: Prentsa oharrak

Udaltzaingoak zenbait gomendio plazaratu ditu San Joan gauaren ospakizunarekin lotuta, herritarrek ustekaberik gabe eta segurtasunez goza dezaten jaian eta suetan.

Garrantzitsua da suetan jauzi egiteko asmoa dutenak egoera onean egotea, istripurik edo erredurarik gerta ez dadin. Horrenbestez, ez da komeni alkoholik edo substantzia sorgorgarririk hartzea, gaitasun fisikoa murrizten baitute.

Orobat gomendatzen da diru-zorrorik edo mugikorrik ez eramatea jauzi egitean, edo sutara eror daitekeen beste gauzarik.

Ikusleek, berriz, jauziak ez eragozten saiatu behar dute, parte-hartzaileek segurtasunez jarduterik izan dezaten. Batzuek zein besteek antolakuntzak ezarritako segurtasun-eremuak errespetatu beharko dituzte.

Udaltzaingoak gogorarazten du, halaber, jaieguna izan arren denak ez duela balio. Hori dela eta, pertsona oro, emakume eta gizon, errespetatzeko eskatzen du, haien izaera sexuala, ideologia edo erlijioa edozein delarik. Jai-eremuetako bizilagunen atsedena ere errespetatzeko eskatzen du. Udaltzainak inguruan ibiliko dira, alkoholemia-kontrolak egingo dituzte, eta adingabeei alkohola saltzen zaien eta kaleko edana egiten den zainduko dute.

Jendetza handiak

Lapurrek jendetza handiak baliatu ohi dituzte eroso jarduteko. Hori dela kausa, poltsak eta bizkar-zorroak ongi ixtea gomendatzen du Udaltzaingoak, eta diru-zorroak eta mugikorrak barruko sakeletan eramatea.

Umeekin joanez gero, garrantzitsua da arretaz zaintzea, gal ez daitezen. Gurasoen telefono-zenbakia besoetan idaztea aholkatzen da, edo identifikazio eskumuturrekoak jartzea, galtzen badira arduradunekin harremanetan jarri ahal izateko.

Toki erakundeak

Udalerriko mendeko toki erakundeetan pizten diren suak direla eta, aldez aurretik suhiltzaileekin harremanetan jartzea gomendatzen die Udaltzaingoak antolatzaileei, kontuan izan beharreko segurtasun baldintzez aholku eman diezaieten.

Udaltzaingoak ohartarazi du komertzialen bidez led argiak modu oldarkor eta engainagarrian ari direla saltzen Gasteizen. Komertzialen atzean dagoen enpresa elektrizitate-hornikuntza komertzializatzen duen enpresa ospetsu baten izenean ari dira argiak saltzen.

Dirudienez, enpresa horretatik etxeetara –gehienetan adineko pertsonenak– jotzen dute bonbilla horiek erostea derrigorrezkoa dela esanez. Ondoren, energia-konpainia aldatzeko aukera eskaintzen dute. Joan den astean etxez etxe horrela jokatzen ari ziren zenbait pertsona atzeman zituzten Zabalaganen.

Izapide batzuk eginez jakin da eskudirutan kobratzen ez duten arren, enpresak 36 hilabetera arteko finantzaketa eskaini ziela banku-helbideratze bidezko kontratuak baliatuz. Led argiak eskuratzeko kontratu horiek 1.200 eurotik 2.750 eurora bitartekoak izan dira; kasuetako batean 72 bonbillakoa zen kontratua.

Udaltzaingoak gogorarazi du joan den urrian Gobernuak debekatu egin zuela atez ate gasa eta elektrizitatea saltzea –”ate hotzean saltzea” esaten zaio praktika horri– -kontsumitzaileak ez badu espresuki halakorik eskatu.

Gainera, ez dago bonbilla normala horrelakoengatik aldatzera behartzen duen araurik. Herritarren batek zerbitzu hori kontratatu baldin badu, jakin dezala atzera egiteko eskubideari esker 14 eguneko epea duela kontratuari uko egiteko, produktua jasotzen duenetik hasita.

Bestalde, Udaltzaingoak azpimarratu nahi izan du oso garrantzitsua dela adineko pertsonei ezezagunei atea ez zabaltzeko gomendatzea eta, are garrantzitsuagoa, datu pertsonalak ez emateko eta dokumentuak aurretiaz senideekin kontsultatu gabe ez sinatzeko eskatzea.

Zalantzarik izanez gero, 092 zenbakira deitzea komeni da, patruila batek salmentaren legezkotasuna egiaztatu eta engainua baztertu dezan.

2018-2023rako Bide Segurtasunaren eta Mugikortasun Iraunkorraren Udal Plan Estrategikoan jasotako komunikazio eta kontzientziazio ekintzetako bigarrena jarri du abian Udaltzaingoak.

Urtarrilaren bukaeran eta otsailaren hasieran orri-markatzekoak banatu zituzten oinezko eta txirrindulari ugari igarotzen diren lekuetan; oraingoan, berriz, hiri autobusak baliatuko dituzte bide-segurtasunari buruzko mezuak zabaltzeko.

Distrakzioak —istripuen eragile ohikoa baita— eta oinezko zein txirrindulariak —zaurgarrienak baitira— izango dira kanpaina berriaren gai nagusiak. Biribilguneetan nola zirkulatu behar den ere azpimarratuko dute, leku horietan gertatzen baita istripu gehien.

TUVISAren lau autobusek erakusten dituzte dagoeneko iragarkiak, eta datorren astean beste lau gehituko zaizkie. Besteak beste, mugikortasun iraunkor eta segurua sustatu nahi da kanpainaren bitartez, zauritutako edo hildako pertsonen kopurua gutxitu, talderik zaurgarrienak babestu eta jokabide ezegokiak zuzendu.

Autobusak kontrolatzeko kanpaina

Bide Segurtasunaren Udal Plan Estrategikoaren barruan, orobat, autobusak kontrolatzeko kanpaina berezia egingo du Udaltzaingoak datorren astean. Bidaiari-garraiorako ibilgailu horiek baldintza teknikoak betetzen dituzten egiaztatuko dute, eta gidariak horiek eramateko gaitasuna duten.

Gasteizko Udaltzaingoak enpresa baten iruzurrezko jardueraz ohartaraziko du, AMVISArekiko ustezko lankidetza amu gisa baliatzen baitu ur-arazgailuak etxez etxe saltzeko. Udaleko ur-enpresak Udaltzaingoari jakinarazi dionez, ez du inolako zerikusirik enpresa horrekin.

AMVISAk dituen datuen arabera, enpresa gutxienez 17 pertsonarekin jarri da harremanetan haren izenean, gehienak adinekoak. Uraren kalitateari buruzko inkesta egiten diete eta, bide batez, 400 eta 600 euro artean balio duten ur-arazgailuak saltzen saiatzen dira.

AMVISAk ohartarazi du ez dela lankidetzan ari ezaugarri horiek dituen inolako enpresarekin, eta ez duela iradoki edo gomendatzen ura arazteko gailuak erostea edo instalatzea, besteak beste, Gasteizko kontsumorako uraren kalitatea bikaina delako, etengabe egiten dituen analisien arabera.

2017ko martxoan antzeman zuen lehenengo aldiz Udaltzaingoak merkataritza-jarduera iruzurti hori, eta herritarrak horren jakinaren gainean jarri ditu geroztik. Agirrelandatik gogorarazten dute horrelako produkturik erosi badute eragindakoek Gasteizko Udaleko kontsumo bulegora edo Kontsumobidera jo dezaketela atzera egiteko eskubideaz baliatzeko; 14 egun naturaleko epea dute horretarako, erositakoa jaso zutenetik kontatzen hasita.