Prentsa Oharren banner

Gasteiz Afrikako kulturara hurbilduko da

Maiatzaren 25era arte Afrikaren Astearen IV. edizioa egingo da

 

Gasteizko afrikar komunitateak Afrikaren IV. Astea egingo du maiatzaren 25era arte. Hainbat jarduerari esker, Arabako hiriburuak hirian bizi diren kontinente horretako 11.000 pertsona ingururen kultura hurbiletik ezagutzeko aukera izango du.

Garapenerako Lankidetzako zinegotzi Jon Armentiak aurkeztu ditu ekitaldiak hamabost bat afrikar erakunde biltzen dituen Afrikar Diaspora Euskadin partzuergoko ordezkariekin batera.

Hurrengo asteartera arte hitzaldiak, zinema, erakusketa bat eta emakumeen lantegi bat egingo dira. Amaitzeko, Udalak harrera bat egingo du maiatzaren 25ean, Afrikaren Eguna, Aihotz plazan, eta dantza afrikarrak musika euskaldunarekin uztartuko dituen emankizun bat egongo da.

“Kulturak elkartu nahi ditugu afrikarrak gure hirian integratuta daudela adierazteko. Aste honi esker bere kultura ezagutzeko, aurreiritziak ezabatzeko eta senidetasuna, bizikidetza eta giza eskubideen errespetua bezalako balioak sustatzeko aukera izango dugu”, azaldu du Jon Armentiak.

Azken urteotan, Gasteizko Udalak Garapenerako Lankidetza Zerbitzuaren eta Hezkuntza eta Kultura Sailaren bidez babestu ditu ekitaldi horiek.

+ info: https://bit.ly/2S8cw5q

 

Share

Gasteizek bere estrategia turistikoa indartu du sektorearekin batera, eta online ordainketa aktibatu du bisita gidatuetan

Udalak berriro heldu dio 3D betaurrekoekiko ibilbide bati; horretan, denboran atzera egin, eta 1850eko hiria ikus daiteke

Ekonomia Sustapenerako Sailak Europako zazpi herrialdetako turismo-agente eta kazetariak gonbidatu ditu hiria ezagutzera eta helmuga jasangarri gisa duen potentziala hedatzera

 

Gasteizko Udala amaitzen ari da 2021-2024 Turismoaren Plan Estrategikoa egiten; horrek hurrengo lau urteetarako jarduketa-ildoak zehaztuko ditu, sektorearekin batera eta Euskal Autonomia Erkidegoko erakundeetako teknikarien ekarpenekin. Arabako hiriburuko eta Arabako turismo-agenteen lankidetzak funtsezko zeregina du proiektuaren fase guztietan. Datorren hilean amaituko da proiektuaren idazketa. Ezarritako prozeduraren barruan, 30 elkarrizketa eta online galde-sorta egingo zaizkie 18 erakundetako ordezkariri, eta hori osatuko da Turismo Mahaiak jasotako iradokizunekin; mahaian, elkarteak, erakunde publikoak eta lurraldeko baliabide turistiko nagusien ordezkariak daude. Planaren eguneraketa funtsezko une batean iritsi da, dokumentuak ezarriko baititu pandemiak eragindako krisiaren osteko lan-ildoak. Lehenengo alkateorde eta Ekonomia Sustapenaren zinegotzi Maider Etxebarriak azpimarratu duenez, “sektorearen iradokizunak eta erakundeen arteko koordinazioak emaitzak ematen ari dira, eta argi dugu Gasteizek ahalik eta gehien ustiatu behar duela duen irudia: helmuga jasangarria, segurua, masifikatu gabea eta familian bidaiatzeko, kirola egiteko eta gastronomiaz gozatzeko ezin hobea. Halaber, sektore pribatuaren eta publikoaren arteko aliantzak eratu behar ditugu, hiria promozionatzeko”.

Plan Estrategikoaren idazketa aurrera doan bitartean, Gasteizek dagoeneko abian jarri du hobekuntza bat hiria deskubritzeko eskaintzen dituen ibilbide gidatuen inguruan. Zehazki, Turismo Bulegoak aktibatu du bisita gidatuak online erosteko aukera, horren bidez 15 ibilbide erreserbatu eta ordaindu daitezke udalaren webgunearen bidez —www.vitoria-gasteiz.org—. Edozein ibilbide egiteko, badago COVID protokolo bat, parte hartzen duten guztiek jarraitu beharrekoa. Horretaz gain, LABIk osasunaren arloko neurriak eguneratzeak sektorerako betekizunak malgutu ditu, eta, aste honetatik aurrera, taldeak sei pertsona artekoak izan daitezke, gida-eginkizuna egiten duen pertsona barne, orain arte baino bi gehiago.

 

3D betaurrekoak

Gainera, bisita gidatuen zerrendak —https://bit.ly/3t3q1jU webgunean eskuragarria— 3D esperientzia bat gehitu du hil honetan. Erdi Aroko hirigunean zeharreko ibilbide gidatua da; horretan, denboran atzera egin daiteke, 1850eko hirira, betaurreko birtualei esker. Bisitariek garaiko toki eta eraikuntza nabarmenak ikusi ahal izango dituzte, hala nola Andre Maria Zuriaren plaza, Erdi Aroko hirigunerako portaleak, antzinako San Frantzisko komentuaren ingurunea eta Bakardade kantoiaren aldeko harresia. Bisita paregabe hori, ordu eta erdiko iraupenekoa, berriz ere hasi da, pandemiaren ondorioz azken urtean etenda egon ostean.

Turismo Bulegoaren 3D ibilbideak osatzen duen zerrendaren barruan aipagarriak dira, halaber, joan den urtearen amaieran abian jarri ziren hiru ibilbide berri: “Ibilbide Gozoa” —hiriaren gozogintzako ehun urtetik gorako tradizioa ezagutzeko aukera ematen du—, “Barre egiten duen hiriaren istorioak” —hirian umoreak mendeetan zehar izan duen bilakaerari buruzkoa— eta “Eskulturen ibilbidea” —Gasteiz aire zabaleko museo bihurtzen duten obrak bisitatzen ditu—.

Gainera, National Geographicek 2021ean bidaiatzeko 25 helmuga onenetakoa aukeratu ondoren Gasteizek toki seguru gisa bere burua ezagutarazi nahi duenez, Ekonomia Sustapenerako Sailak Europako zazpi herrialdetako turismo-agente eta komunikabideak gonbidatu ditu hiria ezagutzera eta helmuga jasangarri gisa duen potentziala hedatzera. Zehazki, ekintzak planteatu dira Alemaniako, Frantziako, Ingalaterrako, Italiako, Danimarkako, Belgikako eta Herbehereetako agente eta kazetariekin.

Barne sustapeneko atalaren barruan, Biltzar eta Turismo Zerbitzuak hurbileko merkatuan lan egiten du, osasun-egoera eta mugikortasun-mugak kontuan izango dituzten kanpaina berriekin.

Etxebarriak gogorarazi du turismoaren sektorerako laguntza bereziak laster argitaratzean ere badiharduela Udalak; iaz lehenengo aldiz egon ziren 40.000 euroko berariazko dirulaguntzak sektorearentzat. Alkateordeak azaldu du oraingoan 100.000 euroko zenbatekoa izango dela Ekonomia Sustapenerako laguntzen planaren lehenengo fasearen barruan, eta zenbateko horrek “aukera emango duela bidaia-agentzien, giden, biltzarrak antolatzeari lotutako enpresen eta hotel-establezimendu txikien gastu arrunta ordaintzeko”.

 

Informazio gehiago:

http://v-g.eus/bisitaenpresak

 

 

Share

Gasteizek estatuko hirien buruan jarraitzen du garapen jasangarriko helburuen betetze-mailan

Udalak Garapen Jasangarrirako Espainiako Sareari eskatu dio datozen edizioetan txostenean adierazle guztiak jasotzeko; izan ere, oraingo honetan, EAEko hiriburuaren 101 adierazleen arteko 20 ebaluatu gabe geratu dira.

 

Gorka Urtaran alkatearen adierazpenak

Gasteiz Estatuko hirien buruan dago berriz ere Garapen Jasangarriko Helburuen betetze-mailari dagokionez, Garapen Jasangarrirako Espainiako Sareak bi urtean behin egiten duen txostenean egiaztatzen denez. Hala ere, Gasteizko Udalak datozen edizioetan txostenean adierazle guztiak jasotzeko eskatu dio erakunde antolatzaileari, oraingo honetan 101 adierazleen arteko 20 ebaluatu gabe geratu baitira.

Udalak “GJHak Espainiako ehun hiritan” txostena aurkezteko ekitaldian parte hartu du gaur, horien betetze-mailan buru denez gonbidatu berezia izan baita udalerria. Azterketaren bigarren edizio honetan egiaztatu da Gasteizek buru izaten jarraitzen duela helburu horien betetze-mailan.  Hiriak hobera egin du. Izan ere, nota ona lortu du txostenak berak udal ekintzarekin lotuagotzat jotzen dituen jasangarritasun-adierazleetan.

Emaitzak ez dira ranking moduan aurkezten, panelen eta banakako fitxen bidez baizik, baina, oro har, euskal hiriburuak hobera egin du. GJH gehiagotan betetze-maila gorena lortu duen udalerria da, sei guztira, duela bi urteko bosten aldean, eta bat ere ez gorriz, orduan bezala.  Rankingaren punturik gorenean dauden ekintzak hauek dira: 5 (genero-berdintasuna), 6 (ur garbia eta saneamendua), 12 (ekoizpen eta kontsumo arduratsua), 13 (klimaren aldeko ekintza), 16 (bakea, justizia eta erakunde sendoak) eta 17 (helburuak lortzeko aliantzak).

Gorka Urtaran alkatea pozik agertu da ikerketak “berresten duelako Nazio Batuek 2030 Agendaren barruan 2015ean ezarritako GJHak gehien betetzen dituzten hirien artean dagoela gurea “.  Txostenak berretsi egiten du konpromisoari eusten diogula, eta ildo beretik lan egiten jarraitzera animatzen gaitu, udal ekintzaren alderdi guztietan.

Balorazio on hori gorabehera, udala kritiko agertu da erabilitako metodologiarekin, hogei adierazle ez direlako baloratu Gasteizen kasuan. Alkatetzako koordinatzaile nagusi Jonatan Morenok azaldu duenez, esate baterako, 1. GIHa (pobreziaren amaiera) ez da ebaluatu, eta hiria ere ez da “aztertu” beste GIH batzuk osatzen dituzten adierazle askotan, nahiz eta horretarako datuak izan. Barnealdeko hirietarako ebaluatu zitezkeen 101 adierazleetatik, 81 adierazle baino ez dira aintzat hartu Gasteizi dagokionez. Eremu sozioekonomikoko hogei adierazle dira, horietako batzuk oso garrantzitsuak, hala nola biztanleko gastu soziala. Bazegoen datu horiek eskuratzerik kaudimen handieneko erakunde ofizialetan, EUSTATen (Euskal Estatistika Erakundea), esate baterako.

Ebaluazioa, beraz, osagabea da; izan ere, adierazle horiek kontuan hartu izan balira emaitza orokorra hobea zatekeen, eta betetze-maila handiagoa. Hori dela eta, Gasteiz desabantaila-egoeran dago beste hiri batzuekin alderatuta, horien azterlanean kontuan hartu baitira adierazle posible guztiak. Hala ere, “analisiak ahalik eta argazki errealistena egitea du helburutzat, hobetzen jarraitu ahal izateko“, argitu du Morenok. Horregatik, dagoeneko eskatu dio REDSi datozen edizioetan txostenak iturri ofizial gehiago erabil ditzan adierazle guztiak ebaluatu ahal izateko. Irudi fidela emateko, datu-iturri ofizial guztiak hartu beharko lirateke kontuan.

Nolanahi ere, alkateak argi utzi nahi izan du emaitza on horiek “erakundeen arrakastaz gain herritarren arrakasta dela bereziki, helburu horiek lortzen inplikatu direlako“. Era berean, tokiko gobernuen lana nabarmendu nahi izan du, argi izan baitute hiriak norantz bideratu behar duen, “planetarekiko eta bertan bizi garen pertsonekiko errespetua gidari dela. Hobetzeko tartea dugu, eta lan horretan ahaleginduko gara”.

 

Share

National Geographic-ek Gasteiz aukeratu du 2021ean bidaiatzeko turismogune onenen artean

Mundu osoko beste 25 lekurekin batera aukeratu dute. Horien artean daude Argentinako Los Glaciares eta Guam uhartea, besteak beste

National Geographic aldizkari entzutetsuak 2021ean bidaiatzeko 25 toki onenen zerrenda egin du, eta horien artean dago Gasteiz. ‘Best of the World 2021’ izenburuarekin, eta “orain amesteko eta geroago bidaiatzeko 25 turismogune” lelopean, Arabako hiriburua aukeratu dute nazioarteko beste zenbait turismogunerekin batera, hala nola Dominika, Los Glaciares (Argentina), Columbia Britainiarra (Kanada) edo Guam uhartea. Horiek guztiak “etorkizuneko gure ibilbideak zehaztuko dituzten denboraz kanpoko leku” gisa definitu ditu argitalpenak berberak.

Nazioarte mailan aldizkariak dituen erredakzio batzuek eta besteek mundu osoko txokoak ebaluatu dituzte eta Gasteiz aukeratu dute Kultura & Historia atalean. Haien arabera, “urteak daramatza iraunkortasuna ulertzeko duen moduagatik nabarmentzen, baina baita hirigintza berdeari artelan asko gehitzeko eta hiriko metropoli handien mailako kultur programazioa eskaintzeko gai izan delako ere”.

Argitalpenak bereziki nabarmendu du Arabako hiriak “sortzen ari diren artistak eta artista gogoangarriak” jasotzen dituela Nazioarteko Jazzaldian. Halaber, National Geographic-en artikuluak nabarmentzen du Arabako hiriburuko parke eta lorategiei esker, bertako biztanleek “Espainiako beste edozein hiritan baino berdegune gehiago dutela bertako metro koadro kopurua aintzat hartuta” Horrekin lotuta, aldizkariak gogorarazi du “hiriko natura mantentzeko esfortzuei” eta “mugikortasun iraunkorraren aldeko apustuari” esker, Gasteizek 2012an Europako Hiriburu Berdearen titulua eskuratu zuela.

Gure hiria aukeratu dute munduko bidaia-aldizkari ospetsuenetako batean 2021ean bisitatzeko 25 turismogune onenen artean. ‘Best of the World’ zerrendan agertuta, Gasteiz nazioarteko arretagunean jarri da, eta horrek dagokion moduko entzutea eman dio haren izaera iraunkorragatik eta ondare kultural eta ardo nahiz gastronomia arloko ondare zabalagatik. Pandemiak gogor jo du turismoaren sektorea, eta jarduera ahalik eta lasterren berreskuratzeko prestatzen ari den garaiotan, National Geographic-en aipamenak eragin bikaina du Gasteizen posizionamenduan. Gasteiztar guztiak oso harro senti daitezke hiriaz”. Hala esan du Maider Etxebarriak, alkateorde eta Turismo zinegotzia denak.

National Geographic-ek tradizioa mantentzeko biztanleek duten pasioa ere nabarmendu du, bereziki alde zaharrean, “Erdi Aroko artisauen gremioen izenak dituzten” kaleak baitituzte eta “bertakoek taberna eta jatetxeak gainezka betetzen dituzte” pintxo ezagunak dastatzeko. Gainera, adierazi dutenez, Gasteiz “gune bikaina da gertu dauden Arabako Errioxako mahastizaintzako eta ardogintzako lekuak eta Araba probintziako barnealdeko eremuak bisitatzeko”.

Hiriko leku enblematikoen artean, aldizkariak Santa Maria Katedralaren “dotorezia gotikoa” aipatu du. Eta haren harira, aipatu du “berez turismogune bihurtzea lortu duela”. Horrez gain, Andre Mari Zuriaren Enparantza ere nabarmendu du, “abuztuko jai handien agertoki” gisa, Zeledon pertsonaia “hegan” jaisten denean, jaiei hasiera emateko.

Bigarren aipamena hamabost egunetan

Hil honetan Arabako hiriburuak jaso duen turismo arloko bigarren aipamena da National Geographic-ena. Joan den azaroaren 6an, nazio mailan Pet Friendly 2020 Turismogune aitorpena jasotzeko hautagai gisa izendatu zuten maskotekin turismoa egiteko Travelguau plataformako erabiltzaileek. Sari horretarako bozketak zabalik dira, eta irabaziz gero, Arabako hiriburua txakurrarekin bidaiatzeko turismogune onena dela aitortuko luke.

Share

‘Ikusarazi beharreko historia: emakumeak Gasteizen’ ibilbidea

 

Hezkuntza Zerbitzuak ibilbide historiko-artistiko berria prestatu du emakumeek hiriaren historiari egindako ekarpenaren balioa nabarmentzeko.

Hezkuntza Zerbitzuak ibilbide historiko-artistiko berri bat prestatu du, “Ikusarazi beharreko historia: emakumeak Gasteizen” deiturikoa, emakumeek Arabako hiriburuaren historiari egin dioten ekarpena onartu eta baloratzeko.

“Gasteiz, hiri hezitzailea” programaren barruko jarduera hau DBH, DBHO, eta HHIko ikasleei zein helduen taldeei zuzentzen zaie. Gida didaktikoa eta bideo bat ditu, eta horien bitartez, hiriko emakumeak non eta nola bizi ziren, eta zein zeregin eta ardura zituzten azaltzen da. Emakumeek urteetan zehar hainbat arlotan –politika, gizarte, arte eta ekonomian – izandako partaidetza azaltzen da.

“Ibilbide berri honekin emakumeek Gasteizko historiari egindako ekarpena onartu eta baloratu nahi dugu, gure hiriaren “irakurketa” historikoa hobetu, eta emakumeen errealitate ahaztu horren aurrean pentsamendu kritikoa sustatu, genero-berdintasunari dagokionez jarrera koherente eta aktiboa erraztuz” adierazi du Hezkuntza eta Kultura zinegotzi Estibaliz Cantok.

Historia gizonek idatzi eta kontatu dutela erakusten du materialak; gizonen ekarpena islatzen duela, emakumeak eta horien ekarpena ikusezin bihurtuz. Beste zenbait gai ere jorratzen ditu, esaterako, historia ofizialean goiko mailek duten gehiegizko ordezkaritza, antzinako “emakume” idealak eta rolak, emakumeek hazkuntzan eta zaintzan egindako ekarpena, eta gaur eguneko indarkeria eta genero-desberdintasuna.

Hauxe da proposatutako ibilbidea: Emakumeen Etxetik hasita, Santa Maria plaza, Eskoriatza-Eskibel jauregia, garai bateko Arte eta Lanbide Eskola, Montehermoso jauregia, Alava jauregia, San Pedro eliza, Errementari kalea, Buruileria plaza, Sokaren Etxea, udaletxea, Dato kalea eta Andre Maria Zuriaren plaza.

Dagoeneko programatuta dauden beste hauei gehitzen zaie ibilbidea: ‘Erdi Aroko Gasteiz’, ‘Gasteiz Neoklasikoa’, ‘XIX. mendeko zabalgunea’, ‘Idazketa eta idatzitakoa’, ‘San Pedro eliza’, ‘Udala’, Bisita Santa Maria katedralera’, ‘Lantegiak Santa Maria katedralean’ eta ‘Argiaren elizpea’.

Informazio gehiago 

 

 

Share

La Vueltak Arabara itzuliko da Gasteiztik irtengo den etapa batekin eta atseden egun batekin

  • Txirrindularitza errondak pasabide esanguratsua izango du Lurraldetik 2020an, Gasteiztik irten eta Gaubeara iritsiko dena, bi gaualdiez gain.

 

 

Gorka Urtaran eta Juan Carlos Ramirez Gasteizko eta Gaubeako alkateek, Ramiro Gonzalez Arabako ahaldun nagusiak, Javier Guillen Unipublic-eko zuzendariak eta Joseba Beloki Vueltako txirrindulari ohiak Gasteiz eta Villanueva de Valdegovía lotuko dituen jardunaldia aurkeztu dute gaur, 159,7 kilometroren ostean.

Horren harira, Gorka Urtaran Gasteizko alkatea pozik agertu da horrelako lasterketa bat berriro ere hiriburuan izango delako. “Gasteiz bizikletari estu lotutako hiria da. Kirol-ibilbideagatik, industria-loturagatik eta milaka herritarrek mugitzeko, bizimodu osasungarria izateko eta etorkizun iraunkorrago batekin konprometitzeko modu bat pedalei eragiten egin dutelako gara. La Vuelta bezalako proba baten irteera hartzeak bizikletarekin dugun lotura indartzen du “, esan du.

Aurkezpenean Ramiro Gonzalez ahaldun nagusia izan da, eta pozik agertu da lehiaketa Lurraldetik igaro delako. “Jakin badakigu tropel handia, munduko txirrindularitzako profesionalik onenek osatua, telebistako erakusleiho handienetako bat dela, eta kirol honek duen zaletasun handia gure errepideetan gertatzen denari adi egongo dela. Ezagutzera eman nahi dugu, Arabako ateak ireki txirrindulari zaleei, eta modu eraginkorrean egiteko, eskuarki egin behar dugu. Jarraipena izan behar dugu “.

“Jardunaldiak Urduñako gainetik (1.) bi pasabide izango ditu, % 14ko desnibel ertaineko arrapalekin. Azken urratsa helmugatik 18 kilometrora dago, beraz, gailurrean lortzen diren aldeak funtsezkoak izango dira. Denbora pixka bat galtzen duen edozein txirrindulari oso kaltetua izan daiteke, helmugaraino geratzen den eremua lasterketako buruak aldeak zabaltzeko mesedegarria delako”, adierazi du Guillenek.

Egun batzuk badira Vueltako antolatzaileek iragarri dutela zaleek ezin izango dutela Urduñako mendatean lasterkariei babesa eman segurtasun arrazoiengatik, baina interesa dutenek Gasteizko kaleetan zehar ikusi ahal izango dute tropela. Mendizabalatik irtengo da etapa, bertan egongo baita sinaduren kontrola, eta Duranarako bidea hartuko du Salburutik pasatuta.

 

Bi gau Araban

Baina kirol arloaz gain, 2020an Arabarekin eta Gasteizekin harreman estua izango du Vueltak. Edizio honen ezohiko garapenagatik, txirrindulariek Col du Tourmalet gainean amaituko den urriaren 25eko etapa amaitu bezain laster egingo dute lekualdaketa Arabako hiriburura. Bertan, lehenengo gau batean atseden hartuko dute, Lurraldeko lehen atseden egunari ekin aurretik. Bigarren gaua igaro ostean, tropelak La Vuelta honetako Arabako etapari egingo dio aurre.

Share