Prentsa Oharren banner

Ziklisten konektibitatearen eta bide-segurtasunaren hobekuntza, Salburuko eskola-inguruneetan

600.000 eurotik gora inbertituko ditu Urtaranen gobernuak bidegorri berrietan eta oinezkoen pasabideetan, eta erreiak murrizten

 

Gasteizko Udalak, Mugikortasunaren eta Espazio Publikoaren Sailaren bitartez, ziklisten konektibitatea eta bide-segurtasuna hobetuko ditu Salburuko ikastetxeen inguruetan. Helburu horrekin, 604.021,26 euroko aurrekontua izango duen lizitazioa egitea onetsi du gaur goizean Tokiko Gobernu Batzarrak. 4 hilabetekoa izango da gauzatzeko epea, kontratua adjudikatzen denetik.

Superetxadien ezarpenaren atzean dagoen filosofiari jarraitzen dio esku-hartzeak eta espaloiak zabaltzea aurreikusten du, Iliada ibilbidean eta Salburua bulebarreko pasealeku-zati jakin batzuetan irisgarritasuna bermatzeko; zirkulazio-erreiak murriztea, Salburua bulebarrean bidegorriak jartzeko, eta bizikleta-trazadura berriak Iliada ibilbidearen eta Salburua bulebarraren ertzetan.

“Obra horien bidez, batez ere Iliada ibilbidean eta Salburua bulebarrean, mugikortasun iraunkorra sustatuko dugu, oinez eta bizikletaz egiten dena, eta bide-segurtasuna hobetuko. Auzoko bizilagunek eskatua zuten, eta, hain zuzen ere, azpimarratzekoa da ikastetxeetako ordezkariekin batera diseinatu dela proiektua”, adierazi du Mugikortasunaren eta Espazio Publikoaren zinegotzi Raimundo Ruiz de Escuderok.

Gaur egun, ibilgailu-trafikoaren arintasunera bideratuta daude bi bide horiek, eta horrek kalte egiten dio bizikleten eta oinezkoen mugikortasunari, baita merkataritza-jarduerari eta herritarren ongizateari ere. Orobat jo da egokitzat bide-segurtasuna hobetzea ikastetxeen inguruetan.

Hauek izango dira jarduerak:

– Iliada ibilbidea: berrantolatu egingo da bide hori, ziklisten konektibitatea hobetzeko. Bi zirkulazio-errei mantenduko dira, baina aparkaleku-lerroa barrualdera mugituko da, eta libre geratzen den 2,40 metroko espazioa bidegorriak jartzeko baliatuko, bi norabideetan. Aparkaleku-zerrendak babestuko ditu bidegorriak, hartara.

Ikastetxearen inguruan, pasealekuaren lehen zatian —Salburua bulebarraren eta Nadine Gordimer kaleko biribilgunearen artean—, 15 metroko oinezkoen pasabide zabal bat egitea aurreikusten da. Gainera, eremu horretan bertan zirkulazio-errei bat kenduko da, bide-segurtasuna areagotu eta ibilgailuen abiadura murrizteko.

Era berean, irisgarritasun-hobekuntzak egingo ditu sailak TUVISAren Zabalgana-Arkaiate 6. lineako geltokietan, eta, bidenabar, autobusera igotzea erraztuko, Nantes ereduko nasak jarriz, erabiltzaileek gainditu beharreko desnibela txikiagoa izan dadin.

– Salburua bulebarra: Antonino Ibilbidearen eta Iliada ibilbidearen arteko galtzadan bidegorria bikoiztea eta oinezkoentzako pasabide bat zabalago egitea aurreikusten da.

Kasu horretan, galtzadatik zirkulatzeko hiru errei dituen etorbidea da, espaloian bi norabideko bidegorria duena. Asmoa da bidegorri hori kentzea, bi zirkulazio-errei bakarrik uztea eta libre geratzen den espazioan bi norabideko bidegorri bat egitea, galtzadan bertan. Bidegorri hori bereizita egongo da, 2,40 metroko zabalera izango du, eta 80 zentimetroko zabalerako segurtasun- eta babes-banda batek bereiziko du zirkulaziotik.

Gainera, Salburua bulebarraren eta Isaac Puente Amestoy kalearen arteko bidegurutzearen ondoan eta San Antonino ibilbidearekin lotzen den kalearen inguruan dauden zebrabideetan, oinezko eta bizikletentzako hobekuntza-lanak egingo dira.

 

 

Share

Udalak terraza eta mahaitxoen ordenantza aldatzeko prozesua hasi du

Udal taldeek orain proposamenak egingo dituzte eta arau berria Udalbatzak onartu beharko du

Gasteizko Udalak gaur hasi du hiriko ostalaritzako establezimendu publikoetan eta antzekoetan terrazak arautzeko ordenantza aldatzeko prozesua. Gasteizko Udalak gainera prozesu hori gauzatzeko tramitazio egutegia onartu du. Hemendik aurrera udal taldeek beren proposamenak egingo dituzte eta arau berria Udalbatzak onartu beharko du. Udalbatzaren helburua otsailerako ordenantza behin-behinean onartzea da.

“Ostalaritza-sektorearekin izan ohi ditugun harremanetan, beharrezkotzat jotzen dituzten aldaketa batzuk helarazi dizkigute dagoeneko. Are gehiago COVID-19ak eragindako pandemiaren ondoren. Baina ez genuke inor atzean utzi nahi. Gaur hasten dugun prozesu honetan, ahalik eta ekarpen eta iritzi gehien izan nahi ditugu, bai ostalaritza-sektoreko profesionalenak, bai Gasteizko gainerako pertsonenak”, esan du Raimundo Ruiz de Escudero Mugikortasuneko eta Espazio Publikoko zinegotziak. “Dugun helburu nagusia adostasun ordenantza bat egitea da”, dio.

 

Share

(Argazkiez eguneratua) Udalak Gasteizko mugikortasun-eredua erakutsi du Albaceteko Mugikortasunaren eta Garraioaren Etorkizunari buruzko elkarrizketa batean

Gasteiz eta bere mugikortasun iraunkorreko eredua protagonista izan dira, berriz ere, etorkizuneko mugikortasunari eta garraioari buruzko lehen mailako ekitaldi batean. Raimundo Ruiz de Escudero Udaleko Mugikortasuneko eta Espazio Publikoko zinegotziak Mugikortasunaren eta Garraioaren Etorkizunari buruzko elkarrizketan parte hartu du gaur goizean, Espainiako Gobernuaren Prospektiba eta Estrategia Bulego Nazionalak antolatuta. Bilera atzo eta gaur egin da Albaceteko Circo Antzokian, eta bertan izan dira, besteak beste, Garraio, Mugikortasun eta Hiri Agenda ministroa, Raquel Sánchez, eta Europako Batzordeko Garraio Komisarioaren kabineteburua, Walter Gotees.

Raimundo Ruiz de Escuderok, zehazki, intermodalitateari eta garraio publikoaren integrazioari buruzko mahai-inguru batean parte hartu du. Bere hitzaldian, Mugikortasuneko eta Espazio Publikoko zinegotziak azpimarratu du oso garrantzitsua dela modu koordinatuan lan egitea modu egokian konektatuta dauden garraio publikoko sareak eraikitzen eta finkatzen. “Orain iraultzaile diruditen ideiak normaltasunera eraman behar ditugu”, esan du. Era berean, zinegotziak garraio publikoaren errentagarritasun soziala azpimarratu du. Gasteizko ordezkariak Arabako hiriburuko mugikortasun-eredua eta azken hamarkadetako bilakaera ere azaldu ditu.

 

Share

Bihar hasiko dira Gasteizko 13 kaletako asfaltoa hobetzeko lanak, Adriano VI.aren eta Tomas Zumarraga Dohatsuaren kaleetatik

Mugikortasunaren eta Espazio Publikoaren Sailak 190.000 euro inbertituko ditu zuloak betetzeko lan horietan

Urtaranen gobernuak Gasteizko aparkalekuak, asfaltatuak eta espaloiak hobetzeko sustatutako plana aurrera doa. Izan ere, bihar bertan hasiko dira hiriko 13 kaletako galtzadak asfaltatzeko lanak. Lanak hilabeteko epean egingo dira eta 190.000 euroko inbertsioa izango dute. Hainbat gunetako zoladura eraberritu eta saneatuko da, eta zorua birjarriko. Mugikortasunaren eta Espazio Publikoaren Sailak kale hauetako leku jakinetan egingo ditu lan horiek:

Adriano VI.a
Argentina
Tomas Zumarraga Dohatsua (Argentina kalearekiko izkinan)
Serafín Ajuria Margolaria
Amurrio
Agirrelanda
Mexiko
Jose Atxotegi
Florida
Aiala Kantzilerra
Manuel Iradier
José Mardones
José Lejarreta

Arriagako Kofradia

Lehenengo obrak Adriano VI. aren kalean eta Tomas Zumarraga Dohatsuaren eta Argentina kaleen arteko bidegurutzean egingo dira, bihar bertan. Ostiralean, taldeak Amurrio kalera (Aiarako Taldearen kalearekiko bidegurutzearen ondoan) eta Agirrelanda kalera joango dira. Astelehenean, berriz, José Mardones kalean eta Arriagako Kofradiaren kalean arituko dira makinak. Datorren asteartean, aurreikuspenak betetzen badira, Manuel Iradier kalean egingo dute lan (Sagrado Corazón ikastetxeko patioaren irteeraren eta autobus-geltokiaren artean). Ondoren, aurreikusitako gainerako jarduerak egingo dira. Lan guztiak trafikoa inoiz ere erabat moztu gabe egingo dira. Lanek eragindako erreiak aldi baterako baino ez dira moztuko.

 

Gasteiz hobetzeko esku-hartze horiek, gainera, Mendizabaleko aparkalekuaren erreformarekin bat egiten dute, zeina dagoeneko martxan baitago, milioi bat euroko inbertsioarekin. “Esku-hartze horiek guztiek eragin zuzena dute gure espazio publikoaren kalitatean, eta bizikletaz edo ibilgailu pribatuz mugitzea nabarmen hobetzen dute“, azaldu du Mugikortasunaren eta Espazio Publikoaren zinegotzi Raimundo Ruiz de Escuderok.

Share

Herrandarren kalea eraberritzea eta Oroimenezkoaren ingurunea egokitzeko obren hirugarren fasea nabarmentzen dira Mugikortasunaren eta Espazio Publikoaren Sailaren aurrekontuan, zeina % 12 hazi baita

Gasteizko Mugikortasunaren eta Espazio Publikoaren Sailak 33 milioi euroko aurrekontua izango du datorren ekitaldian, udal-gobernuak aurkeztutako kontu-proiektuaren arabera. Mugikortasunaren eta Espazio Publikoaren zinegotzi Raimundo Ruiz de Escuderok baieztatu du aurrekontua asmo handikoa dela eta aurreko urtearekin alderatuta % 12 hazi dela. “Mugikortasun iraunkor eta osasungarriaren aldeko apustua egiten dugu, tranbia luzatuz eta BEI abian jarriz. Garapen Jasangarriaren Helburuek markatzen diguten bidetik joateko aukera emango diguten proiektuak garatzen jarraitzen dugu. Eta, gainera, prest egongo gara europar funtsak lortzeko“, ziurtatu du zinegotzi ordezkariak.

Sailaren aurrekontu-proiektuak jasotzen dituen esku-hartze guztien artean, bi obra nabarmentzen dira, “ilusio handia ematen digutenak: Oroimenezkoaren ingurunea eraldatzeko hirugarren fasea, eta, batez ere, Herrandarren kalearen eta José Mardones kalearen ardatza eraberritzea. Nire ustez, proiektu horrek Gasteizko ADNan dauden ezaugarri asko bil ditzake: Herrandarren kalea birnaturalizatu nahi dugu, konektore berde handi bihurtzeko. Asfaltozko kale hori pasealeku handi bihurtu nahi dugu, lorategiak, hiri-baratzeak, ur-eremuak eta jolasteko guneak dituen ibiltoki handi bat“, azaldu du Raimundo Ruiz de Escuderok.

Herrandarren eraldaketarako aurreikusitako lehenengo jarduketa handia ekialdeko zirkulazio-galtzadak batzea izango litzateke, eta Herrandarren kaleko zirkulazioa José Mardones kalearen ondora aldatuko. Hartara, orain asfaltatuta dagoen azalera handi bat libre geratuko litzateke oinezkoentzat. Puntu horretan, hiriko bide berde bat sortuko litzateke, kilometro erdiko bulebar berde zabal bat. Esku-hartzearekin batera bidegorri berriak egingo dira bi norabideetan, baratzeetarako eta aisialdiko ardatz bat (joko naturalizatuak dituen parke bat barne) eta laku bat (euri-uren urmael gisa); orobat, Herrandarren Institutuaren ondoan dagoen kirol-eremuan berdegunea jarriko da, eta erabilera berria emango zaio autobus-geltoki zaharrari.

Oro har, diseinatutako aurrekontuak Sailaren eta gobernuaren sei ardatz estrategikoak garatzen jarraituko du: “Kanpoaldera eta barrualdera konektatutako hiria eta mugikortasun iraunkorra”, “Bizi-kalitatea eta kohesioa”, “Hiriko ekonomiaren finkapena”, “Hiri berde eta iraunkorra”, “Harro egoteko moduko hiria, mundura irekia” eta “Gobernantza: kudeaketa eraginkorra, arduratsua eta irekia”.

Horretarako, alderdi hauekin lotutako partida ekonomikoak aurreikusi dira: BEI martxan jartzea eta tranbia Salburura eta Zabalganera hedatzea; bide-segurtasuna sustatzea; bizikleta-konexioak areagotzea; Gasteizko auzoetan obrak eta inbertsioak egitea, hala nola Aldabe kalearen ingurua oinezkoentzat bihurtzea edo emisio txikien lehen eremua diseinatzea; hiri-mantentzea eta argiteria elektrikoa hobetzea; asfaltoa berritzea; zuhaiztiekin eta auzoetako azpiegitura berdearekin lotutako esku-hartzeak, superetxadien garapena, trafikoa hobetzea, Mobility Lab martxan jartzea, eta beste.

“Prest gaude gizarte gasteiztarrak testuinguru zail honetan jotzen dizkigun erronkei aurre egiteko. Eman dezagun guztiok maila eskakizun horiek betetzeko“, esan du Raimundo Ruiz de Escuderok.

 

 

Share

Udalak BEIren ezaugarri nagusiak azalduko ditu bideoen bitartez

Hamar bideo labur BEIren ezaugarri nagusiak laburbiltzeko. Udalak ikus-entzunezko lan batzuk atera ditu  Gasteizen laster martxan jarriko den garraio-sistema horri buruzko informazio guztia helarazteko herritarrei.

 

“Informazio-bideoen helburua da garraio-sistema berri horren ezaugarri nagusiak ezagutaraztea modu erraz eta oso bisualean. Irudien bidez BEI jasangarria, irisgarria, berritzailea eta segurua dela azaltzen dugu, eta ibilbideari, ibilgailuan sartzeko moduari, segurtasun-sistemei eta errei esklusiboen abantailei buruzko xehetasunak ematen ditugu”, azaldu du TUVISAko lehendakari eta Mugikortasunaren eta Espazio Publikoaren zinegotzi Raimundo Ruiz de Escuderok.

Zehazki, minutu bateko iraupena duen bideo nagusi bat egin da eta lau pilula espezifiko. Bideoak euskaraz eta gaztelaniaz daude eskuragai eta azpitituluak dituzte irisgarriago izateko.

Udalak Bus Elektriko Inteligenteari buruzko zabaltze kanpaina bati ekin zion irailean. Plan horren baitan, eskuorriak eta liburuxkak banatu dira geltoki eta postontzietan, proba-bidaiak egin dira, BEIren ibilgailu bat jarri da kalean jendeak gertutik ezagutzeko, monitoreek informazioa eman dute… Bideoak kanpaina horren barruan daude.

BEI garraio-sistema jasangarriagoa, irisgarriagoa, berritzaileagoa eta seguruagoa izango da. Udalak 9 milioi euroko inbertsioa eginda, puntako teknologia izango duten 13 ibilgailu elektriko berriek Gasteizko 14 auzo elkartuko dituzte. TUVISAren 2. linean eskainiko dute zerbitzua, eta tarte osoan 3 milioi erabiltzaileri zerbitzua eskaintzeko ahalmena izango dute. Proiektuak Eusko Jaurlaritzaren eta Arabako Foru Aldundiaren finantzaketa du. Web-orri honetan aurki daiteke BEIri buruzko informazioa: www.bei.eus.

 

 

Share

Gasteizek zuhaitz gehiago landatuko ditu auzoetan: hobeto hazten eta itzala ematen duten kalitateko zuhaitzak izango dira, kaleetan ingurumen-onura sor dezaten

Udalak 280.000 eurotik gora inbertituko ditu gutxienez hiriko hamar gunetan 600 zuhaitz berri baino gehiago landatzeko

 DOSSIER ARBOLADO

Gasteizko Udaleko Mugikortasunaren eta Espazio Publikoaren Sailak 282.139,87 euro inbertituko ditu negu honetan, auzoetako zuhaiztiak hobetzearren. Lan horiek kontratatzeko dosierra lizitatzen ari da une honetan, eta lanak hiriko hamar eremutan egingo dira.

 

“Gure hiriari zuhaitz gehiago gehitu nahi dizkiogu, guztira 112.000 unitate baino dituen arren. Era berean —eta hau oso garrantzitsua da— ale berri horiek kalitate handiagokoak izatea nahi dugu. Gure ustez, ez dugu hainbesteko arreta jarri behar landatzen ditugun zuhaitzen kopuruan, horien kalitatea handitzean baizik. Mugikortasunaren eta Espazio Publikoaren zinegotzi Raimundo Ruiz de Escuderok azaldu duenez, “Gasteizek zuhaitz handiak izatea nahi dugu, hobeto haz daitezkeenak, ingurumen-onurak eta itzala eskainiko dituztenak, biodibertsitatea bultzatuko dutenak, izurriteekiko erresistenteagoak izango direnak eta klima-aldaketaren ondorioz aurreikusi behar ditugun baldintzetara egokitzen direnak“.

 

Ildo horretatik, bikaintasuna lortzea da helburua, baldintza-agiri teknikoaren arabera: zuhaitz-etorbide nabarmengarriak lortu nahi dira, eta horien onurak ikusgarriak eta eraginkorrak izatea. Horretarako, enpresa esleipendunak ondo prestatu beharko du lurra, kalitateko zuhaitzak landatu beharko ditu, eta bi urtez horien mantentzeaz arduratu. Landatuko diren ingurunerako egokiago diren espezieak jartzea erabaki du Udalak. Zinegotziak nabarmendu duenez, “talde teknikoak lan profesionalizatua eta zientifikoa egin du erabaki guztiak hartzeko“.

 

Leku hauetan egingo dira aurreikusitako jarduerak: Elorriagako atea, Salburuko aerodromoaren ingurua, Estrasburgo hiribidea, Lakua-Arriaga, Ibaiondoko kiroldegia, Wellingtongo Dukearen kalea, autobus geltokiaren ingurua, Bastida plaza, Zabalgana hiribidea Antoniareneko biribilguneraino, eta Oto hiribidea. Landaketa lanak egiteko bi hilabete eta erdiko epea izango da.

 

Zehazki, lan hauek egingo dira:

Elorriagako atea. Hiribide horren erdibitzailaren bi zatitan ez dago zuhaitzik. Beste zati batekoak egoera txarrean daude. Horregatik, zuhaitzak landatzea eta daudenak ordezkatzea erabaki da. Landaketa-fasean, zanga estu bat irekiko da hiribide osoan zehar, ahalik eta sakonen, 15 zentimetroko lodiera duten adarrez betetzeko. Horrek lurpeko aireztapen-tunel bat sortuko du, eta materia organikoa gehituko. Ondoren, espezie hauetako 79 ale landatuko dira: Acer platanoides edo astigar zorrotza (19), Tilia cordata edo ezki hostotxikia (28), eta Ulmus Resista edo zumar erresistenteak (24).

 

Aerodromoaren ingurua. Salburuko iparraldea eta Salburuko hegoaldea lotzen dituen etorbide horretan, hegoaldeko zatia zuhaitzez hornituko da; izan ere, aromatikoen parterre karratu simetrikoz egindako kale horretan ia ez dago zuhaitzik udan behar den erosotasuna eskaintzen duenik. Eremuak tamaina handiko espezieak hartzeko adinako lekua duenez, espezie bakoitzeko basotxoak osatuko dira, zeinek ia parterre guztia hartuko baitute.

 

Estrasburgo hiribidea. Ekialde-mendebalde norabidea du zabalera handiko etorbide horrek, eta etxebizitza-blokeak ditu bi aldeetan. Igarotzeko eta egoteko diseinatuta dago, dendak eta haurrentzako guneak baititu. Oso hiribide simetrikoa da, zuhaitzik gabeko eta soropilez osatutako parterreak dituena. Mugikortasunaren eta Espazio Publikoaren Sailak zenbait tarte bereizi ditu:

Salburuko bulebarretik hurbil dagoen eremua: 4 parterre, espezie autoktonoen basotxoak eratuz (Acer campestre edo astigarrak, Betula alba edo urkiak, Populus nigra var. italica edo makal italiarrak eta Salix babilonica edo sahats negartiak).

Erdialdea: bakar-bakarrik astigarrez osatutako eremua.

Europa ibilbidea: batetik, altuera handia lortu nahi da Populus alba edo zurzuriak eta Populus nigra var. Italica landatuz; bestetik, udaberrian loraldia duten zuhaitzak landatuko dira: pauloniak eta katalpak.

Erdialdea: astigar seriea errepikatuko da.

Mendebaldeko muturra: pauloniak eta katalpak berriro.


Lakua-Arriaga aldea (Aramangelu). Auzo honetarako lanek hiru kaletako lau zati hartuko ditu. Kale horiek parterre handi goratuak dituzte. Zuhaitz gutxi dute eta ez dute emaitza egokirik izan azken urteotan. Horregatik, espazioak berriz diseinatuko dira, lurzoruaren bolumena hobetuz eta espezie egokiagoak hautatuz. Lan hauek egingo dira:

Larrabasterra: alde horretan Sophora japonica edo sofora japoniarrak landatuko dira.

Errotamendi: Celtis occidentalis edo almezak landatuko dira.

Maltzaga: Zelkova serrata espeziea landatuko da.

 

– Ibaiondoko kiroldegia. Hormigoizko zabalgune handi bat dago bertan, eta zenbait urki daude txorko biribilen gainean, egoera txarrean. Onurak ekarriko dituen zuhaizti bat lortzeko, txorko horien zati bat birmoldatu behar dela uste da, eta bi parterre zirkularretan bildu. Erdiko txorkoak errespetatu egingo dira. Horietan guztietan oso eraginkorrak diren espezieak erabiliko dira: Platanus hispanica, Aesculus x carnea ‘briotii’ edo indi-gaztainondo gorriak, Acer platanoides edo astigar zorrotzak, eta Morus alba ‘fruitless’, hau da, hazirik gabeko masustondoak.

Wellingtongo Dukearen kalea Blas de Oteroraino. Leku horretan bada erdibitzaile bat, hiru zatitan banatua: bertan, Acer platanoide batzuk daude, modu desberdinetan lurperatuta. Lurzoruaren kalitatea ertaina denez, lehen zatian egoera txarrean dauden 15 ale ordeztuko dituzte, eta beste 15 bigarren eta hirugarren ataletan.

 

Autobus geltokiaren ingurua: 20 parterre dira, ezberdinak tamainari zein bai formari dagokienez; gehien bat urkiak daude bertan, baina landaketa ostean asko sufritu dute. Horietako asko hil egin dira. Espezieak aldatzea proposatzen da, eta beste landare batzuk sartzea: Pseudotsuga menziensii edo izeiak, Abies pinsapo, Picea abies, Cedrus atlantica edo Atlasko zedroak, Alnus incana edo haltz zuriak, Liquidambar styracilua, Betula alba edo zurzuriak, eta Quercus palustris edo zingira-haritzak.

 

– Bastida plazaren ingurua: hasieran tamaina txikiko zuhaitzak jarri ziren, baina beste espezie batzuk jartzea pentsatu da, eremua behar bezala estali ahal izateko. Lurrak sakonean hobetzea da asmoa, landatzeko lurrak nahastuz eta hainbat espezie sartuz: Alnus incana, Acer platanoides edo astigar zorrotzak, Juglans nigra edo intxaurrondo beltzak, Cedrus atlantica edo zedroak, Carya illinoinensis edo pekanondoa, eta Liriodendron tulipifera.

Zabalgana hiribidea eta Antoniareneko biribilgunea: hiribidetik hegoalderago dauden bi zatietan eta Antoniareneko biribilgunearen eremuan landatu nahi da. Hiribidean Sophora japonica espeziea landatuko da, dauden Sorbusekin nahastuz. Biribilgunean dauden zuhaitzen ordez Zelkova carpinifolia eta Fraxinus pennsylvanica (lizar amerikarrak) landatuko dira.

– Oto hiribidea: Oto hiribideko erdibitzaileko zenbait txorkotan ez dago zuhaitzik. Beste batzuetan ale lehorrak daude, edo etorkizun gutxikoak. Horregatik, klima-baldintza gogorragoei aurre egiteko moduko ezaugarri fisiologikoak dituzten espezieez ordeztuko dira, hala nola hurritzak, astigarrak eta zumarrak.

Share

Espazio Publikoak hiriko zuhaitzak indartuko ditu kalitatezko landaketekin, aleen garapena errazteko eta kaleei ingurumen-onurak emateko

Udalak 280.000 euro baino gehiago inbertituko ditu gutxienez hiriko hamar gunetan



Gasteizko Udaleko Mugikortasun eta Espazio Publiko Sailak 282.139,87 euro inbertituko ditu aurtengo neguan auzoetako zuhaitzak hobetzeko. Tokiko Gobernu Batzarrak gaur goizean onartu du lan horiek kontratatzeko espedientea, hiriko hamar gunetan zuhaitzak landatzeko.

“Gure hiriari zuhaitz gehiago gehitu nahi dizkiogu, gaur egun 112.000 unitate baino gehiago baititu. Baina, era berean, eta hau oso garrantzitsua da, ale berri horiek kalitate handiagokoak izatea nahi dugu, garatu daitezela eta tamaina handiagoa har dezatela, eta horrela ingurumen-onura handiagoak ekar diezazkiotela hiriari “, azaldu du Raimundo Ruiz de Escudero Mugikortasun eta Espazio Publikoko zinegotziak.

Ildo horretan, planteamenduak bikaintasuna bilatzen du: zuhaitz-etorbide handiak lortzea, horien onurak onargarriak eta eraginkorrak izan daitezen. Horregatik, enpresa esleipendunak ondo prestatu beharko du lurra, kalitatezko zuhaitzak landatu beharko ditu eta mantentze-lanez arduratu beharko du 2 urtez. Udalak landatuko diren ingururako egokiak diren espezieak aukeratuko ditu.

Aurreikusitako jarduketen ardatzak honako hauek dira: Elorriagako Atea, Salburuako aerodromoa, Estrasburgo etorbidea, Lakua Arriaga ingurua, Ibaiondo kiroldegia, Wellington Dukearen etorbidea, Autobus Geltokia, Bastida plaza, Zabalgana etorbidea Antoniako biribilguneraino eta Oto hiribidea. Lanek bi hilabete eta erdiko epea izango dute.

 

Share

Aurrera jarraitzen dute Gasteizko markesina digital berriak jartzeko lanek

Gasteizko markesina digital berriak jartzeko lanak aurrera doaz. Gaur goizean, Mugikortasunaren eta Espazio Publikoaren zinegotzi Raimundo Ruiz de Escuderok geltokien hedapenaren bilakaera ezagutu ahal izan du JCDecaux enpresaren ordezkaritzarekin batera, enpresa horretako zuzendari nagusi Carlos Barón buru zelarik.

Orotara tamaina handiko pantaila digitala duten 20 markesina berri jartzen ari dira Gasteizen, baita geralekuko 47 argibide-gune berri ere.

“Aukera modernoagoak, erosoagoak eta irisgarriagoak dira, eta informazio gehiago eskaintzen dute. Azken batean, hiri teknologiko eta konektatuago baterantz goaz, etorkizuneko hirirantz”, esan du zinegotziak.

Dagoeneko markesina digital hauek muntatu dira:


Gasteiz hiribidea, 85

Gasteiz hiribidea, 70

Gasteiz hiribidea, 73

Gasteiz hiribidea, 54

Tomas Zumarraga Dohatsua / Argentina

Adriano VI.a, 1


Asteazkenean, hilak 22, beste bat muntatuko da Jesus Maria Leizaola plazan. Eta datozen asteetan beste batzuk muntatzen joango dira, progresiboki.

Horrelako kontratuetan ohikoa denez, enpresa adjudikaziodunak inbertsio handia egin beharko du hiri-altzarietan (ia bost milioi euro), eta Udalari kanon bat ordainduko dio espazio publikoa erabiltzeagatik. Munta handiko kontratua da: 28 milioi eurotik gora 13 urtetan, inbertsioa eta altzarien mantentzea barne.

Udalak markesinen jatorrizko diseinuarekin jarraitzea erabaki du —Patxi Mangado arkitekto nafarrak egin zuen—, dagoeneko Gasteizekin identifikatzen den diseinu modernoa eta funtzionala dela iritzita.

20 markesina berriek tamaina handiko LCD pantaila digital bana izango dute (82 hazbeteraino); pantailek eguneko 24 orduetan eta asteko 7 egunetan funtzionatuko dute. Erasoen kontrako eta eguraldi txarretik babesteko elementuak ere izango dituzte. Konektagarritasunari dagokionez, Ethernet, 3G/4G, Bluetooth, Wifi eta NFC teknologiak baliatzeko prestatuta egongo dira.

Orobat, geralekuko 47 argibide-gune (TFT pantailekikoak) instalatzea barne hartzen du kontratuak, eta kontratuan sartutako altzari guztien metalezko egitura eguneratzea. Gaur egun, honako elementu hauek daude Gasteizen: 222 markesina hirian eta industrialdeetan, eta beste 28, kontzejuetan; 178 MUPI; 10 komun; 20 erloju-termometro; 96 zutoin, autobus geralekuetan; 17 zutoin, taxi geralekuetan, 53 informazio-panel, eta geralekuko 98 argibide-gune.

 

Share

Astelehenetik aurrera MUGI eta BARIK txartelekin ordaindu ahalko da Tuvisako autobusetan

Datorren astelehenetik aurrera, irailak 20, MUGI eta BARIK txartelekin ordaindu ahal izango da TUVISAko autobusetan. Txartel horiek udalaren garraio sozietateak kudeatutako eguneko eta gaueko linea konbentzionaletan bidaiatzeko balioko dute.

“Urrats berri bat eman dugu TUVISAren elkarreragingarritasunari dagokionez. Aurrerapauso garrantzitsua da, eta aurrera egiten jarraituko dugu garraio publikoa herritarrentzat erakargarriagoa izan dadin” azaldu du Tuvisako lehendakari eta eta Mugikortasunaren eta Espazio Publikoaren zinegotzi Raimundo Ruiz de Escuderok.

MUGI eta BARIK txartelak txartel anonimo gisa erabiliko dira TUVISAren autobusetan. Bidaiariek familia ugarien FN20 eta FN50 taldeentzako dauden tarifa hobaridunak baliatzerik izango dute. Gainerako erabiltzaileek BAT txartel orokorraren tarifa ordainduko dute – autobus-aldaketarako eskubiderik gabe–, eta horrenbestez nabarmen merkatuko zaie tarifa esku-dirutan ordaintzearekin alderatuta.

Share