Prentsa Oharren banner

Gasteizko Udalak eta Renfek hitzarmen bat sinatu dute eta deskontuak eta ekintza bereziak izango dira biltzar-turismoa sustatzeko

 

  • Gasteizera biltzar edo ekitaldietan parte hartzera datozenentzat abantaila bereziak hartzen ditu barne hitzarmenak, eta Arabako hiriburuaren irudia sustatzen du

Gasteizko Udalak eta Renfek lankidetza-hitzarmena izenpetu dute, hiria elkarrekin sustatzeko trena garraiobide gisa erabilita. Lehen alkateorde eta Ekonomia Sustapenerako zinegotzi Maider Etxebarriak eta Renfe Viajeroren zuzendari nagusi Sonia Araujok izenpetu duten hitzarmen honek deskontu eta ekintza bereziak  ditu biltzarretako eta asteburuetako turismoa sustatzeko.

“Akordio garrantzitsua da Gasteizen marka turista nazionalen eta biltzar eta ekitaldien sustatzaileen artean zabaltzeko.  Gainera, gu bisitatzeko garraiabidea gisa trena erabiltzea bultzatzen du; udalak bat egiten du bidaiatzeko modu iraunkor horrekin eta sustatzen jarraituko du” adierazi du Maider Etxebarriak.

Renfek Ave/distantzia luzeko tren guztietan une horretan dauden prezioen % 30eko deskontua eskainiko die biltzar-turismoa zein Gasteizen egiten diren bestelako ekitaldiak sustatzeko egiten diren jardueretako parte-hartzaile guztiei.

Era berean, hitzarmen honen baitan, Renfek Gasteizen irudia zabalduko du Ave/distantzia luzeko trenen buruetan eta promozio-bideoetan. Horretaz gain, autosalmentako makinetan, txarteletan, Renferen webgunean eta Renfek kudeatutako sare sozialetan ere sustatuko du Gasteiz.

Bestalde, Udalak konpromisoa hartzen du Renferen zerbitzuak lurreko garraiobide ofizial gisa sustatzeko eta zabaltzeko bai bere webgunean bai bi elkarteen lankidetzan egiten diren azoka eta biltzarretan. Gainera, + renfe fidelizazio-programari buruzko informazioa emango die bezeroei eta ohiko hedabide ekintzetan zabalduko.

Azkenik, garraio enpresak eta Gasteizko Udalak Renfe Viajes-en bitartez turismo-paketeen ( trena + sarrera + hotela) sustapen eta salmenta egiteko aukera landuko dute, eskaintza konbinatu bat definitu eta zehazte aldera.

 

Share

190.000 euroko inbertsioa Gasteizko 13 kaletan zoladura sendotu eta konpontzeko

Gasteizko Udalak hainbat kaletako zoladura sendotu eta zuloak betetzeko lanak egingo ditu ia 190.000 euroko inbertsioarekin. Tokiko Gobernu Batzarrak gaur goizean onetsi du lan horietarako kontratua, zeina Mugikortasunaren eta Espazio Publikoaren Sailak landu baitu; orotara 13 kaletan egingo dira lanak.

Esku-hartze horretaz gain, 4 milioi euroko inbertsioa eskatuko duen plan bat iragarri zen joan den astean, hiriko disuasio-aparkalekuetan sakoneko asfaltatzeak eta hobekuntzak egiteko.

Gaur lizitatu den kontratuaren barruko lanak egiteko hilabeteko epea emango da, eta zenbait alderditako zoladura eraberrituko da horren bitartez, garbituz eta zoladura berria jarriz. Kale hauetako gune zehatzetan egingo dira lanak:

Adriano VI.a
Argentina
Tomas Zumarraga Dohatsua
Serafín Ajuria Margolaria
Amurrio
Agirrelanda
Mexiko
Jose Atxotegi
Florida
Ayala Kantzilerra
Manuel Iradier
Jose Mardones
Jose Lejarreta

 

 

Share

ONCE erakundearekin hitzarmena sinatzea onetsi du Udalak, informazio- eta sentsibilizazio- ekintzak garatzeko

Gasteizko Udalaren eta ONCE erakundearen arteko lankidetza-hitzarmena onetsi du Tokiko Gobernu Batzarrak, elkarrekin sustatzen dituzten informazio- eta sentsibilizazio- ekintzak garatzeko. Gaurko hitzarmena tarteko, 8.598 euroko laguntza emango du udalak hainbat ekimen gauzatzeko, bai ekitaldi finkatuak, Kriskitin Lasterketa esaterako, bai ekimen berriak, mindfulness lantegiak, esaterako.

Hitzarmen hau Gasteizko udalak arlo soziosanitarioko elkarte eta entitateekin dituen lankidetza-akordio multzoaren baitakoa da. 2021eko aurrekontuan indarrean jarri zenetik arlo honetako 19 hitzarmen onetsi dira, izan ere, aurrekontuetan lehentasunezko esku-hartze gisa ezarrita daude osasuna babesteko politikak.

Covid-19aren ondorioz aldatu egin behar izan da Gasteizko Udalaren eta ONCE erakundearen arteko lankidetza-hitzarmenean aurreikusitako jardueretako batzuk (beste erakunde batzuekin ere hala gertatu da). Adibidez, Kriskitin  Lasterketa birtualki egitea proposatzen da (iaz ere horrela egin zen) eta programako  Mindulness lantegi berriek nork bere burua zaintzea eta pandemiak eragindako emozioak kudeatzea dute xede. Era berean, bestelako jarduera batzuk ere barne hartzen ditu lankidetza-hitzarmenak: lan-jardunaldiak, afiliatuekiko topaketak eta informazio-hitzaldiak. 2021eko lehen lauhilekoan antolatutako 15 informazio-hitzaldietan mila parte-hartzailetik gora izan dira.

Share

Mendizorrotza, Salburua eta San Andreseko hiru ontzitara zabaldu du Udalak igerilekuak kautelaz ixteko neurria

Beste hiru igerileku-ontzi itxi ditu gaur goizean Gasteizko Udalak, kautelaz, parametro mikrobiologikoetan maila irregularrak antzeman direlarik. Hain zuzen ere, Mendizorrotzeko igerileku estalietako ontzi txikia, Salburuko gizarte-etxeko igerilekuetako ontzi handia eta San Andres kiroldegiko igerilekuetako ontzi txikia. Atzo itxi zinei gehitu zaizkie hiru horiek, hots, Aldabeko gizarte-etxeko igerilekuei eta Ibaiondoko gizarte-etxeko igeriketa-ontziari. Kasu guztietan, pseudomona aeruginosa mikroorganismoaren neurketan agertu dira ohiz kanpoko balioak, eta, igerilekuen araudi tekniko-sanitarioa betetze aldera, itxi egin behar izan dira igerileku horiek, balioak normaldu arte.

Hiru kasu berri horiek detektatu direlarik, neurri zuzentzaile egokiak aplikatuko dira, uraren kalitatearen parametro normalak erdiesteko. Neurri horien ondorioz igerilekuak berriro irekitzeko aukera izan bezain laster emango du Udalak horren berri.

 

 

Share

Udalak eta Euskaltzaindiak berretsi egin dute Gasteizen euskararen erabilera sustatzeko lankidetza-hitzarmena

 

Hitzarmenak bere baitan hartzen du gure udalerriko toponimia historikoa aztertzeko Elena Martínez de Madina egiten ari den lana. Jada Arratzuko seriea amaitu du ikerlariak.

 

Gasteizko Udalak eta Euskaltzaindiak berriki berretsi duten lankidetza-hitzarmena aurkeztu dute gaur goizean, bai eta Gasteizko udalerriko toponimia historikoaren saileko beste liburuki bat ere, hain zuzen Gasteizko toponimia. Arratzua III izenekoa. Liburukia aurkezteko prentsaurrekoan parte hartu dute Iñaki Gurtubai Gasteizko alkateorde eta Euskarako zinegotziak, Roberto González de Viñaspre euskaltzain oso eta Euskaltzaindiaren Arabako ordezkariak, eta Elena Martínez de Madina ikerlari eta euskaltzain urgazleak.

Elena Martínez de Madinak eginiko ikerlanak Gasteizko udalerri osoko toponimia historiko eta gaur egungoa aztertzen du, hots, hiria bera eta 63 herri. 

Arratzuko merindadearen ohiko toponimiak aztertzen dituen liburuki honekin amaitzen da berari eskainitako hiru aleko seriea. Oraingo lan honetan zazpi herri aztertu dira: Ilarratza, Jungitu, Lubinau, Matauku, Oreitia, Uribarri Arratzua eta Zerio.

Lankidetza-hitzarmena Udalarekin

Gasteizko Udalak eta Euskaltzaindiak toponimia-ikerkuntzako lanaren aurkezpena urteko lankidetza-hitzarmena sinatzeko baliatu dute. Hitzarmen berriaren eskutik, hirian euskara sustatzen ahaleginduko da Udala, Euskaltzaindiaren eskutik.

Hitzarmen berriaren bidez, Udalak 63.000 euro emango dizkio Euskararen Akademiari, urte osoan kultur zabalkunderako jarduerak, ikastaroak eta hitzaldiak egin ditzan. Horrez gain, Euskaltzaindiak euskararekin lotutako gaietan aholku emango die Udalari eta udal-zerbitzuei. Gainera, hirian hizkuntza babesten, zaintzen eta sustatzen jarraituko du Akademiak. Gasteizko alkateorde eta Euskarako zinegotzi Iñaki Gurtubaik eskertu egin dio Euskaltzaindiari euskararen alde egiten duen guztia, eta berretsi egin du Udalak euskararekiko duen konpromisoa.

Share

Gasteizko Udalak beste urrats bat egin du telelana ezartzeko bidean

 

  • Telelanaren proiektua onetsi delarik, esperientzia pilotu bat abiaraziko da, 40 pertsonekin

 

Tokiko Gobernu Batzarrak Gasteizko Udalaren telelan-proiektua onetsi du gaur goizean. Erreferentziazko agiri horrek informazio- eta komunikazio-teknologiek ahalbidetzen dituzten lan-modalitate ez-presentzialei buruz Udalak eman dituen xedapen guztiak biltzen ditu. Pandemiak eragindako egoerari aurre egiteko azken urtean garatu diren esperientzia puntualetatik harago, telelan-proiektuak sendotu egingo du lan-modalitate hori, zein esparru arautu batean baliatu ahal izango baita.

Udaleko langileen sindikatu-ordezkariekin aztertu ostean, telelanaren proiektua onesteak esperientzia pilotu bat abiarazteko aukera emango du. 40 langile arituko dira esperientzia horretan, betiere betetzen dituzten lanpostuak telelanerako aukera ematen dutenen artekoak. Lehen esperientzia hori irailean hasiko dela aurreikusten da, aurretiaz bertan parte hartzeko deialdia egingo delarik.

“Administrazio modernoek informazio- eta komunikazio-teknologien alde egin behar dute nahitaez. Teknologia berri horiek eskaintzen dizkiguten aurrerapenen artean telelana dago, zeinak abantailak ematen baitizkie langileei, Udalari berari, eta herritarrei oro har. Azken urtean jauzi handia egin dugu lan-modalitate ez-presentzialen alorrean. Orain telelan egonkorra ezartzeko bidean beste urrats bat egiteko egoeran gaude; izan ere, telelana garapen-formula iraunkor gisa ulertzen dugun hirien artean gaude, betiere 2030 agendaren esparruan ”; horra zer esan duen alkateorde eta Giza-Baliabideen Saileko zinegotzi Iñaki Gurtubaik.

Urruneko lanean aritu ahal izateko, langileek hala jarduteko ezagutza informatiko eta telematiko nahikoak izan behar dira, Udalak xedatutako komunikazio-sistemak izan behar dituzte telelanean arituko diren lekuetan, eta lan-segurtasunaren eta -osasunaren alorrean indarreko araudiak telelanari buruz ezarritako bete behar dute.

Horrez gain, telelanaren bidez garatu daitezkeen zereginak zerrendatu dira, esaterako proiektuak aztertu eta ebaluatzea, txostenak idaztea, aholkularitza, informazio-sistemen kudeaketa, informazio grafikoaren (marrazkiak, planoak, mapak…) tratamendua, itzulpengintza eta prozeduren mekanizazioa. Aldiz, ez dira telelanaren bidez egiteko modukoak, besteak beste, herritarrak artatzeko eta informazioa emateko lanpostuak, batez ere eskuz eta aurrez aurre egin beharrekoak, edo idazkaritza edo batez ere administratiboak direnak.

Hasiera batean bederen, gehienez ere urtebetez aritu ahal izango dira langileak telelanean, hartara saihestu egin nahi baitira deserrotze- edo isolamendu-egoerak, bai eta aurrez aurreko lan modalitatera itzultzeko zailtasunak. Telelanean aritzen direnek, asteko hiru egunez arituko dira, gehienez ere, urruneko lanean, eta gainerako bietan aurrez aurre, ohiko lanaldi eta ordutegi berberak beteta. Telelanean arituko direnek bere gain hartuko dute jarraipen sistematiko baten mende jartzeko konpromisoa, bai eta urtea amaitzean ebaluazioa egitekoa ere, hartara aztertzeko sistemaren onurak eta ezarritako helburuen betetze-maila. Udalak ordenagailu bat utzi ahal izango die telelanean arituko direnei, eta langileek Interneteko konexioa izan behar dute, beren lanpostuari dagozkien zereginetan aritu ahal izateko.

Telelanean aritzen direnek beren borondatez arituko dira, eta edozein unetan itzuli ahal izango dira lehengo egoerara; alabaina, administrazioak baimena berraztertu, eta horren ondorioz, telelanaren formula amaitu, aldatu do eteteko aukera izango du.

Gasteizko Udalaren telelan-proiektuak deskonexio digitalarekiko eskubidea aitortzen die –zehazten den disponibilitate-denboratik kanpo– horrela arituko diren langileei, halako moduan non errespetatu egingo baitira beren atseden- eta intimitate-tarteak, .

 

Share

Udalak Alaves animatzen du denboraldiaren azken txanpan

  • Hori dela eta, urdinez eta zuriz argiztatuko ditu hiriko zenbait eraikin enblematiko

 

Gasteizko Udalak bat egiten du Alavesen zaleekin Lehen Mailako Ligaren azken txanpa honetan, eta, hori dela eta, urdinez eta zuriz argiztatuko ditu Udaletxearen fatxada eta erlojua, Floridako kioskoa eta Arkupeko ibilbidearen bi zatiak, denboraldia amaitzeko falta diren partidak jokatzen dituen egunen bezperatik. Horretaz gain, Gasteizko taldearen koloreak dituen olana bat jarria du Udaletxearen fatxadan, eta han egongo da harik eta Ligako txapelketa amaitzen den arte.

Bihar (asteazkena), Gloriosoak Villarrealen aurka jokatuko du, 21:00etan, Mendizorrotzan; horrenbestez, Udalak lehenengoz argiztatuko ditu gorago aipatutako toki enblematikoak. Hala, Udalak Gasteizko zaleekin bat egiten du Deportivo Alavesek Lehen Mailan irautea lor dezan irrikan.

 

 

 

 

 

 

Share

Gasteizko Udalaren eta EHUko ordezkari nagusien arteko bilera

 

Gorka Urtaran Gasteizko alkateak eta Estíbaliz Canto Hezkuntza eta Kultura zinegotziak topaketa izan dute gaur goizean Eva Ferreira EHUko errektorearekin eta Manoli Igartua Arabako campuseko errektoreordearekin. Unibertsitateko zuzendaritza taldea berritu zenetik, ezaugarri horretako lehen harremana da bai errektore mailan, bai errektoreorde mailan.

 

Udalak unibertsitatearekin dituen elkarlaneko eremu desberdinak gainbegiratzeko balio izan du bilerak. Era berean, ahalduntzea eta prestakuntza moduko arloetara bideratutako etorkizuneko ekimen bateratuak arakatu dituzte. Gasteizek EHUrekin duen hitzarmen-markoak ekimen-aukera zabala eskaintzen du; esate baterako, udako ikastaroen moduko adibide finkatuak. Aipatutako lankidetzaren beste adibide batzuk dira farmakutsadurari edo eskola-bereizketa egoerari heltzeko egindako lanak. Elkarlan-lerroen artean, kirol-medikuntza arloko ikerketa ere nabarmentzen da.

 

“Euskal Herriko Unibertsitatea lehen mailako agentea da Gasteizko garapen sozialean, kulturalean eta ekonomikoan. Udalak eta EHUk beren indarrak batzen dituzten guztietan, hiria irabazle ateratzen da eta gure nahia lanean jarraitzea da Unibertsitateak egiten duen ekarpena bistaratzeko. Era berean, sinergia berriak sortu nahi ditugu herritarren onerako”, adierazi du Gorka Urtaran alkateak gaurko topaketaren ostean.

 

Antzeko hitzak adierazi ditu Eva Ferreira errektoreak ere. Haren esanetan, “historikoki, Gasteizko Udala eta Euskal Herriko Unibertsitatea elkarlan estuan aritu dira. EHU Arabako unibertsitatea da eta Gasteizko parte da, bertako eragile sozial eta kultural handienetako bat delako. Gauza asko partekatu ditugu Udalarekin eta proiektu berrietan ere elkarlanean jarraituko dugu gasteiztarren alde”.

Share

2021ean egitekoak diren kultur proiektu eta sendotutako ekitaldi eta jaialdietarako dirulaguntzak eskatzeko epea zabaldu da

Epea apirilaren 22an amaituko da

 

Gasteizko Udalak kultur proiektuei eta sendotutako ekitaldi eta jaialdiei laguntzeko dirulaguntza-deialdia argitaratu du gaur. “Pandemia gorabehera, 200.000 eurotan mantendu dugu laguntza-ildo honen zenbatekoa. Dirulaguntza horien bidez hiriko kultur eskaintza zabaltzen eta hobetzen lagunduko duten kulturaren arloko sustapen-, sorkuntza-, prestakuntza- eta zabalkunde-ekimenei laguntza eman nahi diegu. Horrela, tokiko ekoizpenaren eta sorkuntzaren aldeko apustua egiten dugu kulturarentzat oso zaila den une honetan”, adierazi du Estibaliz Cantok, Gasteizko Hezkuntza eta Kultura zinegotziak.

Bi kontzeptutarako emango dira dirulaguntzak. Lehena, hirian erreferente diren edo bertan kultura sustatzera bideratuta dauden ekimen, jaialdi eta egitarauak, edozein alorretakoak direlarik ere (arte eszenikoak, musika, ikus-entzunezkoak, letrak, folklorea, arte plastikoak edo beste), betiere kultur agente lokalek antolatu eta kudeatzen badituzte. 175.000 euroko zuzkidura ekonomikoa izango du kontzeptu honek. Dirulaguntzaren gehieneko zenbatekoa, proiektuko, 15.000 euro izango da.

Bigarrena, dinamizazio soziokulturalera, kulturartekotasuna sustatzera, bizitza kulturala bultzatzera, kultura integrazio eta gizarte-kohesiorako balio gisa garatzera, kulturaren alorrean garapen pertsonala garatzera (jakituria eta sormena sustatuz) eta abarretara zuzenduriko jarduera eta programak, betiere kultur agente lokalek antolatu eta kudeatzen badituzte. 25.000 euroko zuzkidura ekonomikoa izango du kontzeptu honek. Dirulaguntzaren gehieneko zenbatekoa, proiektuko, 4.000 euro izango da.

Lehiaketaren laburpena 2021eko martxoaren 22ko ALHAOn argitaratu da (32. zk). Eskabideak aurkezteko epea 2021eko apirilaren 22an amaituko da (egun hori barne).

Informazio gehiago

 

Share

Iraunkortasunerako Gobernu Lokalen Sarearen erabaki-organoetan sartu da Gasteizko Udala

ICLEIko batzorde betearazleko aholkulari izendatu dute Ana Oregi, eta Sarearen Europako Batzordeko bost ordezkarietako bat izango da

Iraunkortasunerako Gobernu Lokalen Sarearen erabaki-organoetan sartu berri da Gasteizko Udala. Izan ere, ICLEIren Batzorde Betearazleko iraunkortasun-konponbideen ikerketa urbanoaren arloko aholkulari izendatu dute Ana Oregi alkateordea, eta orobat izango da Sarearen Europako Batzordeko bost ordezkarietako bat.

Joan den astean aurkeztu ziren gobernu lokalen sare horren zuzendaritza-organoak hautatzeko prozesuaren emaitzak. 1990ean sortua, 1.700 kidetik gora biltzen ditu sareak, 100etik gora herrialdetakoak, hainbat arlotan proiektu berritzaileak garatzeko elkarlanean —biodibertsitateari eta ekosistemei buruzko zerbitzuak, klima-aldaketa arindu eta hartara egokitzea, energia, elikadura, azpiegiturak, kontratazioa, mugikortasuna eta ura, besteak beste—.

“Erakunde horrek pisu handia du nazioartean, eta estu lan egiten du Nazio Batuekin eta Europako hainbat erakunderekin, gobernu lokalen iritzia aintzat hartzen dela ziurtatzeko. Gainera, sare tematikoen eta proiektu zehatz oso interesgarrien bidez esperientziak trukatzeko aukera ematen du”, nabarmendu du Lurraldearen eta Klimaren aldeko Ekintzaren zinegotziak.

Share