Prentsa Oharren banner

Prentsa-deialdiak (2021-03-09)

Prentsaurrekoa. Udal Antzoki Sarearen 2021eko udaberriko denboraldia aurkeztea

Parte hartzaileak. Hezkuntza eta Kultura zinegotzi Estibaliz Canto

Eguna. Asteartea, martxoak 9

Ordua. 11:30

Tokia. Udaletxeko prentsa aretoa

————————————

Desagertutako Pertsonei buruzko Deklarazioa irakurtzea

Parte hartzaileak. Vitoria-Gasteizko alkate Gorka Urtaran; eta udal taldeetako ordezkariak

Eguna. Asteartea, martxoak 9

Ordua. 13:00

Tokia. Udaletxeko harrera aretoa

Share

Gasteizek bat egiten du M8 Emakumeen Nazioarteko Egunaren ospakizunarekin

Hori dela eta, hiriko eraikin enblematikoetako batzuk morez argiztatuko dira

 

Gaur, martxoaren 8an (astelehena), M8 da, Emakumeen Nazioarteko Eguna, eta hori dela eta, Gasteizko Udalak bat egiten du ospakizunarekin, eta morez argiztatuko ditu Udaletxearen fatxada, Floridako kioskoa eta Arkupeak.

Gainera, horren ildotik, Gasteizko Udalak, Arabako Foru Aldundiarekin batera, hainbat jarduera antolatu ditu ospakizun honekin lotuta, goiburu honekin: “Bizitzarako funtsezkoak? Aitorpenak, Duintasuna, Erantzukidetasuna”. 

Hona hemen egingo diren jardueren egitaraua:

 

Share

Martxoaren 8aren hiribidean bidegorri berria egiteko lanak hasi dira

Salburua auzoko Martxoaren 8aren hiribideak kilometro batetik gorako bizikleta-konexio berria izango du laster. Bizikletentzako bi bide-zati egiteko lanei ekin die Raimundo Ruiz de Escuderok zuzentzen duen Mugikortasunaren eta Espazio Publikoaren Sailak; bata Salburuko hezegunerantz eta bestea, berriz, Madril kalearekiko biribilgunerantz. Galtzadaren gainean marraztuko dira bizikletentzako bideak, ibilgailuenaren kontrako noranzkoan. Orduko 30 kilometrora mugatuko da zirkulazioa, segurtasuna hobetze aldera.

Esku-hartzeak 50.000 euro inguruko inbertsioa izango du, eta aste honetan egingo dira, nahiz eta data zehatza eguraldiaren mende egongo den, batez ere pintatze-lanak direnez gero.

“Salburua bezalako auzoetan konektibitatea hobetzea eta garraio iraunkorra eta osasungarria sustatzea da sail honen ildo estrategikoetako bat”, azaldu du Mugikortasunaren eta Espazio Publikoaren zinegotzi Raimundo Ruiz de Escuderok. “Kasu honetan, kilometroak gehituko dizkiegu bizikletentzako bideei”. Udal Gobernuaren eta Elkarrekin taldearen arteko 2020ko ekitaldiko aurrekontu-akordioaren emaitza da esku-hartzea.

 

Share

Gasteizko Udal Bandak “Bizitza kolorean” aurkeztuko du

Martxoaren 10ean (asteazkena) izango da Gasteizko Udal Musika Bandaren abonamenduko 5. kontzertua, Principal Antzokian

Gasteizko Principal Antzokian izango da Udal Musika Bandaren abonamenduko 5. kontzertua, martxoaren 10ean (asteazkena), arratsaldeko zazpietan; “Bizitza kolorean” du izenburu. Gasteizko Bandaren zuzendari Luis Orduñak zuzenduko du emanaldia, eta Víctor de Andrés izango da tronboi-jole bakarlaria.

Aukeratutako errepertorioan pieza hauek daude: “Dalí”, Aldo Rafael Forterena; “Fantasy of the Elements”, Silvia San Miguelena, eta “Colors”, Bert Appermont-ena. Lehenengo aldiz joko du Bandak hiruretako bakoitza.

Silvia San Miguelek bere lanari buruz hitz egin du gaur goizeko prentsaurrekoan. “‘Elementuen fantasia’ deitzen diot, asko gustatzen zaidalako Young. Konposatu nuenean, pertsonalitateei buruz egiten zuen analisiari buruz irakurtzen ari nintzen, eta pertsonalitate horiek lau elementuekin lotzen zituen, eterraz gain, zein ez baitut obran sartu”.

“Jarraitu Bandari” ekimenari esker, kontzertua streaming bidez ikusi ahal izango da udalaren webgunean.

Zuzendariaren oharrak

“Olinpon Zeus oroimenaren jainkosa Menmosinerekin maitemindu zen, eta pasioz betetako bederatzi gauetan giza inspirazioaren iturri diren bederatzi musak sortu zituzten, mitologia greziarraren arabera. Jainkosa haiek lurrera jaisten ziren haiei dei egiten zienei ideiak xuxurlatzera eta inspirazioa ematera.”

“Baina inspirazio-iturriak beste esparru lurtarragoetatik etor daitezke, noski. Arkitektoek, margolariek, eskultoreek edo idazleek naturako elementuetan, kolorean, batik bat, aurkitu dute hain “irrikatutako inspirazioa”. Musika-konpositoreek, jakina, gauza bera egin dute, eta horren hiru adibide entzun ahalko dituzue programa honetan.”

“Gasteizko konpositore Silvia San Miguelek naturaren oinarrizko lau elementuetan aurkitu du sorkuntza-bultzada, airea-lurra-ura-sua elementuetan, alegia, eta suiteko mugimendu bana dedikatu die. Aldo Rafael Forte kubatarrak, berriz, gauza bera egingo du Salvador Dalí artistaren obra koloretsu, komiko eta surrealistekin. Azkenik, obra ikusgarri bat aurkeztuko dugu, Bert Appermont belgikarrarena, tronboi eta bandarakoa; horretan, kolore bakoitzak mugimendu bat inspiratu du.”

“Zein garrantzitsua den kolorea gure bizitzetan! Eta zein beharrezkoa musika! Eta nolako bategite txundigarria ateratzen den kontzertua zentzumen guztiekin goza dezagun elkar hartzen dutenean musikak eta koloreek!”

Luis Orduña

Streaming bidez ikusi 

 

 

Share

2021eko martxoaren 8a dela-eta adierazpena

ZAINTZA BERDINTASUNEAN. Emakumeen egitekoa Pandemian eta zaintzaren Krisi Globalean

Dimentsio askoko krisi sistemikoan gaude, zeina gurutzatu eta erlazionatu egiten baita aurretik zeuden beste krisi batzuekin; esaterako, ekologikoa eta zaintza-arlokoa. Pandemiak agerian utzi ditu mugimendu feminista eta emakumeen kolektiboak egiten ari ziren zenbait aldarrikapen: giza bizitza zaurgarria da, eta giza ingurunearen, ingurumenaren eta ingurune komunitarioaren zeharo mendekoa. Ezerk ez du garrantzi handiagoa izan behar bizitza zaintzeak baino, pandemia dela-eta muturreraino prekario bihurtu eta ahuldu den bizitza.

Gaur, martxoak 8, Emakumeen nazioarteko egunean, pandemiak eta haren kudeaketak baldintzatutako urte honetan, aintzat hartu beharra dago emakumeek pandemia eta beraren ondorioak borrokatzeko mundu osoan egindako ekarpena. Zaintzaren ardura emakumeei egokitu zaie, bai zerbitzu publikoetan (osasungintza, hezkuntza, gizarte-zerbitzuak, merkataritza eta elikadura…) bai etxeen barruan, eta batez ere haiek eraman dute krisi sanitario eta sozial honetan funtsezkoak izan diren zerbitzu askoren zama. Emakumeen artean ere banaketa desorekatua da, klase sozialaren, arrazializazioaren eta migrazio-estatusaren arabera. Gainera, kasurik gehienetan egoera prekarioan egindako lanak dira.

Berdintasunik gabeko banaketa horrek, gainkargaz gain, eta hark emakumeen osasunari eta bizi-kalitateari dakarzkien ondorioez gain, zaintza-sistemaren prekaritatea ere azaleratu du, eta lehendik ere bazeuden desberdintasunak areagotu ditu. Gure gizarte-ereduak familiaren, eta, neurriz kanpoko proportzioan, emakumeen esku uzten ditu zaintza gehienak, bai ordainpekoak bai ordaingabeak; oso gutxi ematen dira eremu publikoan. Bestalde, egoera eta estatus okerreneko emakumeek (guraso bakarreko familien buruak, behartsuenak, kolektibo zaurgarrietakoak, indarkeria matxistaren biktimak…) neurri handiagoan jasaten dituzte zaintza-zamaren ondorio negatiboak.

Ondorioz, gizarteak bere aitorpena adierazteko moduak konpromiso irmoa izan behar du, berdintasunik gabeko banaketa bidegabe horri euskarria ematen dioten genero-arrakalak borrokatzeko konpromisoa. Desberdintasun horiek agerikoak dira emakumeek funtsezko zerbitzuetan egiten duten lanaren baldintzen prekaritateari begiratuz gero. Bada garaia zaintza-lan guztiei dagokien balioa emateko, eta aurrera egiteko erantzunkidetasun handiagoko eredu baterantz, pertsona guztientzat ekitate eta ongizate handiagoa sortzeko.

Udalak gaude lehen lerroan, pandemiari eta hark pertsonengan dituen ondorioei aurre egiten, eta liderrak izan behar dugu zaintzari eta haren hornikuntzari buruzko politika publikoak bultzatzeko orduan, erantzunkidetasun publikotik abiatuta, eta arreta emanez gizon eta emakumeen baldintza eta inpaktu desberdinei.

 

Erakundeok koordinatuta egoten jarraitu behar dugu, eta bideak zabaldu behar ditugu herritarrek, eta bereziki mota askotako emakumeen kolektiboek eta mugimendu feministak, benetan eta modu eraginkorrean parte har dezaten erabaki publikoetan.

Horregatik guztiagatik, Udal honek, bere eskumenen esparruaren barruan, honako konpromisoak hartzen ditu:

  • Gizartean zaintza antolatzeko ereduari buruzko eztabaida bultzatzea eta eztabaida horretan buru izatea, bizitza erdigunean jartzean oinarritzen den ikuspuntu feminista batetik abiatuta, zaintzaren erantzunkidetasun sozial eta komunitarioranzko bidean.
  • Analisia egitea, genero-ikuspuntutik, kolektibo zaurgarrienen egoerari eta beharrizanei buruz, baita COVID-19aren ondorioei buruz ere, eta horiei aurre egiteko premiazko neurriak martxan jartzea.
  • COVIDaren krisiaren eragina arintzeko onartzen diren neurri guztietan genero-ikuspuntua gehitzen dela bermatzea, laguntzez eta babes-programez den bezainbatean.
  • Konponbide bideragarriak aztertzea eta ezartzea adingabekoen eta mendekotasuna dutenen zaintzari laguntzeko tokiko zerbitzuentzat, zaintza baldintza duin eta bidezkoetan egin dadin saiatuz edo/eta erraztuz, bai ematen duenarentzat bai jasotzen duenarentzat ere.
  • Udalen Berdintasun-plangintzetan, espresuki azpimarratzea emakumeen ahalduntzea, zaintzaren balioa, eta hari dagokionez gizonek duten erantzunkidetasuna.
  • Berdintasuneko tokiko politikak garatzeko eta generoa tokiko politika guztietan zehar-lerroa izateko erabiltzen diren giza baliabideak eta baliabide tekniko eta ekonomikoak sendotzea eta babestea.
  • Tokiko zaintza-sare komunitarioei babesa ematea.

 

 

Share

Atxilotua errekisitoria judiziala izateagatik eraso baten ondoren  

Larunbatean, 53 urteko gizonezko bat atxilotu zuten udaltzainek bere aurkako errekisitoria judiziala zegoelako.

Iluntzeko 20:30ean, 092ak Jesusen Zerbitzarien kalean eraso bat gertatu zelako poliziaren presentzia eskatzen zuen deia jaso zuen.  Inplikatutakoak identifikatu zituztenean, patruilak egiaztatu zuen ustezko erasotzaileak indarrean errekisitoria bat zuela; ondorioz, udaltzainek gauzatu egin zuten. Atzo, igandean, utzi zuten epailearen esku.

Salaketak

Asteburuan, Udaltzaingoak Covid-19aren aurkako neurriak ez betetzeagatik 49 salaketa jarri ditu.

Pilar auzoko lonja batean, 5 pertsona salatu zituzten biltzeagatik eta jarduerak egiteagatik (Udaltzaingoaren dekretuak xedatutakoaren arabera, lokal mota horiek itxita egon behar dute).

Gainerako zigor-proposamenak honako hauekin lotutakoak izan ziren: 18 musukoa jantzita ez izateagatik edo gaizki erabiltzeagatik; 12 etxeratze-agindua ez betetzeagatik; 5 pertsona kopuruaren muga ez errespetatzeagatik; 3 bide publikoan alkohola kontsumitzeagatik; 2 bizitokiko udalerriko irteeren eta sarreren debekua ez betetzeagatik; 2 ostalaritzako establezimenduetan ordutegia ez betetzeagatik; 1 distantzia mantendu gabe erretzeagatik; eta 1 establezimendu baten titularrari arauak betetzen direla ez zaintzeagatik.

Segurtasun-uhalen kontrola

Udaltzaingoak aste honetan zirkulazioko kanpaina berezia egingo du segurtasun-uhalen erabilera kontrolatzeko. Kontrola gidariei zein bidaiariei egingo zaie, eta haurrak atxikitzeko sistemak (SRI, gaztelaniaz) ere kontrolatuko dituzte.

Kanpaina hori 2018-2023 Bide Segurtasuneko Udal Plan Estrategikoan jasotako zaintza- eta kontrol-ekintzen baitan sartu behar da.

Suhiltzaileak

Suhiltzaileak atzo Bitoriano udalerrira joan ziren atzo txoko bateko tximinian piztu zen sua itzaltzeko.

Share

Poetak maiatzean jaialdiak Paco Ibáñez ekarriko du Principal antzokira, maiatzaren 14an

 

Maiatzaren 7tik 29ra bitartean egingo da jaialdia, modu presentzialean

 

Paco Ibáñezek Principal antzokian abestuko du maiatzaren 14an, Poetak maiatzean jaialdiaren barruan, Hezkuntza eta Kultura zinegotzi Estíbaliz Cantok eta jaialdiko zuzendari Elisa Ruedak gaur prentsaren aurrean jakinarazi dutenez.

Udalaren Antzoki Sareak babesten du kontzertua, Gasteizko kultur egutegiko ekitaldi hutsezin bihurtu den jaialdi honetako izarra.“Poesia inoiz baino beharrezkoagoa da, pandemiak ezarritako murrizketak direla eta joaterik ez dugun lekuetara bidaiatzea ahalbidetzen baitigu. Gure etxeko egongelatik poeta ospetsuen eta mundu zirraragarri horretan bidea urratzen ari diren beste batzuen olerkiekin gozatu dezakegu. Gainera, jaialdiari esker, testuak ahots benetan iradokitzaileetan entzun ditzakegu, eta hori beti da plus bat”, erantsi du Estíbaliz Cantok.

Bestalde, Elisa Ruedak maiatzaren 14ko kontzertuari buruzko xehetasun gehiago eman du. “Paco Ibañez, poeten ahotsa. Humanista eta artista konprometituak emango duen kontzertua maitasun-, askatasun- eta duintasun- proposamena da. Bidegabekeriaren, indarkeriaren eta izugarrikeriaren kontrako erresistentziaren sinboloa. Paco Ibañezen ahotsean eta musikan bilduta, XIII. mendeaz geroztik izan diren gaztelaniazko poeta handienen hitzak entzungo ditugu”.

Ekitaldia maiatzaren 7tik 29ra bitartean egingo da, eta aurten presentziala izango da; 2020ko edizioa, berriz, online egin behar izan zen, pandemia dela eta.

Artista valentziarraren emanaldiaz gozatu nahi dutenek Udalaren Antzoki Sarearen ohiko bideetatik eskuratu ahalko dituzte sarrerak, abonamenduen barruan (martxoaren 25etik aurrera) edo sarrera solteak erosiz (martxoaren 30etik aurrera).

“Paco Ibáñezek Principal antzokian emango duen kontzertura gonbidatzen ditugu gasteiztarrak. Ezagutzen dutenek zuzeneko esperientzia bizi nahiko dute ziur aski. Eta oraindik haren lanean barneratu ez direnek ezin dute aukera galdu. Emanaldian osasunaren arloko agintariek ezarritako protokoloei jarraituko zaie. Kultura segurua dela gogorarazten dizuegu“, azpimarratu du zinegotziak.

Kontzertua

“Claridad no te apartes de mis ojos… escucha, detrás de mis palabras,

el grito de los hombres que no pueden hablar”

Paco Ibáñezek —olerkarien ahotsa, humanista, artista konprometitua— eskaintzen duen kontzertua maitasun, askatasun eta duintasun proposamena da, bidegabekeriaren, indarkeriaren eta izugarrikeriaren kontrako erresistentziaren sinboloa.

Paco Ibáñezen ahotsean eta musikan bilduta, XIII. mendeaz geroztik gaur arte izan diren gaztelaniazko poeta handienen hitzek mendeetan gaindi bidaiatzen dute, Paco abesten duenaren protagonista bihurtzen baita, eta protagonista bihurtzen baititu entzuleak, duintasun pertsonal eta kolektiboaren aldeko erresistentzian lagun.

Bere printzipioak aldatzen ez dituelarik, itsasargi bat izaten jarraitzen du planeta osoan bidegabekeria nagusi den garaiotan. Arrazoia eta poesia da hitzen edertasuna ahaztu den eromenezko garai batean. Dagoeneko hiru gazte belaunaldik ezagutu dute, eta ezagutzen jarraitzen dute, guztiok behar dugun horren bila: hitza.

Haren ahotsak ate misteriotsu eta ezkutu bat irekitzen digu denoi, poesiara daraman ate isil eta liluragarria… askatasunaren atea!

 

 

 

Share

Emakumeen Nazioarteko Egunarekin bat egin du Udal Artxiboak

Inudea eta haurra Florida parkean. 1910 inguruan. Q. ARACAMA

Erakusketa bat izango da beirateetan; Udalaren webgunean ere ikusi ahal izango da, Martxoaren 8an oinarritutako beste erakusketa batekin batera

 

Emakumeen Nazioarteko Egunaren ospakizunarekin bat egin du Gasteizko ‘Pilar Arostegui’ Udal Artxiboak, hainbat kultur ekintzaren bitartez.

Emakumearen Euskal Erakundeak (Emakunde) Martxoaren 8rako proposatutako ‘Nork zaintzen du? Jar dezagun agerian. Egin dezagun dagokiguna’ leman oinarrituta, erakusketa bat egingo du, online. Artxiboaren argazki-funtsetik aukeratutako 20 irudi biltzen ditu erakusketak; zaintze-lanetan diharduten emakumeak ageri dira bertan.

Lehendik 2008an egindako ‘Emakumea Udal Artxiboko argazkietan’ erakutsiak dira argazki horietako zenbait. Erakusketa hartako irudi guztiak online ikus daitezke, baita Udal Artxiboaren galeriako beirateetan ere, tamaina handian.

“Ekintza horien bitartez bat egin nahi dugu Emakumeen Nazioarteko Egunarekin eta Emakundek oraingo honetan —zaintze-lanak nabarmentzeko— proposatu duen kanpainarekin. Bide luzea dago oraindik ere urratzeko. Jar dezagun agerian”, adierazi du Hezkuntza eta Kultura zinegotzi Estíbaliz Cantok.

Argazkiak ikusi

Share