Prentsa Oharren banner

Atxilotua espetxean sartzeko bi errekisitoria judizialen zain

Udaltzaingoak 30 urteko gizonezko bat atxilotu zuen atzo. Espetxean sartzeko bi errekisitoria judizial zituen bere kargura.

Udaltzainek Paraguay kalean atxilotu zuten, Arriagako Atea kaleko merkataritza gune batean hainbat produktu lapurtu ostean. Dokumentazioa egiaztatu ostean konturatu ziren espetxean sartzeko bi agindu zituela gauzatu gabe eta agindu horiek exekutatzeari ekin zioten.

Share

Saltoki batean lapurtzen saiatzeagatik atxilotuta

Udaltzaingoak 25 urteko gizonezko bat jarri du gaur epailearen aurrean. Gizonezkoa atzo atxilotu zuten udaltzainek San Martin plazako saltoki batean indarkeria erabiliz saiakuntza graduan lapurreta-delituaren ustezko egilea zelakoan.

Saltokiko jabeak Udaltzaingoari jakinarazi zion bere establezimenduko burdin sarean, sarrerako atean eta zaintza-kameran kalteak zeudelako. Irudiak berrikusi ostean, udaltzainek ustezko egileetako bat topatu zuten Mediterraneoaren hiribidean.

Susmagarriak zalantzazko jatorria zuten bi mugikor zeramatzan. Gainera, ez zuen helbide ezagunik eta guztia gertatu zen orduan non zegoen galdetu ziotenean ez zuen azalpen koherenterik eman. Ondorioz, atxilotu egin zuten.

Txirrindulari bat larri zaurituta

Atestatuen taldea gaur goizeko 06:45ean Zaramaga kaleko merkataritzagune baten parean gertatu den istripuaren nondik norakoak ikertzen ari da. Istripua auto eta bizikleta banaren artean gertatu da eta txirrindularia, 31 urtekoa, larri zauritu da (iturri medikoen arabera). Ondorioz, Santiago ositalera eraman dute anbulantzian eta han ospitaleratuta geratu da.

 

Share

Atxilotua indarkeria erabiliz lapurreta egiteagatik

Udaltzaingoak 25 urteko gizonezko bat atxilotu zuen atzo Domingo Beltran kaleko establezimendu komertzial batean indarkeria erabiliz ustez lapurreta-delitua egiteagatik. Saltokitik hainbat botila olio lapurtu zuen. Establezimenduko segurtasuneko zaindariak kalean harrapatu zuen eta une hartan borroka gertatu zen. Haren ondorioz, zaindariak zauri arinak jasan zituen. Hala ere, lortu zuen polizia-patruila iritsi arte geldiaraztea eta atxikitzea.

38 urteko gizonezko bat atxilotu zuten atzo gidatzen ari zen bizikletaren jatorria ikertu nahian Udaltzaingoa egiten ari zen esku-hartzean udaltzainetako bati eraso egiteagatik. Patruila batek gelditzeko agindu zion Batxikabo kalean eta, galdekatzen zuten bitartean, ihes egiten saiatu zen ukabilkada bat emanez. Kolpeak udaltzainetako bat jo zuen eta, ondorioz, atxilotu egin zuten.

Udaltzainek atzo Donostiako epaitegi bateko errekisitoria judiziala zuen 56 urteko gizonezko bat atxilotu zuten. Agirrelandako polizia-etxean gertatu zen atxiloketa, udal-gordailuan zuen autoa ateratzeko asmoz joan zenean.

 

Share

Atxilotu bat giza hilketaren saiakuntza dela eta

21 urteko gazte bat atxilotu zuten atzo goizaldean udaltzainek arma zuriarekin egindako mehatxu-delituaren ustezko egilea izateagatik.

03:50ean dei bat jaso zuten Herrandarren kalean eraso bat gertatu zela esanez. Zaurituak, bularrean zauriak zituenez, Santiago Erietxeko larrialdietan jaso zuen laguntza.

Udaltzaingoko agenteek bi lagunekin izan zuten elkarrizketa eta adierazi zuten ustezko erasotzailea hurbileko atari batean sartu zela. Hainbat gestio egin ostean, erasotzailea egon zitekeen etxebizitza topatu zuten. Etxebizitzaren titularrak zabaldu zien atea eta esan zien zer logelatan zegoen susmagarria. Logelatik ateratzeko esan zioten.

Logelatik atera zenean, ustezko erasotzaileak odol-arrastoak zituen elastikoan eta eraso batetik defendatu egin zela adierazi zien udaltzainei. Atxilotu eta Agirrelandara eraman zuten.

Udaltzaingoak ondoren bere logelan egindako erregistroan 7 zentimetroko labana aurkitu zuen ohean, baita ustezko odol-arrastoak ere.

Miaketan, udaltzainek marihuana hazteko bi negutegi landu gisa prestatutako bi instalazio topatu zituzten etxearen barnealdean, bere aireztapen- eta argiteria-sistemekin.

Era berean, sukaldeko gainaren azpian, landatzeko material desberdinekin, hainbat plastikozko ontzi handi topatu zituzten, eta etxebizitzaren sarreran, marihuana usain handia botatzen zuen kaxa bat.

Zegozkien kudeaketak egin ostean, hauek atzeman zituzten:

  • 700 marihuana-kukulu inguru. Kopuru horretan, bakoitzean 2 gramoko 24 monodosi barne, zilarrezko paperean bilduta, txikizka saltzeko prest.
  • Argiteriak, aire-erauzgailua, karbono aktiboko iragazkiak, hezegailuak, higrometroak, pH neurgailua.

Hori dela eta, 20 urteko gaztea atxilotu egin zuten osasun publikoaren kontrako delituaren egile gisa.

Polizia-eginbideak amaitu zirenean, erietxeko alta jaso zuen erasoaren biktimaren salaketa egiteke zegoen. Gertakariak eta erasoaren arrazoiak eta egoerak argitzeko kudeaketek martxan jarraitzen dute oraindik.

Marihuana landatzea eta erasoa

Udaltzainek larunbatean 43 eta 47 urteko bi gizonezko atxilotu zituzten agintaritza-agenteei ustez marihuana landatzeagatik eta eraso egiteagatik, eta droga-trafikoagatik, hurrenez hurren.

Gertakariak 10:30 inguruan izan ziren, 092ak jasotako dei batek El Pilar auzoko etxebizitza poliziaren presentzia eskatu zuenean. Izan ere, gizonezko bati eraso egin zion pisukideak.

Tokira joan zirenean, eta bertakoekin hitz egiten ari zirela, agenteek marihuana-usain handia detektatu zuten eta zenbait kable ikusi zituzten korridorean, logeletarantz. Egindako ikuskapenean, marihuana-landaketa topatu zuten. Erasoa jasan zuenak agenteei aitortu zien berea zela, beraz, atxilotu egin zuten. Agirrelandako bulegoetara eraman aurretik, ospitalera eraman zuten, lesioak senda ziezazkioten. Gero aske geratu zen.

Bestalde, ustezko erasotzailea atxilotu egin zuten, sortutako lesioengatik eta droga-trafikoagatik. Esku-hartzean makila bat topatu zioten, ustez pisukideari eraso egiteko erabili zuena. Horrez gain, hiru poltsa gordetzen zituen metalezko kaxa bat ere topatu zioten, barruan kolore zuriko substantzia pikorduna zuten hiru poltsek.

Atxilotua sexu-abusuagatik

Udaltzainek 29 urteko gizonezko bat atxilotu zuten atzo goizean emakume bati onarpenik gabeko ukituak egiteagatik sexu-abusu baten ustezko egilea izateagatik.

Gertakariak 08:15 inguruan jazo ziren Frantzia kalean, borroka baten baitan. Gizonezko batek emakume bati ipurdian haren onarpenik gabe ukituak egin zizkionean, emakumearen lagun batek emakumea defendatzeko esku hartu zuenean hasi zen dena. Ondorioz, udaltzainek atxilotu egin zuten eta gaur goizean epailearen esku geratu da.

Genero-indarkeria

Udaltzainek 24 urteko gizonezko bat atxilotu zuten larunbat goizaldean bikotekidearen aurkako eraso-delituaren ustezko egilea zelakoan.

Guztia 03:30 aldean gertatu zen, Koordinazio Zentralak patruila bati Herrandarren kalera joateko eskatu zionean; bertan, emakume batek etxetik ihes egin baitzuen, bikotekideak eraso egin ziolako.

Udaltzainek etxeraino lagundu zioten biktimari, Zaramagara, eta bertan, ustezko erasotzailearekin hitz egin zuten; hark eztabaida izan zutela soilik onartu zuen.

Emakumeak markak zituen besoan eta lepoan, beraz, emandako azalpenak eta lesioak ikusita, udaltzainek gizonezkoa atxilotu egin zuten eta larunbat goizean geratu zen epailearen esku.

Emakumea ospitale batera eraman dute lesioak senda diezazkioten.

Udaltzainen aurkako atentatuak

Hiru pertsona atxilotu ditu Udaltzaingoak asteburuan agintaritza-agenteen aurkako atentatu-delituak egiteagatik.

Atzo 52 urteko emakume bat atxilotu zuten, San Prudentzio kaleko ostalaritza-establezimendu batean arazoak sortu baitzituen eta identifikatzeari uko egin ondoren esku hartu zuten agenteen aurka egin baitzuen.

Ostiralean, 22 urteko gazte bat atxilotu zuten, Dato kaleko saltoki batean lapurtutako kreditu-txartela erabiltzearen susmagarri zelakoan gelditzeko eskatu zion agentearen aurka egiteagatik. Atxilotutako unean, hogei tabako-pakete, ONCEko 30 txartel eta telefono mugikor bat atzeman zizkioten.

Gertakariaren inguruan abiatutako ikerketaren ondorioz, udaltzainek 27 urteko beste gazte bat atxilotu zuten ostiralean bertan, txartelaren lapurretan eta erabileran ustez inplikatuta egoteagatik. Susmagarria ihes egiten saiatu zen eta atzetik zuen agente bati eraso egin zion, beraz, atxilotu egin zuten. Florida kaleko establezimendu batean lapurtutako telefono mugikorra atzeman zioten.

Errekisitoria judiziala

Udaltzainek larunbatean 26 urteko gizonezko bat atxilotu zuten, bilatzeko, atxilotzeko eta epaitegi baten aurrean agertzeko agindua zuelako.

Share

Urruntze-agindua hausteagatik atxilotua

Udaltzainek atzo 45 urteko gizonezko bat atxilotu zuten etxeko indarkeriarekin lotutako kondena urratu izanaren delituaren ustezko egilea izanagatik.

Gizonezkoa ama eta anaia zeuden Zaramagako etxebizitza batera joan zen. Pertsona haiekiko urruntze-agindua zuenez, atxilotu egin zuten.

Deskuiduen kontrol-kanpaina

Udaltzaingoak, irailaren 22ra bitartean, gidatzeko garaian tresnak eta gailuak (musika-kaskoak, GPS gailuak eta, batez ere, telefonia mugikorreko gailuak) erabiltzearekin lotutako kontrol-kanpaina egingo du.

Kanpaina hori 2018-2023 Bide Segurtasuneko Udal Plan Estrategikoan jasotako zaintza- eta kontrol-ekintzen baitan sartu behar da.

 

Share

Atxilotua udaltzain bat jotzeagatik

Udaltzainek atzo arratsaldean 52 urteko gizonezkoa atxilotu zuten agintaritza-agenteen aurkako atentatuaren delituaren ustezko egilea izateagatik. Atxilotua Adriano VI.aren kalean bizikleta gidatzen ari zen modu arduragabean. Bertan, ibilgailuen zirkulazioko bideak ustekabean hartu zituen eta, ondorioz, bideko erabiltzaileei arriskua eragin.

Udaltzaingoko patruila batek ikusi zuen gertatutakoa, eta gelditzeko agindu. Une hartan, ihes egiten saiatu zen, baina ez zuen lortu eta handik metro  batzuetara harrapatu zuten.

Udaltzainak esku hartzen ari ziren bitartean, gizonezkoak berriro ere galtzada hartu eta ihes egiten saiatu zen. Une hartan, udaltzainetako bat kolpatu eta bultza egin zion eta, ondorioz, atxilotu eta Agirrelandara eraman zuten.

 

Share

Koroatzearen kalean heroina-trafikoagatik atxilotuta

Udaltzaingoak 56 urteko gizonezko bat atxilotu du heroina-trafikoarekin lotutako osasun publikoaren aurkako delituaren ustezko egilea izateagatik.

Udaltzainek atzo, asteleheneko, 11:15ean atxilotu zuten Aldabe eta Kutxa kaleen arteko elkargunean irailaren hasieran Agirrelandako Ikerketa Unitateak hasitako operatiboaren ondorioz. Koroatzearen auzoan droga saltzen ari zela susmatu ondoren jarri zuten operatiboa martxan.

Operatiboaz arduratu ziren udaltzainek detektatu zutenez, susmagarria ostalaritza-establezimendu baten inguruan mugitzen zen eta, ondorioz, jarraipena egin zioten. Zaintza haren ondorioz, lokal inguruan, errezelorik ez sortzeko droga-transakzioak bizkor egiten zituela egiaztatu zuten.

Heroina zela baieztatu ondoren, udaltzainek gizonezkoa atxilotu zuten.  Handik ordu batzuetara, haren etxebizitza erregistratu eta 250 gramo heroina inguru eta 1.200 euro baino zertxobait gehiago topatu zituzten. Bestalde, droga prestatzeko eta saltzeko hainbat material ere aurkitu zuten: doitasun-baskula eta hainbat telefono mugikor besteak beste.

Atxilotua gaur goizean jarri dute epailearen esku.

Mozkortuta patinete gainean

 Patinete-gidari batek 1.000 €-ko zigorra jaso dezake alkoholemia-proban emaitza positiboak eman ondoren. Bart goizaldean istripua izan ondoren egin diote proba eta botatako aire-litro bakoitzeko 0,89-0,92 miligramoko alkohol-tasak erregistratu ditu.

Gidaria 29 urteko gizonezko bat da eta Orio kaleko zintarri baten aurka talka egin du. Horren ondorioz, lesioak jasan ditu eta Txagorritxu ospitalera eraman behar izan dute.

Udaltzaingoak gogorarazi duenez, indarrean dagoen araudiaren arabera, eta auto-gidariak eta txirrindulariak bezalaxe, MPI gidariak ere alkoholemia-kontrolak egitera derrigortuta daude.

Share

Atxilotua bikotekideari eraso egiteagatik

Udaltzainek 24 urteko gazte bat atxilotu zuten larunbatean ustez bere bikotekideari eraso egiteagatik. Emakumeak 05:30ean poliziaren laguntza eskatu zuen Alde Zaharreko bere etxebizitzan. Udaltzainei azaldu zienez, bikotekideak aurpegian eta lepoan kolpatu zuen.

Gizonezkoa ere etxean zegoen eta, eztabaida batean, bikotekideari bultza egin ziola azaldu zien. Bien adierazpenak eta emakumearen markak ikusita, gizonezkoa atxilotu eta epailearen aurrera eraman zuten.

Hiru edukiontzi sutan

 Suhiltzaileek igandeko goizalean Herrandarren kalean eta Hiru Probintzien plazan su hartu zuten hiru edukiontzi itzali behar izan zituzten.

Share