Prentsa Oharren banner

Gervasio Sanchez erreportari grafikoaren “Saharari begira” erakusketa hartuko du Montehermosok. 

  • Ostegunean inauguratuko da, eta urriaren 7an, bisita gidatua egingo du egileak berak.

 

Montehermoso kulturuneak “Saharari begira” argazki erakusketa hartuko du ostegunetik aurrera; Gervasio Sánchez erreportari grafiko ospetsuaren lana. Erdi Aroko hiriguneko jauregiko Jovellanos aretoan izango da ikusgai, Gasteizko Udalaren Garapenean Laguntzeko Zerbitzuari esker.

Gervasio Sánchez planetako hainbat lurraldetan aritu da prentsa-argazkilari, eta bertatik bertara bizi izan ditu guda eta istiluak. Erakusketa honetan, 2016an Tindufeko eta Mendebaldeko Saharako errefuxiatu-eremuetan ateratako hogeita hamar argazki eta ikus-entzunezko bat aurkezten dizkigu.

Errefuxiatu-eremuetako egunerokoa islatzen da argazkietan. Hirurogeita hamarreko hamarkadatik hona pertsonen kontrako minen biktimen izan diren senitartekoen erretratuak edo heziketa bereziko zentroko haurren erretratuak dira.

Pandemiak areagotu egin du errefuxiatu-eremuetako egoera humanitarioa, eta zaildu egin du nazioarteko laguntza iristea, eta. bigarren aldiz, “Oporrak bakean” programa egitea. Programa honen bitartez errefuxiatu-eremuetan bizi diren Saharar adingabeek udako bi hilabete ematen dituzte Arabako familiekin.

Urriaren 24ra arte izango da ikusgai.

Urriaren 7an, kazetariak berak bisita gidatua egingo du erakusketan. Doan izango da, baina aldez aurretik izena eman behar da Montehermoso kulturunean edo 945161830 telefonora deitu.

 

Share

Miriam Isasik ‘Tósigo’ erakusketa aurkeztu du Montehermoso kulturunean

Irailaren 21era arte izango da ikusgai lehen solairuko aretoan

 

Miriam Isasiren ‘Tósigo’ erakusketa aurkeztu dute Montehermoso kulturunean. Gaurtik, irailak 24, azaroaren 21era bitartean izango da ikusgai lehen solairuko aretoan. Hezkuntza eta Kultura zuzendari Paco Galvek eta erakusketaren egile Miriam Isasik hartu dute parte prentsaurrekoan. 

2020ko deialdian hautatutako lau proiektu artistikoetatik laugarrena da ‘Tósigo’.

Prestameroren Herbario Historikoa oinarritzat hartuz egindako dokumentazio eta artxibatze lan baten bidez, landare toxikoenetako batzuen testuingurura hurbildu da artista.

“‘Tósigo’ erakusketan hainbat landare toxikoren mitologian, historian eta herri-imajinarioan oinarritutako kontakizunak biltzen dira, pozoia biziraupenerako, botererako eta jendea mendean hartzeko tresna nola erabili izan den erakusteko“, azaldu du Galvek.

Egilea

Miriam Isasi Arce Arte Ederretan doktorea da Euskal Herriko Unibertsitatetik, eta Mexiko hiriko UNAMen egin zuen nazioarteko egonaldia.

Prozesuen eta esperimentazioaren arteko zubiak sortzea da haren lanaren ardatza. Haren proiektuak leku jakinetan definitzen dira, horietan ekintzatik esku hartzen baitu. Lurraldea bera eta lurraldearen berezitasunak etengabeak dira haren lanean.

Zenbait artistak emandako lantegi eta mintegietan hartu du parte: Antoni Muntadas, Francesc Torres eta Isidoro Valcárcel Medina, besteak beste.

Aipatutako ikasketa akademikoez gain, hainbat erakunderen sostengua eta dirulaguntzak jaso ditu proiektu eta erakusketetarako: Eusko Jaurlaritza; Bizkaiko Foru Aldundia; Bilboko, Gasteizko eta Basauriko udalak; Bilbao Ekintza; Ikertu; Azkuna Zentroa; Montehermoso kulturunea; Tabakalera; Etxepare euskal institutua; Juan eta Pablo Otaola beka (Basauri); Bilbaoarte fundazioa; Cristina Enea fundazioa; MAEC-AECID (Erromako Espainiaren Akademia), MUSAC eta Artium.

Jarrera garaikide batetik, antropologiari, historiari, aktibismoari, parasitismoari, paisaiari eta memoriari keinuak eginez eraikitzen du bere diskurtsoa, horiek elikagaitzat erabiliz.

 

Share

Paula Huarte, Danel Garay, Ane Berganza eta Nora Goyalde artistek Montehermoso kulturunean erakutsiko dute euren lana

Kulturuneak eta EHUk elkarlanean dihardute sorkuntza arloko azken joeren zabalkundea bultzatzeko

Montehermoso kulturuneak Paula Huarte, Danel Garay, Ane Berganza eta Nora Goyalde artisten proiektuak aukeratu ditu Euskal Herriko Unibertsitatearekin (EHU) batera egiten duen deialdian.

Gasteizko Udalak eta Arte Ederren Fakultateak sorkuntzaren alorreko azken joerei zabalkundea emateko sinatu zuten hitzarmenaren barruan kokatzen da deialdia. Etorkizunean, profesional bihurtzen direlarik, lanean erabili beharko dituzten espazioak eta tresnak eskura jartzea da deialdiaren helburua.

2018an hasitako bideari jarraituz, aukeratutako proiektuak Jovellanos aretoan erakutsiko dira, banaka, 2021ean. Horretaz gain, 900 euro ordainduko zaio artista bakoitzari aurkezpenagatik, eta banakako katalogoa egingo zaie.

Aurtengoan, Andrea Estankonak eta Juan Pablo Ordúñezek (MawatreS) osatzen duten LEKUTAN kultur elkartea arituko da 4 erakusketen komisario lanetan; lehenago Tabakaleran antolatutako 2020ko Komisario Berriak ekimena irabazi eta zuzendu zuten, eta baita Bilbao Art District izenekoa bi urtez ere.

Epea amaitu zelarik, 28 proiektu jaso ziren. Horietatik beherago azalduko ditugun lauak hautatu zituen honako hauek osatutako hautaketa-batzordeak: LEKUTAN komisarioa; Edurne González, Arte Ederren Fakultateko kultur zabalpenerako dekanordea; Arantza Lauzirika, Arte Ederren Fakultateko dekanoa; eta Luis Mª Pascual, Montehermoso Kulturunekoa zuzendaria:

Kúu, Paula Huarte Cosín artistarena

Proposamenak irudiak, pertsonaiak eta objektuak uztartzen ditu, elementu horien bitartez arlo funtzionala, ornamentala eta surrealista elkarrekin bizi diren eremu bat sortzen duelarik. Oso lengoaia eta iruditeria pertsonal batetik jaiotzen den habitata sortzen du, baina erraz ezagutzeko moduko kodeen erabilera bitarte, memoria kolektiboari egiten diote dei. Eskultura-instalazio horren piezak uztartu eta inguru jakin sortzen dute, non surrealismotik gertu dauden istorioak irudikatu, hots, errealitate alternatibo eta arrotz batetik gertuago, errealitate logiko batetik baino. Aurkeztutako piezek eremu ludikoen misterioetara bideratuko gaituzte.

Plantas, un retrato de su voz, Danel Garay Abaroa artistarena

Soinu-instalazio bat da, transdukzioaren eta musika-ekoizpenaren alorretako goi-mailako teknologia erabiliz, landareek emaniko soinu-esperientzia sortzen duena. Izaki bizi diren aldetik, landareen prozesu kimikoetan gorabeherak dituzte, zein frekuentzia gisa erregistratu baitaitezke. Frekuentzia horiek gizakiok entzungarri dugun erregistrora eraman, eta dagokien uhin osziloskopikoan tratatuz gero, soinu-erregistroak sortzen dira, soinu arras espresionista eta atmosferikoak.

Ane Aquí Ahora, Ane Berganza Santamaría artistarena

Proiektuaren egileak “HEMEN ORAIN” dimentsioari buruzko hausnarketa egin du, duela 7 urteko beste esperientzia bat oinarri hartuta. “Orain” munduan dugun presentziaren boterea eraman eta heda dezakeen puntu bakar gisa ulertzen da. Gertakari edo objektuaren beraren eta horrek uzten duten aztarnaren arteko hutsuneen inguruan hausnartzen du. Konpondu gabeko hutsune horiek hainbat sentsazio sortzen dituztelarik, egileak aurre egiten die aurre proposamen honen bidez.

Puntu bat gehiago, Nora Goyalde Aguirre artistarena

Sorkuntza proiektu hau sortzen da, batetik, EHUren Increarte masterrean artistari berari piztu zitzaizkion eta landu ziten interesetatik, eta, bestetik, zenbait abesbatzatan izan duen partaidetzatik.

Proposamena marrazki batzuk soinu bihurtzeko ariketatik eta horretarako erabilitako programatik abiatzen da. Egileari programak bere marrazkiak nola irakurtzen zituen interesatu zitzaion. Programa horrek marra horizontalak sortzen zituen, eta horietan zerbaitek talka egiten zuen puntuak bilatzen zituen, hartara topaketa horietatik informazioa lortzeko. Puntua eta marra interesatzen zaizkio ezeren ulermenerako bide gisa.

 

 

 

Share

Gala Knörrek ‘How to make friend and influence people’ erakusketa aurkeztu du Montehermoso kulturunean

Irailaren 12ra arte izango da ikusgai lehen solairuko aretoan

 

Gala Knörren ‘How to make friendo and influence people’ erakusketa aurkeztu dute Montehermoso kulturunean. Ostegunetik, uztailak 8, irailaren 12ra bitartean izango da ikusgai kultununeko lehen solairuko aretoan. Hezkuntza eta Kultura zinegotzi Estibaliz Canto eta Gala Knörr egilea bera izan dira prentsaurrekoan.

 2020ko deialdian aukeratutako lau proiektuetako hirugarrena da ‘How to make friendo and influence people’. Erakusketa honen bitartez, beren lanak banaka nahiz taldeka aurkezteko aukera ematen diegu artistei, arte eta kultura garaikidea sustatu eta herritarrengana hurbiltzen duten ekintzen bitartez” nabarmendu du Estíbaliz Cantok.

‘How to make friends and influence people’ erakusketan, antzeko titulua eta esanahi ezberdina duten bi libururen irakurketan inspiratzen da egilea. Batetik, Dale Carnegierena, zeinak egoerak eta pertsonak norberaren onurarako manipulatzen irakasten baitu, eta historian gehien saldu diren 100 liburuen artean baitago;  bestetik, Lenny Bruce komiko eta gizartearen kritikariaren memoriak, zeinari lizunkeriagatik egin zioten epaiketa mugarritzat jotzen baita Estatu Batuetan adierazpen-askatasunaren alorrean.

Erakusketak hainbat neurritako lanak biltzen ditu (formatu txiki eta handikoak), bai margolanak, bai ikus-entzunezkoak, eta hainbat euskarritan.

Egilea

Gala Knörr diziplina anitzeko artista da, eta pintura, instalazioa eta idazketa lantzen ditu. Bere lanak identitateen eta teknologiaren arteko intersekzioa aztertzen du sakon; teknologiaren bitartez lortutako irudien garrantzia agerian uzten du, eta hedabideekin eta kultura herrikoiarekin lotutako gaiak lantzen ditu gehien bat, lente satiriko baten bitartez.

Honakoak ere lortu zituen: MA Fine Art (Central Saint Martins) eta BFA Fine Arts (Parsons Paris The New School).

Hainbat tokitan egin ditu egonaldiak: Tabakalera (2021), Pariseko Cité Internationale des Arts (2015, 2019), Castelloneko Museu de Belles Arts (2018), New Yorkeko The Guggenheim Museum (2017), Bilboko Bilbaoarte Fundazioa (2016) eta Malagako La Térmica (2016).

Hainbat sari jaso ditu: VEGAP Proposamen Artistikoak (2020), Generación 2020 Fundación Montemadrid (2020), Juan eta Pablo de Otaola beka (2019), Cultura Resident Investigación Artística del Consorci de Museus GVA (2018), Guggenheim Basque Artist Program beka (2017), Bilbaoarte Fundazioko egoitza beka eta banakako erakusketa (2016-2017) eta La Térmicaren sortzaileentzako beka (2016-2017).

Bere lanak ikusgai izan dira hainbat tokitan: La Casa Encendida (Madril), SB34-The Pool (Bruselas), Galeria T20 (Murtzia), Pablo’s Birthday (New York), La Encartada Fabrika-Museoa (Balmaseda), Azkuna Zentroa (Bilbo), Museu Trepat (Tárrega), Fundación CajaGranada Museo Memoria de Andalucía (Granada), Museo Carmen Thyssen (Malaga), eta Fabra i Coats Fàbrica de Creació i Centre d’Art Contemporani (Bartzelona), besteak beste.

2014an Saatchi Galleryko Hezkuntza Saileko laguntzailea izan zen, eta  2018-2019an artista-ikertzaile izendatu zuten, Londreseko Goldsmiths unibertsitateko  ikasketa postkolonialen zentroan.

 

 

 

 

 

 

 

 

 

 

 

 

 

 

 

 

 

 

 

Share

Ines Medinaren erakusketa Montehermoso kulturunean

Irailaren 5era arte egongo da ikusgai ur-biltegian

 

Ines Medinaren “Desberdintasunaren eta genero-indarkeriaren gaineko ikerketa-prozesu psikoanalitiko-plastikoa” erakusketa aurkeztu dute Montehermoso kulturunean, eta irailaren 5era arte izango da ikusgai ur-biltegian. Hezkuntza eta Kultura zinegotzi Estibaliz Canto eta Ines Medina egilea bera izan dira prentsaurrekoan. 

“Erakusketa hau iaz egitekoa zen, baina atzeratu egin behar izan zen pandemiaren ondorioz.; orain, azkenean, ikusgai izango dugu. Pozgarria da egile garrantzitsu honen lana gurean izatea, gaur egun gure lurraldean artearen munduan ari diren emakume askori bidea ireki zien eta ” azpimarratu du Cantok.

Erakusketa Inés Medinaren obraren errepresentazio zabala biltzen duen ikerketa-prozesu batean oinarrituta dago. Lan osoa ‘Zatiketa plastikoaren kontzeptua’ deitzen da, eta 40 urte baino gehiagoko aldia hartzen du, 22 serietan banatuta. Montehermosora hurbiltzen direnek lan handi horren azken 4 serieak ikusi ahalko dituzte.

  1. seriea, “Burnt Dolls-panpina erreak”, New Yorken eta Aperribai-Galdakaon egin zen 2007-2009 urteetan. 20.a, “Adimenaren transmutazioa”, berriz, Zamudion eta New Yorken, 2010etik 2016ra bitartean.

Horiekin batera, hurrengo bi serieak ere izango dira ikusgai ur biltegian:  21. seriea, “Sorkuntzaren egitura” (New Yorken eta Bilbon egina, 2014-2018 urteetan) eta 22. seriea, “Gaizkia eta haren ondorio suntsitzaileak identifikatzea” (Bilbon landua, 2018-2021 urteetan).

 

Egilea

Inés Medinak Bilboko Arte Ederretako Fakultatean ikasi zuen, hirurogeita hamarreko hamarkadaren amaieran. Espresionismoa izan zuen abiapuntu, eta gero ikerketa abstraktura pasa zen, hainbat fasetatik igarota: espazialtasuna, hiru dimentsiokotasuna…

1995ean New Yorkera lekualdatu zen eta hara eraman zuen bere estudioa, eta bertan ikerketa plastiko formala landu zuen esklusiboki eta ikuspuntu intelektualetik, puntuak eta teknologia ardatz hartuta.

2006an generoaren problematikaren inguruko ikerketa berezi bati ekitea erabaki zuen. Bere pinturak emozioetatik lantzen hasi zen, eta horien ahalmena irudi zuzenak sortzeko baliatzen.

Bere eskarmentu psikoanalitikoa eta ibilbide pedagogiko luzea baliatuta, generoaren problematika lantzen hasi zen, izan ere horrekin oso sentsibilizatuta dago.

Inés Medinak 4 serie horien banakako erakusketa erakusketa-espazio batean egiten duen lehen aldia da

 

Share

Anabel Quincoces, Natalia Suárez, Begoña Antón eta Estíbaliz Sádaba: 2022an aurkeztuko dituzte euren lanak Montehermoson lau artistek

Kulturuneko Proiektu artistikoetarako deialdiak 61 proiektu jaso ditu guztira

 Montehermoso kulturuneak lau lan hautatu ditu 2022ko proiektu artistikoetarako deialdian. Hauek dira datorren urtean euren lana Montehermoso jauregian aurkeztu ahalko duten artistak, kulturuneko erakusketa-programaren baitan: Anabel Quincoces eta Natalia Suárez gasteiztarrak, eta Begoña Antón eta Estíbaliz Sádaba bilbotarrak.

Gasteizko Hezkuntza eta Kultura Saileko zinegotzi Estibaliz Cantok esan duenez, “Programa honen bidez tokiko artisten proiektuak landu, erakutsi eta zabaltzea, horien bitartez jardun artistiko garaikidearen alorrean lantzen ari diren lengoaia eta diskurtso berriak ezagutarazi eta horietaz hausnartzearren”.

“Aurten 61 proiektu jaso ditugu. Epaimahaiak emakumeen lau lan hautatzeak gure sortzaile emakumeen lanaren kalitatea azpimarratzen du”, gehitu du Cantok.

6.000na euroko laguntza ekonomikoa eta katalogo baten argitarapena jasoko dute saritan adituen epaimahaiak hautatu dituen artistek. Aurtengoan, Leyre Goikoetxea arte-komisarioak, EHUn Artearen Historiako irakaslea den Garazi Ansak eta Montehermoso kulturuneko zuzendari Luis Mª Pascualek osatu dute epaimahaia.

Hauek dira proiektu hautatuak:

Hydra-El fluido traslúcido. Anabel Quincoces (Gasteiz 1968).

Artistak aurkeztu duen proiektuak instalazio eskultorikoak aztertu, hauteman eta egiteko lana dute hausnargai, horretarako ibai-uretako biztanleak hartuta aitzakia, mendetan zehar garraiatutako lohi eta sedimentuak, zein etengabe aldatzen baitira. Horretarako Panspermiaren hipotesia balizatzen du, hots, ustez beste planeta batzuetatik Lur planetara nahita bidalitako mikroorganismoen balizko garraio bat, horien bidez bizitzari hasiera emateko.  Zehatzago, hydrak ditu hizpide, zeinen morfologia eta aldatu eta birsortzeko gaitasunak jatorrizko moldera itzultzeko ahalmena ematen baitiete, baita erabat birrindu eta txikitu badituzte ere.

Hydra-El fluido traslúcido bideo-irudiak zeharkatzen dituzten eta berariaz Montehermoso kulturuneko Ur Biltegirako pentsatutako 9 instalazio eskultorikoz osaturiko esku-hartze artistikoa da.

Negro Cremoso.  Natalia Suárez Ortiz de Zárate (Gasteiz, 1994).

Tinta-orban bat edo marra bat egitea batere funtzio edo zeresanik gabeko egintzak dira, ez bada horiek gertatze hutsaren zentzua. Artistarentzat hori zerbait bizitzeko oso modu garbia da, zamarik gabea. Oro har, margotze-lanean oso modu zehatzean arrastatu behar da masa, harik eta modu egokiarekin asmatu arte. Margo-trazu bat ez da tramite hutsa; zerbait margo-lan amaitu izatera irizten bada, trazu bakoitzak izaera propio eta berezkoa duelako izango da, zerbait modu jakin batean gertatu delako, eta ez beste inolaz; horren ondorioz, aleak trazu horiek diren karaktereen batuketari dagokion izaeraz jantziko da. Gauza bera marrazketan ere.

Artistak, azken margoan abiarazi duen lan-ildotik abiatuta, tamaina handiko koadro-sorta bat sortuko du, itxuraz orain artean egin dituen margo eta marrazkietan –zeinek pilatze gisa funtzionatzen baitute– bakarti eta monolitikoagoak.

Botanical Frenzy.  Begoña Antón (Bilbo 1983).

Diziplina anitzeko proiektu honek kolonialismo botanikoaren eta landare-itsutasunaren historia jorratzen du, “orkideen sukarra” deitu fenomenoaren bitartez. Orkideen ea gainerako landareen ustiakuntza komertziala aztertzen du.

Sir Joseph Bank (Cook kapitainak gobernatu zuen HMS Endeavour ontziko botanikariak) 1768an Ekialdeko Indietako orkideak Europara lehen aldiz ekarri zituenetik, oihanen arpilaketak ez du etenik izan. Hainbesteraino, non munduan ezagutzen diren 380.000 landare-espezien arteko % 20 desagertzeko arriskuan baitago.

Artistak argazki domestikoak eta artxiboko materiala jorratuko ditu, collagea baliatuko du, eta posta-zigilu bilduma bat sortuko du, kolonizazio botanikoa eta orkideen garrantzia erakusteko. Ikusiko dugu landare horren inguruan –eta batez Ingalaterran, non dena hasi baitzen– orkidea-hazle, bilduma-zale, feria, lehiaketa, etxez etxeko zaintzaileak, orkideen mutazioetan adituak eta abarren abarra dagoela.

Espacios para habitar. Estíbaliz Sádaba (Bilbo 1963)

Proiektu artistiko honetan egileak instalazio bat planteatzen du –irudia, soinua, performancea, collagea eta marrazkia bitarte–, zeinaren bidez emakumeek historikoki espazio publikoarekin izan duten harreman-zailtasunari buruz hausnarketa egin.

Estíbalizek proiektu bat sortu du hirian zehar egindako ibilera eta nora-hara galduen bidez; horien bidez agerian jarriko du gorputz femeninoak mobilizatzeko eta esperientzia mikropolitikoak aktibatzeko duen deserosotasuna, hartara ahizpatasun edo sororitatea adierazte aldera –eta horien bitartez esperientzia kolektibo, pertsonal eta historikoak transmititze aldera, erreferentzia intelektual eta afektiboen kartografia bat osatzeraino–.

Share

‘Venancio del Val. Calles vitorianas’ erakusketa aurkeztu du Udal Artxiboak

Maiatzaren 21etik ekainaren 20ra bitartean egongo da ikusgai Ur-biltegian, Montehermoso kulturunean

 

Pilar Aróstegui Gasteizko Udal Artxiboak ‘Venancio del Val. Calles vitorianas’ erakusketa antolatu du; maiatzaren 21etik ekainaren 20ra bitartean egongo da ikusgai Montehermoso kulturuneko ur biltegian.

Kazetari eta Gasteizko Udaleko funtzionarioa izandako del Val eta beraren ‘Calles vitorianas’ lan handiari omenaldia egiten die erakusketak. “Bizitza luzeko gizona (93 urte), Gasteizko XX. mendearen zati handi baten lekuko eta kronista izan zen, eta 2003an Pilar Aróstegui Udal Artxiboari eman zion bere funts pertsonala, 75 urteko ahaleginaren eta ikerketaren emaitza”, nabarmendu du Hezkuntza eta Kulturako zuzendari Paco Galvek.

Venancio del Valen alabak erakusketa ikusten izan ziren

‘Calles vitorianas’ beraren liburua oraindik indarrean dago, eta erabilgarria da, 1979an idatzi bazuen ere. Erreferentziako lana bihurtu da, informazio interesgarri ugari baitu. “Zenbaitetan, lan handi horrek estaltzen du idazkera zaluko eta datu xeheak, pasadizoak eta tradizioak maite zituen idazle honen obra zabal eta emankorra. Prentsarako 8.000 artikulu baino gehiagoren egile izan zen, eta irratirako gidoiak, hitzaldiak, monografiak, himno eta abestien hitzak eta San Prudentzio jaietako (1978) eta Andre Maria Zuriaren jaietako pregoiak (1979) ere idatzi zituen”, zehaztu du Galvek.

Erakusketa

 Ur-biltegian, 1911tik 1998ra bitartean argazkilari hauek egindako 58 argazki egongo dira ikusgai: Santiago Arina Albizu, ARQUÉ (Federico Arocena Andrés-Gregorio Querejazu García de Madinaveitia), José Luis Barroso Ruiz de Trocóniz, Enrique Guinea Maquíbar, FOAT SL (Fotografía Aérea y Terrestre), José María Parra García, Edorta Sanz Otsoa de Retana, Balbino Sobrado Cobas eta Ceferino Yanguas Alfaro.

Venancio del Val-en Historia de Vitoria hace 50 años hitzaldia Casino Artista Vitoriano Elkartearen egoitzan. 1961eko apirilaren 25a. ARQUÉ

Erakusketaren lehenengo zatia biografikoa da, eta bertan ikusgai daude 1911ko Gasteizen planoa, urte hartan jaio baizen del Val, eta haren bizitza pertsonal zein profesionaleko hainbat alderdi jasotzen dituzten 32 argazki (1911tik 1998ra bitartekoak): jaio zeneko etxea, musika emanaldiak, bera biziko zen etxearen eraikuntza, lan egin zueneko egunkarietako batzuk, elkarrizketak, udal-irudiak, pregoilari izan zeneko jaiak eta eman zizkioten sari ugarietako bat ematearen ekitaldia.

Jostailuen banaketa Pensamiento Alavés egunkariaren egoitzan, Eduardo Dato kalean. Eskuinean, La Libertad egunkariaren egoitza. 1936ko urtarrilaren 6a. Yanguas

Bigarren zatian, 1978ko Gasteizko airetiko ikuspegi batekin hasten da, eta 26 argazkiren bidez hiriko zenbait alderditan zeharreko ibilaldia egiten du, ‘Calles Vitorianas’ liburuaren 1979ko argitalpena erreferentzia hartuta.

Nahi izanez gero, Interneten bidez ere gozatu ahal izango dira irudi horiek guztiak, Udalaren webgunean.

 

Share

2022an EHUko artisten lanei zabalkundea emateko deialdia egin du Montehermoso kulturuneak

Ekainaren 11ra bitartean aurkeztu ahal izango dituzte beren proiektuak interesdunek

Prestakuntzaren azken etapetan diharduten artisten lanari zabalkundea emateko EHUko Arte Ederretako fakultatearekin elkarlanean urtero egin ohi duen deialdira aurkezteko epea zabaldu du Montehermoso kulturuneak.

“Artistak mundu profesionalera hurbiltzeko plataforma bat da deialdi hau, eta, bidenabar, gizartearekin zuzeneko lotura ezartzeko. Aukeratzen diren proiektuek 900 euroko laguntza jasoko dute, eta erakusketa egin eta zabalkundea emango zaie, Montehermoso kulturunean”, adierazi du Gasteizko Hezkuntza eta Kultura zinegotzi Estíbaliz Cantok.

Gasteizko Udalak eta Arte Ederren Fakultateak sorkuntzaren alorreko azken joerei zabalkundea emateko sinatu zuten hitzarmenaren barruan kokatzen da ekintza hori.

Aurkezten diren proiektuen artetik, guztira lau aukeratuko dira, eta Montehermosoko langileen aholkularitza izango dute, bertako aretoetan erakusketa egin arte. Erakusketa antolatu eta gauzatzeko prozesu osoan parte hartuko dute ikasleek, baita muntatzeko lanetan eta aurkezpen-prentsaurrekoan ere.

Ekainaren 11ra bitartean aurkeztu ahal izango dituzte beren proposamenak interesdunek, Udalaren webgunearen bitartez —wwww.vitoria-gasteiz.org— edo aurrez aurre, herritarrei laguntzeko bulegoetan.

Miguel Alejos, Jugatx Astorkia, Gaspar Avilés eta Rocío Agudoren lanak aukeratu ziren aurreko edizioan, eta 2021. urtean zehar egiten ari dira horien erakusketak, kulturunean.

 

Informazio gehiago

Share

Rocío Agudok “Stay focused” aurkeztuko du Montehermoson

Apirilaren 23tik maiatzaren 23ra arte egongo da ikusgai

Rocío Agudo artistak “Stay focused” erakusketa aurkeztuko du eta apirilaren 23tik maiatzaren 23ra arte egongo da ikusgai Montehermoson, Jovellanos aretoan hain zuzen; udalaren kultur zentroak Euskal Herriko Unibertsitateko Arte Ederren Fakultatearekin batera sustatzen duen deialdian hautatutako proiektuen arteko hirugarrena da.

Programak komisario baten laguntzarekin proiektu artistikoak garatzeko aukera eskaintzen die bigarren zikloko, gradu-ondoko eta doktoretzako ikasleei, ondoren Montehermoson bakarka aurkezteko.

“Etorkizun handiko kultura-sektoreari laguntzea da deialdi honekin lortu nahi dugun helburua. Zaila da berez artearen munduan gailentzea, baina orain, pandemiaren ondorioz, egoera are larriagoa da gazte hauentzat; beraz, deialdi hau inoiz baino beharrezkoagoa da”, esan du Gasteizko Hezkuntza eta Kultura zinegotzi Estibaliz Cantok.

Erakusketa

Rocío Agudo Arte Ederretan graduatua da, eta Arte Garaikide Teknologiko eta Performatikoa masterra ere egina du, Euskal Herriko Unibertsitatearen eskutik. Jarduera Artistikoen JAI Institutuan (Tabakalera, Donostia) ere jaso du prestakuntza Itziar Okariz, Asier Mendizabal eta Ibon Aranberriren eskutik.

Egonaldiak egin ditu BilbaoArte fundazioan (abian), Center for Basque Studies zentroan (AEB, 2019), Etopía zentroan (Zaragoza, 2019) eta CentroCentro (Madril, 2020) espazioan. Besteak beste, Gasteizko Artiumeko eta Zaragozako IAACC Pablo Serrano institutuko erakusketetan parte hartu du.

“Stay focused” proiektuan Rocío Agudok bideoaren gainean eta bideoarekin egiten du lan. Bertan, ekintzatik abiatuta saiakuntza bat egiten du, bere burua eta besteak grabatzeari buruz pentsatzeko grabatzen du, kamera subjektu gisa pentsatzen du eta ikus-entzunezko lengoaia hegemonikoa birplanteatzen du.

Subjektuaren eta kameraren arteko aurkakotasuna desegiten saiatzen da. Mugimendua bilatzen du, gorputza zatitzea, bestearen larruazalera gerturatzea. Filmatzea ukitzea da. Eta zenbait keinu burutzea: proiektorea kameraren aurrean, gorputzaren desira bat, biratze bat automatismotik afektura.

Rocío Agudo artistak bere proiektuaren ezaugarrien berri emango du inaugurazio-egunean, hilaren 23an. Arratsaldeko zazpietan izango da.

ROCIO AGUDO KATALOGOA MH-UPV 2020-21

 

 

Share

‘Lehen besarkada’, 2021eko World Press Photo sariaren irabazle

Mads Nissen daniarraren  ‘Lehen besarkada’  argazkiak irabazi du 2021eko World Press Photo lehiaketako sari nagusia. Argazki hori eta gainerako guztiak ikusgai izango dira urriaren 15etik azaroaren 14ra arte Gasteizko Montehermoso kulturunean.  Hemeretzigarren urtez izango da Gasteizen World Press Photo erakusketa.

 

Share