Prentsa oharrak

• Hiriburua Espainiako lehen hiri eremu ekoturista bihurtzeko asmoz hiriak abian jarritako estrategiari lotuta dago proiektua

Vitoria-Gasteizko Udalak gaur aurkeztu du Turismoko Nazioarteko Azokan (Fitur) ‘Eraztun Berdera iristeko ibilbideak’ proiektua. Arabako hiriburua inguratzen duen ingurune natural zoragarrira iristeko zortzi ibilbide erakargarri biltzen dituen mapa da.

Ekitaldia Euskadiren standean egin da eta bertan izan dira Gasteizko Ekonomia Sustapen, Enplegu, Merkataritza eta Turismoko zinegotzi Maria Nanclares eta Kai Nakai, Guk Green eta Aita Seme Trikitilari influencer-ak.

“Eraztun Berdeak giro ekologikoen aniztasun handia du bere baitan eta horiek, aldi berean, aberastasun naturalistiko adierazgarria gordetzen dute: Basoak, ibaiak, zelaiak, heskaiak eta ibaiertzak, eta lorategi botaniko zoragarria Olarizun. Txoko horietako batzuek nazioarteko aitortza jaso dute haien balio ekologiko handia dela eta. Salburuko Hezeguneak eta Zadorra ibaia, adibidez, Natura 2000 Sarean jasota daude”, azpimarratu du zinegotziak.

Gasteiz bisitatzen dutenek Eraztun Berdea ezagutzeko interes handia erakusten dute eta turismo-bulegoan galdetu ohi dute nola irits daitezkeen bertara hirigunetik. “Gai horri erantzuteko, zortzi ibilbide erraz, seguru eta adin guztietarako egokituta daudenak diseinatu ditugu Arabako hiriburuaren oinarri grisa erakusteko. Ibilbideak bizikletaz, korrika edo oinez egin daitezke”, iragarri du Nanclaresek.

Proiektu honetarako aukeratutako leloa ‘Recorre la ciudad, respira y sonríe’ (Zeharkatu hiria, hartu arnasa eta egin irribarre) da eta hiri inguruko bost ibilbide, Eraztun Berdea zeharkatzen duten bi eta hiriko hainbat toki lotzen dituen beste bat jasotzen ditu.

“Distantziak 5 eta 18 kilometro artekoak dira eta, horrenbestez, goiz edo arratsalde batean egiteko ezin hobeak dira. Eta, nekatzen bagara, hirigunera itzultzeko garraio publikoa hartzeko aukera dago”, azaldu du zinegotziak.

Mapak, gainera, interesguneak eta gomendioak ere jasotzen ditu. Bestalde, ibilbide bakoitzaren jarraipena modu erosoan egin daiteke Wikiloc bidez.

Ibilbideak

Lehen ibilbidearen izena ‘Hacia el Bosque de Armentia por el Paseo de la Senda’ (Armentiako basorantz Senda pasealekutik) da eta zuhaitzen magia sentitzeko aukera emango du. Bigarrena ‘Hacia el cerro de las Neveras por el Jardín Botánico de Olárizu’ (Neberak muinorantz Olarizuko lorategi botanikotik) da eta Arabako Lautadako soroak eta muinoak ikusteko aukera eskainiko du. Hirugarrenaren izena ‘Hacia Ataria y los humedales de Salburúa’ (Atariarantz eta Salburuko hezeguneetarantz) da eta hegazti eta oreinen bizilekua zeharkatzeko aukera eskainiko du.

Proiektuak beste ibilbide hauek ere proposatzen ditu: ‘Rumbo el Parque del Galeón Pirata hasta llegar el Río Zadorra’ (Galeoi pirata parkeraino, Zadorra ibaira iritsi arte), hiriko parkeen altxorrak ezagutzeko, eta ‘Hacia las Lagunas del Parque de Zabalgana’ (Zabalgana parkeko urmaeletaraino), naturaren, landatar eremuaren eta hiriaren arteko sinbiosiarekin gozatu ahal izateko.

Gainera, ‘Por la Ruta Norte del Anillo Verde’ (Eraztun Berdearen iparraldeko ibilbidetik) izenekoak Zadorra ibaiaren ibilguari jarraitzen dio eta ‘Por la Ruta Sur del Anillo Verde’ (Eraztun Berdearen hegoaldeko ibilbidetik) izenekoak ekosistema bereziak ezagutzeko aukera eskaintzen du.

8 ibilbide horrek, gainera, bi aukera jasotzen ditu: Gasteizko iparraldea hegoaldearekin lotzen duena, eta hiriko mendebaldetik ekialdera iristeko aukera eskaintzen duena.

“Ekintza hau horren arrakastatsua izaten ari den ‘I Love Vitoria-Gasteiz’ estrategia turistikoari lotua dago. Horri esker, azken urte honetan, bisitarien kopurua % 6 igo da eta bertan gaua emandakoen kopurua, aldiz, % 9,5 handitu eta 2,44ra iritsi da. Hain zuzen ere, horixe zen ezarri genuen helburua”, nabarmendu du Nanclaresek.

“Hori dela eta, turismo jasangarria maite duten guztiak gonbidatu nahi ditugu Gasteizko Eraztun Berdearen xarmarekin liluratuta geratzera. Oinez edo bizikletaz, beti da zoragarria baliabide natural pribilegiatu hau gertu-gertutik ezagutzea lagunekin, familian edo, zergatik ez, bakarrik”, gehitu du.

Produktu hau sustatzeko asmoz, Gasteizko Udalak influencerren (Kai Nakai, Guk Green eta Aita Seme Trikitilari) laguntza jasoko du. Hala, edukia argitaratuko dute beren sozialetan, eta gaurko aurkezpenean ikusi ahal izan da material fresko eta dibertigarri hori.

Toki ekoturista

Gasteiz Espainiako lehen hiri eremu ekoturista bihurtzeko asmoz hiriak abian jarritako estrategiari lotuta dago proiektua. Hamarkada askoan udal-taldeak egindako lanari esker lortu dituzte aitortza hori eta 2012an Europako Hiriburu Berdea izendatu izana.

“Gaur egun, ekoturismoa gure turismogunean garatu, kudeatu eta susta dezakegu, eta solaskide gisa jardun dezakegu taldearekin bat egiten duten bertako enpresen aurrean. Oraingoz, ekoturismo arloko ziurtagiria duten hamar enpresa ditugu eta gure herrialdeko naturaguneetara bidaiatzera bultzatzea eta ingurumeneko inpaktuak minimizatzea helburu duen bilakaerarekin egin dute bat”, azpimarratu du zinegotziak.

“Pandemiaren ostean, natura-turismoak gorakada esponentziala izan du. Hori dela eta, beharrezkoa da ondare naturalaren eta bioaniztasunaren kontserbazioa sektorekako politiketan txertatzea (turismokoarekin, besteak beste)”, gehitu du.

Gasteizko Udala kide den Espainiako Ekoturismoaren Elkartearen lehentasunezko helburuetako bat da naturarekin lotutako turismoa eta ekoturismoa sustatzeko jarduera kooperatiboak eta berritzaileak babestutako guneetan martxan jartzea: Espainiako Biosferako erreserbak, parke nazionalak, parke naturalak, geoparkeak eta Natura 2000 Sarea, adibidez.

Informazio gehiago udaleko webgunean

• Kazetariek eta dantzariak lurraldearen erakargarriei balioa eman diete FITURen

Ion Aramendi Telecinco kateko aurkezlea, Esther Vaquero “Antena 3 Noticias” albistegiaren bigarren edizioaren gidaria, Rodrigo Blázquez “La Sexta Noticias 20h” albistegiaren zuzendaria, Javier Arco Castillo “Poty” dantzaria eta Óscar Fornies Mediaset Españako Ekoizpen Kudeaketaren arduraduna dora Gasteizko eta Arabako enbaxadore turistiko berriak 2025. urtean.

Kazetariek, dantzariak eta zuzendariak ilusioz eta harrotasunez hartu dute gaur izendapen hori, eta balioa eman diete lurraldearen eta hiriburuaren baliabide naturalei, gastronomikoei eta ondare baliabideei. “Enbaxadore” berriak probintziarekin lotuta daude, Gasteizko Telebista Jaialdian (FesTVal) parte hartu dutelako, gonbidatu eta saritu gisa, edo ikus entzunezko ekoizpenen aurkezpenetan.

​Gasteizko Udalak eta Arabako Foru Aldundiak   enbaxadore berrien izenak eman dituzte jakitera gaur eguerdian, Nazioarteko Turismo Azokako (FITUR) Euskadiren erakustokian egindako ekitaldian. Ekitaldi horretan, María Nanclares Ekonomia Sustapenaren, Enpleguaren, Merkataritzaren eta Turismoaren Saileko zinegotzia eta Cristina González lehenengo diputatu nagusiorde eta Enplegu, Merkataritza eta Turismo Saileko foru diputatua  izan dira.

Joseba Fiestras FesTValen zuzendariak gidatutako ekitaldian, Cristina Gonzálezek eta María Nanclaresek nabarmendu dute FesTVek Gasteiz eta Araba sustatzeko eta ezagutarazteko “lan garrantzitsua” egiten duela. “Gure natura, ondarea eta gastronomia ezagutarazi nahi dugu gure sustapen estrategiaren bidez, eta helburu hori errazagoa da lortzea Ion Aramendi, Esther Vaquero, Rodrigo Blázquez eta “Poty” bezalako profesional ezagun eta aitortuen eskutik”, adierazi dute.

Enbaxadore berriak albistegietan eta telebistako programetan ibilbide arrakastatsua duten profesional ezagunak dira.

Ion Aramendi euskal komunikatzailea (Donostia, 1977) Mediaset Españako aurpegi ezagunenetako bat da. Aramendi Telecinco-ko “Sálvame” saioko erreportari gisa hasi zen lanean, eta, ondoren, aurkezle ibili zen ETB-2ko “¡Qué me estás contando!” magazinean eta La 1 kateko “El cazador” lehiaketan, “Todos en casa” elkarrizketa programan eta “The Dancer” talent showan. Telecinco-ra itzuli da, eta gaur egun “Reacción en cadena” lehiaketa eta “Gran Hermano” eztabaida saioa aurkezten ditu.

Esther Vaquero kazetariak (Salamanca, 1982) SER kateko mikrofonoetan egin zituen lehen urratsak, baina, batez ere, telebistan lan egin du: lehenik eta behin, Cuatro kateko “Noche Hache” late nightean, zeinak Ondas sari bat irabazi baitzuen 2007an; eta, gero, La Sexta katean, Ingalaterrako BBC katean, TVE-n eta berriz ere Cuatro-n. 2020an, Antena 3era itzuli zen, eta, gaur egun, gaueko albistegiaren aurkezlekide da, “Espejo Público”, hauteskunde eztabaidak eta programa bereziak gidatu ondoren.

“Enbaxadore” guztiei aitorpena egitea

Rodrigo Blázquezek (Ourense, 1987), une honetan, Cristina Saavedrarekin batera, “La Sexta Noticias 20h” arratsaldeko albistegia zuzentzen eta aurkezten du, erantzukizun hori bera izan ondoren Grupo Atresmediaren gaurkotasuneko beste programa batzuetan, hala nola “La Sexta Clave”, “Más vale tarde” eta “La Sexta Columna”. Aurretik, kate bereko informazio saioetan erreportari izan zen, besteak beste politikaren eta kirolen ataletan.

Javier Arco Castillo (Torrelavega, 1960) “Poty Castillo” izenez ezagunagoa da. Dantza ikasi zuen Madrilgo Arte Dramatikoaren eta Dantzaren Errege Kontserbatorioan, eta Dantza Konpainia Nazionaleko partaide izan zen zortzi urtez. Telebistaren mundura 2001ean egin zuen jauzi, La 1 kateko “Operación Triunfo” saioaren lehen edizioan koreografo aritzeko, eta beste programa batzuetan jarraitu zuen, hala nola kate bereko “Mira quien baila” saioan, Antena 3en eta Telemadriden.

Gasteizko Udalak eta Arabako Foru Aldundiak   FesTVren eskutik,  Mediaset Españako Ekoizpen Kudeaketaren zuzendari Óscar Fornies ere izendatu dute enbaxadore turistiko. Era horretan, bi erakundeek jarraiko bigarren urtez aitorpena egin die Gasteiz eta Araba beren programetarako agertoki gisa aukeratzen dituzten telebista ekoizleei eta/edo zuzendariei, hiria eta lurraldea ezagutarazten laguntzen baitute.

Óscar Forniesek zenbait programatan garatu du bere telebistako ibilbidea, hala nola La 1 kateko “¡Hola Raffaela!” eta “Un, dos, tres” programetan. Azken horren ekoizle izan zen haren bederatzigarren etapan, 1994. urtera arte. Beste hauetan ere parte hartu du: “Nadie es perfecto”, “Buscados con cargo”, “Este no es el programa de los viernes” eta “Cine de barrio”, TVE 1 katean; “Esta noche cruzamos el Mississippi”, Telecinco-n; “Trato hecho”, Antena 3en; eta “Max madera”, Telemadrid-en.

2000. urtean, Telecinco-n sartu zen Ekoizpen Propioko zuzendariorde gisa, eta, ondoren, Mediaset Españako Entretenimenduko Ekoizpeneko zuzendari kargua hartu zuen. 2019az geroztik, talde bereko Ekoizpen Kudeaketaren zuzendaria da.

María Nanclares zinegotziak eta Cristina González foru diputatuak eskerrak eman dizkiete guztiei, eta Gasteizera eta Arabara itzultzeko gonbit egin diete. “Hiriko eta lurraldeko ateak beti zabalik egongo dira zuentzat. Zuen zain gaude.” “Enbaxadoreen” parte hartzearen osagarri, FesTVal jaialdia eta Gasteizko zein Arabako turismo erakargarri nagusiak lotzen dituen bideo bat eman da.

Araba eta Gasteizen “enbaxadore” berriak ospe handiko eta jendearen artean oso ezagunak diren profesionalez osatutako zerrendara batu dira. Zerrendakide dira Matías Prats, María Escario, Roberto Brasero, Sandra Golpe, Sandra Sabatés, Alberto Chicote, Helena Resano, Mamen Mendizábal, Diego Losada, Jon Sistiaga, Jesús Álvarez, Vicente Vallés, Cristina Villanueva eta Antonio Pagudo, Angie Rigueiro, Manu Baqueiro, Jalis de la Serna eta Catorce Comunicación.

​”Enbaxadoreak” proiektua Gasteizko Udalaren, Arabako Foru Aldundiaren eta FesTVal jaialdiaren arteko lankidetzaren emaitza da, Arabako hiriburuak eta lurraldeak lehen mailako helmuga turistiko moduan duten lekua indartzeko, telebista jaialdiaren kanpo proiekzioa aprobetxatuz eta ikus-entzunezkoen sektoreko bertoko zein nazioko profesional ezagunen gomendioak baliatuz.

• workfromalava.eus atariak telelana eta aisia konbinatzen dituzten profesionalentzako baliabide interesgarriak bildu eta antolatzen ditu

Gasteizko Udalak eta Arabako Foru Aldundiak Nazioarteko Turismo Azokan (Fitur) proiektu berritzaile bat aurkeztu dute gaur lurraldea eta bertako hiriburua helmuga bikaina izan daitezen nomada digitalentzat, hau da, telelana eta aisialdia ohiko bizilekutik kanpo konbinatzen dituzten profesionalentzat. BuleGO! proiektuaren helburua da horrelako bidaiariak erakartzea, batez besteko egonaldia hobetzen jarraitzeko eta sektorean eskaria sasoi jakin batean ez pilatu eta dibertsifikatzeko.

María Nanclares Ekonomia Sustapenaren, Enpleguaren, Merkataritzaren eta Turismoaren Saileko zinegotziak eta Cristina González lehenengo diputatu nagusiorde eta Enplegu, Merkataritza eta Turismo Saileko foru diputatuak ekimen horren berri eman dute Euskadiko standean, Fiturren, egindako ekitaldi batean. Ekitaldi horretan hainbat eragile, enpresa eta erakunde izan dira, eta Gasteiz eta Araba kalitatezko helmuga jasangarri eta irisgarri gisa sendotzeko turismo estrategia partekatu batean kokatu dute.

‘BuleGO’ proiektuaren tresna nagusia da workfromalava.eus web ataria, zeinak nomada digitalentzat interesgarriak diren baliabideak eta instalazioak biltzen eta antolatzen dituen modu intuitiboan, hala nola ostatuak (hotelak, ostatuak, landetxeak, landa turismoak, kanpinak, etab.) eta lan espazioak (coworking zentroak, lan aretoak…), baita gozatzeko planak eta jarduerak ere Gasteizko eta Arabako naturaren, ondarearen eta enogastronomiaren gustu eta zaletasunen arabera.

Fiturren web atari hori abiarazteko, urtean zehar komunikazio kanpaina indartsu bat egingo da sare sozialetan eta beste lineako euskarri batzuetan, “NOMADS, let’s GO!” lelopean. Kanpainaren elementu nagusia sustapen bideoak izango dira, bat kuadrilla bakoitzeko, hiru profil desberdini bideratuak: lanean ari den bitartean bidaiatzen duen nomada indibiduala, esperientzia berriak bizi nahi dituzten bikote nomadak, eta seme-alaben eskutik beste kultura batzuk ezagutu nahi dituzten familia nomadak.

Kanpaina horren lehen faseko helburua Espainiako hiri handietan bizi diren edo lan egiten duten profesionalak izango dira, eta, aurrerago, Europako merkatu garrantzitsuenetara zabalduko da. Duela gutxi egindako azterlanen arabera, 35 milioi nomada digital daude mundu osoan, eta horietatik 753.000 baino gehiago Espainian ari dira lanean. Gainera, herrialde hori seigarren postuan dago profesional horientzako lehentasunen zerrendan.

Batez besteko egonaldia eta eskaria sasoi jakin batean ez pilatzea

Cristina Gonzálezek baieztatu duenez, Arabak eta Gasteizek “baldintza bikainak betetzen dituzte ostatuen, lan espazioen eta Interneteko estalduraren tipologiagatik eta natura-, ondare- eta gastronomia-eskaintza erakargarriagatik, eguzkiaz eta hondartzaz bestelako zerbait bilatzen duten nomada digitalen puntako helmuga bihurtzeko. Lan egingo dugu bidaiari horiek erakartzeko eta funtsezko bi helburutan aurrera egiteko, hau da, batez besteko egonaldia luzatzea eta eskaria sasoi jakin batean ez pilatzeko sektorean”.

“Uste dut aukera aparta dugula nitxo honetan gure sektore turistikoa dibertsifikatzeko eta aukera berriak sortzeko, batez ere landa- eta mendi-eremuetan, non potentziala izugarria baita. Kontuan hartu behar da nomada digitalak egonaldi luzeak bermatzen dituzten profesionalak direla, urte osoan bidaiatzen dutela, eta ez soilik goi denboraldian, eta erosteko ahalmen handia dutela”, gaineratu du.

Bestalde, María Nanclaresek eskerrak eman ditu turismo sektoreko enpresa pribatuek (ostatuak, lan espazioak, etab.) Gasteizen zein lurraldeko beste lekuren batean kokatuta egonik proiektuan izandako inplikazioagatik. “Gaurtik bertatik, Arabako berrogeita hamar enpresa inguruk eskaintzen dizkiete ostatu eta lan espazio zerbitzuak profesional horiei workfromalava.eus atariaren bidez; baina kopuru hori pixkanaka haziko da datozen hilabeteetan”, adierazi du.

Zinegotziak, halaber, nomada digitalei dei egin die hiria eta lurraldea hauta dezaten. “Telelanerako leku bat bilatzen duten guztiei gonbita egiten diegu Gasteizen eta Arabaren alde egin dezaten. Gure zerbitzu osoengatik, ekintzaileei laguntzeko gure programengatik eta gure bizi kalitate handiagatik”, adierazi du.

Gasteiz eta Araba protagonista izango dira berriz ere bihar, osteguna, Nazioarteko Turismo Azokaren Euskadiko standean, 2025 honetan “enbaxadore” turistiko izango diren pertsonen izenen betiko aurkezpenarekin: telebistaren eta FesTVal-en munduari lotutako profesional ospetsuak, hiriaren eta probintziaren erakargarri ugariak zabalduko baitituzte nazioan hasi berri den urte honetan zehar.

• Enpresa pribatuekin lankidetzan proiektu aitzindaria abiarazi dute, telelana eta aisialdia uztartzen dituzten gazteak eta familiak erakartzeko
• Udalak eta Foru Aldundiak  hiriko eta lurraldeko telebista “enbaxadoreak” aintzatetsiko dituzte aurten ere

Gasteiz eta Araba Nazioarteko Turismo Azokara (Fitur) joango dira helmuga bikaina baitira nomada digitalentzat, hau da, telelana eta aisialdia ohiko bizilekutik kanpo konbinatzen dituzten profesionalentzat. Foru Aldundiak eta Udalak proiektu berritzaile bat aurkeztuko dute, enpresa pribatuekin lankidetzan garatua, horrelako bidaiariak erakartzeko.

Bi erakundeek Fiturren ezagutzera emango dituzte hiriko eta lurraldeko enbaxadore turistiko berriak, urtarrilaren 22tik 26ra bitartean izango den azokan.

María Nanclares Sustapen Ekonomiko, Enplegu, Merkataritza eta Turismoko zinegotziak eta Cristina González lehen diputatu nagusiorde eta Enplegu, Merkataritza eta Turismo Saileko foru diputatuak gaur aurkeztu dituzte prentsaurrekoan Arabak eta Gasteizek Fiturrera eramango duten eskaintzaren lerro nagusiak, zeinaren 45. edizioa beteko baita aurten, 152 herrialdetako destinoak, 9.000 enpresa eta 800 erakusle baino gehiago bertan izango direla.

Nanclaresek eta Gonzálezek azpimarratu dute erakundeen arteko koordinazioak garrantzi handia duela Araba eta Gasteiz “helmuga jasangarri gisa” tinkotzea helburu duen sustapen turistikoko estrategia bat eraginkortasunez garatzeko. “Helmuga jasangarri horrek era guztietako bidaiarientzako kalitatezko eskaintza izan behar du, hauexetan oinarrituta: natura oparoa, ondare historiko ikusgarria, lehen mailako enogastronomia eta jaialdien eta ekitaldien programa bizia”.

Hala, eta baterako lan esparru horretan, iragarri dute datorren asteazkenean, urtarrilak 22, aurkeztuko dutela Euskadiren standean ‘BuleGO’ proiektu berritzailea, Basquetourren (Eusko Jaurlaritza) laguntzarekin garatu dena, Gasteiz eta Araba nomada digitalentzako helmuga gisa kokatu eta telelana eta aisialdia ohiko bizilekutik kanpo konbinatzen dituzten profesionalak erakartzeko helburuarekin.

Cristina Gonzálezek azaldu duenez, Arabak eta Gasteizek “baldintza bikainak betetzen dituzte ostatuen eta instalazioen tipologiagatik eta natura-, ondare- eta gastronomia-eskaintza erakargarriagatik, eguzkiaz eta hondartzaz bestelako zerbait bilatzen duten nomada digitalen puntako helmuga bihurtzeko. Lan egingo dugu bidaiari mota hori erakartzeko eta gure turismo estrategiaren bi helburutan aurrera egiteko, hau da, batez besteko egonaldia luzatzea eta bisitak zabaltzea urte osoan zehar”.

“Uste dut aukera aparta dugula nitxo honetan gure sektore turistikoa dibertsifikatzeko eta aukera berriak sortzeko, batez ere landa- eta mendi-eremuetan, non potentziala izugarria baita”, gaineratu du.

BuleGO!

‘BuleGO!’ proiektuaren tresna nagusia izango da workfromalava.eus web ataria, zeinak nomada digitalentzat interesgarriak diren baliabideak eta instalazioak biltzen eta antolatzen dituen, hala nola ostatuak (hotelak, ostatuak, landa turismoak, kanpinak, etab.) eta lan espazioak (coworking zentroak, lan aretoak…), baita gozatzeko planak eta jarduerak ere Gasteizko eta Arabako naturaren, ondarearen eta enogastronomiaren gustu eta zaletasunen arabera.

“Web atari honek diseinu eta erabilera intuitibo erakargarria du, eta berrogeita hamar bat baliabide eta instalaziorekin abiaraziko da, nomada digitalek telelana eta aisialdia konbinatu ahal izateko behar diren zerbitzuak eskaintzen dituzten enpresa pribatuetatik. Baliabide horiek Gasteizen eta Arabako gainerako eskualdeetan kokatuta daude, eta datozen hilabeteetan gero eta gehiago izango dira”, azaldu du María Nanclares zinegotziak.

Fiturren web atari berri hau abiarazteko, komunikazio kanpaina indartsu bat egingo da sare sozialetan eta beste lineako euskarri batzuetan, ‘NOMADS, let’s GO!’ lelopean. Kanpainaren elementu nagusia sustapen bideoak izango dira, hiru profil desberdini bideratuak: lanean ari den bitartean bidaiatzen duen nomada indibiduala, esperientzia berriak bizi nahi dituzten bikote nomadak, eta seme-alaben eskutik beste kultura batzuk ezagutu nahi dituzten familia nomadak.

Kanpaina honen lehen faseko helburua Espainiako hiri handietan bizi diren edo lan egiten duten profesionalak izango dira, eta, aurrerago, Europako merkatu garrantzitsuenetara zabalduko da.

‘BuleGO!’ proiektuaren aurkezpenaren biharamunean, urtarrilaren 23an (osteguna), Gasteiz eta Araba protagonista izango dira berriz ere Turismoko Nazioarteko Azokan. Ekitaldi bat egingo da 2025ean turismo “enbaxadore” izango diren pertsonen izenak ezagutarazteko: telebistari lotutako profesional ospetsuak, zeinek hiriaren eta probintziaren erakargarri ugariak hasi berri den urtean zehar hedatuko baitituzte nazio mailan.

Ekitaldi horretan, jarraiko bigarren urtez aitorpen berezia emango zaie Gasteiz eta Araba beren programetarako agertoki gisa aukeratzen dituzten telebista ekoizleei, hiria eta lurraldea ezagutarazten laguntzen baitute.

Gasteizek, era berean, ‘Eraztun Berderako Ibilbideak’ proiektua aurkeztuko du, Arabako hiriburuaren “green” funtsa azaleratzen duena, eta ‘I Love Vitoria-Gasteiz’ kanpaina indartuko du, hainbat material grafiko eta sustapen materialekin.

Araba eta bere eskualdeak ere oso presente egongo dira nazioarteko lehiaketa horretan. Gorbeialdeak sustapen bideo bat aurkeztuko du Paco Nadal bidaia kazetariarekin; Aiaraldeak zikloturisten ibilbideen proposamen bat estreinatuko du; Bastidak 2025erako turismo eskaintza ezagutzera emango du; eta Ekonomia Garapenaren eta Jasangarritasunaren Sailak Arabako Mendialdeko Asfalto Naturalen meatze paisaiei buruzko ekimena ezagutaraziko du.

Cristina González diputatuak azpimarratu duenez, “Fiturrera joango gara, Arabako sektorearentzat urte oso on baten ondoren, eta, hain zuzen ere, 2024an itxiko dugu historiako markarik onenarekin, bidaiarien sarrerei eta kontratatutako gauei dagokienez, merkatu nazionalaren eta nazioartekoaren bultzadari esker. Gainera, aurrerapauso sendoak ematen ari gara batez besteko egonaldia luzatzeko eta sektorea urteko beste sasoietara zabaltzeko helburu bikoitzean”.

“2024ko urtarriletik azarora 535.000 bisitari baino gehiago jaso ditugu, ia 1,2 milioi gau kontratatuta, 2023ko aldi berean baino % 3,5 eta % 8 gehiago; batez besteko egonaldia, berriz, % 4 hazi da, eta 2,2 egunekoa da. Hazkunde horiei esker, aberastasuna eta enplegua sortu da gure lurraldeko ostatu, turismo enpresa, taberna eta jatetxe eta dendetan”, erantsi du.

María Nanclares Gasteizko Turismoko zinegotziak bat egin du “bi erakundeek batera egindako lana bermatzen duten” turismo datu onen ospakizunarekin, eta hain emaitza onak ematen ari den bide horretatik jarraitzeko prest agertu da.

Azkenik, María Nanclaresek eta Cristina Gonzálezek jakinarazi dute Fiturren bilerak egingo dituztela turismo-enpresekin eta -eragileekin, Gasteiz eta Araba turismo arloan sustatzeko helburuarekin.

• Aktoreek eta kazetariek Gasteizko eta Arabako erakarguneei balioa emango diete FITUR azokan

Manu Baqueiro aktorea, ‘La Sexta’ko erreportari Jalis de la Serna, ‘Antena 3 Noticias’eko kiroletako aurkezle Angie Rigueiro eta Catorce Comunicación ikus-entzunezko ekoizpen-etxea dira Gasteizen eta Arabaren ‘enbaxadore’ turistiko berriak. Aktoreak, kazetariek eta ekoizpen-etxeak “ilusioz eta harro” jaso dute izendapena eta lurraldeko eta hiriburuko natura, ondare eta gastronomia mailako baliabideei balioa eman nahi izan diete.

‘Enbaxadore’ berriak hiriari eta probintziari lotuta daude Gasteizko Telebista Jaialdian (FesTVal) gonbidatu eta saridun gisa edo ikus-entzunezko ekoizpen-lanak aurkezteko parte hartu zutelako.

Gasteizko Udalak eta Arabako Foru Aldundiak gaur ezagutarazi dituzte ‘enbaxadore’ ‘berrien izenak Turismoko Nazioarteko Azokan (FITUR) Euskadiko standean egindako ekitaldian. Bertan izan dira Ekonomia Sustapena, Enplegua, Merkataritza eta Turismoaren zinegotzia, Maria Nanclares; eta lehenengo diputatu nagusiorde eta Enplegu, Merkataritza eta Turismoko foru-diputatua, Cristina González.

María Nanclaresek eta Cristina Gonzálezek bereziki nabarmendu nahi izan dute FesTVal jaialdiak Araba eta Gasteiz sustatzeko eta hedatzeko egiten duen lan “esanguratsua”. Ekitaldia jaialdiaren zuzendariak, Joseba Fiestrasek, aurkeztu du. “Gure sustapen-estrategiaren helburua da gure natura, ondare historikoa eta gastronomikoa ezagutaraztea eta helburu hori lortzea errazagoa da profesional ezagun eta entzutetsu hauekin: Manu Baqueiro, Jalis de la Serna eta Angie Rigueiro”, adierazi dute.

‘Enbaxadore’ berriak telesailetan eta informazio-programetan ibilbide arrakastatsua egin duten profesional entzutetsuak dira. Manu Baqueiro (Madril, 1978) aktorea batez ere ezaguna da TVEren La1 kateak eta Antena 3ek emandako ‘Amar en tiempos revueltos’ eta ‘Amar es para siempre’ (hurrenez hurren) antzeztutako ‘Marce’ren rola dela eta. Izan ere, telesail horietan, ‘Manolita’rekin batera, telebistak azken hamarkadan izan duen bikote enblematikoenetako bat osatu du.

Manu Baqueiro, gainera, antzerki-lan eta film labur eta film luze askotan protagonista izan da.

Victoriano de la Serna (Madril, 1974) kazetaria Jalis de la Serna izenarekin da ezaguna, eta ibilbide luzea du idatzizko prentsan eta, batez ere, La Sexta, Antena 3, Canal Sur, Telemadrid eta Cuatro kateetako hainbat programatan telebistako erreportari gisa. Bere azken lanak ikerketa-programatan eta dokumentaletan oinarritu dira: La Sextak eskainitako ‘Encarcelados’, ‘Enviado Especial’ eta ‘Natural’, eta Antena 3ko ‘En tierra hostil’.

Aitortza ‘enbaxadore’ guztiei

Gaur egun, Angie Rigueirok (Buenos Aires, 1988) ‘Antena 3 Noticias’eko kirolen atala aurkezten du, baina aurretik kate bereko ‘Noticias de la Mañana’ programako aurkezlea izan zen. Kazetaria eta publizista da, eta Estatuko eta nazioarteko politikan aditua da. Idatzizko prentsako, irratiko eta telebistako hainbat komunikabidetan egin du lan (besteak beste, Estatu Batuetako CNN katean). Telebistako lana Francisco de Vitoria Unibertsitateko irakasle-lanarekin uztartzen du. Telebistako Kazetaritzako Masterraren zuzendaria da bertan.

Amaitzeko, Catorce Comunicación Sofía Moratek eta Nicolás Garcíak zuzentzen duten ikus-entzunezkoen ekoizpen-etxea da. Ikusleen eta kritikaren aldetik arrakasta handia lortu dute telebista-kate generalistetan, autonomikoetan, tokikoetan eta tematikoetan. Egindako lanen artean, hauek azpimarratu behar dira: ‘Aquí la Tierra’, ‘Ahora o nunca’, ‘Como sapiens’ eta ‘Los Archivos del Ministerio’ TVEn; eta ‘Dentro del Príncipe’ eta ‘Mis primeras veces’ (Mediaset). Programa horietako batzuk, gainera, Gasteizen eta Araban filmatutakoak dira.

María Nanclares zinegotziak eta Cristina González foru-diputatuak “eskerrak” eman eta “Gasteizera eta Arabara itzultzera” gonbidatu dituzte. “Hiriko eta lurraldeko ateak beti egongo dira zuentzat irekita. Zuen zain izango gara”. ‘Enbaxadoreen’ hitzak osatzeko, FesTVal Arabako eta Gasteizko erakargarritasun turistiko nagusiekin lotzen duen bideoa eskaini dute.

Gasteizko eta Arabako ‘enbaxadore’ berri horiek prestigio handia duten eta ikusleen artean oso ezagunak diren beste profesional batzuen zerrendara gehituko dira: Matías Prats, María Escario, Roberto Brasero, Sandra Golpe, Sandra Sabatés, Alberto Chicote, Helena Resano, Mamen Mendizábal, Diego Losada, Jon Sistiaga, Jesús Álvarez, Vicente Vallés, Cristina Villanueva eta Antonio Pagudo.

‘Enbaxadoreak’ proiektua Gasteizko Udalaren, Arabako Foru Aldundiaren eta FesTVal jaialdiaren arteko elkarlanaren emaitza da. Horren helburua da lehen mailako turismogune gisa Arabako hiriburuaren eta lurraldearen posizionamendua indartzea telebista-jaialdiak kanpoan duen proiekzioari eta ikus-entzunezkoen sektoreko profesional entzutetsuen preskripzioari esker (toki mailan zein Estatuan).

• María Nanclares: “Gure instalazioei, eremu naturalei, zaletuei eta klimari esker, kirol arloko turismorako eta turismo aktiborako bikaina den tokia eskaintzen dugu”.
• Cristina González: “Kirol-turismoa oso garrantzitsua da sektorerako jarduera-motor gisa eta bisitarien etorrera urtaroen araberakoa ez izaten laguntzen du”.

Gasteizko Udalak eta Arabako Foru Aldundiak gaur arratsaldean aurkeztu dute Turismoko Nazioarteko Azokan (Fitur) 2024an zehar ‘Kirolera bidaiatu. Zatoz Arabara eta Gasteizera’ lelopean hirian eta lurraldean egingo diren kirol-ekitaldien egutegia. Aurkezpenean izan dira bertako kirolari esanguratsu batzuk: Martín Fiz eta Ruth Brito atletak eta Igor González de Galdeano txirrindularia.

Kanpaina horren bidez, bi erakundeek Gasteiz eta Araba turismo aktiboko eta kirol-turismoko toki gisa sustatuko dute Espainiako turismo-azoka nagusian eta mundu osoko garrantzitsuenetako batean.

Ekonomia Sustapena, Enplegua, Merkataritza eta Turismoaren zinegotziak, Maria Nanclaresek; eta lehenengo diputatu nagusiorde eta Enplegu, Merkataritza eta Turismoko foru-diputatuak, Cristina Gonzálezek, Fiturren Euskadik duen standean egindako aurkezpenean hartu dute parte. Bertan, Gasteizek eta Araba osoak dituzten ezaugarriei esker, “kirol-turismorako gune ezin hobea” direla nabarmendu nahi izan dute.

“Estatu mailako eta nazioarteko kirol-egitasmoen egutegia eskaintzen duen turismogunea gara. Egitasmo horiek kirolari profesionalentzat zein amateurrentzat izaten dira. Gainera, kirolarekiko pasio handia eta zaletu bikainak ditugu, azpiegitura eta instalazio ezin hobeak, naturagune handiak eta kirola egiteko klima egokia”, azpimarratu du.

Udalak eta Aldundiak 2024ko kirol-ekitaldien egitaraua aurkeztu dute bertako kirolari hauen eskutik: Martín Fiz, Maratoian munduko txapeldun; Igor González de Galdeano, La Vuelta lasterketan bi etapa irabazi zituena eta Tourrean hainbat egunez maillot horia jantzita izan zuena; eta Ruth Brito, Triatloiko munduko txapelduna. Horrez gain, bertan izan da Jose Antonio Arenzana, aurtengo maiatzean lehen aldiz Araban egingo den distantzia luzeko The Wolf Race Graveleko lasterketaren antolatzailea.

Aurten antolatutako lasterketen artean, honako hauek nabarmendu behar dira aipatu berri dugun The Wolf Race lasterketaz (maiatzak 24/25) gain: Martín Fiz Maratoia (maiatzak 5); Gasteizko Ironman lasterketa (uztailak 14) eta La Vuelta, Espainiako txirrindularitza-lasterketa. Azken horrekin lotuta, gainera, irailaren 5ean, oso-osorik Arabatik igaroko den etapaz gozatu ahal izango dute zaletuek. Izan ere, etapa Gasteizko erdigunetik atera eta Izkiko natura-parkera (Maeztu) iritsiko da.

Egutegia Gasteiz eta Araba kirol arloko gune gisa sendotuko duten beste ekitaldi batzuekin osatuko da. Horietako batzuk dira hauek: Parabadmintoneko Nazioarteko Txapelketa (apirila), VI Half Gasteiz distantzia ertaineko triatloi-txapelketa (ekaina), Eusko Bike Challenge (ekaina), Vitoria Cicloturista (ekaina), Emakumezkoen Araba World Tennis Tour (ekaina), BLAN txirrindularitza-proba (iraila), Gasteiz Trail mendi-lasterketa (iraila), Orbea Gravel Arabako Errioxa (urria) eta Wine Run Arabako Errioxa (urria).

“Kirol arloko lasterketa eta ekitaldi horiek gure ostatu, ostalaritza, saltoki eta turismo-enpresentzako jarduera- eta enplegu-iturri garrantzitsua dira. Gainera, gure lurraldera datozen bisitarien iritsiera urtaroen araberakoa ez izaten laguntzen dute”, zehaztu dute Cristina Gonzálezek eta María Nanclaresek.

• Euskadiren standa bihotz itxurako hosto berdez bete da urtarrilaren 28ra, igandera arte, Madrilen egingo den Turismoaren Nazioarteko Azokan

Euskadiko hiriburua Fiturren gaurtik igandera, urtarrilaren 28ra, bitarte egongo da zabalik ‘I Love/like Vitoria-Gasteiz’ sustapen-kanpaina berriarekin. Horren bidez, aukera-elementu gisa jasangarritasuna, historia eta enogastronomia aprobetxatuko dituen kalitatezko turismoa bultzatu nahi du.

Euskadiren standean kanpainaren ezaugarri diren bihotz formako hosto berdeak ikusgai dituzten irudiak eta merchandisinga daude, eta honako mezu hauek zabaldu nahi dituzte: “Gasteiz hiri bizia, berdea, irekia eta modernoa da, jasangarritasunaren aldeko apustua egin duena eta Espainiako hiriko lehen gune ekoturista izendatu dutena”, azpimarratu du María Nanclaresek, Ekonomia Sustapena, Enplegua, Merkataritza eta Turismoaren zinegotziak. Zinegotzia izan da Madrilgo Turismoaren Nazioarteko Azokan Gasteizko ordezkaritzaren burua.

“Asko dugu eskaintzeko: natura, ondarea, enogastronomia eta kultura eta kirol arloko ekitaldiak. Izan ere, hiria ezagutzen duena maitemindu egiten da: ‘I love Vitoria-Gasteiz’”, adierazi du zinegotziak.

Ifeman Gasteiz sustatuko dute mezuetako batzuk dira hauek: ‘I love Green Capital’, ‘I love Green Tourism’, ‘I love cultura singular’, ‘I love gastronomía’, ‘I love enoturismo’ eta ‘I love Green Congress’. Irudien bidez, Udalak honako ezaugarri hauek betetzen dituen hiri gisa erakutsi du Gasteiz: Espainiako ekoturismoko lehen hiriko turismogune ziurtatua, mila urte baino gehiago dituen hiria, erreferente enogastronomikoa eta kongresuak, erakusketak eta beste ekitaldi batzuk egiteko ere jasangarria den turismogunea.

Turismo arloko ekintza-planarekin, Gasteizko Udalak bisitari kopurua handitu, adierazle batzuk hobetu (batez besteko gastua, adibidez) eta hiriko jarduera turistikoa urtaroen araberakoa izatea eragotzi nahi du.

“Datuek agerian utzi dute urte askoan egindako sustapen-lan ona eta Gasteiz modan dagoela esan dezakegu. Beraz, bisitan datozenei zerbitzurik onena eskaintzeko unea da”, adierazi du Nanclaresek.

Fiturren Udalak izango duen erakunde mailako agendak bilera teknikoak eta ekitaldiak jasotzen ditu eta, horien artean, bi hauek azpimarratu behar dira: Gasteiz eta Araba kirol arloko turismogune gisa sustatzea (gaur arratsaldean izango da, 16:00etan) eta 2024rako Gasteizko eta Arabako enbaxadoreak aurkeztea (bihar, osteguna, izango da, 11:00etan).

• 2024ko proben egutegia aurkeztuko dute: Ironman, La Vuelta, Martín Fiz Maratoia eta Graveleko The Wolf Race biltzen dituena besteak beste
• Beste urte batez, Aldundiak eta Udalak hiriko eta lurraldeko telebistako ‘enbaxadoreak’ aitortuko dituzte

Gasteizek eta Arabak Turismoko Nazioarteko Azokan (Fitur) kirol arloko turismogune eta turismo aktiborako toki gisa duten profila indartuko dute bertako kirolarien eskutik: Martín Fiz eta Ruth Brito atletak, eta Igor González de Galdeano txirrindularia. Foru Aldundiak eta Udalak Arabako kirol arloko pertsona ospetsu horiekin batera aurkeztuko dute 2024ko proben egutegia. Aurten, besteak beste, honako hauek izango dira: Ironman, La Vuelta, Martín Fiz maratoia eta Graveleko The Wolf Race lasterketa.

Gainera; bi erakundeek Fiturren ezagutaraziko dituzte hiriko eta lurraldeko enbaxadore turistiko berriak.

Ekonomia Sustapena, Enplegua, Merkataritza eta Turismoaren zinegotziak, Maria Nanclaresek; eta lehenengo diputatu nagusiorde eta Enplegu, Merkataritza eta Turismoko foru-diputatuak, Cristina Gonzálezek, gaur aurkeztu dituzte prentsaurreko bidez Arabak eta Gasteizek Fiturrera eramango duten eskaintzaren ildo nagusiak. Fiturrek aurten 44. edizioa beteko du eta 152 herrialdetako turismoguneak, 9.000 enpresa eta 800 erakusketari baino gehiago bilduko dira.

Nanclaresek eta Gonzálezek Gasteiz eta Araba “natura zoragarria, ondare historiko hunkigarria, lehen mailako enogastronomia eta jaialdi eta ekitaldien egitarau oparoan oinarrituta dagoen eta bidaiari mota guztientzako kalitatezko eskaintza jasotzen duen turismogune jasangarri gisa” posizionatzeko garaian turismo-sustapeneko estrategia modu eraginkorrean garatu ahal izateko erakunde arteko koordinazioak duen “garrantzia” azpimarratu nahi izan dute.

Hala, eta elkarrekin bideratu beharreko lan-esparru horren baitan, urtarrilaren 24an, asteazkenean, hiriak eta lurraldeak 2024an zehar egingo dituzten kirol-ekitaldien egutegia Fiturren aurkeztuko dutela iragarri du. Egutegi horren leloa izango da ‘Viaja al deporte. Ven a Álava y Vitoria-Gasteiz’ (Bidaiatu kirolera. Zatoz Arabara eta Gasteizera). Ekitaldi horretan izango dira Martín Fiz, Maratoian mundu-txapeldun; Igor González de Galdeano, La Vuelta lasterketan bi etapa irabazi zituena eta Tourrean hainbat egunez maillot horia jantzita izan zuena; eta Ruth Brito, Triatloiko munduko txapelduna.

Aurten antolatutako lasterketen artean, honako hauek nabarmendu behar dira: Martín Fiz Maratoia (maiatzak 5); graveleko distantzia luzeko lasterketa, The Wolf Race (maiatzak 24/25); Gasteizko Ironman lasterketa (uztailak 14) eta La Vuelta, Espainiako txirrindularitza-lasterketa. Azken horrekin lotuta, irailaren 5ean, oso-osorik Arabatik igaroko den etapa izango dute ikusgai zaletuek. Izan ere, etapa Gasteizko erdigunetik atera eta Izkiko natura-parkera (Maeztu) iritsiko da.

Egutegia Gasteiz eta Araba kirol arloko gune gisa sendotuko duten beste ekitaldi batzuekin osatuko da. Horietako batzuk dira hauek: Parabadmintoneko Nazioarteko Txapelketa (apirila), VI Half Gasteiz distantzia ertaineko triatloi-txapelketa (ekaina), Eusko Bike Challenge (ekaina), Vitoria Cicloturista (ekaina), emakumezkoen Araba World Tennis Tour (ekaina), BLAN txirrindularitza-proba (iraila), Gasteiz Trail mendi-lasterketa (iraila), Orbea Gravel Arabako Errioxa (urria) eta Wine Run Arabako Errioxa (urria).

Sektorean duen inpaktua

Cristina Gonzálezek nabarmendu duenez, erakundeek, federazioek eta enpresa pribatuek elkarrekin egiten duten lanari esker, “turismo aktiboan eta kirol-turismoan erreferentzia gara eta Fiturrera profil hori sendotzeko asmoz iritsiko gara gure kirolari ezagunenetako batzuen laguntzarekin. Kirol-ekitaldiak (profesionalak eta amateur erakoak) Araba mailan ostalaritzarako, ostatuetarako, merkataritzarako eta enpresa turistikoetarako enplegu- eta jarduera-iturri esanguratsua dira”.

Ildo berean, María Nanclaresek adierazi du lanean jarraituko dutela Gasteiz eta Araba nazioarteko mapan kokatuko duten kirol-ekitaldiak babesteko. “Gure hiria eta lurraldea ezin hobeak dira kirola egiteko hemen bizi direnen zein bisitan datozenen kasuan. Beste erakargune bat dela esan dezakegu eta beste batzuei gehitu behar zaie: gure natura pribilegiatua, ondare zoragarria eta maila goreneko enogastronomia”. Arabako hiriburuak Fiturren aurkeztuko ditu erakargune horiek guztiak I love Vitoria-Gasteiz sustapen-kanpainaren eskutik.

Kirola-aurkezpena egin eta hurrengo egunean, urtarrilaren 25ean, ostegunean, Araba eta Gasteiz berriro bihurtuko dira protagonistak Turismoaren Nazioarteko Azokan. Egun horretan egingo den ekitaldian ezagutaraziko dituzte 2024an Gasteizen eta Arrabaren ‘enbaxadore’ turistikoak izango diren pertsonen izenak: telebista-munduari lotutako prestigio handiko profesionalak izango dira eta hasi berria dugun urtean hiriaren eta probintziaren erakargarritasun ugariak Estatu mailan hedatuko dituzte.

Ekitaldi horretan, gainera, beren programetarako Gasteiz eta Araba aukeratzen duten telebistako produkzio-etxeei aitortza berezia egingo diete. Izan ere, hiria eta lurraldea ezagutarazten laguntzen dute.

Cristina González diputatuak nabarmendu duenez, “Arabako sektorerako oso ona izan den urtearen ostean goaz Fiturrera. Izan ere, bidaiarien sarrerei eta kontratatutako gauei dagokienez historiako marka onenarekin itxiko dugu 2023a Estatuko eta nazioarteko merkatuek emandako bultzadari esker. Oraindik abenduko datuak zenbatzea falta da, baina urteko lehen hamaika hilabeteetan pilatutako datuak 2022 osoko kopuruak gainditzen ditu dagoeneko”.

“2023ko urtarriletik azarora bitarte, 510.000 bisitari baino gehiago jaso ditugu eta hoteletan, nekazaritza-turismoko establezimenduetan eta apartamentu turistikoetan kontratatutako gau kopurua milioi bat baino gehiagokoa izan da. Beste nolabait esanda, 2022ko aldi berean baino % 12 eta % 17 gehiago izan dira (hurrenez hurren) eta 2022 osokoa baino puntu batzuk gorago dago gainera. Gorakada horrek gure lurraldeko ostatuentzako, enpresa turistikoentzako, tabernentzako eta jatetxeentzako aberastasuna eta enplegua dakartza”, gehitu du.

Ostatuetako okupazio-tasak eta batez besteko egonaldiak ere igoera esanguratsuak izan dituzte.

Gasteizko Turismo zinegotziak, María Nanclaresek, bestalde, datu turistiko on horiek goraipatu nahi izan ditu. Izan ere, bere hitzetan, “bi erakundeek elkarrekin egindako lana bermatzen dute”. Gainera, hain emaitza onak izan dituen bide horretan aurrera jarraitzeko prest dagoela adierazi du.

Amaitzeko, Cristina Gonzálezek eta María Nanclaresek jakinarazi dute Fiturren bilerak egingo dituztela turismo arloko enpresekin eta agenteekin Gasteizko eta Arabako turismoa sustatu ahal izateko.