntza egokia jaso dute  telematikoki. Azken sei hilabeteetan COVID probetan positibo izan diren pertsonei gerora jarriko zaie txertoa.

Agirrelandako instalazioetan bertan egingo da txertaketa. Baldintzak betetzen dituen gela bat egokituko da, joan-etorrien logistika errazteko. Guztira, 379 udaltzaini eta 113 suhiltzaileri emango zaie txertoa.

Udal langileak txertoak jartzen hastea Eudelen eta Eusko Jaurlaritzaren Osasun Sailaren arteko akordioaren ondorioa da.

Share