Prentsa Oharren banner

Gizarte zerbitzuek etxebizitza galtzearekin lotutako egoeretan zeuden 163 familiari lagundu diete urtearen lehen seihilekoan

  • Zaurgarritasunari buruzko 100 txosten egin dituzte epaitegietan etxe-kaleratzeak geldiarazteko

 

Gizarte Politiken, Adinekoen eta Haurren Sailak etxe-kaleratzeek eta etxebizitza galtzeak eragindako 163 familiari lagundu diete aurten.

Udaletxean egindakoa batzordean, Gizarte Gaien zinegotzi Jon Armentiak azaldu du zein izan den udalaren jarduna alor horretan, eta nabarmendu du “saila guztiz inplikatuta” dagoela “egoera horiek prebenitu eta aurre egiteko“. 

2021eko lehen seihilekoan gizarte-zerbitzuek etxegabetzeekin eta bizilekua galtzearekin lotutako 63 egoera antzeman dituzte, eta prestazio ekonomikoak edo ordezko ostatuak eskaini dizkiete familiei.

Zehazki, urteko lehen sei hilabeteetan 13 familiarentzako ostatua ordaindu dute hiriko apartamentu turistikoetan, 23.500 euroko kostuarekin. 13 familia horietatik 8k apartamentuetan bizitzen jarraitzen dute.

Gizarte zerbitzuek antzemandako 63 egoera horietaz gain, epaitegiek 100 etxegabetze jakinarazi dituzte, eta Gizarte Politiken, Adinekoen eta Haurren Sailak zaurgarritasunari buruzko beste horrenbeste txosten egin ditu, kaleratzeak eteteko.

 

Prestazioak eta errekurtsoak

Gizarte-zerbitzuek zenbait baliabide jartzen dituzte etxebizitza galtzen duten edo beste zaurgarritasun-egoera batzuetan dauden familien eskura, batetik, tutoretzapeko etxebizitzen programa —21 etxebizitza dira, eta 2020an 136 pertsonari eman zitzaien ostatu— eta bestetik harrera-etxebizitzen programa —9 etxebizitza eta 40 pertsona—.

21 Zabalgunearekin batera ari gara lanean baliabide horiek handitzeko, zehazki, alokatzeko etxebizitzen programa berrirako 4 etxebizitza egokituz eta beste 4 gizarte larrialdietarako harrera programarako“, azaldu du Jon Armentiak.

Gogoratu beharra dago, orobat, gizarte-zerbitzuek 2 milioi euro kudeatu zituztela iaz familientzako laguntzetan, etxebizitzaren alokairuari aurre egiterik izan zezaten, eta beste 2,3 milioi OHZ, ura, komunitatea etab. ordaintzeko.

Share

Udalak eta Zentzuz sareak Gasteizko zaintzaileei eta etxeko langileei buruzko ikerlan bat aurkeztu dute

Cuidadoras Migradas, el Sur de nuestro Norte lana Garapenean Laguntzeko Zerbitzuaren hitzarmen baten emaitza da.

 

Jon Armentia zinegotziak zuzentzen duen Gasteizko Udalaren Garapenean Laguntzeko Zerbitzuak eta Bidezko Merkataritza eta Kontsumo Arduratsuko Zentzuz Sarearekin batera, Gasteizen bizi eta etzeko langile edo zaintzaile lanetan diharduten 30 emakume migratzaileren lan-baldintzei eta esperientziei buruzko ikerlan bat aurkeztu dute gaur goizean.

Garapenean Laguntzeko Zerbitzuaren laguntza bitarte, 2020an eta 2021ean Zentzuz Sareak ikerketa-ekintza partizipatiboko (IAP) lan bat egin du, Cuidadoras Migradas, el Sur de nuestro Norte izenpean.Lana Covid-19aren pandemiaren bete-betean hasi eta amaitu zen, jatorri desberdin eta anitzeko 30 emakumerekin, zein Gasteizen etxeko lanetan eta jendea zaintzen diharduten. Ikerlanaren xedea globalizazioaren testuinguruan gertatzen diren migrazioen feminizazioa ikusaraztea da, bai eta egiten duten lanarekin lotuta migrazio-prozesuan bizi dituzten arazoak ere.

“Ikerketak protagonistei ahotsa ematen die eta emakume horien historia pertsonalak eta migrazio-prozesuak ikusarazten ditu. Gizarte gisa ulertu behar dugu lan-jarduera horren garrantzia, baita justizia soziala dela ere, lan-baldintza eta soldata bidezkoak eta duinak ematea. Udalaren eta Lankidetza Zerbitzuaren izenean, bereziki eskerrak eman nahi dizkiet parte hartu duten 30 emakume langileei eta Zentzuzi“, adierazi du Jon Armentia Garapenerako Lankidetza zinegotziak.

Lanak kate globalen konplexutasuna  ondorioztatzen du, eta gure gizartean etxeko lanen eta zainketen arloan lan egiten duten emakumeek pairatzen duten eskubide-gabezia uzten du agerian. Horrez gain, ikerlanak zaintzen sistema publiko eta komunitarioari buruz hausnarketa egin beharra ere nabarmentzen du, bai eta zaintzen lana baldintza duin eta justuez jantzi beharra ere. Aldi berean, zaintzen problematikan Ipar eta Hegoaren arteko harreman ez bidezkoetatik aparteko faktoreak ere ageri direla erakusten du testuak.

Ikerlana bihar ezagutaraziko da, ekainaren 22an, Zentzuz sareak herritarrei aurkeztuko baitie Goiuri jauregian egingo den ekitaldi ireki batean. Jardunaldian parte hartuko dute baita Amaia Pérez Orozcok (doktorea Ekonomian, eta XXK kolektiboko aktibista gizarte-mugimenduen eta mugimendu feministen alorrean) eta Yolanda Mamani “Chola Bocona” (Boliviako aktibista, irrati-produktorea eta -esataria, youtuberra eta etxeko langilea).

17:00etatik 20:00ak bitartean izango da aurkezpen-ekitaldia. Sarrera doakoa izango

Share

Hiru urtetik beherakoek tabletak eta mugikorrak erabiltzeari buruzko bi hitzaldi antolatu ditu Haurtzaro eta Senitarte Zerbitzuak

 

Hitzaldiak Aldabeko eta Salburuko gizarte-etxeetan izango dira 

Datorren astean, 3 urtetik beherakoek pantailak erabiltzeari buruzko hitzaldiak izango dira Aldabeko eta Salburuko gizarte-etxeetan, Haurtzaro eta Senitarte Zerbitzuak antolatuta. Horren bitartez familiei lagundu egin nahi zaie, haurtxoek gailu elektronikoekin duten harremanari “modu osasungarrian” aurre egin diezaioten.

Teknologia berriak gizarte osora hedatu dira azken urteetan, eta ia ume guztiek dute eskura. Egoerak kezka sortzen du tablet eta mugikorren erabilera desegokiak haurren bizitzako lehen urteetan izan ditzakeen eragin eta ondorioak direla eta. Ildo horretan, 3 urtetik beherakoek gailu elektronikoak inolaz ere ez erabiltzea gomendatzen dute hainbat ikerketa eta azterlan zientifikok.

“Pantailekiko harremana oso kaltegarria izan daiteke eta mendekotasuna sortu. Horren ondorioz, autokontrol-gaitasunak eskuratu behar dira gailu horien erabilera erregulatzeko. Horrela egin ezean, arreta-defizita, ikasteko zailtasunak edo emozioak erregulatzeko arazoak izateko arriskua dago. Aro digitalean hezteko gai izan behar dugu” ohartarazi du Haurtzaro eta Senitarteko zinegotzi Jon Armentiak.

Gai horiek guztiak izango dira hizpide ekainaren batean (asteartea) Aldabeko gizarte-etxeko ekitaldi-aretoan, eta ekainaren 2an, Salburuko gizarte-etxekoan. Azken hau euskaraz izango da. 17:30ean hasiko dira, eta bertaratzeko aldez aurretik izena eman beharra dago, 010 telefonoan edo udalaren webgunean.

 

Prebentzio-tresnak

2019an, Haurtzaro eta Senitarte Zerbitzuak bi tresna jarri zituen familien eskura, pantailen erabilera okerrari eta horren ondorioei aurre egiteko.  Batetik, dibulgazio-bideo bat egin zen, eta, bestetik, “Amaita, bideo-jokorik onena zarete” gida argitaratu zen, guraso eta hezitzaileei aholkuak emateko.

Share

Gasteiz Afrikako kulturara hurbilduko da

Maiatzaren 25era arte Afrikaren Astearen IV. edizioa egingo da

 

Gasteizko afrikar komunitateak Afrikaren IV. Astea egingo du maiatzaren 25era arte. Hainbat jarduerari esker, Arabako hiriburuak hirian bizi diren kontinente horretako 11.000 pertsona ingururen kultura hurbiletik ezagutzeko aukera izango du.

Garapenerako Lankidetzako zinegotzi Jon Armentiak aurkeztu ditu ekitaldiak hamabost bat afrikar erakunde biltzen dituen Afrikar Diaspora Euskadin partzuergoko ordezkariekin batera.

Hurrengo asteartera arte hitzaldiak, zinema, erakusketa bat eta emakumeen lantegi bat egingo dira. Amaitzeko, Udalak harrera bat egingo du maiatzaren 25ean, Afrikaren Eguna, Aihotz plazan, eta dantza afrikarrak musika euskaldunarekin uztartuko dituen emankizun bat egongo da.

“Kulturak elkartu nahi ditugu afrikarrak gure hirian integratuta daudela adierazteko. Aste honi esker bere kultura ezagutzeko, aurreiritziak ezabatzeko eta senidetasuna, bizikidetza eta giza eskubideen errespetua bezalako balioak sustatzeko aukera izango dugu”, azaldu du Jon Armentiak.

Azken urteotan, Gasteizko Udalak Garapenerako Lankidetza Zerbitzuaren eta Hezkuntza eta Kultura Sailaren bidez babestu ditu ekitaldi horiek.

+ info: https://bit.ly/2S8cw5q

 

Share

(Estekaz gaurkotua) Gizarte Politiken Sailak familia zaintzaileei laguntzeko programaren arreta handitu du, eta izen berria eman dio: Maiteki

Adinekoen zaintzaileei ez ezik, desgaitasunak edo mendetasun-arriskua dituzten pertsonen zein bestelako beharrak dituztenen zaintzaileei ere lagunduko die

 

Maiteki Programa

Gizarte Politiken, Adinekoen eta Haurren Sailak familia zaintzaileei laguntzeko programaren bidez ematen duen arreta handitu du, 65 urtetik gorako adinekoen zaintzaileei ez ezik beste batzuk zaintzen dituztenei ere lagunduko baitie aurrerantzean: mendetasun-egoeran edo mendetasun-arriskuan daudenak, desgaitasuna dutenak edo zainketa behar duen egoera psikiko edo fisikoren bat dutenak.

Familia zaintzaileen programa adinez nagusi izatera iritsi da, 18 urte bete berri baititu, eta helburu berria eta argia ezartzeko garaia da: familia gehiagorengana heltzea. Jende gehiagori lagundu nahi diogu”, azaldu du Jon Armentia zinegotziak baliabide berria aurkezteko prentsaurrekoan.

Udalaren gizarte-zerbitzuen arduradun politikoak iragarri duenez, zainketa programaren eboluzioak izen berria ere ekarri du: Maiteki.  “Izan ere, halaxe zaintzen dute familiek, maiteki, eta senitarteko bat zaintzeko laguntzaren bila datozenak ere halaxe tratatzen ditugula sentitzea nahi dugu. Badakigu zein gogorra den zaintzaileentzat zaintzen duten pertsonaz ia egun osoan arduratzea. Lan horrek dakartzan ahaleginaz eta higaduraz gain, pertsona horren zaintza norberaren familiaren eta bizitza pertsonalaren aurretik jartzea esan nahi du askotan.”

Maiteki programak pertsona horiei lagundu nahi die, hain zuzen,”zaintza harremana hobetzerik izan dezaten, zaintzeko ahalegina arindu eta zeregin hori partekatu“. Horretarako baliabide hauek eskaintzen ditu:

 

  • Gizarte-langile baten erreferentzia, zainketa-lanetan lagun egiteko.
  • Laguntza psikologikoa, banakoentzat zein familia osoarentzat, hobeto senti daitezen.
  • Etxez etxeko prestakuntza, hobeto zaintzeko eta mugimenduak egiten, komunikatzen eta portaera zailak kudeatzen trebatzeko, besteak beste.
  • Elkarri laguntzeko taldeak eta zaintzaileen bilerak.
  • Bestelako jarduerak: ikasteko eta ondo pasatzeko hitzaldi eta lantegiak.

 

Zaindutako pertsona 65 urte gorakoa bada, atseden zerbitzu bat baliatu dezakete familiek, hau da, asteburuetarako eguneko zentroak eta etxean laguntzeko zerbitzua.

Bestetik, adinekoentzako zentro soziokulturalekiko lankidetzarako bideak ere sendotuko ditu Maitekik, zaintzaileek bertan antolatzen diren ikastaro eta lantegietara lehentasunez sartzerik izan dezaten.

Jon Armentiaren ustez, “okerra da pentsatzea batzuek zaintza behar dutela eta beste batzuek zaintzeaz arduratu behar dutela. Zaintza eman egiten da, baina baita jaso ere. Zaintzen duenari lagunduz haren bizi-kalitate eta ongizatea hobetzen ditugu, baita zaindutakoaren bizi-kalitate eta ongizatea ere”. 

MAITEKI programaz baliatzeko nahikoa izango da 945 16 13 56 telefono-zenbakira deitzea. Oinarrizko gizarte zerbitzuetan, herritarrei laguntzeko bulegoetan edo 010 zerbitzuan ere eska daiteke.

Gizarte Politiken, Adinekoen eta Haurren Sailak zabalkunde-kanpaina bat jarriko du abian baliabidearen berrikuntzak ezagutarazteko; horretarako, informazio-orriak banatuko dira, eta iragarkiak jarriko komunikabideetan, hiri autobusetan, udalaren webgunean, udalaren informazio-pantailetan, etab.

 

Aurrekariak

Familia zaintzaileei laguntzeko programa da Maitekiren aurrekaria. 2002an sortu zen, 65 urtetik gorako pertsonak zaintzen dituzten familiei laguntzearren, familiartean zaintzen jarraitzeko eta ahalik eta baldintza onenetan zaintzeko aukera izan dezaten.

Iaz 500 familiari eman zien arreta programak.

Share

‘Fokuan. Aterpea Mediterraneoan’ jardunaldiak izango dira Gasteizen, urriaren 26tik 28ra bitartean

 

  • Hitzaldi ziklo bat eta argazki-erakusketa bat, gatazken eta Europaren migrazio-politiken inguruan gogoeta egiteko
  • Europa biltzar-jauregian izango dira hitzaldiak; erakusketa, berriz, Andre Maria Zuriaren plazan, azaroaren 8ra arte

 

Jardunaldi monografikoak antolatuko ditu Jon Armentia zinegotzia buru duen Gasteizko Udaleko Gizarte Politiken Saileko Garapenean Laguntzeko Zerbitzuak datorren asterako, ‘Fokuan. Aterpea Mediterraneoan’ izenburuarekin, Mediterraneoaren eremuko migrazioen gaia hainbat alde eta ikuspegitatik jorratzeko asmoz.

Erakusketa bat instalatuko da gaur arratsaldean Andre Maria Zuriaren plazan —azaroaren 8ra arte ikusi ahal izango da—, eta, horrez gain, proiekzio bat eta hiru hitzaldi izango dira Europa biltzar-jauregian, urriaren 26tik 28ra bitartean. Europaren migrazio- eta humanitate-politiken inguruan eztabaidatu eta gogoeta egiteko foroa izan nahi du zikloak, eta politika horien ondorioak jasaten dituztenei aurpegia jartzeko baliatu nahi da.

“Garapen-bidean dauden herrialdeetan garapenerako gobernuz kanpoko erakunde lokalen proiektuetan lagundu eta horiek finantzatzetik harago, Garapenean Laguntzeko Zerbitzuaren zereginetako bat horixe da: gasteiztarrek elkartasuna erakuts dezaten lan egitea, giza eskubideekin sentsibilizatuta egon daitezen. Gatazka armatuetatik nahiz ingurumen- edo giza-hondamendietatik ihesi Europara etortzen eta bertan bizi eta babeslekua bilatzen ahalegintzen direnek merezi dute hemen ere aurpegi bat jar diezaiegun, eta jasaten ari diren egoeraren inguruan gogoeta egin dezagun, konponbide bila”, nabarmendu du Gizarte Politiken zinegotzi Jon Armentiak, prentsaurrekoan.

Lehenengo hitzaldia urriaren 26an izango da, 19:30ean, eta Carole Alfarah prentsa-argazkilaria —‘Gerraren gerizpean’ erakusketaren egilea— izango da hizlari. Siriako gerraren ondorioak erakutsiko ditu Alfarahek Europa biltzar-jauregian, esperientzia pertsonalean oinarrituta, berak egindako erreportajeak baliatuz. Bereziki, Sirian jarraitzen dutenen —errefuxiatu-esparruetan bizi diren horien— egoera lazgarria, eta Europako gizarteetan integratzeko ahaleginean dihardutenena.

Hurrengo egunean, urriaren 27an, ordu berean, Jesús Núñez Villaverde ekonomista eta militar erretiratua izango da hizlari —Instituto de Estudios sobre Conflictos y Acción Humanitaria (IECAH) erakundeko zuzendaritza-kidea—, zeinek Europar Batasunaren Mediterraneoko migrazio-politika eta tragedia humanitario horren azken orduko gorabeherak aztertuko baititu.

Azkenik, urriaren 28an, Nicolás Castellanoren hitzaldia izango da —Ser irratiko kazetaria, migrazioei, lankidetzari eta garapenari buruzko edukietan espezializatua—. Hartzen dituzten herrialdeetan migratzaile eta errefuxiatuek bizi dituzten diskriminazio-egoerak izango ditu hizpide, eta hedabideek fenomeno horren inguruko iritzi publikoa eratzeko orduan duten zeregin erabakigarria. Zikloko hirugarren eta azken hitzaldi hori 20:00etan hasiko da. Aldez aurretik, 18:00etan, Europa Biltzar Jauregian bertan, Fernando Santiagoren El Naufragio. 30 años de memoria sumergida (2018) dokumentalaren proiekzioa izango da.

ERREFUXIATU liburuxka EUS 20

Share

Alkateak eta Garapenerako Lankidetzako zinegotziak harrera egin diote Euskadiko Frente Polisarioaren ordezkari berriari

  • Duela gutxi izendatu dute M. Limam Mohamed Ali ordezkari; harekin batera, ordezkari ondokoa eta SEADen Lagunen Elkartearen lehendakaria izan dira ekitaldian.

Alkate Gorka Urtaranek eta Garapenerako Lankidetzako zinegotzi Jon Armentiak harrera egin diote Euskadiko Frente Polisarioaren ordezkari berriari, M. Limam Mohamed Aliri, Gasteizko udaletxean. Duela gutxi izendatu dute M. Limam Mohamed Ali ordezkari; harekin batera, Frentearen ordezkari ondoko Brahim Abdelfatah eta SEADen Lagunen Elkartearen lehendakari Lourdes Ruiz de Galarreta izan dira ekitaldian. Ordezkari berriari ongietorria emateaz gain, Tindufeko errefuxiatu-kanpamenduetako oraingo egoera eta saharar biztanleen egoera oro har izan dituzte hizpide.

Share

Udalak 70.000 euro jarriko ditu merkataritza bidezko eta arduratsua sustatzeko

  • Udaleko Lankidetza Zerbitzuak hitzarmen bat sinatu du Setem-Hego Haizea, Medicus Mundi Araba eta Euskal Elizbarrutietako Misioak (Bide Bidean) GGKEekin.

Gasteizko Udalak hirian merkataritza bidezko eta arduratsua sustatzeko programa bat jarri du abian Garapenean Laguntzeko Zerbitzuaren bitartez. Setem-Hego Haizea, Medicus Mundi Araba eta Euskal Elizbarrutietako Misioak (Bide Bidean) GGKEekin sinatutako hitzarmenaren barruan, Udalak 70.000 euro jarriko ditu zenbait ekintza bultzatzeko: tokiko kontsumoko aukerak ezagutarazteko ibilbideak auzoetan, eta informazio jarduera ugari gizarte etxeetan eta adinekoentzako zentro soziokulturaletan, hemengo kontsumo-ohiturek herrialde pobretuenetan duten eraginaren berri emateko.

Orobat, EHUko Azoka Agroekologikoan parte hartzea jasotzen du programak, bidezko merkataritza ikusarazteko, baita Ekonomia Eraldatzaileen Munduko Foro Sozialean (Bartzelona) parte hartzea ere, Gasteizen kontsumo arduratsuarekin garatutako esperientzia arrakastatsuak ezagutarazteko.

Merkataritza bidezko eta arduratsuaren aldeko apustu publikoa ezinbestekoa da erakunde gisa geure egin ditugun Garapen Iraunkorreko Helburuak lortzeko. Horregatik, Garapenean Laguntzeko Zerbitzutik ahaleginak egin ditugu proiektuak integratzeko eta lan-ildo hori indartzeko, alorrean eskarmentu handiena duten tokiko antolakundeekin batera. Gainera, krisi eta eraldaketa garaian gaudelarik, inoiz baino beharrezkoagoa da giza eskubideak aldeztea“, argudiatu du Gizarte Politiken eta Garapenerako Lankidetzaren zinegotzi Jon Armentiak. Hitzarmenaren aurkezpenean Medicus Mundiko Gizartea Eraldatzeko Hezkuntzako eta Komunikazioko teknikari Itsaso Sánchezek lagundu dio, GGKEen sarea ordezkatuz.

Sinatzen denetik 2021eko martxoaren 31ra arte iraungo du plan operatiboak. Programa indartu horren bidez, hiriak berretsi egiten du beste urte batez pobrezia eta desparekotasunen aurka borrokan diharduen nazioarteko mugimenduarekin duen konpromisoa; mugimenduak merkataritza eredu alternatibo baten alde egiten du, printzipio hauetan oinarrituta: lan-baldintza duinak eta emakumeen eta gizonen arteko soldata-berdintasuna bermatzea, haurren esplotazioa baztertzea eta ingurumena babestea natur ingurunea babesten duten teknika eta prozeduraren bidezko ekoizpena tarteko. Mugimendu horrek, azken batean, Nazio Batuen Erakundeak onartu zituen eta 2030erako bete beharko liratekeen Mundu Helburuak (Garapen Iraunkorreko Helburuak) lortzeko bidean lagundu nahi du.

Share

Larrialdietarako Arabako Funtsak 150.000 euro bideratuko ditu covid-19ak eragindako herrialdeetan bost lankidetza-proiektu garatzera

 

  • Gasteizko Udalaren eta Arabako Foru Aldundiaren laguntzaz, GKEek Sirian, Kongon, Ruandan, Ginean eta Burkina Fason egingo dituzte proiektuak

Larrialdietarako Arabako Funtsak, zeina Gasteizko Udalak eta Arabako Foru Aldundiak osatzen baitute, 149.800 euro bideratuko ditu covid-19aren pandemiak eragindako eta garapen-bidean dauden herrialdeetan bost lankidetza-proiektu garatzera. Orobat, funtsa eratzeko hitzarmenari ekarpen berriak egitea onetsi dute bi erakundeek: Gasteizko Udalak 132.000 euro jarriko ditu; Arabako Foru Aldundiak, 125.000 euro.

Gizarte Politiken zinegotzi Jon Armentiak eta Foru Aldundiko Gizarte Eskubideen eta Berdintasunaren zuzendariak aurkeztu dituzte orain arte onetsitako proiektuak, eta Araban egoitza dutelarik proiektuak eta horiek finantzatzeko eskaerak aurkezten dituzten erakundeei laguntzeko garaian funtsaren “arintasuna” eta “eraginkortasuna” nabarmendu dute.

Gasteizko Udaleko Gizarte Politiken, Adinekoen eta Haurren zinegotzi Jon Armentiaren esanetan: “Garapenerako lankidetza, eta Larrialdietarako Arabako Funtsa oraingoan, funtsezko elementua da pandemiak zenbait herrialdetan izan ditzakeen ezusteko ondorioei aurre egin ahal izateko, bertako pobreziak eta desberdintasunak covid-19ari erantzuteko gaitasuna murrizten baitute. Orain inoiz baino gehiago azpimarratu beharra dago osasunerako eskubidea eskubide unibertsala dela, eta Gasteizek eta Arabak tokian bertan eta nazioartean defendatzen dute”.

Nerea Melgosa, Arabako Foru Aldundiko Giza Eskubideen eta Berdintasunaren zuzendaria: “Gure bi administrazioek une zail bati aurre egin behar dioten une honetan egiten dugu ahalegin hau, COVID-19k Arabako ekonomian duen eraginaren ondorioz diru-sarrerak bat-batean jaitsi direlako. Baina badakigu herrialde txiroenei ematen diegun laguntza inoiz baino beharrezkoagoa dela, gaixotasunak epe ertain eta luzera izango duen eragin handiena jasango baitute”.

Funtsak proiektu hauek finantzatuko ditu:

  • Janariak, higiene- eta prebentzio-materiala eta herritarrak sentsibilizatzeko kanpainak Labé eskualdean (Fouta Djallon, Gineako errepublika). Herrialde hartako agintariek aitortu dute ez daudela prestatuta pandemiaren aurka egiteko, ez dutelako ez osasun-materialik ez azpiegiturarik. “Asociación unión y apoyo del hablante de Pilar (Hayal Pilar)” elkarte arabarrak eskatu du laguntza, bazkideak Labé eskualdekoak baitira. 30.000 euroko zuzkidura jasoko du proiektuak.
  • Esku-hartzea Burkina Fason, Bam probintzian, bereziki Kongoussi hirian. Herrialde horretako osasun-azpiegiturak oso egoera txarrean daude. Aipatutako eskualdean, zehazki, herrialdeko beste toki batzuetatik lekualdatutako pertsona ugari dago. ADRA entitateak tokiko antolakunde bat du lekuan bertan; prebentzio-materialak jarriko ditu, eta egoera larrian dauden 300 etxegunetarako babes-ekipoak eta janaria erosiko ditu. 30.000 euroko zuzkidura jasoko du proiektuak.
  • Espainiako UNICEFentzako laguntza. Siriako UNICEFen bitartez ura, saneamendua, higienea eta babes-materiala helaraziko ditu, Siriari laguntzeko makroprograma baten barruan. Orotara 30.000 euroko ekarpena jasoko du horrek.
  • Manuel Iradier elkarte afrikanistaren proposamena, Uvira hirian (Hego-Kivu, Kongoko Errepublika Demokratikoko ekialdean) izandako uholdeen eragina arintzeko proiektu bat garatzeko. Pax Christi Uvira GKEarekin batera lan egingo du; erakunde horrek 17 urteko ibilbidea du, eta besteak beste, lekuz aldatutako pertsonekin, errefuxiatuekin eta larrialdi-egoeran dauden pertsonekin lan egin dute, batzuetan Larrialdietarako Arabako Funtsaren laguntzarekin. Janaria, jantziak, etxeko tresnak eta covid-19ari aurre egiteko higiene- eta prebentzio-materiala jarriko dute. 30.000 euroko zuzkidura jasoko du proiektuak.
  • Ruandan esku hartzea, Kamonyi barrutian (Hegoko probintzian). Pandemiak eragin badie ere, esku-hartzea ez dago horrekin lotuta zuzenean. Izan ere, duela urte batzuetatik hona, eurien sasoiak euri-jasak, uholdeak, haizete bortitzak eta lur-jausiak ekarri ohi ditu, gero eta larriagoak, klima-aldaketaren eraginez. Medicus Mundik koltxoiak, mantak eta esterilak, teilatuetarako xaflak, iltzeak, ur-deposituak eta ura edateko on bihurtzeko eguzki iragazkiak eramango ditu. Horretarako, 29.800 euro emango dizkio Larrialdietarako Arabako Funtsak.

Share

Gizarte Politiken Sailak “gizarte-ezkutu” bat aktibatuko du, pertsona eta familia ahulenek covid-19aren ondorioei aurre egin ahal izateko hainbat neurri hartuz

  • Kontingentzia sozialeko planak 11 milioi euro bideratuko ditu GLLetara eta udal laguntzetara

  • 21 Zabalgunearekin batera, alokairuko etxebizitzen programa bat jarriko du abian, ahultasun-egoeran dauden familientzat

 

Gizarte Politiken, Adinekoen eta Haurren zinegotzi Jon Armentiak bere sailak covid-19aren aurrean landu duen Gizarte Neurrien Plana aurkeztu du gaur goizean. Bertan, hogeita hamar bat jarduera jasotzen dira, pertsona eta familia zaurgarrienek covid-19ak ekarritako ondorioei aurre egin ahal izan diezaieten “eta ez daitezen babesik gabe geratu”.

Egungo osasun, gizarte eta ekonomia egoera zailean, udalaren gizarte zerbitzuek “Gasteizen bizi garenon ongizatea bermatzea” izan dute helburu, “egoera txarrenean dauden pertsonak eta familiak babestu eta laguntzeko gizarte-ezkutu handi bat aktibatuz”, azaldu du Jon Armentiak streaming bidez jarraitu ahal izan den prentsaurrekoan.

Kontingentzia plan berri hau duela gutxi aurkeztu zen “Orain Gasteiz” planaren barruan dago, eta 7 ekintza-ildo proposatzen ditu:

  1. Krisi ekonomikoak eragindako familiei arreta ematea.
  2. Adinekoentzako baliabideak egokitzea.
  3. Bakarrik edo isolatuta bizi diren pertsonen jarraipena.
  4. Etxez etxeko laguntza-zerbitzua indartzea.
  5. Bizitegi-bazterketako egoeran dauden pertsonei arreta ematea.
  6. Haurrei eta nerabeei arreta ematea.
  7. Indarkeria matxistaren biktima diren emakumeei eta LGTBI kolektiboari arreta ematea.

 

Hamaika milioi euro laguntzetan eta alokairuko etxebizitzetan

Lehenengo jarduera-ildoa betetzeko, Gizarte Politiken, Adinekoen eta Haurren Sailak 11 milioi euro bideratuko ditu aurten gizarte-larrialdietarako laguntzetara (GLL) eta udal laguntzetara; horrek esan nahi du aurrekontua 2 milioi euro handituko dela.

Beste ekintza nabarmengarri bat egoera ahulean dauden familientzat alokairuko etxebizitzen programa bat martxan jartzea izango da, zeinak “bizitegi-bazterketako egoerei erantzun azkarra ematea ahalbidetuko” baitu, Armentiaren ustez.

Alokairuak egonaldi luzekoak izango dira —5 eta 7 urte bitartekoak, salbuespenak salbuespen—, eta 21 Zabalguneak erabilgarri dituen etxebizitzekin lotuta egongo dira, programa honetan laguntzen baitu.

Etxebizitzak esleitzeko, une bakoitzean dauden bizitegi-bazterketako kasuen balioespen teknikoa egin beharko da. Beraz, ez da itxaron-zerrendarik egongo.

Seme-alaba adingabeak dituzten bizikidetza-unitateak baliatu ahalko dira programaz, edo, salbuespen gisa, gurasoen mende dauden seme-alaba adindunak dituztenak. Familia horiek etxegabetze-prozedura batean sartuta egon beharko dute, eta prozedura horren arrazoia ez da izango alokairua ez ordaintzea. Gainera, etxebizitza publikoaren eskatzaileak izan beharko dute, etxebizitzaren alokairua ordaintzeko diru-sarrera nahikoak izan beharko dituzte eta etxeko antolaketarako trebetasunak izan beharko dituzte, tutoretzarik edo ikuskapenik behar ez izateko.

Etxebizitza komunitario berriak

Adineko pertsonentzako baliabideak errealitate berrira egokitzeko, etxebizitza komunitario berriak eraikiko dira Hedegile kalean, egungo Aurora zainpeko apartamentuetan. Proiektu berria aurten idatziko da, eta 2021ean gauzatuko, 650.000 euroko aurrekontuarekin.

Etxebizitza berri horiek, garai bateko Los Molinos eta Aurora egoitzetan egindakoei gehituko zaizkie.

Bestalde, gizarte zerbitzuak lanean ari dira eguneko arreta-zerbitzuak berrantolatzeko, “lehenbailehen irekitzeko, edukiera, distantzia soziala, espazioen egokitasuna eta osasun-segurtasuna bermatuko duten arreta-txandak kontuan hartuta”, azaldu du Gizarte Politiken zinegotziak.

Adinekoen segimendua egiten jarraituko da

Adinekoei segimendua eta lagun egiteko dispositiboak martxan jarraituko du adinekoen zentro soziokulturalen jarduera eta programazioa berreskuratzen ez diren bitartean.

Halaber, adinekoei banakako laguntza emateko proiektu bat garatuko da; zainketa eta lotura plan bat ere ezarriko da, besteak beste teknologia berriak gehiago erabiltzeko, eta Hiri Errukibera proiektua gauzatuko da, Vivir con Voz Propia kolektiboarekiko lankidetzan.

Etxez etxeko laguntza-zerbitzua

Gizarte-zerbitzuen kontingentzia-planaren laugarren jarduera-ildoan etxez etxeko otordu-zerbitzua indartzea agertzen da, pandemian ahultasun-egoerei erantzuteko martxan jarri diren laguntzei jarraipena emateko. Gizarte Politiken Sailak egunean 50 menu gehiago ematea kalkulatu du.

Era berean, “Etxean zaintzen ikasten” programa berriro martxan jartzea aurreikusi da.

Bizitegi-bazterketan dauden pertsonentzako arreta

Jon Armentia zinegotziak iragarri duenez, harrera dispositibo bereziek behar adina denbora iraungo dute. “Gaur egun, 57 pertsona daude Lakuan eta Pio Barojan; horiek balioesten ari gara, eta ibilbideak zehaztuko dizkiegu, arreta jasotzen jarrai dezaten, gizarteratze aldera”.

Era berean, harrera-baliabideak indartuko dira, osasun-gomendioetara egokitzeko: gizarte-distantzia, edukierak, etab.

Haurren eta nerabeen arreta

Haur eta nerabeen arloan, normaltasuna itzultzen ez den bitartean, pandemiari aurre egiteko sortutako gizarte- eta hezkuntza-dispositibo bereziak jarraituko du. Horien osagarri, errefortzu eta laguntza emozionaleko programak egingo dira.

Bestalde, haur-pobreziari aurre egingo zaio Haurren eta Nerabeen II. Planaren bidez, haren ildo estrategikoetako bat garatuz: ekitatea, haurren desberdintasunaren ondorioak minimizatzeko.

Genero-indarkeriaren aurkako prestakuntza

Udaleko gizarte-zerbitzuek covid-19aren ondorioei aurre egiteko planteatutako “gizarte-ezkutuaren” zazpigarren eta azken ekintza-ildoak prestakuntzaren aldeko apustua egiten du indarkeria matxistari eta LGTBI kolektiboaren aurkako indarkeriari heltzeko. “Zaurgarritasun handiko garai batean gaude eta arreta hori hobetu nahi dugu”, azaldu du zinegotziak.

Hori dela eta, udaleko gizarte-zerbitzuetan zuzeneko arreta ematen duten 80 profesionalek genero-indarkeriari buruzko prestakuntza jasoko dute online.

Gainera, Berdintasun Zerbitzuko profesional batek genero-ikuspegia txertatuko du gizarte-zerbitzuek eskaintzen duten arretan.

Une gogorrak

Covid-19arekin lotutako gizarte neurrien planaren aurkezpena amaitzeko Jon Armentia zinegotzi eta alkateordeak gogora ekarri duenez, “garai latz hauetan gure lehentasuna osasuna babestea eta pertsona eta familia ahulenentzako laguntza bermatzea da. Horregatik, osasun-krisi honek familia askori planteatzen dion Damoklesen ezpatari aurka egiteko gizarte-ezkutu hau altxatzen dugu indarrez, ondorioak geldiarazteko eta arintzeko eta pandemiak gure bizilagun guztiek merezi duten ongizatea aurretik eramatea saihesteko neurriekin”.

Share