Prentsa Oharren banner

Alkateak gasteiztarren erantzuna eskertu du, “datorren urteko jaietarako gorde baitituzte indarrak”

Gorka Urtaranek erne jarraitzeko eta osasunaren arloko neurriak betetzeko eskatu du, birusa zabal ez dadin

 

Gorka Urtaran audioa

Egoera normala balitz Gasteizko jaiegun garrantzitsuenak liratekeenak igaro direlarik, Gorka Urtaran alkateak gasteiztar gehienei eskerrak eta zorionak emateko mezua zabaldu du gaur, “haien konpromisoarengatik eta erantzunagatik, eta indarrak gordetzeagatik, datorren urtean guztiok Andre Maria Zuriaren jairik onenak ospa ditzagun. Sentipen kontrajarriak izan ditugu egun hauetan. Hala ere, Gasteizen erantzuteko gai garela ikustearen harrotasunak sendatu du egun seinalatu hauetako tristura eta malenkonia. Aurten ez zen garaia, baina ziur nago ahaleginak merezi izan duela. Orain osasuna babestea da gure lehentasuna, eta Gasteizko gizarteak horren arabera jokatu du“.

Orobat, ostalaritza sektoreari eskerrak eta elkartasuna adierazi dizkie alkateak, egoerak gehien kaltetuetako batzuk baitira, eta “gure hirian pandemiak gogor jotako pertsona eta profesional orori. Udalak argi du zein diren hiriaren lehentasunak, osasuna babesteaz gain: tokiko ekonomia sustatu eta laguntzea, eta gizarte-ongizatea eta behar handiena duten pertsonentzako arreta bermatzea; helburu horiek lortzearren ari gara lanean, eta horretan jarraituko dugu“.

Gorka Urtaranek, halaber, “erne jarraitzeko” eskatu du. “Segurtasun-neurriak betetzen jarraitu behar dugu, birusa zabal ez dadin, maskara erabili, distantzia fisikoa gorde, jendetzak saihestu. Gogora dezagun ospitaleetan bizi izandakoa, gogora dezagun itxialdia. Ez dugu hori berriro bizi nahi “.

Alkateak Udaltzaingoaren zeregina ere nabarmendu du, aldi horretan Ertzaintzarekin koordinatu baita prebentzio-lanetan eta osasun-segurtasunari buruzko araudia betearazteko lanetan.

Udaltzaingoaren ohiko zerbitzuak indartu egin dira egun hauetan, eta agenteen presentzia handitu egin da, Ertzaintzaren eta Udaltzaingoaren arteko koordinaziorako aldez aurreko bileretan egindako aurreikuspenei erantzuteko. Kidego horiek lankidetza estua izan dute baterako dispositibo eta ekintza-plan operatibo guztietan.

Abuztuaren 4tik gaur arte 591 salaketa jarri dira Osasun sailburuaren agindua ez betetzeagatik, gehienak (517) maskara ez erabiltzeagatik.

“Ikusi dugu Gasteizko herritarrek arduraz eta zentzuz erantzun dutela egunotan, eta lankidetza horrek garrantzi handia du balantze honetan. Hiri osoan indarrean dagoen araudia betearazteko Ertzaintzarekin koordinatutako dispositibo prebentibo berezia arrakastatsua izan dela esan dezakegu”, adierazi du Marian Gutiérrez Herritarren Segurtasunerako zinegotziak.

Share

Udalak Zurbanoko ateko korridore berdea berreskuratuko du, barietate autoktonoak landatuz

Lurraldeko berezko zuhaitzak landatuz Salburuaren eta hiri-azpiegitura berdearen arteko konexio ekologikoa indartu nahi da

 

Udalak Zurbanoko ateko korridore berdea berreskuratu nahi du, kaleko erdibitzailean zeuden zuhaitzen ordez (makal beltzak gehienak) barietate autoktonoak landatuz.

Haritzak, aranondo gorriak (prunus cerasifera “pissardii”), lizarrak eta astigarrak aldatuko dira, espezie autoktonoak baliatuz hezeguneen korridoreari jarraitutasuna emateko.

Gasteiz hiri osoan 115.000 zuhaitz inguru daude, Eraztun Berdeko zuhaitzez gain. Kentzen den zuhaitz bakoitzeko (egoera txarrean dagoelako, zaharra delako edo beste arrazoiren batengatik) ale berriak jartzea da azken urteetako politika.

Zuhaitzak onuragarriak dira oso, gizarte osoarentzat eta ingurumenarentzat. Hori bai, konplexua da kudeaketa, eta planifikazioa eskatzen du. Hain zuen ere, Hiri Paisaiaren Atalean jardungo duen arbolazain profesional bat gehitu du Udalak aurtengo udan plantillara, zeinaren zereginen artean egongo baitira inausketen plangintza, zuhaitz-ordezkapenak, landaketak, ureztapenak, Hiriko Zuhaitzen Gida-planaren eta kudeaketa-planen jarraipena egitea, hiri-zuhaitzen arriskuen ebaluazioak egitea, hiriko zuhaitzen egoera fitosanitarioaren azterketak egitea, Hiriko Zuhaiztiak Kudeatu eta Babesteari buruzko Ordenantza berrikustea eta hiriko zuhaitzen inbentario digitala eguneratzea, besteak beste.

Nahikoa da begiratu azkarra ematea Espazio Publikoaren Zerbitzuak sustatutako azken proiektuei egiaztatzeko Udala zuhaitzez hornitutako kalitateko espazio publikoak diseinatzen ari dela. Askotariko adibideak ditugu: hiri-bilbean (Tornay Medikuaren kalean eta Salvador eta Peru kaleetan lerrokadura-zuhaitz berriak landatzea), auzoetan (azpiegitura berdearen barruko proiektuak, Gasteiz Hobetuz programan sartutakoak), hiri inguruko parkeetan (Olarizuko lorategi botanikoa, Nebera gaina, Jundiz), eta abar.

Gainera, zuhaixka autoktono ugari landatu dira azken hilabeteetan, hegazti eta intsektuen biodibertsitateari mesede egiten diotenak, eta korridore ekologiko gisa balio dutenak. Anfibioentzako putzuak ere egin dira, Zabalganean, Ekialdeko parkean…

2016tik, 6.108 zuhaitz landatu dira Gasteizen, guztira 2.251 aleko saldo positiboarekin.

Aleak kentzea Don Bela Kondearen kalean

Bestetik,  urki eta makal ale batzuk kenduko ditu Don Bela Kondearen kalean, seneszentzia goiztiarrak jota daudenez tranbiaren katenariari kalte egin baitiezaiokete. Zuhaitzak mozten diren beste batzuetan bezala, ale horiek aurrerago ordezteko asmoa du Udalak.

Share

San Prudentzio zentro integraleko erabiltzaileek bertako lorategietatik paseatu ahalko dute

Bakarrik haiek erabiltzeko ordutegia ezarriko da, 10:00etatik 13:00etara zein 17:30etik 20:00etara.

 

Adinekoei laguntzeko San Prudentzio zentro integraleko erabiltzaileek eta haien senideek bertako lorategietatik paseatu ahalko dute gaurtik aurrera.

Osasun krisia dela eta, egoiliarrak ezin dira bertatik irten, eta familientzako bisitak eraikinaren barruan egin behar ziren. “Zenbait aste daramagu gaur martxan jarri dugun neurri hori lantzen. Gure helburua erabiltzaileen eta haien senideen ongizatea handitzea da, izugarri sufritu baitituzte pandemiaren ondorioak“, azpimarratu du Gizarte Politiken, Adinekoen eta Haurren zinegotzi Jon Armentiak.

Bakarrik egoiliarrek eta haien senideek erabili ahalko dute lorategia, 10:00etatik 13:00etara zein 17:30etik 20:00etara.

San Prudentzio ALZI

Adinekoei laguntzeko San Prudentzio zentro integralak hainbat baliabide hartzen ditu: egoitza, eguneko zentroa, jantokia eta zentro soziokulturala. Sukalde eta ikuztegi zerbitzuak ere baditu, San Prudentzio ALZIrako zein beste udal baliabide batzuetarako.

Egoitza —2. eta 3. mendekotasun-gradua duten pertsonentzat— eta eguneko zentroa —1. mendekotasun-gradua dutenentzat— foru eskumenekoak dira 2017ko urtarrilaren 1az geroztik.

Gasteizko Udalak kudeatzen ditu baliabide horiek, Arabako Foru Aldundiarekiko hitzarmen baten bidez, eta hura arduratzen da finantzaketaz eta lekuak esleitzeaz.

 

 

Share

Udaltzaingoak eta Ertzaintzak Andre Maria Zuriaren plazara sartzea mugatuko dute igandean, abuztuak 9

 

Segurtasun indarrek prebentzio-antolaketari eutsiko diote, hiri osoan araudia betearazteko

 

Abuztuaren 9ko gauean, Udaltzaingoak eta Ertzaintzak 11 kontrol jarriko dituzte Andre Maria Zuriaren plazan eta inguruetan, Zeledonen igoera ospatu ohi den espazio horietara sarbidea mugatzeko antolatutako dispositibo berezi baten barruan. Izan ere, aurten ez horrelakorik izango, pandemia dela eta.

Igandean, abuztuak 9, 23:00etatik 1:30era, sarbidea mugatuko da kale eta plaza hauetan: Prado, Diputazioa, Errementari, Zapatari, Hedegile, Mateo Moraza, Espainia plaza, Posta kalea eta Loma Jeneralaren plaza. San Migeleko balkoira ere ezingo da sartu, ezta Arkupeetatik ere. Andre Maria Zuriaren plaza hesituko da hartara.

“Gasteiztarrek erantzukizunez eta zentzuz erantzun dute egun hauetan. Hilaren 4ko antolaketaren helburu nagusia zen jendetzak eragoztea, eta lortu genuen. Igandean prebentzio-neurriak hartuko ditugu berriro, osasun publikoaren arazo baten aurrean gaudelako“, adierazi du Herritarren Segurtasunaren zinegotzi Marian Gutiérrezek.

Autobusek, taxiek, larrialdietako ibilgailuek eta garajeetan sartzeko edo irteteko baimena duten ibilgailuek bakarrik zirkulatu ahalko dute mugatutako eremuan barrena, eta bertako bizilagunek sartu eta atera ahalko dute oinez. Orobat, sarrera mugatuko eremuaren barruko etxebizitzetatik irteten utziko da, edo irekita dauden ostalaritza-establezimenduetatik.

Ostalaritza-establezimenduetan daudenek nahi dutenean atera ahalko dute bertatik, agenteen jarraibideei kasu eginez. Debekua ezarrita dagoen ordutegian (23:00etatik 01:30era), plazako ostalaritza-establezimenduak irekita egon ahalko dira; mahaitxoak 23:30era arte eduki ahalko dituzte, eta husteko ordu erdiko tartea izango dute (00:00), baita jasotzeko ere (00:30era arte).

Mugatutako zonatik kanpo ere, hilaren 4an Andre Maria Zuriaren plazaren inguruan eta hiriko beste hainbat tokitan abian jarritako dispositibo bereziari eutsiko diote Udaltzaingoak eta Ertzaintzak, pilaketak eta kale-zurrutak saihesteko. Maskararen erabilera ere kontrolatuko da, koronabirusaren hedapena saihesteko.

 

Share

Tuvisaren 2B lineado Aragón/Residencia geltokia ez da aktibo egongo abuztuaren 10etik irailaren 22ra arte

 

BEI Autobus Elektriko Iraunkorraren obrek abuztuan jarraituko dute aurrera, eta, lan horiek garatu behar direnez, TUVISAk, ezinbestean, 2B Lineako Aragón/Residencia geltokia itxi beharko du aldi baterako, abuztuaren 10etik irailaren 22ra arte.

Geltoki horren erabiltzaileek 2 geltoki hurbilenetara jo dezakete zerbitzura iristeko, Madril kalearen eta Arantzabelaren arteko bidegurutzean eta Jacinto Benavente kaleko 7an.

Nahi duenak www.bei.eus webgunean kontsulta ditzake BEIri eta hura ezartzeko lanei buruzko berritasun guztiak.

Share

Superetxadien seinaleztapen sinbolikoa jartzen hasi dira Judimendiko Trebiñuko Konderriaren kalean eta Miranda de Ebro kalean

 

Judimendi izango da Gasteizko superetxadiak zedarritzeko seinaleztapen sinboliko berria estreinatzen duen bigarren auzoa. Gaur hasi dira margotze eta seinaleztapen lanak Trebiñuko Konderriaren kalean eta Miranda de Ebro kalean, eta egun gutxi barru amaituko.

Gasteizko Udalak hiriko superetxadiak seinaleztatzeari ekin dio abuztuan, Mugikortasunaren eta Espazio Publikoaren Plana eta Orain Gasteiz Plana betez, eta horretarako diseinu berritzailea eta apurtzailea erabiliko du. Alkateak aurreratu zuenez, “eguzki-lorea gure etxeak babesteko sinboloa da. Hartara, segurua izateaz gain, gure etxea ere baden espazio publiko bat sustatzen dugu, bertatik ibili ez ezik, horretaz gozatu ere egingo baitugu“, Gorka Urtaranen azalpenetan.

Mugikortasunaren eta Espazio Publikoaren Sailak era sinbolikoan seinaleztatu nahi ditu Mugikortasun Planaren barruan identifikatutako superetxadiak. Alkateak nabarmendu zuenez, “filosofia argia da: herritarrentzako espazioak zabalduko ditugu, distantzia soziala bermatuz, gure merkataritzari eta ostalaritzari lagunduz eta desplazamendu aktiboak lehenetsiz, hau da, oinez eta bizikletazMugikortasunaren alorrean nazioarteko erreferentea gara, eta izaten jarraituko dugu. Pandemiaren osteko agertokian, espazio publikorako neurri eta konfigurazio berriak aplikatzeko garaia da “.

Diseinua deigarria da, Veronica Werckmeister artistak sortutako eguzki-lore batzuk marraztuko baitira: elementu horiek gune babestu batera sartzen dela sinbolizatzen dute, oinez ibiltzeko, jolasteko eta gozatzeko gune batera. Orobat, 90 zentimetroko altuerako seinaleak jarriko dira, landarearen marrazkiez, baita S28 seinalea ere, oinezkoentzako lehentasun-eremu bat dela adierazten duen testuarekin batera. Diseinu berriaren ezaugarririk deigarrienetako bat zebrabide ‘asimetriko’ moduko bat da, oinezkoentzako lehentasunezko espazioa dela gogorarazteko. Bide-marra horiek hainbat neurri izango dituzte, eta piktograma berriek indartuko dituzte, beste erabilera batzuk sustatzeko: haurrak jolasean, bizikletak…

Share

Arabako Foru Aldundiak eta Gasteizko Udalak bisoi europarraren beste kumaldi bat askatu dute Salburuan

Kontserbazio lanei eta tranpak jartzeko kanpainei esker, esan daiteke Araban ez dagoela bisoi amerikarrik, zeina espezie inbaditzailea eta bertako espeziearen mehatxu nagusia baita

Arabako Foru Aldundiak, Gasteizko Udalarekin lankidetzan, bisoi europarraren beste kumaldi bat askatu du Salburuan, gaur goizean. Ama bat eta hiru kume dira, itxian haziak espezie horren hazkuntza programaren barruan, gure lurraldean duen populazioa indartzea xede duen ekimen batean.

Bisoi europarra ‘egoera kritikoan’ katalogatuta dago, haren lehiakide handia den bisoi amerikarraren mehatxuaren aurrean. 1998. urteaz geroztik, bi erakundeak lankidetzan ari dira kontrol lanak egiten, espezie exotiko inbaditzaile hori naturan ugaltzen ari zela detektatu zenetik. Hala ere, espezie hori kontserbatzeko lanei eta tranpak jartzeko kanpaina arrakastatsuari esker, bisoi amerikarrik gabeko lurraldetzat jo daiteke Araba, dagoeneko.

“Ez dugu bisoi amerikarrik aurkitu 2019. urtearen hasieraz geroztik, eta horrek erakusten du kontserbazio lana funtzionatzen ari dela”, adierazi du Josean Galera Ingurumen eta Hirigintza Saileko foru diputatuak, eta pozik agertu da egindako urratsengatik eta bisoi europarrak egoera “egonkorra” duelako, “egoera kritikoan dagoen espeziea” kalifikazioaren barruan.

Ingurumen Plangintza eta Kudeaketako zinegotzi César Fernández de Landaren hitzetan, bisoi europarra “Gasteizko Eraztun Berdeko harribitxia da”. Laurogeita hamarreko hamarkadan Salburuak zuen bisoi europarren dentsitate handienetakoa, baina bisoi amerikarra bertan lekutu izanak desagertzeko zorian utzi zuen. Geroztik, ahalegin handia egin da espezie enblematiko hori babesten, eta azken urteetan Life Lutreola proiektu europarra nabarmendu da, zeinean Udala, Aldundia, beste administrazio batzuk, entitate pribatuak eta GKEak inplikatu baiti

 

Share

Udalak egoiliarrek bakarrik erabiltzekoak diren TAO eremuak mugatu ditu, marra berde-gorriz

Neurriak aparkaleku-eremuak identifikatzen laguntzeko xedea du: aldizkatzeko lekuak, urdinez; maiz aldizkatzekoak, laranjaz; egoiliarrentzako eta aldizkatzeko lekuak, berdez, eta bakarrik egoiliarrentzakoak, berde-gorriz

 

Mugikortasunaren eta Espazio Publikoaren Sailak egoiliarrek bakarrik erabiltzekoak diren TAO aparkaleku-eremuak mugatzeari ekin dio, marra berde-gorriz. Neurri horren xedea da eremu horiek identifikatzen laguntzea, oraingo sistema (marra berdea + seinaleztapen bertikala) nahasgarria gertatzen baitzen erabiltzaileentzat, bai egoiliarrek bai kanpokoek —ordu-txartela jarrita— aparkatzeko baliatu ditzaketen lekuak zirela uste izaten baitzuten.

Ordenantza aplikazio mugikorraren bidez ordaintzeko aukera sartzeko aldatu behar zela baliatuz, leku horiek seinaleztatzeko modua ere aldatu zen, eta marra berde-gorriz bereiziko dira aurrerantzean.

Neurri horrek munta gutxiko kaleei edo tarteei eragiten die oro har, baita Hirigune Historikoari ere, oso-osorik erreserbatuta baitago egoiliarrentzat.

Kale hauetan jarriko da seinaleztapen berria: La Paloma (Prudencio Maria Berastegi eta Esperantza kaleetako zatiak), Salvador Garcia del Diestro, Mantelitarrak, Beethoven, Diego Martinez de Alaba, Manuel Iradier kalearen azken zatia (Duende pasabidearen ondoan) eta Vicente Goikoetxea. Hirigune Historikoan Kanpokale Berria eta Aska kalea baino ez dira margotuko, beste kaleetan seinaleztapen bertikala jarriko baita.

TAO aparkaleku motak koloreen arabera:

Urdina: tarifa arrunta.

Berdea: egoiliarrak eta aldizkatzekoak.

Gorria eta berdea:  egoiliarrak bakarrik.

Laranja: maiz aldizkatzekoak.

Informazio gehiago: Lurrazaleko aparkaldi mugatuko zerbitzua (TAO) arautzen duen ordenantza 

Share

“Aurten ez” kanpainaren protagonistek indar guztiak 2021eko jaietarako gordetzeko eskatu diete herritarrei

Alkateak, Vital Fundazioko presidenteak eta aurten jaiak ez direla ospatuko dioen mezuari aurpegia jarri dioten pertsonek segurtasun neurriak zorrozteko eskatu dute

 

Gasteizko Udalak eta Vital Fundazioak landu duten “Aurten ez” kanpainako protagonistek  indar guztiak 2021eko jaietarako gordetzeko eskatu diete herritarrei; hain zuzen ere, kontzientziaziorako deia egitea eta datozen egunetan jendearen elkarretaratzeak saihestea da kanpainaren helburua.

 

Andre Maria Zuriaren plazako landarezko eskulturan egin  da ekitaldia, zeinean hauek hartu baitute parte: Gorka Urtaran alkatea, Estibaliz Canto Kultura zinegotzia, Jon Urresti Vital Fundazioko presidentea, Lorena Garro medikua, Joel Andujar erizaina, Luis Tamayo Andre Maria Zuriaren Kofradiako kidea, Edurne-Neska txiki (Maite Salazar) eta Zeledon (Gorka Ortiz de Urbina). Datozen egunetan segurtasun neurriak zorrozteko eskatu dute denek.

Medikuak azpimarratu duenez, “denok behar dugu elkar, horregatik da oso garrantzitsua maskara erabiltzea, eskuak maiz garbitzea eta distantzia soziala mantentzea“. Erizainak, bestetik, hau adierazi du: “jaiak ospatzen ditugunean eredu garen bezala, aurten ere hala izan behar dugu segurtasun neurriak betetzean, birusa ez zabaltzeko. Ezin ditugu biktimak ahaztu, ospitaleetan bizi izan dena eta etxean itxita egon garen denbora”.

Kofradiako ordezkariak adierazi duenez, herritar guztiek sentitzen dute jaiak ezin ospatzea, baina “aurten horrela da, ezin dugulako arriskurik hartu. Arduratsuak izan behar dugu eta geure burua zaindu, besteak zaindu ahal izateko “.

Edurne-Neska txikik azpimarratu du aurten “beste modu batera ospatu” behar direla jaiak, “bihotzean eta etxean“. Hala ere, jendea triste ez egoteko eskatu du, eta datorren urtean gogo handiagoz ospatzeko deia egin du. Zeledonen hitzetan, “urtero eskatzen diet laguntza gasteiztarrei hilaren 4an arratsaldeko 6etan plaza zeharkatzeko, eta aurten besteengan pentsatzeko eskatzen dut, geure buruarengan baino gehiago. Oso garrantzitsua da datorren urtean festetan inork huts ez egitea, eta horretarako aurten zaindu behar dugu”.

Alkateak kontzientziazioaren garrantzia azpimarratu du, eta Vital Fundazioko presidenteak, berriz, pertsona bakoitzaren esku dagoela mezu horren arrakasta. “Gure ardura da, eta datorren urteko jaietarako 366 egun baino ez direla geratzen pentsatu behar dugu“, gaineratu du.

Gaur goizean, halaber, “Aurten ez-Este año no toca” leloa duen pankarta bat jarri dute San Migeleko balkoian. Abuztuaren 10era arte egongo da jarrita, Andre Maria Zuriaren plazatik pasatzen diren guztientzat oroigarri gisa.

 

 

Share

Udako kanpaina: edukiera handitu eta ostegunetik txirrista batzuk irekiko dira

Gaurtik aurrera Mendizorrotzako eta Gamarrako igerilekuetako gehieneko edukiera handitu egingo da. Hala, Mendizorrotzako instalazioetako gehieneko edukiera 3.000 pertsonakoa izango da, eta Gamarrako parkekoa 3.400 pertsonakoa, 2.900 abonatuak eta 500 ez abonatua; edukiera horiek txanda bakoitzekoak dira.

Halaber, hilaren 6tik aurrera, txirrista zuriak, haurrentzako igerilekuetakoak eta perretxikoak irekiko dituzte. Mendiren eta Gamarraren hodi itxiak (beltzak) eta Aquamendiren jacuzziak itxita egongo dira kanpaina osoan zehar.

2020ko uda, gizarte-etxe eta kirol-instalazioetan

Share