Prentsa Oharren banner

Prentsa-deialdiak (2021-09-27)

Prentsaurrekoa. Gasteiz On udazken-negu ibiltokia aurkeztea

Parte hartzaileak. Merkataritza eta Enplegu zinegotzi Igor Salazar; Eusko Jaurlaritzako merkataritza zuzendari Elena Moreno;  Enpleguaren Sustapen, Merkataritza eta Turismo foru zuzendari Felipe Garcia; eta José González Baloira, Gasteiz On elkarteko zuzendari batzordeko partaidea eta dendaria

Eguna. Astelehena, irailak 27

Ordua. 10:00

Tokia. Gasteiz On elkarteko egoitza (Errementari kalea, 94)

—————————————–

Prentsaurrekoa. Herritartasunerako Eskola Irekiaren programa aurkeztea

Parte hartzaileak.  Herritarren Partaidetza eta Gardentasun zinegotzi Borja Rodríguez; eta Vital Fundazioko zuzendari Arantxa Ibañez de Opacua

Eguna. Astelehena, irailak 27

Ordua. 10:00

Tokia. Udaletxeko prentsa aretoa

——————————————–

Prentsaurrekoa. Udalaren hurrengo LEParen antolakuntza

Parte hartzaileak. Giza Baliabideen zinegotzi Iñaki Gurtubai; eta Gasteizko Udalaren Giza Baliabideen zuzendari Feliciano Pérez

Eguna. Astelehena, irailak 27

Ordua. 10:30

Tokia. Udaletxeko prentsa aretoa

———————————————

Prentsaurrekoa. ‘Alea jacta est’ kontzertua aurkeztea

Parte hartzaileak. Udal Musika Bandaren zuzendari Luis Orduña; María Hinojosa, sopranoa; eta Moisés Évora, narratzailea

Eguna. Astelehena, irailak 27

Ordua. 11:00

Tokia. Teatro Principal Antzokia

Share

Asteburuko aurreikuspenak

Irailak 24, ostirala

  • Gorka Urtaran alkateak Arborikultura Jardunaldiaren amaieran hartuko du parte, 17:15ean, Europa Jauregian.
  • Gorka Urtaran alkatea eta Livia López Osasun eta Kirol zinegotzia 18:15ean Arka plazan izango dira  Farmazialarien Mundu Eguna dela eta antolatutako ekitaldian.
  • Gorka Urtaran alkatea, Ana Oregi alkateordea eta Estibaliz Canto Hezkuntza eta Kultura zinegotzia “Harria” dantza eta poesia ikuskizunaren emanaldian izango dira, 19:00etan, Olarizu parkeko Berde Antzokian.
  • Marian Gutierrez Herritarren Segurtasunerako zinegotzia eta Livia Lopez Osasun eta Kirol zinegotzia Villa Suso jauregian izango dira, 20:00etan, Mugarik Gabeko Bihotza ekimenaren sari banaketan.

 

Irailak 25, larunbata

  • Livia López Kirol eta Osasun zinegotzia eta Estíbaliz Canto Hezkuntza eta Kultura zinegotzia gurpildun aulkiko XXVI.Zuzenak Txapelketan izango dira 19:00etan, Ariznabarra kiroldegian.

 

Irailak 26, igandea

  • Livia Lopez Kirol eta Osasun zinegotzia Espainiako Badminton Txapelketaren sari banaketan izango da 14:00etan, Aranaldeko kiroldegian.
Share

Udalak Aldaiako pista berrien eta Borinbizkarrako baratzen exekuzioa esleitu du; bi proiektuak ‘Mejorando Vitoria-Gasteiz Hobetuz’ programako proiektu parte-hartzaileak dira

Tokiko Gobernu Batzordeak, Herritarren Partaidetzaren, Gardentasunaren eta Gizarte-etxeen Sailak proposatuta, gaur goizean onartu du Aldaiako pista berrien exekuzio-lanen eta Borinbizkarrako baratz berrien esleipena. Bi proiektuak  ‘Mejorando Vitoria-Gasteiz Hobetuz’  prozesu parte-hartzailetik sortu dira eta herritarren botoa jaso zuten programa honen aurreko edizioan.

Aldaian eraikiko diren aire zabaleko kirolguneko lanak BALGORZA SA enpresari esleitu zaizkio. Udalak 313.923,98 euroko (BEZa barne) inbertsioa egingo du. Horrek esan nahi du aurrekontuarekin alderatuta % 20,42ko jaitsiera izan dela. Gainera, enpresak gehienez ere 3 urtera arte epea luzatzeko eskaintza egin du.

Patinekin ibiltzeko pista elipitikoa da proiektuaren oinarria. Oztoporik gabeko 300 metroko luzera eta 4 metroko zabalera izango du. Barnealdean, hainbat diziplina praktikatzeko tokiak egongo dira: futbol-kantxak, saskibaloia, minibasketa, boleibola, badmintona, pilota, eskalatzea… Gainera, berezitasun nabarmenetako bat da jarduerak egiteko pistak estandarizatu gabeko dimentsioekin diseinatu direla; izan ere, kirol inklusiboa sustatzea da helburua.

Bestalde, Tokiko Gobernu Batzordeak Ortubiko baratz komunitarioen urbanizazio-lanen esleipena onartu dio EUROSERVICIOS Y OBRAS FORESTALES SA enpresari, 192.861,95 euroko zenbatekoarekin (BEZa barne); horrek % 19,6ko jaitsiera izan dela esan nahi du. Era berean, enpresa esleipendunak, aurrekontuan pentsatutakoa baino 75 metro koadro zuhaixka-landaketa gehiago txertatu du eskaintzan.

Zabalganan izango den bigarren baratzak 61 lursail izango ditu eta bi eremutan banatuko da. Nagusia  baratz komunitarioez  arduratuko da, eta bigarrena  fruta-arbolen baratzaz. Ekipamenduak eremu komunitarioa izango du eta bertan egongo da komunen eremua eta biltegi eremua, baita topaketa eremua ere, zuhaitzekin, merenderoekin eta pergola batekin.

Bi proiektuak Mugikortasunaren eta Espazio Publikoaren Sailak diseinatu ditu, ‘Mejorando Vitoria-Gasteiz Hobetuz’ proiektuaren bidez Herritarren Partaidetzaren, Gardentasunaren eta Gizarte-etxeen Sailak bultzatuta. Proiektuari esker, herritarrek zuzenean erabaki dezakete udal aurrekontuaren zati bat zertara bideratuko den.

Borja Rodríguez Herritarren Parte-hartzearen zinegotziak gogoratu du bi proiektuak bizilagunek elkartuta egin duten lanaren ondorioak direla. Kasu honetan, Zabalganako bizilagunek bideratu zituzten proposamenak Vitoria-Gasteiz Hobetuz programa parte-hartzailearen bidez, eta azkenik, auzoko hobekuntza-proiektuak egitea lortuko dute. Kirol eremu inklusiboak eta baratz ekologiko komunitarioek inguruan bizi direnen eguneroko bizitzaren kalitatea hobetuko dute”. 

Raimundo Ruiz Escudero Mugikortasunaren eta Eremu Publikoaren zinegotziak nabarmendu du Gasteizko bizilagunei esker, orain arte erabiltzen ez ziren Zabalganako lursailak topaketako, kiroleko eta baratzezaintzako gune bihurtuko direla. Eta horrela, hiria eta eremu publikoa hobetuko ditugu, guztien parte-hartzearekin gure kaleak hobetuz”.

Share

Gasteizek Valentziarekin, Logroñorekin, Fuenlabradarekin, Gijonekin eta Valladolidekin bat egin du mugikortasun digitaleko plataforma bat garatzeko

Udalerrien elkartze horren helburua Garraio, Mugikortasun eta Hiri Agenda Ministerioak deitutako diru-laguntzak eskuratzea da

Gasteizek Valentziarekin, Logroñorekin, Fuenlabradarekin, Gijonekin eta Valladolidekin bat egin du, herritarrentzat mugikortasun digitaleko plataforma bat garatzeko, lortutako datuetatik abiatuta etorkizuneko mugikortasuna planifikatzeko ere balioko duena. Datuak eta portaerak jaso, prozesatu eta ustiatzeko aukera emango duen tresna da, eta ‘hiri konektatuak’ estrategiaren barruan kokatzen da. Izan ere, elkarteko udalerriek informazioa partekatuko dute.

Tokiko Gobernu Batzarrak gaur goizean eman dio oniritzia udalen elkarte horretako kide izateari. Hirien arteko aliantzak Garraio, Mugikortasun eta Hiri Agenda Ministerioaren Next Generation funtsen deialdira aurkeztuko du proiektua. Horren kostu osoa 27 milioitik gorakoa izango litzateke, eta % 90eko diru-laguntza lortuko litzateke. Plataforma digitalaren azken helburua mugikortasun-datuak lortzea eta interpretatzea izango litzateke, eta datu horiei esker etorkizuneko eredu jasangarriagoetara igarotzea.

Kode irekiko eta hiri anitzeko plataforma horrek, besteak beste, hiri-mugikortasuneko hainbat zerbitzu emango lizkieke herritarrei app bakarrean: autobusa, taxia, bizikletak, partekatutako autoa, aparkalekuak, etab. Horrez gain, udalek herritarren mugikortasun-ohiturak ezagutzeko aukera izango lukete, eta big datari esker errazago hartuko lituzkete erabakiak. Proiektua irekita dago eta, beraz, etorkizunean udalerri berriak atxiki ahal izango dira.

 

 

Share

Espazio Publikoak hiriko zuhaitzak indartuko ditu kalitatezko landaketekin, aleen garapena errazteko eta kaleei ingurumen-onurak emateko

Udalak 280.000 euro baino gehiago inbertituko ditu gutxienez hiriko hamar gunetan



Gasteizko Udaleko Mugikortasun eta Espazio Publiko Sailak 282.139,87 euro inbertituko ditu aurtengo neguan auzoetako zuhaitzak hobetzeko. Tokiko Gobernu Batzarrak gaur goizean onartu du lan horiek kontratatzeko espedientea, hiriko hamar gunetan zuhaitzak landatzeko.

“Gure hiriari zuhaitz gehiago gehitu nahi dizkiogu, gaur egun 112.000 unitate baino gehiago baititu. Baina, era berean, eta hau oso garrantzitsua da, ale berri horiek kalitate handiagokoak izatea nahi dugu, garatu daitezela eta tamaina handiagoa har dezatela, eta horrela ingurumen-onura handiagoak ekar diezazkiotela hiriari “, azaldu du Raimundo Ruiz de Escudero Mugikortasun eta Espazio Publikoko zinegotziak.

Ildo horretan, planteamenduak bikaintasuna bilatzen du: zuhaitz-etorbide handiak lortzea, horien onurak onargarriak eta eraginkorrak izan daitezen. Horregatik, enpresa esleipendunak ondo prestatu beharko du lurra, kalitatezko zuhaitzak landatu beharko ditu eta mantentze-lanez arduratu beharko du 2 urtez. Udalak landatuko diren ingururako egokiak diren espezieak aukeratuko ditu.

Aurreikusitako jarduketen ardatzak honako hauek dira: Elorriagako Atea, Salburuako aerodromoa, Estrasburgo etorbidea, Lakua Arriaga ingurua, Ibaiondo kiroldegia, Wellington Dukearen etorbidea, Autobus Geltokia, Bastida plaza, Zabalgana etorbidea Antoniako biribilguneraino eta Oto hiribidea. Lanek bi hilabete eta erdiko epea izango dute.

 

Share

Aurrera jarraitzen du asfaltatzeko eta espaloiak hobetzeko lanak,  270.000 euroko inbertsioa duten bi kontratu esleituta

Aurrera doa Urtaranen gobernuak Gasteizko aparkalekuak eraberritzeko, asfaltatze-lanak egiteko eta espaloiak hobetzeko  sustatutako plana. Estrategia horren baitako bi kontratu esleitu ditu Gobernu Batzarrak gaur goizean, eta 270.000 euroko inbertsioa egingo da.

Lehenak 190.000 euroko zuzkidura ekonomikoa du eta Firmes Alaveses eta Yarritu enpresek eratutako aldi baterako enpresa-elkarteari esleitu zaio. Esku hartzen horren bitartez, hiriko 13 kaletako errepideetako asfaltoa hobetuko da. Hilabeteko epean egingo dira lanak, eta hainbat gunetako zoladura eraberrituko da, hobetu eta aldatuta.  Kale hauetako gune zehatzetan egingo dira lanak:

Adriano VI.a
Argentina
Tomas Zumarraga Dohatsua
Serafín Ajuria Margolaria
Amurrio
Agirrelanda
Mexiko
Jose Atxotegi
Florida
Ayala Kantzilerra
Manuel Iradier
Jose Mardones
Jose Lejarreta

 

Horretaz gain,  hiriko 1.500 metro karratu espaloi hobetzeko kontratua esleitu dio Promociones y Pavimentaciones Balgorza enpresari. Ia 80.000 euroko inbertsioa da. Lanek urtebeteko epean gauzatu behar dira. Espaloiak 2-3 cm lodiko asfalto urtu beltzez konponduko dira, eta leku batzuetan asfalto leunduz.

Halaber, Gasteiz hobetzeko lan horietaz gain, Mendizabaleko aparkalekua eraberritzeko kontratua ere esleitu da. Milioi bat euroko inbertsioa egingo da. Lanak 6 asteko iraupena izango du. “Jarduera horiek guztiek eragin zuzena dute gure espazio publikoaren kalitatean, eta mugikortasuna hobetzen dute oinez, bizikletaz edo ibilgailu pribatuz egiten delarik ere“, azaldu du Raimundo Ruiz de Escudero Mugikortasun eta Espazio Publikoko zinegotziak.

 

 

Share

Udalak leku gehiago eskainiko du gizarte-etxeetako, kirol-instalazioetako eta BIZAN sareko jardueretan

Eusko Jaurlaritzak edukiera % 75era handitu duenez, jende gehiagok eman ahalko du izena ikastaro askotan

 

Udalak urriaren 4an irekiko du gizarte-etxeetako, kirol-instalazioetako eta adinekoen BIZAN sareko jardueretako leku libreetan izena emateko epea. Covid19ari aurre egiteko osasun-jarraibide berriek ikastaroak egiten diren guneen edukiera % 75era handitzeko aukera ematen dute, eta Gasteizko udalak horietako askotan leku kopurua handitzea erabaki du.

Hutsik geratu diren lekuen zerrenda irailaren 29an argitaratuko da udalaren webgunean. Jarduerak programatzeaz arduratzen diren sailak aztertzen ari dira zein ikastarotan den bideragarri parte-hartzaileen kopurua handitzea.

Irailaren 29tik urriaren 3ra bitartean informazio- eta kontsulta-aldi bat egin ondoren, urriaren 4ko 8:30ean irekiko da leku libreetan izena emateko epea. Hainbat bide egongo da horretarako: udalaren webgunea (gomendatua), 010 telefonora deitzea, edo aurrez aurre egitea edozein gizarte-etxe edo kirol-instalaziotan.

Jarduera hasita badago, prezioa murriztu egingo da, parte-hartzerik izan ez den saio-kopuruaren arabera.

Prozesu honek ez die eragingo genero-berdintasunerako jarduerei, euskara ikastaroei, ingurumen hezkuntzarekin zerikusia duten jarduerei, eta Gauekoak eta Xtraclub programei. Hala ere, jarduera horietako batzuetan handitu egingo da leku-kopurua, eta eutsi egingo zaie izena emateko aurreikusitako epeei. Era berean, igerilekuetako jardueretan oraingoz ez dira plazak handituko, aldagelen erabileraren mugek indarrean jarraitzen baitute.

 

 

 

 

 

 

Share

Miriam Isasik ‘Tósigo’ erakusketa aurkeztu du Montehermoso kulturunean

Irailaren 21era arte izango da ikusgai lehen solairuko aretoan

 

Miriam Isasiren ‘Tósigo’ erakusketa aurkeztu dute Montehermoso kulturunean. Gaurtik, irailak 24, azaroaren 21era bitartean izango da ikusgai lehen solairuko aretoan. Hezkuntza eta Kultura zuzendari Paco Galvek eta erakusketaren egile Miriam Isasik hartu dute parte prentsaurrekoan. 

2020ko deialdian hautatutako lau proiektu artistikoetatik laugarrena da ‘Tósigo’.

Prestameroren Herbario Historikoa oinarritzat hartuz egindako dokumentazio eta artxibatze lan baten bidez, landare toxikoenetako batzuen testuingurura hurbildu da artista.

“‘Tósigo’ erakusketan hainbat landare toxikoren mitologian, historian eta herri-imajinarioan oinarritutako kontakizunak biltzen dira, pozoia biziraupenerako, botererako eta jendea mendean hartzeko tresna nola erabili izan den erakusteko“, azaldu du Galvek.

Egilea

Miriam Isasi Arce Arte Ederretan doktorea da Euskal Herriko Unibertsitatetik, eta Mexiko hiriko UNAMen egin zuen nazioarteko egonaldia.

Prozesuen eta esperimentazioaren arteko zubiak sortzea da haren lanaren ardatza. Haren proiektuak leku jakinetan definitzen dira, horietan ekintzatik esku hartzen baitu. Lurraldea bera eta lurraldearen berezitasunak etengabeak dira haren lanean.

Zenbait artistak emandako lantegi eta mintegietan hartu du parte: Antoni Muntadas, Francesc Torres eta Isidoro Valcárcel Medina, besteak beste.

Aipatutako ikasketa akademikoez gain, hainbat erakunderen sostengua eta dirulaguntzak jaso ditu proiektu eta erakusketetarako: Eusko Jaurlaritza; Bizkaiko Foru Aldundia; Bilboko, Gasteizko eta Basauriko udalak; Bilbao Ekintza; Ikertu; Azkuna Zentroa; Montehermoso kulturunea; Tabakalera; Etxepare euskal institutua; Juan eta Pablo Otaola beka (Basauri); Bilbaoarte fundazioa; Cristina Enea fundazioa; MAEC-AECID (Erromako Espainiaren Akademia), MUSAC eta Artium.

Jarrera garaikide batetik, antropologiari, historiari, aktibismoari, parasitismoari, paisaiari eta memoriari keinuak eginez eraikitzen du bere diskurtsoa, horiek elikagaitzat erabiliz.

 

Share

Atxilotua espetxean sartzeko bi errekisitoria judizialen zain

Udaltzaingoak 30 urteko gizonezko bat atxilotu zuen atzo. Espetxean sartzeko bi errekisitoria judizial zituen bere kargura.

Udaltzainek Paraguay kalean atxilotu zuten, Arriagako Atea kaleko merkataritza gune batean hainbat produktu lapurtu ostean. Dokumentazioa egiaztatu ostean konturatu ziren espetxean sartzeko bi agindu zituela gauzatu gabe eta agindu horiek exekutatzeari ekin zioten.

Share

Udalak 11.000 euro emango dizkio Santa Maria katedralari, hezkuntza jarduerak egiteko

Tokiko Gobernu Batzarrak Santa Maria Katedrala Fundazioarekiko lankidetza-hitzarmena onetsi du. Horren bidez, 11.000 euro jarriko ditu Hezkuntza eta Kultura Sailak, 2021-2022 ikasturtean hezkuntza-programa bat gauzatzeko.

‘Ibilbide historiko-artistikoak’ ekimenaren barruan, lantegiak eta bisitak egingo dira Santa Maria katedralera eta Argiaren Elizpera.  “Baliabide pedagogiko horri esker, DLH, DBH, DBHO eta HHIko ikasleek Gasteizko hiriaren jatorria eta kultura-ondarearen ezaugarriak ezagutzeko aukera izango dute”, azaldu du Hezkuntza eta Kultura zinegotzi Estíbaliz Cantok.

2021eko urriaren 15etik 2022ko ekainaren 30era bitartean egingo dira jarduera horiek.

Share