Prentsa Oharren banner

Gasteizek hondakinak “baliabide bihurtzera” gonbidatuko du, klima-aldaketari aurre egiteko

Udalak sentsibilizazio-kanpaina berria abiatu du edukiontziak erabiltzearen onurak erakusteko

 

“Ez dago hondakinik, leku okerrean utzitako baliabideak baizik”. Ingurumen Plangintza eta Kudeaketa Zerbitzuak abiarazi duen sentsibilizazio-kanpaina berriaren leloetako bat da hori, zeinaren helburua baita herritarren artean birziklatzea sustatzea eta edukiontziak gehiago erabiltzea.

Arlo horretako zinegotzi arduradun César Fernández de Landak, Ecoembeseko tokiko eta erkidegoko kudeaketa zuzendari José Arrancudiagak eta Ecovidrioko zonako kudeatzaile Oscar Acedok aurkeztu dute gaur goizean kanpaina berria: bi kubo handitan banatutako zortzi panelek hondakinen bilketaren aurkia eta ifrentzua erakusten dute.

Andre Maria Zuriaren plazan, Floridako kioskoan, RENFEren geltokitik gertuko oinezkoen ibilbidean eta Etxauriko lorategietan (Erdi Aroko hirigunea) hartutako argazkiek agerian uzten dute nolako aldea dagoen eguneroko garbiketa egin aurreko eta ondoko irudien artean.  Hirian garbiketaz sentsibilizatzeko kanpainetan erabili ohi diren pertsonaia trokelatuen “kuadrillak” ere hartuko du parte kanpainan, denboraldia amaitu arte udal igerilekuetan jarriko baitira pertsonaiak. Kuboak, berriz, Loma Jeneralaren plazan eta Foru plazan jarriko dira abuztuaren hasierara arte.

“Udaletik herritarrei eskatzen diegu bat egin dezaten, birziklatze eta berrerabiltze ohiturak hobetu ditzaten, baina gure erantzukizuna ere gure gain hartzen dugu, gauzak erraztearren, edukiontzi guztiak irletan banatuz, paperontzi gehiago jarriz eta ekonomia zirkularreko proiektuak zein kanpainak sustatuz. Herritarren konpromisoa eskatzen dugu, zeina gure hirian argia baita aspalditik, eta ekonomia zirkularraren filosofia azpimarratzen dugu, hondakinei bigarren bizialdia ematearren“, nabarmendu du César Fernández de Landak.

Ecoembes eta  Ecovidrio enpresen laguntza du kanpainak.

Share

Udalak gezurtatu du Greenpeace-ren salaketa: “Gasteizko herritarrei ez zaie euro bakar bat ere kostatzen ontzien gaikako bilketa”

Ingurumen Plangintza eta Kudeaketa Saileko zinegotziak adierazi du papera, kartoia eta beira biltzearen 2019ko balantze ekonomikoa, Greenpeacek esandako 11,2 milioiko kostua izan ordez, 51.235 euroko superabita ekarri duela

 

Gaur goizean, Udalak gezurtatu ditu Greenpeacek pasa den astean jakitera eman zituen zenbait salaketa; horietan, zehazten zituen paperaren eta kartoiaren bilketa-zerbitzuaren zenbait kostu. “Zenbateko horiek okerrak dira, eta abiapuntua ez da zuzena. Gasteizen, ‘Gainerakoak’ frakzioan, % 20 dira ontziak, eta ez % 67, Greenpeacek esan duen moduan. Horri dagokionez, ozen esan behar dugu: gasteiztarrek argi izan behar dute euren zergetako euro bakar bat ere ez dela bideratzen ontzien gaikako bilketara. Izan ere, ontziak eta beira biltzeko sistemak finantzatu ditu frakzio horien kudeaketa osoa, eta superabita ekarri dio Gasteizi. Hau da, Ecoembes eta Ecovidrioren kontura ordaindu dira prozesuaren kostu guztiak”, azaldu du César Fernández de Landak.

Zinegotziak argi utzi duenez, erakunde gisa Greenpeaceri “errespeturik handiena diot. Hasiera-hasieratik txalotu eta sustengatu dut haren zeregina eta bere historia osoan kontzientziatzeko egin duten lana eta planeta hobea lortzeko eta gure planetari eraso egiten dioten jarrera eta ekintza guztiak salatzeko egiten duen borroka”. Hala eta guztiz ere, oposizioaren galderei erantzuteko, César Fernández de Landak banan-banan zuzendu ditu nazioarteko erakundeak prentsa-oharrean emandako datu okerrak.

Ildo horretan, gogorarazi duenez, Gasteizen “’Gainerakoak’ frakziotik (edukiontzi grisa), TMBren Gasteizko instalazioa gai da urtean 422 tona material birziklagarri bereizteko (sartzen denaren % 7 inguru); material horiek, azken birziklatzaileei igortzen zaizkie, eta haien truke Ecoembes eta Ecovidriok konpentsazio ekonomikoa ematen diote Gasteizko Udalari. Datu horrek, bakarrik, zalantzan jartzen du Gasteizekin lotuta egindako azterlan ekonomiko osoa. Papera, kartoia eta beira biltzearen ondoriozko 2019ko Gasteizko datu ekonomikoek, Greenpeacek esan zuen 11.2 milioiko kostua izan beharrean, 51.235 euroko superabita eman dute”.

 

Greenpeaceri zehapena jarri zaio edukiontziak papereztatzeagatik

Ingurumen Plangintza eta Kudeaketa Saileko zinegotziak azaldu duenez, halaber, “Udalak isuna jarri dio arestian Greenpeaceri, garbiketari buruzko ordenantzaren 148. artikulua ez betetzeagatik. Ordenantza betetzen ez duten kartelak zigortuko dira, arau-hauslea edozein dela ere, eta mezuak edozein direla ere”.

 

Share

Udalak kanpaina bat sortu du Gasteizko ostalariak egoera berrira egokitzeko egiten ari diren ahaleginari keinu bat egiteko eta herritarrak eramateko ontziak birziklatzera animatzeko

 

“Yo me comprometo. Har eta egin on” kanpainaren bidez ontzi konpostagarrien birziklatzea sustatu nahi da, azken asteetan ugaritu egin baita horien erabilera.

 

Osasun neurriak direla eta, ostalaritza sektoreak egoera berrira moldatu behar izan du, eta ugaritu egin dira “eramateko” zerbitzuak; horrek, berriz, herritarren ohiturak aldatzea ekarri du.

Udalak hiriko ostalaritza-establezimenduen ahalegina eta konpromisoa aitortu nahi izan du, baita aldaketetara egokitzeko ahalmena ere, baina beharrezkotzat jo du herritarrak sentsibilizatzea, kafea edo janaria eramateko ontziak zuzen birziklatzen ikas dezaten, egoki ez diren paperontzi edo edukiontzietara bota ordez. Horretarako, “Yo me comprometo. Har eta egin on” kanpaina jarri dute martxan. Ingurumen Plangintza eta Kudeaketako zinegotzi César Fernández de Landak eta Hondakinen Kudeaketarako Ataleko buru Joseba Sánchezek azaldu dituzte gaur goizean kanpainaren helburu nagusiak; kanpaina “oso puntuala da, eta guztiontzat berria den garai honetan sortutako behar berrien ondorio.

Udalak argi dauka zein ahalegin handia egiten ari diren hiriko establezimenduak osasun-larrialdira egokitzeko.  Horren erakusgarri, gero eta ohikoagoa da ontzi konpostagarriak erabiltzea, eragin txikiagoa dutenak eta birziklatzen errazagoak, baina herritarrek material horiek bereizten ikasi behar dute, eta gai organikoak biltzeko edukiontzi marroietara bota. Bestetik, birziklatzeari dagokionez Gasteizko gizartea heldua bada ere, oraindik bada salbuespenik, eta horiexek  nabarmentzen dira gehien; izan ere, kafe edalontziz edo eramateko janarirako ontziz gainezka dauden paperontziak ikus daitezke hiriko leku batzuetan. Ezin dugu atzerapausorik eman, eta kanpaina honen bidez ontzi horiek dagokien edukiontzira botatzeko beharra azpimarratu nahi dugu”.

Ikusizko kanpaina da, sare sozialen bidez zabaltzeko pentsatua. Ostalarien eta herritarren arteko elkarrizketa irudikatzen dute mezuek, konpromisoa hartzera gonbit eginez, “on egitera”, ostalariek berek egiten duten bezala: “Ni moldatu egin naiz, zure ondoan jarraitzeko… eta ni, birziklatzen jarraitzeko”; “Nire jatetxe kuttuna ontzi konpostagarrietara pasatu da… eta nik ontzi horiek birziklatzen ikasi dut”; “Nik kompromisoa hartzen dut tokian-tokikoarekin… Eta haiek konpromisoa hartzen dute bizikletaz egindako bidalketekin”.

Igor Salazarrek, berriz, pandemiak ostalaritza bete-betean jo duela nabarmendu du, “behin eta berriro egokitu behar izan duelako higiene eta osasun betebeharrei. Hala ere, sektoreak bidegabeki seinalatu dute, eta gure laguntza guztia behar du. Horregatik berresten dugu konfiantza izan behar dugula taberna eta jatetxeetako langileen profesionaltasunean, eta bezeroei erantzukizunez joka dezaten eskatzen diegu”. Merkataritza zinegotziak adierazi duenez, “sen oneko kontua da: maskara jantzi eta distantzia gordetzen dugun bezala, hondakinekin ere zuzen jokatu behar dugu”. Salazarrek gogorarazi du Ekonomia Sustapenaren Sailak datorren astean argitaratuko dituela ostalarientzako laguntzak, 600 euro lokal bakoitzeko.

“Yo me comprometo. Har eta egin on” (pdf)

 

 

 

 

Share

Alkateak eskerrak eman dizkie hiru garbitzaileri, etxebizitza batean sortutako sutea hedatzea eragozteagatik

Alkate Gorka Urtaranek eta Ingurumen Plangintza eta Kudeaketako zinegotzi César Fernández de Landak  Antonio Martín, José Luis Fernández eta Fernando Arija hartu dituzte gaur udaletxean, Garbiketa Zerbitzuko langile horiek hiriaren erdialdeko etxebizitza batean sortutako sutea hedatzea eragotzi baitzuten joan den irailaren 13an.

Zehazki, Foru eta Olagibel kaleen arteko etxebizitza batean gertatu zen. Handik hurbil FCC enpresaren zisterna-kamioi bat zegoen, eta harekin ari ziren hiru langileek eragindako fatxadara zein etxebizitzara ura isurtzeari ekin zioten berehala.

Suhiltzaileak agertu arte jarraitu zuten; haiek etxebizitzara igo eta sutea itzali zuten. Hiru langile horiei esker, sutea ez zen hedatu, eta etxebizitzan bizi zen pertsona bizirik atera zen. Pertsona horrek erredurak zituen beso batean eta aurpegian, eta kea arnasteak intoxikazioa eragin zion.

 

 

 

Share

(Audioz eguneratuta) Udalak 300 euroko isunak jarriko ditu bide publikoan maskarak eta eskularru higienikoak uzteagatik

Cesar Fernandez de Landaren adierazpenak

Udalak 300 euroko isunak jarriko ditu bide publikoan maskarak eta eskularru higienikoak uzteagatik. Hori iragarri du Ingurumen Plangintza eta Kudeaketaren zinegotzi César Fernández de Landak.

Maiatzaren hasieran jada jarri zuen abian kontzientziazio-kanpaina bat Udalak, horrelako hondakinak ugaltzen ari zirelako, eta orain isunak gogortzea erabaki da maskara eta eskularru higienikoei dagokienez.

Ingurumen Plangintza eta Kudeaketa Zerbitzua, besteak beste, espazio publikoak garbitu eta desinfektatzeaz arduratzen da, eta berriro eskatu die herritarrei garbiketa eta higiene neurriak zorrozteko eta bereziki eskularrurik eta maskararik ez botatzeko lurrera edo paperontzietara. Horrela, herritarrak oro har eta garbitzaileak berak kutsatzeko arriskutik babestu nahi dituzte.

Udalak gomendatzen du eskularruak eta maskarak norberaren etxeko zabor-poltsara botatzea, eta gero poltsa hori edukiontzira eramatea. Orobat gogorarazten du osasun-krisialdi honetan gure osasuna eta gure bizilagunena babestea guztiz lehentasunezkoa dela, eta guztion erantzukizuna.

Share