Prentsa Oharren banner
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  21 azaroa 2019 16:48

Udaltzaingoa da Espainiako Udalerrien Federazioak eta Drogei buruzko Plan Nazionalak deitutako topaketa honen anfitrioia.

Espainia guztiko udaltzainen 30 bat ordezkari elkartuko dira, bihar arte, Gasteizen, agente-tutoreak prestatzeko topaketan; adingabeekin lotutako istiluak – esaterako, sustantzia sorgorgarriak eduki eta kontsumitzea— prebenitzen eta kudeatzen adituak diren udaltzainak.

Gasteizek eta Euskal Autonomia erkidegoak horrelako topaketa bat hartzen duen lehen aldia da. Topaketak Espainiako Udalerrien Federazioak eta Drogen Plan Nazionalak antolatzen dute.

Ikastaroa atzo hasi zen, eta Estadio Fundazioaren egoitzan egiten ari dira. Bertan, hizlari izango dira Gasteizko udaleko Segurtasunaren Saileko Udaltzaingoko Adingabeen Taldeko arduraduna eta Drogei buruzko Tokiko Ekintzako Osasun Publikoaren arloko mediku Joseba Zabala.

Prestakuntzak iraungo duen hiru egunetan, alderdi hauek landuko dituzte, besteak beste, bertaratuek: arauak, drogamenpekotasunaren prebentzioa edo arriskuan dauden adingabe eta familiekiko esku hartze psikosoziala.

Herritarren Segurtasuneko zinegotzi Marian Gutierrezek topaketaren irekieran parte hartu zuen, eta agente-tutoreek egiten duten lana azpimarratu zuen. Gasteizko Udaltzaingoari dagokionez, Adingabeen Taldeko agenteek egiten dute ikasle eta nerabeekiko prebentzio lan proaktibo hori. Drogei buruzko Tokiko Ekintzaren laguntza dute, eta honek zehazten ditu  droga legalekin eta legez kanpokoekin harremanak dituzten adingabeen eta horien familiekin egin beharreko prebentzio-ekintzak.

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  15 azaroa 2019 12:45

Udaltzaingoak marka bereko 250 gazta inguru atxiki ditu hiriko hainbat establezimendutan, etiketa irregulartasunak antzeman direlako, eta osasun-erregistroa ustez era iruzurtian erabili dutelako. Urriaren bukaeran salaketa bat jaso zen Agirrelandan, baina aurretik ere bazuten horren inguruko susmorik.

Salatutako gertakariak benetakoak ziren eta noraino iristen ziren ikertu zuten Ingurumen Atalak eta Guardiako Ikuskaritzak. Horren ondorioz, etiketan anomalia nabarmenak zituen gazta-marka bat salgai zuten zazpi establezimendu aurkitu ziren, eta berehala Udaleko Osasun Publikoaren Zerbitzuari eman zioten horren berri.

Kontsumitzaileen osasuna babestearren zuhurtasun-printzipioa aplikatuz, gaztak atxiki egin zituzten, eta salgai zituzten dendetan dauzkate gordeta gertakariak argitu arte; une horretan erabakiko da salgaiak merkaturatu daitezkeen ala bahitu eta deuseztatu behar diren.

Udaleko Osasun Publikoaren Zerbitzuak Eusko Jaurlaritzako Osasun Publikoaren Sailari jakinarazi dizkio antzemandako irregulartasunak, elikadura-segurtasunaren alorrean eskumenak dituzten beste autonomia erkidego batzuekin behar diren izapideak egin ditzan, egoera bera gertatu bada ere, gertakariak argitu eta behar diren administrazio-dosierrak bideratzearren.

Udaltzaingoak, bere aldetik, dagokion argiketa bidali du guardiako epaitegira.

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  13 azaroa 2019 12:32

Atzo gas-ikuskatzaile faltsu batek etxean lapurreta egin zion adin handi samarreko emakume bati. Antza denez, goiz horretan bertan, mantentze-lan horiek egiten dituen enpresarekin harremanetan jartzen saiatu zen biktima, nahiz ez zuen lortu, eta beraz, gizonezko bat ikuskapena egitera azaldu zenean, etxera sartzen utzi zion.

Gizonezkoak ohar batzuk eman zizkion, etxeko erradiadoreak ukitzen joan zedin, berak beste gela batzuetan gauza bera egiten zuen bitartean. Minutu batzuk geroago etxetik alde egin zuen, azalpen gehiago eman gabe. Emakumea bere logelara joan zenean, ikusi zuen mesanotxean zeuzkan bitxi batzuk lapurtu zizkiola, eta beraz, salaketa egokia aurkeztu zuen Agirrelandako polizia-etxean.

Udaltzaingoak gogorarazi du horrelako ikuskapenak aurretiazko hitzordu bidez egiten direla, eta beraz, zalantza izanez gero, komeni dela enpresarekin egiaztatzea teknikaririk bidali duten, behar bezala akreditatuta dagoen eta, zalantza izanez gero, 092ra deitu, etxera sartzen utzi aurretik egiaztatzeko.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  12 azaroa 2019 10:00

Udaltzaingoren bigarren promozioko agenteak

 

Promozio bereko beste zazpi polizia zuzenean hasi dira Agirrelandan, prestakuntza baliozkotu baitiete

 

 

 

 

 

 

Gaur, azaroak 12, Udaltzaingorako hirugarren LEP bateratuan aukeratutako 39 udal agenteetako 32 Arkautiko akademian prestatzen hasi dira. Zazpi hilabetez egingo dute formakuntza, eta ondoren praktikaldia hasiko dute Agirrelandan, ekainean.

Promozio bereko beste zazpi polizia zuzenean hasiko dira Udaltzaingoaren egoitzan lanean, akademiatik igaro gabe, prestakuntza baliozkotu baitiete.

39 udaltzain berrietako zazpi emakumeak dira. Jatorriari dagokionez, 36 Euskadin jaiotakoak dira, eta 29, Gasteizen. Gainerakoak Errioxan (2) eta Burgosen (1) jaiotakoak dira. Udaltzain berrien batez besteko adina 33 urtekoa da.

Arkautiko Polizia eta Larrialdietako Euskal Akademian prestakuntza amaituta, agenteek urtebeteko praktikaldia egingo dute Agirrelandako udaltzain-etxean; hori gainditzen dutenean bihurtuko dira udal funtzionario behin betiko.

39 udaltzain horiek behin betiko sartzen direnean, Udaltzaingoak 415 kide izango ditu.

Share
Kategoriak: Sailkatu gabea  —  Etiketak: ,   —  Komunikazio Zerbitzua / Servicio de Comunicación  —  31 urria 2019 12:30

Berrogeita hamar bat arau-hauste erregistratu ditu Udaltzaingoak, hondakin-edukiontzien erabilera kontrolatzeko Salburua auzoan bi astez egin duen lehenengo kanpainan, eta bi pertsona salatu ditu, garbiketaren ordenantza urratzeagatik.

Hamabost egunez, hondakin-edukiontzien eta bilketa pneumatikorako ontzien erabilera egokia kontrolatu du Udaltzaingoak, eta orobat zaindu du ez zekiela jaten eman animaliei kalean, eta ostalaritza-establezimenduetako terrazak higiene-, garbiketa- eta segurtasun-egoera egokian egon zitezela.

Zaintza-lan horien ondorioz, Ingurumen taldeko eta kaleko patruiletako udaltzainek 48 arau-hauste antzeman dituzte —edukiontzietatik kanpo utziko zabor-poltsak, bide publikoan utzitako tamaina handiko hondakinak eta abar—, eta Udalaren garbiketa-zerbitzuei jakinarazi, ebatz ditzaten.

Kontrol-lan horrez gain, kontzientziazio-lana ere egin du Udaltzaingoak, zona horretako herritar, bizilagun eta merkatariekin, zikinkeria eta usain txarrak sortzen dituzten gizalegearen kontrako jokabideak zuzentzeko.

Beste auzo batzuetan egingo da aurki hondakin-edukiontzien erabilera kontrolatzeko kanpaina bera. Hiri osoan barrena txandakatzea da Herritarren Segurtasunaren Sailaren asmoa.

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  30 urria 2019 16:41

Bihar, ostegunez, Halloween gaua izango dela eta, gizalegez eta begirunez jokatzeko deia egin die Udaltzaingoak herritarrei, hirian gero eta errotuago dagoen festa hori lasaitasun eta segurtasun osoz bizi dadin.

Helburu horrekin, hainbat kontrol egingo dituzte udaltzainek festa ospatzen den establezimenduetan, zaraten ordenantza eta ixteko ordutegia betetzen direla bermatzeko, adingabeei alkohola ez zaiela saltzen egiaztatzeko eta edukierak zaintzeko.

Zentzu horretan, larrialdietako irteerak libre uztearen garrantzia gogorarazi du Udaltzaingoak, irisgarri egon daitezen uneoro, eta laguntza eskatu die herritarrei, edozein anomalia, arau-urraketa edo arrisku-egoera antzematen dutelarik 092 telefonora dei dezaten.

Gomendio sorta bat ere egin die herritarrei:

  • Alkoholik edatekotan, arduraz egin.
  • Autoa hartzekotan bazara, ez hartu edari alkoholdunik.
  • Errespeta ezazu festan parte hartzen ez dutenen atsedenerako eskubidea.
  • Ez beti da ez. Errespetatu. Salatu eraso matxistak.
  • Ez erabili produktu piroteknikorik; debekatuta egoteaz gain, lasaitasuna eta atsedena galarazten dizkiete pertsonei nahiz animaliei.

Domu Santu eguna

Halloween gauean ez ezik, Udaltzaingoak arreta berezia izango du azaroaren 1ean ere, Domu Santu egunez, hiriko hilerriek milaka bisitari hartu ohi baitituzte.

Hori dela eta, udaltzainek Salbatzailearen hilerriko sarbidea arautuko dute, non behin-behineko aparkaleku-eremua jarri baita, eta Santa Isabel hilerrian ere zaintza areagotuko dute.

Batera zein bestera joateko garraio publikoa erabiltzeko gomendatzen du Herritarren Segurtasunaren Sailak.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  29 urria 2019 13:31

Atxilotutakoaren etxebizitzan topatutako materialea

 

Udaltzaingoko agenteek 54 urteko gizonezko bat atxilotu zuten atzo, 11:00ak baino lehentxeago, hainbat delituren ustezko egile izateagatik: merkataritza-dokumentazioa faltsutzea, iruzur egitea, dokumentu publikoa faltsutzea, identitatea lapurtzea eta posta lapurtzea. Atxilotuak 12.000 eurotik gora eskuratu ditu maiatzetik hona identitate faltsua erabilita.

Irailaren amaieran jasotako hiru salaketak piztu zuten susmoa Agirrelandako egoitzan. Pertsona batek Gasteizko hiru enpresa desberdinen txeke izendunak kobratu zituen, antza.

Ikerketa taldeak hainbat ikerlan egin zituen egilea atzemateko. “Fitxatu” ondoren, lanean jarri ziren zenbat enpresatan egin zuen iruzur eta, eta bere, “modus operandi” ezagutzeko.

Gizonak enpresen hainbat posta lortzen zuen, legez kanpo, eta hortik txekeak eskuratuta, faltsutze teknikak baliatzen zituen onuradunaren izena aldatzeko eta bere izena edo “eramaileari” jartzeko. Aurretiaz, nortasun Agiri Nazionala faltsutzen zuen, eta horrekin kontu-zenbakia irekitzen zuen banketxeren batean.

Txekeak kobratzeko, batzuetan banketxeetako langileen eta zaintza-kameren aurren jartzen zen, eta beste batzuetan, “eramaileari” jartzen zuenean, behartsuak erabiltzen zituen, lan horregatik zertxobait ordainduta.

Atxilotzeko unean, nortasun agiri faltsutua eta 750 euro inguru zeramatzan. Bere etxea erregistratuta, hauexek aurkitu ziren: hurrengo biktimak izango ziren hiru enpresaren ordainketa-txeke helbideratuak zituzten gutun-azalak, agiri faltsuak baliatuta eskuratutako banku-libreta bat, eta posta lapurtzeko eta agiriak faltsutzeko materiala.

Udaltzaingoak hainbat enpresaren 9 txeke manipulatu aurkitu ditu, guztira 12.000 eurotik gorako baliokoak. Txeke hauek eta atxilotuaren etxean aurkitutakoak Ertzaintzaren Ikerketa Atalera igorri dira, Erandiora, adituek txostena egin dezaten, faltsuketa egiaztatu eta erkatzeko

Gaur goizean epailearen aurrera eraman dute atxilotua. Bilbon ere hainbat txeke kobratuak zituen eta Madrilgo Erkidegoan antzekoak egin izanaren aurrekariak ditu.

Udaltzaingoak laguntza eskatu die Eskalmendi, Betoñu eta Gamarrako industrialdeetan martxotik hona kobrantzetan anomaliak antzeman dituzten enpresei, ustezko iruzurgilearen biktimak izan badira ere.

Zehazkiago, banku-txekeen bidez ordainketak jaso behar zituztelarik kobratu ez duten enpresak lirateke, edo txekeak beste pertsona batzuei ordainduko zitzaizkien; Agirrelandara joateko eta salaketa jartzeko eskatzen zaie horiei, eta ustezko iruzurraren biktima direla frogatzeko dokumentazioa eramateko.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  16 urria 2019 12:22

 

Zazpi mezu zabalduko dira onlineko hedabideen eta Facebooken bitartez, oinezko, txirrindulari eta gidariak kontzientziatzeko

 

 

 

 

 

Udaltzaingoak beste urrats bat egin du 2018-2023 aldirako Bide Segurtasunaren eta Mugikortasun Iraunkorraren Udal Plan Estrategikoan, kontzientziazio-kanpaina bat abian jarrita. Zehazki, zazpi mezu zabalduko dira hedabide digitalen eta Facebook sare sozialaren bitartez, oinezko, txirrindulari eta gidarien artean jokabide seguruak sustatzearren.

2018ko urrian aurkeztu zen plana, zeinaren xedea nagusia baita hiri barruko istripuen kopurua gutxitzea eta trafiko-biktimei dagokienez “vision zero” helburua lortzea. Horretarako, hirian mugikortasun iraunkor eta segurua sustatu nahi da, eta trafiko-istripuetan hildako eta zaurituen kopurua gutxitu; talde ahulak babestu; jokabide ezegokiak zuzendu; bizialdi osoan seguru mugitzen irakatsi, eta informazioaren kudeaketa eta istripuak aztertzeko prozesuak hobetu.

Lehen komunikazio-ekintza 2019ko urtarrilean egin zen: planaren logotipoa, sinadura eta zigilua diseinatu ziren, eta 20.000 orri-markatzaile argitaratu ziren oinezko eta txirrindulariei zuzendurik. Kalean bertan, ikastetxeetan eta Agirrelandako Bide Heziketarako Parkean banatu ziren zenbait astez. Hiru hilabete geroago, beste euskarri bat erabili zen komunikaziorako: hiri autobusak, egunero 12 ordutik gora ematen baitute hiriko kaleetan barrena.

Orain sarera jauzi egiteko txanda iritsi da, mezuak beste jasotzaile batzuen artean zabaltzearren. Dagoeneko oinezkoei, txirrindulariei, biribilguneei eta gidatzean ditugun distrakzioei buruzko mezuak landu dira; horiei abiadura, alkohola eta drogak zein segurtasun-gailuak gaitzat dituztenak gehituko zaizkie.

Onlineko kanpainaz gain, Udaltzaingoa “Ikasleen autobabesa.Errepideetako eta suteen kontrako segurtasuna ikasi” ikastaroa ematen hasi da hilabete honetan, Lehen Hezkuntzako hirugarren zikloko ikasleei zuzendua. Trafikoari eta bide segurtasunari buruz jarrera eta balio egokiak sustatu nahi ditu ikastaroak, arriskuak saihestearren, eta bizikletaren erabilera zuzena; argiak eta txirrinak banatuko dituzte, pizgarri gisa, eta jardunbide egokiak eta ikasitakoa saritzeko.

Argibide gehiago

Kanpainaren irudiak

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  10 urria 2019 12:03

Bigarren urtez jarraian, Udaltzaingoak  Eusko Jaurlaritzako Segurtasun Sailaren Don’t be Dummy/Zuk ez duzu ordezkorik programan parte hartuko du: programa ibiltaria da, Euskadiko ikastetxeetako gazteen artean trafiko-istripuak prebenitzeko. Europa jauregiko Maria de Maeztu entzunaretoan egingo da ekitaldia, ostiralean, hilak 11, eta bertan izango da Herritarren Segurtasunaren zinegotzi Marian Gutiérrez.

Gasteizko sei ikastetxetako Batxilergoko 1.500 ikasle inguru joango dira Dummy-rekiko hitzordura; 3D bidez sortutako abatar interaktiboa da hori. Ibilgailu-fabrikatzaileek horrelako manikiak erabiltzen dituzte inpaktuak simulatzeko eta modelo berrien segurtasuna egiaztatzeko. Ikus-entzunezkoen proiekzioak, trafiko-istripuen biktima baten zuzeneko lekukotza eta bide segurtasunarekin lotutako profesionalen adierazpenak (Udaltzaingoa, Ertzaintza eta suhiltzaileak) baliatzen dira gazteak sentsibilizatzeko.

Gazteengan errepideko arriskuei buruzko hausnarketa eragitea eta haiek prebentzio-neurriez kontzientziatzea da ekimenaren helburua, laster gidatuko baitute ibilgailu motordunen bat, edo lagunekin batera horietako batean ibiliko. Don’t be Dummy 2017ko irailean estreinatu zen, eta iaz eman zen lehenengoz EAEko hiru hiriburuetan. Donostiak Gasteizi emango dio lekukoa, eta bertan bi saio egingo dira ostiralean, 11:30ean eta 13:00etan.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  9 urria 2019 14:27

 

2019an legez kanpoko 96 zabortegi antzeman ditu poliziak

 

 

 

Udaltzaingoak herritar bat salatu du legez kanpoko zabortegi batean obra-hondakinak uzteagatik, Askartzan.

Herritar batek 092 telefonora deitu zuen joan den astean, zabortegiaren berri emateko. Udaltzaingoaren Ingurumen Taldeko patruila bat bertara joan zen, eta hondakinak metatzen ari zirela egiaztatu zuen, batez ere obra-hondakinak.

Jatorria zein zen jakiteko ikerketa abiarazi zuten orduan, eta egilea obratan dagoen merkataritza-establezimendu baten jabea dela ohartu ziren, zeinak hondakinak landan utzi baitzituen, arauzko bideari jarraitu beharrean.

Esku-hartzearen ondorioz, Udaltzaingoak Lurraldearen eta Klimaren aldeko Ekintzaren Sailari dosierra bidali dio, zigorrik jarri behar den azter dezan.

Herritarren Segurtasunaren Sailak gogorarazten du jarduera horiek Garbiketari buruzko Ordenantzaren arau-haustea direla, eta ingurumen alorreko patruilek kontrolatzen dituztela, hala hirian nola udalerriko nekazaritza-eremuan.

Kontrol lan horiei esker, 2019an legez kanpoko 96 zabortegi antzeman ditu poliziak.

 

 

Share

Aurrekoak »